चतुपञ्ञासतिम परिच्छेद
छ राजकोनाम
कत्वा विक्कम्म बाहू’ति, नाम भूपालसूनुतो।
तस्साणाय पवत्तिंसु, सादरं सीहळा खिला॥
सो राजा दमिळे हन्तुं, धनं सञ्चिय’नेकाधा।
सङ्गहं सेवकानञ्च, कुरुमानो यथोचितं॥
अलङ्कारकिरीटानि, छत्तसीहासनानि च।
कारयित्वा’भिसेकत्थं, सचिवेहा’भियाचितो॥
न याव राजरट्ठस्स, गहणं होति ताव मे।
छत्तुस्सापनकम्मेन, किं तेना’ति विवारिय॥
सतं नरसहस्सानं, सङ्कलेत्वा महब्बलो।
सङ्गामारब्भ कालम्हि, वातरोगाभिपीळितो॥
युज्झितुं समयो नेति, द्वादसे वच्छरे लहुं।
उपेच्च देवनगरं, गञ्छिदेवसहब्यतं॥
कित्तिनामो च सचिवो, सेनापच्चमधिट्ठितो।
रज्जत्थिको दिनानट्ठ, निजाणं सम्पवत्तयि॥
घातेत्वा तं महालान-कित्तिनामो महब्बलो।
पत्वा’भिसेकं भुञ्जन्तो, देसं तं रोहणव्हयं॥
संवच्छरम्हि ततिये, चोळयुद्धे पराजितो।
सहत्थेन सकं सीसं, छिन्दित्वा सहसा मरि॥
तदापिते किरीटादि-धनसारं समादिय।
पेसेसुं दमिळा चोळ-महीपालस्स सन्तिकं॥
भया सरट्ठं हित्वा’थ, दुट्ठदेसे वसं तदा।
एको विक्कमपण्डूति, विस्सुतो पत्थिवत्तजो॥
विञ्ञातलङ्कावुत्तन्तो, देसमागम्म रोहणं।
काळतित्थे वसं वस्स-मेकं रज्जमकारयि॥
रामन्वयसमुब्भूतो , तदायुज्झ पुरागतो।
जगती पालनामेन, विस्सुतो भूभुजत्तजो॥
रणे विक्कमपण्डुतं, घातापेत्वा महब्बलो।
ततो चत्तारि वस्सानि, रज्जं कारेसि रोहणे॥
तम्पि चोळारणे हन्त्वा, महेसिं धीतरा सह।
वित्तसारञ्च साकलं, चोळरट्ठमपेसयुं॥
राजा परक्कमो नाम, पण्डुराजसुतो ततो।
अका वस्सद्वयं चोळा, घातेसुं तम्पि युज्झिय॥
इमे भुसं लोभबलाभिभूता,
गता असेसा विवसा विनासं।
इच्चेवमञ्ञाय सदा सपञ्ञो,
तण्हक्खयेयेव रतिं करेय्य॥
सुजनप्पसादसंवेगत्थाय कते महावंसे
छ राजको नाम
चतुपञ्ञासतिमो परिच्छेदो।