खुद्दसिक्खा-पुराणटीका

३-४.इदानि दुतियं दस्सेतुं ‘‘आदियेय्या’’तिआदिमाह। ‘‘आदियेय्या’’तिआदीनं पदानं ‘‘अदिन्‍नं थेय्यचित्तेन भवे पाराजिको’’ति इमिना सम्बन्धो। आदियेय्याति आरामादिं अभियुञ्‍जित्वा यो भिक्खु गण्हेय्य, सो भवे पाराजिकोति अत्थो। एवं सेसेसुपि। हरेय्याति वेतनेन वा मित्तभावेन वा अञ्‍ञस्स भण्डं हरन्तो पुन थेय्यचित्ते उप्पन्‍ने ‘‘सीसे भारं थेय्यचित्तो आमसती’’तिआदिना गण्हेय्याति अत्थो। अवहरेय्याति ‘‘उपनिक्खित्तं भण्डं ‘देहि मे भण्ड’न्ति वुच्‍चमानो ‘नाहं गण्हामी’’तिआदिना अवहरेय्य। इरियापथं कोपेय्याति ‘‘सहभण्डहारकं नेस्सामी’’ति तेनेव पुरिसेन तं नेतुं तस्स गमनपथं वारेत्वा अञ्‍ञेन मग्गेन तं सन्तज्‍जेत्वा नेति, एवं नेन्तस्स तस्स पुरिसस्स पठमपादे थुल्‍लच्‍चयं, दुतियपादुद्धारे पाराजिकं। ‘‘थलट्ठं भण्डं थेय्यचित्तो आमसती’’तिआदिना ठाना चावेय्य। परिकप्पितट्ठानं वा सुङ्कघातं वा अतिक्‍कामेन्तो सङ्केतं वीतिनामेय्य। यं किञ्‍चि परपरिग्गहितं सस्सामिकं भण्डं तेहि सामिकेहि कायेन वा वाचाय वा न दिन्‍नन्ति अदिन्‍नं।

इदानि न इमिनाव आकारेन अवहारको पाराजिको होति, अञ्‍ञथापि होतीति दस्सेतुं ‘‘अथ वा’’तिआदि वुत्तं। थेय्यावहारको च बलावहारको च कुसावहारको च पटिच्छन्‍नावहारको च परिकप्पावहारको च भवे पाराजिकोति सम्बन्धो। तत्थ थेय्यावहारो नाम सन्धिच्छेदादीहि वा कंसकूटमानकूटतुलाकूटादीहि वा वञ्‍चेत्वा गहणं। पसय्हावहारो बलावहारो। कुससङ्कमनं कत्वा परकोट्ठासग्गहणं कुसावहारो। परभण्डं पंसुआदिना पटिच्छादेत्वा सामिकेसु अपस्सित्वा गतेसु पच्‍चागन्त्वा गहणं पटिच्छन्‍नावहारो। परिकप्पावहारो पन दुविधो भण्डोकासवसेन। तत्थ ‘‘साटको चे, गण्हिस्सामि, सुत्तञ्‍चे, न गण्हिस्सामी’’ति भण्डं परिकप्पेत्वा अन्धकारे पसिब्बकं गण्हाति। तत्थ चे साटको होति, उद्धारेयेव पाराजिकं। सचे सुत्तं होति, रक्खति, पुन ‘‘सुत्त’’न्ति ञत्वापि ‘‘यं लद्धं, तं गहेतब्ब’’न्ति उग्गण्हन्तो उद्धारेयेव पाराजिकं, अयं भण्डपरिकप्पो। ओकासपरिकप्पो गब्भद्वारप्पमुखविहारादीनं वसेन परिच्छेदं करोति ‘‘सचे मं एत्थन्तरे पस्सन्ति, दस्सामि, नो चे पस्सन्ति, गण्हित्वा गच्छामी’’ति, तस्स तं परिकप्पितपरिच्छेदं अतिक्‍कमन्तस्स पदवारेन पाराजिकं वेदितब्बं, अयं ओकासपरिकप्पो।

इदानि इमस्मिं अदिन्‍नादाने विनिच्छयनयं दस्सेतुं ‘‘भण्डकालग्घदेसेही’’तिआदि वुत्तं। एत्थाति अदिन्‍नादाने। निच्छयोति विनिच्छयो कातब्बोति अत्थो। तत्थ केनचि भिक्खुना ‘‘मया इदं नाम भण्डं थेय्यचित्तेन गहित’’न्ति वुत्ते विनयधरेन सहसाव तं आपत्तिं अनारोपेत्वा तस्स भण्डस्स सामिकअस्सामिकभावं उपपरिक्खित्वा यदि सस्सामिकं, तस्स भण्डस्स अग्घवसेन आपत्तिया कारेतब्बो। सचे निरालयकाले गहितं , पाराजिकेन न कारेतब्बो, अयं भण्डवसेन विनिच्छयो।

कालोति अवहारकालो। तदेव हि भण्डं कदाचि महग्घं होति, कदाचि अप्पग्घं, तस्मा यस्मिं काले अवहटं, तस्मिं काले यो तस्स अग्घो, तेन अग्घेन आपत्तिया कारेतब्बो, अयं कालवसेन विनिच्छयो।

५.इदानि ततियं दस्सेतुं ‘‘मनुस्सविग्गह’’न्तिआदि आरद्धं। तत्थ मनुस्सविग्गहन्ति पटिसन्धिविञ्‍ञाणेन सद्धिं उप्पन्‍नं कललरूपं आदिं कत्वा पकतिया वीसतिवस्ससतायुकस्स सत्तस्स याव मरणकाला एत्थन्तरे अनुपुब्बेन वुद्धिप्पत्तो अत्तभावो, एसो मनुस्सविग्गहो नाम, एवरूपं मनुस्सविग्गहन्ति अत्थो। चिच्‍चाति वधकचेतनावसेन सञ्‍चेतेत्वा पकप्पेत्वा अभिवितरित्वा वीतिक्‍कमोति अत्थो। जीविता वा वियोजयेति वुत्तप्पकारं मनुस्सविग्गहं कललकालेपि तापनमद्दनेहि वा भेसज्‍जसम्पदानेन वा ततो वा उद्धम्पि तदनुरूपेन उपक्‍कमेन सन्ततिविकोपनवसेन यो जीविता वियोजेय्य, सो चुतो भवेति सम्बन्धो। किञ्‍च भिय्यो – ‘‘सत्थहारकं वा’’तिआदि वुत्तं। एत्थ हरतीति हारकं, किं हरति? जीवितं, हरितब्बन्ति वा हारकं, उपनिक्खिपितब्बन्ति अत्थो, सत्थञ्‍च तं हारकञ्‍चाति सत्थहारकं। अस्साति मनुस्सविग्गहस्स। यथा मनुस्सविग्गहो इच्छितिच्छितक्खणे तं असिआदिसत्थं पटिलभति, तथा सयं मरणचेतनो मरणाधिप्पायो हुत्वा उपनिक्खिपेय्य। सोपि चुतो भवेति अत्थो। एतेन थावरप्पयोगं दस्सेति।

६-७.इदानि ‘‘मरणवण्णं वा संवण्णेय्या’’तिआदिविधिं दस्सेतुं ‘‘गाहेय्य मरणूपायं, वदेय्य मरणे गुण’’न्ति वुत्तं। तत्थ ‘‘सत्थं वा आहर, विसं वा खाद, रज्‍जुया वा उब्बन्धित्वा कालं करोही’’तिआदिना नयेन मरणत्थाय उपायं गाहेय्य। मरणसंवण्णना पनेत्थ बहुविधा ‘‘कायेन संवण्णेति, वाचाय कायवाचाय दूतेन लेखाय वा संवण्णेती’’ति वुत्तत्ता। तत्थ कायेन संवण्णेति नाम कायेन विञ्‍ञापेति। ‘‘यो पपाते पपतनादीनि कत्वा मरति, सो धनं वा लभति, यसं वा लभति, सग्गं वा गच्छती’’तिआदिना नयेन संवण्णेति, आपत्ति दुक्‍कटस्स। तस्स वचनं सुत्वा कोचि ‘‘मरिस्सामी’’ति दुक्खं वेदनं उप्पादेति, थुल्‍लच्‍चयं। मरति चे, पाराजिकं। एवं सेसेसुपि। दूतेन संवण्णनायं पन दूतस्स सासनं आरोचापेति ‘‘एवं आरोचेही’’ति, ‘‘यो एवं मरति, सो धनं वा लभती’’ति सब्बं पुरिमसदिसमेव। लेखाय संवण्णेति नाम गिरिपब्बतपुराणादिलेखं लिखति, ‘‘यो एवं मरती’’तिआदि वुत्तनयमेव। एत्थापि यो मरणूपायं वा गाहेय्य, मरणे वा गुणं वदेय्य, सो चुतो भवेति सम्बन्धो।

इदानि पन इमस्स मनुस्सविग्गहस्स छब्बिधे पयोगे दस्सेतुं ‘‘पयोगा’’तिआदि आरद्धं। साहत्थिकनिस्सग्गिकआणत्तिकथावरइद्धिमयविज्‍जामयानं वसेन तस्स मनुस्सविग्गहस्स छप्पयोगाति अधिप्पायो। तत्थ साहत्थिकोति सयं मारेन्तस्स कायेन वा कायप्पटिबद्धेन वा पहरणं। निस्सग्गिकोति दूरे ठितं मारेतुकामस्स कायादीहि उसुसत्तियन्तपासाणादीनं निस्सज्‍जनं। आणत्तिकोति ‘‘असुकं नाम मारेही’’ति अञ्‍ञं आणापेन्तस्स आणापनं। थावरोति ओपातक्खणनं, अपस्सेनसंविधानं, असिआदीनं उपनिक्खिपनं, तळाकादीसु विससम्पयोजनं, रूपूपहारोति एवमादि। कम्मविपाकजाय इद्धिया पयोजनं इद्धिपयोगं। मारणत्थाय विज्‍जानं परिजप्पनं विज्‍जामयोति।

इदानि इमेसु छसु पयोगेसु आणत्तियं सङ्केतविसङ्केततं दस्सेतुं ‘‘कालवत्थावुधिरियापथा’’तिआदिमाह। तत्थ कालोति पुब्बण्हसायन्हादिकालो च योब्बनथावरियादिकालोपि च। इमेसु यं किञ्‍चि कालं नियमेत्वा ‘‘इमस्मिं नाम काले मारेही’’ति आणत्तो सचे तस्मिंयेव काले मारेति, आणत्तिक्खणेयेव पाराजिकं। सचे नियमितकालतो पुरे वा पच्छा वा मारेति, आणापको मुच्‍चति। वत्थूति मारेतब्बो पुग्गलो। सचे आणत्तो तमेव मारेति, आणापकस्स आणत्तिक्खणेयेव पाराजिकं। अथ अञ्‍ञं मारेति, आणापको मुच्‍चति। एवं सेसेसुपि वुत्तनयेनेव विनिच्छयो वेदितब्बो। आवुधन्ति असिआदि। इरियापथोति मारेतब्बस्स गमनं वा निसज्‍जा वाति एवमादिको। किरियाविसेसोति विज्झनं वा छेदनं वा भेदनं वा सूलारोपनं वाति एवमादिको। ओकासोति गामो वा वनं वा गेहं वाति एवमादिको। इमेसु यथा यथा वधको आणत्तो, तथा तथा कते आणापकस्स आपत्ति, अञ्‍ञथा कते विसङ्केतो होति। आणत्तियं पन अयं विसेसो ‘‘अधिट्ठायाति अधिट्ठहित्वा आणापेति ‘एवं विज्झ, एवं पहर, एवं घातेही’’ति वुत्ताय पाळिया लब्भतीति ञातब्बो।

ततियं।

८-९.इदानि चतुत्थं दस्सेतुं ‘‘झानादिभेद’’न्तिआदिमाह। तस्सत्थो – ‘‘झानं विमोक्खो समाधि समापत्ति ञाणदस्सनं मग्गभावना फलसच्छिकिरिया किलेसप्पहानं विनीवरणता चित्तस्स सुञ्‍ञागारे अभिरती’’ति एवं वुत्तं उत्तरिमनुस्सधम्मं अत्तनि नत्थिताय नोसन्तं ‘‘मयि अत्थी’’ति अत्तनि वा तं ‘‘अहं एत्थ सन्दिस्सामी’’ति अत्तानं वा तत्थ उपनेत्वा दीपेन्तो चुतो भवे। कोट्ठासं वाति एत्थ ‘‘झानलाभी, विमोक्खलाभी, समाधिलाभी, समापत्तिलाभीम्ही’’ति एवमादिना नयेन कोट्ठासतो वाति अत्थो। एकेकं वाति ‘‘पठमस्स झानस्स लाभी, दुतियस्स झानस्स लाभीम्ही’’ति एवमादिना नयेन एकेकं वाति अत्थो। ‘‘अतीतभवे सोतापन्‍नोम्ही’’ति वदतो अतीतभवं सन्धाय कथितत्ता पाराजिकं नत्थि, तस्मा ‘‘पच्‍चुप्पन्‍नभवस्सित’’न्ति वुत्तं, तस्स पच्‍चुप्पन्‍नभवनिस्सितं कत्वाति अत्थो। अञ्‍ञापदेसरहितन्ति ‘‘यो ते विहारे वसति, सो भिक्खु पठमस्स झानस्स लाभी’’तिआदिना नयेन अञ्‍ञापदेसं विनाति अत्थो। एवं दीपेन्तो हि थुल्‍लच्‍चयमापज्‍जति। दीपेन्तोति ‘‘पठमं झानं समापज्‍जिं, समापज्‍जामि, समापन्‍नो, पठमस्स झानस्स लाभीम्हि, वसीम्हि, सच्छिकतं अस्सा’’ति एवमादिना नयेन दीपेन्तोति अत्थो। ‘‘अधिगतो’’ति मानो अधिमानो, सो यस्स नत्थि, सो अनधिमानिको। केन एवं दीपेन्तोति चे? तं दस्सेतुं ‘‘कायेन वाचा’’तिआदि वुत्तं , कायेन वा वाचाय वा तदुभयेन वाति अत्थो। विञ्‍ञत्तिपथेति यत्थ ठितो मनुस्सजातिको गहट्ठो वा पब्बजितो वा तस्स वचनं पकतिसोतेन सुत्वा समनन्तरमेव ‘‘इमं नाम एस वदती’’ति जानाति, तत्थ ठत्वा दीपेन्तो चुतो भवे, न देवब्रह्मादीसु अञ्‍ञतरेन ञातेति अत्थो।

चतुत्थं।

१०.इदानि चतुन्‍नम्पि साधारणविनिच्छयं वत्तुं ‘‘पाराजिकेते चत्तारो’’तिआदिमाह। तत्थायं सङ्खेपो – चत्तारोपि एते पाराजिका ‘‘एककम्मं एकुद्देसो समसिक्खता’’ति एवं वुत्तसंवासस्स अभब्बताय असंवासा, यथापुरे पुब्बे गिहिकाले च अनुपसम्पन्‍नकाले च असंवासिका, एवं पच्छा पाराजिकं आपन्‍नापि असंवासाति। किञ्‍च भिय्यो – अभब्बा भिक्खुभावाय पुन तेन अत्तभावेन उपसम्पदाय अवत्थुताय उपसम्पन्‍ना भवितुम्पि अभब्बाति अत्थो। किं वियाति चे? सीसच्छिन्‍नोव जीवितुं, यथापि सीसच्छिन्‍नो तेन अत्तभावेन पुन जीवितुं अभब्बो, एवमिमे चत्तारोति अधिप्पायो।

११.इदानि इमेसु चतूसु पाराजिकेसु ये परियायाणत्तीहि सम्भवन्ति, ते दस्सेतुं ‘‘परियायो चा’’तिआदि वुत्तं। तत्थ परियायोति मरणाधिप्पायस्स कायपयोगो वा वचीपयोगो वा। तस्मा ‘‘यो ईदिसे मुहुत्ते सत्थं वा आहरित्वा विसं वा खादित्वा सोब्भादीसु वा पपतित्वा मरति, सो धनं वा लभति, यसं वा लभती’’तिआदिना नयेन मरणं अभिनन्दन्तो ‘‘इदं सुत्वा यो कोचि मरतू’’ति यो परियायेन वदति, तं सुत्वा सचे कोचि तथा मरति, पाराजिकं। नियमितेन पन यं सन्धाय वुत्तं, तस्सेव मरणे पाराजिकं। आणत्ति पन वुत्तत्थायेव। ततिये मनुस्सविग्गहपाराजिके लब्भतीति सम्बन्धो। दुतिये पन अदिन्‍नादाने आणत्ति एव लब्भति, न परियायोति अत्थो। कस्मा नं परियायेन नापज्‍जतीति? यथा मनुस्सविग्गहे ‘‘मरणवण्णं वा संवण्णेय्या’’ति वुत्तं, तथा इध अदिन्‍नादाने ‘‘वण्णं वा संवण्णेय्या’’ति अवुत्तत्ता। सेसेसूति पठमचतुत्थेसु परियायाणत्तिद्वयं न लब्भतीति अत्थो।

१२.इदानि चतूसुपि यथासम्भवं अङ्गभेदं दस्सेतुं ‘‘सेवेतुकामताचित्त’’न्तिआदि वुत्तं। तत्थ मेथुनधम्मस्साति मेथुनधम्मपाराजिकस्स। बुधाति विनयधरा।

१३.मनुस्ससन्ति मनुस्ससन्तकता। एतेन पेततिरच्छानगतपरिग्गहेसु अनापत्तीति दीपितं होति। तथासञ्‍ञीति मनुस्ससन्तकवसेन परपरिग्गहितसञ्‍ञीति अत्थो। वत्थुनो गरुताति पञ्‍चमासकं वा अतिरेकपञ्‍चमासकं वा तदग्घनकं भण्डं वा होतीति अत्थो। अवहारो चाति पञ्‍चवीसतिया अवहारेसु येन केनचि अवहारो होतीति अत्थो। अदिन्‍नादानहेतुयोति अदिन्‍नादानपाराजिकस्स एतानि पञ्‍च अङ्गानीति अधिप्पायो।

१४.पाणो मानुस्सकोति मनुस्सजातिकपाणो। तस्मिं पाणे पाणसञ्‍ञिता। घातचेतनाति वधकचेतना। पयोगोति तंसमुट्ठितो साहत्थिकादीनं छन्‍नं पयोगानं अञ्‍ञतरपयोगो। तेन पयोगेन मरणं। पञ्‍चेते वधहेतुयोति मनुस्सविग्गहपाराजिकस्स पञ्‍च अङ्गानीति अत्थो।

१५.असन्तताति उत्तरिमनुस्सधम्मस्स अत्तनि असन्तता चाति अत्थो। पापमिच्छतायारोचनाति इमिना यो केवलं पापमिच्छतं विना मन्दत्ता मोमूहत्ता भणति, तस्स अनापत्तीति दीपितं होति। तस्साति यस्स आरोचेति, तस्स मनुस्सजातिता च। ‘‘यो ते विहारे वसति, सो भिक्खु अरहा’’तिआदिना (परि॰ १६०, ३३६) नाञ्‍ञापदेसो च। तदेवाति तदा एव तङ्खणेयेव जाननं। असन्तदीपनेति उत्तरिमनुस्सधम्मारोचनपाराजिकेति अत्थो।

१६.इदानि ‘‘पाराजिका च चत्तारो’’ति एत्थ च-सद्देन सङ्गहितेहि सद्धिं समोधानेत्वा दस्सेतुं ‘‘असाधारणा चत्तारो’’तिआदि वुत्तं। तत्थ उब्भजाणुमण्डलिका वज्‍जप्पटिच्छादिका उक्खित्तानुवत्तिका अट्ठवत्थुकाति इमे चत्तारो भिक्खुनीनं भिक्खूहि असाधारणा नाम। एतासु उब्भजाणुमण्डलिका नाम या कायसंसग्गरागेन अवस्सुता तेनेव रागेन अवस्सुतस्स मनुस्सपुरिसस्स अक्खकानं अधो, जाणुमण्डलानं कप्परानञ्‍च उपरि येन केनचि सरीरावयवेन आमसनादिं सादियति, तस्सा अधिवचनं। या पन भिक्खुनी अञ्‍ञिस्सा भिक्खुनिया पाराजिकसङ्खातं वज्‍जं जानं पटिच्छादेति, सा वज्‍जप्पटिच्छादिका नाम। समग्गेन पन सङ्घेन उक्खित्तं भिक्खुं या भिक्खुनी यंदिट्ठिको सो होति, तस्सा दिट्ठिया गहणवसेन अनुवत्तति, सा उक्खित्तानुवत्तिका नाम। या पन कायसंसग्गरागेन तिन्ता तथाविधस्सेव पुरिसस्स हत्थग्गहणं वा सङ्घाटिकण्णग्गहणं वा सादियति, कायसंसग्गसङ्खातस्स असद्धम्मस्स पटिसेवनत्थाय पुरिसस्स हत्थपासे सन्तिट्ठति वा, तत्थ ठत्वा सल्‍लपति वा, सङ्केतं वा गच्छति, पुरिसस्स आगमनं वा सादियति, केनचि वा पटिच्छन्‍नोकासं पविसति, हत्थपासे ठत्वा कायं उपसंहरति, अयं अट्ठवत्थुका नामाति वेदितब्बा।

अभब्बकाएकादसाति एत्थ पण्डको थेय्यसंवासको तित्थियपक्‍कन्तको तिरच्छानगतो मातुघातको पितुघातको अरहन्तघातको भिक्खुनिदूसको सङ्घभेदको लोहितुप्पादको उभतोब्यञ्‍जनकोति इमे एकादस अभब्बपुग्गला नाम। विब्भन्ता भिक्खुनीति यदा भिक्खुनी विब्भमितुकामा हुत्वा सेतवत्थं वा कासायमेव वा गिहिनिवासनाकारेन निवासेति, तदा पाराजिकमापन्‍ना नाम होति, पुन उपसम्पदं न लभति, सा च पाराजिकाति अत्थो। मुदुपिट्ठिको नाम कतपरिकम्माय मुदुकाय पिट्ठिया समन्‍नागतो। सो एत्तावता न पाराजिको, अथ खो यदा अनभिरतिया पीळितो अत्तनो अङ्गजातं अत्तनो मुखमग्गवच्‍चमग्गेसु अञ्‍ञतरं पवेसेति, तदा पाराजिको होति।

१७-१८.लम्बीति अङ्गजातस्स दीघत्ता एवं वुत्तो। सोपि यदा अनभिरतिया पीळितो अत्तनो अङ्गजातं अत्तनो मुखे वा वच्‍चमग्गे वा पवेसेति, तदा पाराजिको होति। मुखेन गण्हन्तोति एत्थ यो अनभिरतिया पीळितो परस्स सुत्तस्स वा पमत्तस्स वा अङ्गजातं अत्तनो मुखेन गण्हाति, सो चाति अत्थो। तत्थेवाति परस्स अङ्गजातेवाति अत्थो । यो अनभिरतिया पीळितो परस्स अङ्गजातं कम्मनियं दिस्वा अत्तनो वच्‍चमग्गेन तस्स उपरि निसीदति, तं अत्तनो वच्‍चमग्गं पवेसेति, सो चाति अत्थो। एते चत्तारो अनुलोमिका मेथुनस्साति सम्बन्धो। कथमिति चे? मग्गे मग्गप्पवेसनसदिसताय, न उभिन्‍नं रागवसेन सदिसभावूपगतानं द्वयंद्वयसमापत्तिसदिसताय। इधागता चत्तारोति मेथुनधम्मादिवसेन पाराजिका चत्तारो चाति एवं समोधानतो चतुवीसति पाराजिकाति अत्थो।

एत्थाह – मातुघातकपितुघातकअरहन्तघातका ततियपाराजिकं आपन्‍ना, भिक्खुनिदूसको लम्बीआदयो चत्तारो पठमपाराजिकं आपन्‍नायेवाति कत्वा कुतो चतुवीसतीति? अधिप्पायो पनेत्थ अत्थि, मातुघातकादयो हि चत्तारो इध अनुपसम्पन्‍नायेव अधिप्पेता, लम्बीआदयो चत्तारो किञ्‍चापि पठमपाराजिकेन सङ्गहिता, यस्मा एकेन परियायेन मेथुनधम्मं अप्पटिसेविनोपि होन्ति, तस्मा विसुं वुत्ताति। पाराजिकविनिच्छयो।

पाराजिकनिद्देसवण्णना निट्ठिता।

२०.इदानि कायसंसग्गं दीपेतुं ‘‘इत्थिसञ्‍ञी’’तिआदि आरद्धं। तत्थ इत्थिसञ्‍ञीति तदहुजातायपि मनुस्सित्थिया इत्थिसञ्‍ञीयेव हुत्वाति अत्थो। सचे तत्थ वेमतिको वा पण्डकपुरिसतिरच्छानगतसञ्‍ञी वा होति, थुल्‍लच्‍चयं, तथा इत्थिया कायेन कायप्पटिबद्धामसने च कायप्पटिबद्धेन कायामसने च यक्खीपेतीपण्डकानं कायेन कायामसने च। पुरिसतिरच्छानगतित्थीनं पन कायेन कायामसनेपि दुक्‍कटं, तथा यक्खीआदीनं कायेन कायप्पटिबद्धादीसु च। मतित्थिया पन थुल्‍लच्‍चयं। कायसंसग्गरागवाति इमिना मातुपेमादिं मोक्खाधिप्पायञ्‍च पटिक्खिपति। सम्फुसन्तोति कायसंसग्गरागेन उपक्‍कम्म अन्तमसो लोमेनपि मनुस्सित्थिं सम्फुसन्तोति अत्थसम्बन्धो। इमिना यो इत्थिया आलिङ्गतोपि कायेन न वायमति, केवलं फस्संयेव अनुभवति, तस्स अनापत्तीति दीपितं होति।

कायसंसग्गसिक्खापदं दुतियं।

२१.इदानि दुट्ठुल्‍लवाचं पकासेतुं ‘‘तथा सुणन्ति’’न्तिआदि आरद्धं। तत्थ तथाति इत्थिसञ्‍ञी। मनुस्सित्थिं सुणन्तिन्ति सम्बन्धो। सुणन्तिन्ति इमिना पटिबलायपि इत्थिया अविञ्‍ञत्तिपथे ठिताय दूतेन वा पण्णेन वा आरोचेन्तस्स दुट्ठुल्‍लवाचापत्तिन होतीति दीपितं होति। विञ्‍ञुञ्‍चाति इमिना या महल्‍लिकापि बालापि एळमूगापि असद्धम्मप्पटिसंयुत्तं कथं न जानाति, सा इध नाधिप्पेताति दस्सेति। वच्‍चमग्गपस्सावमग्गानं वसेन मग्गं वा मेथुनं वा आरब्भाति सम्बन्धो। दुट्ठुल्‍लवाचाय रागो दुट्ठुल्‍लवाचारागो, तेन दुट्ठुल्‍लवाचारागेन। तं अस्सादेन्तो ओभासेत्वा दुरुत्तवचनं वत्वा गरुकं फुसेति अत्थो।

कथं द्वे मग्गे आरब्भ पसंसति गरहति? तत्थ पसंसायपि ताव ‘‘इत्थिलक्खणेन सुभलक्खणेन समन्‍नागतासी’’ति वदति, न तावसीसं एति। ‘‘तव वच्‍चमग्गो च पस्सावमग्गो च सुभो सुसण्ठानो दस्सनीयो, ईदिसेन नाम इत्थिलक्खणेन सुभलक्खणेन समन्‍नागतासी’’ति वदति, सीसं एति, सङ्घादिसेसो होतीति अत्थो। गरहणे पन ‘‘सिखरणीसि, सम्भिन्‍नासि, उभतोब्यञ्‍जनासी’’ति इमानि तीणि सुद्धानियेव सीसं एन्ति वच्‍चमग्गपस्सावमग्गानं नियतवचनत्ता अच्‍चोळारिकत्ता च। अञ्‍ञानि पन ‘‘अनिमित्तासि, निमित्तमत्तासी’’तिआदीनि मग्गानं अनियतवचनत्ता मेथुनेन घटेत्वा वुत्तानि एव सीसं एन्ति। मेथुनप्पटिसंयुत्ते ‘‘देहि मे, अरहसि मे दातु’’न्तिआदीहि पन सीसं न एति, ‘‘मेथुनधम्मं देही’’तिआदिना मेथुनधम्मे घटितेयेव सङ्घादिसेसो। इत्थिया वच्‍चमग्गपस्सावमग्गे ठपेत्वा अधक्खकं उब्भजाणुमण्डलं आदिस्स वण्णादिभणने थुल्‍लच्‍चयं, तथा यक्खीपेतीपण्डकेसु वच्‍चमग्गपस्सावमग्गे मेथुनेपि। इमेसं पन यक्खीआदीनं अधक्खकादिके वुत्तप्पकारे पदेसे दुंक्‍कटं, तथा इत्थियादीनं उब्भक्खके अधोजाणुमण्डले कायप्पटिबद्धे चाति।

दुट्ठुल्‍लवाचासिक्खापदं ततियं।

२२.इदानि अत्तकामपारिचरियं दस्सेतुं ‘‘वत्वा’’तिआदि वुत्तं। तत्थ वत्वाति दुट्ठुल्‍लोभासने वुत्तप्पकारं इत्थिं इत्थिसञ्‍ञीयेव हुत्वा वत्वाति अत्थो। अत्तकामुपट्ठानवण्णन्ति एत्थ मेथुनधम्मसङ्खातेन कामेन उपट्ठानं कामुपट्ठानं, अत्तनो अत्थाय कामुपट्ठानं अत्तकामुपट्ठानं, अत्तना वा कामितं इच्छितन्ति अत्तकामं, सयं मेथुनरागवसेन पत्थितन्ति अत्थो, अत्तकामञ्‍च तं उपट्ठानञ्‍चाति अत्तकामुपट्ठानं, तस्स वण्णो अत्तकामुपट्ठानवण्णो, तं अत्तकामुपट्ठानवण्णं। ‘‘एतदग्गं, भगिनि, पारिचरियानं या मादिसं सीलवन्तं कल्याणधम्मं ब्रह्मचारिं एतेन धम्मेन परिचरेय्या’’ति एवं वत्वाति सम्बन्धो। मेथुनरागिनोति इमिना गिलानपच्‍चयादीहि उपट्ठानस्स वण्णं भणतो अनापत्तीति दीपितं होति। वाचा मेथुनयुत्तेनाति एत्थ मेथुनयुत्तेनेव वाचाय मेथुनयाचने गरुकं होति, न अञ्‍ञथाति अधिप्पायो।

अत्तकामपारिचरियसिक्खापदं चतुत्थं।

२३.इदानि सञ्‍चरित्तं दस्सेतुं ‘‘पटिग्गहेत्वा’’तिआदि आरद्धं। तत्थ पटिग्गहेत्वाति इत्थिया वा पुरिसेन वा उभिन्‍नं मातादीहि वा ‘‘भन्ते, इत्थन्‍नामं इत्थिं वा पुरिसं वा एवं भणाही’’ति वुत्तो तेसं वचनं ‘‘साधू’’ति वा ‘‘होतू’’ति वा ‘‘भणामी’’ति वा येन केनचि आकारेन वचीभेदं कत्वा, सीसकम्पनादीहि वा सम्पटिच्छित्वाति अत्थो। सन्देसन्ति एत्थ पन इत्थी दसविधा मातुरक्खिता पितुरक्खिता मातापितुरक्खिता भातुरक्खिता भगिनिरक्खिता ञातिरक्खिता गोत्तरक्खिता धम्मरक्खिता सारक्खा सपरिदण्डाति। दस भरियायो धनक्‍कीता छन्दवासिनी भोगवासिनी पटवासिनी ओदपत्तकिनी ओभटचुम्बटका दासी च भरिया च कम्मकारी च भरिया च धजाहटा मुहुत्तिका चाति।

तासु मातुरक्खिता भिक्खुं पहिणति ‘‘गच्छ, भन्ते, इत्थन्‍नामं ब्रूहि ‘होमि इत्थन्‍नामस्स भरिया धनक्‍कीता…पे॰… मुहुत्तिका चा’’ति, अयं इत्थिया सन्देसो नाम। सचे मातुरक्खिताय मातापिताभाताभगिनिआदयो भिक्खुं पहिणन्ति ‘‘गच्छ, भन्ते, इत्थन्‍नामं ब्रूहि ‘होतु इत्थन्‍नामस्स भरिया धनक्‍कीता…पे॰… मुहुत्तिका चा’’ति, अयम्पि इत्थिया सन्देसोयेव नाम। एवं पितुरक्खितादीसुपि नयो नेतब्बो। पुरिसो भिक्खुं पहिणति ‘‘गच्छ, भन्ते, इत्थन्‍नामं मातुरक्खितं ब्रूहि…पे॰… सपरिदण्डं ब्रूहि ‘होतु किर इत्थन्‍नामस्स भरिया धनक्‍कीता…पे॰… मुहुत्तिका चा’’ति, अयं पुरिसस्स सन्देसो नाम। सचे पुरिसस्स मातापिताभाताभगिनिआदयो भिक्खुं पहिणन्ति ‘‘गच्छ, भन्ते, इत्थन्‍नामं मातुरक्खितं ब्रूहि…पे॰… सपरिदण्डं ब्रूहि ‘होतु इत्थन्‍नामस्स भरिया धनक्‍कीता…पे॰… मुहुत्तिका चा’’ति, अयम्पि पुरिसस्स सन्देसोयेव नाम, आणापनन्ति अत्थो।

वीमंसित्वाति एत्थ वुत्तप्पकारेन सासनं गहेत्वा तस्सा इत्थिया वा पुरिसस्स वा तेसं अवस्सारोचनकानं मातापिताभाताभगिनिआदीनं वा आरोचेत्वाति अत्थो। हरन्ति यत्थ पहितो, तत्थ गन्त्वा तस्सा इत्थिया वा पुरिसस्स वा आरोचेति, सा इत्थी वा पुरिसो वा ‘‘साधू’’ति सम्पटिच्छतु वा, मा वा, लज्‍जाय वा तुण्ही होतु, पुन आगन्त्वा तस्सा इत्थिया वा पुरिसस्स वा हरन्तो गरुकं फुसेति सम्बन्धो। एत्तावता ‘‘पटिग्गण्हति वीमंसति पच्‍चाहरती’’ति वुत्तं अङ्गत्तयं सम्पादितं होति। इमाय तिवङ्गसम्पत्तिया सङ्घादिसेसो, इतो येहि केहिचि द्वीहि अङ्गेहि थुल्‍लच्‍चयं, एकेन दुक्‍कटं। यक्खीपेतीपण्डकेसु अङ्गत्तयेनपि थुल्‍लच्‍चयमेव, एकेन वा द्वीहि वा दुक्‍कटन्ति।

सञ्‍चरित्तसिक्खापदं पञ्‍चमं।

२४.इदानि कुटिकारसिक्खापदं आवि कातुं ‘‘संयाचितपरिक्खार’’न्तिआदि आरद्धं। तत्रायं सङ्खेपत्थो – ‘‘वासिं देथ, फरसुं देथा’’तिआदिना सयं पवत्तितयाचनाय गहितपरिक्खारं संयाचितपरिक्खारं पदभाजने वुत्तनयेन सङ्घं तिक्खत्तुं याचित्वा लद्धभिक्खूहि वा सङ्घेनेव वा तत्थ गन्त्वा सारम्भानारम्भसपरिक्‍कमनापरिक्‍कमनभावं ञत्वा अदेसितवत्थुकं ‘‘कुटि नाम उल्‍लित्ता वा होति अवलित्ता वा उल्‍लित्तावलित्ता वा’’ति (पारा॰ ३४९) एवं वुत्तलक्खणं कुटिं। ‘‘तत्रिदं पमाणं, दीघसो द्वादस विदत्थियो सुगतविदत्थिया, तिरियं सत्तन्तरा’’ति (पारा॰ ३४८) एवं वुत्तपमाणातिक्‍कन्तं, ‘‘मय्हं वासागारं एसा’’ति एवं अत्ता उद्देसो एतिस्साति अत्तुद्देसा, तं अत्तुद्देसं कत्वा गरुं सङ्घादिसेसं फुसेति सम्बन्धो। अयं पनेत्थ विनिच्छयो – अदेसितवत्थुकं पमाणातिक्‍कन्तं कुन्थकिपिल्‍लिकादीनं आसये कतत्ता सारम्भं द्वीहि बलीबद्देहि युत्तेन सकटेन गन्तुं असक्‍कुणेय्यताय अपरिक्‍कमनं उल्‍लित्तादिभेदं कुटिं अत्तनो वसनत्थाय करोन्तो वा कारापेन्तो वा ‘‘इदानि निट्ठानं गमिस्सती’’ति पठमपिण्डदाने थुल्‍लच्‍चयं, दुतियपिण्डदानेन लेपे घटिते द्वे च सङ्घादिसेसे द्वे च दुक्‍कटानि, सचे देसितवत्थुकायेव वा पमाणातिक्‍कन्तायेव वा होति, एकं सङ्घादिसेसं द्वे च दुक्‍कटानि आपज्‍जतीति।

कुटिकारसिक्खापदं छट्ठं।

२५.इदानि विहारकारसिक्खापदं दस्सेतुं ‘‘महल्‍लक’’न्तिआदि आरद्धं। तत्थ महल्‍लकन्ति सस्सामिकभावेन संयाचितकुटितो महन्तभावो एतस्स अत्थि, यस्मा वा वत्थुं देसापेत्वा पमाणातिक्‍कमेनापि कातुं वट्टति, तस्मा पमाणमहन्ततायपि महल्‍लको, तं महल्‍लकं विहारं वा कत्वाति अत्थो। एत्थ पन अदेसितवत्थुकभावेन एको सङ्घादिसेसो, सेसं अनन्तरसदिसमेव। इध च तत्थ च वासागारं ठपेत्वा उपोसथागारं वा जन्ताघरं वा अग्गिसालं वा भविस्सतीति एवमादिना नयेन करोन्तस्स अनापत्ति।

विहारकारसिक्खापदं सत्तमं।

२६.इदानि अमूलकसिक्खापदं पकासेतुं ‘‘अमूलकेना’’तिआदि आरद्धं। तत्थ अमूलकेनाति यं चोदकेन चुदितकम्हि पुग्गले अदिट्ठं असुतं अपरिसङ्कितं, इदं एतेसं दस्सनसवनपरिसङ्कासङ्खातानं मूलानं अभावतो अमूलकं, तेन अमूलकेन वत्थुनाति सम्बन्धो। तत्थ अदिट्ठं नाम अत्तनो पसादचक्खुना वा दिब्बचक्खुना वा अदिट्ठं। असुतं नाम तथेव केनचि वुच्‍चमानं न सुतं। अपरिसङ्कितं नाम चित्तेन अपरिसङ्कितं, तं पन दिट्ठसुतमुतवसेन तिविधं। तत्थ भिक्खुञ्‍च मातुगामञ्‍च तथारूपे ठाने दिस्वा ‘‘अद्धा इमेहि कत’’न्ति वा ‘‘करिस्सन्ती’’ति वा परिसङ्कति, इदं दिट्ठपरिसङ्कितं नाम। अन्धकारे पटिच्छन्‍नोकासे वा भिक्खुस्स च मातुगामस्स च वचनं सुत्वा दुतियस्स अत्थिभावं अजानन्तो पुब्बे वुत्तनयेन परिसङ्कति, इदं सुतपरिसङ्कितं नाम। धुत्तेहि इत्थीहि सद्धिं पच्‍चन्तविहारेसु पुप्फगन्धसुरादीहि अनुभवित्वा गतट्ठानं दिस्वा ‘‘केन नु खो इदं कत’’न्ति वीमंसन्तो तत्र केनचि भिक्खुना गन्धादीहि पूजा कता होति, भेसज्‍जत्थाय अरिट्ठं वा पीतं, सो तस्स गन्धं घायित्वा ‘‘अयं सो भविस्सती’’ति परिसङ्कति, इदं मुतपरिसङ्कितं नाम। एवं तिविधाय परिसङ्काय अभावेन अपरिसङ्कितन्ति अत्थो।

चोदेन्तोति ‘‘पाराजिकं धम्मं आपन्‍नोसि, अस्समणोसि, असक्यपुत्तियोसी’’तिआदीहि वचनेहि सयं चोदेन्तोति अत्थो। एवं चोदेन्तस्स वाचाय वाचाय सङ्घादिसेसो। चोदापेन्तो वाति अत्तना तस्स समीपे ठत्वा अञ्‍ञं भिक्खुं आणापेत्वा चोदापेन्तो तस्स आणत्तस्स वाचाय वाचाय गरुं फुसेति अत्थो। अथ सोपि चावनाधिप्पायेन ‘‘मयापि दिट्ठं अत्थी’’तिआदिना नयेन चोदेति, द्विन्‍नम्पि वाचाय आपत्ति। वत्थुना अन्तिमेन चाति भिक्खुनो अनुरूपेसु एकूनवीसतिया पाराजिकेसु अञ्‍ञतरेनाति अत्थो। चावेतुन्ति ब्रह्मचरिया चावेतुं, यो सुद्धं वा असुद्धं वा कतूपसम्पदं पुग्गलं सुद्धदिट्ठिको समानो चावनाधिप्पायेन चोदेति वा चोदापेति वा, तस्स सङ्घादिसेसोति अधिप्पायो। सुणमानन्ति इमिना परम्मुखा दूतेन वा पण्णेन वा चोदेति। चोदेन्तस्स न रुहतीति दीपितं होति। परम्मुखा पन सत्तहि आपत्तिक्खन्धेहि वदन्तस्स दुक्‍कटं।

अमूलकसिक्खापदं अट्ठमं।

२७.इदानि अञ्‍ञभागियसिक्खापदं दस्सेतुं ‘‘अञ्‍ञस्स किरिय’’न्तिआदिमाह। तत्थ अञ्‍ञस्स किरियन्ति अञ्‍ञस्स खत्तियादिजातिकस्स पाराजिकस्स वीतिक्‍कमसङ्खातं किरियं दिस्वाति सम्बन्धो। तेन लेसेनाति ‘‘दस लेसा जातिलेसो नामलेसो गोत्तलेसो लिङ्गलेसो आपत्तिलेसो पत्तलेसो चीवरलेसो उपज्झायलेसो आचरियलेसो सेनासनलेसो’’ति (पारा॰ ३९४) एवं वुत्तेसु दससु लेसेसु यो तस्मिं पुग्गले दिस्सति, तेन लेसेन तदञ्‍ञं पुग्गलं ब्रह्मचरिया चावेतुं अन्तिमवत्थुना चोदेन्तो गरुकं फुसेति अत्थो। तत्थ अञ्‍ञम्पि वत्थुं लिस्सति सिलिस्सति वोहारमत्तेनेव ईसकं अल्‍लीयतीति लेसो, जातियेव लेसो जातिलेसो। एस नयो सेसपदेसुपि। लेसेन चोदेन्तो कथं चोदेति? अञ्‍ञो खत्तियजातिको इमिना चोदकेन पाराजिकं धम्मं अज्झापज्‍जन्तो दिट्ठो होति, सो अञ्‍ञं अत्तनो वेरिं खत्तियजातिकं भिक्खुं पस्सित्वा तं खत्तियजातिलेसं गहेत्वा एवं चोदेति ‘‘खत्तियो मया दिट्ठो पाराजिकं धम्मं अज्झापज्‍जन्तो, त्वम्पि खत्तियो पाराजिकं धम्मं आपन्‍नोसी’’ति वा ‘‘सो त्वं खत्तियो, नाञ्‍ञो, पाराजिकं धम्मं अज्झापन्‍नोसी’’ति वा चोदेति। एवं नामलेसादयोपि वेदितब्बा।

अञ्‍ञभागियसिक्खापदं नवमं।

२८.एत्तावता ‘‘गरुका नवा’’ति उद्दिट्ठे वित्थारतो दस्सेत्वा इदानि तेसु आपन्‍नेसु पटिपज्‍जनाकारं दस्सेतुं ‘‘छादेति जानमापन्‍न’’न्तिआदि वुत्तं। तस्सायं पिण्डत्थो – यो भिक्खु ‘‘अयं इत्थन्‍नामा आपत्ती’’ति आपत्तिवसेन वा ‘‘इदं भिक्खूनं न वट्टती’’ति एवं वत्थुवसेन वा जानमापन्‍नं आपत्तिं याव छादेति, ताव तेन भिक्खुना अकामा परिवासो वसितब्बोति। चरेय्याति मानत्तं समादाय वसेय्य। कित्तकं दिवसन्ति चे? छ रत्तियो। मानत्तवासो पन सङ्घेयेव, न गणे, न पुग्गले, तेन वुत्तं ‘‘सङ्घे’’ति। परिवुत्थोति ‘‘तयो खो उपालि पारिवासिकस्स भिक्खुनो रत्तिच्छेदा सहवासो विप्पवासो अनारोचना’’ति (चूळव॰ ८३) एवं वुत्तं रत्तिच्छेदं अकत्वा परिवुत्थोति अत्थो। तत्थ सहवासोति पकतत्तेन भिक्खुना सद्धिं एकच्छन्‍ने उदकपातट्ठानब्भन्तरे वासो। विप्पवासो नाम अञ्‍ञं पकतत्तं भिक्खुं विना वासो। अनारोचनाति आगन्तुकादीनं अनारोचना। एतेसु तीसु एकेनापि रत्तिच्छेदो होति एव। एत्थ पन उपचारसीमगतानं आरोचेतब्बं, न बहि ठितानं, बहि ठितानम्पि सचे सद्दं सुणाति, पस्सति, दूरं वा गन्त्वा आरोचेतब्बमेव, अनारोचेन्तस्स रत्तिच्छेदो चेव वत्तभेदे दुक्‍कटञ्‍च होति। अजानन्तस्सेव उपचारसीमं पविसित्वा गच्छन्ति चे, रत्तिच्छेदोव होति, न वत्तभेदो।

चिण्णमानत्तन्ति ‘‘चत्तारो खो, उपालि, मानत्तचारिकस्स भिक्खुनो रत्तिच्छेदा सहवासो विप्पवासो अनारोचना ऊने गणे चरण’’न्ति (चूळव॰ ९२) एवं वुत्तं रत्तिच्छेदं अकत्वा चिण्णमानत्तं परिनिट्ठितमानत्तन्ति अत्थो। एत्थ पन सहवासादयो परिवासे वुत्तप्पकारा एव। ‘‘ऊने गणे चरण’’न्ति एत्थ गणो चत्तारो वा अतिरेका वा भिक्खू, तस्मा सचेपि तीहि भिक्खूहि सद्धिं वसति, रत्तिच्छेदो होतियेव, ‘‘सचे पन तेन तेसं अत्थिभावं दिस्वा आरोचिते पक्‍कमन्ति, ऊने गणे चरणदोसो न होती’’ति (चूळव॰ अट्ठ॰ ९७) अट्ठकथासु वुत्तं किर। अब्भेय्याति तं भिक्खुं वीसतिगणो सङ्घो अब्भेय्य सम्पटिच्छेय्य, अब्भानकम्मवसेन ओसारेय्याति अत्थो। सचे एकेनपि ऊनो वीसतिगणो भिक्खुसङ्घो तं भिक्खुं अब्भेय्य, सो च भिक्खु न अब्भितो, ते च भिक्खू गारय्हा, दुक्‍कटं आपज्‍जन्तीति अत्थो।

२९.इदानि यथा छादिता आपत्ति छन्‍ना होति, तं पकारं दस्सेतुं ‘‘आपत्ती’’तिआदि वुत्तं। तत्थायं पदयोजना – आपत्तिता च अनुक्खित्तता च अनन्तरायता च पहुत्तता च आपत्तिनुक्खित्तअनन्तरायपहुत्ततायो, एतासु चतूसु तथासञ्‍ञिता च छादेतुकामो हुत्वा छादना चाति एवं दसहङ्गेहि अरुणुग्गमम्हि छन्‍ना होतीति। एत्थ पन आपत्तिआदीसु चतूसु आपत्तिसञ्‍ञिता च अनुक्खित्तसञ्‍ञिता च अनन्तरायसञ्‍ञिता च पहुत्तसञ्‍ञिता चाति एवं सञ्‍ञावसेन योजेत्वा अट्ठङ्गानि गहेतब्बानि, छादेतुकामोति इदमेकं, छादनाति इदमेकन्ति एवं दस।

एतेसु पन आदितो पट्ठाय अयं विनिच्छयो – ‘‘आपत्ति च होति आपत्तिसञ्‍ञी चा’’ति एत्थ यं आपन्‍नो, सा तेरसन्‍नं अञ्‍ञतरा होति, सोपि च तत्थ गरुकापत्तिसञ्‍ञीयेव हुत्वा जानन्तो छादेति, छन्‍ना होति। सचे तत्थ अनापत्तिसञ्‍ञी वा अञ्‍ञापत्तिसञ्‍ञी वा वेमतिको वा होति, अच्छन्‍नाव होति। तिविधं पन उक्खेपनीयकम्मं, तेन अकतो अनुक्खित्तो। सो चे पकतत्तसञ्‍ञी हुत्वा छादेति, छन्‍ना होति। सचे अपकतत्तसञ्‍ञी छादेति, अच्छन्‍ना होति। अपकतत्तेन पन पकतत्तसञ्‍ञिनापि अपकतत्तसञ्‍ञिनापि छादितं अच्छादितमेव होतीति। अनन्तरायिकोति यस्स दससु राजचोरअग्गिउदकमनुस्सामनुस्सवाळसरीसपजीवितब्रह्मचरियन्तरायेसुपि एकोपि नत्थि, सो चे अनन्तरायिकसञ्‍ञी हुत्वा छादेति, छन्‍ना होति। सचे सो अन्धकारभीरुको अनन्तराये एव वाळादिअन्तरायसञ्‍ञी हुत्वा छादेति, अच्छन्‍नाव होति। पहूति यो सक्‍कोति सभागभिक्खुनो समीपं गन्तुञ्‍चेव आरोचितुञ्‍च , सो चे पहुसञ्‍ञी हुत्वा छादेति, छन्‍ना होति। यो पन अपहु हुत्वा पहुसञ्‍ञी, पहु वा अपहुसञ्‍ञी हुत्वा छादेति, अच्छन्‍नाव होतीति।

अरुणुग्गमम्हीति एत्थ पुरेभत्तं वा आपत्तिं आपन्‍नो होति पच्छाभत्तं वा, याव अरुणं न उग्गच्छति, ताव आरोचेतब्बा। सचे पन अरुणब्भन्तरे सतक्खत्तुम्पि छादेतुकामता उप्पज्‍जति, अच्छन्‍नाव होति। आरोचेन्तो पन सभागसङ्घादिसेसं आपन्‍नस्स आरोचेतुं न वट्टति। सचे आरोचेति, आपत्ति पन आविकता होति, आरोचनपच्‍चया पन अञ्‍ञं दुक्‍कटं आपत्तिं आपज्‍जति। इमिना अञ्‍ञम्पि वत्थुसभागापत्तिं आरोचेतुं न वट्टतीति दीपितो होति। आरोचेन्तेन पन ‘‘अहं तव सन्तिके एकं आपत्तिं आवि करोमी’’ति वा ‘‘आचिक्खामी’’ति वा ‘‘आरोचेमी’’ति वा ‘‘एकं आपत्तिं आपन्‍नभावं जानाही’’ति वा ‘‘एकं गरुकापत्तिं आवि करोमी’’ति वा आदिना नयेन वत्तब्बं, एत्तावता अच्छन्‍नाव होति। सचे ‘‘लहुकापत्तिं आरोचेमी’’ति वदति, छन्‍नाव होतीति। सङ्घादिसेसविनिच्छयो।

सङ्घादिसेसनिद्देसवण्णना निट्ठिता।

३१.इदानि तेसं अनुलोमानि दस्सेतुं ‘‘दुकूल’’न्तिआदि वुत्तं। तत्थ (महाव॰ अट्ठ॰ ३०५) दुकूलं साणस्स अनुलोमं वाकमयत्ता। पट्टुण्णन्ति पट्टुण्णदेसे पाणकेहि सञ्‍जातवत्थं। सोमारदेसे, चीनदेसे जातं सोमारचीनजं पटन्ति सम्बन्धो। इमानि तीणिपि कोसेय्यस्स अनुलोमानि पाणकेहि कतसुत्तमयत्ता। इद्धिजन्ति एहिभिक्खूनं पुञ्‍ञिद्धिया निब्बत्तचीवरं। तं पन खोमादीनं अञ्‍ञतरं होति। कप्परुक्खेहि निब्बत्तं जालिनिया देवकञ्‍ञाय अनुरुद्धत्थेरस्स दिन्‍नवत्थादिकं देवदिन्‍नं। तम्पि खोमादीहि निब्बत्तवत्थसदिसत्ता छन्‍नम्पि अनुलोमं होतियेव कप्पासिकस्स वा, इद्धिजम्पि तथेव वेदितब्बं। तस्स तस्साति खोमादिकस्स। अनुलोमिकन्ति अनुरूपं।

३२-३३.एवं जातितो सानुलोमानि छ चीवरानि दस्सेत्वा इदानि तेसु अधिट्ठानादिकं विधानं दस्सेतुं ‘‘तिचीवर’’न्तिआदि वुत्तं। एत्थ (कङ्खा॰ अट्ठ॰ कथिनसिकखापदवण्णना; महाव॰ ३५८) धिट्ठानतो पुब्बे तिचीवरं नाम पाटेक्‍कं नत्थि सङ्घाटिआदिप्पहोनकस्स पच्‍चत्थरणादिवसेनापि अधिट्ठातुं अनुञ्‍ञातत्ता। तस्मा ‘‘तिचीवरं अधिट्ठेय्य न विकप्पेय्या’’ति एत्थ ‘‘इमं सङ्घाटि’’न्ति एवं नामे गहिते ‘‘अधिट्ठान’’मिच्‍चेव वत्तब्बं, ‘‘विकप्पेमी’’ति पन न वत्तब्बन्ति अधिप्पायो। एवं सेसेसुपि। मुखपुञ्छनञ्‍च निसीदनञ्‍च मुखपुञ्छननिसीदनं। कण्डुच्छादिन्ति कण्डुप्पटिच्छादिं अधिट्ठेय्य, न विकप्पेय्याति सम्बन्धो। एत्थाति इमेसु नवसु चीवरेसु। तिचीवरन्ति तिचीवराधिट्ठाननयेन अधिट्ठिततिचीवरं। विना अलद्धसम्मुतिको भिक्खु अविप्पवाससम्मुतिअलद्धट्ठाने एकाहम्पि हत्थपासं विजहित्वा न वसेय्याति अत्थो। ‘‘न भिक्खवे चातुमासं निसीदनेन विप्पवसितब्बं, यो विप्पवसेय्य, आपत्ति दुक्‍कटस्सा’’ति खुद्दकक्खन्धके (चूळव॰ २६३) वुत्तत्ता चातुमासं निसीदनं विना न वसेय्याति अत्थो।

३४.इदानि अधिट्ठानविधिं दस्सेतुं ‘‘इमं सङ्घाटि’’न्तिआदि वुत्तं। तत्थ मिच्‍चधिट्ठयेति इति अधिट्ठये, ‘‘इमं सङ्घाटिं अधिट्ठामी’’ति एवं सङ्घाटिं अधिट्ठयेति अत्थो। अहत्थपासमेतन्ति दूरे ठितं पन ठपितोकासं सल्‍लक्खेत्वा सचे एकं, ‘‘एत’’न्ति, बहूनि चे, ‘‘एतानी’’ति वत्वा अधिट्ठयेति अत्थसम्बन्धो। सेसेसुपि अयं नयोति यथा ‘‘इमं सङ्घाटिं अधिट्ठामी’’ति वुत्तं, एवं ‘‘इमं उत्तरासङ्गं, इमं कण्डुप्पटिच्छादिं अधिट्ठामी’’ति एवं अत्तनो नामेनेव वत्वा सम्मुखापि परम्मुखापि वुत्तनयेन अधिट्ठातब्बन्ति वुत्तं होति।

३५.इदानि सचे पुब्बे अधिट्ठितं तिचीवरं निसीदनं वस्सिकसाटिकं कण्डुप्पटिच्छादीति इमेसु छसु चीवरेसु अञ्‍ञतरं चीवरं अत्थि, पुन तथाविधं चीवरं अधिट्ठहित्वा परिहरितुं इच्छन्तेन ‘‘द्वे पन न वट्टन्ती’’ति (पारा॰ अट्ठ॰ २.४६९; कङ्खा॰ अट्ठ॰ कथिनसिक्खापदवण्णना) वुत्तत्ता पुब्बे अधिट्ठितं पच्‍चुद्धरित्वा अधिट्ठातब्बन्ति दस्सेतुं ‘‘अधिट्ठहन्तो’’तिआदि वुत्तं, तं उत्तानमेव। पत्ताधिट्ठहने तथाति ‘‘इमं पत्तं, एतं पत्त’’न्ति एवं नाममत्तमेव विसेसो। सेसं तादिसमेवाति अत्थो।

३६.एतं इमं व सङ्घाटिं संसेति एत्थ सचे अन्तोगब्भे वा सामन्तविहारे वा होति, ठपितट्ठानं सल्‍लक्खेत्वा ‘‘एतं सङ्घाटिं अधिट्ठामी’’ति वाचा भिन्दितब्बा, सचे हत्थपासे होति, ‘‘इमं सङ्घाटि’’न्ति तेसं तेसं नामवसेन वाचा भिन्दितब्बाति अत्थो। पच्‍चुद्धारेपि एसेव नयो। एत्थ पन ‘‘द्वे चीवरस्स अधिट्ठाना कायेन वा अधिट्ठेति, वाचाय वा अधिट्ठेती’’ति (परि॰ ३२२) वुत्तत्ता सङ्घाटिआदिकं हत्थेन गहेत्वा ‘‘इमं सङ्घाटिं अधिट्ठामी’’तिआदिना नयेन चित्तेन आभोगं कत्वा कायविकारं करोन्तेन कायेन अधिट्ठातब्बं, येन केनचि सरीरावयवेन अफुसन्तस्स न वट्टति। वाचाय अधिट्ठहन्तेन वचीभेदं कत्वाव अधिट्ठातब्बं। तथा पत्तेपि। विदूति पण्डितो।

३७-८.इदानि तेसं पमाणपरिच्छेदं दस्सेतुं ‘‘सङ्घाटि पच्छिमन्तेना’’तिआदि वुत्तं। तत्थ दीघतो मुट्ठिपञ्‍चकतो (पारा॰ अट्ठ॰ २.४६९; कङ्खा॰ अट्ठ॰ कथिनसिक्खापदवण्णना) पट्ठाय ‘‘तत्रिदं सुगतस्स सुगतचीवरप्पमाणं, दीघसो नव विदत्थियो सुगतविदत्थिया, तिरियं छ विदत्थियो’’ति (पाचि॰ ५४८) एवं वुत्तसुगतचीवरूनापि वट्टति। तिरियं पन मुट्ठित्तिकं। च-सद्देन अतिरेकम्पि वट्टतीति अत्थो। उत्तरासङ्गस्सपि एतदेव पमाणन्ति तं दस्सेतुं ‘‘तथा एकंसिकस्सापी’’ति वुत्तं। अन्तरवासकस्स पन ‘‘पारुपनेनपि हि सक्‍का नाभिं पटिच्छादेतु’’न्ति (पारा॰ अट्ठ॰ २.४६९) अट्ठकथावचनतो ‘‘द्विहत्थो वा’’ति वुत्तं।

३९.निसीदनस्सदीघेनाति एत्थ (पाचि॰ ५३१ आदयो; पाचि॰ अट्ठ॰ ५३१; कङ्खा॰ अट्ठ॰ निसीदनसिक्खापदवण्णना) निसीदनन्ति सन्थतसदिसं सन्थरित्वा एकस्मिं अन्ते वुत्तप्पमाणेन द्वीसु ठानेसु फालेत्वा कताहि तीहि दसाहि युत्तस्स परिक्खारस्सेतं नामं।

४०.कण्डुप्पटिच्छादि (पाचि॰ ५३८; महाव॰ ३५४; पाचि॰ अट्ठ॰ ५३७; कङ्खा॰ अट्ठ॰ कण्डुप्पटिच्छादिसिक्खापदवण्णना) नाम यस्स अधोनाभिउब्भजाणुमण्डलं कण्डु वा पिळका वा अस्सावो वा थुल्‍लकच्छु वा आबाधो, तस्स पटिच्छादनत्थाय अनुञ्‍ञातं चीवरं। गाथायो सुविञ्‍ञेय्याव।

४१.अड्ढतेय्यावाति (पाचि॰ ५४४) एत्थ ततो उद्धं न वट्टतीति अत्थो।

४२.एत्थाति सङ्घाटितो पट्ठाय याव वस्सिकसाटिका, ताव दस्सितचीवरेसूति अत्थो। तदुत्तरिन्ति ततो तेसं चीवरानं वुत्तप्पमाणतो उत्तरिं करोन्तस्स छेदनपाचित्ति होतीति पाठसेसो, तं अतिरेकं छिन्दित्वा पुन पाचित्तियं देसेतब्बन्ति अत्थो। पच्‍चत्थरणमुखचोळाति एत्थ ‘‘अनुजानामि, भिक्खवे, याव महन्तं पच्‍चत्थरणं आकङ्खति, ताव महन्तं पच्‍चत्थरणं कातु’’न्ति (महाव॰ ३५३) वुत्तत्ता पच्‍चत्थरणस्स पमाणपरिच्छेदो नत्थि,। मुखपुञ्छनचोळस्स पन उक्‍कट्ठवसेन वा अन्तिमवसेन वा पमाणपरिच्छेदो न वुत्तो, तस्मा तम्पि अप्पमाणिकं। तेन वुत्तं ‘‘आकङ्खितप्पमाणिका’’ति, इच्छितप्पमाणिकाति अत्थो। याव एकं धोवीयति, ताव अञ्‍ञं परिभोगत्थाय इच्छितब्बन्ति द्वेपि वट्टन्ति।

४३.नदीपितन्ति कत्थ न दीपितं? अट्ठकथासु। कस्माति चे? ‘‘तेन खो पन समयेन भिक्खूनं परिपुण्णं होति तिचीवरं, अत्थो च होति परिस्सावनेहिपि थविकाहिपि। भगवतो एतमत्थं आरोचेसुं। अनुजानामि, भिक्खवे, परिक्खारचोळक’’न्ति (महाव॰ ३५७) बहूनं पत्तथविकपरिस्सावनादीनं सङ्गहवसेन वुत्तत्ता पाटेक्‍कं निधानमुखन्ति। यस्मा पन भगवता ‘‘यं यं लब्भति, तं तं इमिना विधानेन अधिट्ठहित्वा पुन येन येन परिस्सावनादिना अत्थो होति, तं तं कत्वा गण्हन्तू’’ति अनुकम्पाय अनुञ्‍ञातं, तस्मा विकप्पनुपगपच्छिमचीवरप्पमाणं थविकम्पि पटपरिस्सावनम्पि बहूनिपि एकतो कत्वा ‘‘इमानि चीवरानि परिक्खारचोळानि अधिट्ठामी’’ति वत्वा अधिट्ठातुम्पि वट्टतियेव। तस्मा वुत्तं ‘‘तथा वत्वा’’ति, ‘‘परिक्खारचोळ’’न्ति वत्वाति अत्थो। विकप्पियन्ति विकप्पनुपगं।

४४.अहतकप्पानन्ति (महाव॰ ३४८) एकवारं धोवितकानं।

४५.उतुद्धटानन्ति उतुतो दीघकालतो उद्धटानं, कतवत्थकिच्‍चानं पिलोतिकानन्ति वुत्तं होति। सेसाति उत्तरासङ्गअन्तरवासका। पंसु विय कुच्छितभावं पटिक्‍कूलभावं उलति गच्छतीति पंसुकूलं, चोळखण्डानमेतं नामं, तस्मिं पंसुकूले यथारुचीति अत्थो। कस्माति चे? ‘‘अनुजानामि, भिक्खवे, अहतानं दुस्सानं अहतकप्पानं दिगुणं सङ्घाटिं एकच्‍चियं उत्तरासङ्गं एकच्‍चियं अन्तरवासकं, उतुद्धटानं दुस्सानं चतुग्गुणं सङ्घाटिं दिगुणं उत्तरासङ्गं दिगुणं अन्तरवासकं, पंसुकूले यावदत्थं, पापणिके उस्साहो करणीयो’’ति वुत्तत्ता, तस्मा सुसानादीसु पतितपंसुकूले च अन्तरापणे पतितपिलोतिकचीवरे च पटपरिच्छेदो नत्थि, पटसतम्पि वट्टतीति सिद्धं।

४६.इदानि ‘‘अनुजानामि, भिक्खवे, छिन्‍नकं सङ्घाटिं छिन्‍नकं उत्तरासङ्गं छिन्‍नकं अन्तरवासक’’न्ति (महाव॰ ३४५) वत्वा पुन ‘‘तेन खो पन समयेन अञ्‍ञतरस्स भिक्खुनो तिचीवरे कयिरमाने सब्बं छिन्‍नकं नप्पहोति। भगवतो एतमत्थं आरोचेसुं। अनुजानामि, भिक्खवे, द्वे छिन्‍नकानि एकं अच्छिन्‍नकन्ति। द्वे छिन्‍नकानि एकं अच्छिन्‍नकं नप्पहोति। अनुजानामि, भिक्खवे, द्वे अच्छिन्‍नकानि एकं छिन्‍नकन्ति। एकं छिन्‍नकं नप्पहोति। अनुजानामि, भिक्खवे, अन्वाधिकम्पि आरोपेतुं। न च, भिक्खवे, सब्बं अच्छिन्‍नकं धारेतब्बं, यो धारेय्य, आपत्ति दुक्‍कटस्सा’’ति (महाव॰ ३६०) एवं वुत्तविधानं दस्सेतुं ‘‘तीसू’’तिआदि आरद्धं। तस्स अत्थो – तीसु चीवरेसु यं छिन्दित्वा सिब्बितुं सब्बपच्छिमप्पमाणं पहोति, तं छिन्दितब्बं। सब्बेसु पन अप्पहोन्तेसु अन्वाधिकं आदियेय्याति। तत्थ अन्वाधि नाम अनुवातं विय संहरित्वा चीवरस्स उपरि सङ्घाटिआकारेन आरोपेतब्बं। आगन्तुकपत्तन्तिपि वदन्ति। इदं पन अप्पहोनके अनुञ्‍ञातं। सचे पहोति, न वट्टन्ति, छिन्दितब्बमेव। अनादिण्णन्ति अनारोपितं अन्वाधिकं। न धारेय्याति तिचीवराधिट्ठानवसेन अधिट्ठहित्वा न धारेतब्बन्ति अधिप्पायो।

४७-८.इदानि उदोसितसिक्खापदनयं दस्सेतुं ‘‘गामे’’तिआदि वुत्तं। एत्थ पन सचे गामो (पारा॰ ४७८; पारा॰ अट्ठ॰ २.४७७-४७८; कङ्खा॰ अट्ठ॰ उदोसितसिक्खापदवण्णना) एकस्स रञ्‍ञो वा भोजकस्स वा वसेन एककुलस्स होति, पाकारादिना परिक्खित्तत्ता एकूपचारो च, एवरूपे गामे चीवरं निक्खिपित्वा तस्मिं गामे यथारुचितट्ठाने वसितुं लब्भति। सचे सो गामो अपरिक्खित्तो, यस्मिं घरे चीवरं निक्खित्तं होति, तस्मिं घरे वसितब्बं, तस्स वा घरस्स समन्ततो हत्थपासा न विजहितब्बं।

सचे सो गामो वेसालिकुसिनारादयो विय नानाराजूनं वा भोजकानं वा होति, वुत्तप्पकारेन परिक्खित्तो च, एवरूपे गामे यस्मिं घरे चीवरं निक्खित्तं, तस्मिं घरे वा वत्थब्बं। यस्सा वीथिया तं घरं होति, तस्सा वीथिया तस्स घरस्स सम्मुखाट्ठाने सभाये वा नगरद्वारे वा वत्थब्बं, तेसं सभायद्वारानं हत्थपासा वा न विजहितब्बं। सचे अपरिक्खित्तो, यस्मिं घरे निक्खित्तं, तत्थ वा तस्स हत्थपासे वा वत्थब्बं।

निवेसनादयो हम्मियपरियोसाना गामपरिक्खेपतो बहि सन्‍निविट्ठाति वेदितब्बा। इतरथा तेसं गामग्गहणेनेव गहितत्ता गामस्स एककुलनानाकुलएकूपचारनानूपचारतावसेनेव विनिच्छयो वत्तब्बो सिया। निवेसनादीनं वसेनेव पाळियं (पारा॰ ४७८ आदयो) अत्थो विभत्तो, न गामवसेन। उदोसितविनिच्छये अयं नयो वुत्तोयेव।

निवेसनेति एत्थ सचे एककुलस्स निवेसनं होति परिक्खित्तञ्‍च, अन्तोनिवेसने चीवरं निक्खिपित्वा अन्तोनिवेसने वत्थब्बं। अपरिक्खित्तञ्‍चे होति, यस्मिं गब्भे चीवरं निक्खित्तं, तस्मिं वत्थब्बं, तस्स गब्भस्स हत्थपासा वा न विजहितब्बं। सचे नानाकुलस्स होति परिक्खित्तञ्‍च, यस्मिं गब्भे चीवरं निक्खित्तं, तस्मिं गब्भे वत्थब्बं, सब्बेसं साधारणद्वारमूले वा तेसं गब्भद्वारमूले वा तेसं गब्भद्वारमूलानं वा हत्थपासा न विजहितब्बं। अपरिक्खित्तञ्‍चे होति, यस्मिं गब्भे चीवरं निक्खित्तं, तस्मिं गब्भे वत्थब्बं, हत्थपासा वा न विजहितब्बं।

उदोसितोति यानादीनं भण्डानं साला। पासादोति दीघपासादो। हम्मियन्ति मुण्डच्छदनपासादो। नावा पन थलं आरोपेत्वा निक्खित्तापि होति, समुद्दे ठितापि। सचे एककुलस्स नावा होति, अन्तोनावाय चीवरं निक्खिपित्वा अन्तोनावाय वत्थब्बं। नानाकुलस्स नावा होति नानागब्भा नानाओवरका, यस्मिं ओवरके चीवरं निक्खित्तं, तस्मिं वत्थब्बं, चीवरस्स हत्थपासा वा न विजहितब्बं।

अट्टोति पटिराजादीनं पटिबाहनत्थं इट्ठकाहि कतो बहलभित्तिको चतुपञ्‍चभूमिको पतिस्सयविसेसो। माळोति एककूटसङ्गहितो चतुरस्सपासादो। इमेसु पन उदोसितादीसु माळपरियोसानेसु निवेसने वुत्तनयेनेव विनिच्छयो वेदितब्बो। निवेसनन्ति पन उदोसितादीनं वसेन अकताय पतिस्सयविकतिया अधिवचनं।

४९.‘‘अनुजानामि, भिक्खवे, कण्डुप्पटिच्छादिं याव आबाधा अधिट्ठातुं, ततो परं विकप्पेतुं। वस्सिकसाटिकं वस्सानं चातुमासं अधिट्ठातुं, ततो परं विकप्पेतु’’न्ति (महाव॰ ३५८) वुत्तत्ता रोगपरियन्ता कण्डुप्पटिच्छादि, वस्सानपरियन्ता वस्सिकसाटिकाति अत्थो। सेसाति तिचीवरादयो कालवसेन अपरियन्तिकाति अत्थो।

५०.पच्‍चत्थरणादित्तयं सदसम्पि अदसम्पि रत्तम्पि अरत्तम्पि आदिण्णकप्पम्पि अनादिण्णकप्पम्पि लब्भतीति अत्थो। निसीदनन्ति निसीदनञ्‍च रत्तं अनादिण्णकप्पञ्‍च लब्भतीति अधिप्पायो। पच्‍चत्थरणपरिक्खारमुखपुञ्छनचोळानि पन नीलम्पि पीतकम्पि लोहितकम्पि पुप्फदसादिकम्पि वट्टन्ति, तस्मा ‘‘सदसम्पी’’तिआदि वुत्तं। एवरूपं पन निवासेतुं वा पारुपितुं वा न वट्टति, केवलं पच्‍चत्थरणादिवसेन अधिट्ठानमत्तं कातुं वट्टति।

५१.तिचीवरं कण्डुप्पटिच्छादि वस्सिकसाटिकाति इदं पन सेसचीवरपञ्‍चकं अदसं रजितंयेव कप्पति, तञ्‍च आदिण्णकप्पमेवाति अत्थो। सदसंव निसीदनन्ति इदं पन पुब्बे ‘‘सदसम्पी’’ति एत्थ वुत्तत्ता अदसम्पि निसीदनं वट्टतीति सम्मोहनिवारणत्थं वुत्तन्ति वदन्ति।

५२.अनधिट्ठितन्ति तिचीवरादिवसेन अनधिट्ठितं। अनिस्सट्ठं नाम अञ्‍ञेसं अविस्सज्‍जितं, तं पन विकप्पेत्वा परिभुञ्‍जितब्बन्ति अत्थो।

इदानि विकप्पनुपगस्स पमाणं हेट्ठिमपरिच्छेदेन दस्सेतुं ‘‘हत्थदीघ’’न्तिआदिमाह। तत्थ ‘‘अनुजानामि, भिक्खवे, आयामेन अट्ठङ्गुलं सुगतङ्गुलेन चतुरङ्गुलवित्थतं पच्छिमं चीवरं विकप्पेतु’’न्ति (महाव॰ ३५८) वुत्तत्ता दीघतो एकहत्थं पुथुलतो उपड्ढहत्थं विकप्पेतब्बन्ति अधिप्पायो।

५३.तिचीवरस्साति विनयतिचीवरस्स, न धुतङ्गतिचीवरस्स। तस्स पन इमेसु नवसु चीवरत्तयमेव लब्भति, न अञ्‍ञं लब्भति। सब्बमेतन्ति सब्बं अधिट्ठानविधानञ्‍च परिहरणविधानञ्‍चाति अत्थो। परिक्खारचोळियो सब्बन्ति तिचीवरादिकं नवविधम्पि चीवरं। तथा वत्वाति ‘‘परिक्खारचोळ’’न्ति वत्वा। अधिट्ठतीति अधिट्ठाति। किं पन तिचीवरं परिक्खारचोळं अधिट्ठातुं वट्टतीति? आम वट्टति, ‘‘परिक्खारचोळं नाम पाटेक्‍कं निधानमुखमेतन्ति तिचीवरं परिक्खारचोळं अधिट्ठहित्वा परिभुञ्‍जितुं वट्टति। उदोसितसिक्खापदे पन तिचीवरं अधिट्ठहित्वा परिहरन्तस्स परिहारो वुत्तो’’ति अट्ठकथायं (पारा॰ अट्ठ॰ २.४६९) वुत्तं, तस्मा तिचीवरं परिक्खारचोळं अधिट्ठहन्तेन पच्‍चुद्धरित्वा पुन अधिट्ठातब्बं।

५४.इदानि एतेसं अधिट्ठानविजहनाकारं दस्सेतुं ‘‘अच्छेदविस्सज्‍जनगाहविब्भमा’’तिआदि वुत्तं। तत्थ अच्छेदोति चोरादीहि अच्छिन्दनं। विस्सज्‍जनन्ति अञ्‍ञेसं दानं। कथं पन दिन्‍नं, कथं गहितं सुदिन्‍नं सुग्गहितञ्‍च होतीति? सचे ‘‘इदं तुय्हं देमि ददामि दज्‍जामि ओणोजेमि परिच्‍चजामि निस्सज्‍जामि विस्सज्‍जामी’’ति वा ‘‘इत्थन्‍नामस्स देमि…पे॰… विस्सज्‍जामी’’ति वा वदति, सम्मुखापि परम्मुखापि दिन्‍नंयेव होति। ‘‘तुय्हं गण्हाही’’ति वुत्ते ‘‘मय्हं गण्हामी’’ति वदति, सुदिन्‍नं सुग्गहितञ्‍च। ‘‘तव सन्तकं करोहि, तव सन्तकं होतु, तव सन्तकं करिस्सती’’ति वुत्ते ‘‘ममसन्तकं करोमि, मम सन्तकं होतु, मम सन्तकं करिस्सामी’’ति वदति, दुद्दिन्‍नं दुग्गहितञ्‍च। सचे पन ‘‘तव सन्तकं करोही’’ति वुत्ते ‘‘साधु, भन्ते, मय्हं गण्हामी’’ति गण्हाति, सुग्गहितं।

गाहोति विस्सासग्गाहो (पारा॰ अट्ठ॰ १.१३१)। सो पन एवं वेदितब्बो – ‘‘अनुजानामि, भिक्खवे, पञ्‍चहङ्गेहि समन्‍नागतस्स विस्सासं गहेतुं। सन्दिट्ठो च होति, सम्भत्तो च, आलपितो च, जीवति च, जानाति च ‘गहिते मे अत्तमनो भविस्सती’’’ति (महाव॰ ३५६)। तत्थ सन्दिट्ठोति दिट्ठमत्तकमित्तो। सम्भत्तोति दळ्हमित्तो। आलपितोति ‘‘मम सन्तकं यं इच्छसि, तं गण्हेय्यासि, आपुच्छित्वा गहणे कारणं नत्थी’’ति वुत्तो। जीवतीति अनुट्ठानसेय्याय सयितोपि याव जीवितिन्द्रियुपच्छेदं न पापुणाति। गहिते च अत्तमनोति गहिते च तुट्ठचित्तो। एवरूपस्स सन्तकं ‘‘गहिते मे अत्तमनो भविस्सती’’ति जानन्तेन गहेतुं वट्टति। अनवसेसपरियादानवसेन चेतानि पञ्‍च अङ्गानि वुत्तानि, विस्सासग्गाहो पन तीहि अङ्गेहि रुहति। कथं? सन्दिट्ठो जीवति गहिते अत्तमनो, सम्भत्तो जीवति गहिते अत्तमनो, आलपितो जीवति गहिते अत्तमनोति एवं।

यो पन जीवति, न च गहिते अत्तमनो होति, तस्स सन्तकं विस्सासभावेन गहितम्पि पुन दातब्बं। ददन्तेन मतकधनं ताव ये तस्स धने इस्सरा गहट्ठा वा पब्बजिता वा, तेसं दातब्बं। यो पन पठमंयेव ‘‘सुट्ठु कतं तया मम सन्तकं गण्हन्तेना’’ति वचीभेदेन वा चित्तुप्पादमत्तेन वा अनुमोदित्वा पच्छा केनचि कारणेन कुपितो, सो पच्‍चाहरापेतुं न लभति। योपि अदातुकामो, चित्तेन पन अधिवासेति, न किञ्‍चि वदति, सोपि पुन पच्‍चाहरापेतुं न लभति। यो पन ‘‘मया तुम्हाकं सन्तकं गहित’’न्ति वा ‘‘परिभुत्त’’न्ति वा वुत्ते नाधिवासेति, ‘‘पटिदेही’’ति भणति, सो पच्‍चाहरापेतुं लभति।

विब्भमाति इमिना भिक्खुनियायेव अधिट्ठानविजहनं गहितं होति। सा पन यदा विब्भमति, तदा अस्समणी होति। भिक्खु पन विब्भमन्तोपि याव सिक्खं न पच्‍चक्खाति, ताव भिक्खुयेवाति अधिट्ठानं न विजहतीति। लिङ्गसिक्खाति लिङ्गपरिवत्तनञ्‍च सिक्खापच्‍चक्खानञ्‍चाति अत्थो। सब्बेसूति नवसु चीवरेसु। अधिट्ठानवियोगकारणाति अधिट्ठानविजहनकारणा, इमेसु अञ्‍ञतरेन अधिट्ठानं विजहतीति अत्थो।

५५.इदानि अकप्पियचीवरानि दस्सेतुं ‘‘कुसवाकफलकानी’’तिआदि आरद्धं। तत्थ कुसचीरं (महाव॰ ३७१; महाव॰ अट्ठ॰ ) नाम कुसे गन्थेत्वा कतचीवरं। वाकचीरं नाम तापसानं वक्‍कलं। फलकचीरं नाम फलकानि सिब्बित्वा कतचीवरं। केसकम्बलन्ति केसेहि तन्तं वायित्वा कतकम्बलं। वालकम्बलन्ति चमरवालेहि वायित्वा कतकम्बलं। उलूकपक्खन्ति उलूकसकुणस्स पक्खेहि कतनिवासनं। अजिनक्खिपन्ति सलोमं सखुरं अजिनमिगचम्मं। इमेसु सत्तसु वत्थेसु यं किञ्‍चि धारयतो थुल्‍लच्‍चयन्ति अत्थो। यथा इमेसु थुल्‍लच्‍चयं, तथा अक्‍कनाळं निवासेन्तस्स। अक्‍कनाळं नाम अक्‍कदण्डे वाकादीहि गन्थेत्वा कतचीवरं। ‘‘न भिक्खवे अक्‍कनाळं निवासेतब्बं, यो निवासेय्य, आपत्ति थुल्‍लच्‍चयस्सा’’ति (महाव॰ ३७१) हि वुत्तं।

५६.कदलेरकक्‍कदुस्से पोत्थके चापीति एत्थ कदलिएरकअक्‍कमकचिवाकेहि कतानि वत्थानि एवं वुत्तानीति वेदितब्बानि। एतेसु पोत्थकोयेव पाळियं आगतो, इतरानि तग्गतिकत्ता अट्ठकथासु पटिक्खित्तानि। इमेसु चतूसुपि दुक्‍कटमेव। ‘‘न भिक्खवे नग्गियं तित्थियसमादानं समादियितब्बं, यो समादियेय्य, आपत्ति थुल्‍लच्‍चयस्सा’’ति (महाव॰ ३७०) वुत्तत्ता नग्गियम्पि न कप्पति एव। सब्बमेव नीलकं सब्बनीलकं। एवं सेसेसुपि। एत्थ नीलं उमापुप्फवण्णं होति । मञ्‍जेट्ठकं मञ्‍जेट्ठकवण्णमेव। पीतकं कणिकारपुप्फवण्णं। लोहितकं जयसुमनपुप्फवण्णं। कण्हकं अद्दारिट्ठकवण्णं।

५७.महारङ्गं नाम सतपदिपिट्ठिवण्णं। महानामं नाम रत्तसम्भिन्‍नवण्णं होति। पदुमपुप्फवण्णन्तिपि वुत्तं, मन्दरत्तन्ति अत्थो। तिरीटकेति रुक्खतचे। अच्छिन्‍नदीघदसकेति सब्बसो अच्छिन्‍नदसके च मज्झे छिन्‍नदसके चाति अत्थो। अञ्‍ञमञ्‍ञं संसिब्बित्वा कतदसं फलदसं नाम। केतकपुप्फादिपुप्फसदिसाहि दसाहि युत्तं पुप्फदसं नाम। एतेसुपि ‘‘पोत्थके चापी’’ति एत्थ वुत्तअपि-सद्देन दुक्‍कटन्ति वेदितब्बं। तथाति यथा एतेसु कदलिदुस्सादीसु पुप्फदसावसानेसु दुक्‍कटं, तथा कञ्‍चुकवेठनेसुपि यं किञ्‍चि धारेन्तस्स दुक्‍कटन्ति अत्थो।

एतेसु पन अयं विनिच्छयो (महाव॰ अट्ठ॰ ३७२) – सब्बनीलकादीनि रजनानि वमेत्वा पुन रजित्वा धारेतब्बानि, न सक्‍का चे वमेतुं, पच्‍चत्थरणादीनि वा कारेतब्बानि, तिपट्टचीवरस्स मज्झे वा दातब्बानि। अच्छिन्‍नदसकादीनि दसा छिन्दित्वा धारेतब्बानि। कञ्‍चुकं विजटेत्वा रजित्वा परिभुञ्‍जितब्बं। वेठनेपि एसेव नयो। तिरीटकं पादपुञ्छनं कातब्बं। सब्बन्ति इमं वुत्तप्पकारं कुसचीरादिकं अकप्पियचीवरं अच्छिन्‍नचीवरो लभतीति अत्थो। वुत्तम्पि चेतं परिवारे।

‘‘अकप्पकतं नापि रजनाय रत्तं,

तेन निवत्थो येन कामं वजेय्य।

न चस्स होति आपत्ति,

सो च धम्मो सुगतेन देसितो।

पञ्हा मेसा कुसलेहि चिन्तिता’’ति॥ (परि॰ ४८१)।

अयञ्हि पञ्हो अच्छिन्‍नचीवरभिक्खुं सन्धाय वुत्तो, तस्मा हि यं किञ्‍चि अकप्पियचीवरं निवासेत्वा वा पारुपित्वा वा अच्छिन्‍नचीवरकेन अञ्‍ञं परियेसितब्बं। एत्थ पन ‘‘इध पन, भिक्खवे, मनुस्सा निस्सीमगतानं भिक्खूनं चीवरं देन्ति ‘इमं चीवरं इत्थन्‍नामस्स देमा’ति, अनुजानामि, भिक्खवे, सादितुं, न ताव तं गणनूपगं, याव न हत्थं गच्छती’’ति (महाव॰ २५९) वुत्तत्ता याव आहरित्वा तं न दिन्‍नं, ‘‘तुम्हाकं, भन्ते, चीवरं उप्पन्‍न’’न्ति पहिणित्वा वा नारोचितं, ताव गणनं न उपेति, अनधिट्ठितं वट्टति। पत्तेपि एसेव नयो। आनेत्वा दिन्‍ने वा आरोचिते वा परिहारो नत्थि, दसाहं अधिट्ठातब्बं। चीवरविनिच्छयो।

चीवरनिद्देसवण्णना निट्ठिता।

५९.तत्थ मूलेति मूलरजनेति अत्थो। हलिद्दिं विवज्‍जिय सब्बं लब्भन्ति सम्बन्धो। एवं सेसेसुपि। तुङ्गहारको नाम एको सकण्टकरुक्खो, तस्स हरितालवण्णं खन्धरजनं होति। गिहिपरिभुत्तं पन अल्‍लिपत्तेन एकवारं रजितुं वट्टति। फलरजने अकप्पियं नाम नत्थि, सब्बं वट्टतीति। रजनविनिच्छयो।

रजननिद्देसवण्णना निट्ठिता।

६१.दुतिये ‘‘मगधनाळिद्वयतण्डुलसाधित’’न्ति वत्तब्बे विभत्तिलोपं अकत्वा गाथाबन्धसुखत्थं ‘‘मगधे नाळिद्वयतण्डुलसाधित’’न्ति वुत्तं, पचितन्ति अत्थो। एत्थ (पारा॰ ६०२; पारा॰ अट्ठ॰ २.६०२; कङ्खा॰ अट्ठ॰ पत्तसिक्खापदवण्णना) मगधनाळि नाम अड्ढतेरसपलं गण्हाति। ओदनन्ति एत्थ सब्बप्पकारसम्पन्‍नं अवस्सावितोदनं गहेतब्बं। ओदनस्स चतुत्थभागप्पमाणं नातिघनं नातितनुकं हत्थहारियमुग्गसूपञ्‍च आलोपस्स आलोपस्स अनुरूपं याव चरिमकालोपप्पहोनकं मच्छमंसादिब्यञ्‍जनञ्‍च यो पत्तो गण्हाति, सो उक्‍कट्ठो नामाति अत्थो। सप्पितेलतक्‍करसकञ्‍जिकादीनि पन गणनूपगानि न होन्ति, तानि हि ओदनगतिकानेव होन्ति, नेव हापेतुं, न वड्ढेतुं सक्‍कोन्ति। एवमेतं सब्बं पक्खित्तं सचे पत्तस्स हेट्ठिमराजिसमं तिट्ठति, सुत्तेन वा हीरेन वा छिन्दन्तस्स सुत्तस्स वा हीरस्स वा हेट्ठिमन्तं फुसति, अयं उक्‍कट्ठो नाम पत्तो। सचे तं राजिं अतिक्‍कमित्वा थूपीकतं तिट्ठति, अयं उक्‍कट्ठोमको नाम पत्तो। सचे तं राजिं न सम्पापुणाति, अन्तोगतमेव होति, अयं उक्‍कट्ठुक्‍कट्ठो नाम पत्तो।

६२.‘‘मज्झिमो नाम पत्तो नाळिकोदनं गण्हाती’’ति वुत्तत्ता ‘‘मज्झिमो तस्सुपड्ढो वा’’ति वुत्तं। एत्थापि वुत्तप्पकारेन मज्झिमो मज्झिमोमको मज्झिमुक्‍कट्ठोति पत्तत्तिकं वेदितब्बं। ‘‘ओमको नाम पत्तो पत्थोदनं गण्हाती’’ति (पारा॰ ६०२) वचनतो ‘‘ततोपड्ढो’’ति वुत्तं। मगधनाळिया उपड्ढनाळिकोदनञ्‍च तदूपियं सूपं ब्यञ्‍जनञ्‍च गण्हाति, सो ओमको नाम। इधापि ओमको ओमकोमको ओमकुक्‍कट्ठोति पत्तत्तिकं वेदितब्बं। इमेसु पन नवसु पत्तेसु उक्‍कट्ठुक्‍कट्ठो च ओमकोमको च अपत्तो। एतेसु अधिट्ठातब्बकिच्‍चं नत्थि, सेसा सत्त पत्ता अधिट्ठातब्बा, विकप्पेतब्बा चाति अत्थो।

६३.अतिरेकपत्तोति (पारा॰ ६०१) अनधिट्ठितो अविकप्पितो। सकोति ससन्तको। कप्पोति कप्पियो। अयमेवेत्थ सङ्खेपो – यो पत्तो काकणिकमत्तस्सापि मूलस्स दातब्बस्स नत्थिताय सको। अयोपत्तो पञ्‍चहि पाकेहि मत्तिकापत्तो द्वीहि पाकेहि पक्‍कत्ता कप्पो। सो दसाहपरमं कालं अनधिट्ठितो अविकप्पितो धारेय्योति।

६४.अच्छेदादयो चीवरे वुत्तप्पभेदायेव। छिद्देनाति (पारा॰ अट्ठ॰ २.६०८; कङ्खा॰ अट्ठ॰ पत्तसिक्खापदवण्णना) एत्थ यस्स पत्तस्स मुखवट्टितो हेट्ठा द्वङ्गुलप्पदेसे येन छिद्देन कङ्गुसित्थं निक्खमति, तत्तकेन छिद्देन भिज्‍जति। तस्मिं पन अयचुण्णादीहि पटिपाकतिके कते दसाहब्भन्तरे पुन अधिट्ठातब्बं। पत्ताधिट्ठानमुज्झतीति पत्तो अधिट्ठानं उज्झति।

६५.इदानि परिहरणविधिं दस्सेतुं ‘‘पत्तं न पटिसामेय्य सोदक’’न्तिआदि आरद्धं। सोदकं (चूळव॰ २५४) पत्तं न पटिसामेय्य, आतपे च सोदकं पत्तं न ओतपेति अधिप्पायो। न निदहेति निरुदकं कत्वापि अतिकालं न निदहेति अधिप्पायो। भुम्याति भूमियं। न ठपेति तट्टिकाचम्मखण्डादीसु येन केनचि अनत्थताय पंसुसक्खरमिस्साय भूमिया न ठपेय्याति अत्थो। नो च लग्गयेति एत्थपि नागदन्तादीसु (चूळव॰ २५४) यत्थ कत्थचि लग्गन्तस्स दुक्‍कटमेव।

६६.मिड्ढन्तेति (चूळव॰ २५४; चूळव॰ अट्ठ॰ २५४) मिड्ढपरियन्ते। सचे पन परिवत्तेत्वा तत्थेव पतिट्ठाति, एवरूपाय वित्थिण्णाय मिड्ढिया अब्भन्तरपरिच्छेदे ठपेतुं वट्टति, न परियन्ते। परिभण्डन्तेति बाहिरपस्से कताय तनुकमिड्ढिया अन्तेति अत्थो। अङ्के वाति (चूळव॰ २५४) द्विन्‍नं ऊरूनं मज्झे। एत्थ पन अंसबद्धके अंसकूटे लग्गेत्वा अङ्के ठपेतुं वट्टति, न इतरथा। आतपत्तकेति छत्ते। एत्थ भत्तपूरोपि अंसकूटे लग्गितपत्तोपि ठपेतुं न वट्टति।

६७.उच्छिट्ठोदकं (चूळव॰ २५५; चूळव॰ अट्ठ॰ २५५) नाम मुखविक्खालनोदकं, तं पत्ते निट्ठुभित्वा पत्तेन न नीहरेय्याति अत्थो। चलकञ्‍च अट्ठिकञ्‍च चलकट्ठिकं। एतेसु यं किञ्‍चि पत्तेन नीहरन्तस्स दुक्‍कटं। पत्तं पटिग्गहं कत्वा हत्थं धोवितुम्पि न लभति। हत्थधोवितवत्थधोवितउदकम्पि पत्ते आकिरित्वा नीहरितुं न वट्टति। अनुच्छिट्ठपत्तं उच्छिट्ठहत्थेन गहेतुम्पि न वट्टति। हत्थं पन बहि धोवित्वा गहेतुं वट्टति। मच्छमंसफलाफलादीनि खादन्तो यं मुखेन लुञ्‍चित्वा लुञ्‍चित्वा खादति, तं वा तेसं अट्ठिआदिकं वा मुखतो नीहटं पुन अखादितुकामो छड्डेतुकामो पत्ते ठपेतुं न लभति। सिङ्गिवेरनाळिकेरखण्डादीनि खादन्तेहि डंसित्वा डंसित्वा पुन ठपेतुं लभति। ‘‘न भिक्खवे पत्तहत्थेन कवाटं पणामेतब्बं, यो पणामेय्य, आपत्ति दुक्‍कटस्सा’’ति (चूळव॰ २५५) वुत्तत्ता येन केनचि सरीरावयवेन पत्तं गहेत्वा ठितो येन केनचि सरीरावयवेन कवाटं पणामेतुं न लभति, तस्मा ‘‘पत्तहत्थोवा’’ति वुत्तं। अंसकूटे लग्गित्वा ठितस्स वट्टति।

६८.भूमिआधारकेति एत्थ दन्तवल्‍लिवेत्तवाकादीहि कते वलयाधारके। दारुदण्डाधारेति एकदारुना कतआधारके च बहूहि दण्डेहि कतआधारके चाति अत्थो। तिदण्डे न वट्टति। एतेसु पन सुसज्‍जितेसु एकं पत्तं ठपेत्वाव तस्सुपरि एकं ठपेतुं वट्टति, तयो पन न वट्टन्ति। एकं निक्‍कुज्‍जित्वाव भूमियन्ति एत्थ भूमियं कटसारकादीसु अञ्‍ञतरं पत्थरित्वा तस्सुपरि निक्‍कुज्‍जित्वा वा उक्‍कुज्‍जित्वा वा एकं ठपेय्य, द्वे ठपेतुं न वट्टतीति अधिप्पायो। द्वे पन ठपेन्तेन उपरि ठपितपत्तं एकेन पस्सेन भूमियं फुसापेत्वा ठपेतुं वट्टतीति वदन्ति।

६९-७०.इदानि अकप्पियपत्ते दस्सेतुं ‘‘दारुरूपियसोवण्णा’’तिआदि आरद्धं। तत्थ मणिवेळुरियामयाति (चूळव॰ २५२; चूळव॰ अट्ठ॰ २५२) मणीति इन्दनीलकबरकतादि। सचे गहट्ठा भत्तग्गे सुवण्णरूपियतट्टकादीसु सूपब्यञ्‍जनं कत्वा उपनामेन्ति, आमसितुम्पि न वट्टति। घटिकटाहजा (चूळव॰ २५५; चूळव॰ अट्ठ॰ २५५) च तुम्बकटाहजा च घटितुम्बकटाहजा। एत्थ तुम्बकटाहजानाम अलाबु। पत्तविनिच्छयो।

पत्तनिद्देसवण्णना निट्ठिता।

७४.इदानि येहि अङ्गेहि पवारणा होति, तानि अङ्गानि दस्सेतुं ‘‘असन’’न्तिआदिमाह। तत्थ असनन्ति एतेन अविप्पकतभोजनता वुत्ता, भुञ्‍जमानो च सो पुग्गलो होतीति अत्थो। भोजनञ्‍चेवाति यं भुञ्‍जन्तो पवारेति, तं ओदनो कुम्मासो सत्तु मच्छो मंसन्ति इमेसु अञ्‍ञतरं होतीति अत्थो। अभिहारोति दायको तस्स तं भत्तं कायेन अभिहरतीति अत्थो, वाचाभिहारो पन न गहेतब्बो। समीपताति दायको पवारणप्पहोनकभोजनं गहेत्वा अड्ढतेय्यहत्थप्पमाणे ओकासे होतीति अत्थो। कायवाचापटिक्खेपोति हत्थपासे ठितेन अभिहटं भिक्खं कायेन वा वाचाय वा पटिक्खिपेय्याति अत्थो। एत्थ पन सचे भिक्खु निसिन्‍नो होति, आनिसदस्स पारिमन्ततो पट्ठाय, सचे ठितो, पण्हिअन्ततो पट्ठाय, सचे निपन्‍नो, येन पस्सेन निपन्‍नो, तस्स पारिमन्ततो पट्ठाय दायकस्सापि तथाविधस्स ठपेत्वा पसारितहत्थं यं तस्स आसन्‍नतरं अङ्गं, तस्स वसेन परिच्छेदो कातब्बो। पञ्‍च अङ्गा पवारणाति ‘‘असनं पञ्‍ञायति, भोजनं पञ्‍ञायति, हत्थपासे ठितो अभिहरति, पटिक्खेपो पञ्‍ञायती’’ति (पाचि॰ २३९; परि॰ ४२८) पाळियं वुत्तेहि इमेहि पञ्‍चहि अङ्गेहि पवारणा होतीति अत्थो।

७५.इदानि एतेसु पञ्‍चसु भोजनं दस्सेतुं ‘‘ओदनो’’तिआदि वुत्तं। इदानि ओदनादयो इमेहि निब्बत्ताति दस्सेतुं ‘‘साली’’तिआदिमाह। तत्थ सेतरत्तकाळभेदा सब्बापि कङ्गुजातियो कङ्गूति गहेतब्बा। काळसेता कुद्रूसवरका। इमेसं सत्तन्‍नं धञ्‍ञानं ओदनो च भोज्‍जयागु च ओदनो नामाति अत्थो।

७६.सामाकादितिणं (पाचि॰ अट्ठ॰ २३८-२३९) कुद्रूसके सङ्गहं गतन्ति अत्थो। वरकचोरको वरके सङ्गहं गतो, सालियञ्‍चेव नीवारो सङ्गहं गतो सेतत्ताति वदन्ति। इमेसं वुत्तप्पकारानं सानुलोमानं सत्तन्‍नं धञ्‍ञानं तण्डुले गहेत्वा ‘‘यागुं पचिस्सामा’’ति वा ‘‘भत्तं पचिस्सामा’’ति वा यं किञ्‍चि सन्धाय पचन्ति, सचे उण्हं वा सीतलं वा भुञ्‍जन्तानं भोजनकाले गहितगहितट्ठाने ओधि पञ्‍ञायति, अयं ओदनो नाम, पवारणं जनेति। योपि पायासो वा अम्बिलयागु वा उद्धनतो ओतारितमत्ता अब्भुण्हा आविज्झित्वा पिवितुं सक्‍का, गहितोकासेपि ओधिं न दस्सेति, अयं पवारणं न जनेति। उसुमाय पन विगताय घनभावं गच्छति, ओधि पञ्‍ञायति, पुन पवारणं जनेति, पुब्बे तनुकभावो न रक्खति। भत्ते पन उदककञ्‍जिकखीरादीनि आकिरित्वा ‘‘यागुं गण्हथा’’ति वदन्ति, किञ्‍चापि तनुका होति, पवारणं जनेतियेव तस्मिं यागुया नत्थिभावतो। सचे पन पक्‍कुथितेसु उदकादीसु पक्खिपित्वा पचित्वा देन्ति, यागुसङ्गहमेव गच्छति।

७७.भट्ठधञ्‍ञमयोति सत्तविधानिपि धञ्‍ञानि गहेत्वा खरपाकभज्‍जितानं तेसं तण्डुले कोट्टेत्वा कतचुण्णकुण्डकानि सत्तु नाम। समपाकभज्‍जितानं पन आतपसुक्खानं वा तण्डुलानं चुण्णकुण्डकानि सत्तुसङ्ख्यं न गच्छन्ति। यवसम्भवोति अञ्‍ञेहि पन मुग्गादीहि कतकुम्मासो न पवारेतीति अधिप्पायो। उदकसम्भवोति इमिना कक्‍कटकसिप्पिकसम्बुकादयोपि सङ्गहं गच्छन्ति। सचे यागुपानकाले एकस्मिं भाजने ठपेत्वा मच्छमंसं वा खादन्ति, ते चे अखादन्तो अञ्‍ञं पवारणप्पहोनकं पटिक्खिपति, न पवारेति। खादितेपि सचे मुखे अवसिट्ठं नत्थि, तदा पटिक्खिपन्तोपि न पवारेतियेव। सचे पत्ते अवसिट्ठं अत्थि, मुखे नत्थि, तञ्‍चे अखादितुकामो होति, अञ्‍ञत्थ वा गन्त्वा खादितुकामो, तस्मिं खणे पटिक्खिपन्तोपि न पवारेतियेव।

७८.भोजनन्ति (पाचि॰ अट्ठ॰ २३८-२३९) पञ्‍चसु भोजनेसु यं किञ्‍चि भोजनं। कप्पियं वा अकप्पियं वा भुञ्‍जन्तोति सम्बन्धो। निसेधयन्ति कायेनाभिहटं अङ्गुलिचलनादिना वा भमुकविकारेन वा कुद्धभावेन ओलोकेन वा पटिक्खिपन्तो कायेन वा ‘‘अल’’न्ति वा ‘‘न गण्हामी’’ति वा ‘‘मा आकिरा’’ति वा ‘‘अपगच्छा’’ति वा आदिना नयेन पटिक्खिपन्तो वाचाय वा निसेधयन्तोति अत्थो। कप्पन्ति कप्पियभोजनमेव पटिक्खिपन्तो सो पवारेति, अकप्पियमंसं वा भोजनं वा पटिक्खिपन्तो न पवारेति। कस्मा? तस्स पटिक्खिपितब्बट्ठाने ठितत्ता। सचे कप्पियभोजनं भुञ्‍जमानो अकप्पियं पटिक्खिपति, न पवारेति। कस्मा? तस्स पटिक्खिपितब्बतो। इदानि मिस्सकनयं दस्सेतुं ‘‘तन्‍नामेना’’तिआदि वुत्तं। तत्रायं पिण्डत्थो – तन्‍नामेन वा इमन्ति वा अभिहटं कप्पियं निसेधयं पवारेय्याति। किं वुत्तं होति? यो पन मच्छमंसमिस्सं (कङ्खा॰ अट्ठ॰ पठमपवारणासिक्खापदवण्णना; पाचि॰ अट्ठ॰ २३८-२३९) यागुं ब्यञ्‍जनं वा आहरित्वा ‘‘मच्छं गण्हथ, मंसं गण्हथा’’ति वदति, तं पटिक्खिपतो पवारणा होति। सचे ‘‘यागुं गण्हथ, रसब्यञ्‍जनं गण्हथा’’ति वदति, तं पटिक्खिपतो पवारणा न होति। कस्मा? तस्सापि अत्थिताय। सचे ‘‘इमं गण्हथा’’ति सवत्थुकं कत्वा देति, तं पटिक्खिपतो पवारणा होति। भत्तमिस्सकेपि एसेव नयो। सचे अञ्‍ञस्स अभिहटं पटिक्खिपति, पवारणा नत्थियेव।

७९-८०.इदानि पवारणं अजनेन्ते दस्सेतुं ‘‘लाजा’’तिआदि वुत्तं। एत्थ लाजा तंसत्तुभत्तानीति (कङ्खा॰ अट्ठ॰ पठमपवारणासिक्खापदवण्णना) लाजा च लाजेहि कतसत्तुभत्तानि चाति अत्थो। मच्छमंसपूवेसु पन पवारणा होति, तस्मा ‘‘सुद्धखज्‍जको’’ति वुत्तं। भट्ठपिट्ठन्ति पुब्बे आमकं पच्छा भज्‍जितब्बन्ति वुत्तं होति। वेळुआदीनं वुत्तावसेसानं भत्तन्ति सम्बन्धो। रसयागु रसो पक्‍कयागु। मंसादीहि अमिस्सिता सुद्धयागु। पुथुकामयं पन यं किञ्‍चि पवारणं न जनेति।

८१.वुट्ठायाति (पाचि॰ अट्ठ॰ २३८-२३९) आसना उट्ठाय अतिरित्तं न कातब्बन्ति सम्बन्धो। सचे पवारेत्वा आसना न वुट्ठाति भिक्खु, तस्सापि अतिरित्तं कातुं लभति। अभुत्तेन च भोजनन्ति येन पञ्‍चन्‍नं भोजनानं अञ्‍ञतरं भोजनं अन्तमसो कुसग्गेनापि न भुत्तं, तेनापि अतिरित्तं न कातब्बन्ति अत्थो। येन पन अरुणुग्गमेपि भुत्तं होति, सो चे अपवारितो आसना वुट्ठितोपि मज्झन्हिकसमयेपि पुन किञ्‍चि अभुत्वापि कातुं लभति। येन यं वापुरे कतन्ति येन यं वा पुब्बे कतं, तेन तम्पि पच्छा न कातब्बं। अञ्‍ञेन पन तं कातुं वट्टतीति वदन्ति।

८२.यं फलं वा कन्दमूलं वा पञ्‍चहि समणकप्पेहि कतकप्पियं अञ्‍ञम्पि कप्पियभोजनं वा कप्पियमंसं वा, इदं कप्पियं नाम, वुत्तप्पकारविपरीतं अकप्पियं नाम, तस्मिं अतिरित्तकरणं न रुहति, यञ्‍च पटिग्गहेत्वा न गहितं, तस्मिम्पि न रुहति, तेन वुत्तं ‘‘कप्पियं गहितञ्‍चेवा’’ति। उच्‍चारितन्ति कप्पियं कारेतुं आगतेन भिक्खुना ईसकम्पि उक्खित्तं वा अपनमितं वाति अत्थो। हत्थपासतो बहि ठितं कातुं न वट्टति, तेन वुत्तं ‘‘हत्थपासग’’न्ति। अतिरित्तं करोन्तेवन्ति अतिरित्तं करोन्तो ‘‘अलमेतं सब्ब’’न्ति वचीभेदं कत्वा एवं भासतूति अत्थो। ‘‘अलमेतं सब्ब’’न्ति तिक्खत्तुं वत्तब्बं, अयं किर आचिण्णो। विनयधरा किर पन ‘‘सकिं एव वत्तब्ब’’न्ति वदन्ति। अलमेतं सब्बन्ति इदम्पि वो अधिकं, इतो अञ्‍ञं न लच्छसीति अत्थो।

८३.अनुपसम्पन्‍नहत्थगन्ति कप्पियं करोन्तेन पन अनुपसम्पन्‍नस्स हत्थे ठितंयेव न कातब्बं, तं पन अञ्‍ञेन भिक्खुना पटिग्गहापेत्वा तस्स हत्थे ठितं अतिरित्तं कत्वा अनुपसम्पन्‍नस्स दातुं वट्टति। अत्तना आगन्त्वा अञ्‍ञस्स हत्थे च पेसयित्वापि कारेतुं लब्भतेति अत्थो। तं पन अतिरित्तकारकं ठपेत्वा अञ्‍ञो सब्बो पवारितोपि अप्पवारितोपि भुञ्‍जितुं लभतीति अत्थो। सचे पवारितो परिभुञ्‍जति, यथा अकतेन मिस्सं न होति, तथा मुखञ्‍च हत्थञ्‍च सुद्धं कत्वा भुञ्‍जितब्बं। गिलानस्स भुत्तावसेसम्पि तस्स ‘‘अज्‍ज वा स्वे वा खादिस्सती’’ति आहटम्पि अनतिरित्तकतं भुञ्‍जितुं वट्टतीति। पवारणाविनिच्छयो।

पवारणानिद्देसवण्णना निट्ठिता।

८५.तेसु यावकालिकं दस्सेतुं ‘‘पिट्ठं मूलं फलं खज्‍ज’’न्तिआदिमाह। एत्थ (पाचि॰ २४८-२५०; पाचि॰ अट्ठ॰ २४८-२४९) पिट्ठखादनीयं नाम सत्तन्‍नं ताव धञ्‍ञानं धञ्‍ञानुलोमानं अपरण्णानञ्‍च पिट्ठं पनसपिट्ठं लबुजपिट्ठं अम्बाटकपिट्ठं सालपिट्ठं धोतकतालपिट्ठं खीरवल्‍लिपिट्ठञ्‍चाति एवमादीनि तेसु तेसु जनपदेसु पकतिआहारवसेन मनुस्सानं खादनीयत्थञ्‍च भोजनीयत्थञ्‍च फरणकानि पिट्ठानि यावकालिकानि। इमिनाव लक्खणेन मूलखादनीयादीसुपि यावकालिकलक्खणं वेदितब्बं, अतिवित्थारभयेन संखित्तं। गोरसो नाम खीरदधितक्‍करसो। धञ्‍ञभोजनन्ति सानुलोमानि सत्तधञ्‍ञानि च पञ्‍चविधभोजनञ्‍चाति अत्थो। यागुसूपप्पभुतयोति एत्थ पभुति-सद्देन कन्दखादनीयं मुळालखादनीयं मत्थकखादनीयं खन्धखादनीयं तचखादनीयं पत्तखादनीयं पुप्फखादनीयं अट्ठिखादनीयं निय्यासखादनीयन्ति इमानि सङ्गहितानीति वेदितब्बानि।

तत्रिदं मुखमत्तनिदस्सनं – भिससङ्खातो पदुमपुण्डरीककन्दो पिण्डालुमसालुकआदयो वल्‍लिकन्दो आलुवकन्दो तालकन्दोति एवमादि कन्दखादनीयं। पदुममुळालादयो मुळालखादनीयं। तालहिन्तालकुन्तालकेतकनाळिकेरपूगरुक्खखज्‍जूरीआदीनं कळीरसङ्खाता मत्थका मत्थकखादनीयं। उच्छुखन्धो नीलुप्पलरत्तुप्पलकुमुदसोगन्धिकानं पुप्फदण्डकानीति एवमादि खन्धखादनीयं। तचखादनीयं उच्छुतचो एव एको यावकालिको, सोपि सरसो। मूलकं खारको चच्‍चु तम्बुको तण्डुलेय्यकोति एवमादि पत्तखादनीयं। मूलकपुप्फं खारकपुप्फं चच्‍चुपुप्फं तम्बुकपुप्फन्ति एवमादि पुप्फखादनीयं, असोकपुप्फं पन यावजीविकं। लबुजपनसट्ठिआदि अट्ठिखादनीयं। निय्यासखादनीये यावकालिकं नत्थि। एते वुत्तप्पकारा यावकालिका होन्तीति अत्थो।

८६.इदानि ‘‘अनुजानामि, भिक्खवे, अट्ठ पानानि अम्बपानं जम्बुपानं चोचपानं मोचपानं मधुकपानं मुद्दिकपानं सालूकपानं फारुसकपान’’न्ति (महाव॰ ३००) एवं वुत्तं अट्ठविधं पानकं यामकालिकं नामाति दस्सेतुं ‘‘मधू’’तिआदिमाह। तत्थ (महाव॰ अट्ठ॰ ३००) मधुजं मुद्दिकजं सालूकजं चोचजं मोचजं अम्बुजं जम्बुजञ्‍चाति एवमत्थो गहेतब्बो। एत्थ मधुजं नाम मधुकानं जातिरसेन कतं, तं पन उदकसम्भिन्‍नमेव वट्टति, सुद्धं न वट्टति। मुद्दिकपानं नाम मुद्दिका उदके मद्दित्वा परिस्सावेत्वा गहितं। सालूकपानं नाम रत्तुप्पलनीलुप्पलादीनं किञ्‍जक्खरेहि कतं। सेसानि पाकटानेव। एत्थ पन सचे सयं एतानि यावकालिकवत्थूनि पटिग्गहेत्वा उदके मद्दित्वा आतपे आदिच्‍चपाकेन पचित्वा परिस्सावेत्वा पानकं करोति, तं पुरेभत्तमेव कप्पति। सचे अनुपसम्पन्‍नेन कतं लभति, तदहुपुरेभत्तं सामिसम्पि वट्टति, पच्छाभत्तं निरामिसपरिभोगेन याव अरुणुग्गमना वट्टति। इमानि अट्ठ पानानि सीतानिपि आदिच्‍चपाकानिपि वट्टन्ति, अग्गिपाकानि पन न वट्टन्ति, तस्मा ‘‘नग्गिसन्तत्त’’न्ति वुत्तं।

८७.‘‘अनुजानामि, भिक्खवे, सब्बं फलरसं ठपेत्वा धञ्‍ञफलरस’’न्ति (महाव॰ ३००) वुत्तत्ता धञ्‍ञफलरसो पन न वट्टति, तेन वुत्तं ‘‘सानुलोमानि धञ्‍ञानि ठपेत्वा’’ति। ‘‘अनुजानामि, भिक्खवे, सब्बं पुप्फरसं ठपेत्वा मधुकपुप्फरस’’न्ति वुत्तत्ता मधुकपुप्फरसो आदिच्‍चपाको वा होतु अग्गिपाको वा, पच्छाभत्तं न वट्टति, तेन वुत्तं ‘‘मधुकपुप्फमञ्‍ञत्रा’’ति।

८८.‘‘अनुजानामि, भिक्खवे, सब्बं पत्तरसं ठपेत्वा डाकरस’’न्ति वुत्तत्ता उदकेन पक्‍कानम्पि यावकालिकपत्तानं रसो पुरेभत्तमेव वट्टति, सीतोदकेन मद्दितानं रसो यामकालिकं। तेन वुत्तं ‘‘ठपेत्वा पक्‍कडाकज’’न्ति। यावजीविकपण्णस्स उदकेन पक्‍कस्स रसो यावजीविको होति।

८९.इदानि सत्ताहकालिके दस्सेतुं ‘‘सप्पी’’तिआदिमाह। एत्थ (महाव॰ २६०) पन –

‘‘सप्पिनोनीततेलानि, मधुफाणितमेव च।

सत्ताहकालिका सप्पि, येसं मंसमवारित’’न्ति॥ –

पाठो गहेतब्बो। एवं पन गहिते वसा तेलग्गहणेन गहिताव होति ‘‘तेलं नाम तिलतेलं सासपतेलं मधुकतेलं एरण्डतेलं वसातेल’’न्ति (पारा॰ ६२३; पाचि॰ २६०) एवं पाळियं वित्थारितत्ता। एवं पन अग्गहेत्वा वसा च ‘‘मधुफाणित’’न्ति पाठे गहिते यावकालिकभूता वसा सत्ताहकालिकाति आपज्‍जेय्य, ‘‘यानि खो पन तानि गिलानानं भिक्खूनं पटिसायनीयानि भेसज्‍जानि, सेय्यथिदं – सप्पि नवनीतं तेलं मधु फाणित’’न्ति (पारा॰ ६२२) एवं पञ्‍चेव भगवता सत्ताहकालिकभेसज्‍जानि अनुञ्‍ञातानि, ततो उत्तरि छट्ठस्स सत्ताहकालिकभेसज्‍जस्स अत्थितापि आपज्‍जति, भेसज्‍जक्खन्धकेपि भगवता ‘‘अनुजानामि, भिक्खवे, वसानि भेसज्‍जानि अच्छवसं मच्छवसं सुसुकावसं सूकरवसं गद्रभवसं काले पटिग्गहितं काले निप्पक्‍कं काले संसट्ठं तेलपरिभोगेन परिभुञ्‍जितु’’न्ति (महाव॰ २६२) एवं सत्ताहकालिकवसेन वसं अननुजानित्वा ततो निब्बत्ततेलमेव अनुञ्‍ञातं, तस्मा ‘‘मधुफाणितमेव चा’’ति पाठे अग्गहिते पाळिया अट्ठकथाय च विरुज्झति। थेरेन पन उत्तरविहारवासीनं खुद्दसिक्खाय आगतनयेन वुत्तं। तेसं पन –

‘‘सप्पि नवनीतं तेलं, मधु फाणितपञ्‍चमं।

अच्छमच्छवसादि च, होन्ति सत्ताहकालिका’’ति॥ –

एवमागतं। अम्हाकं पन विसुं सत्ताहकालिके आगतट्ठानं नत्थीति वदन्ति, उपपरिक्खितब्बं।

इदानि तेसु सप्पिं दस्सेतुं ‘‘येसं मंसपवारित’’न्ति वुत्तं। ‘‘सप्पिनाम गोसप्पि वा अजिकासप्पि वा महिं ससप्पि वा। येसं मंसं कप्पति, तेसं सप्पि, नवनीतं नाम तेसंयेव नवनीत’’न्ति (पारा॰ ६२३; पाचि॰ २६०) पाळियं वुत्तत्ता नवनीतं पन गहितन्ति न वित्थारितं , सप्पि पन पुरेभत्तं पटिग्गहितं तदहु पुरेभत्तं सामिसम्पिनिरामिसम्पि वट्टति। पच्छाभत्ततो पट्ठाय सत्ताहं निरामिसं परिभुञ्‍जितब्बं। सत्ताहातिक्‍कमे सचे एकभाजने ठपितं, एकं निस्सग्गियं। सचे बहूसु, वत्थुगणनाय निस्सग्गियपाचित्तियानि। पच्छाभत्तं पटिग्गहितं सत्ताहं निरामिसमेव वट्टति। सप्पि तापेन्तस्स सामंपाको न होति, ‘‘नवनीतं पन तापेन्तस्स हि सामंपाको न होति, सामंपक्‍केन पन तेन सद्धिं आमिसं न वट्टती’’ति च ‘‘सचे अनुपसम्पन्‍नो पुरेभत्तं पटिग्गहितनवनीतेन सप्पिं कत्वा देति, पुरेभत्तं सामिसं वट्टति। सचे सयं करोति, सत्ताहं निरामिसमेव वट्टती’’ति च समन्तपासादिकायं (पारा॰ अट्ठ॰ २.६२२) नवनीतम्हियेव सामंपाकता वुत्ता, न सप्पिम्हि। यं पन कङ्खावितरणियं वुत्तं ‘‘निब्बत्तितसप्पि वा नवनीतं वा पचितुं वट्टती’’ति, ‘‘तं पन तदहु पुरेभत्तम्पि सामिसं परिभुञ्‍जितुं न वट्टती’’ति (कङ्खा॰ अट्ठ॰ भेसज्‍जसिक्खापदवण्णना) च, तत्थ यावकालिकवत्थुना असम्मिस्सं सुधोतं नवनीतं सन्धाय ‘‘पचितुं वट्टती’’ति वुत्तं। सयंपचितसत्ताहकालिकेन सद्धिं यदि आमिसं भुञ्‍जति, तं आमिसं सयंपक्‍कसत्ताहकालिकेन मिस्सितं अत्तनो यावकालिकभावं सत्ताहकालिकेन गण्हापेति, तथा च सति यावकालिकं अपक्‍कम्पि सयंपक्‍कभावं उपगच्छतीति ‘‘सामिसं परिभुञ्‍जितुं न वट्टती’’ति वुत्तं। यथा सयंपक्‍कसत्ताहकालिकवसातेलं सयंभज्‍जितसासपादियावजीविकवत्थूनं तेलञ्‍च सामिसं तदहु पुरेभत्तम्पि न वट्टति, तथा नवनीतसप्पीति वेदितब्बं। वक्खति च आचरियो –

९०.इदानि तेलं दस्सेतुं ‘‘तेलं तिलवसेरण्डमधुसासपसम्भव’’न्तिआदिमाह। एत्थ तिलादीहि सम्भवं निब्बत्तं तेलन्ति सम्बन्धो। एत्थ (पारा॰ अट्ठ॰ १.१००) पन पुरेभत्तं तिले पटिग्गहेत्वा कततेलं पुरेभत्तं सामिसम्पि वट्टति, पच्छाभत्ततो पट्ठाय सवत्थुकप्पटिग्गहितत्ता अनज्झोहरणीयं। पच्छाभत्तं पटिग्गहेत्वा कततेलं अनज्झोहरणीयं, सीसमक्खनादीसु उपनेतब्बं। एरण्डमधुकसासपट्ठीनि पटिग्गहेत्वा सचे तानि भज्‍जित्वा तेलं करोति, तदहु पुरेभत्तम्पि सामिसं न वट्टति, सामंपाकता होति। सचे अभज्‍जित्वा करोति, तदहु पुरेभत्तं सामिसम्पि वट्टति, पच्छाभत्ततो पट्ठाय निरामिसमेव वट्टति, परिभुञ्‍जितब्बवत्थूनं यावजीविकत्ता सवत्थुकप्पटिग्गहणे दोसो नत्थीति। तेलग्गहणत्थाय एरण्डकट्ठिआदीनि पटिग्गहेत्वा सत्ताहं अतिक्‍कामयतो दुक्‍कटं। तथा पाळियं अनागतानि अदस्सितानि कोसम्बककुसुम्भादीनं तेलानि।

इदानि मधुविकतिं दस्सेतुं ‘‘खुद्दाभमरमधुकरि-मक्खिकाहि कत’’न्ति वुत्तं। तत्थ (पारा॰ अट्ठ॰ २.६२३) खुद्दाति खुद्दमक्खिका। भमराति महाभमरमक्खिका । दण्डकेसु मधुकरा मधुकरिमक्खिका नाम। एताहि तीहि मक्खिकाहि कतं मधु नामाति अत्थो। ‘‘मधु नाम मक्खिकामधू’’ति पाळियं (पारा॰ ६२३; पाचि॰ २६०) वुत्तत्ता अञ्‍ञेहि तुम्बटकादीहि कतं सत्ताहकालिकं न होतीति वेदितब्बं।

इदानि फाणितं दस्सेतुं ‘‘रसादिउच्छुविकति, पक्‍कापक्‍का च फाणित’’न्ति आह। पक्‍का च अपक्‍का च रसादिउच्छुविकति फाणितन्ति अत्थो। मधुकपुप्फफाणितं पुरेभत्तं सामिसं वट्टति, पच्छाभत्ततो पट्ठाय सत्ताहं निरामिसमेव वट्टति। तस्स सत्ताहातिक्‍कमे दुक्‍कटं। चिञ्‍चफाणितञ्‍च अम्बफाणितञ्‍च यावकालिकमेव।

९१.इदानि एतेसु वसातेलस्स ओदिस्स अनुञ्‍ञातत्ता तं विसुं उद्धरित्वा दस्सेतुं ‘‘सवत्थुपक्‍का सामं वा’’तिआदिमाह। सत्तविधञ्हि (पारा॰ अट्ठ॰ २.६२३) ओदिस्सं नाम ब्याधोदिस्सं पुग्गलोदिस्सं कालोदिस्सं समयोदिस्सं देसोदिस्सं वसोदिस्सं भेसज्‍जोदिस्सन्ति।

तत्थ ‘‘अनुजानामि, भिक्खवे, अमनुस्सिकाबाधे आमकमंसं आमकलोहित’’न्ति (महाव॰ २६४) वुत्तं, इदं ब्याधोदिस्सं नाम। एत्थ पन कालेपि विकालेपि कप्पियाकप्पियमंसलोहितं वट्टति। ‘‘अनुजानामि, भिक्खवे, रोमन्थकस्स रोमन्थन’’न्ति (चूळव॰ २७३) एवं अनुञ्‍ञातं पुग्गलोदिस्सं नाम। ‘‘अनुजानामि, भिक्खवे, चत्तारि महाविकटानि दातुं गूथं मुत्तं छारिकं मत्तिक’’न्ति (महाव॰ २६८) एवं सप्पदट्ठकाले अप्पटिग्गहितकं अनुञ्‍ञातं कालोदिस्सं नाम। गणभोजनादि समयोदिस्सं नाम। गणङ्गणूपाहनानि देसोदिस्सं नाम। वसोदिस्सं नाम ‘‘अनुजानामि, भिक्खवे, वसानि भेसज्‍जानी’’ति (महाव॰ २६२) एवं वसानामेन अनुञ्‍ञातं। तं ठपेत्वा मनुस्सवसं सब्बेसं कप्पियाकप्पियवसानं तेलं तंतदत्थिकानं तेलपरिभोगेन परिभुञ्‍जितुं वट्टति। भेसज्‍जोदिस्सं नाम ‘‘अनुजानामि, भिक्खवे, तानि पञ्‍च भेसज्‍जानी’’ति (महाव॰ २६१) एवं भेसज्‍जनामेन वुत्तानि सप्पिआदीनि पञ्‍च।

यथा पन खीरदधिआदीहि पक्‍कतेलं पच्छाभत्तं न वट्टति, न एवमिदं। इदं पन तेलं सवत्थुकपक्‍कम्पि वट्टति, तं दस्सेतुं ‘‘सवत्थुपक्‍का सामं वा’’ति वुत्तं। वसं ओलोकेत्वा ‘‘सवत्थुपक्‍का’’ति वुत्तं। सामं पक्‍का वाति अत्थो। यथा सवत्थुकप्पटिग्गहितत्ता सामंपक्‍कत्ता दधिआदीहि पक्‍कतेलं अत्तना कतं पुरेभत्तम्पि न वट्टति, न एवमिदं। इदं पन अत्तना सवत्थुकपक्‍कम्पि पुरेभत्तम्पि पच्छाभत्तम्पि वट्टतीति अत्थो। एत्थ पन कारणूपचारेन वसातेलं ‘‘वसा’’ति वुत्तं।

कालेति पुरेभत्तकाले परेहि वा अत्तना वा पक्‍काति अत्थो। पच्छाभत्तं पन पचितुं न वट्टति ‘‘काले पटिग्गहितं काले निप्पक्‍कं काले संसट्ठ’’न्ति (महाव॰ २६२) वुत्तत्ता। तस्मा ‘‘काले’’ति वुत्तं। यो पन विकाले पटिग्गहेत्वा विकाले पचित्वा विकाले परिस्सावेत्वा परिभुञ्‍जति, सो तीणि दुक्‍कटानि आपज्‍जति।

अमानुसाति एत्थ (महाव॰ २६२) पन अच्छवसादीनं अनुञ्‍ञातत्ता ठपेत्वा मनुस्सवसं सब्बेसं अकप्पियमंसानं वसा अनुञ्‍ञाताति वेदितब्बा। मंसेसु हि मनुस्सहत्थिमंसादीनि दस मंसानि पटिक्खित्तानि, वसा पन एका मनुस्सवसा एव।

अनुपसम्पन्‍नेन (पारा॰ अट्ठ॰ २.६२३) कतनिब्बट्टितवसातेलं पुरेभत्तं पटिग्गहितं पुरेभत्तं सामिसम्पि वट्टति, पच्छाभत्ततो पट्ठाय सत्ताहं निरामिसमेव वट्टति। यं पनेत्थ सुखुमरजसदिसं मंसं वा न्हारु वा अट्ठि वा लोहितं वा, तं अब्बोहारिकं। सचे सयं करोति, पुरेभत्तं पटिग्गहेत्वा पचित्वा परिस्सावेत्वा सत्ताहं निरामिसमेव परिभुञ्‍जितब्बं। निरामिसपरिभोगञ्हि सन्धाय इदं वुत्तं ‘‘काले पटिग्गहितं काले निप्पक्‍कं काले संसट्ठं तेलपरिभोगेन परिभुञ्‍जितु’’न्ति (महाव॰ २६२)। अञ्‍ञेसन्ति सप्पिआदीनं। वत्थुन्ति यावकालिकभूतं वत्थुं। यावकालिकवत्थूनं वत्थुं न पचेति सम्बन्धो।

९२.इदानि यावजीविकविकतिं दस्सेतुं ‘‘हलिद्दी’’तिआदि वुत्तं। तत्थायमनुत्तानपदत्थो (महाव॰ २६३; पाचि॰ अट्ठ॰ २४८-२४९) – पञ्‍चमूलादिकञ्‍चापीति एत्थ द्विपञ्‍चमूलेन सद्धिं अञ्‍ञानिपि तग्गतिकानि मूलभेसज्‍जानि गहितानीति ञातब्बं।

९३-५.बिळङ्गादीनि फलभेसज्‍जानि। तत्थ (महाव॰ २६३) गोट्ठफलन्ति मदनफलन्ति वदन्ति। कप्पासादीनं पण्णन्ति सम्बन्धो। इमे पन वुत्तप्पकारा मूलभेसज्‍जफलभेसज्‍जपण्णभेसज्‍जवसेन वुत्ता सब्बे कप्पिया। इमेसं पुप्फफलपण्णमूला सब्बेपि कप्पिया यावजीविकायेव। ठपेत्वा उच्छुनिय्यासं सब्बो च निय्यासो सरसञ्‍च उच्छुजं तचं ठपेत्वा सब्बो च तचोति सम्बन्धो।

९६.मधुना (पारा॰ अट्ठ॰ २.६२३) अमक्खितं सुद्धसित्थञ्‍च। मधुमक्खितं पन सत्ताहकालिकमेव। यञ्‍च किञ्‍चीति ओदनं मंसं अट्ठिआदीनीति अत्थो।

९७.‘‘यानि वा पनञ्‍ञानिपि अत्थि नेव खादनीये खादनीयत्थं फरन्ति, न भोजनीये भोजनीयत्थं फरन्ति, तानि पटिग्गहेत्वा यावजीवं परिहरितुं, सति पच्‍चये परिभुञ्‍जितुं , असति पच्‍चये परिभुञ्‍जन्तस्स आपत्ति दुक्‍कटस्सा’’ति (महाव॰ २६३) वुत्तत्ता ‘‘आहारत्थमसाधेन्तं, सब्बं तं यावजीविक’’न्ति वुत्तं।

९८.सब्बस्साति गिलानस्सापि अगिलानस्सपीति अत्थो। कालिकत्तयन्ति यावकालिकं वज्‍जेत्वा अवसेसं सति पच्‍चये विकाले कप्पतीति अत्थो।

९९.जनयन्तुभोति जनयन्ति उभो। किं वुत्तं होति? यावकालिकयामकालिकसङ्खाता उभो कालिका अत्तनो कालमतिक्‍कमित्वा परिभुत्ता पाचित्तिं जनयन्तीति अत्थो। किञ्‍च भिय्यो (महाव॰ २७४; महाव॰ अट्ठ॰ २७४; कङ्खा॰ अट्ठ॰ सन्‍निधिकारकसिक्खापदवण्णना) – उभोपि पनेते अकप्पियकुटियं वुत्ता अन्तोवुत्थं दुक्‍कटञ्‍च, पुनदिवसे परिभुञ्‍जतो सन्‍निधिं पाचित्तियञ्‍च जनयन्तीति अत्थो।

१००.अनारुळ्हेति पाळियं अनागते मनुस्ससप्पिआदिम्हीति अत्थो।

१०१.निस्सट्ठलद्धन्ति (पारा॰ ६२४) विनयकम्मं कत्वा पुन लद्धन्ति अत्थो। विकप्पेन्तस्स सत्ताहेति सत्ताहब्भन्तरे सामणेरस्स ‘‘इदं सप्पिं तेल’’न्तिआदिना नयेन नामं गहेत्वा ‘‘तुय्हं विकप्पेमी’’ति वा ‘‘इत्थन्‍नामस्स विकप्पेमी’’ति वा सम्मुखापि वा परम्मुखापि वा विकप्पेन्तस्स अनापत्तीति सम्बन्धो। पाळियं पन ‘‘अनापत्ति अन्तोसत्ताहे अधिट्ठेति, विस्सज्‍जेति, नस्सति, विनस्सति, डय्हति, अच्छिन्दित्वा गण्हन्ति, विस्सासं गण्हन्ती’’ति (पारा॰ ६२५) एत्तकमेव वुत्तं, ‘‘विकप्पेमी’’ति इदं पन नत्थि। किञ्‍चापि नत्थि, अथ खो ‘‘अनधिट्ठिते अधिट्ठितसञ्‍ञी निस्सग्गियं पाचित्तियं, अविकप्पिते विकप्पितसञ्‍ञी निस्सग्गियं पाचित्तिय’’न्ति (पारा॰ ६२४) आपत्तिवारे आगतत्ता थेरेन दस्सितं। तं दस्सेन्तेनापि सचे उपसम्पन्‍नस्स विकप्पेति, अत्तनो एव सन्तकं होति, पटिग्गहणम्पि न विजहति, तस्मा उपसम्पन्‍नवसेन अदस्सेत्वा अनुपसम्पन्‍नवसेन दस्सितं। तस्स हि विकप्पिते पटिग्गहणम्पि विजहति, आपत्तिपि न होतीति। अधिट्ठतोति अब्भञ्‍जनादीनि अधिट्ठहन्तस्स अनापत्तीति अत्थो। सचे पन सत्ताहब्भन्तरे निरपेक्खो हुत्वा अनुपसम्पन्‍नस्स परिच्‍चजति, परिच्‍चत्तत्ता अनापत्ति, इतरस्स च अप्पटिग्गहितत्ता उभिन्‍नम्पि कायिकपरिभोगो वट्टति। अनिस्सग्गियत्ता पन बाहिरपरिभोगेन वट्टति। ‘‘तानि पटिग्गहेत्वा सत्ताहपरमं सन्‍निधिकारकं परिभुञ्‍जितब्बानी’’ति (पारा॰ ६२३) एवं नियमेत्वा अनुञ्‍ञातत्ता वुत्तं ‘‘अञ्‍ञस्स ददतोपि च अनापत्ती’’ति।

१०२.सब्भावन्ति अत्तनो सभावं। यस्मा गाहापयन्ति, तस्मा एवमुदीरितन्ति वुत्तन्ति अत्थो। इदानि वक्खमानं सन्धाय ‘‘एव’’न्ति वुत्तं।

१०३-५.सत्ताहं यावजीविकन्ति (महाव॰ ३०५; महाव॰ अट्ठ॰ कङ्खा॰ अट्ठ॰ सन्‍निधिकारकसिक्खापदवण्णना) सत्ताहकालिकञ्‍च यावजीविकञ्‍चाति अत्थो। किं वुत्तं होति? सत्ताहकालिकयावजीविकद्वयं सेसकालिकसम्मिस्सं सम्भिन्‍नरसं कत्वा परिभुञ्‍जतो सन्‍निधिपाचित्ति होतीति उदीरितन्ति। तदहु पटिग्गहितं तदहेवाति अत्थो। सेसन्ति सत्ताहकालिकयावजीविकद्वयं। इतरन्ति यावजीविकं। पुरे पटिग्गहितं वा होतु, तदहु वा पटिग्गहितं, यावजीविकं सत्ताहकालिकेन सत्ताहं कप्पतीति वेदितब्बं। ‘‘यावकालिकेन, भिक्खवे, यामकालिकं, सत्ताहकालिकं, यावजीविकं तदहु पटिग्गहितं काले कप्पति, नो विकाले। यामकालिकेन, भिक्खवे, सत्ताहकालिकं, यावजीविकं तदहु पटिग्गहितं यामे कप्पति, यामातिक्‍कन्ते न कप्पति। सत्ताहकालिकेन, भिक्खवे, यावजीविकं पटिग्गहितं सत्ताहं कप्पति, सत्ताहातिक्‍कन्ते न कप्पती’’ति हि भेसज्‍जक्खन्धके (महाव॰ ३०५) वुत्तं। एत्थ पन ‘‘तदहु पटिग्गहित’’न्ति विसेसवचनस्स नत्थिताय पुरे पटिग्गहितम्पि वट्टतीति सिद्धन्ति। कालिकविनिच्छयो।

कालिकनिद्देसवण्णना निट्ठिता।

१०७.इदानि येन कायप्पटिबद्धेन पटिग्गहणं न रुहति, तं दस्सेतुं ‘‘असंहारिये’’तिआदिमाह। खाणुके (पाचि॰ अट्ठ॰ २६५) बन्धित्वा ठपितमञ्‍चादिम्हि वा फलके वा पासाणे वा असंहारिये न रुहतीति अत्थो। तत्थजाते पदुमिनिपण्णे वा किंसुकपण्णादिम्हि वा न वट्टति, सुखुमे चिञ्‍चआदीनं पण्णे वा न रुहति, यञ्‍च मज्झिमपुरिसो सन्धारेतुं न सक्‍कोति, तस्मिं असय्हभारे च पटिग्गहो न रुहतीति अत्थो।

१०८.इदानि पटिग्गहणविजहनं दस्सेतुं ‘‘सिक्खामरणलिङ्गेही’’तिआदि आरद्धं। तत्थायं पिण्डत्थो – सिक्खापच्‍चक्खानेन च मरणेन च लिङ्गपरिवत्तनेन च ‘‘न तं दानि परिभुञ्‍जिस्सामी’’ति वा ‘‘न पुन पटिग्गहेत्वा परिभुञ्‍जिस्सामी’’ति वा एवं अनपेक्खविस्सज्‍जनेन च चोरादीहि वा अच्छेदा च अनुपसम्पन्‍नस्स दाना च गाहो पटिग्गाहो उपसम्मति विजहतीति। भिक्खुनिया पन सिक्खापच्‍चक्खानस्स अभावा विब्भमनेन च विजहतीति गहेतब्बं।

इदानि पटिग्गहेत्वा परिभुञ्‍जितब्बं दस्सेतुं ‘‘अप्पटिग्गहितं सब्ब’’न्तिआदि वुत्तं। तस्सत्थो (कङ्खा॰ अट्ठ॰ दन्तपोनसिक्खापद) – चतुकालिकपरियापन्‍नं अन्तमसो रजरेणुम्पि अप्पटिग्गहेत्वा सब्बं परिभुञ्‍जतो पाचित्ति। इदानि अप्पटिग्गहेत्वा परिभुञ्‍जितब्बं दस्सेतुं ‘‘सुद्धञ्‍च नातिबहल’’न्तिआदि वुत्तं। तत्थ सुद्धञ्‍चाति अञ्‍ञेसं रसेन असम्मिस्सं। हिमोदकसमुद्दोदकादीसु पटिग्गहणकिच्‍चं नत्थि। लोणञ्‍च अस्सु च लोणस्सु। एत्थ लोणं नाम सरीरे उट्ठितं। एतानि पन सब्बानि अविच्छिन्‍नानेव कप्पन्ति, नेतरानि।

१११.इदानि अनङ्गलग्गानिपि दस्सेतुं ‘‘गूथमत्तिकमुत्तानी’’तिआदिमाह। तथाविधेति तथाविधे काले, सप्पदट्ठकालेति अत्थो। अञ्‍ञेसं पन अप्पटिग्गहितं अनङ्गलग्गं न वट्टति। कस्मा ? ‘‘अनुजानामि, भिक्खवे, यं करोन्तो पटिग्गण्हाति, स्वेव पटिग्गहो कतो, न पुन पटिग्गहेतब्बो’’ति (महाव॰ २६८) वुत्तत्ता।

११२.दुरूपचिण्णेति दुप्परामट्ठे फलिकरुक्खवल्‍लिआदिं चालेन्तस्स वा आमिसभरितभाजनं अप्पटिग्गहितं परामसन्तस्स वा दुरूपचिण्णदुक्‍कटं होतीति अत्थो। रजोकिण्णेति भिक्खाय चरन्तस्स पत्ते पतितरजं अप्पटिग्गहेत्वा पुन भिक्खं गण्हतो विनयदुक्‍कटं होतीति अत्थो। अथुग्गहप्पटिग्गहेति अथ उग्गहप्पटिग्गहे, अत्तना एव उग्गहेत्वा गहितेति अत्थो। अकप्पियकुटियं अन्तोवुत्थे च यत्थ कत्थचि भिक्खुना सयंपक्‍के च अत्तना वा परेन वा अकप्पियकुटियं अन्तोपक्‍के चाति सब्बत्थ दुक्‍कटन्ति अधिप्पायो। पटिग्गाहविनिच्छयो।

पटिग्गाहनिद्देसवण्णना निट्ठिता।

११४.एत्तावता जातिवसेन दसविधम्पि अकप्पियमंसं दस्सेत्वा इदानि कप्पियमंसेसुपि अकप्पियविधिं दस्सेतुं ‘‘उद्दिस्सकतमंसञ्‍च, यञ्‍च अप्पटिवेक्खित’’न्ति वुत्तं। तत्थ पञ्‍चसु सहधम्मिकेसु यस्स कस्सचि यं किञ्‍चि उद्दिस्स कतं उद्दिस्सकतं नाम, तं पन जानित्वा परिभुञ्‍जितुं सब्बेसम्पि न वट्टति, अजानन्तानं अनापत्ति। मच्छेसुपि एसेव नयो। अप्पटिवेक्खितन्ति अनुपपरिक्खितं, अनापुच्छितन्ति अत्थो। ‘‘न भिक्खवे अप्पटिवेक्खित्वा मंसं परिभुञ्‍जितब्बं, यो परिभुञ्‍जेय्य, आपत्ति दुक्‍कटस्सा’’ति (महाव॰ २८१) वुत्तं। मच्छेसु पन आपुच्छनकिच्‍चं नत्थि अकप्पियमच्छानं नत्थितायाति वदन्ति। इदानि एतेसु आपत्तिभेदं दस्सेतुं ‘‘थुल्‍लच्‍चय’’न्तिआदिमाह। तं सब्बं (कङ्खा॰ अट्ठ॰ सन्‍निधिकारकसिक्खापदवण्णना) उत्तानमेव।

११५.इदानि न केवलं इमेसं मनुस्सादीनं मंसमेव अकप्पियं, अट्ठिआदीनिपि अकप्पियानीति दस्सेतुं ‘‘अट्ठीपी’’तिआदि वुत्तं। तत्थ (महाव॰ अट्ठ २८१) लोमम्पेसन्ति लोमम्पि एसं अकप्पियमंसवत्थूनन्ति अत्थो। सचित्तकं वाति एतेसु पन उद्दिस्सकतमेव सचित्तकं, सेसा अचित्तकाति। अकप्पियमंसविनिच्छयो।

अकप्पियमंसनिद्देसवण्णना निट्ठिता।

११८.एत्तावता रूपियसंवोहारं दस्सेत्वा इदानि कयविक्‍कयं दस्सेतुं ‘‘इमं गहेत्वा’’तिआदिमाह । तत्थ इमन्ति तण्डुलादिकं कप्पियभण्डं गहेत्वा वा ओदनादिं भुत्वा वा ‘‘इमं वत्थादिकं कप्पियभण्डं देहि, इमं रजनपचनादिकं कर, रजनकट्ठादिमा नय, इमं वा तव देमि, त्वं पन इमञ्‍च इमञ्‍च आहर, कर, देही’’ति एवं कयविक्‍कये समापन्‍ने निस्सग्गीति सम्बन्धो।

११९.इदानि परिणामवसेन आपत्तिभेदं दस्सेतुं ‘‘अत्तनो’’तिआदि आरद्धं। तत्रायं पिण्डत्थो (पारा॰ ६५९; पारा॰ अट्ठ॰ २.६५८; कङ्खा॰ अट्ठ॰ परिणतसिक्खापदवण्णना) – सङ्घस्स वा अञ्‍ञस्स वा नतं परिणतं लाभं लभितब्बं चीवरादिपच्‍चयं अत्तनो वा अञ्‍ञस्स वा परिणामेय्य, निस्सग्गियआदीनि होन्तीति। कथं? यो पन मातुसन्तकम्पि सङ्घस्स परिणतं अत्तनो परिणामेति, निस्सग्गियं। अञ्‍ञस्स पुग्गलस्स परिणामेति, सुद्धिकपाचित्तियं। अञ्‍ञस्स सङ्घस्स वा चेतियस्स वा परिणामेति, दुक्‍कटं। यो पन अञ्‍ञपुग्गलस्स वा चेतियस्स वा परिणतं अत्तनो वा अञ्‍ञपुग्गलस्स वा सङ्घस्स वा अञ्‍ञचेतियस्स वा परिणामेति, तस्सापि दुक्‍कटमेवाति।

१२०.यो पन निस्सग्गिं निस्सज्‍जितब्बं अनिस्सज्‍जित्वा विनयकम्मं अकत्वा परिभुञ्‍जेय्य, तस्स दुक्‍कटं। यो वा परेन विनयकम्मत्थाय निस्सट्ठं सकसञ्‍ञाय न ददेय्य, तस्सापि दुक्‍कटं। अञ्‍ञथेतरन्ति एत्थ अञ्‍ञथाति थेय्यसञ्‍ञाय सचे न ददेय्य, इतरं तस्स अग्घवसेन पाराजिकञ्‍च थुल्‍लच्‍चयञ्‍च दुक्‍कटञ्‍च होतीति अत्थो। निस्सग्गियविनिच्छयो।

निस्सग्गियनिद्देसवण्णना निट्ठिता।

१२२.तलसत्तिअनादर-कुक्‍कुच्‍चुप्पादनेसु चाति एत्थ यो भिक्खु उपसम्पन्‍नस्स पहरणाकारं दस्सेन्तो कायं वा कायप्पटिबद्धं वा उच्‍चारेति, तस्स पाचित्तियं। सचे विरद्धो पहारं देति, अप्पहरितुकामताय दुक्‍कटं, तथा अनुपसम्पन्‍नेसुपि दुक्‍कटमेव।

उपसम्पन्‍नेन पञ्‍ञत्तेन वुच्‍चमानो तं असिक्खितुकामताय वा तस्स वचनं असोतुकामताय वा यो अनादरियं करोति, तस्स अनादरकरणे पाचित्तियन्ति अत्थो। अपञ्‍ञत्तेन वुच्‍चमानस्स च अनुपसम्पन्‍नेन पञ्‍ञत्तेन वा अपञ्‍ञत्तेन वा वुच्‍चमानस्स दुक्‍कटं।

उपसम्पन्‍नस्स ‘‘ऊनवीसतिवस्सो मञ्‍ञे त्वं उपसम्पन्‍नो, विकाले मञ्‍ञे तया भुत्त’’न्तिआदिना नयेन सञ्‍चिच्‍च कुक्‍कुच्‍चं उप्पादेन्तस्स पाचित्तियं। अनुपसम्पन्‍नस्स उप्पादने दुक्‍कटं।

गामप्पवेसनापुच्छाति एत्थ पन मज्झन्हिकातिक्‍कमनतो पट्ठाय याव अरुणुग्गमना विकालो नाम, एत्थन्तरे सचे सम्बहुला केनचि कम्मेन गामं पविसन्ति, ‘‘विकाले गामप्पवेसनं आपुच्छामा’’ति सब्बेहिपि अञ्‍ञमञ्‍ञं आपुच्छितब्बं। सचे अनापुच्छा परिक्खित्तस्स परिक्खेपं, अपरिक्खित्तस्स उपचारं अतिक्‍कमन्ति, पठमपादे दुक्‍कटं, दुतियपादुद्धारे पाचित्तियं। आपदासु अनापत्ति।

भोजने च परम्पराति परम्परभोजने च पाचित्तियन्ति अत्थो। एत्थ पन पञ्‍चसु भोजनेसु अञ्‍ञतरं नामं गहेत्वा ‘‘ओदनेन वा सत्तुना वा कुम्मासेन वा मंसेन वा मच्छेन वा निमन्तेमी’’तिआदिना नयेन, येन केनचि वेवचनेन वा अकप्पियनिमन्तनाय निमन्तितस्स येन येन पठमं निमन्तितो, तस्स तस्स भोजनं ठपेत्वा उप्पटिपाटिया, अविकप्पेत्वा वा पठमनिमन्तनं परस्स परस्स कुलस्स पञ्‍चन्‍नं भोजनानं अञ्‍ञतरं परिभुञ्‍जन्तस्स परम्परभोजने पाचित्ति होति। गिलानचीवरदानचीवरकालसमयेसु अनापत्ति, तथा पञ्‍च भोजनानि ठपेत्वा सब्बत्थ।

१२३.अनुद्धरित्वा गमने सेय्यन्ति एत्थ दसविधा सेय्या भिसि चिमिलिका उत्तरत्थरणं भूमत्थरणं तट्टिका चम्मखण्डो निसीदनं पच्‍चत्थरणं तिणसन्थारो पण्णसन्थारोति। एतेसु यं किञ्‍चि सङ्घिके विहारे गुत्तसेनासने अत्तनो वस्सग्गेन गहितं अत्तना वा सन्थरित्वा, अनुपसम्पन्‍नेन वा सन्थरापेत्वा तं दिवसं गमिकवसेन पक्‍कमन्तो नेव सयं उद्धरेय्य न अञ्‍ञं उद्धरापेय्य, यथा उपचिकादीहि न खज्‍जेय्य, एवं न ठपेय्य, अञ्‍ञेन वा न उद्धरापेय्य, पतिरूपं भिक्खुं वा सामणेरं वा आरामिकमेव वा अनापुच्छा वा गच्छेय्य, तस्स परिक्खित्तस्स विहारस्स परिक्खेपं, अपरिक्खित्तस्स द्वे लेड्डुपाते अतिक्‍कमन्तस्स पाचित्तियं। मण्डपरुक्खमूलादिअगुत्तसेनासने सन्थरित्वा गच्छन्तस्स दुक्‍कटं, तथा मञ्‍चपीठभिसिकोच्छकेसु, गुत्तसेनासनेपि दुक्‍कटमेव।

सेनासनानि वाति एत्थ अनुद्धरित्वा गमनेति सम्बन्धो। एत्थ पन मञ्‍चो पीठं भिसि कोच्छकन्ति चतुब्बिधम्पि सेनासनं वस्सानहेमन्तानं अट्ठसु मासेसु अज्झोकासे वा ओवस्सकमण्डपे वा रुक्खमूले वा सयं सन्थरित्वा वा अनुपसम्पन्‍नेन सन्थरापेत्वा वा तं अनुद्धरित्वा वा अनुद्धरापेत्वा वा तस्स सेनासनस्स द्विन्‍नं लेड्डुपातानं अतिक्‍कमने पाचित्तियं। सम्मुञ्‍जनीयादि सेसपरिक्खारेसु दुक्‍कटं।

इत्थियाद्धानगमनेति एत्थ मातुगामेन ‘‘गच्छाम भगिनि, गच्छाम अय्या’’ति एवं संविदहित्वा ‘‘अज्‍ज वा स्वे वा परसुवे वा’’ति नियमितकालं विसङ्केतं अकत्वा द्वारविसङ्केतं मग्गविसङ्केतं कत्वापि गच्छतो गामन्तरे गामन्तरे पाचित्तियं। अगामके अरञ्‍ञे अद्धयोजने अद्धयोजने आपत्ति।

एकेकाय निसीदनेति एत्थ एको एकाय इत्थिया निसीदनेति अत्थो।

१२४.भिंसापनेति एत्थ उपसम्पन्‍नो उपसम्पन्‍नं भिंसापेतुकामो चोरकन्तारवाळकन्तारादीनि आचिक्खति, भयानकं वा रूपसद्दादिं दस्सेति, सो भायतु वा मा वा, तस्स पयोगे पयोगे पाचित्तियं। अनुपसम्पन्‍ने दुक्‍कटं।

आकोटनेति पहारदाने। उपसम्पन्‍नो उपसम्पन्‍नस्स अनत्तमनो हुत्वा सचे उप्पलपत्तेनपि पहारं देति, पाचित्तियं। अनुपसम्पन्‍नस्स गहट्ठस्स वा पब्बजितस्स वा इत्थिया वा पुरिसस्स वा अन्तमसो तिरच्छानगतस्सापि पहारं देति, दुक्‍कटमेव।

अनाचारं आचरित्वा सङ्घमज्झे आपत्तिया वा वत्थुना वा अनुयुञ्‍जियमानो तं अकथेतुकामो ‘‘को आपन्‍नो, किं आपन्‍नो, किस्मिं आपन्‍नो’’तिआदिना नयेन अञ्‍ञेहि वचनेहि तं वचनं पटिच्छादेन्तो सो अञ्‍ञं वदति, अयं अञ्‍ञवादको, तस्मिं अञ्‍ञवादके च कञ्‍चि वीतिक्‍कमं दिस्वा ‘‘आवुसो, इदं नाम तया कत’’न्ति वुत्ते तं न कथेतुकामो तुण्हीभूतोव सङ्घं विहेसतीति सङ्घविहेसको, तस्मिं विहेसके च पाचित्ति होतीति अत्थो। इध पन ञत्तिदुतियेन कम्मेन अञ्‍ञवादके च विहेसके च आरोपिते पुन अञ्‍ञं भणन्तस्स, विहेसन्तस्स पाचित्ति। अनारोपिते दुक्‍कटन्ति वेदितब्बं।

दुट्ठुल्‍लपकासछादेति एत्थ किञ्‍चापि ‘‘दुट्ठुल्‍ला नाम आपत्ति चत्तारि च पाराजिकानि तेरस च सङ्घादिसेसा’’ति (पाचि॰ ३९९) वुत्ता, तथापि इध सङ्घादिसेसाव अधिप्पेता। तस्मा सङ्घसम्मुतिं विना भिक्खुस्स दुट्ठुल्‍लं आपत्तिं ‘‘अयं असुचिं मोचेत्वा सङ्घादिसेसं आपन्‍नो’’तिआदिना नयेन वत्थुना सद्धिं आपत्तिं घटेत्वा भिक्खुञ्‍च भिक्खुनिञ्‍च ठपेत्वा यस्स कस्सचि अनुपसम्पन्‍नस्स आरोचेन्तस्स पाचित्तियं। थुल्‍लच्‍चयादिअदुट्ठुल्‍लारोचने दुक्‍कटं। दुट्ठुल्‍लच्छादनेपि सङ्घादिसेसोव अधिप्पेतो। यो पन भिक्खु भिक्खुस्स दुट्ठुल्‍लं आपत्तिं सयं वा जानित्वा अञ्‍ञेसं वा सुत्वा ‘‘इमं जानित्वा चोदेस्सन्ति सारेस्सन्ति मङ्कुं करिस्सन्ति, नारोचिस्सामी’’ति धुरं निक्खिपति, तस्स पाचित्तियं। धुरं निक्खिपित्वा पच्छा आरोचितेपि न रक्खति एव।

हासोदकेति अङ्गुलिपतोदकेन हासो च उदके हासो चाति एवमत्थो वेदितब्बो। उपसम्पन्‍नो उपसम्पन्‍नं हसाधिप्पायो कायेन कायं आमसति, आपत्ति पाचित्तियस्स, को पन वादो उपकच्छकादीसु घट्टने। अनुपसम्पन्‍ने दुक्‍कटं, तथा भिक्खुस्स कायप्पटिबद्धामसने च निस्सग्गियेन कायप्पटिबद्धामसने च। एत्थ भिक्खुनीपि अनुपसम्पन्‍नट्ठाने ठिता। उदके हसनधम्मो नाम उपरिगोप्फके उदके कीळाधिप्पायस्स निम्मुज्‍जनउम्मुज्‍जनप्‍लवनादिकं। इध हासो नाम कीळा वुच्‍चति।

निच्छुभने विहाराति सङ्घिका विहारा निक्‍कड्ढनेति अत्थो। एत्थ पन यो कुद्धो हुत्वा उपसम्पन्‍नं हत्थादीसु गहेत्वा वा ‘‘निक्खमा’’ति वत्वा वा यत्तकानि द्वारानि एकेन पयोगेन अतिक्‍कामेति, तत्थ द्वारगणनाय आपत्तिं अग्गहेत्वा पयोगस्स एकत्ता एका एव गहेतब्बा। सचे नानापयोगेहि अतिक्‍कामेति, तत्थ द्वारगणनाय गहेतब्बं। तस्स परिक्खारनिक्‍कड्ढने दुक्‍कटं, तथा अनुपसम्पन्‍ने, तस्स परिक्खारनिक्‍कड्ढने च। अलज्‍जिआदीसु पन अनापत्ति।

१२६.इदानि तं भूतगामं दस्सेतुं ‘‘समूला’’तिआदिमाह। तत्थ (पाचि॰ ९१; पाचि॰ अट्ठ॰ ९१) स-इति सो भूतगामो नामाति अत्थो, मूलबीजादीहि पञ्‍चहि बीजेहि पभावितो होतीति वुत्तं होति। तत्थ मूलबीजं नाम हलिद्दिसिङ्गिवेरादि। खन्धबीजं नाम अस्सत्थो निग्रोधोति एवमादि। अग्गबीजं नाम अज्‍जुकफणिज्‍जकादि। फळुबीजं नाम उच्छुवेळुनळादि। ‘‘बीजबीजं नाम पुब्बण्णं अपरण्णं, यानि वा पनञ्‍ञानिपि अत्थि बीजे जायन्ति बीजे सञ्‍जायन्ति, एतं बीजबीजं नामा’’ति वुत्तं। इदानि ‘‘बीजगामभूतगामसमारम्भा पटिविरतो होती’’ति (दी॰ नि॰ १.१०, १९५; म॰ नि॰ १.२९३, ४११; २.११; अ॰ नि॰ १०.९९; पु॰ प॰ १७९) वुत्तत्ता धम्मानुलोमेन आगतं बीजगामसमारम्भं दस्सेतुं ‘‘आरम्भे दुक्‍कट’’न्तिआदिमाह। तस्मा एतं पठमं ‘‘कप्पियं करोही’’ति भूतगामपरिमोचनं कारेत्वा बीजगामपरिमोचनत्थं पुन कप्पियं कारेतब्बं।

१२७.निब्बट्टबीजं (पाचि॰ अट्ठ॰ ९२; कङ्खा॰ अट्ठ॰ भुतगामसिक्खापदवण्णना) नाम अम्बपनसादि। नोबीजं नाम तरुणम्बफलादि, एतं पन सब्बं अकप्पियम्पि वट्टतीति अत्थो। कटाहबद्धबीजानि कपित्थफलादीनि। बहिद्धा वापि कारयेति कपालेपि कातुं वट्टति, सचे एकाबद्धानीति अत्थो। कटाहमुत्तं पन भिन्दित्वा कारेतब्बं।

१२८.भाजने वा भूमियं वा एकाबद्धेसु बीजेसु एकस्मिं बीजे कप्पिये कते सब्बेस्वेव कतं भवेति अत्थो। यथा च बीजे, एवं रुक्खसहस्सं वा उच्छुसहस्सं वा छिन्दित्वा एकाबद्धे कतेपि विनिच्छयो वेदितब्बो।

१२९.कप्पियं कत्वा निक्खित्ते बीजगामे पुन मूलपण्णानि सचे जायरुं, पुन कप्पियं कारेय्याति अत्थो। तदाति मूले च अङ्कुरे च जातेति अत्थो।

१३०.उदकसम्भवोति उदकजातो। चेतियादीसूति एत्थ आदि-सद्देन गेहप्पमुखपाकारवेदिकादीसु निब्बत्ता गहिता। निब्बत्तद्वत्तिपत्तको भूतगामोव, अनिब्बत्तको अग्गबीजे सङ्गहं गच्छति। बीजम्पि याव मूलं वा पण्णं वा न निक्खमति, ताव बीजगामोव, मूले च निक्खन्ते पण्णे च हरिते जाते भूतगामोव होतीति अत्थो।

१३१.मकुळन्ति अफुल्‍लं। अहिछत्तकं नाम रुक्खे जातं अहिछत्तकं।

१३२.अल्‍लरुक्खे गण्हतोति सम्बन्धो। तत्थाति अल्‍लरुक्खे छिन्दतो वापीति सम्बन्धो।

१३४.‘‘इमं रुक्खं, इमं लतं, इमं कन्दं छिन्द, भिन्दा’’तिआदिना नयेन नियमेत्वा भासितुं न वट्टति। ‘‘इदं, एत’’न्ति अवत्वा केवलं ‘‘रुक्खं छिन्दा’’तिआदिना (पाचि॰ अट्ठ॰ ९२; कङ्खा॰ अट्ठ॰ भूतगामहिक्खापदवण्णना) नयेन वत्तुं वट्टतीति। समणकप्पविनिच्छयो।

समणकप्पनिद्देसवण्णना निट्ठिता।

१३७.इदानि यत्थ कप्पियकुटि इच्छितब्बा, तं दस्सेतुं ‘‘वासत्थाया’’तिआदिमाह। वासत्थायाति इमिना कोट्ठागारभत्तसालाचेतियघरसम्मुञ्‍जनीमाळकादि यं यं अञ्‍ञम्पि वासत्थाय करीयति, तत्थ तत्थ कप्पियकुटिकरणकिच्‍चं नत्थीति दीपितं होति। भोजनसाला पन सेनासनमेव, तस्मा तत्थ कातब्बा एवाति वदन्ति। सङ्घिकेवेकसन्तकेति एत्थ एकसन्तको उपसम्पन्‍नसन्तकोव वेदितब्बो।

१३८.इदानि कत्तब्बाकारं दस्सेतुं ‘‘गेहे’’तिआदिमाह। तत्थ सङ्घस्स वा एकस्स वा गेहे विहारे करियमाने एवं ईरयं ‘‘कप्पियकुटिं करोम, कप्पियकुटिं करोमा’’ति वा ‘‘कप्पियकुटि कप्पियकुटी’’ति वा वदन्तो पठमिट्ठकत्थम्भादिं ठपेय्य, एवं कता उस्सावनन्तिका नाम, एवं उदाहरितवचनन्तिकाति अत्थो।

१३९.येभुय्येन वा अपरिक्खित्तो, सकलोपि वा अपरिक्खित्तो आरामो ‘‘गोनिसादी’’ति वुच्‍चतीति सम्बन्धो। एत्थ पन सेनासनेसु परिक्खित्तेसुपि आरामे अपरिक्खित्ते कप्पियकुटिकरणकिच्‍चं नत्थि। सम्मुतिं करोन्तेहि कतं परियोसितं ‘‘इमं विहारं अड्ढयोगं पासादं हम्मियं गुहं तिणकुटिकं मण्डप’’न्ति तेसं नामं गहेत्वा तस्सा कुटिया हत्थपासे वा ठत्वा, तस्सा अन्तो वा पविसित्वा वुत्तनयेनेव ञत्तिदुतियकम्मवाचाय सम्मन्‍नितब्बं।

१४०.‘‘भिक्खुं ठपेत्वा अञ्‍ञेही’’ति वचनतो सेससहधम्मिकेहिपि देवमनुस्सेहिपि अञ्‍ञेहि कप्पियकुटिया अत्थाय दिन्‍नो वा तेसं सन्तको वा गेहो ‘‘गहपती’’ति मतो ञातोति अत्थो, सङ्घसन्तकञ्‍च भिक्खुसन्तकञ्‍च ठपेत्वा सब्बेसं गेहो गहपतीति अधिप्पायो।

१४१.सप्पिआदीहिमिस्सितन्ति सप्पिआदीहि पञ्‍चहि च हलिद्दिसिङ्गिवेरादियावजीविकेन चाति अत्थो। वजेय्य अन्तोवुत्थत्तन्ति एत्थ यावकालिकयामकालिकसङ्खातं पुरिमकालिकद्वयं सङ्घिकं वा भिक्खुस्स वा भिक्खुनिया वा सन्तकं सयं कप्पियकुटिया वुत्थम्पि इतरेहि अकप्पियकुटिया वुत्थेहि मिस्सितं अन्तोवुत्थभावं आगच्छेय्याति अत्थो।

१४२.तेहेवाति अकप्पियकुटियं वुत्थसप्पितेलादीहि। सामपाकतन्ति सामंपक्‍कभावं गच्छतीति अत्थो।

१४३-४.इमा पन कप्पियकुटियो यदा जहितवत्थुका होन्ति, तं दस्सेतुं ‘‘उस्सावनन्तिका’’तिआदिमाह। सचे थम्भे वा भित्तिपादे वा परिवत्तेन्ति, यो यो ठितो, तत्थ तत्थ पतिट्ठाति, एतेनुपायेन सब्बेसु परिवत्तेसुपि न विजहितवत्थुकाव होतीति अत्थो। परिक्खित्ते गोनिसादि विजहितवत्थुका। सेसा छदनविब्भमाति छदनविनासा जहितवत्थुका होन्तीति अधिप्पायो। भूमिविनिच्छयो।

भूमिनिद्देसवण्णना निट्ठिता।

१४६.पत्ते वत्तं चरेति ‘‘यागुं पीतस्स उदकं दत्वा भाजनं पटिग्गहेत्वा नीचं कत्वा साधुकं अपरिघंसन्तेन धोवित्वा पटिसामेतब्ब’’न्ति (महाव॰ ६६, ७८; चूळव॰ ३७६, ३८०) वुत्तं पत्ते वत्तं चरेति अत्थो। गामप्पवेसे वत्तं चरेति एवं सब्बत्थ। ‘‘सचे उपज्झायो वा आचरियो वा गामं पविसितुकामो होति, निवासनं दातब्बं, पटिनिवासनं पटिग्गहेतब्बं, कायबन्धनं दातब्बं, सगुणं कत्वा सङ्घाटियो दातब्बा, धोवित्वा पत्तो सोदको दातब्बो’’ति (महाव॰ ६६, ७८; चूळव॰ ३७६, ३८०) इदं गामप्पवेसने वत्तं नाम। ‘‘सचे उपज्झायो वा आचरियो वा पच्छासमणं आकङ्खति, तिमण्डलं पटिच्छादेन्तेन परिमण्डलं निवासेत्वा कायबन्धनं बन्धित्वा सगुणं कत्वा सङ्घाटियो पारुपित्वा गण्ठिकं पटिमुञ्‍चित्वा धोवित्वा पत्तं गहेत्वा उपज्झायस्स वा आचरियस्स वा पच्छासमणेन होतब्ब’’न्तिआदिना (महाव॰ ६६, ७८; चूळव॰ ३७६, ३८०) नयेन वुत्तं गमने वत्तं नाम। ‘‘निवत्तन्तेन पठमतरं आगन्त्वा आसनं पञ्‍ञापेतब्ब’’न्तिआदिना (महाव॰ ६६, ७८; चूळव॰ ३७६, ३८०) नयेन वुत्तं आगमे वत्तं नाम। ‘‘उपज्झायम्हि वुट्ठिते आसनं उद्धरितब्बं, पादोदकं पादपीठं पादकथलिकं पटिसामेतब्ब’’न्ति (महाव॰ ६६, ७८; चूळव॰ ३७६, ३८०) एवं वुत्तं आसनादीसु वत्तं नाम। उपाहनाय वत्तं नाम ‘‘उपाहना पुञ्छितब्बा, उपाहना पुञ्छन्तेन पठमं सुक्खेन चोळकेन पुञ्छितब्बा, पच्छा अल्‍लेना’’तिआदिना (चूळव॰ ३५७, ३५९) वुत्तं। चीवरे वत्तं नाम ‘‘सचे चीवरं सिन्‍नं होति, मुहुत्तं उण्हे ओतापेतब्बं, न च उण्हे चीवरं निदहितब्ब’’न्तिआदिना (महाव॰ ६६, ७८; चूळव॰ ३७६, ३८०) वुत्तं।

१४७.परिभोजनीयपानीय-वच्‍चप्पस्सावठानिसूति एत्थ सचे पानीयं न होति, पानीयं उपट्ठापेतब्बं। सचे परिभोजनीयं न होति, परिभोजनीयं उपट्ठापेतब्बं। सचे वच्‍चकुटि उक्‍लापा होति, वच्‍चकुटि सम्मज्‍जितब्बा। तथा पस्सावट्ठाने एवं वत्तं चरितब्बन्ति अत्थो। ‘‘विहारं सोधेन्तेन पठमं पत्तचीवरं नीहरित्वा एकमन्तं निक्खिपितब्ब’’न्तिआदिना नयेन वुत्तं विहारसोधने वत्तं नाम। ‘‘भूमत्थरणं ओतापेत्वा सोधेत्वा पप्फोटेत्वा अतिहरित्वा यथापञ्‍ञत्तं पञ्‍ञापेतब्ब’’न्तिआदिना (महाव॰ ६६, ७८; चूळव॰ ३७६, ३८०) वुत्तं पुन पञ्‍ञापने वत्तं नाम।

१४८.इदानि विहारं सोधेन्तेन एवं सोधेतब्बन्ति तं दस्सेतुं ‘‘न पप्फोटेय्या’’तिआदिमाह । तस्सत्थो – विहारं सोधेन्तो भिक्खु भूमत्थरणादिसयनासनं पटिवाते वा पङ्गणे वा पानीयसामन्ता वा न पप्फोटेय्याति। पङ्गणेति बहूनं सन्‍निपाते ठाने।

१४९.न्हानेति ‘‘सचे उपज्झायो नहायितुकामो होति, नहानं पटियादेतब्बं। सचे सीतेन अत्थो होति, सीतं पटियादेतब्ब’’न्तिआदिना (महाव॰ ६६; चूळव॰ ३७६) वुत्तं नहाने वत्तं नाम, ‘‘उपज्झायस्स गत्ततो उदकं सम्मज्‍जितब्बं, निवासनं दातब्ब’’न्तिआदिना (महाव॰ ६६; चूळव॰ ३७६) वुत्तं नहातस्स कातब्बं नाम। रङ्गपाकेति ‘‘सचे उपज्झायस्स आचरियस्स रजनं पचितब्बं होति, सद्धिविहारिकेन अन्तेवासिकेन पचितब्ब’’न्ति (महाव॰ ६६, ७८; चूळव॰ ३७६, ३८०) वुत्तं। धोवनेति ‘‘सचे उपज्झायस्स आचरियस्स चीवरं धोवितब्बं होति, सद्धिविहारिकेन अन्तेवासिकेन धोवितब्बं, उस्सुक्‍कं वा कातब्ब’’न्ति (महाव॰ ६६, ७८; चूळव॰ ३७६, ३८०) वुत्तं। सिब्बनेति ‘‘सचे उपज्झायेन आचरियेन चीवरं कातब्बं होति, सद्धिविहारिकेन अन्तेवासिकेन कातब्ब’’न्ति (महाव॰ ६६, ७८; चूळव॰ ३७६, ३८०) वुत्तं। चीवरे थेवे ठिते रजन्तो न वजे न पक्‍कमेय्याति अत्थो। ‘‘चीवरं रजन्तेन साधुकं सम्परिवत्तकं सम्परिवत्तकं रजितब्बं, न च अच्छिन्‍ने थेवे पक्‍कमितब्ब’’न्ति (महाव॰ ६६, ७८; चूळव॰ ३७६, ३८०) हि वुत्तं।

१५०.एकच्‍चस्साति आचरियुपज्झायानं विसभागस्स अनत्थकामस्स वेरिपुग्गलस्स। अनापुच्छाति आचरियुपज्झायानं अनारोचेत्वा। किञ्‍चनन्ति यं किञ्‍चि।

१५१-२.तस्साति एकच्‍चस्स। निन्‍नेतुन्ति नीहरितुं। किच्‍चयं परिकम्मं वाति वेय्यावच्‍चं वा पिट्ठिपरिकम्मादिपरिकम्मं वा अत्तना तस्स कातुं वा तेन अत्तनो कारापेतुं वाति एवमत्थो वेदितब्बो।

१५३.सचे आचरियुपज्झाया अञ्‍ञत्थ गता होन्ति, परिवेणं गन्त्वा अपस्सन्तेहि गामं पविसितुं वट्टति। गामं पविसन्तो सचे पस्सति, आपुच्छितब्बमेवाति वदन्ति। ‘‘उपज्झायं अनापुच्छा न दिसा पक्‍कमितब्बा’’ति (महाव॰ ६६, चूळव॰ ३७६) हि वुत्तं। अत्तनो किच्‍चयं नाम अन्तोविहारेपि अत्तनो पत्तपचनचीवरकम्मकेसच्छेदनादि।

१५४.सङ्घायत्तकम्मानि नाम परिवासमानत्तअब्भानतज्‍जनीयनियस्सपब्बाजनीयपटिसारणीयउक्खेपनादयो।

१५५.वुट्ठानं नेसमागमेति ‘‘सचे उपज्झायो वा आचरियो वा गिलानो होति, यावजीवं उपट्ठातब्बो, वुट्ठानमस्स आगमेतब्ब’’न्ति (महाव॰ ६६; चूळव॰ ३७६) हि वुत्तं। उपज्झाचरियवत्तविनिच्छयो।

उपज्झाचरियवत्तनिद्देसवण्णना निट्ठिता।

१५७.उब्भजित्वाति (चूळव॰ ३७३, ३७४) निवासनं दूरतोव उक्खिपित्वा नो पविसेय्य। सहसा च नो पविसेय्याति सम्बन्धो। ‘‘बहि ठितेन उक्‍कासितब्ब’’न्ति च ‘‘साधुकं अतरमानेन वच्‍चकुटि पविसितब्बा’’ति च वुत्तत्ता उक्‍कासित्वाव अतरमानो पविसेय्याति अत्थो। ‘‘न उब्भजित्वा पविसितब्बा, वच्‍चपादुकाय ठितेन उब्भजितब्ब’’न्ति (चूळव॰ ३७४) वचनतो ‘‘उब्भजेय्य पादुकास्वेव सण्ठितो’’ति वुत्तं।

१५८.न करेय्य उभयं न करेय्युभयं।

१५९.कूपेति (चूळव॰ ३७४) वच्‍चकूपे। कट्ठन्ति अवलेखनकट्ठं। पस्सावदोणिया खेळं न कातब्बन्ति अत्थो। नावलेखेय्य फरुसेनाति फालितकट्ठेन वा खरेन वा गण्ठिकेन वा कण्टकेन वा सुसिरेन वा पूतिना वा नावलेखितब्बन्ति अत्थो। उहतञ्‍चापीति गूथमक्खितम्पि धोवये अत्तना वा परेन वा कतन्ति अधिप्पायो।

१६०.उब्भजित्वा न निक्खमेति एत्थ ‘‘वच्‍चपादुकाय ठितेन पटिच्छादेतब्ब’’न्ति (चूळव॰ ३७४) हि वुत्तं, पुन ‘‘आचमनपादुकायं ठितेन उब्भजितब्ब’’न्ति (चूळव॰ ३७४) च वुत्तं। ‘‘चपु चपू’’ति सद्दं कत्वा नाचमेय्याति अत्थो। वच्‍चप्पस्सावट्ठानिकविनिच्छयो।

वच्‍चप्पस्सावट्ठानिकनिद्देसवण्णना निट्ठिता।

१६२.तत्थ तत्थ सन्‍निपतितानं सब्बेसं वुड्ढो वुड्ढतरो, तस्मिं वुड्ढतरागमे पुन आपुच्छनं नत्थि। भत्तग्गे चानुमोदतोति एत्थ दानपतिना याचितेन दहरेन वुड्ढेन अनापुच्छित्वा कथेतुं वट्टतीति वदन्ति।

१६३.एकविहारकेति एकोवरके वुड्ढेन वसन्तो अनापुच्छा न सज्झायेय्याति अत्थो। उद्देसं परिपुच्छञ्‍च नो ददेति उद्देसं वा परिपुच्छं वा नो ददेय्य।

१६४.न विवरेय्य न थकेय्य चाति सम्बन्धो। द्वारं नाम महावळञ्‍जं, तत्थ आपुच्छनकिच्‍चं नत्थि।

१६५.वुड्ढेन चङ्कमे चङ्कमन्तोपि येन वुड्ढो, तेन परिवत्तयेति सम्बन्धो। आपुच्छकरणविनिच्छयो।

आपुच्छकरणनिद्देसवण्णना निट्ठिता।

१६७.पटिच्छादिसूति ‘‘तेन खो पन समयेन भिक्खू जन्ताघरेपि उदकेपि परिकम्मं कातुं कुक्‍कुच्‍चायन्ति। अनुजानामि, भिक्खवे, तिस्सो पटिच्छादियो जन्ताघरप्पटिच्छादिं उदकप्पटिच्छादिं वत्थप्पटिच्छादि’’न्ति एवं वुत्तासु तीसु पटिच्छादीसूति अत्थो। दुवेति एतासु तीसु पटिच्छादीसु उदकजन्ताघरप्पटिच्छादियो परिकम्मे कप्पन्तीति अधिप्पायो। वत्थच्छादीति वत्थप्पटिच्छादि। सब्बत्थाति खादनीयसायनीयादीसु सब्बकम्मेसु कप्पियाति अत्थो। नग्गविनिच्छयो।

नग्गनिद्देसवण्णना निट्ठिता।

१६९-१७१.कुट्टत्थम्भतरुट्टानेति एत्थ (चूळव॰ २४३; चूळव॰ अट्ठ॰ २४३) कुट्टे वा थम्भे वा तरुम्हि वा अट्टानफलके वा कायं न घंसयेति अत्थो। गन्धब्बहत्थो नाम मक्‍कटहत्थसदिसो दारुआदिमयो। कुरुविन्दकसुत्तियाति कुरुविन्दसुत्तिया। मल्‍लकेन वा अञ्‍ञमञ्‍ञं वा। ‘‘न भिक्खवे विग्गय्ह परिकम्मं कारापेतब्बं। यो कारापेय्य, आपत्ति दुक्‍कटस्सा’’ति (चूळव॰ २४३) एवं वुत्तं विग्गहपरिकम्मं सन्धाय ‘‘अञ्‍ञमञ्‍ञं वा’’ति वुत्तं।

इदानि कप्पियानि दस्सेतुं ‘‘कपालिट्ठकखण्डानी’’तिआदिमाह। सब्बेसं वट्टतीति सम्बन्धो । गिलानस्सपि (चूळव॰ अट्ठ॰ २४३) अगिलानस्सपि इमानि कपालिट्ठकखण्डादीनि कायघंसने वट्टन्ति। पुथुपाणीति (चूळव॰ २४४) हत्थपरिकम्मं वुच्‍चति। तस्मा सब्बेसं हत्थेन पिट्ठिपरिकम्मं कातुं वट्टति। अकतमल्‍लकं नाम एकदाठिमं परिच्छिन्दित्वा कतं। पासाणादयो पादघंसने एव कप्पिया। न्हानकप्पविनिच्छयो।

न्हानकप्पनिद्देसवण्णना निट्ठिता।

१७४.अनुञ्‍ञातत्तया अञ्‍ञन्ति –

‘‘मक्‍कटो काळसीहो च, सरभो कदलीमिगो।

ये च वाळमिगा केचि, तेसं चम्मं न वट्टती’’ति॥ –

एत्थ वाळमिगग्गहणेन वुत्तावसेसा अन्तमसो गोमहिंसादयो गहिताति वेदितब्बा। थविकाति उपाहनकोसकसत्थकोसककुञ्‍चिककोसकाति वेदितब्बा, न पत्तत्थविकादयो। चम्मविनिच्छयो।

चम्मनिद्देसवण्णना निट्ठिता।

१७६-९.सब्बाव नीलका (महाव॰ २४६; महाव॰ अट्ठ॰ २४६) सब्बनीलका। एस नयो सब्बत्थ ओदातकादीसुपि। ओदातं पन नेव पाळियं, न अट्ठकथायं पटिक्खित्तं, अनुलोमवसेन पन इध पटिक्खित्तन्ति वेदितब्बं। महारङ्गरत्ता सतपदिपिट्ठिवण्णा। महानामरङ्गरत्ता मन्दरत्ता। मञ्‍जेट्ठिका कणवेरपुप्फवण्णा। पुप्फलतादीहि विचित्ता चित्रा। नीलपीतादिवद्धिकाति एत्थ आदि-सद्देन ओदातलोहितमञ्‍जेट्ठिकमहारङ्गमहानामरङ्गरत्तादिवसेन वद्धिका गहिता। सीहब्यग्घुद्दाजिनदीपीनं चम्मेहि चाति सम्बन्धो। कोचीति गिलानोपि अगिलानोपि।

१८०.सकलं वा एकदेसकं वा रजनं चोळेन (महाव॰ अट्ठ॰ २४६) पुञ्छित्वा वळञ्‍जेय्याति अत्थो। खल्‍लकादिकं पन सब्बं हारित्वा वळञ्‍जेतब्बं। उपाहनविनिच्छयो।

उपाहननिद्देसवण्णना निट्ठिता।

१८३.रूपन्ति सकुणरूपादि। यदि च एदिसं अञ्‍ञेहि कतं लभति, घंसित्वा वा छिन्दित्वा वा यथा वा न पञ्‍ञायति, तथा सुत्तेन वेठेत्वा वळञ्‍जेतब्बं।

१८४.थविकाति अञ्‍जनिथविका। अञ्‍जनिसलाकापि लब्भतीति सम्बन्धो।

१८५-६.अट्ठीति (महाव॰ २६६; महाव॰ अट्ठ॰ २६४) मनुस्सट्ठिं ठपेत्वा अवसेसट्ठि। विसाणदन्तेसु अकप्पियं नाम नत्थि। आमलककक्‍कादीहि कता फलमया। तम्मयाति इध वुत्तेहेव निब्बत्ता। अञ्‍जनीविनिच्छयो।

अञ्‍जनीनिद्देसवण्णना निट्ठिता।

१९०.आसन्दादित्तयाति आसन्दी तूली पल्‍लङ्कोति इदं तयं नामं। ‘‘अनुजानामि, भिक्खवे, ठपेत्वा तीणि आसन्दिं पल्‍लङ्कं तूलिकं सेसकं गिहिविकटं अभिनिसीदितुं, न त्वेव अभिनिपज्‍जितु’’न्ति (चूळव॰ ३१४) हि वुत्तं। सेसे गिहिसन्तके निसीदितुं लब्भतीति अत्थो। यदि धम्मासने सङ्घिकम्पि गोनकादिं भिक्खूहि अनाणत्ता आरामिकादयो सयमेव पञ्‍ञपेन्ति चेव नीहरन्ति च, एतं गिहिविकटनीहारं नाम, इमिना गिहिविकटनीहारेन वट्टति। भत्तग्गं नाम विहारे एव दानट्ठानं।

१९१.चतुन्‍नं पादानं, तीसु पस्सेसु अपस्सयानञ्‍च वसेन सत्तङ्गो। एकपस्सेन युत्तो पञ्‍चङ्गो। इमे पन सत्तङ्गपञ्‍चङ्गा ‘‘अनुजानामि, भिक्खवे, उच्‍चकम्पि सत्तङ्ग’’न्ति (चूळव॰ २९४) वुत्तत्ता पमाणातिक्‍कन्तापि वट्टन्ति। तेन वुत्तं ‘‘उच्‍चपादका’’ति। तूलोनद्धा मञ्‍चपीठा घरेयेव निसीदितुं कप्पन्तीति सम्बन्धो।

१९२.चीवरच्छवियोति छन्‍नं चीवरानं, छन्‍नं अनुलोमचीवरानञ्‍च अञ्‍ञतरचीवरच्छवियोति अत्थो। सब्बत्थाति मञ्‍चेपि पीठेपि भत्तग्गेपि अन्तरघरेपीति अत्थो। इमासं पन भिसीनं पमाणपरिच्छेदोपि नत्थि, मञ्‍चपीठादीनं वसेन अनुरूपं सल्‍लक्खेत्वा पमाणं कातब्बं।

१९३.‘‘तूलिका उप्पन्‍ना होति। अनुजानामि, भिक्खवे, विजटेत्वा बिम्बोहनं कातुं, तीणि तूलानि रुक्खतूलं लतातूलं पोटकितूल’’न्ति (चूळव॰ २९७) वुत्तत्ता तूलत्तयञ्‍च (चूळव॰ अट्ठ॰ २९७; कङ्खा॰ अट्ठ॰ तूलोनन्दसिक्खापदवण्णना) बिम्बोहने वट्टति। इमेहि तीहि तूलेहि सब्बेसं रुक्खलतातिणानं तूलं अनुञ्‍ञातन्ति वेदितब्बं। भिसियं पन किञ्‍चि तूलं न वट्टतियेव। भिसिगब्भोति भिसिया वुत्तं चोळादिपञ्‍चकं बिम्बोहने अनुञ्‍ञातन्ति सम्बन्धो। मिगपक्खिनन्ति सीहादीनं सब्बचतुप्पदानं हंसमोरादीनं सब्बपक्खीनं लोमानि कप्पन्ति। मसूरके अनुञ्‍ञातन्ति सम्बन्धो।

१९४.इदानि भिसियं कप्पियाकप्पियं दस्सेतुं ‘‘मनुस्सलोम’’न्तिआदिमाह। उण्णायन्ति (चूळव॰ २९७; चूळव॰ अट्ठ॰ २९७) उण्णाभिसियं मनुस्सलोमं न लब्भतीति अत्थो। उण्णाभिसियम्पि मनुस्सलोमं ठपेत्वा येसं केसञ्‍चि पक्खिचतुप्पदानं लोमं वट्टतीति अत्थो। पण्णेति पण्णभिसियञ्‍च पुप्फञ्‍च सुद्धं तमालपत्तञ्‍च न लब्भं, अवसेसं यं किञ्‍चि पण्णं लब्भतीति अत्थो। तमालपत्तकम्पि अञ्‍ञेहि मिस्सं वट्टतीति। चोळवाकतिणेसु अकप्पियं नाम नत्थि। आसनञ्‍चेव अप्पटिवेक्खितं न लब्भन्ति आसनसामञ्‍ञतो पसङ्गेन वुत्तं। अकप्पियसयनविनिच्छयो।

अकप्पियसयननिद्देसवण्णना निट्ठिता।

१९६.मुनीति बुद्धमुनि। सब्बेहेवाति अनुपसम्पन्‍नेहिपि।

१९७.अन्तन्ति पच्छिमं। ‘‘अनुजानामि, भिक्खवे, यं तिण्णं पहोति, एत्तकं पच्छिमं दीघासन’’न्ति (चूळव॰ ३२०) वुत्तत्ता यं तिण्णं पहोति, एतं संहारिमं वा होतु असंहारिमं वा, तथारूपेसु फलकखण्डेसुपि निसीदितुं वट्टति। द्विन्‍नन्ति द्विन्‍नं समानासनिकानं। ‘‘अनुजानामि, भिक्खवे, दुवग्गस्स मञ्‍चं दुवग्गस्स पीठ’’न्ति (चुळव॰ ३२०) वुत्तत्ता द्वे समानासनिका सह निसीदितुं लभन्ति। अञ्‍ञेहि असमानासनिकेहि, अनुपसम्पन्‍नादीहि वा द्वे हुत्वापि निसीदितुं न लभन्ति। समानासनिकविनिच्छयो।

समानासनिकनिद्देसवण्णना निट्ठिता।

२००-२०२.दसवग्गिको (महाव॰ ३८८; कङ्खा॰ अट्ठ॰ निदानवण्णना) वीसतिवग्गिको च दसवीसतिवग्गिको। अब्भानोपसम्पदाप्पवारणा ठपेत्वा सब्बकम्मेसु कम्मप्पत्तोति सम्बन्धो। एवं सेसेसुपि। इतरोति वीसतिवग्गो च अतिरेकवीसतिवग्गो च।

२०३.इदानि कम्मप्पत्ते च छन्दारहे च दस्सेतुं ‘‘चतुवग्गेना’’तिआदि वुत्तं। तत्थ (परि॰ ४८८, ४९७; परि॰ ४८७-४८८) पकतत्ता नाम ये पाराजिकउक्खित्तलद्धिनानासंवासका न होन्ति। परेति एकसीमट्ठा पकतत्ता भिक्खू। यदि पकतत्ता भिक्खूपि अञ्‍ञतरं गामसीमं वा नदीसमुद्दजातस्सरखण्डसीमासु वा अञ्‍ञतरं पविसित्वा ठिता होन्ति, नेव कम्मप्पत्ता, न छन्दारहा। न हि तेसं छन्दो वा पारिसुद्धि वा आगच्छति अञ्‍ञसीमायं ठितत्ता। सेसेपीति पञ्‍चवग्गादिकरणीयेपीति अत्थो।

२०४.असंवासगणपूरं वा कत्वा कतं कम्मं कुप्पञ्‍च होति, कारकानञ्‍च दुक्‍कटन्ति अत्थो। ‘‘यस्स सङ्घो कम्मं करोति, तंचतुत्थो कम्मं करेय्य, अकम्मं न च करणीय’’न्ति (महाव॰ ३८९) वुत्तत्ता ‘‘कम्मारहगणपूरं वा’’ति वुत्तं। इदानि परिवासादिकम्मानंयेव परिसतो विपत्तिं दस्सेतुं ‘‘गरुकट्ठगणपूरं वा’’ति वुत्तं। तम्पि अनिक्खित्तवत्तं सन्धाय वुत्तं। निक्खित्तवत्तो पन सब्बत्थ गणपूरको होति एव।

२०५.वारेय्याति पटिक्खिपेय्य। ‘‘अनुजानामि, भिक्खवे, अधम्मकम्मे कयिरमाने पटिक्‍कोसितु’’न्ति (महाव॰ १५४) हि वुत्तं। अन्तराये सतीति अत्थो। ‘‘अधम्मकम्मं इदं, न मेतं खमती’’ति एवं द्वे तयो अञ्‍ञमञ्‍ञं दिट्ठिं आवि करेय्युन्ति अत्थो। यदि एको होति, ‘‘न मेतं खमती’’ति एवं अधिट्ठानं करेय्याति अत्थो। एत्तावता एते निरापत्तिका होन्ति, अन्तराया च मुच्‍चन्ति, कम्मं पन अधम्मत्ता कुप्पमेव। वारेन्तेव ततोधिकाति एत्थ ‘‘अनुजानामि, भिक्खवे, चतूहि पञ्‍चहि पटिक्‍कोसितुं, द्वीहि तीहि दिट्ठिं आवि कातुं, एकेन अधिट्ठातुं, ‘‘न मेतं खमती’’ति (महाव॰ १५४) वुत्तत्ता चत्तारो वा पञ्‍च वा वारेन्ति एवाति अत्थो।

२०६.इदानि येहि पटिक्खित्तं होति, ते दस्सेतुं ‘‘कम्मारहा’’तिआदि वुत्तं। तत्थ खित्तचित्त-ग्गहणेन उम्मत्तकोपि गहितोव। एतेसन्ति ये वुत्तप्पकारा, तेसं पटिक्खेपो न रुहतीति अत्थो।

२०७.इदानि यस्स पटिक्खेपो रुहति, तं दस्सेतुं ‘‘पकतत्तेकसीमट्ठ-समसंवासभिक्खुनो’’ति वुत्तं। तस्सत्थो (महाव॰ ३९४) – एवरूपस्स भिक्खुनो पटिक्‍कोसना अन्तमसो आनन्तरस्सापि आरोचेन्तस्स रुहतीति। ‘‘भिक्खुस्स, भिक्खवे , पकतत्तस्स समानसंवासिकस्स समानसीमायं ठितस्स अन्तमसो आनन्तरिकस्सपि भिक्खुनो विञ्‍ञापेन्तस्स सङ्घमज्झे पटिक्‍कोसना रुहती’’ति (महाव॰ ३९४) वुत्तं।

२०८.सम्मुखा यदि पटिक्‍कोसेय्याति अत्थो। तिरोक्खाति परम्मुखा। कायसामग्गिं वा छन्दं वा नो ददेय्य, दुक्‍कटन्ति अत्थो। कम्मविनिच्छयो।

कम्मनिद्देसवण्णना निट्ठिता।

२१०-२११.लाभासाय दायकानं दारके उक्खिपित्वा परिभटभावो पारिभटकता, ताय पारिभटकताय न जीवयेति सम्बन्धो। सेसेसुपि एसेव नयो। खेत्तादीसु पेसितस्स गमनं पहेणकम्मं। सासनप्पटिसासनहरणं दूतकम्मं। पेसितस्स गेहतो गेहगमनं जङ्घपेसनियं। लाभासाय लञ्‍जदानमनुप्पदानं। अञ्‍ञेन वापीति अङ्गविज्‍जादिना।

२१२.विञ्‍ञत्तीति (पारा॰ ५१५ आदयो; पारा॰ अट्ठ॰ २.५१५ आदयो) अञ्‍ञातकविञ्‍ञत्ति। अनेसनाति पुब्बे वुत्तेन पुप्फदानादिना पच्‍चयेसना। कुहनादीहीति (विभ॰ ८६१; विभ॰ अट्ठ॰ ८६१; महानि॰ ८७) कुहना लपना नेमित्तकता निप्पेसिकता लाभेन लाभं निजिगीसनताति इमेहि पञ्‍चहि वत्थूहीति अत्थो। मिच्छाजीवविनिच्छयो।

मिच्छाजीवविवज्‍जनानिद्देसवण्णना निट्ठिता।

२१४.पुच्छेय्यसयनासनन्ति ‘‘कतमं मे सेनासनं पापुणाति, किं अज्झावुत्थं वा अनज्झावुत्थं वा’’ति एवं पुच्छितब्बन्ति अत्थो।

२१५-६.मञ्‍चपीठादिदारुभण्डञ्‍च (चूळव॰ ३६०; चूळव॰ अट्ठ॰ ३६०) रजनभाजनादिमत्तिकाभण्डञ्‍च। आपुच्छाति भिक्खुस्स वा सामणेरस्स वा आरामिकस्स वा ‘‘आवुसो इमं जग्गाही’’ति आरोचेत्वाति अत्थो। अञ्‍ञथाति एवं अकत्वाति अत्थो।

२१७-८.वुड्ढागन्तुकस्साति एत्थ (चूळव॰ ३५८ आदयो; चूळव॰ अट्ठ॰ ३५९ आदयो) दूरतोव दिस्वा यदि ‘‘वुड्ढो’’ति जानाति, तस्मिं अनागते एव आसनपञ्‍ञापनादिवत्तं कातब्बन्ति अत्थो। पादोदप्पभुतिन्ति पादोदकं पादपीठं पादकथलिकं उपनिक्खिपितब्बन्ति अत्थो। पानीयेन आपुच्छन्तेन सचे सकिं आनीतं पानीयं सब्बं पिवति, पुनपि आपुच्छितब्बो एव। पञ्‍ञपेति ‘‘एतं तुम्हाकं सेनासनं पापुणाती’’ति एवं आचिक्खितब्बन्ति अत्थो।

२१९-२०.‘‘भिक्खाचारगामो इतो दूरे’’ति वा ‘‘सन्तिके’’ति वा ‘‘कालस्सेव पिण्डाय चरितब्ब’’न्ति वा ‘‘उपट्ठाके चरितब्ब’’न्ति वा गोचरो आचिक्खितब्बो। अगोचरोति मिच्छादिट्ठिकानं वा गामो, परिच्छिन्‍नभिक्खको वा गामो, यत्थ एकस्स वा द्विन्‍नं वा भिक्खा दीयति, सो आचिक्खितब्बोति अत्थो। कतिकन्ति सङ्घस्स कतिकट्ठानं। ‘‘इमं कालं पविसितब्बं, इमं कालं निक्खमितब्ब’’न्ति एवं पवेसननिक्खमनकालं आचिक्खितब्बं। केसुचि ठानेसु अमनुस्सा वा वाळा वा होन्ति, तस्मा एवं आचिक्खितब्बमेव। निसिन्‍नोवाति इदं आपत्तिअभावमत्तदीपकं, उट्ठहित्वापि सब्बं कातुं वट्टतेव। वत्तविनिच्छयो।

वत्तनिद्देसवण्णना निट्ठिता।

२२२.निधेतुंवाति निधेतुं एव, निस्सग्गियं न होतीति अत्थो। परिभुञ्‍जितुं वा विस्सज्‍जेतुं वा अधिट्ठातुं वा न वट्टतीति अत्थो।

२२४-५.अपरा सम्मुखा वाति सम्मुखा विकप्पना एवाति अत्थो। इमा द्वे विकप्पना अत्तना एव विकप्पेत्वा परेन पच्‍चुद्धरापितत्ता सम्मुखा विकप्पना एवाति वुत्ता।

२२७.मित्तोति दळ्हमित्तो। सन्दिट्ठोति दिट्ठमत्तो नातिदळ्हमित्तो। ‘‘इतरेन च पुब्बे वुत्तनयेन ‘तिस्सो भिक्खू’ति वा ‘तिस्सा भिक्खुनी’ति वा वत्तब्बं। पुन तेन ‘अहं तिस्सस्स भिक्खुनो, तिस्साय भिक्खुनिया वा दम्मी’ति विकप्पेत्वा तेनेव ‘तिस्सस्स भिक्खुनो, तिस्साय भिक्खुनिया सन्तकं परिभुञ्‍ज वा विस्सज्‍जेहि वा यथापच्‍चयं वा करोही’ति पच्‍चुद्धरितब्ब’’न्ति एवं पाठो गहेतब्बो।

२२८.दूरसन्तिकत्तेकत्त-बहुभावं विजानियाति एत्थ दूरत्तञ्‍च सन्तिकत्तञ्‍च एकत्तञ्‍च बहुभावञ्‍च विजानित्वाति अत्थो।

२२९.‘‘दसाहपरमं अतिरेकचीवरं धारेतब्ब’’न्ति (पारा॰ ४६२) वुत्तत्ता ‘‘दसाहं वा’’ति वुत्तं। ‘‘चीवरकालसमयो नाम अनत्थते कथिने वस्सानस्स पच्छिमो मासो, अत्थते कथिने पञ्‍च मासा’’ति (पारा॰ ६४९) वुत्तत्ता ‘‘मासमेकं वा पञ्‍च वा’’ति वुत्तं, मासं वा एकं पञ्‍च वा मासेति अत्थो। ‘‘भिक्खुनो पनेव अकालचीवरं उप्पज्‍जेय्य, आकङ्खमानेन भिक्खुना पटिग्गहेतब्बं। पटिग्गहेत्वा खिप्पमेव कारेतब्बं। नो चस्स पारिपूरि, मासपरमं तेन भिक्खुना तं चीवरं निक्खिपितब्बं ऊनस्स पारिपूरिया सतिया पच्‍चासाया’’ति (पारा॰ ४९९) वुत्तत्ता ‘‘पच्‍चासा सति मासक’’न्ति वुत्तं। नुप्पादयतीति अनधिट्ठितं अविकप्पितं निस्सग्गिं न जनयतीति अत्थो। विकप्पनाविनिच्छयो।

विकप्पनानिद्देसवण्णना निट्ठिता।

२३१.इदानि निस्सयग्गहणाकारं दस्सेतुं ‘‘एकंस’’न्तिआदि वुत्तं। एत्थ (महाव॰ १०३) आयस्मतोति आयस्मन्तं।

२३२.इदानि पटिप्पस्सद्धिविधानं दस्सेतुं ‘‘पक्‍कन्ते’’तिआदि वुत्तं, ‘‘पञ्‍चिमा, भिक्खवे, निस्सयप्पटिप्पस्सद्धियो उपज्झायम्हा। उपज्झायो पक्‍कन्तो वा होति विब्भन्तो वा कालकतो वा पक्खसङ्कन्तो वा आणत्तियेव पञ्‍चमी’’ति (महाव॰ ८३), ‘‘छयिमा, भिक्खवे, निस्सयप्पटिप्पस्सद्धियो आचरियम्हा। आचरियो पक्‍कन्तो वा होति विब्भन्तो वा कालकतो वा पक्खसङ्कन्तो वा आणत्तियेव पञ्‍चमी, उपज्झायेन वा समोधानगतो होती’’ति इदं पन उभयं इध दस्सितं। सचे आचरियुपज्झाया सामन्तविहारेसुपि अपरिक्खित्तेसु लेड्डुपातद्वयब्भन्तरे वसन्ति, निस्सयो न पटिप्पस्सम्भति। परिक्खित्तेसुपि न पटिप्पस्सम्भतीति एके। आचरिया पन न इच्छन्ति। कस्माति चे? निस्सयग्गहणप्पटिप्पस्सद्धीनं उपचारसीमाय परिच्छिन्‍नत्ता। लेड्डुपातेन उपचारसीमापरिच्छेदो पन अपरिक्खित्तेसु एव लब्भति, न परिक्खित्तेसु। तस्मा आचरियानं विनिच्छयेव ठातब्बं।

पक्‍कन्तेति एत्थ (महाव॰ अट्ठ॰ ८३) सचे आचरियो अन्तेवासिकं अनामन्तेत्वाव उपचारसीमं अतिक्‍कमति, निस्सयो पटिप्पस्सम्भति। सचे उपचारसीमं अनतिक्‍कमित्वाव निवत्तति, न पटिप्पस्सम्भति। आचरियं अनामन्तेत्वा अन्तेवासिकस्स गमनेपि एसेव नयो। सचे आचरियो कत्थचि गन्तुकामो अन्तेवासिकं आपुच्छति, अन्तेवासिकोपि ‘‘साधु साधू’’ति सम्पटिच्छति, तङ्खणे एव पटिप्पस्सम्भति। एवं आचरियं आपुच्छित्वा अन्तेवासिकस्स गमनेपि। द्वीसुपि अन्तोविहारेयेव ठितेसु आचरियो वा अन्तेवासिकं, अन्तेवासिको वा आचरियं अनापुच्छित्वाव सचे द्वे लेड्डुपाते अतिक्‍कमति, पटिप्पस्सम्भति। पक्खसङ्कन्ते वा विब्भन्ते वा कालकते वा तङ्खणेयेव पटिप्पस्सम्भति । आणत्ति नाम निस्सयप्पणामना। दस्सनसवनवसेन दुविधं समोधानं।

२३३.अलज्‍जिन्ति एत्थ –

‘‘सञ्‍चिच्‍च आपत्तिं आपज्‍जति।

आपत्तिं परिगूहति।

अगतिगमनञ्‍च गच्छति।

एदिसो वुच्‍चति अलज्‍जिपुग्गलो’’ति॥ (परि॰ ३५९) –

एवं वुत्तं। ‘‘न भिक्खवे अलज्‍जिनं निस्साय वत्थब्बं। यो वसेय्य, आपत्ति दुक्‍कटस्सा’’ति (महाव॰ १२०) हि वुत्तं।

२३४.‘‘अनुजानामि, भिक्खवे, अद्धानमग्गप्पटिपन्‍नेन भिक्खुना निस्सयं अलभमानेन अनिस्सितेन वत्थु’’न्ति (महाव॰ १२१) वुत्तत्ता ‘‘अद्धिकस्सा’’ति वुत्तं। गिलानुपट्ठाकस्स च याचितस्साति सम्बन्धो। ‘‘अनुजानामि, भिक्खवे, गिलानुपट्ठाकेन भिक्खुना निस्सयं अलभमानेन याचियमानेन अनिस्सितेन वत्थु’’न्ति (महाव॰ १२१) हि वुत्तं। सल्‍लक्खेन्तेन फासुकन्ति फासुविहारं सल्‍लक्खेन्तेन। इदं पन परिहारं (महाव॰ अट्ठ॰ १२१) सोतापन्‍नादिअरियसावको वा थामगतसमथविपस्सनालाभी वा बालपुथुज्‍जनो वा न लभति। यस्स खो पन समथविपस्सना तरुणा होति, न थामगता, अयं लभति। असन्ते निस्सयदायके ‘‘यदा पटिरूपो निस्सयदायको आगच्छिस्सति, तदा तस्स निस्साय वसिस्सामी’’ति आभोगं कत्वा याव आसाळ्हीपुण्णमा, ताव वसितुं लभति। सचे पन आसाळ्हीमासे निस्सयदायकं न लभति, यत्थ अत्थि, तत्थ गन्तब्बं। अन्तोवस्से पन अनिस्सितेन वत्थुं न वट्टति। सभागे दायके असन्ते वसितुं लब्भतीति सब्बपदेसु योजना कातब्बा। निस्सयविनिच्छयो।

निस्सयनिद्देसवण्णना निट्ठिता।

२३६.‘‘अनुजानामि, भिक्खवे, द्वे कायबन्धनानि पट्टिकं सूकरन्तक’’न्ति (चूळव॰ २७८) वुत्तत्ता ‘‘दुविध’’न्ति वुत्तं। तत्थ सूकरन्तं नाम कुञ्‍चिकाकोसका विय अन्ते सुसिरं कत्वा कोट्टितं। रज्‍जु च एकाति एकवट्टा रज्‍जु च। तदनुलोमिकाति तेसं द्विन्‍नं अनुलोमिका।

२३७.मच्छकण्डकखज्‍जुरी-पत्ता मट्ठा च पट्टिकाति एत्थ (चूळव॰ अट्ठ॰ २७८) एते मच्छकण्टकादयो मट्ठा विकाररहिता पट्टिका च तदन्तोगधाति अधिप्पायो। लब्भा दसा चतस्सोति एकाय वा द्वीसु वा तीसु वा कथा एव नत्थीति अधिप्पायो, ततो परं न वट्टति। अन्तेसूति उभोसु अन्तेसु। गुणसुत्तकन्ति दिगुणसुत्तकं।

२३९.मकरमुखादिन्ति आदि-सद्देन देड्डुभसीसं गहितं। उभन्तेति उभोसु अन्तेसु। कस्साति? विधस्स। घटकाति घटकतो। लेखाति लेखाय। घटकतो च लेखाय च अञ्‍ञं चित्तकं न कप्पतीति अत्थो।

२४०.देड्डुभकन्ति (चूळव॰ २७८; चूळव॰ अट्ठ॰ २७८) उदकसप्पसिरसदिसं। मुरजन्ति बहुरज्‍जुके एकतो सङ्कड्ढित्वा एकाय रज्‍जुया पलिवेठेत्वा कतरज्‍जु। मद्दवीणन्ति पामङ्गसदिसं। कलाबुकन्ति अनेकवट्टं। एतानि पन सब्बानि न कप्पन्ति। दसासु द्वे मज्झिमाति मुरजं मद्दवीणन्ति द्वे मज्झिमा एव। कप्परेति कप्पन्तीति अत्थो।

२४१.गण्ठियोचापीति (चूळव॰ २७९) चीवरगण्ठियोपि। वेळुआदिमया कप्पन्तीति पसङ्गेन वुत्तं। कायबन्धनविनिच्छयो।

कायबन्धननिद्देसवण्णना निट्ठिता।

पठमभाणवारं।

२४३.दुतियाति अजातपथवीति अत्थो। वुत्तरासीति मत्तिकरासि च पंसुरासि च चातुमासोमवट्ठको अजातपथवीति अत्थो।

२४४.इदानि येभुय्येनमत्तिका येभुय्येनपंसुका येभुय्येनसक्खराति एवं वुत्तासु कित्तावता येभुय्यता होतीति तं दस्सेतुं ‘‘द्वे भागा’’तिआदिमाह। तत्थ तीसु भागेसु द्वे भागा मत्तिका यस्सा भूमिया, एसा येभुय्यमत्तिकाति सम्बन्धो। उपड्ढपंसुआदयोपि कप्पिया एव अकप्पियभागस्स अनतिरेकतो। ‘‘येभुय्येनमत्तिका येभुय्येनपंसुका’’ति (पाचि॰ ८६) हि वुत्तं, न ‘‘उपड्ढमत्तिका, उपड्ढपंसुका’’ति। सेसेसुपीति येभुय्यपंसुकादीसुपि।

२४५.जातसञ्‍ञिस्स पाचित्तीति सम्बन्धो। द्वेळ्हस्स विमतिस्स दुक्‍कटं। जाते अजातसञ्‍ञिस्स अनापत्ति।

२४६.एकायाणत्तिया एकाति सचे सकिं आणत्तो दिवसम्पि खणति, आणापकस्स एका एवाति अत्थो। वाचसोति वाचाय वाचायाति अत्थो।

२४७.एत्थ ‘‘जालेहि अग्गि’’न्ति वा वत्तुं न वट्टति। अनियमेत्वा पन ‘‘पोक्खरणिं खण, पथविं खण, वापिं खण, आवाटं खण, कन्दं खणा’’ति वत्तुं वट्टति।

२४८.एदिसन्ति एत्थ अञ्‍ञम्पि एवरूपं कप्पियवोहारवचनं वट्टतीति अधिप्पायो।

२४९.कोपेतुं लब्भन्ति सम्बन्धो, घटादीहि गहेतुं सक्‍कुणेय्यकं उस्सिञ्‍चनीयकद्दमं।

२५१-२.उदकसन्तिके पतितेति सम्बन्धो। उदके पतितं पन सब्बकालं कप्पियमेव, तस्मा अकप्पियं दस्सेतुं ‘‘उदकसन्तिके’’ति वुत्तं। पासाणे लग्गे रजे च नवसोण्डिया पतिते रजे चाति सम्बन्धो। अब्भोकासुट्ठिते वम्मिके च मत्तिकाकुट्टे चाति अत्थो, तथा एतेपि सब्बे चातुमासाधिकोवट्ठा न कोपेतब्बाति अत्थो।

२५३-५.भूमिं विकोपयं थम्भादिं गण्हितुं न च कप्पतीति सम्बन्धो। धारायाति पस्सावधाराय। पदं दस्सेस्सामीति सम्बन्धो।

२५७.सेकोति सिञ्‍चनं। भूमिया अल्‍लहत्थं ठपेत्वाति सम्बन्धो।

२५८.अवसे सतीति हत्थदाहादीसु आपदासूति अत्थो। पथवीविनिच्छयो।

पथवीनिद्देसवण्णना निट्ठिता।

२६१.सिब्बितुं वा पञ्‍जरं विनन्धितुं वा थिरत्थं छत्ते बन्धितुं दण्डे लेखा वट्टतीति सम्बन्धो। सचे वुत्तप्पकारं अकप्पियछत्तं लभति, घटकम्पि वाळरूपम्पि छिन्दित्वा धारेतब्बं, लेखापि घंसेत्वा अपनेतब्बा, सुत्तकेन वा दण्डो वेठेतब्बो।

२६२.अनुवातं सन्धाय ‘‘अन्ते वा’’ति वुत्तं। द्विन्‍नं पट्टानं सङ्घटितट्ठानं सन्धाय ‘‘पट्टमुखे वापी’’ति वुत्तं। वरकसीसाकारेन सिब्बनं सन्धाय ‘‘वेणिका’’ति च सतपदाकारेन सिब्बनं सन्धाय ‘‘सङ्खलिकापि वा’’ति च वुत्तं। सतपदिसदिसं अञ्‍ञं वा सूचिविकारं न कप्पति, पकतिसूचिकम्ममेव वट्टतीति अत्थो। पाळिकण्णिकआदिकं चीवरे न च कप्पतीति सम्बन्धो।

२६३-४.चतुकोणाव (पारा॰ अट्ठ॰ १.८५) कप्परेति सम्बन्धो। अग्घिकन्ति अग्घियं चेतियसदिसं। एत्थाति गण्ठिपासकपट्टे। कोणसुत्ता च पीळकाति न केवलं चतुकोणा गण्ठिकपासकपट्टाव कप्पन्ति, अथ खो दुविञ्‍ञेय्या कोणसुत्तपीळका च कप्परेति अत्थो। गन्धं तेलं वाति गन्धं वा तेलं वा।

२६५.रत्तन्ति (पारा॰ अट्ठ॰ १.८५) रजितं। अञ्‍ञेन वाति मुग्गरादिना वा। कत्वाति ठपेत्वा। पहारे न च मुट्ठिनाति मुट्ठिना न पहारेय्याति अत्थो।

२६६-७.छत्तवट्टियं (पारा॰ अट्ठ॰ १.८५) लेखं ठपेत्वा धम्मकरणे लेखा न वट्टतीति सम्बन्धो। कुञ्‍चिकाय च पिप्फले च मणिका च पीळका च न वट्टतीति सम्बन्धो। तत्थ मणिकाति एका एव वट्टमणिका। पीळका मुत्तराजिसदिसा बहू।

२६८-९.मालाद्यरणियन्ति (पारा॰ अट्ठ॰ १.८५) अरणियं मालादि वण्णमट्ठं न वट्टतीति सम्बन्धो। एवं सब्बत्थ। तिपुसीसमये पत्तमण्डले भित्तिकम्मञ्‍च न वट्टतीति अत्थो। हित्वाति ठपेत्वा। सूचिसण्डासको (पारा॰ अट्ठ॰ १.८५) नाम सूचिं डंसापेत्वा घंसितुं कतो दारुमयो। ‘‘अनुजानामि, भिक्खवे, मकरदन्तकं छिन्दितु’’न्ति (चूळव॰ २५३) वुत्तत्ता पत्तमण्डले मकरदन्तकं वट्टति, अञ्‍ञं भित्तिकम्मादिविकारमेव न वट्टति, तस्मा गिरिकूटं पत्तमण्डले ठपेत्वा अवसेसे न वट्टतीति वेदितब्बं।

२७२.सेनासनेति (पारा॰ अट्ठ॰ १.८५) पासादादिसेनासनेति अत्थो।

२७३.पुमित्थिरूपरहितन्ति पुरिसरूपइत्थिरूपरहितन्ति अत्थो। परिक्खारविनिच्छयो।

परिक्खारनिद्देसवण्णना निट्ठिता।

२७६.अपरेसम्पि दसन्‍नं कातुं वट्टति, ते दस्सेतुं ‘‘महाचूळपिता’’तिआदिमाह। एत्थ (पारा॰ अट्ठ॰ २.१८५-१८७) पन महापिता चूळपिता महामाता चूळमाता महाभाता चूळभाता महाभगिनी चूळभगिनीति इमेहि अट्ठहि आदि-सद्देन पितुभगिनिञ्‍च मातुभातिकञ्‍च गहेत्वा दस। एतेसं पन सकेन भेसज्‍जेन कातब्बं। अत्तनिये च असतीति पाठसेसो।

२७७.न केवलञ्‍च एतेसं दसन्‍नं, इमेहि सम्बन्धानं पुत्तनत्तादीनं यावसत्तमा कुलपरिवट्टा कातुं वट्टतीति दस्सनत्थं ‘‘कुलदूसना’’तिआदिमाह। अञ्‍ञोपि (पारा॰ अट्ठ॰ २.२८५-२८७) यो आगन्तुको वा चोरो वा युद्धपराजितो वा इस्सरो ञातकेहि परिच्‍चत्तो वा गमियमनुस्सो वा गिलानो हुत्वा विहारं पविसति, सब्बेसम्पि अपच्‍चासीसन्तेन भेसज्‍जं कातब्बं।

२७८.माता (पारा॰ अट्ठ॰ २.१८५-१८७) पिता तदुपट्ठाको भिक्खुनिस्सितको पण्डुपलासो वेय्यावच्‍चकरोति इमेसं छन्‍नं अनामट्ठपिण्डपातो अवारितोति अत्थो। किञ्‍च भिय्यो – दामरिकचोरस्स च इस्सरियस्स च दातुमवारितोति अत्थो।

२७९.तेसन्ति (पारा॰ अट्ठ॰ २.१८५-१८७) गहट्ठानं। सासनोगधन्ति रतनपरित्तआटानाटियपरित्तादिपरित्तं भणितब्बन्ति अत्थो।

२८०.‘‘आगन्त्वा (पारा॰ अट्ठ॰ २.१८५-१८७) सीलं देतु, धम्मञ्‍च परित्तञ्‍च भासतू’’ति केनचि पेसितोति सम्बन्धो। दातुं वत्तुन्ति सीलं दातुं, धम्मञ्‍च परित्तञ्‍च वत्तुं लब्भतीति अत्थो। भेसज्‍जविनिच्छयो।

भेसज्‍जनिद्देसवण्णना निट्ठिता।

२८२-३.तेसु दसविधेसु रतनेसूति अत्थो। द्वीसूति रजतजातरूपेसु। गणसङ्घपुग्गले (पारा॰ अट्ठ॰ २.५३८-५३९) अनामसित्वा ‘‘इदं हिरञ्‍ञसुवण्णं चेतियस्स दम्मि, नवकम्मस्स दम्मी’’ति वुत्ते न पटिक्खिपेति अत्थो। किं कातब्बन्ति चे? तं दस्सेतुं ‘‘वदे’’तिआदि वुत्तं। ‘‘इमे एवं वदन्ती’’ति कप्पियकारानं आचिक्खितब्बन्ति अत्थो।

२८४.न केवलं हिरञ्‍ञसुवण्णादिकमेव, अञ्‍ञम्पि खेत्तवत्थादिकं अकप्पियं न सम्पटिच्छितब्बन्ति तं दस्सेतुं ‘‘खेत्तं वत्थु’’न्तिआदिमाह। दासपसुआदिकं दासपस्वादिकं। सचे हि कोचि ‘‘मय्हं सस्ससम्पादकं महातळाकं अत्थि, तं सङ्घस्स दम्मी’’ति वदति, तञ्‍चे सङ्घो सम्पटिच्छति। पटिग्गहणेपि परिभोगेपि आपत्तियेव। एवं सेसेसुपि।

कप्पियेन कमेन गण्हेय्याति सम्बन्धो। ‘‘खेत्तं दम्मी’’ति वुत्ते ‘‘न वट्टती’’ति पटिक्खिपित्वा ‘‘इतो चत्तारो पच्‍चये परिभुञ्‍जथा’’ति वा ‘‘चतुपच्‍चयपरिभोगत्थाय दम्मी’’ति वा वदति चे, गहेतब्बं। वत्थुम्हिपि एसेव नयो। ‘‘तळाकं दम्मी’’ति वुत्ते पटिक्खिपित्वा ‘‘चत्तारो पच्‍चये परिभुञ्‍जथा’’ति वा ‘‘सङ्घो उदकं परिभुञ्‍जिस्सति, भण्डकं धोविस्सती’’ति वा आदिना नयेन वुत्ते सम्पटिच्छितब्बं। ‘‘दासं दम्मी’’ति वुत्ते पटिक्खिपित्वा ‘‘आरामिकं, वेय्यावच्‍चकरं, कप्पियकारकं दम्मी’’ति वुत्ते सम्पटिच्छितब्बं। ‘‘गोमहिंसअजेळकादयो दम्मी’’ति वुत्ते पटिक्खिपित्वा ‘‘पञ्‍चगोरसपरिभोगत्थाया’’ति वुत्ते सम्पटिच्छितब्बं। एदिसं गहणं सन्धाय ‘‘पटिक्खिपित्वा गण्हेय्या’’ति वुत्तं।

२८५-६.नवमातिककेदारतळाककिरिया (पारा॰ अट्ठ॰ २.२३८-२३९) च अनवे पुब्बे कप्पियवोहारेन पटिक्खिपित्वा गहिततळाके मत्तिकुद्धरणञ्‍च भिन्‍नट्ठाने पाळिबन्धो च दुब्बलट्ठाने आळिया थिरकारो च अनवे केदारे पुराणभागतो अतिरेकभागग्गहणञ्‍च नवे केदारे अपरिच्छिन्‍नभागे ‘‘सस्से देथ एत्तके’’ति कहापणुट्ठापनञ्‍चापीति इदं सब्बं भिक्खुस्स कातुं न वट्टति। सचे करोति, एवमादिकं सब्बेसम्पि अकप्पियन्ति अत्थो।

२८७-९.इदानि तंयेव अकप्पियं दस्सेतुं ‘‘अवत्वा’’तिआदि वुत्तं। तस्सत्थो (पारा॰ अट्ठ॰ २.२३८-२३९) – यो पन ‘‘कस, वप्प’’ इच्‍चादिकं अवत्वा ‘‘एत्तिकाय भूमिया एत्तको भागो देय्यो’’ति भूमिं वा पतिट्ठापेति, ‘‘एत्तके भूमिभागे सस्सं कतं, एत्तकं गण्हथा’’ति कस्सके वदन्ते पमाणगण्हनत्थं दण्डरज्‍जुभि मिनति, खले ठत्वा रक्खणादीनि करोति, तस्सेव अकप्पियन्ति।

२९०.भण्डागारिकसीसेन पितुसन्तकम्पि सचे पटिसामेय्य, पाचित्तियन्ति अत्थो।

२९१-२.पितूनन्ति मातापितूनं। साटकादिकप्पियं वत्थुं। ‘‘पटिसामेत्वा देही’’ति वुत्तेति सम्बन्धो। पातेत्वान गते यस्मा अज्झारामसिक्खापदवसेन (पाचि॰ ५०५-५०६) पलिबोधो, तस्मा गोपितुं लब्भन्ति अत्थो।

२९३-४.सकं वासिआदिपरिक्खारन्ति अत्थो। इदं ठानं गुत्तन्ति दस्सेतब्बं। ‘‘एत्थ ठपेथा’’ति पन न वत्तब्बं।

२९५.एत्थ ‘‘अञ्‍ञो कोचि न पविसति, भिक्खूहि वा सामणेरेहि वा गहितं भविस्सती’’ति सङ्कन्तीति अत्थो। वत्थुम्हीति अलङ्कारादिवत्थुम्हीति अत्थो। तादिसेति यादिसे वत्थुम्हि नट्ठे आसङ्का होति, तादिसे वत्थुम्हि नट्ठेति सम्बन्धो।

२९६.इदानि असङ्कितब्बट्ठानं दस्सेतुं ‘‘विहारावसथस्सन्तो’’तिआदिमाह। विहारस्स च घरस्स चाति अत्थो। रतनन्ति दसविधं रतनं। रत्नसम्मतन्ति साटकवेठनादिकं। गहेत्वानाति कप्पियकारके असति अत्तनापि गहेत्वान निक्खिपेय्याति अत्थो। मग्गेरञ्‍ञेपीति मग्गेपि अरञ्‍ञेपि। तादिसेति ‘‘भिक्खूहि गहितं भविस्सती’’ति आसङ्कितब्बट्ठाने। पतिरूपं करीयतीति मग्गे वा अरञ्‍ञे वा तादिसं भण्डं पस्सित्वा मग्गा ओक्‍कम्म निसीदितब्बं, सामिकेसु आगतेसु तं ठानं आचिक्खितब्बं। सचे सामिके न पस्सति, रतनसम्मतं पंसुकूलं गहेतब्बं। रतनञ्‍चे होति, तुण्हीभूतेन गन्तब्बन्ति अत्थो। अयं मग्गारञ्‍ञकेसु पटिपत्ति। विहारावसथानं पन अन्तो तादिसं दिस्वा भण्डकं मुञ्‍चित्वा ‘‘एत्थ एत्तका कहापणा’’तिआदिना नयेन रूपेन वा लञ्छनाय वा पिलोतिकाय वा सञ्‍ञाणं कत्वा निक्खिपितब्बं, ततो पक्‍कमन्तेन पतिरूपानं भिक्खूनं आचिक्खितब्बं। उग्गहविनिच्छयो।

उग्गहनिद्देसवण्णना निट्ठिता।

२९८.इदानि इमेसु वत्थूसु न केवलं कुलदूसनदुक्‍कटमेव आपज्‍जति, थुल्‍लच्‍चयादीनिपि आपज्‍जतीति दस्सेतुं ‘‘थुल्‍लच्‍चय’’न्तिआदिमाह। सङ्घिकं गरुभण्डं इस्सरेन देन्तस्स थुल्‍लच्‍चयन्ति सम्बन्धो। सेनासनत्थाय नियमितं पन पुप्फादि गरुभण्डं होति। सङ्घस्स वा अञ्‍ञस्स वा सन्तकं थेय्यचित्तेन देन्तस्स दुक्‍कटादीनि होन्तीति पाठसेसो, तस्स भण्डस्स अग्घवसेन दुक्‍कटथुल्‍लच्‍चयपाराजिकानि होन्तीति अत्थो।

२९९-३००.सब्बथाति (पारा॰ अट्ठ॰ २.४३१) कप्पियवोहारअकप्पियवोहारपरियायओभासनिमित्तकम्मादीहि न वट्टतीति अत्थो। वतिआदीनि कत्वा जग्गितुञ्‍च। अत्तनो परिभोगत्थन्ति फलपरिभोगत्थं। रोपनादीनीति रोपापनादीनि। आदि-सद्देन सिञ्‍चापनओचिनापनादीनि गहितानि। कुद्दालखणित्तिवासिफरसुउदकभाजनादीनि आहरित्वा समीपे ठपनवसेन निमित्ततो च कुद्दालखणित्तादीनि च मालावच्छे च गहेत्वा ठिते ‘‘सामणेरादयो दिस्वा ‘थेरो कारापेतुकामो’ति आगन्त्वा करोन्ती’’ति सञ्‍ञाय ओभासतो च ‘‘इमं रुक्खं जान, इमं आवाटं जाना’’तिआदिकप्पियवोहारतो च ‘‘पण्डितेन मालावच्छादयो रोपापेतब्बा, न चिरस्सेव उपकाराय संवत्तन्ती’’तिआदिपरियायतो च रोपनादीनि लब्भरेति सम्बन्धो।

३०१-२.इदानि अट्ठसु वत्थूसु अवसेसानि द्वे वत्थूनि दस्सेतुं ‘‘वुत्ताव वेज्‍जिका जङ्घपेसने’’ति वुत्तं। तत्थ वेज्‍जिका पुब्बे वुत्ताव, इदानि जङ्घपेसनादिविनिच्छयं वक्खामीति अत्थो। पितरोति (पारा॰ अट्ठ॰ २.४३६-४३७) मातापितरो। भण्डुन्ति पब्बज्‍जापेक्खं। भिक्खुस्स सकं वेय्यावच्‍चकरञ्‍चाति एते ठपेत्वा कसिवाणिज्‍जादिगिहिकम्मेसु दूतसासनं हरणे दुक्‍कटन्ति अत्थो। पठमं सासनं अग्गहेत्वा पुन तं दिस्वा वा तस्स सन्तिकं गन्त्वा वा वदतोपि दुक्‍कटमेवाति अत्थो। सासनं अग्गहेत्वा आगतानं पन ‘‘भन्ते, तस्मिं गामे इत्थन्‍नामस्स का पवत्ती’’ति पुच्छियमाने कथेतुं वट्टति। पुच्छितपञ्हे दोसो नत्थि।

३०३.एवं कुलदूसनेन उप्पन्‍नपच्‍चया। ‘‘पञ्‍चन्‍नम्पी’’ति वुत्तत्ता अनुपसम्पन्‍नेन कतम्पि एदिसं न वट्टति एव मिच्छाजीवत्ता। आतुमावत्थु (महाव॰ ३०३) चेत्थ निदस्सनं। किं वियाति चे, तं दस्सेतुं ‘‘अभूतारोचनारूप-सब्योहारुग्गहादिसा’’ति वुत्तं। तत्थ उग्गहादिसाति एतेहि उप्पन्‍नपच्‍चयसदिसाति अत्थो।

३०४.इदानि पुप्फादीनि केसं दातुं वट्टन्ति, केसं दातुं न वट्टन्तीति तं दस्सेतुं ‘‘हरापेत्वा’’तिआदिमाह। पितूनं (पारा॰ अट्ठ॰ २.४३६-४३७) दातुं लब्भतीति सम्बन्धो। सेसञातीनं पत्तानं एव। लिङ्गन्ति सिवलिङ्गं।

३०५.तथाफलन्ति फलम्पि मातापितूनं हरित्वापि हरापेत्वापि दातुं लब्भतीति अत्थो। न केवलं मातापितूनंयेव, अञ्‍ञेसम्पि दातुं लब्भतीति दस्सेतुं ‘‘गिलानान’’न्तिआदिमाह। सपरसन्तकन्ति एत्थ परोति अत्तनो विस्सासञ्‍ञातको एव अधिप्पेतो।

३०६.भाजेन्तेति सङ्घस्स फलपुप्फम्हि भाजियमाने सम्मतेन देय्यन्ति सम्बन्धो। इतरेन असम्मतेन अपलोकेत्वा दातब्बन्ति अत्थो।

३०७.परिच्छिज्‍जाति आगतानं दातब्बन्ति फलवसेन वा रुक्खवसेन वा परिच्छिन्दित्वाति अत्थो। इतरस्साति इस्सरादिकस्स। कतिकं वत्वाति ‘‘इमस्मिं रुक्खे एत्तकानि फलानि लब्भन्ती’’ति एवं वत्वा।

३०८.सेसेति मत्तिकादन्तकट्ठवेळुम्हि (पारा॰ अट्ठ॰ २.४३६-४३७)। यथावुत्तनयो एवाति एत्थ अत्तनो च परस्स च सन्तकं कुलसङ्गहत्थाय ददतो दुक्‍कटन्तिआदिना हेट्ठा वुत्तनयेनेव विनिच्छयो वेदितब्बोति अत्थो। पण्णम्पीति किञ्‍चापि पाळियं पण्णदानं न वुत्तं, तथापि कुलदूसने पवेसयेति अत्थो। कुलदूसनविनिच्छयो।

कुलदूसननिद्देसवण्णना निट्ठिता।

३११.नोपेतुकामो आवासं, तदहूतिक्‍कमेय्य वाति पाठे (महाव॰ १८६) अतिक्‍कमन्तस्स आवासं तदहु वस्सूपनायिकातिपि अत्थो। आवासं अतिक्‍कमेय्य वाति सम्बन्धो। जानं वानुपगच्छतोति एत्थ विहारे निसीदित्वापि अनुपगच्छतो दुक्‍कटापत्ति होतीति अधिप्पायो।

३१२.छिन्‍नवस्सो (वजिर॰ टी॰ महावग्ग २०८) वा केनचि अन्तरायेन पठमं अनुपगतो (महाव॰ १८५-१८६) वा दुतियं उपगच्छेय्याति सम्बन्धो। तेमासन्ति पुरिमं वा तेमासं पच्छिमं वा तेमासं। ‘‘न भिक्खवे वस्सं उपगन्त्वा पुरिमं वा पच्छिमं वा तेमासं अवसित्वा चारिका पक्‍कमितब्बा। यो पक्‍कमेय्य, आपत्ति दुक्‍कटस्सा’’ति (महाव॰ १८५) हि वुत्तं।

३१३-५.‘‘अनुजानामि, भिक्खवे, सत्तन्‍नं सत्ताहकरणीयेन अप्पहितेपि गन्तुं, पगेव पहिते, ‘भिक्खुस्स भिक्खुनिया सिक्खमानाय सामणेरस्स सामणेरिया मातुया च पितुस्स च, गिलानभत्तं वा परियेसिस्सामि, गिलानुपट्ठाकभत्तं वा परियेसिस्सामि, गिलानभेसज्‍जं वा परियेसिस्सामि, पुच्छिस्सामि वा उपट्ठहिस्सामि वा’ति सत्ताहं सन्‍निवत्तो कातब्बो’’ति (महाव॰ १९८) वुत्तत्ता ‘‘मातापितूनमत्थाय…पे॰… उपट्ठिस्स’’न्ति वुत्तं। तत्थायं सङ्खेपो – ‘‘मातादीनं गिलानभत्तं वा तदुपट्ठाकभत्तं वा गिलानानं ओसधं वा एसिस्सं परियेसिस्स’’न्ति वा ‘‘ते गिलाने गन्त्वा पुच्छिस्सामी’’ति वा ‘‘उपट्ठिस्स’’न्ति वा पहितेपि अप्पहितेपि सत्ताहकिच्‍चेन गन्तुं लभति।

इदानि सहधम्मिके एव सन्धाय ‘‘अनभिरत’’न्तिआदि वुत्तं। ‘‘विसभागरूपं दिस्वा अनभिरति, ततो वूपकासिस्सं, तं गहेत्वा अञ्‍ञत्थ गमिस्स’’न्ति अधिप्पायेन गन्तुम्पि लब्भतीति अत्थो। कुक्‍कुच्‍चं विनोदनञ्‍च दिट्ठिं विवेचनञ्‍च अहं वा करेय्यं अञ्‍ञेहि वा कारेय्यन्ति सम्बन्धो। परिवासमानत्तआदीहि वुट्ठानं वा गरुका। आदि-सद्देन सचे सङ्घेन कम्मं कतं होति, तस्स पटिप्पस्सद्धिया अनुस्सावनकरणादीसु उस्सुक्‍कं करेय्यन्ति गन्तुं लब्भतीति अत्थो। सत्ताहकिच्‍चेनाति सत्ताहकरणीयेन।

३१६.धम्मसवनत्थं निमन्तितो एवं वजेति अत्थो। गरू नाम आचरियुपज्झाया, तेहि भण्डधोवनकिच्‍चेन पहितस्स गन्तुं वट्टतीति अत्थो।

३१७.न भण्डधोवन…पे॰… दस्सनेति एत्थ (महाव॰ अट्ठ॰ १९९) एतेसुपि न वजेति सम्बन्धो। लब्भन्ति एत्थ ‘‘अज्‍जेव आगमिस्स’’न्ति अदूरगो यदि न पापुणेय्य, लब्भन्ति सम्बन्धो। किं वुत्तं होति? ‘‘अज्‍जेव आगमिस्सामी’’ति सामन्तविहारं गन्त्वा पुन आगच्छन्तस्स अन्तरामग्गे सचे अरुणुट्ठानं होति, वस्सच्छेदोपि न होति, रत्तिच्छेदेन दुक्‍कटम्पि नापज्‍जतीति वुत्तं होति।

३१८.सेसञातिहीति भातुभगिनीआदीहि। भिक्खुनिस्सितकेन च पहितेति सम्बन्धो। निद्दिसित्वाति ‘‘आगच्छन्तु भदन्ता, इच्छामि दानञ्‍च दातुं धम्मञ्‍च सोतुं भिक्खुञ्‍च पस्सितु’’न्तिआदिना यं किञ्‍चि निद्दिसित्वाव पेसिते गन्तुं वट्टति। केवलं ‘‘आगच्छन्तु भिक्खू, इच्छामि भिक्खूनं आगमन’’न्ति एवं अनिद्दिसित्वा वुत्ते गन्तुं न लब्भतीति अत्थो।

३१९.अच्छराये सतत्तनोति दसविधेसु अन्तरायेसु एकस्मिम्पि अन्तराये अत्तनो सतीति अत्थो। सङ्घसामग्गिया वा वस्सच्छेदे अनापत्तीति अत्थो। वुत्तञ्हेतं ‘‘इध पन, भिक्खवे, वस्सूपगतो भिक्खु पस्सति सम्बहुले भिक्खू सङ्घभेदाय परक्‍कमन्ते। तत्र चे भिक्खुनो एवं होति, ‘गरुको खो सङ्घभेदो वुत्तो भगवता। मा मयि सम्मुखीभूते सङ्घो भिज्‍जी’ति पक्‍कमितब्बं, अनापत्ति वस्सच्छेदस्सा’’ति (महाव॰ २०२)। एवं छिन्‍नवस्सो नो पवारयेति अत्थो।

३२०.रुक्खस्स सुसिरेति एत्थ (महाव॰ २०४; महाव॰ अट्ठ॰ २०३) पन सुद्धे रुक्खसुसिरे एव न वट्टति, महन्तस्स पन सुसिरस्स अन्तो पदरच्छदनं कुटिकं कत्वा पविसनद्वारं योजेत्वा उपगन्तुं वट्टति। रुक्खस्स विटपेति एत्थापि सुद्धविटपमत्ते न वट्टति, महाविटपे पन अट्टकं बन्धित्वा वुत्तनयेन कुटिकं कत्वा उपगन्तुं वट्टति। छवकुटि नाम पासाणकुटिकन्ति वदन्ति। तीसु पस्सेसु पासाणे उस्सापेत्वा उपरि पासाणेन पटिच्छन्‍ना।

३२१.नावादीसु पन उपगतो पवारेतुञ्‍च लब्भतीति सम्बन्धो। वस्सूपनायिकविनिच्छयो।

वस्सूपनायिकनिद्देसवण्णना निट्ठिता।

३२५.‘‘पञ्‍चिमानि, भिक्खवे, अविस्सज्‍जियानि न विस्सज्‍जेतब्बानि सङ्घेन वा गणेन वा पुग्गलेन वा, विस्सज्‍जितानिपि अविस्सज्‍जितानि होन्ति। यो विस्सज्‍जेय्य, आपत्ति थुल्‍लच्‍चयस्सा’’ति (चूळव॰ ३२१) वुत्तत्ता ‘‘भाजितापि अभाजिता’’ति वुत्तं। एतेति वुत्तप्पकारा पञ्‍चपि ‘‘गरुभण्डानी’’ति च ‘‘अविस्सज्‍जियानी’’ति च च-सद्देन ‘‘अवेभङ्गियानी’’ति च वुच्‍चन्तीति अत्थो।

३२६-८.इदानि पुरिमेसु तीसु रासीसु सब्बस्स गरुभण्डत्ता ते अनामसित्वा पच्छिमेसु द्वीसु रासीसु एकच्‍चस्स अगरुभण्डस्सापि अत्थिताय तं दस्सेतुं आरभन्तोपि तेसु द्वीसु बहुविसयं पठमं दस्सेतुं ‘‘वल्‍लिड्ढबाहुमत्तापी’’तिआदिमाहाति ञातब्बं। तस्सायं सङ्खेपो (चूळव॰ अट्ठ॰ ३२१) – वल्‍लि अड्ढबाहुमत्तापि वेळु अट्ठङ्गुलायतोपि तिणादि मुट्ठिमत्तम्पीति एत्थ आदि-सद्देन मुञ्‍जपब्बजं सङ्गण्हाति, पण्णं एकम्पि मत्तिका पाकता वा पञ्‍चवण्णा वा सुधाकङ्गुट्ठआदिकाति आदि-सद्देन सज्‍जुलसजातिहिङ्गुलकादि वा तालपक्‍कप्पमाणापि येहि केहिचि सङ्घस्स दिन्‍ना वा सङ्घिके तिणखेत्तादिम्हि जाता वा रक्खितगोपितभूमिभागे उप्पन्‍ना तत्थजातका वा सङ्घिका रक्खिता एव अभाजियाति अत्थो।

इदानि ये चेत्थ भाजितब्बा, ते दस्सेतुं ‘‘निट्ठिते’’तिआदिमाह, सङ्घस्स वा चेतियस्स वा कम्मे निट्ठिते भाजियाति अधिप्पायो। एत्थ पन यं किञ्‍चि वल्‍लिवेळुतिणपण्णमत्तिकादि सङ्घस्स दिन्‍नं वा सङ्घिके तिणखेत्तादिम्हि जातकं वा रक्खितगोपितं गरुभण्डं, तं सङ्घकम्मे च चेतियकम्मे च निट्ठिते अवसेसं पुग्गलिककम्मेपि दातुं वट्टति, अगरुभण्डत्ता भाजितुम्पि लब्भति। सेनासनत्थाय रक्खितगोपितमेव गरुभण्डं होति, न इतरं। सीहळदीपे तुमूलसोमविहारे सङ्घस्स पाकवत्तम्पि तालपण्णं विक्‍किणित्वा करीयति। कस्मा? न हि तत्थ पण्णेन अत्थो अत्थि, सब्बेपि इट्ठकच्छन्‍ना पासादादयोति। एवं अञ्‍ञत्थापि करीयति एवाति वदन्ति।

३२९.इदानि लोहभण्डादीसु एकन्तभाजेतब्बभण्डं दस्सेतुं ‘‘पत्तादी’’तिआदिमाह। एत्थ (चूळव॰ अट्ठ॰ २२१) पन आदि-सद्देन लोहथालकतम्ब कुण्डिका कटच्छु सरक अञ्‍जनि अञ्‍जनिसलाकाकण्णमलहरणीसूचिसण्डासकत्तरयट्ठिआदीनि गहितानेव। तथाति भाजियमेवाति अत्थो। विप्पकतञ्‍च अविप्पकतञ्‍च। पादगण्हकन्ति मगधनाळिया पञ्‍चनाळिया गण्हनं।

३३१-२.अनुञ्‍ञातवासि यं सक्‍का सिपाटिकाय पक्खिपित्वा परिहरितुन्ति वुत्ता। तच्छितानिट्ठितन्ति विप्पकतं। यदि तच्छितं, गरुभण्डमेव। दन्तं पन अतच्छितञ्‍च अनिट्ठितञ्‍च भाजियमेव। अनिट्ठितं मञ्‍चपादादिकं गरुभण्डं। इदानि मत्तिकभण्डं दस्सेतुं ‘‘भिक्खूपकरणे’’तिआदिमाह। पत्तथालककुण्डिकादिभिक्खूपकरणे च। पादघटकोति पादगण्हनको घटको च मत्तिकामयो भाजियो भाजेतब्बोति अत्थो। सङ्खथालकम्पि भाजियमेव।

३३३-४.मिगचम्मादिकं कप्पियचम्मं भाजियं, सीहचम्मादिकं अकप्पियचम्मं गरुभण्डं। तं पन भूमत्थरणं कातुं वट्टति। एळचम्मं पन पच्‍चत्थरणगतिकत्ता गरुभण्डं होति। इदानि इमानि पन पञ्‍च चीवरपिण्डपातभेसज्‍जानं अत्थाय परिवत्तेतुं न वट्टति, गरुभण्डेन पन गरुभण्डञ्‍च थावरञ्‍च थावरेन थावरमेव परिवत्तेत्वा परिभुञ्‍जितब्बानीति दस्सेतुं ‘‘गरुना’’तिआदिमाह। तत्थ (चूळव॰ अट्ठ॰ ३२१) गरुनाति गरुभण्डेन गरुभण्डञ्‍च थावरञ्‍च परिवत्तेय्याति सम्बन्धो। थावरेन च थावरमेव परिवत्तेय्य, न गरुभण्डन्ति अधिप्पायो। पञ्‍चसु कोट्ठासेसु पच्छिमत्तयं गरुभण्डं, पुरिमद्वयं थावरन्ति वेदितब्बं । तथा कत्वा च भुञ्‍जतूति एवं परिवत्तेत्वा ततो आभतं कप्पियभण्डं परिभुञ्‍जतूति अत्थो। कथं ञायतीति चे? वुत्तञ्हेतं परिवारे-

‘‘अविस्सज्‍जियं अवेभङ्गियं, पञ्‍च वुत्ता महेसिना।

विस्सज्‍जेन्तस्स परिभुञ्‍जन्तस्स अनापत्ति,

पञ्हा मेसा कुसलेहि चिन्तिता’’ति॥ (परि॰ ४७९)।

एत्थ पन गरुभण्डेन गरुभण्डञ्‍च थावरञ्‍च थावरेन थावरमेव परिवत्तनविधिं सन्धाय ‘‘विस्सज्‍जन्तस्स अनापत्ती’’ति वुत्तं। पुन ततो निब्बत्तञ्‍च चतुपच्‍चयं परिभुञ्‍जितुं लब्भतीति दीपेतुं ‘‘परिभुञ्‍जन्तस्स अनापत्ती’’ति वुत्तं। अयं इमिस्सा गाथाय अधिप्पायो। सेसन्ति (चूळव॰ अट्ठ॰ ३२१) आरामादि अभाजियन्ति अत्थो। अवेभङ्गियविनिच्छयो।

अवेभङ्गियनिद्देसवण्णना निट्ठिता।

३३७.रतनानीति मुत्तादिदसविधरतनानि। धञ्‍ञन्ति सत्तविधं धञ्‍ञं।

३३८.सित्थतेलोदतेलेहीति एत्थ (चूळव॰ २४६; चूळव॰ अट्ठ॰ २४६) पन यो मधुसित्थकतेलेन वा उदकमिस्सकतेलेन वा अञ्‍ञेन केनचि विकारेन वा केसे ओसण्ठेति, दन्तमयादीसु येन केनचि फणेन वा कोच्छेन वा हत्थेन वा फणकिच्‍चं करोन्तो अङ्गुलीहि वा ओसण्ठेति, तस्स दुक्‍कटं होतीति अत्थो।

३३९.नेकपावुरणाति (चूळव॰ २६४) न एकपावुरणा। तुवट्टयुन्ति निपज्‍जेय्युं। किं वुत्तं होति? यदि एकपावुरणा वा एकत्थरणा वा एकमञ्‍चे वा तुवट्टेय्युं, न वट्टति, दुक्‍कटं होतीति वुत्तं होति। एकम्हि (चूळव॰ अट्ठ॰ २६४) वा भाजने न भुञ्‍जेय्युन्ति सम्बन्धो।

३४०.चतुरङ्गुलतो (चूळव॰ २८२; चूळव॰ अट्ठ॰ २८२) ऊनं दन्तकट्ठं न खादेय्याति सम्बन्धो। अधिकट्ठङ्गुलन्ति अट्ठङ्गुलतो अधिकं। तथाति न खादेय्याति अत्थो। अकल्‍लको (चूळव॰ २८९) लसुणं न खादेय्य।

३४१.हीनेहि (पाचि॰ ३१ आदयो) वा उक्‍कट्ठेहि वा जातिआदीहि एव उक्‍कट्ठं वा हीनं वा ‘‘चण्डालोसी’’तिआदिना नयेन उजुं वा ‘‘सन्ति वा इधेकच्‍चे चण्डाला, वेना, नेसादा’’तिआदिना नयेन अञ्‍ञापदेसेन वा उपसम्पन्‍नं वा अनुपसम्पन्‍नं वा अक्‍कोसाधिप्पायं विना केवलं दवाधिप्पायेन वदे, दुब्भासितन्ति अत्थो।

३४२.नखे वा केसे वा नासलोमे (चूळव॰ २७५) वा दीघे न धारयेति सम्बन्धो। ‘‘अनुजानामि, भिक्खवे, मंसप्पमाणेन नखे छिन्दितु’’न्ति (चूळव॰ २७४) च ‘‘अनुजानामि, भिक्खवे, दुमासिकं वा दुवङ्गुलं वा’’ति (चूळव॰ २४६) च वुत्तं। न लब्भं वीसतिमट्ठन्ति एत्थ एकनखम्पि मट्ठं कातुं न वट्टति एव। ‘‘न भिक्खवे वीसतिमट्ठं कारापेतब्बं। यो कारापेय्य, आपत्ति दुक्‍कटस्स (चूळव॰ २७४)। अनुजानामि, भिक्खवे, मलमत्तं अपकड्ढितु’’न्ति (चूळव॰ २७४) हि वुत्तं। तस्मा नखतो मलमत्तं अपकड्ढितुं वट्टति। सम्बाधे लोमहारणन्ति एत्थ सम्बाधो नाम उभो उपकच्छका मुत्तकरणञ्‍च। ‘‘अनुजानामि, भिक्खवे, आबाधपच्‍चया सम्बाधे लोमं संहरापेतु’’न्ति (चूळव॰ २७५) हि वुत्तं।

३४३.यथावुड्ढन्ति वुड्ढपटिपाटिया लद्धब्बं। न बाधेय्याति न वारेय्य। सङ्घुद्दिट्ठंवाति उपासकादीहि यथावुड्ढं ‘‘अय्या परिभुञ्‍जन्तू’’ति निस्सज्‍जित्वाव दिन्‍नं सेनासनादि। ‘‘न भिक्खवे उद्दिस्सकतम्पि यथावुड्ढं पटिबाहितब्बं। यो पटिबाहेय्य, आपत्ति दुक्‍कटस्सा’’ति (चूळव॰ ३१३) हि वुत्तं। अधोतपादेहि (चूळव॰ अट्ठ॰ ३२४) वा अल्‍लपादेहि वा नक्‍कमेति सम्बन्धो। सुधोतपादकं वापीति धोतपादेहेव अक्‍कमितब्बट्ठानं। तथेवाति नक्‍कमेय्य सउपाहनोति अत्थो। ‘‘न भिक्खवे अधोतेहि पादेहि, अल्‍लेहि पादेहि, सउपाहनेन सेनासनं अक्‍कमितब्बं। यो अक्‍कमेय्य, आपत्ति दुक्‍कटस्सा’’ति (चूळव॰ ३२४), हि वुत्तं। ‘‘अनुजानामि, भिक्खवे, पच्‍चत्थरित्वा निपज्‍जितु’’न्ति (चूळव॰ ३२४) वुत्तत्ता परिभण्डकतं भूमिं वा भूमत्थरणसेनासनं वा सङ्घिकं मञ्‍चपीठं वा अत्तनो सन्तकेन पच्‍चत्थरणेन पच्‍चत्थरित्वाव निपज्‍जितब्बं।

३४४.सङ्घाटियान पल्‍लत्थेति अधिट्ठितचीवरेन विहारे वा अन्तरघरे वा पल्‍लत्थिका न कातब्बाति अत्थो। परिकम्मकतं (चूळव॰ अट्ठ॰ ३२४) भित्तिआदिं न अपस्सये। ‘‘न भिक्खवे परिकम्मकता भित्ति अपस्सेतब्बा। यो अपस्सेय्य, आपत्ति दुक्‍कटस्सा’’ति (चूळव॰ ३२४) हि वुत्तं। तस्मा सेतभित्ति वा चित्तकम्मकता वा भित्ति न अपस्सयितब्बा। न केवलं भित्तियेव, परिकम्मकता द्वारकवाटवातपानत्थम्भादयोपि न अपस्सयितब्बा। एत्थपि लोमगणनाय एव आपत्तियो वेदितब्बा। सन्ते उदके नो न आचमेति (चूळव॰ ३७३; चूळव॰ अट्ठ॰ ३७३) नो न आचमेतुं, उदकसुद्धिं अकातुं न वट्टतीति अत्थो। सन्तेति वचनेन असन्ते अनापत्तीति दीपेति।

३४५.अकप्पियसमादानेति भिक्खुं वा सामणेरादिके सेससहधम्मिके वा अकप्पिये नियोजेन्तस्स दुक्‍कटमेव। ‘‘न, भिक्खवे, पब्बजितेन अकप्पिये समादपेतब्बं। यो समादपेय्य, आपत्ति दुक्‍कटस्सा’’ति (महाव॰ ३०३) हि वुत्तं। सभागाय (महाव॰ अट्ठ॰ १६९) आपत्तिया देसनायाति अत्थो। वत्थुसभागता इध अधिप्पेता, न आपत्तिसभागता। ‘‘न भिक्खवे सभागा आपत्ति देसेतब्बा। यो देसेय्य, आपत्ति दुक्‍कटस्सा’’ति (महाव॰ १६९) च ‘‘न भिक्खवे सभागा आपत्ति पटिग्गहेतब्बा। यो पटिग्गण्हेय्य, आपत्ति दुक्‍कटस्सा’’ति (महाव॰ १६९) च वुत्तं। वत्थुसभागं आपत्तिं आवि कातुम्पि न वट्टति, तेन वुत्तं ‘‘आविकम्मे च दुक्‍कट’’न्ति। ‘‘अहं, आवुसो, इत्थन्‍नामं आपत्तिं आपज्‍जिं, तं इतो वुट्ठहित्वा पटिकरिस्सामी’’ति अञ्‍ञस्स वचनं आविकम्मंनाम।

३४६.इतरस्सतूति असुद्धचित्तस्स।

३४७.पोरिसन्ति (चूळव॰ अट्ठ॰ २८४) पुरिसप्पमाणं अभिरुहितुं वट्टतीति अत्थो। ‘‘अनुजानामि, भिक्खवे, सति करणीये पोरिसं रुक्खं अभिरुहितुं, आपदासु यावदत्थ’’न्ति (चूळव॰ २८४) हि वुत्तं।

३४८.परिस्सावनं (चूळव॰ २५९; चूळव॰ अट्ठ॰ २५९) विना अड्ढयोजनं गच्छन्तस्स दुक्‍कटन्ति सम्बन्धो। ‘‘अद्धानगमनसमयो नाम अड्ढयोजनं गच्छिस्सामीति भुञ्‍जितब्ब’’न्ति (पाचि॰ २१८) वुत्तं, तस्मा अड्ढयोजनमेव अन्तिमं अद्धानन्ति वेदितब्बं। भिक्खुनिया च मातुगामेन च संविधानसिक्खापदे ‘‘एकद्धानमग्गं पटिपज्‍जेय्य, अन्तमसो गामन्तरम्पी’’ति (पाचि॰ १८२, ४१३) एवं विसेसेत्वा वुत्तत्ता ‘‘कुक्‍कुटसम्पाते गामे गामन्तरे गामन्तरे आपत्ति पाचित्तियस्सा’’ति (पाचि॰ १८३, ४१४) वुत्तं, न अद्धानलक्खणेन। यदि गामन्तरपरिच्छेदेन अद्धानं वुच्‍चति, गणभोजनसिक्खापदेपि ‘‘अद्धानगमनसमयो नाम गामन्तरम्पि गच्छिस्सामीति भुञ्‍जितब्ब’’न्ति वदेय्य, न च वुत्तं। तस्मा ‘‘न भिक्खवे अपरिस्सावनकेन अद्धानो पटिपज्‍जितब्बो। यो पटिपज्‍जेय्य, आपत्ति दुक्‍कटस्स। सचे न होति परिस्सावनं वा धम्मकरणो वा, सङ्घाटिकण्णोपि अधिट्ठातब्बो इमिना परिस्सावेत्वा पिविस्सामी’’ति वुत्तट्ठानेपि अड्ढयोजनवसेनेव अद्धानपरिच्छेदो वेदितब्बो। अभयगिरिवासीनं पन ‘‘द्विगावुतवसेन अद्धानपरिच्छेदो’’ति पाळियं एव अत्थि। याचमानस्साति याचन्तस्स। ‘‘न च भिक्खवे अद्धानप्पटिपन्‍नेन भिक्खुना परिस्सावनं याचियमानेन न दातब्बं। यो न ददेय्य, आपत्ति दुक्‍कटस्सा’’ति हि वुत्तं।

३४९.अञ्‍ञत्र आबाधप्पच्‍चया कण्णनासादिके सेसङ्गे दुक्‍कटन्ति सम्बन्धो। आबाधे सति अङ्गुलिआदीनि छिन्दितुं वट्टति। अङ्गजातं वा बीजानि वा छिन्दितुं न वट्टति एव। अत्तघातने च दुक्‍कटन्ति सम्बन्धो। ‘‘न च भिक्खवे अत्तानं घातेतब्बं। यो घातेय्य, आपत्ति दुक्‍कटस्सा’’ति हि वुत्तं।

३५०.‘‘न च भिक्खवे पटिभानचित्तं कारापेतब्बं इत्थिरूपकं पुरिसरूपकं। यो कारापेय्य, आपत्ति दुक्‍कटस्स। अनुजानामि, भिक्खवे, मालाकम्मं लताकम्मं मकरदन्तकं पञ्‍चपटिक’’न्ति (चूळव॰ २९९) वुत्तत्ता ‘‘चित्तपोत्थकरूपानि, न करे न च कारये’’ति वुत्तं। भुञ्‍जन्तन्ति (चूळव॰ अट्ठ॰ ३१६) विप्पकतभोजनं। ‘‘न भिक्खवे विप्पकतभोजनो भिक्खु वुट्ठापेतब्बो। यो वुट्ठापेय्य, आपत्ति दुक्‍कटस्सा’’ति (चूळव॰ ३१६) हि वुत्तं।

३५१.यानानीति वय्हं रथो सकटं सन्दमानिकादीनि गिलानस्स अभिरुहितुं कप्पन्ति, सिविको च कप्पति। एवं सब्बत्थ। ‘‘अनुजानामि, भिक्खवे, गिलानस्स यानं, पुरिसयुत्तं हत्थवट्टकं, सिविकं पाटङ्कि’’न्ति (महाव॰ २५३) हि वुत्तं।

३५२.दवन्ति केळिं। ‘‘न भिक्खवे बुद्धं वा धम्मं वा सङ्घं वा आरब्भ दवो कातब्बो। यो करेय्य, आपत्ति दुक्‍कटस्सा’’ति (पाचि॰ ६२७) हि वुत्तं। तस्मा ‘‘किं बुद्धो सिलकबुद्धो, उदाहु पटिबुद्धो’’ति वा ‘‘किं धम्मो गोधम्मो अजधम्मो’’ति वा ‘‘किं सङ्घो अजसङ्घो मिगसङ्घो’’ति वा एवमादिना नयेन यो दवं करोति, तस्स दुक्‍कटन्ति वेदितब्बं। ‘‘तुम्हाकं चीवरं दस्साम, पत्तं दस्सामा’’तिआदिना नयेन सामणेरं वा उपसम्पन्‍नं वा अञ्‍ञस्स अन्तमसो दुस्सीलस्सापि परिसभूतं अत्तनो उपट्ठाककरणत्थं उपलाळने दुक्‍कटन्ति अत्थो। ‘‘न भिक्खवे अञ्‍ञस्स परिसा अपलाळेतब्बा। यो अपलाळेय्य, आपत्ति दुक्‍कटस्सा’’ति हि वुत्तं।

३५३.कायं (चूळव॰ ४११) वा ऊरुं वा निमित्तं वा विवरित्वा भिक्खुनीनं न दस्सयेति सम्बन्धो। कद्दमुदकादिना ता भिक्खुनियो न सिञ्‍चेय्याति अत्थो। न केवलं कद्दमुदकादिकेनेव, विप्पसन्‍नउदकरजनकद्दमादीसुपि येन केनचि ओसिञ्‍चन्तस्स दुक्‍कटमेव।

३५४.बालन्ति एत्थ बालो नाम यो ओवादं गहेत्वा पातिमोक्खुद्देसकस्स आरोचेत्वा पाटिपदे पच्‍चाहरितब्बन्ति न जानाति। गिलानो नाम यो ओवादं गहेत्वा उपोसथग्गं गन्त्वा आरोचेतुञ्‍च पच्‍चाहरितुञ्‍च न सक्‍कोति। गमियो नाम यो पटिदेसं गन्तुकामो।

‘‘न भिक्खवे ओवादो न गहेतब्बो। यो न गण्हेय्य, आपत्ति दुक्‍कटस्सा’’ति (चूळव॰ ४१४) च ‘‘अनुजानामि, भिक्खवे, ठपेत्वा बालं, ठपेत्वा गिलानं, ठपेत्वा गमिकं, अवसेसेहि ओवादं गहेतु’’न्ति (चूळव॰ ४१४) च ‘‘न भिक्खवे ओवादो न पच्‍चाहरितब्बो। यो न पच्‍चाहरेय्य, आपत्ति दुक्‍कटस्सा’’ति (पाचि॰ ४१५) च वुत्तत्ता भिक्खुनीहि तेरसियं वा चातुद्दसियं वा आगन्त्वा ‘‘अयं उपोसथो चातुद्दसो’’ति वा ‘‘पन्‍नरसो’’ति वा ‘‘कदा अय्य उपोसथो’’ति वा पुच्छिते ‘‘चातुद्दसो’’ति वा ‘‘पन्‍नरसो’’ति वा ‘‘स्वे भगिनि उपोसथो’’ति वा आचिक्खितब्बं। ताहि भिक्खुनीहि उपोसथदिवसे आगन्त्वा ‘‘भिक्खुनिसङ्घो अय्य भिक्खुसङ्घस्स पादे वन्दति, ओवादूपसङ्कमनञ्‍च याचति, लभतु किर अय्य भिक्खुनिसङ्घो ओवादूपसङ्कमन’’न्ति एवं याचितब्बं, तं वचनं पटिग्गहेत्वा उपोसथग्गे पातिमोक्खुद्देसकस्स ‘‘भिक्खुनिसङ्घो, भन्ते, भिक्खुसङ्घस्स पादे वन्दति, ओवादूपसङ्कमनञ्‍च याचति, लभतु किर, भन्ते, भिक्खुनिसङ्घो ओवादूपसङ्कमन’’न्ति आचिक्खितब्बं। पातिमोक्खुद्देसकेनापि सचे तत्थ भिक्खुनोवादको अत्थि, ‘‘इत्थन्‍नामो भिक्खु भिक्खुनोवादको सम्मतो, तं भिक्खुनिसङ्घो उपसङ्कमतू’’ति वत्तब्बं। सचे नत्थि, ‘‘को आयस्मा उस्सहति भिक्खुनियो ओवदितु’’न्ति पुच्छित्वा सचे अत्थि अट्ठहङ्गेहि समन्‍नागतो भिक्खु, तं तत्थेव सम्मन्‍नित्वा वुत्तनयेनेव ओवादप्पटिग्गाहकस्स आरोचेतब्बं। यदि नत्थि कोचि भिक्खु भिक्खुनोवादको सम्मतो, ‘‘पासादिकेन भिक्खुनिसङ्घो सम्पादेतू’’ति वत्तब्बं। तेन भिक्खुना ‘‘साधू’’ति सम्पटिच्छित्वा पाटिपदे भिक्खुनीनं ‘‘नत्थि कोचि भिक्खु भिक्खुनोवादको सम्मतो, पासादिकेन भिक्खुनिसङ्घो सम्पादेतू’’ति वत्तब्बं। ताहिपि ‘‘साधु अय्या’’ति सम्पटिच्छितब्बं। इमिना नयेन गणपुग्गलेसुपि वचनभेदो वेदितब्बो।

३५५.लोकायतं (चूळव॰ २८६; चूळव॰ अट्ठ॰ २८६) नाम वितण्डसत्थं। ‘‘न भिक्खवे आसित्तकूपधाने भुञ्‍जितब्बं। यो भुञ्‍जेय्य, आपत्ति दुक्‍कटस्सा’’ति (चूळव॰ २६४) वुत्तत्ता ‘‘पेळायपि न भुञ्‍जेय्या’’ति वुत्तं।

३५६.गिहिपारुतं न पारुपेय्य, गिहिनिवासनं न निवासेय्याति अत्थो। ‘‘न भिक्खवे गिहिनिवत्थं निवासेतब्बं हत्थिसोण्डकं मच्छवाळकं चतुकण्णकं तालवण्टकं सतवलिकं। यो निवासेय्य, आपत्ति दुक्‍कटस्सा’’ति (चूळव॰ २८०) हि वुत्तं। परिमण्डलतो अञ्‍ञथा पारुपनं, सब्बमेतं गिहिपारुतं नाम। तं पन न पारुपेतब्बन्ति अत्थो। संवेल्‍लियन्ति एत्थ कच्छं बन्धित्वा न निवासेय्याति अत्थो। दायन्ति (चूळव॰ २८३; चूळव॰ अट्ठ॰ २८३) अरञ्‍ञं। नालिम्पयेय्याति सम्बन्धो।

३५७.वड्ढिञ्‍च न पयोजये, नोञातके नप्पवारिते न याचेति अत्थो। अञ्‍ञस्साति एत्थ (चूळव॰ ४२०; चूळव॰ अट्ठ॰ ४२०) ‘‘तुम्हे परिभुञ्‍जथा’’ति नियमेत्वा दिन्‍नं सहधम्मिकानम्पि दातुं न वट्टति। अग्गं गहेत्वा वा कतिपाहं भुत्वा वा पुन ददेय्याति अत्थो।

३५८.उद्दिस्स याचनेति एत्थ (पाचि॰ अट्ठ॰ ६७९) ‘‘अम्हाकं विहारे इत्थन्‍नामेन इदञ्‍चिदञ्‍च कत’’न्ति वा ‘‘करिस्सन्ती’’ति वा एवं उद्दिस्स रक्खं याचनेति अत्थो। ञत्वाञत्वा वाति एवं ‘‘अम्हेहि याचियमाना इमेसं दण्डेस्सन्ती’’ति तेसं दण्डिनं ञत्वा वा अञत्वा वाति अत्थो। तेहि पन दण्डिते सो दण्डो उद्दिस्स याचन्तानं गीवाव भण्डदेय्यं होति एवाति अत्थो। ‘‘इमिना च इमिना च इदञ्‍च इदञ्‍च कतं, एत्तकं दण्डं गण्हथा’’ति सयं दण्डापने पन अस्स दण्डस्स अग्घभेदेन पाराजिकथुल्‍लच्‍चयदुक्‍कटा ञेय्याति अत्थो।

३५९.अनत्थाय अस्स चोरस्स भासितेति सम्बन्धो। राजराजमहामत्तादीहि तस्स चोरस्स दण्डं गण्हन्ते अस्स भिक्खुस्स तत्तकं गीवाति अत्थो।

३६०.विघासं (पाचि॰ ८२५-८२६) वा उच्‍चारं वा सङ्कारं वा मुत्तं वा पाकारकुट्टानं बहि छड्डेय्य, दुक्‍कटन्ति अत्थो। वळञ्‍जे नावलोकियाति इमिनाव अवळञ्‍जनकाले नावलोकेत्वा छड्डेतुं वट्टतीति दीपेति। न केवलं तत्थेव, अथ खो हरिते वापि वीहादिनाळिकेरादिरोपिमे छड्डेन्तस्स दुक्‍कटमेवाति अत्थो।

३६१.‘‘उपहारं करोमा’’ति वुत्तेति पुच्छितेति अधिप्पायो।

३६२.कीळत्थं (पाचि॰ ९७९; पाचि॰ अट्ठ॰ ९७८) कतं राजागारं वा पोक्खरणिं वा उय्यानं वा चित्तागारं वा आरामं वा दट्ठुं गच्छतो पदे पदे दुक्‍कटन्ति अत्थो।

३६३.आसनेन (चूळव॰ ३६४) नवे न पटिबाहेय्य, उण्हे (महाव॰ ६७, ७८, ७९; चूळव॰ ३७६, ३७८, ३८०, ३८२) चीवरं न निदहेय्य। गुरुनाति आचरियादिना पणामितो खमापेय्याति सम्बन्धो।

३६४.आपत्तीहि च सत्तहीति (वजिर॰ टी॰ पाचित्तिय २६) सत्तहि आपत्तीहि भिक्खुं परम्मुखा अक्‍कोसनेन च ‘‘अस्सद्धो अप्पसन्‍नो बीजभोजी’’तिआदिना अञ्‍ञेनेव वा अक्‍कोसनेन च दुक्‍कटन्ति अधिप्पायो।

३६५.सद्धादेय्यं (महाव॰ अट्ठ॰ ३६१) चीवरं वा पिण्डपातं वाति अत्थो। ‘‘न भिक्खवे सद्धादेय्यं विनिपातेतब्बं। यो विनिपातेय्य, आपत्ति दुक्‍कटस्सा’’ति (महाव॰ ३६१) हि वुत्तं। ‘‘अनुजानामि, भिक्खवे, मातापितूनं दातु’’न्ति (महाव॰ ३६१) वुत्तत्ता ‘‘लब्भं पितून’’न्ति वुत्तं।

३६६.वस्संवुत्थो अञ्‍ञत्राति सम्बन्धो, अञ्‍ञस्मिं विहारेति अत्थो। अञ्‍ञतोति अञ्‍ञविहारतो। ‘‘न भिक्खवे अञ्‍ञत्र वस्संवुत्थेन अञ्‍ञत्र चीवरभागो सादितब्बो। यो सादियेय्य, आपत्ति दुक्‍कटस्सा’’ति (महाव॰ ३६४) हि वुत्तं। तेसन्ति तस्मिं विहारे तं चीवरं भाजेत्वा गण्हितुं युत्तानं भिक्खूनं धुरनिक्खेपतो होति भण्डग्घेन कारियोति अत्थो।

३६७.सह अन्तरेन उत्तरोति सन्तरुत्तरो, गामं न पविसेय्याति अत्थो। ‘‘न भिक्खवे सन्तरुत्तरेन गामो पविसितब्बो। यो पविसेय्य, आपत्ति दुक्‍कटस्सा’’ति (महाव॰ ३६२) हि वुत्तं। कल्‍लो वाति अगिलानो। सउपाहनो गामं न पविसेय्याति सम्बन्धो। ‘‘न भिक्खवे चामरिबीजनी धारेतब्बा। यो धारेय्य, आपत्ति दुक्‍कटस्सा’’ति (चूळव॰ २६९), ‘‘अनुजानामि, भिक्खवे, तिस्सो बीजनियो वाकमयं उसीरमयं मोरपिञ्छमय’’न्ति (चूळव॰ २६९) च वुत्तत्ता ‘‘न धारेय्य चामरीमकसबीजनि’’न्ति वुत्तं। मकसबीजनी पन दन्तविसाणदारुदण्डकापि वट्टति।

३६८.आरामतो बहीति सम्बन्धो। ‘‘न भिक्खवे छत्तं धारेतब्बं। यो धारेय्य, आपत्ति दुक्‍कटस्सा’’ति, ‘‘अनुजानामि, भिक्खवे, गिलानस्स छत्त’’न्ति च वुत्तत्ता अगिलानो आरामतो बहि न लभति, चीवरगुत्तियादिअत्थाय अगिलानोपि लभतीति अत्थो।

३६९.गाहेय्य नुभतोकाजन्ति न गाहेय्य उभतोकाजं। एकन्तरिककाजकन्ति एकतोकाजञ्‍च अन्तरकाजञ्‍च । सीसभारो च खन्धभारो च कटिभारो च सीसक्खन्धकटिभारा। ‘‘न भिक्खवे उभतोकाजं हरितब्बं। यो हरेय्य, आपत्ति दुक्‍कटस्सा’’ति (चूळव॰ २८१), ‘‘अनुजानामि, भिक्खवे, एकतोकाजं अन्तरकाजं सीसभारं खन्धभारं कटिभारं ओलम्बक’’न्ति (चूळव॰ २८१) च वुत्तत्ता उभतोकाजमेव न वट्टति, सेसानि वट्टन्तीति वेदितब्बा।

३७०.अनोकासकतन्ति (महाव॰ १५३) यो पठममेव ‘‘करोहि मे आवुसो ओकासं, अहं तं वत्तुकामो’’ति एवं अकतोकासं आपत्तिया चोदेय्य, तस्स दुक्‍कटं होतीति अत्थो। तथाति दुक्‍कटमेवाति अत्थो।

३७१.पकतङ्गुलेन, न सुगतङ्गुलेनाति अत्थो।

३७२.मूगब्बतादिं (महाव॰ २०९; महाव॰ अट्ठ॰ २०९) तित्थियब्बतं यदि गण्हेय्य, दुक्‍कटन्ति अत्थो। आदि-सद्देन गोवतकुक्‍कुरवतादयो सङ्गहिता। तथाति (महाव॰ ३०३; महाव॰ अट्ठ॰ ३०३) न्हापितपुब्बको खुरभण्डं यदि परिहरेय्य, दुक्‍कटमेवाति अत्थो।

३७३.यं किञ्‍चीति (कङ्खा॰ अट्ठ॰ कुटिकारसिक्खापदवण्णना) न्हापिततुण्णकारकम्मादि यं किञ्‍चि हत्थकम्मन्ति अत्थो। तदनुसारतोति हत्थकम्मयाचनानुसारतोति अत्थो। सचे एवं याचतो हत्थकम्ममूलमेव देति, तं अञ्‍ञस्स दापेत्वा कारेतुं वट्टतीति अत्थो। निक्‍कम्मं पन हत्थकम्मवसेन अयाचित्वापि ‘‘एहि इमं करोही’’ति कारेतुं कप्पतीति अत्थो। यं किञ्‍चिपरसन्तकन्ति यं किञ्‍चि दारुतिणादिकं अपरसन्तकं अपरिग्गहितं आहरापेतुं कप्पतीति अधिप्पायो।

३७४.गिहीनन्ति गिहीनं सन्तकं। गोपकेति रक्खके। यत्तकं देति, तत्तकं गहेतुं कप्पतीति अत्थो। यथापरिच्छेदन्ति ‘‘दिवसे दिवसे एत्तकं उच्छुनाळिकेरं अम्बपक्‍कं तुम्हे खादथा’’ति परिच्छिन्दित्वा दिन्‍नमेव तेसु देन्तेसु लब्भतीति अत्थो।

३७५.द्विहापज्‍जेय्याति द्वीहि आपज्‍जेय्य। कतमेहि द्वीहीति चे, ते दस्सेतुं ‘‘कायवाचाही’’ति वुत्तं, ‘‘द्वीहाकारेहि आपत्तिं आपज्‍जति, कायेन आपज्‍जति, वाचाय आपज्‍जती’’ति (परि॰ ३२२) हि वुत्तं। कायवाचाहि आपत्तिं आपज्‍जन्तो च छहि आकारेहि आपत्तिं आपज्‍जति, तानि दस्सेतुं ‘‘अलज्‍जिञाणकुक्‍कुच्‍चपकतत्ता’’तिआदिमाह। एत्थ (परि॰ २९५) पन अकप्पियभावं जानन्तो एव वीतिक्‍कमं करोन्तो अलज्‍जिताय आपज्‍जति नाम। कप्पियाकप्पियं अजानित्वा आपज्‍जन्तो अञ्‍ञाणताय। कप्पियं नु खो, नो नु खो’’ति संसये उप्पन्‍ने तमभिवितरित्वा वीतिक्‍कमं करोन्तो कुक्‍कुच्‍चपकतत्ता आपज्‍जति। सहसेय्यादिं आपज्‍जन्तो सतिप्‍लवा, सतिसम्मोसाति अत्थो। अच्छमंसं ‘‘सूकरमंस’’न्ति वा सूकरमंसं ‘‘अच्छमंस’’न्ति वा खादन्तो अकप्पिये कप्पियसञ्‍ञिताय च कप्पिये अकप्पियसञ्‍ञिताय च आपज्‍जतीति वेदितब्बो।

३७६.अलज्‍जिताय वा अञ्‍ञाणताय वा आपत्तिं कायवाचाहि छादयेति अत्थो। एके वा एकस्मिं वा। लिङ्गेति लिङ्गपरिवत्तनतो। एवं चतुधा आपत्तिवुट्ठानं होतीति अत्थो। तिणवत्थारकसमथअब्भानादीनं वसेन सङ्घे आपत्ति वुट्ठातीति वेदितब्बं निस्सज्‍जनादीसु गणे। एकस्स सन्तिके वुट्ठानं पाकटमेव। ‘‘या आपत्तियो भिक्खूनं भिक्खुनीहि असाधारणा, ताहि आपत्तीहि अनापत्ती’’ति (पारा॰ ६९) वचनतो लिङ्गपरिवत्तने आपत्तिवुट्ठानं ञातब्बं।

३७७.पच्‍चयद्वयेति चीवरे च पिण्डपाते च। न केवलञ्‍च इमे एव, निमित्तकम्मम्पि न लब्भतेव, गाथाबन्धसुखत्थं पन न वुत्तं। तत्थ निमित्तकम्मं नाम यं किञ्‍चि परेसं पच्‍चयदानसंयोजनकं कायवचीकम्मं। खादनीयं गहेत्वा गच्छन्ते दिस्वा ‘‘किं खादनीयं लभित्था’’तिआदिना नयेन तस्स पवत्ति वेदितब्बा। परिकथा नाम यथा यथा तं लभति, तथा तथा परिवत्तेत्वा कथनं। ‘‘एतरहि भिक्खू पिण्डपातेन किलमन्ती’’तिआदिना नयेन तस्स पवत्ति वेदितब्बा। ओभासो नाम पच्‍चयप्पटिसंयुत्तकथा। विञ्‍ञत्ति पन पाकटा एव। ततियेति सेनासने। सेनासने पन निमित्तोभासपरिकथा वट्टन्ति, विञ्‍ञत्ति एव एका न वट्टति। तत्थ निमित्तकम्मं नाम उपासके दिस्वा सेनासनत्थं भूमिपरिकम्मकरणादि। ओभासो नाम ‘‘उपासका, तुम्हे कुहिं वसथा’’ति ‘‘पासादे, भन्ते’’ति वुत्ते ‘‘किं भिक्खूनं पासादो न वट्टती’’तिआदिकं वचनं। परिकथा नाम ‘‘भिक्खूनं सेनासनं सम्बाध’’न्ति वचनं। सेसेति गिलानपच्‍चये।

३७८.न रुहतीति न होति। अच्‍चये दानन्ति अच्‍चयदानं। पञ्‍चसु सहधम्मिकेसु येन केनचि कालं करोन्तेन ‘‘ममच्‍चयेन मय्हं परिक्खारो उपज्झायस्स होतु, आचरियस्स होतु, अञ्‍ञस्स वा कस्सचि होतू’’ति वुत्ते तेसं न होति, तस्मा वुत्तं ‘‘न रुहती’’ति। सङ्घस्सेव च तं होतीति यदि भिक्खुसामणेरेहि एवं वुत्तं, तस्मिं मतेपि भिक्खुसङ्घस्सेव होति, भिक्खुनिसिक्खमानसामणेरीहि चे वुत्तं, तस्मिं मते भिक्खुनिसङ्घस्स तं होतीति अत्थो। गिहीनं पन रूहतीति गिहीनं पन अच्‍चयदानं एव सब्बेसं रुहतीति वुत्तं होति।

३७९.उपस्सयेति भिक्खुनिविहारे। दायज्‍जोति तस्स परिक्खारस्स दायज्‍जो। सेसेपीति सचे भिक्खुनिसिक्खमानसामणेरियो भिक्खुविहारे कालं करोन्ति, तासं परिक्खारानं भिक्खुसङ्घोव दायज्‍जोति अत्थो।

३८०.पुरिमस्सेवाति एत्थ ‘‘इमं परिक्खारं नेत्वा असुकस्स देही’’ति दिन्‍नं पुरिमस्सेव होतीति अत्थो। ‘‘असुकस्स दम्मी’’ति दिन्‍नं पन पच्छिमस्सेव होति परिच्‍चजित्वा दिन्‍नत्ता। इमं विधिं ञत्वाव विस्सासग्गाहं वा गण्हेय्य, मतकचीवरं वा अधिट्ठेति सम्बन्धो। मतकचीवरअधिट्ठानं नाम घण्टिं पहरित्वा कालं घोसेत्वा थोकं आगमेत्वा सचे भिक्खू आगच्छन्ति, तेहि सद्धिं भाजेतब्बानि, नो चे आगच्छन्ति, ‘‘मय्हिमानि चीवरानि पापुणन्ती’’ति अधिट्ठातब्बानि। एवं अधिट्ठिते सब्बानि तस्सेव होन्ति, ठितिका पन न तिट्ठति। सचे एकेकं उद्धरित्वा ‘‘अयं पठमभागो मय्हं पापुणाति, अयं दुतियभागो’’ति एवं गण्हाति, गहितानि च सुगहितानि होन्ति, ठितिका च तिट्ठति। एवं पापेत्वा गण्हन्तेनापि अधिट्ठितमेव होति।

३८१.लोहभण्डे पहरणिं ठपेत्वा सब्बं कप्पति, दारुभण्डे च दारुजं पत्तञ्‍च पादुकञ्‍च, पल्‍लङ्कञ्‍च आसन्दिञ्‍च ठपेत्वा सब्बं कप्पति, मत्तिकामये कतकञ्‍च कुम्भकारिकञ्‍च ठपेत्वा सब्बं कप्पतीति अत्थो। ‘‘अनुजानामि, भिक्खवे, ठपेत्वा पहरणिं सब्बं लोहभण्डं, ठपेत्वा आसन्दिं पल्‍लङ्कं दारुपत्तं दारुपादुकं सब्बं दारुभण्डं, ठपेत्वा कतकञ्‍च कुम्भकारिकञ्‍च सब्बं मत्तिकाभण्ड’’न्ति (चूळव॰ २९३) हि वुत्तं। एत्थ कतकन्ति पदुमकण्णिकाकारेन कतमल्‍लकन्ति अधिप्पेतं। धनियस्सेव सब्बमत्तिकामया कुटि कुम्भकारिकन्ति। पकिण्णकविनिच्छयो।

पकिण्णकनिद्देसवण्णना निट्ठिता।

३८३.इदानि वत्तब्बतं सन्धाय ‘‘एव’’न्ति वुत्तं।

३८४.पटिदेसेमीति आरोचेमि। एतानि अहं एतानाहं।

३८६.(क) यं सङ्घो गिलानस्स तिचीवरेन विप्पवाससम्मुतिं देति, तं अञ्‍ञत्राति अत्थो।

(ख) अकालचीवरं (पारा॰ ५००) नाम ‘‘अनत्थते कथिने एकादसमासे उप्पन्‍नं, अत्थते कथिने सत्तमासे उप्पन्‍नं, कालेपि आदिस्स दिन्‍नं, एतं अकालचीवरं नामा’’ति।

(ग) पुराणचीवरं (पारा॰ ५०५) नाम ‘‘सकिं निवत्थम्पि सकिं पारुतम्पी’’ति वुत्तं। अञ्‍ञातिका नाम मातितो वा पितितो वा याव सत्तमा कुलपरिवट्टा असम्बन्धा। निसीदनपच्‍चत्थरणधोवापने दुक्‍कटं।

(घ) अञ्‍ञत्र पारिवत्तकाति (पारा॰ ५१२) एत्थ हरीतकीखण्डम्पि वट्टति। चीवरं नाम इध विकप्पनूपगपच्छिमतो पट्ठाय अधिप्पेतं।

(ङ) अञ्‍ञत्र समयाति (पारा॰ ५१९) एत्थ ‘‘अच्छिन्‍नचीवरो वा होति भिक्खु नट्ठचीवरो वा’’ति एवं वुत्तं समयन्ति अत्थो।

(च) ‘‘सन्तरुत्तरपरमं तेन भिक्खुना ततो चीवरं सादितब्ब’’न्ति (पारा॰ ५२४) वुत्तत्ता ‘‘ततुत्तरी’’ति वुत्तं। एत्थ पन ‘‘सचे तीणि नट्ठानि होन्ति, द्वे सादितब्बानि। द्वे नट्ठानि, एकं सादितब्बं, एकं नट्ठं, न किञ्‍चि सादितब्ब’’न्ति (पारा॰ ५२४) वुत्तं।

(छ-ज) ‘‘कीदिसेन ते (पारा॰ ५२९), भन्ते, चीवरेन अत्थो, कीदिसं ते चीवरं चेतापेमी’’ति एवं अप्पवारितोति अत्थो। विकप्पन्ति विसिट्ठकप्पं अधिकविधानं आपन्‍नं। इध पुरिमं एकस्स, दुतियं बहूनं वसेन वुत्तं, एत्तकं नानत्तं।

(झ) अतिरेकतिक्खत्तुन्ति एत्थ केनचि यं किञ्‍चि अकप्पियवत्थुं आनेत्वा ‘‘इदं खो मे, भन्ते, आयस्मन्तं उद्दिस्स चीवरचेतापन्‍नं आभतं, पटिग्गण्हतु आयस्मा चीवरचेतापन्‍न’’न्ति वुत्ते ‘‘न खो मयं, आवुसो, चीवरचेतापन्‍नं पटिग्गण्हाम, चीवरञ्‍च खो मयं पटिग्गण्हाम कालेन कप्पिय’’न्ति वत्तब्बं। एवं वुत्ते सचे सो ‘‘अत्थि कोचि कप्पियकारको’’ति वदति, चीवरत्थिकेन ठपेत्वा पञ्‍च सहधम्मिके यो कोचि उद्दिसितब्बो ‘‘एसो खो, आवुसो, भिक्खूनं वेय्यावच्‍चकरो’’ति, एत्तकमेव वत्तब्बं। एवं वुत्ते सचे दायको तस्स हत्थे अकप्पियवत्थुं दत्वा ‘‘एसो अय्यस्स चीवरं चेतापेत्वा दस्सती’’ति वत्वा गच्छति, तं उपसङ्कमित्वा द्वत्तिक्खत्तुं चोदेतब्बो सारेतब्बो ‘‘अत्थो मे, आवुसो, चीवरेना’’ति, एत्तकमेव वत्तब्बं, ‘‘देहि मे चीवर’’न्तिआदिना न वत्तब्बं। एवं तिक्खत्तुं चोदनाय तं चीवरं लभति, इच्‍चेतं कुसलं। नो चे लभति, छक्खत्तुपरमं तुण्हीभूतेन ठातब्बं, न आसने निसीदितब्बं, न आमिसं पटिग्गहेतब्बं, न धम्मो भासितब्बो। ‘‘किं कारणा आगतोसी’’ति वुत्ते ‘‘जानाहि, आवुसो’’ति एत्तकमेव वत्तब्बं। सचे निसज्‍जादीनि करोति, ठानं भञ्‍जति। वत्तभेददुक्‍कटञ्‍च आपज्‍जतीति वदन्ति। एवं पन अप्पटिपज्‍जित्वा अतिरेकतिक्खत्तुं चोदनाय अतिरेकछक्खत्तुं ठानेन सचे निप्फादेति, निस्सग्गियन्ति अत्थो।

३८७-९.आपत्तिं देसेत्वा पच्छा कत्तब्बं दस्सेतुं ‘‘अथा’’ति वुत्तं। गिहिं वदेति सचे तत्थ आगच्छति आरामिको वा उपासको वा, तं वदेय्याति अत्थो। एवं वुत्तो सो ‘‘इमिना किं आहरामी’’ति चे वदेय्याति अत्थो। अवत्वामन्ति ‘‘इमं वा इमं वा आहरा’’ति अवत्वाति अत्थो। वदेति ‘‘कप्पियं आचिक्खितब्ब’’न्ति (पारा॰ ५८४, ५८९) वचनतो ‘‘पब्बजितानं सप्पि वा तेलं वा मधु वा फाणितं वा वट्टती’’ति एवं आचिक्खितब्बं, ‘‘इमं नाम आहरा’’ति न वत्तब्बमेव। द्वेपेतेति द्वेपि एते रूपियपटिग्गाहकञ्‍च रूपियसब्योहारिकञ्‍चाति अत्थो। अञ्‍ञेनाति अन्तमसो आरामिकेनापि लद्धभागो न कप्पति एव।

३९०.अन्तमसो (पारा॰ अट्ठ॰ २.५८३-४) तन्‍निब्बत्ता रुक्खच्छायापि न कप्पतीति। निस्सट्ठं पटिलद्धम्पीति एत्थ यथा रूपियसंवोहारं कत्वा लद्धवत्थुतो आभतं न कप्पति, तथा कोसियमिस्सकसन्थतादित्तयम्पि न कप्पति। न केवलं तस्सेव, अञ्‍ञेसम्पि न कप्पतेव ‘‘अञ्‍ञेन कतं पटिलभित्वा परिभुञ्‍जति, आपत्ति दुक्‍कटस्सा’’ति (पारा॰ ५४५, ५५०, ५५५) वुत्तत्ता।

३९१.एवं नो चे लभेथ, सो आरामिकादिको ‘‘इमं छड्डेही’’ति संसियो वत्तब्बोति अत्थो। एवम्पि नो चे लभेय्य, सम्मतो भिक्खु छड्डेय्याति अत्थो।

३९२.पटिग्गहितरूपियञ्‍च परिवत्तितरूपियञ्‍च सन्धाय ‘‘एतानी’’ति वुत्तं। दुतियपत्तो नाम ‘‘ऊनपञ्‍चबन्धनेन पत्तेन अञ्‍ञं नवं पत्तं चेतापेय्य, निस्सग्गिय’’न्ति (पारा॰ ६१२) वुत्तपत्तो। सो च एतानि च सङ्घे निस्सट्ठुं लब्भरेति सम्बन्धो। ‘‘सङ्घमज्झे निस्सज्‍जितब्बं, भिक्खुपरिसाय निस्सज्‍जितब्ब’’न्ति (पारा॰ ५८४, ५८९) च वुत्तत्ता न गणपुग्गलानं निस्सज्‍जितुं वट्टति। सेसानि पन तीणि चीवरादिवत्थूनि ‘‘निस्सज्‍जितब्बं सङ्घस्स वा गणस्स वा पुग्गलस्स वा’’ति वुत्तत्ता (पारा॰ ४६३) सङ्घादीनं निस्सज्‍जितुं वट्टति। भासन्तरेनपीति पाळिया वत्तुं असक्‍कोन्तेन दमिळभासादीसु अञ्‍ञतरायपि निस्सज्‍जितुं वट्टतीति अत्थो।

३९३.(क-ग) नानप्पकारकं नाम ‘‘चीवरपिण्डपातसेनासनगिलानपच्‍चयभेसज्‍जपरिक्खारा, ‘‘अन्तमसो चुण्णपिण्डोपि दन्तकट्ठम्पि दसिकसुत्तम्पी’’ति (पारा॰ ५९५) पाळियं वुत्तं। चेतापितोति (पारा॰ ६१३) याचित्वा गहितो।

३९४.सम्मन्‍नित्वान पत्तगाहकं सङ्घस्स पत्तन्तन्ति (पारा॰ ६१४; कङ्खा॰ अट्ठ॰ ऊनपञ्‍चबद्धनसिक्खापदवण्णना) य अन्तिमं पत्तं, तं तस्स दापयेति अत्थो।

३९५.(ख) परिदहितंनिस्सग्गियन्ति एत्थ (पारा॰ ६२६-६२८; पारा॰ अट्ठ॰ २.६२८) पन ठत्वा वस्सिकसाटिकाय परियेसनक्खेत्तं करणक्खेत्तं निवासनक्खेत्तं अधिट्ठानक्खेत्तन्ति चतुब्बिधं खेत्तञ्‍च कुच्छिसमयो पिट्ठिसमयोति दुविधो समयो च वेदितब्बो। कथं? गिम्हानमासेसु पच्छिममासस्स पुरिमो अड्ढमासो परियेसनक्खेत्तं, पच्छिमो करणक्खेत्तञ्‍च निवासनक्खेत्तञ्‍च, परियेसितुम्पि वट्टति, अधिट्ठातुं पन न वट्टति। वस्सिका पन चत्तारो मासा परियेसनादीनं चतुन्‍नम्पि खेत्तं। एते एव पञ्‍च मासा कुच्छिसमयो नाम। इतरे सत्त मासा पिट्ठिसमयो, तत्थ सतुप्पादकरणं न वट्टति।

(ग) अच्छिन्‍नन्ति एत्थ ‘‘यो पन मम पत्तचीवरादीनि वहन्तो मया सद्धिं चरिस्सती’’ति सञ्‍ञाय चीवरं दत्वा पुन सकसञ्‍ञाय एव अत्तनो वेय्यावच्‍चं अकरोन्तं दिस्वा अच्छिन्दति, सो इमं आपत्तिं आपज्‍जति। केवलं परिच्‍चजित्वा दिन्‍नं गहेतुमेव न लभति।

(घ) सुत्तं विञ्‍ञापेत्वाति एत्थ चीवरकारसमयादीसु चीवरसिब्बनादीनमत्थाय सुत्तं विञ्‍ञापेत्वाति अत्थो। अञ्‍ञथा सुत्तं विञ्‍ञापेतुमेव न वट्टति। विञ्‍ञत्तिया एव लद्धतन्तवायेहीति अत्थो। सुत्ततन्तवायानं अकप्पियभावे सति दीघतो विदत्थिमत्ते, तिरियन्ततो हत्थमत्ते वीते निस्सग्गियं, एकतो अकप्पियपक्खे दुक्‍कटं।

(ङ) विकप्पं आपन्‍नन्ति (पारा॰ ६४३) ‘‘इदं खो, आवुसो, चीवरं मं उद्दिस्स विय्यति, आयतञ्‍च करोथ वित्थतञ्‍चा’’तिआदिना अधिकं विधानं आपन्‍नन्ति अत्थो।

(च) अच्‍चेकचीवरं (पारा॰ ६४९-६५०) नाम सेनाय गन्तुकामादीहि दिन्‍नं।

(छ) अतिरेकछारत्तन्ति (पारा॰ ६५४-६५५) छदिवसतो अतिरेकं। ‘‘अत्थतकथिनानं वो, भिक्खवे, पञ्‍च कप्पिस्सन्ति, अनामन्तचारो असमादानचारो गणभोजनं यावदत्थचीवरं यो च तत्थ चीवरुप्पादो, सो नेसं भविस्सती’’ति (महाव॰ ३०६) वुत्तआनिसंसेसु चीवरमासे असमादानचारं ठपेत्वा सेसानिसंसा लब्भन्ति। यदि असमादानचारो लब्भेय्य, पावेय्यका भिक्खू वस्संवुत्था ओकपुण्णेहि चीवरेहि न भगवन्तं उपसङ्कमेय्युं, यस्मा तं न लभन्ति, तस्मा चीवरमासेपि तिचीवरं आदाय एव भगवन्तं उपसङ्कमिंसु। तस्मा वेदितब्बं असमादानचारपरिहारं अत्थतकथिना एव लभन्ति, न इतरेति वदन्ति।

३९७.(ख) ‘‘अहं, भन्ते, एकं पाटिदेसनीयापत्तिं, द्वे, सम्बहुला पाटिदेसनीयापत्तियो आपज्‍जि’’न्ति इमं पन येसु पोत्थकेसु लिखितं, तं अभयगिरिवासीनं खुद्दसिक्खावसेन दस्सितं किर। तत्थ ‘‘अहं, आयस्मा, सम्बहुला पाटिदेसनीया आपत्तियो आपन्‍नो, तायो पटिदेसेमि। अहं, आयस्मा, एकं पाटिदेसनीयं आपत्तिं आपन्‍नो, तं पटिदेसेमी’’ति हि वुत्तं। अम्हाकं पन एवं देसनाविधानं नत्थि। ‘‘गारय्हं, आवुसो, धम्मं आपज्‍जिं असप्पायं पाटिदेसनीयं, तं पटिदेसेमी’’ति (पाचि॰ ५५३) वुत्तं। समन्तपासादिकायं (पाचि॰ ५५३) ‘‘गारय्हं आवुसो’तिआदि पटिदेसेतब्बाकारदस्सन’’न्ति वुत्तं। कङ्खावितरणियम्पि (कङ्खा॰ अट्ठ॰ पठमपाटिदेसनीयसिक्खापदवण्णना) ‘‘तस्सा देसेतब्बाकारो गारय्हं आवुसो’तिआदिना नयेन सिक्खापदे दस्सितोयेवा’’ति वुत्तत्ता पाठे आगतनयेनेव देसनाविधानं वेदितब्बं। सचे द्वे होन्ति, ‘‘गारय्हे, आवुसो, द्वे धम्मे आपज्‍जिं असप्पाये पाटिदेसनीये, ते पटिदेसेमी’’ति, ‘‘पस्सथ, भन्ते, ते धम्मे’’ति च ‘‘गारय्हे , आवुसो, सम्बहुले धम्मे आपज्‍जिं असप्पाये पाटिदेसनीये, ते पटिदेसेमी’’ति, ‘‘पस्सथ, भन्ते, ते धम्मे’’ति च एवं यथानुरूपं देसनाविधानं वेदितब्बं। सेसं वुत्तप्पकारमेवाति।

३९८.अदेसनागामिनियन्ति (परि॰ ४२४ आदयो; परि॰ अट्ठ॰ ४२५) पाराजिकञ्‍च सङ्घादिसेसञ्‍च न देसयेति अत्थो। अनापत्तिञ्‍चाति अनापत्तिं एव ‘‘आपत्ति’’न्ति न देसये। लहुकापत्तिम्पि पुब्बे देसितं पुन न देसयेति सम्बन्धो, नानासंवासनिस्सीमट्ठितानं सन्तिके न देसयेति अत्थो। चतुपञ्‍चहीति एत्थ समानवस्सिकपवारणायं विय चतूहि वा पञ्‍चहि वा एकतो हुत्वा एकस्स सन्तिके न देसयेति अत्थो। द्विन्‍नं वा तिण्णं वा वट्टति। कथं देसेतब्बन्ति चे? एकस्स सन्तिके तीहिपि एकतो निसीदित्वा ‘‘अहं, भन्ते, एकं पाचित्तियापत्तिं आपज्‍जिं, तं तुम्हमूले पटिदेसेमी’’ति एवं अत्तना आपन्‍नआपत्तिवसेन वुत्ते तेन ‘‘पस्ससि, आवुसो, तं आपत्ति’’न्ति एवं तिक्खत्तुं वुत्ते ‘‘आम, भन्ते, पस्सामी’’ति वा ‘‘आमावुसो पस्सामी’’ति वा वुत्ते पुन तेन ‘‘आयतिं संवरेय्याथा’’ति वा ‘‘संवरेय्यासी’’ति वा वुत्ते ‘‘साधु सुट्ठु संवरिस्सामी’’ति वत्तब्बं, एवं देसेतब्बं। मनसाति वचीभेदं अकत्वा केवलं चित्तेनेव न देसयेति अत्थो। अपकतत्तानन्ति अन्तिमवत्थुं अज्झापन्‍नस्स वा उक्खित्तकस्स वा उपोसथो पवारणा वा ठपिता होन्ति, तस्स सन्तिके न देसयेति अत्थो। नानेकाति नानापत्तियो ‘‘एका’’ति वत्वा न देसयेति अत्थो। एका पन ‘‘सम्बहुला’’ति देसिता होतीति। देसनाविनिच्छयो।

देसनानिद्देसवण्णना निट्ठिता।

४००.इदानि छन्ददानविधिं दस्सेतुं ‘‘एकं भिक्खु’’न्तिआदिमाह (कङ्खा॰ अट्ठ॰ निदानवण्णना)।

४०१.(क) ‘‘छन्दं दम्मी’’ति एत्तकमेव अलं, ‘‘हर, आरोचेही’’ति इमेहि किंपयोजनन्ति चे? वुच्‍चते – ‘‘अनुजानामि, भिक्खवे, तदहुपोसथे पारिसुद्धिं देन्तेन छन्दम्पिदातुं, सन्ति सङ्घस्स करणीय’’न्ति (महाव॰ १६५) वुत्तत्ता भगवतो आणं करोन्तेन ‘‘छन्दं दम्मी’’ति वुत्तं। ‘‘छन्दहारको चे, भिक्खवे, दिन्‍ने छन्दे अन्तरामग्गे पक्‍कमति, अनाहटोव होति छन्दो’’ति (महाव॰ १६५) वुत्तत्ता छन्दहारकस्स अञ्‍ञस्स अपक्‍कमनत्थाय पारिसुद्धिं देन्तेन ‘‘इदं करोहि एवा’’ति आणापेन्तेन ‘‘छन्दं मे हरा’’ति वुत्तं। ‘‘छन्दहारको चे, भिक्खवे, दिन्‍ने छन्दे सङ्घप्पत्तो सञ्‍चिच्‍च नारोचेति, आहटो होति छन्दो, छन्दहारकस्स आपत्ति दुक्‍कटस्सा’’ति (महाव॰ १६५) वुत्तत्ता ‘‘यदित्वं सञ्‍चिच्‍च नारोचेस्ससि, आपत्तिं आपज्‍जिस्ससि , आरोचेहि एवा’’ति तस्स आचिक्खन्तो ‘‘आरोचेही’’ति आहाति एवमेत्थ इमेसं पदानं सप्पयोजनता वेदितब्बा। एवं पारिसुद्धिदानेपीति।

४०२.सेसकम्मन्ति यदि सङ्घो उपोसथग्गे अञ्‍ञं अपलोकनादिकम्मं करोति, तं कम्मं विबाधति, विकोपेतीति अत्थो।

४०३.द्वयन्ति उपोसथञ्‍च सेसकम्मञ्‍चाति अत्थो। नत्तनोति अत्तनो उपोसथं न सम्पादेति।

४०५.‘‘एकंसं उत्तरासङ्गं करित्वा उक्‍कुटिकं निसीदित्वा’’तिआदिकं (महाव॰ २१३) सब्बूपचारं कत्वानाति अत्थो।

४०६.‘‘इत्थन्‍नामेन पवारणा दिन्‍ना’’ति आरोचेत्वा।

४०८.पटिजानेय्य नाहटाति (महाव॰ १६४-१६५, २१३) पाठे न आहटाति नाहटा, आहटा न होतीति अत्थो। तथा हेय्याति विब्भमनादीनि करेय्याति अत्थो।

४०९.सुत्तो वा नारोचयेय्य, आहटा होतीति सम्बन्धो। अनापत्तिवाति अनापत्ति एव। छन्ददानविनिच्छयो।

छन्ददाननिद्देसवण्णना निट्ठिता।

४१२.पुब्बकरणेपुब्बकिच्‍चे, पत्तकल्‍ले समानितेति सब्बपठमं कत्तब्बं पुब्बकरणं। तदनन्तरं कत्तब्बं पुब्बकिच्‍चं नाम। एत्थ –

‘‘सम्मज्‍जनी पदीपो च, उदकं आसनेन च।

उपोसथस्स एतानि, पुब्बकरणन्ति वुच्‍चति॥

‘‘छन्दपारिसुद्धिउतुक्खानं, भिक्खुगणना च ओवादो।

उपोसथस्स एतानि, पुब्बकिच्‍चन्ति वुच्‍चती’’ति –॥ (महाव॰ अट्ठ॰ १६८)।

एवं अट्ठकथायं वुत्तनयेन पुब्बकरणञ्‍च पुब्बकिच्‍चञ्‍च वेदितब्बं।

‘‘उपोसथो यावतिका च भिक्खू कम्मप्पत्ता,

सभागापत्तियो च न विज्‍जन्ति।

वज्‍जनीया च पुग्गला तस्मिं न होन्ति,

पत्तकल्‍लन्ति वुच्‍चती’’ति –॥ (महाव॰ अट्ठ॰ १६८)।

वुत्तवसेन पत्तकल्‍ले समानिते, पज्‍जितेति अत्थो। ‘‘पञ्‍चिमे, भिक्खवे, पातिमोक्खुद्देसा। निदानं उद्दिसित्वा अवसेसं सुतेन सावेतब्बं, अयं पठमो पातिमोक्खुद्देसो। निदानं उद्दिसित्वा चत्तारि पाराजिकानि उद्दिसित्वा अवसेसं सुतेन सावेतब्बं, अयं दुतियो पातिमोक्खुद्देसो। निदानं उद्दिसित्वा चत्तारि पाराजिकानि उद्दिसित्वा तेरस सङ्घादिसेसे उद्दिसित्वा अवसेसं सुतेन सावेतब्बं, अयं ततियो पातिमोक्खुद्देसो। निदानं उद्दिसित्वा चत्तारि पाराजिकानि उद्दिसित्वा तेरस सङ्घादिसेसे उद्दिसित्वा द्वे अनियते उद्दिसित्वा अवसेसं सुतेन सावेतब्बं, अयं चतुत्थो पातिमोक्खुद्देसो। वित्थारेनेव पञ्‍चमो। इमे खो भिक्खवे पञ्‍च पातिमोक्खुद्देसा’’ति (महाव॰ १५०) वुत्तत्ता सो सुत्तुद्देसो पञ्‍चधा विभावितोति अत्थो।

४१३.विनान्तरायन्ति (महाव॰ १५०) राजन्तरायादिदसविधं अन्तरायं विना सङ्खेपेनुद्देसो विनिवारितो पटिक्खित्तोति अत्थो। थेरोवाति सङ्घत्थेरोव। एत्थाति पञ्‍चसु उद्देसेसु। ‘‘द्वीसु वा तीसु वा विसदेसु थेरोव इस्सरो’’ति अट्ठकथायं वुत्तत्ता अवत्तन्तेपि अन्तराये संखित्तेन उद्दिसितुं वट्टतीति अधिप्पायो। कत्थ वुत्तन्ति चे? ‘‘यो तत्थ भिक्खु ब्यत्तो पटिबलो, तस्साधेय्य’’न्ति (महाव॰ १५५) वुत्तपाळिया अट्ठकथायं ‘‘यो तत्थ भिक्खु ब्यत्तो पटिबलोति एत्थ किञ्‍चापि दहरस्सापि ब्यत्तस्स पातिमोक्खो अनुञ्‍ञातो, अथ खो एत्थ अयमधिप्पायो – सचे सङ्घत्थेरस्स पञ्‍च वा चत्तारो वा तयो वा पातिमोक्खुद्देसा नागच्छन्ति, द्वे पन अखण्डा सुविसदा वाचुग्गता होन्ति, थेरायत्तोव पातिमोक्खो। सचे पन एत्तकम्पि विसदं कातुं न सक्‍कोति, ब्यत्तस्स भिक्खुनो आयत्तोव होती’’ति अत्थो वुत्तो। पाळियम्पि वुत्तमेव ‘‘तेहि, भिक्खवे, भिक्खूहि एको भिक्खु सामन्ता आवासा सज्‍जुकं पाहेतब्बो ‘गच्छ, आवुसो, संखित्तेन वा वित्थारेन वा पातिमोक्खं परियापुणित्वा आगच्छा’’’ति (महाव॰ १६३)।

४१४.उद्दिसन्ते वाति (महाव॰ १७२) पातिमोक्खे उद्दिसियमाने समा वा थोकतरा वा यदि आगच्छेय्युं, उद्दिट्ठं सुउद्दिट्ठं, तेहि सद्धिं निसीदित्वा अवसेसकं सोतब्बन्ति अत्थो।

४१५.उद्दिट्ठमत्ते (महाव॰ १७२) वा सकलाय वा एकच्‍चाय वा परिसाय वुट्ठिताय समा वा थोकतरा वा यदि आगच्छेय्युन्ति सम्बन्धो। पारिसुद्धिन्ति पारिसुद्धिउपोसथं। करेय्येसन्ति करेय्य एसं, एतेसं सन्तिकेति अत्थो। बहुकाथ चेति अथ बहुका चे, पुन आगता बहुका चेति अत्थो ,। ‘‘उद्दिस्समाने, उद्दिट्ठमत्ते एकच्‍चाय वुट्ठिताय सकलाय वुट्ठिताया’’ति (महाव॰ १७२) आगतेसु सब्बविकप्पेसु पुब्बकिच्‍चं कत्वा पुन आदितो पट्ठाय पातिमोक्खं उद्दिसेति अत्थो।

४१६.इतरानन्ति आगन्तुकानं। सचेतरोति सचे चातुद्दसिकोति अत्थो। समानेतरेनुवत्तन्तूति समा वा ऊना वा इतरे आगन्तुका पुरिमानं आवासिकानं अनुवत्तन्तूति अत्थो। सचेधिकाति आगन्तुका सचे अधिका, पुरिमा आवासिका अनुवत्तन्तूति अत्थो। सेसेप्ययं नयोति ‘‘आगन्तुकानं पन्‍नरसो होति, आवासिकानं चातुद्दसो’’ति इतरेपि समथोका आगन्तुका आवासिकानं अनुवत्तन्तूतिआदिना नयेन विनिच्छयो वेदितब्बोति अत्थो।

४१७.मूलट्ठाति आवासिका। समथोकानं आगन्तुकानं। सामग्गिं देन्तु कामतोति यदि इच्छन्ति, देन्तूति अत्थो।

४१८.नो चे देन्ति, आगन्तुकेहि बहि गन्त्वान उपोसथो कातब्बोति अत्थो। अनिच्छाय सामग्गी देय्याति सम्बन्धो।

४१९.‘‘न भिक्खवे पातिमोक्खुद्देसकेन सञ्‍चिच्‍च न सावेतब्बं। यो न सावेय्य, आपत्ति दुक्‍कटस्सा’’तिवुत्तत्ता (महाव॰ १५४) ‘‘सावेय्य सुत्त’’न्ति वुत्तं। ‘‘अनुजानामि, भिक्खवे, पातिमोक्खुद्देसकेन वायमितुं कथं सावेय्यन्ति, वायमन्तस्स अनापत्ती’’ति (महाव॰ १५४) वुत्तत्ता ‘‘सञ्‍चिच्‍च अस्सावेन्तस्स दुक्‍कट’’न्ति वुत्तं।

४२०.तथाति दुक्‍कटन्ति अत्थो। कल्‍लोति अगिलानो। पेसितोति आणत्तो। ‘‘न भिक्खवे थेरेन आणत्तेन अगिलानेन न सम्मज्‍जितब्बं। यो न सम्मज्‍जेय्य, आपत्ति दुक्‍कटस्सा’’तिआदि (महाव॰ १५९) वुत्तं।

४२१-३.इदानि पारिसुद्धिउपोसथं दस्सेतुं ‘‘सम्मज्‍जित्वा’’तिआदि वुत्तं। अञ्‍जलिं (महाव॰ १६८) पग्गय्हाति सम्बन्धो। तेति अवसेसा द्वे एवं समुदीरिया वत्तब्बाति अत्थो। एकंसं उत्तरासङ्गादिकरणवसेन समत्तपुब्बारम्भेन ते द्वे भिक्खू नवेन एवमीरिया वत्तब्बाति अत्थो।

४२४-५.इदानि द्वीहि कत्तब्बं दस्सेतुं ‘‘द्वीसु थेरेना’’ति वुत्तं।

४२६.एत्तावता ‘‘अनुजानामि, भिक्खवे, चतुन्‍नं पातिमोक्खं उद्दिसितु’’न्ति (महाव॰ १६८) च ‘‘अनुजानामि, भिक्खवे, तिण्णं पारिसुद्धिउपोसथं कातु’’न्ति (महाव॰ १६८) च ‘‘अनुजानामि, भिक्खवे, द्विन्‍नं पारिसुद्धिउपोसथं कातु’’न्ति (महाव॰ १६८) च वुत्तं सङ्घुपोसथञ्‍च पारिसुद्धिउपोसथञ्‍च दस्सेत्वा इदानि यत्थ एको भिक्खु विहरति, तस्स अनुञ्‍ञातं अधिट्ठानुपोसथं दस्सेतुं ‘‘पुब्बकिच्‍च’’न्तिआदिमाह। एत्थ च पुब्बकिच्‍चं नाम सम्मज्‍जनादिकंयेव।

४२७.सङ्घुपोसथपारिसुद्धिउपोसथअधिट्ठानउपोसथानं वसेन तं तं उपोसथं यदि कयिरुन्ति सम्बन्धो।

४२८.वग्गे (महाव॰ १७३) च समग्गे च ‘‘वग्गो’’ति सञ्‍ञिनो च ‘‘वग्गो नु खो, समग्गो नु खो’’ति एवं विमतिस्स च दुक्‍कटं, ‘‘नस्सन्तेते विनस्सन्तेते, को तेहि अत्थो’’ति एवं अनागतानं भिक्खूनं अत्थिभावं ञत्वा भेदाधिप्पायेन उपोसथं करोतो थुल्‍लच्‍चयं होतीति अत्थो। तदुभयेपि ‘‘समग्गो’’ति सञ्‍ञिनो अनापत्ति।

४२९-४३०.सेससहधम्मिका नाम भिक्खुं ठपेत्वा अवसेसा चत्तारो। अभब्बस्साति एत्थ पण्डकथेय्यसंवासक तित्थियपक्‍कन्तक तिरच्छानगत मातुघातक पितुघातक अरहन्तघातक भिक्खुनिदूसक सङ्घभेदक लोहितुप्पादकउभतोब्यञ्‍जनका अभब्बा गहिता। एत्थ पन नागमाणवकादयो तिरच्छानगतपक्खिकाति वेदितब्बा। एतेसं निसिन्‍नपरिसायञ्‍च पातिमोक्खं न उद्दिसेति सम्बन्धो।

तथाति यो पन सङ्घो सभागापत्तिको, सोपि न उद्दिसे, परिवुत्थेन छन्देनपि न उद्दिसेति अत्थो। एत्थ पन चतुब्बिधं पारिवासियं परिसपारिवासियं रत्तिपारिवासियं छन्दपारिवासियं अज्झासयपारिवासियन्ति।

एत्थ पन भिक्खू केनचिदेव करणीयेन सन्‍निपतिता मेघादीहि उपद्दुता ‘‘अनोकासा मयं, अञ्‍ञत्र गच्छामा’’ति छन्दं अविस्सज्‍जेत्वाव उट्ठहन्ति। इदं परिसपारिवासियं। किञ्‍चापि परिसपारिवासियं, छन्दस्स पन अविस्सट्ठत्ता कम्मं कातुं वट्टति।

पुनपि भिक्खूनं ‘‘उपोसथादीनि करिस्सामा’’ति रत्तिं सन्‍निपतित्वा धम्मं सुणन्तानंयेव अरुणो उग्गच्छति। सचे ‘‘चातुद्दसिकं करिस्सामा’’ति निसिन्‍ना, ‘‘पन्‍नरसो’’ति कातुं वट्टति। सचे पन्‍नरसिकं कातुं निसिन्‍ना, पाटिपदे अनुपोसथे उपोसथं कातुं न वट्टति, अञ्‍ञं पन सङ्घकिच्‍चं कातुं वट्टति। इदं रत्तिपारिवासियं नाम।

पुन भिक्खू ‘‘यंकिञ्‍चिदेव अब्भानादिकम्मं करिस्सामा’’ति सन्‍निपतिता होन्ति, तत्रेको नक्खत्तपाठको एवं वदति ‘‘अज्‍ज नक्खत्तं दारुण’’न्ति, ते तस्स वचनेन छन्दं विस्सज्‍जेत्वा तत्थेव निसिन्‍ना होन्ति। अथञ्‍ञो आगन्त्वा ‘‘किं नक्खत्तेन, करोथा’’ति वदति। इदं छन्दपारिवासियञ्‍चेव अज्झासयपारिवासियञ्‍च। तस्मिं पारिवासिये पुन छन्दपारिसुद्धिं अनानेत्वा कम्मं कातुं न वट्टति। इदं सन्धाय ‘‘छन्देन परिवुत्थेना’’ति वुत्तं।

४३१.आपन्‍नमापत्तिं (महाव॰ १६९; महाव॰ अट्ठ॰ १६९) अदेसयित्वान वा ‘‘अहं, आवुसो, इत्थन्‍नामाय आपत्तिया वेमतिको, यदा निब्बेमतिको भविस्सामि, तं आपत्तिं पटिकरिस्सामी’’ति वत्वा विमतिं अनाविकत्वान वा ‘‘न च भिक्खवे अनुपोसथे उपोसथो कातब्बो अञ्‍ञत्र सङ्घसामग्गिया’’ति (महाव॰ १८३) वुत्तत्ता अनुपोसथेपि वा कातुं न च कप्पतीति अत्थो।

४३२.‘‘न च भिक्खवे तदहुपोसथे सभिक्खुका आवासा अभिक्खुको आवासो वा अनावासो वा गन्तब्बो अञ्‍ञत्र सङ्घेन अञ्‍ञत्र अन्तराया’’ति (महाव॰ १८१) वुत्तत्ता ‘‘अट्ठितोपोसथावासा’’ति (महाव॰ अट्ठ॰ १८१) वुत्तं। न वजे न गच्छे। अधिट्ठातुं सीममेव वाति सचे विहारे उपोसथं करोन्ति, उपोसथाधिट्ठानत्थं सीमापि नदीपि न गन्तब्बा। सचे पनेत्थ कोचि भिक्खु होति, तस्स सन्तिकं गन्तुं वट्टति। विस्सट्ठउपोसथापि आवासा गन्तुं वट्टति, एवं गतो अधिट्ठातुम्पि लभतीति। उपोसथविनिच्छयो।

उपोसथनिद्देसवण्णना निट्ठिता।

४३४.अज्‍ज पवारणाति एत्थ (महाव॰ २१५ आदयो) पन चातुद्दसिकाय पवारणाय ‘‘अज्‍ज पवारणा चातुद्दसी’’ति पुब्बकिच्‍चं कातब्बं, पन्‍नरसियं ‘‘अज्‍ज पवारणा पन्‍नरसी’’ति।

४३७.थेरेसु उक्‍कुटिकं निसज्‍ज पवारेन्तेसु सयं पन नवो याव पवारेति, ताव उक्‍कुटिकोव अच्छतूति अत्थो। ‘‘न भिक्खवे थेरेसु उक्‍कुटिकं निसिन्‍नेसु पवारयमानेसु आसनेसु अच्छितब्बं। यो अच्छेय्य, आपत्ति दुक्‍कटस्स। अनुजानामि, भिक्खवे, तदमन्तरा उक्‍कुटिकं निसीदितुं, याव पवारेति, पवारेत्वा आसने निसीदितु’’न्ति (महाव॰ २११) हि वुत्तं।

४४०-२.एवं तेवाचिकप्पवारणं दस्सेत्वा इदानि द्वेवाचिकएकवाचिकसमानवस्सिकप्पवारणासु कत्तब्बं दस्सेतुं ‘‘दानेना’’तिआदिमाह। तत्थ दानेनाति दानेन वा। धम्मसाकच्छाति इमिना धम्मकथासुत्तसङ्गायनाविनयविनिच्छयादयो गहिता। दानेन वा धम्मसाकच्छाय वा कलहेन वा रत्तिया खेपितभावतो तेवाचिकाय ओकासे असति दसविधे वा अन्तराये अनुरूपतो उत्तिं ठपेत्वा पवारेय्याति सम्बन्धो।

इदानि यथानुरूपतो ञत्ति ठपिता, तं दस्सेतुं ‘‘सुणातु मे’’तिआदिमाह। यथाठपितञत्तियाति एत्थ सब्बसङ्गाहिकाचेञत्तिठपिता, तेवाचिकद्वेवाचिकएकवाचिकानं वसेन पवारेतब्बं, समानवस्सिकप्पवारणाव एका न वट्टति। सचे ‘‘सङ्घो तेवाचिकं पवारेय्या’’ति ठपिता, तेवाचिका एव वट्टति, द्वेवाचिकादयो न वट्टन्ति। ‘‘द्वेवाचिकं पवारेय्या’’ति वुत्ते द्वेवाचिकञ्‍च तेवाचिकञ्‍च वट्टति, एकवाचिकसमानवस्सिका न वट्टन्ति। ‘‘एकवाचिकं पवारेय्या’’ति वुत्ते पन समानवस्सिकं ठपेत्वा सेसा वट्टन्ति। ‘‘समानवस्सिक’’न्ति पन वुत्ते सब्बं वट्टतीति। आदिके चेत्थ आहरेति एत्थ पवारणायपि पुब्बे उपोसथे वुत्ते ‘‘यदि समा आगच्छेय्यु’’न्तिआदिके वारे आहरेति अत्थो।

४४३.इदानि वत्तब्बं सन्धाय ‘‘एव’’न्ति वुत्तं। तिवग्गो च चतुवग्गो च तिचतुवग्गो।

४५०.‘‘न भिक्खवे सापत्तिकेन पवारेतब्बं। यो पवारेय्य, आपत्ति दुक्‍कटस्सा’’ति (महाव॰ २३५) वुत्तत्ता सापत्तिकेनपि वेमतिकेनपि पवारियमाने आपत्तिं सरन्तेनपि उपोसथे वुत्तनयेन पटिपज्‍जितब्बं। ‘‘वग्गे समग्गे वग्गोति-सञ्‍ञिनो विमतिस्स वा’’तिआदिगाथातो पट्ठाय याव ‘‘अन्तरायं व सङ्घं वा-धिट्ठातुं सीममेव वा’’ति अवसानगाथा, ताव सेसा उपोसथे वुत्ता गाथायोति अधिप्पेता।

४५१.पवारितेचाति (महाव॰ २१३ आदयो) पठमपवारणाय सङ्घम्हि पवारितेति अधिप्पायो। एत्थ अवुत्थोति पच्छिमिकाय उपगतो अपरिनिट्ठितत्ता ‘‘अवुत्थो’’ति वुच्‍चति।

४५२.चातुमासिनीति कत्तिकपुण्णमी। एत्थ वुत्थवस्सा नाम पच्छिमिकाय उपगता। पवारणाविनिच्छयो।

पवारणानिद्देसवण्णना निट्ठिता।

४५६.‘‘पुन एवं न करिस्स’’न्ति चित्ताधिट्ठानसंवरा यस्मा सुज्झति इन्द्रियसंवरो, तस्मा इन्द्रियसंवरो ‘‘संवरसुद्धी’’ति वुत्तोति सम्बन्धो।

४५७.पहायानेसनन्ति अनेसनं पहाय धम्मेन उप्पादेन्तस्स पच्‍चयेति पाठसेसो।

४५८.‘‘पटिसङ्खा योनिसो चीवरं पटिसेवामि…पे॰… उप्पन्‍नानं वेय्याबाधिकानं…पे॰… परमताया’’ति (म॰ नि॰ १.२३; अ॰ नि॰ ६.५८) च एवं चतूसुपि पच्‍चयेसु यथावुत्तपच्‍चवेक्खणसुज्झनाति अत्थो। एत्थ पन दुविधं पच्‍चवेक्खणं पटिलाभकाले च परिभोगकाले च। पटिलाभकाले हि धातुवसेन वा पटिक्‍कूलवसेन वा पच्‍चवेक्खित्वा ठपितचीवरादीनि ततो उत्तरि परिभुञ्‍जन्तस्स अनवज्‍जोव परिभोगो, परिभोगकालेपि। सुद्धिविनिच्छयो।

सुद्धिनिद्देसवण्णना निट्ठिता।

४६३-४.चतुरारक्खाय सायंपातं भावेतब्बत्ता मेत्ताभावनं दस्सेन्तेन थेरेन सब्बत्थककम्मट्ठानभावनावसेन दस्सिताति वेदितब्बा। इतरथा ‘‘अत्तानं उपमं कत्वा, न हनेय्य न घातये’’ति (ध॰ प॰ १२९-१३०) वचनतो सब्बपठमं ‘‘अहं सुखितो होमि, अवेरो’’तिआदिना नयेन भावेत्वाव अत्तनि चित्तं निपरिबन्धमानं कत्वा पच्छा आचरियुपज्झायादीसु कमेन भावेतब्बा। अत्तनि पन अप्पना न होति। गोचरगामम्हि इस्सरे जनेति सम्बन्धो। तत्थाति (पारा॰ अट्ठ॰ २.१६५) गोचरगामे। सीमट्ठसङ्घतो पट्ठाय परिच्छिज्‍ज परिच्छिज्‍जाति अत्थो। एवं मेत्तं भावेन्तो भिक्खुसङ्घे मेत्ताय सहवासीनं मुदुचित्तं जनेति, अथस्स सुखसंवासता होति। सीमट्ठकदेवतासु मेत्ताय मुदुकतचित्ताहि देवताहि धम्मिकाय रक्खाय सुसंविहितरक्खो होति। गोचरगामम्हि इस्सरजने मेत्ताय मुदुकतचित्तसन्तानेहि इस्सरेहि धम्मिकाय रक्खाय सुरक्खितपरिक्खारो होति। तत्थ मनुस्से मेत्ताय पसादितचित्तेहि तेहि अपरिभूतो हुत्वा विचरति। सब्बसत्तेसु मेत्ताय सब्बत्थ अप्पटिहतचारो होति।

४६५-६.वण्णतो च सण्ठानतो च ओकासतो च दिसतो च परिच्छेदतो च केसादिकोट्ठासे ववत्थपेत्वाति सम्बन्धो। एत्थ वण्णतोति (विसुद्धि॰ १.११०) केसादीनं वण्णतो। सण्ठानतोति तेसंयेव सण्ठानतो। ओकासतोति ‘‘अयं कोट्ठासो इमस्मिं नाम ओकासे पतिट्ठितो’’ति एवं तस्स तस्स ओकासतो। दिसतोति इमस्मिं सरीरे नाभितो उद्धं उपरिमा दिसा, अधो हेट्ठिमा दिसा, तस्मा ‘‘अयं कोट्ठासो इमिस्सा नाम दिसाया’’ति दिसा ववत्थपेतब्बा। परिच्छेदतोति सभागपरिच्छेदतो विसभागपरिच्छेदतोति द्वे परिच्छेदा। तत्थ ‘‘अयं कोट्ठासो हेट्ठा च उपरि च तिरियञ्‍च इमिना नाम परिच्छेदो’’ति एवं सभागपरिच्छेदो वेदितब्बो। ‘‘केसा न लोमा, लोमा न केसा’’ति एवं अमिस्सकवसेन विसभागपरिच्छेदो।

एवं पञ्‍चहि आकारेहि ववत्थानाकारं दस्सेत्वा इदानि मनसि करोन्तेन एवं मनसि कातब्बन्ति तं दस्सेतुं ‘‘अनुपुब्बतो’’तिआदिमाह। तत्थ अनुपुब्बतोति सज्झायकरणकालतो पट्ठाय ‘‘केसा नखा’’ति एवं एकन्तरिकाय वा ‘‘लोमा केसा’’ति एवं उप्पटिपाटिया वा न मनसि कातब्बं, अथ खो ‘‘केसा लोमा’’तिआदिना नयेन अनुपटिपाटिया मनसि कातब्बं, अनुपटिपाटिया मनसि करोन्तेनापि नातिसीघं नातिसणिकं मनसि कातब्बं, बहिद्धा पुथुत्तारम्मणे चेतसो विक्खेपो पटिबाहितब्बो। ‘‘पण्णत्तिं समतिक्‍कम्म, मुञ्‍चन्तस्सानुपुब्बतो’’ति पाठो गहेतब्बो। एवञ्हि सति भावनाक्‍कमेन अत्थो सुविञ्‍ञेय्यो होति। ‘‘केसा लोमा’’तिआदिपञ्‍ञत्तिं अमनसिकत्वा पटिक्‍कूलभावेन एवं चित्तं ठपेतब्बं। मुञ्‍चन्तस्सानुपुब्बतोति यो यो कोट्ठासो आपाथं नागच्छति, तं तं अनुपुब्बतो मुञ्‍चन्तस्साति अत्थो।

४६७.इदानि यथा पटिक्‍कूलमनसिकारो कातब्बो, तं दस्सेतुं ‘‘वण्णआसयसण्ठाना’’तिआदिमाह। एतेहि वण्णादीहि कोट्ठासेहि पटिक्‍कूलाति भावनाति सम्बन्धो। एत्थ (विभ॰ अट्ठ॰ ३५६; विसुद्धि॰ १.१७८) केसा ताव वण्णतोपि पटिक्‍कूला। तथा हि यागुभत्तादीसु केसवण्णं किञ्‍चि दिस्वा जिगुच्छन्ति। सण्ठानतोपि पटिक्‍कूला। तथा हि रत्तिं भुञ्‍जन्ता केससण्ठानं मकचिवाकादिकं छुपित्वा जिगुच्छन्ति। तेलमक्खनादिविरहितानञ्‍च अग्गिम्हि पक्खित्तानञ्‍च गन्धो अतिविय पटिक्‍कूलोति गन्धतोपि पटिक्‍कूला। असुचिट्ठाने जातसूपेय्यपण्णं विय पुब्बलोहितमुत्तकरीसपित्तसेम्हादिनिस्सन्देन जातत्ता आसयतोपि पटिक्‍कूला। गूथरासिम्हि उट्ठितकण्णिकं विय एकतिंसकोट्ठासरासिम्हि जातत्ता ओकासतोपि पटिक्‍कूला। उद्धुमातकं विनीलकं विपुब्बकं विच्छिद्दकं विक्खायितकं विक्खित्तकं हतविक्खित्तकं लोहितकं पुळवकं अट्ठिकन्ति इमेसु उद्धुमातकादीसु वत्थूसु असुभाकारं गहेत्वा पवत्ता भावना वा असुभं नामाति अत्थो।

४६८.यं पनेतं अरहन्तानं वट्टदुक्खसमुच्छेदसङ्खातं समुच्छेदमरणं (विसुद्धि॰ १.१६७), सङ्खारानं खणभङ्गसङ्खातं खणिकमरणं, ‘‘रुक्खो मतो, लोहं मत’’न्तिआदि सम्मुतिमरणञ्‍च, न तं इध अधिप्पेतं। इध पन मरणन्ति एकभवपरियापन्‍नस्स जीवितिन्द्रियस्स उपच्छेदो अधिप्पेतो। तम्पि कालमरणं अकालमरणन्ति दुविधं होति। तत्थ कालमरणं पुञ्‍ञक्खयेन वा आयुक्खयेन वा उभयक्खयेन वा होति, अकालमरणं उपपीळकउपच्छेदककम्मवसेन । ‘‘मरणं मे भविस्सती’’ति वा ‘‘जीवितं उच्छिज्‍जिस्सती’’ति वा ‘‘मरणं मरण’’न्ति वा योनिसो भावयित्वानाति सम्बन्धो।

४६९-७०.यस्स पन एत्तावता उपचारज्झानं न उप्पज्‍जति, तेन वधकपच्‍चुपट्ठानतो सम्पत्तिविपत्तितो उपसंहरणतो कायबहुसाधारणतो आयुदुब्बलतो अनिमित्ततो अद्धानपरिच्छेदतो खणपरित्ततोति इमेहि अट्ठहि आकारेहि मरणं अनुस्सरितब्बं, इदानि ते दस्सेतुं ‘‘वधकस्सेवुपट्ठान’’न्तिआदिमाह। असिं उक्खिपित्वा सीसं छिन्दितुं ठितवधको विय मरणं पच्‍चुपट्ठितमेवाति भावना मरणस्सति नामाति सम्बन्धो। एवं सब्बत्थ। सब्बं आरोग्यं ब्याधिपरियोसानं, सब्बं योब्बनं जरापरियोसानं, सब्बं जीवितं मरणपरियोसानं, तस्मा ‘‘अयं योब्बनादिकायसम्पत्ति तावदेव सोभति, याव मरणसङ्खाता विपत्ति न भविस्सती’’ति एवमादिना सम्पत्तिविपत्तितो च, सत्तहाकारेहि उपसंहरणतो मरणं अनुस्सरितब्बं यसमहत्ततो पुञ्‍ञमहत्ततो थाममहत्ततो इद्धिमहत्ततो पञ्‍ञामहत्ततो पच्‍चेकबुद्धतो सम्मासम्बुद्धतोति। तत्थ ‘‘इदं मरणं नाम महायसानं महापरिवारानं महासम्मतमन्धातादीनम्पि उपरि पतति, किमङ्गं पन मय्हं उपरि न पतिस्सती’’ति एवं यसमहत्ततो,

‘‘जोतिको जटिलो उग्गो,

मेण्डको अथ पुण्णको।

एते चञ्‍ञे च ये लोके,

महापुञ्‍ञाति विस्सुता।

सब्बे मरणमापन्‍ना,

मादिसेसु कथाव का’’ति॥ –

एवं पुञ्‍ञमहत्ततो,

‘‘वासुदेवो बलदेवो, भीमसेनादयो महा।

बला मच्‍चुवसं पत्ता, मादिसेसु कथाव का’’ति॥ –

एवं थाममहत्ततो,

‘‘महामोग्गल्‍लानादीनं महिद्धिकानम्पि उपरि पतति, मादिसेसु कथाव का’’ति एवं इद्धिमहत्ततो, ‘‘सारिपुत्तादीनं महापञ्‍ञानम्पि उपरि पतति, मादिसेसु कथाव का’’ति एवं पञ्‍ञामहत्ततो। एवं इतरेसम्पि पच्‍चेकबुद्धसम्मासम्बुद्धानम्पि महन्तभावं चिन्तेत्वा ‘‘तेसम्पि उपरि मरणं पतति, किमङ्गं पन मय्हं उपरि न पतिस्सती’’ति एवं उपसंहरणतो च, ‘‘अयं कायो बहुसाधारणो अज्झत्तिकानंयेव अनेकसतानं रोगानं बाहिरानं अहिविच्छिकादीनञ्‍चा’’ति कायबहुसाधारणतो च, ‘‘अस्सासपस्सासपटिबद्धं जीवित’’न्तिआदिना नयेन आयुदुब्बलतो च,