२१. अज्झत्तारम्मणत्तिकं
१. पटिच्चवारो
१. पच्चयानुलोमं
१. विभङ्गवारो
हेतुपच्चयो
१.अज्झत्तारम्मणं धम्मं पटिच्च अज्झत्तारम्मणो धम्मो उप्पज्जति हेतुपच्चया – अज्झत्तारम्मणं एकं खन्धं पटिच्च तयो खन्धा…पे॰… द्वे खन्धे…पे॰… पटिसन्धिक्खणे अज्झत्तारम्मणं एकं खन्धं पटिच्च तयो खन्धा…पे॰… द्वे खन्धे…पे॰…। (१)
बहिद्धारम्मणं धम्मं पटिच्च बहिद्धारम्मणो धम्मो उप्पज्जति हेतुपच्चया – बहिद्धारम्मणं एकं खन्धं पटिच्च तयो खन्धा…पे॰… द्वे खन्धे…पे॰… पटिसन्धिक्खणे बहिद्धारम्मणं एकं खन्धं पटिच्च तयो खन्धा…पे॰… द्वे खन्धे…पे॰…। (१)
आरम्मणपच्चयादि
२.अज्झत्तारम्मणं धम्मं पटिच्च अज्झत्तारम्मणो धम्मो उप्पज्जति आरम्मणपच्चया…पे॰… अविगतपच्चया (संखित्तं)।
१. पच्चयानुलोमं
२. सङ्ख्यावारो
३.हेतुपच्चया आरम्मणे द्वे (संखित्तं, सब्बत्थ द्वे), अविगते द्वे (एवं गणेतब्बं)।
अनुलोमं।
२. पच्चयपच्चनीयं
१. विभङ्गवारो
नहेतुपच्चयो
४.अज्झत्तारम्मणं धम्मं पटिच्च अज्झत्तारम्मणो धम्मो उप्पज्जति नहेतुपच्चया – अहेतुकं अज्झत्तारम्मणं एकं खन्धं पटिच्च तयो खन्धा…पे॰… द्वे खन्धे…पे॰… अहेतुकपटिसन्धिक्खणे अज्झत्तारम्मणं एकं खन्धं पटिच्च तयो खन्धा…पे॰… द्वे खन्धे…पे॰… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो। (१)
बहिद्धारम्मणं धम्मं पटिच्च बहिद्धारम्मणो धम्मो उप्पज्जति नहेतुपच्चया – अहेतुकं बहिद्धारम्मणं एकं खन्धं पटिच्च तयो खन्धा…पे॰… द्वे खन्धे…पे॰… अहेतुकपटिसन्धिक्खणे…पे॰… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो। (१)
नअधिपतिपच्चयादि
५.अज्झत्तारम्मणं धम्मं पटिच्च अज्झत्तारम्मणो धम्मो उप्पज्जति नअधिपतिपच्चया … (अनुलोमसहजातसदिसं, निन्नानाकरणं) नपुरेजातपच्चया – अरूपे अज्झत्तारम्मणं एकं खन्धं पटिच्च…पे॰… पटिसन्धिक्खणे…पे॰…। (१)
६.बहिद्धारम्मणं धम्मं पटिच्च बहिद्धारम्मणो धम्मो उप्पज्जति नपुरेजातपच्चया – अरूपे बहिद्धारम्मणं एकं खन्धं पटिच्च तयो खन्धा…पे॰…। पटिसन्धिक्खणे…पे॰… नपच्छाजातपच्चया… नआसेवनपच्चया… (सहजातसदिसं) नकम्मपच्चया – अज्झत्तारम्मणे खन्धे पटिच्च अज्झत्तारम्मणा चेतना।
बहिद्धारम्मणं धम्मं पटिच्च बहिद्धारम्मणो धम्मो उप्पज्जति नकम्मपच्चया – बहिद्धारम्मणे खन्धे पटिच्च बहिद्धारम्मणा चेतना।
नविपाकपच्चयादि
७.अज्झत्तारम्मणं धम्मं पटिच्च अज्झत्तारम्मणो धम्मो उप्पज्जति नविपाकपच्चया (पटिसन्धि नत्थि)… नझानपच्चया…पे॰… पञ्चविञ्ञाणसहगतं अज्झत्तारम्मणं एकं…पे॰…। (१)
बहिद्धारम्मणं धम्मं पटिच्च बहिद्धारम्मणो धम्मो उप्पज्जति नझानपच्चया – पञ्चविञ्ञाणसहगतं बहिद्धारम्मणं एकं खन्धं पटिच्च तयो खन्धा…पे॰… नमग्गपच्चया (नहेतुसदिसो। मोहो नत्थि)… नविप्पयुत्तपच्चया – अरूपे अज्झत्तारम्मणं एकं खन्धं पटिच्च तयो खन्धा…पे॰…। (१)
बहिद्धारम्मणं धम्मं पटिच्च बहिद्धारम्मणो धम्मो उप्पज्जति नविप्पयुत्तपच्चया – अरूपे बहिद्धारम्मणं एकं खन्धं पटिच्च तयो खन्धा…पे॰…। (१)
२. पच्चयपच्चनीयं
२. सङ्ख्यावारो
८.नहेतुया द्वे, नअधिपतिया द्वे, नपुरेजाते द्वे, नपच्छाजाते द्वे, नआसेवने नकम्मे नविपाके नझाने नमग्गे नविप्पयुत्ते द्वे (एवं गणेतब्बं)।
पच्चनीयं।
३. पच्चयानुलोमपच्चनीयं
९.हेतुपच्चया नअधिपतिया द्वे…पे॰… नविपाके द्वे, नविप्पयुत्ते द्वे (एवं गणेतब्बं)।
अनुलोमपच्चनीयं।
४. पच्चयपच्चनीयानुलोमं
१०.नहेतुपच्चया आरम्मणे द्वे, अनन्तरे द्वे, समनन्तरे द्वे…पे॰… मग्गे द्वे…पे॰… अविगते द्वे (एवं गणेतब्बं)।
पच्चनीयानुलोमं।
पटिच्चवारो।
२-६. सहजात-पच्चय-निस्सय-संसट्ठ-सम्पयुत्तवारो
(सहजातवारोपि पच्चयवारोपि निस्सयवारोपि संसट्ठवारोपि सम्पयुत्तवारोपि पटिच्चवारसदिसा।)
७. पञ्हावारो
१. पच्चयानुलोमं
१. विभङ्गवारो
हेतुपच्चयो
११.अज्झत्तारम्मणो धम्मो अज्झत्तारम्मणस्स धम्मस्स हेतुपच्चयेन पच्चयो – अज्झत्तारम्मणा हेतू सम्पयुत्तकानं खन्धानं हेतुपच्चयेन पच्चयो। पटिसन्धिक्खणे अज्झत्तारम्मणा हेतू सम्पयुत्तकानं खन्धानं हेतुपच्चयेन पच्चयो। (१)
बहिद्धारम्मणो धम्मो बहिद्धारम्मणस्स धम्मस्स हेतुपच्चयेन पच्चयो – बहिद्धारम्मणा हेतू सम्पयुत्तकानं खन्धानं…पे॰… पटिसन्धिक्खणे…पे॰…। (१)
आरम्मणपच्चयो
१२.अज्झत्तारम्मणो धम्मो अज्झत्तारम्मणस्स धम्मस्स आरम्मणपच्चयेन पच्चयो – अज्झत्तं विञ्ञाणञ्चायतनं पच्चवेक्खति, नेवसञ्ञानासञ्ञायतनं पच्चवेक्खति, अज्झत्तारम्मणं अज्झत्तं दिब्बं चक्खुं पच्चवेक्खति, दिब्बं सोतधातुं…पे॰… इद्धिविधञाणं…पे॰… पुब्बेनिवासानुस्सतिञाणं…पे॰… यथाकम्मूपगञाणं…पे॰… अनागतंसञाणं पच्चवेक्खति। अरिया अज्झत्तारम्मणे पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति। अज्झत्तारम्मणे अज्झत्ते खन्धे अनिच्चतो…पे॰… विपस्सति, अस्सादेति अभिनन्दति, तं आरब्भ अज्झत्तारम्मणो रागो उप्पज्जति…पे॰… दोमनस्सं उप्पज्जति। अज्झत्तारम्मणा अज्झत्ता खन्धा पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो। (१)
अज्झत्तारम्मणो धम्मो बहिद्धारम्मणस्स धम्मस्स आरम्मणपच्चयेन पच्चयो – बहिद्धा विञ्ञाणञ्चायतनं पच्चवेक्खति, नेवसञ्ञानासञ्ञायतनं पच्चवेक्खति। अज्झत्तारम्मणं बहिद्धा दिब्बं चक्खुं पच्चवेक्खति, दिब्बं सोतधातुं…पे॰… इद्धिविधञाणं…पे॰… पुब्बेनिवासानुस्सतिञाणं…पे॰… यथाकम्मूपगञाणं…पे॰… अनागतंसञाणं पच्चवेक्खति, अज्झत्तारम्मणे बहिद्धा खन्धे अनिच्चतो दुक्खतो अनत्ततो विपस्सति…पे॰… चेतोपरियञाणेन अज्झत्तारम्मणबहिद्धाचित्तसमङ्गिस्स चित्तं जानाति, अज्झत्तारम्मणा बहिद्धा खन्धा चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो। (२)
१३.बहिद्धारम्मणो धम्मो बहिद्धारम्मणस्स धम्मस्स आरम्मणपच्चयेन पच्चयो – बहिद्धारम्मणं बहिद्धा दिब्बं चक्खुं पच्चवेक्खति, दिब्बं सोतधातुं पच्चवेक्खति। इद्धिविधञाणं…पे॰… चेतोपरियञाणं…पे॰… पुब्बेनिवासानुस्सतिञाणं…पे॰… यथाकम्मूपगञाणं…पे॰… अनागतंसञाणं पच्चवेक्खति। बहिद्धारम्मणे बहिद्धा खन्धे अनिच्चतो दुक्खतो अनत्ततो विपस्सति…पे॰… चेतोपरियञाणेन बहिद्धारम्मणबहिद्धाचित्तसमङ्गिस्स चित्तं जानाति। बहिद्धारम्मणा बहिद्धा खन्धा चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो। (१)
बहिद्धारम्मणो धम्मो अज्झत्तारम्मणस्स धम्मस्स आरम्मणपच्चयेन पच्चयो – दानं दत्वा सीलं समादियित्वा उपोसथकम्मं कत्वा तं पच्चवेक्खति, पुब्बे सुचिण्णानि पच्चवेक्खति, झाना वुट्ठहित्वा झानं पच्चवेक्खति। अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, बहिद्धारम्मणे पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति। बहिद्धारम्मणं अज्झत्तं दिब्बं चक्खुं पच्चवेक्खति, दिब्बं सोतधातुं… इद्धिविधञाणं… चेतोपरियञाणं… पुब्बेनिवासानुस्सतिञाणं… यथाकम्मूपगञाणं… अनागतंसञाणं… बहिद्धारम्मणे अज्झत्ते खन्धे अनिच्चतो…पे॰… विपस्सति, अस्सादेति अभिनन्दति, तं आरब्भ अज्झत्तारम्मणो रागो उप्पज्जति…पे॰… दोमनस्सं उप्पज्जति। बहिद्धारम्मणा अज्झत्ता खन्धा इद्धिविधञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो। (२)
अधिपतिपच्चयो
१४.अज्झत्तारम्मणो धम्मो अज्झत्तारम्मणस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति। आरम्मणाधिपति – अज्झत्तं विञ्ञाणञ्चायतनं गरुं कत्वा पच्चवेक्खति, नेवसञ्ञानासञ्ञायतनं गरुं कत्वा पच्चवेक्खति। अज्झत्तारम्मणं अज्झत्तं दिब्बं चक्खुं गरुं कत्वा…पे॰… दिब्बं सोतधातुं…पे॰… इद्धिविधञाणं… पुब्बेनिवासानुस्सतिञाणं… यथाकम्मूपगञाणं… अनागतंसञाणं गरुं कत्वा…पे॰… अज्झत्तारम्मणे अज्झत्ते खन्धे गरुं कत्वा अस्सादेति अभिनन्दति, तं गरुं कत्वा अज्झत्तारम्मणो रागो उप्पज्जति, दिट्ठि उप्पज्जति। सहजाताधिपति – अज्झत्तारम्मणाधिपति सम्पयुत्तकानं खन्धानं अधिपतिपच्चयेन पच्चयो। (१)
१५.बहिद्धारम्मणो धम्मो बहिद्धारम्मणस्स धम्मस्स अधिपतिपच्चयेन पच्चयो। सहजाताधिपति – बहिद्धारम्मणाधिपति सम्पयुत्तकानं खन्धानं अधिपतिपच्चयेन पच्चयो। (१)
बहिद्धारम्मणो धम्मो अज्झत्तारम्मणस्स धम्मस्स अधिपतिपच्चयेन पच्चयो। आरम्मणाधिपति – दानं दत्वा सीलं समादियित्वा उपोसथकम्मं कत्वा तं गरुं कत्वा पच्चवेक्खति, पुब्बे सुचिण्णानि…पे॰… झाना वुट्ठहित्वा…पे॰… अरिया मग्गा वुट्ठहित्वा मग्गं… फलं गरुं कत्वा पच्चवेक्खन्ति। बहिद्धारम्मणं अज्झत्तं दिब्बं चक्खुं गरुं कत्वा…पे॰… दिब्बं सोतधातुं… इद्धिविधञाणं… चेतोपरियञाणं… पुब्बेनिवासानुस्सतिञाणं… यथाकम्मूपगञाणं… अनागतंसञाणं गरुं कत्वा पच्चवेक्खति, बहिद्धारम्मणे अज्झत्ते खन्धे गरुं कत्वा अस्सादेति अभिनन्दति, तं गरुं कत्वा अज्झत्तारम्मणो रागो उप्पज्जति, दिट्ठि उप्पज्जति। (२)
अनन्तरपच्चयो
१६.अज्झत्तारम्मणो धम्मो अज्झत्तारम्मणस्स धम्मस्स अनन्तरपच्चयेन पच्चयो – पुरिमा पुरिमा अज्झत्तारम्मणा खन्धा पच्छिमानं पच्छिमानं अज्झत्तारम्मणानं खन्धानं अनन्तरपच्चयेन पच्चयो। (१)
अज्झत्तारम्मणो धम्मो बहिद्धारम्मणस्स धम्मस्स अनन्तरपच्चयेन पच्चयो – अज्झत्तारम्मणं चुतिचित्तं बहिद्धारम्मणस्स उपपत्तिचित्तस्स अनन्तरपच्चयेन पच्चयो। अज्झत्तारम्मणं भवङ्गं बहिद्धारम्मणाय आवज्जनाय अनन्तरपच्चयेन पच्चयो। अज्झत्तारम्मणा खन्धा बहिद्धारम्मणस्स वुट्ठानस्स अनन्तरपच्चयेन पच्चयो। अज्झत्तारम्मणं अनुलोमं गोत्रभुस्स… अनुलोमं वोदानस्स… अनुलोमं फलसमापत्तिया… निरोधा वुट्ठहन्तस्स… नेवसञ्ञानासञ्ञायतनं फलसमापत्तिया अनन्तरपच्चयेन पच्चयो। (२)
१७.बहिद्धारम्मणो धम्मो बहिद्धारम्मणस्स धम्मस्स अनन्तरपच्चयेन पच्चयो – पुरिमा पुरिमा बहिद्धारम्मणा खन्धा पच्छिमानं पच्छिमानं बहिद्धारम्मणानं खन्धानं अनन्तरपच्चयेन पच्चयो। बहिद्धारम्मणं अनुलोमं गोत्रभुस्स… अनुलोमं वोदानस्स… गोत्रभु मग्गस्स… वोदानं मग्गस्स… मग्गो फलस्स… फलं फलस्स… अनुलोमं फलसमापत्तिया अनन्तरपच्चयेन पच्चयो। (१)
बहिद्धारम्मणो धम्मो अज्झत्तारम्मणस्स धम्मस्स अनन्तरपच्चयेन पच्चयो – बहिद्धारम्मणं चुतिचित्तं अज्झत्तारम्मणस्स उपपत्तिचित्तस्स अनन्तरपच्चयेन पच्चयो। बहिद्धारम्मणं भवङ्गं अज्झत्तारम्मणाय आवज्जनाय अनन्तरपच्चयेन पच्चयो। बहिद्धारम्मणा खन्धा अज्झत्तारम्मणस्स वुट्ठानस्स अनन्तरपच्चयेन पच्चयो। (२)
समनन्तरपच्चयादि
१८.अज्झत्तारम्मणो धम्मो अज्झत्तारम्मणस्स धम्मस्स समनन्तरपच्चयेन पच्चयो…पे॰… सहजातपच्चयेन पच्चयो… अञ्ञमञ्ञपच्चयेन पच्चयो… निस्सयपच्चयेन पच्चयो।
उपनिस्सयपच्चयो
१९.अज्झत्तारम्मणो धम्मो अज्झत्तारम्मणस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे॰…। पकतूपनिस्सयो – अज्झत्तारम्मणा अनिच्चानुपस्सना, दुक्खानुपस्सना, अनत्तानुपस्सना, अज्झत्तारम्मणाय अनिच्चानुपस्सनाय, दुक्खानुपस्सनाय, अनत्तानुपस्सनाय उपनिस्सयपच्चयेन पच्चयो। (१)
अज्झत्तारम्मणो धम्मो बहिद्धारम्मणस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे॰…। पकतूपनिस्सयो – अज्झत्तारम्मणा अनिच्चानुपस्सना, दुक्खानुपस्सना, अनत्तानुपस्सना बहिद्धारम्मणाय अनिच्चानुपस्सनाय, दुक्खानुपस्सनाय, अनत्तानुपस्सनाय उपनिस्सयपच्चयेन पच्चयो। (२)
२०.बहिद्धारम्मणो धम्मो बहिद्धारम्मणस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे॰…। पकतूपनिस्सयो – बहिद्धारम्मणा अनिच्चानुपस्सना, दुक्खानुपस्सना, अनत्तानुपस्सना बहिद्धारम्मणाय अनिच्चानुपस्सनाय, दुक्खानुपस्सनाय, अनत्तानुपस्सनाय उपनिस्सयपच्चयेन पच्चयो। (१)
बहिद्धारम्मणो धम्मो अज्झत्तारम्मणस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे॰…। पकतूपनिस्सयो – बहिद्धारम्मणा अनिच्चानुपस्सना , दुक्खानुपस्सना, अनत्तानुपस्सना अज्झत्तारम्मणाय अनिच्चानुपस्सनाय, दुक्खानुपस्सनाय, अनत्तानुपस्सनाय उपनिस्सयपच्चयेन पच्चयो। (२)
आसेवनपच्चयो
२१.अज्झत्तारम्मणो धम्मो अज्झत्तारम्मणस्स धम्मस्स आसेवनपच्चयेन पच्चयो – पुरिमा पुरिमा अज्झत्तारम्मणा खन्धा पच्छिमानं पच्छिमानं अज्झत्तारम्मणानं खन्धानं आसेवनपच्चयेन पच्चयो। (१)
अज्झत्तारम्मणो धम्मो बहिद्धारम्मणस्स धम्मस्स आसेवनपच्चयेन पच्चयो – अज्झत्तारम्मणं अनुलोमं गोत्रभुस्स, अनुलोमं वोदानस्स आसेवनपच्चयेन पच्चयो। (२)
बहिद्धारम्मणो धम्मो बहिद्धारम्मणस्स धम्मस्स आसेवनपच्चयेन पच्चयो – पुरिमा पुरिमा बहिद्धारम्मणा खन्धा पच्छिमानं पच्छिमानं बहिद्धारम्मणानं खन्धानं आसेवनपच्चयेन पच्चयो। बहिद्धारम्मणं अनुलोमं गोत्रभुस्स… अनुलोमं वोदानस्स… गोत्रभु मग्गस्स… वोदानं मग्गस्स आसेवनपच्चयेन पच्चयो। (१)
कम्मपच्चयो
२२.अज्झत्तारम्मणो धम्मो अज्झत्तारम्मणस्स धम्मस्स कम्मपच्चयेन पच्चयो – सहजाता, नानाक्खणिका। सहजाता – अज्झत्तारम्मणा चेतना सम्पयुत्तकानं खन्धानं कम्मपच्चयेन पच्चयो। पटिसन्धिक्खणे…पे॰…। नानाक्खणिका – अज्झत्तारम्मणा चेतना विपाकानं अज्झत्तारम्मणानं खन्धानं कम्मपच्चयेन पच्चयो। (१)
अज्झत्तारम्मणो धम्मो बहिद्धारम्मणस्स धम्मस्स कम्मपच्चयेन पच्चयो। नानाक्खणिका – अज्झत्तारम्मणा चेतना विपाकानं बहिद्धारम्मणानं खन्धानं कम्मपच्चयेन पच्चयो। (२)
बहिद्धारम्मणो धम्मो बहिद्धारम्मणस्स धम्मस्स कम्मपच्चयेन पच्चयो – सहजाता, नानाक्खणिका। सहजाता – बहिद्धारम्मणा चेतना सम्पयुत्तकानं खन्धानं कम्मपच्चयेन पच्चयो। पटिसन्धिक्खणे…पे॰…। नानाक्खणिका – बहिद्धारम्मणा चेतना विपाकानं बहिद्धारम्मणानं खन्धानं कम्मपच्चयेन पच्चयो। (१)
बहिद्धारम्मणो धम्मो अज्झत्तारम्मणस्स धम्मस्स कम्मपच्चयेन पच्चयो। नानाक्खणिका – बहिद्धारम्मणा चेतना विपाकानं अज्झत्तारम्मणानं खन्धानं कम्मपच्चयेन पच्चयो। (२)
विपाकपच्चयादि
२३.अज्झत्तारम्मणो धम्मो अज्झत्तारम्मणस्स धम्मस्स विपाकपच्चयेन पच्चयो…पे॰… आहारपच्चयेन पच्चयो… इन्द्रियपच्चयेन पच्चयो… झानपच्चयेन पच्चयो … मग्गपच्चयेन पच्चयो… सम्पयुत्तपच्चयेन पच्चयो… अत्थिपच्चयेन पच्चयो… नत्थिपच्चयेन पच्चयो…विगतपच्चयेन पच्चयो… अविगतपच्चयेन पच्चयो।
१. पच्चयानुलोमं
२. सङ्ख्यावारो
सुद्धं
२४.हेतुया द्वे, आरम्मणे चत्तारि, अधिपतिया तीणि, अनन्तरे चत्तारि, समनन्तरे चत्तारि, सहजाते द्वे, अञ्ञमञ्ञे द्वे, निस्सये द्वे, उपनिस्सये चत्तारि, आसेवने तीणि, कम्मे चत्तारि, विपाके द्वे …पे॰… (सब्बत्थ द्वे ), सम्पयुत्ते द्वे, अत्थिया द्वे, नत्थिया चत्तारि, विगते चत्तारि, अविगते द्वे (एवं गणेतब्बं)।
अनुलोमं।
पच्चनीयुद्धारो
२५.अज्झत्तारम्मणो धम्मो अज्झत्तारम्मणस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो… कम्मपच्चयेन पच्चयो। (१)
अज्झत्तारम्मणो धम्मो बहिद्धारम्मणस्स धम्मस्स आरम्मणपच्चयेन पच्चयो… उपनिस्सयपच्चयेन पच्चयो… कम्मपच्चयेन पच्चयो। (२)
बहिद्धारम्मणो धम्मो बहिद्धारम्मणस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो… कम्मपच्चयेन पच्चयो। (१)
बहिद्धारम्मणो धम्मो अज्झत्तारम्मणस्स धम्मस्स आरम्मणपच्चयेन पच्चयो… उपनिस्सयपच्चयेन पच्चयो… कम्मपच्चयेन पच्चयो। (२)
२. पच्चयपच्चनीयं
२. सङ्ख्यावारो
२६.नहेतुया चत्तारि, नआरम्मणे चत्तारि, नअधिपतिया चत्तारि, नअनन्तरे चत्तारि (संखित्तं, सब्बत्थ चत्तारि), नपुरेजाते नपच्छाजाते नआसेवने…पे॰… नविप्पयुत्ते चत्तारि…पे॰… नोअविगते चत्तारि (एवं गणेतब्बं)।
पच्चनीयं।
३. पच्चयानुलोमपच्चनीयं
२७.हेतुपच्चया नआरम्मणे द्वे, नअधिपतिया द्वे, नअनन्तरे नसमनन्तरे नउपनिस्सये नआसेवने नकम्मे…पे॰… नोनत्थिया नोविगते द्वे (सब्बत्थ द्वे। एवं गणेतब्बं)।
अनुलोमपच्चनीयं।
४. पच्चयपच्चनीयानुलोमं
२८.नहेतुपच्चया आरम्मणे चत्तारि, अधिपतिया तीणि, अनन्तरे चत्तारि, समनन्तरे चत्तारि, सहजाते अञ्ञमञ्ञे निस्सये द्वे, उपनिस्सये चत्तारि, आसेवने तीणि, कम्मे चत्तारि, विपाके द्वे…पे॰… सम्पयुत्ते द्वे, अत्थिया द्वे, नत्थिया चत्तारि, विगते चत्तारि, अविगते द्वे (एवं गणेतब्बं)।
पच्चनीयानुलोमं।
पञ्हावारो।
अज्झत्तारम्मणत्तिकं निट्ठितं।