महावग्गवण्णना

महावग्गवण्णना

१. महाखन्धकवण्णना

बोधिकथावण्णना

यं खन्धके लीनपदादिभेद-पकासनं दानि सुपत्तकालं।

तस्मा अपुब्बं विनयत्थमेव, वक्खामि सङ्खेपगहणत्थं॥

तत्थ केनट्ठेनायं खन्धकोति? खन्धानं समूहत्ता विभङ्गो विय। ते पन कथन्ति? खन्धानं पकासनतो दीपनतो। खन्धाति चेत्थ पब्बज्‍जादिविनयकम्मसङ्खाता, चारित्तवारित्तसिक्खापदसङ्खाता च पञ्‍ञत्तियो अधिप्पेता। पब्बज्‍जादीनि हि भगवता पञ्‍ञत्तत्ता ‘‘पञ्‍ञत्तियो’’ति वुच्‍चन्ति। पञ्‍ञत्तियञ्‍च खन्ध-सद्दो दिस्सति ‘‘दारुक्खन्धो अग्गिक्खन्धो उदकक्खन्धो’’तिआदीसु विय। तेसं पञ्‍ञत्तिसङ्खातानं खन्धानं पकासनतो वण्णनतो पब्बज्‍जक्खन्धकादयो वीसति ‘‘खन्धका’’ति वुत्ता, अवसाने द्वे तंसदिसत्ता वेलाय सदिसत्ता सीलस्स वेलाति वचनं विय। अपिच भागरासत्थतापेत्थ युज्‍जते तेसं पञ्‍ञत्तीनं भागतो च रासितो च विभत्तत्ता। किं पनेतेसं खन्धकानं अनुपुब्बकारणन्ति? नायं पुच्छा सम्भवति, अञ्‍ञथा वुत्तेसुपि तप्पसङ्गानतिक्‍कमनतो। अथ वा पब्बज्‍जुपसम्पदापुब्बङ्गमत्ता सासनप्पवेसनस्स तदत्थसङ्गहको महाखन्धको पठमं वुत्तो। केनाति चे? धम्मसङ्गाहकत्थेरेहि। भगवता पन तत्थ तत्थ उप्पन्‍नवत्थुं पटिच्‍च तथा तथा वुत्तानि, न इमिना अनुक्‍कमेन। थेरा पन तं तं पयोजनं पटिच्‍च समानजातिके एकज्झं कत्वा अनुक्‍कमेन सज्झायिंसु। सेसानं पयोजनं तत्थ तत्थेव आवि भविस्सति।

खन्धकोविदाति पञ्‍ञत्तिभागरासट्ठेन नेसं खन्धत्थकोविदा, निरुत्तिपटिसम्भिदापारप्पत्ताति अत्थो। तेसं अनुत्तानत्थानं पदानं संवण्णना। कस्मा पनेवं विसेसितन्ति? ततो सेसभागा युत्ता। मातिकाट्ठुप्पत्तिग्गहणम्पेत्थ पदभाजनियग्गहणेनेव वेदितब्बं। येहि अत्था येसं पदविसेसानं अट्ठकथायं पकासिता, तेसं ते पदविसेसे पुन इध वदेय्याम, वण्णनाय परियोसानं कदा भवे ते ते अत्थेति वुत्तं, तं तस्स निद्देसेन युज्‍जति। उत्ताना चेव या पाळि, तस्सा संवण्णनाय किन्ति वत्तब्बं? न हि अत्था उत्तानाति सम्भवति। अधिप्पायानुसन्धीहीतिआदिवचनेहिपि तं वचनं सम्भवतीति चे? न, अत्थग्गहणेन चेत्थ पदविसेसानं गहितत्ता। ते हि अत्थतो अनपेतत्थेन, अभिधानत्थेन वा अत्थोपचारेन वा अत्थाति वेदितब्बा। संवण्णनानयोति संवण्णना नाम अवुत्तेसु उहापोहक्‍कमनिदस्सनतो ‘‘नयो’’ति वुत्तो।

१.उरुवेलाति यथावुत्तवालिकरासिवसेन लद्धनामको गामो, तस्मा समीपत्थे एतं भुम्मं। तथाभावदस्सनत्थं ‘‘नज्‍जा नेरञ्‍जराय तीरे’’तिआदि वुत्तं। अञ्‍ञथा तस्मिं वालिकरासिम्हि विहरतीति आपज्‍जति, ‘‘उरुवेलं पिण्डाय पाविसीति येन उरुवेलसेनानिगमो’’तिआदिवचनविरोधो च। अट्ठकथायं पन मूलकारणमेव दस्सितं। तत्थ तं सन्धाय वुत्तं…पे॰… दट्ठब्बोति निगमनवचनं। तं किमत्थन्ति चे? गामं सन्धाय यथावुत्तपदत्थसम्भवदस्सनत्थं। ‘‘सो पन गामो तदुपचारेन एवं नामं लभती’’ति वचनं पन अवुत्तसिद्धन्ति कत्वा न वुत्तन्ति वेदितब्बं, अथ वा यस्स ‘‘उरुवेला’’ति यथावुत्तवालिकरासिस्स, तस्स समीपगामस्सपि नामं। तत्थ आयस्मा उपालित्थेरो न इध गामं सन्धाय ‘‘उरुवेलायं विहरती’’ति आह गोचरगामपयोजनाभावतो। न हि भगवा तं गामं गोचरं कत्वा तदा तत्थ विहासि, तस्मा एत्थ वालिकरासिस्स समीपे बोधिरुक्खमूले विहारं सन्धाय सो एवमाहाति दस्सेतुकामो अट्ठकथाचरियो एवमाहाति वेदितब्बं, तस्मा भगवतो गामतो दूरतरे अरञ्‍ञे अभिसम्बोधिदीपनेन दुतियुप्पत्तिट्ठाननियमं तीहि पदेहि अकासि थेरोति वेदितब्बं, अञ्‍ञथा पदत्तयवचनपयोजनाभावतो। तत्थ नदन्ता गच्छतीति नदी। नेलञ्‍जलायाति वत्तब्बे ल-कारस्स र-कारं कत्वा ‘‘नेरञ्‍जराया’’ति वुत्तं, कद्दमसेवालविरहितत्ता निद्दोसजलायाति अत्थो, नीलजलायाति तस्सा नाममेव वा एतं।

बोधिरुक्खमूलेति एत्थ च बोधि वुच्‍चति अभिसम्बोधो। सो च अत्थतो भगवतो चतुत्थमग्गञाणं होति ‘‘विमोक्खन्तिकमेतं नाम’’न्ति (पटि॰ म॰ १.१६२) पटिसम्भिदावचनतो। किञ्‍चापि तं नामकरणभूतं चतुत्थफलञाणम्पि वत्तुं सम्भवति, कत्तब्बकिच्‍चानं पन करणतो तं चतुत्थमग्गञाणमेव एत्थ बोधीति वेदितब्बं। तेनेव पाळियं ‘‘ततियविज्‍जाय आसवानं खयञाणाया’’ति तदेव दस्सितं। अट्ठकथायं पन ‘‘बोज्झङ्गा’’ति, ‘‘बोधिपक्खिया धम्मा’’ति च। तत्थ यस्मा चतूसु मग्गेसु ञाणं ‘‘बोधी’’ति वुच्‍चति, तस्मा सामञ्‍ञतो वत्तुकामताधिप्पायवसेन ‘‘बोधि वुच्‍चति चतूसु मग्गेसु ञाण’’न्ति (चूळनि॰ खग्गविसाणसुत्तनिद्देस १२१) वुत्तं इधाधिप्पेतञाणस्सपि तदन्तोगधत्ता। अथ वा पाळियं भगवतो आदिमग्गत्तयवचनस्स वुत्तट्ठानाभावा चतुत्थमग्गञाणमेव भगवतो उप्पन्‍नं, न भगवा सोतापन्‍नादिभावं पत्वा बुद्धो जातोति समयन्तरप्पसङ्गनिवारणत्थं ‘‘चतूसू’’ति वुत्तं आदित्तयस्स चतुत्थउपनिस्सयसम्भवेन बोधिपरियायसिद्धितो। ‘‘पुग्गलोपि सेनासनम्पि उपनिस्सयपच्‍चयेन पच्‍चयो’’ति (पट्ठा॰ १.१.९ पच्‍चयनिद्देस) वचनतो फलहेतुको फलजनको रुक्खो फलरुक्खोति विय बोधिहेतुरुक्खो बोधिरुक्खोति वेदितब्बो। एत्थ ‘‘यस्मा केवलं बोधीति रुक्खस्सपि नामं, तस्मा बोधी’’ति परतो वुत्तं। निग्रोधादिरुक्खतो अस्स विसेसनवचनं पन तदञ्‍ञबोधिमूलप्पसङ्गनिवारणत्थं। मग्गञाणञ्हि कुसलमूलत्ता बोधि च तं मूलञ्‍चाति सङ्ख्यं लभेय्य। पठमाभिसम्बुद्धो निसीदतीति सम्बन्धो। तेन अभिसम्बुद्धदिवसेन सद्धिं अट्ठाहं एकपल्‍लङ्केन निसिन्‍नभावं दस्सेति। एत्थ एक-सद्दो तस्स निसज्‍जासङ्खातस्स पब्बज्‍जानुयोगानुरूपस्स पल्‍लङ्कस्स अञ्‍ञेन इरियापथेन अनन्तरियभावं अथस्स अकोपितभावं दस्सेति। विमुत्तिसुखन्ति एत्थ विमुत्तियं वा सुखन्ति न सम्भवति। पञ्‍चमज्झानिकत्ता भगवतो फलसमापत्तिसङ्खाता विमुत्ति एव अनुजङ्घनट्ठेन निब्बानसुखन्ति विमुत्तिसुखं, तं समापज्‍जनेन पटिसंवेदी अनुभवन्तो निसीदि। वेनेय्यकालानतिक्‍कमनतो तं अपेक्खमानो निसीदि, न विमुत्तिसुखसङ्गेन।

अथ खोति अधिकारन्तरारम्भे निपातद्वयं। तेन विमुत्तिसुखं पटिसंवेदयमानो न पटिच्‍चसमुप्पादं मनसाकासि, किन्तु ततो वुट्ठायाति दस्सेति । पटिवेधवसेनेव सुमनसिकतस्स पटिच्‍चसमुप्पादस्स पुनप्पुनं मनसिकरणं गम्भीरत्ता अस्सादजननतो, न अपुब्बनयदस्सनाधिप्पायतो। पच्‍चक्खभूतसब्बधम्मत्ता भगवतो असम्मोहतो, पटिविद्धस्स विसयतो वा मनसिकरणं पन विजितदेसपच्‍चवेक्खणं विय रञ्‍ञो अपुब्बं पीतिं जनेति। वुत्तञ्हि ‘‘अमानुसी रती होति, सम्मा धम्मं विपस्सतो’’ति (ध॰ प॰ ३७३)। रत्तिया पठमं यामन्ति अच्‍चन्तसंयोगवसेन उपयोगवचनं, तेन तस्स विकप्पनानत्ततं दस्सेति। किञ्‍चापि ‘‘अनुलोमपटिलोमं मनसाकासी’’ति एकतोव वुत्तं, तथापि इमिना अनुक्‍कमेनाति दस्सनत्थं ‘‘अविज्‍जापच्‍चया’’तिआदि। तत्थ च किञ्‍चापि पवत्तिमत्तपच्‍चवेक्खणा अधिप्पेता कथं पञ्‍ञायतीति? पठमभावाय, पटिलोममनसिकरणं पन अनुलोमे पच्‍चयानं, पच्‍चयुप्पन्‍नानञ्‍च तथाभावसाधनत्थं। यस्मा अविज्‍जाय एव निरोधा सङ्खारनिरोधो, न अञ्‍ञथा, तस्मा सङ्खारानं अविज्‍जा पच्‍चयो, तस्सा च सङ्खारा फलन्ति दीपनतो। तथा निब्बानपच्‍चवेक्खणाय अनुलोममनसिकरणं कारणनिरोधा फलनिरोधसाधनत्थं। एत्थ च अनुभावतो निब्बानं दस्सितं। न हि तं अविज्‍जादिनिरोधमत्तन्ति। तत्थ ‘‘यतो खयं पच्‍चयानं अवेदी’’ति वचनेन अनुलोमो नाधिप्पेतोति सिद्धं। मग्गपच्‍चवेक्खणाय वत्तब्बं नत्थि, उभयत्थपि किच्‍चतो, आरम्मणतो च तस्स मग्गस्स विसयतो च तत्थ मग्गो दस्सितो।

तत्थाह – ‘‘पटिच्‍चसमुप्पादं पटिलोमं मनसाकासी’’ति न युज्‍जति, न हि पटिलोमापदेसेन निद्दिट्ठं निब्बानं पटिच्‍चसमुप्पादो भवितुमरहतीति? वुच्‍चते – न, तदत्थजाननतो। अनुलोमपटिलोमन्ति हि भावनपुंसकं। अनुलोमतो, पटिलोमतो च तं पटिच्‍चसमुप्पादं मनसाकासीति हि तत्थ अत्थो। अञ्‍ञथा निरोधस्स पटिलोमप्पसङ्गापत्तियेवापज्‍जति। पटिलोमे च पनेतस्मिं अनुक्‍कमनियमो अनुलोमे अनुक्‍कमनियमतो सिद्धोति वेदितब्बं। एवं सति पटिच्‍चसमुप्पादस्स पटिलोमो नाम अपटिच्‍चसमुप्पादोति सिद्धं होति। तेन वुत्तं अट्ठकथायं ‘‘निरोधो होतीति अनुप्पादो होती’’तिआदि। एवं सन्ते पुब्बापरविरोधो होति। कथं? पटिच्‍चाति हि इमिना फलस्स पच्‍चयपरिग्गहेन, पच्‍चयानञ्‍च पच्‍चयायत्तुपगमनेन तस्स उप्पादाभिमुखभावदीपनतो असमुप्पादो न सम्भवति, तस्मा अपटिच्‍चसमुप्पादोति एवं उभयपटिक्खेपेन पनस्स पटिलोमता वेदितब्बाति एके। तं अयुत्तं तस्स अनुलोमभावनियमनतो, अत्थातिसयाभावतो, तस्मा अप्पटिच्‍चसमुप्पादो तस्स पटिलोमोति वेदितब्बं। तेनेव भगवता पाळियं पच्‍चयपच्‍चयुप्पन्‍ननिरोधो वुत्तो। तत्थ हि ‘‘अविज्‍जाय त्वेव असेसविरागनिरोधा’’ति एवं पच्‍चयस्स समुच्छिन्‍नपच्‍चयभाववसेन पच्‍चयनिरोधं, फलस्स पच्‍चयपटिग्गहाभाववसेन पच्‍चयुप्पन्‍ननिरोधञ्‍च दीपेति। दुविधो पाळियं निरोधो अत्थतो अनुप्पादो नाम होतीति कत्वा अट्ठकथायं ‘‘निरोधो होतीति अनुप्पादो होती’’ति वुत्तं। एवं सन्ते निब्बानं पच्‍चयपच्‍चयुप्पन्‍नानं निरोधमत्तन्ति आपज्‍जतीति चे? न, तस्सानुभावदीपनाधिप्पायतो। विदितवेलायन्ति मनसिकतवेलायन्ति अत्थो, अञ्‍ञथा ततो पुब्बे अविदितप्पसङ्गतो।

झायतोति एत्थ कामं लक्खणूपनिज्झानेन झायतो बोधिपक्खियधम्मा पातुभवन्ति, चतुअरियसच्‍चधम्मा वा पकासन्ति, तथापि पुब्बभागे समथादियानिकविभागदस्सनत्थं आरम्मणूपनिज्झानग्गहणं। चतुसच्‍चधम्मग्गहणं कामं अनुलोमपटिच्‍चसमुप्पाददस्सनाधिकारेन विरुज्झति, तथापि ‘‘यो दुक्खं परिजानाति, सो समुदयं पजहती’’ति लद्धिवसेन कतन्ति वेदितब्बं।

अजपालकथावण्णना

४.सम्मोदीति हितकामताय भगवा तेन ब्राह्मणेन सद्धिं सम्मोदि। वेदेहि अन्तन्ति एत्थ निब्बानं अन्तो नाम। वेदानं वा अन्तं गतत्ताति एत्थ अरहत्तं। तत्थ पठमेन वेदन्तगू यस्मा, तस्मा एव वुसितब्रह्मचरियो। दुतियेन वेदन्तगू यस्मा, तस्मा वुसितब्रह्मचरियोति एवं योजना कातब्बा। किञ्‍चापि ब्राह्मणस्स चतुसच्‍चयुत्तं अत्थतो वुत्तं, उदानगाथायं वुत्तपटिवेधाभावं सन्धाय ‘‘धम्मचक्‍कप्पवत्तन’’न्ति वुच्‍चतीति परिहारो।

अजपालकथावण्णना निट्ठिता।

मुचलिन्दकथावण्णना

५.मुचलिन्दवत्थुम्हि एतमत्थन्ति इदानि वत्तब्बमत्थं सन्धाय वुत्तं। तं विवेकन्ति उपधिविवेकं । ‘‘अब्यापज्‍जं सुखं लोके’’ति इमिना पठममग्गं दस्सेति तेन सत्तेसु मारणवसेन उप्पज्‍जनकब्यापादप्पहानसिद्धितो। ‘‘पाणभूतेसु संयमो’’ति इमिना दुतियमग्गं दस्सेति। मग्गी हि पुग्गलो अवसिट्ठब्यापादतनुत्तवसेन पाणभूतेसु संयतो होति विहिंसाधिप्पायाभावतो। एवं चत्तारो हि मग्गा अनुक्‍कमेनापि गहिता होन्ति।

मुचलिन्दकथावण्णना निट्ठिता।

राजायतनकथावण्णना

६.राजायतनं पातलि। ‘‘चतुद्दिसा आगन्त्वा’’ति पाठसेसो। मुखवट्टियं किरस्स दिन्‍नानं चतुन्‍नम्पि लेखापरिच्छेदो अत्थि, ते वाणिजा देवताय गारवदस्सनेन भगवतो रूपकायदस्सनेन पसन्‍नत्ता सरणं अग्गहेसुं। देवताय ‘‘भगवा राजायतनमूले पठमाभिसम्बुद्धो’’ति वचनं सुत्वा सावकसङ्घाभावं, अभिसम्बुद्धधम्मसब्भावञ्‍च जानिंसूति वेदितब्बं। जानन्तीति बुद्धाति सम्बन्धो।

राजायतनकथावण्णना निट्ठिता।

ब्रह्मयाचनकथावण्णना

७.अधिगतोखो म्यायन्तिआदिम्हि धम्मोति चतुसच्‍चधम्मो, गम्भीरत्ता दुद्दसो। दुद्दसत्ता दुरनुबोधो। सन्तोति निब्बुतो। पणीतोति अतप्पको। इदं द्वयं लोकुत्तरमेव सन्धाय वुत्तं। अतक्‍कावचरोति तक्‍केन आकारपरिवितक्‍केन ओगाहितब्बो न होति, ञाणेनेव अवचरितब्बोति अत्थो। पण्डितवेदनीयोति सम्मापटिपदं पटिपन्‍नेहि पण्डितेहि वेदनीयो। सब्बसङ्खारसमथोतिआदि सब्बं निब्बानमेव। तञ्हि फलूपचारेन एकम्पि समानं तथा तथा वुच्‍चति। रामाति पजा। अनु अनु अच्छरिया अनच्छरिया। तेसं भगवतो पुब्बभागपटिपदं सुतपुब्बानं, धम्मस्स वा गम्भीरभावं अधिगतपुब्बानं। किञ्‍चापि भगवतो चत्तारोपि मग्गा सुखप्पटिपदा, तथापि बोधिसत्तपटिपदं सन्धाय ‘‘किच्छेन मे’’ति वुत्तं। ‘‘पकासितं पकासितु’’न्ति उभयथापि पाठो। परेतेहि युत्तेहि। रागरत्ताति कामरागदिट्ठिरागेहि रत्ता। अत्तनिच्‍चादिगाहका न दक्खन्ति न पस्सिस्सन्ति।

पञ्‍चवग्गियकथावण्णना

१०.इदानि पन सब्बो जनो सद्धाभाजनं उपनेतु, पूरेस्सामि नेसं सङ्कप्पन्ति। अप्परजक्खजातिकोति समापत्तिया विक्खम्भितकिलेसत्ता निक्‍किलेसजातिको। आजानिस्सतीति चे न निट्ठानमकंसु धम्मसङ्गाहका ते विनयक्‍कमञ्‍ञा, अहं देसेय्यं पटिविज्झिस्सतीति अधिप्पायो, ‘‘मुद्धापि तस्स विपतेय्या’’ति (अ॰ नि॰ ८.११; पारा॰ २) एत्थ विय अभूतपरिकप्पो किरेसो। लोके तस्स अधिमुत्तभावदीपनत्थञ्हि इदं वचनं अत्तनो तदुपदेसेन अविदितभावदीपनत्थं। तस्स अनन्तेवासिकभावदीपनत्थन्ति एवमादीनि पनेत्थ पयोजनानि। भगवतोपि खो ञाणन्ति सब्बञ्‍ञुतञ्‍ञाणं तस्स मरणारम्मणं उप्पज्‍जि। तेन ततो पुब्बे तस्स सति धम्मदेसनाय खिप्पं जाननभावारम्मणन्ति दीपेति। परोपदेसतो अजानित्वा पच्‍चक्खतो मरणसच्छिकिरियम्पि दस्सेति। बुद्धानम्पि अनेकञाणसमोधानाभावतो सुवुत्तमेतं। चित्तपुब्बिका हि चित्तप्पवत्ति, अञ्‍ञथा नवसत्तपातुभावप्पसङ्गो। सब्बधम्मानं एकतो गहणे विरुद्धकालानं एकतो जाननप्पसङ्गो। ततो एकञाणस्स वितथभावप्पत्तिदोसो, तस्मा सब्बस्स विनानेकञाणसमोधानं आपज्‍जितधम्मेसु अप्पटिहतञाणवन्तत्ता पन सब्बञ्‍ञू एव भगवाति वेदितब्बं, न सब्बकालं एकतो। आळारादीनं मरणाजाननतोति चे? न, तस्स जाननेन पुथुज्‍जनस्सापि सब्बञ्‍ञुतापत्तिप्पसङ्गतो। यदाभावेन यदाभावो तब्भावेन तस्साभावप्पसङ्गो लोके सिद्धोति। ‘‘भगवतोपि खो ञाणं उदपादी’’ति वचनतो तस्स मरणजाननं सिद्धन्ति कत्वा भवं मतेनेव भगवा सब्बञ्‍ञूति सिद्धं न देवतारोचनतो पुब्बे अजाननतोति चे? न, विसेसं परिग्गहेत्वा अन्तरा पजाननतो, देवताय सब्बञ्‍ञुभावप्पत्तिदोसतो च। न हि सो कस्सचि वचनेन अञ्‍ञासीति।

अपिच किमिदं तत्थ जाननं नाम तदारम्मणञाणुप्पत्तीति चे? न, लोके सब्बञ्‍ञुनो अच्‍चन्ताभावप्पसङ्गतो। साधिका हि मया एकञाणक्खणे सब्बं ञाणं, तदञ्‍ञेसञ्‍च तदञ्‍ञाणानुप्पत्ति। अपिच सब्बञ्‍ञुनो सब्बधम्मविसये ञाणपच्‍चुपट्ठानसिद्धि तस्स ञाणस्स अत्तनाव अत्तनो अविसयोति चे? न, हेतुनिदस्सनानुप्पत्तितो। अपिच ‘‘भगवतोपि खो ञाणं उदपादी’’ति एत्थ विसेसवचनं अत्थि। येन देवतारोचनुत्तरकालमेव भगवतो ञाणं उदपादीति पञ्‍ञायति। न हि वचनपुब्बापरियभावमत्तेन तदत्थपुब्बापरियता होति, तस्मा अयुत्तमेतं। अभिदोसकालंकतोति पठमयामे कालंकतो। ‘‘मज्झिमयामे’’तिपि वदन्ति। उभयत्थपि महाजानियो। सत्तदिवसब्भन्तरे, एकदिवसब्भन्तरे च पत्तब्बमग्गफलतो परिहीनत्ता महती जानि अस्साति महाजानि। तेसु हि द्वीसु आळारो आकिञ्‍चञ्‍ञायतनभवे निब्बत्तो, उदको भवग्गे, तस्मा नेसं धम्मदेसनाय अक्खणे निब्बत्तभावं सन्धाय भगवा एवं चिन्तेसि, न इतो मनुस्सलोकतो चुतिभावं सन्धायाति वेदितब्बं। अबुद्धवेनेय्यतञ्‍च सन्धायाति नो तक्‍को, अञ्‍ञथा अनिट्ठप्पसङ्गोति आचरियो।

बोधिसत्तस्स जातकाले सुपिनपटिग्गाहका चेव लक्खणपरिग्गाहका च अट्ठ ब्राह्मणा। तेसु तयो द्विधा ब्याकरिंसु ‘‘इमेहि लक्खणेहि समन्‍नागतो अगारं अज्झावसन्तो राजा होति चक्‍कवत्ति, पब्बजन्तो बुद्धो’’ति। पञ्‍च ब्राह्मणा ‘‘अगारे न तिट्ठति, बुद्धोव होती’’ति एकंसब्याकरणाव अहेसुं। तेसु पुरिमा तयो यथामन्तपारं गता। इमे पन मन्तपारं अतिक्‍कमन्ता अत्तना लद्धं पुञ्‍ञमहत्तं विस्सज्‍जेत्वा बोधिसत्तं उद्दिस्स पुरेतरमेव पब्बजिंसु। इमे सन्धाय वुत्तं ‘‘पञ्‍चवग्गिया’’ति। ‘‘तेसं पुत्ता’’तिपि वदन्ति, तं अट्ठकथायं पटिक्खित्तं। कस्मा पनेत्थ भगवा ‘‘बहूपकारा खो मे’’ति चिन्तेसि। किं उपकारकानं एव एस धम्मं देसेति, इतरेसं न देसेतीति? नो न देसेति। उपकारानुस्सरणमत्तकेनेव वुत्तन्ति अट्ठकथानयो। अत्तनो कतञ्‍ञुकतवेदिभावप्पकासनत्थं, कतञ्‍ञुतादिपसंसनत्थं, परेसञ्‍च कतञ्‍ञुभावादिनियोजनत्थं, खिप्पजाननप्पसङ्गनिवारणत्थं।

पब्बज्‍जाकथावण्णना

२५.येन समयेन भगवा पञ्‍चवग्गिये पञ्‍चमियं अरहत्ते पतिट्ठापेत्वा सत्तमियं नाळकत्थेरस्स नाळकपटिपदं आचिक्खित्वा भद्दपदपुण्णमायं यसस्स इन्द्रियानं परिपक्‍कभावं ञत्वा तं उदिक्खन्तो बाराणसियं विहासि, तेन समयेन यसो नामाति सम्बन्धो। तस्स किर उप्पत्तितो पट्ठाय तस्स कुलस्स कित्तिसद्दसङ्खातो, परिजनसङ्खातो वा यसो विसेसतो पवड्ढति। तेन तस्स मातापितरो एवं नाममकंसु। ‘‘सुखुमालो’’तिआदि किमत्थं आयस्मता उपालित्थेरेन वुत्तन्ति? पच्छिमजनस्स नेक्खम्मे समुस्साहनजननत्थं। एवं उत्तमभोगसमप्पितानम्पि उत्तमेसु भोगेसु अप्पमत्तकेनापि असुभनिमित्तेन वितज्‍जेत्वा कालाकालं अगणेत्वा विवेकाभिरतिया महन्तं भोगक्खन्धं तिणं विय पहाय गेहतो निक्खमना अहोसि, कस्स पनञ्‍ञस्स न सियाति अधिप्पायो। समङ्गीभूतस्साति तेहि एकत्तं उपगतस्स, अविवित्तस्साति अत्थो। निद्दा ओक्‍कमीति मनापेसुपि विसयेसु पवत्तिं निवारेत्वा तस्स चित्तं अतिक्‍कमित्वा अभिभवित्वा अत्तनो वसं उपनेसीति अत्थो। सब्बरत्तियो चाति तयोपि यामे। तेन परिजनस्स विकारदस्सने कारणं दस्सेति। रत्ति-सद्दो पनेत्थ काले सूरियाभावे, यामे च पवत्ततीति विञ्‍ञेय्यो। यामेविध विञ्‍ञेय्यो तिचीवरविप्पवासे च। कच्छेति कच्छपस्से। कण्ठेति कण्ठस्स हेट्ठा। मुदिङ्गस्स हि उपरि कण्ठं ठपेत्वा सयन्तिया कण्ठे मुदिङ्गं अद्दसाति अत्थो। आळम्बरन्ति पणवं। उभतोमुखस्स तनुका दीघा। वित्थिन्‍नसमतलस्स वादितस्स एतं अधिवचनं। विप्पलपन्तियोति सुपिनदस्सनादिवसेन असम्बन्धपलापं विप्पलपन्तियो। सुसानं मञ्‍ञेति सुसानं विय अद्दस सकं परिजनन्ति सम्बन्धो। आदीनवोति असुभभावो। निब्बिदाय चित्तं सण्ठातीति विमुच्‍चितुकामतासङ्खाताय उक्‍कण्ठाय चित्तं नमीति अत्थो। उदानं उदानेसीति ‘‘इतो पट्ठाय इमाहि इत्थीहि सह नाहं भविस्सामी’’ति अत्तमनवाचं निच्छारेसि। द्वे किर आकारा तस्स पमादसुत्तपरिजनदस्सने पाकटा जाता किलेसानं बलवभावो, असुभाकारस्स अतिओळारिकभावो च। एवं सति ओळारिकतरे च असुभाकारे किलेसवसेनायं सब्बोपि लोको एत्थ पीळितो मुच्छितो। अहो किलेसा बलवतराति हि पस्सतो पस्सतो तस्स द्वेपि ते आकारा पाकटा जाता, येनेवमवोचाति।

‘‘सुवण्णपादुकायो आरोहित्वा’’ति एतेनस्स निस्सङ्गताय विस्सट्ठगमनं दीपेति। सो हि बलवसंवेगाभितुन्‍नहदयत्ता परिजनस्स पबोधे सतिपि अत्तनो गमननिवारणसमत्थभावं असहमानो अत्तानं तक्‍केन्तो विस्सट्ठो अगमासि। अमनुस्साति देवता। ता हि मनुस्सेहि सुगतिपटिवेधञाणसण्ठानादिगुणसामञ्‍ञेन ‘‘अमनुस्सा’’ति वुच्‍चन्ति। न हि असमानजातिका तिरच्छानादयो ‘‘अब्राह्मणा’’ति वा ‘‘अवसला’’ति वा वुच्‍चन्ति, किन्तु जातिसभागताय एव वसलादयो ‘‘अब्राह्मणा’’ति वुच्‍चन्ति, एवं मनुस्सेहि केनचि आकारेन सभागताय देवता ‘‘अमनुस्सा’’ति वुत्ता। अञ्‍ञथा मनुस्सा न होन्तीति तिरच्छानगतापि ‘‘अमनुस्सा’’ति वत्तब्बा भवेय्युं।

दुतियमारकथावण्णना

३५.‘‘तेन हेतुना’’ति वचनतो पाळियं ‘‘योनिसोमनसिकारासम्मप्पधाना’’ति हेत्वत्थे निस्सक्‍कवचनन्ति वेदितब्बं।

दुतियमारकथावण्णना निट्ठिता।

उरुवेलपाटिहारियकथावण्णना

३७-८.वसेय्यामाति ‘‘त्वञ्‍च अहञ्‍च वसेय्यामा’’ति पियवचनेन तस्स सङ्गण्हनत्थं वुत्तं किर। तेजसा तेजन्ति आनुभावेन आनुभावं। तेजोधातुया वा तेजोधातुं। उभिन्‍नं सजोतिभूतानन्ति अनादरत्थे सामिवचनं, भावसत्तमीअत्थे वा। अग्यागारमेव आदित्तं, न तत्थ वसनको सत्तजातिको। अचिन्तेय्यो हि इद्धिविसयो। कस्मा पन भगवा अग्यागारम्पि अनादित्तं नाधिट्ठासीति? अत्तनो दुक्खुप्पादाभावस्स अनतिविम्हादिभावप्पसङ्गतो। किमत्थं परसन्तकं महासम्भारपवत्तं तं विनासेतीति? पुन यथापोराणं इद्धानुभावेन कत्तुकामताधिप्पायतो। परियादिन्‍नोति खयं नीतो। तेजसा तेजन्ति आनुभावेन आनुभावं। अग्यागारस्स परित्तत्ता इतरो अत्थो न सम्भवति। अयमत्थो ‘‘मक्खं असहमानो’’ति इमिना अतिविय समेति। इद्धानुभावमक्खनञ्हि तत्थ मक्खो नाम। पत्तेनाति पदुमपत्तेनातिपि पोराणा। पदुमिनिसण्डे ठितो हि भगवा तत्थ अहोसीति तेसं मति।

बिम्बिसारसमागमकथावण्णना

५५-७.वत्थुकामभूता इत्थियो कामित्थियो। दुतियादयो अस्सासका। यस्मा अनुप्पन्‍ने एव भगवति बुद्धकोलाहलं लोके पठममेव वस्ससहस्सं उप्पज्‍जति। ब्रह्मानो च ब्राह्मणवण्णं अभिनिम्मिनित्वा वेदेसु सहस्सत्तयमत्तं बुद्धपटिसंयुत्तं परियत्तिं पक्खिपित्वा वाचेन्ति, भगवतो जातितो पट्ठाय च बुद्धकथा लक्खणञ्‍ञूहि ब्राह्मणेहि उप्पादिता, पत्थटा लोके, तस्मा युज्‍जन्ति, न अञ्‍ञथा। ‘‘तमद्दस बिम्बिसारो, पासादस्मिं पतिट्ठितो’’तिआदिगाथाहि बोधिसत्तकाले एव अभिसित्तता बिम्बिसारस्स सिद्धा।

सारिपुत्तमोग्गल्‍लानपब्बज्‍जाकथावण्णना

६०.किं काहसीति किं काहति। ‘‘किं करोति, किं करोसी’’ति वा ब्यञ्‍जनं बहुं वत्वाति अत्थो। पटिपादेन्तोति निगमेन्तो। ‘‘पच्‍चब्यथा , पच्‍चब्यथ’’न्तिपि पठन्ति। कप्पनहुतेहीति एत्थ दसकानं सतं सहस्सं, सहस्सानं सतं सतसहस्सं, सतसहस्सानं सतं कोटि, कोटिसतसहस्सानं सतं पकोटि, पकोटिसतसहस्सानं सतं कोटिपकोटि, कोटिपकोटिसतसहस्सानं सतं नहुतन्ति वेदितब्बं। कप्पनहुतेहीति एवमनुसारतो अब्भतीतं नामाति खन्धकभाणकानं पाठोति।

उपज्झायवत्तकथावण्णना

६४.बुद्धुपज्झायकानं इतरेसं एहिभिक्खूनं निवासनपारुपनकप्पतो नेसं विसुं विसुं सदिसत्ता ‘‘दुन्‍निवत्था दुप्पारुता अनाकप्पसम्पन्‍ना’’ति वुत्ता। न केवलञ्‍च इत्थम्भूता पिण्डाय चरन्ति, अपिच मनुस्सानं भुञ्‍जमानानं उपरीतिआदि। मनुस्सा उज्झायन्ति पिपासासहनतो, इतरेसं आकप्पसम्पत्तिया पसन्‍नत्ता च।

नसम्मावत्तनादिकथावण्णना

६८.अधिमत्तं गेहस्सितपेमं न होतीति एत्थ गेहस्सितपेमं न अकुसलमिच्‍चेव दट्ठब्बं खीणासवानम्पि साधारणत्ता इमस्स लक्खणस्स। न खीणासवानं असम्मावत्तनाभावतोति चे? न, तेसं न पणामेतब्बं तंसमन्‍नागमनसिद्धितो, तस्मा ‘‘ममेस भारो’’ति ममत्तकरणं तत्थ पेमन्ति वेदितब्बं। ‘‘एको वत्तसम्पन्‍नो…पे॰… तेसं अनापत्ती’ति एत्थ विय सचे एको वत्तसम्पन्‍नो भिक्खु ‘भन्ते, तुम्हे अप्पोस्सुक्‍का होथ, अहं तुम्हाकं सद्धिविहारिकं, अन्तेवासिकं वा गिलानं वा उपट्ठहिस्सामि, ओवदितब्बं ओवदिस्सामि, इति करणीयेसु उस्सुक्‍कं आपज्‍जिस्सामी’ति वदति, ते एवासद्धिविहारिकादयो ‘भन्ते, तुम्हेव केवलं अप्पोस्सुक्‍का होथा’ति वदन्ति, वत्तं वा न सादियन्ति, ततो पट्ठाय आचरियुपज्झायानं अनापत्ती’’ति वुत्तं।

नसम्मावत्तनादिकथावण्णना निट्ठिता।

राधब्राह्मणवत्थुकथावण्णना

७३.‘‘पूतिमुत्तन्ति मुत्तं पूतिकायो विया’’ति वत्वापि ‘‘पूतिभावेन मुत्तं पटिनिस्सट्ठं भेसज्‍जं पूतिमुत्तभेसज्‍ज’’न्ति लिखितं। सब्बत्थ इत्थन्‍नामोति एकोव न-कारो होति।

राधब्राह्मणवत्थुकथावण्णना निट्ठिता।

आचरियवत्तकथावण्णना

७६.‘‘आयस्मतो निस्साय वच्छामी’’ति वुत्तं। ‘‘आयस्मतो ओवादं निस्साय वसामी’’ति पाठसेसवसेन वेदितब्बा। निस्सायाति वा निस्सया, निस्सयेनाति वुत्तं होति। आयस्मतोति वा उपयोगत्थे सामिवचनं।

आचरियवत्तकथावण्णना निट्ठिता।

निस्सयपटिप्पस्सद्धिकथावण्णना

८३.दिसं गतोति तत्थ धुरनिक्खित्तवासो हुत्वा तिरोगामं गतो। यत्थ निस्सयो लब्भति, तत्थ गन्तब्बन्ति एत्थापि उपज्झाये वुत्तनयेनेव ‘‘कतिपाहेन गमिस्सामी’’ति गमने चेस उस्साहो रक्खति। मा इध पटिक्‍कमीति मा इध गच्छ। सभागा नाम उपज्झायस्स सिस्सा। तत्थ निस्सयं गहेत्वा। यदि एवं को विसेसोति चे? तेन इदं वुच्‍चति ‘‘अप्पेव नाम खमेय्या’’ति। वसितुं वट्टतीति उपज्झायेन परिच्‍चत्तत्ता उपज्झायसमोधानं निरत्थकन्ति अत्थो। सचे उपज्झायो चिरेन अनुग्गहेतुकामो होति, ततो पट्ठाय उपज्झायोव निस्सयो। उपज्झायो चे अलज्‍जी होति, सद्धिविहारिकेन अनेकक्खत्तुं वारेत्वा अविरमन्तं उपज्झायं पहाय विनापि निस्सयपणामनेन अञ्‍ञस्स सन्तिके निस्सयं गहेत्वा वसितब्बं। उपज्झायस्स चे लिङ्गं परिवत्तति, एकदिवसम्पि न रक्खति। पक्खपण्डको चे होति, निस्सयजातिको चे ‘‘उपज्झायस्स सुक्‍कपक्खं आगमेही’’ति वदति, सयमेव वा आगमेति, वट्टति। उपज्झायो चे उक्खेपनियकम्मकतो होति, नानासंवासकभूमियं ठितत्ता निस्सयो पटिप्पस्सम्भति। सम्मावत्तन्तं पन पस्सित्वा कम्मपटिप्पस्सद्धिं आगमेतुं लभति। मानत्ताचारी चे होति, अब्भानं आगमेतब्बं। दीघं चे परिवासं चरति, अञ्‍ञस्स सन्तिके निस्सयो गहेतब्बो, उपज्झायसमोधानं अप्पमाणं। परिवासमानत्तचारिना हि न निस्सयो दातब्बो। यं पन पारिवासिकक्खन्धकट्ठकथायं वुत्तं ‘‘सद्धिविहारिकानम्पि सादियन्तस्स दुक्‍कटमेवा’’तिआदि (चूळव॰ अट्ठ॰ ७५), तं यथावुत्तमत्थं साधेति एव। यं पन वुत्तं ‘‘सचे सद्धापब्बजिता कुलपुत्ता ‘तुम्हे, भन्ते, विनयकम्ममत्तं करोथा’’ति वत्वा वत्तं करोन्तियेव, गामप्पवेसनं आपुच्छन्तियेव, तं वारितकालतो पट्ठाय अनापत्ती’’ति। तं वत्तसादियनपच्‍चया दुक्‍कटाभावमत्तदीपनत्थं, सद्धिविहारिकानं सापेक्खतं वा सन्धाय वुत्तन्ति वेदितब्बं। तस्मा ते चे उपज्झायेन वारितानुरूपमेव पटिपज्‍जन्ति, निस्सयो तेसं पटिप्पस्सद्धोति सिद्धं होति।

द्वे लेड्डुपाते अतिक्‍कमित्वा निवत्ततीति ‘‘एत्तावता दिसापक्‍कन्तो नाम होति, तस्मा अन्तेवासिके अनिक्खित्तधुरेपि निस्सयो पटिप्पस्सम्भति। आचरियुपज्झाया द्वे लेड्डुपाते अनतिक्‍कम्म लेड्डुपातद्वयब्भन्तरे तिरोविहारेपि परिक्खित्ते, अपरिक्खित्ते वा वसितुं वट्टती’’ति लिखितं। अपरिक्खित्तेयेवाति नो तक्‍कोति आचरियो, एत्थ पन अपरिक्खित्तस्स परिक्खेपारहट्ठानतो विमुत्ते अञ्‍ञस्मिं विहारे वसन्तीति अधिप्पायो। विहारोति चेत्थ ‘‘तादिसस्स विहारस्स अन्ते ठिता एका कुटिका अधिप्पेताति उपतिस्सत्थेरो’’ति वुत्तं। तत्थ ‘‘सचे उभोपि आचरियन्तेवासिका केनचि…पे॰… निस्सयो न पटिप्पस्सम्भती’’ति इमिना सामञ्‍ञतो वुत्तेन अट्ठकथावचनेन धम्मसिरित्थेरवादो समेति। अपरिक्खित्ते वाति द्विन्‍नं लेड्डुपातानं अन्तो परिक्खित्तो वा होति अपरिक्खित्तो वा। ‘‘बहिसीम’’न्ति च वुत्तत्ता अन्तोविहारसीमायं द्वे लेड्डुपाते अतिक्‍कमित्वापि वसितुं वट्टतीति सिद्धत्ता पन उपतिस्सत्थेरवादो न समेति। एकावासे हि परिक्खित्ते वा अपरिक्खित्ते वा अन्तमसो अन्तोतियोजनेपि वसतो निस्सयो न पटिप्पस्सम्भति। सो च उपचारसीमाय परिच्छिन्‍नो, सा च उपचारसीमा परिक्खित्तस्स विहारस्स परिक्खेपेन अपरिक्खित्तस्स परिक्खेपारहट्ठानेन परिच्छिन्‍नो एकावासो।

उपसम्पादेतब्बपञ्‍चककथावण्णना

८४.नअसेक्खेन सीलक्खन्धेनातिआदि ‘‘अत्तानमेव पठमं, पतिरूपे निवेसये’’ति (ध॰ प॰ १५८) वचनवसेन वुत्तं, न आपत्तिअङ्गवसेन। नीलसमायोगतो नीलं विय वुत्तं ‘‘असेक्खेन विमुत्तिञाणदस्सनक्खन्धेना’’ति। अधिसीले सीलविपन्‍नो नाम आपज्‍जित्वा अवुट्ठितो।

उपसम्पादेतब्बपञ्‍चककथावण्णना निट्ठिता।

अञ्‍ञतित्थियपुब्बवत्थुकथावण्णना

८६.यो सो अञ्‍ञतित्थियपुब्बोति एत्थ द्वे अत्थविकप्पा – तस्स पसूरस्स भिक्खुभावं सन्धाय अञ्‍ञतित्थियपुब्बो, सो भिक्खु तंयेव तित्थायतनं सङ्कमीति अयमेको अत्थो। एवं तित्थियपक्‍कन्तको पुन गिहिवेसेन आगतो अञ्‍ञतित्थियपुब्बो, सो आगतो न उपसम्पादेतब्बोति अयमेको अत्थो। तं अञ्‍ञतित्थियपक्‍कन्तकं ठपेत्वा ‘‘यो सो, भिक्खवे, अञ्‍ञतित्थियपुब्बो’’ति एत्थ न गिहिवेसधारणोव पुब्बसद्देन वुत्तो, किन्तु तस्मिं अत्तनो यथासमादिन्‍नतित्थियवेसे ठितोपि। दिट्ठिवसेन अतित्थियभूतत्ता अतित्थियपुब्बो, सो पनागतो विब्भन्तो आगच्छति, तस्स परिवासदानकिच्‍चं नत्थि। किं इमस्स अञ्‍ञतित्थियपुब्बस्स भिक्खुवेसं गहेत्वा सरणगमनेन सामणेरपब्बज्‍जा जाता, न जाताति? किञ्‍चेत्थ यदि जाता, ‘‘यो सो, भिक्खवे, अञ्‍ञोपि अञ्‍ञतित्थियपुब्बो इमस्मिं धम्मविनये आकङ्खति पब्बज्‍जं, आकङ्खति उपसम्पदं, तस्स चत्तारो मासे परिवासो दातब्बो’’ति (महाव॰ ८६) वचनं विरुज्झति। अथ न जाता, परिवासकम्मवाचाय पब्बज्‍जाय अपरामसनं विरुज्झतीति। तत्थ महाविहारवासिनो ‘‘सामणेरस्सेव सतो परिवासो दातब्बो’’ति वदन्ति। इतरे तथा न वदन्ति। ते हि ‘‘एवं आराधको खो भिक्खवे अञ्‍ञतित्थियपुब्बो आगतो उपसम्पादेतब्बो’ति (महाव॰ ८७) सुत्तपदं परिहरितब्बं, पुरे च पच्छा च ‘अञ्‍ञतित्थियपुब्बो’ति वचनसामञ्‍ञतो न सामणेरो जातोति चे, यदि एवं अपब्बाजेत्वाव उपसम्पादेतब्बोति आपज्‍जति। ततो च सब्बपठमं वुत्तसुत्तं विरुज्झति। ‘तित्थायतनं सङ्कन्तो’ति पाठोपि न सुन्दरं। पाणातिपातादीसु अञ्‍ञतरं सचे भिन्दति, चत्तारो मासे परिपुण्णेपि पुन परिपूरेतब्बं विय दिस्सति। वुत्तम्पि तस्स संवरं भिक्खुकरणत्थाय अनुञ्‍ञातत्ता सीले वत्तब्बं नत्थी’’ति वदन्ति, विचारेत्वा गहेतब्बं। सरणानि सचे भिज्‍जन्ति सामणेरस्सेव।

अञ्‍ञतित्थियपुब्बवत्थुकथावण्णना निट्ठिता।

पञ्‍चाबाधवत्थुकथावण्णना

८८.नखपिट्ठीति चूळङ्गुलिनखपिट्ठि अधिप्पेता। ‘‘पटिच्छन्‍ने नखपिट्ठितो महन्तम्पि वट्टति, एवं सेसेसुपी’’ति केचि वदन्ति, तं अट्ठकथाय न समेति विय। पदुमकण्णिकापि आरुळ्हे रत्तपदुमवण्णचित्रं।

पञ्‍चाबाधवत्थुकथावण्णना निट्ठिता।

चोरवत्थुकथावण्णना

९१-२.धम्मसामीति यस्मा सयं धम्मसामी, तस्मा भिक्खूहि अपब्बाजेतब्बकम्पि चोरं अङ्गुलिमालं पब्बाजेत्वा आयतिं एवमाहाति अत्थो। पाळिपोत्थकेसु ‘‘खरभेदको’’तिपि लिखितं। सन्‍निसिन्‍नासूति वूपसन्तासु।

चोरवत्थुकथावण्णना निट्ठिता।

इणायिकदासवत्थुकथावण्णना

९६.पस्स मे पत्तचीवरमत्तं, अहं इदं दस्सामीति सामीचि, यतो नत्थि आपत्ति। उपड्ढुपड्ढन्ति थोकं थोकं।

कम्मारभण्डुवत्थादिकथावण्णना

९८.कम्मारभण्डूति एत्थ दारको चूळामत्तं ठपेत्वा आगच्छति, तस्मा आपुच्छितुं लभति। तञ्‍चे सो वा अञ्‍ञो वा अवहरति, दोसो नत्थि। ‘‘केसमस्सुओरोहनं अकत्वा असतिया सरणानि दत्वा पब्बाजेति, रुहतेवा’’ति वदन्ति।

राहुलवत्थुकथावण्णना

१०५.‘‘अङ्गारिनो दानि दुमा भदन्ते’’तिआदीहि (थेरगा॰ ५२७) सट्ठिमत्ताहि। दस्सेहि इति मं आणापेसि। एत्थ इति-सद्दो आहरितब्बो। पोक्खरवस्सन्ति पोक्खरपत्तवण्णं उदकं, तम्हि वस्सन्ते तेमितुकामाव तेमेन्ति। उण्हीसतो पट्ठायाति मुद्धतो पट्ठाय।

‘‘सिनिद्धनीलमुदुकुञ्‍चितकेसो ,

सूरियनिम्मलतलाभिनलाटो।

युत्ततुङ्गमुदुकायतनासो,

रंसिजालविततो नरसीहो’’ति॥ (अप॰ अट्ठ॰ १.सन्तिकेनिदानकथा; जा॰ अट्ठ॰ १.सन्तिकेनिदानकथा) –

आदिगाथाहि। अथ वा –

‘‘चक्‍कवरङ्कितरत्तसुपादो,

लक्खणमण्डितआयतपण्हि।

चामरछत्तविभूसितपादो,

एस हि तुय्ह पिता नरसीहो॥

‘‘सक्यकुमारवरो सुखुमालो,

लक्खणचित्तिकपुण्णसरीरो।

लोकहिताय गतो नरवीरो,

एस हि तुय्ह पिता नरसीहो॥

‘‘पुण्णससङ्कनिभो मुखवण्णो,

सिक्खापददण्डकम्मवत्थुकथावण्णना

१०७.अत्तनोपरिवेणञ्‍चाति पुग्गलिकं। मुखद्वारिकन्ति मुखद्वारेन भुञ्‍जितब्बं। तत्थ नियोजितब्बकं, तस्स आवरणं निवारणं करोन्ति। अथ वा ‘‘अनुजानामि, भिक्खवे, आवरणं कातु’’न्ति यं आवरणं अनुञ्‍ञातं, तं आवरणं मुखद्वारिकं आहारं करोन्तीति अधिप्पायो।

सिक्खापददण्डकम्मवत्थुकथावण्णना निट्ठिता।

अनापुच्छावरणवत्थुआदिकथावण्णना

१०८.परस्स दुस्सीलभिक्खुस्सपीति अत्थो। केचि ‘‘दुस्सीलभिक्खूपी’’ति लिखन्ति, तं न सुन्दरं। पोराणा पन ‘‘यावततियं वुच्‍चमानो चे न ओरमति, सङ्घं अपलोकेत्वा नासेतब्बो, पुन पब्बज्‍जं याचमानोपि अपलोकेत्वा पब्बाजेतब्बो’’ति वदन्ति। भिक्खूनं उपसम्पदकम्मवाचासदिसन्ति एत्थ ‘‘यथा उपसम्पन्‍नो सिक्खं पच्‍चक्खाय यथानिवत्थपारुतोव हुत्वा पच्छा उपसम्पन्‍नो पुब्बे अत्तनो नवकतरस्स समानवस्सिकस्स पुन वन्दनादीनि करोति, एवं सामणेरोपि पुन गहितसरणो ततो पुब्बे अत्तनो नवकतरस्स समानवस्सिकस्स सामणेरस्स पुन वन्दनादीनि करोति। लिङ्गं पनेत्थ वुड्ढतरभावं न साधेतीति वुत्तं होती’’ति वुत्तं। विकालभोजनं सामणेरानं वीतिक्‍कमेवाति एके। ‘‘अच्‍चयो मं, भन्ते, अच्‍चागमा’’तिआदिना नयेन अच्‍चयं देसापेतब्बो। ‘‘दिट्ठिया अनिस्सज्‍जनेन ‘त्वं, सामणेर, गच्छा’ति वुत्तेयेव पाराजिको होती’’ति वुत्तं, ‘‘यावततियन्ति वुत्तत्ता बुद्धादीनं अवण्णभासितमत्तेन च दिट्ठिग्गहितमत्तेन च सरणानि न भिज्‍जन्तीति वुत्तं होती’’ति वदन्ति। एवं सन्ते पाणातिपातादिं करोन्तस्सापि तं सम्भोतीति मम तक्‍को। ‘‘निस्सीलस्स पुन नासना वुत्ता’’ति च केचि वदन्ति, तं युत्तं विय। न हि भगवा सीलवन्तस्स लिङ्गनासनं अनुजानातीति विचारेतब्बं, भिक्खुनिदूसकापदेसेन भब्बाभब्बे सङ्गण्हातीति पोराणा। ‘‘पब्बज्‍जम्पि न लभतीति यथा चेत्थ अयमत्थो दस्सितो, तथा ‘पण्डको, भिक्खवे, अनुपसम्पन्‍नो न उपसम्पादेतब्बो, उपसम्पन्‍नो नासेतब्बो’ति (महाव॰ १०९) आदिना नयेन वुत्तानम्पि पब्बज्‍जं नत्थीति दीपितं होति। न हि इदं ठानं ठपेत्वा तेसं पब्बज्‍जाय वारितट्ठानं अत्थि। ‘भिक्खुनिदूसको, भिक्खवे, अनुपसम्पन्‍नो न उपसम्पादेतब्बो, उपसम्पन्‍नो नासेतब्बो’ति (महाव॰ ११४) वुत्तेनपि समानत्ता तस्स पब्बज्‍जा विय तेसम्पि पब्बज्‍जा वारिताव होतीतिपि दस्सेतुं पुन भिक्खुनिदूसकोति गहितन्ति अपरे’’ति वुत्तं। किं इमिना? ननु अट्ठकथायं वुत्तं ‘‘यस्स चेत्थ पब्बज्‍जा वारिता, तं सन्धाय इदं वुत्तं अनुपसम्पन्‍नो न उपसम्पादेतब्बो, उपसम्पन्‍नो नासेतब्बो’’ति।

अनापुच्छावरणवत्थुआदिकथावण्णना निट्ठिता।

पण्डकवत्थुकथावण्णना

१०९.ओपक्‍कमिकपण्डकस्स हीनङ्गत्ता अपब्बजितस्स पब्बज्‍जा वारिता, पब्बजितस्स उपसम्पदा न कातब्बा। पुब्बे उपसम्पन्‍नस्स चे उपचरणं अत्थि, न नासना कातब्बाति नो तक्‍कोति आचरियो। छिन्‍नङ्गजातो न पण्डको। पञ्‍चसु नपुंसकपण्डकोव अभावको। इतरे चत्तारो सभावकाति वेदितब्बा। भावो पन तेसं पण्डको होति। एते चत्तारोपि किर पुरिसावाति एके। इत्थीपि पक्खपण्डकी होतीति एके। उपक्‍कमे कते पण्डकभावो अवस्सं होति, तस्मा पब्बज्‍जं न लभति। ‘‘यदि पन कस्सचि न होति, पब्बज्‍जा न वारिताति विनिच्छयं वदन्ती’’ति वुत्तं।

‘‘पब्बज्‍जा वारिताति अपण्डकपक्खे पब्बाजेत्वा पण्डकपक्खे नासेतब्बोति अधिप्पायो’’ति लिखितं। पोराणगण्ठिपदे पन मासपण्डकलेखपण्डकेहि सह सत्त पण्डका वुत्ता। तत्थ लेखपण्डको नाम किर मन्तवसेन उपहतबीजो। तत्थ ‘‘ओपक्‍कमिकलेखपण्डका पब्बजिता न नासेतब्बा। यो पब्बाजेति, तस्स दुक्‍कट’’न्ति च वुत्तं।

पण्डकवत्थुकथावण्णना निट्ठिता।

थेय्यसंवासकवत्थुकथावण्णना

११०.थेय्यसंवासकोति एत्थ किञ्‍चापि ब्यञ्‍जनत्थवसेन संवासत्थेनकोव थेय्यसंवासकोति पञ्‍ञायति, अथ खो तयो थेय्यसंवासका। संवासोति चेत्थ न एककम्मादिको संवासो, किन्तु भिक्खुवस्सगणनादिको किरियभेदो इध संवासो नाम। इमञ्हि सक्‍का थेय्याय कातुं, नेतरन्ति अट्ठकथाय अधिप्पायो। विदेसं गन्त्वा पब्बजितेहि पुच्छिते ‘‘दसवस्सो’’तिआदिं भणन्तस्स दोसो। गिहीनं वुत्ते दोसो नत्थीति केचि। राजभयादीहि गहितलिङ्गानं ‘‘गिही मं समणोति जानातू’’ति वञ्‍चनचित्ते सतिपि भिक्खूनं वञ्‍चेतुकामताय, तेहि संवसितुकामताय च अभावा दोसो न जातो। ‘‘सब्बपासण्डियभत्तानीति विहारं आगन्त्वा सङ्घिकं गण्हन्तस्स संवासं परिहरितुं दुक्‍करं, तस्मा वुत्त’’न्ति च लिखितं। ‘‘सूपसम्पन्‍नो’’ति वुत्तत्ता गहट्ठम्पि सचे उपसम्पादेन्ति, सूपसम्पन्‍नोति आपन्‍नं, ‘‘अनुपसम्पन्‍नकालेयेवा’’ति इमिना सचे उपसम्पन्‍नकाले सुणाति, सूपसम्पन्‍नो एव अनारोचेन्तोपीति दस्सेति। अन्धकट्ठकथायं, पोराणगण्ठिपदेसु च दुस्सीलभिक्खु ‘‘थेय्यसंवासको’’ति वुत्तो ‘‘थेय्याय वो, भिक्खवे, रट्ठपिण्डो भुत्तो’’ति (पारा॰ १९५) इमिना किर परियायेनाति वेदितब्बं। तेनेवाह ‘‘तं न गहेतब्ब’’न्ति। ‘‘महापेळादीसू’’ति एतेन गिहिसन्तकं दस्सितं।

सयं सामणेरोव कूटवस्सानि गणेत्वा गण्हन्तो पाराजिको होति, थेय्यसंवासको पन न होति, तथा भिक्खुपि, सो पन भण्डग्घेन कारेतब्बोति इमिना अधिप्पायेन ‘‘सयं सामणेरोवा’’तिआदि वुत्तं। अयं पन थेय्यसंवासको नाम यस्मा पब्बजितोव होति, नापब्बजितो, तस्मा ‘‘थेय्यसंवासको, भिक्खवे, अपब्बजितो न पब्बाजेतब्बो, पब्बजितो नासेतब्बो’’ति वत्तुं न सक्‍काति कत्वा इमस्स वसेन पण्डकतो पट्ठाय ‘‘अनुपसम्पन्‍नो न उपसम्पादेतब्बो’’तिआदिना पाळि ठपिता, न उपसम्पदामत्तस्सेव अभब्बत्ता एकादसन्‍नम्पि नेसं पब्बज्‍जारहभावप्पसङ्गतो। अपिच अनिट्ठदोसप्पसङ्गतो तथा एव पाळि ठपिता। यस्मा तित्थियपक्‍कमनं, सङ्घभेदनञ्‍च उपसम्पन्‍नस्सेव होति, नानुपसम्पन्‍नस्स, सो दुविधोपि पब्बजितोव होति, नापब्बजितो, तस्मा ‘‘तित्थियपक्‍कन्तको, भिक्खवे, अपब्बजितो न पब्बाजेतब्बो’’तिआदिपाळिया सति ते उभोपि अपब्बाजेतब्बा होन्तीति अनिट्ठप्पसङ्गो आपज्‍जतीति। तीसु पन थेय्यसंवासकेसु सामणेरालयं करोन्तो लिङ्गत्थेनको, उपसम्पन्‍नालयं करोन्तो संवासत्थेनको, उभयत्थेनको च। न हि सामणेरसंवासो इध संवासो नाम, तेनेव अट्ठकथायं ‘‘भिक्खुवस्सगणनादिको हि सब्बोपि किरियभेदो इमस्मिं अत्थे संवासो’’ति वुत्तन्ति एके। यथावुड्ढं वन्दनसादियनासनपटिबाहनानं सामणेरसंवाससामञ्‍ञतो नेवाति आचरियो।

थेय्यसंवासकवत्थुकथावण्णना निट्ठिता।

तित्थियपक्‍कन्तककथावण्णना

तित्थियपक्‍कन्तको, भिक्खवेतिआदि अत्तनो निदानभूते पसूरवत्थुस्मिं एव वत्तब्बं समानम्पि तत्थ वारितअधिकाराभावा अभब्बा। इधेव थेय्यसंवासकेन विना सम्भवतो वुत्तो। तत्थ ‘‘अथ खो न पब्बाजेतब्बोपी’’ति इधेव वचनं पसूरस्स उपसम्पदाय एव याचनिच्छाय दस्सनेन, ‘‘सो आगतो न उपसम्पादेतब्बो’’ति भगवतो उपसम्पदामत्तपटिसेधनेन च पब्बज्‍जानुमतिदोसप्पसङ्गभयाति वेदितब्बं। तेसं लिङ्गे आदिन्‍नमत्ते लद्धिया गहितायपि अग्गहितायपि तित्थियपक्‍कन्तको होति, अवन्दनीयस्सेव नग्गलिङ्गस्स सेट्ठभावं वा उपगच्छति, न मुच्‍चति, एत्थ ‘‘पदवारे दुक्‍कटं, आजीवको भविस्सन्ति विसमचित्तवसेन गतत्ता नग्गो हुत्वा न गमनेना’’ति वदन्ति। उभिन्‍नम्पि वसेन युत्तन्ति मम तक्‍को। ताव नं लद्धि रक्खति असम्पटिच्छितत्ता। उपसम्पन्‍नभिक्खुना कथितोति कथं पञ्‍ञायति? अट्ठकथावचनप्पमाणतोवाति एके। निदानवसेनाति एके। पसूरस्स उपसम्पन्‍नत्ता उपसम्पन्‍नानं एव तित्थियपक्‍कन्ततावचनतोति एके। यथाह ‘‘उपज्झायो पक्‍कन्तोवा होति, विब्भन्तो वा, कालंकतो वा, पक्खसङ्कन्तो वा’’ति आचरियो। पक्खसङ्कन्तो वाति सामणेरनासनावत्थूसु अभावतोति एके। अञ्‍ञतित्थियपुब्बस्स उपसम्पन्‍नस्स सतो पक्खसङ्कन्तभया अनुपसम्पन्‍नकाले उपसम्पदत्थं परिवासपञ्‍ञापनेनाति एके । पब्बज्‍जत्थम्पीति चे? न, पुब्बे विचारितत्ता, अपब्बजितस्स अधिसीलाभावतो च। पातिमोक्खसीलञ्हि अधिसीलं नाम, तञ्‍च अपब्बजितस्स नत्थि। इमस्स च परिवासवत्ते अधिसीलं वुत्तं। यथाह ‘‘पुन चपरं, भिक्खवे, अञ्‍ञतित्थियपुब्बो तिब्बच्छन्दो होति उद्देसे परिपुच्छाय अधिसीले’’ति (महाव॰ ८७)। अपिच ‘‘सचे, भिक्खवे, जातिया साकियो अञ्‍ञतित्थियपुब्बो आगच्छति, सो आगतो उपसम्पादेतब्बो’’ति (महाव॰ ८७) एत्थ उपसम्पदामत्तपरिदीपनतो। उपसम्पदामत्तपरिदीपनञ्हेत्थ तस्सेव परिवासदानसिद्धितो। परिवासदानत्तनिदस्सनत्थे हेसा पाळि।

तित्थियपक्‍कन्तककथावण्णना निट्ठिता।

तिरच्छानगतवत्थुकथावण्णना

१११.नागयोनियाति नागयोनितो, अत्तनो नागजातिहेतूति अधिप्पायो। किंकारणा? अभिक्खणं सकजातिया मेथुनपटिसेवने, विस्सट्ठनिद्दोक्‍कमने च सब्बेसम्पि।

तिरच्छानगतवत्थुकथावण्णना निट्ठिता।

मातुघातकादिवत्थुकथावण्णना

११२-५.अपवाहनन्ति पक्खलनं, कासायवत्थनिवासनं इच्छमानन्ति अत्थो। दुट्ठचित्तेन। कीदिसेन? वधकचित्तेनाति अधिप्पायो। लोहितुप्पादनवसेन दुट्ठचित्तन्ति केचि, तं न सुन्दरं।

मातुघातकादिवत्थुकथावण्णना निट्ठिता।

उभतोब्यञ्‍जनकवत्थुकथावण्णना

११६.‘‘यदि पटिसन्धियं उप्पन्‍नलिङ्गेन एतं नामं लभन्तीति अधिप्पायो’’ति लिखितं।

उभतोब्यञ्‍जनकवत्थुकथावण्णना निट्ठिता।

अनुपज्झायकादिवत्थुकथावण्णना

११७.‘‘केचि ‘कुप्पती’ति वदन्ति, तं ‘न गहेतब्ब’’न्ति यं वुत्तं, तं ‘‘पञ्‍चवग्गकरणीयञ्‍चे, भिक्खवे, कम्मं भिक्खुनिपञ्‍चमो कम्मं करेय्य, अकम्मं न च करणीय’’न्तिआदिना (महाव॰ ३९०) नयेन वुत्तत्ता पण्डकादीनं गणपूरणभावे एव कम्मं कुप्पति, न सब्बन्ति कत्वा सुवुत्तं, इतरथा ‘‘पण्डकुपज्झायेन कम्मं करेय्य, अकम्मं न च करणीय’’न्तिआदिकाय पाळिया भवितब्बं सिया। यथा अपरिपुण्णपत्तचीवरस्स उपसम्पादनकाले कम्मवाचायं ‘‘परिपुण्णस्स पत्तचीवर’’न्ति असन्तं वत्थुं कित्तेत्वा उपसम्पदाय कताय तस्मिं असन्तेपि उपसम्पदा रुहति, एवं ‘‘अयं बुद्धरक्खितो आयस्मतो धम्मरक्खितस्स उपसम्पदापेक्खो’’ति अवत्थुं पण्डकुपज्झायादिं, असन्तं वा, वत्थुं कित्तेत्वा कतायपि गणपूरकानमत्थिताय उपसम्पदा रुहतेव। ‘‘न, भिक्खवे, पण्डकुपज्झायेन उपसम्पादेतब्बो, यो उपसम्पादेय्य, आपत्ति दुक्‍कटस्स, सो च पुग्गलो अनुपसम्पन्‍नो’’तिआदिवचनस्साभावा अयमत्थो सिद्धोव होति। न हि बुद्धा वत्तब्बयुत्तं न वदन्ति, तेन वुत्तं ‘‘यो पन, भिक्खु, जानं ऊनवीसतिवस्सं…पे॰… सो च पुग्गलो अनुपसम्पन्‍नो’’तिआदि (पाचि॰ ४०३)। तथा ‘‘ब्यत्तेन भिक्खुना पटिबलेन सङ्घो ञापेतब्बो’ति (महाव॰ ७१) वचनतो थेय्यसंवासकादिआचरियेहि अनुस्सावनाय कताय उपसम्पदा न रुहति तेसं अभिक्खुत्ता’’ति वचनम्पि न गहेतब्बं। किञ्‍च भिय्यो ‘‘इमानि चत्तारि कम्मानि पञ्‍चहाकारेहि विपज्‍जन्ती’’तिआदिना (परि॰ ४८२) नयेन कम्मानं सम्पत्तिविपत्तिया कथियमानाय ‘‘सत्तहि आकारेहि कम्मानि विपज्‍जन्ति वत्थुतो वा ञत्तितो वा अनुस्सावनतो वा सीमतो वा परिसतो वा उपज्झायतो वा आचरियतो वा’’ति अकथितत्ता न गहेतब्बं। ‘‘परिसतो वा’’ति वचनेन आचरियउपज्झायानं वा सङ्गहो कतोति चे? न, ‘‘द्वादसहाकारेहि परिसतो कम्मानि विपज्‍जन्ती’’ति एतस्स विभङ्गे तेसमनामट्ठत्ता। अयमत्थो ‘‘यस्मा तत्थ तत्थ सरूपेन वुत्तपाळिवसेनेव सक्‍का जानितुं, तस्मा नयमुखं दस्सेत्वा संखित्तोति अयमस्स युत्तिगवेसना’’ति वुत्तं। तत्रिदं विचारेतब्बं – अनुपज्झायकं उपसम्पादेन्ता ते भिक्खू यथावुत्तनयेन अभूतं तं वत्थुं कित्तयिंसु, उदाहु मुसावादभया तानेव पदानि न सावेसुन्ति। किञ्‍चेत्थ यदि ताव उपज्झायाभावत न सावेसुं, ‘‘पुग्गलं न परामसती’’ति वुत्तविपत्तिप्पसङ्गो होति, अथ सावेसुं, मुसावादो नेसं भवतीति? वुच्‍चते – सावेसुंयेव यथावुत्तविपत्तिप्पसङ्गभया, ‘‘कम्मं पन न कुप्पती’’ति अट्ठकथाय वुत्तत्ता च, न मुसावादस्स असम्भवतो, मुसावादेनापि कम्मसम्भवतो च। न हि सक्‍का मुसावादेन कम्मविपत्तिसम्पत्तिं कातुन्ति। तस्मा ‘‘अनुपज्झायकं उपसम्पादेन्ती’’ति वचनस्स उभयदोसविनिमुत्तो अत्थो परियेसितब्बो।

अयञ्‍चेत्थ युत्ति – ‘‘यथा पुब्बे पब्बज्‍जुपसम्पदुपज्झायेसु विज्‍जमानेसुपि उपज्झायग्गहणक्‍कमेन अग्गहितत्ता ‘तेन खो पन समयेन भिक्खू अनुपज्झायक’न्तिआदि वुत्तं, तथा इधापि उपज्झायस्स विज्‍जमानस्सेव सतो अग्गहितत्ता ‘अनुपज्झायकं उपसम्पादेन्ती’ति वुत्तं। कम्मवाचाचरियेन पन गहितो तेन उपज्झायोति सञ्‍ञाय उपज्झायं कित्तेत्वा कम्मवाचं सावेतब्बं, केनचि वा कारणेन कायसामग्गिं अदेन्तस्स उपज्झायस्स छन्दं गहेत्वा कम्मवाचं सावेति, उपज्झायो वा उपसम्पदापेक्खस्स उपज्झं दत्वा पच्छा उपसम्पन्‍ने तस्मिं तादिसे वत्थुस्मिं समनुयुञ्‍जियमानो वा असमनुयुञ्‍जियमानो वा उपज्झायदानतो पुब्बे एव सामणेरो पटिजानाति, सिक्खापच्‍चक्खातको वा अन्तिमवत्थुअज्झापन्‍नको वा पटिजानाति, छन्दहारकादयो विय उपज्झायो वा अञ्‍ञसीमागतो होति, ‘कम्मवाचा रुहती’ति वत्वा ‘अनुजानामि, भिक्खवे, पच्‍चन्तिमेसु जनपदेसु विनयधरपञ्‍चमेन गणेन उपसम्पद’न्ति (महाव॰ २५९) वुत्तत्ता केचि ‘विनयधरपञ्‍चमेन उपज्झायेन सन्‍निहितेनेव भवितब्ब’न्ति वदन्ती’’ति पोराणगण्ठिपदे वुत्तं। सो चे पाठो पमाणो मज्झिमेसु जनपदेसु तस्स वचनस्साभावतो। असन्‍निहितेपि उपज्झाये कम्मवाचा रुहतीति आपज्‍जतीति चे? न, कस्मा? कम्मसम्पत्तियं ‘‘पुग्गलं परामसती’’ति वुत्तपाठोव नो पमाणं। न हि तत्थ असन्‍निहितो उपज्झायसङ्खातो पुग्गलो परामसनं अरहति, तस्मा तत्थ सङ्घपरामसनं विय पुग्गलपरामसनं वेदितब्बं। सङ्घेन गणेन उपज्झायेन उपसम्पादेन्ति तेसं अत्थतो पुग्गलत्ता। पण्डकादिउपज्झायेन उपसम्पादेन्ति उपसम्पादनकाले अविदितत्ताति पोराणा।

अपत्तकादिवत्थुकथावण्णना

११८.अपत्तचीवरंउपसम्पादेन्तीति कम्मवाचाचरियो ‘‘परिपुण्णस्स पत्तचीवर’’न्ति सञ्‍ञाय , केवलं अत्थसम्पत्तिं अनपेक्खित्वा सन्तपदनिहारेन वा ‘‘परिपुण्णस्स पत्तचीवर’’न्ति कम्मवाचं सावेति। यथा एतरहि मतविप्पवुत्थमातापितिकोपि ‘‘अनुञ्‍ञातोसि मातापितूही’’ति पुट्ठो ‘‘आम भन्ते’’ति वदति। किं बहुना, अयं पनेत्थ सारो – ‘‘तस्मिं समये चत्तारि कम्मानि पञ्‍चहाकारेहि विपज्‍जन्ती’’ति लक्खणस्स न ताव पञ्‍ञत्तत्ता अनुपज्झायकादिं उपसम्पादेन्ति, वज्‍जनीयपुग्गलानं अवुत्तत्ता पण्डकुपज्झायादिं उपसम्पादेन्ति। तेरसन्तरायपुच्छाय अदस्सनत्ता अपत्तचीवरकं उपसम्पादेन्ति। ‘‘अनुजानामि, भिक्खवे, ञत्तिचतुत्थेन कम्मेन उपसम्पादेतु’’न्ति (महाव॰ ६९) एवं सब्बपठमं अनुञ्‍ञातकम्मवाचाय ‘‘परिपुण्णस्स पत्तचीवर’’न्ति अवचनमेत्थ साधकन्ति वेदितब्बं। तञ्हि वचनं अनुक्‍कमेनानुञ्‍ञातन्ति।

हत्थच्छिन्‍नादिवत्थुकथावण्णना

११९.इदं ताव सब्बथा होतु, ‘‘मूगं पब्बाजेन्ति, बधिरं पब्बाजेन्ती’’ति इदं कथं सम्भवितुमरहति आदितो पट्ठाय ‘‘अनुजानामि, भिक्खवे, इमेहि तीहि सरणगमनेहि पब्बज्‍ज’’न्तिआदिना (महाव॰ ३४) अनुञ्‍ञातत्ताति? वुच्‍चते – ‘‘एवञ्‍च पन, भिक्खवे, पब्बाजेतब्बोति। एवं वदेहीति वत्तब्बो…पे॰… ततियम्पि सङ्घं सरणं गच्छामी’’ति एत्थ ‘‘एवं वदेहीति वत्तब्बो’’ति इमस्स वचनस्स मिच्छा अत्थं गहेत्वा मूगं पब्बाजेसुं। ‘‘एवं वदेही’’ति तं पब्बज्‍जापेक्खं आणापेत्वा सयं उपज्झायेन वत्तब्बो ‘‘ततियं सङ्घं सरणं गच्छामी’’ति, सो पब्बज्‍जापेक्खो तथा आणत्तो उपज्झायवचनस्स अनु अनु वदतु वा, मा वा, तत्थ तत्थ भगवा ‘‘कायेन विञ्‍ञापेति, वाचाय विञ्‍ञापेति, कायेन वाचाय विञ्‍ञापेति, गहितो होति उपज्झायो। दिन्‍नो होति छन्दो। दिन्‍ना होति पारिसुद्धि। दिन्‍ना होति पवारणा’’ति वदति। तदनुमानेन वा कायेन तेन पब्बज्‍जापेक्खेन विञ्‍ञत्तं होति सरणगमनन्ति वा लोकेपि कायेन विञ्‍ञापेन्तो ‘‘एवं वदती’’ति वुच्‍चति, तं परियायं गहेत्वा मूगं पब्बाजेन्तीति वेदितब्बं। पोराणगण्ठिपदे ‘‘मूगं कथं पब्बाजेन्ती’ति पुच्छं कत्वा तस्स कायप्पसादसम्भवतो कायेन पहारं दत्वा हत्थमुद्दाय विञ्‍ञापेत्वा पब्बाजेसु’’न्ति वुत्तं। किं बहुना, अयं पनेत्थ सारो – यथा पुब्बे पब्बज्‍जाधिकारे वत्तमाने पब्बज्‍जाभिलापं उपच्छिन्दित्वा ‘‘पण्डको, भिक्खवे, अनुपसम्पन्‍नो न उपसम्पादेतब्बो’’तिआदिना नयेन उपसम्पदवसेनेव अभिलापो कतो। थेय्यसंवासकपदे असम्भवतो किञ्‍चापि सो न कतो पब्बज्‍जाव तत्थ कता, सब्बत्थ पन उपसम्पदाभिलापेन अधिप्पेता तदनुभावतो। उपसम्पदाय पब्बज्‍जाय वारिताय उपसम्पदा वारिता होतीति कत्वा। तथा इध उपसम्पदाधिकारे वत्तमाने उपसम्पदाभिलापं उपच्छिन्दित्वा उपसम्पदमेव सन्धाय पब्बज्‍जाभिलापो कतोति वेदितब्बो। कामं सो न कत्तब्बो, मूगपदे असम्भवतो तस्स वसेन आदितो पट्ठाय उपसम्पदाभिलापोव कत्तब्बो विय दिस्सति, तथापि तस्सेव मूगपदस्स वसेन आदितो पट्ठाय पब्बज्‍जाभिलापोव कतो मिच्छागहणनिवारणत्थं। कथं? ‘‘मूगो, भिक्खवे, अप्पत्तो ओसारणं, तञ्‍चे सङ्घो ओसारेति, सोसारितो’’ति (महाव॰ ३९६) वचनतो मूगो उपसम्पन्‍नो होतीति सिद्धं। सो ‘‘केवलं उपसम्पन्‍नोव होति, न पन पब्बजितो तस्स पब्बज्‍जाय असम्भवतो’’ति मिच्छागाहो होति। तं परिच्‍चजापेत्वा यो उपसम्पन्‍नो, सो पब्बजितोव होति। पब्बजितो पन अत्थि कोचि उपसम्पन्‍नो, अत्थि कोचि अनुपसम्पन्‍नो। इमं सम्मागाहं उप्पादेति भगवाति वेदितब्बं।

अपिच तेसं हत्थच्छिन्‍नादीनं पब्बजितानं सुपब्बजितभावदीपनत्थं, पब्बज्‍जाभावासङ्कानिवारणत्थञ्‍चेत्थ पब्बज्‍जाभिलापो कतो। कथं? ‘‘न, भिक्खवे, हत्थच्छिन्‍नो पब्बाजेतब्बो’’तिआदिना पटिक्खेपेन, ‘‘पब्बजिता सुपब्बजिता’’ति वुत्तट्ठानाभावेन च तेसं पब्बज्‍जाभावप्पसङ्का भवेय्य। यथा पसङ्काभवे, तथा पसङ्कं ठपेय्य। खन्धके उपसम्पदं सन्धाय ‘‘हत्थच्छिन्‍नो, भिक्खवे, अप्पत्तो ओसारणं, तञ्‍चे सङ्घो ओसारेति, सोसारितो’’तिआदिना नयेन भगवा निवारेति। तेनेव पन नयेन पब्बजिता ते सब्बेपि सुपब्बजिता एवाति दीपेति, अञ्‍ञथा सब्बेपेते उपसम्पन्‍नाव होन्ति, न पब्बजिताति अयमनिट्ठप्पसङ्गो आपज्‍जति। कथं? ‘‘हत्थच्छिन्‍नो, भिक्खवे, न पब्बाजेतब्बो, पब्बजितो नासेतब्बो’’ति वा ‘‘न, भिक्खवे, हत्थच्छिन्‍नो पब्बाजेतब्बो, यो पब्बाजेय्य, आपत्ति दुक्‍कटस्स, सो च अपब्बजितो’’ति वा तन्तिया ठपिताय चम्पेय्यक्खन्धके ‘‘सोसारितो’’ति वुत्तत्ता केवलं ‘‘इमे हत्थच्छिन्‍नादयो उपसम्पन्‍नाव होन्ति, न पब्बजिता’’ति वा ‘‘उपसम्पन्‍नापि चे पब्बजिता, नासेतब्बा’’ति वा अनिट्ठकोट्ठासो आपज्‍जतीति अधिप्पायो।

अलज्‍जीनिस्सयवत्थुकथावण्णना

१२०.‘‘न , भिक्खवे, अलज्‍जीनं निस्सयो दातब्बो’’ति इमिना अलज्‍जीहि भिक्खूहि, सामणेरेहि वा सद्धिं द्वेपि धम्मामिसपरिभोगा पटिक्खित्ता होन्ति निस्सयभावे भावतो तेसं। यथाह ‘‘आचरियेन, भिक्खवे, अन्तेवासिको सङ्गहेतब्बो अनुग्गहेतब्बो उद्देसेन परिपुच्छाय ओवादेन अनुसासनिया’’तिआदि (महाव॰ ७९) उपज्झायस्सपि निस्सयप्पणामनसम्भवतो, सोपि सद्धिविहारिकस्स निस्सयोति वेदितब्बं, तस्मा उपज्झायो चे अलज्‍जी होति, न तं निस्साय वसितब्बन्ति सिद्धं होति। भिक्खूनं सम्मापटिपत्तिया समानभागो भिक्खु सभागो। तस्सभावो भिक्खुसभागता। तं भिक्खुसभागतं। याव जानामीति अधिप्पायेन वसितुं वट्टति। भिक्खूहि सभागतं। किं तं? लज्‍जिभावं। ‘‘सत्ताहं…पे॰… गहेतब्बो’’ति एत्थ ‘‘सत्ताहमत्तं वसिस्सामि, किं भिक्खुसभागताजाननेनाति जानने धुरं निक्खिपित्वा वसितुं न लभतीति अत्थो’’ति लिखितं। ‘‘भिक्खुसभागतं पन जानन्तो स्वेव गमिस्सामि, किं मे निस्सयारोचनेना’’ति अरुणं उट्ठपेतुं न लभति। ‘‘पुरे अरुणं उट्ठहित्वा गमिस्सामी’’ति आभोगेन सयन्तस्स चे अरुणो उग्गच्छति, वट्टति।

गमिकादिनिस्सयवत्थुकथावण्णना

१२१.‘‘अद्धानमग्गप्पटिपन्‍नेन भिक्खुना निस्सयं अलभमानेन अनिस्सितेन वत्थुन्ति अवस्सकालेयेव वस्सकाले अद्धानगमनस्स पाळियंयेव पटिक्खित्तत्ता’’ति वुत्तं, तं अप्पमाणं सत्ताहं वस्सच्छेदादिवसेन अद्धानगमनसम्भवतो, गच्छन्तस्सेव वस्सकालगमनसम्भवतो च। अन्तरामग्गे…पे॰… अनापत्तीति निस्सयदायकाभावेयेव। ‘‘तस्स निस्साया’’ति पाठानुरूपं वुत्तं, तं निस्सायाति अत्थो। ‘‘यदा पतिरूपो निस्सयदायको आगच्छिस्सती’’ति वचनेन अयं विधि अवस्सकाले एवाति सिद्धं। ‘‘अन्तोवस्से पन कस्सचि आगमनाभावा’’ति वुत्तं। सचे सो जलपट्टने वा थलपट्टने वा वसन्तो वस्सूपनायिकाय आसन्‍नाय गन्तुकामो सुणाति ‘‘असुको महाथेरो आगमिस्सती’’ति, तं चे आगमेति, वट्टति। आगमेन्तस्सेव चे वस्सूपनायिकदिवसो होति, होतु, गन्तब्बं तत्थ, यत्थ निस्सयदायकं लभतीति। पातिमोक्खुद्देसकाभावेन चे गन्तुं वट्टति, पगेव निस्सयदायकाभावेन। सचे सो गच्छन्तो जीवितन्तरायं, ब्रह्मचरियन्तरायं वा पस्सति, तत्थेव वसितब्बन्ति एके।

उपसम्पदाविधिकथावण्णना

१२५.कुट्ठं गण्डोति एत्थ कुट्ठादिग्गहणेन हत्थच्छिन्‍नादयोपि गहिताव होन्तीति पोराणा, तस्मा ‘‘मनुस्सोसि पुरिसोसी’’ति एतेहि भब्बाभब्बपुग्गलपरिवज्‍जनं करोति। ‘‘भुजिस्सोसि अणणोसी’’तिआदीहि पुब्बे हत्थच्छिन्‍नाधिकारे वुत्तअत्थविकप्पेसु दुतियं विकप्पं उपथम्भेति। तत्थ ‘‘अणणोसि भुजिस्सोसी’’ति अनुक्‍कमेन अवत्वा उप्पटिपाटिया वचनेन भुजिस्सो होति, न च रञ्‍ञो भत्तवेतनवसेन भटो। राजाधीनत्ता पन सो राजभटपक्खं भजतीति तब्बिपक्खभावपुच्छनत्थं ‘‘नसि राजभटो’’ति वुत्तं। अञ्‍ञथा पञ्‍चहि आबाधेहि फुट्ठानं गहणेनेव सब्बेसं गहणे सिद्धे इतरे न वत्तब्बा। अथ वत्तब्बा, सब्बेपि वत्तब्बा सियुं।

चत्तारोनिस्सयादिकथावण्णना

१२८-९.‘‘तावदेव छाया मेतब्बा’’तिआदि ‘‘भिक्खूनं पादे वन्दापेत्वा’’ति वचनतो थेराथेरभावजाननत्थं वुत्तं। ‘‘चिरेन अगमासी’’ति किर पोराणपाठो, चिरं अकासीति चत्थि।

२. उपोसथक्खन्धकवण्णना

सन्‍निपातानुजाननादिकथावण्णना

१३२-३.तेनसमयेनाति अत्तनो ओवादपातिमोक्खुद्देसे धुरं निक्खिपित्वा भिक्खूनंयेव विसुं उपोसथकरणं अनुजानित्वा ठितसमयेन। को पन सोति? मज्झिमबोधियं पातिमोक्खुद्देसप्पहोनकसिक्खापदानं परिनिट्ठानकालो। तेनेवाह ‘‘तानि नेसं पातिमोक्खुद्देसं अनुजानेय्य’’न्ति। ‘‘एवञ्‍च पन, भिक्खवे, उद्दिसितब्ब’’न्ति निदानुद्देसं पञ्‍ञापेतुकामताय च सिक्खापदानं उद्देसपरिच्छेदनिदस्सनत्थञ्‍च वुत्तं। अञ्‍ञथा ‘‘एवञ्‍च पन, भिक्खवे, इमं सिक्खापदं उद्दिसेय्यथा’’ति सब्बसिक्खापदानं उद्दिसितब्बक्‍कमस्स दस्सितत्ता इदानि ‘‘एवञ्‍च पन, भिक्खवे, उद्दिसितब्ब’’न्ति इदं निरत्थकं आपज्‍जति, इदञ्‍च सब्बसङ्घुपोसथं सन्धाय वुत्तं।

सीमानुजाननकथावण्णना

१३८.एकावासगतानं वसेन सामग्गिं पटिक्खिपित्वा एकसीमगतानं वसेन अनुजानितुकामो भगवा ‘‘अनुजानामि, भिक्खवे, सीमं सम्मन्‍नितु’’न्ति आह। अथ आवासपरिच्छेदं वत्तुकामो भवेय्य। एत्तावता एकावासो यावता एकासीमा। ‘‘अनुजानामि, भिक्खवे, सीमं सम्मन्‍नितु’’न्ति वदेय्य। तस्मा न इध अनुञ्‍ञातबद्धसीमावसेन एकावासपरिच्छेदो होति, उपचारसीमावसेनेव होतीति वेदितब्बं। कथं जानितब्बन्ति चे? पाळितोव, यथाह ‘‘तेन खो पन समयेन आयस्मा उपनन्दो सक्यपुत्तो एको द्वीसु आवासेसु वस्सं वसि…पे॰… एकाधिप्पाय’’न्ति (महाव॰ ३६४)। अञ्‍ञथा वस्सच्छेदोति अनिट्ठप्पसङ्गोव, कथं? एकावासवसेनेव चे सामग्गी, बहुआवासअनावासेसु न सम्भवेय्य। ततो सो तं आवासं गच्छन्तो बहिद्धा उपोसथं करोति। ‘‘न, भिक्खवे, तदहुपोसथे सभिक्खुको अनावासो गन्तब्बो’’तिआदि (महाव॰ १८१)-पाळिविरोधो सतिपि सङ्घे अनावासे उपोसथस्स अकत्तब्बतो। अनावासेपि चे सामग्गी लब्भति, ‘‘एत्तावता सामग्गी, यावता एकावासो’’ति न वत्तब्बं, तस्मा सब्बथा पुरिमनयो पच्छिमेनेव पटिक्खित्तोति कत्वा नानावासवसेनपि सामग्गीति वेदितब्बं। ‘‘तं कम्मं करोमाति वत्वा न अकंसू’तिआदीसु विय अनागतम्पि अपेक्खति, तस्मा ‘करोमा’ति वुत्ते न वट्टती’’ति वदन्ति। ‘‘सीमं असोधेत्वापि निमित्तं कित्तेतुं वट्टती’’ति लिखितं। हेट्ठिमकोटिया अड्ढट्ठमरतनुब्बेधो हत्थिप्पमाणो। सचे एको बद्धो होति, न कातब्बोति एत्थ ‘‘चतूसु दिसासु चतुन्‍नं पब्बतकूटानं हेट्ठा पिट्ठिपासाणसदिसे पासाणे ठितत्ता एकाबद्धभावे सतिपि पथवितो उद्धं तेसं सम्बन्धे असति हेट्ठा पथविगतसम्बन्धमत्ते अब्बोहारिकं कत्वा कित्तेतुं वट्टति। तेनेव ‘पिट्ठिपासाणो अतिमहन्तोपि पासाणसङ्ख्यमेव गच्छती’ति वुत्तं। पथवितो हेट्ठा तस्स महन्तभावे गय्हमाने पब्बतमेव होती’’ति अनुगण्ठिपदे वुत्तं। ‘‘चिनित्वा कतपंसुपुञ्‍जे तिणगुम्बरुक्खा चे जायन्ति, पब्बतो होतीति धम्मसिरित्थेरो। नेवाति उपतिस्सत्थेरो’’ति वुत्तं।

पासाणोति ‘‘सुधामयपासाणोपि वट्टती’’ति वदन्ति। वीमंसितब्बं इट्ठकाय पटिक्खित्तत्ता। द्वत्तिंसपलगुळपिण्डप्पमाणो तुलताय, न तुलगणनाय। सोपीति खाणुको विय उट्ठितपासाणो।

चतुपञ्‍चरुक्खनिमित्तमत्तम्पीति एकच्‍चेसु निमित्तसद्दो नत्थि। एत्थ तयो चे साररुक्खा होन्ति, द्वे असाररुक्खा, साररुक्खानं बहुत्तं इच्छितब्बं। ‘‘सुसानम्पि इध ‘वनमेवा’ति सङ्ख्यं गच्छति सयंजातत्ता’’ति वुत्तं। केचि पन ‘‘चतूसु द्वे अन्तोसारा चे, वट्टति। अन्तोसारा अधिका, समा वा, वट्टति। तस्मा बहूसुपि द्वे चे अन्तोसारा अत्थि, वट्टती’’ति वदन्ति।

परभागेति एत्थ ‘‘एतेहि बद्धट्ठानतो गतत्ता वट्टति। तथा दीघमग्गेपि गहितट्ठानतो गतट्ठानस्स अञ्‍ञत्ता’’ति वदन्ति।

अन्वद्धमासन्ति एत्थ ‘‘अनुबद्धो अद्धमासो, अद्धमासस्स वा अनू’’ति लिखितं। ‘‘अन्तरवासको तेमियती’’ति वुत्तत्ता तत्तकप्पमाणउदकेयेव कातुं वट्टतीति केचि। तेमियतीति इमिना हेट्ठिमकोटिया नदिलक्खणं वुत्तं। एवरूपाय नदिया यस्मिं ठाने चत्तारो मासे अप्पं वा बहुं वा उदकं अज्झोत्थरित्वा पवत्तति, तस्मिं ठाने अप्पोदकेपि ठत्वा कातुं वट्टतीति एके। ‘‘पवत्तनट्ठाने नदिनिमित्त’न्ति वुत्तत्ता सेतुतो परतो तत्तकं उदकं यदि पवत्तति, नदी एवा’’ति वदन्ति।

उपोसथागारादिकथावण्णना

१४१.‘‘यं सङ्घो आकङ्खति विहारं वा…पे॰… गुहं वा’’ति वचनतो न केवलं पथवियंयेव, विहारादीनं उपरिपि सीमा अनुञ्‍ञाता होति उपोसथकम्मपधानत्ताति सिद्धं। तप्पधाना सीमाति कथं पञ्‍ञायतीति चे? तदधिकारानुञ्‍ञातत्ता, सम्मुतियं ‘‘समानसंवासा’’ति एत्तावता सिद्धे विसुं ‘‘एकूपोसथा’’ति वचनतो च। ‘‘उपोसथं ठपेत्वा सेसकम्मानि समानसंवासा नामा’’ति लिखितं। ‘‘एकं समूहनित्वा’’ति पाळिपाठो।

अविप्पवाससीमानुजाननकथावण्णना

१४३-४.‘‘मनम्हि वूळ्हो’’ति वा पाठो। तत्थ मनम्हि वूळ्होति मनं वूळ्हो अम्हीति अत्थो। ठपेत्वा गामञ्‍च गामूपचारञ्‍चाति अन्तरघरसङ्खातं गामञ्‍च गामूपचारञ्‍च ठपेत्वा। केचि ‘‘परिक्खित्तं गामं सन्धाय ‘गाम’न्ति वुत्तं, अपरिक्खित्तं सन्धाय ‘गामूपचार’’न्ति वदन्ति, तं पन अट्ठकथाय विरुज्झति। तस्मा निवेसनरच्छादयो सन्धाय गामं, परिक्खेपारहट्ठानानि सन्धाय ‘‘गामूपचार’’न्ति च वुत्तं। एत्थ पन अनेकधा पठन्ति। किं तेन, पाळिञ्‍च अट्ठकथञ्‍च सुट्ठु उपपरिक्खित्वा यथा समेन्ति, तथा गहेतब्बं। भिक्खूनं पुरिमकम्मवाचा न वट्टतीति गामगामूपचारे अन्तोकत्वा समानसंवासकसीमाय सम्मताय उपरि अविप्पवाससीमासम्मुतियं युज्‍जति। यत्थ पन केवलं अरञ्‍ञंयेव सम्मतं, तत्थ कथं न वट्टतीति। तत्थ ‘‘ठपेत्वा गामञ्‍च गामूपचारञ्‍चा’’ति वचनं न सात्थकन्ति चे? वुच्‍चते – एवमेतं, किन्तु अनुस्सावनहानिप्पसङ्गतो तं वचनं वत्तब्बमेवाति इमिनाव अधिप्पायेन ‘‘पुरिमकम्मवाचा न वट्टती’’ति वुत्तं सिया। एकस्मिं वा अत्थे कम्मवाचाद्वयआभावतोति वुत्तं। ‘‘न हि ते अञ्‍ञमञ्‍ञस्स कम्मे गणपूरका होन्ती’’ति वुत्तत्ता उभिन्‍नं नानासंवासकसङ्घानम्पि अयमेव विधि आपज्‍जेय्याति चे? नापज्‍जति पटिग्गहसन्‍निधीनं अनुञ्‍ञातत्ता, ओमसनादिपच्‍चया अविसेसतो, कम्मपटिप्पस्सद्धिमत्तापेक्खताय च। तस्साति भिक्खुनिसङ्घस्स। न कम्मवाचं वग्गं करोन्तीति कम्मं न कोपेन्तीति अत्थो। एत्थाति ठपेत्वा गामन्ति एत्थ। ‘‘यदि भिक्खूनं अविप्पवाससीमा गामञ्‍च गामूपचारञ्‍च न ओतरति, अथ कस्मा गामे सीमाबन्धनकाले अविप्पवासं सम्मन्‍नन्तीति चे? आचिण्णकप्पेन, न ततो अञ्‍ञं कञ्‍चि अत्थं अपेक्खित्वा’’ति लिखितं। ‘‘अत्थतो हि सा बहिद्धापि अबद्धा एव होती’’ति वुत्तं। अन्तरगामे बद्धा समानसंवाससीमा यस्मा गामसङ्ख्यं न गच्छति, तस्माति एके। सोपि सीमासङ्ख्यमेव गच्छतीति अविप्पवाससीमासङ्ख्यं गच्छतीति अत्थो। इदं पनेत्थ विचारेतब्बं – गामं अन्तोकत्वा बद्धाय सीमाय पुन अविप्पवाससम्मुतियं अरञ्‍ञपदेसे ठत्वा अविप्पवासकम्मवाचा कातब्बा, उदाहु गामे ठत्वाति? गामे ठत्वा कतायपि कप्पियभूमिया फरतीति। बहिसीमे ठितसम्मतदोसानुलोमत्ता अकप्पियभूमियं ठत्वा न कातब्बाति नो तक्‍को, एस नयो समूहननेपीति आचरियो। खण्डसीमायं ठत्वा अविप्पवाससीमातिआदीसु महासीमा किर ‘‘अविप्पवाससीमा’’ति वुत्ता।

गामसीमादिकथावण्णना

१४७.साचाति सा परिच्छिन्दित्वा दिन्‍नगामसीमा च इतरा च। सा कतमाति चे? ‘‘पकतिगामा’’तिआदिमाह। बद्धसीमासदिसायेव होन्तीति सा च होति इतरा च होतीति अधिप्पायो, तस्मायेव ‘‘तिचीवरविप्पवासपरिहारं लभती’’ति एकवचनं कतं, तं न युत्तं उभिन्‍नम्पि गामत्ताति एके। ‘‘होन्ति, न लभन्ती’’ति च बहुवचनम्पि करोन्तीति। ‘‘सा च इतरा चा’’ति वुत्ता ‘‘मज्झे भिन्दित्वा दिन्‍नगामसीमा पकतिगामादयो अभिन्‍ना’’ति च वदन्ति। ‘‘भिक्खुवसती’’ति पाठो, ‘‘वसन्ती’’ति च लिखितं। ‘‘अथस्स ठितोकासतो’’ति वुत्तत्ता एकवचनमेव युत्तं। सब्बा, भिक्खवे, नदी असीमाति कतरं सीमं पटिक्खिपति? बद्धसीमं, एकादसविपत्तिसीमञ्‍ञतरप्पसङ्गतोति आचरिया। सचे पठमं सीमाय बद्धाय पच्छा नदिआदयो होन्ति, पटिक्खेपोति पसङ्गो आपज्‍जति, तस्मा अबद्धसीममेव पटिक्खिपति। यथा सब्बो गामो गामसीमा, तथा सब्बा नदी असीमा। किन्तु तस्स तस्स भिक्खुनो उदकुक्खेपसीमाति सीमानानत्तं दस्सेतीति नो तक्‍कोति आचरियो। यं मज्झिमस्स पुरिसस्स समन्ता उदकुक्खेपाति पन एकिस्सा नदिया चतुवग्गादीनं सङ्घानं विसुं चतुवग्गकरणीयादिकम्मकरणकाले सीमापरिच्छेददस्सनत्थं वुत्तं। तिचीवरेन विप्पवासाविप्पवासपरिच्छेददस्सनत्थम्पि सत्तब्भन्तरसीमाय परिच्छेददस्सनं वियाति आचरिया, तस्मा उदकुक्खेपपरिच्छेदाभावेपि अन्तोनदियं कम्मं कातुं वट्टतीति सिद्धं।

अयं पन विसेसो – तत्थ नावागतो चे, नावायं वुत्तनयेन। सत्थगतो चे, सत्थे वुत्तनयेन। सो चे अतिरेकचातुमासनिविट्ठो, गामे वुत्तनयेन तिचीवराविप्पवासो वेदितब्बो। तत्थापि अयं विसेसो – सचे सत्थो उदकुक्खेपस्स अन्तो होति, उदकुक्खेपसीमापमाणन्ति एके। सत्थोव पमाणन्ति आचरिया। सचे पनेत्थ बहू भिक्खूतिआदिम्हि केचि अधिट्ठानुपोसथं, केचि गणुपोसथं, केचि सङ्घुपोसथन्ति वत्तुकामताय ‘‘बहू सङ्घा’’ति अवत्वा ‘‘भिक्खू’’ति वुत्तं। ऊनकं पन न वट्टतीति एत्थ सीमासम्भेदसम्भवतोति उपतिस्सत्थेरो। ठपेन्ते हि ऊनकं न ठपेतब्बं। ‘‘अठपेतुम्पि वट्टति एवा’’ति वुत्तं। गच्छन्तिया पनाति एत्थ ‘‘उदकुक्खेपमनतिक्‍कमित्वा परिवत्तमानाय कातुं वट्टती’’ति लिखितं। अञ्‍ञिस्सा सीमाय ञत्तीतिआदि किं सीमतो कम्मविपत्तिभया वुत्तं , उदाहु परिसतोति? एककम्मस्स नानासीमाय असम्भवतो सीमतोति। एककम्मस्स नानासीमट्ठसङ्घेन असम्भवतो परिसतोतिपि एके। ‘‘सवनं हापेती’’ति वुत्तदोसप्पसङ्गतोति नो तक्‍को। एकिस्सा हि सीमाय एकं कम्मं अनिट्ठपेन्तो हापेतीति आचरियो।

बहिनदितीरे जातरुक्खस्स अन्तोनदियं पविट्ठसाखाय वाति एत्थ च नदितीरे खाणुकं कोट्टेत्वाति एत्थ च सचे पन सेतु वा सेतुपादा वा बहितीरे पतिट्ठिताति एत्थ च सीमासोधनं नाम गामसीमट्ठे हत्थपासानयनं। खण्डसीमाय उट्ठितरुक्खतो वियोजेत्वा कातुं वट्टति। कस्मा? तीरट्ठे रुक्खे बद्धनावाय गामो आधारोति। ‘‘उभतोभागेन गामसीमं फुसित्वा ठितसेतु खण्डसीमामहासीमायो फुसित्वा ठितरुक्खेन उपमेतब्बो’’ति च लिखितं। तत्थ पुरिमनये ताव इदं विचारेतब्बं – तादिसे ठाने कतकम्मं किं नदियं कतसङ्ख्यं गच्छति, उदाहु गामसीमायं, अथ उभयत्थाति? किञ्‍चेत्थ तं चे नदियं कतसङ्ख्यं गच्छति, उदकुक्खेपसीमाव सोधेतब्बा, न इतरा। अथ गामसीमायं कतसङ्ख्यं गच्छति, उदकुक्खेपसीमा न सोधेतब्बा। यदि उभयत्थ कतसङ्ख्यं गच्छति, द्वीसु सीमासु एककम्मं कातुं वट्टतीति अनिट्ठप्पसङ्गो आपज्‍जति। ततो ‘‘अञ्‍ञिस्सा सीमाय ञत्ति, अञ्‍ञिस्सा अनुस्सावना होती’’ति इदञ्‍च ‘‘खण्डसीमामहासीमट्ठानं कायसामग्गिया कम्मं कातुं वट्टती’’ति इदञ्‍चानिट्ठं आपज्‍जतीति? एत्थ वुच्‍चते – यथावुत्तं कम्मं उभयत्थ कतसङ्ख्यं गच्छति, न च यथावुत्तं अनिट्ठं आपज्‍जति। कस्मा? ‘‘ञत्तिअनुस्सावनानं एकेकसीमायं पवत्तत्ता, कारकभिक्खूनं वा एकेकसीमायं ठितत्ता’’ति वदन्ति। उभयत्थापि ठातुं सक्‍कुणेय्यताय पन तं अकारणं। एकीभावं उपगतसीमट्ठाने कतत्ताति इदं अचलकारणं। एकीभावं उपगतासु हि द्वीसु नदीगामसीमासु कम्मं कातुं वट्टतीति च। सत्तब्भन्तरसीमायं चे नदी होति, समुद्दो वा, जातस्सरो वा। तेसु ठितभिक्खु सत्तब्भन्तरसीमायं ठितसङ्ख्यं न गच्छति। तत्थ चे नदिआदिलक्खणं अप्पत्तो दीपको, पासाणो, रुक्खो वा होति, सत्तब्भन्तरसङ्ख्यं गच्छति। मनुस्सेहि वळञ्‍जनट्ठानं चे तं होति, गामखेत्तसङ्ख्यं गच्छति। कतरगामखेत्तं? यतो मनुस्सा सञ्‍चरन्ति, सब्बे चे सञ्‍चरन्ति, विसुं गामखेत्तसङ्ख्यं गच्छतीति च आचरिया।

उपोसथभेदादिकथावण्णना

१४९.‘‘द्वेमे , भिक्खवे, उपोसथा’’ति तदा सामग्गीउपोसथस्स अननुञ्‍ञातत्ता वुत्तं। सामग्गीउपोसथस्स पुब्बकिच्‍चे ‘‘अज्‍जुपोसथो सामग्गी’’ति वत्तब्बं, न च कम्मवाचाय भगवता पयोगो दस्सितो, पाळिनयतो अट्ठकथाचरियेहि उद्दिसितब्बक्‍कमो दस्सितो। तथा पञ्‍चन्‍नं पातिमोक्खुद्देसानं उद्देसक्‍कमो सिद्धोति वेदितब्बं। तयो वा द्वे वा पातिमोक्खं उद्दिसन्ति, अधम्मेन समग्गं नाम होतीति एत्थ कामं सङ्घस्स सामग्गी नाम होति वग्गकथाय यथाकम्मं सामग्गीववत्थानतो। तथापि वग्गपटिपक्खभावेन समग्गं, समग्गपटिपक्खभावेन च वग्गं नाम कतं। आवेणिकतो वा गणकम्मादिसम्भवतो, तस्स च समग्गवग्गभावसम्भवतो वुत्तन्ति वेदितब्बं। धम्मेन वग्गन्ति एत्थ पारिसुद्धिकरणं धम्मिकं, सङ्घस्सेव छन्दागमनं, न गणस्साति कत्वा वग्गं नाम होति। ‘‘एकवारं कतं सुकतं, आपत्तिं पन आपज्‍जति, पुन कातुं न लभन्ती’’ति वदन्ति। ‘‘पञ्‍चसु एकस्स छन्दं आहरित्वा चतूहि पातिमोक्खं उद्दिसितुं वट्टती’’ति वदन्ति, तं युत्तं, छन्दहारके भिक्खूनं सन्तिकं पत्ते तेन सङ्घो पहोति, तस्मा छन्दो सङ्घप्पत्तो होतीति कत्वा वुत्तं।

पातिमोक्खुद्देसकथावण्णना

१५०.मातिकाट्ठकथायं (कङ्खा॰ अट्ठ॰ निदानवण्णना) ‘‘सुणातु मे, भन्ते, सङ्घो…पे॰… आविकता हिस्स फासु होति, तत्थायस्मन्ते पुच्छामि…पे॰… तस्मा तुण्ही। एवमेतं धारयामी’ति वत्वा ‘उद्दिट्ठं खो आयस्मन्तो निदान’न्तिआदिना नयेन अवसेसे सुतेन साविते उद्दिट्ठो होती’’ति वुत्तत्ता ‘‘एवमेतं धारयामीति सुता खो पनायस्मन्तेही’’ति एत्थ ‘‘धारयामी’’ति वत्वा ‘‘उद्दिट्ठं खो आयस्मन्तो निदान’’न्ति वचनं संखित्तन्ति गहेतब्बं, तेनेव खुद्दकपेय्यालवसेन लिखितं। एवं मातिकाट्ठकथायम्पि ‘‘आविकता हिस्स फासु होति, तत्थायस्मन्ते’’ति एत्थापि ‘‘उद्दिट्ठं खो आयस्मन्तो निदान’’न्ति वचनं संखित्तन्ति गहेतब्बन्ति एके। केचि ‘‘अविवदमानेहि सिक्खितब्ब’न्ति वुत्ते निदानुद्देसो निट्ठितो नाम होति, तस्मा अनाविकरोन्तो आपत्तिं आपज्‍जती’’ति वदन्ति, तं न युत्तं। कस्मा? ‘‘निदानं उद्दिसित्वा’’ति निट्ठानवचनेन हि निदानस्स निट्ठितभावो वुत्तो, निदानावसाने च आपत्ति वुत्ताति। ‘‘सरभञ्‍ञं नाम सरेन भणन’’न्ति लिखितं। सज्झायं अधिट्ठहित्वाति ‘‘सज्झायं करोमी’’ति चित्तं उप्पादेत्वा। ‘‘आपुच्छामीति वुत्तमत्तेन कथेतुं वट्टती’’ति वदन्ति। तं तुण्हीभावे युज्‍जति। ‘‘अथापि लाभादिना अभिभूतो वारेति, तं न पमाण’’न्ति वदन्ति। एसेव नयोति कथेन्तो यदि विच्छिन्दति, पुन आपुच्छितब्बन्ति।

अधम्मकम्मपटिक्‍कोसनादिकथावण्णना

१५४.‘‘तेसंअनुपद्दवत्थाया’’ति सङ्घो सङ्घस्स कम्मं न करोति, अञ्‍ञोपि उपद्दवो बहूनं होति, तस्मा वुत्तं।

पातिमोक्खुद्देसकअज्झेसनादिकथावण्णना

१५५.‘‘थेराधिकं पातिमोक्ख’’न्ति वत्वापि पच्छा अविसेसेन ‘‘यो तत्थ ब्यत्तो पटिबलो, तस्साधेय्य’’न्ति वुत्तत्ता ‘‘भन्ते’’ति वचनं थेरस्सापि अत्थीति सिद्धं होति। ‘‘गच्छावुसो संखित्तेन वा वित्थारेन वा’’ति वचनतो असतिपि अन्तराये थामं पमाणन्ति सिद्धं होति।

दिसंगमिकादिवत्थुकथावण्णना

१६३.‘‘सचस्स सद्धिंचरा भिक्खुउपट्ठाका अत्थी’’ति पाठो। ‘‘उतुवस्सेति उतुसंवच्छरे हेमन्तगिम्हेसू’’ति लिखितं।

पारिसुद्धिदानकथावण्णना

१६४.पारिसुद्धिं दम्मीति ‘‘सापत्तिको थेरानं देति, सम्पजानमुसावादे दुक्‍कटं सम्भवती’’ति आचरियेन लिखितं। किं नु खो कारणं? सम्पजानमुसावादेन दुक्‍कटापत्ति नाम केवलं भगवता वुत्तत्ता अकिरियसमुट्ठाना होतीति। ‘‘पारिसुद्धिं दम्मी’’ति एत्थ पन किरिया पञ्‍ञायति, तस्मा सम्पजानमुसावादे पाचित्तियं विय दिस्सति, सुट्ठु उपपरिक्खितब्बं। महन्ता हि ते आचरिया नाम। तत्थ ‘‘दम्मी’’ति अत्तनो उपोसथकम्मनिब्बत्तिनिमित्तं वुत्तं। ‘‘हरा’’ति च ‘‘आरोचेही’’ति च हारकस्स अनारोचनपच्‍चया दुक्‍कटमोचनत्थं वुत्तं। एसेव नयो छन्ददानेपि। तत्थ ‘‘दम्मी’’ति अत्तनो चित्तसामग्गिदीपनवचनं, सेसं वुत्तनयमेव, एवं उपतिस्सत्थेरो वण्णेति। अथ वा पठमं समग्गभावं सन्धाय, दुतियं पच्छा विधातब्बभावं, ततियं छन्दहारकस्स दुक्‍कटमोचनत्थं वुत्तं। उभयत्थापि ‘‘सङ्घप्पत्तो पक्‍कमती’’तिआदिवचनतो सङ्घे समग्गे एव छन्दपारिसुद्धिदानं रुहति, नासमग्गेति सिद्धं। ‘‘सङ्घप्पत्तो उक्खित्तको पटिजानाति, आहटा होति पारिसुद्धी’’तिआदिवचनतो उक्खित्तकादीनम्पि छन्दपारिसुद्धिदानं रुहतीति सिद्धं, तञ्‍च खो पकतत्तसञ्‍ञाय, नो अञ्‍ञथाति तक्‍को। जानित्वा सामणेरस्स दिन्‍ने न याति, आपत्ति च, अजानित्वा दिन्‍ने याति च, अनापत्तीति एके। बिळालसङ्खलिका नाम पारिसुद्धीति एत्थ सङ्खलिका नाम अनन्तरेन सम्बज्झति, अञ्‍ञेन च सङ्खलिकेनाति केवलं सङ्खलिका पारिसुद्धि नाम होतीति उपतिस्सत्थेरो। एवं सन्ते विसेसनं निरत्थकं होति। बिळालसङ्खलिका बद्धाव होति अन्तोगेहे एव सम्पयोजनत्ता। यथा सा न कत्थचि गच्छति, तथा सापि न कत्थचि गच्छतीति किर अधिप्पायो।

छन्ददानादिकथावण्णना

१६५-७.‘‘छन्दं दत्वा खण्डसीमं वा सीमन्तरिकं वा बहिसीमं वा गन्त्वा आगतो भिक्खु कम्मं न कोपेति, तस्मा गमिकभिक्खूनं छन्दं गण्हित्वा खण्डसीमं बन्धित्वा पुन विहारसीमं बन्धितुं तेसं छन्दं न गण्हन्ती’’ति वदन्ति। ‘‘मुहुत्तं एकमन्तं होथा’’तिआदिवचनतो यं किञ्‍चि भिक्खुकम्मं गहट्ठादीसु हत्थपासगतेसु न वट्टतीति सिद्धं। निस्सीमन्ति बहिसीमं। तस्स सम्मुतिदानकिच्‍चं नत्थीति तस्मिं सतिपि वट्टतीति अत्थो। आसनेन सह उदकन्ति अत्थो। पन्‍नरसोपीति अपि-सद्दो चातुद्दसिं सम्पिण्डेति, तेन वुत्तं महाअट्ठकथायं ‘‘यदि नो एत’’न्ति। ‘‘अज्‍ज मे उपोसथो पन्‍नरसो’’ति अधिट्ठानं सदा न किञ्‍चि, न अञ्‍ञथाति एके।

आपत्तिपटिकम्मविधिकथादिवण्णना

१६९-१७०.पटिदेसेमीति याय कायचि भासाय वुत्ते देसना च पटिग्गहो च होतियेव दिट्ठाविकम्मेन विसुद्धिया वुत्तत्ताति केचि। वेमतिकेन ‘‘अहं, भन्ते, एकिस्सा थुल्‍लच्‍चयापत्तिया वेमतिको, यदा निब्बेमतिको भविस्सामि, तदा तं आपत्तिं पटिकरिस्सामी’’ति वत्तब्बं। एवं कते याव निब्बेमतिको न होति, ताव सभागापत्तिं पटिग्गहेतुं न लभति, अञ्‍ञेसञ्‍च कम्मानं परिसुद्धो नाम होति। पुन निब्बेमतिको हुत्वा देसेतब्बं। न चाति नेव पाळियं न अट्ठकथायं अत्थि, देसिते पन दोसो नत्थीति। तथा इतोवुट्ठहित्वा तं आपत्तिं पटिकरिस्सामीति एत्थ च सकलसङ्घे सभागापत्तिं आपन्‍ने, वेमतिके च। तथा च ‘‘सब्बो सङ्घो सभागापत्तिं आपज्‍जित्वा यदा सुद्धं पस्सिस्सती’’ति, ‘‘तदा तस्स सन्तिके तं आपत्तिं पटिकरिस्सती’ति वत्वा ‘उपोसथं कातुं लभती’’ति च लिखितं।

अनापत्तिपन्‍नरसकादिकथावण्णना

१७२-३.‘‘अत्थञ्‍ञे’’ति पुब्बवारे, ‘‘अथञ्‍ञे’’ति पच्छावारे पाठो। सीमं ओक्‍कन्ते वा ओक्‍कमन्ते वा पस्सन्ति। धम्मसञ्‍ञिनो पन अञ्‍ञाणेन होन्ति। ‘‘वेमतिकपन्‍नरसकं उत्तानमेवा’’ति पाठो।

सीमोक्‍कन्तिकपेय्यालकथावण्णना

१७८.‘‘न अकामा दातब्बा’’तिवचनतो इच्छाय सति दातब्बाति सिद्धं।

लिङ्गादिदस्सनकथावण्णना

१८०.नाभिवितरन्तीति एत्थ लद्धिनानासंवासका किर ते। कम्मनानासंवासकञ्हि दिट्ठिं पटिनिस्सज्‍जापेत्वा तस्स ओसारणकम्मं कातब्बं। एवञ्हि कते तेन सद्धिं उपोसथं कातुं वट्टति। इतरेन लद्धिनिस्सज्‍जनमत्तेन कातुन्ति वुत्तं। आपत्तिया अदस्सने अप्पटिकम्मे उक्खित्तकञ्‍च दिट्ठिया अप्पटिनिस्सग्गे उक्खित्तकञ्‍च जानित्वा तेन सद्धिं करोन्तस्स पाचित्तियं, तस्मा इमे उक्खित्तानुवत्तकाति वेदितब्बाति एके।

नगन्तब्बगन्तब्बवारकथावण्णना

१८१.न गन्तब्बोति किं सन्धाय? ‘‘अञ्‍ञत्र सङ्घेना’’ति वचनतो यस्मिं विहारे सतं भिक्खू विहरन्ति, ते सब्बे केनचिदेव करणीयेन दस दस हुत्वा विसुं विसुं नानाउदकुक्खेपसीमादीसु ठत्वा उपोसथं कातुं लभन्ति। नवकम्मसालादिका नानासीमाकोटि उपोसथाधिट्ठानत्थं सीमापि नदीपि न गन्तब्बा। गरुकं पातिमोक्खुद्देसं विस्सज्‍जित्वा लहुकस्स अकत्तब्बत्ता ‘‘अञ्‍ञत्र सङ्घेना’’ति वचनं साधेति। तत्थ ‘‘यस्मिं आवासे उपोसथकारका …पे॰… अकत्वा न गन्तब्बो’’ति वचनतो विस्सट्ठउपोसथापि आवासा गन्तुं वट्टतीति सिद्धं। ‘‘ततो पारिसुद्धिउपोसथकरणत्थं विस्सट्ठउपोसथा गन्तुं वट्टति, खण्डसीमं वा पविसितुन्ति अपरे वदन्ती’’ति वुत्तं। इमिना नेव उपोसथन्तरायोति ‘‘अत्तनो उपोसथन्तरायो’’ति लिखितं।

वज्‍जनीयपुग्गलसन्दस्सनकथावण्णना

१८३.‘‘अन्तिमवत्थुं अज्झापन्‍नस्स निसिन्‍नपरिसाय कलहादिभयेन नाहं करिस्सामी’’ति चित्तं उप्पादेत्वा निसीदितुं वट्टति। अञ्‍ञकम्मे तस्स निसिन्‍नपरिसाय आपत्ति नत्थीति एके। ‘‘न च, भिक्खवे, अनुपोसथे उपोसथो कातब्बो अञ्‍ञत्र सङ्घसामग्गिया’’ति (महाव॰ १८३) वचनतो सामग्गीदिवसो अनुपोसथदिवसोति अत्थतो वुत्तं विय दिस्सति। ‘‘द्वेमे, भिक्खवे, उपोसथा’’ति वुत्तवचनवसेनेतं वुत्तं, अञ्‍ञथा परिवारपाळिया विरुज्झतीति आचरिया। चातुद्दसियं, पन्‍नरसियं वा चे सङ्घो समग्गो होति, ‘‘अज्‍जुपोसथो सामग्गी’’ति अवत्वा पकतिनीहारेनेव कत्तब्बन्ति दस्सनत्थं यथादेसना कताति नो तक्‍को। अञ्‍ञथा यथावुत्तद्वये चे सामग्गी होति, तत्थ उपोसथं अकत्वा अनुपोसथदिवसे एव सामग्गीउपोसथो कातब्बोति आपज्‍जति। अञ्‍ञथा पुब्बे पटिसिद्धत्ता इदानि पटिसेधनकिच्‍चं नत्थि। ‘‘न, भिक्खवे, देवसिकं पातिमोक्खं उद्दिसितब्ब’’न्ति (महाव॰ १३६) पुब्बे हि वुत्तं। अथ वा ‘‘अनुजानामि, भिक्खवे, उपोसथे पातिमोक्खं उद्दिसितु’’न्ति पुब्बे वुत्तत्ता ‘‘सकिं पक्खस्स चातुद्दसे वा पन्‍नरसे वा’’ति च ‘‘द्वेमे, भिक्खवे, उपोसथा’’ति (महाव॰ १४९) च पच्छा वुत्तत्ता ततो अञ्‍ञस्मिं दिवसे उपोसथो न कातब्बोति अत्थतो आपन्‍नं अनिट्ठं, सति सङ्घसामग्गिया अञ्‍ञो दिवसो पकतिवसेन अनुपोसथोपि उपोसथदिवसो नाम होतीति दस्सनवसेन निवारेतुम्पि एवंदेसना कताति वेदितब्बा।

उपोसथक्खन्धकवण्णना निट्ठिता।

३. वस्सूपनायिकक्खन्धकवण्णना

वस्सूपनायिकानुजाननकथावण्णना

१८४.महाअट्ठकथायम्पि ‘‘सङ्कासयिस्सन्ती’’ति पाठो, दीपवासिनो ‘‘सङ्कापयिस्सन्ती’’ति पठन्ति किर। ‘‘कति नु खो वस्सूपनायिका’’ति चिन्तायं ‘‘किं निमित्त’’न्ति वुत्ते ‘‘अनुजानामि, भिक्खवे, वस्सं उपगन्तु’’न्ति यं वस्सूपगमनं वुत्तं, तं ‘‘इमं तेमासं वस्सं उपेमी’’ति वत्वा उपगन्तब्बं। वस्सानमासा च चत्तारो। तत्थ पठमं तेमासं, पच्छिमं तेमासन्ति दुविधं तेमासं। तेनायं तेसं भिक्खूनं चिन्ता अहोसि।

वस्सानेचारिकापटिक्खेपादिकथावण्णना

१८५.अनपेक्खगमनेन वा अञ्‍ञत्थ अरुणं उट्ठापनेन वा आपत्ति वेदितब्बाति एत्थ पठमं ताव सो सत्ताहं अनागताय पवारणाय सकरणीयो पक्‍कमति। ‘‘आगच्छेय्य वा सो, भिक्खवे, भिक्खु तं आवासं न वा आगच्छेय्य, तस्स, भिक्खवे, भिक्खुनो पुरिमिका च पञ्‍ञायति, पटिस्सवे च अनापत्ती’’ति वचनतो ओरं सन्धाय वुत्तन्ति वेदितब्बं। तथा हि ‘‘सो तदहेव अकरणीयो पक्‍कमति, सकरणीयो पक्‍कमति, तस्स, भिक्खवे, भिक्खुनो पुरिमिका च न पञ्‍ञायति, पटिस्सवे च आपत्ति दुक्‍कटस्सा’’ति (महाव॰ २०७) वुत्तं।

सत्ताहकरणीयानुजाननकथावण्णना

१८७-८.दुतियं पन ‘‘सो तं सत्ताहं बहिद्धा वीतिनामेति, तस्स, भिक्खवे, भिक्खुनो पुरिमिका च न पञ्‍ञायति, पटिस्सवे च आपत्ति दुक्‍कटस्सा’’ति वचनतो सत्ताहतो परं वेदितब्बं। तथा हि ‘‘सो तं सत्ताहं अन्तो सन्‍निवत्तं करोति, तस्स, भिक्खवे, भिक्खुनो पुरिमिका च पञ्‍ञायति, पटिस्सवे च अनापत्ती’’ति (महाव॰ २०७) वुत्तं। सतिपि कारणद्वये वस्सच्छेदकारणाभावे आपत्ति वेदितब्बा, तस्मा तीणिपि एतानि वचनानि यथासम्भवं योजितानि विग्गहानि होन्ति। तीणि परिहीनानीति तासं नत्थिताय।

पहितेयेवअनुजाननकथावण्णना

१९९.‘‘अनुजानामि भिक्खवे, सङ्घकरणीयेन गन्तुं, सत्ताहं सन्‍निवत्तो कातब्बो’’ति वचनतो अन्तोवस्से संहारिकभावेन गन्तुं वट्टति। तत्थ धम्मछन्दवसेनपि आगते सङ्घस्स आयमुखं विनस्सति। ततो ‘‘सेनासनानि कत्वा’’ति च वुत्तं। आगतन्ति आगमनं। भावेत्थ तपच्‍चयोयं। सङ्घकरणीयेन गन्तुन्ति एत्थ ‘‘सेनासनपटिसंयुत्तेसु एव सङ्घकरणीयेसु, न अञ्‍ञेसू’’ति धम्मसिरित्थेरो वदति किर। अट्ठकथायम्पि तं पदं उद्धरित्वा ‘‘यं किञ्‍चि उपोसथागारादीसु सेनासनेसू’’तिआदिना सेनासनमेव दस्सितं, तस्मा उपपरिक्खितब्बं।

अनिमन्तितेन गन्तुं न वट्टतीति तस्स रत्तिच्छेदो च दुक्‍कटापत्ति च होति, तं ‘‘वस्सच्छेदो’’ति च वदन्ति। निमन्तितोयेव नाम होतीति एत्थ उपासकेहि ‘‘इमस्मिं नाम दिवसे दानादीनि करोम, सब्बे सन्‍निपतन्तू’’ति कतायपि कतिकाय गन्तुं वट्टति। पवारणाय नवमितो पट्ठाय पंसुकूलिकचीवरं परियेसितुं कावीरपट्टने विय सब्बेसं गन्तुं वट्टति अनुसंवच्छरं नियमतो उपासकेहि सज्‍जित्वा ठपनतो। वुत्तम्पि चेतं अन्धकट्ठकथायं ‘‘भिक्खुसङ्घेन वा कतिका कता ‘समन्ता भिक्खू गच्छन्तू’ति, घोसनं वा कतं उपासकेहि, तत्थ गच्छन्तस्स रत्तिच्छेदो नत्थीति तथा ‘अनुसंवच्छरं आगच्छन्तू’ति सकिं निमन्तितेपि वट्टती’’ति च ‘‘चीवरकालतो पट्ठाय नियमं कत्वा समन्ततो आगतानं सज्‍जेत्वा दानतो कावीरपट्टने घोसेत्वा करणाकारो पञ्‍ञायतीति अपरे’’ति च। आचरिया पन एवं न वदन्ति।

अन्तरायेअनापत्तिवस्सच्छेदकथावण्णना

२०१.‘‘सचे दूरं गतो होति, सत्ताहवारेन अरुणो उट्ठापेतब्बो’’ति वचनतो ‘यस्मिं अन्तराये सति वस्सच्छेदं कातुं वट्टति, तस्मिं अन्तरायेव वस्सच्छेदमकत्वा सत्ताहकरणीयेन वीतिनामेतुं वट्टतीति दीपितन्ति अपरे’’ति वुत्तं। विनयधरा पन न इच्छन्ति, तस्मा ‘‘सत्ताहवारेन अरुणो उट्ठापेतब्बो’’ति इदं तत्रुप्पादादिनिमित्तं वुत्तन्ति वेदितब्बं। तं सन्धाय ‘‘आचरिया पन एवं न वदन्ती’’ति वुत्तं। गावुंवाति बलिबद्धं वा। बहिसीमाय ठितानन्ति तेहि खण्डसीमाय ठितेहिपीति उपतिस्सत्थेरो। वस्सच्छेदे अस्स वस्सच्छेदस्स। विहारा अञ्‍ञत्थ वुट्ठापेन्तेहि तत्थेव सन्‍निपतित्वा ‘‘इमिना च इमिना च कारणेन इमस्मिं नाम पदेसे इमं विहारं नेत्वा वुट्ठापेमा’’ति अनुस्सावेत्वाव कातब्बन्ति।

वजादीसुवस्सूपगमनकथावण्णना

२०३.वजेन सद्धिं गतस्स वस्सच्छेदे अनापत्तीति वस्सच्छेदो न होतीति किर अधिप्पायो। सत्थस्स अविहारत्ता ‘‘इमस्मिं विहारे’’ति अवत्वा ‘‘इध वस्सं उपेमी’’ति एत्तकं वत्तब्बं। ‘‘सत्थे पन वस्सं उपगन्तुं न वट्टतीति ‘इमस्मिं विहारे इमं तेमास’न्ति वा ‘इध वस्सं उपेमी’ति वा न वट्टति, आलयकरणमत्तेनेव वट्टतीति अधिप्पायो’’ति लिखितं। तं पन अट्ठकथाय विरुज्झति। ‘‘इध वस्सं उपेमीति तिक्खत्तुं वत्तब्ब’’न्ति हि वुत्तं। अट्ठकथावचनम्पि पुब्बापरं विरुज्झतीति चे? न, अधिप्पायाजाननतो। सत्थो दुविधो ठितो, सञ्‍चारोति। तत्थ ठिते कुटिकाय ‘‘इध वस्सं उपेमी’’ति वत्वा वसितब्बं। इदञ्हि सन्धाय ‘‘अनुजानामि, भिक्खवे, सत्थे वस्सं उपगन्तु’’न्ति वुत्तं, सञ्‍चारिम्हि पन सत्थे कुटिकाय अभावतो वस्सं उपगन्तुं न वट्टति। सति सिविकाय वा सकटकुटिकाय वा वट्टति, तथा वजेपि। तीसु ठानेसु भिक्खुनो नत्थि वस्सच्छेदे आपत्ति।

पवारेतुञ्‍च लभतीति एत्थायं विचारणा – ‘‘अनुजानामि, भिक्खवे, येन वजो, तेन गन्तु’’न्ति इदं किं वस्सरक्खणत्थं वुत्तं, उदाहु वस्सच्छेदापत्तिरक्खणत्थन्ति? किञ्‍चेत्थ यदि वस्सरक्खणत्थं, ‘‘न, भिक्खवे, असेनासनिकेन वस्सं उपगन्तब्ब’’न्ति इदं विरुज्झति। अथ वस्सच्छेदापत्तिरक्खणत्थं वुत्तन्ति सिद्धं न सो पवारेतुं लभतीति, का पनेत्थ युत्ति? यतो अयमेव तिविधो पवारेतुं लभति, नेतरो। वाळेहि उब्बाळ्हादिको हि उपगतट्ठानापरिच्‍चागा लभति। परिच्‍चागा न लभतीति अयमेत्थ युत्ति। येन गामो, तत्थ गतोपि पवारेतुं लभतीति एकेनाति आचरियो। यो हि पुब्बे ‘‘इध वस्सं उपेमी’’ति न उपगतो, ‘‘इमस्मिं विहारे’’ति उपगतो, सो च परिच्‍चत्तो। अञ्‍ञथा विना विहारेन केवलं गामं सन्धाय ‘‘इध वस्सं उपेमी’’ति उपगन्तुं वट्टतीति। आपज्‍जतूति चे? न, ‘‘अनुजानामि, भिक्खवे, वजे सत्थे नावाय वस्सं उपगन्तु’’न्ति वचनं विय ‘‘गामे उपगन्तु’’न्ति वचनाभावतो। यस्मा ‘‘तीसु ठानेसु भिक्खुनो नत्थि वस्सच्छेदे आपत्ती’’ति वचनं तत्थ वस्सूपगमनं अत्थीति दीपेति तदभावे छेदाभावा, तस्मा ‘‘सत्थे पन वस्सं उपगन्तुं न वट्टती’’ति कुटिया अभावकालं सन्धाय वुत्तन्ति सिद्धं। तीसु ठानेसु भिक्खुनो नत्थि वस्सच्छेदे आपत्तीति ‘‘तेहि सद्धिं गच्छन्तस्सेव नत्थि, विरुज्झित्वा गमने आपत्ति च, पवारेतुञ्‍च न लभती’’ति लिखितं, तस्मा यं वुत्तं अट्ठकथायं ‘‘अथ सत्थो अन्तोवस्सेयेव भिक्खुना पत्थितट्ठानं पत्वा अतिक्‍कमति…पे॰… अन्तरा एकस्मिं गामे तिट्ठति वा विप्पकिरति वा’’तिआदि, तं एत्तावता विरुज्झित्वा गतानम्पि विरुज्झित्वा गमनं न होति, तस्मा पवारेतब्बन्ति दस्सनत्थन्ति वेदितब्बं।

तत्थ ‘‘पदरच्छदनं कुटिं कत्वा उपगन्तब्ब’’न्ति वचनतो सेनासनत्थाय रुक्खं आरुहितुं वट्टतीति सिद्धं होति, न पाळिविरोधतोति चे? न, तप्पटिक्खेपेनेव सिद्धत्ता, इमस्स इध पुनपि पटिक्खेपनतो। ‘‘न, भिक्खवे, असेनासनिकेन वस्सं उपगन्तब्ब’’न्ति इमिना पटिक्खेपेन सिद्धे ‘‘न, भिक्खवे, अज्झोकासे वस्सं उपगन्तब्ब’’न्ति पटिक्खेपो विय सियाति चे? न, अज्झोकासस्स असेनासनभावानुमतिप्पसङ्गतो। अज्झोकासो हि ‘‘अज्झोकासे पलालपुञ्‍जे’’ति वचनतो सेनासनन्ति सिद्धं। चतुसालअज्झोकासे वसन्तोपि ‘‘चतुसालाय वसती’’ति वुच्‍चति, तस्मा तत्थ वट्टतीति आपज्‍जति, तस्मा इध असेनासनिको नाम अत्तना वा परेन वा अत्तनो निबद्धवासत्थं अपापितसेनासनिकोति वेदितब्बं। अञ्‍ञथा द्विन्‍नं पटिक्खेपानं अञ्‍ञतरातिरेकता च रुक्खमूलेपि निब्बकोसेपि वस्सं उपगन्तुं वट्टतीति च, अपापितसेनासनिकेनापि गब्भे वसितुं वट्टतीति च आपज्‍जति, सद्वारबन्धमेव सेनासनं इध अधिप्पेतन्ति कथं पञ्‍ञायतीति चे? निदानतो। अयञ्हि असेनासनिकवस्सूपगमनापत्ति ‘‘तेन खो पन समयेन भिक्खू असेनासनिका वस्सं उपगच्छन्ति, सीतेनपि उण्हेनपि किलमन्ती’’ति इमस्मिं निदाने पञ्‍ञत्ता, तस्मा सीतादिपटिक्खेपमेव इध सेनासनन्ति अधिप्पेतब्बन्ति सिद्धं। एवं सन्ते सिद्धं पुब्बपक्खनिदस्सनन्ति चे? न, पुब्बे अपरत्थपवत्तिसूचनतो। दुतियज्झाननिद्देसे ‘‘वितक्‍कविचारानं वूपसमा अवितक्‍कं अविचार’’न्ति (दी॰ नि॰ १.२२८; म॰ नि॰ १.२७१) वचनानि निदस्सनं। अज्झोकासपटिक्खेपनिदानेन बहिअज्झोकासोव पटिक्खित्तो, न चतुसालादिमज्झगतो अज्झोकासोति आपज्‍जति, तस्मा न निदानं पमाणन्ति चे? न, नियमतो। किञ्‍चि हि सिक्खापदं निदानापेक्खं होतीति साधितमेतं। इदं सापेक्खं, इदं अनपेक्खन्ति कथं पञ्‍ञायति, न हि एत्थ उभतोविभङ्गे विय सिक्खापदानं पदभाजनं, अनापत्तिवारो वा अत्थीति? इधापि देसनाविधानतो पञ्‍ञायति। ‘‘देवे वस्सन्ते रुक्खमूलम्पि निब्बकोसम्पि उपधावन्ती’’ति हि इमेहि द्वीहि निदानवचनेहि बहि वा अन्तो वा सब्बं ओवस्सकट्ठानं इध अज्झोकासो नाम। अनोवस्सकट्ठानम्पि अनिब्बकोसमेव इध इच्छितब्बन्ति सिद्धं होति। तेन न उपगन्तब्बन्ति न आलयकरणपटिक्खेपो, ‘‘इध वस्सं उपेमी’’ति वचनपटिक्खेपो। छवसरीरं दहित्वा छारिकाय, अट्ठिकानञ्‍च अत्थाय कुटिका करीयतीति अन्धकट्ठकथावचनं। ‘‘टङ्कितमञ्‍चोति कसिकुटिकापासाणघर’’न्ति लिखितं। ‘‘अकवाटबद्धसेनासने अत्तनो पापिते सभागट्ठाने सकवाटबद्धे वसति चे, वट्टती’’ति वुत्तं। पयोगोपि अत्थि, ‘‘असेनासनिकेन वस्सं न उपगन्तब्ब’’न्ति पाळि च अट्ठकथा च, तस्मा उपपरिक्खितब्बं।

अधम्मिककतिकादिकथावण्णना

२०५.महाविभङ्गे वुत्तन्ति एत्थ अयं अन्धकट्ठकथावचनं ऊनपन्‍नरसवस्सेन सामणेरेन इध विहारे न वत्थब्बा, न पंसुकूलं आहिण्डितब्बं, न चोळभिक्खा गहेतब्बा, न अञ्‍ञविहारे भुञ्‍जितब्बं, न अञ्‍ञस्स भिक्खुस्स वा भिक्खुनिया वा सन्तकं भुञ्‍जितब्बं, अञ्‍ञमञ्‍ञं नेव आलपेय्याम न सल्‍लपेय्याम, न सज्झायितब्बं, मत्तिकापत्तेन वट्टति, न अपरिपुण्णपरिक्खारस्स वासोति।

४. पवारणाक्खन्धकवण्णना

अफासुकविहारकथावण्णना

२१०.‘‘सङ्घं आवुसो पवारेमी’’ति वुत्तत्ता पच्छापि ‘‘वदतु मं सङ्घो’’ति वत्तब्बं विय दिस्सति। अयं पनेत्थ अधिप्पायो – यस्मा अहं सङ्घं पवारेमि, तस्मा तत्थ परियापन्‍ना थेरा, मज्झिमा, नवा वा अविसेसेनायस्मन्तो सब्बेपि मं वदन्तूति।

पवारणाभेदवण्णना

२१२.द्वेमा, भिक्खवे, पवारणाति एत्थ तादिसे किच्‍चे सति यत्थ कत्थचि पवारेतुं वट्टति। तेनेव महाविहारे भिक्खू चातुद्दसियं पवारेत्वा पन्‍नरसियं कायसामग्गिं इदानिपि देन्ति। चेतियगिरि महादस्सनत्थम्पि अट्ठमियं गच्छन्ति, तम्पि चातुद्दसियं पवारेतुकामानंयेव होति। ‘‘सत्ताहं अनागताय पवारणाय सकरणीयो पक्‍कमति, अनापत्तीति वचनतो इदं आचिण्ण’’न्ति लिखितं। ‘‘नो चे अधिट्ठहेय्य, आपत्ति दुक्‍कटस्सा’’ति एकस्स वुत्तदुक्‍कटं, तस्सेव वुत्तं पुब्बकिच्‍चञ्‍च सङ्घगणानम्पि नेतब्बं।

पवारणादानानुजाननकथावण्णना

२१३.तेन च भिक्खुनाति पवारणादायकेन।

अनापत्तिपन्‍नरसकादिकथावण्णना

‘‘तस्सा च पवारणाय आरोचिताय सङ्घेन च पवारिते सब्बेसं सुप्पवारितं होतीति वचनतो केवलं पवारणाय पवारणादायकोपि पवारितोव होती’’ति वदन्तीति।

२२२.अवुट्ठिताय परिसायाति पवारेत्वा पच्छा अञ्‍ञमञ्‍ञं कथेन्तिया। एकच्‍चाय वुट्ठितायाति एकच्‍चेसु यथानिसिन्‍नेसु एकच्‍चेसु सकसकट्ठानं गतेसु। पुन पवारेतब्बन्ति पुनपि सब्बेहि समागन्त्वा पवारेतब्बं। आगच्छन्ति समसमा, तेसं सन्तिके पवारेतब्बन्ति ‘‘गते अनानेत्वा निसिन्‍नानंयेव सन्तिके पवारेतब्बं, उपोसथक्खन्धकेपि एसेव नयो’’ति लिखितं। सब्बाय वुट्ठिताय परिसाय आगच्छन्ति समसमा, तेसं सन्तिके पवारेतब्बन्ति ‘‘यदि सब्बे वुट्ठहित्वा गता, सन्‍निपातेतुञ्‍च न सक्‍का, एकच्‍चे सन्‍निपातापेत्वा पवारेतुं वट्टती’’ति वदन्ति। कस्मा? ञत्तिं ठपेत्वा कत्तब्बसङ्घकम्माभावा वग्गं न होति किर। एत्थ पन एकच्‍चेसु गतेसुपि सब्बेसु गतेसुपि सब्बे सन्‍निपातापेत्वा ञत्तिं अट्ठपेत्वा केवलं पवारेतब्बं। एकच्‍चे सन्‍निपातापेत्वा पवारेतुं न वट्टति ‘‘सङ्घं, भन्ते, पवारेमी’’ति वचनतो। सब्बेपि हि सन्‍निपतिता पच्छा दिट्ठं वा सुतं वा परिसङ्कितं वा वत्तारो होन्ति। अनागतानं अत्थिभावं ञत्वापि एकच्‍चानं सन्तिके पवारणावचनं विय होति। सम्मुखीभूते चत्तारो सन्‍निपातापेत्वा निस्सग्गियं आपन्‍नचीवरादिनिस्सज्‍जनं विय पवारणा न होति सब्बायत्तत्ता। ‘‘समग्गानं पवारणा पञ्‍ञत्ता’’ति वचनञ्‍चेत्थ साधकं। ‘‘इतो अञ्‍ञथा न वट्टति अट्ठकथायं अननुञ्‍ञातत्ता’’ति उपतिस्सत्थेरो वदति। ‘‘थोकतरेहि तेसं सन्तिके पवारेतब्बं ञत्तिं अट्ठपेत्वावा’’ति वुत्तं। आगन्तुका नाम नवमितो पट्ठायागता वा वजसत्थनावासु वुत्थवस्सा वा होन्ति।

५. चम्मक्खन्धकवण्णना

सोणकोळिविसवत्थुकथावण्णना

२४२.असीतिया…पे॰… कारेतीति ‘‘असीति गामिकसहस्सानि सन्‍निपातापेत्वा’’ति इमस्स कारणवचनं। तत्थ ‘‘गामानं असीतिया सहस्सेसू’’ति वत्तब्बे ‘‘असीतिया गामसहस्सेसू’’ति वुत्तं। गामप्पमुखा गामिका, तेसं सहस्सानि। ‘‘कम्मचित्तीकतानी’’ति उपचारेन वुत्तं। कम्मपच्‍चयउतुसमुट्ठाने हि तेसं अञ्‍जनवण्णभावो। ‘‘केनचिदेव करणीयेना’’ति वत्तब्बे ‘‘केनचिदेवा’’ति वुत्तं। एत्थ एवं-सद्दो ओपम्मे पवत्तति। एवमुपमानोपदेसपुच्छावधारणपटिञ्‍ञातओपम्मे। पुरतो पेक्खमानानन्ति अनादरत्थे सामिवचनं। ततो पन भगवतो गन्धकुटिया कवाटं सुबद्धं पस्सित्वा इच्छिताकारकुसलताय इद्धिया गन्त्वा कुटिं पविसित्वा आरोचेसि। विहारपच्छायायन्ति विहारस्स वड्ढमानच्छायायं। ‘‘अहो नूनाति अहो महन्तो’’ति लिखितं। भगवतो सम्बहुलेहि सद्धिं आहिण्डनं आयस्मतो सोणस्स वीरियारम्भनिदस्सनेन अनारद्धवीरियानं उत्तेजनत्थं, एवं सुखुमालानं पादरक्खणत्थं उपाहना अनुञ्‍ञाताति दस्सनत्थञ्‍च।

सोणस्सपब्बज्‍जाकथावण्णना

२४३.तत्थ च निमित्तं गण्हाहीति तेसं इन्द्रियानं आकारं उपलक्खेहि।

सब्बनीलिकादिपटिक्खेपकथावण्णना

२४६.‘‘रञ्‍जनचोळकेन पुञ्छित्वा’’ति पाठो। ‘‘खल्‍लकादीनि अपनेत्वा’ति वुत्तत्ता द्वे तीणि छिद्दानि कत्वा वळञ्‍जेतुं वट्टती’’ति वदन्तानं वादो न गहेतब्बो।

यानादिपटिक्खेपकथावण्णना

२५४.‘‘चतुरङ्गुलाधिकानी’’ति वुत्तत्ता चतुरङ्गुलतो हेट्ठा वट्टतीति एके। उभतोलोहितकूपधानन्ति एत्थ ‘‘कासावं पन वट्टति, कुसुम्भादिरत्तमेव न वट्टती’’ति लिखितं।

सब्बचम्मपटिक्खेपादिकथावण्णना

२५५.किस्स त्यायन्ति किस्स ते अयं।

६. भेसज्‍जक्खन्धकवण्णना

पञ्‍चभेसज्‍जादिकथावण्णना

२६०.‘‘यंभेसज्‍जञ्‍चेव अस्सा’’ति परतो ‘‘तदुभयेन भिय्योसो मत्ताय किस्सा होन्ती’’तिआदिना विरोधदस्सनतो निदानानपेक्खं यथालाभवसेन वुत्तन्ति वेदितब्बं। यथानिदानं कस्मा न वुत्तन्ति चे? तदञ्‍ञापेक्खाधिप्पायतो। सब्बबुद्धकालेपि हि सप्पिआदीनं सत्ताहकालिकभावापेक्खाति तथा वचनेन भगवतो अधिप्पायो, तेनेव ‘‘आहारत्थञ्‍च फरेय्य, न च ओळारिको आहारो पञ्‍ञायेय्या’’ति वुत्तं। तथा हि काले पटिग्गहेत्वा काले परिभुञ्‍जितुन्ति एत्थ च कालपरिच्छेदो न कतो। कुतोयेव पन लब्भा तदञ्‍ञापेक्खाधिप्पायो भगवतो मूलभेसज्‍जादीनि तानि पटिग्गहेत्वा यावजीवन्ति कालपरिच्छेदो। यं पन ‘‘अनुजानामि, भिक्खवे, तानि पञ्‍च भेसज्‍जानि काले पटिग्गहेत्वा काले परिभुञ्‍जितु’’न्ति वचनं, तं ‘‘सन्‍निधिं कत्वा अपरापरस्मिं दिवसे काले एव परिभुञ्‍जितुं अनुजानामी’’ति अधिप्पायतो वुत्तन्ति वेदितब्बं। अञ्‍ञथा अतिसयत्ताभावतो ‘‘यं भेसज्‍जञ्‍चेव अस्सा’’तिआदि वितक्‍कुप्पादो न सम्भवति। पणीतभोजनानुमतिया पसिद्धत्ता आबाधानुरूपसप्पायापेक्खाय वुत्तानीति चे? तञ्‍च न, भिय्योसो मत्ताय किसादिभावापत्तिदस्सनतो। यथा ‘‘उच्छुरसं उपादाय फाणित’’न्ति वुत्तं, तथा ‘‘नवनीतं उपादाय सप्पि’’न्ति वत्तब्बतो नवनीतं विसुं न वत्तब्बन्ति चे? न, विसेसदस्सनाधिप्पायतो। यथा फाणितग्गहणेन सिद्धेपि परतो उच्छुरसो विसुं अनुञ्‍ञातो उच्छुसामञ्‍ञतो गुळोदकट्ठाने ठपनाधिप्पायतो। तथा नवनीते विसेसविधिदस्सनाधिप्पायतो नवनीतं विसुं अनुञ्‍ञातन्ति वेदितब्बं। विसेसविधि पनस्स भेसज्‍जसिक्खापदट्ठकथावसेन वेदितब्बं। वुत्तञ्हि तत्थ ‘‘पचित्वा सप्पिं कत्वा परिभुञ्‍जितुकामेन अधोतम्पि पचितुं वट्टती’’ति (पारा॰ अट्ठ॰ २.६२२)। तत्थ सप्पि पक्‍काव होति, नापक्‍का। तथा फाणितम्पि। नवनीतं अपक्‍कमेव।

एत्थाह – नवनीतं विय उच्छुरसोपि सत्ताहकालिकपाळियं एव वत्तब्बोति? न वत्तब्बो। कस्मा? सत्ताहकालिकपाळियं वुत्ते उच्छुरसो गुळापदेसेन यथा अगिलानस्स फाणितं पटिसिद्धं, तथा उच्छुरसोपीति आपज्‍जति, अवुत्ते पन गुळं विय सो फाणितसङ्ख्यं न गच्छति। इध अवत्वा पच्छा वचनेन गुळोदकट्ठानेव ठपितो होति। तदत्थमेव पच्छाभत्तं वट्टनकपानकाधिकारे वुत्तो, तस्मा एव यामकालिकोति चे? न, अट्ठकथाविरोधतो। न उपादायत्थस्स निस्सयत्थत्ताति चे? किं वुत्तं होति – ‘‘उच्छुरसं उपादाय उच्छुविकति फाणितन्ति वेदितब्बा’’ति (पारा॰ अट्ठ॰ २.६२३) यदेतं निस्सग्गियट्ठकथावचनं, तत्थ ‘‘उपादाया’’ति इमस्स निस्साय पच्‍चयं कत्वाति अत्थोति। न, परतो अपरकिरियाय अदस्सनतो। यथा ‘‘चक्खुञ्‍च पटिच्‍च रूपे चा’’तिआदीसु (म॰ नि॰ १.२०४, ४००; ३.४२१, ४२५; सं॰ नि॰ २.४३) ‘‘पटिच्‍चा’’ति इमस्स उस्सुक्‍कवचनस्स ‘‘उप्पज्‍जती’’ति अपरकिरिया दिस्सति, न तथा ‘‘उच्छुरसं उपादाया’’ति एत्थ अपरकिरिया दिस्सतीति। अयुत्तमेतं तत्थ तदभावेपि सिद्धत्ता। यथा ‘‘चत्तारो च महाभूता चतुन्‍नञ्‍च महाभूतानं उपादाय रूप’’न्ति (ध॰ स॰ ५८४) एत्थ अपरकिरियाय अभावेपि उस्सुक्‍कवचनं सिद्धं, तथा एत्थापि सियाति? न, तत्थ पाठसेसापेक्खत्ता। यथा चत्तारो महाभूता उपादाय वुत्तं, पवत्तकं वा रूपन्ति इमं पाठसेसं सा पाळि अपेक्खति, न तथा इदं अट्ठकथावचनं कञ्‍चि पाठं अपेक्खति। परिपुण्णवादिनो हि अट्ठकथाचरिया। सञ्‍ञाकरणमत्तं वा तस्स रूपस्स। ‘‘अत्थि रूपं उपादाया’’तिआदीसु (ध॰ स॰ ५८४) हि सञ्‍ञाकरणमत्तं, एवमिधापीति वेदितब्बं। इध पन ‘‘उच्छुरसं उपादाया’’ति उच्छुरसं आदिं कत्वा, ततो पट्ठायाति अत्थो, तस्मा ‘‘उच्छुरसेन संसट्ठं भत्तं अगिलानो भिक्खु विञ्‍ञापेत्वा भुञ्‍जन्तो पणीतभोजनसिक्खापदेन कारेतब्बो, भिक्खुनी पाटिदेसनियेना’’ति वुत्तं, तं अयुत्तन्ति एके। ते विसेसहेतुनो अभावं दस्सेत्वा पञ्‍ञापेतब्बा।

गुळादिअनुजाननकथावण्णना

२७४.सामं पक्‍कं समपक्‍कन्ति दुविधं विय दीपेति, तस्मा खीरादीसु उण्हमत्तमेव पाको। तेन उत्तण्डुलादिसमाना होन्ति।

मनुस्समंसपटिक्खेपकथावण्णना

२८०.‘‘न, भिक्खवे, मनुस्समंसं…पे॰… थुल्‍लच्‍चयस्सा’’ति वुत्तत्ता, ‘‘न च, भिक्खवे, अप्पटि…पे॰… दुक्‍कटस्सा’’ति च वुत्तत्ता अप्पटिवेक्खणदुक्‍कटञ्‍च थुल्‍लच्‍चयञ्‍चाति द्वे आपज्‍जति, तस्मा कप्पियमंसेपि अप्पटिवेक्खणपच्‍चया दुक्‍कटमेव। केचि ‘‘मंसभावं जानन्तोव आपज्‍जति। पूवादीसु अजानन्तस्स का पच्‍चवेक्खणा’’ति वदन्ति। अजानन्तोपि आपज्‍जति सामञ्‍ञेन वुत्तत्ताति केचि।

हत्थिमंसादिपटिक्खेपकथावण्णना

२८१.इमेसं…पे॰… सब्बं न वट्टतीति इदं दसन्‍नम्पि मनुस्समंसादीनं अकप्पियभावमत्तपरिदीपनवचनं, नापत्तिविभागदस्सनवचनं। यं किञ्‍चि ञत्वा वा अञत्वा वा खादन्तस्स आपत्तियेवाति इदम्पि अनियमितवचनमेव ‘‘अयं नाम आपत्ती’’ति अवुत्तत्ता । तदुभयम्पि हेट्ठा मनुस्सादीनं मंसादीसु थुल्‍लच्‍चयदुक्‍कटापत्तियो होन्तीति गहितनयेहि अधिप्पायो जानितुं सक्‍काति एवं वुत्तं। तत्रायं अधिप्पायो – यस्मा एतेसं मनुस्सादीनं मंसादीनि अकप्पियानि, तस्मा मनुस्सानं मंसादीसु थुल्‍लच्‍चयापत्ति। सेसानं सब्बत्थ दुक्‍कटापत्तीति। पाठेयेव हि लोहितादिं मंसगतिकं कत्वा ‘‘न, भिक्खवे, मनुस्समंसं…पे॰… थुल्‍लच्‍चयस्सा’’ति वुत्तं। तत्थेव हत्थादीनं मंसादीसुपि दुक्‍कटापत्ति पञ्‍ञत्ता। तेन वुत्तं सीहळट्ठकथायं ‘‘मनुस्समंसे वा केसे वा नखे वा अट्ठिम्हि वा लोहिते वा थुल्‍लच्‍चयमेवा’’ति वुत्तं। इमिना एव –

‘‘अट्ठिपि लोहितं चम्मं, लोममेसं न कप्पती’’ति॥ –

खुद्दसिक्खागाथापदस्स अत्थो च अधिप्पायो च सुविञ्‍ञेय्योति। पटिग्गहणेति एत्थ अनादरियदुक्‍कटं वुत्तं। ‘‘उदकमनुस्सादिमंसम्पि न वट्टती’’ति वदन्ति। नागराजेन वुत्तादीनवे सतिपि उज्झायनाधिकारमेव गहेत्वा ‘‘पटिकूलताया’’ति वुत्तं।

यागुमधुगोळकादिकथावण्णना

२८३.यथाधम्मो कारेतब्बोति इदं सङ्गीतिकारकवचनं। न हि भगवा तमेव सिक्खापदं द्विक्खत्तुं पञ्‍ञपेसि, एवं एवरूपेसूति एके। पठमपञ्‍ञत्तमेव सन्धाय वुत्तं, तथापि न च ते भिक्खू सापत्तिका जाता। कथं? परम्परभोजनसिक्खापदस्स अट्ठुप्पत्तिया। ‘‘अपिच मयं कालस्सेव पिण्डाय चरित्वा भुञ्‍जिम्हा’’ति वुत्तं। मातिकाविभङ्गे (पाचि॰ २२७) च ‘‘परम्परभोजनं नाम पञ्‍चन्‍नं भोजनानं अञ्‍ञतरेन भोजनेन निमन्तितो, तं ठपेत्वा अञ्‍ञं पञ्‍चन्‍नं भोजनानं अञ्‍ञतरं भोजनं भुञ्‍जति, एतं परम्परभोजनं नामा’’ति वुत्तं, तस्मा अञ्‍ञं भोजनं नाम निमन्तनतो लद्धं यं किञ्‍चीति सिद्धं। यस्मा न भोज्‍जयागुनिमन्तनतो लद्धभोजनं, तस्मा ‘‘एत्थ अनापत्ती’’ति ते भिक्खू परिभुञ्‍जिंसूति। एत्थ ‘‘यथाधम्मो कारेतब्बो’’ति वुत्तत्ता पन अञ्‍ञनिमन्तनतो लद्धभोजनमेव भुञ्‍जन्तस्स आपत्ति, नेतरन्ति अनुञ्‍ञातं। ततो पट्ठाय तस्स अनापत्तिवारे ‘‘निच्‍चभत्ते सलाकभत्ते पक्खिके उपोसथिके पाटिपदिके’’ति वुत्तं। पुब्बे वेसालिया पञ्‍ञत्तकाले नत्थि, यदि अत्थि, अट्ठुप्पत्तिमातिकाविभङ्गविरोधो, तस्मा ‘‘अपिच मयं कालस्सेव पिण्डाय चरित्वा भुञ्‍जिम्हा’’ति अट्ठुप्पत्तियं वुत्तत्ता, पदभाजनेपि ‘‘अञ्‍ञं पञ्‍चन्‍नं भोजनानं अञ्‍ञतरं भोजनं भुञ्‍जती’’ति अविसेसेन वुत्तत्ता च पठमं वा पच्छा वा निमन्तितं भोजनं ठपेत्वा अनिमन्तितमेव भुञ्‍जन्तस्स आपत्ति, नेतरन्ति किञ्‍चापि आपन्‍नं, ‘‘न, भिक्खवे, अञ्‍ञत्र निमन्तितेन अञ्‍ञस्स भोज्‍जयागु परिभुञ्‍जितब्बा’’ति वुत्तत्ता पन पठमनिमन्तितभोजनतो अञ्‍ञं पच्छा लद्धं निमन्तितभोजनं, निच्‍चभत्तादीनि च भुञ्‍जन्तस्स आपत्तीति आपज्‍जमानं विय जातन्ति अनुपञ्‍ञत्तिप्पसङ्गनिवारणं, अनिमन्तनभोजने आपत्तिप्पसङ्गनिवारणञ्‍च करोन्तो, पठमपञ्‍ञत्तिसिक्खापदमेव इमिना अत्थेन परिणामेन्तो च ‘‘यथाधम्मो कारेतब्बो’’ति भगवा आह, तस्मा ततो पट्ठाय पच्छा निमन्तनभोजनं भुञ्‍जन्तस्सेव आपत्ति। तेसु न निच्‍चभत्तादीनीति आपन्‍नं। तेनेवायस्मा उपालित्थेरो तस्स अनापत्तिवारे ‘‘निच्‍चभत्ते’’तिआदीनि पञ्‍च पदानि पक्खिपित्वा सङ्गायि। अधिप्पायञ्‍ञू हि ते महानागा, तस्मा पठममेव यं भगवता वुत्तं ‘‘पञ्‍च भोजनानि ठपेत्वा सब्बत्थ अनापत्ती’’ति वचनं, पच्छापि तं अनुरक्खन्तेन अभोजनं मधुगोळकं अपरामसित्वा भोज्‍जयागु एव वुत्ताति एवं आचरियो।

एत्थाह – यथा पच्छालद्धलेसेन थेरेन निच्‍चभत्तादिपक्खेपो कतो, एवं कथिनक्खन्धके परम्परभोजनं पक्खिपित्वा ‘‘अत्थतकथिनानं वो, भिक्खवे, छ कप्पिस्सन्ती’’ति किमत्थं न वुच्‍चन्ति? वुच्‍चते – यथावुत्तलेसनिदस्सनत्थं। अञ्‍ञथा इदं सिक्खापदं वेसालियं, अन्धकविन्दे चाति उभयत्थ उपड्ढुपड्ढेन पञ्‍ञत्तं सिया। नो चे, सापत्तिका भिक्खू सियुं, न च ते सापत्तिका अप्पटिक्खित्तेपि तेसं कुक्‍कुच्‍चदस्सनतो। ‘‘तेन हि, ब्राह्मण, भिक्खूनं देहीति। भिक्खू कुक्‍कुच्‍चायन्ता न पटिग्गण्हन्ती’’ति हि वुत्तं। तेसञ्हि ‘‘परिभुञ्‍जथा’’ति भगवतो आणत्तिया परिभुत्तानम्पि ‘‘ओदिस्सकं नु खो इदं अम्हाक’’न्ति विमतिप्पत्तानं विमतिविनोदनत्थं ‘‘अनुजानामि, भिक्खवे, यागुञ्‍च मधुगोळकञ्‍चा’’ति वुत्तं। एवमिधापेते पञ्‍ञत्तं परम्परभोजनसिक्खापदं ओमद्दित्वा परम्परभोजनं कथं भुञ्‍जिस्सन्तीति। एत्थाहु केचि आचरिया परम्परभोजनसिक्खापदेनेव ‘‘अञ्‍ञस्स भोजनं न कप्पती’’ति जानन्तापि ‘‘अनुजानामि, भिक्खवे, यागुञ्‍चा’’ति विसुं अनुञ्‍ञातत्ता ‘‘पटग्गिदानमहाविकटादि विय कप्पती’’ति सञ्‍ञाय भुञ्‍जिंसु। तेन वुत्तं ‘‘अपिच मयं कालस्सेव भोज्‍जयागुया धाता’’तिआदि, तं अयुत्तं तत्थ अट्ठुप्पत्तिमातिकाविभङ्गविरोधेन अनापत्तिवारे निच्‍चभत्तादीनं असम्भवप्पसङ्गतो, भिक्खूनं सापत्तिकभावानतिक्‍कमनतो, मिच्छागाहहेतुप्पसङ्गेन भगवता अनुञ्‍ञातप्पसङ्गतो च। ते हि भिक्खू यस्मा भगवा कत्थचि विनयवसेन कप्पियम्पि ‘‘गाथाभिगीतं मे अभोजनेय्य’’न्ति (सं॰ नि॰ १.१९४; सु॰ नि॰ ८१; मि॰ प॰ ४.५.९) पटिक्खिपति, तस्मा भगवतो अधिप्पायं पति ‘‘कुक्‍कुच्‍चायन्ता न पटिग्गण्हन्ती’’ति वुत्तं, सिक्खापदं पति भगवापि अत्तनो अधिप्पायप्पकासनत्थमेव ‘‘अनुजानामि, भिक्खवे, यागुञ्‍चा’’ति आह। दुरवग्गाहो हि भगवतो अधिप्पायो। तथा हि भारद्वाजस्स पायासं अभोजनेय्यन्ति अकतविञ्‍ञत्तिप्पसङ्गतो पटिक्खिपि। आनन्दत्थेरेन विञ्‍ञापेत्वा सज्‍जितं तेकटुलयागुं पन ‘‘यदपि, आनन्द, विञ्‍ञत्तं, तदपि अकप्पिय’’न्ति अवत्वा ‘‘यदपि, आनन्द, अन्तोवुत्थ’’न्तिआदिमेवाह। तेन नो चे तं अन्तोवुत्थं कप्पतीति अधिप्पायदस्सनेन पणीतभोजनसूपोदनविञ्‍ञत्तिसिक्खापदानि उपत्थम्भेति भगवतोपि कप्पति, पगेव अम्हाकन्ति।

कप्पियभूमिअनुजाननकथावण्णना

२९५.ओरवसद्दन्ति महासद्दं। बहूहि सम्परिवारेत्वाति एत्थ एकेनापि वट्टति। ‘‘बहूसु एकस्सपि वचनेन सह सियाति वुत्त’’न्ति वदन्ति। ‘‘आमसित्वा’’ति वुत्तत्ता अनामसिते न वट्टति। ‘‘दोसो नत्थी’’ति वचनेन सेसापि अनुञ्‍ञाता। ‘‘भित्तिञ्‍चे उपसन्ते पच्छा तं पूरेन्ति, तत्थ कातुं न वट्टति, पकतिभूमियंयेव कातुं वट्टती’’ति वदन्ति। तं उपरि अट्ठकथायं ‘‘इट्ठकादीहि कताचयस्सा’’तिआदिना विरुज्झति विय। मत्तिकापिण्डं वाति एत्थ ‘‘असतिया अनधिट्ठिताय सरितट्ठानतो पट्ठाय चे उपरि अधिट्ठिता, हेट्ठा ठितं भण्डं अकप्पियं, उपरिट्ठितमेव कप्पियं, अयमेत्थ विसेसो’’ति वुत्तं। एत्थ कप्पियकुटि लद्धुं वट्टतीति एवंविधे पुन कातब्बाति अत्थो। कप्पियकुटिं कातुं देमाति एत्थ कप्पियकुटिकिच्‍चं कातुन्ति अधिप्पायो। भोजनसाला पन सेनासनमेव, तस्मा तत्थ कातब्बन्ति अपरे। ‘‘अकतेपि वट्टती’’ति वुत्तं।

‘‘मुखसन्‍निधि नाम भोजनकाले सन्‍निधी’’ति लिखितं। मुखसन्‍निधीति तस्स नामं। ‘‘यदि सन्‍निधि होति, पाचित्तियं भवेय्य, मुखसन्‍निधि पन दुक्‍कटं, तस्मा सन्‍निधि अनधिप्पेता’’ति वुत्तं। ‘‘तस्स सन्तकं कत्वा’’ति वुत्तत्ता अनपेक्खविस्सज्‍जनं नाधिप्पेतं। चीवरविकप्पने विय कप्पियमत्तं ञातब्बन्ति केचि।

केणियजटिलवत्थुकथावण्णना

३००.‘‘अत्तना पटिग्गहितं पुरेभत्तमेव परिच्‍चजित्वा सामणेरादीहि पानकं कत्वा दिन्‍ने पुरेभत्तमेव वट्टति, न पच्छाभत्तं सवत्थुकपटिग्गहितत्ता’’ति वदन्ति, तत्थ पुन पटिग्गहणे निद्दोसत्ता, पुरेभत्तमेव पटिग्गहणस्स निस्सट्ठत्ता, अत्तना च अग्गहितत्ता दोसो न दिस्सति, उपपरिक्खित्वा गहेतब्बं। सालूका नाम कन्दा, ‘‘इतो किञ्‍चितक’’न्ति वोहरन्ति। ‘‘फारुसकन्ति गोळविसये एको रुक्खो’’ति च लिखितं। ‘‘पक्‍कडाकरस’’न्ति विसेसितत्ता ‘‘अपक्‍कं वट्टती’’ति वुत्तं। कुरुन्दिवचनेनपि सिद्धमेव। तण्डुलधोवनोदकम्पि धञ्‍ञरसो एव। ‘‘निक्‍कसटो उच्छुरसो सत्ताहकालिको’’ति लिखितं। सावित्तीति गायत्ति। छन्दसोति वेदस्स। ‘‘न, भिक्खवे, पब्बजितेन अकप्पिये समादपेतब्ब’न्ति वुत्तत्ता अनुपसम्पन्‍नस्सापि न केवलं दससु एव सिक्खापदेसु, अथ खो यं भिक्खुस्स न कप्पति, तस्मिम्पीति अधिप्पायो’’ति वुत्तं।

७. कथिनक्खन्धकवण्णना

कथिनानुजाननकथावण्णना

३०६.‘‘कथिनन्ति पञ्‍चानिसंसे अन्तोकरणसमत्थताय थिरन्ति अत्थो’’ति लिखितं। ‘‘पञ्‍च कप्पन्ती’’ति अवत्वा ‘‘कप्पिस्सन्ती’’ति अनागतवचनं ‘‘वो’’ति इमस्स सामिवचनपक्खे युज्‍जति तेसं तस्मिं खणे अनत्थतकथिनत्ता। द्वीसु पनेतेसु अत्थविकप्पेसु पच्छिमो युत्तो सब्बेसम्पि तेसं पावेय्यकानं सब्बधुतङ्गधरत्ता। निमन्तनं सादियन्तस्सेव हि अनामन्तचारो पञ्‍ञत्तो, तथा गणभोजनं। असमादानचारो अनधिट्ठिततिचीवरस्स नत्थि अतेचीवरिकस्स यावदत्थचीवरचतुत्थादिचीवरग्गहणसम्भवतो। इतरस्सापि अनधिट्ठानमुखेन लब्भति। चीवरुप्पादो अपंसुकूलिकस्सेव। ‘‘कथिनत्थतसीमाय’’न्ति उपचारसीमं सन्धाय वुत्तं। उपचारसीमट्ठस्स मतकचीवरादिभागियताय बद्धसीमाय तत्रुप्पादाभावतो विञ्‍ञेय्यमेतं उपचारसीमावेत्थ अधिप्पेताति। कथिनत्थारं के लभन्तीति के साधेन्तीति अत्थो। पञ्‍च जना साधेन्ति। कथिनदुस्सस्स हि दायका पच्छिमकोटिया चत्तारो होन्ति। एको पटिग्गाहकोति। ‘‘तत्र चे, भिक्खवे, य्वायं चतुवग्गो भिक्खुसङ्घो ठपेत्वा तीणि कम्मानि उपसम्पदं पवारणं अब्भान’’न्ति (महाव॰ ३८८) चम्पेय्यक्खन्धके वुत्तत्ता ‘‘न पञ्‍चवग्गकरणीय’’न्ति गहेतब्बं। ‘‘यस्स सङ्घो कथिनदुस्सं देति, तं हत्थपासे अकत्वापि बहिसीमाय ठितस्सपि दातुं वट्टती’’ति वदन्ति, तं हत्थपासे कत्वा एव दातब्बं। कस्मा? ‘‘तस्स कम्मप्पत्तत्ता’’ति वुत्तं। ‘‘तत्रुप्पादेन तण्डुलादिना वत्थेसु चेतापितेसु अत्थतकथिनानमेव तानि वत्थानि पापुणन्ति। वत्थेहि पन तण्डुलादीसु चेतापितेसु सब्बेसं तानि पापुणन्ती’’ति वुत्तं। पठमपवारणाय पवारिता लभन्तीति इदं उक्‍कट्ठकोटिया वुत्तं। अन्तरायेन अप्पवारितानम्पि वुत्थवस्सानं कथिनत्थारसम्भवतो इतरे गणपूरके कत्वा कथिनं अत्थरितब्बन्ति कथं पञ्‍ञायतीति चे? ‘‘द्विन्‍नं पुग्गलानं अत्थतं होति कथिनं अत्थारकस्स च अनुमोदकस्स चा’’ति (परि॰ ४०३) परिवारे एकवचनकरणतो, तत्थेव ‘‘सङ्घस्स अत्थतं होति कथिनं, गणस्स पुग्गलस्स अत्थतं होति कथिन’’न्ति (परि॰ ४१४) वचनतो च।

अञ्‍ञस्मिंविहारे वुत्थवस्सापि न लभन्तीति इदं किं एकसीमस्मिं, उदाहु नानासीमस्मिन्ति? किञ्‍चेत्थ – यदि ताव एकसीमस्मिं, परतो ‘‘सचे पन एकसीमाय बहू विहारा होन्ति, सब्बे भिक्खू सन्‍निपातेत्वा एकत्थ कथिनं अत्थरितब्बं, विसुं विसुं अत्थरितुं न वट्टती’’ति इमिना अट्ठकथावचनेन विरुज्झति। इदञ्हि वचनं सब्बेसंयेव एको कथिनत्थारोति दीपेति। अथ नानासीमस्मिं, उपनन्दस्स एकाधिप्पायदानानुमतिया विरुज्झति। वुत्तञ्हेतं ‘‘देथ, भिक्खवे, मोघपुरिसस्स एकाधिप्पाय’’न्ति (महाव॰ ३६४)। इदञ्हि वचनं द्वीसुपि आवासेसु तस्स कथिनत्थारसिद्धिं दीपेतीति। अविरोधोव इच्छितब्बो अप्पटिसिद्धत्ता, तस्मा एकसीमस्मिं वा नानासीमस्मिं वा नानूपचारे अञ्‍ञस्मिं विहारे वुत्थवस्सापि न लभन्तीति अधिप्पायो वेदितब्बो। ‘‘पच्छिमिकाय उपसम्पन्‍नो पठमपवारणाय पवारेतुम्पि लभति, वस्सिको च होति आनिसंसञ्‍च लभतीति सामणेरानं वस्सूपगमनं अनुञ्‍ञातं होति, सामणेरा कथिनानिसंसं लभन्ती’’ति वदन्ति।

तिण्णं चीवरानं अञ्‍ञतरप्पहोनकन्ति इदं ‘‘न अञ्‍ञत्र सङ्घाटिया उत्तरासङ्गेन अन्तरवासकेन अत्थतं होति कथिन’’न्ति इमाय पाळिया विरुज्झनं विय दिस्सति। अयञ्हि पाळि तिण्णं चीवरानं अञ्‍ञतरविरहेनापि न अत्थतं होति कथिनन्ति दीपेतीति चे? न, तदत्थजाननतो, न तिण्णं चीवरानं अञ्‍ञतरविरहेन न अत्थतं होति कथिनन्ति हि दीपेतुकामो भगवा तं पाळिमाह। यदि एवं ‘‘अञ्‍ञत्र सङ्घाटिया उत्तरासङ्गेन अन्तरवासकेना’’ति न वत्तब्बा सियाति चे? न, अधिप्पायजाननतोव। यो सङ्घाटिया अत्थरितुकामो, तस्स अञ्‍ञत्र सङ्घाटिया न अत्थतं होति। एस नयो इतरत्थापीति अयमेत्थ अधिप्पायो। तेनेव सुक्‍कपक्खे ‘‘सङ्घाटिया अत्थतं होती’’तिआदिना नयेन एकमेव चीवरं वुत्तं, एवं सन्ते ‘‘चतुवीसतिया आकारेहि अनत्थतं होति कथिनं, सत्तरसहि आकारेहि अत्थतं होति कथिन’’न्ति यथारहं उक्‍कट्ठकोटिया वुत्तन्ति वेदितब्बं, तस्मा कण्हपक्खे उल्‍लिखित…पे॰… निस्सीमट्ठानुमोदनानं चतुवीसतिया आकारानं सम्भवन्तानं सब्बेन सब्बं अभावेनपि निमित्तकतादीनं असम्भवन्तानं अञ्‍ञतरभावेनपि न अत्थतं होति कथिनन्ति एवमधिप्पायो वेदितब्बो। सुक्‍कपक्खेपि अहताहतकप्प…पे॰… सीमट्ठानुमोदनानं सत्तरसन्‍नं आकारानं सम्भवन्तानं अञ्‍ञतरभावेनपि इतरेसं सब्बेन सब्बं अभावेनपि अत्थतं होति कथिनन्ति एवमधिप्पायो वेदितब्बो। अञ्‍ञथा अञ्‍ञमञ्‍ञविरोधो, यथासम्भवं योजेत्वा वेदितब्बो।

आदायसत्तककथावण्णना

३११.सन्‍निट्ठानन्तिके द्वेपि पलिबोधा एकतो छिज्‍जन्तीति इध, परिवारट्ठकथायञ्‍च वुत्तं इमिस्सा खन्धकपाळिया समेति एकतो उभिन्‍नम्पि धुरनिक्खेपस्स कतत्ता। ‘‘इदं बहिसीमायमेव वुत्तं सन्‍निट्ठानन्तिकं सन्धाय वुत्तं। यं पन वुत्तं परिवारे ‘चत्तारो कथिनुद्धारा सिया अन्तोसीमाय उद्धरिय्यन्ति, सिया बहिसीमाय उद्धरिय्यन्ति, निट्ठानन्तिको सन्‍निट्ठानन्तिको नासनन्तिको आसावच्छेदिको’ति (परि॰ ४१६)। तत्थ बहिसीमाय सन्‍निट्ठानन्तिको उद्धरिय्यतीति इध दस्सितनयोव। कथं अन्तोसीमाय सन्‍निट्ठानन्तिको? अकतचीवरमादाय ‘न पच्‍चेस्स’न्ति गतो, गतगतट्ठाने फासुविहारं अलभन्तो तमेव विहारं आगच्छति, तस्स चीवरपलिबोधो ठितो। सो च ‘नेविमं चीवरं कारेस्स’न्ति चित्ते उप्पन्‍नमत्ते छिज्‍जति, तस्मा अन्तोसीमाय उद्धरिय्यति, तस्मा दुविधो सन्‍निट्ठानन्तिको’’ति पोराणगण्ठिपदे लिखितं, तं युत्तं, अञ्‍ञथा अन्तोसीमाय ‘‘नेविमं चीवरं कारेस्स’’न्ति पवत्तउब्भारो इतरेसु समोधानं न गच्छतीति अतिरित्तो सिया। सीमातिक्‍कन्तिकोति चीवरकालसीमातिक्‍कन्तिको। सउब्भारे चीवरपलिबोधो पठमं छिज्‍जन्तो विय खायति, अथ खो सापेक्खताय चीवरकरणे सउस्साहोव होतीति लेसं सन्धाय परिवारवसेन ‘‘द्वे पलिबोधा अपुब्बं अचरिमं छिज्‍जन्ती’’ति (महाव॰ अट्ठ॰ ३११) वुत्तं। ‘‘कतचीवरो’’ति वुत्तत्ता इध न सम्भवति।

८. चीवरक्खन्धकवण्णना

जीवकवत्थुकथावण्णना

३२६.राजगहकोति राजगहवासी।

पज्‍जोतराजवत्थुकथावण्णना

३३४.भुञ्‍जितुं निसिन्‍नस्साति एत्थ ‘‘धम्मपदे ‘बहिनगरे दिस्वा’ति वुत्तं, तस्मा द्वीसु दिवसेसु दिन्‍नं तेन तेसु एकेकं गहेत्वा द्वीसु अट्ठकथासु वुत्तन्ति युज्‍जती’’ति वदन्ति।

समत्तिंसविरेचनकथावण्णना

३३६.कबळे कबळेति एत्थ किञ्‍चापि गुळादीसु पक्खित्तं, तं पन भगवाव परिभुञ्‍जि, तस्मा नत्थि दोसो।

वरयाचनकथावण्णना

३३७.महापिट्ठियकोजवं नाम अतिरेकचतुरङ्गुलपुप्फं किर।

कम्बलानुजाननादिकथावण्णना

३४०.उपचारेति सुसानस्स उपचारे। बहिपि वट्टतीति एके। कतिककरणं दस्सेत्वा ‘‘मय्हं सन्तकं तव च मम च होतूति वत्वा इतरेन च तथावुत्ते वट्टती’’ति समानपरिक्खारविधिं वदन्ति।

भण्डागारसम्मुतिआदिकथावण्णना

३४३.‘‘इदं पन भण्डागारन्ति आवेणिकलक्खण’’न्ति वुत्तं।

चीवररजनकथावण्णना

३४४.गोमये आपत्ति नत्थि, विरूपत्तावारितं। ‘‘कुङ्कुमपुप्फं न वट्टती’’ति वदन्ति। ‘‘अल्‍लिकाया’’तिपि पाठो अत्थि।

निसीदनादिअनुजाननकथावण्णना

३५३.अट्ठानमेतन्ति एत्थ रूपकण्डे ‘‘चतुसमुट्ठानिक’’न्ति वुत्तत्ता कम्मसमुट्ठानं रागचित्ताभावा न मुच्‍चतीति वा रागपच्‍चये सति कम्मसमुट्ठानं होतीति वा विचारेत्वा गहेतब्बं कथावत्थुना च।

सङ्घिकचीवरुप्पादकथावण्णना

३६३.नो चे अत्थतं होति ‘‘एकं चीवरमास’’न्ति न वत्तब्बं। कस्मा? ‘‘अनुजानामि, भिक्खवे, तस्सेव तानि चीवरानि याव चीवरमासा’’ति वचनस्स अभावतो, तस्मा अनत्थतकथिनस्स अननुञ्‍ञातन्ति चे? न, हेट्ठा अनुञ्‍ञातत्ता, ततो लीनत्थदीपनत्थमिध तथा वुत्तत्ता च। हेट्ठा हि ‘‘अकालचीवरं नाम अनत्थते कथिने एकादसमासे उप्पन्‍नं, अत्थते कथिने सत्तमासे उप्पन्‍नं, कालेपि आदिस्स दिन्‍नं, एतं अकालचीवरं नामा’’ति (पारा॰ ५००) वचनतो अनत्थतकथिनानं एकचीवरमासे उप्पन्‍नं, तेसंयेव होतीति सिद्धं, तस्मा इध तं अवत्वा एकोपि तयो गणपूरके लभित्वा कथिनं अत्थरितुं लभतीति इमं लीनत्थं पकासेतुं ‘‘याव कथिनस्स उब्भाराया’’ति वुत्तं। इतरथा अयमत्थो न ञायति। ‘‘जानितब्बोच विनयधरेहीति तथा वुत्तोति अपरे’’ति वुत्तं। अत्थतं होति, पञ्‍च मासे सब्बं तस्सेव भिक्खुनो होतीति सम्बन्धो। अच्‍चन्तसंयोगवसेन उपयोगवचनं। ‘‘इध वस्संवुत्थसङ्घस्सा’’ति नियमितत्ता ‘‘वस्सावासिकं देमा’’ति एत्थ च ‘‘इधा’’ति अधिकारत्ता तस्मिं वुत्ते लभति। ‘‘पिट्ठिसमये उप्पन्‍नत्ताति चीवरकालस्सासन्‍नत्ता च अनत्थतकथिनानम्पि वुत्थवस्सानञ्‍च अनुञ्‍ञातट्ठानत्ता एव वुत्त’’न्ति अञ्‍ञतरस्मिं गण्ठिपदे लिखितं। केचि पन ‘‘यं पन इदं ‘इध वस्संवुत्थसङ्घस्सा’तिआदिं कत्वा याव ‘अनागतवस्से’ति पदं, ताव पुच्छित्वा ‘कस्मा? पिट्ठिसमये उप्पन्‍नत्ता’ति इदं परतो ‘तत्र सम्मुखीभूतानं सब्बेसं पापुणाती’ति इमस्स परियोसाने ‘कस्मा? पिट्ठिसमये उप्पन्‍नत्ता’ति लिखितब्बं। कस्माति चे? परतो ‘चीवरमासतो पट्ठाय याव हेमन्तस्सा’ति वुत्तेन निब्बिसेसत्ता, तस्मा एव एकच्‍चेसु पण्डितन्ति वदन्ती’’ति वदन्ति। इध पन इध-सद्देन विसेसितं, तत्थ नत्थि, तस्मा अञ्‍ञमञ्‍ञविरोधो नत्थीति गहेतब्बं। ‘‘मय्हिमानि चीवरानि पापुणन्ती’’ति वचनमेवाधिट्ठानं, इदमेत्थ उक्‍कट्ठवसेन वुत्तं। ‘‘मय्हिमानि चीवरानी’ति वुत्तेपि अधिट्ठितमेव होती’’ति वुत्तं। ‘‘मय्हिमानी’ति वुत्ते तस्स चीवरानि नाम नत्थि, तस्मा ‘चीवरानि पापुणन्ती’ति वत्तब्बमेवा’’ति वदन्ति। दुग्गहितानीति सङ्घिकानेव होन्ति। ‘‘गहितमेव नामा’ति इमस्स इदं पत्तन्ति किञ्‍चापि न विदितं, ते पन भागा तेसं अत्थतो पत्तायेवाति अधिप्पायो’’ति लिखितं। ‘‘एकस्मिं अपतिते पुन आगता लभन्ती’’ति वुत्तं।

उपनन्दसक्यपुत्तवत्थुकथावण्णना

३६४.‘‘न, भिक्खवे, अञ्‍ञत्र वस्संवुत्थेना’’ति चीवरसमयं उपादाय पटिक्खेपो कतो ।एकस्मिं विहारे ‘‘राजविहारे विय नानापरिवेणेसु वा इध वा वुत्था लभतू’’ति वत्वा दिन्‍नं। ‘‘सत्ताहवारेन अरुणमेव उट्ठापेतीति एतं वचनमत्तमेव एकविहारे सत्ताहकिच्‍चाभावा’’ति च लिखितं।

मतसन्तककथावण्णना

३६९.भिक्खुस्साति भिक्खुस्मिं कालंकते। तत्थ ‘‘पत्तचीवरे’’ति पधानपरिक्खारदस्सनमुखेन सब्बपरिक्खारनिदस्सनन्ति वेदितब्बं। अधम्मेन उप्पन्‍नञ्‍चेतं होति, सङ्घस्स कप्पियमेव मतत्ताति एके। नोति तक्‍को पत्तचतुक्‍के सब्बथा अकप्पियपत्तनयविरोधतो। अधम्मेन उप्पन्‍नसेनासने च वसतो अनापत्ति। अञ्‍ञतरस्मिं आवासे द्वे भिक्खू वसन्ति, तत्थ चेको कालंकतो, इतरो तस्स परिक्खारं अपापेत्वा तं थेय्यचित्तेन गण्हाति, सङ्घसन्तकं गहितं होति, भण्डग्घेन कारेतब्बो। अनावासे गण्हाति, न कारेतब्बो अस्सामिकस्स गहितत्ता। मरणसमये वत्तुं असहन्तो चे चित्तेनेव देति, पुञ्‍ञं पसवति, सङ्घोव तस्स सामी। परो वा अविस्सासिको सयमेव गण्हाति, गहणं न रुहति, थेय्यचित्तेन चे, भण्डग्घेन कारेतब्बो। तस्स च आवासगतस्स को सामी। ‘‘सङ्घो सामी’’ति वचनतो सङ्घेन बलक्‍कारेन सो वारेतब्बोति एके। जीवमानकाले गहितत्ता न सङ्घो सामीति एके। सामिको चे सयं पस्सित्वा अच्छिन्दितुं लभति, सङ्घोपि लभति सामिठाने ठितत्ताति इतरे, विचारेत्वा गहेतब्बं।

मतकस्स हिरञ्‍ञादिअकप्पियभण्डं होति। उग्गहितञ्‍चेतं होति, उग्गहिते वुत्तनयेन पटिपज्‍जितब्बं। धम्मेन उप्पन्‍नं चे, कप्पियकारको आचिक्खितब्बो। दासो चे गहितो होति, न सङ्घो सामी, आरामिको चे, सङ्घो सामी। गावीमहिंसीआदयो होन्ति, आवासगतानं सङ्घो सामी, अनावासगतानं न सङ्घो सामी। सङ्घो चे आवासं आनेत्वा अत्तनो सन्तकं कत्वा पच्छा समीपे बहिसीमाय ठपेति, कारकसङ्घो सामी, तथा आरामिके। मतकस्स परिक्खारो निक्खेपवसेन ठपितो होति, एसोव सामी। महग्घो चे होति, सेसस्स सङ्घो सामी। ‘‘केनचि गिलानुपट्ठाकेना’’ति वत्तब्बक्‍कमो एतेन दस्सितो। पुन उपट्ठाकानं बहुभावे सति सब्बेसं दातब्बकम्मं दस्सेन्तेन भगवता कम्मवाचायं ‘‘गिलानुपट्ठाकान’’न्ति वुत्तं। सामणेरवारे ‘‘चीवर’’न्ति पाठो। ‘‘इमं तुय्हं देमि ददामि दज्‍जामि ओणोजेमि परिच्‍चजामि विस्सज्‍जामि निस्सज्‍जामी’ति वा ‘इत्थन्‍नामस्स देमि…पे॰… निस्सज्‍जामी’ति वा वदति, ‘सम्मुखा वा परम्मुखा वा वुत्ते दिन्‍नंयेव होती’ति दानलक्खणस्स च ‘तुय्हं गण्हाही’ति वुत्ते ‘मय्हं गण्हामी’ति वदति, ‘सुदिन्‍नं सुग्गहितञ्‍चा’ति (पारा॰ अट्ठ॰ २.४६९) गहणलक्खणस्स च वुत्तत्ता ‘मम सन्तकं तव च मम च होतू’ति एवमादिवचनेन समानपरिक्खारं कातुं वट्टतीति आचरिया’’ति लिखितं।

अनुगण्ठिपदे पन अतीव पपञ्‍चं कत्वा पुन ‘‘इदमेत्थ आचरियानं सन्‍निट्ठानं – सचेसम्बहुला, द्वे वा समानपरिक्खारं कत्तुकामा होन्ति, ते सब्बे अत्तनो सन्तकं वत्तमानं उप्पज्‍जनकेन सद्धिं पेसलस्स एकस्स परिच्‍चजन्ति, सो पुन तेसमेव परिच्‍चजति, एत्तावता ते समानपरिक्खारिका होन्तीति। इदं समानपरिक्खारलक्खणं पाळिआदीसु वुत्तलक्खणेयेव पतनतो अचलप्पत्तं होति, तथापि पोराणविधिं अज्झोत्थरित्वा वत्तनतो पटिसेधेतब्बो, आचरियानं मतानुसारेन कातब्बं कातुकामेनाति अपरे’’ति वुत्तं, ‘‘वस्संवुत्थसामणेरो पञ्‍चसु सिक्खापदेसु एकं अतिक्‍कमित्वा पुन गहितो लाभं न लभति, अन्तिमवत्थुं अज्झापन्‍नो नाम होती’’ति वदन्ति।

वस्संवुत्थानंअनुप्पन्‍नचीवरकथावण्णना

३७५.उप्पन्‍ने चीवरे अभाजिते पक्‍कमतीति एत्थ ‘‘सङ्घेन तत्रुप्पादतो एकेकस्स भिक्खुनो एत्तकं वस्सावासिकं दातुं सङ्घस्स रुच्‍चती’’ति सावितेपि विब्भमति, ततो न लभति, पुन पब्बजित्वा उपसम्पज्‍जित्वा चीवरभाजनं सम्भावेन्तोपि न लभतियेव पुब्बपकतितो भट्ठत्ता। अथ पापिते विब्भमति, लभती’’ति च वुत्तं।

सङ्घेभिन्‍नेचीवरुप्पादकथावण्णना

३७६.परसमुद्देति जम्बुदीपे।

अट्ठचीवरमातिकाकथावण्णना

३७९.यस्मा अपरिक्खित्तस्स परिक्खेपारहट्ठानं दुब्बिजानं, तस्मा ‘‘अपिचा’’तिआदि वुत्तं। तत्थ धुवसन्‍निपातट्ठानम्पि परियन्तगतमेव गहेतब्बं। ‘‘महापच्‍चरियं पन भिक्खूसुपि…पे॰… पापुणातीति ‘उपचारसीमाय देमा’ति एवं दिन्‍नमेव सन्धाया’’ति लिखितं । ‘‘समानसंवासकसीमाया’’ति वुत्ते खण्डसीमादीसु ठितानं न पापुणाति तासं विसुं समानसंवासकसीमत्ता। समानसंवासकअविप्पवाससीमानं इदं नानत्तं – ‘‘अविप्पवाससीमाय दम्मी’’ति दिन्‍नं गामट्ठानं न पापुणाति। कस्मा? ‘‘ठपेत्वा गामञ्‍च गामूपचारञ्‍चा’’ति वुत्तत्ता। ‘‘समानसंवासकसीमाया’’ति दिन्‍नं पन यस्मिं ठाने अविप्पवाससीमा अत्थि, तत्थ ठितानं, इतरत्र ठितानञ्‍च पापुणाति। ‘‘खण्डसीमायं ठत्वा ‘सीमट्ठकसङ्घस्स दम्मी’ति वुत्ते उपचारसीमाय एव परिच्छिन्दित्वा दातब्ब’’न्ति वुत्तं। ‘‘अविप्पवाससीमाय देमा’’ति खण्डसीमायं ठत्वा दिन्‍ने तत्थेव पापुणातीति केचि। योजनसतम्पि पूरेत्वा निसीदन्तीति एत्थ विहारूपचारे हत्थपासेन, बहिगामादीसु द्वादसहत्थेन उपचारोति एके। ‘‘इमस्मिं विहारे सङ्घस्सा’’ति वुत्ते एकाबद्धा हुत्वापि परिक्खेपपरिक्खेपारहट्ठानं अतिक्‍कमित्वा ठितानं न पापुणातीति एके। ‘‘भिक्खुनिविहारतो बहि यत्थ कत्थचि ठत्वा ‘सङ्घस्सा’ति वुत्ते भिक्खुसङ्घोव सामी’’ति वदन्ति। एकोपि गन्त्वाति एत्थ सब्बेसं वा पापेत्वा गन्तब्बं, आनेत्वा वा पापेतब्बं, इतरथा गतस्स न पापुणाति। समानलाभकतिका मूलावासे सति सिया, मूलावासविनासेन कतिकापि विनस्सति। समानलाभवचनं सति द्वीसु, बहूसु वा युज्‍जति। तेनेव एकस्मिं अवसिट्ठे युज्‍जतीति नो मति।

‘‘तावकालिककालेन, मूलच्छेदवसेन वा।

अञ्‍ञेसं कम्मं अञ्‍ञस्स, सिया नावाससङ्गमो’’ति॥ –

आचरियो।

सब्बत्थ दिन्‍नमेवाति ‘‘समानभागोव होती’’ति वदन्ति। ‘‘एकमेकं अम्हाकं पापुणातीति चे वदति, वट्टती’’ति वदन्ति विभागस्स कतत्ता। ‘‘भिक्खुसङ्घस्स चीवरे दिन्‍ने पंसुकूलिकानं न वट्टती’’ति वदन्ति। ‘‘उभतोसङ्घस्सा’’ति वुत्ते ‘‘भिक्खुसङ्घस्सा’’ति अवुत्तत्ता भिक्खुनिसङ्घेन मिस्सितत्ता, तत्थ अपरियापन्‍नत्ता च पुग्गलो विसुं लभति। एवं सन्ते ‘‘भिक्खुसङ्घस्स च भिक्खुनिसङ्घस्स च दम्मी’’ति वुत्तेपि ‘‘उभतोसङ्घस्स दिन्‍नमेव होती’’ति इमिना विरुज्झतीति चे? न विरुज्झति, तं द्विन्‍नं सङ्घानं दिन्‍नभावमेव दीपेति, न उभतोसङ्घपञ्‍ञत्तिं, तस्मा एव ‘‘भिक्खुसङ्घस्स च भिक्खुनिसङ्घस्स च तुय्हञ्‍चा’’ति वारो न वुत्तो। अथ वा अट्ठकथावचनमेव पमाणं, न विचारणाति एके। यस्मा एको अद्धानादियको विय दुविधो न होति, तस्मा उभतोसङ्घग्गहणेन एको भिक्खु न गहितोति । ‘‘सब्बावासस्स च चेतियस्स च धम्मस्स चा’ति वुत्ते सब्बविहारेसु चेतियधम्मानं एकेकस्स भिक्खुनो भागो दातब्बो’’ति वदन्ति। ‘‘भिक्खुसङ्घस्स च चेतियस्स चा’’ति वुत्ते न विरुज्झतीति चे? न, तत्थ ‘‘भिक्खुसङ्घस्सा’’ति वुत्तत्ता, इध विहारेन घटितत्ता च तम्हि तम्हि विहारे एकभागं लभितब्बमेवाति परिहरन्ति। अत्तनो पापेत्वाति विकाले अपरिभोगत्ता सकलोपि वट्टेय्याति चे? ‘‘भिक्खुसङ्घस्स हरा’’ति वुत्तत्ता, तेन ‘‘हरामी’’ति गहितत्ता च न वट्टति। पच्छिमवस्संवुत्थानम्पीति एत्थ अपि-सद्दो अवधारणत्थो, पच्छिमवस्संवुत्थानमेवाति अत्थो, इतरथा समुच्‍चयत्थे गहिते ‘‘लक्खणञ्‍ञू वदन्ती’’ति वचनं निरत्थकं सिया। कस्माति आरभित्वा पपञ्‍चं करोन्ति। किं तेन, परतो ‘‘चीवरमासतो पट्ठाय…पे॰… अतीतवस्संवुत्थानमेव पापुणाती’’ति इमिना सिद्धत्ता न विचारितं, तेन वुत्तं ‘‘लक्खणञ्‍ञू’’ति अचलवसेन। सचे पन बहिउपचारसीमाय ठितो…पे॰… सम्पत्तानं सब्बेसं पापुणातीति यत्थ कत्थचि वुत्थवस्सानन्ति अधिप्पायो ‘‘यत्थ कत्थचि वुत्थवस्सानं सब्बेसं सम्पत्तानं पापुणाती’’ति (कङ्खा॰ अट्ठ॰ अकालचीवरसिक्खापदवण्णना) कङ्खावितरणियं वुत्तत्ता। गिम्हानं पठमदिवसतो पट्ठाय वुत्ते पन यस्मा अनन्तरातीतं हेमन्तं एव वुत्था नाम होन्ति, न वस्सं, तस्मा ‘‘मातिका आरोपेतब्बा’’ति वुत्तं। ये वा थेरेहि पेसिता, तेसं पापुणातीति किर अत्थो।

९. चम्पेय्यक्खन्धकवण्णना

द्वेनिस्सारणादिकथावण्णना

३९५.अप्पत्तोनिस्सारणन्ति एत्थ निस्सारणं नाम कुलदूसकानंयेव अनुञ्‍ञातं, अयं पन कुलदूसको न होति, तस्मा ‘‘अप्पत्तो’’ति वुत्तो। यदि एवं कथं सुनिस्सारितो होतीति? चूळवग्गे ‘‘आकङ्खमानो सङ्घो पब्बाजनीयकम्मं करेय्या’’ति (चूळव॰ २७) वुत्तत्ता। ‘‘तस्सपापियसिककम्मारहस्स तस्सपापियसिककम्मं करोन्ती’’ति वचनतो चक्‍कं बन्धन्ति ञातब्बं।

उपालिपुच्छाकथावण्णना

४००.‘‘परतोति उपालिपुच्छतो पर’’न्ति लिखितं। दोसारितपाळियं ‘‘ऊनवीसतिवस्सो न आगतो विप्पन्‍नवत्थुकत्ता’’ति वुत्तं। इमस्मिं चम्पेय्यक्खन्धके अधम्मकम्मानियेव द्विधा कत्वा पञ्‍चागतानीति वेदितब्बं। तेनेव परिवारे इमस्मिं खन्धके ‘‘पञ्‍च अधम्मिकानी’’ति वुत्तं। ‘‘अन्धमूगबधिरो सोसारितो’’ति इमिना अपब्बजितस्सपि उपसम्पदा रुहतीति सिद्धं।

चम्पेय्यक्खन्धकवण्णना निट्ठिता।

१०. कोसम्बकक्खन्धकवण्णना

कोसम्बकविवादकथावण्णना

४५१.सुत्तन्तिकोति एत्थ किञ्‍चापि ‘‘विनयधरो मातिकाधरो’’ति वुत्तं, उभतोविभङ्गं पन सन्धाय वुत्तं, न खन्धकभाणको होति। आवुसो एत्थ आपत्तीति वचनं उपादाय ‘‘सो तस्सा आपत्तिया आपत्तिदिट्ठि होती’’ति वुच्‍चति। पच्छा विनयधरो ‘‘वत्थुम्हि सति पमाणं, न पञ्‍ञत्तिय’’न्ति सतिं पटिलभित्वा तस्सा आपत्तिया आपत्तिदिट्ठि अहोसि, तेन वुत्तं अन्ते ‘‘अञ्‍ञे भिक्खू तस्सा आपत्तिया आपत्तिदिट्ठिनो होन्ती’’ति।

दीघावुवत्थुकथावण्णना

४५८.‘‘भूतपुब्बं, भिक्खवे, बाराणसियं ब्रह्मदत्तो’’ति लिखन्ति। पुराणपोत्थकेसु ‘‘बाराणसिय’’न्ति नत्थि, ‘‘नत्थिभावोव सुन्दरो’’ति वदन्ति।

पालिलेय्यकगमनकथावण्णना

४६७.रक्खितवनसण्डेति सङ्गीतित्थेरेहि सुविञ्‍ञेय्यं कत्वा वुत्तं। ‘‘पालिलेय्योति गामो, तस्स वसेना’’तिपि वदन्ति, तं धम्मपदट्ठकथाय न विरुज्झति।

अट्ठारसवत्थुकथावण्णना

४७३.नत्वेव…पे॰… पटिबाहितब्बन्ति वदामीति एत्थ सेनासनारहस्स यो सेनासनं पटिबाहति, तस्सेव आपत्ति दुक्‍कटस्स। ‘‘कलहकारकादीनमेत्थ ओकासो नत्थीतिआदिकं सङ्घस्स कतिकं वत्वा तं न पञ्‍ञापेन्तस्स वा ‘अहं बुद्धो’ति पसय्ह अत्तना अत्तनो पञ्‍ञापेत्वा गण्हन्तं ‘युत्तिया गण्हथा’ति वत्वा वारेन्तस्स वा दोसो नत्थि। इध कलहवूपसमनत्थं आगतानं कोसम्बिकानम्पि ‘यथावुड्ढ’न्ति अवत्वा ‘विवित्ते असति विवित्तं कत्वापि दातब्ब’न्ति वुत्तत्ता विवित्तं कत्वा देन्तं पटिबाहेन्तस्सेव आपत्तीति किर अयमत्थो पारिवासिकादीनं विहारपरियन्तदापनेन साधितब्बो’’ति लिखितं।

सङ्घसामग्गीकथावण्णना

४७५.‘‘अथ खो ते उक्खित्तानुवत्तका भिक्खू तं उक्खित्तकं भिक्खुं ओसारेत्वा येन उक्खेपका भिक्खू…पे॰… तस्स वत्थुस्स वूपसमाय सङ्घसामग्गिं करोमा’’ति वचनं दुविञ्‍ञेय्यविनिच्छयं विनयलक्खणकुसलस्स। विज्‍जमाने हि कारकसङ्घे इतरो सङ्घो ओसारितुं न लभति। ओसारेन्तो चे, ते भिक्खू कारकसङ्घेन समानलद्धिकभावं पत्तत्ता तेन समानसंवासका होन्ति, ततो उक्खेपकानं छन्दं अग्गहेत्वा ओसारेन्तानं कम्मं कुप्पति, तस्मा ‘‘तेन हि, भिक्खवे, तं भिक्खुं ओसारेथा’’ति (महाव॰ ४७४) भगवतो वचनेन उक्खित्तानुवत्तका ओसारेसुं, उदाहु निस्सीमं गन्त्वा, उदाहु इतरेसं छन्दं गहेत्वा ओसारेसुं, ननु एतेसमञ्‍ञतरेनेत्थ भवितब्बं, न च पनेतं सब्बगण्ठिपदेसु विचारितं। अयं पनेत्थ तक्‍को –

‘‘यस्मिं वत्थुस्मिं सङ्घेन, कतकम्मस्स भिक्खुनो।

सति तस्मिं न अञ्‍ञस्स, पटिप्पस्सम्भनं खमं॥

‘‘विरमन्ते ततो दोसो, अपि सङ्घो अकारको।

ओसारेतुं अलं यस्मा, कारको अनुलोमिको’’ति॥