ततिय परिच्छेद
पठमधम्मसंगीति
पञ्चनेत्तो जिनो पञ्च-चत्तालीससमा’समो।
ठत्वा सब्बानि किच्चानि, कत्वा लोकस्स सब्बथा॥
कुसिनाराययमक-सालानमन्तरे वरे।
वेसाखपुण्णमायं सो, दीपो लोकस्स निब्बुतो॥
सङ्ख्यापथमतिक्कन्ता, भिक्खू तत्थ समागता।
खत्तिया ब्राह्मणा वस्सा, सुद्धा देवा तथेव च॥
सत्तसतसहस्सानि, तेसु पामोक्खभिक्खवो।
थेरो महाकस्सपोव, सङ्घत्थेरो तदा अहु॥
सत्थुसरीरसारीर-धातुकिच्चानि कारिय।
इच्छन्तो सो महाथेरो, सत्थु धम्मचिरट्ठितिं॥
लोकनाथे दसबले, सत्ताहपरिनिब्बुते।
दुब्भासितं सुभद्दस्स, बुद्धस्स वचनं सरं॥
सरं चीवरदानञ्च, समत्ते ठपनं तथा।
सद्धम्मठपनत्थाय, मुनिना’नुग्गहं कतं॥
कातुं सद्धम्मसंगीतिं, सम्बुद्धानमते यति।
नवङ्गसासनधरे, सब्बङ्गसमुपागते॥
भिक्खू पञ्चसतेयेव, महाखीणासवे वरे।
सम्मन्नि एकेनूने तु, आनन्दत्थेरकारणा॥
पुन आनन्दत्थेरा’पि, भिक्खूहि अभियाचितो।
सम्मन्नि कातुं संगीतिं, सा न सक्का हि तं विना॥
साधुकीळनसत्ताहं, सत्ताहं धातुभाजनं।
इच्चद्धमासं खेपेत्वा, सब्बलोकानुकम्पका॥
वस्सं वसं राजगहे, कस्साम धम्मसङ्गहं।
नाञ्ञेहि तत्त वत्थब्ब-मिति कत्वान निच्छयं॥
सोकातुरं तत्थ तत्थ, अस्सासेन्तो महाजनं।
जम्बुदीपम्हि ते थेरा, विचरित्वान चारिकं॥
आसळ्हिसुक्कपक्खम्हि, सुक्कपक्खठितत्थिका।
उपागमुं राजगहं, सम्पन्नचतुपच्चयं॥
तत्थेव वस्सूपगता, ते महाकस्सपादयो।
थेरा थिरगुणूपेता, सम्बुद्धमतकोविदा॥
वस्सानं पठमं मासं, सब्बसेनासनेसु’पि।
कारेसुं पटिसङ्खारं, वत्वाना’जातसत्तुनो॥
विहारपटिसङ्खारे, निट्ठिते अहु भूपति।
इदानि धम्मसंगीतिं, करिस्सामि मयं इति॥
कत्तब्बं किन्तिपुट्ठस्स, निसज्जठानमादिसुं।
राजा कत्थाति पुच्छित्वा, वुत्तठानम्हि तेहि सो॥
सीघं वेभारसेलस्स, पस्से कारेसि मण्डपं।
सत्तपण्णिगुहाद्वारे, रम्मं देवसभोपमं॥
सब्बथा मण्डयित्वा तं, अत्थरापेसि तत्थ सो।
भिक्खूनं गणनायेव, अनग्घत्थरणानि च॥
निस्साय दक्खिणं भागं, उत्तरामुखमुत्तमं।
थेरासनं सुपञ्ञत्तं, आसि तत्थ महारहं॥
तस्मिं मण्डपमज्झस्मिं, पुरत्थमुखमुत्तमं।
धम्मासनं सुपञ्ञत्तं, अहोसि सुगतारहं॥
राजा’रोचयि थेरानं, कम्मं नो निट्ठितं इति।
ते थेरा थेरमानन्द-मानन्दकरमब्रवुं॥
स्वे सन्निपातो आनन्द, सेखेन गमनं तहिं।
न युत्तन्ते सदत्थे त्वं, अप्पमत्तो ततो भव॥
इच्चेवं चोदितो थेरो, कत्वान वीरियं समं।
इरियापथतो मुत्तं, अरहत्तमपापुणि॥
वस्सानं दुतिये मासे, दुतिये दिवसे पन।
रुचिरे मण्डपे तस्मिं, थेरा सन्निपतिंसु ते॥
ठपेत्वा’नन्दत्थेरस्स, अनुच्छविकमासनं।
आसनेसु निसीदिंसु, अरहन्तो यथारहं॥
थेरो’रहत्तपत्तिं सो, ञापेतुं तेहि नागमा।
कुहिं आनन्दत्थेरो’ति, वुच्चमाने तु केहिचि॥
निम्मुज्जित्वा पथविया, गन्त्वा जोतिपथेन वा।
निसीदि थेरो आनन्दो, अत्तनो ठपितासने॥
उपालिथेरो विनये, सेसधम्मे असेसके।
आनन्दत्थेरमकरुं, सब्बे थेरा धुरन्धरे॥
महाथेरो सकत्तानं, विनयं पुच्छितुं सयं।
सम्मन्नु’पालिथेरो च, विस्सज्जेतुं तमेव तु॥
थेरासने निसीदित्वा, विनयं तमपुच्छि सो।
धम्मासने निसीदित्वा, विस्सज्जेसि तमेव सो॥
विनयञ्ञूनमग्गेन, विस्सज्जितकमेन ते।
सब्बे सज्झायमकरुं, विनयं नयकोविदा॥
अग्गं बहुस्सुतादीनं, कोसारक्खं महेसिनो।
सम्मन्नित्वान अत्तानं, थेरो धम्ममपुच्छि सो॥
तथा सम्मन्निय’त्तानं, धम्मासनागतो सयं।
विस्सज्जेसि तमानन्द-त्थेरो धम्ममसेसतो॥
वेदेहमुनिना तेन, विस्सज्जितकमेन ते।
सब्बे सज्झायमकरुं, धम्मं धम्मत्थकोविदा॥
एवं सत्तहि मासेहि, धम्मसंगीति निट्ठिता।
सब्बलोकहितत्थाय, सब्बलोकहि तेहि सा॥
महाकस्सपथेरेन, इदं सुगतसासनं।
पञ्चवस्ससहस्सानि, समत्थं वत्तने कतं॥
अतीव जातपामोज्जा, सन्धारकजलन्तिका।
संगीतिपरियोसाने, छद्धाकम्पि महामही॥
अच्छरियानि चा’हेसुं, लोकेनेकानिनेकधा।
थेरेहेव कतत्ता च, थेरियायं परम्परा॥
पठमं सङ्गहं कत्वा, सब्बलोकहितं बहुं।
ते यावतायुकं ठत्वा, थेरा सब्बेपि निब्बुता॥
थेरा’पि ते मतिपदीपहतन्धकारा,
लोकन्धकारहननम्हि महापदीपा।
निब्बापिता मरणघोरमहानिलेन,
तेनापि जीवितमदं मतिमा जहेय्याति॥
सुजनप्पसादंसंवेगत्थाय कते महावंसे
पठमधम्मसंगीतिनाम
ततियो परिच्छेदो।