२. दुतियनयो

१७२.चक्खुविञ्‍ञाणधातुया ये धम्मा… सोतविञ्‍ञाणधातुया ये धम्मा… घानविञ्‍ञाणधातुया ये धम्मा… जिव्हाविञ्‍ञाणधातुया ये धम्मा… कायविञ्‍ञाणधातुया ये धम्मा… मनोधातुया ये धम्मा… मनोविञ्‍ञाणधातुया ये धम्मा खन्धसङ्गहेन सङ्गहिता आयतनसङ्गहेन असङ्गहिता धातुसङ्गहेन असङ्गहिता…पे॰… ते धम्मा चतूहि खन्धेहि एकादसहायतनेहि द्वादसहि धातूहि असङ्गहिता।

१७३.चक्खुन्द्रियेन ये धम्मा… सोतिन्द्रियेन ये धम्मा… घानिन्द्रियेन ये धम्मा… जिव्हिन्द्रियेन ये धम्मा… कायिन्द्रियेन ये धम्मा… इत्थिन्द्रियेन ये धम्मा… पुरिसिन्द्रियेन ये धम्मा खन्धसङ्गहेन सङ्गहिता आयतनसङ्गहेन असङ्गहिता धातुसङ्गहेन असङ्गहिता…पे॰… ते धम्मा चतूहि खन्धेहि द्वीहायतनेहि अट्ठहि धातूहि असङ्गहिता।

१७४.असञ्‍ञाभवेन ये धम्मा… एकवोकारभवेन ये धम्मा खन्धसङ्गहेन सङ्गहिता आयतनसङ्गहेन असङ्गहिता धातुसङ्गहेन असङ्गहिता…पे॰… ते धम्मा चतूहि खन्धेहि तीहायतनेहि नवहि धातूहि असङ्गहिता।

१७५.परिदेवेन ये धम्मा… सनिदस्सनसप्पटिघेहि धम्मेहि ये धम्मा खन्धसङ्गहेन सङ्गहिता आयतनसङ्गहेन असङ्गहिता धातुसङ्गहेन असङ्गहिता…पे॰… ते धम्मा चतूहि खन्धेहि द्वीहायतनेहि अट्ठहि धातूहि असङ्गहिता।

१७६.अनिदस्सनसप्पटिघेहि धम्मेहि ये धम्मा खन्धसङ्गहेन सङ्गहिता आयतनसङ्गहेन असङ्गहिता धातुसङ्गहेन असङ्गहिता…पे॰… ते धम्मा चतूहि खन्धेहि दसहायतनेहि सोळसहि धातूहि असङ्गहिता।

१७७.सनिदस्सनेहि धम्मेहि ये धम्मा खन्धसङ्गहेन सङ्गहिता आयतनसङ्गहेन असङ्गहिता धातुसङ्गहेन असङ्गहिता…पे॰… ते धम्मा चतूहि खन्धेहि द्वीहायतनेहि अट्ठहि धातूहि असङ्गहिता।

१७८.सप्पटिघेहि धम्मेहि ये धम्मा… उपादाधम्मेहि ये धम्मा खन्धसङ्गहेन सङ्गहिता आयतनसङ्गहेन असङ्गहिता धातुसङ्गहेन असङ्गहिता, ते धम्मा कतिहि खन्धेहि कतिहायतनेहि कतिहि धातूहि असङ्गहिता? ते धम्मा चतूहि खन्धेहि एकादसहायतनेहि सत्तरसहि धातूहि असङ्गहिता।

दसायतना सत्तरस धातुयो,

सत्तिन्द्रिया असञ्‍ञाभवो एकवोकारभवो।

परिदेवो सनिदस्सनसप्पटिघं,

अनिदस्सनं पुनदेव [पुनरेव (पी॰)] सप्पटिघं उपादाति॥

सङ्गहितेनअसङ्गहितपदनिद्देसो दुतियो।