१. महाखन्धकं

१. महाखन्धकं

बोधिकथावण्णना

इदानि उभतोविभङ्गानन्तरं सङ्गहमारोपितस्स महावग्गचूळवग्गसङ्गहितस्स खन्धकस्स अत्थसंवण्णनं आरभितुकामो ‘‘उभिन्‍नं पातिमोक्खान’’न्तिआदिमाह। तत्थ उभिन्‍नं पातिमोक्खानन्ति उभिन्‍नं पातिमोक्खविभङ्गानं। पातिमोक्खग्गहणेन हेत्थ तेसं विभङ्गो अभेदेन गहितो। यं खन्धकं सङ्गायिंसूति सम्बन्धो। खन्धानं समूहो खन्धको, खन्धानं वा पकासनतो दीपनतो खन्धको। ‘‘खन्धा’’ति चेत्थ पब्बज्‍जुपसम्पदादिविनयकम्मसङ्खाता चारित्तवारित्तसिक्खापदसङ्खाता च पञ्‍ञत्तियो अधिप्पेता। पब्बज्‍जादीनि हि भगवता पञ्‍ञत्तत्ता ‘‘पञ्‍ञत्तियो’’ति वुच्‍चन्ति। पञ्‍ञत्तियञ्‍च खन्धसद्दो दिस्सति ‘‘दारुक्खन्धो अग्गिक्खन्धो’’तिआदीसु विय। अपिच भागरासट्ठतापेत्थ युज्‍जतियेव तासं पञ्‍ञत्तीनं भागतो रासितो च विभत्तत्ता। खन्धकोविदाति पञ्‍ञत्तिभागरासट्ठवसेन खन्धट्ठे कोविदा।

पदभाजनीये येसं पदानं अत्था येहि अट्ठकथानयेहि पकासिताति योजेतब्बं। ते चे पुन वदेय्यामाति ते चे अट्ठकथानये पुनपि वदेय्याम। अथ वा पदभाजनीये येसं पदानं ये अत्था हेट्ठा पकासिता, ते चे अत्थे पुन वदेय्यामाति योजेतब्बं। इमस्मिं पक्खे हि-सद्दो पदपूरणे दट्ठब्बो। परियोसानन्ति संवण्णनापरियोसानं। उत्ताना चेव ये अत्थाति ये अत्था पुब्बे अपकासितापि उत्ताना अगम्भीरा।

१.विसेसकारणं नत्थीति ‘‘येन समयेन आयस्मतो सारिपुत्तत्थेरस्स सिक्खापदपञ्‍ञत्तियाचनहेतुभूतो परिवितक्‍को उदपादि, तेन समयेना’’तिआदिना वुत्तकारणं विय इध विसेसकारणं नत्थि। अयमभिलापोति ‘‘तेन समयेना’’ति अयमभिलापो। किं पनेतस्स वचने पयोजनन्ति यदि विसेसकारणं नत्थि, एतस्स वचने किं पयोजनन्ति अधिप्पायो। निदानदस्सनं पयोजनन्ति योजेतब्बं। तमेव विभावेतुं ‘‘या हि भगवता’’तिआदि वुत्तं।

महावेला विय महावेला, विपुलवालुकपुञ्‍जताय महन्तो वेलातटो वियाति अत्थो। तेनाह ‘‘महन्ते वालिकरासिम्हीति अत्थो’’ति। उरु मरु सिकता वालुका वण्णु वालिकाति इमे सद्दा समानत्था, ब्यञ्‍जनमेव नानं। तेनाह ‘‘उरूति वालिका वुच्‍चती’’ति।

इतो पट्ठाय च –

यस्मा सुत्तन्तपाळीनं, अत्थो सङ्खेपवण्णितो।

तस्मा मयं करिस्साम, तासं अत्थस्स दीपनं॥

नज्‍जाति (उदा॰ अट्ठ॰ १) नदति सन्दतीति नदी, तस्सा नज्‍जा, नदिया निन्‍नगायाति अत्थो। नेरञ्‍जरायाति ‘‘नेलञ्‍जलाया’’ति वत्तब्बे ल-कारस्स र-कारं कत्वा ‘‘नेरञ्‍जराया’’ति वुत्तं, कद्दमसेवालपणकादिदोसरहितसलिलायाति अत्थो। केचि ‘‘नीलंजलायाति वत्तब्बे नेरञ्‍जरायाति वुत्त’’न्ति वदन्ति, नाममेव वा एतं तस्सा नदियाति वेदितब्बं। तस्सा नदिया तीरे यत्थ भगवा विहासि, तं दस्सेतुं ‘‘बोधिरुक्खमूले’’ति वुत्तं। ‘‘बोधि वुच्‍चति चतूसु मग्गेसु ञाण’’न्ति (चूळव॰ खग्गविसाणसुत्तनिद्देस १२१) एत्थ मग्गञाणं बोधीति वुत्तं, ‘‘पप्पोति बोधिं वरभूरिमेधसो’’ति (दी॰ नि॰ ३.२१७) एत्थ सब्बञ्‍ञुतञ्‍ञाणं। तदुभयम्पि बोधिं भगवा एत्थ पत्तोति रुक्खोपि ‘‘बोधिरुक्खो’’त्वेव नामं लभि। अथ वा सत्त बोज्झङ्गे बुज्झतीति भगवा बोधि। तेन बुज्झन्तेन सन्‍निस्सितत्ता सो रुक्खो ‘‘बोधिरुक्खो’’ति नामं लभि। अट्ठकथायं पन एकदेसेनेव अत्थं दस्सेतुं ‘‘बोधि वुच्‍चति चतूसु मग्गेसु ञाण’’न्तिआदि वुत्तं। मूलेति समीपे। पठमाभिसम्बुद्धोति अनुनासिकलोपेनायं निद्देसोति आह ‘‘पठमं अभिसम्बुद्धो’’ति। पठमन्ति च भावनपुंसकनिद्देसो, तस्मा अभिसम्बुद्धो हुत्वा सब्बपठमं बोधिरुक्खमूले विहरतीति एवमेत्थ सम्बन्धो वेदितब्बो।

अथखो भगवाति एत्थ अथाति तस्मिं समयेति एवमत्थो गहेतब्बो अनेकत्थत्ता निपातानं, यस्मिं समये अभिसम्बुद्धो हुत्वा बोधिरुक्खमूले विहरति, तस्मिं समयेति अत्थो। तेनेव उदानपाळियं (उदा॰ २) ‘‘तेन खो पन समयेन भगवा सत्ताहं एकपल्‍लङ्केन निसिन्‍नो होति विमुत्तिसुखपटिसंवेदी’’ति वुत्तं। अथाति वा पच्छाति इमस्मिं अत्थे निपातो, तस्मा अभिसम्बोधितो पच्छाति एवमत्थो गहेतब्बो। खोति पदपूरणे निपातो। सत्त अहानि सत्ताहं। अच्‍चन्तसंयोगे चेतं उपयोगवचनं। यस्मा भगवा तं सत्ताहं निरन्तरताय अच्‍चन्तमेव फलसमापत्तिसुखेन विहासि, तस्मा ‘‘सत्ताह’’न्ति अच्‍चन्तसंयोगवसेन उपयोगवचनं वुत्तं। एकपल्‍लङ्केनाति विसाखपुण्णमाय अनत्थङ्गतेयेव सूरिये अपराजितपल्‍लङ्कवसेन वजिरासने निसिन्‍नकालतो पट्ठाय सकिम्पि अनुट्ठहित्वा यथाभुजितेन एकेनेव पल्‍लङ्केन।

विमुत्तिसुखपटिसंवेदीति एत्थ तदङ्गविक्खम्भनसमुच्छेदपटिप्पस्सद्धिनिस्सरणविमुत्तीसु पञ्‍चसु पटिप्पस्सद्धिविमुत्तिसङ्खाता भगवतो फलविमुत्ति अधिप्पेताति आह ‘‘विमुत्तिसुखं फलसमापत्तिसुखं पटिसंवेदयमानो’’ति। विमुत्तीति च उपक्‍किलेसेहि पटिप्पस्सद्धिवसेन चित्तस्स विमुत्तभावो, चित्तमेव वा तथा विमुत्तं वेदितब्बं। ताय विमुत्तिया जातं, सम्पयुत्तं वा सुखं विमुत्तिसुखं। ‘‘यायं, भन्ते, उपेक्खा सन्ते सुखे वुत्ता भगवता’’ति (म॰ नि॰ २.८८) वचनतो उपेक्खापि चेत्थ सुखमिच्‍चेव वेदितब्बा। तथा हि वुत्तं सम्मोहविनोदनियं (विभ॰ अट्ठ॰ २३२) ‘‘उपेक्खा पन सन्तत्ता, सुखमिच्‍चेव भासिता’’ति। भगवा हि चतुत्थज्झानिकं अरहत्तफलसमापत्तिं समापज्‍जति, न इतरं। अथ वा ‘‘तेसं वूपसमो सुखो’’तिआदीसु (दी॰ नि॰ २.२२१, २७२) यथा सङ्खारदुक्खवूपसमो ‘‘सुखो’’ति वुच्‍चति, एवं सकलकिलेसदुक्खूपसमभावतो अग्गफले लब्भमाना पटिप्पस्सद्धिविमुत्ति एव इध ‘‘सुख’’न्ति वेदितब्बा।

अथाति अधिकारत्थे निपातो, खोति पदपूरणे। तेसु अधिकारत्थेन ‘‘अथा’’ति इमिना विमुत्तिसुखपटिसंवेदनतो अञ्‍ञं अधिकारं दस्सेति। को पनेसोति? पटिच्‍चसमउप्पादमनसिकारो। रत्तियाति अवयवसम्बन्धे सामिवचनं। पठमन्ति अच्‍चन्तसंयोगत्थे उपयोगवचनं । भगवा हि तस्सा रत्तिया सकलम्पि पठमं यामं तेनेव मनसिकारेन युत्तो अहोसीति।

पच्‍चयाकारन्ति अविज्‍जादिपच्‍चयधम्मं। पटिच्‍चाति पटिमुखं गन्त्वा, कारणसामग्गिं अपटिक्खिपित्वाति अत्थो। पटिमुखगमनञ्‍च पच्‍चयस्स कारणसामग्गिया अङ्गभावेन फलस्स उप्पादनमेव। अपटिक्खिपित्वाति पन विना ताय कारणसामग्गिया अङ्गभावं अगन्त्वा सयमेव न उप्पादेतीति अत्थो। एतेन कारणबहुता दस्सिता। अविज्‍जादिएकेकहेतुसीसेन हि हेतुसमूहो निद्दिट्ठो। सहितेति समुदिते, अविनिब्भुत्तेति अत्थो। अविज्‍जादिको हि पच्‍चयधम्मो सहितेयेव अञ्‍ञमञ्‍ञं अविनिब्भोगवुत्तिधम्मे उप्पादेति। इमिना पच्‍चयुप्पन्‍नधम्मबहुता दस्सिता। उभयेनपि ‘‘एकं न एकतो’’तिआदिनयो (विभ॰ अट्ठ॰ २२६ सङ्खारपदनिद्देस; विसुद्धि॰ २.६१७) दीपितो होति। एकतो हि कारणतो न इध किञ्‍चि एकं फलमत्थि, न अनेकं, नापि अनेकेहि कारणेहि एकं, अनेकेहि पन कारणेहि अनेकमेव होति। तथा हि अनेकेहि उतुपथवीबीजसलिलसङ्खातेहि कारणेहि अनेकमेव रूपगन्धरसादिअङ्कुरसङ्खातं फलमुप्पज्‍जमानं दिस्सति। यं पनेतं ‘‘अविज्‍जापच्‍चया सङ्खारा, सङ्खारपच्‍चया विञ्‍ञाण’’न्ति एकेकहेतुफलदीपनं कतं, तत्थ पयोजनं न विज्‍जति।

भगवा हि कत्थचि पधानत्ता कत्थचि पाकटत्ता कत्थचि असाधारणत्ता देसनाविलासस्स च वेनेय्यानञ्‍च अनुरूपतो एकमेव हेतुं वा फलं वा दीपेति। ‘‘फस्सपच्‍चया वेदना’’ति हि एकमेव हेतुं फलञ्‍चाह। फस्सो हि वेदनाय पधानहेतु यथाफस्सं वेदनाववत्थानतो। वेदना च फस्सस्स पधानफलं यथावेदनं फस्सववत्थानतो। ‘‘सेम्हसमुट्ठाना आबाधा’’ति (महानि॰ ५) पाकटत्ता एकं हेतुं आह। पाकटो हि एत्थ सेम्हो, न कम्मादयो। ‘‘ये केचि, भिक्खवे, अकुसला धम्मा, सब्बेते अयोनिसोमनसिकारमूलका’’ति असाधारणत्ता एकं हेतुं आह। असाधारणो हि अयोनिसोमनसिकारो अकुसलानं, साधारणानि वत्थारम्मणादीनीति। तस्मा अविज्‍जा तावेत्थ विज्‍जमानेसुपि अञ्‍ञेसु वत्थारम्मणसहजातधम्मादीसु सङ्खारकारणेसु ‘‘अस्सादानुपस्सिनो तण्हा पवड्ढती’’ति (सं॰ नि॰ २.५२) च ‘‘अविज्‍जासमुदया आसवसमुदयो’’ति (म॰ नि॰ १.१०४) च वचनतो अञ्‍ञेसम्पि तण्हादीनं सङ्खारहेतूनं हेतूति पधानत्ता, ‘‘अविद्वा, भिक्खवे, अविज्‍जागतो पुञ्‍ञाभिसङ्खारम्पि अभिसङ्खरोती’’ति पाकटत्ता असाधारणत्ता च सङ्खारानं हेतुभावेन दीपिताति वेदितब्बा। एवं सब्बत्थ एकेकहेतुफलदीपने यथासम्भवं नयो नेतब्बो। तेनाहु पोराणा –

‘‘एकं न एकतो इध, नानेकमनेकतोपि नो एकं।

फलमत्थि अत्थि पन एक-हेतुफलदीपने अत्थो’’ति॥

पच्‍चेतुमरहतीति पटिच्‍चो। यो हि नं पच्‍चेति अभिसमेति, तस्स अच्‍चन्तमेव दुक्खवूपसमाय संवत्तति। सम्मा सह च उप्पादेतीति समुप्पादो। पच्‍चयधम्मो हि अत्तनो फलं उप्पादेन्तो सम्पुण्णमेव उप्पादेति, न विकलं। ये च धम्मे उप्पादेति, ते सब्बे सहेव उप्पादेति, न एकेकं। इति पटिच्‍चो च सो समुप्पादो चाति पटिच्‍चसमुप्पादोति एवम्पेत्थ अत्थो दट्ठब्बो। वित्थारोति पटिच्‍चसमुप्पादपदवण्णनापपञ्‍चो। मयम्पि तं अतिपपञ्‍चभया इध न दस्सयिस्साम, एवं परतो वक्खमानम्पि वित्थारं। अनुलोमपटिलोमन्ति भावनपुंसकनिद्देसो ‘‘विसमं चन्दिमसूरिया परिवत्तन्ती’’तिआदीसु (अ॰ नि॰ ४.७०) विय। स्वेवाति सो एव पच्‍चयाकारो। पुरिमनयेन वा वुत्तोति ‘‘अविज्‍जापच्‍चया सङ्खारा’’तिआदिना नयेन वुत्तो पच्‍चयाकारो। पवत्तियाति संसारप्पवत्तिया। मनसि अकासीति यो यो पच्‍चयधम्मो यस्स यस्स पच्‍चयुप्पन्‍नधम्मस्स यथा यथा हेतुपच्‍चयादिना पच्‍चयभावेन पच्‍चयो होति, तं सब्बं अविपरीतं अपरिहापेत्वा अनवसेसतो पच्‍चवेक्खणवसेन चित्ते अकासीति अत्थो।

अविज्‍जापच्‍चयातिआदीसु (विभ॰ अट्ठ॰ २२५; विसुद्धि॰ २.५८६-५८७; उदा॰ अट्ठ॰ १) अविन्दियं कायदुच्‍चरितादिं विन्दतीति अविज्‍जा, विन्दियं कायसुचरितादिं न विन्दतीति अविज्‍जा, धम्मानं अविपरीतसभावं अविदितं करोतीति अविज्‍जा, अन्तविरहिते संसारे भवादीसु सत्ते जवापेतीति अविज्‍जा, अविज्‍जमानेसु जवति, विज्‍जमानेसु न जवतीति अविज्‍जा, विज्‍जापटिपक्खाति वा अविज्‍जा। सा ‘‘दुक्खे अञ्‍ञाण’’न्तिआदिना चतुब्बिधा वेदितब्बा। पटिच्‍च नं न विना फलं एति उप्पज्‍जति चेव पवत्तति चाति पच्‍चयो, उपकारट्ठो वा पच्‍चयो। अविज्‍जा च सा पच्‍चयो चाति अविज्‍जापच्‍चयो , तस्मा अविज्‍जापच्‍चया। सङ्खरोन्तीति सङ्खारा, लोकिया कुसलाकुसलचेतना। ते पुञ्‍ञापुञ्‍ञानेञ्‍चाभिसङ्खारवसेन तिविधा वेदितब्बा। विजानातीति विञ्‍ञाणं, तं लोकियविपाकविञ्‍ञाणवसेन बात्तिंसविधं। नमतीति नामं, वेदनादिक्खन्धत्तयं। रुप्पतीति रूपं, भूतरूपं चक्खादिउपादारूपञ्‍च। आयतन्ति, आयतञ्‍च संसारदुक्खं नयतीति आयतनं। फुसतीति फस्सो। वेदयतीति वेदना। इदम्पि द्वयं द्वारवसेन छब्बिधं, विपाकवसेन गहणे बात्तिंसविधं। तस्सति परितस्सतीति तण्हा, सा कामतण्हादिवसेन सङ्खेपतो तिविधा, वित्थारतो अट्ठसतविधा च। उपादियतीति उपादानं, तं कामुपादानादिवसएन चतुब्बिधं।

भवति भावयति चाति भवो, सो कम्मोपपत्तिभेदतो दुविधो। जननं जाति। जीरणं जरा। मरन्ति तेनाति मरणं। सोचनं सोको। परिदेवनं परिदेवो। दुक्खयतीति दुक्खं। उप्पादट्ठितिवसेन द्वेधा खनतीति वा दुक्खं। दुम्मनस्स भावो दोमनस्सं। भुसो आयासो उपायासो। सम्भवन्तीति निब्बत्तन्ति। न केवलञ्‍च सोकादीहेव, अथ खो सब्बपदेहि ‘‘सम्भवन्ती’’ति पदस्स योजना कातब्बा। एवञ्हि अविज्‍जापच्‍चया सङ्खारा सम्भवन्तीति पच्‍चयपच्‍चयुप्पन्‍नववत्थानं दस्सितं होति। तेनेवाह ‘‘अविज्‍जापच्‍चया सङ्खारा सम्भवन्तीति इमिना नयेन सब्बपदेसु अत्थो वेदितब्बो’’ति। एवमेतस्स…पे॰… समुदयो होतीति एत्थ पन अयमत्थो। एवन्ति निद्दिट्ठनयनिदस्सनं। तेन अविज्‍जादीहेव कारणेहि, न इस्सरनिम्मानादीहीति दस्सेति। एतस्साति यथावुत्तस्स। केवलस्साति असम्मिस्सस्स, सकलस्स वा। दुक्खक्खन्धस्साति दुक्खसमूहस्स, न सत्तस्स नापि सुभसुखादीनं। समुदयो होतीति निब्बत्ति सम्भवति।

अच्‍चन्तमेव सङ्खारेहि विरज्‍जति एतेनाति विरागो, अरियमग्गोति आह ‘‘विरागसङ्खातेन मग्गेना’’ति। असेसं निरोधा असेसनिरोधा, असेसेत्वा निस्सेसेत्वा निरोधा समुच्छिन्दना अनुसयप्पहानवसेन अग्गमग्गेन अविज्‍जाय अच्‍चन्तसमुग्घाततोति अत्थो। यदिपि हेट्ठिममग्गेहिपि पहीयमाना अविज्‍जा अच्‍चन्तसमुग्घातवसेनेव पहीयति, तथापि न अनवसेसतो पहीयति। अपायगमनीया हि अविज्‍जा पठममग्गेन पहीयति, तथा सकिदेव इमस्मिं लोके सब्बत्थ च अनरियभूमियं उपपत्तिया पच्‍चयभूता अविज्‍जा यथाक्‍कमं दुतियततियमग्गेहि पहीयति, न इतराति, अरहत्तमग्गेनेव पन सा अनवसेसं पहीयतीति। अनुप्पादनिरोधो होतीति सब्बेसं सङ्खारानं अनवसेसं अनुप्पादनिरोधो होति। हेट्ठिमेन हि मग्गत्तयेन केचि सङ्खारा निरुज्झन्ति, केचि न निरुज्झन्ति अविज्‍जाय सावसेसनिरोधा, अग्गमग्गेन पनस्सा अनवसेसनिरोधा न केचि सङ्खारा न निरुज्झन्तीति। एवं निरुद्धानन्ति एवं अनुप्पादनिरोधेन निरुद्धानं। केवल-सद्दो निरवसेसवाचको च होति ‘‘केवला अङ्गमगधा’’तिआदीसु। असम्मिस्सवाचको च ‘‘केवला सालयो’’तिआदीसु। तस्मा उभयथापि अत्थं वदति ‘‘सकलस्स, सुद्धस्स वा’’ति। तत्थ सकलस्साति अनवसेसस्स सब्बभवादिगतस्स। सत्तविरहितस्साति परपरिकप्पितजीवरहितस्स।

अपिचेत्थ किञ्‍चापि ‘‘अविज्‍जानिरोधा सङ्खारनिरोधो, सङ्खारनिरोधा विञ्‍ञाणनिरोधो’’ति एत्तावतापि सकलस्स दुक्खक्खन्धस्स अनवसेसतो निरोधो वुत्तो होति, तथापि यथा अनुलोमे यस्स यस्स पच्‍चयधम्मस्स अत्थिताय यो यो पच्‍चयुप्पन्‍नधम्मो न निरुज्झति पवत्तति एवाति इमस्स अत्थस्स दस्सनत्थं ‘‘अविज्‍जापच्‍चया सङ्खारा…पे॰… समुदयो होती’’ति वुत्तं। एवं तप्पटिपक्खतो तस्स तस्स पच्‍चयस्स अभावे सो सो पच्‍चयुप्पन्‍नधम्मो निरुज्झति न पवत्ततीति दस्सनत्थं इध ‘‘अविज्‍जानिरोधा सङ्खारनिरोधो, सङ्खारनिरोधा विञ्‍ञाणनिरोधो, विञ्‍ञाणनिरोधा नामरूपनिरोधो…पे॰… दुक्खक्खन्धस्स निरोधो होती’’ति वुत्तं, न पन अनुलोमे विय कालत्तयपरियापन्‍नस्स दुक्खक्खन्धस्स निरोधदस्सनत्थं। अनागतस्सेव हि अरियमग्गभावनाय असति उप्पज्‍जनारहस्स दुक्खक्खन्धस्स अरियमग्गभावनाय निरोधो इच्छितोति अयम्पि विसेसो वेदितब्बो।

यदा हवेति एत्थ हवेति ब्यत्तन्ति इमस्मिं अत्थे निपातो। केचि पन ‘‘हवेति आहवे युद्धे’’ति अत्थं वदन्ति, ‘‘योधेथ मारं पञ्‍ञावुधेना’’ति (ध॰ प॰ ४०) हि वचनतो किलेसमारेन युज्झनसमयेति तेसं अधिप्पायो। आरम्मणूपनिज्झानलक्खणेनाति आरम्मणूपनिज्झानसभावेन। लक्खणूपनिज्झानलक्खणेनाति एत्थापि एसेव नयो। तत्थ आरम्मणूपनिज्झानं नाम अट्ठ समापत्तियो कसिणारम्मणस्स उपनिज्झायनतो। लक्खणूपनिज्झानं नाम विपस्सनामग्गफलानि। विपस्सना हि तीणि लक्खणानि उपनिज्झायतीति लक्खणूपनिज्झानं, मग्गो विपस्सनाय आगतकिच्‍चं साधेतीति लक्खणूपनिज्झानं, फलं तथलक्खणं निरोधसच्‍चं उपनिज्झायतीति लक्खणूपनिज्झानं। नो कल्‍लो पञ्होति अयुत्तो पञ्हो, दुप्पञ्हो एसोति अत्थो। आदिसद्देन –

‘‘फुसतीति अहं न वदामि। फुसतीति चाहं वदेय्यं, तत्रस्स कल्‍लो पञ्हो ‘को नु खो, भन्ते, फुसती’ति? एवञ्‍चाहं न वदामि, एवं मं अवदन्तं यो एवं पुच्छेय्य ‘किंपच्‍चया नु खो, भन्ते, फस्सो’ति, एस कल्‍लो पञ्हो। तत्र कल्‍लं वेय्याकरणं ‘सळायतनपच्‍चया फस्सो, फस्सपच्‍चया वेदना’ति। को नु खो, भन्ते, वेदयतीति? नो कल्‍लो पञ्होति भगवा अवोच, वेदयतीति अहं न वदामि, वेदयतीति चाहं वदेय्यं, तत्रस्स कल्‍लो पञ्हो ‘को नु खो, भन्ते, वेदयती’ति? एवञ्‍चाहं न वदामि। एवं मं अवदन्तं यो एवं पुच्छेय्य ‘किंपच्‍चया नु खो, भन्ते, वेदना’ति, एस कल्‍लो पञ्हो। तत्र कल्‍लं वेय्याकरणं ‘फस्सपच्‍चया वेदना, वेदनापच्‍चया तण्हा’’’ति (सं॰ नि॰ २.१२) –

एवमादिं पाळिसेसं सङ्गण्हाति।

आदिना च नयेनाति एत्थ आदि-सद्देन पन ‘‘कतमा नु खो, भन्ते, जाति, कस्स च पनायं जातीति। ‘नो कल्‍लो पञ्हो’ति भगवा अवोचा’’ति एवमादिं सङ्गण्हाति। ननु चेत्थ ‘‘कतमं नु खो, भन्ते, जरामरण’’न्ति (सं॰ नि॰ २.३५) इदं सुपुच्छितन्ति? किञ्‍चापि सुपुच्छितं, यथा पन सतसहस्सग्घनके सुवण्णथालके वड्ढितस्स सुभोजनस्स मत्थके आमलकमत्ते गूथपिण्डे ठपिते सब्बं भोजनं दुब्भोजनं होति छड्डेतब्बं, एवमेव ‘‘कस्स च पनिदं जरामरण’’न्ति इमिना सत्तूपलद्धिवादपदेन गूथपिण्डेन तं भोजनं दुब्भोजनं विय अयम्पि सब्बो दुप्पञ्हो जातोति।

सोळस कङ्खाति ‘‘अहोसिं नु खो अहं अतीतमद्धानं, न नु खो अहोसिं, किं नु खो अहोसिं, कथं नु खो अहोसिं, किं हुत्वा किं अहोसिं नु खो अहं अतीतमद्धानं, भविस्सामि नु खो अहं अनागतमद्धानं, न नु खो भविस्सामि, किं नु खो भविस्सामि, कथं नु खो भविस्सामि, किं हुत्वा किं भविस्सामि नु खो अहं अनागतमद्धानं, अहं नु खोस्मि, नो नु खोस्मि, किं नु खोस्मि, कथं नु खोस्मि, अयं नु खो सत्तो कुतो आगतो, सो कुहिं गामी भविस्सती’’ति (सं॰ नि॰ २.२०; म॰ नि॰ १.१८) एवमागता अतीतानागतपच्‍चुप्पन्‍नविसया सोळसविधा कङ्खा।

तत्थ (म॰ नि॰ अट्ठ॰ १.१८; सं॰ नि॰ अट्ठ॰ २.२.२०) अहोसिं नु खो, न नु खोति सस्सताकारञ्‍च अधिच्‍चसमुप्पत्तिआकारञ्‍च निस्साय अतीते अत्तनो विज्‍जमानतञ्‍च अविज्‍जमानतञ्‍च कङ्खति, किं कारणन्ति न वत्तब्बं। उम्मत्तको विय हि बालपुथुज्‍जनो यथा तथा वा पवत्तति। अपिच अयोनिसोमनसिकारोयेवेत्थ कारणं। एवं अयोनिसोमनसिकारस्स पन किं कारणन्ति? स्वेव पुथुज्‍जनभावो अरियानं अदस्सनादीनि वा। ननु च पुथुज्‍जनोपि योनिसो मनसि करोतीति। को वा एवमाह ‘‘न मनसि करोती’’ति। न पन तत्थ पुथुज्‍जनभावो कारणं, सद्धम्मसवनकल्याणमित्तादीनि तत्थ कारणानि । न हि मच्छमंसादीनि अत्तनो पकतिया सुगन्धानि, अभिसङ्खारपच्‍चया पन सुगन्धानिपि होन्ति।

किं नु खो अहोसिन्ति जातिलिङ्गुपपत्तियो निस्साय ‘‘खत्तियो नु खो अहोसिं, ब्राह्मणवेस्ससुद्दगहट्ठपब्बजितदेवमनुस्सानं अञ्‍ञतरो’’ति कङ्खति।

कथं नु खोति सण्ठानाकारं निस्साय ‘‘दीघो नु खो अहोसिं, रस्सओदातकण्हप्पमाणिकअप्पमाणिकादीनं अञ्‍ञतरो’’ति कङ्खति। केचि पन ‘‘इस्सरनिम्मानादिं निस्साय ‘केन नु खो कारणेन अहोसि’न्ति हेतुतो कङ्खती’’ति वदन्ति।

किं हुत्वा किं अहोसिन्ति जातिआदीनि निस्साय ‘‘खत्तियो हुत्वा नु खो ब्राह्मणो अहोसिं…पे॰… देवो हुत्वा मनुस्सो’’ति अत्तनो परम्परं कङ्खति। सब्बत्थेव पन अद्धानन्ति कालाधिवचनमेतं, तञ्‍च भुम्मत्थे उपयोगवचनं दट्ठब्बं।

भविस्सामि नु खो, न नु खोति सस्सताकारञ्‍च उच्छेदाकारञ्‍च निस्साय अनागते अत्तनो विज्‍जमानतञ्‍च अविज्‍जमानतञ्‍च कङ्खति। सेसमेत्थ वुत्तनयमेव।

अहंनु खोस्मीति अत्तनो अत्थिभावं कङ्खति। युत्तं पनेतन्ति? युत्तं अयुत्तन्ति का एत्थ चिन्ता। अपिचेत्थ इदं वत्थुम्पि उदाहरन्ति, चूळमाताय किर पुत्तो मुण्डो, महामाताय पुत्तो अमुण्डो। तं सुत्तं मुण्डेसुं। सो उट्ठाय ‘‘अहं नु खो चूळमाताय पुत्तो’’ति चिन्तेसि। एवं ‘‘अहं नु खोस्मी’’ति कङ्खा होति।

नो नु खोस्मीति अत्तनो नत्थिभावं कङ्खति। तत्रापि इदं वत्थु – एको किर मच्छे गण्हन्तो उदके चिरट्ठानेन सीतिभूतं अत्तनो ऊरुं ‘‘मच्छो’’ति चिन्तेत्वा पहरि। अपरो सुसानपस्से खेत्तं रक्खन्तो भीतो सङ्कुटितो सयि। सो पटिबुज्झित्वा अत्तनो जण्णुकानि ‘‘द्वे यक्खा’’ति चिन्तेत्वा पहरि, एवं ‘‘नो नु खोस्मी’’ति कङ्खति।

किं नु खोस्मीति खत्तियोव समानो अत्तनो खत्तियभावं कङ्खति कण्णो विय सूतपुत्तसञ्‍ञी। एस नयो सेसेसु। देवो पन समानो देवभावं अजानन्तो नाम नत्थि। सोपि पन ‘‘अहं रूपी नु खो अरूपी नु खो’’तिआदिना नयेन कङ्खति। खत्तियादयो कस्मा न जानन्तीति चे? अप्पच्‍चक्खा तेसं तत्थ तत्थ कुले उप्पत्ति। गहट्ठापि च पातलिकादयो पब्बजितसञ्‍ञिनो। पब्बजितापि ‘‘कुप्पं नु खो मे कम्म’’न्तिआदिना नयेन गहट्ठसञ्‍ञिनो। मनुस्सापि च एकच्‍चे राजानो विय अत्तनि देवसञ्‍ञिनो होन्ति।

कथं नु खोस्मीति वुत्तनयमेव। केवलञ्हेत्थ अब्भन्तरे जीवो नाम अत्थीति गहेत्वा तस्स सण्ठानाकारं निस्साय ‘‘दीघो नु खोस्मि, रस्सचतुरस्सछळंसअट्ठंससोळसंसादीनं अञ्‍ञतरप्पकारो’’ति कङ्खन्तो ‘‘कथं नु खोस्मी’’ति कङ्खतीति वेदितब्बो। सरीरसण्ठानं पन पच्‍चुप्पन्‍नं अजानन्तो नाम नत्थि।

कुतो आगतो, सो कुहिं गामी भविस्सतीति अत्तभावस्स आगतिगतिट्ठानं कङ्खति।

वपयन्तीति विअपयन्ति, इकारलोपेनायं निद्देसो। ब्यपयन्तीति वुत्तं होति। तेनाह ‘‘वपयन्ति अपगच्छन्ती’’ति। अपगमनञ्‍च अनुप्पत्तिनिरोधवसेनाति आह ‘‘निरुज्झन्ती’’ति।

अजपालकथावण्णना

४.तस्स सत्ताहस्स अच्‍चयेनाति पल्‍लङ्कसत्ताहस्स अपगमनेन। तम्हा समाधिम्हा वुट्ठहित्वाति ततो अरहत्तफलसमापत्तिसमाधितो यथाकालपरिच्छेदं वुट्ठहित्वा। अञ्‍ञेपि बुद्धत्तकराति विसाखपुण्णमितो पट्ठाय रत्तिन्दिवं एवं निच्‍चसमाहितभावहेतुभूतानं बुद्धगुणानं उपरि अञ्‍ञेपि बुद्धत्तसाधका। ‘‘अयं बुद्धो’’ति बुद्धभावस्स परेसं विभावना धम्मा किं नु खो सन्तीति योजना। एकच्‍चानं देवतानन्ति या अधिगतमग्गा सच्छिकतनिरोधा एकपदेसेन बुद्धगुणे जानन्ति, ता ठपेत्वा तदञ्‍ञासं देवतानं। अनिमिसेहीति धम्मपीतिविप्फारवसेन पसादविभावनिच्‍चलदलताय निमेसरहितेहि। रतनचङ्कमेति देवताहि मापिते रतनमयचङ्कमे। ‘‘रतनभूतानं सत्तन्‍नं पकरणानं तत्थ च अनुत्तरस्स धम्मरतनस्स सम्मसनेन तं ठानं रतनघरचेतियं नाम जात’’न्तिपि वदन्ति। तेनेव अट्ठसालिनियं (ध॰ स॰ अट्ठ॰ निदानकथा) ‘‘रतनघरं नाम न रतनमयं गेहं, सत्तन्‍नं पन पकरणानं सम्मसितट्ठानं रतनघरन्ति वेदितब्ब’’न्ति वुत्तं।

कस्मा पनायं अजपालनिग्रोधो नाम जातोति आह ‘‘तस्स किरा’’तिआदि। केचि पन ‘‘यस्मा तत्थ वेदे सज्झायितुं असमत्था महल्‍लकब्राह्मणा पाकारपरिक्खेपयुत्तानि निवेसनानि कत्वा सब्बे वसिंसु, तस्मास्स ‘अजपालनिग्रोधो’ति नामं जात’’न्ति वदन्ति। तत्रायं वचनत्थो – न जपन्तीति अजपा, मन्तानं अनज्झायकाति अत्थो। अजपा लन्ति आदियन्ति निवासं एत्थाति अजपालोति। अपरे पन वदन्ति ‘‘यस्मा मज्झन्हिके समये अन्तो पविट्ठे अजे अत्तनो छायाय पालेति रक्खति, तस्मा ‘अजपालो’तिस्स नामं रुळ्ह’’न्ति। सब्बथापि नाममेतं तस्स रुक्खस्स।

विमुत्तिसुखं पटिसंवेदेन्तोति धम्मं विचिनन्तोयेव अन्तरन्तरा विमुत्तिसुखञ्‍च पटिसंवेदेन्तो। ‘‘धम्मं विचिनन्तो विमुत्तिसुखञ्‍च पटिसंवेदेन्तो’’ति एवं वा एत्थ पाठो गहेतब्बो। उदानट्ठकथायम्पि (उदा॰ अट्ठ॰ ४) हि अयमेव पाठो। धम्मं विचिनन्तो चेत्थ एवं अभिधम्मे नयमग्गं सम्मसि पठमं धम्मसङ्गणीपकरणं नाम, ततो विभङ्गप्पकरणं, धातुकथापकरणं, पुग्गलपञ्‍ञत्तिप्पकरणं, कथावत्थुं नाम, यमकं नाम, ततो महापकरणं पट्ठानं नामाति। तत्थस्स सण्हसुखुमट्ठानम्हि चित्ते ओतिण्णे पीति उप्पज्‍जि, पीतिया उप्पन्‍नाय लोहितं पसीदि, लोहिते पसन्‍ने छवि पसीदि, छविया पसन्‍नाय पुरत्थिमकायतो कूटागारादिप्पमाणा रस्मियो उट्ठहित्वा आकासे पक्खन्दं छद्दन्तनागकुलं विय पाचीनदिसाय अनन्तानि चक्‍कवाळानि पक्खन्दा। पच्छिमकायतो उट्ठहित्वा पच्छिमदिसाय, दक्खिणंसकूटतो उट्ठहित्वा दक्खिणदिसाय, वामंसकूटतो उट्ठहित्वा उत्तरदिसाय अनन्तानि चक्‍कवाळानि पक्खन्दा। पादतलेहि पवाळङ्कुरवण्णा रस्मियो निक्खमित्वा महापथविं विनिब्बिज्झ उदकं द्विधा भिन्दित्वा वातक्खन्धं पदालेत्वा अजटाकासं पक्खन्दा। सीसतो संपरिवत्तियमानं मणिदामं विय नीलवण्णरस्मिवट्टि उट्ठहित्वा छ देवलोके विनिविज्झित्वा नव ब्रह्मलोके अतिक्‍कम्म अजटाकासं पक्खन्दा। तस्मिं दिवसे अपरिमाणेसु चक्‍कवाळेसु अपरिमाणा सत्ता सब्बे सुवण्णवण्णाव अहेसुं। तं दिवसञ्‍च पन भगवतो सरीरा निक्खन्ता यावज्‍जदिवसापि किर ता रस्मियो अनन्तलोकधातुयो गच्छन्तियेव। न केवलञ्‍च इमस्मिंयेव सत्ताहे धम्मं विचिनन्तस्स सरीरतो रस्मियो निक्खमिंसु, अथ खो रतनघरसत्ताहेपि पट्ठानं सम्मसन्तस्स एवमेव सरीरतो रस्मियो निक्खन्ता एवाति वेदितब्बं।

मुचलिन्दकथावण्णना

५.मुचलिन्दमूलेति (उदा॰ अट्ठ॰ ११) एत्थ मुचलिन्दो वुच्‍चति नीपरुक्खो, यो ‘‘निचुलो’’तिपि वुच्‍चति, तस्स समीपेति अत्थो। केचि पन ‘‘मुचलोति तस्स रुक्खस्स नामं, वनजेट्ठकताय पन मुचलिन्दोति वुत्त’’न्ति वदन्ति। उदपादीति सकलचक्‍कवाळगब्भं पूरेन्तो महामेघो उदपादि। एवरूपो किर मेघो द्वीसुयेव कालेसु वस्सति चक्‍कवत्तिम्हि वा उप्पन्‍ने बुद्धे वा, इध बुद्धुप्पादकाले उदपादि। पोक्खरणिया निब्बत्तोति पोक्खरणिया हेट्ठा नागभवनं अत्थि, तत्थ निब्बत्तो। सकभवनाति अत्तनो नागभवनतो। एवं भोगेहि परिक्खिपित्वाति सत्त वारे अत्तनो सरीरभोगेहि भगवतो कायं परिवारेत्वा। उपरिमुद्धनि महन्तं फणंविहच्‍चाति भगवतो मुद्धप्पदेसस्स उपरि अत्तनो महन्तं फणं पसारेत्वा। ‘‘फणं करित्वा’’तिपि पाठो, सोयेवत्थो।

तस्स किर नागराजस्स एतदहोसि ‘‘भगवा च मय्हं भवनसमीपे रुक्खमूले निसिन्‍नो, अयञ्‍च सत्ताहवद्दलिका वत्तति, वासागारमस्स लद्धुं वट्टती’’ति। सो सत्तरतनमयं पासादं निम्मिनितुं सक्‍कोन्तोपि ‘‘एवं कते कायसारो गहितो न भविस्सति, दसबलस्स कायवेय्यावच्‍चं करिस्सामी’’ति महन्तं अत्तभावं कत्वा सत्थारं सत्तक्खत्तुं भोगेहि परिक्खिपित्वा उपरि फणं धारेसि। ‘‘तस्स परिक्खेपब्भन्तरं लोहपासादे भण्डागारगब्भप्पमाणं अहोसी’’ति इध वुत्तं। मज्झिमट्ठकथायं (म॰ नि॰ अट्ठ॰ १.२८४) पन –

‘‘परिक्खेपस्स अन्तो ओकासो हेट्ठा लोहपासादप्पमाणो अहोसि, ‘इच्छितिच्छितेन इरियापथेन सत्था विहरिस्सती’ति नागराजस्स अज्झासयो अहोसि, तस्मा एवं महन्तं ओकासं परिक्खिपि, मज्झे रतनपल्‍लङ्को पञ्‍ञत्तो होति, उपरि सुवण्णतारकविचित्तं समोसरितगन्धदामकुसुमचेलवितानं अहोसि, चतूसु कोणेसु गन्धतेलेन दीपा जलिता, चतूसु दिसासु विवरित्वा चन्दनकरण्डका ठपिता’’ति –

वुत्तं। इच्छितिच्छितेन इरियापथेन विहरिस्सतीति च नागराजस्स अज्झासयमत्तमेतं, भगवा पन यथानिसिन्‍नोव सत्ताहं वीतिनामेसि।

किञ्‍चापि…पे॰… चिन्तेतुं युत्तन्ति एत्थ केचि वदन्ति ‘‘उण्हग्गहणं भोगपरिक्खेपस्स विपुलभावकरणे कारणकित्तनं। खुद्दके हि तस्मिं भगवन्तं नागराजस्स सरीरसम्भूता उस्मा बाधेय्य, विपुलभावकरणेन पन तादिसं मा उण्हं बाधयित्था’’ति। सउपसग्गपदस्स अत्थो उपसग्गेन विनापि विञ्‍ञायतीति आह ‘‘विद्धन्ति उब्बिद्ध’’न्ति, सा चस्स उब्बिद्धता उपक्‍किलेसविगमेन दूरभावेन उपट्ठानन्ति आह ‘‘मेघविगमेन दूरीभूत’’न्ति। इन्दनीलमणि विय दिब्बति जोततीति देवो, आकासो। विदित्वाति ‘‘इदानि विगतवलाहको आकासो, नत्थि भगवतो सीतादिउपद्दवो’’ति ञत्वा। विनिवेठेत्वाति अपनेत्वा। अत्तनोरूपन्ति अत्तनो नागरूपं। पटिसंहरित्वाति अन्तरधापेत्वा। माणवकवण्णन्ति कुमारकरूपं।

राजायतनकथावण्णना

६.ओसधहरीतकं उपनेसीति न केवलं ओसधहरीतकमेव, दन्तकट्ठम्पि उपनेसि। पच्‍चग्घेति एत्थ पुरिमं अत्थविकप्पं केचि न इच्छन्ति, तेनेव आचरियधम्मपालत्थेरेन वुत्तं ‘‘पच्‍चग्घेति अभिनवे। पच्‍चेकं महग्घताय पच्‍चग्घेति केचि, तं न सुन्दरं। न हि बुद्धा भगवन्तो महग्घं पटिग्गण्हन्ति परिभुञ्‍जन्ति वा’’ति।

राजायतनकथावण्णना निट्ठिता।

ब्रह्मयाचनकथावण्णना

७.आचिण्णसमाचिण्णोति आचरितो चेव आचरन्तेहि च सम्मदेव आचरितोति अत्थो। एतेन अयं परिवितक्‍को सब्बबुद्धानं पठमाभिसम्बोधियं उप्पज्‍जतेवाति अयमेत्थ धम्मताति दस्सेति। गम्भीरोपि धम्मो पटिपक्खविधमनेन सुपाकटो भवेय्य, पटिपक्खविधमनं पन सम्मापटिपत्तिपटिबद्धं, सा सद्धम्मसवनाधीना, तं सत्थरि धम्मे च पसादायत्तं। सो विसेसतो लोके सम्भावनीयस्स गरुकातब्बस्स अभिपत्थनाहेतुकोति परम्पराय सत्तानं धम्मसम्पटिपत्तिया ब्रह्मुनो याचनानिमित्तन्ति तं दस्सेन्तो ‘‘ब्रह्मुना याचिते देसेतुकामताया’’तिआदिमाह।

अधिगतोति पटिविद्धो, सयम्भूञाणेन ‘‘इदं दुक्ख’’न्तिआदिना यथाभूतं अवबुद्धोति अत्थो। धम्मोति चतुसच्‍चधम्मो तब्बिनिमुत्तस्स पटिविज्झितब्बधम्मस्स अभावतो। गम्भीरोति महासमुद्दो विय मकसतुण्डसूचिया अञ्‍ञत्र समुपचितपरिपक्‍कञाणसम्भारेहि अञ्‍ञेसं ञाणेन अलब्भनेय्यपतिट्ठो। गम्भीरत्ताव दुद्दसो दुक्खेन दट्ठब्बो, न सक्‍का सुखेन दट्ठुं। यो हि अलब्भनेय्यपतिट्ठो, सो ओगाहितुं असक्‍कुणेय्यताय सरूपतो च विसेसतो च सुखेन पस्सितुं न सक्‍का, अथ खो किच्छेन केनचि कदाचिदेव दट्ठब्बो। दुद्दसत्ताव दुरनुबोधो दुक्खेन अवबुज्झितब्बो, न सक्‍का सुखेन अवबुज्झितुं। यञ्हि दट्ठुमेव न सक्‍का, तस्स ओगाहेत्वा अनुबुज्झने कथा एव नत्थि अवबोधस्स दुक्‍करभावतो। इमस्मिं ठाने ‘‘तं किं मञ्‍ञथ, भिक्खवे, कतमं नु खो दुक्‍करतरं वा दुरभिसम्भवतरं वा’’ति (सं॰ नि॰ ५.१११५) सुत्तपदं वत्तब्बं।

सन्तोति अनुपसन्तसभावानं किलेसानं सङ्खारानञ्‍च अभावतो वूपसन्तसब्बपरिळाहताय सन्तो निब्बुतो, सन्तारम्मणताय वा सन्तो। एत्थ च निरोधसच्‍चं सन्तं आरम्मणन्ति सन्तारम्मणं, मग्गसच्‍चं सन्तं सन्तारम्मणञ्‍चाति सन्तारम्मणं। पधानभावं नीतोति पणीतो। अथ वा पणीतोति अतित्तिकरणट्ठेन अतप्पको सादुरसभोजनं विय। सन्तपणीतभावेनेव चेत्थ असेचनकताय अतप्पकता दट्ठब्बा। इदञ्हि द्वयं लोकुत्तरमेव सन्धाय वुत्तं। अतक्‍कावचरोति उत्तमञाणविसयत्ता तक्‍केन अवचरितब्बो ओगाहितब्बो न होति, ञाणेनेव अवचरितब्बो। ततो एव निपुणञाणगोचरताय सण्हसुखुमसभावत्ता च निपुणो सण्हो। पण्डितवेदनीयोति बालानं अविसयत्ता सम्मापटिपदं पटिपन्‍नेहि पण्डितेहि एव वेदितब्बो।

अल्‍लीयन्ति अभिरमितब्बट्ठेन सेवियन्तीति आलया, पञ्‍च कामगुणाति आह ‘‘सत्ता पञ्‍चकामगुणे अल्‍लीयन्ति, तस्मा ते आलयाति वुच्‍चन्ती’’ति। तत्थ पञ्‍चकामगुणे अल्‍लीयन्तीति पञ्‍चकामगुणे सेवन्तीति अत्थो। तेति पञ्‍च कामगुणा। रमन्तीति रतिं विन्दन्ति कीळन्ति लळन्ति। आलीयन्ति अभिरमणवसेन सेवन्तीति आलया, अट्ठसतं तण्हाविचरितानि, तेहि आलयेहि रमन्तीति आलयरामाति एवम्पेत्थ अत्थो दट्ठब्बो। इमे हि सत्ता यथा कामगुणे, एवं रागम्पि अस्सादेन्ति अभिनन्दन्तियेव। यथेव हि सुसज्‍जितपुप्फफलभरितरुक्खादिसम्पन्‍नं उय्यानं पविट्ठो राजा ताय ताय सम्पत्तिया रमति, सम्मुदितो आमोदितपमोदितो होति, न उक्‍कण्ठति, सायम्पि निक्खमितुं न इच्छति, एवमिमेहि कामालयतण्हालयेहि सत्ता रमन्ति, संसारवट्टे सम्मोदिता अनुक्‍कण्ठिता वसन्ति। तेन नेसं भगवा दुविधम्पि आलयं उय्यानभूमिं विय दस्सेन्तो ‘‘आलयरामा’’तिआदिमाह। रताति निरता। सुट्ठु मुदिताति अतिविय मुदिता अनुक्‍कण्ठनतो।

पञ्‍चवग्गियकथावण्णना

१०.एतदहोसीति एतं अहोसि, ‘‘कस्स नु खो अहं पठमं धम्मं देसेय्य’’न्ति अयं धम्मदेसनापटिसंयुत्तो वितक्‍को उदपादीति अत्थो। आळारोति तस्स नामं। दीघपिङ्गलो किरेस। सो हि तुङ्गसरीरताय दीघो, पिङ्गलचक्खुताय पिङ्गलो, तेनस्स ‘‘आळारो’’ति नामं अहोसि। कालामोति गोत्तं। पण्डितोति (म॰ नि॰ अट्ठ॰ १.२८४) पण्डिच्‍चेन समन्‍नागतो, समापत्तिपटिलाभसंसिद्धेन अधिगमबाहुसच्‍चसङ्खातेन पण्डितभावेन समन्‍नागतोति अत्थो। ब्यत्तोति वेय्यत्तियेन समन्‍नागतो, समापत्तिपटिलाभपच्‍चयेन पारिहारिकपञ्‍ञासङ्खातेन ब्यत्तभावेन समन्‍नागतोति अत्थो। मेधावीति ठानुप्पत्तिया पञ्‍ञाय समन्‍नागतो। अथ वा मेधावीति तिहेतुकपटिसन्धिपञ्‍ञासङ्खाताय तंतंइतिकत्तब्बतापञ्‍ञासङ्खाताय च मेधाय समन्‍नागतोति एवमेत्थ अत्थो दट्ठब्बो। अप्परजक्खजातिकोति समापत्तिया विक्खम्भितत्ता निक्‍किलेसजातिको विसुद्धसत्तो। आजानिस्सतीति सल्‍लक्खेस्सति पटिविज्झिस्सति।

भगवतोपि खो ञाणं उदपादीति भगवतोपि सब्बञ्‍ञुतञ्‍ञाणं उप्पज्‍जि। भगवा किर देवताय कथितेनेव निट्ठं अगन्त्वा सयम्पि सब्बञ्‍ञुतञ्‍ञाणेन ओलोकेन्तो इतो सत्तमदिवसमत्थके कालं कत्वा आकिञ्‍चञ्‍ञायतने निब्बत्तोति अद्दस। तं सन्धायाह ‘‘भगवतोपि खो ञाणं उदपादी’’ति। महाजानियोति सत्तदिवसब्भन्तरे पत्तब्बमग्गफलतो परिहीनत्ता महती जानि परिहानि अस्साति महाजानियो। अक्खणे निब्बत्तत्था इध धम्मदेसनट्ठानं आगमनपादापि नत्थि, अथाहं तत्थ गच्छेय्यं, गन्त्वा देसियमानं धम्मम्पिस्स सोतुं सोतपसादोपि नत्थि, एवं महाजानियो जातोति दस्सेति। किं पन भगवता तं अत्तनो बुद्धानुभावेन धम्मं ञापेतुं न सक्‍काति? आम न सक्‍का, न हि परतोघोसमन्तरेन सावकानं धम्माभिसमयो सम्भवति, अञ्‍ञथा इतरपच्‍चयरहितस्सपि धम्माभिसमयेन भवितब्बं, न च तं अत्थि। वुत्तञ्हेतं – ‘‘द्वेमे, भिक्खवे, पच्‍चया सम्मादिट्ठिया उप्पादाय परतो च घोसो अज्झत्तञ्‍च योनिसोमनसिकारो’’ति (अ॰ नि॰ २.१२७)।

उदकोति तस्स नामं, रामस्स पन पुत्तताय रामपुत्तो। अभिदोसकालकतोति अड्ढरत्ते कालकतो। भगवतोपि खो ञाणं उदपादीति इधापि किर भगवा देवताय कथितवचनेन सन्‍निट्ठानं अकत्वा सब्बञ्‍ञुतञ्‍ञाणेन ओलोकेन्तो ‘‘हिय्यो अड्ढरत्ते कालं कत्वा उदको रामपुत्तो नेवसञ्‍ञानासञ्‍ञायतने निब्बत्तो’’ति अद्दस, तस्मा एवं वुत्तं। सेसं पुरिमसदिसमेव।

बहूपकाराति बहुउपकारा। पधानपहितत्तं उपट्ठहिंसूति पधानत्थाय पेसितत्तभावं वसनट्ठाने परिवेणसम्मज्‍जनेन पत्तचीवरं गहेत्वा अनुबन्धनेन मुखोदकदन्तकट्ठदानादिना च उपट्ठहिंसु। के पनेते पञ्‍चवग्गिया नाम? ये ते –

रामो धजो लक्खणो चापि मन्ती।

धम्मचक्‍कप्पवत्तनसुत्तवण्णना

१३.द्वेमे, भिक्खवे, अन्ताति द्वे इमे, भिक्खवे, कोट्ठासा, द्वे भागाति अत्थो। भागवचनो हेत्थ अन्त-सद्दो ‘‘पुब्बन्ते ञाणं अपरन्ते ञाण’’न्तिआदीसु (ध॰ स॰ १०६३) विय। इमस्स पन पदस्स उच्‍चारणसमकालं पवत्तनिग्घोसो बुद्धानुभावेन हेट्ठा अवीचिं उपरि भवग्गं पत्वा दससहस्सिलोकधातुं फरित्वा अट्ठासि। तस्मिंयेव समये परिपक्‍ककुसलमूला सच्‍चाभिसम्बोधाय कताधिकारा अट्ठारसकोटिसङ्खा ब्रह्मानो समागच्छिंसु। पच्छिमदिसाय सूरियो अत्थमेति, पाचीनदिसाय आसाळ्हनक्खत्तेन युत्तो पुण्णचन्दो उग्गच्छति। तस्मिं समये भगवा धम्मचक्‍कप्पवत्तनसुत्तं आरभन्तो ‘‘द्वेमे, भिक्खवे, अन्ता’’तिआदिमाह।

तत्थ पब्बजितेनाति गिहिबन्धनं छेत्वा पब्बज्‍जुपगतेन। न सेवितब्बाति न वळञ्‍जेतब्बा नानुयुञ्‍जितब्बा। यो चायं कामेसु कामसुखल्‍लिकानुयोगोति यो च अयं वत्थुकामेसु किलेसकामसुखस्स अनुयोगो, किलेसकामसंयुत्तस्स सुखस्स अनुगतोति अत्थो। हीनोति लामको। गम्मोति गामवासीनं सन्तको तेहि सेवितब्बताय। पोथुज्‍जनिकोति पुथुज्‍जनेन अन्धबालजनेन आचिण्णो। अनरियोति न अरियो न विसुद्धो न उत्तमो, न वा अरियानं सन्तको। अनत्थसंहितोति न अत्थसंहितो, हितसुखावहकारणं अनिस्सितोति अत्थो। अत्तकिलमथानुयोगोति अत्तनो किलमथस्स अनुयोगो, दुक्खकरणं दुक्खुप्पादनन्ति अत्थो। दुक्खोति कण्टकापस्सयसेय्यादीहि अत्तबाधनेहि दुक्खावहो। मज्झिमा पटिपदाति अरियमग्गं सन्धाय वुत्तं। मग्गो हि कामसुखल्‍लिकानुयोगो एको अन्तो, अत्तकिलमथानुयोगो एको अन्तो, एते द्वे अन्ते न उपेति न उपगच्छति, विमुत्तो एतेहि अन्तेहि, तस्मा ‘‘मज्झिमा पटिपदा’’ति वुच्‍चति। एतेसं मज्झे भवत्ता मज्झिमा, वट्टदुक्खनिस्सरणत्थिकेहि पटिपज्‍जितब्बतो च पटिपदाति, तथा लोभो एको अन्तो, दोसो एको अन्तो। सस्सतं एकं अन्तं, उच्छेदो एको अन्तोति पुरिमनयेनेव वित्थारेतब्बं।

चक्खुकरणीतिआदीहि तमेव पटिपदं थोमेति। पञ्‍ञाचक्खुं करोतीति चक्खुकरणी। सा हि चतुन्‍नं सच्‍चानं दस्सनाय संवत्तति परिञ्‍ञाभिसमयादिभेदस्स दस्सनस्स पवत्तनट्ठेनाति ‘‘चक्खुकरणी’’ति वुच्‍चति। तयिदं सतिपि पटिपदाय अनञ्‍ञत्ते अवयववसेन सिज्झमानो अत्थो समुदायेन कतो नाम होतीति उपचारवसेन वुत्तन्ति दट्ठब्बं। दुतियपदं तस्सेव वेवचनं। उपसमायाति किलेसुपसमत्थाय। अभिञ्‍ञायाति चतुन्‍नं सच्‍चानं अभिजाननत्थाय। सम्बोधायाति तेसंयेव सम्बुज्झनत्थाय। निब्बानायाति निब्बानसच्छिकिरियाय। अथ वा निब्बानायाति अनुपादिसेसनिब्बानाय। ‘‘उपसमाया’’ति हि इमिना सउपादिसेसनिब्बानं गहितं।

इदानि तं मज्झिमप्पटिपदं सरूपतो दस्सेतुकामो ‘‘कतमा च सा’’ति पुच्छित्वा ‘‘अयमेवा’’तिआदिना नयेन विस्सज्‍जेसि। तत्थ अयमेवाति अवधारणवचनं अञ्‍ञस्स निब्बानगामिमग्गस्स अत्थिभावपटिसेधनत्थं। सत्तापटिक्खेपो हि इध पटिसेधनं अलब्भमानत्ता अञ्‍ञस्स मग्गस्स। अरियोति किलेसानं आरकत्ता अरियो निरुत्तिनयेन। अरिपहानाय संवत्ततीतिपि अरियो अरयो पापधम्मा यन्ति अपगच्छन्ति एतेनाति कत्वा। अरियेन भगवता देसितत्ता अरियस्स अयन्तिपि अरियो, अरियभावप्पटिलाभाय संवत्ततीतिपि अरियो। एत्थ पन अरियकरो अरियोतिपि उत्तरपदलोपेन अरिय-सद्दसिद्धि वेदितब्बा। अट्ठहि अङ्गेहि उपेतत्ता अट्ठङ्गिको। मग्गङ्गसमुदाये हि मग्गवोहारो, समुदायो च समुदायीहि समन्‍नागतो नाम होति। अयं पनेत्थ वचनत्थो – अत्तनो अवयवभूतानि अट्ठङ्गानि एतस्स सन्तीति अट्ठङ्गिकोति। परमत्थतो पन अङ्गानियेव मग्गो पञ्‍चङ्गिकतूरियादीनि विय, न च अङ्गविनिमुत्तो छळङ्गो वेदो विय। किलेसे मारेन्तो गच्छतीति मग्गो निरुत्तिनयेन, निब्बानं मग्गति गवेसतीति वा मग्गो। अरियमग्गो हि निब्बानं आरम्मणं करोन्तो गवेसन्तो विय होति। निब्बानत्थिकेहि मग्गीयतीति वा मग्गो विवट्टूपनिस्सयपुञ्‍ञकरणतो पट्ठाय तदत्थपटिपत्तितो। गम्मति वा तेहि पटिपज्‍जीयतीति मग्गो। एत्थ पन आदिअन्तविपरियायेन सद्दसिद्धि वेदितब्बा।

अनत्तलक्खणसुत्तवण्णना

२०.आमन्तेसीति आसाळ्हीपुण्णमदिवसे धम्मचक्‍कप्पवत्तनतो पट्ठाय अनुक्‍कमेन सोतापत्तिफले पतिट्ठिते अञ्‍ञासिकोण्डञ्‍ञप्पमुखे पञ्‍चवग्गिये ‘‘इदानि तेसं आसवक्खयाय धम्मं देसेस्सामी’’ति पञ्‍चमिया पक्खस्स आमन्तेसि। अनत्ताति अवसवत्तनट्ठेन असामिकट्ठेन सुञ्‍ञतट्ठेन अत्तपटिक्खेपट्ठेनाति एवं चतूहि कारणेहि अनत्ता। तत्थ ‘‘उप्पन्‍नं रूपं ठितिं मा पापुणातु, ठानप्पत्तं मा जीरतु, जरप्पत्तं मा भिज्‍जतु, उदयब्बयेहि मा किलमयतू’’ति न एत्थ कस्सचि वसीभावो अत्थि, स्वायमस्स अवसवत्तनट्ठो। सामिभूतस्स कस्सचि अभावो असामिकट्ठो। निवासीकारकवेदकअधिट्ठायकविरहेन ततो सुञ्‍ञता सुञ्‍ञतट्ठो। परपरिकप्पितअत्तसभावाभावो एव अत्तपटिक्खेपट्ठो। इदानि अनत्ततंयेव विभावेतुं ‘‘रूपञ्‍च हिदं भिक्खवे’’तिआदिमाह। तत्थ अत्ता अभविस्साति कारको वेदको सयंवसीति एवंभूतो अत्ता अभविस्साति अधिप्पायो। एवञ्हि सति रूपस्स आबाधाय संवत्तनं अयुज्‍जमानकं सिया। कामञ्‍चेत्थ ‘‘यस्मा च खो, भिक्खवे, रूपं अनत्ता, तस्मा रूपं आबाधाय संवत्तती’’ति रूपस्स अनत्तताय दुक्खता विभाविता विय दिस्सति, तथापि ‘‘यस्मा रूपं आबाधाय संवत्तति, तस्मा अनत्ता’’ति पाकटाय साबाधताय रूपस्स अत्तसाराभावो विभावितो, ततो एव च ‘‘न च लब्भति रूपे ‘एवं मे रूपं होतु, एवं मे रूपं मा अहोसी’ति’’ रूपे कस्सचि अनिस्सरता तस्स च अवसवत्तनाकारो दस्सितो। वेदनादीसुपि एसेव नयो।

यसस्स पब्बज्‍जाकथावण्णना

२५.इदानि यसस्स पब्बज्‍जं दस्सेतुं ‘‘तेन खो पन समयेना’’तिआदि आरद्धं। तत्रायं अनुत्तानपदवण्णना – हेमन्तिकोतिआदीसु (दी॰ नि॰ अट्ठ॰ २.४२; अ॰ नि॰ अट्ठ॰ २.३.३९) यत्थ सुखं होति हेमन्तकाले वसितुं, अयं हेमन्तिको। इतरेसुपि एसेव नयो। अयं पनेत्थ वचनत्थो – हेमन्ते वासो हेमन्तं उत्तरपदलोपेन, हेमन्तं अरहतीति हेमन्तिको। इतरेसुपि एसेव नयो। तत्थ वस्सिको पासादो नातिउच्‍चो होति नातिनीचो, द्वारवातपानानिपिस्स नातिबहूनि नातितनूनि, भूमत्थरणपच्‍चत्थरणखज्‍जभोज्‍जानिपेत्थ मिस्सकानेव वट्टन्ति। हेमन्तिके थम्भापि भित्तियोपि नीचा होन्ति, द्वारवातपानानि तनुकानि सुखुमछिद्दानि, उण्हप्पवेसनत्थाय भित्तिनिय्यूहानि हरियन्ति, भूमत्थरणपच्‍चत्थरणनिवासनपारुपनानि पनेत्थ उण्हविकिरियानि कम्बलादीनि वट्टन्ति, खज्‍जभोज्‍जं सिनिद्धं कटुकसन्‍निस्सितञ्‍च। गिम्हिके थम्भापि भित्तियोपि उच्‍चा होन्ति, द्वारवातपानानि पनेत्थ बहूनि विपुलजातानि होन्ति, भूमत्थरणानि सीतविकिरियानि दुकूलमयानि वट्टन्ति, खज्‍जभोज्‍जानि मधुररससीतविकिरियानि, वातपानसमीपेसु चेत्थ नवा चाटियो ठपेत्वा उदकस्स पूरेत्वा नीलुप्पलादीहि सञ्छादेन्ति, तेसु तेसु पदेसेसु उदकयन्तानि करोन्ति, येहि देवे वस्सन्ते विय उदकधारा निक्खमन्ति।

निप्पुरिसेहीति पुरिसविरहितेहि। न केवलञ्‍चेत्थ तूरियानेव निप्पुरिसानि, सब्बट्ठानानिपि निप्पुरिसानेव। दोवारिकापि इत्थियोव, नहापनादिपरिकम्मकरापि इत्थियोव। पिता किर ‘‘तथारूपं इस्सरियसुखसम्पत्तिं अनुभवमानस्स पुरिसं दिस्वा परिसङ्का उप्पज्‍जति, सा मे पुत्तस्स मा अहोसी’’ति सब्बकिच्‍चेसु इत्थियोव ठपापेसि। पञ्‍चहि कामगुणेहीति रूपसद्दादीहि पञ्‍चहि कामकोट्ठासेहि। समप्पितस्साति सम्मा अप्पितस्स, उपेतस्साति अत्थो। समङ्गीभूतस्साति तस्सेव वेवचनं। परिचारयमानस्साति परितो चारयमानस्स, तस्मिं तस्मिं कामगुणे इन्द्रियानि चारयमानस्साति अत्थो। आळम्बरन्ति पणवं। विकेसिकन्ति मुत्तकेसं, विप्पकिण्णकेसन्ति अत्थो। विक्खेळिकन्ति विस्सन्दमानलालं। विप्पलपन्तियोति विरुद्धं पलपन्तियो वा रुदन्तियो वा। सुसानं मञ्‍ञेति आमकसुसानं विय अद्दस सकं परिजनन्ति सम्बन्धो। उदानं उदानेसीति संवेगवसेन उदानं उदानेसि, संवेगवसप्पवत्तं वाचं निच्छारेसीति अत्थो।

चतुगिहिसहायपब्बज्‍जाकथावण्णना

३०.इदानि तस्स सहायानं पब्बज्‍जं दस्सेन्तो ‘‘अस्सोसुं खो’’तिआदिमाह। तत्रायं अनुत्तानपदवण्णना – सेट्ठिनो च अनुसेट्ठिनो च येसं कुलानं तानि सेट्ठानुसेट्ठीनि कुलानि, तेसं सेट्ठानुसेट्ठीनं कुलानं, पवेणिवसेन आगतेहि सेट्ठीहि च अनुसेट्ठीहि च समन्‍नागतानं कुलानन्ति अत्थो। विमलोतिआदीनि तेसं पुत्तानं नामानि। केसमस्सुं ओहारेत्वाति केसञ्‍च मस्सुञ्‍च ओरोपेत्वा। कासायानि वत्थानीति कसायरसपीतानि ब्रह्मचरियं चरन्तानं अनुच्छविकानि वत्थानि। ओरकोति ऊनको लामको। सेसमेत्थ वुत्तनयमेव।

चतुगिहिसहायपब्बज्‍जाकथावण्णना निट्ठिता।

पञ्‍ञासगिहिसहायपब्बज्‍जाकथावण्णना

३१.पञ्‍ञासमत्तानं गिहिसहायानं पब्बज्‍जायपि यं वत्तब्बं, तं वुत्तमेव। इमेसं पन सब्बेसं पुब्बयोगो वत्तब्बोति तं दस्सेतुं ‘‘यसआदीनंकुलपुत्तानं अयं पुब्बयोगो’’तिआदिमाह। तत्थ वग्गबन्धनेनाति गणबन्धनेन, एकीभूताति वुत्तं होति। अनाथसरीरानीति अनाथानि मतकळेवरानि। पटिजग्गन्ताति बहि नीहरित्वा झापेन्ता।

पञ्‍ञासगिहिसहायपब्बज्‍जाकथावण्णना निट्ठिता।

मारकथावण्णना

३२.इदानि सरणगमनूपसम्पदं दस्सेतुं ‘‘अथ खो भगवा’’तिआदि आरद्धं। तत्रायं अनुपुब्बपदवण्णना (सं॰ नि॰ अट्ठ॰ १.१.१४१) – मुत्ताहन्ति मुत्तो अहं। चारिकन्ति अनुपुब्बगमनचारिकं, गामनिगमराजधानीसु अनुक्‍कमेन गमनसङ्खातं चारिकन्ति अत्थो। चरथाति दिवसं योजनपरमं गच्छन्ता चरथ। मा एकेन द्वे अगमित्थाति एकेन मग्गेन द्वीसु गतेसु एकस्मिं धम्मं देसेन्ते एकेन तुण्हीभूतेन ठातब्बं होति, तस्मा एवमाह। आदिकल्याणन्ति आदिम्हि कल्याणं सुन्दरं भद्दकं, तथा मज्झपरियोसानेसु। आदिमज्झपरियोसानञ्‍च नामेतं सासनस्स च देसनाय च वसेन दुब्बिधं। तत्थ सासनस्स सीलं आदि, समथविपस्सनामग्गा मज्झं, फलनिब्बानानि परियोसानं। सीलसमाधयो वा आदि, विपस्सनामग्गा मज्झं, फलनिब्बानानि परियोसानं। सीलसमाधिविपस्सना वा आदि, मग्गो मज्झं, फलनिब्बानानि परियोसानं। देसनाय पन चतुप्पदिकगाथाय ताव पठमपादो आदि, दुतियततिया मज्झं, चतुत्थो परियोसानं। पञ्‍चपदछप्पदानं पठमपादो आदि, अवसानपादो परियोसानं, सेसा मज्झं। एकानुसन्धिकस्स सुत्तस्स निदानं आदि, इदमवोचाति परियोसानं, सेसं मज्झं। अनेकानुसन्धिकस्स सुत्तस्स मज्झे बहुकम्पि अनुसन्धि मज्झमेव, निदानं आदि, इदमवोचाति परियोसानं। सात्थन्ति सात्थकं कत्वा देसेथ। सब्यञ्‍जनन्ति ब्यञ्‍जनेहि चेव पदेहि च परिपूरं कत्वा देसेथ। केवलपरिपुण्णन्ति सकलपरिपुण्णं। परिसुद्धन्ति निरुपक्‍किलेसं। ब्रह्मचरियन्ति सिक्खत्तयसङ्गहं सासनब्रह्मचरियं। पकासेथाति आवि करोथ।

अप्परजक्खजातिकाति पञ्‍ञाचक्खुम्हि अप्पकिलेसरजसभावा, दुकूलसाणिया पटिच्छन्‍ना विय चतुप्पदिकगाथापरियोसाने अरहत्तं पत्तुं समत्था सत्ता सन्तीति अत्थो। परिहायन्तीति अलाभपरिहानिया धम्मतो परिहायन्ति। तेनेवाह ‘‘अनधिगतं नाधिगच्छन्ता विसेसाधिगमतो परिहायन्ती’’ति। सेनानिगमोति सेनाय निगमो। पठमकप्पिकानं किर तस्मिं ठाने सेनानिवेसो अहोसि, तस्मा सो पदेसो ‘‘सेनानिगमो’’ति वुच्‍चति। ‘‘सेनानिगामो’’तिपि पाठो, सेनानि नाम सुजाताय पिता, तस्स गामोति अत्थो। तेनुपसङ्कमिस्सामीति नाहं तुम्हे उय्योजेत्वा परिवेणादीनि कारेत्वा उपट्ठाकादीहि परिचरियमानो विहरिस्सामि, तिण्णं पन जटिलानं अड्ढुड्ढानि पाटिहारियसहस्सानि दस्सेत्वा धम्ममेव देसेतुं उपसङ्कमिस्सामि।

पब्बज्‍जूपसम्पदाकथावण्णना

३४.‘‘अनुजानामि भिक्खवे’’तिआदिकाय पन पाळिया यो पब्बज्‍जूपसम्पदाविनिच्छयो वत्तब्बो, तं वित्थारतो दस्सेतुं ‘‘पब्बज्‍जापेक्खं कुलपुत्तं पब्बाजेन्तेना’’तिआदिमाह। तत्थ ये पुग्गला पटिक्खित्ताति सम्बन्धो। सयं पब्बाजेतब्बोति केसच्छेदनादीनि सयं करोन्तेन पब्बाजेतब्बो। केसच्छेदनं कासायच्छादनं सरणदानन्ति हि इमानि तीणि करोन्तो ‘‘पब्बाजेती’’ति वुच्‍चति। एतेसु एकं द्वे वापि करोन्तो तथा वोहरीयतियेव, तस्मा एतं पब्बाजेहीति केसच्छेदनं कासायच्छादनञ्‍च सन्धाय वुत्तं। उपज्झायंउद्दिस्स पब्बाजेतीति एत्थापि एसेव नयो। खण्डसीमं नेत्वाति भण्डुकम्मारोचनपरिहरणत्थं वुत्तं। तेन सभिक्खुके विहारे अञ्‍ञम्पि ‘‘एतस्स केसे छिन्दा’’ति वत्तुं न वट्टति। पब्बाजेत्वाति केसच्छेदनं सन्धाय वदति। भिक्खुतो अञ्‍ञो पब्बाजेतुं न लभतीति सरणदानं सन्धाय वुत्तं। तेनेवाह ‘‘सामणेरो पना’’तिआदि। भब्बरूपोति भब्बसभावो। तमेवत्थं परियायन्तरेन विभावेति ‘‘सहेतुको’’ति। ञातोति पाकटो। यसस्सीति परिवारसम्पत्तिया समन्‍नागतो।

वण्णसण्ठानगन्धासयोकासवसेन असुचिजेगुच्छपटिकूलभावं पाकटं करोन्तेनाति सम्बन्धो। तत्थ केसा नामेते वण्णतोपि पटिकूला, सण्ठानतोपि गन्धतोपि आसयतोपि ओकासतोपि पटिकूला। मनुञ्‍ञेपि (विसुद्धि॰ १.१८३; विभ॰ अट्ठ॰ ३५६; सारत्थ॰ टी॰ पाराजिककण्ड २.१६२) हि यागुपत्ते वा भत्तपत्ते वा केसवण्णं किञ्‍चि दिस्वा ‘‘केसमिस्सकमिदं, हरथ न’’न्ति जिगुच्छन्ति, एवं केसा वण्णतो पटिकूला। रत्तिं भुञ्‍जन्तापि केससण्ठानं अक्‍कवाकं वा मकचिवाकं वा छुपित्वा तथेव जिगुच्छन्ति, एवं सण्ठानतो पटिकूला। तेलमक्खनपुप्फधूमादिसङ्खारविरहितानञ्‍च केसानं गन्धो परमजेगुच्छो होति, ततो जेगुच्छतरो अग्गिम्हि पक्खित्तानं। केसा हि वण्णसण्ठानतो अप्पटिकूलापि सियुं, गन्धेन पन पटिकूलायेव। यथा हि दहरस्स कुमारकस्स वच्‍चं वण्णतो हलिद्दिवण्णं, सण्ठानतोपि हलिद्दिपिण्डिसण्ठानं। सङ्कारट्ठाने छड्डितञ्‍च उद्धुमातककाळसुनखसरीरं वण्णतो तालपक्‍कवण्णं, सण्ठानतो वट्टेत्वा विस्सट्ठमुदिङ्गसण्ठानं, दाठापिस्स सुमनमकुळसदिसा, तं उभयम्पि वण्णसण्ठानतो सिया अप्पटिकूलं, गन्धेन पन पटिकूलमेव, एवं केसापि सियुं वण्णसण्ठानतो अप्पटिकूला, गन्धेन पन पटिकूलायेवाति। यथा पन असुचिट्ठाने गामनिस्सन्देन जातानि सूपेय्यपण्णानि नागरिकमनुस्सानं जेगुच्छानि होन्ति अपरिभोगानि, एवं केसापि पुब्बलोहितमुत्तकरीसपित्तसेम्हादिनिस्सन्देन जातत्ता परमजेगुच्छाति एवं आसयतो पटिकूला। इमे च केसा नाम गूथरासिम्हि उट्ठितकण्णकं विय एकतिंसकोट्ठासरासिम्हि जाता, ते सुसानसङ्कारट्ठानादीसु जातसाकं विय परिखादीसु जातकमलकुवलयादिपुप्फं विय च असुचिट्ठाने जातत्ता परमजेगुच्छाति एवं ओकासतो पटिकूलातिआदिना नयेन तचपञ्‍चकस्स वण्णादिवसेन पटिकूलभावं पकासेन्तेनाति अत्थो।

निज्‍जीवनिस्सत्तभावं वा पाकटं करोन्तेनाति इमे केसा नाम सीसकटाहपलिवेठनचम्मे जाता। तत्थ यथा वम्मिकमत्थके जातेसु कुन्थतिणेसु न वम्मिकमत्थको जानाति ‘‘मयि कुन्थतिणानि जातानी’’ति, नापि कुन्थतिणानि जानन्ति ‘‘मयं वम्मिकमत्थके जातानी’’ति, एवमेव न सीसकटाहपलिवेठनचम्मं जानाति ‘‘मयि केसा जाता’’ति, नापि केसा जानन्ति ‘‘मयं सीसकटाहपलिवेठनचम्मे जाता’’ति। अञ्‍ञमञ्‍ञं आभोगपच्‍चवेक्खणरहिता एते धम्मा। इति केसा नाम इमस्मिं सरीरे पाटियेक्‍को कोट्ठासो अचेतनो अब्याकतो सुञ्‍ञो निस्सत्तो थद्धो पथवीधातूतिआदिना नयेन निज्‍जीवनिस्सत्तभावं पकासेन्तेन। पुब्बेति पुरिमबुद्धानं सन्तिके। मद्दितसङ्खारोति नामरूपववत्थानेन चेव पच्‍चयपरिग्गहवसेन च ञाणेन परिमद्दितसङ्खारो। भावितभावनोति कलापसम्मसनादिना सब्बसो कुसलभावनाय पूरणेन भावितभावनो।

दुतियमारकथावण्णना

३५.अथ खो भगवा वस्संवुट्ठोतिआदिकाय पन पाळिया अयं अपुब्बपदवण्णना। योनिसोमनसिकाराति उपायमनसिकारेन, अनिच्‍चादीसु अनिच्‍चादितो मनसिकरणेनाति अत्थो। योनिसो सम्मप्पधानाति उपायवीरियेन, अनुप्पन्‍नाकुसलानुप्पादनादिविधिना पवत्तवीरियेनाति अत्थो। विमुत्तीति उक्‍कट्ठनिद्देसेन अरहत्तफलविमुत्ति वुत्ता। अज्झभासीति ‘‘अयं अत्तना वीरियं कत्वा अरहत्तं पत्वापि न तुस्सति, इदानि अञ्‍ञेसम्पि ‘पापुणाथा’ति उस्साहं करोति, पटिबाहेस्सामि न’’न्ति चिन्तेत्वा अभासि। मारपासेनाति किलेसपासेन। सेसमेत्थ वुत्तनयमेव।

दुतियमारकथावण्णना निट्ठिता।

भद्दवग्गियकथावण्णना

३६.तिंसभद्दवग्गियवत्थुम्हि यथाभिरन्तं विहरित्वाति यथाअज्झासयं विहरित्वा। बुद्धानञ्हि एकस्मिं ठाने वसन्तानं छायूदकादीनं विपत्तिं वा अफासुकसेनासनं वा मनुस्सानं अस्सद्धादिभावं वा आगम्म अनभिरति नाम नत्थि, तेसं सम्पत्तिया ‘‘इध फासुं विहरामा’’ति अभिरमित्वा चिरविहारोपि नत्थि। यत्थ पन तथागते विहरन्ते सत्ता सरणेसु वा तीसु पतिट्ठहन्ति, सीलानि वा समादियन्ति, पब्बजन्ति वा, सोतापत्तिमग्गादीनं वा परेसं उपनिस्सयो होति, तत्थ बुद्धा सत्ते तासु सम्पत्तीसु पतिट्ठापनअज्झासयेन वसन्ति, तासं अभावे पक्‍कमन्ति। तेन वुत्तं ‘‘यथाअज्झासयं विहरित्वा’’ति। अज्झोगाहेत्वाति पविसित्वा। तिंसमत्ताति तिंसपमाणा। सेसमेत्थ वुत्तनयमेव।

भद्दवग्गियकथावण्णना निट्ठिता।

उरुवेलपाटिहारियकथावण्णना

३७-३८.उरुवेलकस्सपवत्थुम्हि जटिलोति जटाधरो। जटा अस्स अत्थीति हि जटिलो। नेतीति नायको, सामं विनेति अत्तनो लद्धिं सिक्खापेतीति विनायको। सचे ते कस्सप अगरूति कस्सप सचे तुय्हं भारियं अफासुकं किञ्‍चि नत्थि। अग्यागारेति अग्गिसालायं। उभिन्‍नं सजोतिभूतानन्ति उभोसु सजोतिभूतेसु पज्‍जलितेसु। यत्र हि नामाति यो नाम।

आदित्तपरियायसुत्तवण्णना

५४.इदानि तस्स भिक्खुसहस्सस्स आदित्तपरियायदेसनाय अरहत्तप्पत्तिं दस्सेतुं ‘‘अथ खोभगवा’’तिआदि आरद्धं। तत्थ गयायं विहरति गयासीसेति गयानामिकाय नदिया अविदूरे भवत्ता गामो गया नाम, तस्सं गयायं विहरति। समीपत्थे चेतं भुम्मवचनं। गयागामस्स हि अविदूरे गयाति एका पोक्खरणीपि अत्थि नदीपि गयासीसनामको हत्थिकुम्भसदिसो पिट्ठिपासाणोपि। यत्थ भिक्खुसहस्सस्स ओकासो पहोति, भगवा तत्थ विहरति। तेन वुत्तं ‘‘गयासीसे’’ति, गयागामस्स आसन्‍ने गयासीसनामके पिट्ठिपासाणे विहरतीति वुत्तं होति। भिक्खू आमन्तेसीति तेसं सप्पायधम्मदेसनं विचिनित्वा तं देसेस्सामीति आमन्तेसि। भगवा हि तं इद्धिमयपत्तचीवरधरं समणसहस्सं आदाय गयासीसं गन्त्वा तेन परिवारितो निसीदित्वा ‘‘कतरा नु खो एतेसं धम्मकथा सप्पाया’’ति चिन्तेन्तो ‘‘इमे सायं पातं अग्गिं परिचरन्ति, इमेसं द्वादसायतनानि आदित्तानि सम्पज्‍जलितानि विय कत्वा दस्सेस्सामि, एवं इमे अरहत्तं पापुणितुं सक्खिस्सन्ती’’ति सन्‍निट्ठानमकासि। अथ नेसं तथा देसेतुं ‘‘सब्बं, भिक्खवे, आदित्त’’न्तिआदिना इमं आदित्तपरियायं अभासि।

तत्थ (सं॰ नि॰ अट्ठ॰ ३.४.२३) सब्बं नाम चतुब्बिधं सब्बसब्बं आयतनसब्बं सक्‍कायसब्बं पदेससब्बन्ति। तत्थ –

‘‘न तस्स अद्दिट्ठमिधत्थि किञ्‍चि।

अथो अविञ्‍ञातमजानितब्बं।

सब्बं अभिञ्‍ञासि यदत्थि नेय्यं।

तथागतो तेन समन्तचक्खू’’ति (महानि॰ १५६; चूळनि॰ धोतकमाणवपुच्छानिद्देस ३२; पटि॰ म॰ १.१२१) –

इदं सब्बसब्बं नाम। ‘‘सब्बं वो, भिक्खवे, देसेस्सामि, तं सुणाथा’’ति (सं॰ नि॰ ४.२३) इदं आयतनसब्बं नाम। ‘‘सब्बधम्ममूलपरियायं वो, भिक्खवे, देसेस्सामी’’ति (म॰ नि॰ १.१) इदं सक्‍कायसब्बं नाम। ‘‘सब्बधम्मेसु वा पठमसमन्‍नाहारो उप्पज्‍जति चित्तं मनो मानसं तज्‍जा मनोविञ्‍ञाणधातू’’ति इदं पदेससब्बं नाम। इति पञ्‍चारम्मणमत्तं पदेससब्बं, तेभूमका धम्मा सक्‍कायसब्बं, चतुभूमका धम्मा आयतनसब्बं, यं किञ्‍चि नेय्यं सब्बसब्बं। पदेससब्बं सक्‍कायसब्बं न पापुणाति तस्स तेभूमकधम्मेसुपि एकदेसस्स असङ्गण्हनतो। सक्‍कायसब्बं आयतनसब्बं न पापुणाति लोकुत्तरधम्मानं असङ्गण्हनतो। आयतनसब्बं सब्बसब्बं न पापुणाति। कस्मा? यस्मा आयतनसब्बेन चतुभूमकधम्माव परिग्गहिता , न लक्खणपञ्‍ञत्तियोति। इमस्मिं पन सुत्ते आयतनसब्बं अधिप्पेतं, तत्थापि इध विपस्सनुपगधम्माव गहेतब्बा।

बिम्बिसारसमागमकथावण्णना

५५.इदानि ‘‘अथ खो भगवा गयासीसे यथाभिरन्तं विहरित्वा’’तिआदीसु या सा अनुत्तानपदवण्णना, तं दस्सेतुं ‘‘लट्ठिवनेति तालुय्याने’’तिआदि आरद्धं। तत्थ तालुय्यानेति तालरुक्खानं बहुभावतो एवंलद्धनामे उय्याने। अप्पेकच्‍चे येन भगवा तेनञ्‍जलिं पणामेत्वातिआदीसु अञ्‍जलिं पणामेत्वाति ये उभतोपक्खिका, ते सन्धायेतं वुत्तं। ते किर एवं चिन्तयिंसु ‘‘सचे नो मिच्छादिट्ठिका चोदेस्सन्ति ‘कस्मा तुम्हे समणं गोतमं वन्दित्था’ति, तेसं ‘किं अञ्‍जलिमत्तकरणेनपि वन्दितं होती’ति वक्खाम। सचे नो सम्मादिट्ठिका चोदेस्सन्ति ‘कस्मा भगवन्तं न वन्दित्था’ति, ‘किं सीसेन भूमिं पहरन्तेनेव वन्दितं होति, ननु अञ्‍जलिकम्मम्पि वन्दना एवा’ति वक्खामा’’ति। नामगोत्तं सावेत्वाति ‘‘भो गोतम, अहं असुकस्स पुत्तो दत्तो नाम मित्तो नाम इध आगतो’’ति वदन्ता नामं सावेन्ति नाम, ‘‘भो गोतम, अहं वासेट्ठो नाम कच्‍चानो नाम इधागतो’’ति वदन्ता गोत्तं सावेन्ति नाम। एते किर दलिद्दा जिण्णकुलपुत्ता परिसमज्झे नामगोत्तवसेन पाकटा भविस्सामाति एवं अकंसु। ये पन तुण्हीभूता निसीदिंसु, ते केराटिका चेव अन्धबाला च। तत्थ केराटिका ‘‘एकं द्वे कथासल्‍लापे करोन्ते विस्सासिको होति, अथ विस्सासे सति एकं द्वे भिक्खा अदातुं न युत्त’’न्ति ततो अत्तानं मोचेन्ता तुण्ही निसीदन्ति। अन्धबाला अञ्‍ञाणतायेव अवक्खित्ता मत्तिकापिण्डो विय यत्थ कत्थचि तुण्हीभूता निसीदन्ति।

किसकोवदानोति एत्थ किसकानं ओवदानो किसकोवदानोति इमं ताव अत्थविकप्पं दस्सेतुं ‘‘तापसचरियाय किससरीरत्ता’’तिआदि वुत्तं। अग्गिहुत्तन्ति अग्गिपरिचरणं। रूपादयोव इध कामनीयट्ठेन ‘‘कामा’’ति वुत्ताति आह ‘‘एते रूपादयो कामे’’ति। यञ्‍ञा अभिवदन्तीति यागहेतु इज्झन्तीति वदन्ति। उपधीसूति एत्थ चत्तारो उपधी कामुपधि खन्धुपधि किलेसुपधि अभिसङ्खारुपधीति। कामापि हि ‘‘यं पञ्‍च कामगुणे पटिच्‍च उप्पज्‍जति सुखं सोमनस्सं, अयं कामानं अस्सादो’’ति (म॰ नि॰ १.१६७) एवं वुत्तस्स सुखस्स अधिट्ठानभावतो उपधीयति एत्थ सुखन्ति इमिना वचनत्थेन ‘‘उपधी’’ति वुच्‍चन्ति। खन्धापि खन्धमूलकस्स दुक्खस्स अधिट्ठानभावतो, किलेसापि अपायदुक्खस्स अधिट्ठानभावतो, अभिसङ्खारापि भवदुक्खस्स अधिट्ठानभावतो ‘‘उपधी’’ति वुच्‍चन्ति, तेसु खन्धुपधि इधाधिप्पेतोति आह ‘‘खन्धुपधीसु मलन्ति ञत्वा’’ति। यञ्‍ञा मलमेव वदन्तीति यागहेतु मलमेव इज्झतीति वदन्ति। यिट्ठेति महायागे। हुतेति दिवसे दिवसे कत्तब्बअग्गिपरिचरणे। कामभवे असत्तन्ति कामभवे अलग्गं, तब्बिनिमुत्तन्ति वुत्तं होति।

सारिपुत्तमोग्गल्‍लानपब्बज्‍जाकथावण्णना

६०.इदानि ‘‘तेन खो पन समयेन सञ्‍चयो परिब्बाजको’’तिआदीसु अपुब्बपदवण्णनं दस्सेन्तो ‘‘सारिपुत्तमोग्गल्‍लाना’’तिआदिमाह। तत्थ सारीब्राह्मणिया पुत्तो सारिपुत्तो, मोग्गल्‍लीब्राह्मणिया पुत्तो मोग्गल्‍लानो। अम्हाकं किर (अ॰ नि॰ अट्ठ॰ १.१.१८९-१९०; ध॰ प॰ अट्ठ॰ १.१० सारिपुत्तत्थेरवत्थु) भगवतो निब्बत्तितो पुरेतरमेव सारिपुत्तो राजगहनगरस्स अविदूरे उपतिस्सगामे सारीब्राह्मणिया नाम कुच्छियं पटिसन्धिं गण्हि। तंदिवसमेवस्स सहायोपि राजगहस्सेव अविदूरे कोलितगामे मोग्गल्‍लीब्राह्मणिया कुच्छियं पटिसन्धिं गण्हि। तानि किर द्वेपि कुलानि याव सत्तमा कुलपरिवट्टा आबद्धपटिबद्धसहायानेव। तेसं द्विन्‍नं एकदिवसमेव गब्भपरिहारं अदंसु। दसमासच्‍चयेन जातानम्पि तेसं छसट्ठि धातियो उपनयिंसु। नामग्गहणदिवसे सारीब्राह्मणिया पुत्तस्स उपतिस्सगामे जेट्ठकुलस्स पुत्तत्ता ‘‘उपतिस्सो’’ति नामं अकंसु, इतरस्स कोलितगामे जेट्ठकुलस्स पुत्तत्ता ‘‘कोलितो’’ति नामं अकंसु। तेन वुत्तं ‘‘गिहिकाले उपतिस्सो कोलितोति एवं पञ्‍ञायमाननामा’’ति।

अड्ढतेय्यसतमाणवकपरिवाराति एत्थ पञ्‍चपञ्‍चसतमाणवकपरिवारातिपि वदन्ति। वुत्तञ्हेतं अङ्गुत्तरनिकायट्ठकथायं (अ॰ नि॰ अट्ठ॰ १.१.१८९-१९०) –

‘‘उपतिस्समाणवकस्स कीळनत्थाय नदिं वा उय्यानं वा गमनकाले पञ्‍च सुवण्णसिविकासतानि परिवारानि होन्ति, कोलितमाणवकस्स पञ्‍च आजञ्‍ञरथसतानि। द्वेपि जना पञ्‍चपञ्‍चमाणवकसतपरिवारा होन्ती’’ति।

राजगहे च अनुसंवच्छरं गिरग्गसमज्‍जं नाम होति। तेसं द्विन्‍नम्पि एकट्ठानेयेव मञ्‍चकं बन्धन्ति। द्वेपि एकतोव निसीदित्वा समज्‍जं पस्सित्वा हसितब्बट्ठाने हसन्ति, संवेगट्ठाने संविज्‍जन्ति, दायं दातुं युत्तट्ठाने दायं देन्ति। तेसं इमिनाव नियामेन एकदिवसं समज्‍जं पस्सन्तानं परिपाकगतत्ता ञाणस्स पुरिमदिवसेसु विय हसितब्बट्ठाने हासो वा संवेगट्ठाने संविज्‍जनं वा दायं दातुं युत्तट्ठाने दायदानं वा नाहोसि। द्वेपि पन जना एवं चिन्तयिंसु ‘‘किं एत्थ ओलोकेतब्बं अत्थि, सब्बेपिमे अप्पत्ते वस्ससते अपण्णत्तिकभावं गमिस्सन्ति, अम्हेहि पन एकं मोक्खधम्मं गवेसितुं वट्टती’’ति आरम्मणं गहेत्वा निसीदिंसु। ततो कोलितो उपतिस्सं आह ‘‘सम्म उपतिस्स, न त्वं अञ्‍ञदिवसेसु विय हट्ठपहट्ठो, अनत्तमनधातुकोसि, किं ते सल्‍लक्खित’’न्ति। ‘‘सम्म कोलित, एतेसं ओलोकने सारो नत्थि, निरत्थकमेतं, अत्तनो मोक्खधम्मं गवेसितुं वट्टती’’ति इदं चिन्तयन्तो निसिन्‍नोम्हीति। त्वं पन कस्मा अनत्तमनोति। सोपि तथेव आह। अथस्स अत्तना सद्धिं एकज्झासयतं ञत्वा उपतिस्सो एवमाह ‘‘अम्हाकं उभिन्‍नं सुचिन्तितं, मोक्खधम्मं पन गवेसन्तेहि एका पब्बज्‍जा लद्धुं वट्टति, कस्स सन्तिके पब्बजामा’’ति।

तेन खो पन समयेन सञ्‍चयो परिब्बाजको राजगहे पटिवसति महतिया परिब्बाजकपरिसाय सद्धिं। ते ‘‘तस्स सन्तिके पब्बजिस्सामा’’ति पञ्‍चहि माणवकसतेहि सद्धिं सञ्‍चयस्स सन्तिके पब्बजिंसु। तेसं पब्बजितकालतो पट्ठाय सञ्‍चयो अतिरेकलाभग्गयसग्गप्पत्तो अहोसि। ते कतिपाहेनेव सब्बं सञ्‍चयस्स समयं परिमद्दित्वा ‘‘आचरिय, तुम्हाकं जाननसमयो एत्तकोव, उदाहु उत्तरिपि अत्थी’’ति पुच्छिंसु। सञ्‍चयो ‘‘एत्तकोव, सब्बं तुम्हेहि ञात’’न्ति आह। तस्स कथं सुत्वा चिन्तयिंसु ‘‘एवं सति इमस्स सन्तिके ब्रह्मचरियवासो निरत्थको, मयं मोक्खधम्मं गवेसितुं निक्खन्ता, सो इमस्स सन्तिके उप्पादेतुं न सक्‍का, महा खो पन जम्बुदीपो, गामनिगमराजधानियो चरन्ता अवस्सं मोक्खधम्मदेसकं आचरियं लभिस्सामा’’ति। ते ततो पट्ठाय ‘‘यत्थ यत्थ पण्डिता समणब्राह्मणा अत्थी’’ति सुणन्ति, तत्थ तत्थ गन्त्वा पञ्हसाकच्छं करोन्ति, तेहि पुट्ठं पञ्हं अञ्‍ञो कथेतुं समत्थो नाम नत्थि, ते पन तेसं पञ्हं विस्सज्‍जेन्ति। एवं सकलजम्बुदीपं परिग्गण्हित्वा निवत्तित्वा सकट्ठानमेव आगन्त्वा ‘‘सम्म कोलित, यो पठमं अमतं अधिगच्छति , सो आरोचेतू’’ति कतिकं अकंसु। इममेव वत्थुं सङ्खिपित्वा दस्सेन्तो ‘‘तत्र नेसं महाजनं दिस्वा…पे॰… कतिकं अकंसू’’ति आह।

उपज्झायवत्तकथावण्णना

६४.वज्‍जावज्‍जं उपनिज्झायतीति उपज्झायो, नत्थि उपज्झायो एतेसन्ति अनुपज्झायका। तेनाह ‘‘वज्‍जावज्‍जं उपनिज्झायकेन गरुना विरहिता’’ति। तत्थ वज्‍जावज्‍जन्ति खुद्दकं महन्तञ्‍च वज्‍जं। वुद्धिअत्थो हि अयमकारो ‘‘फलाफल’’न्तिआदीसु विय। उत्तिट्ठपत्तन्ति एत्थ उच्छिट्ठ-सद्दसमानत्थो उत्तिट्ठ-सद्दो। तेनेवाह ‘‘तस्मिञ्हि मनुस्सा उच्छिट्ठसञ्‍ञिनो, तस्मा उत्तिट्ठपत्तन्ति वुत्त’’न्ति। पिण्डाय चरणकपत्तन्ति इमिना पन पत्तस्स सरूपदस्सनमुखेन उच्छिट्ठकप्पनाय कारणं विभावितं। तस्मिन्ति तस्मिं पिण्डाय चरणकपत्ते।

नसम्मावत्तनादिकथावण्णना

६८.नसम्मावत्तनादिकथायं गेहस्सितपेमन्ति ‘‘पिता मे अय’’न्ति एवं उप्पन्‍नपेमं। उपज्झायम्हि पितुचित्तुपट्ठानमेव हि इध गेहस्सितपेमं नाम। न हि इदं अकुसलपक्खियं गेहस्सितपेमं सन्धाय वुत्तं पटिविद्धसच्‍चानं पहीनानुगेधानं तदसम्भवतो, न च भगवा भिक्खू संकिलेसे नियोजेति, गेहस्सितपेमसदिसत्ता पन पेममुखेन मेत्तासिनेहो इध वुत्तोति वेदितब्बं। ‘‘तेसु एको वत्तसम्पन्‍नो भिक्खु…पे॰… तेसं अनापत्ती’’ति वचनतो सचे एको वत्तसम्पन्‍नो भिक्खु ‘‘भन्ते, तुम्हे अप्पोस्सुक्‍का होथ, अहं तुम्हाकं सद्धिविहारिकं अन्तेवासिकं वा गिलानं उपट्ठहिस्सामि, ओवदितब्बं ओवदिस्सामि, इति करणीयेसु उस्सुक्‍कं आपज्‍जिस्सामी’’ति वदति, ते एव वा सद्धिविहारिकादयो ‘‘भन्ते, तुम्हे केवलं अप्पोस्सुक्‍का होथा’’ति वदन्ति, वत्तं वा न सादियन्ति , ततो पट्ठाय आचरियुपज्झायानं अनापत्तीति वदन्ति। सेसमेत्थ उत्तानमेव।

नसम्मावत्तनादिकथावण्णना निट्ठिता।

राधब्राह्मणवत्थुकथावण्णना

६९.राधब्राह्मणवत्थुम्हि किसो अहोसीति खादितुं वा भुञ्‍जितुं वा असक्‍कोन्तो तनुको अहोसि अप्पमंसलोहितो। उप्पण्डुप्पण्डुकजातोति सञ्‍जातुप्पण्डुप्पण्डुकभावो पण्डुपलासप्पटिभागो। धमनिसन्थतगत्तोति परियादिन्‍नमंसलोहितत्ता सिराजालेनेव सन्थरितगत्तो। अधिकारन्ति अधिकिरियं, सक्‍कारन्ति वुत्तं होति। कतं जानन्तीति कतञ्‍ञुनो, कतं पाकटं कत्वा जानन्तीति कतवेदिनो। किं पन थेरो भगवता बाराणसियं तीहि सरणगमनेहि अनुञ्‍ञातं पब्बज्‍जं उपसम्पदञ्‍च न जानातीति? नो न जानाति। यदि एवं ‘‘कथाहं, भन्ते, तं ब्राह्मणं पब्बाजेमि उपसम्पादेमी’’ति कस्मा आहाति इमं अनुयोगं सन्धायाह ‘‘किञ्‍चापि आयस्मा सारिपुत्तो’’तिआदि। परिमण्डलेहीति परिपुण्णेहि। अञ्‍ञथा वा वत्तब्बं अञ्‍ञथा वदतीति ‘‘भन्ते’’ति वत्तब्बं ‘‘बन्धे’’ति वदति।

आचरियवत्तकथावण्णना

७५.उपसेनवत्थुम्हि आचिण्णन्ति चरितं वत्तं अनुधम्मता। कच्‍चि भिक्खु खमनीयन्ति भिक्खु कच्‍चि तुय्हं इदं चतुचक्‍कं नवद्वारं सरीरयन्तं खमनीयं सक्‍का खमितुं सहितुं परिहरितुं, न किञ्‍चि दुक्खं उप्पादेतीति। कच्‍चि यापनीयन्ति कच्‍चि सब्बकिच्‍चेसु यापेतुं सक्‍का, न किञ्‍चि अन्तरायं दस्सेतीति। जानन्तापि तथागतातिएवमादि यं परतो ‘‘कति वस्सोसि त्वं भिक्खू’’तिआदिना पुच्छि, तस्स परिहारदस्सनत्थं वुत्तं। तत्रायं सङ्खेपत्थो – तथागता नाम जानन्तापि सचे तादिसं पुच्छाकारणं होति, पुच्छन्ति। सचे पन तादिसं पुच्छाकारणं नत्थि, जानन्तापि न पुच्छन्ति। यस्मा पन बुद्धानं अजाननं नाम नत्थि, तस्मा ‘‘अजानन्तापी’’ति न वुत्तं। कालं विदित्वा पुच्छन्तीति सचे तस्सा पुच्छाय सो कालो होति, एवं तं कालं विदित्वा पुच्छन्ति। सचे न होति, एवम्पि कालं विदित्वाव न पुच्छन्ति। एवं पुच्छन्तापि च अत्थसंहितं तथागता पुच्छन्ति, यं अत्थनिस्सितं कारणनिस्सितं, तदेव पुच्छन्ति, नो अनत्थसंहितं। कस्मा? यस्मा अनत्थसंहिते सेतुघातो तथागतानं। सेतु वुच्‍चति मग्गो, मग्गेनेव तादिसस्स वचनस्स घातो समुच्छेदोति वुत्तं होति।

इदानि अत्थसंहितन्ति एत्थ यं अत्थनिस्सितं वचनं तथागता पुच्छन्ति, तं दस्सेन्तो ‘‘द्वीहि आकारेही’’तिआदिमाह। तत्थ आकारेहीति कारणेहि । धम्मं वा देसेस्सामाति अट्ठुप्पत्तियुत्तं सुत्तं वा पुब्बचरितकारणयुत्तं जातकं वा कथयिस्साम। सावकानं वा सिक्खापदं पञ्‍ञपेस्सामाति सावकानं वा ताय पुच्छाय वीतिक्‍कमं पाकटं कत्वा गरुकं वा लहुकं वा सिक्खापदं पञ्‍ञपेस्साम आणं ठपेस्साम। अतिलहुन्ति अतिसीघं।

पणामनाखमापनाकथावण्णना

८०.यं पुब्बे लक्खणं वुत्तन्ति सम्बन्धो, ‘‘तेनेव लक्खणेन निस्सयन्तेवासिकस्स आपत्ति वेदितब्बा’’ति पोत्थकेसु पाठो दिस्सति, ‘‘न तेनेव लक्खणेन निस्सयन्तेवासिकस्स आपत्ति वेदितब्बा’’ति एवं पनेत्थ पाठो वेदितब्बो। सद्धिविहारिकस्स वुत्तलक्खणेन निस्सयन्तेवासिकस्स आपत्ति न वेदितब्बाति एवं पनेत्थ अत्थोपि वेदितब्बो। अञ्‍ञथा ‘‘निस्सयन्तेवासिकेन हि याव आचरियं निस्साय वसति, ताव सब्बं आचरियवत्तं कातब्ब’’न्ति इदं विरुज्झेय्य। इदञ्हि वचनं निस्सयन्तेवासिकस्स अमुत्तनिस्सयस्सेव वत्तं अकरोन्तस्स आपत्तीति दीपेति। तस्मा सद्धिविहारिकस्स यथावुत्तवत्तं अकरोन्तस्स निस्सयमुत्तकस्स अमुत्तकस्सपि आपत्ति, निस्सयन्तेवासिकस्स पन अमुत्तनिस्सयस्सेव आपत्तीति गहेतब्बं। तेनेव विसुद्धिमग्गेपि (विसुद्धि॰ १.४१) ञातिपलिबोधकथायं –

‘‘ञातीति विहारे आचरियुपज्झायसद्धिविहारिकअन्तेवासिकसमानुपज्झायकसमानाचरियका, घरे माता पिता भगिनी भाताति एवमादिका। ते गिलाना इमस्स पलिबोधा होन्ति, तस्मा सो पलिबोधो उपट्ठहित्वा तेसं पाकतिककरणेन उपच्छिन्दितब्बो। तत्थ उपज्झायो ताव गिलानो सचे लहुं न वुट्ठाति, यावजीवं पटिजग्गितब्बो। तथा पब्बज्‍जाचरियो उपसम्पदाचरियो सद्धिविहारिको उपसम्पादितपब्बाजितअन्तेवासिकसमानुपज्झायका च। निस्सयाचरिय उद्देसाचरिय निस्सयन्तेवासिक उद्देसन्तेवासिकसमानाचरियका पन याव निस्सयउद्देसा अनुपच्छिन्‍ना, ताव पटिजग्गितब्बा’’ति –

विभागेन वुत्तं। अयञ्‍च विभागो ‘‘तेनेव लक्खणेन निस्सयन्तेवासिकस्स आपत्ति वेदितब्बा’’ति एवं पाठे सति न युज्‍जेय्य। अयञ्हि पाठो सद्धिविहारिकस्स विय निस्सयन्तेवासिकस्सपि यथावुत्तवत्तं अकरोन्तस्स निस्सयमुत्तकस्स अमुत्तकस्सपि आपत्तीति इममत्थं दीपेति, तस्मा वुत्तनयेनेवेत्थ पाठो गहेतब्बो।

पब्बज्‍जउपसम्पदधम्मन्तेवासिकेहि पन…पे॰… ताव वत्तं कातब्बन्ति पब्बज्‍जाचरियउपसम्पदाचरियधम्माचरियानं

एतेहि यथावुत्तवत्तं कातब्बं। तत्थ येन सिक्खापदानि दिन्‍नानि, अयं पब्बज्‍जाचरियो। येन उपसम्पदकम्मवाचा वुत्ता, अयं उपसम्पदाचरियो। यो उद्देसं परिपुच्छं वा देति, अयं धम्माचरियोति वेदितब्बं। सेसमेत्थ उत्तानमेव।

पणामनाखमापनाकथावण्णना निट्ठिता।

निस्सयपटिप्पस्सद्धिकथावण्णना

८३.निस्सयपटिप्पस्सद्धिकथायं दिसं गतोति पुन आगन्तुकामो अनागन्तुकामो वा हुत्वा वासत्थाय कञ्‍चि दिसं गतो। भिक्खुनो सभागतन्ति पेसलभावं। ओलोकेत्वाति उपपरिक्खित्वा। विब्भन्ते…पे॰… तत्थ गन्तब्बन्ति एत्थ सचे केनचि करणीयेन तदहेव गन्तुं असक्‍कोन्तो कतिपाहेन गमिस्सामीति गमने सउस्साहो होति, रक्खतीति वदन्ति। मा इध पटिक्‍कमीति मा इध पविसि। तत्रेव वसितब्बन्ति तत्थेव निस्सयं गहेत्वा वसितब्बं। तंयेव विहारं…पे॰… वसितुं वट्टतीति एत्थ उपज्झायेन परिच्‍चत्तत्ता उपज्झायसमोधानपरिहारो नत्थि, तस्मा उपज्झायेन समोधानगतस्सपि आचरियस्स सन्तिके गहितनिस्सयो न पटिप्पस्सम्भति।

आचरियम्हानिस्सयपटिप्पस्सद्धीसु आचरियो पक्‍कन्तो वा होतीति एत्थ ‘‘पक्‍कन्तोति दिसं गतो’’तिआदिना उपज्झायस्स पक्‍कमने यो विनिच्छयो वुत्तो, सो तत्थ वुत्तनयेनेव इधापि सक्‍का विञ्‍ञातुन्ति तं अवत्वा ‘‘कोचि आचरियो आपुच्छित्वा पक्‍कमती’’तिआदिना अञ्‍ञोयेव नयो आरद्धो, अयञ्‍च नयो उपज्झायपक्‍कमनेपि वेदितब्बोयेव। ईदिसेसु हि ठानेसु एकत्थ वुत्तलक्खणं अञ्‍ञत्थापि दट्ठब्बं। सचे द्वे लेड्डुपाते अतिक्‍कमित्वा निवत्तति, पटिप्पस्सद्धो होतीति एत्थ एत्तावता दिसापक्‍कन्तो नाम होतीति अन्तेवासिके अनिक्खित्तधुरेपि निस्सयो पटिप्पस्सम्भति। आचरियुपज्झाया द्वे लेड्डुपाते अतिक्‍कम्म अञ्‍ञस्मिं विहारे वसन्तीति बहिउपचारसीमायं अन्तेवासिकसद्धिविहारिकानं वसनट्ठानतो द्वे लेड्डुपाते अतिक्‍कम्म अञ्‍ञस्मिं सेनासने वसन्ति, अन्तोउपचारसीमायं पन द्वे लेड्डुपाते अतिक्‍कमित्वापि वसतो निस्सयो न पटिप्पस्सम्भति। ‘‘सचेपि आचरियो मुञ्‍चितुकामोव हुत्वा निस्सयपणामनाय पणामेती’’तिआदि सब्बं उपज्झायस्स आणत्तियम्पि वेदितब्बं। सेसमेत्थ उत्तानमेव।

निस्सयपटिप्पस्सद्धिकथावण्णना निट्ठिता।

उपसम्पादेतब्बपञ्‍चककथावण्णना

८४.पञ्‍चहि, भिक्खवे, अङ्गेहि समन्‍नागतेनातिआदीसु न सामणेरो उपट्ठापेतब्बोति उपज्झायेन हुत्वा सामणेरो न गहेतब्बो। अयमत्थो अङ्गुत्तरनिकायट्ठकथायं (अ॰ नि॰ अट्ठ॰ ३.५.२५१-२५३) वुत्तोयेव।

‘‘अत्तानमेव पठमं, पतिरूपे निवेसये।

अथञ्‍ञमनुसासेय्य, न किलिस्सेय्य पण्डितो’’ति॥ (ध॰ प॰ १५८) –

इमस्स अनुरूपवसेन पठमं ताव अत्तसम्पत्तियं नियोजेतुं ‘‘न असेक्खेन सीलक्खन्धेना’’तिआदि वुत्तं, न आपत्तिअङ्गवसेन। तत्थ असेक्खेन सीलक्खन्धेनाति असेक्खस्स सीलक्खन्धो असेक्खो सीलक्खन्धो नाम। असेक्खस्स अयन्ति हि असेक्खो, सीलक्खन्धो। एवं सब्बत्थ। एवञ्‍च कत्वा विमुत्तिञाणदस्सनसङ्खातस्स पच्‍चवेक्खणञाणस्सपि असेक्खता उपपन्‍ना। असेक्खसीलन्ति च न मग्गफलमेव अधिप्पेतं, अथ खो यंकिञ्‍चि असेक्खसन्ताने पवत्तसीलं लोकियलोकुत्तरमिस्सकस्स सीलस्स इधाधिप्पेतत्ता। समाधिक्खन्धादीसुपि विमुत्तिक्खन्धपरियोसानेसु अयमेव नयो। तस्मा यथा सीलसमाधिपञ्‍ञक्खन्धा मिस्सका अधिप्पेता, एवं विमुत्तिक्खन्धोपीति तदङ्गविमुत्तिआदयोपि वेदितब्बा, न पटिप्पस्सद्धिविमुत्ति एव। विमुत्तिञाणदस्सनं पन लोकियमेव। तेनेव संयुत्तनिकायट्ठकथायं (सं॰ नि॰ अट्ठ॰ १.१.१३५) वुत्तं ‘‘पुरिमेहि चतूहि पदेहि लोकियलोकुत्तरसीलसमाधिपञ्‍ञाविमुत्तियो कथिता, विमुत्तिञाणदस्सनं पच्‍चवेक्खणञाणं होति, तं लोकियमेवा’’ति।

अस्सद्धोतिआदीसु तीसु वत्थूसु सद्धा एतस्स नत्थीति अस्सद्धो। सुक्‍कपक्खे सद्दहतीति सद्धो, सद्धा वा एतस्स अत्थीतिपि सद्धो। नत्थि एतस्स हिरीति अहिरिको, अकुसलसमापत्तिया अजिगुच्छमानस्सेतं अधिवचनं। हिरी एतस्स अत्थीति हिरिमा। न ओत्तप्पतीति अनोत्तप्पी, अकुसलसमापत्तिया न भायतीति वुत्तं होति। तब्बिपरीतो ओत्तप्पी। कुच्छितं सीदतीति कुसीतो, हीनवीरियस्सेतं अधिवचनं। आरद्धं वीरियं एतस्साति आरद्धवीरियो, सम्मप्पधानयुत्तस्सेतं अधिवचनं। मुट्ठा सति एतस्साति मुट्ठस्सति, नट्ठस्सतीति वुत्तं होति। उपट्ठिता सति एतस्साति उपट्ठितस्सति, निच्‍चं आरम्मणाभिमुखप्पवत्तसतिस्सेतं अधिवचनं।

अधिसीलेसीलविपन्‍नो च अज्झाचारे आचारविपन्‍नो च आपज्‍जित्वा अवुट्ठितो। सस्सतुच्छेदसङ्खातं अन्तं गण्हाति गाहयतीति वा अन्तग्गाहिका, मिच्छादिट्ठि। पुरिमानि द्वे पदानीति ‘‘न पटिबलो होति अन्तेवासिं वा सद्धिविहारिं वा गिलानं उपट्ठातुं वा उपट्ठापेतुं वा, अनभिरतं वूपकासेतुं वा वूपकासापेतुं वा’’ति इमानि द्वे पदानि।

अञ्‍ञतित्थियपुब्बवत्थुकथावण्णना

८६.अञ्‍ञतित्थियवत्थुम्हि आजीवको अचेलकोति दुविधो नग्गपरिब्बाजकोति आह ‘‘नग्गपरिब्बाजकस्सेव आजीवकस्स वा’’तिआदि। तत्थ आजीवको उपरि एकमेव वत्थं उपकच्छके पवेसेत्वा परिदहति, हेट्ठा नग्गो। अचेलको सब्बेन सब्बं नग्गोयेव।

पञ्‍चाबाधवत्थुकथावण्णना

८८.पञ्‍चाबाधवत्थुम्हि नखपिट्ठिप्पमाणन्ति एत्थ ‘‘कनिट्ठङ्गुलिनखपिट्ठि अधिप्पेता’’ति तीसुपि गण्ठिपदेसु वुत्तं। ‘‘तञ्‍चे नखपिट्ठिप्पमाणम्पि वड्ढनकपक्खे ठितंहोति, न पब्बाजेतब्बो’’ति इमिना सामञ्‍ञतो लक्खणं दस्सितं, तस्मा यत्थ कत्थचि सरीरावयवेसु नखपिट्ठिप्पमाणं वड्ढनकपक्खे ठितञ्‍चे, न वट्टतीति सिद्धं। एवञ्‍च सति नखपिट्ठिप्पमाणम्पि अवड्ढनकपक्खे ठितञ्‍चे, सब्बत्थ वट्टतीति आपन्‍नं, तञ्‍च न सामञ्‍ञतो अधिप्पेतन्ति पदेसविसेसेयेव नियमेत्वा दस्सेन्तो ‘‘सचे पना’’तिआदिमाह। सचे हि अविसेसेन नखपिट्ठिप्पमाणं अवड्ढनकपक्खे ठितं वट्टेय्य, ‘‘निवासनपारुपनेहि पकतिपअच्छन्‍ने ठाने’’ति पदेसनियमं न करेय्य, तस्मा निवासनपारुपनेहि पकतिपटिच्छन्‍नट्ठानतो अञ्‍ञत्थ नखपिट्ठिप्पमाणं अवड्ढनकपक्खे ठितम्पि न वट्टतीति सिद्धं, नखपिट्ठिप्पमाणतो खुद्दकतरं पन अवड्ढनकपक्खे वड्ढनकपक्खे वा ठितं होतु, वट्टति नखपिट्ठिप्पमाणतो खुद्दकतरस्स वड्ढनकपक्खे अवड्ढनकपक्खे वा ठितस्स मुखादीसुयेव पटिक्खित्तत्ता।

गण्डेपि इमिनाव नयेन विनिच्छयो वेदितब्बो। तत्थ पन मुखादीसु कोलट्ठिमत्ततो खुद्दकतरोपि गण्डो न वट्टतीति विसुं न दस्सितो। ‘‘मुखादिके अप्पटिच्छन्‍नट्ठाने अवड्ढनकपक्खे ठितोपि न वट्टती’’ति एत्तकमेव हि तत्थ वुत्तं, तथापि कुट्ठे वुत्तनयेन मुखादीसु कोलट्ठिप्पमाणतो खुद्दकतरोपि गण्डो न वट्टतीति विञ्‍ञायति, तस्मा अवड्ढनकपक्खे ठितोपीति एत्थ पि-सद्दो अवुत्तसम्पिण्डनत्थो। तेन कोलट्ठिमत्ततो खुद्दकतरोपि न वट्टतीति अयमत्थो दस्सितोयेवाति अयमम्हाकं खन्ति। पकतिवण्णे जातेति रोगहेतुकस्स विकारवण्णस्स अभावं सन्धाय वुत्तं। कोलट्ठिमत्तकोति बदरट्ठिप्पमाणो। सुछविं कारेत्वाति सञ्‍जातछविं कारेत्वा। ‘‘सञ्छविं कारेत्वा’’तिपि पाठो, विज्‍जमानछविं कारेत्वाति अत्थो। पदुमपुण्डरीकपत्तवण्णन्ति रत्तपदुमसेतपदुमवसेन पदुमपत्तवण्णं। सोसब्याधीति खयरोगो।

पञ्‍चाबाधवत्थुकथावण्णना निट्ठिता।

राजभटादिवत्थुकथावण्णना

९०-९६.राजभटादिवत्थूसु आहंसूति मनुस्सा वदिंसु। तस्मा…पे॰… एवमाहाति यस्मा सयं धम्मस्सामी, तस्मा भिक्खूहि अपब्बाजितब्बं चोरं अङ्गुलिमालं पब्बाजेत्वा आयतिं अकरणत्थाय भिक्खूनं सिक्खापदं पञ्‍ञपेन्तो ‘‘न, भिक्खवे, धजबन्धो चोरो पब्बाजेतब्बो, यो पब्बाजेय्य, आपत्ति दुक्‍कटस्सा’’ति आह। उपरमन्तीति विरमन्ति निवत्तन्ति। भिन्दित्वाति अन्दुबन्धनं भिन्दित्वा। छिन्दित्वाति सङ्खलिकबन्धनं छिन्दित्वा। मुञ्‍चित्वाति रज्‍जुबन्धनं मुञ्‍चित्वा। विवरित्वाति गामबन्धनादीसु गामद्वारादीनि विवरित्वा। अपस्समानानं वा पलायतीति पुरिसगुत्तियं पुरिसानं अपस्समानानं पलायति। उपड्ढुपड्ढन्ति थोकं थोकं।

निस्सयमुच्‍चनककथावण्णना

१०३.निस्सयमुच्‍चनकस्स वत्तेसु पञ्‍चकछक्‍केसु पन उभयानि खो पन…पे॰… अनुब्यञ्‍जनसोति एत्थ ‘‘सब्बोपि चायं पभेदो मातिकाट्ठकथायं ञातायं ञातो होती’’ति तीसुपि गण्ठिपदेसु वुत्तं। आपत्तिं जानातीतिआदीसु च ‘‘पाठे अवत्तमानेपि ‘इदं नाम कत्वा इदं आपज्‍जती’ति जानाति चे, वट्टती’’ति तत्थेव वुत्तं। तञ्‍च खो पुब्बे पाठे पगुणे कतेति गहेतब्बन्ति च आचरियुपज्झायानम्पि एसेव नयोति च केचि वदन्ति। सेसमेत्थ उत्तानमेव।

निस्सयमुच्‍चनककथावण्णना निट्ठिता।

राहुलवत्थुकथावण्णना

१०५.राहुलवत्थुम्हि तत्थेव विहरिंसूति सब्बेपि ते अरहत्तं पत्तकालतो पट्ठाय अरिया नाम मज्झत्ताव होन्तीति रञ्‍ञो पहितसासनं दसबलस्स अनारोचेत्वाव तत्थ विहरिंसु। एकदिवसं जातं काळुदायिं नाम अमच्‍चन्ति अयं किर (अ॰ नि॰ अट्ठ॰ १.१.२२५) पदुमुत्तरबुद्धकाले हंसवतीनगरे कुलगेहे निब्बत्तो सत्थु धम्मदेसनं सुणन्तो सत्थारं एकं भिक्खुं कुलप्पसादकानं अग्गट्ठाने ठपेन्तं दिस्वा अधिकारकम्मं कत्वा तं ठानन्तरं पत्थेसि। सो यावजीवं कुसलं कत्वा देवमनुस्सेसु संसरन्तो अम्हाकं बोधिसत्तस्स मातुकुच्छियं पटिसन्धिग्गहणदिवसे कपिलवत्थुस्मिंयेव अमच्‍चगेहे पटिसन्धिं गण्हि। जातदिवसे बोधिसत्तेन सद्धिंयेव जातोति तं दिवसंयेव दुकूलचुम्बटके निपज्‍जापेत्वा बोधिसत्तस्स उपट्ठानत्थाय नयिंसु। बोधिसत्तेन हि सद्धिं बोधिरुक्खो राहुलमाता चतस्सो निधिकुम्भियो आरोहनियहत्थी कण्डको छन्‍नो काळुदायीति इमे सत्त एकदिवसे जातत्ता सहजाता नाम अहेसुं। अथस्स नामग्गहणदिवसे सकलनगरस्स उदग्गचित्तदिवसे जातोति उदायीत्वेव नामं अकंसु। थोकं काळधातुकत्ता पन काळुदायी नाम जातो। सो बोधिसत्तेन सद्धिं कुमारकीळं कीळन्तो वुद्धिं अगमासि।

सट्ठिमत्ताहिगाथाहीति –

‘‘अङ्गारिनो दानि दुमा भदन्ते।

फलेसिनो छदनं विप्पहाय।

ते अच्‍चिमन्तोव पभासयन्ति।

समयो महावीर भागीरसानं॥ (थेरगा॰ ५२७)

‘‘नातिसीतं नातिउण्हं, नातिदुब्भिक्खछातकं।

सद्दला हरिता भूमि, एस कालो महामुनी’’ति॥ –

आदिकाहि सट्ठिमत्ताहि गाथाहि। ‘‘पोक्खरवस्सन्ति पोक्खरपत्तवण्णमुदक’’न्ति गण्ठिपदेसु वुत्तं। पोक्खरपत्तप्पमाणं मज्झे उट्ठहित्वा अनुक्‍कमेन सतपटलं सहस्सपटलं हुत्वा वस्सनकवस्सन्तिपि वदन्ति। तस्मिं किर वस्सन्ते तेमेतुकामाव तेमेन्ति, न इतरे। एकोपि राजा वा…पे॰… गतो नत्थीति धम्मदेसनं सुत्वा पक्‍कन्तेसु ञातीसु एकोपि राजा वा राजमहामत्तो वा ‘‘स्वे अम्हाकं भिक्खं गण्हथा’’ति निमन्तेत्वा गतो नत्थि। पितापिस्स सुद्धोदनमहाराजा ‘‘मय्हं पुत्तो मम गेहं अनागन्त्वा कहं गमिस्सती’’ति अनिमन्तेत्वाव अगमासि, गन्त्वा पन गेहे वीसतिया भिक्खुसहस्सानं यागुआदीनि पटियादापेत्वा आसनानि पञ्‍ञापेसि।

सिक्खापददण्डकम्मवत्थुकथावण्णना

१०६.अनुजानामि, भिक्खवे, सामणेरानं दस सिक्खापदानीतिआदीसु सिक्खितब्बानि पदानि सिक्खापदानि, सिक्खाकोट्ठासाति अत्थो। सिक्खाय वा पदानि सिक्खापदानि, अधिसीलअधिचित्तअधिपञ्‍ञासिक्खाय अधिगमुपायाति अत्थो। अत्थतो पन कामावचरकुसलचित्तसम्पयुत्ता विरतियो, तंसम्पयुत्तधम्मा पनेत्थ तग्गहणेनेव गहेतब्बा। सरसेनेव पतनसभावस्स अन्तरा एव अतिपातनं अतिपातो, सणिकं पतितुं अदत्वा सीघं पातनन्ति अत्थो। अतिक्‍कम्म वा सत्थादीहि अभिभवित्वा पातनं अतिपातो, पाणस्स अतिपातो पाणातिपातो, पाणवधो पाणघातोति वुत्तं होति। पाणोति चेत्थ वोहारतो सत्तो, परमत्थतो जीवितिन्द्रियं। तस्मिं पन पाणे पाणसञ्‍ञिनो जीवितिन्द्रियुपच्छेदकउपक्‍कमसमुट्ठापिका कायवचीद्वारानं अञ्‍ञतरप्पवत्ता वधकचेतना पाणातिपातो, ततो पाणातिपाता।

वेरमणीति वेरहेतुताय वेरसञ्‍ञितं पाणातिपातादिपापधम्मं मणति, ‘‘मयि इध ठिताय कथमागच्छसी’’ति वा तज्‍जेन्ती विय नीहरतीति वेरमणी। विरमति एतायाति वा विरमणीति वत्तब्बे निरुत्तिनयेन ‘‘वेरमणी’’ति वुत्तं। अत्थतो पन वेरमणीति कामावचरकुसलचित्तसम्पयुत्ता विरतियो। सा ‘‘पाणातिपातादिं विरमन्तस्स या तस्मिं समये पाणातिपाता आरति विरति पटिविरति वेरमणी अकिरिया अकरणं अनज्झापत्ति वेलानतिक्‍कमो सेतुघातो’’ति एवमादिना नयेन विभङ्गे (विभ॰ ७०४) वुत्ता। कामञ्‍चेसा वेरमणी नाम लोकुत्तरापि अत्थि, इध पन समादानवसप्पवत्ता विरति अधिप्पेताति लोकुत्तराय विरतिया समादानवसेन पवत्तिअसम्भवतो कामावचरकुसलचित्तसम्पयुत्ता विरतियो गहेतब्बा।

अदिन्‍नादाना वेरमणीतिआदीसु अदिन्‍नस्स आदानं अदिन्‍नादानं, परस्सहरणं, थेय्यं चोरिकाति वुत्तं होति। तत्थ अदिन्‍नन्ति परपरिग्गहितं। यत्थ परो यथाकामकारितं आपज्‍जन्तो अदण्डारहो अनुपवज्‍जो च होति, तस्मिं पन परपरिग्गहिते परपरिग्गहितसअञनो तदादायकउपक्‍कमसमुट्ठापिका थेय्यचेतना अदिन्‍नादानं।

अब्रह्मचरियं नाम असेट्ठचरियं द्वयंद्वयसमापत्ति। सा हि ‘‘अप्पस्सादा कामा बहुदुक्खा बहुपायासा, आदीनवो एत्थ भिय्यो’’तिआदिना (म॰ नि॰ १.१७७; २.४२) हीळितत्ता असेट्ठा अप्पसत्था चरियाति वा असेट्ठानं निहीनानं इत्थिपुरिसानं चरियाति वा असेट्ठचरियं, असेट्ठचरियत्ता अब्रह्मचरियन्ति च वुच्‍चति , अत्थतो पन असद्धम्मसेवनाधिप्पायेन कायद्वारप्पवत्ता मग्गेनमग्गप्पटिपत्तिसमुट्ठापिका चेतना अब्रह्मचरियं।

मुसाति अभूतं अतच्छं वत्थु, वादोति तस्स भूततो तच्छतो विञ्‍ञापनं। लक्खणतो पन अतथं वत्थुं तथतो परं विञ्‍ञापेतुकामस्स तथाविञ्‍ञत्तिसमुट्ठापिका चेतना मुसावादो मुसा वदीयति वुच्‍चति एतायाति कत्वा।

सुरामेरयमज्‍जप्पमादट्ठानाति एत्थ सुराति पूवसुरा पिट्ठसुरा ओदनसुरा किण्णपक्खित्ता सम्भारसंयुत्ताति पञ्‍च सुरा। मेरयन्ति पुप्फासवो फलासवो मध्वासवो गुळासवो सम्भारसंयुत्तोति पञ्‍च आसवा। तत्थ पूवे भाजने पक्खिपित्वा तज्‍जं उदकं दत्वा मद्दित्वा कता पूवसुरा। एवं सेससुरापि। किण्णाति पन तस्सा सुराय बीजं वुच्‍चति, ये सुरामोदकाति वुच्‍चन्ति, ते पक्खिपित्वा कता किण्णपक्खित्ता। हरीतकीसासपादिनानासम्भारेहि संयोजिता सम्भारसंयुत्ता। मधुकतालनाळिकेरादिपुप्फरसो चिरपरिवासितो पुप्फासवो। पनसादिफलरसो फलासवो। मुद्दिकारसो मध्वासवो। उच्छुरसो गुळासवो। हरीतकआमलककटुकभण्डादिनानासम्भारानं रसो चिरपरिवासितो सम्भारसंयुत्तो। तं सब्बम्पि मदकरणवसेन मज्‍जं पिवन्तं मदयतीति कत्वा। पमादट्ठानन्ति पमादकारणं। याय चेतनाय तं मज्‍जं पिवन्ति, तस्सा एतं अधिवचनं। सुरामेरयमज्‍जे पमादट्ठानं सुरामेरयमज्‍जप्पमादट्ठानं, तस्मा सुरामेरयमज्‍जप्पमादट्ठाना।

अनापुच्छावरणवत्थुआदिकथावण्णना

१०८.दण्डकम्ममस्स करोथाति अस्स दण्डकम्मं योजेथ आणापेथ। दण्डकम्मन्ति वा निग्गहकम्मं, तस्मा निग्गहमस्स करोथाति वुत्तं होति। एस नयो सब्बत्थ ईदिसेसु ठानेसु। सेनासनग्गाहो च पटिप्पस्सम्भतीति इमिना च छिन्‍नवस्सो च होतीति दीपेति। सचे आकिण्णदोसोव होति, आयतिं संवरे न तिट्ठति, निक्‍कड्ढितब्बोति एत्थ सचे यावततियं वुच्‍चमानो न ओरमति, सङ्घं अपलोकेत्वा नासेतब्बो। पुन पब्बज्‍जं याचमानोपि अपलोकेत्वा पब्बाजेतब्बोति वदन्ति। पच्छिमिकाय वस्सावासिकं लच्छतीति पच्छिमिकाय पुन वस्सं उपगतत्ता लच्छति। अपलोकेत्वा लाभो दातब्बोति छिन्‍नवस्सताय वुत्तं। इतरानि पञ्‍च सिक्खापदानीति विकालभोजनादीनि पञ्‍च। अच्‍चयं देसापेतब्बोति ‘‘अच्‍चयो मं, भन्ते, अच्‍चगमा’’तिआदिना नयेन देसापेतब्बो।

अनापुच्छावरणवत्थुआदिकथावण्णना निट्ठिता।

पण्डकवत्थुकथावण्णना

१०९.पण्डकवत्थुम्हि ‘‘यो काळपक्खे इत्थी होति, जुण्हपक्खे पुरिसो, अयं पक्खपण्डको’’ति केचि वदन्ति, अट्ठकथायं पन ‘‘काळपक्खे पण्डको होति, जुण्हपक्खे पनस्स परिळाहो वूपसम्मती’’ति अपण्डकपक्खे परिळाहवूपसमस्सेव वुत्तत्ता पण्डकपक्खे उस्सन्‍नपरिळाहता पण्डकभावापत्तीति विञ्‍ञायति, तस्मा इदमेवेत्थ सारतो पच्‍चेतब्बं। इत्थिभावो पुम्भावो वा नत्थि एतस्साति अभावको। तस्मिं येवस्स पक्खे पब्बज्‍जा वारिताति एत्थ ‘‘अपण्डकपक्खे पब्बाजेत्वा पण्डकपक्खे नासेतब्बो’’ति तीसुपि गण्ठिपदेसु वुत्तं। केचि पन ‘‘अपण्डकपक्खे पब्बजितो सचे किलेसक्खयं पापुणाति, न नासेतब्बो’’ति वदन्ति, तं तेसं मतिमत्तं पण्डकस्स किलेसक्खयासम्भवतो खीणकिलेसस्स च पण्डकभावानुपपत्तितो। अहेतुकपटिसन्धिकथायञ्हि अविसेसेन पण्डकस्स अहेतुकपटिसन्धिता वुत्ता। आसित्तउसूयपक्खपण्डकानञ्‍च पटिसन्धितो पट्ठायेव पण्डकसभावो, न पवत्तियंयेवाति वदन्ति। तेनेव अहेतुकपटिसन्धिनिद्देसे जच्‍चन्धबधिरादयो विय पण्डको जातिसद्देन विसेसेत्वा न निद्दिट्ठो। इधापि चतुत्थपाराजिकसंवण्णनायं (पारा॰ अट्ठ॰ २.२३३) ‘‘अभब्बपुग्गले दस्सेन्तेन पण्डकतिरच्छानगतउभतोब्यञ्‍जनका तयो वत्थुविपन्‍ना अहेतुकपटिसन्धिका, तेसं सग्गो अवारितो, मग्गो पन वारितो’’ति अविसेसेन वुत्तं।

पण्डकवत्थुकथावण्णना निट्ठिता।

थेय्यसंवासकवत्थुकथावण्णना

११०.थेय्यसंवासकवत्थुम्हि कोलञ्‍ञाति मातुवंसे पितुवंसे च जाता मातापितुप्पभुतिसब्बञातयो। थेय्याय संवासो एतस्साति थेय्यसंवासको। सो च न संवासमत्तस्सेव थेनको इधाधिप्पेतो, अथ खो लिङ्गस्स तदुभयस्स च थेनकोपीति आह ‘‘तयो थेय्यसंवासका’’तिआदि। न यथावुड्ढं वन्दनं सादियतीति यथावुड्ढं भिक्खूनं वा सामणेरानं वा वन्दनं न सादियति। यथावुड्ढं वन्दनं सादियतीति अत्तना मुसावादं कत्वा दस्सितवस्सानुरूपं यथावुड्ढं वन्दनं सादियति। भिक्खुवस्सगणनादिकोति इमिना न एककम्मादिकोव इध संवासो नामाति दस्सेति।

राज…पे॰… भयेनाति एत्थ भय-सद्दो पच्‍चेकं योजेतब्बो ‘‘राजभयेन दुब्भिक्खभयेना’’तिआदिना । संवासं नाधिवासेति, याव सो सुद्धमानसोति राजभयादीहि गहितलिङ्गताय सो सुद्धमानसो याव संवासं नाधिवासेतीति अत्थो। यो हि राजभयादिं विना केवलं भिक्खू वञ्‍चेत्वा तेहि सद्धिं संवसितुकामताय लिङ्गं गण्हाति, सो असुद्धचित्तताय लिङ्गग्गहणेनेव थेय्यसंवासको नाम होति। अयं पन तादिसेन असुद्धचित्तेन भिक्खू वञ्‍चेतुकामताय अभावतो याव संवासं नाधिवासेति, ताव थेय्यसंवासको नाम न होति। तेनेव ‘‘राजभयादीहि गहितलिङ्गानं ‘गिही मं समणोति जानन्तू’ति वञ्‍चनाचित्ते सतिपि भिक्खूनं वञ्‍चेतुकामताय अभावा दोसो न जातो’’ति तीसुपि गण्ठिपदेसु वुत्तं। केचि पन ‘‘वूपसन्तभयता इध सुद्धचित्तता’’ति वदन्ति, एवञ्‍च सति सो वूपसन्तभयो याव संवासं नाधिवासेति, ताव थेय्यसंवासको न होतीति अयमत्थो विञ्‍ञायति। इमस्मिञ्‍च अत्थे विञ्‍ञायमाने अवूपसन्तभयस्स संवाससादियनेपि थेय्यसंवासकता न होतीति आपज्‍जेय्य, न च अट्ठकथायं अवूपसन्तभयस्स संवाससादियनेपि अथेय्यसंवासकता दस्सिता। सब्बपासण्डियभत्तानि भुञ्‍जन्तोति च इमिना अवूपसन्ततयेनपि संवासं असादियन्तेनेव वसितब्बन्ति दीपेति। तेनेव तीसुपि गण्ठिपदेसु वुत्तं ‘‘यस्मा विहारं आगन्त्वा सङ्घिकं गण्हन्तस्स संवासं परिहरितुं दुक्‍करं, तस्मा सब्बपासण्डियभत्तानि भुञ्‍जन्तोति इदं वुत्त’’न्ति, तस्मा राजभयादीहि गहितलिङ्गतायेवेत्थ सुद्धचित्तताति गहेतब्बं।

सब्बपासण्डियभत्तानीति सब्बसामयिकानं साधारणं कत्वा वीथिचतुक्‍कादीसु ठपेत्वा दातब्बभत्तानि। कायपरिहारियानीति कायेन परिहरितब्बानि। अब्भुग्गच्छन्तीति अभिमुखं गच्छन्ति। कम्मन्तानुट्ठानेनाति कसिगोरक्खादिकम्मकरणेन। तदेव पत्तचीवरं आदाय विहारं गच्छतीति चीवरानि निवासनपारुपनवसेन आदाय पत्तञ्‍च अंसकूटे लग्गेत्वा विहारं गच्छति। नापि सयं जानातीति ‘‘यो एवं पब्बजति, सो थेय्यसंवासको नाम होती’’ति वा ‘‘एवं कातुं न लभती’’ति वा ‘‘एवं पब्बजितो समणो न होती’’ति वा न जानाति। यो एवं पब्बजति, सो थेय्यसंवासको नाम होतीति इदं पन निदस्सनमत्तं। अनुपसम्पन्‍नकालेयेवाति इमिना उपसम्पन्‍नकाले सुत्वा सचेपि नारोचेति, थेय्यसंवासको न होतीति दीपेति।

सिक्खं अप्पच्‍चक्खाय…पे॰… थेय्यसंवासको न होतीति इदं भिक्खूहि दिन्‍नलिङ्गस्स अपरिच्‍चत्तत्ता न लिङ्गथेनको होति, लिङ्गानुरूपस्स संवासस्स सादितत्ता नापि संवासथेनको होतीति वुत्तं। एको भिक्खु कासाये सउस्साहोव ओदातं निवासेत्वाति एत्थापि इदमेव कारणं दट्ठब्बं। परतो सामणेरो सलिङ्गे ठितोतिआदिना सामणेरस्स वुत्तविधानेसुपि अथेय्यसंवासकपक्खे अयमेव नयो। भिक्खुनियापि एसेव नयोति वुत्तमेवत्थं ‘‘सापि हि गिहिभावं पत्थयमाना’’तिआदिना विभावेति। यो कोचि वुड्ढपब्बजितोति सामणेरं सन्धाय वुत्तं। महापेळादीसूति एतेन गिहिसन्तकं दस्सितं। सयं सामणेरोव…पे॰… थेय्यसंवासको न होतीति एत्थ किञ्‍चापि थेय्यसंवासको न होति, पाराजिकं पन आपज्‍जतियेव। सेसमेत्थ उत्तानमेव।

तित्थियपक्‍कन्तककथावण्णना

तित्थियपक्‍कन्तककथायं तेसं लिङ्गे आदिन्‍नमत्ते तित्थियपक्‍कन्तको होतीति ‘‘तित्थियो भविस्सामी’’ति गतस्स लिङ्गग्गहणेनेव तेसं लद्धिपि गहितायेव होतीति कत्वा वुत्तं। केनचि पन ‘‘तेसं लिङ्गे आदिन्‍नमत्ते लद्धिया गहितायपि अग्गहितायपि तित्थियपक्‍कन्तको होती’’ति वुत्तं, तं न गहेतब्बं। न हि ‘‘तित्थियो भविस्सामी’’ति गतस्स लिङ्गसम्पटिच्छनतो अञ्‍ञं लद्धिग्गहणं नाम अत्थि। लिङ्गसम्पटिच्छनेनेव हि सो गहितलद्धिको होति। तेनेव ‘‘वीमंसनत्थं कुसचीरादीनि…पे॰… याव न सम्पटिच्छति, ताव तं लद्धि रक्खति। सम्पटिच्छितमत्ते तित्थियपक्‍कन्तको होती’’ति वुत्तं। नग्गोव आजीवकानं उपस्सयं गच्छति, पदवारे पदवारे दुक्‍कटन्ति ‘‘आजीवको भविस्स’’न्ति असुद्धचित्तेन गमनपच्‍चया दुक्‍कटं वुत्तं। नग्गेन हुत्वा गमनपच्‍चयापि दुक्‍कटा न मुच्‍चतियेव। कूटवस्सं गणेन्तोति कूटवस्सं गणेत्वा संवासं सादियन्तोति अधिप्पायो।

तित्थियपक्‍कन्तककथावण्णना निट्ठिता।

१११.तिरच्छानगतवत्थु उत्तानमेव।

मातुघातकादिवत्थुकथावण्णना

११२.मातुघातकादिवत्थूसु अपवाहनन्ति अपगमनं, पतिकरणन्ति अत्थो। यथा समानजातिकस्स विकोपने कम्मं गरुतरं, न तथा विजातिकस्साति आह ‘‘मनुस्सित्थिभूता’’ति । पुत्तसम्बन्धेन मातुपितुसमञ्‍ञा , दत्तकित्तिमादिवसेनपि पुत्तवोहारो लोके दिस्सति, सो च खो परियायतोति निप्परियायसिद्धतं दस्सेतुं ‘‘जनिका माता’’ति वुत्तं। यथा मनुस्सत्तभावे ठितस्सेव कुसलधम्मानं तिक्खविसदसूरभावापत्ति यथा तं तिण्णम्पि बोधिसत्तानं बोधित्तयनिब्बत्तियं, एवं मनुस्सत्तभावे ठितस्सेव अकुसलधम्मानम्पि तिक्खविसदसूरभावापत्तीति आह ‘‘सयम्पि मनुस्सजातिकेनेवा’’ति। चुतिअनन्तरं फलं अनन्तरं नाम, तस्मिं अनन्तरे नियुत्तं, तंनिब्बत्तनेन अनन्तरकरणसीलं, अनन्तरपयोजनं वा आनन्तरियं, तेन आनन्तरियेन मातुघातककम्मेन। पितुघातकेपि येन मनुस्सभूतो जनको पिता सयम्पि मनुस्सजातिकेनेव सता सञ्‍चिच्‍च जीविता वोरोपितो, अयं आनन्तरियेन पितुघातककम्मेन पितुघातकोतिआदिना सब्बं वेदितब्बन्ति आह ‘‘पितुघातकेपि एसेव नयो’’ति।

परिवत्तितलिङ्गम्पि (म॰ नि॰ अट्ठ॰ ३.१२८; अ॰ नि॰ अट्ठ॰ १.१.२७५; विभ॰ अट्ठ॰ ८०९) मातरं पितरं वा जीविता वोरोपेन्तस्स आनन्तरियकम्मं होतियेव। सतिपि हि लिङ्गपरिवत्ते सो एव एककम्मनिब्बत्तो भवङ्गप्पबन्धो जीवितिन्द्रियप्पबन्धो च, नाञ्‍ञोति। यो पन सयं मनुस्सो तिरच्छानभूतं मातरं वा पितरं वा, सयं वा तिरच्छानभूतो मनुस्सभूतं, तिरच्छानभूतोयेव वा तिरच्छानभूतं जीविता वोरोपेति, तस्स कम्मं आनन्तरियं न होति, भारियं पन होति, आनन्तरियं आहच्‍चेव तिट्ठति। एळकचतुक्‍कं सङ्गामचतुक्‍कं चोरचतुक्‍कञ्‍चेत्थ कथेतब्बं। ‘‘एळकं मारेमी’’ति अभिसन्धिनापि हि एळकट्ठाने ठितं मनुस्सो मनुस्सभूतं मातरं वा पितरं वा मारेन्तो आनन्तरियं फुसति मरणाधिप्पायेनेव आनन्तरियवत्थुनो विकोपितत्ता। एळकाभिसन्धिना पन मातापितिअअसन्धिना वा एळकं मारेन्तो आनन्तरियं न फुसति आनन्तरियवत्थुअभावतो। मातापितिअभिसन्धिना मातापितरो मारेन्तो फुसतेव। एस नयो इतरस्मिम्पि चतुक्‍कद्वये। यथा च मातापितूसु, एवं अरहन्तेपि एतानि चतुक्‍कानि वेदितब्बानि। सब्बत्थ हि पुरिमं अभिसन्धिचित्तं अप्पमाणं, वधकचित्तं पन तदारम्मणं जीवितिन्द्रियञ्‍च आनन्तरियानानन्तरभावे पमाणं। कतानन्तरियकम्मो च ‘‘तस्स कम्मस्स विपाकं पटिबाहिस्सामी’’ति सकलचक्‍कवाळं महाचेतियप्पमाणेहि कञ्‍चनथूपेहि पूरेत्वापि सकलचक्‍कवाळं पूरेत्वा निसिन्‍नस्स भिक्खुसङ्घस्स महादानं दत्वापि बुद्धस्स भगवतो सङ्घाटिकण्णं अमुञ्‍चन्तो विचरित्वापि कायस्स भेदा निरयमेव उपपज्‍जति, पब्बज्‍जञ्‍च न लभति।

उभतोब्यञ्‍जनकवत्थुकथावण्णना

११६.उभतोब्यञ्‍जनमस्स अत्थीति उभतोब्यञ्‍जनकोति इमिना असमानाधिकरणविसयो बाहिरत्थसमासोयं, पुरिमपदे च विभत्तिअलोपोति दस्सेति। ब्यञ्‍जनन्ति चेत्थ इत्थिनिमित्तं पुरिसनिमित्तञ्‍च अधिप्पेतं। अथ उभतोब्यञ्‍जनकस्स एकमेव इन्द्रियं, उदाहु द्वेति? एकमेव ‘‘यस्स इत्थिन्द्रियं उप्पज्‍जति, तस्स पुरिसिन्द्रियं उप्पज्‍जतीति? नो। यस्स वा पन पुरिसिन्द्रियं उप्पज्‍जति, तस्स इत्थिन्द्रियं उप्पज्‍जतीति? नो’’ति (यम॰ ३.इन्द्रिययमक.१८८) एकस्मिं सन्ताने इन्द्रियद्वयस्स पटिसिद्धत्ता, तञ्‍च खो इत्थिउभतोब्यञ्‍जनकस्स इत्थिन्द्रियं, पुरिसउभतोब्यञ्‍जनकस्स पुरिसिन्द्रियं। यदि एवं दुतियब्यञ्‍जनकस्स अभावो आपज्‍जति। इन्द्रियञ्हि ब्यञ्‍जनकारणं वुत्तं, तञ्‍च तस्स नत्थीति? वुच्‍चते – न तस्स इन्द्रियं दुतियब्यञ्‍जनकारणं। कस्मा? सदा अभावतो। इत्थिउभतोब्यञ्‍जनकस्स हि यदा इत्थिया रागचित्तं उप्पज्‍जति, तदा पुरिसब्यञ्‍जनं पाकटं होति, इत्थिब्यञ्‍जनं पटिच्छन्‍नं गुळ्हं होति, तथा इतरस्स इतरं। यदि च तेसं इन्द्रियं दुतियब्यञ्‍जनकारणं भवेय्य, सदापि ब्यञ्‍जनद्वयं तिट्ठेय्य, न पन तिट्ठति, तस्मा वेदितब्बमेतं ‘‘न तस्स तं ब्यञ्‍जनकारणं, कम्मसहायं पन रागचित्तमेवेत्थ कारण’’न्ति।

यस्मा चस्स एकमेव इन्द्रियं होति, तस्मा इत्थिउभतोब्यञ्‍जनको सयम्पि गब्भं गण्हाति, परम्पि गण्हापेति। पुरिसउभतोब्यञ्‍जनको परं गण्हापेति, सयं पन न गण्हाति। यदि पटिसन्धियं पुरिसलिङ्गं, यदि पटिसन्धियं इत्थिलिङ्गन्ति च पटिसन्धियं लिङ्गसब्भावो कुरुन्दियंवुत्तो, सो च अयुत्तो। पवत्तियंयेव हि इत्थिलिङ्गादीनि समुट्ठहन्ति, न पटिसन्धियं। पटिसन्धियं पन इन्द्रियमेव समुट्ठाति, न लिङ्गादीनि। न च इन्द्रियमेव लिङ्गन्ति सक्‍का वत्तुं इन्द्रियलिङ्गानं भिन्‍नसभावत्ता। वुत्तञ्हेतं अट्ठसालिनियं (ध॰ स॰ अट्ठ॰ ६३२) –

‘‘इत्थत्तं इत्थिभावोति उभयं एकत्थं, इत्थिसभावोति अत्थो। अयं कम्मजो पटिसन्धिसमुट्ठितो। इत्थिलिङ्गादि पन इत्थिन्द्रियं पटिच्‍च पवत्ते समुट्ठितं। यथा बीजे सति बीजं पटिच्‍च बीजपच्‍चया रुक्खो वड्ढित्वा साखाविटपसम्पन्‍नो हुत्वा आकासं पूरेत्वा तिट्ठति, एवमेव इत्थिभावसङ्खाते इत्थिन्द्रिये सति इत्थिलिङ्गादीनि होन्ति। बीजं विय हि इत्थिन्द्रियं, बीजं पटिच्‍च वड्ढित्वा आकासं पूरेत्वा ठितरुक्खो विय इत्थिन्द्रियं पटिच्‍च इत्थिलिङ्गादीनि पवत्ते समुट्ठहन्ति। तत्थ इत्थिन्द्रियं न चक्खुविञ्‍ञेय्यं, मनोविञ्‍ञेय्यमेव। इत्थिलिङ्गादीनि चक्खुविञ्‍ञेय्यानिपि मनोविञ्‍ञेय्यानिपी’’ति।

तेनेवाह ‘‘तत्थ विचारणक्‍कमो वित्थारतो अट्ठसालिनिया धम्मसङ्गहट्ठकथाय वेदितब्बो’’ति।

उभतोब्यञ्‍जनकवत्थुकथावण्णना निट्ठिता।

अनुपज्झायकादिवत्थुकथावण्णना

११७.सिक्खापदंअपञ्‍ञत्तं होतीति इधेव पञ्‍ञत्तं सिक्खापदं सन्धाय वुत्तं। उपज्झं अग्गाहापेत्वाति ‘‘उपज्झायो मे, भन्ते, होही’’ति एवं उपज्झं अग्गाहापेत्वा। कम्मवाचाय पन उपज्झायकित्तनं कतंयेवाति दट्ठब्बं। अञ्‍ञथा ‘‘पुग्गलं न परामसती’’ति वुत्तकम्मविपत्तिसम्भवतो कम्मं कुप्पेय्य, तेनेव ‘‘उपज्झायं अकित्तेत्वा’’ति अवत्वा ‘‘उपज्झं अग्गाहापेत्वा’’इच्‍चेव वुत्तं। यथा च अपरिपुण्णपत्तचीवरस्स उपसम्पादनकाले कम्मवाचाय ‘‘परिपुण्णस्स पत्तचीवर’’न्ति असन्तवत्थुं कित्तेत्वा कम्मवाचाय कतायपि उपसम्पदा रुहति, एवं ‘‘अयं बुद्धरक्खितो आयस्मतो धम्मरक्खितस्स उपसम्पदापेक्खो’’ति असन्तं पुग्गलं कित्तेत्वा केवलं सन्तपदनीहारेन कम्मवाचाय कताय उपसम्पदा रुहतियेवाति दट्ठब्बं। तेनेवाह ‘‘कम्मं पन न कुप्पती’’ति। ‘‘न, भिक्खवे, अनुपज्झायको उपसम्पादेतब्बो, यो उपसम्पादेय्य, आपत्ति दुक्‍कटस्सा’’ति एत्तकमेव वत्वा ‘‘सो च पुग्गलो अनुपसम्पन्‍नो’’ति अवुत्तत्ता कम्मविपत्तिलक्खणस्स च असम्भवतो ‘‘तं न गहेतब्ब’’न्ति वुत्तं। ‘‘पञ्‍चवग्गकरणञ्‍चे, भिक्खवे, कम्मं पण्डकपञ्‍चमो कम्मं करेय्य, अकम्मं न च करणीय’’न्तिआदिवचनतो (महाव॰ ३९०) पण्डकादीनम्पि उभतोब्यञ्‍जनकपरियन्तानं गणपूरकभावेयेव कम्मं कुप्पति, न अञ्‍ञथाति आह ‘‘उभतोब्यञ्‍जनकुपज्झायपरियोसानेसुपि एसेव नयो’’ति।

अनुपज्झायकादिवत्थुकथावण्णना निट्ठिता।

अपत्तकादिवत्थुकथावण्णना

११८.अञ्‍ञे वा भिक्खू दातुकामा होन्तीति सम्बन्धो। अनामट्ठपिण्डपातन्ति अग्गहितअग्गं पिण्डपातं। सामणेरभागसमको आमिसभागोति एत्थ किञ्‍चापि सामणेरानं आमिसभागस्स समकमेव दिय्यमानत्ता विसुं सामणेरभागो नाम नत्थि, हेट्ठा गच्छन्तं पन भत्तं कदाचि मन्दं भवेय्य, तस्मा उपरि अग्गहेत्वा सामणेरपाळियाव गहेत्वा दातब्बोति अधिप्पायो। नियतपब्बज्‍जस्सेव चायं भागो दीयति। तेनेव ‘‘अपक्‍कं पत्त’’न्तिआदि वुत्तं।

अपत्तकादिवत्थुकथावण्णना निट्ठिता।

हत्थच्छिन्‍नादिवत्थुकथावण्णना

११९.अजपदकेति अजपदसण्ठाने पदेसे। ब्रह्मुजुगत्तोति ब्रह्मा विय उजुगत्तो। अवसेसो सत्तोति इमिना लक्खणेन रहितसत्तो। एतेन ठपेत्वा महापुरिसं चक्‍कवत्तिञ्‍च इतरे सत्ता खुज्‍जपक्खिकाति दस्सेति। येभुय्येन हि सत्ता खन्धे कटियं जाणूसूति तीसु ठानेसु नमन्ति। ते कटियं नमन्ता पच्छतो नमन्ति, इतरेसु द्वीसु ठानेसु नमन्ता पुरतो नमन्ति। दीघसरीरा पन एकेन पस्सेन वङ्का होन्ति, एके मुखं उन्‍नामेत्वा नक्खत्तानि गणयन्ता विय चरन्ति, एके अप्पमंसलोहिता सूलसदिसा होन्ति, एके पुरतो पब्भारा होन्ति, पवेधमाना गच्छन्ति। परिवटुमोति समन्ततो वट्टलो।

अट्ठिसिराचम्मसरीरोति अट्ठिसिराचम्ममत्तसरीरो। कप्पसीसोति द्विधाभूतसीसो। केकरोति तिरियं पस्सन्तो। ‘‘उदकतारका नाम उदकपुब्बुळ’’न्ति गण्ठिपदेसु वुत्तं। अक्खितारकाति अक्खिभण्डका। निप्पखुमक्खीति अक्खिदललोमेहि विरहितअक्खिको। पखुम-सद्दो हि लोके अक्खिदललोमेसु निरुळ्हो। पटङ्गमण्डूको नाम महामुखमण्डूको। एळमुखोति निच्‍चपग्घरणकलालमुखो। सब्बञ्‍चेतन्ति ‘‘कच्छुगत्तो वा’’तिआदिं सन्धाय वदति। वातण्डिकोति अण्डकेसु वुद्धिरोगेन समन्‍नागतो। विकटोति तिरियं गमनपादेहि समन्‍नागतो, यस्स च चङ्कमतो जाणुका बहि गच्छन्ति। पण्होति पच्छतो परिवत्तपादेहि समन्‍नागतो, यस्स चङ्कमतो जाणुका अन्तो पविसन्ति।

कुदण्डपादताय कारणं विभावेति ‘‘मज्झे सङ्कुटितपादत्ता’’ति। अग्गे सङ्कुटितपादत्ताति कुण्डपादताय कारणनिदस्सनं। कुण्डपादस्सेव गमनसभावं विभावेति ‘‘पिट्ठिपादग्गेन चङ्कमन्तो’’ति। मम्मनन्ति खलितवचनं। यो एकमेव अक्खरं चतुपञ्‍चक्खत्तुं वदति, तस्सेतं अधिवचनं।

हत्थच्छिन्‍नादिवत्थुकथावण्णना निट्ठिता।

अलज्‍जीनिस्सयवत्थुकथावण्णना

१२०.निस्सयपटिसंयुत्तवत्थूसु भिक्खूहि समानो सीलादिगुणभागो अस्साति भिक्खुसभागो, तस्स भावो भिक्खुसभागता। द्वे तीणि दिवसानि वसित्वा गन्तुकामेन अनिस्सितेनवसितब्बन्ति एत्थ ‘‘याव भिक्खुसभागतं जानामी’’ति आभोगं विनापि अनिस्सितेन वसितुं वट्टतीति अधिप्पायो। भिक्खुसभागतं पन जानन्तो ‘‘स्वे गमिस्सामि, किं मे निस्सयेना’’ति अरुणं उट्ठपेतुं न लभति। ‘‘पुरारुणा उट्ठहित्वाव गमिस्सामी’’ति आभोगेन सयन्तस्स सचे अरुणो उग्गच्छति, वट्टति। ‘‘सत्ताहं वसिस्सामी’’ति आलयं करोन्तेन पन निस्सयो गहेतब्बोति ‘‘सत्ताहमत्तं वसिस्सामि, किं भिक्खुसभागताजाननेना’’ति जानने धुरं निक्खिपित्वा वसितुं न लभति, भिक्खुसभागतं उपपरिक्खित्वा निस्सयो गहेतब्बोति अत्थो।

गमिकादिनिस्सयवत्थुकथावण्णना

१२१.अन्तरामग्गे विस्समन्तो वा…पे॰… अनापत्तीति असति निस्सयदायके अनापत्ति। तस्स निस्सायाति पाळिअनुरूपतो वुत्तं, तं निस्सायाति अत्थो। सचे पन आसाळ्हीमासे…पे॰… तत्थ गन्तब्बन्ति एत्थ सचे सो वस्सूपनायिकाय आसन्‍नाय गन्तुकामो सुणाति ‘‘असुको महाथेरो आगमिस्सती’’ति, तञ्‍चे आगमेति, वट्टति। आगमेन्तस्सेव चे वस्सूपनायिकदिवसो होति, होतु, गन्तब्बं तत्थ, यत्थ निस्सयदायकं लभति। केचि पन ‘‘सचे सो गच्छन्तो जीवितन्तरायं ब्रह्मचरियन्तरायं वा पस्सति, तत्थेव वसितब्ब’’न्ति वदन्ति।

गोत्तेन अनुस्सावनानुजाननकथावण्णना

१२२.‘‘इत्थन्‍नामो इत्थन्‍नामस्स आयस्मतो’’ति नामकित्तनस्स अनुस्सावनाय आगतत्ता ‘‘नाहं उस्सहामि थेरस्स नामं गहेतु’’न्ति वुत्तं, ‘‘आयस्मतो पिप्पलिस्स उपसम्पदापेक्खो’’ति एवं नामं गहेतुं न उस्सहामीति अत्थो। ‘‘गोत्तेनपि अनुस्सावेतु’’न्ति वचनतो येन वोहारेन वोहरति, तेन वट्टतीति सिद्धं। ‘‘कोनामो ते उपज्झायो’’ति पुट्ठेनपि गोत्तमेव नामं कत्वा वत्तब्बन्ति सिद्धं होति, तस्मा चतुब्बिधेसु नामेसु येन केनचि नामेन अनुस्सावना कातब्बाति वदन्ति। एकस्स बहूनि नामानि होन्ति, तत्थ एकं नामं ञत्तिया, एकं अनुस्सावनाय कातुं न वट्टति, अत्थतो ब्यञ्‍जनतो च अभिन्‍नाहि अनुस्सावनाहि भवितब्बन्ति। किञ्‍चापि ‘‘इत्थन्‍नामो इत्थन्‍नामस्स आयस्मतो’’ति पाळियं ‘‘आयस्मतो’’ति पदं पच्छा वुत्तं, कम्मवाचापाळियं पन ‘‘अयं बुद्धरक्खितो आयस्मतो धम्मरक्खितस्सा’’ति पठमं लिखितन्ति तं उप्पटिपाटिया वुत्तन्ति न पच्‍चेतब्बं। पाळियञ्हि ‘‘इत्थन्‍नामो इत्थन्‍नामस्स आयस्मतो’’ति अत्थमत्तं दस्सितं, तस्मा पाळियं अवुत्तोपि ‘‘अयं बुद्धरक्खितो आयस्मतो धम्मरक्खितस्सा’’ति कम्मवाचापाळियं पयोगो दस्सितो। ‘‘न मे दिट्ठो इतो पुब्बे इच्‍चायस्मा सारिपुत्तो’’ति च ‘‘आयस्मा सारिपुत्तो अत्थकुसलो’’ति च पठमं ‘‘आयस्मा’’ति पयोगस्स दस्सनतोति वदन्ति। कत्थचि ‘‘आयस्मतो बुद्धरक्खितत्थेरस्सा’’ति वत्वा कत्थचि केवलं ‘‘बुद्धरक्खितस्सा’’ति सावेति, सावनं हापेतीति न वुच्‍चति नामस्स अहापितत्ताति एके। सचे कत्थचि ‘‘आयस्मतो बुद्धरक्खितस्सा’’ति वत्वा कत्थचि ‘‘बुद्धरअखतस्सायस्मतो’’ति सावेति, पाठानुरूपत्ता खेत्तमेव ओतिण्णन्तिपि एके। ब्यञ्‍जनभेदप्पसङ्गतो अनुस्सावनानं तं न वट्टतीति वदन्ति। सचे पन सब्बट्ठानेपि एतेनेव पकारेन वदति, वट्टति।

द्वेउपसम्पदापेक्खादिवत्थुकथावण्णना

१२३.एकानुस्सावनेति एत्थ एकतो अनुस्सावनं एतेसन्ति एकानुस्सावनाति असमानाधिकरणविसयो बाहिरत्थसमासोति दट्ठब्बं। तेनेवाह ‘‘द्वे एकतोअनुस्सावने’’ति। तत्थ एकतोति एकक्खणेति अत्थो, विभत्तिअलोपेन चायं निद्देसो। पुरिमनयेनेव एकतोअनुस्सावने कातुन्ति ‘‘एकेन एकस्स, अञ्‍ञेन इतरस्सा’’तिआदिना पुब्बे वुत्तनयेन द्वीहि वा तीहि वा आचरियेहि एकेन वा एकतोअनुस्सावने कातुं।

उपसम्पदाविधिकथावण्णना

१२६.वज्‍जावज्‍जं उपनिज्झायतीति उपज्झाति इमिना उपज्झायसद्दसमानत्थो उपज्झासद्दोपीति दस्सेति।

चत्तारोनिस्सयादिकथावण्णना

१३०.सम्भोगेति धम्मसम्भोगे आमिससम्भोगे च। अनापत्ति सम्भोगे संवासेति एत्थ च अयमधिप्पायो – यस्मा अयं ओसारणकम्मस्स कतत्ता पकतत्तट्ठाने ठितो, तस्मा न उक्खित्तकेन सद्धिं सम्भोगादिपच्‍चया पाचित्तियं, नापि अलज्‍जिना सद्धिं परिभोगपच्‍चया दुक्‍कटं अलज्‍जीलक्खणानुपपत्तितो। यो हि उच्छुरसकसटानं सत्ताहकालिकयावजीविकत्ता वट्टति विकाले उच्छु खादितुन्ति सञ्‍ञं उप्पादेत्वा तं खादित्वा तप्पच्‍चया पाचित्तियं न पस्सति ‘‘वट्टती’’ति तथासञ्‍ञिताय, यो वा पन आपत्तिमापन्‍नभावं पटिजानित्वा ‘‘न पटिकरोमी’’ति अभिनिविसति, अयं –

‘‘सञ्‍चिच्‍च आपत्तिं आपज्‍जति, आपत्तिं परिगूहति।

अगतिगमनञ्‍च गच्छति, एदिसो वुच्‍चति अलज्‍जीपुग्गलो’’ति॥ (परि॰ ३५९) –

वुत्तलक्खणे अपतनतो अलज्‍जी नाम न होति। तस्मा यथा पुब्बे याव उक्खेपनीयकम्मं कतं, ताव तेन सद्धिं सम्भोगे संवासे च अनापत्ति, एवमिधापीति सब्बथा अनापत्तिट्ठानेयेव अनापत्ति वुत्ताति वेदितब्बं । न हि भगवा अलज्‍जिना सद्धिं सम्भोगपच्‍चया आपत्तिसम्भवे सति ‘‘अनापत्ति सम्भोगे संवासे’’ति वदति। ततो यमेत्थ केनचि ‘‘अनापत्ति सम्भोगे संवासे’’ति इमिना पाचित्तियेन अनापत्ति वुत्ता, ‘‘अलज्‍जीपरिभोगपच्‍चया दुक्‍कटं पन आपज्‍जतियेवा’’ति वत्वा बहुधा पपञ्‍चितं, न तं सारतो पच्‍चेतब्बं। सेसमेत्थ उत्तानमेव।

इति समन्तपासादिकाय विनयट्ठकथाय सारत्थदीपनियं

महाखन्धकवण्णना निट्ठिता।