२. भिक्खुवग्गो

१०८.उदकं अनेन धीयति, ठपीयति वा एत्थाति उदकाधानं। उदकट्ठानन्ति च खुद्दकभाजनं। ‘‘ओवाददानत्थं आमन्तेसी’’ति वत्वा तं पनस्स ओवाददानं न इधेव, अथ खो बहूसु ठानेसु बहुक्खत्तुं पवत्तितन्ति तानि तानि सङ्खेपतो दस्सेत्वा इध संवण्णनत्थं ‘‘भगवता ही’’तिआदि वुत्तं।

तत्थ सब्बबुद्धेहि अविजहितन्ति इमिना सब्बेसं बुद्धानं सासने कुमारपञ्हा नाम होतीति दस्सेति। एकेकतो पट्ठाय याव दसका पवत्ता दस पुच्छा एतस्साति दसपुच्छं, एकेकतो पट्ठाय याव दसका एकुत्तरवसेन पवत्तं विस्सज्‍जनत्थाय पञ्‍चपण्णसविस्सज्‍जनं सामणेरपञ्हन्ति सम्बन्धो। यं पनेत्थ वत्तब्बं, तं परमत्थजोतिकायं खुद्दकट्ठकथायं (खु॰ पा॰ अट्ठ॰ ४.कुमारपञ्हवण्णना) वुत्तनयेनेव वेदितब्बं। अनादीनवदस्सिताय अभिण्हं मुसा समुदाचरणतो ‘‘पियमुसावादा’’ति वुत्तं, उदकावसेसछड्डनउदकाधाननिकुज्‍जनउक्‍कुज्‍जनदस्सनसञ्‍ञिता चतस्सो उदकाधानूपमायो सब्बस्स युद्धकम्मस्स अकरणकरणवसेन दस्सिता द्वे हत्थिउपमायो।

तत्थराहुलसुत्तन्ति सुत्तनिपाते आगतं राहुलसुत्तं (सु॰ नि॰ ३३७ आदयो)। अभिण्होवादवसेन वुत्तन्ति इमिना अन्तरन्तरा तं सुत्तं कथेत्वा भगवा थेरं ओवदतीति दस्सेति। इदञ्‍च पनाति इदं यथावुत्तं भगवतो तंतंकालानुरूपं अत्तनो ओवाददानं सन्धाय। बीजन्ति अण्डं। पस्ससि नूति नु-सद्दो अनुजानने, ननु पस्ससीति अत्थो। सच्‍चधम्मं लङ्घित्वा ठितस्स किञ्‍चिपि अकत्तब्बं नाम पापं नत्थीति आह – ‘‘सम्पजानमुसावादे संवररहितस्स ओपम्मदस्सनत्थं वुत्ता’’ति। तथा हि –

‘‘एकं धम्ममतीतस्स, मुसावादिस्स जन्तुनो।

वितिण्णपरलोकस्स, नत्थि पापमकारिय’’न्ति॥ (ध॰ प॰ १७६)।

उरुळ्हवाति उरुळ्हो हुत्वा उस्सितो। सो पन दमवसेन अभिरुय्ह वड्ढितो आरोहनयोग्यो च होतीति आह ‘‘अभिवड्ढितो आरोहसम्पन्‍नो’’ति। आगतागतेति अत्तनो योग्यपदेसं आगतागते। पटिसेनाय फलककोट्ठकमुण्डपाकारादयोति पटिसेनाय अत्तनो आरक्खत्थाय ठपिते फलककोट्ठके चेव उद्धच्छदपाकारादिके च। एतं पदेसन्ति एतं परसेनापदेसं। एत्तकेनाति ओलोकनमत्तेन। तस्स ओलोकनाकारदस्सनेनेव। सतम्पि सहस्सम्पि सेनानीकं द्वेधा भिज्‍जति, तीरपातिकं मद्दितं हुत्वा पदाता हुत्वा द्वेधा हुत्वा पलायन्ति। कण्णेहि पहरित्वाति पगेव सरानं आगमनसद्दं उपधारेत्वा यथा वेगो न होति, एवं समुट्ठापेत्वा तेहि पहरित्वा पातनं। पटिहत्थिपटिअस्सातिआदिना पच्‍चेकं पति-सद्दो योजेतब्बोति। दीघासिलट्ठियाति दीघलताय असिलट्ठिया।

करणेति कम्मकरणे। मञ्‍ञति हत्थारोहो। अयमुग्गरन्ति तादिसे काले गहितमुग्गरं। ओलोकेत्वाति ञाणचक्खुना दिस्वा, अभिण्हं सम्पजञ्‍ञं उपट्ठपेत्वाति अत्थो।

१०९.ससक्‍कन्ति पस्सितुं युत्तं कत्वा उस्साहं जनेत्वा न करणीयं, तादिसं नियमतो अकत्तब्बं होतीति आह ‘‘एकंसेनेव न कातब्ब’’न्ति। पटिसंहरेय्यासीति करणतो सङ्कोचं आपज्‍जेय्यासि। यथाभूतो असन्तो निवत्तो अकरोन्तो नाम होतीति आह ‘‘निवत्तेय्यासि मा करेय्यासी’’ति। अनुपदेय्यासीति अनुबलप्पदायी भवेय्यासि। तेनाह ‘‘उपत्थम्भेय्यासी’’ति। तं पन अनुबलप्पदानं उपत्थम्भनं पुनप्पुनं करणमेवाति आह ‘‘पुनप्पुनं करेय्यासी’’ति । सिक्खमानोति तंयेव अधिसीलसिक्खं तन्‍निस्सयञ्‍च सिक्खाद्वयं सिक्खन्तो सम्पादेन्तो।

१११.कित्तकेपन ठानेति कित्तके ठाने पवत्तानि। अविदूरे एव पवत्तानीति दस्सेन्तो ‘‘एकस्मिं पुरेभत्तेयेव सोधेतब्बानी’’ति आह। एवञ्हि तानि सुसोधितानि होन्ति सुपरिसुद्धानि। परेसं अप्पियं गरुं गारय्हं, यथावुत्तट्ठानतो पन अञ्‍ञं वा कम्मट्ठानमनसिकारेनेव कायकम्मादीनि परिसोधितानि होन्तीति न गहितं। पटिघं वाति एत्थ वा-सद्देन असमपेक्खणे मोहस्स सङ्गहो दट्ठब्बो।

११२.वुत्तनयेन कायकम्मादिपरिसोधनं नाम इधेव, न इतो बहिद्धाति आह ‘‘बुद्धा…पे॰… सावका वा’’ति। ते हि अत्थतो समणब्राह्मणा वाति। तस्माति यस्मा सब्बबुद्धपच्‍चेकबुद्धसावकेहि आरुळ्हमग्गो, राहुल, मया तुय्हं आचिक्खितो, तस्मा। तेन अनुसिक्खन्तेन तया एवं सिक्खितब्बन्ति ओवादं अदासि। सेसं वुत्तनयत्ता सुविञ्‍ञेय्यमेव।

अम्बलट्ठिकराहुलोवादसुत्तवण्णनाय लीनत्थप्पकासना

समत्ता।

११४.विसङ्खरित्वाति विसंयुत्ते कत्वा, यथा सङ्गाकारेन गहणं न गच्छति, एवं विनिभुञ्‍जित्वाति अत्थो। महाभूतानि ताव वित्थारेतु, सम्मसनूपगत्ता, असम्मसनूपगं आकासधातुं अथ कस्मा वित्थारेसीति आह ‘‘उपादारूपदस्सनत्थ’’न्ति। आपोधातु सुखुमरूपं। इतरासु ओळारिकसुखुमतापि लब्भतीति आह ‘‘उपादारूपदस्सनत्थ’’न्ति। हेट्ठा चत्तारि महाभूतानेव कथितानि, न उपादारूपन्ति तस्स पनेत्थ लक्खणहारनयेन आकासदस्सनेन दस्सितता वेदितब्बा। तेनाह ‘‘इमिना मुखेन तं दस्सेतु’’न्ति। न केवलं उपादारूपग्गहणदस्सनत्थमेव आकासधातु वित्थारिता, अथ खो परिग्गहसुखतायपीति दस्सेन्तो ‘‘अपिचा’’तिआदिमाह। तत्थ परिच्छिन्दितब्बस्स रूपस्स निरवसेसपरियादानत्थं ‘‘अज्झत्तिकेना’’ति विसेसनमाह। आकासेनाति आकासधातुया गहिताय। परिच्छिन्‍नरूपन्ति ताय परिच्छिन्दितकलापगतम्पि पाकटं होति विभूतं हुत्वा उपट्ठाति।

इदानि वुत्तमेवत्थं सुखग्गहणत्थं गाथाय दस्सेति। तस्साति उपादायरूपस्स। एवं आविभावत्थन्ति एवं परिच्छिन्‍नताय आकासस्स वसेन विभूतभावत्थं। तन्ति आकासधातुं।

११८.आकासभावं गतन्ति चतूहि महाभूतेहि असम्फुट्ठानं तेसं परिच्छेदकभावेन आकासन्ति गहेतब्बतं गतं, आकासमेव वा आकासगतं यथा ‘‘दिट्ठिगतं (ध॰ स॰ ३८१; महानि॰ १२), अत्थङ्गत’’न्ति (अ॰ नि॰ अट्ठ॰ १.१.१३०) च। आदिन्‍नन्ति इमन्ति तण्हादिट्ठीहि आदिन्‍नं। तेनाह ‘‘गहितं परामट्ठ’’न्ति। अञ्‍ञत्थ कम्मजं ‘‘उपादिन्‍न’’न्ति वुच्‍चति, न तथा इधाति आह ‘‘सरीरट्ठकन्ति अत्थो’’ति। पथवीधातुआदीसुवुत्तनयेनेवाति महाहत्थिपदोपमे (म॰ नि॰ १.३०० आदयो) वुत्तनयदस्सनं सन्धाय वदति।

११९.तादिभावो नाम निट्ठितकिच्‍चस्स होति, अयञ्‍च विपस्सनं अनुयुञ्‍जति, अथ किमत्थं तादिभावता वुत्ताति? पथवीसमतादिलक्खणाचिक्खणाहि विपस्सनाय सुखप्पवत्तिअत्थं। तेनाह ‘‘इट्ठानिट्ठेसू’’तिआदि। गहेत्वाति कुसलप्पवत्तिया ओकासदानवसेन परिग्गहेत्वा। न पतिट्ठितोति न निस्सितो न लग्गो।

१२०.ब्रह्मविहारभावना असुभभावना आनापानस्सतिभावना च उपचारं वा अप्पनं वा पापेन्तो विपस्सनाय पादकभावाय अनिच्‍चादिसञ्‍ञाय विपस्सनाभावेन उस्सक्‍कित्वा मग्गपटिपाटिया अरहत्ताधिगमाय होतीति ‘‘मेत्तादिभावनाय पन होती’’ति वुत्तं। यत्थ कत्थचि सत्तेसु सङ्खारेसु च पटिहञ्‍ञनकिलेसोति आघातभावमेव वदति ञायभावतो अञ्‍ञेसम्पि। अस्मिमानोति रूपादिके पच्‍चेकं एकज्झं गहेत्वा ‘‘अयमहमस्मी’’ति एवं पवत्तमानो।

१२१.इदं कम्मट्ठानन्ति एत्थ गणनादिवसेन आसेवियमाना अस्सासपस्सासा योगकम्मस्स पतिट्ठानताय कम्मट्ठानं। तत्थ पन तथापवत्तो मनसिकारो भावना। एत्थ च तस्सेव थेरस्स भगवता बहूनं कम्मट्ठानानं देसितत्ता चरितं अनादियित्वा कम्मट्ठानानि सब्बेसं पुग्गलानं सप्पायानीति अयमत्थो सिद्धो, अतिसप्पायवसेन पन कम्मट्ठानेसु विभागकथा कथिताति वेदितब्बा।

महाराहुलोवादसुत्तवण्णनाय लीनत्थप्पकासना समत्ता।

१२५.त्वंनेवयाचकोति अहं भन्ते भगवति ब्रह्मचरियं चरिस्सामीतिआदिना। न याचितकोति त्वं मालुक्यपुत्त मयि ब्रह्मचरियं चरातिआदिना।

१२६.परसेनाय ठितेन पुरिसेन। बहललेपनेनाति बहलविलेपनेन। महासुपियादि सब्बो मुदुहिदको वेणुविसेसो सण्हो। मरुवाति मकचि। खीरपण्णिनोति खीरपण्णिया, यस्सा छिन्दनमत्ते पण्णे खीरं पग्घरति। गच्छन्ति गच्छतो जातं सयंजातगुम्बतो गहितन्ति अधिप्पायो। सिथिलहनु नाम दत्ता कण्णो पतङ्गो। एताय दिट्ठिया सति न होतीति ‘‘सस्सतो लोको’’ति एताय दिट्ठिया सति मग्गब्रह्मचरियवासो न होति, तं पहाय एव पत्तब्बतो।

१२७.अत्थेव जातीतिआदिना एता दिट्ठियो पच्‍चेकम्पि संसारपरिब्रूहना कटसिवड्ढना निब्बानविबन्धनाति दस्सेति।

१२८.तस्मातिहाति इदं अट्ठाने उद्धटं, ठानेयेव पन ‘‘वुत्तपटिपक्खनयेन वेदितब्ब’’न्ति इमस्स परतो कत्वा संवण्णेतब्बं। अत्तनो फलेन अरणीयतो अनुगन्तब्बतो कारणम्पि ‘‘अत्थो’’ति वुच्‍चतीति आह ‘‘कारणनिस्सित’’न्ति। तेनाह ‘‘ब्रह्मचरियस्स आदिमत्तम्पी’’ति। पुब्बपदट्ठानन्ति पठमारम्भो। सेसं सुविञ्‍ञेय्यमेव।

चूळमालुक्यसुत्तवण्णनाय लीनत्थप्पकासना समत्ता।

१३०.सक्‍कायदिट्ठिपरियुट्ठितेनाति परियुट्ठानसमत्थसक्‍कायदिट्ठिकेन। तथाभूतञ्‍च चित्तं ताय दिट्ठिया विगय्हितं अज्झोत्थटञ्‍च नाम होतीति आह ‘‘गहितेन अभिभूतेना’’ति। दिट्ठिनिस्सरणं नाम दस्सनमग्गो तेन समुच्छिन्दितब्बतो, सो पन निब्बानं आगम्म तं समुच्छिन्दति, तस्मा वुत्तं ‘‘दिट्ठिनिस्सरणं निब्बान’’न्ति। अविनोदिता अनीहटाति पदद्वयेनपि समुच्छेदवसेन अप्पहीनत्तंयेव वदति। अञ्‍ञं संयोजनं अञ्‍ञो अनुसयोति वदन्ति, सहभावो नाम अञ्‍ञेन होति। न हि तदेव तेन सहाति वुच्‍चतीति तेसं अधिप्पायो। अञ्‍ञेनाति अत्थतो अञ्‍ञेन। अवत्थामत्ततो यदिपि अवयवविनिमुत्तो समुदायो नत्थि, अवयवो पन समुदायो न होतीति सो समुदायतो अञ्‍ञो एवाति सक्‍का वत्तुन्ति यथावुत्तस्स परिहारस्स अप्पाटिहीरकतं आसङ्कित्वा पक्खन्तरं आसल्‍लितं ‘‘अथापि सिया’’तिआदिना। पक्खन्तरेहि परिहारा होन्तीति यथावुत्तञायेनपि अञ्‍ञो पुरिसो अथापि सिया, अयं पनेत्थ अञ्‍ञो दोसोति आह ‘‘यदि तदेवा’’तिआदि। अथापि सिया तुय्हं यदि परिवितक्‍को ईदिसो यदि तदेव संयोजनन्तिआदि। इममत्थं सन्धायाति परमत्थतो सो एव किलेसो संयोजनमनुसयो च, बन्धनत्थअप्पहीनत्थानं पन अत्थेव भेदोति इममत्थं सन्धाय।

१३२.तचच्छेदो विय समापत्ति किलेसानं समापत्तिविक्खम्भनस्स सारच्छेदस्स अनुसयस्स दूरभावतो। फेग्गुच्छेदो विय विपस्सना तस्स आसन्‍नभावतो। एवरूपा पुग्गलाति अभावितसद्धादिबलताय दुब्बलनामकाया पुग्गला, येसं सक्‍कायनिरोधाय…पे॰… नाधिमुच्‍चति। एवं दट्ठब्बाति यथा सो दुब्बलको पुरिसो, एवं दट्ठब्बो सो पुरिसो गङ्गापारं विय सक्‍कायपारं गन्तुं असमत्थत्ता। वुत्तविपरियायेन सुक्‍कपक्खस्स अत्थो वेदितब्बो।

१३३.उपधिविवेकेनाति इमिना उपधिविवेकाति करणे निस्सक्‍कनन्ति दस्सेति, उपधिविवेकाति वा हेतुम्हि निस्सक्‍कवचनस्स उपधिविवेकेनाति हेतुम्हि करणवचनेन पञ्‍चकामगुणविवेको कथितो। कामगुणापि हि उपधीयति एत्थ दुक्खन्ति उपधीति वुच्‍चन्तीति। थिनमिद्धपच्‍चया कायविजम्भितादिभेदं कायालसियं। तत्थाति अन्तोसमापत्तियं समापत्तिअब्भन्तरे जातं। तं पन समापत्तिपरियापन्‍नम्पि अपरियापन्‍नम्पीति तदुभयं दस्सेतुं ‘‘अन्तोसमापत्तिक्खणेयेवा’’तिआदि वुत्तं। रूपादयो धम्मेति रूपवेदनादिके पञ्‍चक्खन्धधम्मे। न निच्‍चतोति इमिना निच्‍चपटिक्खेपतो तेसं अनिच्‍चतमाह। ततो एव उदयवयन्ततो विपरिणामतो तावकालिकतो च ते अनिच्‍चाति जोतितं होति। यञ्हि निच्‍चं न होति, तं उदयब्बयपरिच्छिन्‍नं जराय मरणेन चाति द्वेधा विपरिणतं इत्तरखणमेव च होति। न सुखतोति इमिना सुखपटिक्खेपतो तेसं दुक्खतमाह, अतो एव अभिण्हं पटिपीळनतो दुक्खवत्थुतो च ते दुक्खाति जोतितं होति। उदयब्बयवन्तताय हि ते अभिण्हं पटिपीळनतो निरन्तरदुक्खताय दुक्खस्सेव च अधिट्ठानभूताति। पच्‍चययापनीयताय रोगमूलताय च रोगतो। दुक्खतासूलयोगिताय किलेसासुचिपग्घरणतो उप्पादजराभङ्गेहि उद्धुमातपक्‍कभिज्‍जनतो च गण्डतो। पीळाजननतो अन्तोतुदनतो दुन्‍नीहरणतो च अवद्धिआवहतो अघवत्थुतो च असेरीभावतो आबाधपदट्ठानताय च आबाधतो। अवसवत्तनतो अविधेय्यताय परतो। ब्याधिजरामरणेहि पलुज्‍जनीयताय पलोकतो। सामीनिवासीकारकवेदकअधिट्ठायकविरहतो सुञ्‍ञतो। अत्तपटिक्खेपट्ठेन अनत्ततो, रूपादिधम्मापि न एत्थ अत्ता होन्तीति अनत्ता, एवं अयम्पि न अत्ता होतीति अनत्ता। तेन अब्यापारतो निरीहतो तुच्छतो अनत्ताति दीपितं होति। लक्खणत्तयमेव अवबोधत्थं एकादसहि पदेहि विभजित्वा गहितन्ति दस्सेतुं ‘‘तत्था’’तिआदि वुत्तं।

अन्तोसमापत्तियन्ति समापत्तीनं सहजातताय समापत्तीनं अब्भन्तरे। चित्तं पटिसंहरतीति तप्पटिबद्धछन्दरागादिउपक्‍किलेसविक्खम्भनेन विपस्सनाचित्तं पटिसंहरति। तेनाह ‘‘मोचेती’’ति। सवनवसेनाति ‘‘सब्बसङ्खारसमथो’’तिआदिना सवनवसेन। थुतिवसेनाति तथेव थोमनावसेन गुणतो संकित्तनवसेन। परियत्तिवसेनाति तस्स धम्मस्स परियापुणनवसेन। पञ्‍ञत्तिवसेनाति तदत्थस्स पञ्‍ञापनवसेन। आरम्मणकरणवसेनेव उपसंहरति मग्गचित्तं। एतं सन्तन्तिआदि पन अवधारणनिवत्तितत्थदस्सनं। यथा विपस्सना ‘‘एतं सन्तं एतं पणीत’’न्तिआदिना असङ्खताय धातुया चित्तं उपसंहरति, एवं मग्गो निब्बानं सच्छिकिरियाभिसमयवसेन अभिसमेन्तो तत्थ लब्भमाने सब्बे विसेसे असम्मोहतो पटिविजानन्तो तत्थ चित्तं उपसंहरति। तेनाह ‘‘इमिना पन आकारेना’’तिआदि। सो तत्थ ठितोति सो अदन्धविपस्सनो योगी तत्थ ताय अनिच्‍चादिलक्खणत्तयारम्मणाय विपस्सनाय ठितो। सब्बसोति तस्स मग्गस्स अधिगमाय निब्बत्तितसमथविपस्सनासु। असक्‍कोन्तो अनागामी होतीति हेट्ठिममग्गवहासु एव समथविपस्सनासु छन्दरागं पहाय अग्गमग्गवहासु तासु निकन्तिं परियादातुं असक्‍कोन्तो अनागामितायमेव सण्ठाति।

समतिक्‍कन्तत्ताति समथवसेन विपस्सनावसेन चाति सब्बथापि रूपस्स अतिक्‍कन्तत्ता। तेनाह ‘‘अयञ्ही’’तिआदि। अनेनाति योगिना। तं अतिक्‍कम्माति इदं यो वा पठमं पञ्‍चवोकारभवपरियापन्‍ने धम्मे सम्मदेव सम्मसित्वा ते विवज्‍जेत्वा ततो अरूपसमापत्तिं समापज्‍जित्वा अरूपधम्मे सम्मसति, तं सन्धाय वुत्तं। तेनाह ‘‘इदानि अरूपं सम्मसती’’ति।

१३५.दूसयन्ति गरहन्ति एतेनाति दोसो, अपराधो, सो एव कुच्छितभावेन दोसको। गरहाय पवत्तिट्ठानतो ओकासो। तेनाह – ‘‘एतं ओकासं एतं अपराध’’न्ति। दुक्‍करतरन्ति पतिकारवसेन अतिसयेन दुक्‍करं। अपराधो हि न खमापेन्तं यथापच्‍चयं वित्थारितो हुत्वा दुप्पतिकारो होति। तेनाह ‘‘वस्सञ्ही’’तिआदि।

अलग्गित्वाति इमम्पि नाम अपनीतं अकासीति एवं अविनेत्वा, तं तं तस्स हितपटिपत्तिं निवारणं कत्वाति अत्थो। ञायपटिपत्तिं अतिच्‍च एति पवत्ततीति अच्‍चयो, अपराधो, पुरिसेन मद्दित्वा पवत्तितो अपराधो अत्थतो पुरिसं अतिच्‍च अभिभवित्वा पवत्तो नाम होति। तेनाह ‘‘अच्‍चयो मं, भन्ते, अच्‍चगमा’’ति। अवसेसपच्‍चयानं समागमे एति फलं एतस्मा उप्पज्‍जति पवत्तति चाति समयो, हेतु यथा ‘‘समुदायो’’ति आह ‘‘एकं कारण’’न्ति। यं पनेत्थ भद्दालित्थेरस्स अपरिपूरकारिताय भिक्खुआदीनं जाननं, तम्पि कारणं कत्वा ‘‘अहं खो, भन्ते, न उस्सहामी’’तिआदिना वत्तब्बन्ति दस्सेति।

१३६.एकचित्तक्खणिकाति पठममग्गचित्तक्खणेन एकचित्तक्खणिका। एवं आणापेतुं न युत्तन्ति सङ्कमत्थाय आणापेतुं न युत्तं पयोजनाभावतो। अनाचिण्णञ्‍चेतं बुद्धानं, यदिदं पदसा अक्‍कमनं। तथा हि –

‘‘अक्‍कमित्वान मं बुद्धो, सह सिस्सेहि गच्छतु।

मा नं कललं अक्‍कमित्थ, हिताय मे भविस्सती’’ति॥ (बु॰ वं॰ २.५३)।

सुमेधपण्डितेन पच्‍चासीसितं न कतं। यथाह –

‘‘दीपङ्करो लोकविदू, आहुतीनं पटिग्गहो।

उस्सीसके मं ठत्वान, इदं वचनमब्रवी’’ति॥ (बु॰ वं॰ २.६०)।

भगवता आणत्ते सति तेसम्पि एवं कातुं न युत्तन्ति एत्थापि एसेव नयो। एतेसं पटिबाहितुं युत्तन्ति इदं अट्ठानपरिकप्पनवसेनेव वुत्तं। न हि बुद्धानं कातुं आरद्धं नाम किच्‍चं केहिचि पटिबाहितुं युत्तं नाम अत्थि पटिबाहितुंयेव अकरणतो। सम्मत्तनियामस्स अनोक्‍कन्तत्ता वुत्तं ‘‘बाहिरको’’ति।

१३७.न कम्मट्ठानं अल्‍लीयतीति चित्तं कम्मट्ठानं न ओतरति।

१४०.पुनप्पुनं कारेन्तीति दण्डकम्मपणामनादिकारणं पुनप्पुनं कारेन्ति। सम्मावत्तम्हि न वत्ततीति तस्सा तस्सा आपत्तिया वुट्ठानत्थं भगवता पञ्‍ञत्तसम्मावत्तम्हि न वत्तति। अनुलोमवत्ते न वत्ततीति येन येन वत्तेन सङ्घो अनुलोमिको होति, तस्मिं तस्मिं अनुलोमवत्ते न वत्तति विलोममेव गण्हाति, पटिलोमेन होति। नित्थारणकवत्तम्हीति येन वत्तेन सङ्घो अनुलोमिको होति, सापत्तिकभावतो नित्थिण्णो होति, तम्हि नित्थारणवत्तस्मिं न वत्तति। तेनाह ‘‘आपत्ती’’तिआदि। दुब्बचकरणेति दुब्बचस्स भिक्खुनो करणे।

१४४.यापेतीति वत्तति, सासने तिट्ठतीति अत्थो। अभिञ्‍ञापत्ताति ‘‘असुको असुको च थेरो सीलवा कल्याणधम्मो बहुस्सुतो’’तिआदिना अभिञ्‍ञातभावं पत्ता अधिगतअभिञ्‍ञाता।

१४५.सत्तेसु हायमानेसूति किलेसबहुलताय पटिपज्‍जनकसत्तेसु परिहायन्तेसु पटिपथेसु जायमानेसु। अन्तरधायति नाम तदाधारताय। दिट्ठधम्मिका परूपवादादयो। सम्परायिका अपायदुक्खविसेसा। आसवन्ति तेन तेन पच्‍चयेन पवत्तन्तीति आसवा। नेसन्ति परूपवादादिआसवानं। तेति वीतिक्‍कमधम्मा।

अकालं दस्सेत्वाति सिक्खापदपञ्‍ञत्तिया अकालं दस्सेत्वा। उप्पत्तिन्ति आसवट्ठानियानं धम्मानमुप्पत्तिं। सिक्खापदपञ्‍ञत्तिया कालं, तावसेनासनानि पहोन्ति, तेन आवासमच्छरियादिहेतुना सासने एकच्‍चे आसवट्ठानिया धम्मा न उप्पज्‍जन्ति। इमिना नयेनाति इमिना पन हेतुना पदसोधम्मसिक्खापदानं सङ्गहो दट्ठब्बो।

यसन्ति कित्तिसद्दं परिवारञ्‍च। सागतत्थेरस्स नागदमनकित्तियसादिवसेन सुरापानसङ्खातो आसवट्ठानियो धम्मो उप्पज्‍जि।

रसेन रसं संसन्देत्वाति उपादिन्‍नकफस्सरसेन अनुपादिन्‍नकफस्सरसं संसन्देत्वा।

१४६.न खो, भद्दालि, एसेव हेतु, अथ खो अञ्‍ञम्पि अत्थीति दस्सेन्तो भगवा ‘‘अपिचा’’तिआदिमाह। तेन धम्मस्स सक्‍कच्‍चसवने थेरं नियोजेति।

१४७.विसेवनाचारन्ति अदन्तकिरियं। परिनिब्बायतीति वूपसम्मति। तत्थ अदन्तकिरियं पहाय दन्तो होति। युगस्साति रथधुरस्स।

अनुक्‍कमेति अनुरूपपरिगमे। तदवत्थानुरूपं पादानं उक्खिपने निक्खिपने च। तेनाह ‘‘चत्तारो पादे’’तिआदि। रज्‍जुबन्धनविधानेनाति पादतो भूमिया मोचनविधानेन। एवं करणत्थन्ति यथा अस्से निसिन्‍नस्सेव भूमिं गहेतुं सक्‍का, एवं चत्तारो पादे तथा कत्वा अत्तनो निच्‍चलभावकरणत्थं। मण्डलेति मण्डलधाविकायं। पथवीकमनेति पथविं फुट्ठमत्तेन गमने। तेनाह ‘‘अग्गग्गखुरेही’’ति। ओक्‍कन्तकरणस्मिन्ति ओक्‍कन्तेत्वा परसेनासम्मद्दन ओक्‍कन्तकरणे। एकस्मिं ठानेति चतूसु पादेसु यत्थ कत्थचि एकस्मिं ठाने गमनं चोदेन्तीति अत्थो, सो पनेत्थ सीघतरो अधिप्पेतो। दवत्तेति मरियादाकोपनेहि नानप्पयोजने, परसेनाय पवत्तमहानादपहरणेहि अत्थो। तेनाह ‘‘युद्धकालस्मि’’न्तिआदि।

रञ्‍ञा जानितब्बगुणेति यथा राजा अस्सस्स गुणे जानाति, एवं तेन जानितब्बगुणकारणं कारेति। अस्सराजवंसेति दुस्सहं दुक्खं पत्वापि यथा अयं राजवंसानुरूपकिरियं न जहिस्सति, एवं सिक्खापने। सिक्खापनमेव हि सन्धाय सब्बत्थ ‘‘कारणं कारेती’’ति वुत्तं तस्स करणकारापनपरियायत्ता।

यथाउत्तमजवो होतीति जवदस्सनट्ठाने यथा हयो उत्तमजवं न हापेसि, एवं सिक्खापेति। उत्तमहयभावे, यथा उत्तमहयो होतीति कम्मकरणकाले अत्तनो उत्तमसभावं अनिगुहित्वा अवज्‍जेत्वा यथा अत्थसिद्धि होति, एवं परमजवेन सिक्खापेति। यथा किरिया विना दब्बम्पि विना किरियं न भवति, एवं दट्ठब्बन्ति दस्सेतुं ‘‘तत्थ पकतिया’’तिआदि वुत्तं।

तत्राति तस्मिं पकतिया उत्तमहयस्सेव उत्तमहयकारणारहत्ता उत्तमजवपटिपज्‍जने। मासखादकघोटकानन्ति मासं खादित्वा यथा तथा विगुणखलुङ्गकानं। वलञ्‍जकदण्डन्ति रञ्‍ञा गहेतब्बसुवण्णदण्डं। धातुपत्थद्धोति अत्तनाव समुप्पादितधातुया उपत्थम्भितो हुत्वा।

उत्तमे साखल्येति परमसखिलभावे सखिलवाचाय एव दमेतब्बताय। तेनाह ‘‘मुदुवाचाय ही’’तिआदि।

अरहत्तफलसम्मादिट्ठियाति फलसमापत्तिकाले पवत्तसम्माञाणं। सम्माञाणं पुब्बे वुत्तसम्मादिट्ठियेवाति पन इदं फलसम्मादिट्ठिभावसामञ्‍ञेन वुत्तं। केचि पन ‘‘पच्‍चवेक्खणञाण’’न्ति वदन्ति, तं न युज्‍जति ‘‘असेक्खेना’’ति विसेसितत्ता। तम्पि असेक्खञाणन्ति चे? एवम्पि निप्परियाय सेक्खग्गहणे परियायसेक्खग्गहणं न युत्तमेव, किच्‍चभेदेन वा वुत्तन्ति दट्ठब्बं। एका एव हि सा पञ्‍ञा निब्बानस्स पच्‍चक्खकिरियाय सम्मादस्सनकिच्‍चं उपादाय ‘‘सम्मादिट्ठी’’ति वुत्ता, सम्माजाननकिच्‍चं उपादाय ‘‘सम्माञाण’’न्ति। अञ्‍ञाताविन्द्रियवसेन वा सम्मादिट्ठि, पञ्‍ञिन्द्रियवसेन सम्माञाणन्ति एवमेत्थ अत्थो दट्ठब्बो। मग्गफलावहाय देसनाय सङ्खेपतोव आगतत्ता वुत्तं ‘‘उग्घटितञ्‍ञुपुग्गलस्स वसेना’’ति।

१४९.यन्ति भुम्मत्थे पच्‍चत्तवचनं, तेन च अनन्तरनिद्दिट्ठसमयो पच्‍चामट्ठोति आह ‘‘यस्मिं समये’’ति। न भगवन्तं पटिच्‍चाति न भगवन्तं आरम्मणं कत्वा।

कम्मनिप्फन्‍नत्थन्ति अत्तना आयाचियमानकम्मसिद्धिअत्थं। भवतीति भू, न भूति अभू, भयवसेन पन सा इत्थी ‘‘अभु’’न्ति आह। आतु मातूति एत्थ यथा –

‘‘अङ्गा अङ्गा सम्भवसि, हदया अधिजायसे।

अत्ता एव पुत्त नामासि, स जीव सरदोसत’’न्ति॥ –

आदीसु पुत्तो ‘‘अत्ता’’ति वुच्‍चति कुलवसेन सन्ताने पवत्तनतो। एवं पितापि ‘‘पुत्तस्स अत्ता’’ति वुच्‍चति। यस्मा ‘‘भिक्खुस्स अत्ता माता’’ति वत्थुकामा भयवसेन ‘‘आतु मातू’’ति आह। तेनाह ‘‘आतूति पिता’’तिआदि।

१५०.एवमेवन्ति इदं गरहत्थजोतननिपातपदन्ति वुत्तं ‘‘गरहन्तो आहा’’ति। तथा हि नं वाचकसद्देनेव दस्सेन्तो ‘‘इधेकच्‍चे मोघपुरिसा’’ति आह। आहंसूति तेसं तथा वचनस्स अविच्छेदेन पवत्तिदीपनन्ति आह ‘‘वदन्ती’’ति। किं पनिमस्स अप्पमत्तकस्साति पहातब्बवत्थुं अवमञ्‍ञमानेहि वुत्तं। तेनाह ‘‘किं पना’’ति। हेतुम्हि जोतेतब्बे चेतं सामिवचनं यथा ‘‘अनुस्सवस्स हेतु, अज्झेनस्स हेतू’’ति। तेनाह ‘‘अप्पमत्तकस्स हेतू’’ति। ननु अपस्सन्तेन विय असुणन्तेन विय भवितब्बन्ति? सत्थारा नाम अप्पमत्तकेसु दोसेसु अपस्सन्तेन विय च असुणन्तेन विय च भवितब्बन्ति तेसं अधिप्पायेन विवरणं। तेसु चाति सिक्खाकामेसु च। अप्पच्‍चयं उपट्ठापेन्तीति आनेत्वा सम्बन्धितब्बन्ति दस्सेति। तेसन्ति ये ‘‘मोघपुरिसा’’ति वुत्ता पुग्गला, तेसं। गले बद्धं महाकट्ठन्ति गले ओलम्बेत्वा बद्धं रुक्खदण्डमाह। पूतिलतायाति गलोचिया। पाराजिकवत्थु विय दुप्पजहं होतीति छन्दकप्पहानवसेन तं पजहितुं न सक्‍कोति।

१५१.अनुस्सुक्‍काति तस्स पहातब्बस्स पहाने उस्सुक्‍करहिता। अपच्‍चासीसनपक्खेति ताय परदत्तवुत्तिताय कस्सचि पच्‍चयस्स कुतोचि अपच्‍चासीसकपक्खे ठिता हुत्वा सुप्पजहं होति, न तस्स पहाने भारियं अत्थि।

१५२.दलिद्दो दुग्गतो। अस्सकोति असापतेय्यो। गेहयट्ठियोति गेहछदनस्स आधारा, ता उजुकं तिरियं ठपेतब्बदण्डा। समन्ततो भित्तिपादेसु ठपेतब्बदण्डा मण्डला। काकातिदायिन्ति इतो चितो काकेहि अतिपातवसेन उड्डेतब्बं। तेनाह ‘‘यत्थ किञ्‍चिदेवा’’तिआदि। सूरकाकाति काकानं उड्डेपनाकारमाह। नपरमरूपन्ति हीनरूपं। विलीवमञ्‍चकोति तालवेत्तकादीहि वीतमञ्‍चको। सा पनस्स सन्तानानं छिन्‍नभिन्‍नताय ओलुग्गविलुग्गता, तथा सति सा विसमरूपा होतीति आह ‘‘ओणता’’तिआदि। सो पुग्गलो लूखभोजी होतीति आह ‘‘धञ्‍ञं नाम कुद्रूसको’’ति। समकालं वपितब्बताय समवापकं, यथाउतु वपितब्बबीजं। जायिकाति कुच्छिता भरिया, सब्बत्थ गरहायं क-सद्दो। सो वताहं पब्बजेय्यन्ति सोहं केसमस्सुं ओहारेत्वा पब्बजेय्यं, योहं पुरिसो नाम अस्सं वताति पब्बज्‍जावसेन अत्तनो पुरिसं बोधेय्य। तंसभावे ठितस्स बोधा न तु दुक्‍करा, सा खटोपिका। सा कुम्भी। मेण्डकसेट्ठिनो अड्ढतेळसानि कोट्ठागारसतानि विय।

१५३.सुवण्णनिक्खसतानन्ति अनेकेसं सुवण्णनिक्खसतानं। चयोति सन्तानेहि निचयो अवीचि निच्‍चप्पबन्धनिचयो। तेनाह ‘‘सन्तानतो कतसन्‍निचयो’’ति।

१५४.हेट्ठा किञ्‍चापि अप्पजहनका पठमं दस्सिता, पजहनका पधाना, तेसञ्‍च वसेनेत्थ पुग्गलचतुक्‍कं दस्सितं। ते तञ्‍चेव पजहन्तीति पजहनका पठमं गहिता। रासिवसेनाति ‘‘इधुदायि एकच्‍चो पुग्गलो’’तिआदिना चतुक्‍के आगतविभागं अनामसित्वा ‘‘ते ते’’ति पचुरवसेन वुत्तं। तेनाह ‘‘न पाटियेक्‍कं विभत्ता’’ति। अविभागेन गहितवत्थूसु विभागतो गहणं लोकसिद्धमेतन्ति दस्सेतुं ‘‘यथा नामा’’तिआदि वुत्तं। पजहनकपुग्गलाति ‘‘ते तञ्‍चेव पजहन्ती’’ति एवं पजहनकपुग्गला एव।

उपधिअनुधावनकाति उपधीसु अनुअनुधावनका उपधियो आरब्भ पवत्तनका। वितक्‍कायेवाति कामसङ्कप्पादिवितक्‍कायेव। इन्द्रियनानत्तताति विमुत्तिपरिपाचकानं इन्द्रियानं परोपरियत्तं। तस्स हि वसेनेव ते चत्तारो पुग्गला जाता। अग्गमग्गत्थाय विपस्सनं उस्सुक्‍कापेत्वा याव न तं मग्गेन समुग्घातेन्ति, ताव नप्पजहन्ति नाम। इति हेट्ठिमा तयोपि अरिया अप्पहीनस्स किलेसस्स वसेन ‘‘नप्पजहन्ती’’ति वुत्ता, पगेव पुथुज्‍जना। वुत्तनयेन पन विपस्सनं मग्गेन घटेन्ता ते चत्तारो जना अग्गमग्गक्खणे पजहन्ति नाम। ते एव तत्थ सीघकारिनो खिप्पं पजहन्ति नाम, तेनाह ‘‘तत्था’’तिआदि।

संवेगं कत्वा अग्गिं अक्‍कन्तपुरिसो विय। मग्गेनाति अनुक्‍कमागतेन अग्गमग्गेन। महाहत्थिपदोपमेति महाहत्थिपदोपमसुत्ते (म॰ नि॰ १.३०० आदयो)। तत्थ हि ‘‘तस्स धातारम्मणमेव चित्तं पक्खन्दति पसीदति सन्तिट्ठति अधिमुच्‍चती’’ति (म॰ नि॰ १.३०२) एत्थ अतितिक्खनातितिक्ख-नातिमन्दअतिमन्द-पुग्गलवसेन अट्ठकथायं (म॰ नि॰ अट्ठ॰ २.३०२) तयो वारा उद्धटा, तत्थ मज्झिमवसेनेव पञ्हो कथितो। इन्द्रियभावनेति इन्द्रियभावनासुत्ते, तत्थापि मज्झिमनयेनेव पञ्हो कथितो। तेनाह ‘‘इमेसू’’तिआदि।

तन्ति ‘‘उपधी’’ति वुत्तं खन्धपञ्‍चकं। दुक्खस्स मूलन्ति सब्बस्सपि वट्टदुक्खस्स कारणं। निग्गहणोति निरुपादानो। तेनाह ‘‘नित्तण्हो’’ति।

१५५.ये पजहन्तीति ‘‘ते तञ्‍चेव पजहन्ती’’ति एवं वुत्तपुग्गला। ते इमे नाम एत्तके किलेसे पजहन्तीति ये ते पुथुज्‍जना लाभिनो च पञ्‍च कामगुणे एत्तके तंतंझानादिवत्थुके च तंतंमग्गवज्झताय परिच्छिन्‍नत्ता एत्तके किलेसे पजहन्ति। ये नप्पजहन्तीति एत्थ वुत्तनयानुसारेन अत्थो वेदितब्बो। असुचिसुखं कायासुचिसन्‍निस्सितत्ता। अनरियेहीति अपरिसुद्धेहि। पटिलाभतो भायितब्बं किलेसदुक्खगतिकत्ता। विपाकतो भायितब्बं अपायदुक्खगतिकत्ता। गणतोपि किलेसतोपि विवित्तसुखन्ति गणसङ्गणिकतो च किलेससङ्गणिकतो च विवित्तसुखं। रागादिवूपसमत्थायाति रागादिवूपसमावहं सुखं। न भायितब्बं सम्पति आयतिञ्‍च एकन्तहितभावतो।

१५६.इञ्‍जितस्मिन्ति पच्‍चत्ते भुम्मवचनन्ति आह ‘‘इञ्‍जन’’न्तिआदि। इञ्‍जति तेनाति इञ्‍जितं, तस्स तस्स झानस्स खोभकरं ओळारिकं झानङ्गं। चतुत्थज्झानं अनिञ्‍जनं सन्‍निसिन्‍नाभावतो। तथा हि वुत्तं ‘‘ठिते आनेञ्‍जप्पत्ते’’ति (दी॰ नि॰ १.२४४-२४५; म॰ नि॰ १.३८४-३८६; पारा॰ १२-१३)।

अलं-सद्दो युत्तत्थोपि होति – ‘‘अलमेव निब्बिन्दितुं, अलं विमुच्‍चितु’’न्तिआदीसु (दी॰ नि॰ २.२७२; सं॰ नि॰ २.१२४, १२८, १३४, १४३), तस्मा अनलं अनुसङ्गं कातुं अयुत्तन्ति अत्थो। तेनाह ‘‘अकत्तब्बआलयन्ति वदामी’’ति। सन्‍निट्ठानन्ति सम्मापटिपत्तियं अलं एत्तावताति उस्साहपटिप्पस्सम्भनवसेन सन्‍निट्ठानं न कातब्बन्ति योजना। उद्धम्भागियसञ्‍ञितं अणुं वा ओरम्भागियसञ्‍ञितं थूलं वा, रूपरागोति एवरूपं अणुं वा कामासवो पटिघन्ति एवरूपं थूलं वा, मुदुना पवत्तिआकारविसेसेन अप्पसावज्‍जं, कम्मबन्धनट्ठेन वा अप्पसावज्‍जं, तब्बिपरियायतो महासावज्‍जं वेदितब्बं। नातितिक्खपञ्‍ञस्स वसेन देसनाय पवत्तत्ता ‘‘नेय्यपुग्गलस्स वसेना’’ति वुत्तं। सब्बसो हि परियादिन्‍ननिकन्तिकस्स अरियपुग्गलस्स वसेन सञ्‍ञावेदयितनिरोधस्स आगतत्ता ‘‘अरहत्तनिकूटेनेव निट्ठापिता’’ति वुत्तं। यं पनेत्थ अत्थतो न विभत्तं, तं सुविञ्‍ञेय्यमेव।

लटुकिकोपमसुत्तवण्णनाय लीनत्थप्पकासना समत्ता।

१५८.ववस्सग्गत्थेति निच्छयत्थे, इदं ताव अम्हेहि वुच्‍चमानवचनं एकन्तसोतब्बं, पच्छा तुम्हेहि कातब्बं करोथाति अधिप्पायो। वचनपरिहारोति तेहि सक्यराजूहि वुत्तवचनस्स परिहारो। लेसकप्पन्ति कप्पियलेसं। धुरवहाति धुरवाहिनो, धोरय्हाति अत्थो। पादमूलन्ति उपचारं वदति। विगच्छिस्सतीति हायिस्सति। पटिप्फरितोति न भगवतो सम्मुखाव, सक्यराजूनं पुरतोपि विप्फरितोव होति।

१५९.अभिनन्दतूति अभिमुखो हुत्वा पमोदतु। अभिवदतूति अभिरूपवसेन वदतु। पसादञ्‍ञथत्तन्ति अप्पसादस्स विपरिणामो हीनायावत्तनसङ्खातं परिवत्तनं, तेनाह ‘‘विब्भमन्तानं। विपरिणामञ्‍ञथत्त’’न्ति। कारणूपचारेन सस्सेसु बीजपरियायोति आह ‘‘बीजानं तरुणानन्ति तरुणसस्सान’’न्ति। तरुणभावेनेव तस्स भाविनो फलस्स अभावेन विपरिणामो।

१६०.कत्तब्बस्स सरसेनेव करणं चित्तरुचियं, न तथा परस्स उस्सादनेनाति आह – ‘‘पक्‍कोसियमानानं गमनं नाम न फासुक’’न्ति। मयम्पि भगवा विय दिट्ठधम्मसुखविहारेनेव विहरिस्सामाति दीपेति पकतिया विवेकज्झासयभावतो विरद्धो आगतस्स भारस्स अवहनतोयेव। तेनाह ‘‘अत्तनो भारभावं न अञ्‍ञासी’’ति।

१६१.कस्माआरभीति? सप्पायतो। पञ्‍चसता हि भिक्खू अभिनवा, तस्मा तेसं ओवाददानत्थं भगवा इमं देसनं आरभीति।

१६२.कोधुपायासस्साति एत्थ कुज्झनट्ठेन कोधो, स्वेव चित्तस्स कायस्स च अतिप्पमद्दनमथनुप्पादनेहि दळ्हं आयासट्ठेन उपायासो। अनेकवारं पवत्तित्वा अत्तना समवेतं सत्तं अज्झोत्थरित्वा सीसं उक्खिपितुं अदत्वा अनयब्यसनपापनेन कोधुपायासस्स ऊमिसदिसता दट्ठब्बा। तेनाह ‘‘कोधुपायासे’’तिआदि।

१६३.ओदरिकत्तेन खादितोति ओदरिकभावेन आमिसगेधेन मिच्छाजीवेन जीविकाकप्पनेन नासितसीलादिगुणताय खादितधम्मसरीरो।

१६४.पञ्‍चकामगुणावट्टेनिमुज्‍जित्वाति एत्थ कामरागाभिभूते सत्ते इतो च एत्तो, एत्तो च इतोति एवं मनापियरूपादिविसयसङ्खाते आवट्टे अत्तानं संसारेत्वा यथा ततो बहिभूते नेक्खम्मे चित्तम्पि न उप्पादेति, एवं आवट्टेत्वा ब्यसनापादनेन कामगुणानं आवट्टसदिसता दट्ठब्बा। तेनाह ‘‘यथा ही’’तिआदि।

१६५.रागानुद्धंसितेनाति रागेन अनुद्धंसितेन। चण्डमच्छं आगम्माति सुसुकादिचण्डमच्छं आगम्म। मातुगामं आगम्माति मातुगामो हि योनिसोमनसिकाररहितं अधीरपुरिसं इत्थिकुत्तभूतेहि अत्तनो हावभावविलासेहि अभिभुय्य गहेत्वा धीरजातियम्पि अत्तनो रूपादीहि पलोभनवसेन अनवसेसं अत्तनो उपकारधम्मे सीलादिके सम्पादेतुं असमत्थं करोन्तो अनयब्यसनं पापेति। तेनाह – ‘‘मातुगामं आगम्म उप्पन्‍नकामरागो विब्भमती’’ति।

भयं नाम यत्थ भायितब्बवत्थु, तत्थ ओतरन्तस्सेव होति, न अनोतरन्तस्स, तं ओतरित्वा भयं विनोदेत्वा तत्थ किच्‍चं साधेतब्बं, इतरथा चत्थसिद्धि न होतीति इममत्थं उपमोपमितब्बसरूपवसेन दस्सेतुं ‘‘यथा’’तिआदि वुत्तं। तत्थ उदकं निस्साय आनिसंसो पिपासविनयनं सरीरसुद्धि परिळाहूपसमो कायउतुग्गाहापनन्ति एवमादि। सासनं निस्साय आनिसंसो पन सङ्खेपतो वट्टदुक्खूपसमो, वित्थारतो पन सीलानिसंसादिवसेन अनेकविधो, सो विसुद्धिमग्गे (विसुद्धि॰ १.९) वुत्तनयेन वेदितब्बो। वुत्तप्पकारो आनिसंसो होति तानि भयानि अभिभुय्य पवत्तस्साति अधिप्पायो। इमानि अभायित्वाति इमानि कोधूपायासादिभयानि अभिभुय्य पवत्तित्वा अभायित्वा। कोधूपायासादयो हि भायति एतस्माति भयन्ति वुत्ता। थेरोति महाधम्मरक्खितत्थेरो। कामं पहानाभिसमयकालो एव सच्छिकिरियाभिसमयो, सम्मादिट्ठिया पन संकिलेसवोदानधम्मेसु किच्‍चं असंकिण्णं कत्वा दस्सेतुं समानकालिकम्पि असमानकालिकं विय वुत्तं ‘‘तण्हासोतं छिन्दित्वा निब्बानपारं दट्ठुं न सक्‍कोती’’ति। सेसं सुविञ्‍ञेय्यमेव।

चातुमसुत्तवण्णनाय लीनत्थप्पकासना समत्ता।

१६७.अनुरुद्धप्पमुखा भिक्खू भगवता ‘‘कच्‍चि तुम्हे अनुरुद्धा’’ति पुच्छिताति थेरो ‘‘तग्घ मयं, भन्ते’’ति आह।

सचे पब्बजति, जीवितं लभिस्सति, नो अञ्‍ञथाति रञ्‍ञा पब्बज्‍जाय अभिनीताति राजाभिनीता। चोराभिनीताति एत्थापि एसेव नयो। चोरानं मूलं छिन्दन्तो ‘‘कण्टकसोधनं करिस्सामी’’ति। आजीविकायाति आजीवेन जीवितवुत्तिया। इमेसु पन अनुरुद्धत्थेरादीसु।

विवेकन्ति पुब्बकालिककिरियप्पधानं ‘‘अब्यापज्‍जं उपेत’’न्तिआदीसु वियाति आह – ‘‘विविच्‍चा’’ति, विविच्‍चित्वा विवित्तो हुत्वा विना हुत्वाति अत्थो। पब्बजितकिच्‍चन्ति पब्बजितस्स सारुप्पकिच्‍चं। समणकिच्‍चन्ति समणभावकरणकिच्‍चं। यदग्गेन हि पब्बजितकिच्‍चं कातुं न सक्‍कोति तदग्गेन समणभावकरम्पि किच्‍चं कातुं न सक्‍कोति। तेनाह ‘‘सो येवा’’तिआदि।

१६८.अप्पटिसन्धिके ताव ब्याकरोन्तो पवत्तीसु ठानं अतीतोति कत्वा उपपत्तीसु ब्याकरोति नाम तत्थ पटिसन्धिया अभावकित्तनतो। महन्ततुट्ठिनोति विपुलपमोदा।

१६९.इमस्साति ‘‘अस्सा’’ति पदस्स अत्थवचनं। इमस्स ठितस्स आयस्मतो सामं दिट्ठो वा होति अनुस्सवसुतो वाति योजना। समाधिपक्खिका धम्मा धम्माति अधिप्पेता, समाधि पन एवंविहारीति एत्थ विहारसद्देन गहितो। एवंविमुत्ताति एत्थ पन विमुत्तिसद्देन फलविमुत्ति गहिता। चरतोपीति समथविपस्सनाचारेन चरतोपि विहरन्तस्सपि। उपासकउपासिकाठानेसु लब्भमानम्पि अरहत्तं अप्पकभावतो पाळियं अनुद्धटन्ति दट्ठब्बं। सेसं सुविञ्‍ञेय्यमेव।

नळकपानसुत्तवण्णनाय लीनत्थप्पकासना समत्ता।

१७५.आवासे नियुत्ताति आवासिका तस्स अनतिवत्तनतो। तेनाह ‘‘निबद्धवासिनो’’ति, नियतवासिनोति अत्थो। तन्‍निबन्धाति निबन्धं वुच्‍चति ब्यापारो, तत्थ बन्धा पसुता उस्सुकाति तन्‍निबन्धा। कथं ते तत्थ निबन्धाति आह ‘‘अकतं सेनासन’’न्तिआदि। उप्पज्‍जनकेन कालेन पत्तब्बं कालिकं सो पन कालो अनागतो एव होतीति आह ‘‘अनागते काले पत्तब्ब’’न्ति।

१७८.एत्तका वेदना सेवितब्बाति अट्ठारसपि नेक्खम्मनिस्सिता वेदना सेवितब्बा, गेहस्सिता न सेवित्ब्बा।

१८१.तं कतं सोळसविधस्सपि किच्‍चस्स निट्ठितत्ता। अनुलोमिकानीति उतुसुखभावेन अनुरूपानि। तेनाह ‘‘कम्मट्ठानसप्पायानी’’ति। समानं कुरुमानाति ओमत्ततं अधिमत्ततञ्‍च पहाय समकिच्‍चतं सम्पादेन्ता।

१८२.ते द्वे होन्तीति ते आदितो वुत्ता द्वे।

उभतो (अ॰ नि॰ टी॰ ३.७.१४) उभयथा उभोहि भागेहि विमुत्तोति उभतोभागविमुत्तो एकदेससरूपेकसेसनयेन। तथा हि वुत्तं अभिधम्मट्ठकथायं (पु॰ प॰ अट्ठ॰ २४) ‘‘द्वीहि भागेहि द्वे वारे विमुत्तोति उभतोभागविमुत्तो’’ति। तत्थ केचि ताव थेरा – ‘‘समापत्तिया विक्खम्भनविमोक्खेन, मग्गेन समुच्छेदविमोक्खेन विमुत्तोति उभतोभागविमुत्तो’’ति वदन्ति। अञ्‍ञे थेरा – ‘‘अयं उभतोभागविमुत्तो रूपतो मुच्‍चित्वा नामं निस्साय ठितो पुन ततो मुच्‍चनतो नामनिस्सितको’’ति वत्वा तस्स च साधकं –

‘‘अच्‍चि यथा वातवेगेन खित्ता, (उपसिवाति भगवा,)

अत्थं पलेति न उपेति सङ्खं।

एवं मुनि नामकाया विमुत्तो,

अत्थं पलेति न उपेति सङ्ख’’न्ति॥ (सु॰ नि॰ १०८०; चूळनि॰ उपसीवमाणवपुच्छा ११; उपसीवमाणवपुच्छानिद्देस ४३) –

इमं सुत्तपदं वत्वा ‘‘नामकायतो च रूपकायतो च सुविमुत्तत्ता उभतोभागविमुत्तो’’ति वदन्ति। सुत्ते हि आकिञ्‍चञ्‍ञायतनलाभिनो उपसिवब्राह्मणस्स भगवता नामकाया विमुत्तोति उभतोभागविमुत्तोति अक्खातोति। अपरे पन ‘‘समापत्तिया विक्खम्भनविमोक्खेन एकवारं विमुत्तो, मग्गेन समुच्छेदविमोक्खेन एकवारं विमुत्तोति एवं उभतोभागविमुत्तो’’ति वदन्ति। एत्थ पठमवादे द्वीहि भागेहि विमुत्तोति उभतोभागविमुत्तो। दुतियवादे उभतोभागतो विमुत्तोति उभतोभागविमुत्तो। ततियवादे पन द्वीहि भागेहि द्वे वारे विमुत्तोति अयमेतेसं विसेसो। किलेसेहि विमुत्तो किलेसा वा विक्खम्भनसमुच्छेदेहि कायद्वयतो विमुत्ता अस्साति अयमत्थो दट्ठब्बो। तेनाह ‘‘द्वीहि भागेही’’तिआदि।

सोति उभतोभागविमुत्तो। कामञ्‍चेत्थ रूपावचरचतुत्थज्झानम्पि अरूपावचरज्झानं विय दुवङ्गिकं आनेञ्‍जप्पत्तन्ति वुच्‍चति। तं पन पदट्ठानं कत्वा अरहत्तं पत्तो उभतोभागविमुत्तो नाम न होति रूपकायतो अविमुत्तत्ता। तञ्हि किलेसकायतोव विमुत्तं, न रूपकायतो, तस्मा ततो वुट्ठाय अरहत्तं पत्तो उभतोभागविमुत्तो न होतीति आह – ‘‘चतुन्‍नं अरूप…पे॰… पञ्‍चविधो होती’’ति। ‘‘रूपी रूपानि पस्सती’’तिआदिके निरोधसमापत्तिअन्ते अट्ठ विमोक्खे वत्वा – ‘‘यतो च खो, आनन्द, भिक्खु इमे अट्ठ विमोक्खे कायेन फुसित्वा विहरति, पञ्‍ञाय चस्स दिस्वा आसवा परिक्खीणा होन्ति, अयं वुच्‍चति, आनन्द, भिक्खु उभतोभागविमुत्तो’’ति यदिपि महानिदाने (दी॰ नि॰ २.१२९-१३०) वुत्तं, तं पन उभतोभागविमुत्तसेट्ठवसेन वुत्तन्ति इध सब्बउभतोभागविमुत्तसङ्गहणत्थं ‘‘पञ्‍चविधो होती’’ति वत्वा ‘‘पाळि पनेत्थ…पे॰… अभिधम्मे अट्ठविमोक्खलाभिनो वसेन आगता’’ति आह। इधापि हि कीटागिरिसुत्ते ‘‘इध, भिक्खवे, एकच्‍चो पुग्गलो…पे॰… उभतोभागविमुत्तो’’ति अरूपसमापत्तिवसेन चत्तारो उभतोभागविमुत्ता, सेट्ठो च वुत्तो वुत्तलक्खणूपपत्तितो। यथावुत्तेसु हि पञ्‍चसु पुरिमा चत्तारो निरोधं न समापज्‍जन्तीति परियायेन उभतोभागविमुत्ता नाम। अट्ठसमापत्तिलाभी अनागामी तं समापज्‍जित्वा ततो वुट्ठाय विपस्सनं वड्ढेत्वा अरहत्तं पत्तोति निप्परियायेन उभतोभागविमुत्तसेट्ठो नाम।

१८३.आदिकेनेवाति पठमेनेव। अनुपुब्बसिक्खाति अनुपुब्बेनेव पवत्तसिक्खाय। तेनाह ‘‘करणत्थे पच्‍चत्तवचन’’न्ति। सद्धा जाता एतस्साति सद्धाजातो, अग्याहितातिपक्खेपेन जात-सद्दस्स पच्छावचनं । एवमेतन्ति अधिमुच्‍चनं ओकप्पनियसद्धा। सन्तिके निसीदति उपट्ठानवसेन। साधुकं कत्वा धारेतीति यथासुतं धम्मं वाचुग्गतकरणवसेन तं पगुणं कत्वा सारवसेन धारेति। छन्दो जायतीति धम्मेसु निज्झानक्खमेसु इमे धम्मे भावनापञ्‍ञाय पच्‍चक्खतो उस्सामीति कत्तुकम्यताकुसलच्छन्दो जायति। उस्सहतीति छन्दो उप्पादमत्ते अट्ठत्वा ततो भावनारम्भवसेन उस्सहति। तुलयतिति सम्मसनवसेन सङ्खारे। तीरणविपस्सनाय तुलयन्तोति तीरणपरिञ्‍ञाय जानित्वा उपरि पहानपरिञ्‍ञाय वसेन परितुलयन्तो पटिजानन्तो। मग्गपधानं पदहतीति मग्गलक्खणं पधानिकं मग्गं पदहति। पेसितचित्तोति निब्बानं पति पेसितचित्तो। नामकायेनाति मग्गप्पटिपाटिया तंतंमग्गसम्पयुत्तनामकायेन। न पन किञ्‍चि आहाति दूरताय समानं न किञ्‍चि वचनं भगवा आह ते दळ्हतरं निग्गण्हितुं।

१८४.पणेन वोहारेन ब्याकरणं पणविया, पणविया अभावेन ओपणविया, न उपेतीति न युज्‍जति। तन्ति इदं इध अधिप्पेतं पणो पणवियं दस्सेतुं। तयिदं सब्बं भगवा ‘‘मयं खो, आवुसो, सायञ्‍चेव भुञ्‍जामा’’ति अस्सजिपुनब्बसुकेहि वुत्तं सिक्खाय अवत्तनभावदीपनवचनं सन्धाय वदति।

उक्खिपित्वाति सीसेन गहेत्वा विय समादाय। अनुधम्मोति अनुरूपो सभावो, सावकभावस्स अनुच्छविका पटिपत्ति। रोहनीयन्ति विरुळ्हिभावं। सिनिय्हति एत्थ, एतेन वाति सिनेहो, कारणं। तं एत्थ अत्थीति सिनेहवन्तं, पादकन्ति अत्थो। तचो एकं अङ्गन्ति तचो वीरपक्खभावे एकमङ्गं। पधानं अनुयुञ्‍जन्तस्स हि तचे पलुज्‍जमानेपि तंनिमित्तं अवोसानं अनापज्‍जनकस्सेव वीरियस्स एकं अङ्गं एकं कारणं। एवं सेसेसु वत्तब्बं। तेनाह – ‘‘अरहत्तं अप्पत्वा न वुट्ठहिस्सामीति एवं पटिपज्‍जती’’ति। सेसं सुविञ्‍ञेय्यमेव।

कीटागिरिसुत्तवण्णनाय लीनत्थप्पकासना समत्ता।

निट्ठिता च भिक्खुवग्गवण्णना।