१. रूपादिवग्गवण्णना
निदानवण्णना
विभागवन्तानं सभावविभावनं विभागदस्सनवसेनेव होतीति पठमं ताव निपातसुत्तवसेन विभागं दस्सेतुं ‘‘तत्थ अङ्गुत्तरागमो नामा’’तिआदिमाह। तत्थ तत्थाति ‘‘अङ्गुत्तरागमस्स अत्थं पकासयिस्सामी’’ति यदिदं वुत्तं, तस्मिं वचने, ‘‘यस्स अत्थं पकासयिस्सामी’’ति पटिञ्ञातं, सो अङ्गुत्तरागमो नाम निपातसुत्तवसेन एवं विभागोति अत्थो। अथ वा तत्थाति ‘‘अङ्गुत्तरनिस्सितं अत्थ’’न्ति एतस्मिं वचने यो अङ्गुत्तरागमो वुत्तो, सो निपातसुत्तादिवसेन एदिसोति अत्थो।
इदानि तं आदितो पट्ठाय संवण्णितुकामो अत्तनो संवण्णनाय पठममहासङ्गीतियं निक्खित्तानुक्कमेन पवत्तभावदस्सनत्थं ‘‘तस्स निपातेसु…पे॰… वुत्तं निदानमादी’’तिआदिमाह। तत्थ यथापच्चयं तत्थ तत्थ देसितत्ता पञ्ञत्तत्ता च विप्पकिण्णानं धम्मविनयानं सङ्गहेत्वा गायनं कथनं सङ्गीति। एतेन तंतंसिक्खापदानं सुत्तानञ्च आदिपरियोसानेसु अन्तरन्तरा च सम्बन्धवसेन ठपितं सङ्गीतिकारवचनं सङ्गहितं होति। सङ्गीयमानस्स अत्थस्स महन्तताय पूजनीयताय च महती सङ्गीति महासङ्गीति, पठमा महासङ्गीति पठममहासङ्गीति, तस्सा पवत्तिकालो पठममहासङ्गीतिकालो, तस्मिं पठममहासङ्गीतिकाले। निददाति देसनं देसकालादिवसेन अविदितं विदितं कत्वा निदस्सेतीति निदानं। यो लोकियेहि उपोग्घातोति वुच्चति, स्वायमेत्थ ‘‘एवं मे सुत’’न्तिआदिको गन्थो वेदितब्बो। न ‘‘सनिदानाहं, भिक्खवे, धम्मं देसेमी’’तिआदीसु (अ॰ नि॰ ३.१२६) विय अज्झासयादिदेसनुप्पत्तिहेतु। तेनेवाह – ‘‘एवं मे सुतन्तिआदिकं आयस्मता आनन्देन पठममहासङ्गीतिकाले वुत्तं निदानमादी’’ति।
१.‘‘सा पनेसा’’तिआदिना बाहिरनिदाने वत्तब्बं अतिदिसित्वा इदानि अब्भन्तरनिदानं आदितो पट्ठाय संवण्णितुं ‘‘यं पनेत’’न्ति वुत्तं। तत्थ यस्मा संवण्णनं करोन्तेन संवण्णेतब्बे धम्मे पदानि पदविभागं तदत्थञ्च दस्सेत्वा ततो परं पिण्डत्थादिनिदस्सनवसेन च संवण्णना कातब्बा, तस्मा पदानि ताव दस्सेन्तो ‘‘एवन्ति निपातपद’’न्तिआदिमाह । तत्थ पदविभागोति पदानं विसेसो, न पदविग्गहो। अथ वा पदानि च पदविभागो च पदविभागो, पदविग्गहो च पदविभागो च पदविभागोति वा एकसेसवसेन पदपदविग्गहा पदविभागसद्देन वुत्ताति वेदितब्बं। तत्थ पदविग्गहो ‘‘जेतस्स वनं जेतवन’’न्तिआदिना समासपदेसु दट्ठब्बो।
अत्थतोति पदत्थतो। तं पन पदत्थं अत्थुद्धारक्कमेन पठमं एवं-सद्दस्स दस्सेन्तो ‘‘एवं-सद्दो तावा’’तिआदिमाह। अवधारणादीति एत्थ आदि-सद्देन इदमत्थपुच्छापरिमाणादिअत्थानं सङ्गहो दट्ठब्बो। तथा हि ‘‘एवंगतानि पुथुसिप्पायतनानि, एवमादीनी’’तिआदीसु इदं-सद्दस्स अत्थे एवं-सद्दो। गत-सद्दो हि पकारपरियायो, तथा विधाकार-सद्दा च। तथा हि विधयुत्तगतसद्दे लोकिया पकारत्थे वदन्ति। ‘‘एवं सु ते सुन्हाता सुविलित्ता कप्पितकेसमस्सू आमुक्कमणिकुण्डलाभरणा ओदातवत्थवसना पञ्चहि कामगुणेहि समप्पिता समङ्गीभूता परिचारेन्ति सेय्यथापि त्वं एतरहि साचरियकोति। नो हिदं, भो गोतमा’’तिआदीसु (दी॰ नि॰ १.२८६) पुच्छायं। ‘‘एवं लहुपरिवत्तं (अ॰ नि॰ १.४८), एवमायुपरियन्तो’’ति (दी॰ नि॰ १.२४४; पारा॰ १२) च आदीसु परिमाणे।
ननु च ‘‘एवं सु ते सुन्हाता सुविलित्ता एवमायुपरियन्तो’’ति एत्थ एवं-सद्देन पुच्छनाकारपरिमाणाकारानं वुत्तत्ता आकारत्थो एव एवं-सद्दोति? न, विसेससब्भावतो। आकारमत्तवाचको हि एवं-सद्दो आकारत्थोति अधिप्पेतो यथा ‘‘एवं ब्याखो’’तिआदीसु (म॰ नि॰ १.२३४; पाचि॰ ४१७; चूळव॰ ६५), न पन आकारविसेसवाचको। एवञ्च कत्वा ‘‘एवं जातेन मच्चेना’’तिआदीनि (ध॰ प॰ ५३) उपमादिउदाहरणानि उपपन्नानि होन्ति। तथा हि ‘‘यथा हि…पे॰… बहु’’न्ति (ध॰ प॰ ५३) एत्थ पुप्फरासिट्ठानियतो मनुस्सूपपत्तिसप्पुरिसूपनिस्सयसद्धम्मस्सवनयोनिसोमनसिकारभोगसम्पत्ति- आदिदानादिपुञ्ञकिरियाहेतुसमुदायतो सोभासुगन्धतादिगुणयोगतो मालागुणसदिसियो पहूता पुञ्ञकिरिया मरितब्बसभावताय मच्चेन सत्तेन कत्तब्बाति जोतितत्ता पुप्फरासिमालागुणाव उपमा। तेसं उपमाकारो यथा-सद्देन अनियमतो वुत्तोति ‘‘एवं-सद्दो उपमाकारनिगमनत्थो’’ति वत्तुं युत्तं, सो पन उपमाकारो नियमियमानो अत्थतो उपमाव होतीति आह – ‘‘उपमायं आगतो’’ति। तथा ‘‘एवं इमिना आकारेन अभिक्कमितब्ब’’न्तिआदिना उपदिसियमानाय समणसारुप्पाय आकप्पसम्पत्तिया यो तत्थ उपदिसनाकारो, सो अत्थतो उपदेसो एवाति वुत्तं – ‘‘एवं ते…पे॰… उपदेसे’’ति। तथा एवमेतंभगवा, एवमेतं सुगताति एत्थ भगवता यथावुत्तमत्थं अविपरीततो जानन्तेहि कतं तत्थ संविज्जमानगुणानं पकारेहि हंसनं उदग्गताकरणं सम्पहंसनं, यो तत्थ सम्पहंसनाकारोति योजेतब्बं।
एवमेवं पनायन्ति एत्थ गरहणाकारोति योजेतब्बं, सो च गरहणाकारो ‘‘वसली’’तिआदिखुंसनसद्दसन्निधानतो इध एवं-सद्देन पकासितोति विञ्ञायति। यथा चेत्थ, एवं उपमाकारादयोपि उपमादिवसेन वुत्तानं पुप्फरासिआदिसद्दानं सन्निधानतोति दट्ठब्बं। एवं, भन्तेति खोतिआदीसु पन धम्मस्स साधुकं सवनमनसिकारेन नियोजितेहि भिक्खूहि अत्तनो तत्थ ठितभावस्स पटिजाननवसेन वुत्तत्ता एत्थ एवं-सद्दो वचनसम्पटिच्छनत्थो वुत्तो, तेन ‘‘एवं, भन्ते, साधु भन्ते, सुट्ठु भन्ते’’ति वुत्तं होति। एवञ्च वदेहीति ‘‘यथाहं वदामि, एवं समणं आनन्दं वदेही’’ति वदनाकारो इदानि वत्तब्बो एवं-सद्देन निदस्सीयतीति निदस्सनत्थो वुत्तो। एवं नोति एत्थापि तेसं यथावुत्तधम्मानं अहितदुक्खावहभावे सन्निट्ठानजननत्थं अनुमतिग्गहणवसेन ‘‘नो वा, कथं वो एत्थ होती’’ति पुच्छाय कताय ‘‘एवं नो एत्थ होती’’ति वुत्तत्ता तदाकारसन्निट्ठानं एवं-सद्देन विभावितन्ति विञ्ञायति। सो पन तेसं धम्मानं अहिताय दुक्खाय संवत्तनाकारो नियमियमानो अवधारणत्थो होतीति आह – ‘‘एवं नो एत्थ होतीतिआदीसु अवधारणे’’ति।
नानानयनिपुणन्ति एकत्तनानत्तअब्यापारएवंधम्मतासङ्खाता, नन्दियावट्टतिपुक्खलसीहविक्कीळितअङ्कुसदिसालोचनसङ्खाता वा आधारादिभेदवसेन नानाविधा नया नानानया। नया वा पाळिगतियो, ता च पञ्ञत्तिआदिवसेन संकिलेसभागियादिलोकियादितदुभयवोमिस्सकतादिवसेन कुसलादिवसेन खन्धादिवसेन सङ्गहादिवसेन समयविमुत्तादिवसेन पधानादिवसेन कुसलमूलादिवसेन तिकपट्ठानादिवसेन च नानप्पकाराति नानानया, तेहि निपुणं सण्हं सुखुमन्ति नानानयनिपुणं। आसयोव अज्झासयो, ते च सस्सतादिभेदेन तत्थ च अप्परजक्खतादिभेदेन च अनेके, अत्तज्झासयादयो एव वा समुट्ठानं उप्पत्तिहेतु एतस्साति अनेकज्झासयसमुट्ठानं। अत्थब्यञ्जनसम्पन्नन्ति अत्थब्यञ्जनपरिपुण्णं उपनेतब्बाभावतो। सङ्कासनपकासनविवरणविभजनउत्तानीकरणपञ्ञत्तिवसेन छहि अत्थपदेहि अक्खरपदब्यञ्जनाकारनिरुत्तिनिद्देसवसेन छहि ब्यञ्जनपदेहि च समन्नागतन्ति वा अत्थो दट्ठब्बो।
विविधपाटिहारियन्ति एत्थ पाटिहारियपदस्स वचनत्थं ‘‘पटिपक्खहरणतो रागादिकिलेसापनयनतो च पाटिहारिय’’न्ति वदन्ति। भगवतो पन पटिपक्खा रागादयो न सन्ति , ये हरितब्बा। पुथुज्जनानम्पि विगतूपक्किलेसे अट्ठगुणसमन्नागते चित्ते हतपटिपक्खे इद्धिविधं पवत्तति, तस्मा तत्थ पवत्तवोहारेन च न सक्का इध ‘‘पाटिहारिय’’न्ति वत्थुं। सचे पन महाकारुणिकस्स भगवतो वेनेय्यगता च किलेसा पटिपक्खा, तेसं हरणतो ‘‘पाटिहारिय’’न्ति वुत्तं, एवं सति युत्तमेतं। अथ वा भगवतो च सासनस्स च पटिपक्खा तित्थिया, तेसं हरणतो पाटिहारियं। ते हि दिट्ठिहरणवसेन च दिट्ठिप्पकासने असमत्थभावेन च इद्धिआदेसनानुसासनीहि हरिता अपनीता होन्तीति। ‘‘पटी’’ति वा अयं सद्दो ‘‘पच्छा’’ति एतस्स अत्थं बोधेति ‘‘तस्मिं पटिपविट्ठम्हि, अञ्ञो आगञ्छि ब्राह्मणो’’तिआदीसु (सु॰ नि॰ ९८५; चूळनि॰ पारायनवग्गो, वत्थुगाथा ४) विय, तस्मा समाहिते चित्ते विगतूपक्किलेसे कतकिच्चेन पच्छा हरितब्बं पवत्तेतब्बन्ति पटिहारियं, अत्तनो वा उपक्किलेसेसु चतुत्थज्झानमग्गेहि हरितेसु पच्छा हरणं पटिहारियं, इद्धिआदेसनानुसासनियो च विगतूपक्किलेसेन कतकिच्चेन च सत्तहितत्थं पुन पवत्तेतब्बा, हरितेसु च अत्तनो उपक्किलेसेसु परसत्तानं उपक्किलेसहरणानि होन्तीति पटिहारियानि भवन्ति। पटिहारियमेव पाटिहारियं, पटिहारिये वा इद्धिआदेसनानुसासनिसमुदाये भवं एकमेकं पाटिहारियन्ति वुच्चति। पटिहारियं वा चतुत्थज्झानं मग्गो च पटिपक्खहरणतो, तत्थ जातं, तस्मिं वा निमित्तभूते, ततो वा आगतन्ति पाटिहारियं। तस्स पन इद्धिआदिभेदेन विसयभेदेन च बहुविधस्स भगवतो देसनायं लब्भमानत्ता आह – ‘‘विविधपाटिहारिय’’न्ति।
न अञ्ञथाति भगवतो सम्मुखा सुताकारतो न अञ्ञथाति अत्थो, न पन भगवतो देसिताकारतो। अचिन्तेय्यानुभावा हि भगवतो देसना। एवञ्च कत्वा ‘‘सब्बप्पकारेन को समत्थो विञ्ञातु’’न्ति इदं वचनं समत्थितं भवति, धारणबलदस्सनञ्च न विरुज्झति सुताकाराविरुज्झनस्स अधिप्पेतत्ता। न हेत्थ अत्थन्तरतापरिहारो द्विन्नं अत्थानं एकविसयत्ता, इतरथा थेरो भगवतो देसनाय सब्बथा पटिग्गहणे समत्थो असमत्थो चाति आपज्जेय्याति।
‘‘यो परो न होति, सो अत्ता’’ति एवं वुत्ताय नियकज्झत्तसङ्खाताय ससन्ततियं वत्तनतो तिविधोपि मे-सद्दो किञ्चापि एकस्मिंयेव अत्थे दिस्सति, करणसम्पदानसामिनिद्देसवसेन पन विज्जमानभेदं सन्धायाह – ‘‘मे-सद्दो तीसु अत्थेसु दिस्सती’’ति।
किञ्चापि उपसग्गो किरियं विसेसेति, जोतकभावतो पन सतिपि तस्मिं सुत-सद्दो एव तं तमत्थं वदतीति अनुपसग्गस्स सुत-सद्दस्स अत्थुद्धारे सउपसग्गस्स गहणं न विरुज्झतीति दस्सेन्तो ‘‘सउपसग्गो च अनुपसग्गो चा’’ति आह। अस्साति सुतसद्दस्स। कम्मभावसाधनानि इध सुतसद्दे सम्भवन्तीति वुत्तं – ‘‘उपधारितन्ति वा उपधारणन्ति वा अत्थो’’ति। मयाति अत्थे सतीति यदा मे-सद्दस्स कत्तुवसेन करणनिद्देसो, तदाति अत्थो। ममाति अत्थे सतीति यदा सम्बन्धवसेन सामिनिद्देसो, तदा।
सुतसद्दसन्निट्ठाने पयुत्तेन एवं-सद्देन सवनकिरियाजोतकेन भवितब्बन्ति वुत्तं – ‘‘एवन्ति सोतविञ्ञाणादिविञ्ञाणकिच्चनिदस्सन’’न्ति। आदि-सद्देन सम्पटिच्छनादीनं सोतद्वारिकविञ्ञाणानं तदभिनीहटानञ्च मनोद्वारिकविञ्ञाणानं गहणं वेदितब्बं। सब्बेसम्पि वाक्यानं एवकारत्थसहितत्ता ‘‘सुत’’न्ति एतस्स सुतमेवाति अयमत्थो लब्भतीति आह – ‘‘अस्सवनभावप्पटिक्खेपतो’’ति। एतेन अवधारणेन नियामतं दस्सेति। यथा च सुतं सुतमेवाति नियामेतब्बं, तं सम्मा सुतं होतीति आह – ‘‘अनूनाधिकाविपरीतग्गहणनिदस्सन’’न्ति। अथ वा सद्दन्तरत्थापोहनवसेन सद्दो अत्थं वदतीति सुतन्ति अस्सुतं न होतीति अयमेतस्स अत्थोति वुत्तं – ‘‘अस्सवनभावप्पटिक्खेपतो’’ति। इमिना दिट्ठादिविनिवत्तनं करोति। इदं वुत्तं होति – न इदं मया दिट्ठं, न सयम्भुञाणेन सच्छिकतं, अथ खो सुतं, तञ्च सम्मदेवाति। तेनेवाह – ‘‘अनूनाधिकाविपरीतग्गहणनिदस्सन’’न्ति। अवधारणत्थे वा एवं-सद्दे अयमत्थयोजना – ‘‘करीयती’’ति तदपेक्खस्स सुत-सद्दस्स अयमत्थो वुत्तो ‘‘अस्सवनभावप्पटिक्खेपतो’’ति। तेनेवाह – ‘‘अनूनाधिकाविपरीतग्गहणनिदस्सन’’न्ति। सवन-सद्दो चेत्थ कम्मत्थो वेदितब्बो ‘‘सुय्यती’’ति।
एवं सवनहेतुसवनविसेसवसेन पदत्तयस्स एकेन पकारेन अत्थयोजनं दस्सेत्वा इदानि पकारन्तरेहि तं दस्सेतुं – ‘‘तथा एव’’न्तिआदि वुत्तं। तत्थ तस्साति या सा भगवतो सम्मुखा धम्मस्सवनाकारेन पवत्ता मनोद्वारविञ्ञाणवीथि, तस्सा। सा हि नानप्पकारेन आरम्मणे पवत्तितुं समत्था। तथा च वुत्तं – ‘‘सोतद्वारानुसारेना’’ति। नानप्पकारेनाति वक्खमानानं अनेकविहितानं ब्यञ्जनत्थग्गहणानं नानाकारेन। एतेन इमिस्सा योजनाय आकारत्थो एवं-सद्दो गहितोति दीपेति। पवत्तिभावप्पकासनन्ति पवत्तिया अत्थिभावप्पकासनं। सुतन्ति धम्मप्पकासनन्ति यस्मिं आरम्मणे वुत्तप्पकारा विञ्ञाणवीथि नानप्पकारेन पवत्ता, तस्स धम्मत्ता वुत्तं, न सुतसद्दस्स धम्मत्थत्ता। वुत्तस्सेवत्थस्स पाकटीकरणं ‘‘अयञ्हेत्था’’तिआदि। तत्थ विञ्ञाणवीथियाति करणत्थे करणवचनं, मयाति कत्तुअत्थे।
एवन्ति निद्दिसितब्बप्पकासनन्ति निदस्सनत्थं एवं-सद्दं गहेत्वा वुत्तं निदस्सेतब्बस्स निदस्सितब्बत्ताभावाभावतो । तेन एवं-सद्देन सकलम्पि सुत्तं पच्चामट्ठन्ति दस्सेति। सुतसद्दस्स किरियासद्दत्ता सवनकिरियाय च साधारणविञ्ञाणप्पबन्धप्पटिबद्धत्ता तत्थ च पुग्गलवोहारोति वुत्तं – ‘‘सुतन्ति पुग्गलकिच्चप्पकासन’’न्ति। न हि पुग्गलवोहाररहिते धम्मप्पबन्धे सवनकिरिया लब्भतीति।
यस्स चित्तसन्तानस्सातिआदिपि आकारत्थमेव एवं-सद्दं गहेत्वा पुरिमयोजनाय अञ्ञथा अत्थयोजनं दस्सेतुं वुत्तं। तत्थ आकारपञ्ञत्तीति उपादापञ्ञत्ति एव धम्मानं पवत्तिआकारुपादानवसेन तथा वुत्ता। सुतन्ति विसयनिद्देसोति सोतब्बभूतो धम्मो सवनकिरियाकत्तुपुग्गलस्स सवनकिरियावसेन पवत्तिट्ठानन्ति कत्वा वुत्तं। चित्तसन्तानविनिमुत्तस्स परमत्थतो कस्सचि कत्तुअभावेपि सद्दवोहारेन बुद्धिपरिकप्पितभेदवचनिच्छाय चित्तसन्तानतो अञ्ञं विय तंसमङ्गिं कत्वा वुत्तं – ‘‘चित्तसन्तानेन तंसमङ्गीनो’’ति। सवनकिरियाविसयोपि सोतब्बधम्मो सवनकिरियावसेन पवत्तचित्तसन्तानस्स इध परमत्थतो कत्तुभावतो, सवनवसेन चित्तपवत्तिया एव वा सवनकिरियाभावतो तंकिरियाकत्तु च विसयो होतीति कत्वा वुत्तं – ‘‘तंसमङ्गीनो कत्तुविसये’’ति। सुताकारस्स च थेरस्स सम्मानिच्छितभावतो आह – ‘‘गहणसन्निट्ठान’’न्ति। एतेन वा अवधारणत्थं एवं-सद्दं गहेत्वा अयमत्थयोजना कताति दट्ठब्बं।
पुब्बे सुतानं नानाविहितानं सुत्तसङ्खातानं अत्थब्यञ्जनानं उपधारितरूपस्स आकारस्स निदस्सनस्स, अवधारणस्स वा पकासनसभावो एवं-सद्दोति तदाकारादिउपधारणस्स पुग्गलपञ्ञत्तिया उपादानभूतधम्मप्पबन्धब्यापारताय वुत्तं – ‘‘एवन्ति पुग्गलकिच्चनिद्देसो’’ति। सवनकिरिया पन पुग्गलवादिनोपि विञ्ञाणनिरपेक्खा नत्थीति विसेसतो विञ्ञाणब्यापारोति आह – ‘‘सुतन्ति विञ्ञाणकिच्चनिद्देसो’’ति। मेति सद्दप्पवत्तिया एकन्तेनेव सत्तविसयत्ता विञ्ञाणकिच्चस्स च तत्थेव समोदहितब्बतो ‘‘मेति उभयकिच्चयुत्तपुग्गलनिद्देसो’’ति वुत्तं। अविज्जमानपञ्ञत्तिविज्जमानपञ्ञत्तिसभावा यथाक्कमं एवंसद्दसुतसद्दानं अत्थाति ते तथारूपपञ्ञत्तिउपादानब्यापारभावेन दस्सेन्तो आह – ‘‘एवन्ति पुग्गलकिच्चनिद्देसो, सुतन्ति विञ्ञाणकिच्चनिद्देसो’’ति। एत्थ च करणकिरियाकत्तुकम्मविसेसप्पकासनवसेन पुग्गलब्यापारविसयपुग्गलब्यापारनिदस्सनवसेन गहणाकारग्गाहकतब्बिसयविसेसनिद्देसवसेन कत्तुकरणब्यापारकत्तुनिद्देसवसेन च दुतियादयो चतस्सो अत्थयोजना दस्सिताति दट्ठब्बं।
सब्बस्सपि सद्दाधिगमनीयस्स अत्थस्स पञ्ञत्तिमुखेनेव पटिपज्जितब्बत्ता सब्बपञ्ञत्तीनञ्च विज्जमानादिवसेन छसु पञ्ञत्तिभेदेसु अन्तोगधत्ता तेसु ‘‘एव’’न्तिआदीनं पञ्ञत्तीनं सरूपं निद्धारेन्तो आह – ‘‘एवन्ति च मेति चा’’तिआदि। तत्थ एवन्ति च मेति च वुच्चमानस्सत्थस्स आकारादिनो धम्मानं असल्लक्खणभावतो अविज्जमानपञ्ञत्तिभावोति आह – ‘‘सच्चिकट्ठपरमत्थवसेन अविज्जमानपञ्ञत्ती’’ति। तत्थ सच्चिकट्ठपरमत्थवसेनाति भूतत्थउत्तमत्थवसेन। इदं वुत्तं होति – यो मायामरीचिआदयो विय अभूतत्थो, अनुस्सवादीहि गहेतब्बो विय अनुत्तमत्थो च न होति, सो रूपसद्दादिसभावो, रुप्पनानुभवनादिसभावो वा अत्थो सच्चिकट्ठो परमत्थो चाति वुच्चति, न तथा ‘‘एवं मे’’तिपदानं अत्थोति। एतमेवत्थं पाकटतरं कातुं ‘‘किञ्हेत्थ त’’न्तिआदि वुत्तं। सुतन्ति पन सद्दायतनं सन्धायाह – ‘‘विज्जमानपञ्ञत्ती’’ति। तेनेव हि ‘‘यञ्हि तं एत्थ सोतेन उपलद्ध’’न्ति वुत्तं। ‘‘सोतद्वारानुसारेन उपलद्ध’’न्ति पन वुत्ते अत्थब्यञ्जनादि सब्बं लब्भति। तं तं उपादाय वत्तब्बतोति सोतपथमागते धम्मे उपादाय तेसं उपधारिताकारादिनो पच्चामसनवसेन एवन्ति, ससन्ततिपरियापन्ने खन्धे उपादाय मेति वत्तब्बत्ताति अत्थो। दिट्ठादिसभावरहिते सद्दायतने पवत्तमानोपि सुतवोहारो ‘‘दुतियं ततिय’’न्तिआदिको विय पठमादीनि दिट्ठमुतविञ्ञाते अपेक्खित्वा पवत्तोति आह – ‘‘दिट्ठादीनि उपनिधाय वत्तब्बतो’’ति। अस्सुतं न होतीति हि सुतन्ति पकासितो अयमत्थोति।
अत्तना पटिविद्धा सुत्तस्स पकारविसेसा एवन्ति थेरेन पच्चामट्ठाति आह – ‘‘असम्मोहं दीपेती’’ति। नानप्पकारप्पटिवेधसमत्थो होतीति एतेन वक्खमानस्स सुत्तस्स नानप्पकारतं दुप्पटिविज्झतञ्च दस्सेति। सुतस्स असम्मोसं दीपेतीति सुताकारस्स याथावतो दस्सियमानत्ता वुत्तं। असम्मोहेनाति सम्मोहाभावेन, पञ्ञाय एव वा सवनकालसम्भूताय तदुत्तरिकालपञ्ञासिद्धि। एवं असम्मोसेनाति एत्थापि वत्तब्बं। ब्यञ्जनानं पटिविज्झितब्बो आकारो नातिगम्भीरो, यथासुतधारणमेव तत्थ करणीयन्ति सतिया ब्यापारो अधिको, पञ्ञा तत्थ गुणीभूताति वुत्तं – ‘‘पञ्ञापुब्बङ्गमाया’’तिआदि ‘‘पञ्ञाय पुब्बङ्गमा’’ति कत्वा। पुब्बङ्गमता चेत्थ पधानभावो ‘‘मनोपुब्बङ्गमा’’तिआदीसु (ध॰ प॰ १, २) विय, पुब्बङ्गमताय वा चक्खुविञ्ञाणादीसु आवज्जनादीनं विय अप्पधानत्ते पञ्ञा पुब्बङ्गमा एतिस्साति अयम्पि अत्थो युज्जति, एवं सतिपुब्बङ्गमायाति एत्थापि वुत्तनयानुसारेन यथासम्भवमत्थो वेदितब्बो। अत्थब्यञ्जनसम्पन्नस्साति अत्थब्यञ्जनपरिपुण्णस्स, सङ्कासनप्पकासनविवरणविभजनउत्तानीकरणपञ्ञत्तिवसेन छहि अत्थपदेहि अक्खरपदब्यञ्जनाकारनिरुत्तिनिद्देसवसेन छहि ब्यञ्जनपदेहि च समन्नागतस्साति वा अत्थो दट्ठब्बो।
योनिसोमनसिकारंदीपेति एवं-सद्देन वुच्चमानानं आकारनिदस्सनावधारणत्थानं अविपरीतसद्धम्मविसयत्ताति अधिप्पायो। अविक्खेपं दीपेतीति ‘‘चित्तपरियादानं कत्थ भासित’’न्तिआदिपुच्छावसे पकरणप्पत्तस्स वक्खमानस्स सुत्तस्स सवनं समाधानमन्तरेन न सम्भवतीति कत्वा वुत्तं। विक्खित्तचित्तस्सातिआदि तस्सेवत्थस्स समत्थनवसेन वुत्तं। सब्बसम्पत्तियाति अत्थब्यञ्जनदेसकप्पयोजनादिसम्पत्तिया। अविपरीतसद्धम्मविसयेहि विय आकारनिदस्सनावधारणत्थेहि योनिसोमनसिकारस्स, सद्धम्मस्सवनेन विय च अविक्खेपस्स यथा योनिसोमनसिकारेन फलभूतेन अत्तसम्मापणिधिपुब्बेकतपुञ्ञतानं सिद्धि वुत्ता तदविनाभावतो। एवं अविक्खेपेन फलभूतेन कारणभूतानं सद्धम्मस्सवनसप्पुरिसूपनिस्सयानं सिद्धि दस्सेतब्बा सिया अस्सुतवतो सप्पुरिसूपनिस्सयरहितस्स च तदभावतो। न हि विक्खित्तचित्तोतिआदिना समत्थनवचनेन पन अविक्खेपेन कारणभूतेन सप्पुरिसूपनिस्सयेन च फलभूतस्स सद्धम्मस्सवनस्स सिद्धि दस्सिता। अयं पनेत्थ अधिप्पायो युत्तो सिया, सद्धम्मस्सवनसप्पुरिसूपनिस्सया न एकन्तेन अविक्खेपस्स कारणं बाहिरङ्गत्ता, अविक्खेपो पन सप्पुरिसूपनिस्सयो विय सद्धम्मस्सवनस्स एकन्तकारणन्ति। एवम्पि अविक्खेपेन सप्पुरिसूपनिस्सयसिद्धिजोतना न समत्थिताव। नो न समत्थिता विक्खित्तचित्तानं सप्पुरिसपयिरुपासनाभावस्स अत्थसिद्धत्ता। एत्थ च पुरिमं फलेन कारणस्स सिद्धिदस्सनं नदीपूरेन विय उपरि वुट्ठिसब्भावस्स, दुतियं कारणेन फलस्स सिद्धिदस्सनं दट्ठब्बं एकन्तवस्सिना विय मेघवुट्ठानेन वुट्ठिप्पवत्तिया।
भगवतो वचनस्स अत्थब्यञ्जनप्पभेदपरिच्छेदवसेन सकलसासनसम्पत्तिओगाहनाकारो निरवसेसपरहितपारिपूरिताकारणन्ति वुत्तं – ‘‘एवं भद्दको आकारो’’ति। यस्मा न होतीति सम्बन्धो। पच्छिमचक्कद्वयसम्पत्तिन्ति अत्तसम्मापणिधिपुब्बेकतपुञ्ञतासङ्खातगुणद्वयं। अपरापरं वुत्तिया चेत्थ चक्कभावो, चरन्ति एतेहि सत्ता सम्पत्तिभवेसूति वा। ये सन्धाय वुत्तं – ‘‘चत्तारिमानि, भिक्खवे, चक्कानि, येहि समन्नागतानं देवमनुस्सानं चतुचक्कं वत्तती’’तिआदि (अ॰ नि॰ ४.३१)। पुरिमपच्छिमभावो चेत्थ देसनाक्कमवसेन दट्ठब्बो। पच्छिमचक्कद्वयसिद्धियाति पच्छिमचक्कद्वयस्स अत्थिताय। सम्मापणिहितत्तो पुब्बे च कतपुञ्ञो सुद्धासयो होति तदसिद्धिहेतूनं किलेसानं दूरीभावतोति आह – ‘‘आसयसुद्धि सिद्धा होती’’ति। तथा हि वुत्तं – ‘‘सम्मापणिहितं चित्तं, सेय्यसो नं ततो करे’’ति (ध॰ प॰ ४३), ‘‘कतपुञ्ञोसि त्वं, आनन्द, पधानमनुयुञ्ज, खिप्पं होहिसि अनासवो’’ति (दी॰ नि॰ २.२०७) च। तेनेवाह – ‘‘आसयसुद्धिया अधिगमब्यत्तिसिद्धी’’ति। पयोगसुद्धियाति योनिसोमनसिकारपुब्बङ्गमस्स धम्मस्सवनप्पयोगस्स विसदभावेन। तथा चाह – ‘‘आगमब्यत्तिसिद्धी’’ति , सब्बस्स वा कायवचीपयोगस्स निद्दोसभावेन। परिसुद्धकायवचीपयोगो हि विप्पटिसाराभावतो अविक्खित्तचित्तो परियत्तियं विसारदो होतीति।
नानप्पकारपटिवेधदीपकेनातिआदिना अत्थब्यञ्जनेसु थेरस्स एवं-सद्दसुत-सद्दानं असम्मोहदीपनतो चतुप्पटिसम्भिदावसेन अत्थयोजनं दस्सेति। तत्थ सोतप्पभेदपटिवेधदीपकेनाति एतेन अयं सुत-सद्दो एवं-सद्दसन्निधानतो, वक्खमानापेक्खाय वा सामञ्ञेनेव सोतब्बधम्मविसेसं आमसतीति दस्सेति। मनोदिट्ठिकरणानं परियत्तिधम्मानं अनुपेक्खनसुप्पटिवेधा विसेसतो मनसिकारप्पटिबद्धाति ते वुत्तनयेन योनिसोमनसिकारदीपकेन एवं-सद्देन योजेत्वा, सवनधारणवचीपरिचया परियत्तिधम्मा विसेसेन सोतावधानप्पटिबद्धाति ते अविक्खेपदीपकेन सुत-सद्देन योजेत्वा दस्सेन्तो सासनसम्पत्तिया धम्मस्सवने उस्साहं जनेति। तत्थ धम्माति परियत्तिधम्मा। मनसा अनुपेक्खिताति ‘‘इध सीलं कथितं, इध समाधि, इध पञ्ञा, एत्तका एत्थ अनुसन्धयो’’तिआदिना नयेन मनसा अनु अनु पेक्खिता। दिट्ठिया सुप्पटिविद्धाति निज्झानक्खन्ति भूताय, ञातपरिञ्ञासङ्खाताय वा दिट्ठिया तत्थ तत्थ वुत्तरूपारूपधम्मे ‘‘इति रूपं, एत्तकं रूप’’न्तिआदिना सुट्ठु ववत्थपेत्वा पटिविद्धा।
सकलेन वचनेनाति पुब्बे तीहि पदेहि विसुं विसुं योजितत्ता वुत्तं। असप्पुरिसभूमिन्ति अकतञ्ञुतं, ‘‘इधेकच्चो पापभिक्खु तथागतप्पवेदितं धम्मविनयं परियापुणित्वा अत्तनो दहती’’ति (पारा॰ १९५) एवं वुत्तं अनरियवोहारावत्थं। सा एव अनरियवोहारावत्था असद्धम्मो। ननु च आनन्दत्थेरस्स ‘‘ममेदं वचन’’न्ति अधिमानस्स, महाकस्सपत्थेरादीनञ्च तदासङ्काय अभावतो असप्पुरिसभूमिसमतिक्कमादिवचनं निरत्थकन्ति? नयिदमेवं, ‘‘एवं मे सुत’’न्ति वदन्तेन अयम्पि अत्थो विभावितोति दस्सनतो। केचि पन ‘‘देवतानं परिवितक्कापेक्खं तथावचनन्ति एदिसी चोदना अनवकासा’’ति वदन्ति। तस्मिं किर खणे एकच्चानं देवतानं एवं चेतसो परिवितक्को उदपादि ‘‘भगवा परिनिब्बुतो, अयञ्च आयस्मा देसनाकुसलो इदानि धम्मं देसेति, सक्यकुलप्पसुतो तथागतस्स भाता चूळपितुपुत्तो, किं नु खो सयं सच्छिकतं धम्मं देसेति, उदाहु भगवतो एव वचनं यथासुत’’न्ति, एवं तदासङ्कितप्पकारतो असप्पुरिसभूमिसमोक्कमादितो अतिक्कमादि विभावितन्ति। अत्तनो अदहन्तोति ‘‘ममेद’’न्ति अत्तनि अट्ठपेन्तो। अप्पेतीति निदस्सेति। दिट्ठधम्मिकसम्परायिकपरमत्थेसु यथारहं सत्ते नेतीति नेत्ति, धम्मोयेव नेत्ति धम्मनेत्ति।
दळ्हतरनिविट्ठा विचिकिच्छा कङ्खा। नातिसंसप्पनं मतिभेदमत्तं विमति। अस्सद्धियं विनासेति भगवता भासितत्ता सम्मुखा चस्स पटिग्गहितत्ता खलितदुरुत्तादिग्गहणदोसाभावतो च। एत्थ च पञ्चमादयो तिस्सो अत्थयोजना आकारादिअत्थेसु अग्गहितविसेसमेव एवं-सद्दं गहेत्वा दस्सिता, ततो परा चतस्सो आकारत्थमेव एवं-सद्दं गहेत्वा विभाविता, पच्छिमा पन तिस्सो यथाक्कमं आकारत्थं निदस्सनत्थं अवधारणत्थञ्च एवं-सद्दं गहेत्वा योजिताति दट्ठब्बं।
एक-सद्दो अञ्ञसेट्ठअसहायसङ्खादीसु दिस्सति। तथा हेस ‘‘सस्सतो अत्ता च लोको च, इदमेव सच्चं मोघमञ्ञन्ति इत्थेके अभिवदन्ती’’तिआदीसु (म॰ नि॰ ३.२७) अञ्ञत्थे दिस्सति, ‘‘चेतसो एकोदिभाव’’न्तिआदीसु (दी॰ नि॰ १.२२८; पारा॰ ११) सेट्ठे, ‘‘एको वूपकट्ठो’’तिआदीसु (दी॰ नि॰ १.४०५; २.२१५; म॰ नि॰ १.८०; सं॰ नि॰ ३.६३; चूळव॰ ४४५) असहाये ‘‘एकोव खो, भिक्खवे, खणो च समयो च ब्रह्मचरियवासाया’’तिआदीसु (अ॰ नि॰ ८.२९) सङ्खायं। इधापि सङ्खायन्ति दस्सेन्तो आह – ‘‘एकन्ति गणनपरिच्छेदनिद्देसो’’ति। कालञ्च समयञ्चाति युत्तकालञ्च पच्चयसामग्गिञ्च। खणोति ओकासो। तथागतुप्पादादिको हि मग्गब्रह्मचरियस्स ओकासो तप्पच्चयप्पटिलाभहेतुत्ता। खणो एव च समयो। यो खणोति च समयोति च वुच्चति, सो एको एवाति हि अत्थो। महासमयोति महासमूहो। समयोपि खोति सिक्खापदपूरणस्स हेतुपि। समयप्पवादकेति दिट्ठिप्पवादके। तत्थ हि निसिन्ना तित्थिया अत्तनो अत्तनो समयं पवदन्तीति। अत्थाभिसमयाति हितप्पटिलाभा। अभिसमेतब्बोति अभिसमयो, अभिसमयो अत्थो अभिसमयट्ठोति पीळनादीनि अभिसमेतब्बभावेन एकीभावं उपनेत्वा वुत्तानि। अभिसमयस्स वा पटिवेधस्स विसयभूतो अत्थो अभिसमयट्ठोति तानेव तथा एकत्तेन वुत्तानि। तत्थ पीळनं दुक्खसच्चस्स तंसमङ्गिनो हिंसनं अविप्फारिकताकरणं। सन्तापो दुक्खदुक्खतादिवसेन सन्तपनं परिदहनं।
तत्थ सहकारिकारणे सनिज्झं समेति समवेतीति समयो, समवायो। समेति समागच्छति एत्थ मग्गब्रह्मचरियं तदाधारपुग्गलेहीति समयो, खणो। समेति एत्थ, एतेन वा संगच्छति सत्तो, सभावधम्मो वा सहजातादीहि, उप्पादादीहि वाति समयो, कालो। धम्मप्पवत्तिमत्तताय अत्थतो अभूतोपि हि कालो धम्मप्पवत्तिया अधिकरणं करणं विय च कप्पनामत्तसिद्धेन रूपेन वोहरीयतीति। समं, सह वा अवयवानं अयनं पवत्ति अवट्ठानन्ति समयो, समूहो यथा ‘‘समुदायो’’ति। अवयवसहावट्ठानमेव हि समूहोति। अवसेसपच्चयानं समागमे एति फलं एतस्मा उप्पज्जति पवत्तति चाति समयो, हेतु यथा ‘‘समुदयो’’ति। समेति संयोजनभावतो सम्बद्धो एति अत्तनो विसये पवत्तति, दळ्हग्गहणभावतो वा संयुत्ता अयन्ति पवत्तन्ति सत्ता यथाभिनिवेसं एतेनाति समयो, दिट्ठि। दिट्ठिसंयोजनेन हि सत्ता अतिविय बज्झन्तीति। समिति सङ्गति समोधानन्ति समयो, पटिलाभो। समस्स यानं, सम्मा वा यानं अपगमोति समयो, पहानं। अभिमुखं ञाणेन सम्मा एतब्बो अभिसमेतब्बोति अभिसमयो, धम्मानं अविपरीतो सभावो। अभिमुखभावेन सम्मा एति गच्छति बुज्झतीति अभिसमयो, धम्मानं अविपरीतसभावावबोधो। एवं तस्मिं तस्मिं अत्थे समयसद्दस्स पवत्ति वेदितब्बा। समयसद्दस्स अत्थुद्धारे अभिसमयसद्दस्स उदाहरणं वुत्तनयेन वेदितब्बं। अस्साति समयसद्दस्स। कालो अत्थो समवायादीनं अत्थानं इध असम्भवतो, देसदेसकपरिसानं विय सुत्तस्स निदानभावेन कालस्स अपदिसितब्बतो च।
कस्मा पनेत्थ अनियमितवसेनेव कालो निद्दिट्ठो, न उतुसंवच्छरादिवसेन नियमेत्वाति आह – ‘‘तत्थ किञ्चापी’’तिआदि। उतुसंवच्छरादिवसेन नियमं अकत्वा समयसद्दस्स वचने अयम्पि गुणो लद्धो होतीति दस्सेन्तो ‘‘ये वा इमे’’तिआदिमाह। सामञ्ञजोतना हि विसेसे अवतिट्ठतीति। तत्थ दिट्ठधम्मसुखविहारसमयो देवसिकं झानसमापत्तीहि वीतिनामनकालो, विसेसतो सत्तसत्ताहानि। सुप्पकासाति दससहस्सिलोकधातुया पकम्पनओभासपातुभावादीहि पाकटा। यथावुत्तभेदेसु एव समयेसु एकदेसं पकारन्तरेहि सङ्गहेत्वा दस्सेतुं ‘‘यो चाय’’न्तिआदिमाह। तथा हि ञाणकिच्चसमयो अत्तहितप्पटिपत्तिसमयो च अभिसम्बोधिसमयो, अरियतुण्हीभावसमयो दिट्ठधम्मसुखविहारसमयो, करुणाकिच्चपरहितप्पटिपत्तिधम्मिकथासमयो देसनासमयोयेव।
करणवचनेन निद्देसो कतोति सम्बन्धो। तत्थाति अभिधम्मविनयेसु। तथाति भुम्मकरणेहि। अधिकरणत्थो आधारत्थो। भावो नाम किरिया, किरियाय किरियन्तरलक्खणं भावेनभावलक्खणं। तत्थ यथा कालो सभावधम्मपरिच्छिन्नो सयं परमत्थतो अविज्जमानोपि आधारभावेन पञ्ञातो तङ्खणप्पवत्तानं ततो पुब्बे परतो च अभावतो ‘‘पुब्बण्हे जातो, सायन्हे गच्छती’’ति च आदीसु, समूहो च अवयवविनिमुत्तो अविज्जमानोपि कप्पनामत्तसिद्धो अवयवानं आधारभावेन पञ्ञापीयति ‘‘रुक्खे साखा, यवरासियं सम्भूतो’’तिआदीसु, एवं इधापीति दस्सेन्तो आह – ‘‘अधिकरणं…पे॰… धम्मान’’न्ति। यस्मिं काले, धम्मपुञ्जे वा कामावचरं कुसलं चित्तं उप्पन्नं होति, तस्मिं एव काले, धम्मपुञ्जे च फस्सादयोपि होन्तीति अयञ्हि तत्थ अत्थो। यथा ‘‘गावीसु दुय्हमानासु गतो, दुद्धासु आगतो’’ति दोहनकिरियाय गमनकिरिया लक्खीयति, एवं इधापि ‘‘यस्मिं समये, तस्मिं समये’’ति च वुत्ते ‘‘सती’’ति अयमत्थो विञ्ञायमानो एव होति पदत्थस्स सत्ताविरहाभावतोति समयस्स सत्ताकिरियाय चित्तस्स उप्पादकिरिया, फस्सादीनं भवनकिरिया च लक्खीयतीति। यस्मिं समयेति यस्मिं नवमे खणे, यस्मिं योनिसोमनसिकारादिहेतुम्हि, पच्चयसमवाये वा सति कामावचरं कुसलं चित्तं उप्पन्नं होति, तस्मिंयेव खणे हेतुम्हि पच्चयसमवाये च फस्सादयोपि होन्तीति उभयत्थ समयसद्दे भुम्मनिद्देसो कतो लक्खणभूतभावयुत्तोति दस्सेन्तो आह – ‘‘खण…पे॰… लक्खीयती’’ति।
हेतुअत्थो करणत्थो च सम्भवति ‘‘अन्नेन वसति, अज्झेनेन वसति, फरसुना छिन्दति, कुदालेन खणती’’तिआदीसु विय। वीतिक्कमञ्हि सुत्वा भिक्खुसङ्घं सन्निपातापेत्वा ओतिण्णे वत्थुस्मिं तं पुग्गलं पटिपुच्छित्वा विगरहित्वा च तं तं वत्थुं ओतिण्णकालं अनतिक्कमित्वा तेनेव कालेन सिक्खापदानि पञ्ञापेन्तो भगवा विहरति सिक्खापदपञ्ञत्तिहेतुञ्च अपेक्खमानो ततियपाराजिकादीसु विय।
अच्चन्तमेव आरम्भतो पट्ठाय याव देसनानिट्ठानं परहितप्पटिपत्तिसङ्खातेन करुणाविहारेन। तदत्थजोतनत्थन्ति अच्चन्तसंयोगत्थजोतनत्थं। उपयोगवचननिद्देसो कतो यथा ‘‘मासं अज्झेती’’ति। पोराणाति अट्ठकथाचरिया। अभिलापमत्तभेदोति वचनमत्तेन विसेसो। तेन सुत्तविनयेसु विभत्तिब्यत्तयो कतोति दस्सेति।
इदानि ‘‘भगवा’’ति इमस्स अत्थं दस्सेन्तो आह – ‘‘भगवाति गरू’’तिआदि। भगवाति वचनं सेट्ठन्ति सेट्ठवाचकं वचनं, सेट्ठगुणसहचरणं सेट्ठन्ति वुत्तं। अथ वा वुच्चतीति वचनं, अत्थो। यस्मा यो ‘‘भगवा’’ति वचनेन वचनीयो अत्थो, सो सेट्ठोति अत्थो। भगवाति वचनमुत्तमन्ति एत्थापि एसेव नयो। गारवयुत्तोति गरुभावयुत्तो गरुगुणयोगतो। गरुकरणं वा सातिसयं अरहतीति गारवयुत्तो, गारवारहोति अत्थो। सिप्पादिसिक्खापका गरू होन्ति, न च गारवयुत्ता, अयं पन तादिसो न होति, तस्मा गरूति वत्वा गारवयुत्तोति वुत्तन्ति केचि। वुत्तोयेव, न इध वत्तब्बो विसुद्धिमग्गस्स इमिस्सा अट्ठकथाय एकदेसभावतोति अधिप्पायो।
धम्मसरीरं पच्चक्खं करोतीति ‘‘यो वो, आनन्द, मया धम्मो च विनयो च देसितो पञ्ञत्तो , सो वो ममच्चयेन सत्था’’ति (दी॰ नि॰ २.२१६) वचनतो धम्मस्स सत्थुभावपरियायो विज्जतीति कत्वा वुत्तं। वजिरसङ्घातसमानकायो परेहि अभेज्जसरीरत्ता। न हि भगवतो रूपकाये केनचि सक्का अन्तरायो कातुन्ति। देसनासम्पत्तिं निद्दिसति वक्खमानस्स सकलसुत्तस्स एवन्ति निद्दिसनतो। सावकसम्पत्तिं निद्दिसति पटिसम्भिदापत्तेन पञ्चसु ठानेसु भगवता एतदग्गे ठपितेन मया महासावकेन सुतं, तञ्च खो मया सुतं, न अनुस्सुतिकं, न परम्पराभतन्ति इमस्स अत्थस्स दीपनतो। कालसम्पत्तिं निद्दिसति ‘‘भगवा’’ति पदस्स सन्निधाने पयुत्तस्स समयसद्दस्स कालस्स बुद्धुप्पादप्पटिमण्डितभावदीपनतो । बुद्धुप्पादपरमा हि कालसम्पदा। तेनेतं वुच्चति –
‘‘कप्पकसाये कलियुगे, बुद्धुप्पादो अहो महच्छरियं।
हुतावहमज्झे जातं, समुदितमकरन्दमरविन्द’’न्ति॥ (दी॰ नि॰ टी॰ १.१; सं॰ नि॰ टी॰ १.१.१ देवतासंयुत्त)।
भगवाति देसकसम्पत्तिं निद्दिसति गुणविसिट्ठसत्तुत्तमगरुगारवाधिवचनभावतो।
एवंनामके नगरेति कथं पनेतं नगरं एवंनामकं जातन्ति? वुच्चते, यथा काकन्दस्स इसिनो निवासट्ठाने मापिता नगरी काकन्दी, माकन्दस्स निवासट्ठाने मापिता माकन्दी, कुसम्बस्स निवासट्ठाने मापिता कोसम्बीति वुच्चति, एवं सवत्थस्स इसिनो निवासट्ठाने मापिता नगरी सावत्थीति वुच्चति। एवं ताव अक्खरचिन्तका वदन्ति। अट्ठकथाचरिया पन भणन्ति – ‘‘यं किञ्चि मनुस्सानं उपभोगपरिभोगं, सब्बमेत्थ अत्थी’’ति सावत्थि। सत्थसमायोगे च ‘किं भण्डमत्थी’ति पुच्छिते ‘सब्बमत्थी’ति वचनमुपादाय सावत्थि।
‘‘सब्बदा सब्बूपकरणं, सावत्थियं समोहितं।
तस्मा सब्बमुपादाय, सावत्थीति पवुच्चति॥ (म॰ नि॰ अट्ठ॰ १.१४; खु॰ पा॰ अट्ठ॰ ५.मङ्गलसुत्तवण्णना; उदा॰ अट्ठ॰ ५; पटि॰ म॰ २.१.१८४)।
‘‘कोसलानं पुरं रम्मं, दस्सनेय्यं मनोरमं।
दसहि सद्देहि अविवित्तं, अन्नपानसमायुतं॥
‘‘वुद्धिं वेपुल्लतं पत्तं, इद्धं फीतं मनोरमं।
आळकमन्दाव देवानं, सावत्थिपुरमुत्तम’’न्ति॥ (म॰ नि॰ अट्ठ॰ १.१४; खु॰ पा॰ अट्ठ॰ ५.मङ्गलसुत्तवण्णना)।
अविसेसेनाति न विसेसेन, विहारभावसामञ्ञेनाति अत्थो। इरियापथविहारो…पे॰… विहारेसूति इरियापथविहारो दिब्बविहारो ब्रह्मविहारो अरियविहारोति एतेसु चतूसु विहारेसु। समङ्गिपरिदीपनन्ति समङ्गिभावपरिदीपनं। एतन्ति विहरतीति एतं पदं। तथा हि तं ‘‘इधेकच्चो गिहिसंसट्ठो विहरति सहनन्दी सहसोकी’’तिआदीसु (सं॰ नि॰ ४.२४१) इरियापथविहारे आगतं, ‘‘यस्मिं समये, भिक्खवे, भिक्खु विविच्चेव कामेहि … पठमं झानं उपसम्पज्ज विहरती’’तिआदीसु (ध॰ स॰ ४९९; विभ॰ ६२४) दिब्बविहारे, ‘‘सो मेत्तासहगतेन चेतसा एकं दिसं फरित्वा विहरती’’तिआदीसु (दी॰ नि॰ १.५५६; ३.३०८; म॰ नि॰ १.७७, ४५९, ५०९; २.३०९, ३१५, ४५१, ४७१; ३.२३०, विभ॰ ६४२, ६४३) ब्रह्मविहारे, ‘‘सो खोहं, अग्गिवेस्सन, तस्सायेव कथाय परियोसाने तस्मिंयेव पुरिमस्मिं समाधिनिमित्ते अज्झत्तमेव चित्तं सण्ठपेमि सन्निसादेमि एकोदिं करोमि, समादहामि, येन सुदं निच्चकप्पं विहरामी’’तिआदीसु (म॰ नि॰ १.३८७) अरियविहारे।
तत्थ इरियनं पवत्तनं इरिया, कायप्पयोगो। तस्सा पवत्तनूपायभावतो ठानादि इरियापथो। ठानसमङ्गी वा हि कायेन किञ्चि करेय्य गमनादीसु अञ्ञतरसमङ्गी वा। अथ वा इरियति पवत्तति एतेन अत्तभावो, कायकिच्चं वाति इरिया, तस्सा पवत्तिया उपायभावतो पथोति इरियापथो, ठानादि एव। सो च अत्थतो गतिनिवत्तिआदिआकारेन पवत्तो चतुसन्ततिरूपप्पबन्धो एव। विहरणं, विहरति एतेनाति वा विहारो। दिवि भवो दिब्बो, तत्थ बहुलप्पवत्तिया ब्रह्मपारिसज्जादिदेवलोके भवोति अत्थो। तत्थ यो दिब्बानुभावो, तदत्थाय संवत्ततीति वा दिब्बो, अभिञ्ञाभिनीहारवसेन महागतिकत्ता वा दिब्बो, दिब्बो च सो विहारो चाति दिब्बविहारो, चतस्सो रूपावचरसमापत्तियो। अरूपसमापत्तियोपि एत्थेव सङ्गहं गच्छन्ति। ब्रह्मानं, ब्रह्मानो वा विहारा ब्रह्मविहारा, चतस्सो अप्पमञ्ञायो। अरियो, अरियानं वा विहारो अरियविहारो, चत्तारि सामञ्ञफलानि। सो हि एकं इरियापथबाधनन्तिआदि यदिपि भगवा एकेनपि इरियापथेन चिरतरं कालं अत्तभावं पवत्तेतुं सक्कोति, तथापि उपादिन्नकसरीरस्स अयं सभावोति दस्सेतुं वुत्तं। यस्मा वा भगवा यत्थ कत्थचि वसन्तो वेनेय्यानं धम्मं देसेन्तो नानासमापत्तीहि च कालं वीतिनामेन्तो वसतीति सत्तानं अत्तनो च विविधहितसुखं हरति उपनेति उप्पादेति, तस्मा विविधं हरतीति विहरतीति एवमेत्थ अत्थो वेदितब्बो।
जेतस्सराजकुमारस्साति एत्थ अत्तनो पच्चत्थिकजनं जिनातीति जेतो। सोतसद्दो विय हि कत्तुसाधनो जेतसद्दो। अथ वा रञ्ञा पसेनदिकोसलेन अत्तनो पच्चत्थिकजने जिते जातोति जेतो। रञ्ञो हि जयं आरोपेत्वा कुमारो जितवाति जेतोति वुत्तो। मङ्गलकामताय वा तस्स एवंनाममेव कतन्ति जेतो। मङ्गलकामताय हि जेय्योति एतस्मिं अत्थे जेतोति वुत्तं। वित्थारो पनातिआदिना ‘‘अनाथपिण्डिकस्स आरामे’’ति एत्थ सुदत्तो नाम सो, गहपति, मातापितूहि कतनामवसेन, सब्बकामसमिद्धताय पन विगतमच्छेरताय करुणादिगुणसमङ्गिताय च निच्चकालं अनाथानं पिण्डमदासि। तेन अनाथपिण्डिकोति सङ्खं गतो। आरमन्ति एत्थ पाणिनो, विसेसेन वा पब्बजिताति आरामो, तस्स पुप्फफलादिसोभाय नातिदूरनच्चासन्नतादिपञ्चविधसेनासनङ्गसम्पत्तिया च ततो ततो आगम्म रमन्ति अभिरमन्ति, अनुक्कण्ठिता हुत्वा निवसन्तीति अत्थो। वुत्तप्पकाराय वा सम्पत्तिया तत्थ तत्थ गतेपि अत्तनो अब्भन्तरंयेव आनेत्वा रमेतीति आरामो। सो हि अनाथपिण्डिकेन गहपतिना जेतस्स राजकुमारस्स हत्थतो अट्ठारसहिरञ्ञकोटीहि सन्थारेन किणित्वा अट्ठारसहिरञ्ञकोटीहि सेनासनानि कारापेत्वा अट्ठारसहिरञ्ञकोटीहि विहारमहं निट्ठापेत्वा एवं चतुपञ्ञासहिरञ्ञकोटिपरिच्चागेन बुद्धप्पमुखस्स भिक्खुसङ्घस्स निय्यातितो, तस्मा ‘‘अनाथपिण्डिकस्स आरामो’’ति वुच्चतीति इममत्थं निदस्सेति।
तत्थाति ‘‘एकं समयं भगवा सावत्थियं विहरति जेतवने अनाथपिण्डिकस्स आरामे’’ति यं वुत्तं वाक्यं, तत्थ। सियाति कस्सचि एवं परिवितक्को सिया, वक्खमानाकारेन कदाचि चोदेय्य वाति अत्थो। अथ तत्थ विहरतीति यदि जेतवने अनाथपिण्डिकस्स आरामे विहरति। न वत्तब्बन्ति नानाठानभूतत्ता सावत्थिजेतवनानं, ‘‘एकं समय’’न्ति च वुत्तत्ताति अधिप्पायो। इदानि चोदको तमेव अत्तनो अधिप्पायं ‘‘न हि सक्का’’तिआदिना विवरति। इतरो सब्बमेतं अविपरीतं अत्थं अजानन्तेन तया वुत्तन्ति दस्सेन्तो ‘‘न खो पनेतं एवं दट्ठब्ब’’न्तिआदिमाह। तत्थ एतन्ति ‘‘सावत्थियं विहरति जेतवने अनाथपिण्डिकस्स आरामे’’ति एतं वचनं। एवन्ति ‘‘यदि ताव भगवा’’तिआदिना यं तं भवता चोदितं, तं अत्थतो एवं न खो पन दट्ठब्बं, न उभयत्थ अपुब्बं अचरिमं विहारदस्सनत्थन्ति अत्थो। इदानि अत्तना यथाधिप्पेतं अविपरीतमत्थं, तस्स च पटिकच्चेव वुत्तभावं, तेन च अप्पटिविद्धतं पकासेन्तो ‘‘ननु अवोचुम्ह…पे॰… जेतवने’’ति आह। एवम्पि ‘‘जेतवने अनाथपिण्डिकस्स आरामे विहरति’’च्चेव वत्तब्बं, न ‘‘सावत्थिय’’न्ति चोदनं मनसि कत्वा वुत्तं – ‘‘गोचरगामनिदस्सनत्थ’’न्तिआदि।
अवस्सञ्चेत्थ गोचरगामकित्तनं कत्तब्बं। तथा हि तं यथा जेतवनादिकित्तनं पब्बजितानुग्गहकरणादिअनेकप्पयोजनं, एवं गोचरगामकित्तनम्पि गहट्ठानुग्गहकरणादिविविधपयोजनन्ति दस्सेन्तो ‘‘सावत्थिवचनेना’’तिआदिमाह। तत्थ पच्चयग्गहणेन उपसङ्कमपयिरुपासनानं ओकासदानेन धम्मदेसनाय सरणेसु सीलेसु च पतिट्ठापनेन यथूपनिस्सयं उपरिविसेसाधिगमावहनेन च गहट्ठानुग्गहकरणं, उग्गहपरिपुच्छानं कम्मट्ठानानुयोगस्स च अनुरूपवसनट्ठानपरिग्गहेनेत्थ पब्बजितानुग्गहकरणं वेदितब्बं। करुणाय उपगमनं, न लाभादिनिमित्तं। पञ्ञाय अपगमनं, न विरोधादिनिमित्तन्ति उपगमनापगमनानं निरुपक्किलेसतं विभावेति। धम्मिकसुखं नाम अनवज्जसुखं। देवतानं उपकारबहुलता जनविवित्तताय। पचुरजनविवित्तञ्हि ठानं देवा उपसङ्कमितब्बं मञ्ञन्ति। तदत्थपरिनिप्फादनन्ति लोकत्थनिप्फादनं, बुद्धकिच्चसम्पादनन्ति अत्थो। एवमादिनाति आदि-सद्देन सावत्थिकित्तनेन रूपकायस्स अनुग्गण्हनं दस्सेति, जेतवनादिकित्तनेन धम्मकायस्स। तथा पुरिमेन पराधीनकिरियाकरणं, दुतियेन अत्ताधीनकिरियाकरणं। पुरिमेन वा करुणाकिच्चं, इतरेन पञ्ञाकिच्चं। पुरिमेन चस्स परमाय अनुकम्पाय समन्नागमं, पच्छिमेन परमाय उपेक्खाय समन्नागमं दीपेति। भगवा हि सब्बसत्ते परमाय अनुकम्पाय अनुकम्पति, न च तत्थ सिनेहदोसानुपतितो परमुपेक्खकभावतो। उपेक्खको च न परहितसुखकरणे अप्पोस्सुक्को महाकारुणिकभावतो। तस्स महाकारुणिकताय लोकनाथता, उपेक्खकताय अत्तनाथता।
तथा हेस बोधिसत्तभूतो महाकरुणाय सञ्चोदितमानसो सकललोकहिताय उस्सुक्कमापन्नो महाभिनीहारतो पट्ठाय तदत्थनिप्फादनत्थं पुञ्ञञाणसम्भारे सम्पादेन्तो अपरिमितं कालं अनप्पकं दुक्खमनुभोसि, उपेक्खकताय सम्मा पतितेहि दुक्खेहि न विकम्पितता। महाकारुणिकताय संसाराभिमुखता, उपेक्खकताय ततो निब्बिन्दना। तथा उपेक्खकताय निब्बानाभिमुखता, महाकारुणिकताय तदधिगमो। तथा महाकारुणिकताय परेसं अहिंसापनं, उपेक्खकताय सयं परेहि अभायनं। महाकारुणिकताय परं रक्खतो अत्तनो रक्खणं, उपेक्खकताय अत्तानं रक्खतो परेसं रक्खणं। तेनस्स अत्तहिताय पटिपन्नादीसु चतुत्थपुग्गलभावो सिद्धो होति। तथा महाकारुणिकताय सच्चाधिट्ठानस्स च चागाधिट्ठानस्स च पारिपूरी, उपेक्खकताय उपसमाधिट्ठानस्स च पञ्ञाधिट्ठानस्स च पारिपूरी । एवं पुरिसुद्धासयप्पयोगस्स महाकारुणिकताय लोकहितत्थमेव रज्जसम्पदादिभवसम्पत्तिया उपगमनं, उपेक्खकताय तिणायपि अमञ्ञमानस्स ततो अपगमनं। इति सुविसुद्धउपगमापगमस्स महाकारुणिकताय लोकहितत्थमेव दानवसेन सम्पत्तीनं परिच्चजना, उपेक्खकताय चस्स फलस्स अत्तनो अपच्चासीसना। एवं समुदागमनतो पट्ठाय अच्छरियब्भुतगुणसमन्नागतस्स महाकारुणिकताय परेसं हितसुखत्थं अतिदुक्करकारिता, उपेक्खकताय कायम्पि अनलङ्कारिता।
तथा महाकारुणिकताय चरिमत्तभावे जिण्णातुरमतदस्सनेन सञ्जातसंवेगो, उपेक्खकताय उळारेसु देवभोगसदिसेसु भोगेसु निरपेक्खो महाभिनिक्खमनं निक्खमि। तथा महाकारुणिकताय ‘‘किच्छं वतायं लोको आपन्नो’’तिआदिना (दी॰ नि॰ २.५७; सं॰ नि॰ २.४, १०) करुणामुखेनेव विपस्सनारम्भो, उपेक्खकताय बुद्धभूतस्स सत्त सत्ताहानि विवेकसुखेनेव वीतिनामनं। महाकारुणिकताय धम्मगम्भीरतं पच्चवेक्खित्वा धम्मदेसनाय अप्पोस्सुक्कनं आपज्जित्वापि महाब्रह्मुनो अज्झेसनापदेसेन ओकासकरणं, उपेक्खकताय पञ्चवग्गियादिवेनेय्यानं अननुरूपसमुदाचारेपि अनञ्ञथाभावो। महाकारुणिकताय कत्थचि पटिघाताभावेनस्स सब्बत्थ अमित्तसञ्ञाभावो, उपेक्खकताय कत्थचिपि अनुरोधाभावेन सब्बत्थ सिनेहसन्थवाभावो। महाकारुणिकताय परेसं पसादना, उपेक्खकताय पसन्नाकारेहि न विकम्पना। महाकारुणिकताय धम्मानुरागाभावेन तत्थ आचरियमुट्ठिअभावो, उपेक्खकताय सावकानुरागाभावेन परिवारपरिकम्मताभावो। महाकारुणिकताय धम्मं देसेतुं परेहि संसग्गमुपगच्छतोपि उपेक्खकताय न तत्थ अभिरति। महाकारुणिकताय गामादीनं आसन्नट्ठाने वसतोपि उपेक्खकताय अरञ्ञट्ठाने एव विहरणं। तेन वुत्तं – ‘‘पुरिमेनस्स परमाय अनुकम्पाय समन्नागमं दीपेती’’ति।
तन्ति तत्राति पदं। ‘‘देसकालपरिदीपन’’न्ति ये देसकाला इध विहरणकिरियाविसेसनभावेन वुत्ता, तेसं परिदीपनन्ति दस्सेन्तो ‘‘यं समयं…पे॰… दीपेती’’ति आह। तं-सद्दो हि वुत्तस्स अत्थस्स पटिनिद्देसो, तस्मा इध कालस्स देसस्स वा पटिनिद्देसो भवितुमरहति, न अञ्ञस्स। अयं ताव तत्र-सद्दस्स पटिनिद्देसभावे अत्थविभावना। यस्मा पन ईदिसेसु ठानेसु तत्र-सद्दो धम्मदेसनाविसिट्ठं देसकालञ्च विभावेति, तस्मा वुत्तं – ‘‘भासितब्बयुत्ते वा देसकाले दीपेती’’ति। तेन तत्राति यत्र भगवा धम्मदेसनत्थं भिक्खू आलपति भासति, तादिसे देसे, काले वाति अत्थो। न हीतिआदिना तमेवत्थं समत्थेति। ननु च यत्थ ठितो भगवा ‘‘अकालो खो तावा’’तिआदिना बाहियस्स धम्मदेसनं पटिक्खिपि, तत्थेव अन्तरवीथियं ठितो तस्स धम्मं देसेसीति? सच्चमेतं, अदेसेतब्बकाले अदेसनाय इदं उदाहरणं। तेनेवाह – ‘‘अकालो खो तावा’’ति।
यं पन तत्थ वुत्तं – ‘‘अन्तरघरं पविट्ठम्हा’’ति, तम्पि तस्स अकालभावस्सेव परियायेन दस्सनत्थं वुत्तं। तस्स हि तदा अद्धानपरिस्समेन रूपकाये अकम्मञ्ञता अहोसि, बलवपीतिवेगेन नामकाये। तदुभयस्स वूपसमं आगमेन्तो पपञ्चपरिहारत्थं भगवा ‘‘अकालो खो’’ति परियायेन पटिक्खिपि। अदेसेतब्बदेसे अदेसनाय पन उदाहरणं ‘‘अथ खो भगवा मग्गा ओक्कम्म अञ्ञतरस्मिं रुक्खमूले निसीदि (सं॰ नि॰ २.१५४), विहारपच्छायायं पञ्ञत्ते आसने निसीदी’’ति (दी॰ नि॰ १.३६३) च एवमादिकं इध आदिसद्देन सङ्गहितं। ‘‘अथ खो सो, भिक्खवे, बालो इध पुब्बे नेसादो इध पापानि कम्मानि करित्वा’’तिआदीसु (म॰ नि॰ ३.२५१) पदपूरणमत्ते खो-सद्दो, ‘‘दुक्खं खो अगारवो विहरति अप्पतिस्सो’’तिआदीसु (अ॰ नि॰ ४.२१) अवधारणे, ‘‘कित्तावता नु खो, आवुसो, सत्थु पविवित्तस्स विहरतो सावका विवेकं नानुसिक्खन्ती’’तिआदीसु (म॰ नि॰ १.३१) आदिकालत्थे, वाक्यारम्भेति अत्थो। तत्थ पदपूरणेन वचनालङ्कारमत्तं कतं होति, आदिकालत्थेन वाक्यस्स उपञ्ञासमत्तं। अवधारणत्थेन पन नियमदस्सनं, तस्मा आमन्तेसि एवाति आमन्तने नियमो दस्सितो होति।
भगवाति लोकगरुदीपनन्ति कस्मा वुत्तं, ननु पुब्बेपि भगवासद्दस्स अत्थो वुत्तोति? यदिपि वुत्तो, तं पनस्स यथावुत्ते ठाने विहरणकिरियाय कत्तु विसेसदस्सनत्थं कतं, न आमन्तनकिरियाय, इध पन आमन्तनकिरियाय, तस्मा तदत्थं पुन ‘‘भगवा’’ति पाळियं वुत्तन्ति तस्सत्थं दस्सेतुं ‘‘भगवाति लोकगरुदीपन’’न्ति आह। तेन लोकगरुभावतो तदनुरूपं पटिपत्तिं पत्थेन्तो अत्तनो सन्तिकं उपगतानं भिक्खूनं अज्झासयानुरूपं धम्मं देसेतुं ते आमन्तेसीति दस्सेति। कथासवनयुत्तपुग्गलवचनन्ति वक्खमानाय चित्तपरियादानदेसनाय सवनयोग्गपुग्गलवचनं। चतूसुपि परिसासु भिक्खू एव एदिसानं देसनानं विसेसेन भाजनभूताति सातिसयं सासनसम्पटिग्गाहकभावदस्सनत्थं इध भिक्खुग्गहणन्ति दस्सेत्वा इदानि सद्दत्थं दस्सेतुं ‘‘अपिचा’’तिआदिमाह। तत्थ भिक्खकोति भिक्खूति भिक्खनधम्मताय भिक्खूति अत्थो। भिक्खाचरियं अज्झुपगतोति बुद्धादीहि अज्झुपगतं भिक्खाचरियं, उञ्छाचरियं, अज्झुपगतत्ता अनुट्ठितत्ता भिक्खु। यो हि अप्पं वा महन्तं वा भोगक्खन्धं पहाय अगारस्मा अनगारियं पब्बजितो, सो कसिगोरक्खादिजीविकाकप्पनं हित्वा लिङ्गसम्पटिच्छनेनेव भिक्खाचरियं अज्झुपगतत्ता भिक्खु, परप्पटिबद्धजीविकत्ता वा विहारमज्झे काजभत्तं भुञ्जमानोपि भिक्खाचरियं अज्झुपगतोति भिक्खु, पिण्डियालोपभोजनं निस्साय पब्बज्जाय उस्साहजातत्ता वा भिक्खाचरियं अज्झुपगतोति भिक्खूति एवमेत्थ अत्थो दट्ठब्बो। आदिना नयेनाति ‘‘छिन्नभिन्नपटधरोति भिक्खु, भिन्दति पापके अकुसले धम्मेति भिक्खु, भिन्नत्ता पापकानं अकुसलानं धम्मानं भिक्खू’’तिआदिना (विभ॰ ५१०) विभङ्गे आगतनयेन। ञापनेति अवबोधने, पटिवेदनेति अत्थो।
भिक्खनसीलताति भिक्खनेन जीवनसीलता, न कसिवाणिज्जादिना जीवनसीलता। भिक्खनधम्मताति ‘‘उद्दिस्स अरिया तिट्ठन्ती’’ति (जा॰ १.७.५९) एवं वुत्ता भिक्खनसभावता, न याचनकोहञ्ञसभावता। भिक्खने साधुकारिताति ‘‘उत्तिट्ठे नप्पमज्जेय्या’’ति (ध॰ प॰ १६८) वचनं अनुस्सरित्वा तत्थ अप्पमज्जना। अथ वा सीलं नाम पकतिसभावो, इध पन तदधिट्ठानं। धम्मोति वतं। साधुकारिताति सक्कच्चकारिता आदरकिरिया। हीनाधिकजनसेवितन्ति ये भिक्खुभावे ठितापि जातिमदादिवसेन उद्धता उन्नळा, ये च गिहिभावे परेसं अधिकभावम्पि अनुपगतत्ता भिक्खाचरियं परमकारुञ्ञतं मञ्ञन्ति, तेसं उभयेसम्पि यथाक्कमं ‘‘भिक्खवो’’ति वचनेन हीनजनेहि दलिद्देहि परमकारुञ्ञतं पत्तेहि परकुलेसु भिक्खाचरियाय जीविकं कप्पेन्तेहि सेवितं वुत्तिं पकासेन्तो उद्धतभावनिग्गहं करोति। अधिकजनेहि उळारभोगखत्तियकुलादितो पब्बजितेहि बुद्धादीहि आजीवविसोधनत्थं सेवितं वुत्तिं पकासेन्तो दीनभावनिग्गहं करोतीति योजेतब्बं। यस्मा ‘‘भिक्खवो’’ति वचनं आमन्तनभावतो अभिमुखीकरणं, पकरणतो सामत्थियतो च सुस्सुसाजननं सक्कच्चसवनमनसिकारनियोजनञ्च होति, तस्मा तमत्थं दस्सेन्तो ‘‘भिक्खवोति इमिना’’तिआदिमाह। तत्थ साधुकं सवनमनसिकारेति साधुकसवने साधुकमनसिकारे च। कथं पन पवत्तिता सवनादयो साधुकं पवत्तिता होन्तीति? ‘‘अद्धा इमाय सम्मापटिपत्तिया सकलसासनसम्पत्ति हत्थगता भविस्सती’’ति आदरगारवयोगेन कथादीसु अपरिभवादिना च। वुत्तञ्हि ‘‘पञ्चहि, भिक्खवे, धम्मेहि समन्नागतो सुणन्तो सद्धम्मं भब्बो नियामं ओक्कमितुं कुसलेसु धम्मेसु सम्मत्तं। कतमेहि पञ्चहि? कथं न परिभोति, कथितं न परिभोति, न अत्तानं परिभोति, अविक्खित्तचित्तो धम्मं सुणाति एकग्गचित्तो, योनिसो च मनसिकरोति। इमेहि खो, भिक्खवे, पञ्चहि धम्मेहि समन्नागतो सुणन्तो सद्धम्मं भब्बो नियामं ओक्कमितुं कुसलेसु धम्मेसु सम्मत्त’’न्ति (अ॰ नि॰ ५.१५१)। तेनेवाह – ‘‘साधुकं सवनमनसिकारायत्ता हि सासनसम्पत्ती’’ति।
पुब्बे सब्बपरिसासाधारणत्तेपि भगवतो धम्मदेसनाय ‘‘जेट्ठसेट्ठा’’तिआदिना भिक्खूनं एव आमन्तने कारणं दस्सेत्वा इदानि भिक्खू आमन्तेत्वाव धम्मदेसनाय पयोजनं दस्सेतुं ‘‘किमत्थं पन भगवा’’ति चोदनं समुट्ठापेति। तत्थ अञ्ञं चिन्तेन्ताति अञ्ञविहिता। विक्खित्तचित्ताति असमाहितचित्ता। धम्मं पच्चवेक्खन्ताति हिय्यो ततो परं दिवसेसु वा सुतधम्मं पति पति मनसा अवेक्खन्ता। भिक्खू आमन्तेत्वा धम्मे देसियमाने आदितो पट्ठाय देसनं सल्लक्खेतुं सक्कोन्तीति इममत्थं ब्यतिरेकमुखेन दस्सेतुं ‘‘ते अनामन्तेत्वा’’तिआदि वुत्तं।
भिक्खवोति चेत्थ सन्धिवसेन इ-कारलोपो दट्ठब्बो। भिक्खवो इतीति अयं इति-सद्दो हेतुपरिसमापनादिअत्थपदत्थविपरियायपकारावधारणनिदस्सनादिअनेकत्थप्पभेदो। तथा हेस ‘‘रुप्पतीति खो, भिक्खवे, तस्मा रूपन्ति वुच्चती’’तिआदीसु (सं॰ नि॰ ३.७९) हेत्वत्थे दिस्सति। ‘‘तस्मातिह मे, भिक्खवे, धम्मदायादा भवथ, मा आमिसदायादा। अत्थि मे तुम्हेसु अनुकम्पा। किन्ति मे सावका धम्मदायादा भवेय्युं, नो आमिसदायादा’’तिआदीसु (म॰ नि॰ १.१९) परिसमापने। ‘‘इति वा इति एवरूपा नच्चगीतवादितविसूकदस्सना पटिविरतो’’तिआदीसु (दी॰ नि॰ १.१३) आदिअत्थे। ‘‘मागण्डियोति तस्स ब्राह्मणस्स सङ्खा समञ्ञा पञ्ञत्ति वोहारो नामं नामकम्मं नामधेय्यं निरुत्ति ब्यञ्जनमभिलापो’’तिआदीसु (महानि॰ ७३, ७५) पदत्थविपरियाये। ‘‘इति खो, भिक्खवे, सप्पटिभयो बालो, अप्पटिभयो पण्डितो, सउपद्दवो बालो, अनुपद्दवो पण्डितो, सउपसग्गो बालो, अनुपसग्गो पण्डितो’’तिआदीसु (म॰ नि॰ ३.१२४) पकारे। ‘‘अत्थि इदप्पच्चया जरामरणन्ति पुट्ठेन सता, ‘आनन्द, अत्थी’तिस्स वचनीयं। ‘किं पच्चया जरामरण’न्ति इति चे वदेय्य। जातिपच्चया जरामरणं इच्चस्स वचनीय’’न्तिआदीसु (दी॰ नि॰ २.९६) अवधारणे। ‘‘अत्थीति खो, कच्चान, अयमेको अन्तो, नत्थीति खो, कच्चान, अयं दुतियो अन्तो’’तिआदीसु (सं॰ नि॰ २.१५; सं॰ नि॰ ३.९०) निदस्सने। इधापि निदस्सने एव दट्ठब्बो। भिक्खवोति हि आमन्तनाकारो। तमेस इति-सद्दो निदस्सेति ‘‘भिक्खवोति आमन्तेसी’’ति। इमिना नयेन ‘‘भद्दन्ते’’तिआदीसुपि यथारहं इति-सद्दस्स अत्थो वेदितब्बो। पुब्बे ‘‘भगवा आमन्तेसी’’ति वुत्तत्ता ‘‘भगवतो पच्चस्सोसु’’न्ति इध ‘‘भगवतो’’ति सामिवचनं आमन्तनमेव सम्बन्धिअन्तरं अपेक्खतीति इमिना अधिप्पायेन ‘‘भगवतो आमन्तनं पटिअस्सोसु’’न्ति वुत्तं। ‘‘भगवतो’’ति पन इदं पटिस्सवसम्बन्धेन सम्पदानवचनं यथा ‘‘देवदत्ताय पटिस्सुणोती’’ति। यं निदानं भासितन्ति सम्बन्धो। इमस्स सुत्तस्स सुखावगाहणत्थन्ति कमलकुवलयुज्जलविमलसादुरससलिलाय पोक्खरणिया सुखावतरणत्थं निम्मलसिलातलरचनाविलाससोभितरतनसोपानं विप्पकिण्णमुत्तातलसदिसवालुकाचुण्णपण्डरभूमिभागं तित्थं विय सुविभत्तभित्तिविचित्रवेदिकापरिक्खित्तस्स नक्खत्तपथं फुसितुकामताय विय पटिविजम्भितसमुस्सयस्स पासादवरस्स सुखारोहनत्थं दन्तमयसण्हमुदुफलकञ्चनलताविनद्धमणिगणप्पभासमुदयुज्जलसोभं सोपानं विय सुवण्णवलयनूपुरादिसङ्घट्टनसद्दसम्मिस्सितस्स कथितहसितमधुरस्सरगेहजनविजम्भितविचरितस्स उळारइस्सरियविभवसोभितस्स महाघरस्स सुखप्पवेसनत्थं सुवण्णरजतमणिमुत्तापवाळादिजुतिविस्सरविज्जोतितसुप्पतिट्ठितविसालद्वारबाहं महाद्वारं विय च अत्थब्यञ्जनसम्पन्नस्स बुद्धानं देसनाञाणगम्भीरभावसंसूचकस्स इमस्स सुत्तस्स सुखावगाहत्थं।
एत्थाह – ‘‘किमत्थं पन धम्मविनयसङ्गहे कयिरमाने निदानवचनं, ननु भगवता भासितवचनस्सेव सङ्गहो कातब्बो’’ति? वुच्चते, देसनाय ठितिअसम्मोससद्धेय्यभावसम्पादनत्थं। कालदेसदेसकनिमित्तपरिसापदेसेहि उपनिबन्धित्वा ठपिता हि देसना चिरट्ठितिका होति असम्मोसधम्मा सद्धेय्या च। देसकालकत्तुहेतुनिमित्तेहि उपनिबद्धो विय वोहारविनिच्छयो। तेनेव च आयस्मता महाकस्सपेन ‘‘चित्तपरियादानसुत्तं, आवुसो आनन्द, कत्थ भासित’’न्तिआदिना देसादिपुच्छासु कतासु तासं विस्सज्जनं करोन्तेन धम्मभण्डागारिकेन ‘‘एवं मे सुत’’न्तिआदिना इमस्स सुत्तस्स निदानं भासितं। अपिच सत्थुसम्पत्तिप्पकासनत्थं निदानवचनं। तथागतस्स हि भगवतो पुब्बचरणानुमानागमतक्काभावतो सम्मासम्बुद्धभावसिद्धि। न हि सम्मासम्बुस्स पुब्बचरणादीहि अत्थो अत्थि सब्बत्थ अप्पटिहतञाणचारताय एकप्पमाणत्ता च ञेय्यधम्मेसु। तथा आचरियमुट्ठिधम्ममच्छरियसासनसावकानानुरागाभावतो खीणासवभावसिद्धि। न हि सब्बसो खीणासवस्स ते सम्भवन्तीति सुविसुद्धस्स परानुग्गहप्पवत्ति। एवं देसकसंकिलेसभूतानं दिट्ठिसीलसम्पदादूसकानं अविज्जातण्हानं अच्चन्ताभावसंसूचकेहि ञाणप्पहानसम्पदाभिब्यञ्जनकेहि च सम्बुद्धविसुद्धभावेहि पुरिमवेसारज्जद्वयसिद्धि, ततो च अन्तरायिकनिय्यानिकधम्मेसु सम्मोहाभावसिद्धितो पच्छिमवेसारज्जद्वयसिद्धीति भगवतो चतुवेसारज्जसमन्नागमो अत्तहितपरहितप्पटिपत्ति च निदानवचनेन पकासिता होति। तत्थ तत्थ सम्पत्तपरिसाय अज्झासयानुरूपं ठानुप्पत्तिकप्पटिभानेन धम्मदेसनादीपनतो, इध पन रूपगरुकानं पुग्गलानं अज्झासयानुरूपं ठानुप्पत्तिकप्पटिभानेन धम्मदेसनादीपनतोति योजेतब्बं। तेन वुत्तं – ‘‘सत्थुसम्पत्तिप्पकासनत्थं निदानवचन’’न्ति।
तथा सासनसम्पत्तिप्पकासनत्थं निदानवचनं। ञाणकरुणापरिग्गहितसब्बकिरियस्स हि भगवतो नत्थि निरत्थका पटिपत्ति, अत्तहितत्था वा। तस्मा परेसं एव अत्थाय पवत्तसब्बकिरियस्स सम्मासम्बुद्धस्स सकलम्पि कायवचीमनोकम्मं यथापवत्तं वुच्चमानं दिट्ठधम्मिकसम्परायिकपरमत्थेहि यथारहं सत्तानं अनुसासनट्ठेन सासनं, न कप्परचना। तयिदं सत्थुचरितं कालदेसदेसकपरिसापदेसेहि सद्धिं तत्थ तत्थ निदानवचनेहि यथारहं पकासीयति। ‘‘इध पन रूपगरुकानं पुग्गलान’’न्तिआदि सब्बं पुरिमसदिसमेव। तेन वुत्तं – ‘‘सासनसम्पत्तिप्पकासनत्थं निदानवचन’’न्ति। अपिच सत्थुनो पमाणभावप्पकासनेन वचनेन सासनस्स पमाणभावदस्सनत्थं निदानवचनं, तञ्च देसकप्पमाणभावदस्सनं हेट्ठा वुत्तनयानुसारेन ‘‘भगवा’’ति च इमिना पदेन विभावितन्ति वेदितब्बं। भगवाति हि तथागतस्स रागदोसमोहादिसब्बकिलेसमलदुच्चरितदोसप्पहानदीपनेन वचनेन अनञ्ञसाधारणसुपरिसुद्धञाणकरुणादिगुणविसेसयोगपरिदीपनेन ततो एव सब्बसत्तुत्तमभावदीपनेन अयमत्थो सब्बथा पकासितो होतीति। इदमेत्थ निदानवचनप्पयोजनस्स मुखमत्तनिदस्सनं।
निक्खित्तस्साति देसितस्स। देसना हि देसेतब्बस्स सीलादिअत्थस्स वेनेय्यसन्तानेसु निक्खिपनतो ‘‘निक्खेपो’’ति वुच्चति। सुत्तनिक्खेपं विचारेत्वाव वुच्चमाना पाकटा होतीति सामञ्ञतो भगवतो देसनाय समुट्ठानस्स विभागं दस्सेत्वा ‘‘एत्थायं देसना एवंसमुट्ठाना’’ति देसनाय समुट्ठाने दस्सिते सुत्तस्स सम्मदेव निदानपरिजाननेन वण्णनाय सुविञ्ञेय्यत्ता वुत्तं। तत्थ यथा अनेकसतअनेकसहस्सभेदानिपि सुत्तन्तानि संकिलेसभागियादिपट्ठाननयवसेन सोळसविधतं नातिवत्तन्ति, एवं अत्तज्झासयादिसुत्तनिक्खेपवसेन चतुब्बिधभावन्ति आह – ‘‘चत्तारो हि सुत्तनिक्खेपा’’ति। एत्थ च यथा अत्तज्झासयस्स अट्ठुप्पत्तिया च परज्झासयपुच्छाहि सद्धिं संसग्गभेदो सम्भवति ‘‘अत्तज्झासयो च परज्झासयो च, अत्तज्झासयो च पुच्छावसिको च, अट्ठुप्पत्तिको च परज्झासयो च, अट्ठुप्पत्तिको च पुच्छावसिको चा’’ति अज्झासयपुच्छानुसन्धिसब्भावतो, एवं यदिपि अट्ठुप्पत्तिया अत्तज्झासयेनपि संसग्गभेदो सम्भवति, अत्तज्झासयादीहि पन पुरतो ठितेहि अट्ठुप्पत्तिया संसग्गो नत्थीति न इध निरवसेसो वित्थारनयो सम्भवतीति ‘‘चत्तारो सुत्तनिक्खेपा’’ति वुत्तं। तदन्तोगधत्ता वा सेसनिक्खेपानं मूलनिक्खेपवसेन चत्तारोव दस्सिता। यथादस्सनञ्हेत्थ अयं संसग्गभेदो गहेतब्बोति।
तत्रायं वचनत्थो – निक्खिपीयतीति निक्खेपो, सुत्तं एव निक्खेपो सुत्तनिक्खेपो। अथ वा निक्खिपनं निक्खेपो, सुत्तस्स निक्खेपो सुत्तनिक्खेपो, सुत्तदेसनाति अत्थो। अत्तनो अज्झासयो अत्तज्झासयो, सो अस्स अत्थि कारणभूतोति अत्तज्झासयो। अत्तनो अज्झासयो एतस्साति वा अत्तज्झासयो। परज्झासयेपि एसेव नयो। पुच्छाय वसो पुच्छावसो, सो एतस्स अत्थीति पुच्छावसिको। सुत्तदेसनावत्थुभूतस्स अत्थस्स उप्पत्ति अत्थुप्पत्ति, अत्थुप्पत्तियेव अट्ठुप्पत्ति त्थ-कारस्स ट्ठ-कारं कत्वा। सा एतस्स अत्थीति अट्ठुप्पत्तिको। अथ वा निक्खिपीयति सुत्तं एतेनाति सुत्तनिक्खेपो, अत्तज्झासयादि एव। एतस्मिं अत्थविकप्पे अत्तनो अज्झासयो अत्तज्झासयो। परेसं अज्झासयो परज्झासयो। पुच्छीयतीति पुच्छा, पुच्छितब्बो अत्थो। पुच्छावसेन पवत्तं धम्मप्पटिग्गाहकानं वचनं पुच्छावसिकं, तदेव निक्खेपसद्दापेक्खाय पुल्लिङ्गवसेन वुत्तं – ‘‘पुच्छावसिको’’ति। तथा अट्ठुप्पत्ति एव अट्ठुप्पत्तिकोति एवमेत्थ अत्थो वेदितब्बो।
अपिचेत्थ परेसं इन्द्रियपरिपाकादिकारणनिरपेक्खत्ता अत्तज्झासयस्स विसुं सुत्तनिक्खेपभावो युत्तो केवलं अत्तनो अज्झासयेनेव धम्मतन्तिट्ठपनत्थं पवत्तितदेसनत्ता। परज्झासयपुच्छावसिकानं पन परेसं अज्झासयपुच्छानं देसनापवत्तिहेतुभूतानं उप्पत्तियं पवत्तितानं कथमट्ठुप्पत्तिया अनवरोधो, पुच्छावसिकअट्ठुप्पत्तिकानं वा परज्झासयानुरोधेन पवत्तितानं कथं परज्झासये अनवरोधोति? न चोदेतब्बमेतं। परेसञ्हि अभिनीहारपरिपुच्छादिविनिमुत्तस्सेव सुत्तदेसनाकारणुप्पादस्स अट्ठुप्पत्तिभावेन गहितत्ता परज्झासयपुच्छावसिकानं विसुं गहणं। तथा हि ब्रह्मजालधम्मदायादसुत्तादीनं वण्णावण्णआमिसुप्पादादिदेसनानिमित्तं ‘‘अट्ठुप्पत्ती’’ति वुच्चति। परेसं पुच्छं विना अज्झासयं एव निमित्तं कत्वा देसितो परज्झासयो, पुच्छावसेन देसितो पुच्छावसिकोति पाकटोयमत्थोति। अत्तनो अज्झासयेनेव कथेसीति धम्मतन्तिट्ठपनत्थं कथेसि। विमुत्तिपरिपाचनीया धम्मा सद्धिन्द्रियादयो। अज्झासयन्ति अधिमुत्तिं। खन्तिन्ति दिट्ठिनिज्झानक्खन्तिं। मनन्ति पञ्ञत्तिचित्तं। अभिनीहारन्ति पणिधानं। बुज्झनभावन्ति बुज्झनसभावं, पटिविज्झनाकारं वा। रूपगरुकानन्ति पञ्चसु आरम्मणेसु रूपारम्मणगरुका रूपगरुका। चित्तेन रूपनिन्ना रूपपोणा रूपपब्भारा रूपदस्सनप्पसुता रूपेन आकड्ढितहदया, तेसं रूपगरुकानं।
पटिसेधत्थोति पटिक्खेपत्थो। कस्स पन पटिक्खेपत्थोति? किरियापधानञ्हि वाक्यं, तस्मा ‘‘न समनुपस्सामी’’ति समनुपस्सनाकिरियापटिसेधत्थो। तेनाह – ‘‘इमस्स पन पदस्सा’’तिआदि। यो परो न होति, सो अत्ताति लोकसमञ्ञामत्तसिद्धं सत्तसन्तानं सन्धाय – ‘‘अह’’न्ति सत्था वदति, न बाहिरकपरिकप्पितं अहंकारविसयं अहंकारस्स बोधिमूलेयेव समुच्छिन्नत्ता। लोकसमञ्ञानतिक्कमन्ता एव हि बुद्धानं लोकिये विसये देसनापवत्ति। भिक्खवेति आलपने कारणं हेट्ठा वुत्तमेव। अञ्ञन्ति अपेक्खासिद्धत्ता अञ्ञत्थस्स ‘‘इदानि वत्तब्बइत्थिरूपतो अञ्ञ’’न्ति आह। एकम्पि रूपन्ति एकं वण्णायतनं। समं विसमं सम्मा याथावतो अनु अनु पस्सतीति समनुपस्सना, ञाणं। संकिलिस्सनवसेन अनु अनु पस्सतीति समनुपस्सना, दिट्ठि। नो निच्चतोति एत्थ इति-सद्दो आदिअत्थो, एवमादिकोति अत्थो। तेन ‘‘दुक्खतो समनुपस्सती’’ति एवमादीनि सङ्गण्हाति। ओलोकेन्तोपीति देवमनुस्सविमानकप्परुक्खमणिकनकादिगतानि रूपानि अनवसेसं सब्बञ्ञुतञ्ञाणेन ओलोकेन्तोपि। सामञ्ञवचनोपि यं-सद्दो ‘‘एकरूपम्पी’’ति रूपस्स अधिगतत्ता रूपविसयो इच्छितोति ‘‘यं रूप’’न्ति वुत्तं। तथा पुरिससद्दो परियादियितब्बचित्तपुग्गलविसयोति रूपगरुकस्साति विसेसितं। गहणं ‘‘खेपन’’न्ति च अधिप्पेतं, परियादानञ्च उप्पत्तिनिवारणन्ति आह – ‘‘चतुभूमककुसलचित्त’’न्ति। तञ्हि रूपं तादिसस्स परित्तकुसलस्सपि उप्पत्तिं निवारेति, किमङ्गं पन महग्गतानुत्तरचित्तस्साति लोकुत्तरकुसलचित्तस्सपि उप्पत्तिया निवारणं होतुं समत्थं, लोकियकुसलुप्पत्तिया निवारकत्ते वत्तब्बमेव नत्थीति ‘‘चतुभूमककुसलचित्तं परियादियित्वा’’ति वुत्तं। न हि कामगुणस्सादप्पसुतस्स पुरिसस्स दानादिवसेन सविप्फारिका कुसलुप्पत्ति सम्भवति। गण्हित्वा खेपेत्वाति अत्तानं अस्सादेत्वा पवत्तमानस्स अकुसलचित्तस्स पच्चयो होन्तं पवत्तिनिवारणेन मुट्ठिगतं विय गहेत्वा अनुप्पादनिरोधेन खेपेत्वा विय तिट्ठति। ताव महति लोकसन्निवासे तस्स परियादियट्ठानं अविच्छेदतो लब्भतीति आह – ‘‘तिट्ठती’’ति यथा ‘‘पब्बता तिट्ठन्ति, नज्जो सन्दन्ती’’ति। तेनाह – ‘‘इध उभयम्पि वट्टती’’तिआदि।
यथयिदन्ति सन्धिवसेन आकारस्स रस्सत्तं यकारागमो चाति आह – ‘‘यथा इद’’न्ति। इत्थिया रूपन्ति इत्थिसरीरगतं तप्पटिबद्धञ्च रूपायतनं। परमत्थस्स निरुळ्हो, पठमं साधारणतो सद्दसत्थलक्खणानि विभावेतब्बानि, पच्छा असाधारणतोति तानि पाळिवसेन विभावेतुं – ‘‘रुप्पतीति खो…पे॰… वेदितब्ब’’न्ति आह। तत्थ रुप्पतीति सीतादिविरोधिपच्चयेहि विकारं आपादीयति, आपज्जतीति वा अत्थो। विकारुप्पत्ति च विरोधिपच्चयसन्निपाते विसदिसुप्पत्ति विभूततरा, कुतो पनायं विसेसोति चे? ‘‘सीतेना’’तिआदिवचनतो। एवञ्च कत्वा वेदनादीसु अनवसेसरूपसमञ्ञा सामञ्ञलक्खणन्ति सब्बरूपधम्मसाधारणं रूप्पनं। इदानि अत्थुद्धारनयेन रूपसद्दं संवण्णेन्तो ‘‘अयं पना’’तिआदिमाह। रूपक्खन्धे वत्ततीति ‘‘ओळारिकं वा सुखुमं वा’’तिआदिवचनतो (म॰ नि॰ १.३६१; २.११३; ३.८६, ८९; विभ॰ २)। रूपूपपत्तियाति एत्थ रूपभवो रूपं उत्तरपदलोपेन। रूपभवूपपत्तियाति अयञ्हेत्थ अत्थो। कसिणनिमित्तेति पथवीकसिणादिसञ्ञिते पटिभागनिमित्ते। रूप्पति अत्तनो फलस्स सभावं करोतीति रूपं, सभावहेतूति आह – ‘‘सरूपा…पे॰… एत्थ पच्चये’’ति। करचरणादिअवयवसङ्घातभावेन रूपीयति निरूपीयतीति रूपं, रूपकायोति आह – ‘‘आकासो…पे॰… एत्थ सरीरे’’ति।
रूपयति वण्णविकारं आपज्जमानं हदयङ्गतभावं पकासेतीति रूपं, वण्णायतनं। आरोहपरिणाहादिभेदरूपगतं सण्ठानसम्पत्तिं निस्साय पसादं आपज्जमानो रूपप्पमाणोति वुत्तोति आह – ‘‘एत्थ सण्ठाने’’ति। पियरूपन्तिआदीसु सभावत्थो रूपसद्दो। आदिसद्देन रूपज्झानादीनं सङ्गहो। ‘‘रूपी रूपानि पस्सती’’ति एत्थ अज्झत्तं केसादीसु परिकम्मसञ्ञावसेन पटिलद्धरूपज्झानं रूपं, तं अस्स अत्थीति रूपीति वुत्तो। इत्थिया चतुसमुट्ठाने वण्णेति इत्थिसरीरपरियापन्नमेव रूपं गहितं, तप्पटिबद्धवत्थालङ्कारादिरूपम्पि पन पुरिसचित्तस्स परियादायकं होतीति दस्सेतुं – ‘‘अपिचा’’तिआदि वुत्तं। गन्धवण्णग्गहणेन विलेपनं वुत्तं। कामं ‘‘असुकाय इत्थिया पसाधन’’न्ति सल्लक्खितस्स अकायप्पटिबद्धस्सपि वण्णो पटिबद्धचित्तस्स पुरिसस्स चित्तं परियादाय तिट्ठेय्य, तं पन न एकन्तिकन्ति एकन्तिकं दस्सेन्तो ‘‘कायप्पटिबद्धो’’तिआह। उपकप्पतीति चित्तस्स परियादानाय उपकप्पति। पुरिमस्सेवाति पुब्बे वुत्तअत्थस्सेव दळ्हीकरणत्थं वुत्तं यथा ‘‘द्विक्खत्तुं बन्धं सुबन्ध’’न्ति। निगमनवसेन वा एतं वुत्तन्ति दट्ठब्बं। ओपम्मवसेन वुत्तन्ति ‘‘यं एवं पुरिसस्स चित्तं परियादाय तिट्ठती’’ति सकलमेविदं पुरिमवचनं उपमावसेन वुत्तं, तत्थ पन उपमाभूतं अत्थं दस्सेतुं – ‘‘यथयिदं…पे॰… इत्थिरूप’’न्ति वुत्तं। परियादाने आनुभावो सम्भवो परियादानानुभावो, तस्स दस्सनवसेन वुत्तं।
इदं पन ‘‘इत्थिरूप’’न्तिआदिवचनं परियादानानुभावे साधेतब्बे दीपेतब्बे वत्थु कारणं। नागो नाम सो राजा, दीघदाठिकत्ता पन ‘‘महादाठिकनागराजा’’ति वुत्तो। असंवरनियामेनाति चक्खुद्वारिकेन असंवरनीहारेन। निमित्तं गहेत्वाति रागुप्पत्तिहेतुभूतं रूपं सुभनिमित्तं गहेत्वा। विसिकादस्सनं गन्त्वाति सिवथिकदस्सनं गन्त्वा। तत्थ हि आदीनवानुपस्सना इज्झति। वत्थुलोभेन कुतो तादिसाय मरणन्ति असद्दहन्तो ‘‘मुखं तुम्हाकं धूमवण्ण’’न्ति ते दहरसामणेरे उप्पण्डेन्तो वदति।
रतनत्तये सुप्पसन्नत्ता काकवण्णतिस्सादीहि विसेसनत्थञ्च सो तिस्समहाराजा सद्धासद्देन विसेसेत्वा वुच्चति। दहरस्स चित्तं परियादायतिट्ठतीति अधिकारवसेन वुत्तं। निट्ठितुद्देसकिच्चोति गामे असप्पायरूपदस्सनं इमस्स अनत्थाय सियाति आचरियेन निवारितगामप्पवेसो पच्छा निट्ठितुद्देसकिच्चो हुत्वा ठितो। तेन वुत्तं – ‘‘अत्थकामानं वचनं अग्गहेत्वा’’ति । निवत्थवत्थं सञ्जानित्वाति अत्तना दिट्ठदिवसे निवत्थवत्थं तस्सा मतदिवसे सिवथिकदस्सनत्थं गतेन लद्धं सञ्जानित्वा। एवम्पीति एवं मरणसम्पापनवसेनपि। अयं तावेत्थ अट्ठकथाय अनुत्तानत्थदीपना।
नेत्तिनयवण्णना
इदानि पकरणनयेन पाळिया अत्थवण्णनं करिस्साम। सा पन अत्थसंवण्णना यस्मा देसनाय समुट्ठानप्पयोजनभाजनेसु पिण्डत्थेसु च निद्धारितेसु सुकरा होति सुविञ्ञेय्या च, तस्मा सुत्तदेसनाय समुट्ठानादीनि पठमं निद्धारयिस्साम। तत्थ समुट्ठानं नाम देसनानिदानं, तं साधारणमसाधारणन्ति दुविधं। तत्थ साधारणम्पि अज्झत्तिकबाहिरभेदतो दुविधं। तत्थ साधारणं अज्झत्तिकसमुट्ठानं नाम लोकनाथस्स महाकरुणा। ताय हि समुस्साहितस्स भगवतो वेनेय्यानं धम्मदेसनाय चित्तं उदपादि, यं सन्धाय वुत्तं – ‘‘सत्तेसु च कारुञ्ञतं पटिच्च बुद्धचक्खुना लोकं वोलोकेसी’’तिआदि (म॰ नि॰ १.२८३; महाव॰ ९; सं॰ नि॰ १.१७३)। एत्थ च हेतावत्थायपि महाकरुणाय सङ्गहो दट्ठब्बो यावदेव संसारमहोघतो सद्धम्मदेसनाहत्थदानेहि सत्तसन्तारणत्थं तदुप्पत्तितो। यथा च महाकरुणा, एवं सब्बञ्ञुतञ्ञाणं दसबलञाणादयो च देसनाय अब्भन्तरसमुट्ठानभावेन वत्तब्बा। सब्बञ्हि ञेय्यधम्मं तेसं देसेतब्बाकारं सत्तानञ्च आसयानुसयादिं याथावतो जानन्तो भगवा ठानाट्ठानादीसु कोसल्लेन वेनेय्यज्झासयानुरूपं विचित्तनयदेसनं पवत्तेसीति। बाहिरं पन साधारणं समुट्ठानं दससहस्समहाब्रह्मपरिवारस्स सहम्पतिब्रह्मुनो अज्झेसनं। तदज्झेसनुत्तरकालञ्हि धम्मगम्भीरतापच्चवेक्खणाजनितं अप्पोस्सुक्कतं पटिप्पस्सम्भेत्वा धम्मस्सामी धम्मदेसनाय उस्साहजातो अहोसि। असाधारणम्पि अब्भन्तरबाहिरभेदतो दुविधमेव। तत्थ अब्भन्तरं याय महाकरुणाय येन च देसनाञाणेन इदं सुत्तं पवत्तितं, तदुभयं वेदितब्बं। बाहिरं पन रूपगरुकानं पुग्गलानं अज्झासयो। स्वायमत्थो अट्ठकथायं वुत्तो एव।
पयोजनम्पि साधारणासाधारणतो दुविधं। तत्थ साधारणं याव अनुपादापरिनिब्बानं विमुत्तिरसत्ता भगवतो देसनाय। तेनेवाह – ‘‘एतदत्था कथा, एतदत्था मन्तना’’तिआदि। असाधारणं पन तेसं रूपगरुकानं पुग्गलानं रूपे छन्दरागस्स जहापनं, उभयम्पेतं बाहिरमेव। सचे पन वेनेय्यसन्तानगतम्पि देसनाबलसिद्धिसङ्खातं पयोजनं अधिप्पायसमिज्झनभावतो यथाधिप्पेतत्थसिद्धिया महाकारुणिकस्स भगवतोपि पयोजनमेवाति गण्हेय्य, इमिना परियायेनस्स अब्भन्तरतापि सिया।
अपिच तेसं रूपगरुकानं पुग्गलानं रूपस्मिं विज्जमानस्स आदीनवस्स याथावतो अनवबोधो इमिस्सा देसनाय समुट्ठानं, तदवबोधो पयोजनं। सो हि इमाय देसनाय भगवन्तं पयोजेति तन्निप्फादनपरायं देसनाति कत्वा। यञ्हि देसनाय साधेतब्बं फलं, तं आकङ्खितब्बत्ता देसकं देसनाय पयोजेतीति पयोजनन्ति वुच्चति। तथा तेसं पुग्गलानं तदञ्ञेसञ्च वेनेय्यानं रूपमुखेन पञ्चसु उपादानक्खन्धेसु आदीनवदस्सनञ्चेत्थ पयोजनं। तथा संसारचक्कनिवत्तिसद्धम्मचक्कप्पवत्तिसस्सतादिमिच्छावादनिराकरणं सम्मावादपुरेक्खारो अकुसलमूलसमूहननं कुसलमूलसमारोपनं अपायद्वारपिदहनं सग्गमग्गद्वारविवरणं परियुट्ठानवूपसमनं अनुसयसमुग्घातनं ‘‘मुत्तो मोचेस्सामी’’ति पुरिमपटिञ्ञाविसंवादनं तप्पटिपक्खमारमनोरथविसंवादनं तित्थियधम्मनिम्मथनं बुद्धधम्मपतिट्ठापनन्ति एवमादीनिपि पयोजनानि इध वेदितब्बानि।
२.सद्दगरुकादीनन्ति आदिसद्देन गन्धरसफोट्ठब्बगरुके सङ्गण्हाति। आसयवसेनाति अज्झासयवसेन। उतुसमुट्ठानोपि इत्थिसन्तानगतो सद्दो लब्भति, सो इध नाधिप्पेतोति ‘‘चित्तसमुट्ठानो’’ति वुत्तं। कथितसद्दो आलापादिसद्दो। गीतसद्दो सरेन गायनसद्दो। इत्थिया हसनसद्दोपेत्थ सङ्गहेतब्बो तस्सपि पुरिसेन अस्सादेतब्बतो। तेनाह – ‘‘अपिच खो मातुगामस्स सद्दं सुणाति तिरोकुट्टा वा तिरोपाकारा वा हसन्तिया वा भणन्तिया वा गायन्तिया वा, सो तदस्सादेती’’तिआदि। निवत्थनिवासनस्साति खलित्थद्धस्स निवासनस्स। अलङ्कारस्साति नूपुरादिकस्स अलङ्कारस्स। इत्थिसद्दोत्वेव वेदितब्बोति इत्थिपटिबद्धभावतो वुत्तं। तेनाह – ‘‘सब्बोपी’’तिआदि। अविदूरट्ठानेति तस्स हत्थिकुलस्स वसनट्ठानतो अविदूरट्ठाने। कायूपपन्नोति सम्पन्नकायो थिरकथिनमहाकायो। महाहत्थीति महानुभावो हत्थी। जेट्ठकं कत्वाति यूथपतिं कत्वा।
कथिनतिक्खभावेन सिङ्गसदिसत्ता अळसङ्खातानि सिङ्गानि एतस्स अत्थीति सिङ्गी, सुवण्णवण्णताय महाबलताय च सीहहत्थिआदिमिगसदिसत्ता मिगो वियाति मिगो। तत्थ तत्थ किच्चं नेतुभावेन चक्खुयेव नेत्तं, तं उग्गतट्ठेन आयतं एतस्साति आयतचक्खुनेत्तो। अट्ठि एव तचो एतस्साति अट्ठित्तचो। तेनाभिभूतोति तेन मिगेन अभिभूतो अज्झोत्थटो निच्चलग्गहितो हुत्वा। करुणं रुदामीति कारुञ्ञपत्तो हुत्वा रोदामि विरवामि। पच्चत्थिकभयतो मुत्ति नाम यथा तथा सहायवतो होति, न एकाकिनोति आह – ‘‘मा हेव मं पाणसमं जहेय्या’’ति। तत्थ मा हेव मन्ति मं एवरूपं ब्यसनं पत्तं अत्तनो पाणसमं पियसामिकं त्वं माहेव जहि।
कुञ्चे गिरिकूटे रमति अभिरमति, तत्थ वा विचरति, कोञ्जनादं नदन्तो वा विचरति, कु वा पथवी, तदभिघातेन जीरतीति कुञ्जरो। सट्ठिहायनन्ति जातिया सट्ठिवस्सकालस्मिं कुञ्जरा थामेन परिहायन्ति, तं सन्धाय एवमाह। पथब्या चातुरन्तायाति चतूसु दिसासु समुद्दं पत्वा ठिताय चातुरन्ताय पथविया। सुप्पियोति सुट्ठु पियो। तेसं त्वं वारिजो सेट्ठोति ये समुद्दे वा गङ्गाय वा यमुनाय वा नम्मदानदिया वा कुळीरा, तेसं सब्बेसं वण्णसम्पत्तिया महन्तत्तेन च वारिम्हि जातत्ता वारिजो त्वमेव सेट्ठो पसत्थतरो। मुञ्च रोदन्तिया पतिन्ति सब्बेसं सेट्ठत्ता तमेव याचामि, रोदमानाय मय्हं सामिकं मुञ्च। अथाति गहणस्स सिथिलकरणसमनन्तरमेव। एतस्साति पटिसत्तुमद्दनस्स।
पब्बतगहनं निस्सायाति तिस्सो पब्बतराजियो अतिक्कमित्वा चतुत्थाय पब्बतराजियं पब्बतगहनं उपनिस्साय। एवं वदतीति ‘‘उदेतयं चक्खुमा’’तिआदिना (जा॰ १.२.१७) इमं बुद्धमन्तं मन्तेन्तो वदति।
तत्थ उदेतीति पाचीनलोकधातुतो उग्गच्छति। चक्खुमाति सकलचक्कवाळवासीनं अन्धकारं विधमित्वा चक्खुप्पटिलाभकरणेन यन्तेन तेसं दिन्नं चक्खु, तेन चक्खुना चक्खुमा। एकराजाति सकलचक्कवाळे आलोककरानं अन्तरे सेट्ठट्ठेन रञ्जनट्ठेन च एकराजा। हरिस्सवण्णोति हरिसमानवण्णो, सुवण्णवण्णोति अत्थो। पथविं पभासेतीति पथविप्पभासो। तं तं नमस्सामीति तस्मा तं एवरूपं भवन्तं नमस्सामि वन्दामि। तयाज्ज गुत्ता विहरेम्ह दिवसन्ति तया अज्ज रक्खिता हुत्वा इमं दिवसं चतुइरियापथविहारेन सुखं विहरेय्याम।
३.ततिये रूपायतनस्स विय गन्धायतनस्सपि समुट्ठापकपच्चयवसेन विसेसो नत्थीति आह – ‘‘चतुसमुट्ठानिक’’न्ति। इत्थिया सरीरगन्धस्स कायारुळ्हअनुलेपनादिगन्धस्स च तप्पटिबद्धभावतो अविसेसेन गहणप्पसङ्गे इधाधिप्पेतगन्धं निद्धारेन्तो ‘‘स्वाय’’न्तिआदिमाह। तत्थ इत्थियाति पाकतिकाय इत्थिया। दुग्गन्धोति पाकतिकाय इत्थिया सरीरगन्धभावतो दुग्गन्धो होति। इधाधिप्पेतोति इट्ठभावतो अस्सादेतब्बत्ता वुत्तं। कथं पन इत्थिया सरीरगन्धस्स दुग्गन्धभावोति आह – ‘‘एकच्चा ही’’तिआदि। तत्थ अस्सस्स विय गन्धो अस्सा अत्थीति अस्सगन्धिनी। मेण्डकस्स विय गन्धो अस्सा अत्थीति मेण्डकगन्धिनी। सेदस्स विय गन्धो अस्सा अत्थीति सेदगन्धिनी। सोणितस्स विय गन्धो अस्सा अत्थीति सोणितगन्धिनी। रज्जतेवाति अनादिमति संसारे अविज्जादिकिलेसवासनाय परिकड्ढितहदयत्ता फोट्ठब्बस्सादगधितचित्तताय च अन्धबालो एवरूपायपि दुग्गन्धसरीराय इत्थिया रज्जतियेव। पाकतिकाय इत्थिया सरीरगन्धस्स दुग्गन्धभावं दस्सेत्वा इदानि विसिट्ठाय एकच्चाय इत्थिया तदभावं दस्सेतुं – ‘‘चक्कवत्तिनोपना’’तिआदिमाह। यदि एवं ईदिसाय इत्थिया सरीरगन्धोपि इध कस्मा नाधिप्पेतोति आह – ‘‘अयं न सब्बासं होती’’तिआदि। तिरच्छानगताय इत्थिया एकच्चाय च मनुस्सित्थिया सरीरगन्धस्स अतिविय अस्सादेतब्बभावदस्सनतो पुन तम्पि अविसेसेन अनुजानन्तो ‘‘इत्थिकाये गन्धो वा होतू’’तिआदिमाह। इत्थिगन्धोत्वेव वेदितब्बोति तप्पटिबद्धभावतो वुत्तं।
४.चतुत्थादीसु किं तेनाति जिव्हाविञ्ञेय्यरसे इधाधिप्पेते किं तेन अवयवरसादिना वुत्तेन पयोजनं। ओट्ठमंसं सम्मक्खेतीति ओट्ठमंससम्मक्खनो, खेळादीनि। आदिसद्देन ओट्ठमंसमक्खनो तम्बुलमुखवासादिरसो गय्हति। सब्बो सो इत्थिरसोति इत्थियावस्स गहेतब्बत्ता।
५.इत्थिफोट्ठब्बोति एत्थापि एसेव नयो। यदि पनेत्थ इत्थिगतानि रूपारम्मणादीनि अविसेसतो पुरिसस्स चित्तं परियादाय तिट्ठन्ति, अथ कस्मा भगवता तानि विसुं विसुं गहेत्वा देसितानीति आह – ‘‘इति सत्था’’तिआदि। यथा हीतिआदिना तमेवत्थं समत्थेति। गमेतीति विक्खेपं गमेति, अयमेव वा पाठो। गमेतीति च सङ्गमेति। न तथा सेसा सद्दादयो, न तथा रूपादीनि आरम्मणानीति एतेन सत्तेसु रूपादिगरुकता असंकिण्णा विय दस्सिता, न खो पनेतं एवं दट्ठब्बं अनेकविधत्ता सत्तानं अज्झासयस्साति दस्सेतुं – ‘‘एकच्चस्स चा’’तिआदि वुत्तं। पञ्चगरुकवसेनाति पञ्चारम्मणगरुकवसेन। एकच्चस्स हि पुरिसस्स यथावुत्तेसु पञ्चसुपि आरम्मणेसु गरुकता होति, एकच्चस्स तत्थ कतिपयेसु, एकस्मिं एव वा, ते सब्बेपि पञ्चगरुकात्वेव वेदितब्बा यथा ‘‘सत्तिसयो अट्ठविमोक्खा’’ति। न पञ्चगरुकजातकवसेन एकेकारम्मणे गरुकस्सेव नाधिप्पेतत्ता। एकेकारम्मणगरुकानञ्हि पञ्चन्नं पुग्गलानं तत्थ आगतत्ता तं जातकं ‘‘पञ्चगरुकजातक’’न्ति वुत्तं। यदि एवं तेन इध पयोजनं नत्थीति आह – ‘‘सक्खिभावत्थाया’’ति। आहरित्वा कथेतब्बन्ति रूपादिगरुकताय एते अनयब्यसनं पत्ताति दस्सेतुं कथेतब्बं।
६-८.तेसन्ति सुत्तानं। उप्पण्डेत्वा गण्हितुं न इच्छीति तस्स थोकं विरूपधातुकत्ता न इच्छि। अनतिक्कमन्तोति संसन्देन्तो। द्वे हत्थं पत्तानीति द्वे उप्पलानि हत्थं गतानि। पहट्ठाकारं दस्सेत्वाति अपराहि इत्थीहि एकेकं लद्धं, मया द्वे लद्धानीति सन्तुट्ठाकारं दस्सेत्वा। परोदीति तस्सा पुब्बसामिकस्स मुखगन्धं सरित्वा। तस्स हि मुखतो उप्पलगन्धो वायति। हारेत्वाति तस्मा ठाना अपनेत्वा, ‘‘हरापेत्वा’’ति वा पाठो, अयमेवत्थो।
साधु साधूति भासतोति धम्मकथाय अनुमोदनवसेन ‘‘साधु साधू’’ति भासतो। उप्पलंव यथोदकेति यथा उप्पलं उप्पलगन्धो मुखतो निब्बत्तोति। वट्टमेव कथितन्ति यथारुतवसेन वुत्तं। यदिपि एवं वुत्तं, तथापि यथारुतमत्थे अवत्वा विवट्टं नीहरित्वा कथेतब्बं विमुत्तिरसत्ता भगवतो देसनाय।
रूपादिवग्गवण्णना निट्ठिता।
इति मनोरथपूरणिया अङ्गुत्तरनिकाय-अट्ठकथाय
पठमवग्गवण्णनाय अनुत्तानत्थदीपना निट्ठिता।