(१९) ४. अरियमग्गवग्गो
१. अरियमग्गसुत्तं
१८९.‘‘अरियमग्गञ्च वो, भिक्खवे, देसेस्सामि अनरियमग्गञ्च। तं सुणाथ…पे॰… कतमो च, भिक्खवे, अनरियो मग्गो? पाणातिपातो…पे॰… मिच्छादिट्ठि – अयं वुच्चति, भिक्खवे, अनरियो मग्गो।
‘‘कतमो च , भिक्खवे, अरियो मग्गो? पाणातिपाता वेरमणी…पे॰… सम्मादिट्ठि – अयं वुच्चति, भिक्खवे, अरियो मग्गो’’ति। पठमं।
२. कण्हमग्गसुत्तं
१९०.‘‘कण्हमग्गञ्च वो, भिक्खवे, देसेस्सामि सुक्कमग्गञ्च। तं सुणाथ…पे॰… कतमो च, भिक्खवे, कण्हो मग्गो? पाणातिपातो…पे॰… मिच्छादिट्ठि – अयं वुच्चति, भिक्खवे, कण्हो मग्गो।
‘‘कतमो च, भिक्खवे, सुक्को मग्गो? पाणातिपाता वेरमणी…पे॰… सम्मादिट्ठि – अयं वुच्चति, भिक्खवे, सुक्को मग्गो’’ति। दुतियं।
३. सद्धम्मसुत्तं
१९१.‘‘सद्धम्मञ्च वो, भिक्खवे, देसेस्सामि असद्धम्मञ्च। तं सुणाथ…पे॰… कतमो च, भिक्खवे, असद्धम्मो? पाणातिपातो…पे॰… मिच्छादिट्ठि – अयं वुच्चति, भिक्खवे, असद्धम्मो।
‘‘कतमो च, भिक्खवे, सद्धम्मो? पाणातिपाता वेरमणी…पे॰… सम्मादिट्ठि – अयं वुच्चति, भिक्खवे, सद्धम्मो’’ति। ततियं।
४. सप्पुरिसधम्मसुत्तं
१९२.‘‘सप्पुरिसधम्मञ्च वो, भिक्खवे, देसेस्सामि असप्पुरिसधम्मञ्च। तं सुणाथ…पे॰… कतमो च, भिक्खवे, असप्पुरिसधम्मो? पाणातिपातो…पे॰… मिच्छादिट्ठि – अयं वुच्चति, भिक्खवे, असप्पुरिसधम्मो।
‘‘कतमो च, भिक्खवे, सप्पुरिसधम्मो? पाणातिपाता वेरमणी…पे॰… सम्मादिट्ठि – अयं वुच्चति, भिक्खवे, सप्पुरिसधम्मो’’ति। चतुत्थं।
५. उप्पादेतब्बधम्मसुत्तं
१९३.‘‘उप्पादेतब्बञ्च वो, भिक्खवे, धम्मं देसेस्सामि न उप्पादेतब्बञ्च। तं सुणाथ…पे॰… कतमो च, भिक्खवे, न उप्पादेतब्बो धम्मो? पाणातिपातो…पे॰… मिच्छादिट्ठि – अयं वुच्चति, भिक्खवे, न उप्पादेतब्बो धम्मो।
‘‘कतमो च, भिक्खवे, उप्पादेतब्बो धम्मो? पाणातिपाता वेरमणी…पे॰… सम्मादिट्ठि – अयं वुच्चति, भिक्खवे, उप्पादेतब्बो धम्मो’’ति। पञ्चमं।
६. आसेवितब्बधम्मसुत्तं
१९४.‘‘आसेवितब्बञ्च वो, भिक्खवे, धम्मं देसेस्सामि नासेवितब्बञ्च। तं सुणाथ…पे॰… कतमो च, भिक्खवे, नासेवितब्बो धम्मो? पाणातिपातो…पे॰… मिच्छादिट्ठि – अयं वुच्चति, भिक्खवे, नासेवितब्बो धम्मो।
‘‘कतमो च, भिक्खवे, आसेवितब्बो धम्मो? पाणातिपाता वेरमणी…पे॰… सम्मादिट्ठि – अयं वुच्चति, भिक्खवे, आसेवितब्बो धम्मो’’ति। छट्ठं।
७. भावेतब्बधम्मसुत्तं
१९५.‘‘भावेतब्बञ्च वो, भिक्खवे, धम्मं देसेस्सामि न भावेतब्बञ्च। तं सुणाथ…पे॰… कतमो च, भिक्खवे, न भावेतब्बो धम्मो? पाणातिपातो …पे॰… मिच्छादिट्ठि – अयं वुच्चति, भिक्खवे, न भावेतब्बो धम्मो।
‘‘कतमो च, भिक्खवे, भावेतब्बो धम्मो? पाणातिपाता वेरमणी…पे॰… सम्मादिट्ठि – अयं वुच्चति, भिक्खवे, भावेतब्बो धम्मो’’ति। सत्तमं।
८. बहुलीकातब्बसुत्तं
१९६.‘‘बहुलीकातब्बञ्च वो, भिक्खवे, धम्मं देसेस्सामि न बहुलीकातब्बञ्च। तं सुणाथ…पे॰… कतमो च, भिक्खवे, न बहुलीकातब्बो धम्मो? पाणातिपातो…पे॰… मिच्छादिट्ठि – अयं वुच्चति, भिक्खवे, न बहुलीकातब्बो धम्मो।
‘‘कतमो च, भिक्खवे, बहुलीकातब्बो धम्मो? पाणातिपाता वेरमणी…पे॰… सम्मादिट्ठि – अयं वुच्चति, भिक्खवे, बहुलीकातब्बो धम्मो’’ति। अट्ठमं।
९. अनुस्सरितब्बसुत्तं
१९७.‘‘अनुस्सरितब्बञ्च वो, भिक्खवे, धम्मं देसेस्सामि नानुस्सरितब्बञ्च। तं सुणाथ…पे॰… कतमो च, भिक्खवे, नानुस्सरितब्बो धम्मो? पाणातिपातो…पे॰… मिच्छादिट्ठि – अयं वुच्चति, भिक्खवे, नानुस्सरितब्बो धम्मो।
‘‘कतमो च, भिक्खवे, अनुस्सरितब्बो धम्मो? पाणातिपाता वेरमणी…पे॰… सम्मादिट्ठि – अयं वुच्चति, भिक्खवे, अनुस्सरितब्बो धम्मो’’ति। नवमं।
१०. सच्छिकातब्बसुत्तं
१९८.‘‘सच्छिकातब्बञ्च वो, भिक्खवे, धम्मं देसेस्सामि न सच्छिकातब्बञ्च। तं सुणाथ…पे॰… कतमो च, भिक्खवे, न सच्छिकातब्बो धम्मो? पाणातिपातो…पे॰… मिच्छादिट्ठि – अयं वुच्चति, भिक्खवे, न सच्छिकातब्बो धम्मो।
‘‘कतमो च, भिक्खवे, सच्छिकातब्बो धम्मो? पाणातिपाता वेरमणी…पे॰… सम्मादिट्ठि – अयं वुच्चति, भिक्खवे, सच्छिकातब्बो धम्मो’’ति। दसमं।
अरियमग्गवग्गो चतुत्थो।