२०. मग्गामग्गञाणदस्सनविसुद्धिनिद्देसवण्णना

६९३.तत्राति तस्मिं तीरणपरिञ्‍ञाय ञातपरिञ्‍ञानन्तरभावे, तासु वा परिञ्‍ञासु। विनिच्छयोति सरूपतो, किच्‍चतो, भूमितो च सन्‍निट्ठानं। लोकुत्तरापि पुरिमस्मिं सच्‍चद्वये मग्गसम्पयुत्ता तिविधापि परिञ्‍ञा किच्‍चवसेन लब्भतीति ‘‘लोकियपरिञ्‍ञा’’ति विसेसेत्वा वुत्तं। सभावधम्मानं लक्खणसल्‍लक्खणतो ञेय्यअभिमुखा पञ्‍ञा अभिञ्‍ञापञ्‍ञा। ञातट्ठेति ञातभावनिमित्तं। अभिञ्‍ञेय्यस्स जाननहेतु ‘‘ञाण’’न्ति वुच्‍चति। परिञ्‍ञापञ्‍ञाति अनिच्‍चादिलक्खणानि परिच्छिज्‍ज जाननपञ्‍ञा। तीरणट्ठेति सम्मसनभावहेतु। पहानपञ्‍ञाति पहातब्बस्स पजहनपञ्‍ञा। वेदयितादिलक्खणविधुरताय रुप्पनलक्खणं पच्‍चत्तलक्खणं वुत्तं। तेसंयेव पच्‍चत्तलक्खणसल्‍लक्खणवसेन गहितधम्मानंयेव। यथा पथवीफस्सादीनं कक्खळफुसनादिलक्खणानि तीसुपि खणेसु सल्‍लक्खितब्बानि पटिनियतरूपताय सभावसिद्धानेव हुत्वा गय्हन्ति, न एवमनिच्‍चतादिलक्खणानि। तानि पन भङ्गुदयब्बयपीळावसवत्तनाकारमुखेन गहेतब्बतो समारोपितरूपानि विय गय्हन्तीति वुत्तं ‘‘सामञ्‍ञलक्खणं आरोपेत्वा’’ति। लोकियपरिञ्‍ञानंयेव अधिप्पेतत्ता लक्खणारम्मणिकविपस्सनाव ‘‘पहानपरिञ्‍ञा’’ति वुत्ता।

सङ्खारपटिच्छेदतोति नामरूपववत्थानतो, या ‘‘दिट्ठिविसुद्धी’’ति वुत्ता। केचि पन ‘‘खन्धादीनं विपस्सनाय भूमिभावतो सब्बोपि खन्धादिविचारो सङ्खारपरिच्छेदो’’ति वदन्ति। ‘‘पच्‍चत्तलक्खणपटिवेधस्सेव आधिपच्‍च’’न्ति इमिना नामरूपपच्‍चयपरिग्गहपञ्‍ञानं तीरणपहानासमत्थतं दस्सेति । तासम्पि पन ‘‘नमनलक्खणं नामं, रुप्पनलक्खणं रूप’’न्ति अरूपरूपानं साधारणाकारसल्‍लक्खणवसेन पवत्तिया एकेनाकारेन तीरणपरियायो, दिट्ठिकङ्खाविक्खम्भनेन पहानपरियायो लब्भतीति सिया तीरणपहानेसुपि आधिपच्‍चन्ति वदन्ति। उक्‍कट्ठनिद्देसेन पन यथा दिट्ठिविसुद्धियाव सङ्खारपरिच्छेदता, एवं लक्खणारम्मणिकविपस्सनाय एव तीरणपहानकिच्‍चता वेदितब्बा। एवं हि तिस्सोपि परिञ्‍ञा ववत्थिता होन्ति, अञ्‍ञथा सङ्कारो सिया। तीरणपरिञ्‍ञाय भूमि तत्थ पञ्‍ञाय अनिच्‍चतादिलक्खणसन्तीरणतो। तेनाह ‘‘एतस्मिं…पे॰… आधिपच्‍च’’न्ति। कामं उदयब्बयञाणम्पि कञ्‍चि मिच्छाभिनिवेसं पजहति, तस्स पन अथामगतत्ता न सातिसयं पहानन्ति वुत्तं ‘‘भङ्गानुपस्सनं आदिं कत्वा उपरि पहानपरिञ्‍ञाय भूमी’’ति। अनिच्‍चतो अनुपस्सन्तोति अनिच्‍चाकारतो सङ्खारे अनुपस्सन्तो सम्मसन्तो। निच्‍चसञ्‍ञन्ति ‘‘ते निच्‍चा सस्सता’’ति पवत्तं मिच्छासञ्‍ञं। सञ्‍ञासीसेन दिट्ठिचित्तानम्पि गहणं दट्ठब्बं। एसेव नयो इतो परेसुपि। निब्बिन्दन्तोति अनिच्‍चानुपस्सनादिसम्भूताय निब्बिदानुपस्सनाय सङ्खारे निब्बिज्‍जनवसेन पस्सन्तो। नन्दिन्ति सप्पीतिकतण्हं। विरज्‍जन्तोति विरागानुपस्सनाय विरज्‍जनवसेन यथा सङ्खारेसु रागो नुप्पज्‍जति, एवं अनुपस्सन्तो। तथाभूतो हि रागं पजहतीति वुच्‍चति। निरोधेन्तोति निरोधानुपस्सनाय यथा सङ्खारा निरुज्झन्तियेव, न आयतिं पुनब्भववसेन उप्पज्‍जन्ति, एवं अनुपस्सन्तो। तथाभूतो हि सङ्खारानं समुदयं पजहति नाम अनुप्पत्तिधम्मतापादनतो। पटिनिस्सज्‍जन्तोति पटिनिस्सग्गानुपस्सनाय यथा सङ्खारा न पुन आदियन्ति, एवं वोस्सज्‍जन्तो। तेनाह ‘‘आदानं पजहती’’ति, निच्‍चादिवसेन वा गहणं विस्सज्‍जेतीति अत्थो। साधितत्ताति सम्पादितत्ता। इतराति तीरणपहानपरिञ्‍ञा। एवं परिञ्‍ञा निद्दिसित्वा परिञ्‍ञाक्‍कमवसेनपि कङ्खावितरणानन्तरं ‘‘कलापसम्मसने योगो कातब्बो’’ति य्वायमत्थो वुत्तो, तं निगमवसेन पच्‍चाहरन्तो ‘‘तेन वुत्त’’न्तिआदिमाह, तं वुत्तत्थमेव।

६९४.तत्राति तस्मिं कलापसम्मसने विभावेतब्बे, तस्स वा कलापसम्मसनस्स आदिभावे। अयं पाळीति दस्सियमानं पटिसम्भिदामग्गपाळिमाह। तत्थ सङ्खिपित्वा ववत्थाने पञ्‍ञाति अतीतादिभेदभिन्‍ने धम्मे एकतो सङ्गहेत्वा अनिच्‍चादिवसेन विनिच्छये साधेतब्बे तंसाधनीया पञ्‍ञा। सम्मसने अनिच्‍चतादिवसेन तीरणे ञाणन्ति पवुच्‍चति, सा कथं होतीति अत्थो। ववत्थाने सम्मसनेति च निप्फादेतब्बे भुम्मवचनं। यं किञ्‍चि रूपन्तिआदीनि पदानि हेट्ठा वुत्तत्थानेव। सब्बं रूपं अनिच्‍चतो ववत्थपेतीतिआदीनि पन यस्मा परतो वण्णियिस्सन्ति, तस्मा तत्थेव नेसं अत्थं विभावयिस्साम।

पाळिववत्थानं पन एवं वेदितब्बं – एत्थ हि आदिकम्मिकानं विपस्सनामनसिकारसुखत्थं ‘‘यं किञ्‍चि रूप’’न्तिआदिना पठमं ताव पञ्‍चक्खन्धा अतीतादिविभागमुखेन गहिता, ते पन खन्धा यस्मा द्वारारम्मणेहि सद्धिं द्वारप्पवत्तधम्मवसेन विभागं लब्भन्ति, तस्मा तदनन्तरं द्वारछक्‍कादिवसेन दस छक्‍का गहिता। यस्मा पन लक्खणेसु अनत्तलक्खणं दुक्खविभागं, तस्मा तस्स विभावनाय छ धातुयो गहिता। ततो येसु कसिणेसु इतो बाहिरकानं अत्ताभिनिवेसो, तानि इमेसं झानानं आरम्मणभावेन उपट्ठानाकारमत्तानीति दस्सनत्थं दस कसिणानि गहितानि। ततो दुक्खानुपस्सनाय परिवारभावेन पटिक्‍कूलाकारवसेन द्वत्तिंस कोट्ठासा गहिता। पुब्बे खन्धवसेन सङ्खेपतो गहिता धम्मा नातिसङ्खेपवित्थारनयेन, वित्थारनयेन च मनसि कातब्बाति दस्सनत्थं द्वादसायतनानि, अट्ठारस धातुयो च गहिता। तेसु इमे धम्मा सतिपि सुञ्‍ञनिरीहअब्यापारभावे धम्मसभावतो आधिपच्‍चवसेन पवत्तन्तीति अनत्तलक्खणविभावनत्थं इन्द्रियानि गहितानि। एवं अनेकभेदभिन्‍नापिमे धम्मा भूमित्तयपरियापन्‍नताय तिविधाव होन्तीति दस्सनत्थं तिस्सो धातुयो गहिता।

एत्तावता निमित्तं दस्सेत्वा पवत्तं दस्सेतुं कामभवादयो नव भवा गहिता। एत्तके अभिञ्‍ञेय्यविसेसे पवत्तमनसिकारकोसल्‍लेन सण्हसुखुमेसु निब्बत्तितमहग्गतधम्मेसु मनसिकारो पवत्तेतब्बोति दस्सनत्थं झानप्पमञ्‍ञारुप्पानि गहितानि। तत्थ झानानि नाम वुत्तावसेसारम्मणानि रूपावचरज्झानानि। पच्‍चयपच्‍चयुप्पन्‍नविभागतो इमे धम्मा भिन्दित्वा मनसि कातब्बाति दस्सनत्थं पटिच्‍चसमुप्पादङ्गानि गहितानि। पच्‍चयाकारमनसिकारो हि लक्खणत्तयं सुखेन, सुट्ठुतरञ्‍च विभावेति, तस्मा पच्छतो गहितो। एवमेते सम्मसनीयभावेन गहिता खन्धादिवसेन कोट्ठासतो पञ्‍चवीसतिविधा। पभेदतो पन अतीतादिभेदं अनामसित्वाव गय्हमाना द्वीहि ऊनानि द्वेसतानि होन्ति।

तत्थ अनिच्‍चतो ववत्थपेतीतिआदिको पठमो लक्खणववत्थापनवारो। अनिच्‍चं खयट्ठेनातिआदिको दुतियो हेतुवारो लक्खणानं हेतुकित्तनतो। अनिच्‍चं सङ्खतन्तिआदिको पन हेतुपतिट्ठापनवारो पाकटभावसल्‍लक्खणतो। खयट्ठेनाति हि खयसभावतो यस्मा रूपं खयसभावं उप्पज्‍जित्वा खयं वयं भेदं गच्छति, तस्मा अनिच्‍चन्ति अत्थो। भयट्ठेनाति भायितब्बभावतो यस्मा रूपं पभङ्गुरताय भयानकं, तस्मा दुक्खन्ति। तेनाह भगवा ‘‘यदनिच्‍चं, तं दुक्ख’’न्ति (सं॰ नि॰ ३०.१५, ४५, ४६, ७६, ८५; २.४.१४; पटि॰ म॰ २.१०)। असारकट्ठेनाति असारकभावतो, अत्तसारविरहतोति अत्थो। ततियवारे पन ‘‘रूपं अनिच्‍च’’न्ति वत्वा तस्स हेतुं पतिट्ठापेतुं ‘‘सङ्खत’’न्तिआदि वुत्तं। यस्मा समेच्‍च सम्भूय पच्‍चयेहि कतं, अनुरूपे च पच्‍चये पटिच्‍च, न विना तेहि समं, सम्मा च उप्पन्‍नं, तस्मा खयवयविरागनिरोधधम्मन्ति। न हि पच्‍चयनिब्बत्तं अनिरुज्झनकं नाम अत्थि। तेनाह भगवा ‘‘यं तं रूपं जातं भूतं सङ्खतं पलोकधम्मं, तं वत मा पलुज्‍जीति नेतं ठानं विज्‍जती’’ति (सं॰ नि॰ ५.३७९)। एतेन अनिच्‍चा पथवीधातु पच्‍चयनिब्बत्तत्ता तदञ्‍ञं पच्‍चयनिब्बत्तं वियाति दस्सेति। एस नयो सेसधम्मेसुपि।

६९५.‘‘अतीतं रूपं अनिच्‍च’’न्तिआदिना अनिच्‍चतो सम्मसनस्स अतीतादिविभागा पवत्तिट्ठानभूताति आह ‘‘एकादसहि ओकासेही’’ति। ववत्थापनं नाम सन्‍निट्ठानं। अनिच्‍चतो सन्‍निट्ठानञ्‍चेत्थ ‘‘अनिच्‍च’’न्ति विपस्सनावाति आह ‘‘अनिच्‍चन्ति सम्मसती’’ति।

कथन्ति सम्मसनाकारो पुच्छितोति तं परतो इधेव पाळियं दुतियवारे वुत्तनयेनेवाति सङ्खेपेनेव विस्सज्‍जेति। इदानि तमत्थं पाकटतरं कातुं ‘‘वुत्तञ्हेत’’न्तिआदिमाह। तत्थ ही-ति हेतुअत्थे निपातो। यस्मा ‘‘रूपं अतीतानागतपच्‍चुप्पन्‍नं अनिच्‍चं खयट्ठेना’’ति एवं वुत्तं, तस्मा इमिना वुत्तनयेन अनिच्‍चन्ति सम्मसतीति योजना।

एवम्पि सङ्खेपोयेवाति विभजित्वा दस्सेतुं ‘‘एसा’’तिआदि वुत्तं। अतीतेति अतीते भवे। आदिकम्मिकस्स हि इदं सम्मसनविधानं, तस्मा भववसेन अद्धाभेदो अधिप्पेतो। तेनाह ‘‘नयिमं भवं सम्पत्तन्ती’’ति। एत्थ इति-सद्दो हेतुअत्थो। इदं वुत्तं होति – यं अतीतभवे परियापन्‍नं रूपं, तं अतीतेयेव भवे खीणं, ततो न इमं भवं सम्पत्तं, तस्मा अनिच्‍चं खयट्ठेन खयसभावत्ताति सम्मसतीति। एस नयो यं अनागतन्तिआदीसुपि।

यं बहिद्धा, तम्पि बहिद्धा एव खीयति, न अज्झत्तभावं गच्छतीति अनिच्‍चं खयट्ठेनाति, यं ओळारिकं, तम्पि तत्थेव खीयतीति अनिच्‍चं खयट्ठेनातिआदिना योजेतब्बं।

इदं सब्बम्पीति इदं अतीतादिभेदस्स रूपस्स सम्मसनतो सब्बं एकादसविधम्पि सम्मसनं एकं सम्मसनं अनिच्‍चतो सम्मसनन्ति कत्वा।

तन्ति तं एकादसविधम्पि रूपं। सप्पटिभयतायाति भयानकताय। भयावहं होतीति अप्पहीनविपल्‍लासस्स ‘‘अहं विनस्सामि, मम सन्तकं विनस्सती’’ति चिन्तेन्तस्स भयजनकं होति। सीहोपमसुत्ते देवानं वियाति सीहोपमसुत्ते देसियमाने देवानं विय। तत्थ हि –

‘‘यदा तथागतो लोके उप्पज्‍जति अरहं सम्मासम्बुद्धो…पे॰… सो धम्मं देसेति ‘इति रूपं, इति रूपस्स समुदयो, इति रूपस्स अत्थङ्गमो। इति वेदना… इति सञ्‍ञा… इति सङ्खारा… इति विञ्‍ञाणं, इति विञ्‍ञाणस्स समुदयो, इति विञ्‍ञाणस्स अत्थङ्गमो’ति। येपि ते, भिक्खवे, देवा दीघायुका वण्णवन्तो सुखबहुला उच्‍चेसु विमानेसु चिरट्ठितिका, तेपि तथागतस्स धम्मदेसनं सुत्वा येभुय्येन भयं संवेगं सन्तासं आपज्‍जन्ति ‘अनिच्‍चाव किर भो मयं समाना निच्‍चम्हाति अमञ्‍ञिम्ह, अद्धुवाव…पे॰… असस्सताव किर भो मयं समाना सस्सतम्हाति अमञ्‍ञिम्ह, मयम्पि किर भो अनिच्‍चा अद्धुवा असस्सता सक्‍कायपरियापन्‍ना’’’ति (सं॰ नि॰ ३.७८; अ॰ नि॰ ४.३३) –

६९६.नियमतो सङ्खतादिभेदं होतीति एकंसेन सङ्खततादिविसेसवन्तं होति असङ्खतादिसभावे अनिच्‍चताय असम्भवतो। अस्साति अनिच्‍चस्स। परियायदस्सनत्थन्ति वेवचनदस्सनत्थं, तं पन ‘‘खयधम्म’’न्तिआदीनं वसेन वेदितब्बं, न पुरिमानं तिण्णं। न हि तदेव तस्स परियायो होति, नापि सङ्खतपटिच्‍चसमुप्पन्‍नपदानि हुत्वा अभावदीपनतो पाकभावदीपनतो। पाकभावदीपनेन पन अनिच्‍चताय साधनपक्खे तिट्ठन्ति। तेनेव हि सब्बेसं पदानं परियायताभावतो ‘‘नानाकारेहि वा’’ति विकप्पन्तरं गहितं। मनसिकारप्पवत्तीदस्सनत्थन्ति अनिच्‍चताय उपब्रूहनमनसिकारपवत्तिदस्सनत्थं।

६९८.एकेकं खन्धं अनिच्‍चादिसम्मसनस्स वसेन सम्मसतीति सम्बन्धो। तस्स पन सम्मसनस्स पञ्‍चन्‍नं खन्धानं साधारणताय ‘‘एकेकं खन्ध’’न्ति वुत्तं। अनच्‍चन्तिकतायाति अच्‍चन्तिकताभावतो, असस्सततायाति अत्थो। सस्सतञ्हि अच्‍चन्तिकं पराय कोटिया अभावतो। आदिअन्तवन्ततायाति पुब्बापरकोटिवन्तताय, उदयब्बयधम्मतोति अत्थो। अनिच्‍चतो सम्मसतीति सम्बन्धो। एस नयो सब्बत्थ।

अनिच्‍चतोति च अद्धुवतो। एतञ्हि न निच्‍चं, खणिकताय असदाभाविताय वा न इच्‍चं न उपगन्तब्बन्ति अनिच्‍चं। उप्पादवयपटिपीळनतायाति उप्पादेन, वयेन च पति पति खणे खणे तंसमङ्गिनो विबाधनसभावत्ता, तेहि वा सयमेव विबाधेतब्बत्ता। उदयब्बयवन्तो हि धम्मा अभिण्हं तेहि पटिपीळिता एव होन्ति, या पीळना ‘‘सङ्खारदुक्खता’’ति वुच्‍चति। दुक्खवत्थुतायाति तिविधस्सापि दुक्खस्स, संसारदुक्खस्स च अधिट्ठानभावतो। पच्‍चययापनीयतायाति यथारहं पच्‍चयेहि यापेतब्बताय। रोगमूलतायाति मूलब्याधि विय अनुबन्धब्याधीनं मूलभावतो, पदद्वयेनापि याप्यरोगसदिसतोति दस्सेति। याप्यब्याधि हि रोगो इतरो आबाधोति। दुक्खतासूलयोगितायाति तिविधदुक्खतासङ्खातेन रुज्‍जनेन युज्‍जताय। किलेसासुचिपग्घरणतायाति यथारहमारम्मणवसेन, समन्‍नागमवसेन च रागादिकिलेसासुचिविस्सन्दनतो। अहुत्वा सम्भवतो उप्पत्तिया उद्धुमातता।

अन्तोतुदनतायाति अब्भन्तरे तुदनतो। दुक्खवेदनादयो विय हि इमे सङ्खारा अत्तभावस्स अब्भन्तरगता एव उदयब्बयवसेन तुदन्ति। अरियमग्गसण्डासेन विना नीहरितुं असक्‍कुणेय्यताय दुन्‍नीहरणीयता तण्हादिट्ठाभिनिवेसदळ्हभावतो। अघन्ति पापं विय अरियजनेहि विगरहितब्बं। सत्तानं अनत्थजननतो अवड्ढिआवहं, पापस्स च वत्थुभूतं खन्धपञ्‍चकन्ति आह ‘‘विगरह…पे॰… अघतो’’ति। असेरिभावजनकतायाति परवसताजननतो। यथा गिलानो अञ्‍ञेहि संवेसनवुट्ठापनादिना परपटिबद्धसरीरवुत्तिको असेरी, एवमेतेपि असेरिभावजनका। अवसतायाति अवसवत्तनतो। यथा परोसतन्तो पुरिसो परस्स वसं न गच्छति, एवं सुभसुखादिभावेन वसे वत्तेतुं असक्‍कुणेय्यतो। अविधेय्यतायाति ‘‘मा जीरथ, मा मीयथा’’तिआदिना विधातुं असक्‍कुणेय्यतो। पलुज्‍जनतायाति ब्याधिआदीहि पकारेहि छिज्‍जनतो विनस्सनतो। तेहि एव वा आब्यसनतो। ब्यसनत्थो हि लोकसद्दो, पसद्दो भुसत्थो दट्ठब्बो। ब्याधिआदीहि च खन्धानं ब्यसनन्ति। ब्यसनावहभावेन एतीति ईति, आगन्तुकानं अकुसलपक्खियानं ब्यसनहेतूनं एतं अधिवचनं। खन्धा च एदिसाति आह ‘‘अनेकब्यसनावहताय ईतितो’’ति।

उपद्दवतीति उपद्दवो, अनत्थं जनेन्तो अभिभवति अज्झोत्थरतीति अत्थो, राजदण्डादीनं एतं अधिवचनं। खन्धा च एदिसाति वुत्तं ‘‘अविदितानं…पे॰… उपद्दवतो’’ति। दिट्ठधम्मिकसम्परायिकभयावहतो, अभयपटिपक्खतो च खन्धा भयन्ति आह ‘‘सब्बभयानं…पे॰… भयतो’’ति। बहिद्धा ञातिब्यसनादीहि, अज्झत्तं रागादीहि अनत्थेहि उपसज्‍जनट्ठेन, उपसग्गसदिसताय च उपसग्गो। उपसग्गोति च देवतूपसंहारवसेन पवत्तो ब्याधिआदिअनत्थो। सो अत्थकामेन मुहुत्तम्पि न अज्झुपेक्खितब्बो होति। तेन वुत्तं ‘‘अनेकेहि…पे॰… उपसग्गतो’’ति। दोसूपसट्ठतायाति आरम्मणतो, सम्पयोगतो च रागादिदोसेहि उपेतताय। लोकधम्मा लाभादिहेतुका अनुनयपटिघा, तेहि, ब्याधिआदीहि च अनवट्ठितता पचलितता।

७०१.तत्थाति कम्मतो रूपपवत्तियं। नानाक्खणिककम्मपच्‍चयभूतंयेव इध कम्मन्ति अधिप्पेतन्ति आह ‘‘कम्मं नाम कुसलाकुसलचेतना’’ति। जीवितनवकं चक्खुदसकादिअन्तोगधमेव कत्वा ‘‘समसत्ततिरूप’’न्ति वुत्तं। तं वा चक्खुदसकादि विय सुखपरिग्गहं न होतीति। तदेवाति यथावुत्तं विपाकक्खन्धकटत्तारूपमाह। कम्मञ्हि कम्मजस्स जनकं, परिपाचकम्पि होति जीवितिन्द्रियस्स, कम्मजग्गिनो च वसेन अनुरक्खणसब्भावतो, आहारादिपटिलाभहेतुताय उपत्थम्भकनिमित्ततो च। तेनाह ‘‘उपत्थम्भकपच्‍चयोपि होती’’ति। उपत्थम्भकपच्‍चयता चस्स उपनिस्सयपच्‍चयवसेनेव वेदितब्बा। कम्मं पच्‍चयो एतस्साति कम्मपच्‍चयं, तदेव चित्तं, तं समुट्ठानं एतस्साति कम्मपच्‍चयचित्तसमुट्ठानं। विपाकचेतसिकानम्पि कम्मपच्‍चयचित्तसमुट्ठानता वत्तब्बा, न वा वत्तब्बा कम्मसमुट्ठानकम्मपच्‍चयग्गहणेन गहितत्ता। ठानप्पत्ता ओजा अञ्‍ञं ओजट्ठमकं समुट्ठापेति आहारानुगते सरीरेति गहेतब्बं।

तत्रापीति कम्मसमुट्ठानाहारसमुट्ठानेपि ओजट्ठमके। चतस्सो वा पञ्‍च वा पवत्तियो घटेतीति सदिससन्ततिवसेन चतस्सो वा पञ्‍च वा रूपकलापप्पवत्तियो सन्तानेति। बाहिरपच्‍चयविसेसेन पन विसदिसा बहूपि पवत्तियो घटेतीति वदन्ति। यथा कम्मपच्‍चयाहारसमुट्ठाने पवेणिघटना, एवं कम्मपच्‍चयउतुसमुट्ठानेपीति तं दस्सेतुं ‘‘कम्मपच्‍चयउतुसमुट्ठानं नामा’’तिआदि वुत्तं। एत्थ च यथा तत्थ तत्थ कोट्ठासे परम्परप्पवत्तिं दस्सेन्तेन अकम्मजा दुतियादिपवत्तियो असम्भेदेन दस्सिता, एवं कम्मजाहारसमुट्ठानउतुवसेन, कम्मजउतुसमुट्ठानाहारवसेन, कम्मपच्‍चयचित्तजाहारउतुसमुट्ठानउतुआहारवसेन च सम्भेदवसेनापि रूपप्पवत्ति दस्सेतब्बाति वदन्ति। तत्थ कम्मजतो पवत्तआहारा विसेसपच्‍चयलाभे सति यथावुत्तपरिमाणाहि पवत्तीहि उद्धम्पि पवत्तियो न घटेन्तीति न सक्‍का वत्तुं। तथा हि ‘‘दस द्वादस वारे पवत्तिं घटेती’’ति (विसुद्धि॰ २.७०३), ‘‘एवं दीघम्पि अद्धानं अनुपादिन्‍नपक्खे ठत्वापि उतुसमुट्ठानं पवत्तति एवा’’ति (विसुद्धि॰ २.७०४) च वक्खति।

७०२.जनकाजनका मताति पुरिमका तिकोट्ठाससङ्गहिता जनका, पच्छिमकोट्ठासिका ‘‘सोळसा’’ति वुत्ता अजनकाति मता ञाता। कुसलकिरियतोति कुसलतो च किरियतो च। इरियाय कायिककिरियाय पवत्तिट्ठानताय पथभावतो इरियापथो, गमनादि, अत्थतो तदवत्था रूपप्पवत्ति। कामञ्‍चेत्थ रूपविनिमुत्तो इरियापथो, विञ्‍ञत्ति च नत्थि, तथापि न सब्बं रूपसमुट्ठापकचित्तं इरियापथूपत्थम्भकं, विञ्‍ञत्तिविकारुप्पादकञ्‍च होति। यं पन चित्तं विञ्‍ञत्तिजनकं, तं एकंसतो इतरस्स जनकं अविनाभावतो, तथा इरियापथूपत्थम्भकं रूपस्स। एतस्स विसेसस्स दस्सनत्थं ‘‘रूपं, इरियापथं, विञ्‍ञत्तिञ्‍चा’’ति समुच्‍चयो कतो। विपाकवज्‍जानीति एत्थ विपाकाभिञ्‍ञाद्वयवज्‍जानीति वत्तब्बं तदञ्‍ञेसंयेव सेसग्गहणेन गहेतब्बत्ता। न वा वत्तब्बं सेसग्गहणेनेव अभिञ्‍ञाचित्तानम्पि निवत्तेतब्बतो। न विञ्‍ञत्तिं जनयन्ति महग्गतकुसलादीनं सन्तभावेन अविप्फारिकभावतो। विप्फारिकमेव हि कामावचरकुसलादिविञ्‍ञत्तिं समुट्ठापेति, इरियापथूपत्थम्भकानि पन होन्ति सतिपि सन्तभावे झानवेगेन सउस्साहत्ता, यतो तेसं जवनकिच्‍चता। पञ्‍च भवङ्गचित्तानीति सम्बन्धो। रूपमेव जनयन्ति, न इरियापथं निरुस्साहसन्तभावेन परिदुब्बलभावतो। किरियामयचित्तेहि अविमिस्सभवङ्गप्पवत्तिकाले खन्धादिसरीरावयवानं निच्‍चलभावेनावट्ठानं। तथा हि अब्बोकिण्णे भवङ्गे पवत्तमाने अङ्गानि ओसीदन्ति पविट्ठानि विय होन्ति। ‘‘द्वत्तिंसा’’ति पन आदिना वुत्तेसु जागरणचित्तेसु वत्तमानेसु अङ्गानि उपत्थद्धानि यथापवत्तइरियापथभावेनेव पवत्तन्तीति। द्वेपञ्‍चविञ्‍ञाणानि सब्बदुब्बलताय रूपं न जनेन्ति। पटिसन्धिचित्तं वत्थुदुब्बलताय। खीणासवानं चुतिचित्तन्ति एत्थ –

‘‘कामावचरानं पच्छिमचित्तस्स उप्पादक्खणे यस्स चित्तस्स अनन्तरा कामावचरानं पच्छिमचित्तं उप्पज्‍जिस्सति, रूपावचरे अरूपावचरे पच्छिमभविकानं, ये च रूपावचरं अरूपावचरं उपपज्‍जित्वा परिनिब्बायिस्सन्ति, तेसं चवन्तानं तेसं वचीसङ्खारो निरुज्झिस्सति, नो च तेसं कायसङ्खारो निरुज्झिस्सती’’ति (यम॰ २.सङ्खारयमक.८८) –

पन वचनतो अञ्‍ञेसम्पि चुतिचित्तं रूपं न समुट्ठापेतीति विञ्‍ञायति। न हि रूपसमुट्ठापकचित्तस्स गब्भगततादिविबन्धाभावे कायसङ्खारासमुट्ठापने कारणं अत्थि, न च युत्तं चुतो च चित्तसमुट्ठानरूपञ्‍चस्स पवत्तति, नापि ‘‘चुतिचित्तं रूपं समुट्ठापेती’’ति पाळि अत्थि, ‘‘खीणासवान’’न्ति, पन विसेसनं अप्पटिसन्धिकनिरोधेन निरुज्झन्तस्स तेसं चुतिचित्तस्स रूपसमुट्ठापनं पाकटन्ति कत्वा कतन्ति दट्ठब्बं। सोळस चित्तानीति परिच्छिज्‍ज गहणं तेसं रूपजनने एकंसतो नियमेतब्बत्ता, अञ्‍ञानि पन बहूनि अरूपे उप्पन्‍नानि अनोकासगतत्ता रूपं न जनेन्तियेव। न ठितिक्खणे, भङ्गक्खणे वा रूपं जनेन्तीति सम्बन्धो। उप्पादक्खणे पन बलवं अनन्तरादिपच्‍चयलाभतो।

यथा पथवीआदयो रूपधम्मा चित्तहेतुका चित्तसमुट्ठाना, एवं वेदनादयोपीति वुत्तं ‘‘चित्तसमुट्ठानं नाम तयो अरूपिनो खन्धा, सद्दनवक’’न्तिआदि। तेनेवाह – ‘‘कतमे धम्मा चित्तसमुट्ठाना? वेदनाक्खन्धो सञ्‍ञाक्खन्धो सङ्खारक्खन्धो कायविञ्‍ञत्ति वचीविञ्‍ञत्ती’’ति (ध॰ स॰ १२०१, १५३५)। तत्थ कायविञ्‍ञत्तिआदीनं चित्तसमुट्ठानता परियायतो वुत्ताति वेदितब्बा तेसं अनिप्फन्‍नत्ता। ‘‘एवं वुत्तं चतुसमुट्ठानरूप’’न्ति इमिना अतंसमुट्ठानस्सेव चित्तजरूपस्स चित्तपच्‍चयता दस्सिता। यथा पन कम्मपच्‍चयं दस्सितं , एवं चित्तपच्‍चये गय्हमाने तंसमुट्ठानरूपस्स, सहजातवेदनादीनञ्‍च चित्तपच्‍चयता सिया। चित्तसमुट्ठानचित्तपच्‍चये पन असङ्करतो दस्सेतुं पच्छाजातपच्‍चयवसेनेव चित्तपच्‍चयं उद्धटन्ति दट्ठब्बं। चित्तसमुट्ठानउतुआहारेहि कम्मसमुट्ठानउतुआहारा बलवन्तो होन्तीति तेसं वसेन चतुपञ्‍चपवत्तिघटनं वुत्तं, चित्तसमुट्ठानानं पन वसेन द्वत्तिप्पवत्तिघटनं तंपाकतिकचित्तवसेन, महग्गतानुत्तरचित्तवसेन पन बहुतरापि पवत्तियो इच्छितब्बा। तंनिब्बत्तानं चित्तजरूपानं उळारपणीतभावतो।

७०३.‘‘उपादिन्‍नं कम्मजरूपं पच्‍चयं लभित्वा’’ति एतेन बहिद्धा अनुपादिन्‍नओजा रूपाहरणकिच्‍चं न करोतीति दस्सेति। पच्‍चयलाभो चस्स कम्मजभूतसन्‍निस्सयतावसेनाति आह ‘‘तत्थ पतिट्ठाया’’ति। तत्थ कम्मपच्‍चयचित्तसमुट्ठानादिरूपस्सपि कम्ममूलकत्ता सिया कम्मजपरियायोति तंनिवत्तनत्थं ‘‘उपादिन्‍न’’न्ति विसेसेत्वा वुत्तं। आहारपच्‍चयस्स आहारो न केवलं उपत्थम्भकोव, अथ खो जनकोपीति दस्सेतुं ‘‘चतुसमुट्ठानरूप’’न्ति वुत्तं। ‘‘दस द्वादस वारे’’ति वत्वा कथं इमस्सेव दस द्वादस वारे पवत्तिघटनाति अनुयोगं सन्धायाह ‘‘एकदिवसं परिभुत्ताहारो’’तिआदि। दारकस्स सरीरं फरित्वाति नाभिमूलानुगताहि रसहरणीहि फरित्वा, अञ्‍ञथा जलाबुअन्तरिके काये मक्खनावसेन न सम्माविनियोगो आहारस्स सम्भवतीति।

उपादिन्‍नको अनुपादिन्‍नकोति दुविधे आहारे पुब्बे अनुपादिन्‍नको आहारपच्‍चयआहारो दस्सितोति इतरं दस्सेतुं ‘‘कम्मजाहारो’’तिआदि वुत्तं। तं कम्मपच्‍चयाहारसमुट्ठाने वुत्तनयमेव। तेनाह ‘‘चतस्सो वा पञ्‍च वा पवत्तियो घटेती’’ति। आहारपच्‍चयउतुनोपि उतुपच्‍चयाहारस्स विय दस द्वादस वारे पवत्तिघटना वेदितब्बा। वुत्तनयत्ता न उद्धतन्ति वदन्ति। सेसानन्ति कम्मचित्तउतुसमुट्ठानानं तिसन्ततिरूपानं। कबळीकाराहारो हि अञ्‍ञाहारसमुट्ठितस्स, तिसन्ततिरूपानञ्‍च उपत्थम्भकवसेन अत्तना उप्पादितस्स जनको हुत्वा पच्‍चयो होति। एवं आहारपच्‍चयो होन्तोयेव अत्थिअविगतवसेनापि पच्‍चयो होति, निस्सयभावो पन पट्ठाननयेन नत्थि। आहारपच्‍चया पवत्तमानानि रूपानि आहारनिस्सयानि नाम होन्तीति सुत्तन्तनयेन वुत्तोति दट्ठब्बो। परतो उतुनो निस्सयजोतनायपि एसेव नयो।

७०४.कम्मसमुट्ठानादिवसेन चतुब्बिधायपि तेजोधातुया रूपुप्पादने समत्थभावतो ‘‘उतु नाम चतुसमुट्ठाना तेजोधातू’’ति वुत्तं। एस दुविधो होतीति एस उतु तेजोधातुभावाविसेसेपि तिक्खमन्दताविसेसेन उण्हो, सीतोति दुविधो होति। यं पनेत्थ वत्तब्बं, तं हेट्ठा विचारितमेव। यदिपि उतु उपादिन्‍नकेन विनापि रूपं समुट्ठापेति, इन्द्रियबद्धे पन तेन विना तस्स रूपुप्पादनं नत्थीति आह ‘‘उपादिन्‍नकं पच्‍चयं लभित्वा’’ति। तेनाह ‘‘चतुसमुट्ठानो उतू’’ति। उतुसमुट्ठानोयेव हि उतु उपादिन्‍नकेन विना रूपं समुट्ठापेति। उतुपच्‍चयं नाम चतुसमुट्ठानिकं रूपं। यञ्हि उतुसमुट्ठानं पन्‍नरसविधं रूपं, यञ्‍च तदञ्‍ञतिसन्ततिरूपं, तस्स सब्बस्सपि सभागो उतुउपत्थम्भकपच्‍चयो होतीति। यस्मा विसभागो उतु हिमादि विय पदुमादीनं विसदिसरूपुप्पत्तिहेतुभूतं पुरिमरूपं विनासेन्तं विय होति, तस्मा सभागं, विसभागञ्‍च एकज्झं गहेत्वा वुत्तं ‘‘उतु चतुसमुट्ठानिकरूपानं पवत्तिया च विनासस्स च पच्‍चयो होती’’ति।

दीघम्पि अद्धानन्ति ‘‘दस द्वादस वारे’’ति अञ्‍ञस्स वुत्तपरिच्छेदतो दीघम्पि कालं। उतु हि सभागसन्ततिवसेन लद्धपच्‍चयं चिरतरम्पि कालं सदिसाकारं रूपप्पवत्तिं सन्तानेति उपादिन्‍नकसन्‍निस्सयेन विना, पगेव इतरथा। तेनाह ‘‘अनुपादिन्‍नपक्खे ठत्वापी’’ति, मंसविनिमुत्तकेसलोमनखचम्मखिलतिलकादिवसेन जीवमानसरीरे अञ्‍ञत्थ मतकळेवरादिवसेनाति अधिप्पायो। रूपस्स निब्बत्तिया दिट्ठाय तस्स भङ्गोपि दिट्ठोयेव होति इत्तरकालत्ता धम्मप्पवत्तियाति आह ‘‘निब्बत्तिं पस्सन्तो कालेन रूपं सम्मसति नामा’’ति। न हि निब्बत्तिमत्तदस्सनं सम्मसनं नाम होति, उदयब्बयदस्सनञ्‍च अधिकतन्ति। एस नयो इतो परेसुपि निब्बत्तिग्गहणेसु।

७०७.एत्थ च ‘‘उप्पादवयवत्तितो’’तिआदिना चतूहि कारणेहि अनिच्‍चा, ‘‘अभिण्हसम्पटिपीळनतो’’तिआदिना चतूहि कारणेहि दुक्खा, ‘‘सुञ्‍ञतो’’तिआदिना चतूहि कारणेहि अनत्ताति रूपधम्मे निरुळ्हं लक्खणत्तयं पुब्बे अत्तना असल्‍लक्खितं सल्‍लक्खेत्वा सम्मसन्तो तं तत्थ आरोपेतीति वुच्‍चति। तथा पनानेन आदाननिक्खेपनवसेन सम्मसितत्ता आह ‘‘रूपे तिलक्खणं आरोपेत्वा’’ति।

तत्थ च यस्मा अनिच्‍चलक्खणग्गहणपुब्बकं दुक्खलक्खणग्गहणं, दुक्खलक्खणग्गहणपुब्बकं वा अनत्तलक्खणग्गहणं। अनिच्‍चलक्खणञ्‍चेत्थ रूपभेदेन दस्सियमानं यथोळारिकतो दीपेतब्बन्ति तं वस्ससतपरिच्छेदेन पठमं दस्सेन्तेन वस्ससतं ठितस्स ‘‘दस वा वीसति वा’’तिआदिना विभजित्वा अनुक्‍कमेन यावउद्धरणादिकोट्ठासवसेन रूपस्स भङ्गं दिस्वा ततो ‘‘अनिच्‍चं दुक्खं अनत्ता’’ति तिलक्खणारोपनं वयोवुड्ढत्थङ्गमतो सम्मसनन्ति दस्सेतुं ‘‘तमेव वस्ससत’’न्तिआदिना वयवसेन रूपस्स सम्मसनविधि आरद्धो। तत्थ यस्मा ओळारिकवसेनेवायं आदितो रूपभेदो गय्हति, तस्मा न वस्ससतं समकोट्ठासवसेन विभत्तं, मज्झिमावत्थाय वा तथारूपत्ता मज्झिमवये एकं वस्सं वड्ढितं।

७०८.मन्दताबाहुल्‍लेन पवत्तं वस्सानं दसकं मन्ददसकं। एस नयो सेसेसुपि।

तदाति पठमे वस्सदसके। सोति पुग्गलो। चपलोति अनवट्ठितकिरियताय तरलो। तेन मोमूहभावतो विसेसेति। न हेस नवमदसके विय मोमूहभावेन मन्दो, अथ खो चपलतायाति। तेनाह ‘‘कुमारको’’ति। ततिये दसके मंसपारिपूरिया यथारहं छविवण्णो विप्पसीदतीति आह ‘‘वण्णायतनं वेपुल्‍लं पापुणाती’’ति। चतुत्थे दसके अट्ठीनं, न्हारूनञ्‍च थिरभावप्पत्तिया बलञ्‍च थामो च वेपुल्‍लं पापुणाति। पञ्‍चमे दसके योब्बनमदस्स दूरीभावेन येभुय्येन किलेसतनुताय पञ्‍ञा यथारहं सुविसदा होति। खिड्डाय रति खिड्डारति। कपल्‍लिकादिनिस्सयविसेसेन पदीपस्स सुद्धतादि विय निस्सयविसेसेन पञ्‍चमछट्ठदसकेसु पञ्‍ञाय बुद्धिहानियो वेदितब्बा। पुरतो पब्भारो होति कटिसन्धिगीवासन्धीनं वसेन रस्सस्सापि, पगेव दीघस्स। पब्भारोति च गरुभावेन पलम्बको। मोमूहो होति सतिपञ्‍ञाविप्पवासतो। सयनबहुलोव होति ठानादिवसेन सरीरभारं वहितुं असक्‍कोन्तो।

७०९.तिण्णं तिण्णं वस्सानन्ति येभुय्यताय वुत्तं। चतुवस्सिकोपि हि एको कोट्ठासो होतीति। द्विसतं कोट्ठासे कत्वा एकेकअयनवसेनातिपि वेदितब्बं।

वस्साने पवत्तरूपन्ति सम्बन्धो।

तं पन वस्सानं द्विधा समत्तं, न पुब्बे विय चतुमासन्ति आह ‘‘द्वेमास’’न्ति। अच्‍चन्तसंयोगे चेतं उपयोगवचनं। सो पन वस्सानो उतु सावणपोट्ठपादमासा, अस्सयुजकत्तिकमासा सरदो, मिगसिरफुस्समासा हेमन्तो, माघफग्गुनमासा सिसिरो, चित्तवेसाखमासा वसन्तो, जेट्ठासळ्हमासा गिम्हो उतूति वेदितब्बो। छ कोट्ठासे कत्वाति दसदसनाटिकावसेन छ कोट्ठासे कत्वा।

७१०.अभिमुखं पुरतो कमनं अभिक्‍कमो। पटिनिवत्तनवसेन कमनं पटिक्‍कमो। आमुखं लोकनं आलोकनं। विविधं इतो चितो च लोकनं विलोकनं। हत्थपादानं सङ्कुचनं समिञ्‍जनं। आयमनं पसारणं।

पादुद्धरणकालेति दुतियपादुद्धरणकाले। पादस्साति उद्धटपादस्स। ओमत्ताति सत्तितो हीनप्पमाणा। तेनाह ‘‘मन्दा’’ति। इतराति तेजोवायोधातुयो। यथा पादस्स उद्धरणं सिज्झति, तथा पवत्तचित्तसमुट्ठानरूपेसु एकंसतो तेजोवायोधातूनं अधिमत्तता इच्छितब्बा सल्‍लहुकसभावताय तासं। ततो एव च इतरासं ओमत्तता गरुसभावत्ता। तंसम्बन्धत्ता पन सेसं तिसमुट्ठानरूपं तग्गतिकमेव होति। कायवचीविञ्‍ञत्तिपवत्तियं वायोपथवीअधिमत्तता इमस्स अत्थस्स निदस्सनन्ति दट्ठब्बं। पुरतो हरणे, पच्छतो हरणे च उद्धरणे विय सल्‍लहुकसभावरूपप्पवत्तीति तासंयेव द्विन्‍नं धातूनं अधिमत्तता इच्छितब्बाति आह ‘‘तथा अतिहरणवीतिहरणेसू’’ति। यथा उद्धरणादीसु सल्‍लहुकसभावत्ता पच्छिमानं द्विन्‍नं धातूनं किच्‍चं अधिकं होति, इतरासं हीनं, एवं वोस्सज्‍जनादीसु तीसु गरुसभावत्ता पुरिमानं द्विन्‍नं किच्‍चं अधिकं होति, इतरासं हीनन्ति दस्सेन्तो आह ‘‘वोस्सज्‍जने’’तिआदि।

तदुपादायरूपानीति ता धातुयो निस्साय पवत्तउपादारूपानि। एत्थेवाति उद्धरणेयेव। तेनाह ‘‘अतिहरणं अप्पत्वा’’ति। इतीति एवं। तत्थ तत्थाति तस्मिं तस्मिं उद्धरणादिकोट्ठासे। पब्बंपब्बन्तिआदि तेसं धम्मानं कोट्ठासन्तरसङ्कराभावदस्सनं। तटतटायन्ताति तटतटायन्ति विय, तेन नेसं पवत्तिक्खणस्स इत्तरतं दस्सेति।

७११.अस्साति सम्मसनस्स। दारुतिणुक्‍कादीसूति दारुउक्‍कातिणुक्‍कादीसु। ‘‘किं अन्धबाल एकघनं सततं सब्बदाभाविं एकन्ति मञ्‍ञसी’’ति अधिप्पायेनाह ‘‘किमेत्थ मनाप’’न्ति। इदम्पीति यदिदं तेलवट्टिक्खयेन पदीपस्स अपञ्‍ञायनं वुत्तं, इदम्पि। अङ्गुलङ्गुलन्तरेति अङ्गुलिया मितं अङ्गुलन्ति अङ्गुलप्पमाणे पदेसेति अत्थो। तन्तुनो अवयवलेसभूतं परमसुखुमभावप्पत्तं अंसुं सन्धायाह ‘‘अंसुं पन मुञ्‍चित्वा’’ति।

तत्थातिआदि उपमासंसन्दनं। तत्थ कामं उपमेय्ये विय उपमायं पाकटो कालभेदो नत्थि, एककोट्ठासगतं पन कोट्ठासन्तरं न पापुणातीति एत्तावता उपमाभावो वेदितब्बो। उपमायम्पि वा ताव यावाति कालस्स भेदमत्ता लब्भतेवाति तस्सा गहणे कालभेदवसेनापि उपमा योजेतब्बा।

७१२.पुब्बे आदाननिक्खेपादिवसेन चतुसन्ततिरूपं सङ्घरित्वा दस्सितं, इदानि आहारसमुट्ठानादिवसेन भिन्दित्वा दस्सेन्तो ‘‘तदेव रूपं विसङ्खरित्वा’’तिआदिमाह। तत्थ विसङ्खरित्वा विभजित्वा। ‘‘विसङ्घरित्वा’’ति वा पाठो, अयमेवत्थो। आहारमयन्ति आहारेन निब्बत्तं। झत्तन्ति मिलातं। किलन्तन्ति खिन्‍नं। धातन्ति तित्तं। पीणितन्ति मंसूपचयसम्पत्तिया पीणितं। ततो एव मुदु। सिनिद्धन्ति सिनिद्धच्छविताय सण्हं। ततो एव फस्सवन्तं।

७१३.उण्हकाले समुट्ठितं रूपन्ति उण्हसन्तापेन सन्तत्तं रूपं सन्धायाह। सीतउतुनाति सप्पायेन सीतउतुना।

७१४.आयतनद्वारवसेनाति आयतनसङ्खातद्वारवसेन। कम्मद्वारनिवत्तनत्थं आयतनग्गहणं। कायद्वारेति पसादकायद्वारे। मनोद्वारं नाम सावज्‍जनं भवङ्गं। तस्स निस्सयभावतो हदयवत्थुं सन्धाय निस्सितवोहारेन ‘‘मनोद्वारे’’ति वुत्तं, यत्थ मनोद्वारुप्पत्ति।

७१५.सोमनस्सितदोमनस्सितवसेनाति सोमनस्सितदोमनस्सितपुग्गलवसेन, सोमनस्सितदोमनस्सितकालवसेन वा।

अयमत्थोति अयं इदानि वुच्‍चमानो सङ्खारानं अतिइत्तरखणतासङ्खातो अत्थो।

जीवितन्ति जीवितिन्द्रियं। सुखदुक्खाति सुखदुक्खवेदना। उपेक्खापि हि सुखदुक्खासु एव अन्तोगधा इट्ठानिट्ठभावतो। अत्तभावोति जीवितवेदनाविञ्‍ञाणानि ठपेत्वा अवसिट्ठधम्मा वुत्ता। सञ्‍ञाति केचि। केवलाति अत्तना निच्‍चभावेन वा अवोमिस्सा। एकचित्तसमायुत्ताति एकेकेन चित्तेन सहिता। लहुसो वत्तते खणोति वुत्तनयेन एकचित्तक्खणिकताय लहुको अतिइत्तरो जीवितादीनं खणो वत्तति।

चुल्‍लासीतिसहस्सानि कप्पन्ति चतुरासीतिसहस्सपरिमाणं कप्पं, अच्‍चन्तसंयोगे एतं उपयोगवचनं। कप्पन्ति च सामञ्‍ञवसेन एकवचनं। मरूति देवा। द्वीहि चित्तेहि समोहिताति एवं चिरजीविनोपि ते द्वीहि चित्तेहि सहिता हुत्वा न तिट्ठन्ति। इदं वुत्तं होति – तेसम्पि सन्ताने जीवितादीनि द्वीहि चित्तेहि सह न तिट्ठन्ति, एकेन चित्तेन सह उप्पन्‍नानि तेनेव सह निरुज्झनतो याव दुतिया न तिट्ठन्तीति।

ये निरुद्धा मरन्तस्साति चवन्तस्स सत्तस्स चुतिचित्तेन सद्धिं निरुद्धाति वत्तब्बा ये खन्धा। तिट्ठमानस्स वा इधाति ये वा इध पवत्तियं तिट्ठन्तस्स धरन्तस्स भङ्गप्पत्तिया निरुद्धक्खन्धा। सब्बेपि सदिसा ते सब्बेपि एकसदिसा अत्थङ्गता अप्पटिसन्धिका पुन आगन्त्वा पटिसन्धानाभावेन विगता। यथा हि चुतिक्खन्धा न निब्बत्तन्ति, एवं ततो पुब्बेपि खन्धा। तस्मा एकचित्तक्खणिकं सत्तानं जीवितन्ति अधिप्पायो।

अनन्तरा च ये भग्गाति ये सङ्खारा अनन्तरमेव भग्गा निरुद्धा। ये च भग्गा अनागतेति ये च सङ्खारा अनागते भग्गा भञ्‍जनसीला भिज्‍जिस्सन्ति। तदन्तरा निरुद्धानन्ति तेसं अतीतानागतानं अन्तरा वेमज्झे पच्‍चुप्पन्‍नतं पत्वा निरुद्धानं भग्गानं। वेसमं नत्थि लक्खणेति तेसं तिविधानम्पि भङ्गलक्खणनिमित्तं विसमता विसदिसता नत्थि।

अनिब्बत्तेनन जातोति अनुप्पन्‍नेन चित्तेन जातो न होति, अजातो नाम होति। पच्‍चुप्पन्‍नेन वत्तमानेन चित्तेन जीवति जीवमानो नाम होति। चित्तभङ्गा मतो लोकोति चुतिचित्तस्स विय सब्बस्सपि तस्स तस्स चित्तस्स भङ्गप्पत्तिया अयं लोको परमत्थतो मतो नाम होति निरुद्धस्स अप्पटिसन्धिकत्ता। एवं सन्तेपि पञ्‍ञत्ति परमत्थिया यायं तं तं सन्तं सनिस्सयं चित्तं उपादाय ‘‘तिस्सो जीवति, फुस्सो जीवती’’ति एवं वचनप्पवत्तिया विसयभूता सन्तानपञ्‍ञत्ति, सा एत्थ परमत्थिया परमत्थभूता। तथा हि वदन्ति ‘‘नामगोत्तं न जीरती’’ति (सं॰ नि॰ १.७६)।

७१६.‘‘विवट्टकप्पतो पट्ठाय उप्पज्‍जनकरूप’’न्ति इमिना सयमेव उप्पज्‍जनकधम्मताय ‘‘धम्मतारूप’’न्ति अन्वत्थनामतं दस्सेति। अयलोहादीसु अयो नाम काळलोहं। लोहं नाम जातिलोहं विजातिलोहं कित्तिमलोहं पिसाचलोहन्ति चतुब्बिधं। तत्थ अयो रजतं सुवण्णं तिपु सीसं तम्बलोहं वेकन्तकलोहन्ति इमानि सत्त जातिलोहानि। नागनासिकलोहं विजातिलोहं। कंसलोहं वट्टलोहं हारकूटन्ति तीणि कित्तिमलोहानि। मोरक्खकादि पिसाचलोहं। तत्थ तम्बलोहं वेकन्तकन्ति इमेहि द्वीहि जातिलोहेहि सद्धिं सेसं सब्बम्पि इध ‘‘लोह’’न्ति गहितन्ति। तिपूति सेततिपु। सीसन्ति काळतिपु। सुवण्णं आकरुप्पन्‍नरसविद्धादिभेदं। मुत्ता सामुद्दिकमुत्तादि। मणीति वेळुरियलोहितङ्गमसारगल्‍लानि ठपेत्वा अवसेसो सब्बो मणिविसेसो। वेळुरियो वंसवण्णमणि। सङ्खो सामुद्दिकसङ्खो। सिलाति काळसिलापण्डुसिलादिभेदा सब्बापि रतनसम्मतसिला। पवाळं नाम वट्टुमं विद्धमं। लोहितङ्गं रत्तमणि। मसारगल्‍लं कबरमणि। भूमिआदयो पाकटाव। तदस्साति तं धम्मतारूपं अस्स योगिनो।

तरुणपल्‍लववण्णन्ति अम्बादीनं तरुणपल्‍लवेन समानवण्णं। सभागरूपसन्ततिन्ति वण्णादिना समानभागं रूपसन्तानं। अनुप्पबन्धापयमानन्ति हेतुफलपरम्पराय सम्बन्धनवसेन पवत्तन्ति।

सोति योगी। तन्ति असोकरुक्खपण्णं। परिग्गहेत्वाति ञाणेन परिच्छिज्‍ज गहेत्वा। इमिना नयेनाति इमिना असोकपण्णे वुत्तेन नयेन। सब्बम्पि अयलोहादिभेदं धम्मतारूपं। तम्पि हि सीतकाले सीतलं, उण्हकाले सूरियसन्तापेन उण्हतरं होति। तत्थ सीतभावेन पवत्तं रूपं उण्हं उण्हभावेन पवत्तं रूपं सीतं न पापुणाति। तत्थ तत्थेव तटतटायन्तं भिज्‍जतीतिआदिना योजेतब्बं।

७१८.तम्पि चित्तन्ति आदाननिक्खेपतो सम्मसनवसेन पवत्तचित्तुप्पादम्पि। चित्तसीसेन हि निद्देसो। एस नयो सब्बत्थ। यमकतो सम्मसति नाम नामरूपधम्मे आरब्भ युगळवसेन सम्मसनस्स पवत्तनतो। अयञ्हि पुब्बे रूपसत्तकवसेन सम्मसित्वा ठितोपि इदानि आदाननिक्खेपादिवसेन सम्मसित्वाव तं सम्मसति। खणिकतो सम्मसनादीसुपि एसेव नयो।

७१९.एतम्पीति एतं चतुत्थसम्मसनचित्तम्पि। पठमचित्तन्ति आदाननिक्खेपादिवसेन रूपं सम्मसितचित्तं, यं रूपपरिग्गाहकचित्तन्ति अधिप्पेतं। सम्मसितसम्मसितचित्तसम्मसनेन तेसं खणिकभावस्स विभावनतो इदं सम्मसनं ‘‘खणिकतो सम्मसन’’न्ति वुत्तं।

७२०.इदमेव च सम्मसनं दिगुणितं अनेकसम्मसनपटिपाटिसम्भवतो ‘‘पटिपाटितो सम्मसन’’न्ति वुत्तं। वट्टेय्याति सम्भवेय्य। तथा सति पटिपाटिसम्मसनपसुता एव भावना सिया, न मूलकम्मट्ठानुपकारी, न चायं समापत्तिचारो। यस्मा च तत्तकेन रूपधम्मेसु, अरूपधम्मेसु च अनिच्‍चादिलक्खणानि सुट्ठु विभूतानि होन्ति, तस्मा वुत्तं ‘‘याव दसमचित्तसम्मसना…पे॰… ठपेतब्ब’’न्ति। ठपेतब्बन्ति च न एकादसमं द्वादसमेन सम्मसितब्बन्ति पटिपाटितो सम्मसनस्स परिच्छेददस्सनपरं, न ततो सम्मसनतो ओरमनदस्सनपरं, तस्मा पुनपि रूपं परिग्गहेत्वा याव दसमचित्तसम्मसना भावनमनुयुञ्‍जतेव। वुत्तन्ति अरियवंसकथायं वुत्तं।

७२१.विसुं सम्मसननयो नाम नत्थीति अनिच्‍चादिमनसिकारविनिमुत्तो अञ्‍ञो विपस्सनामनसिकारो नत्थि। विपस्सनाय च दिट्ठिआदिविक्खम्भना इध दिट्ठिउग्घाटनादयोति अधिप्पेता। विपस्सनाय एव हि पवत्तिविसेसेन दिट्ठिउग्घाटनादयो इज्झन्तीति दस्सेन्तो ‘‘यं पनेत’’न्तिआदिमाह। तत्थ सत्तसञ्‍ञाति सत्ता अत्थीति उप्पज्‍जनकसञ्‍ञा। दुब्बलाय अत्तदिट्ठिया सहगतसञ्‍ञातिपि वदन्ति। सत्तसञ्‍ञं उग्घाटितचित्तेनाति सत्तसञ्‍ञाय विक्खम्भनवसेन पवत्तचित्तेन दिट्ठि नुप्पज्‍जति, सञ्‍ञाविपल्‍लासहेतुउप्पज्‍जनका चित्तदिट्ठिविपल्‍लासा तदभावेन होन्तीति। मानो नाम यो दिट्ठूपनिस्सयो अपायगमनीयो, सो दिट्ठिया विक्खम्भिताय विक्खम्भितो एव होति, दिट्ठिया समुच्छिन्‍नाय समुच्छिज्‍जनतोति आह ‘‘दिट्ठिउग्घाटित…पे॰… मानो नुप्पज्‍जती’’ति। मानो विक्खम्भियमानो तण्हाय पवत्तिं निवारेति, अभिमतविसयेसु एव तण्हाय पवत्तनतोति वुत्तं ‘‘मानसमुग्घाटित…पे॰… तण्हा नुप्पज्‍जती’’ति। तण्हाति इध सुखुमा निकन्ति अधिप्पेताति आह ‘‘तण्हाय…पे॰… परियादिन्‍ना नाम होती’’ति।

अयं नयोति इदानि वुच्‍चमानो सम्मसनविधि।

मम विपस्सनाति इमस्सापि अत्तनियसञ्‍ञिताय विपस्सनाय सामिभूतो अत्ता परामसीयतीति दिट्ठिगाहताति तथा ‘‘गण्हतो हि दिट्ठिसमुग्घाटनं नाम न होती’’ति वुत्तं। कामञ्‍चायं दिट्ठिविसुद्धिकङ्खावितरणविसुद्धिसमधिगमेन विसुद्धदिट्ठिको, मग्गेन पन असमुग्घाटितत्ता अनोळारिकाय च दिट्ठिया वसेनेवं वुत्तं।

सुट्ठूति सम्मा। मनापन्ति च किरियाविसेसनं, मनवड्ढनाकारेनाति अत्थो। उभयेनापि विपस्सनाविसयं अधिमानमाह। तेन वुत्तं ‘‘मानसमुग्घाटो नाम न होती’’ति।

विपस्सितुं सक्‍कोमीति तत्थ समत्थतापदेसेन गुणविसेसयोगतो विपस्सनाय अस्सादेतब्बता दस्सीयति, चित्तं विपस्सितुं सक्‍कोमि। तस्मा विपस्सन्तो एव कालं वीतिनामेस्सामीति विपस्सनं अस्सादेन्तस्साति योजना।

यस्मा दिट्ठिसमुग्घाटनं नामेत्थ विसेसतो अनत्तानुपस्सनाय होति, तस्मा तं दस्सेन्तेन ‘‘सचे सङ्खारा’’तिआदिना अनत्तानुपस्सनाविधिं वत्वा यस्मा पन अनत्ततो अनुपस्सन्तेन सङ्खारा अनिच्‍चतोपि दुक्खतोपि अनुपस्सितब्बा एव तदुपब्रूहनतो, तस्मा ‘‘हुत्वा अभावट्ठेना’’तिआदि वुत्तं।

यस्मा मानसमुग्घाटनं नाम अनिच्‍चानुपस्सनाय होति। खणे खणे भिज्‍जनके सङ्खारे पस्सन्तस्स कुतो मानस्स अवसरो। अनिच्‍चसञ्‍ञा भावेतब्बा अस्मिमानसमुग्घाटायाति हि वुत्तं।

७२२.सब्बाकारतोति इध विय एकदेसेन अवत्वा सब्बाकारतो सरूपतो, किच्‍चतो च अनवसेसतो वत्तब्बा। इधेवाति तीरणपरिञ्‍ञायमेव। एकच्‍चानंयेवेत्थ अनुपस्सनानं पटिलाभोति आह ‘‘एकदेसं पटिविज्झन्तो’’ति, ता पन सयमेव सरूपतो दस्सेस्सति । तप्पटिपक्खे धम्मेति या अनुपस्सना इध सम्भवन्ति, तासं पटिपक्खे धम्मे निच्‍चसञ्‍ञादिके पजहति विक्खम्भेति।

खयानुपस्सनन्ति सङ्खारानं खणभङ्गानुपस्सनं। भावेन्तोति वड्ढेन्तो। घनसञ्‍ञन्ति सन्ततिसमूहकिच्‍चारम्मणानं वसेन एकत्तग्गहणं। खयानुपस्सनन्ति हुत्वा अभावानुपस्सनन्ति वदन्ति। याय पञ्‍ञाय घनविनिब्भोगं कत्वा ‘‘अनिच्‍चं खयट्ठेना’’ति (पटि॰ म॰ १.४८) पस्सति, सा खयानुपस्सना। भङ्गानुपस्सनतो पट्ठाय तस्सा पारिपूरीति घनसञ्‍ञाय पहानं होति, ततो पुब्बे अपरिपुण्णताय तं न होति। एवमञ्‍ञत्थापीति परिपुण्णापरिपुण्णता पहानतीरणपरिञ्‍ञासु विपस्सनापञ्‍ञाय दट्ठब्बा। पच्‍चक्खतो, अन्वयतो च सङ्खारानं भङ्गं दिस्वा तत्थेव भङ्गसङ्खाते निरोधे अधिमुत्तता वयानुपस्सना, ताय आयूहनं पजहति। यदत्थं, याय च आयूहति, तस्मिं पवत्ते तण्हाय चस्स चित्तं न नमतीति। तेन वुत्तं ‘‘वयानुपस्सनं भावेन्तो आयूहनं पजहती’’ति। जातस्स जरामरणेहि द्विधा परिणामदस्सनं, रूपसत्तकादिवसेन वा परिग्गहितस्स तंतंपरिच्छेदतो परं अञ्‍ञभावदस्सनं विपरिणामानुपस्सना, ताय धुवसञ्‍ञं थिरभावगहणं पजहति।

अनिमित्तानुपस्सनादयो अनिच्‍चानुपस्सनादयो एव। निमित्तन्ति सन्ततियं, समूहे च एकत्तसञ्‍ञाय गय्हमानं कालन्तरावट्ठायिभावेन, निच्‍चभावेन च सङ्खारानं सकिच्‍चपरिच्छेदताय सविग्गहं विय उपट्ठानमत्तं। पणिधिन्ति सुखपत्थनं, रागादिपणिधिं वा, अत्थतो तण्हावसेन सङ्खारेसु निन्‍नतं। अभिनिवेसन्ति अत्ताभिनिवेसं। एतेसञ्हि निमित्तादीनं पटिपक्खभावेन अनिच्‍चानुपस्सनादयो अनिमित्तादिनामेहि वुत्ताति अनिच्‍चानुपस्सनादीहि पहातब्बा निच्‍चसञ्‍ञादयो विय निमित्तग्गाहादयोव पटिपक्खाति दट्ठब्बा। रूपादिआरम्मणं ञत्वा तदारम्मणस्स चित्तस्स भङ्गं दिस्वा सङ्खारा एव भिज्‍जन्ति, सङ्खारानं मरणं, न अञ्‍ञो कोचि अत्थीति भङ्गवसेन सुञ्‍ञतं गहेत्वा पवत्ता विपस्सना अधिपञ्‍ञा च सा धम्मेसु च विपस्सनाति अधिपञ्‍ञाधम्मविपस्सना, ताय निच्‍चसारादिआदानवसेन पवत्तं अभिनिवेसं सतण्हं दिट्ठिं पजहति। यथाभूतञाणदस्सनं नाम सप्पच्‍चयनामरूपदस्सनं। तेन ‘‘अहोसिं नु खो अहमतीतमद्धान’’न्ति (म॰ नि॰ १.१८; सं॰ नि॰ २.२०) एवमादिकं, ‘‘इस्सरतो लोको सम्भवती’’ति एवमादिकञ्‍च सम्मोहाभिनिवेसं पजहति। भयतुपट्ठानवसेन उप्पन्‍नं सब्बभवादीसु आदीनवदस्सनञाणं आदीनवानुपस्सना, ताय कस्सचिपि आलयनिस्सयअदस्सनतो आलयाभिनिवेसं तथापवत्तं तण्हं पजहति। सङ्खारानं मुञ्‍चनस्स उपायभूतं पटिसङ्खाञाणं पटिसङ्खानुपस्सना, ताय अनिच्‍चादीसु अप्पटिसङ्खातत्ता पटिसङ्खानस्स पटिपक्खभूतं अविज्‍जं पजहति। सङ्खारुपेक्खा, अनुलोमञाणञ्‍च विवट्टानुपस्सना। तस्सा हि वसेन तस्स पदुमपलासे उदकबिन्दु विय सब्बसङ्खारेहि चित्तं पतिलीयति पतिकुटति, तस्मा ताय संयोगाभिनिवेसं कामसंयोगादिकिलेसप्पवत्तिं पजहति। अनिच्‍चानुपस्सनादयो सत्त अनुपस्सना हेट्ठा अत्थतो विभत्ताति, परतो च संवण्णीयन्तीति इध न वुत्ता।

७२४.एवं सङ्खेपतो उदयब्बयमनसिकारविधिं दस्सेत्वा इदानि वित्थारतो दस्सेतुं ‘‘पुन यानी’’तिआदि वुत्तं। तत्थ अविज्‍जासमुदयाति अविज्‍जाय उप्पादा, अत्थिभावाति अत्थो। निरोधविरोधीहि उप्पादो अत्थिभाववाचकोपि होतीति वुत्तोवायमत्थो। तस्मा पुरिमभवसिद्धाय अविज्‍जाय सति इमस्मिं भवे रूपस्स उप्पादो होतीति अत्थो। पच्‍चयसमुदयट्ठेनाति पच्‍चयस्स उप्पन्‍नभावेन, अत्थिभावतोति अत्थो। अविज्‍जादीहि च तीहि अतीतकालिकानि तेसं सहकारीकारणभूतानि उपादानादीनिपि गहितानेवाति दट्ठब्बं।

पवत्तिपच्‍चयेसु कबळीकाराहारस्स बलवताय सो एव गहितो ‘‘आहारसमुदया’’ति। तस्मिं पन गहिते पवत्तिपच्‍चयतासामञ्‍ञेन उतुचित्तानिपि गहितानेव होन्तीति चतुसमुट्ठानिकरूपस्स पच्‍चयतो उदयदस्सनं विभावितमेवाति दट्ठब्बं। अविज्‍जातण्हुपनिस्सयसहितेनेव कम्मुना रूपकायस्स निब्बत्ति। असति च अविज्‍जुपनिस्सयाय भवनिकन्तिया जातिया असम्भवो एवाति। यथा च रूपस्स अविज्‍जातण्हुपनिस्सयता, एवं वेदनादीनम्पि दट्ठब्बा। आहारो पन उप्पन्‍नस्स रूपस्स पोसको, कबळीकाराहारस्स अधिप्पेतत्ता, कामधाताधिट्ठानत्ता च देसनाय। उक्‍कंसनिद्देसेन वा आहारग्गहणं। ‘‘निब्बत्तिलक्खण’’न्तिआदिना कालवसेन उदयदस्सनमाह। तत्थ अद्धानवसेन पगेव उदयं पस्सित्वा ठितो इध सन्ततिवसेन दिस्वा अनुक्‍कमेन खणवसेन पस्सति। पञ्‍च लक्खणानीति अविज्‍जा तण्हा कम्मं आहारोति इमेसं पच्‍चयानं अत्थितासङ्खातलक्खणानि चेव रूपस्स निब्बत्तिलक्खणञ्‍चाति इमानि पञ्‍च लक्खणानि। तेसं अत्थिता हि रूपस्स उदयो लक्खीयति एतेहीति लक्खणानीति वुच्‍चन्ति। निब्बत्ति पन सङ्खतलक्खणमेवाति।

अविज्‍जानिरोधा रूपनिरोधोति अग्गमग्गञाणेन अविज्‍जाय अनुप्पादनिरोधतो अनागतस्स रूपस्स अनुप्पादनिरोधो होति पच्‍चयाभावे अभावतो। पच्‍चयनिरोधट्ठेनाति अविज्‍जासङ्खातस्स अनागते उप्पज्‍जनकरूपपच्‍चयस्स निरुद्धभावेन। तण्हानिरोधा कम्मनिरोधाति एत्थापि एसेव नयो। आहारनिरोधाति पवत्तिपच्‍चयस्स कबळीकाराहारस्स अभावे। रूपनिरोधोति तंसमुट्ठानरूपस्स अभावो होति। सेसं हेट्ठा वुत्तनयानुसारेन वेदितब्बं। विपरिणामलक्खणन्ति भङ्गकालवसेन तेसं वयदस्सनं। तस्मा तं अद्धावसेन पगेव पस्सित्वा ठितो इध सन्ततिवसेन दिस्वा अनुक्‍कमेन खणवसेन पस्सति। पञ्‍च लक्खणानीति इध अविज्‍जादीनं चतुन्‍नं पच्‍चयानं अनुप्पादनिरोधो, रूपस्स खणनिरोधो चाति इमानि पञ्‍च लक्खणानि। तेसञ्हि अनुप्पादनिरोधो, रूपस्स अच्‍चन्तनिरोधो लक्खीयति एतेहीति लक्खणानीति वुच्‍चन्ति।

विपरिणामो सङ्खतलक्खणमेव। एस नयो वेदनाक्खन्धादीसु। अयं पन विसेसो – ‘‘फुट्ठो वेदेति, फुट्ठो सञ्‍जानाति, फुट्ठो चेतेती’’ति (सं॰ नि॰ ४.९३), ‘‘फस्सपच्‍चया वेदना, चक्खुसम्फस्सजा वेदना, सञ्‍ञा, चेतना’’ति, च वचनतो फस्सो वेदना (विभ॰ २३१) सञ्‍ञा सङ्खारक्खन्धानं पवत्तिपच्‍चयो, तंनिरोधा च तेसं निरोधो, महापदान (दी॰ नि॰ २.६०) महानिदानसुत्तेसु, अभिधम्मे च अञ्‍ञमञ्‍ञपच्‍चयवारे ‘‘नामरूपपच्‍चया विञ्‍ञाण’’न्ति (कथा॰ ७१९) वचनतो नामरूपं विञ्‍ञाणस्स पवत्तिपच्‍चयो, तंनिरोधा तस्स निरोधोति वुत्तं ‘‘फस्ससमुदया वेदनासमुदयो’’तिआदि।

७२५.एवं मनसि करोतो न याव उदयब्बयञाणं उप्पज्‍जति, ताव उदयब्बया सुट्ठु पाकटा न होन्तीति कत्वा वुत्तं ‘‘इति किरिमे धम्मा…पे॰… पटिवेन्ती’’ति, नयदस्सनवसेन वा एवं वुत्तं। पठमञ्हि पच्‍चुप्पन्‍नधम्मानं उदयब्बयं दिस्वा अथ अतीतानागते नयं नेति। दुक्खादिसच्‍चप्पभेदा, अनुलोमादिपटिच्‍चसमुप्पादप्पभेदा, एकत्तादिनयप्पभेदा, अनिच्‍चतादिलक्खणप्पभेदा च सच्‍चपटिच्‍चसमुप्पादनयलक्खणप्पभेदा। पटिच्‍चसमुप्पादग्गहणेनेव चेत्थ पटिच्‍चसमुप्पन्‍नधम्मानम्पि गहणं, तेसम्पि अत्तनो फलं पति पटिच्‍च समुप्पादभावतो।

७२६.यन्ति करणे पच्‍चत्तवचनं, येन ञाणेनाति अत्थं वदन्ति। यन्ति वा किरियापरामसनं। खन्धानं समुदयं पस्सति, खन्धानं निरोधं पस्सतीति एत्थ यदेतं दस्सनन्ति अत्थो। यं पनाति एत्थापि एसेव नयो। एत्थ च यथा अविज्‍जादिसमुदयनिरोधतो खन्धानं समुदयनिरोधस्स अञ्‍ञत्ता ‘‘अविज्‍जासमुदया रूपसमुदयो’’तिआदिवचनभेदो (पटि॰ म॰ १.५०) कतो, न एवं निब्बत्तिविपरिणामलक्खणेहि खन्धानं उदयब्बयस्स भेदो अत्थि अभिन्‍नाधिकरणत्ताति ‘‘निब्बत्तिलक्खणविपरिणामलक्खणानि पस्सन्तो खन्धानं उदयब्बयं पस्सती’’ति वचनभेदं अकत्वा वुत्तं। उप्पत्तिक्खणेयेव हीति हि-सद्दो हेतुअत्थो। यस्मा उप्पादक्खणेयेव निब्बत्तिलक्खणं, भङ्गक्खणेयेव च विपरिणामलक्खणं, तस्मा तानि पस्सन्तो खणतो खन्धानं उदयब्बये पस्सति नामाति ‘‘यं पना’’तिआदिना वुत्तमेवत्थं पाकटतरं करोति।

७२७.इच्‍चस्सेवन्ति एत्थ इति-सद्दो हेतुअत्थो। यस्मा ‘‘अविज्‍जा समुदया’’तिआदि पच्‍चयतो खन्धानं उदयब्बयदस्सनं, ‘‘निब्बत्तिलक्खण’’न्तिआदि खणतो, तस्माति अत्थो। अस्साति योगिनो। एवन्ति वुत्तप्पकारपरामसनं। ये पन ‘‘इच्‍चस्स पच्‍चयतो’’ति पठन्ति, तेसं इतीति वुत्तप्पकारपरामसनं। जनकावबोधतोति खन्धानं जनकस्स अविज्‍जादिपच्‍चयस्स अवबुज्झनतो । जातिदुक्खावबोधतोति जातिसङ्खातस्स दुक्खस्स अवबुज्झनतो। दुक्खसच्‍चं पाकटं होति एकदेसदस्सनेन पब्बतसमुद्दादिदस्सनकानं विय। मरणदुक्खावबोधतोति एत्थापि एसेव नयो। ‘‘पच्‍चयानुप्पादेना’’ति एतेन पच्‍चयानं अनुप्पादनिरोधो इध पच्‍चयनिरोधोति दस्सेति। पच्‍चयवतन्ति पच्‍चयतो उप्पज्‍जनकानं। यञ्‍चस्स उदयब्बयदस्सनन्ति यं अस्स योगिनो पच्‍चयतो, खणतो च उदयब्बयानं दस्सनं। तत्थ असम्मोहो, तप्पधानो वा वितक्‍कादिधम्मपुञ्‍जो मग्गो वायं लोकिकोति निय्यानानुलोमतो लोकिको मग्गो एवायं। इति तस्मा मग्गसच्‍चं पाकटं होति सभावावबोधतो। तेनाह ‘‘तत्र सम्मोहविघाततो’’ति, तदङ्गवसेनाति अत्थो। अथ वा यथावुत्तो सम्मादिट्ठिसङ्खातो मग्गो अरियमग्गस्स उपायभूतो असम्मोहसभावो अत्तानम्पि पकासेति पदीपो वियाति मग्गसच्‍चं पाकटं होति। स्वायं पाकटभावो मोहन्धकारविधमनेनाति आह ‘‘तत्र सम्मोहविघाततो’’ति।

७२८.‘‘अविज्‍जापच्‍चया’’तिआदिको अनुलोमो पटिच्‍चसमुप्पादो पवत्तिया अनुलोमनतो। ‘‘अविज्‍जासमुदया’’तिआदिना अविज्‍जादीसु सन्तेसूति अयमत्थो वुत्तोति आह ‘‘इमस्मिं सति इदं होतीति अवबोधतो’’ति। पवत्तिया विलोमनतो ‘‘अविज्‍जायत्वेव असेसविरागनिरोधा’’तिआदिको पटिलोमो पटिच्‍चसमुप्पादो। ते च सङ्खता पटिच्‍चसमुप्पन्‍ना ‘‘जरामरणं, भिक्खवे, अनिच्‍चं सङ्खतं पटिच्‍चसमुप्पन्‍न’’न्तिआदिवचनतो (सं॰ नि॰ २.२०)। पटिच्‍चसमुप्पन्‍नस्स च पाकटता पच्‍चयाकारपाकटताय एव ‘‘इमस्सेतं फल’’न्ति अवबोधतो।

७२९.पुरिमपुरिमानं निरोधो उत्तरुत्तरानं उप्पादानुबन्धोति अयमत्थो पच्‍चयतो उदयदस्सनेन सिज्झमानो एकत्तनयाधिगमाय होति। यतो ‘‘अञ्‍ञो करोति, अञ्‍ञो पटिसंवेदयती’’तिआदि (सं॰ नि॰ २.१७) वोहारसिद्धिया उच्छेददिट्ठिया अनोकासता। तेनाह ‘‘हेतुफलसम्बन्धेना’’तिआदि। सङ्खारा खणे खणे उप्पज्‍जन्तीति अयमत्थो खणतो उदयदस्सनेन सिज्झमानो नानत्तनयाधिगमाय होति। यतो पच्‍चयपच्‍चयुप्पन्‍नानं सभावभेदावबोधतो ‘‘सो करोति, सो पटिसंवेदयती’’तिआदिनयप्पवत्ताय सस्सतदिट्ठिया अनोकासता। तेनाह ‘‘खणतो उदयदस्सनेना’’तिआदि। पच्‍चयतोउदयब्बयदस्सनेन पच्‍चये सति फलस्स भावो, असति अभावोति इमस्स अत्थस्स सिद्धिया अत्थितामत्तेनेव ते धम्मा कारणन्ति अब्यापारनयो पाकटो होति। यतो अत्तदिट्ठिया अनोकासता वसवत्तिताय अलब्भनेय्यतो । तेन वुत्तं ‘‘धम्मान’’न्तिआदि। अवसवत्तिभावो परायत्तता, सा च सप्पच्‍चयताय वेदितब्बा। पच्‍चयतो उदयदस्सनेन तेहि तेहि पच्‍चयेहि इमे धम्मा उप्पज्‍जन्ति, उप्पज्‍जमाना च पच्‍चयानुरूपमेव उप्पज्‍जन्तीति हेतुफलस्स हेतुअनुरूपतो सिद्धिया अकिरियदिट्ठिया अनोकासतावाति आह ‘‘पच्‍चयतो पना’’तिआदि। सति कारणे कुतो अकिरियवादो। करोतीति हि कारणं।

७३०.पच्‍चयतो उदयं पस्सतो पच्‍चये सति सभावे सति फलस्स सम्भवोति अत्थितामत्तेन उपकारकताति सङ्खतानं निरीहता, असति च अभावोति पच्‍चयाधीनवुत्तिता च विञ्‍ञायमाना अत्तसुञ्‍ञतं विभावेतीति आह ‘‘पच्‍चयतो चस्स…पे॰… तावबोधतो’’ति। अनिच्‍चलक्खणं पाकटं होति खणतो उदयब्बयदस्सनेन सङ्खारानं उदयब्बयतो परिच्छिन्‍नताय विञ्‍ञायमानत्ता। तेनाह ‘‘हुत्वा अभावावबोधतो’’ति। उप्पज्‍जित्वा निरुज्झनञ्हि हुत्वा अभावो। पुब्बन्तापरन्तविवेको अतीतानागतभावसुञ्‍ञता। न हि सङ्खारा खणत्तयतो पुब्बे, पच्छा च विज्‍जन्ति, तस्मा पुब्बन्तापरन्तविवेकावबोधतोति आदिअन्तवन्ततापटिवेधतोति अत्थो। दुक्खलक्खणम्पि पाकटं होति उदयब्बयदस्सनेनाति सम्बन्धो। उप्पज्‍जित्वा भिज्‍जन्ता सङ्खारा उप्पादतो उद्धं जराभङ्गावत्थन्तरुप्पत्तिया निरन्तरं विबाधीयन्तेव। सा च नेसं विबाधियमानता सम्मा उदयब्बयदस्सनेन विभूता होतीति आह ‘‘दुक्ख…पे॰… बोधतो’’ति।

सभावलक्खणम्पीति उदयब्बयदस्सनेन न केवलं अनिच्‍चदुक्खलक्खणमेव, अथ खो पथवीफस्सादीनं कक्खळफुसनादिसञ्‍ञितं सभावसङ्खातं लक्खणम्पि पाकभावविद्धं सभावावच्छिन्‍नं पाकटं होति। तेनाह ‘‘उदयब्बयपरिच्छिन्‍नावबोधतो’’ति। सभावलक्खणेति सभावसञ्‍ञिते लक्खणे, तंतंधम्मानं सलक्खणे। सङ्खतलक्खणस्स तावकालिकत्तम्पीति उप्पादादिसङ्खतलक्खणस्स उप्पादक्खणादिपरित्तकालिकतापि खणन्तरानवट्ठानतो तस्स। तेनाह ‘‘उदयक्खणे’’तिआदि। उदयवयमत्तग्गहणञ्‍चेत्थ उदयब्बयदस्सनवसेनेव इमस्स ञाणस्स पवत्तनतो, न ठितिक्खणस्स अभावा।

७३१.न केवलञ्‍च निच्‍चनवा, अथ खो परित्तकालट्ठायिनो। कथन्ति आह ‘‘सूरियुग्गमने’’तिआदि। तत्थ उदके दण्डेन कतलेखा उदके दण्डराजि। उस्सावबिन्दुआदयो पञ्‍च किच्‍चापि उत्तरुत्तरि अतिपरित्तट्ठायिभावदस्सनत्थं निदस्सिता, तथापि ते दन्धनिरोधा एव निदस्सिता, ततोपि लहुतरनिरोधत्ता सङ्खारानं। तथा हि गमनस्सादानं देवपुत्तानं हेट्ठुपरियायेन पटिमुखं धावन्तानं सिरसि पादे च बन्धखुरधारा सन्‍निपाततोपि सीघतरो रूपधम्मानं निरोधो वुत्तो, पगेव अरूपधम्मानं। न केवलं निच्‍चनवा, नापि परित्तकालट्ठायिनोव, अथ खो असारा। कथन्ति आह ‘‘माया’’तिआदि। मायादयो हि मणिआदिवसेन दिस्समाना अतंसभावताय असारा। तत्थ मन्तोसधभाविता इन्दजालादिका माया। मिगतण्हिका मरीचि। सुपिनमेव सुपिनन्तं। मण्डलाकारेन आविज्झियमानं अलातमेव अलातचक्‍कं। गन्धब्बदेवपुत्तानं कीळनिच्छावसेन नगरं विय आकासे उपट्ठानमत्तं गन्धब्बनगरं।

एत्तावताति य्वायं ‘‘जातं रूपं पच्‍चुप्पन्‍न’’न्तिआदिपाळिनयानुसारेन (पटि॰ म॰ १.४९), ‘‘यं किञ्‍चि रूपं अतीतानागतपच्‍चुप्पन्‍न’’न्तिआदिपाळिनयानुसारेन (म॰ नि॰ १.३४७, ३६१; २.११३; ३.८६, ८९; पटि॰ म॰ १.४८) वा याव उदयब्बयपटिवेधा भावनाविधि आरद्धो, एत्तावता। कलापसम्मसनादिकोपि हि सब्बो भावनाविधि उदयब्बयञाणुप्पादनस्सेव, न परिसपरिसरीरकरबन्धोति। वयधम्ममेवाति भिज्‍जनसभावमेव। वयं उपेति अत्तनो धम्मताय। यञ्हि उपक्‍कमेन विनस्सतीति वुच्‍चति, तम्पि अत्तनो धम्मताय एव विनस्सति अहेतुकत्ता विनासस्स। उपक्‍कमहेतु पन विसदिसुप्पादो होति। इमिना आकारेनाति ‘‘यं किञ्‍चि समुदयधम्मं, सब्बं तं निरोधधम्म’’न्ति (सं॰ नि॰ ५.१०८१; महाव॰ १६; पटि॰ म॰ २.३०) हि वुत्तं, तस्मा वयं अनालम्बित्वापि ‘‘वयधम्ममेव उप्पज्‍जती’’ति उदयस्स, ‘‘उप्पन्‍नञ्‍च इदं वयं उपेती’’ति वयस्स च इमिना यथावुत्तेन पच्‍चक्खकरणाकारेन। अधुना उप्पन्‍नं, न ताव बलप्पत्तन्ति आह ‘‘तरुणविपस्सनाञाण’’न्ति। कलापसम्मसनादिवसेन पवत्तं सम्मसनं न निप्परियायेन विपस्सनासमञ्‍ञं लभति, उदयब्बयानुपस्सनादिवसेन पवत्तमेव लभतीति आह ‘‘यस्साधिगमा आरद्धविपस्सकोति सङ्खं गच्छती’’ति।

७३३.विपस्सनोभासोति विपस्सनाचित्तसमुट्ठितं, ससन्ततिपतितं उतुसमुट्ठानञ्‍च भासुरं रूपं। तत्थ विपस्सनाचित्तसमुट्ठितं योगिनो सरीरट्ठमेव पभस्सरं हुत्वा तिट्ठति, इतरं सरीरं मुञ्‍चित्वा ञाणानुभावानुरूपं समन्ततो पत्थरति, तं तस्सेव पञ्‍ञायति, तेन फुट्ठोकासे रूपगतम्पि पस्सति, पस्सन्तो च चक्खुविञ्‍ञाणेन पस्सति, उदाहु मनोविञ्‍ञाणेनाति वीमंसितब्बन्ति वदन्ति। दिब्बचक्खुलाभिनो विय तं मनोविञ्‍ञाणविञ्‍ञेय्यमेवाति वुत्तं विय दिस्सतीति। विपस्सनावीथि नाम पटिपाटिया पवत्तमाना विपस्सनाव। उक्‍कन्ता नाम होति योगिना ‘‘मग्गप्पत्तोम्ही’’ति अधिमानेन विस्सट्ठत्ता, तस्स वा योगिनो विपस्सना ततो एव वीथि उक्‍कन्ता नाम होति। मूलकम्मट्ठानन्ति विपस्सनमेवाह।

वेमत्ततायाति अप्पविपुलतावसेन विसदिसताय। अस्साति ओभासस्स। द्वीहि कुट्टेहि परिच्छिन्‍नं गेहं द्विकुट्टगेहं। तस्स किर अब्भन्तरेपि एका भित्ति होति बहिपि, उभिन्‍नं अन्तरे अनुपरियायपथं होति, सायन्हे तत्थ सन्थरितानि पञ्‍चवण्णानि कुसुमानि, विसदञाणस्स ओभासेन फरितट्ठाने रूपगतञ्‍च दिब्बचक्खुनो विय पञ्‍ञायन्ति। तेन वुत्तं ‘‘भन्ते मय्ह’’न्तिआदि।

एवं ओभासस्स वेमत्तताय वत्थुं दस्सेत्वा चिरकालविप्पलम्बने वत्थुं दस्सेतुं ‘‘अयं पना’’तिआदि वुत्तं। तत्थ अयं पन विपस्सनुपक्‍किलेसोति वक्खमानप्पकारं सन्धायाह, न सब्बं। सोति सो समथविपस्सनालाभी अधिमानिको।

दिवासनेति दिवाट्ठाने निसीदितब्बआसने। पठमं ‘‘पञ्हं पुच्छिस्सामी’’ति चिन्तितत्ता वुत्तं ‘‘पञ्हं, भन्ते, पुच्छितुं आगतोम्ही’’ति।

पच्छा उपायेन पुथुज्‍जनभावं विञ्‍ञापेत्वा कम्मट्ठाने नियोजेस्सामीति चिन्तितत्ता वुत्तं ‘‘अवस्सयो भविस्सामिच्‍चेवाहं आगतो’’ति, तस्स च पधानत्ता सावधारणं कत्वा वुत्तं। अयं धम्मोति अयं अरियमग्गानुगतो पटिसम्भिदाधम्मोति थेरस्स अज्झासयवसेन वदति। समाधिन्ति अभिञ्‍ञासमाधिं। अञ्‍चितकण्णोति निच्‍चलट्ठपितकण्णपुटो। पलायितुं आरद्धो भयेन। तेनाह ‘‘थेरो किर दोसचरितो’’ति। दोसचरितस्स हि सूरस्सापि सहसा भयं उप्पज्‍जति। तेनस्स खीणासवत्थेरो अज्झासयं ञत्वा ‘‘इमिना उपायेन पुथुज्‍जनभावं जानापेस्सामी’’ति हत्थिनिम्मापनादिमकासि। दोसचरितत्ता हि थेरो खिप्पं पटिविज्झि। खिप्पविरागी हि दोसचरितो।

७३४.तस्साति उदयब्बयञाणं मत्थकं पापेन्तस्स योगिनो। ‘‘एवम्पि रूपं उदेति, एवम्पि रूपं वेती’’तिआदिना उदयब्बयानुपस्सनमेवेत्थ तुलनं, तीरणञ्‍च वेदितब्बं। यथा देवानमिन्देन खित्तं वजिरं अमोघं, अप्पटिहतञ्‍च होति, एवमिदम्पि ञाणं निपुणं उदयब्बयदस्सनेति वुत्तं ‘‘विस्सट्ठइन्दवजिरमिवा’’तिआदि। तत्थ तिखिणन्ति अकुण्ठं। सूरन्ति तेजवन्तं। अतिविसदन्ति निसितभावेन अतिविय पटुतरं ञाणं उप्पज्‍जति। तथा हिनेन योगी ‘‘मग्गप्पत्तोस्मी’’ति मञ्‍ञति।

विपस्सनापीतीति विपस्सनाचित्तसम्पयुत्ता पीति। खुद्दकादयो पीतियो हेट्ठा वण्णिता एव। यस्मा उदयब्बयानुपस्सनाय वीथिपटिपन्‍नाय अनुक्‍कमेन पञ्‍च पीतियो उप्पज्‍जन्ति, तस्मा वुत्तं ‘‘अयं पञ्‍च…पे॰… उप्पज्‍जती’’ति। मत्थकप्पत्तेन पन उदयब्बयञाणेन सद्धिं फरणापीतियेव होति। उपचारप्पनाक्खणतो अञ्‍ञदापि हि फरणापीति होतियेव। तेनाह ‘‘सकलसरीरं पूरयमाना उप्पज्‍जती’’ति।

पस्सद्धिआदीनि छ युगळकानि अञ्‍ञमञ्‍ञावियोगिनीति पस्सद्धिया उप्पन्‍नाय इतरापि उप्पन्‍ना एव होन्तीति किच्‍चदस्सनमुखेन ता सब्बापि दस्सेन्तो ‘‘कायचित्तानं नेव दरथो, न गारव’’न्तिआदिमाह। तत्थ कायग्गहणेन रूपकायस्सपि गहणं वेदितब्बं, न वेदनादिक्खन्धत्तयस्सेव। कायप्पस्सद्धिआदयो हि रूपकायस्सापि दरथादिनिम्मद्दिकाति। कायचित्तानि पस्सद्धानि…पे॰… उजुकानियेव होन्ति तेसं अपस्सद्धादिभावस्स हेतुभूतानं उद्धच्‍चादिथिनमिद्धादिदिट्ठिमानादिसेसनीवरणादिअस्सद्धियादिमायासाथेय्यादिसंकिलेसधम्मानं विधमनवसेन तदा विपस्सनाचित्तुप्पादस्स पवत्तनतो। तस्मिं समयेति तस्मिं उदयब्बयञाणुप्पत्तिसमये। मनुस्सानं अयन्ति मानुसी, मनुस्सयोग्गा कामसुखरति, तादिसेहि मनुस्सविसेसेहि अनुभवितब्बतानतिवत्तनतो दिब्बा रतिपि सङ्गहिता, मानुसीसदिसताय कामसुखभावेन दिब्बा रतिपि वा, तस्सा अतिक्‍कन्तताय न मानुसीति अमानुसी।

सुञ्‍ञागारन्ति यं किञ्‍चि विवित्तं सेनासनं, विपस्सनं एव वा। सापि हि निच्‍चभावादिसुञ्‍ञताय, योगिनो सुखसन्‍निस्सयताय च ‘‘सुञ्‍ञागार’’न्ति वत्तब्बतं लभति। चित्तस्स अनुपस्सनकरानं किलेसानं विगमेन सन्तचित्तस्स। संसारे भयस्स इक्खनेन भिक्खुनो। सम्मा ञायेन रूपारूपधम्मानं उदयब्बयानुपस्सनादिवसेन विपस्सतो। सम्मसतो अनारद्धविपस्सनानं मनुस्सानं अविसयताय अमानुसी। विपस्सनापीतिसुखसञ्‍ञिता रति होतीति अयमेत्थ गाथाय सङ्खेपत्थो। दुतियगाथा पन उदयब्बयञाणमेव सन्धाय वुत्ता। तत्थ यतो यतोति रूपतो वा अरूपतो वा।

विपस्सनासुखन्ति विपस्सनाचित्तसम्पयुत्तं चेतसिकसुखं। यस्मा तंसमुट्ठितेहि अतिपणीतरूपेहि सब्बो कायो परिफुटो, परिब्रूहितो च होति। तस्मा वुत्तं ‘‘सकलसरीरं अभिसन्दयमान’’न्ति।

७३५.उपक्‍किलेसवत्थुतायाति निप्परियायतो दिट्ठिमानतण्हा इध उपक्‍किलेसा तेसं वत्थुताय उप्पत्तिट्ठानताय। न सभावतोति आह ‘‘न अकुसलत्ता’’ति। यथा पन ओभासादयो, एवं निकन्तिपि दिट्ठिगाहादीनं ठानं होतीति वुत्तं ‘‘उपक्‍किलेसवत्थु चा’’ति। वत्थुवसेनेवाति गाहे अनामसित्वा गाहानं वत्थुतावसेनेव। अत्तवादी हि ‘‘अहंबुद्धिनिबन्धनो’’ति परिकप्पितो अत्ता ओभासस्स सामिभूतो ‘‘ममा’’ति सामिवचनस्स विसयभावेन गहितोति आह ‘‘मम ओभासो उप्पन्‍नोति गण्हतो हि दिट्ठिगाहो’’ति। ओभासस्स मनापग्गहणमुखेन तेन अत्तानं सेय्यादितो दहतीति वुत्तं ‘‘मनापो वत ओभासो उप्पन्‍नोति गण्हतो मानगाहो’’ति। अस्सादयतोति सम्पियायतो। तेसन्ति दिट्ठिगाहादिसञ्‍ञितानं उपक्‍किलेसानं वसेन। ओभासादीसूति ओभासादिनिमित्तं। कम्पनं यथारद्धविपस्सनाय अट्ठत्वा विक्खेपापत्ति, सा च ओभासादीसु तण्हादिगाहोति दस्सेन्तो ‘‘ओभासादीसु कम्पति…पे॰… समनुपस्सती’’ति आह।

ओभासनिमित्तं चित्तं विकम्पतीति सम्बन्धो। ओभासे वा विसयभूते उपक्‍किलेसेहि चित्तं विकम्पतीति योजना। तेनाह ‘‘येहि चित्तं पवेधती’’ति। सेसेसुपि एसेव नयो। उपट्ठानेति सतियं। उपेक्खाय चाति विपस्सनुपेक्खाय च।