पुत्तकण्ड
अभिजातं अनुजातं, पुत्तमिच्छन्ति पण्डिता।
अवजातं न इच्छन्ति, यो होति कुलगन्धनो॥
पञ्चट्ठानानि सम्पस्सं, पुत्तमिच्छन्ति पण्डिता।
भतो वा नो भरिस्सति, किच्चं वा नो करिस्सति॥
कुलवंसो चिरं तिट्ठे, दायज्जं पटिपज्जति।
अथ वा पन पेतानं, दक्खिनं अनुपदस्सति॥
बहुपुत्ते पिता एको, अवस्सं पोसेति सदा।
बहुपुत्ता न सक्कोन्ति, पोसेतुं पितरेककं॥
पुत्तं वा भातरं दुट्ठु, अनुसासेय्य नो जहे।
किन्नु छेज्जं करं पादं, लित्तं असुचिना सिया॥