२. पारिवासिकक्खन्धकं

७६.अञ्‍ञो सामणेरो न गहेतब्बोति उपज्झायेन हुत्वा अञ्‍ञो सामणेरो न गहेतब्बो। उपज्झं दत्वा गहितसामणेरापीति पकतत्तकाले उपज्झं दत्वा गहितसामणेरापि। लद्धसम्मुतिकेन आणत्तोपि गरुधम्मेहि अञ्‍ञेहि वा ओवदितुं लभतीति आह ‘‘पटिबलस्स वा भिक्खुस्स भारो कातब्बो’’ति। आगता भिक्खुनियो वत्तब्बाति सम्बन्धो। सवचनीयन्ति सदोसं । जेट्ठकट्ठानं न कातब्बन्ति पधानट्ठानं न कातब्बं। किं तन्ति आह ‘‘पातिमोक्खुद्देसकेन वा’’तिआदि।

रजेहि हता उपहता भूमि एतिस्साति रजोहतभूमि, रजोकिण्णभूमीति अत्थो। पच्‍चयन्ति वस्सावासिकलाभं सन्धाय वुत्तं। एकपस्से ठत्वाति पाळिं विहाय भिक्खूनं पच्छतो ठत्वा। सेनासनं न लभतीति सेय्यापरियन्तभागिताय वस्सग्गेन गण्हितुं न लभति। अस्साति भवेय्य। ‘‘आगन्तुकेन आरोचेतब्बं, आगन्तुकस्स आरोचेतब्ब’’न्ति अविसेसेन वुत्तत्ता सचे द्वे पारिवासिका गतट्ठाने अञ्‍ञमञ्‍ञं पस्सन्ति, उभोहिपि अञ्‍ञमञ्‍ञस्स आरोचेतब्बं। यथा बहि दिस्वा आरोचितस्स भिक्खुनो विहारं आगते पुन आरोचनकिच्‍चं नत्थि, एवं अञ्‍ञं विहारं गतेनपि तत्थ पुब्बे आरोचितस्स पुन आरोचनकिच्‍चं नत्थीति वदन्ति।

८१.अविसेसेनाति पारिवासिकस्स उक्खित्तकस्स च अविसेसेन। ओबद्धन्ति पलिबुद्धं।

८३.सहवासोति वुत्तप्पकारे छन्‍ने पकतत्तेन भिक्खुना सद्धिं सयनमेव अधिप्पेतं, न सेसइरियापथकप्पनं। सेसमेत्थ सुविञ्‍ञेय्यमेव।

पारिवासिकक्खन्धकवण्णना निट्ठिता।