॥ नमो तस्स भगवतो अरहतो सम्मासम्बुद्धस्स॥
कमलाञ्जलि
कमलासन कमलापति पमथाधिप वजिरा,
युधदानव मनुजोरग भुजगासन पतिनं।
मकुटाहित मनिदीधिति भमरावलि भजितं,
पणमा’महं अनघं मुनि चरणामल कमलं॥
कमलालय सदि’सङ्कित कलमङ्गल रुचिरं,
जुतिरञ्जितं अभिनिज्जित सुभकञ्चन नलिनं।
जनिता चिर समये निज पितु भूपति नमितं,
पणमा’महं अनघं मुनि चरणामल कमलं॥
सरणागत रजनीपति दिनसेखर नमितं,
भजिताखिल जनपावनं अभिकङ्खित सुखदं।
वसुधातल सयमुग्गत सरसीरुह महितं,
पणमा’महं अनघं मुनि चरणामल कमलं॥
दिरदासन तरुपन्तिक घटितासनं अभयं,
विजयासन समधिट्ठित चतुरङ्गिक विरियं।
धरमानक सुरियेहनि विजितन्तक धजिनिं,
पणमा’महं अभिपातित नमुचिद्धज विभवं॥
सदयोदित पियभारति विजितन्तक समरं,
दसपारमि बलकम्पित सधराधर धरनिं।
गिरिमेखल वरवारन सिरसानत चरणं,
पणमा’महं अभिनन्दित सनरामर भुवनं॥
निखिलासव विगमे’नतिविमलीकत हदयं,
तदनन्तर विदिताखिल मतिगोचर विसयं।
विसयीकत भुवनत्तयं अतिलोकिय चरितं,
पणमा’महं अपराजितं अरहं मुनिं असमं॥
मुदुभारति मधुपासित नलिनोपम वदनं,
रुचिरायत नलिनीदल निभ लोचन युगलं।
उदयोदित रविमण्डल जलितामल निटिलं,
पणमा’मह अकुतोभयं अनघं मुनि पमुखं॥
असितम्बुद रुचिकुञ्चित मुदु कुन्तल ललितं,
भुवनोदर विततामित जुतिसञ्चय जलितं।
मदमोदित दिरदोपम गतिविब्भम रुचिरं,
पणमा’महं अमतन्दद मुनिपुङ्गवं असमं॥
करुणारस परिभावित सवणामत वचनं,
विरुदावलि सतघोसित यसपूरित भुवनं।
सुमनोहर वरलक्खण सिरिसञ्चय सदनं,
पणमा’महं उदितामल ससिमण्डल वदनं॥
विनयारह जनमानस कुमुदाकर ससिनं,
तसिनापग परिसोसन सतदीधिति तुलितं।
तमनासव मुनिसेवितं अपलोकित सुखदं,
पणमा’महं अनिकेतनं अखिलागति विगतं॥
सहिताखिल भयभेरवं अभयागत सरनं,
अजरामर सुखदायकं अनिराकत करुणं।
तमुपासक जनसेवित सुपतिट्ठित चरणं,
पणमा’महं अहितापहं अनघुत्तम चरणं॥
करुणामत रसपुरित वीमलाखिल हदयं,
विहितामित जनताहितं अनुकम्पित भुवनं।
भुवने सुतं अवनीपति सत सेवित चरणं,
पणमा’महं अनघं मुनिं अघनासन चतुरं॥
अरतीरति परिपीलित यतिमानस दमनं,
निजसासन विनिवारित पुथुतित्थिय समणं।
परवादिक जनताकत परिभासित खमनं,
पणमा’महं अतिदेवत वर गोतम समणं॥
सरणागत भयनासन वजिरालय पणिभं,
भवसागर पतितामित जनतारन निरतं।
सिरसावहं अमलञ्जलि पुटपङ्कज मकुलं,
पणमा’महं अखिललाय विगतं मुनिं अतुलं॥
विमलीकत जनमानस विगतासव भगवं,
भवपारग विभवामत सुखदायक सततं।
परमादर गरुगारव विनतं जिन पयतं,
पदपङ्कज रजसा मम समलङ्कुरु सिरसं॥
पवनाहत दुमपल्लवं इव नारत चपलं,
भवलालस मलिनीकतं अजितिन्द्रिय निवहं।
चिर सञ्चित दुरिताहतं अनिवारित तिमिसं,
विमलीकुरु करुणाभर सुतरं मम हदयं॥
अदये दयं अनये नयं अपि यो गुणं अगुणे,
अहिते हितं अकरो क्वचिद अपि केनचि नकतं।
सदये जिन सुनये गुणसदने तयि नितरं,
सुहिते हितचरिते’नघ रमते मम हदयं॥
भवसङ्कट पतितेनपि भवता चिर चरितं,
विसमे सम चरणं खलु दसपारमि भरणं।
सरतो’हनि सरतो निसि सुपिनेनपि सततं,
रमते जिन सुमते त्वयि सदयं मम हदयं॥
अतिदुद्ददं अददी भवं अतिदुक्करं अकरी।
अतिदुक्खमं अखमी वत करुणानिधि’रसमो,
इति ते गुणं अनघं मुनि सरतो मम हदयं,
रमते’हनि रमते निसि रमते त्वयि सततं॥
अतिदुच्चरं अचरी भवं अतिदुद्दमं अदमी,
अतिदुद्दयं अदयी वत सदयापर हदयो।
इति ते गुणं अनघं मुनि सरतो मम हदयं,
रमते’हनि रमते निसि रमते त्वयि सततं॥
अतिदुग्गमं अगमी भवं अतिदुज्जयं अजयी,
अतिदुस्सहं असही वत समुपेक्खित मनसो।
इति ते गुणं अनघं मुनि सरतो मम हदयं,
रमते’हनि रमते निसि रमते त्वयि सततं॥
अतिदारुन पलयानल सदिसानल जलिते,
निरये विनिपतितो चिरं अघतापित मनसो।
न सरिं सकिद अपि ते पित भजितुं पदनलिनं,
खम गोतम नरसारथि तमिदं मम खलितं॥
तिरियग्गत-गतियं चिरं अनवट्ठित चरितो,
अतिनिट्ठुर वधतज्जित भयकम्पित हदयो।
न सरिं सकिदपि ते पित भजितुं पदनलिनं,
खम गोतम पुरिसुत्तम तमिदं मम खलितं॥
परिदेवन निरतो चिरं अथ पेत्तिय विसये,
सुजिघच्छित सुपिपासित परिसोसित जठरे।
न सरिं सकिदपि ते पित भजितुं पदनलिनं,
खम गोतम दिपदुत्तम तमिदं मम खलितं॥
विवसो भुसं अघदूसित मनसासुर विसये,
जनितो घनतिमिरे चिरं अतिदुक्खित हदयो।
न सरिं सकिदपि ते पित भजितुं पदनलिनं,
खम गोतम वसिसत्तम तमिदं मम खलितं॥
मनसा चिर विहितं सरं अतिकिब्बिस चरितं,
समथेनथ सुविराजिय तं असञ्ञितं उपगो।
न सरिं सकिद अपि ते पित भजितुं पद नलिनं,
खम गोतम वसिपुङ्गव तमिदं मम खलितं॥
विजिगुच्छिय दुरितं निज वपुसा कतं अमितं,
तनु वज्जितं उपगो भवं इह भावित समथो।
न सरिं सकिदपि ते पित भजितुं पदनलिनं,
खम गोतम यतिकुञ्जर तमिदं मम खलितं॥
रतनत्तय रहिते भुस बहुलीकत दुरिते,
जनितो परविसये बुधजन निन्दिय चरिते।
न सरिं सकिदपि ते पित भजितुं पदनलिनं,
खम गोतम करुणानिधि तमिदं मम खलितं॥
जनितो यदि मनुजेसुपि विकलिन्द्रिय निवहो,
तनुना करचरणादिहि विकते’निह दुखितो।
न सरिं सकिदपि ते पित भजितुं पदनलिनं,
खम गोतम मतिसागर तमिदं मम खलितं॥
विधिनाहित मतिभावन रहितो तमपिहितो,
विसदेसुपि कुसलादिसु तथदस्सन विमुखो।
न सरिं सकिदपि ते पित भजितुं पदनलिनं,
खम गोतम नरकेसरि तमिदं मम खलितं॥
सुचिरेनपि भुवि दुल्लभं असमं खणं अलभं,
सनरामर जनताहित सुखदं मुनि जननं।
न सरिं सकिदपि ते पित भजितुं पदनलिनं,
खम गोतम वदतंवर तमिदं मम खलितं॥
निसितायुध वधसज्जित खळनिद्दय हदयो,
परहिंसन रुचि भिंसन यमसोदर सदिसो।
न सरिं सकिदपि ते पित भजितुं पदनलिनं,
खम गोतम मुनिसत्तम तमिदं मम खलितं॥
परसन्तक हरणे कतमति बञ्चन बहुलो,
घरसन्धिक परिपन्थिक सहसाकति निरतो।
न सरिं सकिदपि ते पित भजितुं पदनलिनं,
खम गोतम मुनिपुङ्गव तमिदं मम खलितं॥
नवयोब्बन मदगब्बित परिमुच्छित हदयो,
सुचिसज्जन विजिगुच्छिय परदारिक निरतो।
न सरिं सकिदपि ते पित भजितुं पदनलिनं,
खम गोतम करुणाभर तमिदं मम खलितं॥
मदिरासवरत नागरजन सन्तत भजितो,
गरुगारव हिरिदूरित तिरियग्गत चरितो।
न सरिं सकिदपि ते पित भजितुं पदनलिनं,
खम गोतम विहतासव तमिदं मम खलितं॥
सपितामह पपितामह निचितं धनं अमितं,
पितुसञ्चितमपि नासिय कितवो हतविभवो।
न सरिं सकिदपि ते पित भजितुं पदनलिनं,
खम गोतम विजितन्तक तमिदं मम खलितं॥
वितथालिक वचनो परपियसुञ्ञत करणो,
फरुसं भणं अतिनिप्फल बहुभासन निपुणो।
न सरिं सकिदपि ते पित भजितुं पदनलिनं,
खम गोतम भुवनेसुत तमिदं मम खलितं॥
परसम्पदं अभिझायन निरन्तर दुखितो,
नभिरज्झन परमो क्वचि फलदस्सन रहितो।
न सरिं सकिदपि ते पित भजितुं पदनलिनं,
खम गोतम गुणसागर तमिदं मम खलितं॥
भवतो भवं अपरापरं अयताचिरं इति मे,
वपुसा अथ वचसापि च मनसा कतं अमितं।
खम गोतम दुरितापह दुरितं बहुविहितं,
दद मे सिवपदं अच्चुतं अमतं भवविगतं॥
तिमिरावुत कुणपाकुल विजिगुच्छिय पवने,
जनिकासुचि जठरे बहु किमिसन्तति सदने।
असयिं भवगहणे चरं अहं अप्पटिसरणे,
सरनं भव भगवं मम भवनीरधि तरणे॥
बहि निक्खमं असकिं भगतिरियं पथ पतितो,
अगदङ्कर कत सल्लक सतखण्डित करणो।
अमरिं भवगहणे चरं अहं अप्पटिसरणे,
सरणं भव भगवं मम भवनीरधि तरने॥
पतितो बहि रतिपिल्लक तनुरामय मथितो,
वदितुं किमु विदितुम्पि च न सहं मतिरहितो।
अमरिं भवगहणे चरं अहं अप्पटिसरणे,
सरणं भव भगवं मम भवनीरधि तरणे॥
जनितो यदि सुखितो जनदयितो पियजनको,
पुथुको बहुविध-कीलननिरतो गदगहितो।
अमरिं भवगहणे चरं अहं अप्पटिसरणे,
सरणं भव भगवं मम भवनीरधि तरणे॥
तरुनोपि हि घरबन्धन गथितोमित विभवो,
सहसा गदगहितो पियभरियासुत वियुतो।
अमरिं भवगहणे चरं अहं अप्पटिसरणे,
सरणं भव भगवं मम भवनीरधि तरणे॥
अजरं तनुं अभिमञ्ञिय नवयोब्बन वसिको,
जरसा परिमथितो परं अननुट्ठित कुसलो।
अमरिं भवगहणे चरं अहं अप्पटिसरणे,
सरणं भव भगवं मम भवनीरधि तरणे॥
निरुजो धुवं अरुजं तनुं अभिमञ्ञिय समदो,
कुसलासय विमुखो भुसं अवसो गदनिहतो।
अमरिं भवगहणे चरं अहं अप्पटिसरणे,
सरणं भव भगवं मम भवनीरधि तरणे॥
पविचिन्तिय सकजीवितं अमरं धुवं अनिघं,
इति जीवितमदगब्बित मतिरुज्झित कुसलो।
अमरिं भवगहणे चरं अहं अप्पटिसरणे,
सरणं भव भगवं मम भवनीरधि तरणे॥
परहिंसन धनमोसन परदारिक निरतो,
धरनीपति गहितो बहु वधबन्धन निहतो।
अमरिं भवगहणे चरं अहं अप्पटिसरणे,
सरणं भव भगवं मम भवनीरधि तरणे॥
नरकोदक पतितो गिरितरुमत्थक गलितो,
मिगवाळक गहितो विसधर जातिहि डसितो।
अमरिं भवगहणे चरं अहं अप्पटिसरणे,
सरणं भव भगवं मम भवनीरधि तरणे॥
अभिचारक विधिकोपित निसिचारक गहितो,
सविसोदन सहसादन पभुतीहि च खलितो।
अमरिं भवगहणे चरं अहं अप्पटिसरणे,
सरणं भव भगवं मम भवनीरधि तरणे॥
सयमेवच सजनोपरि कुपितो मतिवियुतो,
सविसादन गलकन्तन पभुतामित खलितो।
अमरिं भवगहणे चरं अहं अप्पटिसरणे,
सरणं भव भगवं मम भवनीरधि तरणे॥
पितुपूजन निरतासय सुखितो पितुदयितो,
मरणेनच पितुनो भुसं अनुसोचन निरतो।
परुदिं चिरं अतिदुस्सह कसिरे भवगहणे,
सरणं भव भगवं मम भवनीरधि तरणे॥
समुपट्ठिय जनिकं निजं अभिवादन परमो,
मरणेनच जनिकायनुसरिता गुणमहिमं।
परुदिं चिरं अतिदुस्सह कसिरे भवगहणे,
सरणं भव भगवं मम भवनीरधि तरणे॥
गुरुदेवत पतिमानन परमो पियसुवचो,
समुपासितचरणो गुरुमरणेनतिदुखितो।
परुदिं चिरं अतिदुस्सह कसिरे भवगहणे,
सरणं भव भगवं मम भवनीरधि तरणे॥
घरमेधितं उपगोमितविभवो रतिबहुलो,
मरणे पियभरियासुतदुहितू’नतिकरुणं।
परुदिं चिरं अतिदुस्सह कसिरे भवगहणे,
सरणं भव भगवं मम भवनीरधि तरणे॥
पियपुब्बज सहजानुज भगिणिद्वय मरणे,
निज बन्धव-सख-सिस्सक मरणे प्यतिकरुणं।
परुदिं चिरं अतिदुस्सह कसिरे भवगहणे,
सरणं भव भगवं मम भवनीरधि तरणे॥
जगतीपति गहणा रिपुजनतक्कर हरणा,
सरितोदक वहणा पुथुजलितानल दहणा।
परुदिं हतविभवो चिरमिह दुग्गतिगहणे,
सरणं भव भगवं मम भवनीरधि तरणे॥
अतिदुग्गम विसमाकुल भवसङ्कट पतिते,
ब्यसनं चिरमिति दुस्सहं अनुभूयपि विमितं।
न जहे सुखलववञ्चितहदयो भवतसिनं,
तमपाकुरु करुणानिधि तसिनं मम कसिणं॥
जननावधि मरणं विय मरणावधि जननं,
उभयेनपि भयमेवहि भवतो मम नियतं।
सिवमेवच जननावधि मरणावधि रहितं,
दद मे सिवं अमतन्दद तं अनासव भगवं॥
चिरदिक्खितमपि मे मनं अनिवारित तसिनं,
भवतो भव रतिपीलितं अहहो कलिघटितं!
तमतो पित भयतो मममव मे भव सरणं,
भगवं पटिसरणं मम भवनीरधि तरणं॥