पाचित्तियवण्णना

पाचित्तियवण्णना

५. पाचित्तियकण्डो

१. मुसावादवग्गो

१. मुसावादसिक्खापदवण्णना

१.वादक्खित्तोति एत्थ अविसेसेन वादजप्पवितण्डसङ्खातो तिविधोपि कथामग्गो ‘‘वादो’’ इच्‍चेव वुत्तोति वेदितब्बो। तेसु ‘‘तित्थियेहि सद्धि’’न्ति वचनतो ठपेत्वा वादं ‘‘सेसा’’ति वदन्ति। छलजातिनिग्गहट्ठानकुसलताय कदाचि कत्थचि अवजानित्वा पटिजानाति, तथा पुब्बे किञ्‍चि वचनं पटिजानित्वा पच्छा अवजानाति। एवं वा अञ्‍ञथा वा अञ्‍ञेनञ्‍ञं पटिचरति। एवं पवत्तो सम्पजानमुसा भासं पटिस्सुणित्वा असच्‍चायन्तो सङ्केतं कत्वा विसंवादेन्तो एवं सो वादक्खित्तो समानो पाचित्तियवत्थुञ्‍च परिपूरेन्तो विचरतीति एवमधिप्पायो वेदितब्बो। अत्तनो वादेति एत्थ ‘‘सब्बे धम्मा अनत्ता’’ति (ध॰ प॰ २७९; चूळनि॰ अजितमाणवपुच्छानिद्देस ७; नेत्ति॰ ५; महानि॰ २७) पठममारद्धे अत्तनो वादे। ‘‘यं दुक्खं तदनत्ता’’ति (सं॰ नि॰ ३.१५) नो समयो। ‘‘सब्बे धम्मा’’ति वुत्ते निब्बानम्पि सङ्गहं गच्छति। ‘‘निब्बानं परमं सुख’’न्ति (ध॰ प॰ २०३-२०४; म॰ नि॰ २.२१५) वुत्तत्ता पन तं न दुक्खं। नो ठानमेतं विज्‍जति। अयं परवादी ‘‘यं दुक्खं तदनत्ता’’ति सुत्तं दस्सेत्वा सिद्धन्तं सम्भमेत्वा ‘‘विरोधि विरुद्धो’’ति वुत्तं दोसं आरोपेस्सतीति तस्मिं पठमवादे कञ्‍चि दोसं सल्‍लक्खेन्तो आरोपिते वा दोसे अनारोपिते वा ‘‘नायं मम वादो’’ति तं अवजानित्वा ‘‘निब्बानन्त्वेव सस्सत’’न्ति, ‘‘अनत्ता इति निच्छया’’ति च सुत्तं दिस्वा तस्स पठमवादस्स निद्दोसतं सल्‍लक्खेत्वा ‘‘ममेव अयं वादो’’ति तमेव पच्छा पटिजानाति। एवं तत्थ यथावुत्तमानिसंसं सल्‍लक्खेन्तो तं पटिजानित्वा यदि अनत्ता सब्बे धम्मा, धम्मा एव न ते भवन्ति। सभावं धारेन्तीति हि ‘‘धम्मा’’ति वुच्‍चन्ति।

अयञ्‍च अत्त-सद्दो सभाववाचीति एवं आरोपिते वा दोसे अनारोपिते वा दोसोति सल्‍लक्खेत्वा ‘‘नायं मम वादो’’ति तमेव पठमवादं पच्छा अवजानाति। अथ सो परवादी सपक्खं पटिसेधे पटिजाननत्तापनयनं । पटिजानाति पत्यास्स इति वचनतो ‘‘पटिञ्‍ञा अञ्‍ञा सो नाम ते निग्गहो’’ति वुत्तो। सभावातिरित्तं अत्थं पटिसेधाधिप्पायतो सभावतो अतिरित्तं बालपरिकप्पितमत्तानं सन्धाय ‘‘अनत्ता सब्बे धम्मा’’ति मे पटिञ्‍ञातकथा, सा च तदवत्थायेवाति न मे तं पटिञ्‍ञातत्तापनयनं अत्थि, ‘‘नायं मम वादो’’ति अवजाननं पन सभावसङ्खातं अत्तानं सन्धाय ‘‘अनत्ता सब्बे धम्मा’’ति न वदामीति अधिप्पायेन कतन्ति इमिना अञ्‍ञेन कारणेन तं पुब्बे पटिञ्‍ञातत्तापनयनं कारणं पटिच्छादेति। ‘‘अनत्ता सब्बेव धम्मा’’ति न वत्तब्बं ‘‘अत्त-सद्दस्स सभाववाचित्ता’’ति इदं कारणं पटिच्‍च तेन पुब्बे पटिञ्‍ञातत्तापनयनं कतं। तमञ्‍ञकारणं पच्छा दस्सितेन अञ्‍ञेन कारणेन पटिच्छादेतीति अधिप्पायो।

यस्मा न केवलं यथादस्सितनयेन सो अत्थमेव अवजानाति, पटिजानाति च, किन्तु वचनम्पि, तस्मा अट्ठकथायं (पाचि॰ अट्ठ॰ १) ‘‘जानितब्बतो’’ति पठमं कारणं वत्वा परवादिना ‘‘यदि जानितब्बतो अनिच्‍चं, निब्बानं ते अनिच्‍चं सिया’’ति वुत्ते ‘‘न मया ‘जानितब्बतो’ति कारणं वुत्तं, ‘जातिधम्मतो’ति मया वुत्तं, तं तया बधिरताय अञ्‍ञेन सल्‍लक्खितन्तिआदीनि वदतीति अधिप्पायो। ‘जानितब्बतो’ति वत्वा पुन ‘जातिधम्मतो’तिआदीनि वदती’’ति वुत्तं। ‘‘अवजानित्वा पुन पटिजानन्तो तं अवजाननं इमिना पटिच्छादेति नामा’’ति लिखितं।

२. ओमसवादसिक्खापदवण्णना

१३.‘‘पुन अरे पत्तेति पुन तं ठानं परिवट्टेत्वा आगते अञ्‍ञस्मिं अरे’’ति लिखितं। पतिट्ठितारप्पदेसन्ति भूमिं। पुन अरेति पुन तस्मिंयेव अरे भूमिं पत्तेति अत्थोति केचि, तं न सुन्दरं विय। जापितोति पराजितो, ‘‘पराजितो’’ति वा पाठो। पापेसीति अभिभवसि। मनापं भासमानस्स ब्राह्मणस्स गरुं भारं। उदब्बहीति आकड्ढीति अत्थो, अनादरत्थे वा सामिवचनं। धनञ्‍च नं अलाभेसीति यथा सो धनं अलभि, तथा अकासीति अधिप्पायो।

३. पेसुञ्‍ञसिक्खापदवण्णना

३६-७.‘‘इमस्स सुत्वा अमुस्सा’’ति पाठो। ‘‘इमेसं सुत्वा’’ति न सुन्दरं। भेदायपीति भेदाय। तिण्णम्पि भिक्खुभावतोयेव निपज्‍जनतो ‘‘भिक्खूनं पेसुञ्‍ञे’’ति बहुवचनं कतं।

४. पदसोधम्मसिक्खापदवण्णना

४५-६.सब्बमेतंपदसो धम्मो नामाति एत्थ धम्मो नाम बुद्धभासितोति एवं सम्बन्धो। अक्खरसमूहोति असमत्तपदे। पच्‍चेकबुद्धभासितं बुद्धभासिते एव। अनुपासकगहट्ठेहि भासितो इसिभासितादिसङ्गहं गच्छतीति वेदितब्बं। कत्थचि पोत्थके ‘‘देवताभासितो’’ति पदं नत्थि, यत्थ अत्थि, सा पाळि। गाथाबन्धेपि च एस नयोति एकमेव अक्खरं वत्वा ठानं लब्भति एव। ‘‘एवं मे सुत’’न्तिआदिसुत्तं भणापियमानो एकारं वत्वा तिट्ठति चे, अन्वक्खरेन पाचित्तियं, अपरिपुण्णपदं वत्वा ठिते अनुब्यञ्‍जनेन। पदेसु एकं पठमपदं विरुज्झति चे, अनुपदेन पाचित्तियं। अट्ठकथानिस्सितोति अट्ठकथानिस्सितवसेन ठितो। पुब्बे पकतिभासाय वुत्तं अट्ठकथं सन्धाय। पाळिनिस्सितोति पाळियं एवागतो। मग्गकथादीनिपि पकरणानि।

५. पठमसहसेय्यसिक्खापदवण्णना

५०.‘‘न सहसेय्यं कप्पेतब्ब’’न्ति भाववसेन वुत्तं, केसुचि ‘‘न सहसेय्या कप्पेतब्बा’’ति पाठो, न कप्पेतब्बा भिक्खुनाति पञ्‍ञत्तन्ति अधिप्पायो। ‘‘अपस्सेनं वाति वायिममञ्‍चकमेव होती’’ति लिखितं। यं एतेसं न कप्पति, तं तेसम्पीति उपज्झायादीनं सन्तिकं अगन्त्वा सहसेय्यं कप्पेय्याति पाठसेसो।

६. दुतियसहसेय्यसिक्खापदवण्णना

५५.‘‘अथ खो ते मनुस्सा’’ति च ‘‘ते अद्धिका’’ति च पाठो। ‘‘एकरत्त’’न्तिपि अत्थि, सो न सुन्दरो। पण्डके पाळियं दुक्‍कटस्स वुत्तत्ता ‘‘उभतोब्यञ्‍जनेहि मूलापत्तीति दिस्सती’’ति, ‘‘अनिमित्तादयो इत्थियोवा’’ति च वदन्ति उभतोब्यञ्‍जनके वुत्तं विय। किञ्‍चापि मतित्थी पाराजिकवत्थु होति, अनुपादिन्‍नपक्खे ठितत्ता पन इध आपत्तिं न करोति। पाराजिकापत्तिट्ठानञ्‍चेत्थ न ओलोकेतब्बं।

दुतियसहसेय्यसिक्खापदवण्णना निट्ठिता।

७. धम्मदेसनासिक्खापदवण्णना

६६.‘‘विञ्‍ञू पटिबला’’ति वचनतो अविञ्‍ञू इत्थियापि देसेन्तस्स अनापत्ति। इध यक्खीआदयो मनुस्सित्थी विय अनोळारिकत्ता दुक्‍कटवत्थुका जाता। तिरच्छानगतमनुस्सविग्गहित्थिया पटिबलताय वुत्तत्ता इतरापि दुक्‍कटवत्थुयेवाति एके। ‘‘मातुगामाया’’ति लिङ्गविपल्‍लासेन वुत्तं। ‘‘अट्ठकथादिपाठं ठपेत्वा दमिळादिना यथारुचि कथेतुं लभति किरा’’ति लिखितं, यथा यक्खीआदयो दुक्‍कटवत्थुका जाता, तथा पुरिसविग्गहं गहेत्वा ठितेन यक्खादिना सद्धिं ठितस्स मातुगामस्स धम्मं देसेन्तो दुक्‍कटं अनापज्‍जित्वा कस्मा पाचित्तियमापज्‍जतीति चे? ईसकम्पि दुतियपक्खं अभजनतो। मनुस्समातुगामोपि न दुतियो, पगेव यक्खादयोति। न दुतियानियते तस्स दुतियत्ताति चे? न तत्थ दुट्ठुल्‍लवाचापेक्खा दुतियता, किन्तु निसज्‍जापेक्खा, इध च न निसज्‍जमत्तं, किन्तु देसना इधाधिप्पेता। सा च निपज्‍जनतो ओळारिका, तस्मा असमत्थनिदस्सनं।

धम्मदेसनासिक्खापदवण्णना निट्ठिता।

८. भूतारोचनसिक्खापदवण्णना

६७.‘‘चतुत्थपाराजिकवत्थु च इदञ्‍च एकमेवा’’ति वुत्तं, न युत्तं। कस्मा? तत्थ ‘‘मोघपुरिसा’’ति वुत्तत्ता। ते अरियमिस्सका न होन्तीति द्वेपि एकसदिसानीति मम तक्‍को। ‘‘अरियापि पटिजानिंसु, तेसम्पि अब्भन्तरे विज्‍जमानत्ता उत्तरिमनुस्सधम्मस्सा’’ति लिखितं। ‘‘सब्बेपि भूतं भगवाति पुथुज्‍जनअरियानं उत्तरिमनुस्सधम्मस्स आरोचितत्ता ‘भूत’न्ति वुत्तं, न अत्तनो उत्तरिमनुस्सधम्मं सन्धायाति अपरे’’ति वुत्तं।

९. दुट्ठुल्‍लारोचनसिक्खापदवण्णना

७८-८०.‘‘तेनेव हत्थेन उपक्‍कमित्वा असुचिं मोचेसी’’ति पाठो सम्पतिपाठो सुन्दरो। अपलोकेत्वाव कातब्बा। नो चे, पाळियंयेव वुत्तं सिया। ‘‘ओत्तप्पेना’’ति वत्तब्बे रुळ्हीवसेन परेसु ‘‘हिरोत्तप्पेना’’ति वुत्तं। महाअट्ठकथायं उत्तानत्ता न वुत्तं, पाचित्तियासम्भवदस्सनेनेव हि दुक्‍कटन्ति सिद्धं।

१०. पथवीखणनसिक्खापदवण्णना

८६.कटसक्खरा सेतमत्तिका विय मुदुका सक्खरजाति। ‘‘अकतपब्भारेति अवलञ्‍जितब्बट्ठानदस्सनत्थं वुत्त’’न्ति लिखितं। ‘‘अनोवस्सकट्ठानदस्सनत्थ’’न्ति वत्तब्बं। मूसिकुक्‍कुरन्ति मूसिकाहि उद्धटपंसु। सुद्धचित्ताति किञ्‍चापि ‘‘एवं पवट्टिते पथवी भिज्‍जिस्सती’’ति जानन्ति, नो पन चे पथवीभेदत्थिका, सुद्धचित्ता नाम होन्ति। पंसुआदयो द्वे कोट्ठासा आपत्तिकरा। केचि ‘‘सब्बच्छन्‍नादीसु उपड्ढे दुक्‍कटस्स वुत्तत्ता सचे दुक्‍कटं, युत्त’’न्ति वदन्ति। तत्थ युत्तं तादिसस्स वत्थुनो सम्भवा, इध पन जातपथवी च अजातपथवी चाति द्वेयेव वत्थूनि, तस्मा द्विन्‍नं एकेन भवितब्बन्ति न युत्तं। एत्थापि दुक्‍कटवचनं अत्थीति चे? तं पन सञ्‍ञावसेन, न वत्थुवसेनाति न युत्तमेव।

२. भूतगामवग्गो

१. भूतगामसिक्खापदवण्णना

८९.फरसुं निग्गहेतुं असक्‍कोन्तोति दस्सितभावं जानापेति। कस्मा अयं फरसुं उग्गिरीति चे? मनुस्सानन्तिआदि तस्स परिहारो। ‘‘आकोटेसि छिन्दीति च वचनतो रुक्खदेवतानं हत्थानि छिज्‍जन्ति, न चातुमहाराजिकादीनं विय अच्छेज्‍जानी’’ति वदन्ति।

२. अञ्‍ञवादकसिक्खापदवण्णना

९८-९.अञ्‍ञं वदतीति अञ्‍ञवादकं, ‘‘वचनं करेय्या’’ति लिखितं। ‘‘तुण्हीभूतस्सेतं नाम’’न्ति पाठो। उग्घातेतुकामोति समोहनितुकामो, अन्तरायं कत्तुकामोति पोराणा।

३. उज्झापनकसिक्खापदवण्णना

१०३.‘‘छन्दाया’’ति अक्खरक्खरायातिआदि विय लिङ्गविपल्‍लासेन वुत्तं, छन्दत्थन्ति वा अत्थो। येसं सेनासनानि पञ्‍ञपेति, तेसं अत्तनि छन्दत्थन्ति अधिप्पायो।

४. पठमसेनासनसिक्खापदवण्णना

११०.‘‘एवञ्‍चिदं भगवता भिक्खूनं सिक्खापदं पञ्‍ञत्तं होती’’ति वचनतो, परिवारे ‘‘एका पञ्‍ञत्ति, एका अनुपञ्‍ञत्ती’’ति (परि॰ २२६) वचनतो च इध अत्थि अनुपञ्‍ञत्तीति सिद्धं। किञ्‍चापि सिद्धं, ‘‘एवञ्‍च पन, भिक्खवे, इमं सिक्खापदं उद्दिसेय्याथा’’तिआदिना पन पञ्‍ञत्तिट्ठानं न पञ्‍ञायति, केवलं ‘‘अनुजानामि, भिक्खवे, अट्ठमासे…पे॰… निक्खिपितु’’न्ति एत्तकमेव वुत्तं, तं कस्माति चे? पठमपञ्‍ञत्तियं वुत्तनयेनेव वत्तब्बतो अविसेसत्ता न वुत्तं। यदि एवं का एत्थ अनुपञ्‍ञत्तीति? अज्झोकासेति। अयमनुपञ्‍ञत्ति पञ्‍ञत्तियम्पि अत्थीति चे? अत्थि, तं पन ओकासमत्तदीपनं, दुतियं चातुवस्सिकमाससङ्खातकालदीपनं। यस्मा उभयम्पि एकं कालोकासं एकतो कत्वा ‘‘अज्झोकासे’’ति वुत्तन्ति दीपेन्तो भगवा ‘‘अनुजानामि, भिक्खवे…पे॰… निक्खिपितु’’न्ति आहाति वेदितब्बं। तेनेव मातिकाट्ठकथायं (कङ्खा॰ अट्ठ॰ पठमसेनासनसिक्खापदवण्णना) वुत्तं ‘‘यत्थ च यदा च सन्थरितुं न वट्टति, तं सब्बमिध अज्झोकाससङ्ख्यमेव गतन्ति वेदितब्ब’’न्ति। हेमन्तकालस्स अनापत्तिसमयत्ता इदं सिक्खापदं निदानानपेक्खन्ति सिद्धं, तथा हि अज्झोकासपदसामत्थियेन अयं विसेसो – वस्सानकाले ओवस्सकट्ठाने अज्झोकासे, मण्डपादिम्हि च न वट्टति। हेमन्तकाले पकतिअज्झोकासे न वट्टति, सब्बमिध ओवस्सकेपि मण्डपादिम्हि वट्टति, तञ्‍च खो यत्थ हिमवस्सेन सेनासनं न तेमेति, गिम्हकाले पकतिअज्झोकासेपि वट्टति, तञ्‍च खो अकालमेघादस्सनेयेवाति अयं विसेसो ‘‘अट्ठ मासे’’ति च ‘‘अवस्सिकसङ्केते’’ति च एतेसं द्विन्‍नं पदानं सामत्थियतोपि सिद्धो।

किञ्‍च भिय्यो – अट्ठकथायं सन्दस्सितविसेसोव। चम्मादिना ओनद्धको वा नववायिमो वा न सीघं विनस्सति। कायानुगतिकत्ताति काये यत्थ, तत्थ गतत्ता। सङ्घिकमञ्‍चादिम्हि कायं फुसापेत्वा विहरितुं न वट्टतीति धम्मसिरित्थेरो। ‘‘सङ्घिकं पन ‘अज्झोकासपरिभोगेन परिभुञ्‍जथ, भन्ते, यथासुख’न्ति दायका देन्ति सेनासनं, एवरूपे अनापत्ती’’ति अन्धकट्ठकथायं वचनतो, इध च पटिक्खेपाभावतो वट्टति। ‘‘अञ्‍ञञ्‍च एवरूपन्ति अपरे’’ति वुत्तं। ‘‘पादट्ठानाभिमुखाति निसीदन्तस्स पादपतनट्ठानाभिमुखा’’ति लिखितं। सम्मज्‍जन्तस्स पादट्ठानाभिमुखन्ति आचरियस्स तक्‍को।

५. दुतियसेनासनसिक्खापदवण्णना

११६-७.एत्तकमेव वुत्तमट्ठकथासु, तथापि पदट्ठादयोपि लब्भन्ति एव। अनुगण्ठिपदे ‘‘अञ्‍ञं अत्थरणादि अकप्पियत्ता न वुत्त’’न्ति वुत्तं। ‘‘मञ्‍चं वा पीठं वा विहारे वा विहारूपचारे वा’ति इमिनापि संसन्दनत्थं ‘किञ्‍चापि वुत्तो, अथ खो’तिआदि आरद्ध’’न्ति च वुत्तं। उपचारमत्तञ्‍चेतं ‘‘रुक्खमूले’’ति, तत्थ वत्तब्बं नत्थि।

६. अनुपखज्‍जसिक्खापदवण्णना

१२१.छब्बग्गियेसुयेव थेरा भिक्खूति केचि। पादे धोवित्वातिआदिम्हि पविसन्तस्स वा पादधोवनपासाणतो याव मञ्‍चपीठं पस्सावत्थाय निक्खमन्तस्स वा याव पस्सावट्ठानन्ति योजना कातब्बा। एवं सन्ते ‘‘पस्सावत्थाय निक्खमन्तस्स वा’’ति न वत्तब्बं, ‘‘पस्सावट्ठानतो निक्खमन्तस्स वा’’ति वत्तब्बं। पस्सावट्ठानन्ति कत्थचि पोत्थके। तथा हि मातिकाट्ठकथायं (कङ्खा॰ अट्ठ॰ अनुपखज्‍जसिक्खापदवण्णना) ‘‘पविसन्तस्स पादधोवनपासाणतो याव मञ्‍चपीठं निक्खमन्तस्स मञ्‍चपीठतो याव पस्सावट्ठानं, ताव उपचारो’’ति वुत्तं, तस्मा ‘‘पादे धोवित्वा पविसन्तस्स, पस्सावत्थाय निक्खमन्तस्स च द्वारे निक्खित्तपादधोवनपासाणतो, पस्सावट्ठानतो च मञ्‍चपीठ’’न्ति कत्थचि पोत्थके पाठो, सो अपाठो। कस्मा? मञ्‍चपीठानं उपचारस्स वुत्तत्ता। पविसन्तस्स याव मञ्‍चपीठानं उपचारो, निक्खमन्तस्स ततो पट्ठाय याव पस्सावट्ठानं वच्‍चकुटिचङ्कमट्ठानन्ति इमिना अत्थेन यथा संसन्दति, तथाविधो पाठोति आचरियो।

७. निक्‍कड्ढनसिक्खापदवण्णना

१२६-७.छसत्तकोट्ठकानि वाति एत्थ द्वारकोट्ठकं अधिप्पेतं। ‘‘निक्खमा’’ति वचनं सुत्वापि अत्तनो रुचिया निक्खमति, अनापत्ति; इध अग्गिसालादि एव उपचारोति।

निक्‍कड्ढनसिक्खापदवण्णना निट्ठिता।

८. वेहासकुटिसिक्खापदवण्णना

१२९.‘‘पमाणमज्झिमस्स गलप्पमाणे दिन्‍नतुलापि वेहासकुटियेवा’’ति लिखितं, ‘‘न सा इध अधिप्पेता’’ति वुत्तं।

वेहासकुटिसिक्खापदवण्णना निट्ठिता।

९. महल्‍लकविहारसिक्खापदवण्णना

१३५.यावद्वारकोसाति द्वारसमीपा, याव भित्तीति अत्थो, तं सुवुत्तं। कवाटवित्थारप्पमाणोति हत्थपासस्साधिप्पेतत्ता, समन्ता कवाटवित्थारप्पमाणउपचारस्स गहितत्ता अपरिपूरउपचारापि होति। आलोकं करोतीति आलोकं सन्धेति पिधेतीति सन्धि एव आलोकसन्धिनामका होन्ति। वातपानकवाटलेपकम्मे अप्पहरितट्ठानकिच्‍चं नत्थि।

१०. सप्पाणकसिक्खापदवण्णना

१४०.सप्पाणकसिक्खापदं उत्तानत्थमेव।

समत्तो वण्णनाक्‍कमेन भूतगामवग्गो दुतियो।

३. ओवादवग्गो

१. ओवादसिक्खापदवण्णना

१४४.कथानुसारेनाति यो भिक्खुनोवादकत्थिको किंसीलो किंसमाचारो कतरकुला पब्बजितोतिआदि कथानुसारेनाति अत्थो। सग्गमग्गगमनेपीति अपि-सद्देन मोक्खगमनेपि। ‘‘लक्खणप्पटिवेधपटिसंयुत्तो’’ति अट्ठगरुधम्मानुसारेन वत्तब्बं धम्मकथं सन्धाय वुत्तं।

२. अत्थङ्गतसिक्खापदवण्णना

१५३.मुनातीति जानाति। अन्तरधायतिपीति एत्थ तदुत्तमं चे अत्थि, तं पस्सामि, यं विचित्तं वा, तदत्थञ्‍च। तग्घ कारणं। सह उप्पादमनन्तरा किरिया। यमा च ते मनसा कतत्र नेत्वाति। यथा पातो सिया पातो भवं पातोव उदकतो उग्गन्त्वा ठितं, तथा विरोचमानं अङ्गीरसं बुद्धं पस्स, न केवलं पदुमं विय, विरोचमानं तपन्तमादिच्‍चमिवन्तलिक्खेति सम्बन्धो। अथ वा अङ्गीरसं बुद्धं पदुमंव विरोचमानं सूरियंव तपन्तं पस्स बुद्धं। यथा पातो सिया फुल्‍लमवीतगन्धं कोकनुदसङ्खातं पदुमं पस्ससि, तथा विरोचमानं अङ्गीरसं बुद्धं पस्स। उभयेनेव हि भगवतो कन्ति दीपिताति कत्वा दीपितगुणसुभं बुद्धं सक्‍कत्वा तं कन्तिं पूजेय्य। पूजनेय्यतोपि वीतिनामेय्य इति लक्खये। ‘‘एकतो उपसम्पन्‍नाया’’ति पाळि।

३. भिक्खुनुपस्सयसिक्खापदवण्णना

१६२.‘‘एकरत्तम्पि वसन्ती’’ति (पाचि॰ १६१) वचनतो यत्थ रत्तियं न वसन्ति, तत्थ गन्त्वा ओवदितुं वट्टतीति एके। यदि एवं सङ्केतट्ठानं गन्त्वा ओवदितुं वट्टतीति सिद्धं। ‘‘ततो अद्धयोजनेयेव सभिक्खुको आवासो इच्छितब्बो’’ति न वत्तब्बं। भिक्खुनोवादको चे अद्धयोजनं गन्त्वा ओवदितुकामो होति, भिक्खुनिसङ्घो च अद्धयोजनं गन्त्वा सोतुकामो, ‘‘वट्टती’’ति वत्तब्बं सिया, तञ्‍च न वुत्तं, तस्मा न वट्टति। हेट्ठिमपरिच्छेदेन पन ‘‘एकरत्तम्पी’’ति वुत्तं। ततो पट्ठाय उपस्सयं होति, न उपस्सयसङ्खेपेन कतमत्तेनाति वुत्तं होति। यत्थ वासूपगता भिक्खुनियो, सो उपस्सयसङ्ख्यं गच्छति, तत्थ न गन्त्वा ओवादो दातब्बो। एकावासे दिवा वट्टतीति एके, विचारेत्वा युत्ततरं गहेतब्बं।

भिक्खुनुपस्सयसिक्खापदवण्णना निट्ठिता।

४. आमिससिक्खापदवण्णना

१६४.‘‘उपसम्पन्‍नं सङ्घेन असम्मत’’न्ति पाळिवचनतो, ‘‘सम्मतेन वा सङ्घेन वा भारं कत्वा ठपितो’’ति अट्ठकथावचनतो च अट्ठहङ्गेहि समन्‍नागतो सम्मतेन वा विप्पवसितुकामेन ‘‘यावाहं आगमिस्सामि, ताव ते भारो होतू’’ति याचित्वा ठपितो, तस्साभावतो सङ्घेन वा तथेव भारं कत्वा ठपितो अट्ठहि गरुधम्मेहि ओवदितुं लभति, पगेव अञ्‍ञेन धम्मेनाति सिद्धं। ‘‘यो पन भिक्खु असम्मतो भिक्खुनियो ओवदेय्य, पाचित्तिय’’न्ति पगेव भारं कत्वा अट्ठपितं सन्धाय वुत्तन्ति वेदितब्बं। अभयगिरिवासीनम्पि इदमेव मतं, अनुगण्ठिपदे पन इमं नयं पटिक्खिपित्वा ‘‘नत्थि कोची’’तिआदिना ‘‘एतरहि ओवादको असम्मतो भिक्खुनोवादको नामा’’ति वत्वा ‘‘यं पन अन्धकट्ठकथायं वुत्तं ‘उपसम्पन्‍नं सङ्घेन कम्मवाचाय असम्मतं, भिक्खुसङ्घेन पन भिक्खुनिसङ्घस्स अनुग्गहं करोथ, भिक्खुनियो ओवदथ, भिक्खुसङ्घस्स च करोथ फासुविहारन्ति एवं याचित्वा ठपितो भिक्खुसङ्घं आपुच्छित्वा, ततो सो थेरो भिक्खुनियो ओवदति, एवरूपं भिक्खुसङ्घेन असम्मतन्ति, तत्र वुत्तनयेनेव अत्थो गहेतब्बो’’ति वुत्तं। पोराणगण्ठिपदे पन ‘‘असम्मतो गामं ओवादत्थाय आगतानं भिक्खुनीनं वचनं सुत्वा पटिवचनं देन्तो सङ्घानुमतिया, न ञत्तिचतुत्थेना’’ति वुत्तं, तं अनुगण्ठिपदमतेन समेति, अन्धकट्ठकथायं वुत्तवचनं तेन समेति, तञ्‍च पाळिवचनं, न हि ओवादपटिग्गाहको, पातिमोक्खुद्देसको वा ‘‘पासादिकेन सम्पादेतू’’ति वचनमत्तेन भिक्खुनोवादको नाम होति। होतीति चे, अनुपसम्पन्‍नोपि तत्तकेन वचनेन ‘‘भिक्खुनोवादको होतू’’ति वत्तब्बो। होतीति चे, यं वुत्तं गण्ठानुगण्ठिपदेसु ‘‘असम्मतो नाम असम्मतभावेन ‘बहुस्सुतो त्वं ओवदाही’ति सङ्घेन भारं कत्वा ठपितो’’ति। एत्थ बाहुसच्‍चेन किं पयोजनं। अनुगण्ठिपदेयेव ‘‘अभयगिरिवासी वदतीति सुत्वा सम्मतेन वा आणत्तो ओवदितुं लभतीति धम्मसिरित्थेरो पच्छा अनुजानाती’’ति वुत्तं। किं बहुकाय। ‘‘पासादिकेन सम्पादेतू’’ति एत्तकमत्तेन भिक्खुनोवादको होति। अट्ठकथायं ‘‘भारं कत्वा’’ति इमिना किं पयोजनं, तत्तकम्पि वत्तुं अञ्‍ञो न लभति, तेन च ‘‘अनुजानामि, भिक्खवे, ठपेत्वा बालं गिलानं गमिकं अवसेसेहि ओवादं गहेतु’’न्ति (चूळव॰ ४१४) अयं पाळि विरुज्झेय्य। कथं? तस्स हि ‘‘न, भिक्खवे, ओवादो न पच्‍चाहरितब्बो’’ति (चूळव॰ ४१५) चनतो सम्मतासम्मतभावेन नत्थि कोचीति ‘‘पासादिकेन सम्पादेतू’’ति वत्तब्बं सिया, वदन्तो च इध पठमेन आपत्तिया कारेतब्बो होतीति। होतु असम्मतत्ता, अकतभारत्ता च। इमस्स च भिक्खुनोवादकत्ते इमस्स खीयनेन दुक्‍कटं सिया, सब्बमेतं अनिट्ठं, तस्मा अट्ठकथायं ‘‘अयमेत्थ भिक्खुनोवादको नामा’’ति अवुत्तत्ता तथा भारं कत्वा ठपितो ओवदितुं लभतियेव, नाञ्‍ञोति आचरियो।

आमिससिक्खापदवण्णना निट्ठिता।

५. चीवरदानसिक्खापदवण्णना

१६९.सादियिस्ससीति पुच्छा।

चीवरदानसिक्खापदवण्णना निट्ठिता।

६. चीवरसिब्बनसिक्खापदवण्णना

१७६.वञ्‍चेत्वाति ‘‘तव ञातिकाया’’ति अवत्वा ‘‘एकिस्सा भिक्खुनिया’’ति एत्तकमेव वत्वा, ते हि ‘‘एकिस्सा’’ति वचनं सुत्वा अञ्‍ञातिकाय सन्तकसञ्‍ञिनो सिब्बेसुं। इमस्मिं सिक्खापदे ‘‘चीवरं नाम छन्‍नं चीवरानं अञ्‍ञतरं चीवर’’न्ति एत्तकमेव पाळि, तेन वुत्तं ‘‘चीवरन्ति यं निवासेतुं वा पारुपितुं वा’’तिआदि। ‘‘विकप्पनुपगं पच्छिम’’न्ति च लिखितं, सो पमादलेखो।

चीवरसिब्बनसिक्खापदवण्णना निट्ठिता।

७. संविधानसिक्खापदवण्णना

१८१.ता भिक्खुनियो दूसयिंसूति विपरिणामो कातब्बो।

८. नावाभिरुहनसिक्खापदवण्णना

१८९.नदिया कुतो गामन्तरन्ति चे? ‘‘यस्सा नदिया’’तिआदिमाह। गामन्तरगणनायाति यस्मिं गामतित्थे आरुळ्हो, तं ठपेत्वा अञ्‍ञगामगणनाय। ‘‘मातुगामोपि इध सङ्गहं गच्छती’’ति आचरियस्स तक्‍को, तेनेव ‘‘उभयत्थ एकतो उपसम्पन्‍नाय दुक्‍कटं, सिक्खमानाय सामणेरिया अनापत्ती’’ति च न वुत्तं। एसेव नयो अञ्‍ञेसुपि एवरूपेसु।

९. परिपाचितसिक्खापदवण्णना

१९२.चेटकेति दारके। तरुणपोतकेति पोराणा। ‘‘पापभिक्खूनं पक्खुपच्छेदाय इदं पञ्‍ञत्तं, तस्मा पञ्‍च भोजनेयेवापत्ति वुत्ता’’ति लिखितं।

१०. रहोनिसज्‍जसिक्खापदवण्णना

१९८.‘‘उपनन्दस्स चतुत्थसिक्खापदेन चा’’ति पाठो।

रहोनिसज्‍जसिक्खापदवण्णना निट्ठिता।

समत्तो वण्णनाक्‍कमेन ओवादवग्गो ततियो।

४. भोजनवग्गो

१. आवसथपिण्डसिक्खापदवण्णना

२०३-४.पूगस्साति पूगेन। कुक्‍कुच्‍चायन्तोति निस्सरणेनेत्थ भवितब्बं, तं मयं न जानामाति सन्‍निट्ठानस्स करणवसेन ‘‘कुक्‍कुच्‍चायन्तो’’ति वुच्‍चति। यथा हि आयस्मा उपालि नयग्गाहेन ‘‘अनापत्ति आवुसो सुपिनन्तेना’’ति (पारा॰ ७८) आह, तथा थेरोपि ‘‘अनापत्ति गिलानस्सा’’ति कस्मा न परिच्छिन्दतीति? अनत्ताधिकारत्ता विनयपञ्‍ञत्तिया, ‘‘नायं अत्तनो ओकासो’’ति पटिक्खित्तत्ता, सिक्खापदस्स अपरिपुण्णत्ता। पठमपाराजिकसिक्खापदे परिपुण्णं कत्वा पञ्‍ञत्तेयेव हि सो थेरो ‘‘अनापत्ति सुपिनन्तेना’’ति आह ‘‘अञ्‍ञत्र सुपिनन्ता’’ति वुत्तपदानुसारेनाति। यस्मा ओदिस्स अयावदत्थेव दायकानं पीळा नत्थि, तस्मा ‘‘अनोदिस्स यावदत्थो’’ति वुत्तं।

२. गणभोजनसिक्खापदवण्णना

२०९-२१८.गुळ्हपटिच्छन्‍नोति अपाकटोव। एको पुत्तेनाति एकस्सेकं भत्तं ‘‘अहं अञ्‍ञेन निमन्तितो’’ति न वुच्‍चति। ‘‘सचे एकतो गण्हन्ति, गणभोजनं होती’’ति (पाचि॰ अट्ठ॰ २१७-२१८) वुत्तत्ता चत्तारो उपासका चत्तारो भिक्खू विसुं विसुं निमन्तेत्वा हत्थपासे ठितानं चे देन्ति, गणभोजनं होति एवाति एके, तं न युत्तं विय। ‘‘विञ्‍ञत्तितो पसवने गणस्स एकतो गहणे इमिना सिक्खापदेन आपत्ति, विसुं गहणे पणीतभोजनसूपोदनविञ्‍ञत्तीही’’ति लिखितं। ‘‘विञ्‍ञत्तितो पसवनं अट्ठुप्पत्तिवसेन अट्ठकथायं अनुञ्‍ञातं। सूपोदनादिवसेन तत्थ आपत्ति एवा’’ति वुत्तं, तं न युत्तं। कस्मा? परिवारे (परि॰ १६८) एव द्विन्‍नं आकारानं आगतत्ता, तस्मा अट्ठकथायं ‘‘अनुञ्‍ञात’’न्ति दुवुत्तं। अट्ठुप्पत्तियंयेव पाकटन्ति ‘‘पदभाजने न वुत्त’’न्ति वत्तब्बं। एकतो गण्हन्तीति गहितभत्तापि अञ्‍ञे याव गण्हन्ति, ताव चे तिट्ठन्ति, एकतो गण्हन्तियेव नाम। ‘‘गच्छति चे, अनापत्ती’’ति वदन्ति।

एत्थाह – ‘‘पटिग्गहणमेव हेत्थ पमाण’’न्ति वुत्तं, अथ कस्मा पाळियं ‘‘गणभोजनं नाम यत्थ चत्तारो…पे॰… भुञ्‍जन्ति, एतं गणभोजनं नामा’’ति (पाचि॰ २१८) वुत्तन्ति? वुच्‍चति – यत्थाति उपयोगत्थे भुम्मवचनं। चत्तारोति गणस्स हेट्ठिमपरिच्छेदनिदस्सनं। पञ्‍चन्‍नं भोजनानन्ति आपत्तिप्पहोनकभोजननिदस्सनं। अञ्‍ञतरेन भोजनेन निमन्तिताति अकप्पियनिमन्तननिदस्सनं। निमन्तनवसेनेव पन गणभोजनस्स वुत्तत्ता ‘‘निमन्तिता भुञ्‍जन्तीति वुत्त’’न्ति वुत्तं। ‘‘अञ्‍ञतरं भोजनं विञ्‍ञापेत्वा भुञ्‍जन्ती’’ति पन न वुत्तं अट्ठुप्पत्तियंयेव पाकटत्ता। यं भुञ्‍जन्तीति एवं सम्बन्धो वेदितब्बो। तत्थ भुञ्‍जन्तीति पटिग्गाहकनियमवचनं। न हि अप्पटिग्गहितकं भिक्खू भुञ्‍जन्ति। इदं वुत्तं होति ‘‘गणस्स यतो पटिग्गहिताहारभोजनहेतु पाचित्तिय’’न्ति। आगन्तुकपट्टं मोघसुत्तेन सिब्बित्वा ठपेन्ति, तत्थ अनुवाते यथा एकतलं होति, तथा हत्थेहि घट्टेति। वलेतीति आवट्टेति। परिवत्तनन्ति सुत्तं गण्हन्तानं सुखग्गहणत्थं सुत्तपरिवत्तनं करोति, पट्टं सिब्बन्तानं सुखसिब्बनत्थं पट्टपरिवत्तनञ्‍च। नवचीवरकारको इधाधिप्पेतो, न इतरोति। ‘‘बिम्बिसारं आपुच्छित्वा सम्भारे कयिरमानेयेव काला अतिक्‍कन्ता, पच्छा गणभोजनसिक्खापदे पञ्‍ञत्ते भगवन्तं उपसङ्कमित्वा पुच्छी’’ति वदन्ति, अञ्‍ञथा अट्ठकथाय विरुज्झनतो।

३. परम्परभोजनसिक्खापदवण्णना

२२१.अधिट्ठिताति निच्‍चप्पवत्ता। बदरचुण्णसक्‍करादीहि योजितं बदरसाळवं। किरकम्मकारेनाति किरस्स कम्मकारेन।

४. काणमातासिक्खापदवण्णना

३१-३.पटियालोकन्ति पच्छिमं देसं। पूवगणनायाति अतिरित्तपूवगणनायाति अत्थो। सचे ‘‘अपाथेय्यादिअत्थाय सज्‍जित’’न्ति सञ्‍ञाय गण्हाति, अचित्तकत्ता सिक्खापदस्स आपत्ति एव। अथ उग्गहितं गण्हाति, न मुच्‍चतियेव। असंविभागे पन अनापत्ति अकप्पियत्ता। अचित्तकता पञ्‍ञत्तिजाननाभावेनेव, न वत्थुजाननाभावेनाति एके। न, मातिकाट्ठकथायं ‘‘पाथेय्यादिअत्थाय सज्‍जितभावजानन’’न्ति अङ्गेसु अवुत्तत्ता। पोराणगण्ठिपदे पनेवं वुत्तं ‘‘एकेन वा अनेकेहि वा द्वत्तिपत्तपूरेसु गहितेसु तेसं अनारोचनेन वा सयं वा जानित्वा यो अञ्‍ञं गण्हाति, तस्स दुक्‍कटं। एकतो तीसु, चतूसु वा पविट्ठेसु एकेन चे द्वेपत्तपूरा गहिता, दुतिये द्वे गण्हन्ते पठमो चे न निवारेति, पठमस्स पाचित्तियं। निवारेति चे, अनापत्ति, दुतियस्सेव दुक्‍कट’’न्ति। सचे सञ्‍चिच्‍च न वदति, पोराणगण्ठिपदे वुत्तनयेन पाचित्तियं, मातिकाट्ठकथावसेन (कङ्खा॰ अट्ठ॰ काणमातासिक्खापदवण्णना) दुक्‍कटं। ‘‘अतिरेकपटिग्गहण’’न्ति तत्थ पञ्‍चमं अङ्गं वुत्तं, तस्मा अप्पटिग्गहितत्ता न पाचित्तियं, कत्तब्बाकरणतो पन दुक्‍कटं। अञ्‍ञथा किरियाकिरियं इदं आपज्‍जति, अनिवारणं, अनारोचनं वा छट्ठङ्गं वत्तब्बं सिया। एकनिकायिकानं वाति एत्थ ‘‘आसन्‍नविहारभिक्खू, आसन्‍नआसनसालागता वा सचे विसभागेहि आनीतं न पटिग्गण्हन्ति, ‘आरामिकादीनंयेव वा दापेन्ती’ति जानाति, यत्थ परिभोगं गच्छति, तत्थ दातुं वट्टती’’ति वुत्तं। ‘‘द्वत्तिपत्तपूरा’ति वचनतो पच्छिआदीसु अधिकम्पि गण्हतो अनापत्ती’’ति केचि विनयधरमानिनो वदन्ति, तं तेसंयेव निसीदतु, आचरिया पन ‘‘पच्छिआदीसुपि उक्‍कट्ठपत्तस्स पमाणवसेन द्वत्तिपत्तपूरा गहेतब्बा। उक्‍कट्ठपरिच्छेदकथा हेसा’’ति वदन्ति।

काणमातासिक्खापदवण्णना निट्ठिता।

५. पठमपवारणसिक्खापदवण्णना

२३६.यावदत्थपवारणायपवारिता किञ्‍चापि ‘‘पवारिता’’इच्‍चेव अधिप्पेता अट्ठुप्पत्तियाव, अथ खो पच्छिमाव इधाधिप्पेता।

६. दुतियपवारणसिक्खापदवण्णना

२४३.साधारणमेवाति सब्बपवारणानं साधारणं ‘‘यावत्तकं इच्छसी’’ति इदं।

दुतियपवारणसिक्खापदवण्णना निट्ठिता।

७. विकालभोजनसिक्खापदवण्णना

२४७-९.नटानं नाटकानि नटनाटकानि, सीताहरणादीनि। मूलञ्‍च तं खादनीयञ्‍चाति मूलखादनीयं। एस नयो सब्बत्थ। पिट्ठन्ति चुण्णं। खारकमूलन्ति यूपसमूलं। चच्‍चुमूलं नेळियमूलं। तम्बकं वचं। तण्डुलेय्यकं चूळकुहु। वत्थुलेय्यकं महाकुहु। वजकलि निकोट्ठं। जज्झरी हिरतो।

कोट्ठं जरट्ठं वुच्‍चति। गण्ठि मुहुकुलमुदु विचयत्थ वजमुजु वदुळवि।

वज्‍जयेतिमे किंसुकं, हलिद्दि। कसेरुको, कटिबलवन्ति तस्स नामं। अम्बाटकं अमूलकं पिढल कक्‍कुल। मसालु किनळ। आलुव कळि तड्ढिअळि अलस कटिस्सल नमेदति मेर। सिग्गु सीरि कोळ कालकं नेकळवि। खीरवल्‍लिकन्दो तुमूरोरियो होति। सङ्खतो धोवनमेव। अयं ‘‘परिसङ्खारो’’ति लिखितं। खीरकाकोली किरिकवेळि। जीविकं जीविहि। उसभक उम्मसुवियि।

हिन्तालं कितिलि। कुन्ताल तोहो तिलिसता पदिकळिरो पटसेवलकळि। करमन्दकं करम्ब दण्डोकिर उदकजोति कण्डको। ‘‘सिङ्घतकोतिपि वुच्‍चती’’ति लिखितं। फग्गव हकिळि। नत्तमालन्ति करञ्‍जि।

सेल्‍लु लोहोलियं। कासमद्दक कुदुववलि अनसिकिन। उम्मादिय मेलेलिदिय। चीनमुग्गो वेनमुत्ति हुरमुग्ग। राजमासो माहविलिति। अग्गिमन्तो मुञ्‍चि। सुनिपण्णको तिपिलवनिनाळिका तिलक। भूमियं जातलोणीति एत्थ लोणीनामस्स साधारणत्ता ‘‘भूमिय’’न्ति विसेसेत्वा वुत्तं। ब्रह्मीपत्तं देमेतेये पणसा। ‘‘दीपवासिनो वदन्ती’’ति सिथिलं कत्वा कस्मा वुत्तन्ति चे? ‘‘खादनीयत्थं फरतीति लक्खणेन असमानत्ता’’ति वुत्तं। पदेलिविनितेकि। सुलसिपण्णन्ति तसापलिकं।

अगन्धिकपुप्फं करिस्सयेति चेकवादिदपुप्फं चेलेपतिमलं। जीवन्तीपुप्फं जीवितन्दिगमल। बकुल मुथुवल। कुय्यक पुनपुन्‍नामपुन्‍नरा, जातिसुमन। नवमालिका चेहेमल।

तिन्तिणिक कचिनी विलेयि। मातुलुङ्ग लवनो। पुस्सफल सुपुलि। तिम्बरूसक तिगिब्बेरेहिति सुसतुधुत। तिपुसवातिङ्गण धुततिकेण पटियि। चोच वरियियेलि। मोच अतिरेलि। गोट्ठफलं पूवफलन्ति एके। कोट्ठसे किर अच्छिव।

असमुस्सि बिम्ब इति केचि। कास्मरीति सेपण्णि। अतितेमेति करियमेतिस्स। जातिफलं कतंमेति। कटुकफलं तिरिरक।

तरुणफलं किरिउपुलु। पोक्खरट्ठि किञ्‍चक्खट्ठि। सिद्धत्थकं सासपं सेतवण्णं। राजिकं रत्तं होति।

८. सन्‍निधिकारकसिक्खापदवण्णना

२५३.अपरज्‍जु सन्‍निधि नाम होतीति अत्थो। अज्‍ज पटिग्गहितन्ति न केवलं पटिग्गहितमेव, अथ खो उग्गहितकम्पि, तेनेव अट्ठकथायं ‘‘पटिग्गण्हाति, आपत्ति दुक्‍कटस्साति एवं सन्‍निधिकतं यं किञ्‍चि यावकालिकं वा यामकालिकं वा अज्झोहरितुकामताय गण्हन्तस्स पटिग्गहणे ताव आपत्ति दुक्‍कटस्सा’’ति वुत्तं। यदि तं पठममेव पटिग्गहितं, ‘‘पटिग्गहणे तावा’’ति न वत्तब्बं, तस्मा वेदितब्बमेतं ‘‘अत्तनो काले गहितं अज्‍ज पटिग्गहित’न्ति वुत्त’’न्ति।

एत्थाह – यथा पञ्‍च भेसज्‍जानि उग्गहितकानि अनधिप्पेतानि। सत्ताहातिक्‍कमे अनापत्ति अनज्झोहरणीयत्ता, तथा इधापि उग्गहितकं नाधिप्पेतन्ति? एत्थ वुच्‍चति – भेसज्‍जसिक्खापदे (पारा॰ ६१८ आदयो) उग्गहितकं नाधिप्पेतन्ति युत्तं अत्तनो कालातिक्‍कमनमत्तेन तत्थ आपत्तिप्पसङ्गतो। एत्थ न युत्तं अत्तनो कालातिक्‍कमनमत्तेन आपत्तिप्पसङ्गाभावतो। अज्झोहरणेनेव हि एत्थ आपत्तीति अधिप्पायो, तस्मा अनुगण्ठिपदमतेन अज्‍ज उग्गहेत्वा पुनदिवसे भुञ्‍जन्तो द्वे आपत्तियो आपज्‍जति।

तत्रायं विचारणा – अत्तना भुञ्‍जितुकामो अज्‍ज उग्गहेत्वा पुनदिवसे भुञ्‍जति, द्वे आपत्तियो आपज्‍जति। सामणेरादीनंयेव अत्थाय उग्गहेत्वा गहितं पुनदिवसे पटिग्गहेत्वा भुञ्‍जन्तो आपत्तिया न कारेतब्बोति। पटिग्गण्हाति, आपत्ति दुक्‍कटस्साति एत्थायमधिप्पायो – सचे बेलट्ठसीसो विय दुतियततियादिदिवसत्थाय अज्‍ज पटिग्गहेत्वा सामणेरादीनं गोपनत्थाय देति, तस्स पुनदिवसे अज्झोहरणत्थं पटिग्गहणे आपत्ति दुक्‍कटस्साति सम्भवति। सयमेव सचे तं गोपेत्वा ठपेति, पुनदिवसे पतितं कचवरं दिस्वा विमतिवसेन वा पटिग्गण्हतो पटिग्गहणतोव आपत्ति दुक्‍कटस्साति सम्भवति। नो चे पटिग्गण्हाति, तं दुक्‍कटं नत्थि। ‘‘इदञ्हि ‘एकं पादं अतिक्‍कामेति, आपत्ति थुल्‍लच्‍चयस्सा’तिआदि विया’’ति वुत्तं। यो पन एकप्पहारेनेव द्वेपि पादे अतिक्‍कामेति, तस्स तं थुल्‍लच्‍चयं नत्थि, एवंसम्पदमिदन्ति वेदितब्बं। एत्थ पटिग्गहितभावं अविजहन्तमेव सन्‍निधिं जनेतीति धम्मसिरित्थेरो, तं ‘‘पटिग्गण्हाति, आपत्ति दुक्‍कटस्सा’’ति पाळिया विरुज्झति। कपालेन पीतो पन स्नेहो अब्बोहारिको। किञ्‍चापि उण्हे ओतापेन्तस्स पग्घरति, तथापि ‘‘भेसज्‍जसिक्खापदे विया’’ति वुत्तं। इतरथा कपालेन पीता सप्पिआदयोपि सत्ताहातिक्‍कमे आपत्तिं जनेय्युन्ति। सयं पटिग्गहेत्वाति इधापि पुब्बे वुत्तविधियेव। दुद्धोतपत्तकथापि एतेन समेति विय । आहारत्थायाति कालेपि लब्भति। पकतिआमिसेति कप्पियामिसे। सामिसेन मुखेन अज्झोहरतो द्वेति ‘‘हिय्यो पटिग्गहितयामकालिकं अज्‍ज पुरेभत्तं सामिसेन मुखेन अज्झोहरतो द्वे पाचित्तियानी’’ति लिखितं। अज्‍ज पटिग्गहितं यावकालिकम्पि हि यामातिक्‍कन्तपानकेन संसट्ठं सन्‍निधिं करोति। अकप्पियमंसेसु मनुस्समंसे थुल्‍लच्‍चयं, सेसमंसे दुक्‍कटञ्‍च वड्ढति।

९. पणीतभोजनसिक्खापदवण्णना

२५९.अकप्पियसप्पिनाति येसं मंसं न कप्पति, तेसं सप्पिना। ‘‘वसातेलञ्हि ठपेत्वा अकप्पियसप्पि नाम नत्थी’’ति लिखितं। विसङ्केतन्ति एत्थ ‘‘सूपोदनविञ्‍ञत्तिपि न होती’’ति वुत्तं। कायिकानीति कायेन आपज्‍जितब्बानि।

१०. दन्तपोनसिक्खापदवण्णना

२६४-५.मुखद्वारन्ति कण्ठनाळि। उच्‍चारणमत्तन्ति उक्खिपितब्बमत्तकं। कसटं छड्डेत्वाति समुदाचारवसेन, अछड्डितेपि ‘‘वट्टती’’ति वुत्तं। हत्थपासातिक्‍कमन्ति दायकस्स। भिक्खुस्स देतीति अञ्‍ञस्स भिक्खुस्स। कञ्‍जिकन्ति यं किञ्‍चि द्रवं। पत्तो पटिग्गहेतब्बोति भूमियं ठपिते अभिहाराभावतो। ‘‘यथा पठमतरं पतितथेवे दोसो नत्थि, तथा आकिरित्वा अपनेन्तानं पतितथेवेपि अभिहटत्ता नेवत्थि दोसो’’ति लिखितं। चरुकेनाति खुद्दकपिण्डेन। जागरन्तस्सपीति ‘‘अपि-सद्देन सुत्तस्सपी’’ति लिखितं। केचीति अभयगिरिवासिनो। तेहि कायसंसग्गे कायपटिबद्धेनापि तप्पटिबद्धेनापि थुल्‍लच्‍चयापत्ति दस्सिता एवाति अत्थो। कायपटिबद्धपटिबद्धेनाति वचनमत्तमेवेतं। ‘‘सत्थकेनाति पटिग्गहितकेना’’ति लिखितं, तं दुल्‍लिखितं सतिपि मले पुन पटिग्गहेतब्बकिच्‍चाभावतो। केसञ्‍चि अत्थायाति अनुपसम्पन्‍नानं अत्थाय। ‘‘सामणेरस्स हत्थं फुट्ठमत्तमेव तं परिच्‍चत्त’’न्ति लिखितं।

पटिग्गहणुपगभारं नाम मज्झिमपुरिसेन उक्खिपितब्बकं। मूलपटिग्गहणमेव वट्टतीति एत्थ ‘‘मच्छिकवारणत्थन्ति वुत्तत्ता ‘अभुञ्‍जनत्थायापि पटिग्गहेत्वा गहिते वट्टती’’’ति ये वदन्ति, ते वत्तब्बा ‘‘सीसमक्खनतेलं पटिग्गहेत्वा ‘इदं सीसमक्खन’न्ति अनाभोगेनेव सत्ताहं अतिक्‍कामेन्तस्स किं निस्सग्गियं भवेय्या’’तिआदि, सुत्ताधिप्पायो पन एवं गहेतब्बो ‘‘मच्छिकवारणत्थं बीजन्तस्स तस्मिं लग्गरजादिम्हि पत्ते पतिते सुखं परिभुञ्‍जितुं सक्‍का’ति सञ्‍ञाय पुब्बे पटिग्गहितब्ब’’न्ति वुत्तं। परिवत्तनकथायं ‘‘अम्हाकं तण्डुलेसु खीणेसु एतेहि अम्हाकं हत्थगतेहि सामणेरसन्तकेहिपि सक्‍का पतिट्ठपेतु’न्ति भिक्खूनं चित्तुप्पादो चे सम्भवति, ‘परिवत्तनं सात्थक’न्ति उपतिस्सत्थेरो’’ति वुत्तं। यदि एवं सुद्धचित्तानं निरत्थकन्ति आपन्‍नमेव, तथा ‘‘पण्डितो एस सामणेरो पत्तपरिवत्तनं कत्वा दस्सति, मयमेव च इमस्स विस्सासेन वा याचित्वा वा भुञ्‍जिस्सामा’’ति चित्ते सति भुञ्‍जितुं न वट्टति कतेपि परिवत्तनेति च आपन्‍नं, किं बहुना। निरपेक्खेहेव गण्हितब्बं, न सापेक्खेहीति दस्सनत्थं वुत्तन्ति आचरियो। अयमेवत्थो ‘‘सचे पन सक्‍कोति वितक्‍कं सोधेतुं, ततो लद्धं खादितुम्पि वट्टती’’ति वचनेन सिद्धोव। आधारके पत्तो ठपितो होति यथापटिग्गहितभावे निरालयो। समुद्दोदकेन अप्पटिग्गहितकेन। मेण्डकस्स खीरं खीरत्ताव वट्टति। ‘‘अत्तनो पन खीरं मुखेनेव पिवन्तस्स अनापत्तीति दस्सेतुं वुत्त’’न्ति वुत्तं। ‘‘सरीरनिस्सितमहाभूतानि हि इधाधिप्पेतानी’’ति लिखितं, तदुभयम्पि ‘‘कप्पियमंसखीरं वा’’तिआदिना नयेन विरुज्झति।

अपिच ‘‘अप्पटिग्गहितभाजने अञ्‍ञभिक्खुसन्तके अत्तनो पिण्डपातं पक्खिपति, ‘तं थोक’न्ति वा अञ्‍ञेन वा कारणेन वदति, तं सब्बेसं न कप्पति। कस्मा? विनयदुक्‍कटत्ता । अत्तना पटिग्गहेत्वा पक्खिपितब्बं विनयविधिं अकत्वा दुक्‍कटन्ति अधिप्पायो। एवं तादिसं किमत्थं न भुञ्‍जतीति? अट्ठकथायं ‘उग्गहितको होती’ति वुत्तत्ता। एवञ्हि तत्थ वुत्तं भूमियं वा भाजने वा फलं वा यं किञ्‍चि आमिसं वा यावजीविकम्पि अप्पटिग्गहितकं अजानन्तो आमसति, न वट्टति, उग्गहितकं होती’’ति अनुगण्ठिपदे वुत्तं, तस्मा इमस्स मतेन भिक्खु भिक्खुस्स सचे पत्ते अप्पटिग्गहिते पिण्डं ठपेति, तं अकप्पियं उग्गहितकन्ति सिद्धं। अयमेवत्थो ‘‘सचे अत्तनो वा भिक्खूनं वा यागुपचनकभाजने…पे॰… निरामिसं कत्वा परिभुञ्‍जितब्ब’’न्ति वचनेन संसन्दित्वा कथेतब्बो। ‘‘कप्पियमंसखीरं वा’’ति पसङ्गवसेन वुत्तं। दधि चे पटिलद्धं, तञ्‍च अधिप्पेतन्ति केचि।

५. अचेलकवग्गो

१. अचेलकसिक्खापदवण्णना

२६९.विघासादानं अन्तरा पूवलाभेन अञ्‍ञतरा परिब्बाजिका पविसित्वा ठिता। दापेतीति अनुपसम्पन्‍नेन।

अचेलकसिक्खापदवण्णना निट्ठिता।

२. उय्योजनसिक्खापदवण्णना

२७६.विजहन्तस्साति अनादरत्थे सामिवचनं। उय्योजकस्स विजहन्तस्स सतो आपत्ति दुक्‍कटस्सातिपि अत्थो। इध अनुपसम्पन्‍नो नाम सामणेरोवाधिप्पेतो।

उय्योजनसिक्खापदवण्णना निट्ठिता।

३. सभोजनसिक्खापदवण्णना

२८०.सभोजनेति एत्थ पठमविकप्पो ‘‘इत्थी च पुरिसो चा’’ति इमिना ततियपदेन युज्‍जति, दुतियविकप्पो पठमेहि द्वीहि। कुलेति घरे। अनुपविसित्वा निसीदनचित्तेन सचित्तकं।

सभोजनसिक्खापदवण्णना निट्ठिता।

४. रहोपटिच्छन्‍नसिक्खापदवण्णना

२८४.इध पञ्‍चमं उपनन्दस्स चतुत्थं होति, तस्मा भिक्खुनिवग्गस्स दसमट्ठकथायं उपरि उपनन्दस्स ‘‘ततियसिक्खापदेना’’ति न पाठो, ‘‘चतुत्थेना’’ति पाठोति वेदितब्बो।

रहोपटिच्छन्‍नसिक्खापदवण्णना निट्ठिता।

५. रहोनिसज्‍जसिक्खापदवण्णना

२८९.रहोनिसज्‍जसिक्खापदं उत्तानत्थमेव।

६. चारित्तसिक्खापदवण्णना

२९४.सभत्तोति निमन्तनभत्तोति पोराणा।

पुरेभत्तञ्‍च पिण्डाय, चरित्वा यदि भुञ्‍जति।

सिया परम्परापत्ति, पच्छाभत्तं न सा सिया॥

पच्छाभत्तञ्‍च गमिको, पुब्बगेहं यदि गच्छे।

एके आपत्तियेवाति, अनापत्तीति एकच्‍चे॥

कुलन्तरस्सोक्‍कमने , आपत्तिमतयो हि ते।

समानभत्तपच्‍चासा, इति आहु इधापरे॥

मता गणिकभत्तेन, समेन्ति नं निमन्तने।

विस्सज्‍जनं समानन्ति, एके सम्मुखतापरे॥

सन्‍निट्ठानत्थिकेहेव, विचारेतब्बभेदतो।

विञ्‍ञू चारित्तमिच्‍चेव, सिक्खापदमिदं विदूति॥

चारित्तसिक्खापदवण्णना निट्ठिता।

७. महानामसिक्खापदवण्णना

३१०.कालन्ति सो। यस्मा सङ्घपवारणायमेवायं विधि, तस्मा ‘‘ञातकानं पवारितान’’न्ति वुत्तं। ‘‘इमिना हि तया पवारितम्ह, अम्हाकञ्‍च इमिना च इमिना च अत्थो’’ति यथाभूतं आचिक्खित्वा विञ्‍ञापेतुं गिलानोव लभति। यं पन वुत्तं पणीतभोजनसिक्खापदे ‘‘महानामसिक्खापदेन कारेतब्बो’’ति, तं सङ्घवसेन पवारितं, भेसज्‍जत्थाय सप्पिआदिभेसज्‍जपञ्‍चकं विञ्‍ञापेति चे, ‘‘न भेसज्‍जेन करणीयेन भेसज्‍जं विञ्‍ञापेती’ति वचनेन पाचित्तियन्ति अत्थो’’ति (पाचि॰ ३०९) लिखितं।

महानामसिक्खापदवण्णना निट्ठिता।

८. उय्युत्तसेनासिक्खापदवण्णना

३११-५.मं दिट्ठेनाति मया दिट्ठेन, मम दस्सनेन वा। एकम्पि सरहत्थं पुरिसन्ति अङ्गपरियापन्‍नं।

उय्युत्तसेनासिक्खापदवण्णना निट्ठिता।

९. सेनावाससिक्खापदवण्णना

३१९.नवमे सेनापरिक्खेपेन वा परिक्खेपारहट्ठानेन वा सञ्‍चरणट्ठानपरियन्तेन वा परिच्छिन्दितब्बा।

सेनावाससिक्खापदवण्णना निट्ठिता।

१०. उय्योधिकसिक्खापदवण्णना

३२४.दसमे एकमेकं दस्सनाय गच्छति, आपत्ति दुक्‍कटस्स। यत्थ ठितो पस्सति, आपत्ति पाचित्तियस्सातिआदि। अट्ठमे पन एकमेकं दस्सनाय गच्छति, आपत्ति दुक्‍कटस्स। यत्थ ठितो पस्सति, आपत्ति दुक्‍कटस्साति पाळि। कस्मा? अङ्गप्पमाणाभेदेपि अनीकविसेसतो। दसमे पन अट्ठमङ्गस्स दस्सनेन दुक्‍कटं सियाति।

उय्योधिकसिक्खापदवण्णना निट्ठिता।

समत्तो वण्णनाक्‍कमेन अचेलकवग्गो पञ्‍चमो।

६. सुरापानवग्गो

१. सुरापानसिक्खापदवण्णना

आयस्मतो यं मुनि सागतस्स,

महिद्धिकत्तस्स निदस्सनेन।

पानस्स दोसो तस्स दस्सनत्थं,

पुब्बेव सो भद्दवतिं पयातो॥

तस्मा पस्सं नागमपोथयित्वा,

विनिस्सटं सागतं इद्धिया च।

नतो सुरापाननिसेधनत्थं,

कोसम्बिमेवज्झगमाति ञेय्यं॥

३२६-८.पसुपालकाति अजपालका। येन मज्‍जति, तस्स बीजतो पट्ठाय। केचि ‘‘सचित्तकपक्खे चित्तं अकुसलमेवाति (कङ्खा॰ अट्ठ॰ पठमपाराजिकवण्णना) वुत्तत्ता वत्थुं जानित्वा पिवतो अकुसल’’न्ति वदन्ति। एवं सति ‘‘अकुसलेनेव पातब्बतायाति न वत्तब्ब’’न्ति वुत्ते ‘‘सचित्तकपक्खमेव सन्धाया’’ति वदन्ति। एवं सति ‘‘कुसलाकुसलाब्याकतचित्तन्ति वत्तब्ब’’न्ति वुत्ते तम्पि ‘‘तब्बहुलनयेन वुत्त’’न्ति वदन्ति। कङ्खावितरणियम्पि अविसेसेत्वा ‘‘अकुसलचित्त’’न्ति (कङ्खा॰ अट्ठ॰ सुरापानसिक्खापदवण्णना) वुत्तं, तस्मा ‘‘तं अकुसलेनेव पिवती’’ति वदन्तीति।

सुरापानसिक्खापदवण्णना निट्ठिता।

२. अङ्गुलिपतोदकसिक्खापदवण्णना

३३०.अङ्गुलिपतोदकसिक्खापदं उत्तानत्थमेव।

३. हसधम्मसिक्खापदवण्णना

३३६.ततिये कथं तिवेदनं? हसाधिप्पायेनेव ‘‘परस्स दुक्खं उप्पादेस्सामी’’ति उदकं खिपन्तस्स दुक्खवेदनं। सेसं उत्तानं।

इदं सञ्‍ञाविमोक्खञ्‍चे, तिकपाचित्तियं कथं।

कीळितंव अकीळाति, मिच्छागाहेन तं सिया॥

एत्तावता कथं कीळा, इति कीळायं एवायं।

अकीळासञ्‍ञी होतेत्थ, विनयत्थं समादये॥

एकन्ताकुसलो यस्मा, कीळायाभिरतमनो।

तस्मा अकुसलं चित्तं, एकमेवेत्थ लब्भतीति॥

हसधम्मसिक्खापदवण्णना निट्ठिता।

४. अनादरियसिक्खापदवण्णना

३४४.‘‘लोकवज्‍जं अतिक्‍कमित्वा ‘इदं अम्हाकं आचरियुग्गहो’ति वदन्तस्स न वट्टती’’ति लिखितं। यं संकिलिट्ठेनेव चित्तेन आपज्‍जति, यं वा अरियपुग्गलो अपञ्‍ञत्ते सिक्खापदे अज्झाचरति, इदं लोकवज्‍जन्ति सब्बत्थिकवादीआदीनि आचरियकुलानि। तत्थ दुतियततियविकप्पो इध न अधिप्पेतो सेखियानं लोकवज्‍जत्ता।

गारय्हो आचरियुग्गहोति एत्थ ‘‘यस्मा उच्छुरसो सत्ताहकालिको, तस्स कसटो यावजीविको, द्विन्‍नंयेव समवायो उच्छुयट्ठि, तस्मा विकाले उच्छुयट्ठिं खादितुं वट्टति गुळहरीटकं विया’ति एवमादिको सम्पति निब्बत्तो गारय्हाचरियवादो न गहेतब्बो’’ति च, पण्णत्तिवज्‍जे पन वट्टतीति ‘‘न पत्तहत्थेन कवाटो पणामेतब्बो’ति इमस्स ‘येन हत्थेन पत्तो गहितो, तेन हत्थेन न पणामेतब्बो, इतरेन पणामेतब्बो’ति अत्थं गहेत्वा तथा आचरन्तो न आपत्तिया कारेतब्बो। ‘तथा बुद्धबोधिचेतियानं पुप्फं गण्हितुं वट्टतीति तथा आचरन्तो’’ति च। तथा आचरति अभयगिरिवासिको। महाविहारवासिनो चे एवं वदन्ति, ‘‘मा एवं वदा’’ति अपसादेतब्बो। तेन वुत्तं ‘‘सुत्तं सुत्तानुलोमञ्‍च उग्गहितकानंयेवा’’तिआदि। ‘‘इदं सब्बं उपतिस्सत्थेरो आहा’’ति च वुत्तं। ‘‘सुत्तानुलोमं अट्ठकथा’’ति लिखितं।

अनादरियसिक्खापदवण्णना निट्ठिता।

५. भिंसापनसिक्खापदवण्णना

३४५.भिंसापनसिक्खापदं उत्तानत्थमेव।

६. जोतिसिक्खापदवण्णना

३५४.‘‘विसिब्बनापेक्खो’’ति वचनतो यस्स अपेक्खा नत्थि, तस्स अनापत्ति।

जोतिसिक्खापदवण्णना निट्ठिता।

७. नहानसिक्खापदवण्णना

३६४.नहानसिक्खापदं उत्तानत्थमेव।

८. दुब्बण्णकरणसिक्खापदवण्णना

३६८.अलभीतिलभो। यथा ‘‘पचतीति पचो, पथतीति पथो’’ति वुच्‍चति, एवं ‘‘लभतीति लभो’’ति कस्मा न वुत्तं? परिनिट्ठितलाभस्सेव इधाधिप्पेतत्ता। मग्गेति सिब्बिनिमग्गे। कप्पकतेन सद्धिं अकप्पकतं सिब्बेति। यावता अधिट्ठानं न विजहति, तावता पुब्बं कप्पमेव। कप्पं न विजहति चे, पुन कप्पं दातब्बन्ति आचरियस्स तक्‍को।

दुब्बण्णकरणसिक्खापदवण्णना निट्ठिता।

९. विकप्पनसिक्खापदवण्णना

३७४.परिभोगो एत्थ कायकम्मं। अपच्‍चुद्धारणं वचीकम्मं।

विकप्पनसिक्खापदवण्णना निट्ठिता।

१०. चीवरापनिधानसिक्खापदवण्णना

३७९.दसमे यस्मा निसीदनसन्थतं चीवरनिसीदनम्पीति उभयम्पि सदसमेव, तस्मा तं उभयम्पि एकतो कत्वा ‘‘निसीदनं नाम सदसं वुच्‍चती’’ति आह। तत्थापि चीवरग्गहणेन चीवरनिसीदनं गहितमेवाति अत्थतो सन्थतनिसीदनमेव वुत्तं होति। यदि एवं ‘‘निसीदनसन्थतं नाम सदसं वुच्‍चती’’ति वत्तब्बन्ति? न, इतरस्स अनिसीदनअदसभावप्पसङ्गतो। एत्थ निसीदनसन्थतस्स पाचित्तियवत्थुत्ता इतरम्पि पाचित्तियवत्थुमेवाति वेदितब्बं तज्‍जातिकत्ता। सस्सामिके सूचिघरे सूचिगणनाय आपत्तियोति पोराणा।

चीवरापनिधानसिक्खापदवण्णना निट्ठिता।

समत्तो वण्णनाक्‍कमेन सुरापानवग्गो छट्ठो।

७. सप्पाणकवग्गो

१. सञ्‍चिच्‍चपाणसिक्खापदवण्णना

३८२.सञ्‍चिच्‍चपाणसिक्खापदं उत्तानत्थमेव।

२. सप्पाणकसिक्खापदवण्णना

३८७.‘‘पाणो अत्थी’’ति जानन्तोपि ‘‘मरिस्सन्ती’’ति अविचारेत्वा पिवतिचे, अनापत्ति।

जले पक्खिपनं पुप्फं, जलप्पवेसनं इदं।

एवं उभिन्‍नं नानत्तं, ञेय्यं ञाणवता सदाति॥

सप्पाणकसिक्खापदवण्णना निट्ठिता।

३. उक्‍कोटनसिक्खापदवण्णना

३९२.ततिये द्वादस उक्‍कोटा वेदितब्बा। तत्थ अकतं कम्मं, दुक्‍कटं कम्मं, पुन कातब्बं कम्मन्ति अनुवादाधिकरणे लब्भन्ति। अनिहटं, दुन्‍निहटं, न पुन हरितब्बन्ति विवादाधिकरणे लब्भन्ति, अविनिच्छितं, दुविनिच्छितं, पुन विनिच्छितब्बन्ति आपत्ताधिकरणे लब्भन्ति। अवूपसन्तं, दुवूपसन्तं, पुन वूपसमेतब्बन्ति किच्‍चाधिकरणे लब्भन्तीति अट्ठकथानयो, पाळियं पनेत्थ मुखमत्तमेव दस्सितं।

उक्‍कोटनसिक्खापदवण्णना निट्ठिता।

४. दुट्ठुल्‍लसिक्खापदवण्णना

३९९.‘‘पाराजिकानीति अत्थुद्धारवसेन दस्सितानी’’ति कथं विञ्‍ञायतीति चे? परिवारपाळितो। वुत्तञ्हि तत्थ ‘‘आपत्ताधिकरणपच्‍चया कति आपत्तियो आपज्‍जति। आपत्ताधिकरणपच्‍चया चतस्सो आपत्तियो आपज्‍जति। भिक्खुनी जानं पाराजिकं धम्मं पटिच्छादेति, आपत्ति पाराजिकस्स। वेमतिका पटिच्छादेति, आपत्ति थुल्‍लच्‍चयस्स। भिक्खु सङ्घादिसेसं पटिच्छादेति, आपत्ति पाचित्तियस्स। आचारविपत्तिं पटिच्छादेति , आपत्ति दुक्‍कटस्सा’’ति (परि॰ २९०)। पाराजिकं पटिच्छादेन्तो भिक्खु अनापत्ति, नो आपत्तिं आपज्‍जति अवुत्तत्ताति चे? न, संकिलिट्ठेन चित्तेन पटिच्छादने विना आपत्तिया असम्भवतो। दुक्‍कटवारे वत्तब्बापि पाराजिकापत्तियो पठमं अत्थुद्धारवसेन सङ्घादिसेसेहि सह वुत्तत्ता न सक्‍का पुन वत्तुन्ति न वुत्ताति वेदितब्बा।

याव कोटि न छिज्‍जतीति चेत्थ यो अन्तमसो पटिच्छादनत्थं अञ्‍ञस्स आरोचेतु वा, मा वा, पटिच्छादनचित्तेनेव आपत्तिं आपन्‍नो। तस्स पुन अञ्‍ञस्स पटिच्छादनत्थं अनारोचनेनेव न कोटि छिन्‍ना होति, किं पुन पटिनिवत्तित्वा वचनेन पयोजनन्ति न अन्तिमस्स अनारोचनेन छिन्‍ना होति, अप्पटिच्छादनेन एव छिन्‍ना होति, ततो अप्पटिच्छादनत्थं अपुब्बस्स आरोचेतब्बं, ततो पट्ठाय कोटि छिन्‍ना होति, तदभावो पटिनिवत्तित्वा अप्पटिच्छादनत्थं आरोचेतब्बं, एवम्पि कोटि छिन्‍ना होतीति एवं नो पटिभातीति आचरियो। ततियेन दुतियस्साति एत्थ ‘‘दुतियो नाम पठमो’’ति वदन्तानं ‘‘वत्थु पुग्गलो न वत्तब्बो’’ति वारितत्ता न सुन्दरं। अञ्‍ञस्स चतुत्थस्स आरोचनेपि न सुन्दरं। कस्मा? पुब्बेव सुत्वा अञ्‍ञस्स अनारोचितत्ता। ‘‘सुतेन अञ्‍ञस्स आरोचेतब्बं सिया’’ति वदन्ति।

दुट्ठुल्‍लसिक्खापदवण्णना निट्ठिता।

५. ऊनवीसतिवस्ससिक्खापदवण्णना

४०४.पुनप्पुनं उप्पज्‍जनतो बहुधा। हायनवड्ढनन्ति मातुकुच्छिस्मिं चे द्वादसन्‍नं मासानं ऊनताय हायनं कतं। पसूतस्स वड्ढनं कातब्बं। मातुकुच्छिस्मिं चे वड्ढनं कतं। पसूतस्स हायनं कातब्बं। निक्खमनीयपुण्णमासी नाम सावणमासस्स पुण्णमासी। ‘‘पाटिपददिवसेति दुतिये उपगच्छति दिवसे’’ति लिखितं। सो हि पसूतदिवसतो पट्ठाय परिपुण्णवीसतिवस्सो होति। अवसेसानं द्विन्‍नं वस्सानं अधिकदिवसानि होन्तेव, तस्मा निक्‍कङ्खा हुत्वा उपसम्पादेन्ति। तं सन्धायाति गब्भवस्सञ्‍च पवारेत्वा लद्धवस्सञ्‍च अगणेत्वा जातदिवसतो पट्ठाय गणेत्वा एकूनवीसतिवस्सं। एकूनवीसतिवस्सोति ‘‘गब्भवस्सं एव पहाया’’ति लिखितं, तं दुल्‍लिखितं।

६. थेय्यसत्थसिक्खापदवण्णना

४०९.थेय्यसत्थो चे सुद्धमातुगामो द्वे आपत्तियो। अथ भिक्खुनियो, समयो रक्खति। थेय्यसत्थभावस्स ठानं कत्वा रक्खणीयत्ता सहधम्मिकानं रक्खतियेवाति एके। थेय्यभावे न सहधम्मिकता, तस्मा न रक्खति एवाति एके। अपाराजिकथेय्यभावे सति सहधम्मिकभावोति चे? इतरस्मिं इतरन्ति समयो अनिस्सटो आपज्‍जति। भिक्खु थेय्यसत्थो चे, यथावत्थुकमेव। थेय्यसत्थे थेय्यसत्थसञ्‍ञी सद्धिं संविधायाति च। ‘‘सद्धि’’न्ति पदं केसुचि नत्थि, तं अननुरूपं। तथा दुतियेपि।

थेय्यसत्थसिक्खापदवण्णना निट्ठिता।

७. संविधानसिक्खापदवण्णना

४१२.‘‘तेन खो पन समयेन अञ्‍ञतरा इत्थी’’ति च पाठो अत्थि, केसुचि नत्थि। नत्थिभावो सुन्दरो ‘‘तेन खो समयेना’’ति अधिकारत्ताति केचि। इध एकतोउपसम्पन्‍ना, सिक्खमाना, सामणेरीति इमापि तिस्सो सङ्गहं गच्छन्ति। इमासं पन समयो रक्खति, अयमिमासं, मातुगामस्स च विसेसो।

८. अरिट्ठसिक्खापदवण्णना

४१७.गहट्ठस्सापि भिक्खुनीदूसककम्मं मोक्खन्तरायिकमेव, तस्मा तस्स पब्बज्‍जापि पटिक्खित्ता। विपाकन्तरायिका अहेतुकत्ता। पुब्बे सञ्‍चिच्‍च आपन्‍ना सम्मुट्ठा सुद्धसञ्‍ञिनो अन्तरायिका एव। सेसाति जातिका। रसेनाति भावेन। अधिकुट्टनट्ठेनाति अधिकरणं कत्वा कुट्टनट्ठेन छिन्दनट्ठेन। असिसूनूपमा कुसलधम्मच्छेदनट्ठेन। सत्तिसूलूपमा चित्तवितुदनट्ठेनाति पोराणा। अनापत्तिपाळियं ‘‘आदिकम्मिकस्सा’’ति मुखारुळ्हवसेन लिखितं।

अरिट्ठसिक्खापदवण्णना निट्ठिता।

९. उक्खित्तसम्भोगसिक्खापदवण्णना

४२५.‘‘तं दिट्ठिं अप्पटिनिस्सट्ठेनाति इमिना लद्धिनानासंवासकतं दीपेती’’ति वुत्तं। तिचित्तन्ति एत्थ विपाकाब्याकतचित्तेन सहवासेय्यं कप्पेय्याति एवमत्थो दट्ठब्बो। अञ्‍ञथा सचित्तकत्ता सिक्खापदस्स किरियाब्याकतं सन्धाय न युज्‍जति।

उक्खित्तसम्भोगसिक्खापदवण्णना निट्ठिता।

१०. कण्टकसिक्खापदवण्णना

४२८.यत्थते न पस्सामाति तेति तं। अथ वा तव रूपादिं न पस्साम। अयं समणुद्देसो पाराजिको होति। ‘‘सचे तं दिट्ठिं पटिनिस्सज्‍जति, सङ्घस्स आरोचेत्वा सङ्घानुमतिया पब्बाजेतब्बो’’ति पोराणगण्ठिपदे वुत्तं, तं न युत्तं, दण्डकम्मनासना हि इधाधिप्पेता। यदि सो पाराजिको, लिङ्गनासना नाम सिया। ते पटिसेवतो नालं अन्तरायायाति च दिट्ठि सत्थरि असत्थादिदिट्ठि न होति। सचे सा यस्स उप्पज्‍जति, सो पाराजिको होति, तस्मिम्पि एवमेव पटिपज्‍जितब्बं संवरे अतिट्ठन्तो लिङ्गनासनायेव नासेतब्बोति आचरियस्स तक्‍को।

कण्टकसिक्खापदवण्णना निट्ठिता।

समत्तो वण्णनाक्‍कमेन सप्पाणकवग्गो सत्तमो।

८. सहधम्मिकवग्गो

१. सहधम्मिकसिक्खापदवण्णना

४३४.सहधम्मिकसिक्खापदं उत्तानत्थमेव।

२. विलेखनसिक्खापदवण्णना

४३८.आपत्तिञ्‍च सतिसम्मोसायाति एत्थ च-सद्दो कत्तब्बञ्‍च न करोतीति दीपेति, न चत्तारि एवाति वुत्तं होति। रट्ठेकदेसो जनपदो। बुद्धकाले अरिट्ठकण्टका सासनपच्‍चत्थिका। ‘‘नालं अन्तरायाया’’ति वचनेन हि ते भगवतो असब्बञ्‍ञुतं दीपेन्ति। परिनिब्बुते भगवति दसवत्थुदीपका वज्‍जिपुत्तका। ते हि विनयसासनपच्‍चत्थिका। परूपहारादिवादा पन सुत्तन्ताभिधम्मप्पच्‍चत्थिका। के पन ते? एकच्‍चे महासङ्घिकादयो, न सब्बेति दीपनत्थं ‘‘परूपहारा…पे॰… वादा’’ति विसेसनवचनमाह। तत्थ ये कुहका पापिच्छका अभूतं उल्‍लपित्वा पटिलद्धवरभोजनानि भुञ्‍जित्वा मुट्ठस्सती निद्दं ओक्‍कमित्वा सुक्‍कविस्सट्ठिं पत्ता, अञ्‍ञेहि तं दिस्वा ‘‘अत्थि अरहतो सुक्‍कविस्सट्ठी’’ति वुत्ते ‘‘मारकायिका उपसंहरन्ती’’ति वत्वा जनं वञ्‍चेन्ति। ये च सम्मापटिपन्‍ना अकुहका, तेपि तं वचनं सुत्वा केचि तंदिट्ठिका होन्ति अधिमानिनो च। अत्तनो सुक्‍कविस्सट्ठिं पस्सित्वापि नाधिमुच्‍चन्ति, अनधिगते अधिकतसञ्‍ञिनोव होन्ति। तथा अत्थि अरहतो अञ्‍ञाणकङ्खावितरणा नामगोत्तादीसु विय सच्‍चेसु परवितरणा परेहि पञ्‍ञत्ता नामानीति अधिप्पायो यथासम्भवं योजेतब्बो। तत्थ विनयधरो ‘‘अट्ठानमेतं, भिक्खवे, अनवकासो , यं अरहतो असुचि मुच्‍चेय्य (कथा॰ ३१३; महाव॰ ३५३)। दिट्ठधम्मा…पे॰… अपरप्पच्‍चया सत्थुसासने’’तिआदीनि (महाव॰ ३०) सुत्तपदानि दस्सेत्वा ते सासनपच्‍चत्थिकेसु निग्गहितं निग्गण्हातीति अधिप्पायो। इतरे ‘‘परियत्ति मूल’’न्ति वादिनो। ‘‘पातिमोक्खे उद्दिस्समाने’’ति निदानवसेन वुत्तं। तथागतस्स विभङ्गपदानि सिद्धानि। सिद्धेयेव किं इमस्स अङ्गानि? गरहितुकामता उपसम्पन्‍नस्स सन्तिके सिक्खापदविवण्णनञ्‍चाति।

विलेखनसिक्खापदवण्णना निट्ठिता।

३. मोहनसिक्खापदवण्णना

४४४.मोहनसिक्खापदं उत्तानत्थमेव।

४. पहारसिक्खापदवण्णना

४५२.रत्तचित्तोति कायसंसग्गरागेन। विहेठेतुकामं पन दिस्वा ‘‘सचे अहं इमं मारेमि, नत्थि मे मोक्खो’’ति चिन्तेत्वा कुपितो सत्तसञ्‍ञं पुरेक्खत्वा पहारं देति, तस्स यथावत्थुकमेव।

पहारसिक्खापदवण्णना निट्ठिता।

५. तलसत्तिकसिक्खापदवण्णना

४५६.‘‘कायं वा कायपटिबद्धं वा’’ति (पाचि॰ ४५६) वचनतो कायादीसु यं उच्‍चारेति , तं तलं नाम। तलमेव तलसत्तिकं। पोथनसमत्थट्ठेन सत्तिकन्ति एके। तं ‘‘उप्पलपत्तम्पी’’ति इमिना नियमेति। एवं कुपिता हि कोपवसेन पोथनासमत्थतं अविचारेत्वा यं किञ्‍चि हत्थगतं पटिक्खिपन्ति, सुखसम्फस्सम्पि होतु, पाचित्तियमेव। यस्मा पहरितुकामताय पहटे पुरिमेन पाचित्तियं। केवलं उच्‍चारेतुकामताय उग्गिरणमत्ते कते इमिना पाचित्तियं। इमिना पन विरज्झित्वा पहारो दिन्‍नो, तस्मा न पहरितुकामताय दिन्‍नत्ता दुक्‍कटं। किमिदं दुक्‍कटं पहारपच्‍चया, उदाहु उग्गिरणपच्‍चयाति? पहारपच्‍चया एव दुक्‍कटं। पुरिमं उग्गिरणपच्‍चया पाचित्तियन्ति सदुक्‍कटं पाचित्तियं युज्‍जति। पुरिमञ्हि उग्गिरणं, पच्छा पहारो। न च पच्छिमपहारं निस्साय पुरिमं उग्गिरणं अनापत्तिवत्थुकं भवितुमरहतीति नो तक्‍कोति आचरियो। ‘‘तेन पहारेन हत्थादीसु यं किञ्‍चि भिज्‍जति, दुक्‍कटमेवा’’ति इमिनापि पहारपच्‍चया दुक्‍कटं। उग्गिरणं यथावत्थुकमेवाति सिद्धं, सुट्ठु वीमंसितब्बं। ‘‘तिरच्छानादीनं असुचिकरणादीनि दिस्वा कुज्झित्वापि उग्गिरन्तस्स मोक्खाधिप्पायो एवा’’ति वदन्ति।

तलसत्तिकसिक्खापदवण्णना निट्ठिता।

६. अमूलकसिक्खापदवण्णना

४६२.उपसम्पन्‍ने अनुपसम्पन्‍नसञ्‍ञी अमूलकेन सङ्घादिसेसेनाति सुक्‍कविस्सट्ठिकायसंसग्गादिना सङ्घादिसेसापत्तिया वत्थुनाति वेदितब्बं। न हि अनुपसम्पन्‍नस्स सङ्घादिसेसापत्ति नाम अत्थि।

अमूलकसिक्खापदवण्णना निट्ठिता।

७. सञ्‍चिच्‍चसिक्खापदवण्णना

४६८.ऊनवीसतिवस्सो मञ्‍ञेति एत्थ सयं सञ्‍ञाय तथा अमञ्‍ञन्तो कुक्‍कुच्‍चुप्पादनत्थं ‘‘मञ्‍ञे’’ति वदन्तो किं मुसावादेन कारेतब्बोति? न सिया अङ्गसम्पत्तिया, न च केवलं ‘‘मञ्‍ञे’’ति इमिना नियमतो अङ्गसम्पत्ति होति। परमत्थविहितं कत्थचि होति। ‘‘उदकं मञ्‍ञे आदित्त’’न्तिआदिम्हि परो कुक्‍कुच्‍चं उप्पादेतु वा , मा वा, तं अप्पमाणन्ति मातिकाट्ठकथायं (कङ्खा॰ अट्ठ॰ सञ्‍चिच्‍चसिक्खापदवण्णना) ‘‘कुक्‍कुच्‍चुप्पादन’’न्ति तस्स अधिप्पायवसेन वुत्तन्ति।

सञ्‍चिच्‍चसिक्खापदवण्णना निट्ठिता।

८. उपस्सुतिसिक्खापदवण्णना

४७३.इमेसंसुत्वाति एत्थ ‘‘वचन’’न्ति पाठसेसो। एकपरिच्छेदानीति सिया किरिया सिया अकिरियाति इमिना नयेन एकपरिच्छेदानि। एत्थ किञ्‍चापि अञ्‍ञवादकपच्‍चयापत्ति किरिया च विहेसकपच्‍चयापत्ति अकिरिया च, तदुभयं पन एकसिक्खापदन्ति कत्वा तं अञ्‍ञवादकसङ्खातं सिक्खापदं सिया किरिया पठमस्स वसेन, सिया अकिरिया दुतियस्स वसेनाति एवमत्थो दट्ठब्बो।

उपस्सुतिसिक्खापदवण्णना निट्ठिता।

९. कम्मपटिबाहनसिक्खापदवण्णना

४७४.‘‘धम्मिकानं कम्मान’’न्ति (पाचि॰ ४७५) वचनतो एकच्‍चे भिक्खू धम्मिकानं कम्मानं ‘‘छन्दं दम्मी’’ति छन्दं देन्ति, तं तेसं मतिमत्तमेव, न पटिपत्ति। अधम्मं निस्साय खिय्यति, तं वा उक्‍कोटेति, अनापत्ति नेव होतीति? न, तथा छन्ददानकाले अकत्वा पच्छा अधम्मकम्मखिय्यनादिपच्‍चया अनापत्तिवारे वुत्तत्ता। अधम्मेन वा वग्गेन वा न कम्मारहस्स वा कम्मकरणपच्‍चया आपत्तिमोक्खकरणतो अविसेसमेव तथावचनन्ति चे? न, छन्ददानकाले अधम्मकम्मकरणानुमतिया अभावतो, कारकस्सेव वज्‍जप्पसङ्गतो च। गणस्स दुक्‍कटन्ति चे? पारिसुद्धिछन्ददायकाव ते, न गणो अकम्मप्पत्तत्ता, परिवारेपि (परि॰ ४८२ आदयो) कम्मवग्गे कम्मप्पत्तछन्ददायका विसुं वुत्ता। तथापि अधम्मकम्मस्स छन्दो न दातब्बो देन्ते अकप्पियानुमतिदुक्‍कटतो। तत्थ हि योजनदुक्‍कटतो न मुच्‍चन्तीति नो तक्‍कोति आचरियो।

कम्मपटिबाहनसिक्खापदवण्णना निट्ठिता।

१०. छन्दंअदत्वागमनसिक्खापदवण्णना

४८१.सन्‍निपातं अनागन्त्वा चे छन्दं न देति, अनापत्तीति एके। दुक्‍कटन्ति एके धम्मकम्मन्तरायकरणाधिप्पायत्ता। सङ्घमज्झे छन्दं दातुं लभतीति केचि। दिन्‍नछन्दे सङ्घमज्झं पविसित्वा पुन गतेपि छन्दो न पटिप्पस्सम्भेय्याति चे? पटिप्पस्सम्भति। कस्मा? ‘‘अहत्थपासो छन्दारहो’’तिआदीहि विरुज्झनतो। पाळियं पन दातुकामताय हत्थपासं अतिक्‍कमन्तं सन्धाय वुत्तन्ति केचि।

छन्दंअदत्वागमनसिक्खापदवण्णना निट्ठिता।

११. दुब्बलसिक्खापदवण्णना

४८४-५.अदासीति अपलोकेत्वा अदासि। भिक्खूति एत्थ ते छब्बग्गिया अत्तानं परिवज्‍जयित्वा ‘‘सङ्घो’’ति अवत्वा ‘‘भिक्खू’’ति आहंसु। परिणामेन्तीति नेन्ति। तत्थ लाभोति पदुद्धारकरणं इध अनधिप्पेतस्सपि यस्स कस्सचि अत्थुद्धारवसेन लाभदीपनत्थं। चीवरमेव हि इधाधिप्पेतं, तेनेव ‘‘अञ्‍ञं परिक्खारं दिन्‍नं खीयति, आपत्ति दुक्‍कटस्सा’’ति वुत्तं। दिन्‍नन्ति च परिक्खारन्ति च भुम्मत्थे उपयोगवचनं।

दुब्बलसिक्खापदवण्णना निट्ठिता।

१२. परिणामनसिक्खापदवण्णना

४९१.ञातकम्पि परस्स दातुकामं अञ्‍ञस्स दापेति, आपत्ति एव। सब्बत्थ आपुच्छित्वा दातुकामं यथासुखं विचारेतुं लभति।

परिणामनसिक्खापदवण्णना निट्ठिता।

समत्तो वण्णनाक्‍कमेन सहधम्मिकवग्गो अट्ठमो।

९. रतनवग्गो

१. अन्तेपुरसिक्खापदवण्णना

४९४-७.यथा भगवन्तं पयिरुपासति, एवमाकारेन नारहतायं पुरिसो पापो होतुं, न होति पापोति अत्थो, कारणत्थं वा। तन्ति निपातमत्तं, यतोति वा अत्थो। हत्थिसम्मद्दन्ति सङ्घाटसम्मद्दो, अक्‍कमनं चुण्णताति अत्थो।

२. रतनसिक्खापदवण्णना

५०४.‘‘अधिवासेन्तु गहपतिनो भत्त’’न्ति च ‘‘मे गहपतिनो’’ति च अत्थि।

३. विकालगामप्पविसनसिक्खापदवण्णना

५११-२.अहिना डट्ठवत्थुम्हि सो भिक्खु सन्तं भिक्खुं अनापुच्छा गतो, तस्स कुक्‍कुच्‍चं उदपादि। अदिन्‍नादाने वुत्तनयेनाति गामो गामूपचारोति इदं सन्धाय वुत्तं।

विकालगामप्पविसनसिक्खापदवण्णना निट्ठिता।

४. सूचिघरसिक्खापदवण्णना

५१७.तन्ति भेदनकं। अस्साति पाचित्तियस्स पठमं भेदनकं कत्वा पच्छा देसेतब्बत्ता। एस नयो इतरेसुपि।

५. मञ्‍चसिक्खापदवण्णना

५२१-२.‘‘उच्‍चे मञ्‍चे’’ति च ‘‘उच्‍चा मञ्‍चे’’ति च कत्थचि। आयतोति वित्थतो। अट्ठङ्गुलपादकन्ति भावनपुंसकं, अट्ठङ्गुलप्पमाणं पादकं वा।

मञ्‍चसिक्खापदवण्णना निट्ठिता।

६. तूलोनद्धसिक्खापदवण्णना

५२८.पोटकितूलन्ति यं किञ्‍चि तिणतूलं। पटिलाभेन उद्दालेत्वा पाचित्तियं देसेतब्बन्ति एत्थ किञ्‍चापि पटिलाभमत्तेनेव पाचित्तियन्ति विय दिस्सति, परिभोगेयेव पन आपत्ति दट्ठब्बा, ‘‘अञ्‍ञेन कतं पटिलभित्वा परिभुञ्‍जति, आपत्ति दुक्‍कटस्सा’’ति वचनं एत्थ साधकं।

तूलोनद्धसिक्खापदवण्णना निट्ठिता।

७. निसीदनसिक्खापदवण्णना

५३१.किञ्‍चापि निसीदनस्स जाति न दिस्सति एत्थ, तथापि चीवरक्खन्धके अनुञ्‍ञातत्ता, ‘‘नव चीवरानि अधिट्ठातब्बानी’’ति एत्थ च परियापन्‍नत्ता चीवरजातियेवस्स जातीति वेदितब्बा। ‘‘सन्थतसदिसं सन्थरित्वाति सदस’’न्ति पुब्बे वुत्तनिसीदनसन्थतत्ता उपमेति। लाभे सदसं, अलाभे अदसम्पि वट्टतीति एके, तं न युत्तं। ‘‘निसीदनं नाम सदसं वुच्‍चती’’ति तस्स सण्ठाननियमनतो।

निसीदनसिक्खापदवण्णना निट्ठिता।

८. कण्डुपटिच्छादिसिक्खापदवण्णना

५३९.यदि कण्डुपटिच्छादि नाम अधोनाभि उब्भजाणुमण्डला उप्पन्‍नकण्डुपीळकादिपटिच्छादिका अधिप्पेता, तस्स सुगतस्स सुगतविदत्थिया दीघसो चतस्सो विदत्थियो तिरियं द्वेति इदम्पि अतिमहन्तं पमाणं दिस्सति। सब्बो हि पुरिसो अत्तनो अत्तनो विदत्थिया सत्तविदत्थिको होति, सुगतस्स च एकाविदत्थि मज्झिमस्स पुरिसस्स तिस्सो विदत्थियो होन्ति, तस्मा कण्डुपटिच्छादि पकतिपुरिसस्स पमाणं आपज्‍जति तिरियं, दीघसो पन दिगुणं आपज्‍जतीति। आपज्‍जतु, उक्‍कट्ठपरिच्छेदो तस्सा, चे इच्छति, सब्बम्पि सरीरं पटिच्छादेस्सति, सब्बसरीरगतसङ्घाटि विय बहुगुणं कत्वा निवासेतुकामो निवासेस्सतीति अयं भगवतो अधिप्पायो सिया।

कण्डुपटिच्छादिसिक्खापदवण्णना निट्ठिता।

९. वस्सिकसाटिकसिक्खापदवण्णना

५४२.वस्सिकसाटिकापि उक्‍कट्ठपटिच्छेदवसेन अनुञ्‍ञाता। वस्सकाले केचि सङ्घाटिपरिभोगेनेव परिभुञ्‍जिस्सन्तीति अयं भगवतो अधिप्पायो सिया। किञ्‍चापि इमिना तक्‍केन अनुञ्‍ञाता, ‘‘अप्पमाणिकायो कण्डुपटिच्छादियो धारेन्ति, वस्सिकसाटिकायो धारेन्ती’’ति इमस्मिं वत्थुस्मिं पञ्‍ञत्तत्ता पन अञ्‍ञथा पुण्णपरिच्छेदतो अधिकप्पमाणायो ते भिक्खू धारेसुन्ति कत्वा एतपरमता तासं अनुञ्‍ञाताति वेदितब्बा। एसेव नयो दसमेपि।

वस्सिकसाटिकसिक्खापदवण्णना निट्ठिता।

१०. नन्दत्थेरसिक्खापदवण्णना

५५१.तत्थ भिसिं वा बिब्बोहनं वा करोतीति दीघसो बहूनं भिक्खूनं साधारणत्थं करोतीति युज्‍जति।

नन्दत्थेरसिक्खापदवण्णना निट्ठिता।

समत्तो वण्णनाक्‍कमेन रतनवग्गो नवमो।

पाचित्तियकण्डवण्णना निट्ठिता।

६. पाटिदेसनीयकण्डो

१. पठमपाटिदेसनीयसिक्खापदवण्णना

५५३-५.‘‘पटिदेसेतब्बाकारदस्सन’’न्ति अट्ठकथायं वुत्तत्ता पाळियं आगतवसेनेव आपत्ति देसेतब्बा, न अञ्‍ञथा। ‘‘अन्तरघरे अन्तरघरसञ्‍ञी’’तिआदिना च ‘‘खादनीयभोजनीये अखादनीयअभोजनीयसञ्‍ञी’’तिआदिना च ‘‘भिक्खुनिया अभिक्खुनिसञ्‍ञी’’तिआदिना च नयेन अपरेपि तयो तिकच्छेदा योजेत्वा दस्सेतब्बा।

पठमपाटिदेसनीयसिक्खापदवण्णना निट्ठिता।

२. दुतियपाटिदेसनीयसिक्खापदवण्णना

५५९.‘‘निमन्तिता भुञ्‍जन्तीति पञ्‍चन्‍नं भोजनानं अञ्‍ञतरेन भोजनेन निमन्तिता भुञ्‍जन्ती’’ति किञ्‍चापि वुत्तं, अथ खो अकप्पियनिमन्तनेन निमन्तितता एत्थ न अङ्गं, मातिकाट्ठकथायं वा इध वा अनापत्तिवारे लेसाभावतो, तस्मा ‘‘निमन्तिता’’ति पदस्स अत्थो पुब्बे आचिण्णवसेनेव वुत्तो। अपरेपि तयो तिकच्छेदा योजेत्वा दस्सेतब्बा पदभाजने वुत्तत्ताति वेदितब्बं। यथा तथा हि भुञ्‍जन्तानं तादिसं भिक्खुनिं अवारेन्तानं पाटिदेसनीयमेव। ‘‘एसा वोसासति नाम, वोसासन्ती’’ति च दुविधो पाठो। ‘‘अज्झोहारे अज्झोहारे’’ति वचनेन पुन ‘‘गारय्हं आवुसो धम्म’’न्ति एकवचनं विरुद्धन्ति। पठमं अज्झोहारेयेव आपन्‍नं सन्धाय वुत्तं, तथा अञ्‍ञत्रापि आगच्छति ‘‘आपज्‍जिम्हा’’ति वचनतो। एकेन बहूनम्पि वट्टतीति केचि, तं न सुन्दरं। ‘‘तेहि भिक्खूही’’तिआदिना पाठे वुत्तत्ताति मम तक्‍को। एकेन सहेव ‘‘अहं आपज्‍जि’’न्तिपि वत्तब्बन्ति एकेन द्वीहि तीहि देसेतब्बतो, सब्बेहि एवं वत्तुं वट्टति। ‘‘आपज्‍जिम्हाति सहेवा’’ति वदन्ति। एकेन चे अवारितो, ‘‘अहं, आवुसो, गारय्हं धम्मं आपज्‍जि’’न्तिपि वत्तब्बं।

दुतियपाटिदेसनीयसिक्खापदवण्णना निट्ठिता।

७. सेखियकण्डो

१. परिमण्डलवग्गवण्णना

५७६.‘‘सिक्खितसिक्खेनाति चतूहि मग्गेही’’ति वुत्तं। यस्मा अट्ठङ्गुलमत्तं ओतारेत्वा निवत्थमेव निसिन्‍नस्स चतुरङ्गुलमत्तं होति, तस्मा उभोपेते अट्ठकथावादा एकपरिच्छेदा, ‘‘अड्ढतेय्यहत्थ’’न्ति सुखुमं, एकपत्तं वा सन्धाय वुत्तं। तञ्हि यथाठानेन तिट्ठति। दुपट्टं सन्धाय ‘‘द्विहत्थप्पमाणम्पी’’ति वुत्तन्ति उपतिस्सत्थेरो। एकपट्टं, द्विपट्टं वा हेट्ठिमपरिच्छेदेन ‘‘द्विहत्थप्पमाण’’न्ति वुत्तन्ति वेदितब्बं। वुत्तञ्हि निस्सग्गियअट्ठकथायं ‘‘तिरियं द्विहत्थोपि वट्टती’’ति, तञ्‍च खो अलाभे एव ‘‘अलाभे तिरियं द्विहत्थप्पमाणम्पि वट्टती’’ति वुत्तत्ता। इदं सब्बं अधिट्ठानुपगं सन्धाय वुत्तं। विरुद्धं दिस्वा सज्‍जेतब्बं। नो चे सज्‍जेति, दुक्‍कटं। सचित्तकं पण्णत्तिविजाननचित्तेनेव ‘‘अनादरियं पटिच्‍चा’’ति वुत्तत्ता, न वत्थुविजाननचित्तेन ‘‘इदमेवं कत’’न्ति जानतोपि आपत्तिया अभावतो। फुस्सदेवत्थेरवादोपि एकेन परियायेन युज्‍जति। तथा उपतिस्सत्थेरवादोपि। पञ्‍ञत्तेपि सिक्खापदे अपञ्‍ञत्तेपि यं पकतिया वज्‍जं, तं लोकवज्‍जं। इदं पन पञ्‍ञत्तेयेव वज्‍जं, नापञ्‍ञत्ते, तस्मा इतरलोकवज्‍जेन असदिसत्ता न लोकवज्‍जं। पण्णत्तितो पट्ठाय वज्‍जतो पण्णत्तिवज्‍जं। अनादरियचित्तेनेव आपज्‍जितब्बत्ता सचित्तकं, तस्स चित्तस्स तिवेदनत्ता तिवेदनं। यस्मा अनादरियचित्तता नाम केवलं अकुसलमेव, तञ्‍च पकतिया वज्‍जं, तस्मा इदं लोकवज्‍जं। सञ्‍चिच्‍च वीतिक्‍कमनं नाम दोमनस्सिकस्सेव होतीति दुक्खवेदनं। गण्ठिपदे पन ‘‘पाणातिपातादि विय निवासनादिदोसो लोकगरहितो न होतीति पण्णत्तिवज्‍जन्ति फुस्सदेवत्थेरो’’ति लिखितं।

२. उज्‍जग्घिकवग्गवण्णना

५८६.हसनीयस्मिन्ति हेत्वत्थे भुम्मं, हसितब्बवत्थुकारणाति अत्थो। अन्तरघरे उच्‍चासद्देन अनुमोदनादिं करोन्तस्स अनापत्ति किर। तथा हि महिन्दत्थेरोपि हत्थिसालादीसु महाजनस्स कथेसि।

३. खम्भकतवग्गवण्णना

६०४.सूपो पत्तप्पमाणवण्णनायं वुत्ताकारो। ओलोणी वुच्‍चति कुधितं, गोरसतो पूरा थूपितोति अत्थो।

४. सक्‍कच्‍चवग्गवण्णना

६०९.सूपोदनविञ्‍ञत्तिसिक्खापदे ‘‘सूपो नाम द्वे सूपा’’ति न वुत्तं सूपग्गहणेन पणीतभोजनेहि अवसेसानं सब्बभोजनानं सङ्गण्हनत्थं। अनापत्तिवारे चस्स ‘‘ञातकानं पवारितानं अञ्‍ञस्सत्थाय अत्तनो धनेना’’ति इदं अधिकं। कत्थचि पोत्थके ‘‘अनापत्ति असञ्‍चिच्‍च असतिया अजानन्तस्स गिलानस्स आपदासू’’ति एत्तकमेव वुत्तं, तं न, ‘‘समसूपकं पिण्डपातं भुञ्‍जिस्सामी’’ति इमस्स अनापत्तिवारे ‘‘अञ्‍ञस्सत्थाया’’ति कत्थचि लिखितं, तञ्‍च पमादवसेन लिखितं। ‘‘मुखे पक्खिपित्वा पुन विप्पटिसारी हुत्वा ओगिलितुकामस्सपि सहसा चे पविसति, एत्थ ‘असञ्‍चिच्‍चा’ति वुच्‍चति। विञ्‍ञत्तम्पि अविञ्‍ञत्तम्पि एकस्मिं ठाने ठितं सहसा अनुपधारेत्वा गहेत्वा भुञ्‍जन्तो ‘असतिया’ति वुच्‍चती’’ति लिखितं, अनापत्तिवारे एकच्‍चेसु पोत्थकेसु ‘‘रसरसेति लिखितं, तं गहेतब्ब’’न्ति वुत्तं।

सक्‍कच्‍चवग्गवण्णना निट्ठिता।

५. कबळवग्गवण्णना

६१८.‘‘सब्बं हत्थ’’न्ति वचनतो एकदेसं मुखे पक्खिपन्तस्स अनापत्तीति एकच्‍चे। ‘‘सब्बन्ति वचनतो एकदेसम्पि न वट्टती’’ति वदन्ति, तं युत्तं अनापत्तिवारे अविसेसितत्ता।

६. सुरुसुरुवग्गवण्णना

६२७.‘‘सुरुसुरु’’न्ति च ‘‘सुरोसुरो’’ति च पाठो। सीतीकतोति सीतङ्को। ‘‘सिलकबुद्धोति अरियानं परिहासवचनमेवेत’’न्ति लिखितं।

७. पादुकवग्गवण्णना

६४०.सयं यानगतो हुत्वा, यथा यानगतस्स वे।

अलं वत्तुं तथा नालं, सछत्तो छत्तपाणिनो॥

यथा एत्थ, एवं अञ्‍ञत्रापि।

पकिण्णकवण्णना

कायवाचाचित्ततो समुट्ठहन्तीति कत्वा ‘‘समनुभासनसमुट्ठानानी’’ति वुत्तानि। समनुभासनं किरियं। इमानि किरियानि। धम्मदेसनसमुट्ठानानि वाचाचित्ततोति एत्थ कायवचीविञ्‍ञत्तिभावतो उज्‍जग्घिकउच्‍चासद्दादीसु विय ‘‘कायवाचाचित्ततो’’ति वत्तब्बानीति चे? न वत्तब्बानि। निसीदनगमनाहारपक्खिपनादिकायविञ्‍ञत्तिया सब्भावा तत्थ युत्तं, न धम्मदेसने तादिसस्साभावा।

पकिण्णकवण्णना निट्ठिता।

सेखियकण्डवण्णना निट्ठिता।

८. सत्ताधिकरणसमथवण्णना

‘‘येभुय्यसिका कातब्बा…पे॰… तिणवत्थारको कातब्बो, सो पुग्गलो’’ति च लिखितं।

सत्ताधिकरणसमथवण्णना निट्ठिता।

भिक्खुविभङ्गो निट्ठितो।

॥ नमो तस्स भगवतो अरहतो सम्मासम्बुद्धस्स॥

भिक्खुनीविभङ्गवण्णना

१. पाराजिककण्डवण्णना

गन्थारम्भवण्णना

विभङ्गे विय भिक्खूनं, वित्थारमभिसङ्खतं।

अकत्वा भिक्खुनीनम्पि, वक्खे गण्ठिपदक्‍कमं॥

यो भिक्खुनीनं विभङ्गो अस्स, तस्स संवण्णनाक्‍कमो पत्तोति अत्थो।

गन्थारम्भवण्णना निट्ठिता।

१. पठमपाराजिकसिक्खापदवण्णना

६५६-७.तत्थ तत्थ ठानुप्पत्तिकपञ्‍ञा वीमंसा। पदपटिपाटिया एवाति मातिकापदपटिपाटिया एव। ‘‘वुत्तन्ति सङ्गीतिकानं उपसङ्कप्पनानं विभाजनं वुत्त’’न्ति लिखितं।

२. दुतियपाराजिकसिक्खापदवण्णना

‘‘किस्स पन त्वं अय्ये जानं पाराजिकं धम्मं अज्झापन्‍न’’न्ति वचनतो, ‘‘अट्ठन्‍नं पाराजिकानं अञ्‍ञतरं पाराजिकं अज्झापन्‍न’’न्ति (पाचि॰ ६६६) वचनतो, अन्ते ‘‘उद्दिट्ठा खो अय्यायो अट्ठ पाराजिका धम्मा’’तिआदिवचनतो (पाचि॰ ६७७), परिवारे ‘‘साधारणपञ्‍ञत्ति उभतोपञ्‍ञत्ती’’ति (परि॰ २०१) वचनतो च भिक्खुनिविभङ्गं पत्वा भगवा साधारणानि सिक्खापदानि भिक्खूनं उप्पन्‍नवत्थुस्मिंयेव ‘‘या पन भिक्खुनी छन्दसो मेथुनं धम्मं पटिसेवेय्य अन्तमसो तिरच्छानगतेनपि पाराजिका होति असंवासा’’तिआदिना नयेन सविसेसम्पि अविसेसम्पि मातिकं निक्खिपित्वा अनुक्‍कमेन पदभाजनं, आपत्तिभेदं, तिकच्छेदं, अनापत्तिवारञ्‍च अनवसेसं वत्वा वित्थारेसि। सङ्गीतिकारकेहि पन असाधारणपञ्‍ञत्तियोयेव इध वित्थारिताति वेदितब्बा।

६६६.तत्थ ‘‘अट्ठन्‍नं पाराजिकान’’न्ति इदं केवलं सङ्गीतिकारकानंयेव नयतो निक्खित्तवचनं इतो पुब्बे छट्ठसत्तमट्ठमानं पाराजिकानं अपञ्‍ञत्तत्ता। भगवता पन इदं पञ्‍ञापितमादिसिक्खापदम्पि उपादाय ‘‘छन्‍नं पाराजिकान’’न्ति वुत्तं सिया। इतो उद्धं पञ्‍ञत्तानिपि उपादाय ‘‘अट्ठन्‍नं पाराजिकान’’न्ति वचनं अपरभागे उप्पन्‍नन्ति एकच्‍चे आचरिया। अट्ठकथायं पन ‘‘इदञ्‍च पाराजिकं पच्छा पञ्‍ञत्तं, तस्मा ‘अट्ठन्‍न’न्ति विभङ्गे वुत्त’’न्तिआदि वुत्तं, तस्मा अट्ठकथाचरियानं मतेन सिद्धमेतं यथापञ्‍ञत्तानुक्‍कमवसेनेव सङ्गीतानीति। ‘‘अञ्‍ञासि’’न्ति पाठो। अञ्‍ञासीति न गहेतब्बो। ‘‘दुट्ठुल्‍लसिक्खापदे वुत्तनयेनेवा’’ति वचनतो वज्‍जपटिच्छादिकं या पटिच्छादेति, सापि वज्‍जपटिच्छादिकआयेवाति सिद्धं। किञ्‍चापि वज्‍जपटिच्छादनं पेमवसेन होति, तथापि सिक्खापदवीतिक्‍कमचित्तं दोमनस्सिकमेव होतीति कत्वा ‘‘दुक्खवेदन’’न्ति वुत्तं।

दुतियपाराजिकसिक्खापदवण्णना निट्ठिता।

३. ततियपाराजिकसिक्खापदवण्णना

६६९.इमं अधिप्पायमत्तन्ति ‘‘चोदेत्वा सारेत्वा’’ति एतं। एत्थायं विचारणा – यो भिक्खु उक्खित्तकभिक्खुना समानदिट्ठिको लद्धिनानासंवासको होति, सो अवन्दनीयो, कम्माकम्मे उक्खित्तको विय न गणपूरणो, सहसेय्यम्पि न लभति, न तथा भिक्खुनी। सा हि याव न समनुभट्ठा, ताव गणपूरका च होति, संवासञ्‍च लभति। लद्धिनानासंवासिकानुवत्तिकापि उक्खित्तानुवत्तिकाव होति। उक्खित्तो चे कालङ्कतो, तदनुवत्तको भिक्खु लद्धिनानासंवासको होतियेव। तथा विब्भन्तेपि तस्मिं तित्थियपक्‍कन्तकेपि सिक्खं पच्‍चक्खाय सामणेरभूमियं ठितेपीति एके। तेसं मतेन उक्खित्तके तथाभूतेपि भिक्खुनी तदनुवत्तिका समनुभासितब्बावाति आपज्‍जति। समनुभासनकम्मं सङ्घायत्तं, सङ्घेन सञ्‍चिच्‍च पुरिमकापत्तिं अपनेतुं न युत्तं विय खायति। उक्खेपनीयकम्मञ्‍च आपत्तिअदस्सनमत्ते, अप्पटिकम्ममत्ते, कुदिट्ठिअप्पटिनिस्सज्‍जनमत्ते च करियति, तस्स अनुवत्तनमत्तेन समनुभासित्वा सासनतो चावेतब्बानीति न युत्तन्ति चे? न वत्तब्बमेव, इदं अपाराजिकवत्थूसुपि तप्पसङ्गतो, अनञ्‍ञविसयत्ता च विनयस्स।

ततियपाराजिकसिक्खापदवण्णना निट्ठिता।

४. चतुत्थपाराजिकसिक्खापदवण्णना

६७५.‘‘लोकस्सादसङ्खातस्स मित्तसन्थवस्स वसेन तं दस्सेतुं कायसंसग्गरागेनाति वुत्त’’न्ति लिखितं। तिस्सित्थियोति तीसु इत्थीसु, तिस्सो वा इत्थियो। तं न सेवेति तासु न सेवति। अनरियाति उभतोब्यञ्‍जना। ब्यञ्‍जनस्मिन्ति अत्तनो ब्यञ्‍जने। न सेवेति न सेवति। न चाचरेति नाचरति। वण्णावण्णोति द्वीहिपि सुक्‍कविस्सट्ठि। गमनुप्पादनन्ति सञ्‍चरित्तं।

२. सङ्घादिसेसकण्डवण्णना

१. पठमसङ्घादिसेससिक्खापदवण्णना

६८१.आहतकोति आनीतो, नियतकोति अधिप्पायो। अकप्पियअड्डो नाम सङ्घस्स वा आरामिकपुग्गलस्स वा वत्थुस्स कारणा सङ्घस्स वारिकभावेन सयमेव वा अधिकरणट्ठानं गन्त्वा ‘‘अम्हाकं एसो दासो, दासी, वापी, खेत्तं, आरामो, आरामवत्थु, गावो, गावी, महिंसी, अजा, कुक्‍कुटा’’तिआदिना वोहरति, अकप्पियं। ‘‘अयं अम्हाकं आरामिको आरामिका, अयं वापी इत्थन्‍नामेन सङ्घस्स हत्थे दोहनत्थाय दिन्‍ना। इतो खेत्ततो आरामतो उप्पज्‍जनकचतुपच्‍चया इतो गावितो महिंसितो अजातो उप्पज्‍जनकगोरसा इत्थन्‍नामेन सङ्घस्स दिन्‍ना’’ति पुच्छिते वा अपुच्छिते वा वत्तुं वट्टति। ‘‘कत’’न्ति अवत्वा ‘‘करोन्ती’’ति वचनेन किर अनेनकतं आरब्भ आचिक्खिता नाम होति। गीवाति केवलं गीवा एव होति, न पाराजिकं। कारापेत्वा दातब्बाति एत्थ सचे आवुधभण्डं होति, तस्स धारा न कारेतब्बा, अञ्‍ञेन पन आकारेन सञ्‍ञापेतब्बं। ‘‘तिचित्तं तिवेदन’’न्ति वुत्तत्ता ‘‘मानुस्सयवसेन कोधुस्सयवसेना’’ति तब्बहुलनयेन वुत्तन्ति वेदितब्बं।

पठमसङ्घादिसेससिक्खापदवण्णना निट्ठिता।

२. दुतियसङ्घादिसेससिक्खापदवण्णना

६८३.भटिपुत्तकानं कुमारभटिकानं गणा भटिपुत्तगणा। कप्पन्ति कप्पियं। कप्पगतिकन्ति कप्पियसभावं। पक्‍कन्तासुपीति अत्तनो परिसं ठपेत्वा इतरासु पक्‍कन्तासु। पण्णत्तिं अजानन्ता अरियापि वुट्ठापेन्तीति कत्वा वा कम्मवाचापरियोसाने आपत्तिक्खणे विपाकाब्याकतसमङ्गितावसेन वा ‘‘तिचित्त’’न्ति वुत्तन्ति वेदितब्बं। ‘‘पब्बाजने न दुक्‍कट’’न्ति पोराणगण्ठिपदे वुत्तं।

दुतियसङ्घादिसेससिक्खापदवण्णना निट्ठिता।

३. ततियसङ्घादिसेससिक्खापदवण्णना

६८७.भद्दाकापिलानी महाकस्सपस्स पुराणदुतिया किर। ञातीनं कुलं यस्मिं गामके, तदेतं गामकं ञातिकुलं, कुलसन्‍निहितं गामकं अगमासीति अत्थो। ‘‘अजं गामं नेती’’तिआदीसु विय वा द्विकम्मिकं कत्वा गामकं अगमासि ञातिकुलं अगमासीतिपि युज्‍जति।

४. चतुत्थसङ्घादिसेससिक्खापदवण्णना

६९४.पटिवत्ताति पटिवचनं देन्ति। कम्मदोसन्ति ‘‘अनञ्‍ञाय गणस्स छन्दन्ति एवमादी’’ति लिखितं। कत्तब्बट्ठानदोसन्ति पोराणा। कारकगणस्साति कारकसङ्घस्स। ‘‘भिक्खुनिसङ्घं सन्‍निपातेत्वा’ति वुत्तत्ता कारकसङ्घोपि अयमेवाति चे? पठममेव कारकसङ्घं न आमन्तेत्वा बलक्‍कारेनायं थुल्‍लनन्दा तं भिक्खुनिं ओसारेसी’’ति पोराणगण्ठिपदे वुत्तं, तस्मा कारकभिक्खूनं सम्मुखापि तेसं अनुमतिं पठमं अग्गहेत्वा तं कम्मं न पटिप्पस्सम्भेतब्बन्ति सिद्धं होति, पटिप्पस्सद्धं बलक्‍कारेन न कातब्बमेवाति अधिप्पायो। ‘‘भिक्खुनीपि दिट्ठाविकम्मं कातुं लभती’’ति च तत्थ वुत्तं।

५. पञ्‍चमसङ्घादिसेससिक्खापदवण्णना

७०१.एतंन वुत्तन्ति भिक्खुनिया अवस्सुतभावो दट्ठब्बोति एतं नियमनं न वुत्तं। तं अवचनं पाळिया समेति। कतरपाळियाति? ‘‘अनवस्सुतोति जानन्ती पटिग्गण्हाती’’ति इमाय। यदि हि पुग्गलस्स अवस्सुतभावो न पमाणं, किं इमाय पाळिया पयोजनं, ‘‘अनापत्ति उभो अनवस्सुता होन्ति, अनवस्सुता पटिग्गण्हाती’’ति एत्तकमेव वत्तब्बं सिया। अत्तनो हि अनवस्सुतभावोयेव पमाणन्ति। इमस्स पन अनापत्तिवारस्स अयमत्थो – उभो चे अनवस्सुता, सब्बथापि अनापत्ति। अथ भिक्खुनी अनवस्सुता समाना अवस्सुतम्पि ‘‘अनवस्सुतो’’ति सञ्‍ञाय तस्स हत्थतो पटिग्गण्हाति, एवम्पि अनापत्तीति। अथ सा अनवस्सुतापि अञ्‍ञं अनवस्सुतं वा अवस्सुतं वा ‘‘अवस्सुतो’’ति जानाति, दुक्‍कटमेव। वुत्तञ्हेतं अनन्तरसिक्खापदे ‘‘किस्स त्वं अय्ये न पटिग्गण्हासीति। अवस्सुतो अय्येति…पे॰… नाहं अवस्सुता’’ति।

पञ्‍चमसङ्घादिसेससिक्खापदवण्णना निट्ठिता।

६. छट्ठसङ्घादिसेससिक्खापदवण्णना

७०५.तेनाति तस्मा। यस्मा उय्योजिका न देति न पटिग्गण्हाति, तस्मा पटिग्गहो न विज्‍जतीति अत्थो। इतरिस्सा परिभोगपच्‍चया। ‘‘अकुसलचित्त’’न्ति बाहुल्‍लेन वुत्तं। ‘‘वट्टतीति सञ्‍ञाय वदन्तियापि आपत्ती’’ति वदन्ति।

छट्ठसङ्घादिसेससिक्खापदवण्णना निट्ठिता।

७. सत्तमसङ्घादिसेससिक्खापदवण्णना

७१२-४.कम्मवाचतो पुब्बे आपन्‍नापत्तियो न पटिप्पस्सम्भन्ति। ञत्तिया दुक्‍कटथुल्‍लच्‍चया पटिप्पस्सम्भन्ति सङ्घादिसेसे पत्तेति पोराणा। तं ‘‘अज्झापज्‍जन्तिया’’ति पाळिया समेति। ‘‘सुत्वा न वदन्ती’’ति एत्थ सचे जीवितब्रह्मचरियन्तरायभया न वदन्ति, अनापत्ति । ‘‘अधम्मकम्मे अधम्मकम्मसञ्‍ञा आपत्ति दुक्‍कटस्सा’’ति वुत्तत्ता ‘‘अनापत्ति असमनुभासन्तिया’’ति सङ्घादिसेसं सन्धाय वुत्तं।

सत्तमसङ्घादिसेससिक्खापदवण्णना निट्ठिता।

८. अट्ठमसङ्घादिसेससिक्खापदवण्णना

७१५.पच्‍चाकताति पराजिता। कुलदूसकसिक्खापदस्स, इमस्स च निदानमत्तमेव नानाकरणं। वुत्तञ्हि तत्थ ‘‘तस्स वचनस्स पटिनिस्सग्गाय एव वचनीयो, न कुलदूसननिवारणत्थाया’’ति। एवं सन्ते उभोपेता आपत्तियो अञ्‍ञमञ्‍ञं सभागत्था, तस्मा इदं तस्स अनुपञ्‍ञत्तिसदिसं आपज्‍जति, ततो इदं निरत्थकमेव आपज्‍जतीति? न एवं दट्ठब्बं। वत्थुविसेसतो, कम्मवाचाविसेसतो च उभिन्‍नं नानाकरणं।

अट्ठमसङ्घादिसेससिक्खापदवण्णना निट्ठिता।

९. नवमसङ्घादिसेससिक्खापदवण्णना

७२३.‘‘कायिकवाचसिकेन संसग्गेना’’ति पाठसेसो।

नवमसङ्घादिसेससिक्खापदवण्णना निट्ठिता।

सङ्घादिसेसकण्डवण्णना निट्ठिता।

३. निस्सग्गियकण्डवण्णना

१. पठमनिस्सग्गियपाचित्तियसिक्खापदवण्णना

७३३.पठमनिस्सग्गियपाचित्तियसिक्खापदं उत्तानमेव।

२. दुतियनिस्सग्गियपाचित्तियसिक्खापदवण्णना

७४०.वत्थुसम्पत्तत्ता वा न तस्सा अनापन्‍नकामताय वा अनाणत्तिकताय वा अकालचीवरमदंसु। यथादाने एव उपनेतब्बं, न भाजेतब्बं पुग्गलिकत्ताति अधिप्पायो। अत्थतो हि इतरम्पि यथादाने एव उपनेतब्बमेव। गण्ठिपदे पन ‘‘अय्याय दम्मीति एवं पटिलद्धन्ति निस्सट्ठपटिलद्धं। यथादानेति दायकेहि परिच्‍चत्तविधानेन। उपनेतब्बन्ति अकालचीवरभावेन भाजेतब्बन्ति अधिप्पायो। इध भाजापिताय लद्धचीवरमेव निस्सग्गियं होति, तं विनयकम्मं कत्वापि अत्तना न लभती’’ति लिखितं। यदि निस्सट्ठपटिलद्धं सन्धाय इदं वुत्तं सिया, ‘‘निस्सज्‍जितब्बं सङ्घस्स वा गणस्स वा पुग्गलस्स वा ददेय्य, ददेय्युं, अय्याय दम्मी’’ति वुत्तत्ता तीणिपेतानि पदानि वत्तब्बानि सियुं, तस्मा न केवलं निस्सट्ठपटिलद्धमेव यथादाने उपनेतब्बं, अञ्‍ञाहि भिक्खुनीहि लद्धकोट्ठासम्पि यथादानेयेव उपनेतब्बं।

३. ततियनिस्सग्गियपाचित्तियसिक्खापदवण्णना

७४४.सकसञ्‍ञाय गहितत्ता पाचित्तियं, दुक्‍कटञ्‍च वुत्तं। इतरथा भण्डग्घेन कारेतब्बं।

ततियनिस्सग्गियपाचित्तियसिक्खापदवण्णना निट्ठिता।

४. चतुत्थनिस्सग्गियपाचित्तियसिक्खापदवण्णना

७५२.लेसेन गहेतुकामता, अञ्‍ञस्स विञ्‍ञुस्स विञ्‍ञापनं, पटिलाभोति तीणि अङ्गानि, तस्मा पठमं विञ्‍ञत्तं अलभित्वा अञ्‍ञं ततो ऊनतरम्पि लभेय्य, निस्सग्गियमेव अङ्गसम्पत्तितो। एस नयो अञ्‍ञत्थापि।

चतुत्थनिस्सग्गियपाचित्तियसिक्खापदवण्णना निट्ठिता।

५. पञ्‍चमनिस्सग्गियपाचित्तियसिक्खापदवण्णना

७५३.‘‘तेलं गोपेत्वा सप्पिम्पि मे अत्तनो कुलघरा’’ति किर पाठो।

पञ्‍चमनिस्सग्गियपाचित्तियसिक्खापदवण्णना निट्ठिता।

६. छट्ठनिस्सग्गियपाचित्तियसिक्खापदवण्णना

७५८-७६२.पावारिकस्साति दुस्सवाणिजकस्स। याय चेतापितं, तस्सा निस्सग्गियं, निस्सट्ठपटिलाभो च। ‘‘इतरासं पन जानित्वा वस्सग्गेन पत्तकोट्ठासं सादियन्तीनम्पि न निस्सग्गियं, केवलं यथादाने एव ताहिपि उपनेतब्ब’’न्ति वदन्ति। ‘‘निस्सट्ठं पटिलभित्वापि यथादाने उपनेतब्ब’न्ति वुत्तत्ता सेसाहि गहितं सुग्गहित’’न्ति वदन्ति। एत्थ गिलानायपि न मोक्खो।

छट्ठनिस्सग्गियपाचित्तियसिक्खापदवण्णना निट्ठिता।

७. सत्तमनिस्सग्गियपाचित्तियसिक्खापदवण्णना

७६४.सत्तमे ‘‘सयं याचितकेना’’ति किञ्‍चापि अविसेसेन वुत्तं। तथापि अञ्‍ञदत्थिकेन अत्तुद्देसिकेन सञ्‍ञाचिकेनाति अत्थो वेदितब्बो। अयमत्थो ‘‘भिक्खुनियो तेन च परिक्खारेन सयम्पि याचित्वा भेसज्‍जं चेतापेत्वा परिभुञ्‍जिंसू’’ति इमिस्सा पाळिया अत्थेन संसन्दित्वा वेदितब्बो। तस्सायमत्थो – तेन परिक्खारेन भेसज्‍जं चेतापेत्वा च-सद्देन सञ्‍ञाचिकेन च भेसज्‍जं चेतापेत्वाति इममत्थं दीपेन्तो ‘‘सयम्पि याचित्वा भेसज्‍जं चेतापेत्वा’’ति आह। अञ्‍ञथा ‘‘तेन परिक्खारेन भेसज्‍जं चेतापेत्वा सयम्पि याचित्वा परिभुञ्‍जिंसू’’ति इमिना अनुक्‍कमेन पाळि वत्तब्बा सिया।

पदभाजने पन ‘‘संयाचिकेनाति सयं याचित्वा’’ति तस्सेव पदस्स अधिप्पायमत्तं वुत्तं। सा हि पदभाजनधम्मता। ‘‘सङ्घिकं लाभं परिणत’’न्तिआदिपदानं भाजने पन सा पाकटा। अञ्‍ञथा संयाचिकपदेन को अञ्‍ञो अतिरेकत्थो सङ्गहितो सिया, सो न दिस्सतीति तदेव पदं निप्पयोजनं, इदञ्‍च सिक्खापदं पुरिमेन निन्‍नानाकरणं सिया। अत्तनो हि सन्तकं यथाकामं करणीयन्ति। एत्थ च सङ्घस्स याचनाय वसेन एकतो हुत्वा याचनाय लद्धं संयाचिकन्ति वेदितब्बं। अञ्‍ञथा इतो परेन संयाचिक-सद्देन इदं निब्बिसेसं आपज्‍जतीति ‘‘पुग्गलिकेन संयाचिकेना’’ति इदञ्‍च सिक्खापदं विसुं न वत्तब्बं सिया इधेव तेन आपज्‍जितब्बापत्तिया सङ्गहितत्ता, न च सङ्गहिता आपत्तिद्वयभावतो। मिस्सेत्वा चेतापितत्ता हि एकमेव आपत्तीति चे? न, संयाचिकपदस्स निप्पयोजनभावप्पसङ्गतो, एवं सङ्घिकमहाजनिकपुग्गलिकानि मिस्सित्वा चेतापने एकापत्तिभावप्पसङ्गतो च।

सत्तमनिस्सग्गियपाचित्तियसिक्खापदवण्णना निट्ठिता।

८. अट्ठमनिस्सग्गियपाचित्तियसिक्खापदवण्णना

७६९.गणस्साति आभिधम्मिकादिगणस्स, ऊनचतुवग्गस्स च।

अट्ठमनिस्सग्गियपाचित्तियसिक्खापदवण्णना निट्ठिता।

९. नवमनिस्सग्गियपाचित्तियसिक्खापदवण्णना

७७४.सञ्‍ञाचिकेनाति गणयाचनाय लद्धेनेव, न अञ्‍ञेन।

नवमनिस्सग्गियपाचित्तियसिक्खापदवण्णना निट्ठिता।

१०. दसमनिस्सग्गियपाचित्तियसिक्खापदवण्णना

७७९.दसमे पन ‘‘या पन भिक्खुनी अञ्‍ञदत्थिकेन परिक्खारेन अञ्‍ञुद्दिसिकेन पुग्गलिकेन अञ्‍ञं चेतापेय्य, निस्सग्गियं पाचित्तिय’’न्ति एवंविधेन भवितब्बं, ‘‘पुग्गलिकेन संयाचिकेना’’ति इमिना एकादसमेन भवितब्बं सिया यथाक्‍कमेन सम्भवतो। काममेव चेतं अट्ठुप्पत्तिया अभावतो न वुत्तं, अत्थतो पन गहेतब्बमेव। एत्थ पन सङ्घगणपुग्गलानं पवारितट्ठाने, पुग्गलस्सेव ञातकट्ठाने च अनापत्तिछाया दिस्सति, इदं सब्बं अम्हाकं तक्‍कानुसारवसेनेव वुत्तन्ति कत्वा न सारतो दट्ठब्बं। विचारेत्वा यथा निच्‍चलकारणं दिस्वा यं वा विनयक्‍कमकोविदा अनुजानन्ति, तं तदेव गहेतब्बं। पोराणगण्ठिपदे पन ‘‘आपदासुपि अञ्‍ञं गरुभण्डमेव चेतापेतब्बं, इतरं न वट्टति, भिक्खुस्स पन वट्टती’’ति वुत्तं।

दसमनिस्सग्गियपाचित्तियसिक्खापदवण्णना निट्ठिता।

११. एकादसमनिस्सग्गियपाचित्तियसिक्खापदवण्णना

७८४.‘‘दुतियवग्गस्स पठमे’’ति अवत्वा ‘‘एकादसमे’’ति इध वुत्तं। कस्मा? भिक्खुनिविभङ्गे तिंसककण्डं पत्वा वग्गक्‍कमस्स अवुत्तत्ता। यस्मा पवारितट्ठाने विञ्‍ञत्ति नाम न पटिसेधेतब्बा, तस्मा भगवा अञ्‍ञातिकअप्पवारितट्ठाने धम्मनिमन्तनवसेन वदेय्य ‘‘येनत्थो’’ति वुत्ताय ‘‘चतुक्‍कंसपरमं विञ्‍ञापेतब्ब’’न्ति परिच्छेदं दस्सेतीति वेदितब्बं। अञ्‍ञथा ‘‘निदानेन सिक्खापदं न समेति, सिक्खापदेन च अनापत्तिवारो’’ति च ‘‘अकतविञ्‍ञत्तिया चतुक्‍कंसपरमं विञ्‍ञापेतब्ब’’न्ति च अनिट्ठं आपज्‍जति, तस्मा मातिकाट्ठकथायं चेतापेतब्बन्ति ठपेत्वा सहधम्मिके च ञातकपवारिते च अञ्‍ञेन किस्मिञ्‍चिदेव गुणेन, परितुट्ठेन च वदेय्य ‘‘येनत्थो’’ति वुत्तस्स ‘‘विञ्‍ञापेतब्ब’’न्ति वुत्तनयेन अत्थो दट्ठब्बो। पोराणगण्ठिपदे पन ‘‘इदं परिच्छिन्‍नपवारणं सन्धाय वुत्तं। अनापत्ति ञातकानं पवारितानन्ति पन सब्बप्पकारेन पवत्तं निच्‍चपवारणं सन्धाय वुत्तं। निच्‍चपवारणा नाम यदा येनत्थो, तदा तं वदेय्याथाति एवं पवत्ता । ‘हन्द सीतपावुरण’न्ति देन्तानं पन अतिरेकचतुक्‍कंसम्पि गहेतुं वट्टती’’ति वुत्तं। अयमेव नयो दसमेपीति।

एकादसमनिस्सग्गियपाचित्तियसिक्खापदवण्णना निट्ठिता।

भिक्खुनीविभङ्गे तिंसकवण्णना निट्ठिता।

निस्सग्गियकण्डवण्णना निट्ठिता।

४. पाचित्तियकण्डवण्णना

१. लसुणवग्गो

१. पठमलसुणसिक्खापदवण्णना

७९३-७.अहंलसुणेनाति एत्थ ‘‘पवारेमी’’ति पाठसेसो। बदरसाळवं किर बदरफलानि सुक्खापेत्वा चुण्णेत्वा कत्तब्बा खादनीयविकति।

पठमलसुणसिक्खापदवण्णना निट्ठिता।

२. दुतियसिक्खापदवण्णना

८००.संहरापेय्याति ‘‘संहरति वा संहरापेति वा’’ति पदभाजनं वेदितब्बं। किञ्‍चापि एत्थ आपत्तिभेदो न दस्सितो, तथापि खुरसण्डासकत्तरिआदिपरियेसनघंसनादीसु पुब्बपयोगेसु दुक्‍कटं युज्‍जति, यथा चेत्थ, एवं तलघातकादिम्हि च आपत्तिभेदो पाळियं न वुत्तो। यथासम्भवं पन पुब्बपयोगेसु दुक्‍कटं सम्भवति। एवं भिक्खुस्स एत्थ च लसुणे च दुक्‍कटं। इदं किरियाकिरियन्ति पोराणा। तत्थ ‘‘किरियाकिरिय’’न्ति न वुत्तं।

दुतियसिक्खापदवण्णना निट्ठिता।

५. पञ्‍चमसिक्खापदवण्णना

८१२.पञ्‍चमे उदकसुद्धिपच्‍चये सतिपि फस्ससादियने यथावुत्तपरिच्छेदे अनापत्ति। तत्थ द्विन्‍नं पब्बानन्ति ‘‘द्विन्‍नं अङ्गुलानं सहपवेसने एकेकअङ्गुलस्स एकेकं पब्बं कत्वा द्वे पब्बा, एकङ्गुलप्पवेसने द्विन्‍नं पब्बानं उपरि न वट्टतीति वेदितब्बं। महापच्‍चरियम्पि अयमेव नयो दस्सितो’’ति लिखितं।

पञ्‍चमसिक्खापदवण्णना निट्ठिता।

७. सत्तमसिक्खापदवण्णना

८२०-८२२.‘‘नगरं अतिहरन्ती’’ति पाठो। ‘‘नगरद्वारे अतिहरन्ती’’ति कत्थचि, तत्थ द्वारेनाति अत्थो। अयमेव वा पाठो। तं पुब्बापरविरुद्धन्ति ‘‘पुनपि वुत्त’’न्ति वुत्तं वादं सन्धाय, न ततो पुब्बे तत्थ वुत्तं वादं। एत्थ ‘‘मातरम्पि विञ्‍ञापेत्वाति वचनेन विरुज्झती’’ति लिखितं, तं दुल्‍लिखितं, न हि तेन विरोधं सन्धाय इदं वुत्तन्ति। करणे चे पाचित्तियं, कारापनेपि पाचित्तियेनेव भवितब्बं। अथ कारापने दुक्‍कटं, करणेपि दुक्‍कटेनेव भवितब्बं। न हि करणे वा कारापने वा विसेसो अत्थि आपज्‍जने सतीति अधिप्पायो।

८. अट्ठमसिक्खापदवण्णना

८२४.पोराणा ‘‘निब्बिट्ठराजभटो’’ति पठन्ति। तस्सत्थो वारितभत्तवेतनो राजभटोति। ‘‘तञ्‍ञेव भटपथन्ति तंयेव भत्तवेतन’’न्ति अत्थं वदन्ति। उम्मुकन्ति अलातं।

९. नवमसिक्खापदवण्णना

८३२.‘‘सामिके अपलोकेत्वा छड्डेती’’ति कत्थचि पोत्थके नत्थि, कत्थचि अत्थि, अत्थिभावोव सेय्यो किरियाकिरियत्ता सिक्खापदस्स। इध खेत्तपालका, आरामादिगोपका च सामिका एव। ‘‘सङ्घस्स खेत्ते, आरामे च तत्थ कचवरं न छड्डेतब्बन्ति कतिका चे नत्थि, भिक्खुस्स छड्डेतुं वट्टति सङ्घपरियापन्‍नत्ता, न भिक्खुनीनं। तासम्पि भिक्खुनिसङ्घसन्तके वुत्तनयेन वट्टति, न तत्थ भिक्खुस्स, एवं सन्तेपि सारुप्पवसेनेव कातब्ब’’न्ति वुत्तं।

नवमसिक्खापदवण्णना निट्ठिता।

१०. दसमसिक्खापदवण्णना

८३३.साधुकीळितगीतं वाति एत्थ पाचिण्णगीतम्पि सोतुं न वट्टति। ‘‘गीतुपसञ्हितं पन धम्मं सोतुं वट्टतीति दीघनिकायट्ठकथायं वुत्त’’न्ति वुत्तं। पोराणगण्ठिपदे पन ‘‘धम्मगीतम्पि न वट्टती’’ति वत्वा ‘‘बुद्धस्स गायाम वादेमाति वुत्ते सम्पटिच्छितुं न वट्टति, दुक्‍कटं होती’’ति वुत्तं, ‘‘पूजं करोम, जातकं वा वत्थुं वा देसेमाति वुत्ते ‘साधू’ति सम्पटिच्छितुं वट्टती’’ति च वुत्तं।

२. अन्धकारवग्गवण्णना

१. पठमसिक्खापदवण्णना

८३९.‘‘दिवापि अन्धकारं अत्थि, तप्पटिसेधनत्थं ‘रत्तन्धकारे’ति वुत्त’’न्ति वदन्ति पोराणा। सन्तिट्ठेय्याति एत्थ ठानापदेसेन चतुब्बिधोपि इरियापथो सङ्गहितो, तस्मा पुरिसस्स हत्थपासे तेन सद्धिं चङ्कमनादिं करोन्तिया पाचित्तियमेव। ‘‘सल्‍लपेय्य वा’’ति केवलं निदानवसेन वुत्तं विसेसाभावतो। ‘‘सल्‍लपेय्यवाति पुरिसस्स हत्थपासे ठिता सल्‍लपति, आपत्ति पाचित्तियस्सा’’ति हि वुत्तं, तं न युत्तन्ति एके। कस्मा? यस्मा तस्स पुरिसस्स हत्थपासे ठितेनेव एकं पाचित्तियं। सल्‍लपनेनपि अपरम्पि एकं आपज्‍जतीति नापज्‍जति, कथं पञ्‍ञायतीति? अङ्गवसेन। इमस्स हि रत्तन्धकारता, पुरिसस्स हत्थपासे ठानं वा सल्‍लपनं वा, सहायाभावो, रहोपेक्खताति इमानि चत्तारि अङ्गानि वुत्तानि। तत्थ यदि ठानपच्‍चया एका आपत्ति विसुं सिया, तस्सा चत्तारि अङ्गानि सियुं। यदि सल्‍लपनपच्‍चया एका, तस्सापि पञ्‍च अङ्गानि सियुं। तस्मा मातिकाट्ठकथायं ‘‘चत्तारि वा पञ्‍च वा अङ्गानी’’ति वत्तब्बं सिया, न च वुत्तं, तस्मा सल्‍लपनपच्‍चया विसुं नत्थीति। अत्थियेव, मातिकाट्ठकथावचनञ्‍च तदत्थमेवाति एके। कथं? सहुप्पत्तितो द्विन्‍नं आपत्तीनं। किं वुत्तं होति? सल्‍लपने सति ठानपच्‍चया आपज्‍जितब्बं चतुरङ्गिकं, सल्‍लपनपच्‍चया आपज्‍जितब्बं चतुरङ्गिकन्ति द्वे पाचित्तियानि सहुप्पन्‍नानि एकतो आपज्‍जन्तीति। इदं अयुत्तं पाळिविरोधतो। पाळियञ्हि ‘‘सल्‍लपेय्य वाति पुरिसस्स हत्थपासे ठिता सल्‍लपति, आपत्ति पाचित्तियस्सा’’ति वुत्तं। यदि द्वे सियुं, ‘‘आपत्ति द्विन्‍नं पाचित्तियान’’न्ति न वत्तब्बता सियाति। अयं नयो दुतियादीसुपि यथायोगं वेदितब्बो। एत्थ दुतियेनापि सद्धिं यदि भिक्खुनिया रहोपेक्खता अत्थि, सो चे पुरिसो, न दुतियो, पुरिसगणनाय आपत्तियो। अथ दुतिया भिक्खुनी होति, तस्सा च तेन पुरिसेन सद्धिं रहोपेक्खता अत्थि, सा च भिक्खुनी न दुतिया होति। उभिन्‍नम्पि आपज्‍जतीति एके, विचारेत्वा पन गहेतब्बं। पोराणगण्ठिपदे पन वुत्तं ‘‘हत्थपासे ठानेन दुक्‍कट’’न्ति, तं पाळिया विरुज्झति। ‘‘पुरिसस्स हत्थपासे तिट्ठति, आपत्ति पाचित्तियस्सा’’ति हि पाळि, किंबहुना। चतुत्थसिक्खापदे मातिकाट्ठकथायं (कङ्खा॰ अट्ठ॰ दुतियिकउय्योजनसिक्खापदवण्णना) ‘‘सन्तिट्ठनादीसु तीणि पाचित्तियानी’’तिआदिवचनतो वत्थुगणनाय आपत्ति वेदितब्बा। ‘‘अङ्गानि चेत्थ चत्तारि पञ्‍च वा’’ति वत्तब्बन्ति सन्‍निट्ठानं।

पठमसिक्खापदवण्णना निट्ठिता।

२-३-४. दुतियततियचतुत्थसिक्खापदवण्णना

८४२-६.दुतियततियचतुत्थानि उत्तानानि। सब्बत्थ ‘‘सल्‍लपतीति यं किञ्‍चि तिरच्छानकथं कथेती’’ति पोराणगण्ठिपदे वुत्तं।

५. पञ्‍चमसिक्खापदवण्णना

८५६.‘‘कुलं नाम चत्तारि कुलानी’’ति वुत्तत्ता तित्थियारामे कप्पति तस्स कुलवोहाराभावतोति एके। तित्थियानं खत्तियादिपरियापन्‍नत्ता न कप्पतीति एके। तस्स कप्पियभूमित्ता न युत्तन्ति चे? न, यथावुत्तखत्तियादीनं सम्भवतो। तथापि गोचरकुलं इधाधिप्पेतं। ‘‘उपचारो द्वादसहत्थो’’ति लिखितं।

पञ्‍चमसिक्खापदवण्णना निट्ठिता।

६. छट्ठसिक्खापदवण्णना

८६०.‘‘निसीदन्तिया एका, निपज्‍जन्तिया एका’’ति अवत्वा ‘‘निसीदित्वा गच्छन्तिया’’तिआदि न वत्तब्बं। न हि गमनपच्‍चया एसा आपत्तीति? न, परियोसानाधिप्पायवसेन वुत्तत्ता। ‘‘निसीदित्वा निपज्‍जन्तिया द्वे’’ति वचनेनपि गमनं इध नाधिप्पेतन्ति दस्सितं होति, तथा ‘‘निपज्‍जित्वा निसीदन्तिया द्वे’’तिपि वत्तब्बं। यदि एवं ‘‘तस्मिं अभिनिपज्‍जति, आपत्ति द्विन्‍नं पाचित्तियान’’न्ति कस्मा न वुत्तन्ति चे? अनिसीदित्वापि निपज्‍जनसम्भवतो। निपज्‍जनत्थाय निसीदित्वा निपज्‍जन्तिया निपज्‍जनकपयोगत्ता एका आपत्तीति केचि।

छट्ठसिक्खापदवण्णना निट्ठिता।

७. सत्तमसिक्खापदवण्णना

८६७.अनापत्तिवारे ‘‘धुवपञ्‍ञत्ते’’ति न वुत्तं ‘‘सन्थरित्वा वा सन्थरापेत्वा वा’’ति वुत्तत्ता । इध छट्ठे वुत्तनयेन पकतिया पञ्‍ञत्ते अभिनिसीदति वा अभिनिपज्‍जति वा, पाचित्तियमेव। अञ्‍ञत्थ धुवपञ्‍ञत्तं। इध वुत्तनयेन सन्थरित्वा वा सन्थरापेत्वा वा अभिनिसीदति वा अभिनिपज्‍जति वा, पाचित्तियमेव। उभयत्थापि पञ्‍चमे वुत्तनयेन अनापुच्छा पक्‍कमेय्य, पाचित्तियमेव, अनापत्तिवारे मातिकायं वुत्तकालतो अञ्‍ञकालस्स अपरामट्ठत्ताति नो तक्‍कोति आचरियो। अपिच अत्थापत्तिकाले आपज्‍जति, नो विकालेतिआदित्तिके, अत्थापत्ति रत्तिं आपज्‍जति, नो दिवातिआदित्तिके च अट्ठकथायं इध पञ्‍चमछट्ठसत्तमसिक्खापदेहि सङ्गहितापत्तीनं अपरामट्ठत्ता यथासम्भवं तिविधकाले तिविधमेतं योजेत्वा दस्सेतुं वट्टति एव महापदेसनयानुलोमतो।

सत्तमसिक्खापदवण्णना निट्ठिता।

८. अट्ठमसिक्खापदवण्णना

८६९.अट्ठमे भिक्खुस्स दुक्‍कटं सम्भवति।

अट्ठमसिक्खापदवण्णना निट्ठिता।

९. नवमसिक्खापदवण्णना

८७५-७.दुग्गाहवसेन वा सुग्गाहवसेन वा यथावुत्तनयेन सपथकरणे आपत्तीति वेदितब्बं। यस्मा मातिकायं ‘‘अत्तानं वा परं वा’’ति वुत्तं, तस्मा या अत्तानमेव आरब्भ सपथं करेय्य, तस्सा एका । परमेवारब्भ तस्सा एका। उभोपि आरब्भ तस्सा द्वे आपत्तियो सम्भवन्ति। तिकच्छेदो पनेत्थ परमेवारब्भ सपथकरणं सन्धाय पवत्तो।

नवमसिक्खापदवण्णना निट्ठिता।

१०. दसमसिक्खापदवण्णना

८८२.दसमे अनापत्तिवारो रोदनस्सेव, न वधस्स, तस्मा ञातिब्यसनादीहि फुट्ठापि अत्तानं वधति एव, न रोदति, दुक्‍कटमेव।

दसमसिक्खापदवण्णना निट्ठिता।

अन्धकारवग्गवण्णना निट्ठिता।

३. नग्गवग्गवण्णना

१-२. पठमदुतियसिक्खापदवण्णना

८८३.नग्गवग्गस्स पठमदुतियानि उत्तानानि। पठमे अयं विसेसो – भिक्खुस्स तथा न्हायन्तस्स दुक्‍कटं अञ्‍ञत्र जन्ताघरउदकपटिच्छादीहि। न च विगरहि तत्थ भगवा अत्तनाव अननुञ्‍ञातत्ता उदकसाटिकायाति पोराणा। ‘‘एकमेव निवासेत्वा, पारुपित्वा च नहायितुं न वट्टती’’ति पोराणगण्ठिपदे वुत्तं।

पठमदुतियसिक्खापदवण्णना निट्ठिता।

३. ततियसिक्खापदवण्णना

८९४.ततिये अन्तोचतूहपञ्‍चाहं धुरं निक्खिपन्तियापि आपत्ति एव। लिङ्गपरिवत्ते धुरं निक्खिपन्तिया दुक्‍कटं तिकदुक्‍कटत्ता। ‘‘सम्बहुलाहि भिक्खुनीहि सद्धिन्ति एत्थ चतस्सोपि सम्बहुला’’ति पोराणगण्ठिपदे वुत्तं।

ततियसिक्खापदवण्णना निट्ठिता।

४. चतुत्थसिक्खापदवण्णना

८९८.चतुत्थे सङ्घाटिचारन्ति एत्थ सङ्घाटिआदिवसेन अधिट्ठितानंयेवायं विधि, नेतरासं किर। तत्थ तिचीवरे एव विप्पवासपच्‍चया निस्सग्गियं। अन्तोचीवरकालेपि पञ्‍चाहिकं सङ्घाटिचारं अतिक्‍कामेन्तिया आपत्तियेव। ‘‘विना एतेहि चीवरेहि उपसम्पदं कातुं न वट्टती’’ति पोराणगण्ठिपदे वुत्तं।

चतुत्थसिक्खापदवण्णना निट्ठिता।

५. पञ्‍चमसिक्खापदवण्णना

९०६.पञ्‍चमस्स अनापत्तिवारे ताय वा अविप्पवासायाति अत्थतो लब्भति।

पञ्‍चमसिक्खापदवण्णना निट्ठिता।

८. अट्ठमसिक्खापदवण्णना

९१६.सोकज्झायिका नाम किर मायाकारा। विलुम्पका भण्डकाति च पोराणा।

अट्ठमसिक्खापदवण्णना निट्ठिता।

९. नवमसिक्खापदवण्णना

९२०.‘‘कथञ्हि नाम अतिक्‍कामेस्सती’’ति वुत्तत्ता थुल्‍लनन्दा चीवरकालसमयं आगमेथाति अतिक्‍कमापेसीति सिद्धं होति।

नवमसिक्खापदवण्णना निट्ठिता।

१०. दसमसिक्खापदवण्णना

९२७.दसमे एककुलं एतदवोचुन्ति एत्थ कुलं नाम तस्मिं मनुस्सा, तस्मा बहुवचनं।

दसमसिक्खापदवण्णना निट्ठिता।

नग्गवग्गवण्णना निट्ठिता।

४. तुवट्टवग्गवण्णना

१. पठमसिक्खापदवण्णना

९३४-५.एकाय निपन्‍नाय अपरा निपज्‍जति, आपत्ति पाचित्तियस्साति ‘‘उभिन्‍नम्पि पठमनिपन्‍नाय अनुट्ठापना’’ति वत्वा एत्थ किरियाकिरियन्ति एके, तं अट्ठकथाय विरुज्झति। ‘‘किरिय’’न्ति हि अट्ठकथायं वुत्तं। अथ कस्सा आपत्तीति? उभिन्‍नम्पि निपज्‍जनकिरियं पटिच्‍च। इमस्स अनापत्तिवारे ‘‘ववत्थानं दस्सेत्वा’’ति नत्थि, तस्मा ववत्थानं कत्वा निपज्‍जितुं न वट्टतीति एके। विपुलतरे वट्टतीति एके। ‘‘अन्तरं कत्वा निपज्‍जितुं वट्टती’’ति पोराणगण्ठिपदे लिखितं।

पठमसिक्खापदवण्णना निट्ठिता।

२. दुतियसिक्खापदवण्णना

९४०.ववत्थानं दस्सेत्वाति एत्थ उपरि पारुपनम्पि मज्झे ओभोगं कत्वा उभिन्‍नं अन्तरे ओतारेति, वट्टतीति एके। ववत्थानञ्‍च यथा ठाने न तिट्ठति, तथा अतिक्‍कमित्वा तुवट्टेन्तिया आपत्तियेवाति। ‘‘किरियाकिरिय’’न्ति च पोराणगण्ठिपदे वुत्तं।

दुतियसिक्खापदवण्णना निट्ठिता।

३. ततियसिक्खापदवण्णना

९४१.अत्तनो सज्झायनट्ठाने चे वुड्ढतरा आगच्छति, वन्दनकाले वा, आपुच्छनकिच्‍चं नत्थि। एकस्मिं ओवरके आपुच्छितब्बं। ‘‘अथ ओवरके महाथेरी वसति, सम्मुखे इतरा, आपुच्छितब्बा तस्सा उपचारत्ता’’ति पोराणगण्ठिपदे वुत्तं।

ततियसिक्खापदवण्णना निट्ठिता।

६. छट्ठसिक्खापदवण्णना

९५६.गहपति नाम ठपेत्वा सहधम्मिके वेदितब्बो, तस्मा भिक्खुना वा सामणेरेन वा अननुलोमिकेन संसग्गेन संसट्ठापि न समनुभासितब्बाति सम्भवति एव।

छट्ठसिक्खापदवण्णना निट्ठिता।

९. नवमसिक्खापदवण्णना

९६९.एकिन्द्रियन्ति कायिन्द्रियेनेव एकिन्द्रियं, निगण्ठानं अचेलकानं मतं। कापिला पन ‘‘पञ्‍चिन्द्रिया’’ति मञ्‍ञन्ता एवं वदन्ति ‘‘सचक्खुकत्ता अलाबुमालुवादयो यत्थ आलम्बनं, तत्थ गच्छन्ति। ससोतकत्ता कदलियो मेघगज्‍जितं सुत्वा गब्भं गण्हन्ति। सघानकत्ता पनसादयो कुणपगन्धेन फलन्ति। सजिव्हकत्ता उदकं पिवन्ति येन, सब्बेपि ‘पादपा’ति वुच्‍चन्ति। सकायपसादत्ता इत्थिसम्फस्सेन असोकरुक्खा पुप्फन्ती’’ति। सङ्घातन्ति विनासं।

१०. दसमसिक्खापदवण्णना

९७३.दसमे ‘‘आहुन्दरिका’’ति पठन्ति किर।

दसमसिक्खापदवण्णना निट्ठिता।

तुवट्टवग्गवण्णना निट्ठिता।

५. चित्तागारवग्गवण्णना

१. पठमसिक्खापदवण्णना

९७८.कीळनउपवनं नाम कञ्‍चिनगरस्स नगरुपवनं विय दट्ठब्बं। उय्यानं नाम तत्थेव नन्दवनउय्यानं विय दट्ठब्बं। ‘‘तत्थेव ठत्वा तं तं दिसाभागं विलोकेत्वा पस्सन्तिया पन पाटेक्‍का आपत्तियो’’ति पाठो। एवं वुत्ते यं पुब्बे वुत्तं पदं ‘‘अनुद्धरमाना’’ति, तं एकस्मिंयेव दिसाभागेति सिद्धन्ति एके। उपचारो द्वे लेड्डुपातोति च।

पठमसिक्खापदवण्णना निट्ठिता।

२. दुतियसिक्खापदवण्णना

९८४.‘‘आहरिमेहि वाळेही’’ति ‘‘असंहारिमेना’’ति च दुविधो पाठो। ‘‘विसुं कत्वा पच्छा सद्धिं तेहि वाळेही’’ति लिखितं। यथा तथा वाळरूपे उट्ठपेत्वा कतपादं ‘‘पल्‍लङ्क’’न्ति वुच्‍चति अनापत्तिवारे ‘‘असंहारिमेहि वाळेहि कतं परिभुञ्‍जती’’ति वचनाभावतो।

दुतियसिक्खापदवण्णना निट्ठिता।

३. ततियसिक्खापदवण्णना

९८८.‘‘उज्‍जवुज्‍जवेति हत्थप्पसारणे’’ति लिखितं, तं न युत्तं ‘‘यत्तकं हत्थेन अञ्छितं होति, तस्मिं तक्‍कम्हि वेठिते एकापत्ती’’ति वचनतो।

ततियसिक्खापदवण्णना निट्ठिता।

४. चतुत्थसिक्खापदवण्णना

९९३.‘‘यागुपानेति यागुदाने’’ति लिखितं। पोराणगण्ठिपदे ‘‘मातापितूनं दातुं वट्टती’’ति वुत्तं।

चतुत्थसिक्खापदवण्णना निट्ठिता।

६. छट्ठसिक्खापदवण्णना

१००१.छट्ठे भिक्खुविभङ्गे अचेलकसिक्खापदेन एकपरिच्छेदं। इध अगारिको विसेसो, तस्मा ‘‘असाधारण’’न्ति वदन्ति।

छट्ठसिक्खापदवण्णना निट्ठिता।

९. नवमसिक्खापदवण्णना

१०१५.‘‘खीलनमन्तं दारुसारखीलं मन्तेत्वा पथवियं पवेसेत्वा मारणमन्तं। नागमण्डलंनाम नागरोधमन्तं, पिट्ठादीहि वा परिक्खेपं कत्वा तत्थ मनुस्से पवेसेन्ति गुत्तत्थाया’’ति लिखितं।

नवमसिक्खापदवण्णना निट्ठिता।

६. आरामवग्गवण्णना

१०२१.पठमसिक्खापदं उत्तानत्थमेव।

२. दुतियसिक्खापदवण्णना

१०३०.भिक्खुनी चे भिक्खुं अक्‍कोसति, इमिना सिक्खापदेन पाचित्तियं। भिक्खुनिं चे अक्‍कोसति, ओमसवादेन आपज्‍जति। ओमसवादे सम्मुखाव रुहति, इध पन परम्मुखापि।

तत्रायं विचारणा – भिक्खुविभङ्गे ओसमवादसिक्खापदे भिक्खुनी अनुपसम्पन्‍नट्ठाने तिट्ठतीति कत्वा भिक्खुनिविभङ्गेपि ओमसवादसिक्खापदे भिक्खु भिक्खुनिया अनुपसम्पन्‍नट्ठाने तिट्ठतीति सिद्धं। इध च अनुपसम्पन्‍नस्स अक्‍कोसने दुक्‍कटं वुत्तं, भिक्खुस्स उपसम्पन्‍नस्स अक्‍कोसने पाचित्तियं वुत्तं, तस्मा इमानि द्वे सिक्खापदानि भिक्खुम्हि संसन्दियमानानि अञ्‍ञमञ्‍ञं न समेन्ति। यथा समेन्ति, तथा जानितब्बं। तत्थ पोराणगण्ठिपदे वुत्तनयेन भिक्खुनीनं ओमसवादसिक्खापदे अनुपसम्पन्‍नोति न गहेतब्बो, इदमेत्थ युत्तं। परिभासेय्याति अञ्‍ञत्र अक्‍कोसवत्थूहि। तेसु हि अञ्‍ञतरस्मिं सति ओमसवादपाचित्तियमेवाति एके, तं न युत्तं । ओमसवादे पाळिमुत्तकअक्‍कोसे हि दुक्‍कटं होतीति। दुक्‍कटोकासे इदं पाचित्तियं तेहि निद्दिट्ठं होति, तस्मा ‘‘बाला एता’’ति पाळियं इध आगतपदानंयेव वसेन परिभासनं वेदितब्बं।

दुतियसिक्खापदवण्णना निट्ठिता।

४. चतुत्थसिक्खापदवण्णना

१०३८.निमन्तिता वा पवारिता वाति एत्थ पोराणगण्ठिपदे ताव एवं वुत्तं ‘‘पवारितापि यागुं पातुं लभति, भोज्‍जयागुं न लभति। यागु पनेत्थ खादनीयभोजनीयसङ्ख्यं न गच्छति। निमन्तिता भिक्खुनी पिण्डाय चरित्वा भुञ्‍जितुकामा सामिके अपलोकेत्वाव भुञ्‍जितुं लभति। परम्परभोजनापत्ति भिक्खुनीनं नत्थि। निमन्तिता तं भत्तं भुञ्‍जित्वा वा अभुञ्‍जित्वा वा पवारिता कप्पियं कारापेत्वा भुञ्‍जितुं न लभति, अकप्पियनिमन्तनेन निमन्तियमाना द्वे निमन्तनानि सम्पटिच्छितुञ्‍च न लभती’’ति। तत्थ ‘‘पवारितापि यागुं पातुं लभती’’ति वुत्तं पाळियं, अट्ठकथायञ्‍च अनुञ्‍ञातत्ता। ‘‘निमन्तिता अप्पवारिता यागुं पिवती’’ति हि पाळियं वुत्तं। तत्रिदं सिक्खापदवण्णनापुब्बङ्गमसन्‍निट्ठानं – निमन्तिता वा पवारिता वाति एत्थ वासद्देन अकप्पियनिमन्तनेन निमन्तिता अप्पवारिता ठपेत्वा यागुं अञ्‍ञं खादनीयं वा भोजनीयं वा खादेय्य वा भुञ्‍जेय्य वा, पाचित्तियं अञ्‍ञत्र सामिकानं अपलोकना। परम्परभोजनाभावेन भिक्खुनीनं को गुणो जातोति? न एतासं गुणलाभो, केवलं पाकटतरं जातं। भिक्खूपि विकप्पेत्वा मिस्सेत्वाव भुञ्‍जितुं लभन्ति। समये यथासुखं लभन्ति। इमिना अपलोकनेन किन्ति? पवारिता वा अनिमन्तिता वा न किञ्‍चि कप्पियं कारापेत्वा गिलानातिरित्तम्पि लभन्ति, निमन्तिता च पवारिता च यागुम्पि न लभन्ति, अपलोकेत्वापि न लभन्तीति।

चतुत्थसिक्खापदवण्णना निट्ठिता।

आरामवग्गवण्णना निट्ठिता।

७. गब्भिनिवग्गवण्णना

१. पठमादिसिक्खापदवण्णना

१०६७.‘‘गब्भिनि’’न्ति दस्सनादीहिपि गब्भसम्भवतो वुत्तं। पदभाजनेपि पवारितभावो न दिस्सति।

८. कुमारिभूतवग्गवण्णना

२. दुतियादिसिक्खापदवण्णना

११२४.‘‘अनुजानामि , भिक्खवे, अट्ठारसवस्साय कुमारिभूताय…पे॰… सिक्खासम्मुतिं दातु’’न्ति इध वुत्तं विय ‘‘अनुजानामि, भिक्खवे, दसवस्साय गिहिगताय…पे॰… सिक्खासम्मुतिं दातु’’न्ति न वुत्तं, तस्मा ‘‘परिपुण्णद्वादसवस्साय एव गिहिगताय सिक्खासम्मुति दातब्बा’’ति वुत्तं। गिहिगताय सिक्खासम्मुति दातब्बाति एकेति कत्वा दसवस्सायपि वट्टति । कस्मा? ‘‘अनापत्ति परिपुण्णद्वादसवस्सं परिपुण्णसञ्‍ञा वुट्ठापेती’ति (पाचि॰ १०९३-१०९५) च ‘अनापत्ति परिपुण्णद्वादसवस्सं गिहिगतं…पे॰… सिक्खितसिक्खं वुट्ठापेती’ति (पाचि॰ १०९७-११०१) च वुत्तत्ता’’ति पोराणगण्ठिपदे वुत्तं। किं इमिना परिहारेन। ‘‘दसवस्साय गिहिगताय सिक्खासम्मुति दातब्बा’’ति हि वुत्तं। ‘‘गिहिगतातिपि वत्तुं न वट्टती’ति सचे वदन्ति, कम्मं कुप्पती’’ति लिखितं।

९. छत्तुपाहनवग्गवण्णना

११. एकादसमादिसिक्खापदवण्णना

१२१४.उपचारं सन्धाय कथितन्ति ‘‘द्वादसहत्थं उपचारो’’ति लिखितं।

निगमनवण्णना

गिरग्गसमज्‍जादीनि ‘‘अचित्तकानि लोकवज्‍जानी’’ति वुत्तत्ता ‘‘नच्‍च’’न्ति वा ‘‘गन्धो’’ति वा अजानित्वापि दस्सनेन, विलिम्पनेन वा आपज्‍जनतो वत्थुअजाननचित्तेन अचित्तकानि। ‘‘नच्‍च’’न्ति वा ‘‘गन्धो’’ति वा जानित्वा पस्सन्तिया, विलिम्पन्तिया च अकुसलत्ता एव लोकवज्‍जानि। चोरिवुट्ठापनादीनि ‘‘चोरी’’तिआदिना वत्थुं जानित्वा करणे एव आपत्तिसब्भावतो सचित्तकानि। उपसम्पदादीनं एकन्तेन अकुसलचित्तेनेव अकत्तब्बत्ता पण्णत्तिवज्‍जानि। ‘‘इध सचित्तकाचित्तकता पण्णत्तिजाननाजाननताय अग्गहेत्वा वत्थुजाननाजाननताय गहेतब्बा’’ति लिखितं। अनुगण्ठिपदे पन ‘‘गिरग्गसमज्‍जादीनि ‘अचित्तकानि लोकवज्‍जानी’ति वुत्तत्ता ‘नच्‍च’न्ति वा ‘सङ्घाणी’ति वा ‘गन्धो’ति वा तस्स नामवसेन अजानित्वा मायाकारस्स मायानि सीसट्ठिआदीनि पटिसङ्खाय पस्सन्तिया, अक्खमालादिअत्थाय सङ्घाणिं कटिया बन्धन्तिया, ‘सेदगन्धं अपनेत्वा बुद्धपूजं करिस्सामी’ति उप्पन्‍नेन चित्तेन गन्धं विलिम्पेत्वा नहायन्तिया च आपत्तिसब्भावतो नामेन सद्धिं नामवसेन वा वत्थुस्स अजाननचित्तेन अचित्तकानि नाम। न अन्धकारे ‘कटिसुत्तमिद’न्ति सञ्‍ञाय सङ्घाणिं गहेत्वा कटियं धारणकाले, मत्तिकासञ्‍ञाय च गन्धं गहेत्वा विलिम्पनकाले आपत्तिसब्भावतो ‘अचित्तकानी’ति वत्तब्बानि। तस्मिं काले अनापत्ति, तेनेव सङ्घाणिया असङ्घाणिसञ्‍ञावारेपि ‘आपत्ति पाचित्तियस्सा’ति पाळि न वुत्ता। यथा ‘खेत्तआबाधपच्‍चया, कटिसुत्तकं धारेती’ति वचनतो विनापि अकुसलेन सङ्घाणिआदीनि सक्‍का धारेतुन्ति सिद्धं, एवं आबाधपच्‍चया विनापि अकुसलेन न सक्‍का सुरं पातुन्ति सिद्धं ‘अनापत्ति आबाधपच्‍चया मज्‍जं पिवती’ति पाळिया अभावतो। अकुसलेन विना मधुपुण्णमुट्ठियं पक्खित्तमज्‍जस्स अज्झोहरणकालादीसु सुरापानापत्तिं आपज्‍जतीति च सिद्धं ‘मज्‍जे अमज्‍जसञ्‍ञी पिवति, आपत्ति पाचित्तियस्सा’ति (पाचि॰ ३२८) वुत्तत्ता। किंबहुना, कामभोगसञ्‍ञाय सद्धिं ‘सङ्घाणी’ति च ‘गन्धो’ति च जानित्वा विना अनापत्तिकारणेन धारेन्तिया एकन्ताकुसलत्ता लोकवज्‍जानि नाम वुच्‍चन्ति। इमिना उपायेन सेसेसुपि नयो नेतब्बो। एत्थ सुरापानाधिकारे उपतिस्सत्थेरवादो’’ति वुत्तं। असंकच्‍चिकसिक्खापदे ‘‘अपरिक्खित्तस्स गामस्स उपचारं ओक्‍कमन्तियाति पाठो’’ति च ‘‘पणीतभोजनविञ्‍ञत्ति, अचेलकसिक्खापदं, निमन्तितस्स चारित्तापज्‍जनं, दुट्ठुल्‍लप्पटिच्छादनं, ऊनवीसतिवस्सुपसम्पदं, मातुगामेन सद्धिं संविधाय अद्धानगमनं, राजन्तेपुरप्पवेसनं, सन्तं भिक्खुं अनापुच्छा विकाले गामप्पवेसनं, निसीदनं, वस्सिकसाटिकन्ति पाठो’’ति च वुत्तं।

निगमनवण्णना निट्ठिता।

पाचित्तियकण्डवण्णना निट्ठिता।

उभतोविभङ्गट्ठकथावण्णना निट्ठिता।

॥ नमो तस्स भगवतो अरहतो सम्मासम्बुद्धस्स॥