३३. उमापुप्फियवग्गो
१-१०. उमापुप्फियत्थेरअपदानादिवण्णना
तेत्तिंसतिमे वग्गे पठमदुतियततियचतुत्थपञ्चमछट्ठापदानानि उत्तानानियेव।
५५.सत्तमापदाने समयं अगमासहन्ति समूहं समागमट्ठानं अहं अगमासिन्ति अत्थो।
६२.अब्बुदनिरब्बुदानीति ‘‘पकोटिसतसहस्सानं सतं अब्बुदं, अब्बुदसतसहस्सानं सतं निरब्बुद’’न्ति वुत्तत्ता आयुना अब्बुदनिरब्बुदानि गतमहाआयुवन्ता मनुजाधिपा चक्कवत्तिनो खत्तिया अट्ठ अट्ठ हुत्वा कप्पानं पञ्चवीससहस्सम्हि आसिंसु अहेसुन्ति अत्थो। अट्ठमनवमदसमापदानानि पाकटानेवाति।
तेत्तिंसतिमवग्गवण्णना समत्ता।