९. आटानाटियसुत्तवण्णना

२७६.कस्मा पनेत्थ वेस्सवणो एव कथेसि, न इतरेसु यो कोचीति? तत्थ कारणं दस्सेतुं ‘‘किञ्‍चापी’’तिआदि वुत्तं। विस्सासिको अभिण्हं उपसङ्कमनेन। ब्यत्तोति विसारदो, तञ्‍चस्स वेय्यत्तियं सुट्ठु सिक्खितभावेनाति आह ‘‘सुसिक्खितो’’ति। मनुस्सेसु विय हि देवेसुपि कोचिदेव पुरिमजातिपरिचयेन सुसिक्खितो होति, तत्रापि कोचिदेव यथाधिप्पेतमत्थं वत्तुं समत्थो परिपुण्णपदब्यञ्‍जनाय पोरिया वाचाय समन्‍नागतो। ‘‘महेसक्खा’’ति इमस्स अत्थवचनं ‘‘आनुभावसम्पन्‍ना’’ति, महेसक्खाति वा महापरिवाराति अत्थो। पाणातिपाते आदीनवदस्सनेनेव तं विपरियायतो ततो वेरमणियं आनिसंसो पाकटो होतीति ‘‘आदीनवं दस्सेत्वा’’ इच्‍चेव वुत्तं। तेसु सेनासनेसूति यानि ‘‘अरञ्‍ञवनप्पत्थानी’’तिआदिना (म॰ नि॰ १.३४-४५) वुत्तानि भिक्खूनं वसनट्ठानभूतानि अरञ्‍ञायतनानि, तेसु भिक्खूहि सयितब्बतो, आसितब्बतो च सेनासनसञ्‍ञितेसु। निबद्धवासिनोति रुक्खपब्बतपटिबद्धेसु विमानेसु निच्‍चवासिताय निबद्धवासिनो। बद्धत्ताति गाथाभावेन गन्थितत्ता सम्बन्धितत्ता।

‘‘उग्गण्हातु भन्ते भगवा’’ति अत्तना वुच्‍चमानं परित्तं भगवन्तं उग्गण्हापेतुकामो वेस्सवणो अवोचाति अधिप्पायेन चोदको ‘‘किं पन भगवतो अप्पच्‍चक्खधम्मो नाम अत्थी’’ति चोदेसि। आचरियो सब्बत्थ अप्पटिहतञाणचारस्स भगवतो न किञ्‍चि अप्पच्‍चक्खन्ति दस्सेन्तो ‘‘नत्थी’’ति वत्वा ‘‘उग्गण्हातु भन्ते भगवा’’ति वदतो वेस्सवणस्स अधिप्पायं विवरन्तो ‘‘ओकासकरणत्थ’’न्तिआदिमाह। यथा हि पञ्‍चसिखो गन्धब्बदेवपुत्तो देवानं तावतिंसानं, ब्रह्मुनो च सनङ्कुमारस्स सम्मुखा अत्तनो यथासुतं धम्मं भगवतो सन्तिकं उपगन्त्वा पवेदेति, एवमयम्पि महाराजा इतरेहि सद्धिं आटानाटनगरे गाथावसेन बन्धितं परित्तं भगवतो पवेदेतुं ओकासं कारेन्तो ‘‘उग्गण्हातु भन्ते भगवा’’ति आह, न नं तस्स परियापुणने नियोजेन्तो। तस्मा उग्गण्हातूति यथिदं परित्तं मया पवेदितमत्तमेव हुत्वा चतुन्‍नं परिसानं चिरकालं हितावहं होति, एवं उद्धं आरक्खाय गण्हातु, सम्पटिच्छतूति अत्थो। सत्थु कथितेति सत्थु आरोचिते, चतुन्‍नं परिसानं सत्थु कथने वाति अत्थो। सुखविहारायाति यक्खादीहि अविहिंसाय लद्धब्बसुखविहाराय।

२७७.सत्तपिबुद्धा चक्खुमन्तो पञ्‍चहि चक्खूहि चक्खुमभावे विसेसाभावतो। तस्माति यस्मा चक्खुमभावो विय सब्बभूतानुकम्पितादयो सब्बेपि विसेसा सत्तन्‍नम्पि बुद्धानं साधारणा, तस्मा, गुणनेमित्तकानेव वा यस्मा बुद्धानं नामानि नाम, न लिङ्गिकावत्थिकयादिच्छकानि, तस्मा बुद्धानं गुणविसेसदीपनानि ‘‘चक्खुमन्तस्सा’’तिआदिना (दी॰ नि॰ ३.२७७) वुत्तानि एतानि एकेकस्स सत्त सत्त नामानि होन्ति। तेसं नामानं साधारणभावं अत्थवसेन योजेतब्बाति दस्सेतुं ‘‘सब्बेपी’’तिआदि वुत्तं। सब्बभूतानुकम्पिनोति अनञ्‍ञसाधारणमहाकरुणाय सब्बसत्तानं अनुकम्पिका। न्हातकिलेसत्ताति अट्ठङ्गिकेन अरियमग्गजलेन सपरसन्तानेसु निरवसेसतो धोतकिलेसमलत्ता। मारसेनापमद्दिनोति सपरिवारे पञ्‍चपि मारे पमद्दितवन्तो। वुसितवन्तोति मग्गब्रह्मचरियवासं, दसविधं अरियवासञ्‍च वुसितवन्तो। वुसितवन्तताय एव बाहितपापता वुत्ता होतीति ‘‘ब्राह्मणस्सा’’ति पदं अनामट्ठं। विमुत्ताति अनञ्‍ञसाधारणानं पञ्‍चन्‍नम्पि विमुत्तीनं वसेन निरवसेसतो मुत्ता। अङ्गतोति सरीरङ्गतो, ञाणङ्गतो च, द्वत्तिंसमहापुरिसलक्खण- (दी॰ नि॰ २.३३; ३.२००; म॰ नि॰ २.३८५) असीतिअनुब्यञ्‍जनेहि निक्खमनप्पभा, ब्यामप्पभा, केतुमालाउण्हीसप्पभा च सरीरङ्गतो निक्खमनकरस्मियो, यमकमहापाटिहारियादीसु उप्पज्‍जनकप्पभा ञाणङ्गतो निक्खमनकरस्मियो। न एतानेव ‘‘चक्खुमा’’तिआदिना (दी॰ नि॰ ३.२७७) वुत्तानि सत्त नामानि, अथ खो अञ्‍ञानिपि बहूनि अपरिमितानि नामानि। कथन्ति आह ‘‘असङ्ख्येय्यानि नामानि सगुणेन महेसिनोति वुत्त’’न्ति (ध॰ स॰ अट्ठ॰ १३१३; उदा॰ अट्ठ॰ ५३; पटि॰ अट्ठ॰ ७६)। केन वुत्तं? धम्मसेनापतिना।

यदि एवं कस्मा वेस्सवणो एतानेव गण्हीति आह ‘‘अत्तनो पाकटनामवसेना’’ति। खीणासवाजनाति अधिप्पेता। ते हि कम्मकिलेसेहि जातापि एवं न पुन जायिस्सन्तीति इमिना अत्थेन जना। यथाह ‘‘यो च कालघसो भूतो’’ति (जा॰ १.२.१९०) देसनासीसमत्तन्ति निदस्सनमत्तन्ति अत्थो, अवयवेन वा समुदायुपलक्खणमेतं। सति च पिसुणवाचप्पहाने फरुसवाचा पहीनाव होति, पगेव च मुसावादोति ‘‘अपिसुणा’’ इच्‍चेव वुत्ता। महत्ताति महा अत्ता सभावो एतेसन्ति महत्ता। तेनाह ‘‘महन्तभावं पत्ता’’ति। महन्ताति वा महा अन्ता, परिनिब्बानपरियोसानाति वुत्तं होति। महन्तेहि वा सीलादीहि समन्‍नागता। अयं ताव अट्ठकथायं आगतनयेन अत्थो। इतरेसं पन मतेन बुद्धादीहि अरियेहि महनीयतो पूजनीयतो महं नाम निब्बानं, महमन्तो एतेसन्ति महन्ता, निब्बानदिट्ठाति अत्थो। निस्सारदाति सारज्‍जरहिता, निब्भयाति अत्थो। तेनाह ‘‘विगतलोमहंसा’’ति।

हितन्ति हितचित्तं, सत्तानं हितेसीति अत्थो। यथाभूतं विपस्सिसुन्ति पञ्‍चुपादानक्खन्धेसु समुदयादितो याथावतो विविधेनाकारेन पस्सिंसु। ‘‘ये चापी’’ति पुब्बे पच्‍चत्तबहुवचनेन अनियमतो वुत्ते तेसम्पीति अत्थं सम्पदानबहुवचनवसेन नियमेत्वा ‘‘नमत्थू’’ति च पदं आनेत्वा योजेति यं तं-सद्दानं अब्यभिचारितसम्बन्धभावतो। विपस्सिंसु नमस्सन्तीति वा योजना। पठमगाथायाति ‘‘ये चापि निब्बुता लोके’’ति एवं वुत्तगाथाय। दुतियगाथायाति तदन्तरगाथाय। तत्थ देसनामुखमत्तन्ति इतरेसम्पि बुद्धानं नामग्गहणे पत्ते इमस्सेव भगवतो नामग्गहणं तथा देसनाय मुखमत्तं, तस्मा तेपि अत्थतो गहिता एवाति अधिप्पायो। तेनाह ‘‘अयम्पि ही’’तिआदि। तत्थ अयन्ति अयं गाथा। पुरिमयोजनायं तस्साति विसेसितब्बताय अभावतो ‘‘यन्ति निपातमत्त’’न्ति वुत्तं, इध पन ‘‘तस्स नमत्थू’’ति एवं सम्बन्धस्स च इच्छितत्ता ‘‘य’’न्ति नामपदं उपयोगेकवचनन्ति दस्सेन्तो ‘‘यं नमस्सन्ति गोतम’’न्ति आह।

२७८.‘‘यतो उग्गच्छति सूरियो’’तिआदिकं कस्मा आरद्धं? यं ये यक्खादयो सत्थु धम्मआणं, अत्तनो च राजाणं नादियन्ति, तेसं ‘‘इदञ्‍चिदञ्‍च निग्गहं करिस्सामा’’ति सावनं कातुकामा तत्थ तत्थ द्विसहस्सपरित्तदीपपरिवारेसु चतूसु महादीपेसु अत्तनो आणाय वत्तानं अत्तनो पुत्तानं, अट्ठवीसतिया यक्खसेनापतिआदीनञ्‍च सत्थरि पसादगारवबहुमानञ्‍च पवेदेत्वा निग्गहारहानं सन्तज्‍जनत्थं आरद्धं। तत्थ ‘‘यतो उग्गच्छती’’तिआदीसु ‘‘यतो ठानतो उदेती’’ति वुच्‍चति, कुतो पन ठानतो उदेतीति वुच्‍चति? पुब्बविदेहवासीनं ताव मज्झन्हिकट्ठाने ठितो जम्बुदीपवासीनं उदेतीति वुच्‍चति, उत्तरकुरुकानं पन ओग्गच्छतीति इमिना नयेन सेसदीपेसुपि सूरियस्स उग्गच्छनोग्गच्छनपरियायो वेदितब्बो। अयञ्‍च अत्थो हेट्ठा अग्गञ्‍ञसुत्तवण्णनायं (दी॰ नि॰ अट्ठ॰ ३.१२१) पकासितो एव। अदितिया पुत्तोति लोकसमुदाचारवसेन वुत्तं। लोकिया हि देवे अदितिया पुत्ता, असुरे अतिथिया पुत्ताति वदन्ति। आदिप्पनतो पन आदिच्‍चो, एकप्पहारेनेव तीसु दीपेसु आलोकविदंसनेन समुज्‍जलनतोति अत्थो। मण्डलीति एत्थ ई-कारो भुसत्थोति आह ‘‘महन्तं मण्डलं अस्साति मण्डली’’ति। महन्तं हिस्स विमानमण्डलं पञ्‍ञासयोजनायामवित्थारतो। ‘‘संवरीपिनिरुज्झती’’ति इमिनाव दिवसोपि जायतीति अयम्पि अत्थो वुत्तोति वेदितब्बो। रत्ति अन्तरधायतीति सिनेरुपच्छायालक्खणस्स अन्धकारस्स विगच्छनतो।

उदकरहदोति जलधि। ‘‘तस्मिं ठाने’’ति इदं पुरत्थिमसमुद्दस्स उपरिभागेन सूरियस्स गमनं सन्धाय वुत्तं। तथा हि जम्बुदीपे ठितानं पुरत्थिमसमुद्दतो सूरियो उग्गच्छन्तो विय उपट्ठाति। तेनाह ‘‘यतो उग्गच्छति सूरियो’’ति। समुद्दनट्ठेन अत्तनि पतितस्स सम्मदेव, सब्बसो च उन्दनट्ठेन किलेदनट्ठेन समुद्दो। समुद्दो हि किलेदनट्ठो रहदो। सारितोदकोति अनेकानि योजनसहस्सानि वित्थिण्णोदको, सरिता नदियो उदके एतस्साति वा सरितोदको।

सिनेरुपब्बतराजा चक्‍कवाळस्स वेमज्झे ठितो, तं पधानं कत्वा वत्तब्बन्ति अधिप्पायेन ‘‘इतोति सिनेरुतो’’ति वत्वा तथा पन दिसाववत्थानं अनवट्ठितन्ति ‘‘तेसं निसिन्‍नट्ठानतो वा’’ति वुत्तं। तेसन्ति चतुन्‍नं महाराजानं। निसिन्‍नट्ठानं आटानाटनगरं। तत्थ हि निसिन्‍ना ते इमं परित्तं बन्धिंसु। तेसं निसिन्‍नट्ठानतोति वा सत्थु सन्तिके तेसं निसिन्‍नट्ठानतो। उभयथापि सूरियस्स उदयट्ठाना पुरत्थिमा दिसा नाम होति। पुरिमपक्खंयेवेत्थ वण्णेन्ति। तेन वुत्तं ‘‘इतो सा पुरिमा दिसा’’ति। सूरियो, पन चन्दनक्खत्तादयो च सिनेरुं दक्खिणतो, चक्‍कवाळपब्बतञ्‍च वामतो कत्वा परिवत्तेन्ति। यत्थ च नेसं उग्गमनं पञ्‍ञायति, सा पुरत्थिमा दिसा। यत्थ ओक्‍कमनं पञ्‍ञायति, सा पच्छिमा दिसा। दक्खिणपस्से उत्तरा दिसा, वामपस्से दक्खिणा दिसाति चतुमहादीपवासीनं पच्‍चेकं सिनेरु उत्तरादिसायमेव, तस्मा अनवट्ठिता दिसाववत्थाति आह ‘‘इति नं आचिक्खति जनो’’ति। यं दिसन्ति यं पुरत्थिमदिसं यसस्सीति महापरिवारो। कोटिसतसहस्सपरिमाणा हि देवता अभिण्हं परिवारेन्ति। चन्दननागरुक्खादीसु ओसधितिणवनप्पतिसुगन्धानं अब्बनतो, तेहि दित्तभावूपगमनतो ‘‘गन्धब्बा’’ति लद्धनामानं चातुमहाराजिकदेवानं अधिपति भावतो। मे सुतन्ति एत्थ मेति निपातमत्तं। सुतन्ति विस्सुतन्ति अत्थो। अयञ्हेत्थ योजना – तस्स धतरट्ठमहाराजस्स पुत्तापि बहवो। कित्तका? असीति, दस एको च। एकनामा। कथं? इन्दनामा। ‘‘महप्फला’’ति च सुतं विस्सुतमेतं लोकेति।

२७९.येनपेता पवुच्‍चन्तीति एत्थ वचनसेसेन अत्थो वेदितब्बो, न यथारुतवसेनेवाति दस्सेन्तो ‘‘येन दिसाभागेन नीहरीयन्तूति वुच्‍चन्ती’’ति आह। डय्हन्तु वाति पेते सन्धाय वदति। छिज्‍जन्तु वा हत्थपादादिके पिसुणा पिट्ठिमंसिका। हञ्‍ञन्तु पाणातिपातिनोतिआदिका। पवुच्‍चन्तीति वा समुच्‍चन्ति, ‘‘अलं तेस’’न्ति समाचिनीयन्तीति अत्थो। एवञ्हि वचनसेसेन विना एव अत्थो सिद्धो होति। रहस्सङ्गन्ति बीजं सन्धाय वदति।

२८०.यस्मिं दिसाभागे सूरियो अत्थं गच्छतीति एत्थ ‘‘यतो ठानतो उदेती’’ति एत्थ वुत्तनयानुसारेन अत्थो वेदितब्बो।

२८१.येन दिसाभागेन उत्तरकुरु रम्मो अवट्ठितो, इतो सा उत्तरा दिसाति योजना । महानेरूति महन्तो, महनीयो च नेरुसङ्खातो पब्बतो। तेनाह ‘‘महासिनेरु पब्बतराजा’’ति। रजतमयं। तथा हि तस्स पभाय अज्झोत्थतं तस्सं दिसायं समुद्दोदकं खीरं विय पञ्‍ञायति। मणिमयन्ति इन्दनीलमयं। तथा हि दक्खिणदिसाय समुद्दोदकं येभुय्येन नीलवण्णं हुत्वा पञ्‍ञायति, तथा आकासं। मनुस्सा जायन्ति। कथं जायन्ति? अममा अपरिग्गहाति योजना। ममत्तविरहिताति ‘‘इदं मम इदं ममा’’ति ममङ्कारविरहिताति अधिप्पायो। यदि तेसं ‘‘अयं मय्हं भरिया’’ति परिग्गहो नत्थि, ‘‘अयं मे माता, अयं भगिनी’’ति एवरूपा इध विय मरियादापि न सिया मातुआदिभावस्स अजाननतोति चोदनं सन्धायाह ‘‘मातरं वा’’तिआदि। छन्दरागो नुप्पज्‍जतीति एत्थ ‘‘धम्मतासिद्धस्स सीलस्स आनुभावेन पुत्ते दिट्ठमत्ते एव मातु थनतो थञ्‍ञं पग्घरति, तेन सञ्‍ञाणेन नेसं मातरि पुत्तस्स मातुसञ्‍ञा, मातु च पुत्ते पुत्तसञ्‍ञा पच्‍चुपट्ठिता’’ति केचि।

नङ्गलाति लिङ्गविपल्‍लासेन वुत्तन्ति आह ‘‘नङ्गलानिपी’’ति। अकट्ठेति अकसिते अकतकसिकम्मे।

तण्डुलाव तस्स फलन्ति सत्तानं पुञ्‍ञानुभावहेतुका थुसादिअभावेन तण्डुला एव तस्स सालिस्स फलं। तुण्डिकिरन्ति पचनभाजनस्स नामन्ति वुत्तं ‘‘उक्खलिय’’न्ति। आकिरित्वाति तण्डुलानि पक्खिपित्वा। निद्धूमङ्गारेनाति धूमङ्गाररहितेन केवलेन अग्गिना। जोतिकपासाणतो अग्गिम्हि उट्ठहन्ते कुतो धूमङ्गारानं सम्भवो। भोजनन्ति ओदनमेवाधिप्पेतन्ति ‘‘भोजनमेवा’’ति अवधारणं कत्वा तेन निवत्तेतब्बं दस्सेन्तो ‘‘अञ्‍ञो सूपो वा ब्यञ्‍जनं वा न होती’’ति आह। यदि एवं रसविसेसयुत्तो तेसं आहारो न होतीति? नोति दस्सेन्तो ‘‘भुञ्‍जन्तानं…पे॰… रसो होती’’ति आह। मच्छरियचित्तं नाम न होतीति धम्मतासिद्धस्स सीलस्स आनुभावेन। तथा हि ते कत्थचिपि अममा परिग्गहाव हुत्वा वसन्ति।

अपिच तत्थ उत्तरकुरुकानं पुञ्‍ञानुभावसिद्धो अयम्पि विसेसो वेदितब्बो – तत्थ किर तेसु तेसु पदेसेसु घनचितपत्तसञ्छन्‍नसाखापसाखा कूटागारूपमा मनोरमा रुक्खा तेसं मनुस्सानं निवेसनकिच्‍चं साधेन्ति, यत्थ सुखं निवसन्ति, अञ्‍ञेपि तत्थ रुक्खा सुजाता सब्बदापि पुप्फितग्गा तिट्ठन्ति, जलासयापि विकसितकमलकुवलयपुण्डरीकसोगन्धिकादिपुप्फसञ्छन्‍ना सब्बकालं परमसुगन्धं समन्ततो पवायन्ता तिट्ठन्ति। सरीरम्पि तेसं अतिदीघतादिदोसरहितं आरोहपरिणाहसम्पन्‍नं जराय अनभिभूतत्ता वलिपलितादिदोसरहितं यावतायुकं अपरिक्खीणजवबलपरक्‍कमसोभमेव हुत्वा तिट्ठति। अनुट्ठानफलूपजीविताय न च नेसं कसिवाणिज्‍जादिवसेन, आहारपरियेट्ठिवसेन दुक्खं अत्थि, ततो एव न दासदासिकम्मकरादिपरिग्गहो अत्थि, न च तत्थ सीतुण्हडंसमकसवातातपसरीसपवाळादिपरिस्सयो अत्थि। यथा नामेत्थ गिम्हानं पच्छिमे मासे पच्‍चूसवेलायं समसीतुण्हउतु होति, एवमेव सब्बकालं समसीतुण्होव उतु होति, न च तेसं कोचि उपघातो, विहेसा वा उप्पज्‍जति। अकट्ठपाकिममेव सालिं अकणं अथुसं सुगन्धं तण्डुलफलं परिभुञ्‍जन्तानं नेसं कुट्ठं, गण्डो, किलासो, सोसो, कासो, सासो, अपमारो, जरोति एवमादिको न कोचि रोगो उप्पज्‍जति। न ते खुज्‍जा वा वामनका वा काणा वा कुणी वा खञ्‍जा वा पक्खहता वा विकलङ्गा वा विकलिन्द्रिया वा होन्ति। इत्थियोपि तत्थ नातिदीघा नातिरस्सा नातिकिसा नातिथूला नातिकाळा नाच्‍चोदाता सोभग्गप्पत्तरूपा होन्ति। तथा हि दीघङ्गुली तम्बनखी लम्बत्थना तनुमज्झा पुण्णचन्दमुखी विसालक्खी मुदुगत्ता संहितूरू ओदातदन्ता गम्भीरनाभी तनुजङ्घा दीघनीलवेल्‍लितकेसी पुथुलसुसोणी नातिलोमानालोमा सुभगा उतुसुखसम्फस्सा सण्हा सखिलसम्भासा नानाभरणविभूसिता विचरन्ति। सब्बदा हि सोळसवस्सुद्देसिका विय होन्ति। पुरिसा च पञ्‍चवीसतिवस्सुद्देसिका विय, न पुत्तदारेसु रज्‍जन्ति। अयं तत्थ धम्मता।

२८२.परिकम्मन्ति पुब्बुपचारं। परिसोधेत्वाति एकक्खरस्सापि अविराधनवसेन आचरियसन्तिके सब्बं सोधेत्वा। सुट्ठु उग्गहिताति परिमण्डलपदब्यञ्‍जनाय पोरिया वाचाय विस्सट्ठाय अनेलगळाय अत्थस्स विञ्‍ञापनीया सम्मदेव उग्गहिता। तथा हि ‘‘अत्थञ्‍च ब्यञ्‍जनञ्‍च परिसोधेत्वा’’ति वुत्तं। अत्थं जानतो एव हि ब्यञ्‍जनं परिसुज्झति, नो अजानतो। पदब्यञ्‍जनानीति पदञ्‍चेव ब्यञ्‍जनञ्‍च अहापेत्वा। एवञ्हि परिपुण्णा नाम होतीति। विसंवादेत्वाति अञ्‍ञथा कत्वा। तेजवन्तं न होति विरज्झनतो चेव विम्हयत्थभावतो च। सब्बसोति अनवसेसतो आदिमज्झपरियोसानतो। तेजवन्तं होतीति सभावनिरुत्तिं अविराधेत्वा सुप्पवत्तिभावेन साधनतो। एवं पयोगविपत्तिं पहाय पयोगसम्पत्तिया सति परित्तस्स अत्थसाधकतं दस्सेत्वा इदानि अज्झासयविपत्तिं पहाय अज्झासयसम्पत्तिया अत्थसाधकतं दस्सेतुं ‘‘लाभहेतू’’तिआदि वुत्तं। इदं परित्तभणनं सत्तानं अनत्थपटिबाहनहेतूति तस्स ञाणकरुणापुब्बकता निस्सरणपक्खो। मेत्तं पुरेचारिकं कत्वाति मेत्तामनसिकारेन सत्तेसु हितफरणं पुरक्खत्वा।

‘‘वत्थुं वा’’तिआदि पुब्बे चतुपरिसमज्झे कताय साधनाय भगवतो पवेदनं। घरवत्थुन्ति वसनगेहं। निबद्धवासन्ति परगेहेपि नेवासिकभावेन वासं न लभेय्य, यं पन महाराजानं, यक्खसेनापतीनञ्‍च अजानन्तानंयेव कदाचि वसित्वा गमनं, तं अप्पमाणन्ति अधिप्पायो। समितिन्ति यक्खादिसमागमं। कामं पाळियं ‘‘न मे सो’’ति आगतं, इतरेसम्पि पन महाराजानमत्तना एकज्झासयताय तेसम्पि अज्झासयं हदये ठपेत्वा वेस्सवणो तथा अवोच। कञ्‍ञं अनु अनु वहितुं अयुत्तो अनावय्हो, सब्बकालं कञ्‍ञं लद्धुं अयुत्तोति अत्थो, तं अनावय्हं। तेनाह ‘‘न आवाहयुत्त’’न्ति। न विवय्हन्ति अविवय्हं, कञ्‍ञं गहेतुमयुत्तन्ति अत्थो। तेनाह ‘‘न विवाहयुत्त’’न्ति। आहितो अहंमानो एत्थाति अत्ता, अत्तभावो। अत्ता विसयभूतो एतासं अत्थीति अत्ता, परिभासा, ताहि। परियत्तं कत्वा वचनेन परिपुण्णाहि। यथा यक्खा अक्‍कोसितब्बा, एवं पवत्ता अक्‍कोसा यक्खअक्‍कोसा नाम, तेहि। ते पन ‘‘कळारक्खि कळारदन्ता काळवण्णा’’ति एवं आदयो।

विरुद्धाति विरुज्झनका परेहि विरोधिनो। रभसाति सारम्भकाति अधिप्पायो। तेनाह ‘‘करणुत्तरिया’’ति। रभसाति वा साहसिका। सामिनो मनसो अस्सवाति मनस्सा, किङ्करा। ये हि ‘‘किं करोमि भद्दन्ते’’ति सामिकस्स वसे वत्तन्ति, ते एवं वुच्‍चन्ति। तेन वुत्तं ‘‘यक्खसेनापतीनं ये मनस्सा, तेस’’न्ति। आणाय अवरोधितुपचारा अवरुद्धा, ते पन आणावतो पच्‍चत्थिका नाम होन्तीति ‘‘पच्‍चामित्ता वेरिनो’’ति वुत्तं। उज्झापेतब्बन्ति हेट्ठा कत्वा चिन्तापेतब्बं, तं पन उज्झापनं तेसं नीचकिरियाय जानापनं होतीति आह ‘‘जानापेतब्बा’’ति।