पट्ठानपकरण-अनुटीका

पट्ठानपकरण-अनुटीका

गन्थारम्भवण्णना

कामगुणादीहीति कामगुणझानाभिञ्‍ञाचित्तिस्सरियादीहि। लळन्तीति लळितानुभवनवसेन रमन्ति। तेसूति कामगुणादीसु। विहरन्तीति इरियापथपरिवत्तनादिना वत्तन्ति। पच्‍चत्थिकेति बाहिरब्भन्तरभेदे अमित्ते। इस्सरियं तत्थ तत्थ आधिपतेय्यं। ठानं सेट्ठिसेनापतियुवराजादिट्ठानन्तरं। आदि-सद्देन परिवारपरिच्छेदादि सङ्गय्हति। पुञ्‍ञयोगानुभावप्पत्तायाति दानमयादिपुञ्‍ञानुभावाधिगताय समथविपस्सनाभावनासङ्खातयोगानुभावाधिगताय च। जुतियाति सरीरप्पभाय चेव ञाणप्पभाय च। एत्थ च देव-सद्दो यथा कीळाविजिगिसावोहारजुतिगतिअत्थो, एवं सत्तिअभित्थवकमनत्थोपि होति धातुसद्दानं अनेकत्थभावतोति ‘‘यदिच्छितनिप्फादने सक्‍कोन्तीति वा’’तिआदि वुत्तं।

इद्धिविधादितामत्तेन भगवतो अभिञ्‍ञादीनं सावकेहि साधारणतावचनं, सभावतो पन सब्बेपि बुद्धगुणा अनञ्‍ञसाधारणायेवाति दस्सेन्तो ‘‘निरतिसयाय अभिञ्‍ञाकीळाय, उत्तमेहि दिब्बब्रह्मअरियविहारेही’’ति आह। चित्तिस्सरियसत्तधनादीनं दानसङ्खातेन सम्मापटिपत्तिअवेच्‍चप्पसादसक्‍कारानं गहणसङ्खातेनाति योजना। गहणञ्‍चेत्थ तेसु उपलब्भमानसम्मापटिपत्तिअवेच्‍चप्पसादानं तेहि उपनीयमानसक्‍कारस्स च अभिनन्दनं अनुमोदनं सम्पटिच्छनञ्‍च वेदितब्बं। धम्मसभावानुरूपानुसासनीवचनेनेव च पन सिक्खापदपञ्‍ञत्तिपि सङ्गहिताति दट्ठब्बा वीतिक्‍कमधम्मानुरूपा अनुसासनीति कत्वा। ञाणगति ञाणेन गन्तब्बस्स ञेय्यस्स अवबोधो। समन्‍नागतत्ताति इदं ‘‘अभिञ्‍ञाकीळाया’’तिआदीसु पच्‍चेकं योजेतब्बं, तथा सदेवकेन लोकेनाति इदं ‘‘गमनीयतो’’तिआदीसु। ते देवेति सम्मुतिदेवादिके देवे। तेहि गुणेहीति अभिञ्‍ञादिगुणेहि। पूजनीयतरो देवोति इदं पूजनीयपरियायो अयं अति-सद्दोति कत्वा वुत्तं। अतिरेकतरोति अधिकतरो। उपपत्तिदेवानन्ति इदं तब्बहुलताय वुत्तं। विसुद्धिदेवापि हि तत्थ विज्‍जन्तेव, तेसुपि वा लब्भमानं उपपत्तिदेवभावमत्तमेव गहेत्वा तथा वुत्तं। पटिपक्खानं दुस्सील्यमुट्ठस्सच्‍चविक्खेपानं, सीलविपत्तिअभिज्झादोमनस्सअवसिट्ठनीवरणानं वा।

इसीनं सत्तमो, इसीसु सत्तमोति दुविधम्पि अत्थं योजेत्वा दस्सेन्तो ‘‘चतुसच्‍चावबोधगतिया…पे॰… वुत्तो’’ति आह। सपरसन्तानेसु सीलादिगुणानं एसनट्ठेन वा इसयो, बुद्धादयो अरिया। इसि च सो सत्तमो चाति इसिसत्तमोति एवमेत्थ अत्थो दट्ठब्बो। ‘‘नामरूपनिरोध’’न्ति एत्थ यं नामरूपं निरोधेतब्बं, तं दस्सेन्तो ‘‘यतो विञ्‍ञाणं पच्‍चुदावत्तती’’ति आह। वट्टपरियापन्‍नञ्हि नामरूपं निरोधेतब्बं। तस्मिञ्हि निरोधिते सब्बसो नामरूपं निरोधितमेव होति। यथाह ‘‘सोतापत्तिमग्गञाणेन अभिसङ्खारविञ्‍ञाणस्स निरोधेन सत्त भवे ठपेत्वा अनमतग्गे संसारे ये उप्पज्‍जेय्युं नामञ्‍च रूपञ्‍च, एत्थेते निरुज्झन्ति…पे॰… अरहतो अनुपादिसेसाय निब्बानधातुया परिनिब्बायन्तस्स चरिमविञ्‍ञाणस्स निरोधेन पञ्‍ञा च सति च नामञ्‍च रूपञ्‍च, एत्थेते निरुज्झन्ति वूपसमन्ति अत्थं गच्छन्ति पटिप्पस्सम्भन्ती’’ति (चूळनि॰ अजितमाणवपुच्छानिद्देस ६)। अतिगम्भीरनयमण्डितदेसनं सातिसयं पच्‍चयाकारस्स विभावनतो। सभावतो च पच्‍चयाकारो गम्भीरो। यथाह ‘‘अधिगतो खो म्यायं धम्मो गम्भीरो’’तिआदि (दी॰ नि॰ २.६७; म॰ नि॰ १.२८१; २.३३७; सं॰ नि॰ १.१७२; महाव॰ ७, ८), ‘‘गम्भीरो चायं, आनन्द , पटिच्‍चसमुप्पादो गम्भीरावभासो’’ति (दी॰ नि॰ २.९५; सं॰ नि॰ २.६०) च आदि। तस्स चायं अनन्तनयपट्ठानदेसना अतिगम्भीराव।

गन्थारम्भवण्णना निट्ठिता।

पच्‍चयुद्देसवण्णना

समाननेति समाननयने, समाहरणे, समानकरणे वा अट्ठकथाधिप्पायं। तत्थ ‘‘द्वे अनुलोमानि धम्मानुलोमञ्‍च पच्‍चयानुलोमञ्‍चा’’तिआदिना परतो वण्णयिस्सन्ति।

पट्ठाननामत्थोति ‘‘पट्ठान’’न्ति इमस्स नामस्स अत्थो, तं पन यस्मा अवयवद्वारेन समुदाये निरुळ्हं, तस्मा यथा अवयवेसु पतिट्ठितं, तमेव ताव दस्सेतुं ‘‘तिकपट्ठानादीनं तिकपट्ठानादिनामत्थो’’ति वुत्तं। अथ वा अवयवानमेव पट्ठाननामत्थो निद्धारेतब्बो तंसमुदायमत्तत्ता पकरणस्स। न हि समुदायो नाम कोचि अत्थो अत्थीति दस्सेतुं ‘‘पट्ठानं…पे॰… नामत्थो’’ति वुत्तं। तेनेवाह ‘‘इमस्स पकरणस्स…पे॰… समोधानता चेत्थ वत्तब्बा’’ति। वचनसमुदायत्थविजाननेन विदितपट्ठानसामञ्‍ञत्थस्स वित्थारतो पट्ठानकथा वुच्‍चमाना सुखग्गहणा होतीति दस्सेन्तो आह ‘‘एवञ्हि…पे॰… होती’’ति। तत्थाति तासु नामत्थयथावुत्तसमोधानतासु। सब्बसाधारणस्साति सब्बेसं अवयवभूतानं तिकपट्ठानादीनं समुदायस्स च साधारणस्स। अत्थतो आपन्‍नं नानाविधभावन्ति पकारग्गहणेनेव पकारानं अनेकविधता च गहिताव होन्तीति वुत्तं। पकारेहि ठानन्ति हि पट्ठानं, नानाविधो पच्‍चयो, तं एत्थ विभजनवसेन अत्थीति पट्ठानं, पकरणं, तदवयवो च। एतस्मिञ्‍च अत्थनये सद्दतोपि नानाविधभावसिद्धि दस्सिताति वेदितब्बा। तत्थ नानप्पकारा पच्‍चयता, नानप्पकारानं पच्‍चयता च नानप्पकारपच्‍चयताति उभयम्पि सामञ्‍ञनिद्देसेन एकसेसनयेन वा एकज्झं गहितन्ति दस्सेन्तो ‘‘एकस्सपि…पे॰… वेदितब्बा’’ति आह। अनेकधम्मभावतोति अनेके धम्मा एतस्साति अनेकधम्मो, तब्भावतोति योजेतब्बं। नानप्पकारपच्‍चयताति नानप्पकारपच्‍चयभावो, यो अट्ठकथायं ‘‘नानप्पकारपच्‍चयट्ठो’’ति वुत्तो।

कामं धम्मसङ्गहादीसुपि अत्थेव पच्‍चयधम्मविभागो, सो पन तत्थ पच्‍चयभावो न तथा तप्परभावेन विभत्तो यथा पट्ठानेति दस्सेन्तो ‘‘एतेन…पे॰… दस्सेती’’ति आह। सातिसयविभागतं इमस्स पकरणस्स तथा तदवयवानं।

सब्बञ्‍ञुतञ्‍ञाणस्स यथावुत्तगमनं यदधिकरणं, तं दस्सेतुं ‘‘एत्थाति वचनसेसो’’ति। गमनदेसभावतोति पवत्तिट्ठानभावतो। अञ्‍ञेहि गतिमन्तेहीति तीसु कालेसु अप्पटिहतञाणादीहि। तस्स सब्बञ्‍ञुतञ्‍ञाणस्स।

तिविधेन परिच्छेदेन देसितेसु धम्मेसु तिकवोहारोति आह ‘‘तिकानन्ति तिकवसेन वुत्तधम्मान’’न्ति। तीणि परिमाणानि एतेसन्ति हि तिका। समन्ताति समन्ततो सब्बभागतोति वुत्तं होतीति आह ‘‘अनुलोमादीहि सब्बप्पकारेहिपी’’ति। गतानीति पवत्तानि। समन्तचतुवीसतिपट्ठानानीति समन्ततो अनुलोमादिसब्बभागतो समोधानवसेन चतुवीसति पट्ठानानि। अनुलोमादिसब्बकोट्ठासतोति अनुलोमादिचतुकोट्ठासतो। तिकादिछछभावन्ति तिकादिदुकदुकपरियोसानेहि छछभावं। तेनाति यथावुत्तदस्सनेन। धम्मानुलोमादिसब्बकोट्ठासतोति पच्‍चनीकादिदुकादिसहजातवारादिपच्‍चयपच्‍चनीयादिआरम्मणमूलादीनं गहणं दट्ठब्बं। यथावुत्ततो अञ्‍ञस्स पकारस्स असम्भवतो ‘‘अनूनेहि नयेहि पवत्तानीति वुत्तं होती’’ति आह। तानि पन यथावुत्तानि समन्तपट्ठानानि। अयञ्‍च अत्थवण्णना अट्ठकथावचनेन अञ्‍ञदत्थु संसन्दतीति दस्सेन्तो आह ‘‘तेनेवाह…पे॰… वसेना’’ति।

पच्‍चयनिद्देसो

१. हेतुपच्‍चयनिद्देसवण्णना

१.हेतुपच्‍चयेन पच्‍चयभावो हेतुपच्‍चयोति उद्दिट्ठो, न हेतुपच्‍चयधम्मोति अत्थो। सोति हेतुभावेन पच्‍चयो। एत्थ च पठमविकप्पे यो हेतुपच्‍चयेन पच्‍चयभावो वुत्तो, यो च दुतियविकप्पे हेतुभावेन पच्‍चयो वुत्तो, सो यस्मा अत्थतो यथावुत्तस्स पच्‍चयधम्मस्स यथावुत्तानं पच्‍चयुप्पन्‍नानं हेतुपच्‍चयभावोयेव, तस्मा वुत्तं ‘‘उभयथापि हेतुभावेन उपकारकता हेतुपच्‍चयोति उद्दिट्ठोति दस्सितं होती’’ति। यथा चेत्थ, एवं ‘‘आरम्मणपच्‍चयेन पच्‍चयभावो, आरम्मणभावेन वा पच्‍चयो आरम्मणपच्‍चयो’’तिआदिना आरम्मणपच्‍चयादीसु अत्थो नेतब्बोति दस्सेन्तो ‘‘एस नयो सेसपच्‍चयेसुपी’’ति आह। धम्मसभावो एव, न धम्मतो अञ्‍ञा धम्मसत्ति नाम अत्थीति। उपकारकं धम्मन्ति पच्‍चयधम्मं आह। उपकारकतन्ति पच्‍चयतं।

पच्‍चत्तनिद्दिट्ठोति पच्‍चत्तवसेन निद्दिट्ठो, पठमाय विभत्तिया निद्दिट्ठोति अत्थो। तेनाति पच्‍चयधम्मनिद्देसभूतेन पच्‍चत्तनिद्दिट्ठेन पठमेन हेतुसद्देन। एतस्साति हेतुसद्दाभिधेय्यमत्थमाह। सो हि छब्बिधो नवविधो द्वादसविधोति अनेकभेदेन भिन्‍नोपि हेतुभावसामञ्‍ञेन एकज्झं कत्वा एकवचनेन वुत्तो। दुतियो हेतुसद्दोति आनेत्वा योजना। हेतुना सम्पयुत्तानन्ति अधिकतत्ता वुत्तं ‘‘हेतु सम्पयुत्तानं पच्‍चयो होन्तो हेतुना सम्पयुत्तानमेव पच्‍चयो होति, न विप्पयुत्तान’’न्ति एवं पदमेतं। न हि सब्बेन सब्बं हेतुविप्पयुत्तधम्मानं हेतुपच्‍चयो न होतीति। सम्पयुत्तसद्दस्स सम्बन्धीसद्दत्ता ‘‘सम्पयुत्तसद्दस्स सापेक्खत्ता’’ति वुत्तं। सम्पयुत्तोति हि वुत्ते केन सम्पयुत्तोति एकन्ततो सम्बन्धिअन्तरं अपेक्खितब्बं। तेनाह ‘‘अञ्‍ञस्स…पे॰… विञ्‍ञायती’’ति। नायं एकन्तोति य्वायं ‘‘दुतिये हेतुसद्दे अविज्‍जमाने’’तिआदिना वुत्तो अत्थो, अयमेकन्तो न होति, अञ्‍ञापेक्खोपि सद्दो अञ्‍ञस्स विसेसनं होतीति इदं न सब्बत्थेव सम्भवतीति अत्थो। ‘‘पच्‍चत्तनिद्दिट्ठो’’ति इमिना पठमस्स हेतुसद्दस्स सम्पयुत्तसद्दानपेक्खतं आह। तेन वुत्तं ‘‘हेहुपच्‍चयेन पच्‍चयोति एत्थेव ब्यावटो’’ति। अविसिट्ठाति न विसेसिता। एवन्ति यथा हेतुसद्देन अञ्‍ञत्थ ब्यावटेन सम्पयुत्ता न विसेसियन्ति किच्‍चन्तरपसुतत्ता, एवं सम्पयुत्तसद्देन हेतुसद्दविसेसनरहितेन तदत्थमत्तब्यावटत्ता अविसेसतो सम्पयुत्तानं गहणं सिया। तेन वुत्तं ‘‘सम्पयुत्तसद्देना’’तिआदि। आहारिन्द्रियासम्पयुत्तस्स अभावतोति आहारेहि इन्द्रियेहि च नसम्पयुत्तस्स धम्मस्स अभावतो। न हि फस्सचेतनाविञ्‍ञाणवेदनाजीवितविरहितो चित्तुप्पादो अत्थि। तेनाह ‘‘वज्‍जेतब्बा…पे॰… तं न कत’’न्ति। वज्‍जेतब्बं हेतुविप्पयुत्तं।

एवम्पीति दुतियेन हेतुसद्देन गय्हमानेपि नापज्‍जति। यदिपि हेतवो बहवो, सामञ्‍ञनिद्देसो चायं, तथापि सामञ्‍ञजोतनाय विसेसनिद्दिट्ठत्ताति अधिप्पायो। तेन वुत्तं ‘‘पच्‍चत्त…पे॰… वुत्तत्ता’’ति। विनापि दुतियेन हेतुसद्देन हेतुसम्पयुत्तभावे सिद्धेपीति इमिना यं वुत्तं ‘‘नायमेकन्तो’’ति, तमेव उल्‍लिङ्गेति। न पन हेतूनन्ति इदं हेतुस्स पच्‍चयभावेन गहितत्ता पच्‍चयुप्पन्‍नभावेन गहणं न युज्‍जेय्याति आसङ्कमानं सन्धाय वुत्तं। तेनेवाह ‘‘एवम्पि गहणं सिया’’ति। सोति दुतियो हेतुसद्दो। अपरे पन ‘‘हेतुसम्पयुत्तकान’’न्ति एत्थ हेतूनञ्‍च सम्पयुत्तकानञ्‍चाति समासं विकप्पेन्ति। पतिट्ठामत्तादिभावेन निरपेक्खाति हेतुझानमग्गधम्मा पतिट्ठानउपनिज्झाननिय्यानमत्तेन अञ्‍ञधम्मनिरपेक्खा हेतुझानमग्गपच्‍चयकिच्‍चं करोन्ति। सापेक्खा एवाति अञ्‍ञसापेक्खा एव। आहरितब्बइसितब्बा आहारिन्द्रियपच्‍चयेहि उपकत्तब्बधम्मा। तस्माति यस्मा येहि सापेक्खा, ते अत्तनो पच्‍चयुप्पन्‍नधम्मे पच्‍चयभावेनेव परिच्छिन्दित्वा तिट्ठन्ति, तस्मा। तेनाह ‘‘ते विनापि…पे॰… न कत’’न्ति। परिच्छिन्दन्ति विसेसेन्ति। तन्ति दुतियं आहारिन्द्रियग्गहणं। तत्थाति आहारिन्द्रियपच्‍चयनिद्देसे। न केवलञ्‍च तत्थेव, इध च हेतुपच्‍चयनिद्देसे दुतियेन हेतुग्गहणेन पच्‍चयुप्पन्‍नानं पुन विसेसनकिच्‍चं नत्थि, कस्मा? पच्‍चयभूतेनेव हेतुना सम्पयुत्तानं अञ्‍ञेसञ्‍च हेतूनं अविच्छिन्‍नत्ता।

२. आरम्मणपच्‍चयनिद्देसवण्णना

२.उप्पज्‍जनक्खणेयेवाति एत्थ उप्पादतो पट्ठाय याव भङ्गा उद्धं पज्‍जनं गमनं पवत्तनं उप्पज्‍जनं, तस्स खणो, तस्मिं उप्पज्‍जनक्खणेति एवं वा अत्थो दट्ठब्बो। एवञ्हि सति उप्पज्‍जनसद्देन उप्पन्‍नसद्देन विय सब्बे पवत्तमानभावा सङ्गहिता होन्ति, न उप्पादमत्तं। तेनाति चक्खुविञ्‍ञाणादीनं वत्तमानक्खणेयेव रूपादीनं आरम्मणपच्‍चयत्तेन। अनालम्बियमानानन्ति सब्बेन सब्बं नालम्बियमानानन्ति अत्थो। अञ्‍ञथा हि यथावुत्तानं रूपादीनं यदा आरम्मणपच्‍चयत्ताभावो, तदा अनालम्बियमानतावाति। सब्बरूपानीति सब्बानि रूपायतनानि, यत्तकानि तानि आपाथगतानि योग्यदेसे ठितानि, तानि सब्बानीति अत्थो। सह न होन्तीति एकज्झं आरम्मणं न होन्ति। सतिपि हि अनेकेसं एकज्झं आपाथगमने यत्थ यत्थ पुब्बाभोगो, तं तंयेव आरम्मणं होति, न सब्बं। नीलादिसङ्घातवसेन चेतं वुत्तं, न पच्‍चेकं नीलादिरूपायतनमत्तवसेन। समुदितानियेव हि रूपायतनानि चक्खुविञ्‍ञाणस्स आरम्मणं, न विसुं विसुन्ति धातुविभङ्गवण्णनायं दस्सितोयं नयो। यं पन अट्ठकथायं ‘‘ते ते विसुं विसुं आरम्मणपच्‍चयो होन्ती’’तिपि वुत्तं, तम्पि यथावुत्तमेवत्थं सन्धाय वुत्तं। अञ्‍ञथा रूपायतनं मनिन्द्रियगोचरं नाम न सिया। सद्दादीसुपि एसेव नयो। तेनेवाह ‘‘तथा सद्दादयोपी’’ति। ‘‘सह न होन्ती’’ति वुत्तमत्थं पाळिया विभावेतुं ‘‘यं यन्ति हि वचनं रूपादीनि भिन्दती’’ति आह।

‘‘ये एते’’तिआदिको पुरिमो अत्थो, ‘‘न एकतो होन्ती’’तिआदिको पन पच्छिमो, ‘‘सब्बारम्मणतादिवसेन वा इधापि अत्थो गहेतब्बो’’ति कस्मा वुत्तं। न हि ‘‘यं यं वा पनारब्भा’’ति इमिस्सा पाळिया विय ‘‘यं यं धम्मं आरब्भा’’ति इमस्स पाठस्स पुरतो मनोविञ्‍ञाणस्स सब्बारम्मणता नागता। वुत्तञ्हि ‘‘सब्बे धम्मा मनोविञ्‍ञाणधातुया तंसम्पयुत्तकानञ्‍च धम्मानं आरम्मणपच्‍चयेन पच्‍चयो’’ति। न हि अनन्तरमेव पाळियं सरूपतो आगतमत्थं गहेत्वा पदन्तरं संवण्णेतब्बं। तत्थ हि ‘‘रूपारम्मणं वा’’तिआदिना नियमवसेन छ आरम्मणानि वत्वा ‘‘यं यं वा पनारब्भा’’ति वचनं सब्बारम्मणतादिदस्सनन्ति युत्तमेवेतन्ति, इध पन सब्बारम्मणतं वत्वा पुन ‘‘यं यं धम्मं आरब्भा’’ति वुच्‍चमानं सब्बारम्मणतादस्सनन्ति कथमिदं युज्‍जेय्य? कमाभावोपि ‘‘सब्बे धम्मा’’ति अविसेसवचनेनेव सिद्धो आरम्मणानुपुब्बियाव अग्गहितत्ता। न हि मनोधातुया विय मनोविञ्‍ञाणधातुया इध आरम्मणानि अनुपुब्बतो गहितानि, तत्थ विय वा एतेनेव नियमाभावोपि संवण्णितोति वेदितब्बो। तस्मा अट्ठकथायं वुत्तनयेनेवेत्थ अत्थो गहेतब्बो।

पवत्तन्ति पवत्तनं। नदिया सन्दनं पब्बतस्स ठानन्ति हि वुत्ता अविरतमविच्छेदनायं तथापवत्तिकिरियाव। तेनाह ‘‘अविरतं अविच्छिन्‍नं सन्दन्ती’’ति। एवन्ति यथा ‘‘सन्दन्ती’’ति वत्तमानवचनं वुत्तं, एवं ‘‘ये ये धम्मा उप्पज्‍जन्ती’’ति सब्बसङ्गहवसेन उप्पज्‍जनस्स गहितत्ता आरम्मणपवग्गतो ‘‘उप्पज्‍जन्ती’’ति वत्तमानवचनं वुत्तन्ति अत्थो। तेनाह अट्ठकथायं ‘‘सब्बकालसङ्गहवसेना’’तिआदि। तथा च वुत्तं ‘‘अतीतानागत…पे॰… अधिप्पायो’’ति, अतीतानागतपच्‍चुप्पन्‍नानं चित्तचेतसिकानन्ति अत्थो। समुदायवसेनाति चित्तेन रासीकरणवसेन। अधिप्पायोति इमिना वत्तमानुपचारेन विनाव ‘‘ये ये धम्मा उप्पज्‍जन्ती’’ति एत्थ वत्तमानत्थं सक्‍का योजेतुन्ति इममत्थं उल्‍लिङ्गेति। तेनाह ‘‘इमे पना’’तिआदि। यदिपि पच्‍चयधम्मा केचि अतीता अनागतापि होन्ति, पच्‍चयुप्पन्‍नधम्मो पन पच्‍चुप्पन्‍नो एवाति आह ‘‘अतीतानागतानं न होन्ती’’ति। उप्पादे वा हि पच्‍चयुप्पन्‍नस्स पच्‍चयेन भवितब्बं ठितियं वाति। तस्माति यस्मा अतीतानागता परमत्थतो नत्थि, तस्मा। तेसूति पच्‍चयुप्पन्‍नेसु। तंतंपच्‍चयाति तं तं रूपादिआरम्मणं पच्‍चयो एतेसन्ति तंतंपच्‍चया। अयमत्थो दस्सितो होति समानसभावत्ता। न हि अत्थाभेदेन सभावभेदो अत्थि। न पन तंतंपच्‍चयवन्तता दस्सिता होति अतीतानागतेसु निप्परियायेन तदभावतो। यस्मा पच्‍चयवन्तो पच्‍चयुप्पन्‍नायेव, ते च पच्‍चुप्पन्‍नायेवाति।

३. अधिपतिपच्‍चयनिद्देसवण्णना

३.धुरसहचरियतो धोरेय्यो ‘‘धुर’’न्ति वुत्तोति आह ‘‘धुरन्ति धुरग्गाह’’न्ति। छन्दस्स पुब्बङ्गमतासिद्धं पासंसभावं उपादाय अट्ठकथायं ‘‘जेट्ठक’’न्ति वुत्तन्ति तमेवत्थं दीपेन्तो ‘‘सेट्ठ’’न्ति आह। तथा हि वुत्तं अट्ठसालिनियं ‘‘छन्दं पुब्बङ्गमं कत्वा आयूहित’’न्ति। पुरिमछन्दस्साति ‘‘छन्दाधिपती’’ति पुरिमस्मिं पदे निद्देसवसेन वुत्तस्स छन्दसद्दस्स समानरूपेन सदिसाकारेन। तदनन्तरं निद्दिट्ठेनाति तस्स पुरिमस्स छन्दसद्दस्स अनन्तरं निद्देसवसेन वुत्तेन। ततो एव च तंसमानत्थताय च तंसम्बन्धेन ‘‘छन्दसम्पयुत्तकान’’न्ति एत्थ छन्दसद्देनेव अधिपतिसद्दरहितेनाति अत्थो। पच्‍चयभूतस्साति अधिपतिपच्‍चयभूतस्स। सम्पयुत्तकविसेसनभावोति अत्तना सम्पयुत्तधम्मानं सो एव अधिपतिपच्‍चयतासङ्खातो विसेसनभावो। एस नयोति इमिना ‘‘वीरियाधिपति वीरियसम्पयुत्तकानन्तिआदीसु पुरिमवीरियस्स समानरूपेना’’तिआदिना वत्तब्बं अत्थवचनं अतिदिसति।

कुसलाब्याकतानं पवत्तिन्ति कुसलाब्याकतानं अधिपतीनं पवत्तनाकारं। अलद्धं आरम्मणं लद्धब्बं लब्भनीयं, लद्धुं वा सक्‍कुणेय्यं, दुतिये पन अत्थे लाभमरहतीति लद्धब्बं। अवञ्‍ञातन्ति पगेव अनवञ्‍ञातन्ति अत्थो।

अप्पनाप्पत्ता कुसलकिरियधम्मा महाबला साधिपतिका एव होन्ति, तथा मिच्छत्तनियतापीति आह ‘‘अप्पनासदिसा…पे॰… नुप्पज्‍जन्ती’’ति। अप्पनासदिसाति अप्पनाप्पत्तसदिसा। कम्मकिलेसावरणभूता च तेति ते मिच्छत्तनियतधम्मा कम्मावरणभूता, ये आनन्तरियप्पकारा किलेसावरणभूता, ये नियतमिच्छादिट्ठिधम्मा, सम्पयुत्तचेतनाय पनेत्थ किलेसावरणपक्खिकता दट्ठब्बा आनन्तरियचेतनासम्पयुत्तस्स पटिघस्स कम्मावरणपक्खिकता विय। पच्‍चक्खगति अनन्तरताय विना भाविनीति वुत्तं ‘‘पच्‍चक्खसग्गानं कामावचरदेवानम्पी’’ति। तेन तेसु आनन्तरिया विय असम्भाविनो अहेतुकाभिनिवेसादयोपीति दस्सेति।

तिविधोपि किरियारम्मणाधिपतीति एत्थ अयं किरियारम्मणाधिपतीति अज्झत्तारम्मणो अधिप्पेतो, उदाहु बहिद्धारम्मणोति उभयथापि न सम्भवो एवाति दस्सेन्तो ‘‘कामावचरादिभेदतो पना’’तिआदिमाह। तत्थ परसन्तानगतानं सारम्मणधम्मानं अधिपतिपच्‍चयता नत्थीति सम्बन्धो। अभावतोति अवचनतो। अवचनञ्हि नाम यथाधम्मसासने अभिधम्मे अभावो एवाति एतेनेव अनुद्धटतापि अवुत्ततो वेदितब्बा। अज्झत्तारम्मणबहिद्धारम्मणद्वयविनिमुत्तस्स सारम्मणधम्मस्स अभावतो नत्थीति विञ्‍ञायतीति वत्तब्बे तमेव विञ्‍ञायमानतं सम्भावेन्तो ‘‘नत्थीति विञ्‍ञायमानेपी’’ति आह। तेन वुत्तं ‘‘बहिद्धा खन्धे’’तिआदि। रूपे एव भवितुं अरहति एदिसेसु ठानेसु अरूपे असम्भवतोति अधिप्पायो। असम्भवतो च यथावुत्तपाळिअनुसारतोति वेदितब्बन्ति। ‘‘विचारित’’न्ति कस्मा वुत्तं, ननु ‘‘अतीतारम्मणे अनागते खन्धे गरुं कत्वा अस्सादेती’’तिआदिवचनतो अरूपेपि एदिसेसु ठानेसु खन्धसद्दो पवत्ततेव। आवज्‍जनकिरियसब्भावतो पनाति इदं यथादस्सितपाळिया विरोधपरिहरणाधिप्पायेन वुत्तं, अवचनं पन कत्थचि विनेय्यज्झासयेन, कत्थचि नयदस्सनेन होतीति कुतो विरोधावसरो।

४. अनन्तरपच्‍चयनिद्देसवण्णना

४.यथावुत्ता निरोधानन्तरसुञ्‍ञता निरोधप्पत्तता ओकासदानविसेसो, अत्तनो अनुरूपचित्तुप्पादनसमत्थता चित्तनियमहेतुता, तत्थ अनन्तरुप्पादनसमत्थता च सण्ठानाभावतो सुट्ठुतरं निरन्तरुप्पादनसमत्थता च चित्तनियमहेतुविसेसो दट्ठब्बो। धातुवसेनाति विञ्‍ञाणधातुमनोधातुमनोविञ्‍ञाणधातुवसेन। एत्तका एव हि धातुयो भिन्‍नसभावा अनन्तरपच्‍चयताय नियमेत्वा वत्तब्बा, अभिन्‍नसभावा पन विसेसाभावतो पुरिमतामत्तंयेव विसेसं पुरक्खत्वा वत्तब्बाति ता कुसलादिभेदेन तथा वुत्ता। तेनाह ‘‘कुसलादिवसेन चा’’ति। या पन मनोधातुमनोविञ्‍ञाणधातुवसेन अनन्तरपच्‍चयता वत्तब्बा, तत्थ मनोविञ्‍ञाणधातु मनोधातुया अनन्तरपच्‍चयेन पच्‍चयोति वुच्‍चमानो सम्मोहो सिया, पुरे मनोधातुया अनन्तरपच्‍चयभावेन वुत्ता, इदानि मनोविञ्‍ञाणधातु मनोधातुयाति पच्‍चयपच्‍चयुप्पन्‍नविसेसा न विञ्‍ञायेय्य, मनोधातुया पन चक्खुविञ्‍ञाणादिधातूनं अनन्तरपच्‍चयभावे वुच्‍चमाने नियमो नत्थि। तेनाह ‘‘मनोधातु चक्खुविञ्‍ञाणधातुयाति चा’’ति । तथेवाति नियमाभावतो एवाति अत्थो। तस्माति यस्मा इतो अञ्‍ञथा देसनाय पच्‍चयपच्‍चयुप्पन्‍नानं विसेसाभावो चित्तविसेसदस्सनविच्छेदो नियमाभावो चाति इमे दोसा आपज्‍जन्ति, तस्मा। निदस्सनेनाति धातुवसेन निदस्सनेन। नयं दस्सेत्वाति ‘‘मनोविञ्‍ञाणधातु तंसम्पयुत्तका च धम्मा मनोधातुया तंसम्पयुत्तकानञ्‍च धम्मानं अनन्तरपच्‍चयेन पच्‍चयो’’ति एवमादिकस्स अनन्तरपच्‍चयताग्गहणस्स नयं दस्सेत्वा। निरवसेसदस्सनत्थन्ति निरवसेसस्स अनन्तरपच्‍चयभाविनो चित्तुप्पादस्स दस्सनत्थं।

सदिसकुसलानन्ति समानकुसलानं, समानता चेत्थ एकवीथिपरियापन्‍नताय वेदितब्बा। तेनेवाह ‘‘भूमिभिन्‍नानम्पि पच्‍चयभावो वुत्तो होती’’ति। समानवीथिता च यस्मा समानवेदना समानहेतुका च होन्ति, तस्मा ‘‘वेदनाय वा हेतूहि वा सदिसकुसलान’’न्ति आह। वा-सद्दो चेत्थ अनियमत्थो। तेन ञाणसङ्खारादिभेदस्सपि विकप्पनवसेन सङ्गहो दट्ठब्बो। चुतिपि गहिता तंसभावत्ता। भवङ्गचित्तमेव हि परियोसाने ‘‘चुती’’ति वुच्‍चति। कुसलाकुसलानन्तरञ्‍च कदाचि सा उप्पज्‍जतीति तदारम्मणम्पि गहितन्ति दट्ठब्बं, किरियजवनानन्तरं तदारम्मणुप्पत्तियन्ति अधिप्पायो।

कामावचरकिरियाय आवज्‍जनस्साति अयमेत्थ अत्थो अधिप्पेतोति दस्सेन्तो ‘‘आवज्‍जनग्गहणेन कामावचरकिरियं विसेसेती’’ति आह। तमेव हि अत्थं पाकटतरं कातुं ‘‘कामावचरविपाको’’तिआदि वुत्तं। वोट्ठब्बनम्पि गहितं सन्तीरणानन्तरत्ताति अधिप्पायो।

अनन्तरपच्‍चयनिद्देसवण्णना निट्ठिता।

६. सहजातपच्‍चयनिद्देसवण्णना

६.पोराणपाठोति पुरातनो अट्ठकथापाठो। इमस्साति इमस्स पदस्स। अवुत्तस्साति पाळियं अवुत्तस्स। यदिपि सहगतसद्दस्स अत्थसंवण्णनायं संसट्ठसद्दस्स विय समानत्थस्सपि कत्थचि सद्दन्तरस्स अत्थो वुच्‍चति परियायविसेसबोधनत्थं, तथापि न मूलसद्दस्स अत्थो विभावितो होतीति दस्सेन्तो आह ‘‘न च…पे॰… होती’’ति। ‘‘अञ्‍ञमञ्‍ञ’’न्ति च ‘‘अञ्‍ञअञ्‍ञ’’न्ति वत्तब्बे म-कारागमं कत्वा निद्देसो, कम्मब्यतिहारे चेतं पदं, तस्मा इतरेतरन्ति वुत्तं होति। पच्‍चयपच्‍चयुप्पन्‍नानं एकस्मिंयेव खणे पच्‍चयुप्पन्‍नपच्‍चयभावस्स इच्छितत्ता यो हि यस्स पच्‍चयो यस्मिं खणे, तस्मिंयेव खणे सोपि तस्स पच्‍चयोति अयमेत्थ अञ्‍ञमञ्‍ञपच्‍चयता। तथा हि अट्ठकथायं ‘‘अञ्‍ञो अञ्‍ञस्सा’’ति वत्वा ‘‘इमिना…पे॰… दीपेती’’ति वुत्तं। ओक्‍कमनं पविसनन्ति अत्थो। आसनक्खणे हि धम्मा पुरिमभवतो इमं भवं पविसन्ता विय होन्ति। तेन वुत्तं ‘‘परलोकतो इमं लोकं आगन्त्वा पविसन्तं विय उप्पज्‍जती’’ति। तस्मा अविसेसेन पटिसन्धि ओक्‍कन्तिसद्दाभिधेय्याति अधिप्पायेन वुत्तं ‘‘ओक्‍कन्ति…पे॰… अधिप्पायेनाहा’’ति। तंनिवारणत्थन्ति तस्स खणन्तरे रूपीनं सहजातपच्‍चयभावस्स ‘‘कञ्‍चि काले न सहजातपच्‍चयेन पच्‍चयो’’ति निवारणत्थं। तेन पदद्वयेन समानेसु पच्‍चयपच्‍चयुप्पन्‍नधम्मेसु पुरिमतो पच्छिमस्स विसेसमत्थं दस्सेति।

एवञ्‍च ‘‘कञ्‍चि काले’’ति पदस्स ‘‘केचि कालेति वा, किस्मिञ्‍चि काले’’ति वा विभत्तिविपल्‍लासेन अत्थो गहेतब्बोति अधिप्पायेन पठमविकप्पं दस्सेत्वा इदानि पकारन्तरेन दस्सेतुं ‘‘कञ्‍चि कालेति केचिकिस्मिञ्‍चि कालेति वा अत्थो’’ति आह। तेन ‘‘कञ्‍ची’’ति अयं सामञ्‍ञनिद्देसोति दस्सेति। यो हि अयं ‘‘केची’’ति पच्‍चत्तबहुवचनाभिधेय्यो अत्थो, यो च ‘‘किस्मिञ्‍ची’’ति भुम्मेकवचनाभिधेय्यो, तदुभयं सति कालवन्तकालताविभागे किं-सद्दस्स वचनीयतासामञ्‍ञेन पन एकज्झं कत्वा ‘‘कञ्‍ची’’ति पाळियं वुत्तन्ति तं विभजित्वा दस्सेतुं ‘‘केचि किस्मिञ्‍ची’’ति वुत्तं। अट्ठकथायं पन ‘‘किस्मिञ्‍ची’’ति भुम्मवसेनेव वुत्तं। तेन यथावुत्तअत्थविभागेन पदेन। वत्थुभूताति वत्थुसभावा। हदयरूपमेव सन्धाय वदति। रूपन्तरानन्ति हदयवत्थुतो अञ्‍ञरूपानं। अरूपीनं सहजातपच्‍चयतं पुब्बे ‘‘ओक्‍कन्तिक्खणे नामरूप’’न्ति एत्थ अनिवारितं निवारेतीति योजना, तथा वत्थुस्स च कालन्तरे पटिसन्धिकालतो अञ्‍ञस्मिं काले अरूपीनं निवारेतीति। एवञ्‍च कत्वातिआदिना यथावुत्तअत्थवण्णनाय पाळियं विभत्तिनिद्देसस्स रूपकभावमाह। पुनपि पुरिमतो पच्छिमस्स उपचयेन विसेसं दस्सेतुं ‘‘पुरिमेन चा’’तिआदि वुत्तं। तत्थ पुरिमेनाति ‘‘ओक्‍कन्तिक्खणे नामरूप’’न्ति इमिना पच्‍चयनिद्देसवचनेन। ‘‘एको खन्धो वत्थु च तिण्णं खन्धान’’न्तिआदिना पटिच्‍चवारादिपाठेन। अत्थविवरणञ्हि पच्‍चयनिद्देसपाळिया सब्बेपि सत्त महावारा। वत्थुस्स वत्तब्बत्ते आपन्‍ने किन्ति पच्‍चयोति तस्स नामस्साति योजना। एतेनाति ‘‘रूपिनो धम्मा अरूपीनं धम्मान’’न्ति एतेन वचनेन। केवलस्साति नामरहितस्स वत्थुस्स। तथाति नामस्स पच्‍चयभावेन।

कत्थचीति ‘‘रूपिनो धम्मा अरूपीनं धम्मानं कञ्‍चि कालं सहजातपच्‍चयेन पच्‍चयो’’ति एतस्मिं निद्देसे। एत्थ हि अञ्‍ञमञ्‍ञसहजातपच्‍चयभावो लब्भति। वचनेनाति ‘‘अञ्‍ञमञ्‍ञ’’न्ति इमिना वचनेन पाळियं सहजातपच्‍चयभावस्स असङ्गहितत्ता, अत्थतो पन लब्भतेवाति। तेनाह ‘‘लब्भमानेपी’’ति। तस्साति अञ्‍ञमञ्‍ञपच्‍चयत्तस्स। एवन्ति ‘‘न अञ्‍ञमञ्‍ञवसेना’’ति इमिना पकारेन। समुदायेकदेसवसेन सामिवचनन्ति अवयवावयविसम्बन्धे अवयविनि सामिवचनन्ति अत्थो, निद्धारणे वा ‘‘कण्हा गावीन’’न्तिआदीसु विय।

८. निस्सयपच्‍चयनिद्देसवण्णना

८.किस्मिञ्‍चिकालेति इदं न लब्भति सब्बदापि निस्सयपच्‍चयताय लब्भमानत्ता। सहजं पुरेजन्ति हि विभागं अनामसित्वा निस्सयतामत्तमेव निस्सयपच्‍चयता। वत्थुरूपं पञ्‍चवोकारभवेति वत्थुरूपं पञ्‍चवोकारभवे चाति च-सद्दो लुत्तनिद्दिट्ठो दट्ठब्बो। तस्साति आरुप्पविपाकट्ठपनस्स। पकासेतब्बत्ताति इमिना अपाकटं पाकटं कत्वा वचनेन चोदना अनोकासाति दस्सेति।

निस्सयपच्‍चयनिद्देसवण्णना निट्ठिता।

९. उपनिस्सयपच्‍चयनिद्देसवण्णना

९.उपनिस्सये तयोति अनन्तरारम्मणपकतूपनिस्सयप्पभेदे तयो उपनिस्सये। अनेकसङ्गाहकतायाति अनेकेसं पच्‍चयधम्मानं सङ्गहणतो। एकन्तेनेव होन्ति चित्तनियमहेतुभावेन पवत्तिनियमतो। येसु पदेसूति येसु कुसलादिपदेसु। सङ्गहितोति सङ्गहं गतो, कुसलादिपदेसु येसं पदानंयेव अनन्तरूपनिस्सयो लब्भतीति अत्थो। तेसु ‘‘केसञ्‍ची’’ति न वुत्तं। कस्मा? न सक्‍का वत्तुं एकन्तेनेव उपलब्भनतो। तेसूति कुसलाकुसलपदेसु। न हि कुसलो अकुसलस्स अनन्तरूपनिस्सयो होति, अकुसलो वा कुसलस्स, आरम्मणपकतूपनिस्सया पन अनेकन्तिका, तस्मा तत्थ ‘‘केसञ्‍ची’’ति वुत्तं। सिद्धानं पच्‍चयधम्मानन्ति पच्‍चयभावेन पुरिमनिप्फन्‍नानं कुसलादीनं कुसलस्स अकुसलस्स वाति अत्थो। अकुसलादीहीति यथासङ्ख्यं अकुसलेन कुसलेन वा। अविसेसेनाति यथावुत्तविसेसे नियमं अग्गहेत्वा अकुसलादीसु अकुसलकुसलानं ‘‘केसञ्‍ची’’तिआदिना।

अनारम्मणत्ता आरम्मणूपनिस्सयं पुब्बापरनियमेन अप्पवत्तितो अनन्तरूपनिस्सयं न लभतीति योजना। पकतस्साति निप्फादितस्स, उपसेवितस्स वा। न हि रूपसन्तानस्स सद्धादिनिप्फादनं अत्थि, उतुभोजनादिउपसेवनं वा सम्भवति। तेनाह ‘‘यथा हि…पे॰… रूपसन्तानेना’’ति। ननु च रूपसन्ताने पुब्बेनापरं विसेसो लब्भति , सो च न विना समानजातियेन कारणेनाति स्वायं पकतूपनिस्सयलाभोति कदाचि आसङ्केय्याति आह ‘‘यस्मिञ्‍चा’’तिआदि। तत्थ तन्ति उतुबीजादिकं कम्मादि च तेन रूपेन पुरिमनिप्फन्‍नेन। उप्पादनं साभिसन्धिकं दट्ठब्बं। अधिपतीसु पुब्बाभिसङ्खारो विय पकप्पनं संविदहनं। पकरणं वुत्तलक्खणेन कारणभावेन अवट्ठानं, यतो कारणविसेसो ‘‘पकती’’ति वुच्‍चति। यदि एवं कस्मा रूपस्सेव तं पटिक्खिपीयतीति आह ‘‘यथा च…पे॰… दट्ठब्बा’’ति। एवम्पि उतुबीजादीनं अङ्कुरादीसु कथं पच्‍चयविसेसभावोति आह ‘‘उतुबीजादयो पन…पे॰… भावतो’’ति। उपनिस्सयोति च यस्मा बलवताकारणं अधिप्पेतं, तस्मा न एत्थ एकन्तेन पुरिमनिप्फत्ति इच्छितब्बा। यदि एवं पाळियं कथं पुरिमग्गहणन्ति आह ‘‘पुरिमपुरिमानंयेव पना’’तिआदि। तेपि वा परिकप्पनवसेन पुरिमनिप्फन्‍नायेव नाम होन्ति। न हि असंविदिताकारे वत्थुस्मिं पत्थनापवत्तीति। तेनाह ‘‘तंसमानलक्खणताया’’ति।

धम्मेति पुग्गलसेनासनपञ्‍ञत्तीनं उपादानभूते धम्मे। अयं नयोति पञ्‍ञत्तिमुखेन पञ्‍ञपेतब्बा तदुपादानभूता धम्मा गय्हन्तीति यथावुत्तो नयो। एत्थेवाति ‘‘सेनासनम्पि उपनिस्सयपच्‍चयेन पच्‍चयो’’ति एतस्मिंयेव वचने। कथं पच्‍चुप्पन्‍नस्स पकतूपनिस्सयभावोति चोदनाय ‘‘वक्खती’’तिआदिना आगमं दस्सेत्वा युत्तिं दस्सेतुं ‘‘पच्‍चुप्पन्‍नानम्पिच तादिसानं पुब्बेपकतत्ता’’ति वुत्तं। तादिसानन्ति यादिसा उतुआदयो पच्‍चुपट्ठिता, तादिसानं ततो पुब्बे पुरेतरं पकतत्ता पकतूपनिस्सययोग्यताय आपादितत्ता।

कसिणादीनम्पि आरम्मणूपनिस्सयता सम्भवतीति कत्वा वुत्तं ‘‘इमिना अधिप्पायेन ‘एकच्‍चाया’ति आहा’’ति। तथा हि ‘‘कसिणमण्डलं दिस्वा’’तिआदिना तस्स उपनिस्सयभावो अट्ठकथायं वुत्तो।

१०. पुरेजातपच्‍चयनिद्देसवण्णना

१०.दस्सितमेव नयदस्सनवसेनाति योजना। यदि दस्सितमेव, कस्मा वुत्तं ‘‘सावसेसवसेन देसना कता’’ति आह ‘‘सरूपेन अदस्सितत्ता’’ति। ‘‘यं यं धम्मं पुरेजातं आरब्भ ये ये धम्मा उप्पज्‍जन्ति चित्तचेतसिका धम्मा, ते ते धम्मा तेसं तेसं धम्मानं पुरेजातपच्‍चयेन पच्‍चयो’’ति एवं सरूपेन पाळियं अदस्सितत्ता। इद्धिविधाभिञ्‍ञाय चाति च-सद्देन चुतूपपातञाणस्सपि सङ्गहो दट्ठब्बो। तस्सपि हि रूपधम्मारम्मणकाले अट्ठारससु यं किञ्‍चि आरम्मणपुरेजातं होति पच्‍चुप्पन्‍नारम्मणत्ता। ‘‘चवमाने उपपज्‍जमाने’’ति हि वुत्तं। दिब्बचक्खुदिब्बसोतञाणेसु च वत्तब्बमेव नत्थि।

इतरस्सपि अभावाति आरम्मणपुरेजातस्सपि अभावा अग्गहणं पटिसन्धिभाविनोति योजना। सतिपि कस्सचि पटिसन्धिभाविनो आरम्मणपुरेजाते विभूतं पन कत्वा आरम्मणकरणाभावतो अविज्‍जमानसदिसन्ति कत्वा वुत्तं ‘‘इतरस्सपि अभावा’’ति। तेनेवाह ‘‘पटिसन्धिया विय अपरिब्यत्तस्स आरम्मणस्स आरम्मणमत्तभावतो’’ति। सन्तीरणभाविनो मनोविञ्‍ञाणधातुयापि एकन्तेनेव पुरेजातपच्‍चयो रूपादीनि पञ्‍चारम्मणानीति योजना। एत्थ च ‘‘मनोधातूनञ्‍चा’’तिआदि ‘‘तदारम्मणभाविनो’’ति पदस्स पुरतो वत्तब्बो, उप्पटिपाटिया लिखितं।

पुरेजातपच्‍चयनिद्देसवण्णना निट्ठिता।

११. पच्छाजातपच्‍चयनिद्देसवण्णना

११.निरवसेसदस्सितपुरेजातदस्सनवसेनाति ‘‘चतुसमुट्ठानिकतिसमुट्ठानिकरूपकायस्सा’’ति एवं निरवसेसतो दस्सितस्स पुरेजातस्स पच्‍चयुप्पन्‍नस्स दस्सनवसेन। पच्‍चया हि इध कामावचररूपावचरविपाका, तेसु कामावचरविपाको च चतुसमुट्ठानिकरूपकायस्स पच्‍चयो, न इतरो। तेनेवाह ‘‘रूपावचरविपाको पन आहारसमुट्ठानस्स न होती’’ति, तस्मा ‘‘तस्सेवा’’ति वुत्तेपि यथारहमत्थो वेदितब्बो।

पच्छाजातपच्‍चयनिद्देसवण्णना निट्ठिता।

१२. आसेवनपच्‍चयनिद्देसवण्णना

१२.पकारेहि गुणितं पगुणं, बहुक्खत्तुं पवत्तिया भावितन्ति अत्थो। अतिसयेन पगुणं पगुणतरं, ततोयेव बलवतरं। तस्स भावो, तेन पगुणतरबलवतरभावेन विसिट्ठं विसेसप्पत्तं। स्वायं विसेसो विपाके नत्थीति आह ‘‘एतेन विपाकाब्याकततो विसेसेती’’ति।

आसेवनपच्‍चयनिद्देसवण्णना निट्ठिता।

१३. कम्मपच्‍चयनिद्देसवण्णना

१३.एवंसभावाति कम्मपच्‍चयेन उपकारकसभावा। समत्थताति आनुभावो। तस्साति विपाकक्खन्धकटत्तारूपसङ्खातस्स फलस्स। कम्मपच्‍चयभावो वुत्तोति कम्मपच्‍चयेन पच्‍चयभावो वुत्तो। एकवोकारे रूपम्पीति एकवोकारेपि रूपं न जनेति, पगेव चतुवोकारेति अत्थो।

कम्मपच्‍चयनिद्देसवण्णना निट्ठिता।

१४. विपाकपच्‍चयनिद्देसवण्णना

१४.यथा हि रूपभवे सञ्‍ञीनं तंनिब्बत्तितपुञ्‍ञाभिसङ्खारेनेव रूपुप्पत्ति, एवं असञ्‍ञीनम्पीति तत्थ कामावचरकम्मुना यथा विपाकानुरूपानं पच्‍चयो होन्तो केसञ्‍चियेव होति, न सब्बेसं, कत्थचियेव होति, न सब्बत्थ, न एवं विपाकानन्ति आह ‘‘एकन्तेना’’ति। तेसं वसेनाति तेसं विपाकपच्‍चयलाभीनं विपाकक्खन्धानं वसेन। न हीतिआदिना ‘‘एकन्तेना’’ति वुत्तमत्थं ब्यतिरेकतो विभावेति। भूमिद्वयविपाकोति कामावचररूपावचरविपाको आरुप्पे रूपस्स न हि पच्‍चयोति योजना।

विपाकपच्‍चयनिद्देसवण्णना निट्ठिता।

१५. आहारपच्‍चयनिद्देसवण्णना

१५.केवलाय ओजाय अज्झोहरणस्स अभावा ‘‘असितपीतादिवत्थूहि सह अज्झोहरितोवा’’ति वुत्तं। खादनीयभोजनीयप्पभेदे असिते ताव कबळीकारता होतु, पातब्बादिके पन कथन्ति आह ‘‘पातब्ब…पे॰… होन्ती’’ति। येभुय्यवसेन वा एवं वुत्तन्ति वेदितब्बं।

अनुपालकोति उपत्थम्भको। चित्तसमुट्ठानस्स कायस्स आहारपच्‍चयभावो कबळीकाराहारस्स विचारेत्वा गहेतब्बो। कस्माति चे? एत्थ कारणमाह ‘‘न ही’’तिआदिना। सति हि पच्‍चयभावे ‘‘चित्तसमुट्ठानो कबळीकाराहारो चित्तसमुट्ठानस्स कायस्स आहारपच्‍चयेन पच्‍चयो’’तिआदि वत्तब्बं सिया, न पन वुत्तं, नोचित्तसमुट्ठानस्स पन वुत्तं। तेनाह ‘‘तिविधोपि…पे॰… वुत्तो’’ति।

आहारपच्‍चयनिद्देसवण्णना निट्ठिता।

१६. इन्द्रियपच्‍चयनिद्देसवण्णना

१६.‘‘मिस्सकत्ता’’ति इदं इन्द्रियताय रूपारूपजीवितिन्द्रियानं एकज्झं कत्वा देसिततं सन्धाय वुत्तं, तस्मा मिस्सकत्ताति रूपजीवितिन्द्रियमिस्सकत्ताति अत्थो। जीवितिन्द्रियन्ति अरूपजीवितिन्द्रियं। न सब्बेन सब्बं वज्‍जितब्बन्ति यथा पञ्हापुच्छके अरूपजीवितिन्द्रियं मिस्सकत्ता न गहितं, न एवमिध अरूपजीवितिन्द्रियं अग्गहितन्ति अत्थो।

अरूपानं चक्खुविञ्‍ञाणादीनं पच्‍चयन्तरापेक्खानि आवज्‍जनारम्मणादिअञ्‍ञपच्‍चयसापेक्खानि इन्द्रियपच्‍चया सियुं चक्खादीनं रूपारूपानं अञ्‍ञमञ्‍ञं कदाचिपि अविनिब्भुत्तभावस्स अभावतो, पच्‍चयन्तरसमोधानापेक्खताय च। यो पन निरपेक्खोति यथा चक्खादीनि पच्‍चयन्तरेसु सापेक्खानि, एवं सापेक्खो अहुत्वा यो तत्थ निरपेक्खो इन्द्रियपच्‍चयो होति अविनिब्भुत्तधम्मानं यथा दुविधम्पि जीवितिन्द्रियं, सो अत्तनो…पे॰… नत्थीति योजना। अविनिब्भुत्तानं तेसम्पि लिङ्गादीनं सियुं विनिब्भुत्तानं पच्‍चयुप्पन्‍नानं इन्द्रियपच्‍चयताभावस्स अदिट्ठत्ता। ननु चक्खादीनं विनिब्भुत्तानं इन्द्रियपच्‍चयभावो दिट्ठोति? सच्‍चं दिट्ठो, न पन सो समानजातियाति दस्सेन्तो ‘‘न ही’’तिआदिमाह। सति चेवन्ति एवं वुत्तप्पकारे समानजातियंयेव अविनिब्भुत्तस्स इन्द्रियपच्‍चयभावे सति इत्थिपुरिसिन्द्रियेहि सद्धिं। सहयोगे हि इदं करणवचनं। यदिपि इत्थिपुरिसिन्द्रियानि लिङ्गादीनं कललादिकाले इन्द्रियपच्‍चयतं न फरेय्युं तेसं तदा अभावतो। ये पन रूपधम्मा तदा सन्ति, तेहि अविनिब्भुत्ताव, तेसं कस्मा न फरन्तीति आह ‘‘अञ्‍ञेसं पना’’तिआदि। अबीजभावतो अनिमित्तभावतो। तदनुरूपानन्ति कललादिअवत्थानुरूपानं अत्थितं इच्छन्ति, यतो ‘‘इत्थी, पुरिसो’’ति पकतिविभागो विञ्‍ञायतीति तेसं अधिप्पायो।

कुसलजातियन्ति निद्धारणे भुम्मं। ये पन ‘‘कुसलजातिक’’न्ति पठन्ति, तेसं पच्‍चत्तेकवचनं। विसुं एकजाति वा भूमि वा न होति तदेकदेसभावतो। हेतुआदीसुपीति आदि-सद्देन ‘‘अकुसलाहारेसुपि एसेव नयो’’ति एवमादिकं सङ्गण्हाति। एस नयोति य्वायं ‘‘भूमिवसेन वुत्तेसू’’तिआदिना अरूपे अलब्भमानस्स इन्द्रियपच्‍चयस्स अट्ठपने अत्थनयो वुत्तो, एस नयो योजेतब्बोति। तथा अपरियापन्‍नकुसलहेतु, तथा अकुसलहेतूति एत्थापि पठमापरियापन्‍नकुसलहेतु दोमनस्ससहगताकुसलहेतु च विसुं एकजाति भूमि वा न होन्तीति आरुप्पे अलब्भमानापि विसुं न ठपिताति योजेतब्बो। एस नयो ‘‘अकुसलाहारेसुपि एसेव नयो’’ति एवमादीसु।

सति सहजातपच्‍चयत्ते उप्पादक्खणेपि इन्द्रियपच्‍चयता सियाति कत्वा वुत्तं ‘‘सहजातपच्‍चयत्ताभावं सन्धाया’’ति। वुत्तञ्हि ‘‘उप्पज्‍जमानो सह उप्पज्‍जमानभावेन उपकारको धम्मो सहजातपच्‍चयो’’ति (पट्ठा॰ अट्ठ॰ पच्‍चयुद्देसवण्णना)। तस्स पन सहजातपच्‍चयत्ताभावो यदिपि अट्ठकथायं ‘‘सहजातपच्‍चयता पन तस्स नत्थी’’ति सरूपेनेव दस्सितो, तथापि तं अननुजानन्तो ‘‘उप्पाद…पे॰… निवारेतु’’न्ति वत्वा ‘‘वक्खती’’तिआदिना तमत्थं समत्थेति। कम्मपच्‍चयसदिसन्ति हि एतेन तस्स उप्पादक्खणे पच्‍चयभावो पकासितो। पवत्तेचाति च-सद्देन पटिसन्धियञ्‍च कटत्तारूपस्स रूपजीवितिन्द्रियतो अञ्‍ञो इन्द्रियपच्‍चयो न हि अत्थीति योजना। पटिच्‍चवारादयो सम्पयुत्तवारपरियोसाना छ वारा उप्पादक्खणमेव गहेत्वा पवत्ता ‘‘कुसलं धम्मं पटिच्‍च कुसलो धम्मो उप्पज्‍जति हेतुपच्‍चया’’तिआदिना, न ठितिक्खणन्ति अधिप्पायो। एवञ्‍च कत्वाति उप्पादक्खणमेव गहेत्वा पवत्तत्ता। एतेसूति यथावुत्तेसु छसु वारेसु। केचि पन ‘‘रूपजीवितिन्द्रियस्स अनुपालनं उप्पादक्खणे न पाकटं बलवञ्‍च यथा ठितिक्खणे पच्छाजातादिपच्‍चयलाभतो थिरभावप्पत्तियास्स तं पाकटं बलवञ्‍च, तस्मा ‘ठितिक्खणे’ति वुत्त’’न्ति वदन्ति।

१७. झानपच्‍चयनिद्देसवण्णना

१७.सोमनस्सदोमनस्ससङ्खातानीति सोमनस्सदोमनस्सपरियायेन वुत्तानि, झानङ्गभावविसेसनतो वा सोमनस्सदोमनस्सभूतानेव सुखदुक्खानि झानङ्गानि, न इतरसुखदुक्खानीति झानङ्गभूतानंयेव सुखदुक्खानं झानङ्गभावदस्सनत्थं सोमनस्सदोमनस्सग्गहणं कतं। इदानि यथावुत्तमेव ‘‘द्विपञ्‍चविञ्‍ञाणेसू’’तिआदिना वित्थारतो विभावेति, तं सुविञ्‍ञेय्यमेव। तेनाति विसेसनभूतेन सोमनस्सदोमनस्सग्गहणेन।

अभिनिपातमत्तत्ताति आरम्मणकरणमत्तभावतो। चिन्तनापवत्तिया उपनिज्झायनपवत्तिया। यथावुत्तेनेव कारणेनाति ‘‘उपनिज्झानाकारस्स अभावतो’’ति एतेन कारणेन। पुब्बेतिआदितो। चत्तारि अङ्गानि वज्‍जितानीति सत्तसु अङ्गेसु दस्सियमानेसु चत्तारि अङ्गानि वज्‍जितानि। अट्ठकथा हेसाति लेसेन अपकासेतब्बताय कारणमाह। तीसुपि एकमेव वत्तब्बं सिया, तंसमानलक्खणताय इतरेसं तिण्णम्पि गहणं होतीति। तिण्णं पन वचनेनाति उपेक्खासुखदुक्खानं अझानङ्गतादस्सनत्थेन वचनेन। ततो उपेक्खादितो अञ्‍ञस्स धम्मस्स चित्तेकग्गताय झानङ्गन्ति उद्धटभावो आपज्‍जति अझानङ्गेसु अग्गहितत्ता। यथावुत्तकारणतोति ‘‘उपनिज्झानाकारस्स अभावतो’’ति वुत्तकारणतो अञ्‍ञेन कारणेन अनुद्धटभावो वा आपज्‍जति अनुपनिज्झायनसभावेहि सद्धिं अग्गहितत्ता उपनिज्झायनाकारभावतो अञ्‍ञेनेव कारणेन चित्तेकग्गताय पाळियं अनुद्धटभावो आपज्‍जति। तंदोसपरिहरणत्थन्ति यथावुत्तदोसविनिमोचनत्थं।

येपनातिआदि पदकारमत्तदस्सनं। सोमनस्सादीहीति सोमनस्सदोमनस्सझानङ्गुपेक्खाहि। अविभूतभावो उपेक्खनं। उपेक्खा हि अविभूतकिच्‍चा वुत्ता। समानानं केसं? सुखादीनं, केहि? सोमनस्सादीहि, कथं? सुख…पे॰… युत्तताति योजना। न चित्तेकग्गतायाति सुखादीहि, तदञ्‍ञेहि अभिनिरोपनादीहि च अनिन्द्रियकिच्‍चताय च अनुपनिज्झायनकिच्‍चताय च असमानताय पञ्‍चविञ्‍ञाणेसु चित्तेकग्गताय झानङ्गन्ति अनुद्धटभावे कारणं न वत्तब्बन्ति। साति चित्तेकग्गता। एत्थाति ‘‘उपेक्खासुखदुक्खानी’’ति एतस्मिं अट्ठकथावचने न गहिता। विचिकिच्छायुत्तमनोधातुआदीसूति विचिकिच्छासम्पयुत्तचित्ते मनोधातुया सम्पटिच्छनादीसु च। तस्सापि चित्तेकग्गतायपि।

झानपच्‍चयनिद्देसवण्णना निट्ठिता।

१८. मग्गपच्‍चयनिद्देसवण्णना

१८.दुविधम्पि सङ्कप्पन्ति सम्मासङ्कप्पो मिच्छासङ्कप्पोति च एवं अनवज्‍जसावज्‍जभेदेन दुविधम्पि। वीरियं समाधिन्ति एत्थापि एसेव नयो। सङ्गण्हित्वा वितक्‍कादिभावसामञ्‍ञेन सह गहेत्वा, एकेकमेव कत्वा गहेत्वाति अत्थो। तेहि मिच्छावाचाकम्मन्ताजीवेहि। इधाति इमस्मिं मग्गपच्‍चयनिद्देसे लब्भमानानि च मग्गपच्‍चयभावतो, च-सद्देन अलब्भमानानि च मग्गपच्‍चयत्ताभावा। यदि एवं कस्मा वुत्तानीति आह ‘‘मग्गङ्गवचनसामञ्‍ञेना’’ति। एवं परियायनिद्देसो इध किमत्थियोति चोदनं सन्धायाह ‘‘एवञ्हि सुत्तवोहारोपि दस्सितो होती’’ति। एवं पन दस्सेन्तेनाति परमत्थतो अमग्गङ्गानिपि सुत्ते मग्गङ्गवोहारसिद्धिया इध मग्गङ्गेहि सह दस्सेन्तेन। उद्धरित्वाति पदुद्धारं कत्वा। इदानि मिच्छावाचादीहि सद्धिं द्वादसङ्गानि न दस्सेतब्बानि, कस्माति चेति आह ‘‘न हि पाळियं…पे॰… वत्तब्बो’’ति। तप्पटिपक्खभावतोयेव मिच्छामग्गङ्गानि, न मिच्छादिट्ठिआदयो विय सभावतोति अधिप्पायो।

परियायनिप्परियायमग्गङ्गदस्सनत्थेपि अत्थवचने एवं न वत्तब्बमेवाति दस्सेन्तो ‘‘परियाय…पे॰… अधिकरणानी’’ति आह। तस्सत्थो – यथा ‘‘अञ्‍ञभागियस्स अधिकरणस्सा’’ति एत्थ पाळिगतअधिकरणसद्दपतिरूपको अञ्‍ञो अधिकरणसद्दो पाळिगततदञ्‍ञसाधारणताय उभयपदत्थो उद्धटो ‘‘अधिकरणं नाम चत्तारि अधिकरणानी’’ति, एवमिधापि निप्परियायं इतरञ्‍च मग्गङ्गं दस्सेतुकामेन पाळिगततदञ्‍ञसाधारणो मग्गङ्गसद्दो उद्धरितब्बो सिया, तथा न कतन्ति। तस्माति यस्मा पाळिगतोयेव मग्गङ्गसद्दो उद्धटो, न तदञ्‍ञसाधारणो, न च अत्थुद्धारमुखेन अधिप्पेतत्थो नियमितो, तस्मा। तेसूति अहेतुकचित्तुप्पादेसु। ‘‘सम्मादिट्ठि…पे॰… समाधयो’’ति एत्थ सङ्कप्पवायामसमाधयो सम्मामिच्छासद्देहि विसेसेत्वा वुत्ताति आह ‘‘सम्मादिट्ठिआदयो यथावुत्ता सन्ती’’ति। सङ्कप्पवायामसमाधिप्पत्ता पन तत्थ केचि सन्तियेवाति। अथ वा सम्मादिट्ठिआदयोति वुत्तप्पकारे सम्मादिट्ठिआदिके अनवसेसे सन्धाय वुत्तं। तेनाह ‘‘यथावुत्ता’’ति। उप्पत्तिट्ठाननियमनत्थत्ता न विसेसनत्थत्ताति अधिप्पायो।

मग्गपच्‍चयनिद्देसवण्णना निट्ठिता।

२०. विप्पयुत्तपच्‍चयनिद्देसवण्णना

२०.सम्पयोगासङ्कावत्थुभूतोति सम्पयोगासङ्काय अधिट्ठानभूतो। तेनाह अट्ठकथायं ‘‘अरूपिनो हि खन्धा चक्खादीनं वत्थूनं अब्भन्तरतो निक्खमन्ता विय उप्पज्‍जन्ती’’ति।

विप्पयुत्तपच्‍चयनिद्देसवण्णना निट्ठिता।

२१. अत्थिपच्‍चयनिद्देसवण्णना

२१.यस्मिं सति यं होति, असति च न होति, सो तस्स पच्‍चयोति यदिदं समासतो पच्‍चयलक्खणं यं सन्धाय सुत्ते वुत्तं ‘‘इमस्मिं सति इदं होति, इमस्मिं असति इदं न होती’’ति, तयिदं अत्थिपच्‍चये योजेत्वा दस्सेन्तो ‘‘यो ही’’तिआदिं वत्वा अयञ्‍च नयो निब्बाने न लब्भति, तस्मा निब्बानं अत्थिपच्‍चयभावेन न उद्धटन्ति दस्सेतुं ‘‘निब्बानञ्‍च…पे॰… उपकारकं होती’’ति आह। तेन पच्‍चयधम्मानं पच्‍चयभावो विसेसतो ब्यतिरेकमुखेन पाकटो होतीति दस्सेति। नत्थिभावोपकारकताविरुद्धोति नत्थिपच्‍चयभावविरुद्धो। विगताविगतपच्‍चया विय हि अञ्‍ञमञ्‍ञं उजुपच्‍चनीकभावेन ठिता नत्थिअत्थिपच्‍चया। न निब्बानं अत्थिपच्‍चयो नत्थिभावोपकारकताअविरोधतो। ये हि अत्थिपच्‍चयधम्मा, ते नत्थिभावोपकारकताविरुद्धा एव दिट्ठाति अधिप्पायो।

सति च उप्पन्‍नत्तेति सम्बन्धो। येसं पच्‍चया होन्ति आहारिन्द्रियाति योजना। एकतोति सह। सहजातादिपच्‍चयत्ताभावतोति सहजातपुरेजातपच्छाजातपच्‍चयत्ताभावतो। तदभावोति सहजातादिपच्‍चयत्ताभावो। एतेसन्ति अत्थिपच्‍चयतावसेन पवत्तमानानं आहारिन्द्रियानं। धम्मसभाववसेनाति धम्मतावसेन। धम्मता हेसा, यदिदं पच्‍चयुप्पन्‍नेहि सह पुरेतरं पच्छा च लब्भमाना आहारिन्द्रिया तेसं अत्थिपच्‍चया होन्ति, न सहजातादिपच्‍चयाति। यथा वा चक्खादिद्वारानं रूपादिआरम्मणानं सतिपि नियतवुत्तिताय द्वारारम्मणतो विञ्‍ञाणस्स छब्बिधभावे आरम्मणमनामसित्वा, द्वारतो द्वारमनामसित्वा आरम्मणतो छब्बिधता वुच्‍चति, एवमिधापि आहारिन्द्रियानं पच्‍चयुप्पन्‍नेहि सतिपि सहजातादिभावे अरूपक्खन्धादिवसेन सहजातादिभेदभिन्‍नस्स अत्थिपच्‍चयस्स दस्सितत्ता पञ्हावारे आहारिन्द्रियानं वसेन आगते चतुत्थपञ्‍चमकोट्ठासभूते अत्थिपच्‍चयविसेसे सहजातादिभेदं आमसितुं न लब्भतीति दस्सेतुं अट्ठकथायं ‘‘आहारो इन्द्रियञ्‍च सहजातादिभेदं न लभती’’ति वुत्तं, न पन आहारिन्द्रियेसु सहजातादिभावस्स अभावतो। एवम्पेत्थ अत्थो दट्ठब्बो।

अत्थिपच्‍चयनिद्देसवण्णना निट्ठिता।

२२-२३-२४. नत्थिविगतअविगतपच्‍चयनिद्देसवण्णना

२२-२३.एत्थाति नत्थिपच्‍चये। नानन्ति नानत्तं। एतेनाति अनन्तरपच्‍चयतो नत्थिपच्‍चयस्स विसेसमत्तदीपनेन ‘‘पच्‍चयलक्खणमेव हेत्थ नान’’न्ति इमिना वचनेन। अत्थोति धम्मो। ब्यञ्‍जनसङ्गहितेति ‘‘नत्थिपच्‍चयो विगतपच्‍चयो’’ति एवमादिब्यञ्‍जनेन सङ्गहिते। पच्‍चयलक्खणमत्तेति एत्थ पवत्तिओकासदानेन उपकारका अरूपधम्मा, विगतभावेन उपकारकाति एवमादिके पच्‍चयानं लक्खणमत्ते।

नत्थिविगतअविगतपच्‍चयनिद्देसवण्णना निट्ठिता।

पच्‍चयनिद्देसवण्णना निट्ठिता।

पच्‍चयनिद्देसपकिण्णकविनिच्छयकथावण्णना

आदिमपाठोति पुरिमपाठो। तथा च सतीति दोसस्सपि सत्तरसहि पच्‍चयेहि पच्‍चयभावे सति। अधिपतिपच्‍चयभावोपिस्स अनुञ्‍ञातो होतीति आह ‘‘दोसस्सपि गरुकरणं पाळियं वत्तब्बं सिया’’ति। ‘‘सेसान’’न्ति वचनेनेव निवारितोति कदाचि आसङ्केय्याति तंनिवत्तनत्थमाह ‘‘न च सेसान’’न्तिआदि। पुरेजातादीहीति पुरेजातकम्माहारझानिन्द्रियमग्गविपाकपच्‍चयेहि। तन्‍निवारणत्थन्ति तस्स यथावुत्तदोसस्स निवारणत्थं। विसुञ्‍च अग्गहेत्वाति लोभमोहा विपाकपच्‍चयापि न होन्ति, तथा दोसोति एवं विसुञ्‍च अग्गहेत्वा। फोट्ठब्बायतनं कायविञ्‍ञाणधातुया आरम्मणादिपच्‍चयो होन्तंयेव पथवीआदिसभावत्ता अत्तना सहजातानं सहजातादिपच्‍चया होन्तियेवाति वुत्तं ‘‘फोट्ठब्बायतनस्स सहजातादिपच्‍चयभावं दस्सेती’’ति। ‘‘सब्बधम्मान’’न्ति ‘‘सब्बे धम्मा मनोविञ्‍ञाणधातुया तंसम्पयुत्तकानञ्‍च धम्मानं आरम्मणपच्‍चयेन पच्‍चयो’’ति एत्थ वुत्ते सब्बधम्मे सन्धायाह ‘‘सब्बधम्मानं यथायोगं हेतादिपच्‍चयभावं दस्सेती’’ति। न हि एतं…पे॰… भावदस्सनं, अथ खो एकधम्मस्स अनेकपच्‍चयभावदस्सनं, तस्मा ‘‘एतेन फोट्ठब्बायतनस्सा’’तिआदि वुत्तन्ति अधिप्पायो। रूपादीनन्ति रूपायतनादीनं।

भेदाति विसेसा। भेदं अनामसित्वाति चक्खुविञ्‍ञाणधातुआदिविसेसं अग्गहेत्वा। ते एवाति यथावुत्तविसेसानं सामञ्‍ञभूते खन्धे एव। यं सन्धाय ‘‘एवं न सक्‍का वत्तु’’न्ति वुत्तं, तं विभावेतुं ‘‘न ही’’तिआदि वुत्तं। पट्ठानसंवण्णना हेसाति एतेन सुत्ते वुत्तपरियायमग्गभावेनेत्थ न सक्‍का मिच्छावाचादीनं मग्गपच्‍चयं वत्तुन्ति दस्सेति। सेसपच्‍चयभावोति मग्गपच्‍चयं ठपेत्वा यथावुत्तेहि सेसेहि अट्ठारसहि पच्‍चयेहि पच्‍चयभावो। अधिपतिपच्‍चयो न होतीति आरम्मणाधिपतिपच्‍चयो न होति। तन्ति विचिकिच्छं। तत्थाति यथावुत्तेसु अहिरिकादीसु।

दसधा पच्‍चया होन्ति, पुन तथा हदयवत्थुन्ति इदं अत्थमत्तवचनं। पाठो पन ‘‘हदयवत्थु तेसञ्‍चेव विप्पयुत्तस्स च वसेन दसधा पच्‍चयो होती’’ति वेदितब्बो। रूपसद्दगन्धरसायतनमत्तमेवाति इदं रूपादीनं सहजातपच्‍चयताय विय निस्सयपच्‍चयताय च अभावतो, पुरेजातपच्‍चयताय च भावतो वुत्तं। एतानीति यथावुत्तानि रूपसद्दगन्धरसारम्मणानि। सब्बातिक्‍कन्तपच्‍चयापेक्खाति ‘‘एकधम्मस्स अनेकपच्‍चयभावतो’’ति एतस्मिं विचारे हेतुआदिअतिक्‍कन्तपच्‍चयापेक्खा एतेसं रूपादीनं अपुब्बता नत्थि, अथ खो आरम्मणआरम्मणाधिपतिआरम्मणूपनिस्सयपच्‍चयापेक्खा। न हि रूपादीनि हेतुसहजाताधिपतिआदिवसेन पच्‍चया होन्तीति। तस्साति रूपजीवितिन्द्रियस्स पुरेजातपच्‍चयभावतो अपुब्बता, तस्मा तं एकूनवीसतिविधो पच्‍चयो होतीति वुत्तं होति। सत्तधा पच्‍चयभावो योजेतब्बो, न हि ओजा पुरेजातपच्‍चयो न होतीति।

अत्थोति वा हेतुआदिधम्मानं सभावो वेदितब्बो। सो हि अत्तनो पच्‍चयुप्पन्‍नेहि अरणीयतो उपगन्तब्बतो, ञाणेन वा ञातब्बतो ‘‘अत्थो’’ति वुच्‍चति। आकारोति तस्सेव पवत्तिआकारो, येन अत्तनो पच्‍चयुप्पन्‍नानं पच्‍चयभावं उपगच्छतीति एवमेत्थ अत्थो दट्ठब्बो। तं पन विप्पयुत्तं। ‘‘सत्तहाकारेही’’ति पठानस्स कारणमाह ‘‘उक्‍कट्ठपरिच्छेदो ही’’तिआदिना।

पुच्छावारो

१. पच्‍चयानुलोमवण्णना

एकेकं तिकं दुकञ्‍चाति कुसलत्तिकादीसु बावीसतिया तिकेसु हेतुदुकादीसु सतं दुकेसु एकेकं तिकं दुकञ्‍च। न तिकदुकन्ति तुल्ययोगीनं न तिकदुकन्ति अत्थो। तिकविसिट्ठं पन दुकं, दुकविसिट्ठञ्‍च तिकं, तिकविसिट्ठतिकदुकविसिट्ठदुकेसु विय निस्साय उपरि देसना पवत्ता एवाति।

ये कुसलादिधम्मे पटिच्‍चाति वुत्ता ‘‘कुसलं धम्मं पटिच्‍च कुसलो धम्मो उप्पज्‍जति हेतुपच्‍चया’’तिआदीसु, ते कुसलादिधम्मा पटिच्‍चत्थं फरन्ता हेतुआदिपच्‍चयट्ठं साधेन्ता कुसलादिपच्‍चया चेवाति अत्थो। तेनेवाहाति यस्मा पच्‍चयधम्मानं पच्‍चयुप्पन्‍नेसु पटिच्‍चत्थफरणं उभयेसं तेसं सहभावे सति, नाञ्‍ञथा। तेनेव कारणेनाह ‘‘ते च खो सहजातावा’’ति। तेति हेतुआदिपच्‍चया। तेसु हि हेतुसहजातअञ्‍ञमञ्‍ञनिस्सयादयो सहजाता, अनन्तरसमनन्तरादयो असहजाता पच्‍चया होन्तीति। एतेहि द्वीहि वारेहि इतरेतरत्थबोधनवसेन पवत्ताय देसनाय किं साधितं होतीति आह ‘‘एवञ्‍च निरुत्तिकोसल्‍लं जनितं होती’’ति।

तेते पञ्हे उद्धरित्वाति ‘‘सिया कुसलो धम्मो कुसलस्स धम्मस्स हेतुपच्‍चयेन पच्‍चयो’’तिआदयो ये ये पञ्हा विस्सज्‍जनं लभन्ति, ते ते पञ्हे उद्धरित्वा। पमादलेखा एसाति इदं ‘‘कुसलो हेतु हेतुसम्पयुत्तकानं धम्मान’’न्ति लिखितं सन्धाय वुत्तं। पटिच्‍चसहजातवारेसु सहजातपच्‍चयो, पच्‍चयनिस्सयवारेसु निस्सयपच्‍चयो, संसट्ठसम्पयुत्तवारेसु सम्पयुत्तपच्‍चयो एकन्तिकोति कत्वा वुत्तोति आह ‘‘पुरिमवारेसु…पे॰… नियमेत्वा’’ति। तत्थाति तेसु पुरिमवारेसु छसु। न विञ्‍ञायन्ति सरूपतो अनुद्धटत्ता। एवमादीहि पञ्हेहि। हेतादिपच्‍चयपच्‍चयुप्पन्‍नेसूति हेतुआदीसु पच्‍चयधम्मेसु सम्पयुत्तक्खन्धादिभेदेसु तेसं पच्‍चयुप्पन्‍नेसु। निद्धारणे चेतं भुम्मं। हेतादिपच्‍चयानं निच्छयाभावतोति ‘‘इमे नाम ते हेतुआदयो पच्‍चयधम्मा’’ति निच्छयाभावतो सरूपतो अनिद्धारितत्ता। यथा हि नाम नानाजटाजटितं गुम्बन्तरगतञ्‍च तंसदिसं सरूपतो अदिस्समानं इदं तन्ति न विनिच्छिनीयति, एवं ञातुं इच्छितोपि अत्थो सरूपतो अनिद्धारितो निज्‍जटो निगुम्बो च नाम न होति निच्छयाभावतो, सरूपतो पन तस्मिं निद्धारिते तब्बिसयस्स निच्छयस्स वसेन पुग्गलस्स असम्बुद्धभावाप्पत्तिया सो पञ्हो निज्‍जटो निगुम्बो च नाम होतीति आह ‘‘निच्छयाभावतो ते पञ्हा निज्‍जटा निगुम्बा च कत्वा न विभत्ता’’ति, ‘‘न कोचि पुच्छासङ्गहितो…पे॰… विभत्ता’’ति च। तन्ति पञ्हाविस्सज्‍जनं सन्धाय निज्‍जटता न वुत्ता, अथ खो निच्छयुप्पादनन्ति अधिप्पायो।

ठपनं नाम इध विनेय्यसन्ताने पतिट्ठपनं, तं पन तस्स अत्थस्स दीपनं जोतनन्ति आह ‘‘पकासितत्ता’’ति। पकारेहीति हेतुआदिपच्‍चयप्पकारेहि, कुसलादिपच्‍चयपच्‍चयुप्पन्‍नप्पकारेहि वा।

२५-३४.परिकप्पनं विदहनन्ति कत्वा आह ‘‘परिकप्पपुच्छाति विधिपुच्छा’’ति। सियाति भवेय्याति अत्थो। एसो विधि किं अत्थीति एतेन ‘‘सिया’’ति विधिम्हि किरियापदं। पुच्छा पन वाक्यत्थसिद्धा वेदितब्बा। तमेव हि वाक्यत्थसिद्धं पुच्छं दस्सेतुं अट्ठकथायम्पि ‘‘किं सो कुसलं धम्मं पटिच्‍च सिया’’ति वुत्तं। संपुच्छनं परिकप्पपुच्छाति तस्मिं पक्खे हि किरियाय पदेनेव पुच्छा विभावीयतीति वुत्तं होतीति। ‘‘सिया कुसलं धम्मं पटिच्‍च कुसलो धम्मो उप्पज्‍जेय्य हेतुपच्‍चया’’ति एत्थ ‘‘कुसलं धम्मं पटिच्‍च हेतुपच्‍चया’’ति उभयमिदं पच्‍चयवचनं, ‘‘कुसलो धम्मो उप्पज्‍जेय्या’’ति पच्‍चयुप्पन्‍नवचनं। तेसु पच्‍चयधम्मस्स पच्‍चयभावे विभाविते पच्‍चयुप्पन्‍नस्स उप्पत्ति अत्थतो विभावितायेव होतीति पच्‍चयधम्मोव पुच्छितब्बो। तत्थ च पच्‍चयधम्मविसिट्ठो पटिच्‍चत्थो वा पुच्छितब्बो सिया पच्‍चयविसिट्ठो वाति दुविधा पुच्छितब्बायेव अत्थविकप्पा अट्ठकथायं वुत्ता। तेसु पठमस्मिं पुच्छा सदोसाति दस्सेन्तो ‘‘यो कुसलो धम्मो उप्पज्‍जेय्या’’तिआदिमाह। तत्थ सब्बपुच्छानं पवत्तितोति कुसलमूलादीनं सत्तसत्तपुच्छानं पवत्तनतो, उप्पज्‍जमानं कुसलं। तेहि पच्‍चयेहीति पच्छाजातविपाकपच्‍चयेहि उप्पत्ति अनुञ्‍ञाताति आपज्‍जति, न च तं युत्तन्ति अधिप्पायो। तंतंपच्‍चयाति ततो ततो योनिसोमनसिकारादिपच्‍चयतो। भवनमत्थिता एत्थ न च पुच्छिताति ‘‘किं सिया’’ति वुत्तयोजनाय दोसमाह। एवञ्‍च कत्वाति उप्पत्तिया एव पुच्छितत्ता।

तत्थाति ‘‘अथ वा’’तिआदिना वुत्ते अत्थन्तरे। उप्पज्‍जेय्याति उप्पत्तिं अनुजानित्वाति ‘‘उप्पज्‍जेय्या’’ति एत्थ वुत्तं कुसलपच्‍चयं उप्पत्तिं अनुजानित्वा। तस्साति उप्पत्तिया। भवनपुच्छनन्ति हेतुपच्‍चया भवनपुच्छनं न युत्तन्ति सम्बन्धो। पुन तस्साति हेतुपच्‍चया उप्पत्तिया। भवनपुच्छनन्ति केवलं भवनपुच्छनं। तस्माति यस्मा वुत्तनयेन उभयत्थापि उप्पत्तिअनुजाननमुखेन भवनपुच्छनं अयुत्तं, तस्मा। अनुजाननञ्‍च अट्ठकथायं वुत्ते अत्थविकप्पद्वये अत्थतो आपन्‍नं, तं अननुजानन्तो आह ‘‘अननुजानित्वावा’’तिआदि। संपुच्छनमेवाति इमिना संपुच्छने ‘‘उप्पज्‍जेय्या’’ति इदं किरियापदन्ति दस्सेति। यदि एवं ‘‘सिया’’ति इदं कथन्ति आह ‘‘सियाति…पे॰… पुच्छती’’ति। अयं नयोति ‘‘सिया’’तिआदिना अनन्तरवुत्तो अत्थनयो। न विञ्‍ञायति अनामट्ठविसेसत्ता। द्वेपि पुच्छाति सम्भवनपुच्छा तब्बिसेसपुच्छा चाति दुविधापि पुच्छा एकायेव पुच्छा संपुच्छनभावतो एकाधिकरणभावतो च।

गमनुस्सुक्‍कवचनन्ति गमनस्स उस्सुक्‍कवचनं। गमनकिरियाय यथा अत्तनो कत्ता उपरि कत्तब्बकिरियाय योग्यरूपो होति, एवमेव ठानं गमनुस्सुक्‍कनं तस्स बोधनं वचनं। एवंभूता च किरिया यस्मा अत्थतो किरियन्तरापेक्खा नाम होति, तस्मा वुत्तं ‘‘गमनस्स…पे॰… अत्थो’’ति। कथं पनेतस्मिं सहजातपच्‍चयपट्ठाने पटिच्‍चवारे पटिच्‍चसद्दस्स पच्छिमकालकिरियापेक्खताति चोदनं मनसि कत्वा आह ‘‘यदिपी’’तिआदि। तेनेतं दस्सेति ‘‘असतिपि पटिअयनुप्पज्‍जनानं कालभेदे अञ्‍ञत्र हेतुफलेसु दिस्समानं पुरिमपच्छिमकालतं हेतुफलतासामञ्‍ञतो इधापि समारोपेत्वा रुळ्हीवसेन पुरिमपच्छिमकालवोहारो कतो’’ति। तेनाह ‘‘गहणप्पवत्तिआकारवसेन…पे॰… दट्ठब्बो’’ति। तत्थ अत्तपटिलाभो उप्पादोति अत्थो।

२. पच्‍चयपच्‍चनीयवण्णना

४२-४४.यावाति पाळिपदस्स अत्थवचनं यत्तकोति आह ‘‘पभेदो’’ति। अत्थि तेवीसतिमूलकस्साति अत्थो। ताव तत्तकं पभेदं। तत्थाति अनुलोमे आगतन्ति अत्थो। नयदस्सनवसेनदस्सितं, किन्ति? एकेकस्स पदस्स वित्थारं दस्सेति। अवसेसस्स पच्‍चयस्स मूलवन्तभावेन गहितस्स।

पच्‍चयपच्‍चनीयवण्णना निट्ठिता।

३. अनुलोमपच्‍चनीयवण्णना

४५-४८.पुन तत्थाति अनुलोमे। पच्‍चयपदानीति पच्‍चया एव पदानि पच्‍चयपदानि। इधाति अनुलोमपच्‍चनीये। सुद्धिकपच्‍चयानन्ति पच्‍चयन्तरेन अवोमिस्सानं पच्‍चयानं, अनुलोमपच्‍चनीयदेसनं वक्खमानं सन्धायाति अत्थो।

अनुलोमपच्‍चनीयवण्णना निट्ठिता।

पुच्छावारवण्णना निट्ठिता।

१. कुसलत्तिकं

१. पटिच्‍चवारवण्णना

१. पच्‍चयानुलोमं

(१) विभङ्गवारवण्णना

५३.तिकपदानं तिकन्तरपदेहि विसदिसता पाकटायेवाति वुत्तं ‘‘तिकपदनानत्तमत्तेन विना’’ति। मूलावसानवसेनाति ‘‘एकमूलेकावसानं नवा’’तिआदिना वुत्तमूलावसानवसेन। ‘‘न तायेव वेदनात्तिकादीसू’’ति एत्थ या सदिसता पटिक्खित्ता, तं दस्सेतुं ‘‘सदिसतं सन्धाय ‘न तायेवा’ति वुत्त’’न्ति आह। याति या पुच्छा। सब्बपुच्छासमाहरणन्ति सब्बासं एकूनपञ्‍ञासाय पुच्छानं समुच्‍चयनं अनवसेसेत्वा कथनं। इध इमस्मिं पटिच्‍चवारुद्देसे कत्तब्बं। आदितो हि अनवसेसतो वुत्ते पच्छा यथारहं तदेकदेसवचनं युत्तं। न हि तत्थ एकूनपञ्‍ञास पुच्छा विस्सज्‍जनं लभन्तीति तत्थ तस्मिं धम्मानुलोमपच्‍चनीये पीतित्तिके एकूनपञ्‍ञास पुच्छा विस्सज्‍जनं न हि लभन्ति, अट्ठवीसे पन लभन्तीति अत्थो।

तेन सहजातपच्‍चयभूतेनाति तेन वेदनादिभेदेन एकेन धम्मेन सहजातपच्‍चयो होन्तेन, सहजातपच्‍चयतं वा पत्तेन पापुणन्तेनाति अत्थो। अनुञ्‍ञातं विय होतीति यदिपि अट्ठकथायं ‘‘याव निरोधगमना’’तिआदिवचनेहि खणत्तयसमङ्गी उप्पज्‍जतीति अनुञ्‍ञातं विय होति, उप्पादक्खणसमङ्गीयेव पन उप्पज्‍जतीति वुत्तो पटिच्‍चवारादीनं छन्‍नं वारानं उप्पादमेव गहेत्वा पवत्तत्ता। तथा हि तेसु पच्छाजातपच्‍चयो अनुलोमतो न तिट्ठति।

इध कुसलवचनेन गहिते खन्धे सन्धाय वुत्तन्ति इमस्मिं पटिच्‍चवारे ‘‘कुसलं धम्मं पटिच्‍च कुसलो धम्मो उप्पज्‍जती’’ति कुसलसद्देन गहिते खन्धे सन्धाय वुत्तं चतूसुपि कुसलखन्धेसु एकतो उप्पज्‍जमानेसु सामञ्‍ञतो वुत्तेसु सहजातादिसाधारणपच्‍चयवसेन अविसेसतो सब्बे सब्बेसं पच्‍चयाति अयमेव इमस्स पच्‍चयो, इमस्सेव अयं पच्‍चयोति च नियमेत्वा वत्तुं न सक्‍का। तेन वुत्तं अट्ठकथायं ‘‘एकस्सेव द्विन्‍नंयेव वा’’तिआदि। ‘‘सुखाय वेदनाय सम्पयुत्तं धम्मं पटिच्‍चा’’तिआदीसु पन विसेसनभावेन वेदनादीनं विसुं गहितत्ता ‘‘एकं खन्धं पटिच्‍च द्वे खन्धा’’तिआदि वत्तुं सक्‍का। तेन वुत्तं ‘‘वेदनात्तिकादीसु पना’’तिआदि। तथाति इमिना ‘‘एकेकस्सपि दुकादिभेदानञ्‍चा’’ति इमं अनुकड्ढति।

एतस्मिन्ति ‘‘विपाकाब्याकतं किरियाब्याकत’’न्ति एवं विपाककिरियाब्याकतग्गहणे। ‘‘सब्बस्मिं न गहेतब्ब’’न्ति वुत्तं, कत्थ पन गहेतब्बन्ति आह ‘‘चित्तसमुट्ठानञ्‍च रूपन्ति एत्थेवा’’ति। एवं पठमे वाक्ये अतिब्यापितं परिहरित्वा दुतिये अब्यापितं परिहरितुं ‘‘न केवल’’न्तिआदि वुत्तं। एत्थाति ‘‘विपाकाब्याकतं किरियाब्याकत’’न्ति एत्थ न गहेतब्बं तस्सपि आरुप्पे उप्पज्‍जमानस्स रूपेन विना उप्पत्तितो। एत्थ च यथा हेतुपच्‍चयग्गहणेनेव अहेतुकं निवत्तितं, एवं चित्तसमुट्ठानञ्‍च रूपन्ति रूपग्गहणेनेव आरुप्पे विपाकोपि तत्थ उप्पज्‍जमानेन चित्तुप्पादेन सद्धिं न गहितो। तं पनेतं अत्थसिद्धमेव अकत्वा सरूपतो पाकटतरं कत्वा दस्सेतुं अट्ठकथायं ‘‘विपाकाब्याकत’’न्तिआदि वुत्तं। पटिसन्धिपच्छिमचित्तानि पनेत्थ सतिपि रूपस्स अनुप्पादने ववत्थानाभावतो न गहितानीति दट्ठब्बं।

(२) सङ्ख्यावारवण्णना

७३.यथाअञ्‍ञमञ्‍ञपच्‍चये विसेसो विभङ्गे अत्थीति इदं हेतुपच्‍चयादिविभङ्गतो विसेसभावसामञ्‍ञेन वुत्तं। न हि यादिसो अञ्‍ञमञ्‍ञपच्‍चयविभङ्गे विसेसो, तादिसो पुरेजातपच्‍चयविभङ्गे। तथा हि अञ्‍ञमञ्‍ञपच्‍चये पटिसन्धि लब्भति, न पुरेजातपच्‍चये। ‘‘विपाकाब्याकतं एकं खन्धं पटिच्‍चा’’तिआदिके विभङ्गेति इमिना यस्मिं पच्‍चये विपाकाब्याकतं उद्धटं, तं निदस्सनवसेन दस्सेति। इदं वुत्तं होति – यथा हेतुपच्‍चयादीसु ‘‘विपाकाब्याकतं एकं खन्धं पटिच्‍चा’’तिआदिना विभङ्गे विपाकाब्याकतं उद्धटं अत्थि, एवं विपाकाब्याकताभावं आसेवनपच्‍चये विसेसं दस्सेतीति।

पटिच्‍चवारो

पच्‍चयपच्‍चनीयवण्णना

८६-८७.रूपसमुट्ठापकवसेनेववेदितब्बन्ति इदं अट्ठकथावचनं अनन्तरं ‘‘चित्तसमुट्ठानञ्‍च रूप’’न्ति पाळियं आगतत्ता वुत्तं, पञ्‍चविञ्‍ञाणानं पन अहेतुकपटिसन्धिचित्तानञ्‍च वसेन योजना सम्भवतीति कत्वा वुत्तं ‘‘सब्बसङ्गाहिकवसेन पनेतं न न सक्‍का योजेतु’’न्ति।

पच्‍चयानुलोमपच्‍चनीयवण्णना

१३१-१८९.तिण्णन्ति हेतु अधिपति मग्गोति इमेसं तिण्णं पच्‍चयानं। साधारणानन्ति ये तेसं तिण्णं साधारणा पच्‍चया पच्‍चनीकतो न लब्भन्ति, यस्मा तेसं सङ्गण्हनवसेन वुत्तं, तस्मा। मग्गपच्‍चयेति मग्गपच्‍चये अनुलोमतो ठिते। इतरेहीति हेतुअधिपतिपच्‍चयेहि। साधारणा सत्तेवाति मग्गपच्‍चयवज्‍जे सत्तेव। हेतुपच्‍चयोपि पच्‍चनीयतो न लब्भतीति हेतुरहितेसु अधिपतिनो अभावा। सो पनाति हेतुपच्‍चयो असाधारणोति कत्वा न वुत्तो साधारणानं अलब्भमानानं वुच्‍चमानत्ता। न हि हेतुपच्‍चयो मग्गपच्‍चयस्स साधारणो। येहीति येहि पच्‍चयेहि। तेति अनन्तरपच्‍चयादयो। एकन्तिकत्ताति अविनाभावतो। अरूपट्ठानिकाति अरूपपच्‍चया अरूपधम्मानंयेव पच्‍चयभूता अनन्तरपच्‍चयादयो। तेनाति ‘‘एकन्तिकानं अरूपट्ठानिका’’ति इधाधिप्पेतत्ता। तेहीति पुरेजातासेवनपच्‍चयेहि। तेसं वसेनाति तेसं ऊनतरगणनानं एककादीनं वसेन। तस्स तस्साति पच्‍चनीयतो योजितस्स तस्स तस्स दुकादिकस्स बहुगणनस्स। गणनाति ऊनतरगणना। अनुलोमतो ठितस्सपीति पि-सद्देन अनुलोमतो ठितो वा होतु पच्‍चनीयतो योजितो वा, ऊनतरगणनाय समानन्ति दस्सेति। नयिदं लक्खणं एकन्तिकन्ति इमिना यथावुत्तलक्खणं येभुय्यवसेन वुत्तन्ति दस्सेति।

पच्‍चयानुलोमपच्‍चनीयवण्णना निट्ठिता।

पच्‍चयपच्‍चनीयानुलोमवण्णना

१९०.सब्बेसुपीति पच्छाजातं ठपेत्वा सब्बेसुपि पच्‍चयेसु। सो हि अनुलोमतो अलब्भमानभावेन गहितो ‘‘सब्बेसू’’ति एत्थ सङ्गहं न लभति। अरूपावचरविपाकस्स आरुप्पे उप्पन्‍नलोकुत्तरविपाकस्स च पुरेजातासेवनानं अलब्भनतोति ‘‘किञ्‍चि निदस्सनवसेन दस्सेन्तो’’ति आह।

अवसेसानं लाभमत्तन्ति अवसेसानं एकच्‍चानं लाभं। तेनाह ‘‘न सब्बेसं अवसेसानं लाभ’’न्ति । पच्छाजाते पसङ्गो नत्थीति पच्छाजातो अनुलोमतो तिट्ठतीति अयं पसङ्गो एव नत्थि। पुरेजा…पे॰… लब्भतीति इमिना विप्पयुत्ते पच्‍चनीयतो ठिते पुरेजातो लब्भतीति अयम्पि अत्थतो आपन्‍नो होतीति तं निद्धारेत्वा तत्थ यं वत्तब्बं, तं दस्सेतुं ‘‘पुरेजातो पन विप्पयुत्ते पच्‍चनीयतो ठिते अनुलोमतो लब्भतीति इदम्पी’’तिआदि वुत्तं। तत्थ ‘‘अवसेसा सब्बेपीति अत्थे गय्हमाने आपज्‍जेय्या’’ति इदं तस्सा अत्थापत्तिया सब्भावदस्सनमत्तं दट्ठब्बं, अत्थो पन तादिसो न उपलब्भतीति अयमेत्थ अधिप्पायो। तेनाह ‘‘यम्पि केची’’तिआदि।

तत्थ केचीति पदकारे सन्धायाह। ते हि ‘‘अरूपधातुया चवित्वा कामधातुं उपपज्‍जन्तस्स गतिनिमित्तं आरम्मणपुरेजातं होतीति ञापेतुं ‘नविप्पयुत्तपच्‍चया पुरेजाते’ति अयमत्थो निद्धारितो’’ति वदन्ति, तं न युज्‍जति आरुप्पे रूपं आरब्भ चित्तुप्पादस्स असम्भवतो। तथा हेके असञ्‍ञभवानन्तरस्स विय आरुप्पानन्तरस्स कामावचरपटिसन्धिविञ्‍ञाणस्स पुरिमानुपट्ठितारम्मणं इच्छन्ति। तेनेवाह ‘‘तम्पि तेसं रुचिमत्तमेवा’’तिआदि। युज्‍जमानकपच्‍चयुप्पन्‍नवसेन वाति यस्मिं यस्मिं पच्‍चये अनुलोमतो ठिते यं यं पच्‍चयुप्पन्‍नं भवितुं युज्‍जति, तस्स तस्स वसेनाति अत्थो। न विचारितं सुविञ्‍ञेय्यत्ताति अधिप्पायो। नवाति आरम्मणअनन्तरसमनन्तरूपनिस्सयपुरेजातासेवनसम्पयुत्तनत्थिविगतपच्‍चया। तम्पि तेसं नवन्‍नं पच्‍चयानं अनुलोमतो अलब्भमानतं।

२. सहजातवारवण्णना

२३४-२४२.सहजातपच्‍चयकरणन्ति सहजातं पच्‍चयधम्मं पच्‍चयं कत्वा पवत्ति। सहजातायत्तभावगमनन्ति सहजाते पच्‍चयधम्मे आयत्तभावस्स गमनं पच्‍चयुप्पन्‍नस्स अत्तना सहजातपच्‍चयायत्तवुत्तिता । एत्थ च सहजातपच्‍चयसङ्खातं सहजातं करोतीति सहजातो, तथापवत्तो पच्‍चयुप्पन्‍नधम्मो। तत्थ पवत्तमानो सहजातसद्दो यस्मा तस्स पच्‍चयुप्पन्‍नस्स अत्तना सहजातं पच्‍चयधम्मं पच्‍चयं कत्वा पवत्तिं तदायत्तभावूपगमनञ्‍च वदतीति वुच्‍चति, तस्मा वुत्तं ‘‘सहजातसद्देन…पे॰… वुत्त’’न्ति। तस्स करणस्स गमनस्स वाति तस्स यथावुत्तस्स सहजातपच्‍चयकरणस्स सहजातायत्तभावूपगमनस्स वा। ‘‘कुसलं धम्मं सहजातो’’ति इमस्स कुसलं धम्मं सहजातं तंसहभावितञ्‍च पच्‍चयं कत्वाति अयमत्थोति आह ‘‘कुसलादीनं कम्मभावतो’’ति। सहजातपच्‍चयसहभावीनं पच्‍चयानं सङ्गण्हत्थञ्हेत्थ ‘‘सहजातायत्तभावगमनं वा’’ति वुत्तं।

तंकम्मभावतोति तेसं यथावुत्तपच्‍चयकरणतदायत्तभावगमनानं कम्मभावतो। अट्ठकथायं पन ‘‘कुसलं धम्मं सहजातोति कुसलं धम्मं पटिच्‍च तेन सहजातो हुत्वा’’ति पटिच्‍चसद्दं आहरित्वा अत्थो वुत्तो, तं ‘‘पटिच्‍चत्थो सहजातत्थो’’ति कत्वा वुत्तं। सहजातसद्दयोगे कुसलं धम्मन्ति उपयोगवचनस्स युत्ति न वुत्ता, ‘‘तेन सहजातो हुत्वा’’ति पन वुत्तत्ता करणत्थे उपयोगवचनन्ति दस्सितन्ति केचि। निस्सयवारे पन कुसलं धम्मं निस्सयत्थेन पच्‍चयं कत्वाति वदन्तेन इधापि ‘‘कुसलं धम्मं सहजातत्थेन पच्‍चयं कत्वा’’ति अयमत्थो वुत्तोयेव होति, पटिच्‍चसद्दाहरणम्पि इममेवत्थं ञापेतीति दट्ठब्बं। उपादारूपं किञ्‍चि भूतरूपस्स अनुपालकं उपत्थम्भकञ्‍च होन्तम्पि सहजातलक्खणेन न होति, तस्मा पटिच्‍चत्थं न फरतीति आह ‘‘पटिच्‍चाति इमिना वचनेन दीपितो पच्‍चयो न होती’’ति। निदस्सनवसेन वुत्तन्ति उदाहरणवसेन वुत्तं, न अनवसेसतोति अत्थो। यथावुत्तोति पटिच्‍चत्थफरणवसेन वुत्तो। यथा च उपादारूपं भूतरूपस्स उपादारूपस्स च पच्‍चयो न होति, एवं ठपेत्वा छ वत्थूनि सेसरूपानि अरूपधम्मानं पच्‍चयो न होतीति दस्सेन्तो ‘‘वत्थुवज्‍जानि रूपानि च अरूपान’’न्ति आह।

सहजातवारवण्णना निट्ठिता।

३. पच्‍चयवारवण्णना

२४३.पति-सद्दो पतिट्ठत्थं दीपेति ‘‘सारे पतिट्ठितो’’तिआदीसु, अय-सद्दो गतिं दीपेति ‘‘एति एत्थाति अयो’’ति।

भूतुपादारूपानि सह सङ्गण्हित्वा वुत्तं उपादारूपानं विय भूतरूपानि निस्सयो होतीति कत्वा। यदि एवं कस्मा अट्ठकथायं ‘‘महाभूते निस्साय चित्तसमुट्ठानं उपादारूप’’न्ति उपादारूपंयेव दस्सितन्ति आह ‘‘अट्ठकथायं पना’’तिआदि।

४. निस्सयवारवण्णना

३२९-३३७.निस्सयपच्‍चयभावन्ति निस्सयवारे वुत्तस्स सहजातपुरेजातस्स च निस्सयट्ठस्स धम्मस्स पच्‍चयभावं पच्‍चयवारेन नियमेतुन्ति योजना। तथा पच्‍चयवारे ‘‘पच्‍चया’’ति वुत्तस्स पच्‍चयधम्मस्स सहजातपुरेजातभावं निस्सयवारेन नियमेतुन्ति योजना। नियमनञ्‍चेत्थ पच्‍चयट्ठनिस्सयट्ठानं परियायन्तरेन पकासितत्ता अत्थतो भेदाभावदस्सनन्ति वेदितब्बो। तेन वुत्तं ‘‘पच्‍चयत्तं नाम निस्सयत्तं, निस्सयत्तं नाम पच्‍चयत्त’’न्ति।

निस्सयवारवण्णना निट्ठिता।

५. संसट्ठवारवण्णना

३५१-३६८.साति सवत्थुका पटिसन्धि। इधापीति इमस्मिं संसट्ठवारेपि। अधिपतिपुरेजातासेवनेसु अनुलोमतो नकम्मनविपाकनझाननविप्पयुत्तेसु पच्‍चनीयतो ठितेसु न लब्भति, अञ्‍ञेसु सहजातादीसु अनुलोमतो हेतुआदीसु पच्‍चनीयतो च अनुलोमतो च ठितेसु लब्भतीति। तेनाह ‘‘लब्भमानपच्‍चयेसू’’ति। इमस्स विसेसस्साति इमस्स यथावुत्तस्स विसेसस्स दस्सनत्थं उद्धटा, तस्मा तादिसस्स विसेसस्स दस्सेतब्बस्स अभावतो वत्थुविरहिता पटिसन्धि अनुद्धटा, न विप्पयुत्ते पच्‍चनीयतो ठिते अभावतोति अत्थो। हेतुपच्‍चयविरहितमत्तदस्सनत्थन्ति इमिना भूतकथनं अहेतुकग्गहणं न ब्यभिचारनिवत्तनन्ति दस्सेति। ‘‘अहेतुकविपाककिरियवसेना’’ति भवितब्बं हेतुपरियन्तत्ता मग्गस्स।

६. सम्पयुत्तवारवण्णना

३९२-४००.सदिसं सम्पयुत्तन्ति ‘‘यं सदिसं, तं संसट्ठ’’न्ति वुच्‍चमानं सम्पयुत्तं न होति ‘‘संसट्ठा योजिता हया’’तिआदीसु। असंसट्ठं वोकिण्णन्ति यं न संसट्ठं अन्तरन्तरा उप्पज्‍जमानेन वोकिण्णम्पि विमिस्सताय सम्पयुत्तन्ति वुच्‍चमानं, तं संसट्ठं न होति ‘‘या सा वीमंसा…पे॰… कोसज्‍जसम्पयुत्ता’’तिआदीसु। एवं असम्पयुत्तस्सपि संसट्ठपरियायो असंसट्ठस्स च सम्पयुत्तपरियायो अत्थीति तदुभयं इतरेतरं नियमेतीति दस्सनत्थं वारद्वयदेसनाति दस्सेन्तो आह ‘‘उभयं…पे॰… नियामकं होती’’ति, संसट्ठसद्दो हि वोकिण्णट्ठो नत्थि, सम्पयुत्तसद्दो च सदिसत्थो, तस्मा यथा संसट्ठसद्दो सम्पयुत्तसद्दापेक्खो सदिसत्थतो विनिवत्तित्वा एकुप्पादादिसभावमेव अत्थं बोधेति, एवं सम्पयुत्तसद्दोपि संसट्ठसद्दापेक्खो वोकिण्णट्ठतो विनिवत्तित्वाति अञ्‍ञमञ्‍ञापेक्खस्स सद्दद्वयस्स अञ्‍ञमञ्‍ञनियामकता वेदितब्बा।

सम्पयुत्तवारवण्णना निट्ठिता।

७. पञ्हावारविभङ्गवण्णना

४०१-४०३.तेपच्‍चयेति ते हेतुआदिके पच्‍चये। पटिपाटियाति एत्थ पच्‍चयपटिपाटिया कुसलादिपदपटिपाटिया वाति आसङ्कायं उभयवसेनपि अत्थो युज्‍जतीति दस्सेन्तो पठमं ताव सन्धायाह ‘‘यथाक्‍कमेना’’तिआदि। तस्सत्थो – ‘‘हेतुपच्‍चयो आरम्मणपच्‍चयो’’तिआदिना नयेन देसनाक्‍कमेन याय पटिपाटिया पटिच्‍चवारे पच्‍चया आगता, तदनुरूपं ते दस्सेतुन्ति। दुतियं पन दस्सेतुं ‘‘कुसलो कुसलस्सा’’तिआदि वुत्तं। सा पनायं पदपटिपाटि यस्मा न कुसलपददस्सनमत्तेन दस्सिता होति, तस्मा तं एकदेसेन सकलं नयतो दस्सेन्तो आह ‘‘कुसलो कुसलस्साति…पे॰… होती’’ति। तेनाति निदस्सनमत्तेन ‘‘कुसलो कुसलस्सा’’ति पदेन। सब्बो पभेदोति यं तत्थ तत्थ पच्‍चये ‘‘कुसलो कुसलस्सा’’तिआदिको यत्तको पभेदो विस्सज्‍जनं लभति, सो सब्बो पभेदोति अत्थो। ते पच्‍चये पटिपाटिया दस्सेतुन्ति ते हेतुआदिपच्‍चये कुसलादिपदपटिपाटिया दस्सेतुं।

पञ्हावारस्स घटने अनुलोमगणना

४३९.एत्थाति अब्याकतमूलके। यदि एवन्ति यदि कुसलाकुसलमूलेहि अलब्भमानम्पि लब्भति, एवं सन्ते। गणनमत्तसामञ्‍ञतो, न पच्‍चयसामञ्‍ञतोति अधिप्पायो।

पच्‍चनीयुद्धारवण्णना

५२७.नहेतुपच्‍चयेनाति एत्थ न-कारो अञ्‍ञत्थोति दस्सेन्तो ‘‘हेतुपच्‍चयतो अञ्‍ञेन पच्‍चयेना’’ति आह। अग्गहितग्गहणेनाहि सहजातादिसङ्गहवसेन अग्गहितानं गहणेन। अट्ठ होन्तीति इमिस्सा पाळिया आगता आरम्मणादयो अट्ठ पच्‍चया होन्ति। तेसूति अट्ठसु पच्‍चयेसु। तीहीति आरम्मणसहजातउपनिस्सयपच्‍चयेहि। द्वीहीति आरम्मणपच्‍चयउपनिस्सयपच्‍चयेहि। तस्मिं तस्मिं पच्‍चयेति तस्मिं तस्मिं हेतुआदिके पच्‍चये। ततो हेतुआदिपच्‍चयतो। यथायोगं योजेतब्बाति यस्मिं पच्‍चये पच्‍चनीयतो ठिते ये पच्‍चया अनुलोमतो योजनं लभन्ति, ते योजेतब्बाति अत्थो।

द्विन्‍नन्ति अनन्तरूपनिस्सयस्स पकतूपनिस्सयस्साति इमेसं द्विन्‍नं। वत्थुपुरेजातस्स वसेन पुरेजातं आरम्मणपुरेजातस्स आरम्मणेन सङ्गहितत्ता। अञ्‍ञिस्सा चेतनायाति नानाक्खणिककम्मपच्‍चयभावेनेव पवत्ताय चेतनाय। अरूपाहारा अपरिच्‍चत्तसहजातभावा एव आहारपच्‍चयो होन्ति, रूपाहारो ठितिप्पत्तोयेवाति वुत्तं ‘‘सहजाततो अञ्‍ञस्स कबळीकाराहारस्स वसेन आहारो’’ति। सहजाततो अञ्‍ञस्साति च इदं अरूपाहारनिवत्तनत्थं वुत्तं, न कबळीकाराहारविसेसनिवत्तनत्थं तादिसस्सेव तस्स अभावतो। न हि रूपाहारो सहजातपच्‍चयो होति, नापि पुरेजातपच्‍चयो होति । यथा सहजातानं सहजातपच्‍चयो न होति, एवं पुरेजातानं पच्छाजातपच्‍चयो न होति, पच्छाजातानञ्‍च पुरेजातपच्‍चयो न होति। कस्मा? तादिसस्स पच्‍चयलक्खणस्स अभावतो। येसञ्हि यो जनको, न तेहि तस्स सहजातता अत्थि, नापि पुरेजातता पुरेजातपच्‍चयलक्खणयुत्ता, पच्छाजातपच्‍चयताय पन वत्तब्बमेव नत्थि रूपधम्मत्ता। उपत्थम्भकत्तेपि एसेव नयो, तस्मा सहजातादिविधुरो एव तस्स पच्‍चयभावो वेदितब्बो। तेनेव हि ‘‘सहजातं पुरेजातं पच्छाजातं आहारं इन्द्रिय’’न्ति एत्थ रूपजीवितिन्द्रियं विय रूपाहारो विसुं गहितो। तथा चाह ‘‘रूपाहारो…पे॰… आहारपच्‍चयोव होती’’ति। सहजाततो पुरेजाततो च अञ्‍ञस्स रूपजीवितिन्द्रियस्साति एत्थ रूपाहारे वुत्तनयेनेव अत्थो वेदितब्बो।

एवञ्‍च कत्वाति पुरिमपुरिमेहि असङ्गहितसङ्गण्हनवसेन पच्छिमपच्छिमानं गहितत्ता तथा रूपाहारस्स जीवितिन्द्रियस्स च वसेन इध आहारिन्द्रियपच्‍चयानं गहितत्ताति अत्थो, अञ्‍ञथा ‘‘आहारपच्‍चयेन पच्‍चयो, इन्द्रियपच्‍चयेन पच्‍चयो’’ति वत्तब्बं सियाति अधिप्पायो। तेनेवाह ‘‘आरम्मण…पे॰… इच्‍चेव वुत्त’’न्ति। तदञ्‍ञाभावाति ततो आरम्मणादिपच्‍चयतो अञ्‍ञस्स इधाधिप्पेतकम्मादिपच्‍चयस्स कुसले अभावा। तस्माति यस्मा आरम्मणतो अञ्‍ञेसं द्विन्‍नं वसेन उपनिस्सयो वुत्तो, तस्मा ‘‘आरम्मणाधिपति आरम्मणपच्‍चये सङ्गहं गच्छती’’ति वत्तब्बं, न आरम्मणूपनिस्सयेति अधिप्पायो। यदि एवं कस्मा परित्तत्तिकपञ्हावारपच्‍चनीये आरम्मणं न वुत्तं। उपनिस्सयेन हि असङ्गहितत्ते तं वत्तब्बमेव सियाति चोदनं सन्धायाह ‘‘यं पना’’तिआदि। तत्थ पुरिमेहि असङ्गहितवसेन वुत्तानन्ति पुरिमेहि पच्‍चयेहि असङ्गहितवसेन वुत्तानं पच्छिमानं पच्‍चयानं। सङ्गहितविवज्‍जनाभावतोति अत्तना समानलक्खणताय सङ्गहितस्स पच्‍चयस्स विवज्‍जनाभावतो, विवज्‍जने कारणं नत्थीति अत्थो। उपनिस्सयतो अञ्‍ञारम्मणाभावतोति अप्पमाणो धम्मो अप्पमाणस्स धम्मस्स आरम्मणं होन्तो आरम्मणूपनिस्सयोव होति आरम्मणाधिपतिभावतोति अत्थो। यथा आरम्मणे गहिते आरम्मणूपनिस्सयो गहितोव होति बलवारम्मणभावतो , एवं आरम्मणूपनिस्सये गहिते आरम्मणं गहितमेव होति तंसभावत्ताति तत्थ तं विसुं न उद्धटन्ति दट्ठब्बं। तेनाह ‘‘न पन आरम्मणूपनिस्सयस्स आरम्मणे असङ्गहितत्ता’’ति।

पच्‍चनीयगणनवण्णना

नहेतुमूलकवण्णना

५३२.अधिपतिपच्‍चयादिभूतो आरम्मणपच्‍चयोति आरम्मणआरम्मणाधिपतिआरम्मणूपनिस्सये वदति। ते च यस्मा आरम्मणसभावा एव, तस्मा वुत्तं ‘‘परिहायतियेवा’’ति। पन्‍नरससूति दुतिये सहजातपच्‍चये ‘‘हेतुपच्‍चयो’’तिआदिना वुत्तेसु पन्‍नरससु। एकादसन्‍नं वसेनाति सहजातपच्‍चयो, सहजातताविसिट्ठा अधिपतिनिस्सयकम्माहारिन्द्रियत्थिअविगतहेतुझानमग्गा चाति इमेसं एकादसन्‍नं वसेन। सहजाते अन्तोगधा हेतुआदयो। तस्मिं पटिक्खित्तेति तस्मिं सहजाते पटिक्खित्ते पच्‍चनीयतो ठिते। अनन्तोगधा सहजाते , के पन तेति आह ‘‘आरम्मणाधिपतिपुरेजातनिस्सयादयो’’ति। आरम्मणादिआकारेनाति आरम्मणपुरेजातनिस्सयनानाक्खणिककम्मादिआकारेन।

तस्मिं पटिक्खित्तेति तस्मिं सहजातपच्‍चये पटिक्खित्ते। इमे वाराति सहजातं पुरेजातन्ति विस्सज्‍जितवारा। एते निस्सयादयोति सहजातताविसिट्ठे निस्सयादिके वदति, न इतरे। तेनाह ‘‘यस्मा च…पे॰… पटिक्खेपेन पटिक्खित्ता’’ति।

निस्सयादिभूतञ्‍च सहजातपच्‍चयं ठपेत्वाति एतेन ‘‘ठपेत्वा सहजातपच्‍चय’’न्ति एत्थ अन्तोगधनिस्सयादिभावोयेव सहजातपच्‍चयो गहितोति दस्सेति। निस्सयादीति आदि-सद्देन हेतुआदीनं सङ्गहो दट्ठब्बो। अञ्‍ञमञ्‍ञपच्‍चयधम्मवसेन पवत्तिसब्भावतोति अञ्‍ञमञ्‍ञपच्‍चयधम्मवसेन सहजातादीहि पवत्तिसब्भावतो अञ्‍ञमञ्‍ञे पटिक्खित्ते ‘‘कुसलो कुसलाब्याकतस्सा’’ति वारो परिहायति। तेसं तेसं पच्‍चयुप्पन्‍नानन्ति इदं सामञ्‍ञवचनम्पि ‘‘अञ्‍ञमञ्‍ञपच्‍चयसङ्गहं गता’’ति वचनतो अञ्‍ञमञ्‍ञपच्‍चयलाभीनंयेव गहणं सियाति आसङ्कं निवत्तेतुं ‘‘कुसलो च कुसलस्सा’’तिआदि वुत्तं। समुदायभूतोति चतुक्खन्धसमुदायभूतो। एकदेसभूतेहीति तस्सेव एकदेसभूतेहि। ‘‘कुसलो पना’’तिआदि ‘‘नअञ्‍ञमञ्‍ञपच्‍चयेन…पे॰… परिहायती’’ति इमस्स अट्ठकथावचनस्स समाधानवचनं।

रूपक्खन्धेकदेसोव होन्ति रूपाहाररूपिन्द्रियवसेन, ‘‘एकन्तेन विप्पयुत्तपच्‍चयधम्मेही’’ति वुत्तधम्मा ‘‘ते’’ति पच्‍चामट्ठाति आह ‘‘तेति ते विप्पयुत्तपच्‍चयधम्मा’’ति।

अनुलोमपच्‍चनीयवण्णना

५५०.इमेहेवाति ‘‘कुसलो कुसलस्स, अकुसलो अकुसलस्सा’’ति इमेहि एव समाना होन्ति कुसलादितासामञ्‍ञेन। तेन वुत्तं ‘‘अत्थाभावतो पन न अनुरूपा’’ति। ‘‘कुसलो कुसलस्सा’’तिआदिना सतिपि उद्देसतो सामञ्‍ञे येभुय्येन सिया विभङ्गे विसेसोति आह ‘‘यथायोगं निद्देसतो चा’’ति।

पच्‍चनीयानुलोमवण्णना

६३१.परिहापनगणनायाति परिहापेतब्बगणनाय समानत्तञ्‍च न एकन्तिकं ऊनतमभावस्सपि सम्भवतोति अधिप्पायो। तेनाह ‘‘नहेतुनारम्मणदुकस्सा’’तिआदि। तत्थ सद्धिं योजियमानेन ऊनतरगणनेन अधिपतिपच्‍चयेन परिहीनापीति योजना। सद्धिं परिहीनापीति वा इमस्मिं पक्खे ‘‘अधिपतिपच्‍चयेना’’ति इत्थम्भूतलक्खणे करणवचनं। एतन्ति लक्खणं।

अट्ठानन्ति अनुलोमतो अट्ठानं अतिट्ठनं। तिट्ठन्तीति अनुलोमतोति योजना। तेसन्ति हेतुआदीनं। इतरेसूति यादिसा अधिप्पेता, ते दस्सेतुं ‘‘अधिपती’’तिआदि वुत्तं। इमानि द्वेति ‘‘कुसलाब्याकता अब्याकतस्स, अकुसलाअब्याकता अब्याकतस्सा’’ति इमानि च द्वे।

नहेतुमूलकवण्णना निट्ठिता।

२. वेदनात्तिकवण्णना

१.वेदनात्तिके पटिच्‍चादिनियमन्ति तिकपदसम्बन्धवसेन पटिच्‍चवारादीसु वत्तब्बं पटिच्‍चसहजातट्ठादिनियमनं न लभन्ति वेदनारूपनिब्बानानि। कस्मा? तिकमुत्तकत्ता। तथा पच्‍चयुप्पन्‍नवचनं। न हि सक्‍का वत्तुं वेदनं रूपं निब्बानञ्‍च सन्धाय ‘‘सुखाय वेदनाय सम्पयुत्तं धम्मं पटिच्‍च सुखाय वेदनाय सम्पयुत्तो उप्पज्‍जती’’ति। तिकधम्मानन्ति वेदनात्तिकधम्मानं। तत्थाति हेतुपच्‍चयादीसु। यथानुरूपतोति वेदनादीसु यो यस्स वेदनाय सम्पयुत्तधम्मस्स आरम्मणादिपच्‍चयो भवितुं युत्तो, तदनुरूपतो। आरम्मणादीति आदि-सद्देन आरम्मणाधिपतिआरम्मणूपनिस्सयादिके सङ्गण्हाति।

३. विपाकत्तिकवण्णना

१-२३.सोयेवाति अकतसमासेहि पदेहि यो अत्थो वुच्‍चति, सोयेव अत्थो वुत्तो होति।

४. उपादिन्‍नत्तिकवण्णना

५१.अधिपतिधम्मोयेव लोकुत्तरधम्मेसु नाधिपतिपच्‍चया उप्पज्‍जतीति आह ‘‘नाधिपतिपच्‍चयाति सयं अधिपतिभूतत्ता’’ति। ननु अधिपतिधम्मोपि आरम्मणाधिपतिवसेन अधिपतिपच्‍चयेन उप्पज्‍जतीति चोदनं सन्धायाह ‘‘अविरहिता…पे॰… दस्सेती’’ति। अविरहितारम्मणाधिपतीसूति लोकुत्तरे सन्धायाह। ते हि निब्बानारम्मणत्ता एवं वुच्‍चति। पि-सद्देन को पन वादो विरहितारम्मणाधिपतिअनेकन्तारम्मणाधिपतीसूति दस्सेति।

६. वितक्‍कत्तिकवण्णना

२२.वितक्‍कत्तिके सत्तसु मूलकेसूति ‘‘सवितक्‍कसविचारं धम्मं पटिच्‍चा’’तिआदिना आगतानि तीणि एककानि, तीणि दुकानि, एकं तिकन्ति एवं एकमूलकानि यानि सत्तमूलकानि, तेसु। यथाक्‍कमन्ति पाळियं आगतानुक्‍कमेन। सत्ताति पठमे एकके सत्त। पञ्‍चाति दुतिये पञ्‍च। तानिमानि हेतुपच्‍चये वुत्तनयेन वेदितब्बानि। इध पन पवत्तिवसेनेव योजेतब्बं। तीणीतिआदीसु ततिये तीणि, चतुत्थे एकं, पञ्‍चमे तीणि, छट्ठेपि तीणि, सत्तमे एकं। तानि पन यथाक्‍कमं ततियपदं पटिच्‍च ततियपददुतियपदतदुभयवसेन, पठमपदततियपदानि पटिच्‍च ततियपदवसेन, पठमपददुतियपदानि पटिच्‍च पठमपदततियपदतदुभयवसेन, दुतियपदततियपदानि पटिच्‍च पठमपदततियपदतदुभयवसेन, पठमदुतियततियपदानि पटिच्‍च ततियपदवसेनेव वेदितब्बानि। अञ्‍ञमञ्‍ञे अट्ठवीसातिआदीसुपि इमिनाव नयेन गणना वेदितब्बा। एवन्ति यथावुत्तं गणनं पच्‍चामसति। दुतियततियमूलकेसु एकं एकन्ति दुतियमूलके एकं, ततियमूलके एकन्ति योजेतब्बं। तथा आसेवनेति यथा पुरेजाते एकादस, तथा आसेवनेति अत्थो। अञ्‍ञानीति अधिपतिअञ्‍ञमञ्‍ञपुरेजातासेवनतो अञ्‍ञेसु पच्‍चयेसु गणनानि। हेतुआरम्मणसदिसानीति हेतुआरम्मणपच्‍चयेसु गणनासदिसानि।

८. दस्सनेनपहातब्बत्तिकवण्णना

पटिच्‍चसमुप्पादविभङ्गेविचारितनयेन विचारेतब्बन्ति इदं ‘‘न च पुथुज्‍जनानं दस्सनेन पहातुं सक्‍कुणेय्यो, इतरेसं न केनचि पच्‍चयेन पच्‍चयो न होन्तीति सक्‍का वत्तु’’न्तिआदिना अत्तना आनीतं अमतग्गपथविनिच्छयं सन्धाय वुत्तं। तत्थ यं वत्तब्बं, तम्पि पटिच्‍चसमुप्पादटीकाय अत्थविवरणे वुत्तमेव, तस्मा तत्थ वुत्तनयेनेव वेदितब्बं।

दस्सनेनपहातब्बत्तिकवण्णना निट्ठिता।

पट्ठानपकरण-अनुटीका समत्ता।

इति पञ्‍चपकरणमूलटीकाय लीनत्थवण्णना

अनुटीका समत्ता।

अभिधम्मस्स अनुटीका समत्ता।