पाचित्तिययोजना

३.सम्मा वदति अनेनाति संवादनं, उजुजातिकचित्तं, न संवादनं विसंवादनं, वञ्‍चनाधिप्पायवसप्पवत्तं चित्तन्ति दस्सेन्तो आह ‘‘विसंवादनचित्त’’न्ति। ‘‘वाचा’’त्यादिना वचति एतायाति वाचाति अत्थं दस्सेति । हीति दळ्हीकरणजोतकं, तदमिना सच्‍चन्ति अत्थो। ‘‘वाचायेवा’’ति पदं ‘‘ब्यप्पथो’’ति पदे तुल्यत्थं, ‘‘वुच्‍चती’’ति पदे कम्मं। पथसद्दपरत्ता वाचासद्दस्स ब्यादेसो कतो। सुद्धचेतना कथिताति सम्बन्धो। तंसमुट्ठितसद्दसहिताति ताय चेतनाय समुट्ठितेन सद्देन सह पवत्ता चेतना कथिताति योजना।

‘‘एव’’न्ति पदं ‘‘दस्सेत्वा’’ति पदे निदस्सनं, करणं वा। ‘‘दस्सेत्वा’’ति पदं ‘‘दस्सेन्तो आहा’’ति पदद्वये पुब्बकालकिरिया। अन्तेति ‘‘वाचा’’तिआदीनं पञ्‍चन्‍नं पदानं अवसाने। ‘‘आहा’’ति एत्थ वत्तमान-तिवचनस्स अकारो पच्‍चुप्पन्‍नकालवाचकेन ‘‘इदानी’’ति पदेन योजितत्ता। ‘‘तत्था’’ति पदं ‘‘अत्थो वेदितब्बो’’ति पदे आधारो। एत्थाति ‘‘अदिट्ठं दिट्ठं मे’’तिआदीसु। ‘‘पाळिय’’न्ति पदं ‘‘देसना कता’’ति पदे आधारो। निस्सितविञ्‍ञाणवसेन अवत्वा निस्सयपसादवसेन ‘‘चक्खुना दिट्ठ’’न्ति वुत्तन्ति आह ‘‘ओळारिकेनेवा’’ति।

४.तस्साति ‘‘तीहाकारेही’’तिआदिवचनस्स। ‘‘अत्थो’’ति पदं ‘‘वेदितब्बो’’ति पदे कम्मं। हीति विसेसजोतकं, विसेसं कथयिस्सामीति अत्थो। तत्थाति चतुत्थपाराजिके। इधाति इमस्मिं सिक्खापदे।

९.आदीनम्पीति पिसद्दो सम्पिण्डनत्थो।

११.मन्दसद्दो जळत्थवाचकोति आह ‘‘मन्दत्ता जळत्ता’’ति। यो पन अञ्‍ञं भणतीति सम्बन्धो। ‘‘सामणेरेना’’ति पदं ‘‘वुत्तो’’ति पदे कत्ता। अपिसद्दो पुच्छावाचको, ‘‘पस्सित्था’’ति पदेन योजेतब्बो, अपि पस्सित्थाति अत्थो। ‘‘अदिट्ठं दिट्ठं मे’’तिआदिवचनतो अञ्‍ञा पूरणकथापि ताव अत्थीति दस्सेन्तो आह ‘‘अञ्‍ञा पूरणकथा नाम होती’’ति। अप्पताय ऊनस्स अत्थस्स पूरणवसेन पवत्ता कथा पूरणकथा। एसा पूरणकथा नाम काति आह ‘‘एको’’तिआदि। एसा हि गामे अप्पकम्पि तेलं वा पूवखण्डं वा पस्सित्वा वा लभित्वा वा बहुकं कत्वा पूरणवसेन कथितत्ता पूरणकथा नाम। बहुकानि तेलानि वा पूवे वा पस्सन्तोपि लभन्तोपि अप्पकं कत्वा ऊनवसेन कथितत्ता ऊनकथापि अत्थीति सक्‍का वत्तुं। अट्ठकथासु पन अवुत्तत्ता वीमंसित्वा गहेतब्बं। बहुकाय पूरणस्स अत्थस्स ऊनवसेन पवत्ता कथा ऊनकथाति विग्गहो कातब्बोति। पठमं।

१३.‘‘इदं वत्थु’’न्ति पदं ‘‘आहरी’’ति पदे कम्मं। नन्दितब्बोति नन्दो वण्णबलादि, सो एतस्सत्थीति नन्दी। विसालानि महन्तानि विसाणानि एतस्सत्थीति विसालो, नन्दी च सो विसालो चेति नन्दिविसालोति वचनत्थं दस्सेति ‘‘नन्दिविसालो नामा’’तिआदिना। सोति नन्दिविसालो, ‘‘आहा’’ति पदे कत्ता। तत्थेवाति युञ्‍जितट्ठानेयेव। अहेतुकपटिसन्धिकालेपीति पि-सद्दो अनुग्गहत्थवाचको, पगेव द्विहेतुक तिहेतुक पटिसन्धिकालेति अत्थो। ‘‘तेन चा’’ति चकारस्स अवुत्तसम्पिण्डनत्थत्ता ‘‘अत्तनो कम्मेन चा’’ति अत्थं सम्पिण्डेतीति आह ‘‘अत्तनो कम्मेन चा’’ति। अत्तनोति नन्दिविसालस्स।

१५.एत्थाति एतिस्सं पदभाजनियं, ‘‘आहा’’ति पदे आधारो। ‘‘यस्मा’’ति पदं विभजितुकामो’’ति पदे हेतु। अट्ठुप्पत्तियंयेव ‘‘हीनेनापी’’ति वत्वा पदभाजनियं अवुत्तत्ता इदं वुत्तन्ति दट्ठब्बं। वेणुकारजातीति विलीवकारजाति। नेसादजातीति एत्थ केवट्टजातिपि सङ्गहिता।

पु वुच्‍चति करीसं, तं कुसति अपनेतीति पुक्‍कुसो। पुप्फं वुच्‍चति करीसं, कुसुमं वा, तं छड्डेतीति पुप्फछड्डको।

कुटति छिन्दतीति कोट्ठो, सोयेव कोट्ठको। यकारभकारे एकतो योजेत्वा ‘‘यभा’’ति यो अक्‍कोसो अत्थि, एसो हीनो नाम अक्‍कोसोति योजना।

१६.सब्बपदेसूति नामादीसु सब्बपदेसु। एत्थाति इमस्मिं सिक्खापदे। अलिकन्ति असच्‍चं, मिच्छावाचन्ति सम्बन्धो। योपि वदतीति योजना।

२६.परिहरित्वाति परिमुखं कथनं अपनेत्वा। दवं परिहासं कामेतीति दवकामो, तस्स भावो दवकम्यं, तंयेव दवकम्यता। अनुपसम्पन्‍नन्ति एत्थ अकारस्स सदिसत्थमग्गहेत्वा अञ्‍ञत्थोव गहेतब्बोति आह ‘‘ठपेत्वा भिक्खु’’न्तिआदि। यदि हि सदिसत्थो भवेय्य, सामणेरोव अनुपसम्पन्‍नो नाम सिया सण्ठानेन च पुरिसभावेन च सदिसत्ता, तस्मा अञ्‍ञत्थोव गहेतब्बोति दट्ठब्बं। सब्बसत्ताति एत्थ सब्बसद्दो अनवसेसत्थो मनुस्से उपादाय वचनत्थजाननाजाननपकतिकानं सब्बसत्तानम्पि गहितत्ता।

३५.अत्थपुरेक्खारो नामाति वेदितब्बोति सम्बन्धो। सिक्खापदमपेक्खिय नपुंसकलिङ्गवसेन ‘‘किरिय’’न्तिआदि वुत्तं। आपत्तिमपेक्खिय इत्थिलिङ्गवसेन ‘‘किरिया’’तिआदि वुत्तं। वज्‍जकम्मसद्दा सिक्खापदमपेक्खन्तापि आपत्ति, मपेक्खन्तापि नियतनपुंसकलिङ्गत्ता नपुंसकायेव, तस्मा ते द्वे आपत्तिट्ठाने न वुत्ताति दट्ठब्बन्ति। दुतियं।

३७.भिक्खुपेसुञ्‍ञेति भिक्खूनं सन्तिकं उपसंहटे पेसुञ्‍ञवचनेति छट्ठीसमासो।

३८.‘‘दिस्वा’’ति पदं ‘‘भणन्तस्सा’’ति पदे पुब्बकालकिरिया, दस्सनं हुत्वाति अत्थो। ततियं।

४५.‘‘पदसो’’ति एत्थ सो-पच्‍चयो विच्छत्थवाचकोति आह ‘‘पदं पद’’न्ति। तत्थाति तेसु चतुब्बिधेसु। पदं नाम इध अत्थजोतकं वा विभत्यन्तं वा न होति, अथ खो लोकियेहि लक्खितो गाथाय चतुत्थंसो पादोव अधिप्पेतोति आह ‘‘पदन्ति एको गाथापादो’’ति। अनु पच्छा वुत्तपदत्ता दुतियपादो अनुपदं नाम। अनु सदिसं ब्यञ्‍जनं अनुब्यञ्‍जनन्ति अत्थं दस्सेति ‘‘अनुब्यञ्‍जन’’न्तिआदिना। ब्यञ्‍जनसद्दो पद-परियायो। यंकिञ्‍चि पदं अनुब्यञ्‍जनं नाम न होति, पुरिमपदेन पन सदिसं पच्छिमपदमेव अनुब्यञ्‍जनं नाम।

वाचेन्तो हुत्वा निट्ठापेतीति योजना। ‘‘एकमेकं पद’’न्ति पदं ‘‘निट्ठापेती’’ति पदे कारितकम्मं। ‘‘थेरेना’’ति पदं ‘‘वुत्ते’’ति पदे कत्ता, ‘‘एकतो’’ति पदे सहत्थो। सामणेरो अपापुणित्वा भणतीति सम्बन्धो। मत्तमेवाति एत्थ एवसद्दो मत्तसद्दस्स अवधारणत्थं दस्सेति, तेन पकारं पटिक्खिपति। ‘‘अनिच्‍च’’न्ति च ‘‘अनिच्‍चा’’ति च द्विन्‍नं पदानं सतिपि लिङ्गविसेसत्ते अनुब्यञ्‍जनत्ता आपत्तिमोक्खो नत्थीति आह ‘‘अनुब्यञ्‍जनगणनाय पाचित्तिया’’ति।

ब्रह्मजालादीनीति एत्थ आदिसद्देन सामञ्‍ञफलसुत्तादीनि दीघसुत्तानि (दी॰ नि॰ १.१५० आदयो) सङ्गहितानि। चसद्देन ओघतरणसुत्तादीनि संयुत्तसुत्तानि (सं॰ नि॰ १.१) च चित्तपरियादानसुत्तादीनि अङ्गुत्तरसुत्तानि (अ॰ नि॰ १.२ आदयो) च सङ्गहितानि। सोति देवताभासितो वेदितब्बोति योजना।

किञ्‍चापि वदतीति सम्बन्धो। एत्थ च किञ्‍चापिसद्दो गरहत्थवाचको, पनसद्दो अनुग्गहत्थवाचको। मेण्डकमिलिन्दपञ्हेसूति मेण्डकपञ्हे च मिलिन्दपञ्हे च। यन्ति सुत्तं वुत्तन्ति सम्बन्धो। आरम्मणकथा बुद्धिककथा दण्डककथा ञाणवत्थुकथाति योजेतब्बं पेय्यालवसेन वुत्तत्ता। इमायो पकरणानि नामाति वदन्ति। महापच्‍चरियादीसु वत्वा परिग्गहितोति योजना। यन्ति सुत्तं।

४८.तत्राति ‘‘एकतो उद्दिसापेन्तो’’ति वचने। उद्दिसापेन्तीति आचरियं देसापेन्ति बहुकत्तारमपेक्खिय बहुवचनवसेन वुत्तं। तेहीति उपसम्पन्‍नानुपसम्पन्‍नेहि। द्वेपीति उपसम्पन्‍नो च अनुपसम्पन्‍नो च।

उपचारन्ति द्वादसहत्थूपचारं। येसन्ति भिक्खूनं। पलायनकगन्थन्ति परिवज्‍जेत्वा गच्छन्तं पकरणं। सामणेरो गण्हातीति योजना।

ओपातेतीति अवपातेति, गळितापेतीति अत्थो। सुत्तेपीति वेय्याकरणसुत्तेपि। तन्ति येभुय्येन पगुणगन्थं। परिसङ्कमानन्ति सारज्‍जमानं। यं पन वचनं वुत्तन्ति सम्बन्धो। किरियसमुट्ठानत्ताति इमस्स सिक्खापदस्स किरियसमुट्ठानत्ताति। चतुत्थं।

५०.‘‘पकतिया’’ति पदं ‘‘देन्ती’’ति पदे विसेसनं। ते भिक्खू देन्तीति सम्बन्धो। ‘‘गारवेना’’ति पदञ्‍च ‘‘सिक्खाकामताया’’ति पदञ्‍च ‘‘देन्ती’’ति पदे हेतु। सीसस्स उपधानं उस्सीसं, तस्स करीयते उस्सीसकरणं, तंयेव अत्थो पयोजनं उस्सीसकरणत्थो, तदत्थाय। तत्राति पुरिमवचनापेक्खं, ‘‘सिक्खाकामताया’’ति वचनेति अत्थो। निदस्सनन्ति सेसो। अथ वा सिक्खाकामतायाति पच्‍चत्ते भुम्मवचनं। ‘‘इदम्पिस्स होति सीलस्मि’’न्तिआदीसु (दी॰ नि॰ १.१९५ आदयो) विय। इदम्पि सिक्खाकामताय अयं सिक्खाकामता सिक्खाकामभावो होतीति योजना। एस नयो ‘‘तत्रिदं समन्तपासादिकाय समन्तपासादिकत्तस्मि’’न्तिआदीसुपि। भिक्खू खिपन्तीति योजना। तन्ति आयस्मन्तं राहुलं। अथाति खिपनतो पच्छा। इदन्ति वत्थु। सम्मुञ्‍चनिकचवरछड्डनकानि सन्धाय वुत्तं। तेनायस्मता राहुलेन पातितं नु खोति योजना। सो पनायस्मा गच्छतीति सम्बन्धो। अपरिभोगा अञ्‍ञेसन्ति अञ्‍ञेहि न परिभुञ्‍जितब्बा।

५१.हीति सच्‍चं, यस्मा वा। सयनं सेय्या, कायपसारणकिरिया, सयन्ति एत्थाति सेय्या, मञ्‍चपीठादि। तदुभयम्पि एकसेसेन वा सामञ्‍ञनिद्देसेन वा एकतो कत्वा ‘‘सहसेय्य’’न्ति वुत्तन्ति दस्सेन्तो आह ‘‘सेय्या’’तिआदि। तत्थाति द्वीसु सेय्यासु। तस्माति यस्मा द्वे सेय्या दस्सिता, तस्मा। ‘‘सब्बच्छन्‍ना’’तिआदिना लक्खणं वुत्तन्ति योजना। पाकटवोहारन्ति लोके विदितं वचनं। दुस्सकुटियन्ति दुस्सेन छादितकुटियं। अट्ठकथासु यथावुत्ते पञ्‍चविधच्छदनेयेव गय्हमाने को दोसोति आह ‘‘पञ्‍चविधच्छदनेयेवा’’तिआदि। यं पन सेनासनं परिक्खित्तन्ति सम्बन्धो। पाकारेन वाति इट्ठकसिलादारुना वा। अञ्‍ञेन वाति किलञ्‍जादिना वा। वत्थेनपीति पिसद्दो पगेव इट्ठकादिनाति दस्सेति। यस्साति सेनासनसङ्खाताय सेय्याय। उपरीति वा समन्ततोति वा योजना। एकेन द्वारेन पविसित्वा सब्बपासादस्स वळञ्‍जितब्बतं सन्धाय वुत्तं ‘‘एकूपचारो’’ति। सतगब्भं वा चतुस्सालं एकूपचारं होतीति सम्बन्धो। तन्ति सेनासनसङ्खातं सेय्यं।

तत्थाति सेनासनसङ्खातायं सेय्यायं। सम्बहुला सामणेरा सचे होन्ति, एको भिक्खु सचे होतीति योजना। ‘‘सामणेरा’’ति इदं पच्‍चासन्‍नवसेन वुत्तं, उपलक्खणवसेन वा अञ्‍ञेहिपि सहसेय्यानं आपत्तिसम्भवतो। तेति सामणेरा। सब्बेसन्ति भिक्खूनं। तस्साति सामणेरस्स। एसेव नयोति एसो एव नयो, न अञ्‍ञो नयोति अत्थो। अथ वा एसेव नयोति एसो इव नयो, एसो एतादिसो नयो इव अयं नयो दट्ठब्बोति अत्थो।

अपि चाति एकंसेन। एत्थाति इमस्मिं सिक्खापदे। चतुक्‍कन्ति एकावासएकानुपसम्पन्‍नं, एकावासनानुपसम्पन्‍नं, नानावासएकानुपसम्पन्‍नं, नानावासनानुपसम्पन्‍नन्ति चतुसमूहं, चतुपरिमाणं वा। योति भिक्खु। हिसद्दो वित्थारजोतको, तं वचनं वित्थारयिस्सामीति अत्थो, वित्थारो मया वुच्‍चतेति वा। देवसिकन्ति दिवसे दिवसे। णिकपच्‍चयो हि विच्छत्थवाचको। योपि सहसेय्यं कप्पेति, तस्सापि आपत्तीति योजेतब्बो। तत्राति ‘‘तिरच्छानगतेनापी’’ति वचने।

‘‘अपदानं अहिमच्छा, द्विपदानञ्‍च कुक्‍कुटी।

चतुप्पदानं मज्‍जारी, वत्थु पाराजिकस्सिमा’’ति॥ (पारा॰ अट्ठ॰ १.५५)।

इमं गाथं सन्धाय वुत्तं ‘‘वुत्तनयेनेवा’’ति। तस्माति यस्मा वेदितब्बो, तस्मा। गोधाति कुण्डो। बिळालोति आखुभुजो। मङ्गुसोति नकुलो।

असम्बद्धभित्तिकस्स कतपासादस्साति योजना। तुलाति एत्थ तुला नाम थम्भान, मुपरि दक्खिणुत्तरवित्थारवसेन ठपितो दारुविसेसो थलति थम्भेसु पतिट्ठातीति कत्वा। ता पन हेट्ठिमपरिच्छेदतो तिस्सो, उक्‍कट्ठपरिच्छेदेन पन पञ्‍चसत्तनवादयो। नानूपचारे पासादेति सम्बन्धो।

५३.द्वीसु अट्ठकथावादेसु महाअट्ठकथावादोव युत्तोति सो पच्छा वुत्तो।

इमिनापीति सेनम्बमण्डपेनापि। एतन्ति जगतिया अपरिक्खित्ततं। यथाति यंसद्दत्थो ततियन्तनिपातो, येन सेनम्बमण्डपेनाति अत्थोति। पञ्‍चमं।

६६.छप्पञ्‍चवाचाहीति एत्थ ‘‘पञ्‍चा’’ति वाचासिलिट्ठवसेन वुत्तं कस्सचि पयोजनस्साभावा। तत्थाति ‘‘छप्पञ्‍चवाचाही’’ति पदे। एको गाथापादो एका वाचाति वदन्तो चुण्णिये विभत्यन्तं एकं पदं एका वाचा नामाति दस्सेति, अत्थजोतकपदं वा वाक्यपदं वा न गहेतब्बं। ‘‘एकं पदं पाळितो, पञ्‍च अट्ठकथातो’’ति इमिना ‘‘द्वे पदानि पाळितो, चत्तारि अट्ठकथातो’’तिआदिनयोपि गहेतब्बो। छपदानतिक्‍कमोयेव हि पमाणं। तस्मिन्ति एत्थ सति विभत्तिविपल्‍लासे लिङ्गस्सापि विपल्‍लासो होति ‘‘तस्मि’’न्ति पुल्‍लिङ्गेन वुत्तत्ता। सति च विभत्तिविपल्‍लासे ‘‘तस्सा’’ति इत्थिलिङ्गभावेन पवत्ता। ‘‘मातुगामस्सा’’ति नियतपुल्‍लिङ्गापेक्खनस्स असम्भवतो अत्थवसेन ‘‘एकिस्सा’’ति इत्थिलिङ्गभावेन वुत्तं। इमिना भेदलिङ्गनिस्सितो विसेसनविसेस्योपि अत्थीति दस्सेति। तुम्हाकन्ति निद्धारणसमुदायो। ‘‘सुणाथा’’ति अवत्वा आभोगोपि वट्टतीति आह ‘‘पठम’’न्तिआदि। पठमन्ति च पठममेव। तेन वुत्तं ‘‘न पच्छा’’ति। पुट्ठो हुत्वा भिक्खु कथेतीति योजनाति। सत्तमं।

७७.उत्तरिमनुस्सधम्ममेव सन्धाय वुत्तं, न सुतादिगुणन्ति अत्थो। अन्तरा वाति परिनिब्बानकालतो अञ्‍ञस्मिं काले वा। अतिकड्ढियमानेनाति अतिनिप्पीळियमानेन। उम्मत्तकस्सातिइदं पनाति एत्थ इति-सद्दो आद्यत्थो। तेन ‘‘खित्तचित्तस्सा’’तिआदिं सङ्गण्हाति। दिट्ठिसम्पन्‍नानन्ति मग्गपञ्‍ञाय, फलपञ्‍ञाय च सम्पन्‍नानं। अनापत्तीति पाचित्तियापत्तिया अनापत्ति न वत्तब्बा, आपत्तियेव होति, तस्मा ‘‘उम्मत्तकस्स अनापत्ती’’ति न वत्तब्बन्ति अधिप्पायोति। अट्ठमं।

८०.साति भिक्खुसम्मुति, सङ्घेन कातब्बाति योजना। कत्थचीति किस्मिञ्‍चि ठाने। इधाति इमस्मिं सिक्खापदे। ‘‘वुत्तत्ता’’ति पदं ‘‘कातब्बा’’ति पदे हेतु। एसाति एसो भिक्खु। हितेसितायाति हितस्स एसिताय, अत्थस्स इच्छतायाति अत्थो।

८२.सेसानीति आदिम्हि पञ्‍चसिक्खापदतो सेसानि उपरि पञ्‍च सिक्खापदानि। अस्साति अनुपसम्पन्‍नस्स। घटेत्वाति सम्बन्धं कत्वाति। नवमं।

८७.तत्रापीति इट्ठककपालादीसुपि। हीति सच्‍चं। तेसं अनुपादानत्ताति तेसं इट्ठकादीनं अग्गिस्स अनिन्धनत्ता। हीति सच्‍चं, यस्मावा। तानीति इट्ठकादीनि। अविसयत्ताति आपत्तिया अनोकासत्ता। तिणुक्‍कन्ति तिणमयं उक्‍कं। तत्थेवाति महापच्‍चरियं एव। अरीयति अग्गिनिप्फादनत्थं घंसीयति एत्थाति अरणी, हेट्ठा निमन्थनीयदारु। सह धनुना एति पवत्ततीति सहितो, उपरि निमन्थनदारु। अरणी च सहितो च अरणीसहितो, तेन अग्गिं निब्बत्तेत्वाति योजना। यथा करियमाने न डय्हति, तथा करोहीति सम्बन्धो।

८८.आवाटंजानाति आवाटं कातुं, खणितुं वा जानाहीति अत्थो। ‘‘एवं महामत्तिकं जान, थुसमत्तिकं जाना’’ति एत्थापि यथालाभं सम्पदानवाचकपदं अज्झाहरित्वा योजना कातब्बा। साति पथवी। तेनाति पवट्टनादिनाति। दसमं।

मुसावादवग्गो पठमो।

९०.‘‘भवन्ती’’ति इमिना विरूळ्हे मूले नीलभावं आपज्‍जित्वा वड्ढमानके तरुणरुक्खगच्छादिके दस्सेति। ‘‘अहुवत्थु’’न्ति इमिना पन वड्ढित्वा ठिते महन्तरुक्खगच्छादिके दस्सेति। ‘‘अहुवत्थु’’न्ति च हिय्यत्तनिसङ्खाताय त्थुं-विभत्तिया हू-धातुस्स ऊकारस्स उवादेसो होति। पोत्थकेसु पन ‘‘अहुवती’’ति पाठो दिस्सति, सो अपाठोति दट्ठब्बो। ‘‘जायन्ती’’ति इमिना भू-धातुस्स सत्तत्थभावं दस्सेति , ‘‘वड्ढन्ती’’ति इमिना वड्ढनत्थभावं। एतन्ति ‘‘भूतगामो’’ति नामं। पीयते यथाकामं परिभुञ्‍जीयते, पातब्बं परिभुञ्‍जितब्बन्ति वा पातब्यं, पासद्दो यथाकामपरिभुञ्‍जनत्थो। तेनाह – ‘‘छेदनभेदनादीहि यथारुचि परिभुञ्‍जितब्बताति अत्थो’’ति।

९१.‘‘इदानी’’ति पदं ‘‘आहा’’ति पदे कालसत्तमी। यस्मिन्ति बीजे। तन्ति बीजं। पञ्‍च बीजजातानीति एत्थ जातसद्दस्स तब्भावत्थतं सन्धाय अट्ठकथासु एवं वुत्तं। तब्भावत्थस्स ‘‘मूले जायन्ती’’ति इमाय पाळिया असंसन्दनतं सन्धाय वुत्तं सङ्गहकारेन ‘‘न समेन्ती’’ति। अट्ठकथाचरियानं मतेन सति जातसद्दस्स तब्भावत्थभावे ‘‘मूले जायन्ती’’तिआदीसु मूले मूलानि जायन्तीति दोसो भवेय्याति मनसि कत्वा आह ‘‘न ही’’तिआदि। हीति सच्‍चं, यस्मा वा। तानीति रुक्खादीनि। तस्साति ‘‘भूतगामो नाम पञ्‍च बीजजातानी’’ति पदस्स। एतन्ति ‘‘बीजजातानी’’ति नामं। बीजेसु जातानि बीजजातानीति वुत्ते ‘‘मूले जायन्ती’’तिआदिना समेति। एतेनाति ‘‘बीजतो’’तिआदिना सङ्गहोति सम्बन्धो।

‘‘येही’’ति पदं ‘‘जातत्ता’’ति पदे अपादानं, हेतु वा ‘‘वुत्तानी’’ति पदे करणं, कत्ता वा। तेसन्ति बीजानं। रुक्खादीनं विरुहनं जनेतीति बीजं। ‘‘बीजतो’’तिआदिना कारियोपचारेन कारणस्स दस्सितत्ता कारणूपचारं पदीपेति। अञ्‍ञानिपि यानि वा पन गच्छवल्‍लिरुक्खादीनि अत्थि संविज्‍जन्ति, तानि गच्छवल्‍लिरुक्खादीनि जायन्ति सञ्‍जायन्तीति योजना। तानीति गच्छवल्‍लिरुक्खादीनि । तञ्‍च मूलं, पाळियं वुत्तहलिद्दादि च अत्थि, सब्बम्पि एतं मूलबीजं नामाति सम्बन्धो। एत्थाति बीजेसु, खन्धबीजेसु वा।

९२.सञ्‍ञावसेनाति ‘‘बीज’’न्ति सञ्‍ञावसेन। ‘‘तत्था’’ति पदं ‘‘वेदितब्बो’’ति पदे आधारो। ‘‘यथा’’तिआदिना कारणोपचारेन कारियस्स वुत्तत्ता फलूपचारं दस्सेति। यं बीजं वुत्तं, तं दुक्‍कटवत्थूति योजना। यदेतं आदिपदन्ति योजेतब्बं। तेनाति आदिपदेन। रवीयति भगवता कथीयतीति रुतं, पाळि, तस्स अनुरूपं यथारुतं, पाळिअनतिक्‍कन्तन्ति अत्थो।

एत्थाति ‘‘बीजे बीजसञ्‍ञी’’तिआदिपदे, इमस्मिं सिक्खापदे वा। उदके ठाति पवत्ततीति उदकट्ठो, एवं थलट्ठोपि। तत्थाति उदकट्ठथलट्ठेसु। सासपस्स मत्तं पमाणं अस्स सेवालस्साति सासपमत्तिको। तिलस्स बीजपमाणं अस्स सेवालस्साति तिलबीजको। पमाणत्थे को। आदिसद्देन सङ्खपणकादयो सेवाले सङ्गण्हाति। तत्थ तिलबीजपमाणो जलसण्ठितो नीलादिवण्णयुत्तो सेवालो तिलबीजं नाम, सपत्तो अप्पकण्डो उक्खलिपिधानादिपमाणो समूलो एको सेवालविसेसो सङ्खो नाम, भमरसण्ठानो नीलवण्णो एको सेवालविसेसो पणको नाम। उदकं सेवतीति सेवालो। तत्थाति सेवालेसु। योति सेवालो। पतिट्ठितं सेवालन्ति सम्बन्धो। यत्थ कत्थचीति मूले वा नळे वा पत्ते वा। उद्धरित्वाति उप्पाटेत्वा। ‘‘हत्थेही’’ति पदं ‘‘वियूहित्वा’’ति पदे करणं। हीति सच्‍चं, यस्मा वा। तस्साति सेवालस्स। एत्तावताति इतो चितो च वियूहनमत्तेन। यो सेवालो निक्खमति, तं सेवालन्ति योजना। परिस्सावनन्तरेनाति परिस्सावनछिद्देन। उप्पलानि अस्मिं गच्छेति उप्पलिनी। पदुमानि अस्मिं गच्छेति पदुमिनी, इनो, इत्थिलिङ्गजोतको ई। तत्थेवाति उदकेयेव। तानीति वल्‍लीतिणानि। हीति सच्‍चं, यस्मा वा। अनन्तकोति सासपमत्तिको सेवालो। सो हि नत्थि अत्ततो अन्तो लामको सेवालो एतस्साति कत्वा ‘‘अनन्तको’’ति वुच्‍चति। अत्तनायेव हि सुखुमो, ततो सुखुमो सेवालो नत्थीति अधिप्पायो। तत्थाति दुक्‍कटवत्थुभावे। तम्पीति ‘‘सम्पुण्णभूतगामं न होती’’ति वचनम्पि। पिसद्दो महापच्‍चरिआदिअट्ठकथाचरियानं वचनापेक्खो। हीति सच्‍चं, यस्मा वा। न आगतो, तस्मा न समेतीति योजना। अथाति तस्मिं अनागते। एतन्ति अनन्तकसेवालादिं। गच्छिस्सतीति वदेय्याति सम्बन्धो। तम्पीति ‘‘गच्छिस्सती’’ति वचनम्पि। पिसद्दो पुरिमट्ठकथाचरियानं वचनापेक्खो।

अभूतगाममूलत्तातादिसस्स बीजगामस्साति एत्थ बीजगामो तिविधो होति – यो सयं भूतगामतो हुत्वा अञ्‍ञम्पि भूतगामं जनेति, अम्बट्ठिआदिको। यो पन सयं भूतगामतो हुत्वा अञ्‍ञं पन भूतगामं न जनेति, तालनाळिकेरादिखाणु। यो पन सयम्पि भूतगामतो अहुत्वा अञ्‍ञम्पि भूतगामं न जनेति। पानीयघटादीनं बहि सेवालोति। भूतगामो पन चतुब्बिधो होति – यो सयं बीजगामतो हुत्वा अञ्‍ञम्पि बीजगामं जनेति, एतरहि अम्बरुक्खादिको। यो पन सयं बीजगामतो अहुत्वाव अञ्‍ञं बीजगामं जनेति, आदिकप्पकाले अम्बरुक्खादिको। यो पन सयं बीजगामतो हुत्वा अञ्‍ञं पन बीजगामं न जनेति, नीलवण्णो फलितकदलीरुक्खादिको। यो पन सयम्पि बीजगामतो अहुत्वा अञ्‍ञम्पि बीजगामं न जनेति, इध वुत्तो अनन्तकसेवालादिकोति। तत्थ चतुत्थं भूतगामं सन्धाय वुत्तं ‘‘अभूतगाममूलकत्ता तादिसस्स बीजस्सा’’ति। अयं पन ततियबीजगामस्स च चतुत्थभूतगामस्स च विसेसो – ततियबीजगामे मूलपण्णानि न पञ्‍ञायन्ति, चतुत्थभूतगामे तानि पञ्‍ञायन्तीति। मूलपण्णानं अपञ्‍ञायनत्ता बीजगामोति वुत्तो, तेसं पञ्‍ञायनत्ता भूतगामोति वुत्तो। इतरथा हि विरोधो भवेय्याति। अत्तनो वादे पाचित्तियभावतो गरुकं, महापच्‍चरिआदीनं वादे दुक्‍कटमत्तभावतो लहुकं। एतन्ति ठानं।

९८.अञ्‍ञन्ति पुच्छितत्थतो अञ्‍ञं अपुच्छितमत्थं। भावप्पधानोयं कत्तुनिद्देसोति आह ‘‘अञ्‍ञेनञ्‍ञं पटिचरणस्सेतं नाम’’न्ति। तुण्हीभावस्साति अभासनस्स। आत्यूपसग्गो लुत्तनिद्दिट्ठोति आह ‘‘आरोपेतू’’ति। एवं ‘‘अरोपिते’’ति एत्थपि। तेनाह ‘‘अनारोपिते’’ति।

१०१.तन्ति अञ्‍ञवादकविहेसकरोपनकम्मं। अस्साति भवेय्य, होति वा।

१०२.किन्ति किं वचनं। येनाति येन ब्याधिना कथेतुं न सक्‍कोति, तादिसो ब्याधि मुखे होतीति योजना। तप्पच्‍चयाति ततो कथितकारणाति। दुतियं।

१०५.उज्झापेन्ति अनेनाति उज्झापनकं। खिय्यन्ति अनेनाति खिय्यनकन्ति दस्सेन्तो आह ‘‘येन वचनेना’’तिआदि।

१०६.उपसम्पन्‍नं सङ्घेन सम्मतं मङ्कुकत्तुकामोति सम्बन्धं दस्सेन्तो आह ‘‘उपसम्पन्‍नं सङ्घेन सम्मत’’न्तिआदि। सम्बज्झनं सम्बन्धो, कातब्बोति योजना। उपसम्पन्‍नस्स सङ्घेन सम्मतस्स अवण्णं कत्तुकामो अयसं कत्तुकामोति विभत्तिविपरिणामेन सम्बन्धं दस्सेन्तो आह ‘‘विभत्तिविपरिणामो कातब्बो’’ति। ‘‘वसेना’’ति पदं विभत्तिविपरिणामो कातब्बो’’ति पदे विसेसनं। यस्मा विसेसो नत्थि, तस्मा कतन्ति योजना। तन्ति ‘‘खिय्यनक’’न्ति पदं। सो च भिक्खूति उज्झापनको च खिय्यनको च सो च भिक्खु। अथाति तस्मा उज्झापनकखिय्यनककरत्ता। अस्साति भिक्खुनो। अस्साति भवेय्य।

‘‘उपसम्पन्‍न’’न्ति पदं ‘‘उज्झापेती’’ति पदे धातुकम्मं ‘‘अनुपसम्पन्‍न’’न्ति पदं कारितकम्मं, ‘‘अनुपसम्पन्‍न’’न्ति पदं ‘‘उज्झापेती’’ति कारितकिरियं अपेक्खित्वा कम्मं होति। ‘‘खिय्यती’’ति सुद्धकिरियाय अपेक्खाय विभत्तिविपल्‍लासो होतीति आह ‘‘तस्स वा’’तिआदि। तस्साति अनुपसम्पन्‍नस्स सन्तिकेति सम्बन्धो। तन्ति सङ्घेन सम्मतं उपसम्पन्‍नं। ‘‘सङ्घेन असम्मत’’न्ति एत्थ न अपलोकनकम्मेन असम्मतं, कम्मवाचाय पन असम्मतन्ति आह ‘‘कम्मवाचाया’’तिआदि। द्वे तयो हुत्वा कम्मवाचाय सम्मनितुमसक्‍कुणेय्यत्ता असम्मतन्ति च दस्सेन्तो आह ‘‘यत्रा’’तिआदि। यत्राति यस्मिं विहारे। ‘‘अनुपसम्पन्‍नं सङ्घेन सम्मत’’न्ति एत्थ अनुपसम्पन्‍नस्स सम्मुतियो दातुमसक्‍कुणेय्यत्ता पुब्बवोहारवसेन सम्मतन्ति वुत्तन्ति दस्सेन्तो आह ‘‘किञ्‍चापी’’तिआदि। तन्ति अनुपसम्पन्‍नभावे ठितं। ब्यत्तस्साति वियत्तस्स। सङ्घेन वा कतोति योजनाति। ततियं।

११०.‘‘वस्सिको’’ति न सङ्केताति अवस्सिकसङ्केता। ‘‘अट्ठ मासे’’ति सामञ्‍ञतो वुत्तेपि ‘‘अवस्सिकसङ्केते’’ति विसेसितत्ता हेमन्तिकगिम्हिकमासायेव गहेतब्बाति आह ‘‘चत्तारो हेमन्तिके’’तिआदि। यत्थाति यस्मिं रुक्खे। न ऊहदन्तीति सम्बन्धो। ‘‘काका वा’’ति एत्थ वासद्दो सम्पिण्डनत्थो। तेनाह ‘‘अञ्‍ञे वा सकुन्ता’’ति। तस्माति यस्मा अनुजानाति, तस्मा। यत्थाति यस्मिं रुक्खे, विस्समित्वा गच्छन्तीति योजना। यस्मिन्ति रुक्खे, कत्वा वसन्तीति योजना। अट्ठ मासे एवाति सम्भवतो आह ‘‘येसु जनपदेसू’’तिआदि । तेसुपीति जनपदेसुपि। अवस्सिकसङ्केते एवाति सम्भवतो आह ‘‘यत्था’’तिआदि। यत्थाति येसु जनपदेसु। ‘‘विगतवलाहकं विसुद्धं नभं होती’’ति इमिना सचे अविगतवलाहकं अविसुद्धं नभं होति, निक्खिपितुं न वट्टतीति दीपेति। ‘‘एवरूपे काले’’ति पदं ‘‘निक्खिपितुं वट्टती’’ति पदे आधारो।

अब्भोकासिकेनापीति अब्भोकासधुतङ्गयुत्तेनापि। पिसद्दो रुक्खमूलिकस्स अपेक्खको। वत्तं वित्थारेन्तो आह ‘‘तस्स ही’’तिआदि। तस्साति अब्भोकासिकस्स। हिसद्दो वित्थारजोतको। तत्थेवाति पुग्गलिकमञ्‍चकेयेव। सङ्घिकं मञ्‍चन्ति सम्बन्धो। वीतमञ्‍चकोति वायितमञ्‍चको। तस्मिन्ति वीतमञ्‍चके। पुराणमञ्‍चको नस्सन्तोपि अनग्घोति आह ‘‘पुराणमञ्‍चको गहेतब्बो’’ति। चम्मेन अवनहितब्बोति ओनद्धो, सो एव ओनद्धको। गहेत्वा च पन पञ्‍ञपेत्वा निपज्‍जितुं न वट्टतीति योजना। असमयेति वस्सिकसङ्खाते अकाले। चतुग्गुणेनापीति चतुपटलेनपि। वट्टन्ति वलाहका आवट्टन्ति अस्मिं समयेति वट्टुलो, सो एव वट्टलिको, सत्ताहं वट्टलिको, सत्ताहो वा वट्टलिको सत्ताहवट्टलिको, सो आदि येसं तानीति सत्ताहवट्टलिकादीनि। आदिसद्देन सत्ताहतो ऊनाधिकानि गहेतब्बानि। कायानुगतिकत्ताति कायं अनुगमकत्ता कायसदिसत्ताति अत्थो।

पण्णकुटीसूति पण्णेन छादितकुटीसु। सभागभिक्खूनन्ति अत्तना सभागभिक्खूनं, सन्तिकन्ति सम्बन्धो। अनोवस्सके ठानेति योजना। लग्गेत्वाति लम्बेत्वा, अयमेव वा पाठो। ‘‘सम्मज्‍जनि’’न्ति पदं ‘‘गहेत्वा’’ति पदे अवुत्तकम्मं, ‘‘ठपेतब्बा’’ति पदे वुत्तकम्मं। धोवित्वाति सम्मज्‍जनिं सुद्धं कत्वा। उपोसथागारादीसूतिआदिसद्देन परिवेणादीनि गहेतब्बानि।

यो पन भिक्खु गन्तुकामो होति, तेनाति योजना। तत्थाति सालायं। यत्थ कत्थचीति यस्मिं किस्मिञ्‍चि ठाने। पाकतिकट्ठानेति पकतिया गहितट्ठाने। तत्र तत्रेवाति तेसु तेसु चेतियङ्गणादीसुयेव । असनसालन्ति असन्ति भक्खन्ति अस्सं सालायन्ति असना, असना च सा साला चेति असनसाला, भोजनसालाति अत्थो। तत्राति तस्स सम्मज्‍जन्तस्स, तस्मिं ‘‘वत्तं जानितब्ब’’न्ति पाठे वा। मज्झतोति पवित्ततो, सुद्धट्ठानतोति अत्थो। पादट्ठानाभिमुखाति सम्मज्‍जन्तस्स पादट्ठानं अभिमुखा। वालिका हरितब्बाति पंसु च वालिका च अपनेतब्बा। सम्मुञ्‍चनीसलाकाय परं पेल्‍लेतब्बाति अधिप्पायो। बहीति सम्मज्‍जितब्बतलतो बहि।

१११.मसारकोतीति एत्थ इतिसद्दो नामपरियायो, मसारको नामाति अत्थो। एवं बुन्दिकाबद्धोतीतिआदीसुपि। पादे मसित्वा विज्झित्वा तत्थ अटनियो पवेसेतब्बा एत्थाति मसारको। बुन्दो एव बुन्दिको, पादो, तस्मिं आबद्धा बन्धिता अटनी यस्साति बुन्दिकाबद्धो। कुळीरस्स पादो विय पादो यस्साति कुळीरपादको, यथा कुळीरो वङ्कपादो होति, एवं वङ्कपादोति वुत्तं होति। आहच्‍च अङ्गे विज्झित्वा तत्थ पवेसितो पादो यस्साति आहच्‍चपादको। आणिन्ति अग्गखिलं। मञ्‍चति पुग्गलं धारेतीति मञ्‍चो। पीठति विसमदुक्खं हिंसतीति पीठं। पणवोति एको तूरियविसेसो, तस्स सण्ठानं कत्वाति अत्थो। तञ्हि एतरहि बुद्धपटिमस्स पल्‍लङ्कसण्ठानं होति। तन्ति कोच्छं। करोन्ति किराति सम्बन्धो। एत्थाति सेनासनपरिभोगे। हीति सच्‍चं। तन्ति कोच्छं महग्घं होति, महग्घत्ता भद्दपीठन्तिपि वुच्‍चति। येनाति येन भिक्खुना। ‘‘थाममज्झिमस्सा’’ति पदेन पमाणमज्झिमं निवत्तेति।

एत्थाति ‘‘अनापुच्छं वा गच्छेय्या’’ति पदे। थेरो आणापेतीति योजना। आणापेतीति च आण-धातुया एव पेसनसङ्खातस्स हेत्वत्थस्स वाचकत्ता णापेसद्दो स्वत्थोव। सोति दहरो। तथाति यथा थेरेन वुत्तो, तथा कत्वाति अत्थो। तत्थाति दिवाट्ठाने, मञ्‍चपीठे वा। ततोति ठपनकालतो। परिबुन्धेति हिं सेतीति पलिबोधो, परिसद्दो उपसग्गो, सो विकारवसेन अञ्‍ञथा जातो। सो पलिबोधो अञ्‍ञत्थ आवासादिको, इध पन सन्थरापितमञ्‍चादिको। सायन्ति सायन्हे, भुम्मत्थे चेतं उपयोगवचनं। थेरो भणतीति सम्बन्धो। तत्थाति मञ्‍चपीठे। ‘‘बालो होती’’ति वत्वा तस्स अत्थं दस्सेन्तो आह ‘‘अनुग्गहितवत्तो’’ति। अनुग्गहितं वत्तं येनाति अनुग्गहितवत्तो, थेरो। तज्‍जेतीति उब्बेजेति। तस्मिन्ति दहरे। अस्साति थेरस्स।

आणत्तिक्खणेयेवाति थेरस्स पेसनक्खणेयेव। दहरो वदतीति योजना। ‘‘थेरो’’ति पदं ‘‘वत्वा गच्छती’’ति पदद्वये कत्ता, ‘‘कारेतब्बो’’ति पदे कम्मं। नन्ति मञ्‍चपीठं, ‘‘पञ्‍ञपेत्वा’’तिपदमपेक्खिय एवं वुत्तं। नन्ति दहरं वा। ‘‘वत्वा’’ति पदमपेक्खिय एवं वुत्तं। तत्थेवाति मञ्‍चपीठेयेव। अस्साति थेरस्स। तत्थाति दिवाट्ठाने। भोजनसालतो अञ्‍ञत्थ गच्छन्तोति भोजनसालतो निक्खमित्वा मञ्‍चपीठपञ्‍ञापनट्ठानतो अञ्‍ञं ठानं गच्छन्तो, थेरोति योजना। तत्थेवाति दिवाट्ठानेयेव। यत्रिच्छतीति यं ठानं गन्तुमिच्छतीति अत्थो। अन्तरसन्‍निपातेति सकलं अहोरत्तं असन्‍निपातेत्वा अन्तरे सन्‍निपाते सतीति योजना।

तत्थाति तस्मिं ठाने। आगन्तुका गण्हन्तीति सम्बन्धो। ततोति गण्हनतो। तेसन्ति आगन्तुकानं । येहीति आवासिको वा होतु, आगन्तुको वा, येहि भिक्खूहि। तेति निसिन्‍नकभिक्खू। उद्धं पाळिपाठं सारेति पवत्तेतीति उस्सारको। धम्मकथायं साधूति धम्मकथिको। तस्मिन्ति उस्सारके वा धम्मकथिके वा। अहोरत्तन्ति अहो च रत्ति च अहोरत्तं, अच्‍चन्तसंयोगपदं। इतरस्मिन्ति पठमं निसिन्‍नभिक्खुतो अञ्‍ञस्मिं भिक्खुम्हीति योजना। अन्तोउपचारट्ठेयेवाति लेड्डुपातसङ्खातस्स उपचारस्स अन्तो ठितेयेव, अनादरे चेतं भुम्मं। सब्बत्थाति आपत्तिवारअनापत्तिवारेसु।

११२.चिमिलिकं वातिआदीसु विनिच्छयो एवं वेदितब्बोति योजना। तन्ति चिमिलिकत्थरणं। उत्तरि अत्थरितब्बन्ति उत्तरत्थरणन्ति दस्सेन्तो आह ‘‘उत्तरत्थरणं नामा’’तिआदि। भूमियन्ति सुधादिपरिकम्मेन अकतायं पकतिभूमियं। चम्मखण्डोति एत्थ चम्मंयेव अन्ते खण्डत्ता छिन्‍नत्ता चम्मखण्डोति वुच्‍चति। ननु सीहचम्मादीनि न कप्पन्तीति आह ‘‘अट्ठकथासु ही’’तिआदि। हीति सच्‍चं। तस्माति यस्मा न दिस्सति, तस्मा। परिहरणेयेवाति अत्तनो सन्तकन्ति परिच्छिन्दित्वा, पुग्गलिकन्ति वा परिग्गहेत्वा तं तं ठानं हरणेयेव। पादो पुञ्छीयति सोधीयति एतायाति पादपुञ्छनीति कत्वा रज्‍जुपिलोतिकायो पादपुञ्छनीति वुच्‍चतीति आह ‘‘पादपुञ्छनी नामा’’तिआदि। मयसद्दलोपं कत्वा फलकपीठन्ति वुत्तन्ति आह ‘‘फलकपीठं नाम फलकमयं पीठ’’न्ति। फलकञ्‍च पीठञ्‍च फलकपीठन्ति वा दस्सेतुं वुत्तं ‘‘अथ वा’’ति। एतेनाति ‘‘फलकपीठ’’न्ति पदेन। ‘‘सङ्गहित’’न्ति पदे करणं, कत्ता वा। बीजनिपत्तकन्ति चतुरस्सबीजनीयेव सकुणपत्तसदिसत्ता बीजनिपत्तकं, सदिसत्थे को। ‘‘अज्झोकासे’’ति पदं ‘‘पचित्वा’’ति पदे आधारो। अग्गिसालायन्ति अग्गिना पचनसालायं। पब्भारेति लेणसदिसे पब्भारे। यत्थाति यस्मिं ठाने।

यस्मिन्ति पुग्गले। ‘‘अत्तनो पुग्गलिकमिव होती’’ति इमिना अनापत्तीति दस्सेति।

११३.यो भिक्खु वा लज्‍जी होति, तथारूपं भिक्खुं वा ति योजना। ‘‘लज्‍जी होती’’ति वत्वा तस्स अत्थं दस्सेन्तो आह ‘‘अत्तनो पलिबोधं विय मञ्‍ञती’’ति। योति आपुच्छको भिक्खु। ‘‘केनचि उपद्दुतं होती’’ति सङ्खेपेन वुत्तमत्थं वित्थारेन्तो आह ‘‘सचेपि ही’’तिआदि। हिसद्दो वित्थारजोतको। वुड्ढतरो भिक्खु गण्हातीति सम्बन्धो। तं पदेसन्ति सेनासनट्ठपितट्ठानं। आपदासूति विपत्तीसूति। चतुत्थं।

११८.‘‘गच्छन्तेना’’ति पदं ‘‘गन्तब्ब’’न्ति पदे कत्ता। तथेवाति यथा पुरिमभिक्खु करोति, तथेव। वसन्तेन भिक्खुना पटिसामेतब्बन्ति योजना। रत्तिट्ठानन्ति रत्तिं वसनट्ठानं।

या दीघसाला वा या पण्णसाला वा उपचिकानं उट्ठानट्ठानं होति, ततोति योजना। तस्मिन्ति दीघसालादिके। हीति सच्‍चं , यस्मा वा, सन्तिट्ठन्तीति सम्बन्धो। सिलुच्‍चयोति पब्बतो, तस्मिं लेणं सिलुच्‍चयलेणं, पब्बतगुहाति अत्थो। उपचिकासङ्काति उपचिकानं उट्ठानट्ठानन्ति आसङ्का। ततोति पासाणपिट्ठियं वा पासाणथम्भेसु वा कतसेनासनादितो। आगन्तुको यो भिक्खु अनुवत्तन्तो वसतीति सम्बन्धो। सोति आगन्तुको भिक्खु। पुन सोति आगन्तुको भिक्खुयेव। ततोति गहेत्वा इस्सरियेन वसनतो। उभोपीति आवासिकोपि आगन्तुकोपि द्वे भिक्खू। तेसूति द्वीसु तीसु। पच्छिमस्साति सब्बपच्छिमस्स। आभोगेनाति आभोगमत्तेन मुत्ति नत्थि, आपुच्छितब्बमेवाति अधिप्पायो। अञ्‍ञतोति अञ्‍ञावासतो। अञ्‍ञत्राति अञ्‍ञस्मिं आवासे। तत्थेवाति आनीतावासेयेव। तेनाति वुड्ढतरेन, ‘‘सम्पटिच्छिते’’ति पदे कत्ता। सम्पटिच्छितेति वुड्ढतरेन सम्पटिच्छितेपि इतरस्स गन्तुं वट्टति आपुच्छितत्ताति वदन्ति। नट्ठं वाति नट्ठे वा सेनासने सति गीवा न होतीति योजना। अञ्‍ञस्साति अविस्सासिकपुग्गलस्स। नट्ठानीति नट्ठेसु मञ्‍चपीठेसु सन्तेसु।

वुड्ढतरो भिक्खु च इस्सरियो च यक्खो च सीहो च वाळमिगो च कण्हसप्पो च वुड्ढ…पे॰… कण्हसप्पा, ते आदयो येसं तेति वुड्ढ…पे॰… कण्हसप्पादयो, तेसु। आदिसद्देन पेतादयो सङ्गण्हाति। यत्थाति यस्मिं ठाने। अस्साति भिक्खुनो। ‘‘पलिबुद्धो’’ति पदस्स अत्थं दस्सेतुं वुत्तं ‘‘उपद्दुतो’’ति। पञ्‍चमं।

१२०.‘‘जान’’न्ति एत्थ जाननाकारं दस्सेतुं वुत्तं ‘‘अनुट्ठापनीयो अय’’न्ति। तेनेवाति जाननहेतुना एव। अस्साति ‘‘जान’’न्तिपदस्स। हीति वित्थारजोतको। सङ्घो पन देतीति सम्बन्धो। यस्साति वुड्ढादीसु अञ्‍ञतरस्स। एत्थाति वुड्ढगिलानादीसु। गिलानस्सपि देतीति योजना। ‘‘गिलानो’’ति पदं ‘‘न पीळेतब्बो, अनुकम्पितब्बो’’तिपदद्वये वुत्तकम्मं। ‘‘कामञ्‍चा’’ति पदस्स अनुग्गहत्थजोतकत्ता पनसद्दो गरहत्थजोतको।

१२१.मञ्‍चपीठानं उपचारो नामाति सम्बन्धो। यतोति यतो कुतोचि ठानतो। याव मञ्‍चपीठं अत्थि, ताव उपचारो नामाति योजना। तस्मिं उपचारे ठितस्स भिक्खुनो उपचारेति सम्बन्धो।

‘‘अभिनिसीदति वा अभिनिपज्‍जति वा’’ति एत्थ वासद्दस्स अनियमविकप्पत्थं दस्सेतुं वुत्तं ‘‘अभिनिसीदनमत्तेना’’तिआदि।

१२२.इतोति वारतो। इधाति इमस्मिं पाचित्तियवारे। यथा वुत्तो, एवन्ति सम्बन्धो। सब्बत्थेवाति सब्बेसु एव विहारपरिवेणेसु। अस्साति विसभागपुग्गलस्स। इधापीति इमस्मिम्पि सिक्खापदे। तत्थाति विस्सासिकपुग्गले।

१२३.पाळियं ‘‘आपदासू’’तिपदं ‘‘पविसती’’ति अज्झाहारपदेन सम्बन्धितब्बन्ति आह ‘‘आपदासूतिआदी’’ति। छट्ठं।

१२७.इधापीति इमस्मिम्पि सिक्खापदे। पिसद्दो पुरिमसिक्खापदापेक्खो। सब्बत्थाति सब्बेसु सिक्खापदेसु। यत्राति यस्मिं सिक्खापदे।

१२८.सोति भण्डनकारककलहकारको भिक्खु। हीति सच्‍चं, यस्मा वा। पक्खन्ति अत्तनो पक्खं। निक्‍कड्ढियमानपुग्गलपक्खे उम्मत्तकस्स निक्‍कड्ढति वा निक्‍कड्ढापेति वाति सम्बन्धितब्बं। निक्‍कड्ढकपुग्गलपक्खे उम्मत्तकस्स अनापत्तीति सम्बन्धितब्बन्ति। सत्तमं।

१३१.या कुटि सीसं न घट्टेति, सा असीसघट्टा नामाति योजना। ‘‘पमाणमज्झिमस्सा’’तिइमिना थाममज्झिमं निवत्तेति। सब्बहेट्ठिमाहीति सब्बेसं दब्बसम्भारानं हेट्ठा ठिताहि। तुलाहीति गेहथम्भानमुपरि वित्थारवसेन ठितेहि कट्ठविसेसेहि। इमिना अट्ठकथावचनेन च तुलाय सरूपं पाकटं। केचि पन तुलाय सरूपं अञ्‍ञथा वदन्ति। एतेनाति ‘‘मज्झिमस्स पुरिसस्स असीसघट्टा’’तिवचनेन दस्सिता होतीति सम्बन्धो। हीति सच्‍चं। या काचि कुटि वुच्‍चतीति योजना। उपरीति द्विभूमिककुटियं भूमितो उपरि भूमियं। अच्छन्‍नतलाति अनुल्‍लोचतला, अवितानतलाति अत्थो। इध पनाति इमस्मिं पन सिक्खापदे।

१३३.हीति सच्‍चं, यस्मा वा। यायन्ति या अयं कुटि। तत्थाति तस्सं सीसघट्टकुटियं। अनोणतेन भिक्खुनाति योजना। यस्साति कुटिया। अपरिभोगन्ति न परिभुञ्‍जितब्बं, न परिभुञ्‍जनारहन्ति अत्थो। पताणीति पतनस्स निवारणा आणि अग्गखीला। सा हि आबन्धं नयति पवत्तेतीति आणीति वुच्‍चति। यत्थाति यस्मिं मञ्‍चपीठे । न निप्पतन्तीति निक्खन्तो हुत्वा न पतन्ति। आहच्‍चपादकेति अङ्गे आहनित्वा विज्झित्वा तत्थ पवेसितपादके। नागदन्तकादीसूति नागस्स दन्तो वियाति नागदन्तको, सदिसत्थे को, सो आदि येसं तेति नागदन्तकादयो, तेसु। आदिसद्देन भित्तिखीलादयो सङ्गण्हातीति। अट्ठमं।

१३६.छादितं नामाति एत्थ छादितसद्दो भावत्थो होति, तेनाह ‘‘छादन’’न्ति। उजुकमेवाति छदनुट्ठापनतो उद्धं उजुकं एव। तन्ति छादनं। अपनेत्वापीति नासेत्वापि। तस्माति यस्मा लब्भति, तस्मा, पक्‍कमितब्बन्ति सम्बन्धो। परिक्खेपेनाति परिवारेन छादेन्तस्साति योजना। इधापीति परियायछादनेपि अधिट्ठहित्वाति सम्बन्धो। तुण्हीभूतेनाति तुण्हीभूतो हुत्वा। छदनुपरीति छदनस्स उपरि। हीति सच्‍चं। ‘‘ततो चे उत्तरि’’न्ति एत्थ ततो द्वत्तिपरियायतो उपरीति दस्सेन्तो आह ‘‘तिण्णं मग्गानं वा’’तिआदि।

१३७.करेन हत्थेन लुनितब्बो, छिन्दितब्बो, लातब्बो गहेतब्बोति वा करळोति कते अत्थपकरणादितो तिणमुट्ठि एवाति आह ‘‘तिणमुट्ठिय’’न्ति। नवमं।

१४७.ते भिक्खूति छब्बग्गिया भिक्खू भवेय्युन्ति सम्बन्धो। अदिट्ठं सच्‍चं येहीति अदिट्ठसच्‍चा, तेसं भावो अदिट्ठसच्‍चत्तं, तस्मा अदिट्ठसच्‍चत्ता बन्धित्वाति योजना। नेसन्ति छब्बग्गियानं। अञ्‍ञेनेव उपायेनाति अलद्धसम्मुतितो अञ्‍ञेनेव लद्धसम्मुतिसङ्खातेन कारणेन कत्तुकामोति सम्बन्धो। परतोति परस्मिं पच्छा, उपरीति अत्थो। करोन्तो वाति परिबाहिरे करोन्तो एव हुत्वा आहाति योजना। हीति सच्‍चं, यस्मा वा। यस्मा न भूतपुब्बानि, इति तस्मा परिबाहिरं करोन्तो वाति अत्थो।

तत्थाति ‘‘अनुजानामी’’तिआदिवचने। सीलवाति एत्थ वन्तुसद्दो पसंसत्थे च अतिसयत्थे च निच्‍चयोगत्थे च होति। तस्साति लद्धसम्मुतिकस्स। तन्ति सीलं। पातिमोक्खसंवरसद्दानं कम्मधारयभावं, तेहि च संवुतसद्दस्स तप्पुरिसभावं दस्सेतुं वुत्तं ‘‘पातिमोक्खोवा’’तिआदि। तत्थ एवसद्देन कम्मधारयभावं, एनसद्देन च तप्पुरिसभावं दस्सेतीति दट्ठब्बं।

वत्ततीति अत्तभावं पवत्तेति। कारितपच्‍चयो हि अदस्सनं गतो। इमिना इरियापथविहार दिब्बविहार ब्रह्मविहार अरियविहारेसु चतूसु विहारेसु अत्तभाववत्तनं इरियापथविहारं दस्सेति। हीति सच्‍चं। एतन्ति ‘‘पातिमोक्खसंवरसंवुतो विहरती’’तिवचनं। विभङ्गेति झानविभङ्गे।

‘‘सील’’न्तिआदीनि अट्ठ पदानि तुल्याधिकरणानि। अयं पनेत्थ सम्बन्धो – सीलं कुसलानं धम्मानं समापत्तिया पतिट्ठा आदि चरणं संयमो संवरो मोक्खं पमोक्खन्ति। समापत्तियाति समापत्तत्थाय। ‘‘उपेतो’’तिआदीनि सत्त पदानि अञ्‍ञमञ्‍ञवेवचनानि। तत्थ उपपन्‍नोति युत्तो अनुयुत्तो। समन्‍नागतोति समन्ततो अनु पुनप्पुनं आगतोति समन्‍नागतो, समङ्गीभूतोति अत्थो। एत्थ हि संसद्दो समन्तत्थवाचको, अनुसद्दो नउपच्छिन्‍नत्थवाचको। तेनाति तेन कारणेन। पालेतीति अत्तभावं बाधनतो रक्खति। यपेतीति अत्तभावो पवत्तति। यापेतीति अत्तभावं पवत्तापेति। यप यापने। यापनं पवत्तनन्ति हि धातुपाठेसु वुत्तं (सद्दनीतिधातुमालायं १८ पकारन्तधातु)। विहरतीति एत्थ एको आकारत्थवाचको इतिसद्दो लुत्तनिद्दिट्ठो, इति वुच्‍चति, इति वुत्तन्ति वा योजना।

आचारगोचरसद्दानं द्वन्दभावं, तेहि च सम्पन्‍नसद्दस्स तप्पुरिसभावं दस्सेन्तो आह ‘‘आचारगोचरसम्पन्‍नो’’तिआदि। तत्थ चसद्देन द्वन्दभावं, एनसद्देन च तप्पुरिसभावं दस्सेति। अणुसद्दो अप्पत्थो, मत्तसद्दो पमाणत्थोति आह ‘‘अप्पमत्तकेसू’’ति। ‘‘दस्सनसीलो’’तिइमिना ‘‘दस्सावी’’तिएत्थ आवीसद्दस्स तस्सीलत्थभावं दस्सेति। ‘‘समादाया’’ति एत्थ संपुब्बआपुब्बस्स दासद्दस्स कम्मापेक्खत्ता तस्स कम्मं दस्सेतुं वुत्तं ‘‘तं तं सिक्खापद’’न्ति। इमिना ‘‘सिक्खापदेसू’’ति उपयोगत्थे भुम्मवचनन्ति दस्सेति। अथ वा सिक्खापदेसूति निद्धारणत्थे भुम्मवचनमेतं। ‘‘तं तं सिक्खापद’’न्ति कम्मं पन अज्झाहरितब्बन्ति दस्सेति। ‘‘समादाया’’ति एत्थ संसद्दस्स च आपुब्बस्स दासद्दस्स च यकारस्स च अत्थं दस्सेतुं ‘‘साधुकं गहेत्वा’’ति वुत्तं। एत्थाति इमिस्सं अट्ठकथायं। वित्थारो पन गहेतब्बोति योजना। योति कुलपुत्तो।

१४८.वत्थुस्मिन्ति अट्ठुप्पत्तियं। ककारलोपं कत्वा गरुधम्माति वुच्‍चन्तीति आह ‘‘गरुकेहि धम्मेही’’ति। तेति गरुधम्मा। हीति यस्मा। ‘‘एकतो’’ति सामञ्‍ञेन वुत्तवचनस्स विसेसेन गहेतब्बतं दस्सेतुं वुत्तं ‘‘भिक्खुनीनं सन्तिके’’ति। यथावत्थुकमेवाति पाचित्तियमेव। तञ्हि वत्थुस्स आपत्तिकारणस्स अनुरूपं पवत्तत्ता ‘‘यथावत्थुक’’न्ति वुच्‍चति।

१४९.पातोति पगेव, पठमन्ति अत्थो। असम्मट्ठं सम्मज्‍जीतब्बन्ति सम्बन्धो। असम्मज्‍जने दोसं पाकटं करोन्तो आह ‘‘असम्मट्ठं ही’’तिआदि। हीति तप्पाकटीकरणजोतको। तन्ति परिवेणं। दिस्वा भवेय्युन्ति सम्बन्धो। तेनाति असोतुकामानं विय भवनहेतुना। परिवेणसम्मज्‍जनस्स आनिसंसं दस्सेत्वा पानीयपरिभोजनीयउपट्ठानस्स तमेव दस्सेन्तो आह ‘‘अन्तो गामतो पना’’ति आदि। तस्मिन्ति पानीयपरिभोजनीये।

साखाभङ्गम्पीति भञ्‍जितब्बसाखम्पि। दुतियोति विञ्‍ञू पुरिसो दुतियो। निसीदितब्बट्ठानं दस्सेन्तो आह ‘‘निसीदितब्ब’’न्तिआदि। ‘‘विहारमज्झे’’ति सामञ्‍ञतो वत्वा विसेसतो दस्सेतुं वुत्तं ‘‘द्वारे’’ति। ओसरन्ति अवसरन्ति एत्थाति ओसरणं, तञ्‍च तं ठानञ्‍चेति ओसरणट्ठानं, तस्मिं। समग्गत्थाति एत्थ संपुब्बो च आपुब्बो च गमुसद्दो होति, ततो हिय्यत्तनीसङ्खातं त्थवचनं वा होति, पञ्‍चमीसङ्खातस्स थवचनस्स त्थत्तं वा होति, संयोगपरत्ता आ उपसग्गो रस्सो च होति, इति अत्थं दस्सेन्तो आह ‘‘सम्मा आगतत्था’’ति। तत्थ ‘‘सम्मा’’तिपदेन संसद्दस्स अत्थं दस्सेति, ‘‘आ’’इतिपदेन आत्यूपसग्गं, ‘‘गत’’इतिपदेन गमुधातुं, ‘‘त्थ’’इतिपदेन हिय्यत्तनीसङ्खातं त्थवचनं वा, पञ्‍चमीसङ्खातस्स थवचनस्स त्थत्तं वा दस्सेति। अयं पनेत्थत्थो – समं तुम्हे आगतत्थाति। पञ्‍चमीसङ्खातस्स थवचनस्स त्थत्तकाले समं तुम्हे आगा अत्थ भवथाति। ‘‘आगच्छन्ती’’तिपदेन ‘‘वत्तन्ती’’ति एत्थ वतुधातुया अत्थं दस्सेति, ‘‘पगुणा वाचुग्गता’’तिपदेहि अधिप्पायं दस्सेति। पाळीति गरुधम्मपाळि।

तत्थाति तस्सं पाळियं, तेसु वा अभिवादनादीसु चतूसु। मग्गसम्पदानन्ति मग्गं परिहरित्वा भिक्खुस्स ओकासदानं। बीजनन्ति बीजनिया विधूपनं। पानीयापुच्छनन्ति पानीयस्स आपुच्छनं। आदिसद्देन परिभोजनीयापुच्छनादिकं सङ्गण्हाति। एत्थ चाति एतेसु चतूसु अभिवादनादीसु। ‘‘अन्तो गामे वा’’तिआदीनि छ पदानि ‘‘कातब्बमेवा’’तिपदे आधारो। राजुस्सारणायाति रञ्‍ञो आनुभावेन जनानं उस्सारणाय। महाभिक्खुसङ्घो सन्‍निपतति एत्थाति महासन्‍निपातं, तस्मिं महासन्‍निपाते ठाने निसिन्‍ने सतीति योजना। पच्‍चुट्ठानन्ति पटिकच्‍चेव उट्ठानं। तं तन्ति सामीचिकम्मं।

सक्‍कत्वाति चित्तिं कत्वा, सं आदरं कत्वाति अत्थो। तेनाह ‘‘यथा कतो’’तिआदि। तिण्णं किच्‍चानन्ति ‘‘सक्‍कत्वा गरुंकत्वा मानेत्वा’’तिसङ्खातानं तिण्णं किच्‍चानं। अनीयसद्दो कम्मत्थोति आह ‘‘न अतिक्‍कमितब्बो’’ति।

नत्थि भिक्खु एत्थाति अभिक्खुको आवासो, सो कित्तके ठाने अभिक्खुको, यो आवासो अभिक्खुको नाम होतीति आह ‘‘सचे’’ति आदि। ‘‘उपस्सयतो’’तिपदं ‘‘अब्भन्तरे’’तिपदे अपादानं। एत्थाति अभिक्खुके आवासे। हीति सच्‍चं। ततोति अड्ढयोजनब्भन्तरे ठितआवासतो। परन्ति अञ्‍ञस्मिं आवासे, भुम्मत्थे चेतं उपयोगवचनं। पच्छाभत्तन्ति भत्ततो पच्छा। तत्थाति अभिक्खुके आवासे। ‘‘भिक्खुनियो’’तिपदं ‘‘वदन्ती’’तिपदे कम्मं। वुत्तप्पमाणेति अड्ढयोजनब्भन्तरसङ्खाते वुत्तप्पमाणे। साखामण्डपेपीति साखाय छादितमण्डपेपि। पिसद्देन आवासे पन का नाम कथाति दस्सेति। वुत्ताति वसिता। एत्तावताति एकरत्तं वसितमत्तेन। एत्थाति सभिक्खुके आवासे। उपगच्छन्तीहि भिक्खुनीहि याचितब्बाति योजना। पक्खस्साति आसळ्हीमासस्स जुण्हपक्खस्स। ‘‘तेरसिय’’न्तिपदेन अवयविअवयवभावेन योजेतब्बं। मयन्ति अम्हे। यतोति येन उजुना मग्गेनाति सम्बन्धो। तेनाह ‘‘तेन मग्गेना’’ति। अञ्‍ञेन मग्गेनाति उजुमग्गतो अञ्‍ञेन जिम्हमग्गेन। अयन्ति अयं आवासो। ततोति भिक्खूनं आवासतो, भिक्खुनिउपस्सयतो वा, इदमेव युत्ततरं। वक्खति हि ‘‘अम्हाकं उपस्सयतो गावुतमत्ते’’ति। खेमट्ठानेति अभयट्ठाने। तञ्हि खीयन्ति भया एत्थाति खेमं, खेमञ्‍च तं ठानञ्‍चेति खेमट्ठानन्ति कत्वा ‘‘खेमट्ठान’’न्ति वुच्‍चति। ताहि भिक्खुनीहीति अड्ढयोजनमत्ते ठाने वसन्तीहि। ता भिक्खुनियोति गावुतमत्ते ठाने वसन्तियो। अन्तराति तुम्हाकं, अम्हाकञ्‍च निवासनट्ठानस्स, निवासनट्ठानतो वा अन्तरे वेमज्झे। भुम्मत्थे चेतं निस्सक्‍कवचनं। ठिते मग्गेति सम्बन्धो ‘‘सन्तिका’’तिपदं ‘‘आगत’’इतिपदे अपादानं। तत्थाति अञ्‍ञासं भिक्खुनीनं उपस्सये। इति याचितब्बाति योजना। ततोति भिक्खूनं याचितब्बतो, परन्ति सम्बन्धो।

१५०.‘‘अधम्मकम्मे’’ति एत्थ कतमं कम्मं नामाति आह ‘‘अधम्मकम्मेतिआदीसू’’तिआदि। तत्थाति अधम्मकम्मधम्मकम्मेसु।

१५२.उद्देसं देन्तो भणति, अनापत्तीति योजना। ओसारेतीति कथेति। चतुपरिसतीति चतुपरिसस्मिं। तत्रापीति तेन भिक्खुनीनं सुणनकारणेनाति। पठमं।

१७६.यं चीवरं निवासितुं वा पारुपितुं वा सक्‍का होति, तं चीवरं नामाति योजना। एवं हीति एवमेव। ‘‘दुक्‍कट’’न्तिइमिना ‘‘सयं सिब्बति, आपत्ति पाचित्तियस्सा’’ति एत्थ अन्तरापत्तिं दस्सेति। आराति सूचि। सा हि अरति निस्सङ्गवसेन गच्छति पविसतीति ‘‘आरा’’ति वुच्‍चति, तस्सा पथो गमनं आरापथो, तस्मिं, आरापथस्स नीहरणावसानत्ता ‘‘नीहरणे’’ति वुत्तं। सतक्खत्तुम्पीति अनेकक्खत्तुम्पि। आणत्तोति आणापीयतीति आणत्तो। ‘‘आणापितो’’ति वत्तब्बे णापेसद्दस्स लोपं, इकारस्स च अकारं कत्वा, ‘‘आदत्ते’’ति आख्यातपदे तेविभत्तिया विय तपच्‍चयस्स च द्विभावं कत्वा एवं वुत्तं। तेनाह ‘‘सकिं चीवरं सिब्बाति वुत्तो’’ति। अथ पनाति ततो अञ्‍ञथा पन। आणत्तस्साति आणापितस्स। सम्बहुलानिपि पाचित्तियानि होन्तीति सम्बन्धो।

येपि निस्सितका सिब्बन्तीति योजना, आचरियुपज्झायेसु सिब्बन्तेसूति सम्बन्धो। तेसन्ति आचरियुपज्झायानं। तेसम्पीति निस्सितकानम्पि। ञातिकानं भिक्खुनीनं चीवरन्ति सम्बन्धो। ‘‘अन्तेवासिकेही’’तिपदं ‘‘सिब्बापेन्ती’’तिपदे कारितकम्मं। तत्रापीति आचरियुपज्झायेहि सिब्बापनेपि। ‘‘अन्तेवासिके’’तिपदं ‘‘वञ्‍चेत्वा’’तिपदे सुद्धकम्मं, ‘‘सिब्बापेन्ती’’तिपदे कारितकम्मं। इतरेसन्ति आचरियुपज्झायानन्ति। छट्ठं।

१८२-३.संपुब्बो, विपुब्बो च धाधातु त्वापच्‍चयो होतीति आह ‘‘संविदहित्वा’’ति। कुक्‍कुटोति तम्बचूळो। सो हि कुकति आहारत्थं पाणकादयो आददातीति कुक्‍कुटो। अयन्ति गामो। अधिकरणे णोति आह ‘‘सम्पदन्ति एत्था’’ति। एत्थाति च एतस्मिं गामे। उत्तरपदस्स अधिकरणत्थत्ता पुब्बपदेन छट्ठीसमासोति आह ‘‘कुक्‍कुटान’’न्तिआदि। एवं णसद्दस्स अधिकरणत्थं, पुब्बपदेन छट्ठीसमासञ्‍च दस्सेत्वा इदानि णसद्दस्स भावत्थं, पुब्बपदेन बाहिरत्थसमासञ्‍च दस्सेतुं वुत्तं ‘‘अथ वा’’ति। तत्थाति पच्छिमपाठे। उप्पतित्वाति उड्डित्वा उद्धं आकासं लङ्गित्वाति अत्थो। एत्थाति पच्छिमपाठे। द्विधाति पदगमनपक्खगमनवसेन द्विपकारेन। ‘‘उपचारो न लब्भती’’तिइमिना गामन्तरो न होति, एकगामोयेव पन होति, तस्मा आपत्तिपि एकायेव होतीति दस्सेति। पच्‍चूसेति पभाते। सो हि पटिविरुद्धं तिमिरं उसेति नासेतीति पच्‍चूसोति वुच्‍चति। वस्सन्तस्साति रवन्तस्स। ‘‘वचनतो’’तिपदं ‘‘आपत्तियेवा’’तिपदे ञापकहेतु। रतनमत्तन्तरोति कुक्‍कुपमाणेन ब्यवधानो।

तत्राति ‘‘गामन्तरे गामन्तरे’’ति वचने। हीति वित्थारो। उभोपीति भिक्खुभिक्खुनियोपि संविदहन्तीति सम्बन्धो। न वदन्तीति अट्ठकथाचरिया न कथयन्ति। चतुन्‍नं मग्गानं समागमट्ठानं चतुक्‍कं, द्विन्‍नं, तिण्णं, चतुक्‍कतो अतिरेकानं वा मग्गानं सम्बद्धट्ठानं सिङ्घाटकं। तत्रापीति उपचारोक्‍कमनेपि। गामतोति अत्तनो गामतो। याव न ओक्‍कमन्ति, तावाति योजना। सन्धायाति आरब्भ। अथाति तस्मिं निक्खमनकाले। द्वेपीति भिक्खुभिक्खुनियोपि गच्छन्तीति सम्बन्धो। तन्ति वचनं।

हीति विसेसो। ‘‘गामन्तरे गामन्तरे’’ति पुरिमस्मिं नये अतिक्‍कमे अनापत्ति, ओक्‍कमने आपत्तीति अयं विसेसो।

१८४.गतपुब्बत्थाति गतपुब्बा अत्थ भवथाति अत्थो। एहि गच्छामाति वा आगच्छेय्यासीति वा वदतीति योजना। चेतियवन्दनत्थन्ति थूपस्स वन्दितुं।

१८५.विसङ्केतेनाति एत्थ कालविसङ्केतो, द्वारविसङ्केतो, मग्गविसङ्केतोति तिविधो। तत्थ कालविसङ्केतेनेव अनापत्तिं सन्धाय ‘‘विसङ्केतेन गच्छन्ति, अनापत्ती’’ति आह। द्वारविसङ्केतेन वा मग्गविसङ्केतेन वा आपत्तिमोक्खो नत्थि। तमत्थं दस्सेन्तो आह ‘‘पुरेभत्त’’न्तिआदि। चक्‍कसमारुळ्हाति इरियापथचक्‍कं वा सकटचक्‍कं वा सम्मा आरुळ्हा। जनपदाति जनकोट्ठासा। परियायन्तीति परि पुनप्पुनं यन्ति च आयन्ति चाति। सत्तमं।

१८९.एकं तीरं अगामकं अरञ्‍ञं होतीति योजना। अद्धयोजनगणनाय पाचित्तियानि होन्तीति सम्बन्धो। मज्झेन गमनेपीति पिसद्दो अगामकअरञ्‍ञतीरपस्सेन गमने का नाम कथाति दस्सेति। न केवलं नदियाति केवलं नदिया एव अनापत्ति नाति योजना, अञ्‍ञेसुपि समुद्दादीसु अनापत्तीति अधिप्पायो। योपि भिक्खु गच्छतीति सम्बन्धो। हीति सच्‍चं, यस्मा वा।

१९१.कालविसङ्केतो, तित्थविसङ्केतो, नावाविसङ्केतोति तिविधो विसङ्केतो। तत्थ कालविसङ्केतेन अनापत्तिं सन्धाय ‘‘विसङ्केतेन अभिरुहन्ती’’ति वुत्तं। अञ्‍ञेन विसङ्केतेन आपत्तियेव, तमत्थं दस्सेन्तो आह ‘‘इधापी’’तिआदीति। अट्ठमं।

१९४.लद्धब्बन्ति लद्धारहं। अस्साति ‘‘भिक्खुनिपरिपाचित’’न्तिपदस्स। सम्मा आरभितब्बोति समारम्भोति दस्सेन्तो आह ‘‘समारद्धं वुच्‍चती’’ति। पटियादितस्साति परिपाचितस्स भत्तस्स। गिहीनं समारम्भोति गिहिसमारम्भो, कत्वत्थे चेतं सामिवचनं। ततोति ततो भत्ततो। अञ्‍ञत्राति विना। तमत्थं विवरन्तो आह ‘‘तं पिण्डपातं ठपेत्वा’’ति। पदभाजने पन वुत्तन्ति सम्बन्धो। ‘‘ञातकपवारितेही’’तिपदं ‘‘असमारद्धो’’तिपदे कत्ता। अत्थतोति भिक्खुनिअपरिपाचितअत्थतो। तस्माति यस्मा अत्थतो समारद्धोव होति, तस्मा।

१९५.पटियादितन्ति पटियत्तं। पकतिया पटियत्तं पकतिपटियत्तन्ति दस्सेन्तो आह ‘‘पकतिया’’तिआदि। महापच्‍चरियं पन वुत्तन्ति सम्बन्धो। तस्साति तस्सेव भिक्खुनो। अञ्‍ञस्साति ततो अञ्‍ञस्स भिक्खुनो।

१९७.भिक्खुनिपरिपाचितेपीति पिसद्दो भिक्खुनिअपरिपाचिते का नाम कथाति दस्सेतीति। नवमं।

२०६.‘‘अद्धयोजनं वा योजनं वा’’तिइमिना ‘‘पक्‍कमितु’’न्तिपदस्स कम्मं दस्सेति। ‘‘गन्तु’’न्तिइमिना कमुसद्दस्स पदविक्खेपत्थं दस्सेति। ‘‘अनोदिस्सा’’तिपदस्स त्वापच्‍चयन्तभावं दस्सेतुं ‘‘अनुद्दिसित्वा’’ति वुत्तं। पासं डेतीति पासण्डो, सत्तानं चित्तेसु दिट्ठिपासं खिपतीति अत्थो। अथ वा तण्हापासं, दिट्ठिपासञ्‍च डेति उड्डेतीति पासण्डो, तं पासण्डं। यावतत्थो पञ्‍ञत्तो होतीति यावता अत्थो होति, तावता पञ्‍ञत्तो होतीति योजना। ‘‘यावदत्थो’’तिपि पाठो, अयमेवत्थो। दकारो पदसन्धिकरो। सकिं भुञ्‍जितब्बन्ति एकदिवसं सकिं भुञ्‍जितब्बन्ति अत्थो। तेनाह ‘‘एकदिवसं भुञ्‍जितब्ब’’न्ति।

एत्थाति इमस्मिं सिक्खापदे। एककुलेन वा पञ्‍ञत्तन्ति सम्बन्धो। भुञ्‍जितुं न वट्टति एकतो हुत्वा पञ्‍ञत्तत्ताति अधिप्पायो। नानाकुलेहि पञ्‍ञत्तं पिण्डन्ति योजना। भुञ्‍जितुं वट्टति नानाकुलानि एकतो अहुत्वा विसुं विसुं पञ्‍ञत्तत्ताति अधिप्पायो। योपि पिण्डो छिज्‍जतीति सम्बन्धो। उपच्छिन्दित्वाति असद्धियादिपापचित्तत्ता उपच्छिन्दित्वा।

२०८.अनुवसित्वाति पुनप्पुनं वसित्वा। अन्तरामग्गे गच्छन्तत्ता ‘‘गच्छन्तो भुञ्‍जती’’ति इदं ताव युत्तं होतु, गतट्ठाने पन गमितत्ता कथं? पच्‍चुप्पन्‍नसमीपोपि अतीतो तेन सङ्गहितत्ता युत्तं। ‘‘कुतो नु त्वं भिक्खु आगच्छसी’’तिआदीसु (सं॰ नि॰ १.१३०) विय। तंसमीपोपि हि तादिसो। नानाट्ठानेसु नानाकुलानं सन्तके पकतिया अनापत्तिभावतो नानाट्ठानेसु एककुलस्सेव सन्तकं सन्धाय वुत्तं ‘‘अनापत्ती’’ति। आरद्धस्स विच्छेदत्ता ‘‘पुन एकदिवसं भुञ्‍जितुं लभती’’ति वुत्तं। ‘‘ओदिस्सा’’ति सामञ्‍ञतो वुत्तेपि भिक्खूयेव गहेतब्बाति आह ‘‘भिक्खूनंयेवा’’ति। पठमं।

२११.भत्तं अनधिवासेन्तानं कस्मा चीवरं परित्तं उप्पज्‍जतीति आह ‘‘भत्तं अगण्हन्तान’’न्तिआदि।

२१२.चीवरकारके भिक्खू भत्तेन कस्मा निमन्तेन्तीति आह ‘‘गामे’’तिआदि।

२१५.नानावेरज्‍जकेति एत्थ रञ्‍ञो इदं रज्‍जं, विसदिसं रज्‍जं विरज्‍जं, नानप्पकारं विरज्‍जं नानाविरज्‍जं। नानाविरज्‍जेहि आगता नानावेरज्‍जका। मज्झे वुद्धि होतीति आह ‘‘नानाविधेहि अञ्‍ञरज्‍जेहि आगते’’ति। अञ्‍ञरज्‍जेहीति राजगहतो अञ्‍ञेहि रज्‍जेहि। रञ्‍जितब्बन्ति रञ्‍जन्ति वुत्ते निग्गहितस्स अनासनं सन्धाय वुत्तं ‘‘नानावेरञ्‍जकेइतिपि पाठो’’ति।

२१८.गणभोजनेति गणस्स भोजनं गणभोजनं, गणभोजनस्स भोजनं गणभोजनं, तस्मिं गणभोजने पाचित्तियन्ति अत्थो। ‘‘रत्तूपरतो’’तिआदीसु (दी॰ नि॰ १.१०; म॰ नि॰ १.२९३) विय एकस्स भोजनसद्दस्स लोपो दट्ठब्बो। ननु उपोसथे विय द्वे तयो गणो नामाति आह ‘‘इध गणो नाम चत्तारो’’तिआदि। तेन द्वे तयो गणो नाम न होन्ति, चत्तारो पन आदिं कत्वा तदुत्तरि गणो नामाति दस्सेति। तं पनेतन्ति एत्थ एतसद्दो वचनालङ्कारो द्वीसु सब्बनामेसु पुब्बस्सेव येभुय्येन पधानत्ता। पसवतीति वड्ढति, जायतीति अत्थो। वेवचनेन वाति ‘‘भत्तेन निमन्तेमि, भोजनेन निमन्तेमी’’ति परियायेन वा। भासन्तरेन वाति मूलभासातो अञ्‍ञाय भासाय वा। एकतो निमन्तिता भिक्खूति सम्बन्धो। हीति सच्‍चं, यस्मा वा। पमाणन्ति कारणं। ‘‘चत्तारो’’ति लिङ्गविपल्‍लासं कत्वा ‘‘विहारे’’तिपदेन योजेतब्बं। ठितेसुयेवाति पदं निद्धारणसमुदायो। एको निमन्तितोति सम्बन्धो।

चत्तारो भिक्खू विञ्‍ञापेय्युन्ति सम्बन्धो। पाटेक्‍कन्ति पतिएकस्स भावो पाटेक्‍कं, विसुन्ति अत्थो। एकतो वा नानातो वा विञ्‍ञापेय्युन्ति सम्बन्धो।

छविसङ्खाततो बाहिरचम्मतो अब्भन्तरचम्मस्स थूलत्ता ‘‘महाचम्मस्सा’’ति वुत्तं। फालं एतेसं पादानं सञ्‍जातन्ति फालिता, उप्पादेन्तीति सम्बन्धो। पहटमत्ते सतीति योजना। लेसेन कप्पन्ति पवत्तं चित्तं लेसकप्पियं।

सुत्तञ्‍चाति सूचिपासपवेसनसुत्तञ्‍च। ननु विसुं चीवरदानसमयो विय चीवरकारसमयोपि अत्थि, कस्मा ‘‘यदा तदा’’ति वुत्तन्ति आह ‘‘विसुं ही’’तिआदि। हीति सच्‍चं, यस्मा वा। विसुं चीवरदानसमयो विय चीवरकारसमयो नाम यस्मा नत्थि, तस्मा ‘‘यदा तदा’’ति मया वुत्तन्ति अधिप्पायो। तस्मा यो भिक्खु करोति, तेन भुञ्‍जितब्बन्ति योजना। सूचिवेठनकोति सिब्बनत्थाय द्वे पिलोतिकखण्डे सम्बन्धित्वा सूचिया विज्झनको। विचारेतीति पञ्‍चखण्डसत्तखण्डादिवसेन संविदहति। छिन्दतीति सत्थकेन वा हत्थेन वा छिन्दति। मोघसुत्तन्ति मुय्हनं मोघो, अत्थतो गहेतब्बछट्टेतब्बट्ठाने मुय्हनचित्तं, तस्स छिन्दनं सुत्तन्ति मोघसुत्तं। आगन्तुकपट्टन्ति दुपट्टचीवरे मूलपट्टस्स उपरि ठपितपट्टं। पच्‍चागतन्ति पट्टचीवरादीसु लब्भति। बन्धतीति मूलपट्टेन आगन्तुकपट्टं। बन्धति। अनुवातन्ति चीवरं अनुपरियायित्वा वीयति बन्धीयतीति अनुवातं, तं छिन्दति। घट्टेतीति द्वे अनुवातन्ते अञ्‍ञमञ्‍ञं सम्बज्झति। आरोपेतीति चीवरस्स उपरि आरोपेति। तत्थाति चीवरे। सुत्तं करोतीति सूचिपासपवेसनसुत्तं वट्टेति। वलेतीति वट्टित्वा सुत्तवेठनदण्डके आवट्टेति। पिप्फलिकन्ति सत्थकं। तञ्हि पियम्पि फालेतीति पिप्फलि, सायेव पिप्फलिकन्ति कत्वा पिप्फलिकन्ति वुच्‍चति, तं निसेति निसानं करोतीति अत्थो। यो पन कथेति, एतं ठपेत्वाति योजना।

अद्धानमग्गस्स द्विगावुतत्ता ‘‘अद्धयोजनब्भन्तरे गावुते’’ति वुत्तं। अभिरूळ्हेन भुञ्‍जितब्बन्ति सम्बन्धो। यत्थाति यस्मिं काले। ‘‘सन्‍निपतन्ती’’ति बहुकत्तुवसेन वुत्तं। अकुसलं परिवज्‍जेतीति परिब्बाजको, पब्बज्‍जवेसं वा परिग्गहेत्वा वजति गच्छति पवत्ततीति परिब्बाजको। विना भावपच्‍चयेन भावत्थस्स ञातब्बतो परिब्बाजकभावो परिब्बाजको, तं समापन्‍नोति परिब्बाजकसमापन्‍नो। अथ वा परिब्बाजकेसु समापन्‍नो परियापन्‍नोति परिब्बाजकसमापन्‍नो। ‘‘एतेस’’न्तिपदं ‘‘येन केनची’’तिपदे निद्धारणसमुदायो।

२२०.येपि भिक्खू भुञ्‍जन्तीति सम्बन्धो। तत्थाति ‘‘द्वे तयो एकतो’’तिवचने। अनिमन्तितो चतुत्थो यस्स चतुक्‍कस्साति अनिमन्तितचतुत्थं, अनिमन्तितेन वा चतुत्थं अनिमन्तितचतुत्थं। एसेव नयो अञ्‍ञेसुपि चतुत्थेसु। इधाति इमस्मिं सासने। निमन्तेतीति अकप्पियनिमन्तनेन निमन्तेति। तेसूति चतूसु भिक्खूसु। सोति उपासको। अञ्‍ञन्ति नागतभिक्खुतो अञ्‍ञं, निमन्तितभिक्खुतो वा। तङ्खणप्पत्तन्ति तस्मिं पुच्छनकथनक्खणे पत्तं। हीति वित्थारो। तत्थाति तस्मिं ठाने, गेहे वा। तेहीति करणभूतेहि भिक्खूहि।

सोति पिण्डपातिको। अनागच्छन्तम्पीति सयं न आगच्छन्तम्पि। लच्छथाति लभिस्सथ।

सोपीति सामणेरोपि, न पिण्डपातिकोयेवाति अत्थो।

तत्थाति गिलानचतुत्थे, तेसु चतूसु वा। गिलानो इतरेसं पन गणपूरको होतीति योजना।

गणपूरकत्ताति समयलद्धस्स गणपूरकत्ता। चतुक्‍कानीति चीवरदानचतुत्थं चीवरकारचतुत्थं अद्धानगमनचतुत्थं नावाभिरुहनचतुत्थं महासमयचतुत्थं, समणभत्तचतुत्थन्ति छ चतुक्‍कानि। पुरिमेहि मिस्सेत्वा एकादस चतुक्‍कानि वेदितब्बानि। एको पण्डितो भिक्खु निसिन्‍नो होतीति सम्बन्धो। तेसूति तीसु भिक्खूसु, गतेसु गच्छतीति योजना। भुत्वा आगन्त्वा ठितेसुपि अनापत्तियेव। कस्मा सब्बेसं अनापत्ति, ननु चत्तारो भिक्खू एकतो गण्हन्तीति आह ‘‘पञ्‍चन्‍नं ही’’तिआदि। हीति सच्‍चं, यस्मा वा। भोजनानंयेवाति न यागुखज्‍जकफलाफलादीनं। तानि चाति येहि भोजनेहि विसङ्केतं नत्थि, तानि च भोजनानि। तेहीति चतूहि भिक्खूहि । तानीति यागुआदीनि। इतीति तस्मा अनापत्तिन्ति योजना।

कोचि पेसितो अपण्डितमनुस्सो वदतीति योजना। कत्तुकामेन पेसितोति सम्बन्धो। भत्तं गण्हथाति वाति वासद्दो ‘‘ओदनं गण्हथ, भोजनं गण्हथ, अन्‍नं गण्हथ, कुरं गण्हथा’’ति वचनानिपि सङ्गण्हाति। निमन्तनं सादियन्तीति नेमन्तनिका। पिण्डपाते धुतङ्गे नियुत्ताति पिण्डपातिका। पुनदिवसे भन्तेति वुत्तेति योजना। हरित्वाति अपनेत्वा। ततोति ततो वदनतो परन्ति सम्बन्धो। विक्खेपन्ति विविधं खेपं। तेति असुका च असुका च गामिका। भन्तेति वुत्तेति योजना। सोपीति अपण्डितमनुस्सोपि, न गामिकायेवाति अत्थो। कस्मा न लभामि भन्तेति वुत्तेति योजना। एवं ‘‘कथं निमन्तेसुं भन्ते’’ति एत्थापि। ततोति तस्मा कारणा। एसाति एसो गामो। तन्ति भूमत्थे चेतं उपयोगवचनं, तस्मिं गामे चरथाति हि अत्थो। किं एतेनाति एतेन पुच्छनेन किं पयोजनं। एत्थाति पुच्छने। मा पमज्‍जित्थाति वदतीति सम्बन्धो। दुतियदिवसेति निमन्तनदिवसतो दुतियदिवसे। धुरगामेति पधानगामे, अन्तिकगामे वा। भावो नाम किरियत्ता एकोयेव होति, तस्मा कत्तारं वा कम्मं वा सम्बन्धं वा अपेक्खित्वा बहुवचनेन न भवितब्बं, तेन वुत्तं ‘‘न दुब्बचेहि भवितब्ब’’न्ति। तेसूति गामिकेसु भोजेन्तेसूति सम्बन्धो। असनसालायन्ति भोजनसालायं। सा हि असति भुञ्‍जति एत्थाति असना, सलन्ति पविसन्ति अस्सन्ति साला, असना च सा सालाचेति असनसालाति अत्थेन ‘‘असनसाला’’ति वुच्‍चति।

२२२.उद्धं सूरो उग्गतो अस्मिं कालेति उस्सूरोति वुत्ते अतिदिवाकालोति आह ‘‘अतिदिवा’’ति।

२२६.अयं भत्तविकप्पना नाम वट्टतीति योजना। पञ्‍चसु सहधम्मिकेसूति निद्धारणसमुदायो, इत्थन्‍नामस्साति सम्बन्धो। यदि पन सम्मुखापि विकप्पितुं वट्टति, तदा अत्तना सह ठितस्स भगवतो कस्मा न विकप्पेतीति आह ‘‘सा चाय’’न्तिआदि। सा अयं विकप्पना सङ्गहिताति सम्बन्धो। कस्मा भगवतो विकप्पेतुं न वट्टतीति आह ‘‘भगवति ही’’तिआदि। हीति सच्‍चं, यस्मा वा। सङ्घेन कतन्ति सम्बन्धो।

२२९.‘‘द्वे तयो निमन्तने’’तिपदानि लिङ्गविपल्‍लासानीति आह ‘‘द्वे तीणि निमन्तनानी’’ति। निमन्तितब्बो एतेहीति निमन्तनानि भोजनानि भुञ्‍जतीति सम्बन्धो। द्वे तीणि कुलानि आकिरन्तीति योजना। सूपब्यञ्‍जनन्ति सूपो च ब्यञ्‍जनञ्‍च सूपब्यञ्‍जनं। अनापत्ति एकतो मिस्सितत्ताति अधिप्पायो। मूलनिमन्तनन्ति पठमनिमन्तनं भोजनं। अन्तोति हेट्ठा। एकम्पि कबळन्ति एकम्पि आलोपं। यथा तथा वाति येन वा तेन वा आकारेन। तत्थाति तस्मिं भोजने। रसं वाति खीरतो अञ्‍ञं रसं वा। येन खीररसेन अज्झोत्थतं भत्तं एकरसं होति, तं खीरं वा तं रसं वा आकिरन्तीति योजना। यंसद्दो हि उत्तरवाक्ये ठितो पुब्बवाक्ये तंसद्दं अवगमयति। खीरेन संसट्ठं भत्तं खीरभत्तं। एवं रसभत्तं। अञ्‍ञेपीति खीरभत्तरसभत्तदायकतो अञ्‍ञेपि। अनापत्ति भत्तेन अमिस्सितत्ताति अधिप्पायो। ‘‘भुञ्‍जन्तेना’’तिपदं ‘‘भुञ्‍जितु’’न्तिपदे भावकत्ता। सप्पिपायासेपीति सप्पिना च पायासेन च कते भत्तेपि।

तस्साति महाउपासकस्स। आपत्तीति च वट्टतीति च द्विन्‍नं अट्ठकथावादानं युत्तभावं महापच्‍चरिवादेन दस्सेतुं वुत्तं ‘‘महापच्‍चरिय’’न्तिआदि। द्वे अट्ठकथावादा हि सन्धायभासितमत्तमेव विसेसा, अत्थतो पन एका। महापच्‍चरियं वुत्तन्ति सम्बन्धो। एकोवाति कुम्भिया एकोव। परम्परभोजनन्ति परस्स परस्स भोजनं । निमन्तितम्हाति अहं निमन्तितो अम्हि ननूति अत्थो। आपुच्छित्वापीति महाउपासकं आपुच्छित्वापि।

सोति अनुमोदको भिक्खु। तन्ति भिक्खुं। अञ्‍ञोति अञ्‍ञतरो। किन्ति कस्मा। निमन्तितत्ताति निमन्तितभावतो।

सकलेन गामेन निमन्तितोपि एकतो हुत्वाव निमन्तितस्स कप्पति, न विसुं विसुन्ति आह ‘‘एकतो हुत्वा’’ति। पूगेपीति समादपेत्वा पुञ्‍ञं करोन्तानं समूहेपि। ‘‘निमन्तियमानो’’तिपदस्स निमन्तनाकारं दस्सेन्तो आह ‘‘भत्तं गण्हा’’ति। यदग्गेनाति यं अग्गेन येन कोट्ठासेनाति अत्थो। द्वीसु थेरवादेसु महासुमत्थेरवादोव युत्तोति सो पच्छा वुत्तोति। ततियं।

२३१.इमस्मिं पन वत्थुस्मिन्ति इमस्मिं पूववत्थुस्मिं। एतन्ति पाथेय्यवत्थुं। अरियसावकत्ताति अरियभूतस्स सावकस्स भावतो, अरियस्स वा सम्मासम्बुद्धस्स सावकभावतो।

२३३.पहेणकपण्णाकारसद्दानं अञ्‍ञमञ्‍ञवेवचनत्ता वुत्तं ‘‘पहेणकत्थायाति पण्णाकारत्थाया’’ति। इधाति ‘‘पूवेहि वा’’तिपदे, सिक्खापदे वा। बद्धसत्तूति मधुसक्खरादीहि मिस्सेत्वा बद्धसत्तु। थूपीकतन्ति थूपीकतं कत्वा।

‘‘द्वत्तिपत्तपूरे’’तिपदस्स विसेसनुत्तरभावं दस्सेतुं वुत्तं ‘‘पूरे पत्ते’’ति। द्वे वा तयो वा पत्ताति द्वत्तिपत्ता, वासद्दत्थे सङ्ख्योभयबाहिरत्थसमासो, तिसद्दपरत्ता द्विस्स च अकारो होति, द्वत्तिपत्ता च ते पूरा चाति द्वत्तिपत्तपूरा, ते द्वत्तिपत्तपूरे गहेत्वाति योजना। ‘‘आचिक्खितब्ब’’न्ति वुत्तवचनस्स आचिक्खनाकारं दस्सेन्तो आह ‘‘अत्र मया’’तिआदि। तेनापीति दुतियेनापि। पठमभिक्खु एकं गहेत्वा दुतियभिक्खुस्स आरोचनञ्‍च दुतियभिक्खु एकं गहेत्वा ततियभिक्खुस्स आरोचनञ्‍च अतिदिसन्तो आह ‘‘येना’’तिआदि। तत्थ येनाति पठमभिक्खुना। पटिक्‍कमन्ति भुञ्‍जीत्वा एत्थाति पटिक्‍कमनन्ति वुत्ते असनसालाव गहेतब्बाति आह ‘‘असनसाल’’न्ति। यत्थाति यस्सं असनसालायं। मुखोलोकनं न वट्टतीति आह ‘‘अत्तनो’’तिआदि। अञ्‍ञत्थाति पटिक्‍कमनतो अञ्‍ञत्थ। अस्साति भिक्खुस्स।

‘‘संविभजितब्ब’’न्ति वुत्तवचनस्स संविभजनाकारं दस्सेतुं वुत्तं ‘‘सचे तयो’’तिआदि। यथामित्तन्ति यस्स यस्स मित्तस्स। अकामाति न कामेन। कारणत्थे चेतं निस्सक्‍कवचनं।

२३५.अन्तरामग्गेति मग्गस्स अन्तरो अन्तरामग्गो, सुखुच्‍चारणत्थं मज्झे दीघो, तस्मिं। बहुम्पि देन्तानं एतेसं ञातकपवारितानं बहुम्पि पटिग्गण्हन्तस्साति योजना। अट्ठकथासु पन वुत्तन्ति सम्बन्धो। अट्ठकथानं वचनं पाळिया न समेतीति। चतुत्थं।

२३७.उद्धङ्गमो रवो ओरवो, सोयेव सद्दो ओरवसद्दो, काकानं ओरवसद्दो ककोरवसद्दोति दस्सेन्तो आह ‘‘काकान’’न्तिआदि।

२३९.तवन्तुपच्‍चयस्स अतीतत्थभावं दस्सेतुं वुत्तं ‘‘तत्थ चा’’तिआदि। तत्थाति ‘‘भुत्तवा’’तिपदे। यस्मा येन भिक्खुना अज्झोहरितं होति, तस्मा सो ‘‘भुत्तावी’’ति सङ्ख्यं गच्छतीति योजना। सङ्खादित्वाति दन्तेहि चुण्णं कत्वा। तेनाति तेन हेतुना। अस्साति ‘‘भुत्तावी’’तिपदस्स। पवारेति पटिक्खिपतीति पवारितो भिक्खूति दस्सेन्तो आह ‘‘कतपवारणो’’ति। सोपि चाति सो पटिक्खेपो च होतीति सम्बन्धो। अस्साति ‘‘पवारितो’’तिपदस्स। तत्थाति ‘‘असनं पञ्‍ञायती’’तिआदिवचने। यस्मा भुत्तावीतिपि सङ्ख्यं गच्छति, तस्मा न पस्सामाति योजना। ‘‘असनं पञ्‍ञायती’’ति पदभाजनिया ‘‘भुत्तावी’’ति मातिकापदस्स असंसन्दनभावं दस्सेतुं वुत्तं ‘‘असनं पञ्‍ञायतीति इमिना’’तिआदि। यञ्‍चाति यञ्‍च भोजनं। दिरत्तादीति एत्थ आदिसद्देन पञ्‍चादिवचनं सङ्गण्हाति। एतन्ति ‘‘भुत्तावी’’तिपदं।

‘‘असनं पञ्‍ञायती’’तिआदीसु विनिच्छयो एवं वेदितब्बोति सम्बन्धो। ‘‘पञ्‍ञायती’’ति एत्थ ञाधातुया खायनत्थं दस्सेतुं वुत्तं ‘‘दिस्सती’’ति। ‘‘हत्थपासे’’तिपदस्स द्वादसहत्थप्पमाणो हत्थपासो नाधिप्पेतोति आह ‘‘अड्ढतेय्यहत्थप्पमाणे’’ति। वाचाय अभिहरणं नाधिप्पेतं। तेनाह ‘‘कायेना’’ति। अभिहरतीति अभिमुखं हरति। तन्ति भोजनं। एतन्ति पञ्‍चङ्गभावं, ‘‘पञ्‍चहि…पे॰… पञ्‍ञायती’’ति वचनं वा।

तत्राति ‘‘असनं पञ्‍ञायती’’तिआदिवचने। अस्नातीति कीयादिगणत्ता, तस्स च एकक्खरधातुत्ता सकारनकारानं संयोगो दट्ठब्बो। तन्ति भोजनं। उन्दति पसवति भुञ्‍जन्तानं आयुबलं जनेतीति ओदनो। यवादयो पूतिं कत्वा कतत्ता कुच्छितेन मसीयति आमसीयतीति कुमासो। सचति समवायो हुत्वा भवतीति सत्तु। ब्यञ्‍जनत्थाय मारेतब्बोति मच्छो। मानीयति भुञ्‍जन्तेहीति मंसं। तत्थाति ओदनादीसु पञ्‍चसु भोजनेसु। सारो अस्सत्थि अञ्‍ञेसं धञ्‍ञानन्ति साली। वहति भुञ्‍जन्तानं जीवितन्ति वीहि। यवति अमिस्सितोपि मिस्सितो विय भवतीति यवो। गुधति परिवेठति मिलक्खभोजनत्ताति गोधुमो। सोभनसीसत्ता कमनीयभावं गच्छतीति कङ्गु। महन्तसीसत्ता, मधुररसनाळत्ता च वरीयति पत्थीयति जनेहीति वरको। कोरं रुधिरं दूसति भुञ्‍जन्तानन्ति कुद्रूसको। निब्बत्तो ओदनो नामाति सम्बन्धो। तत्थाति सत्तसु धञ्‍ञेसु। सालीतीति एत्थ इतिसद्दो नामपरियायो। साली नामाति अत्थो। एसेव नयो ‘‘वीहीती’’तिआदीसुपि।

एत्थाति तिणधञ्‍ञजातीसु। नीवारो सालिया अनुलोमो, वरकचोरको वरकस्स अनुलोमो। अम्बिलपायासादीसूति एत्थ आदिसद्देन खीरभत्तादयो सङ्गण्हन्ति। ओधीति अवधि, मरियादोति अत्थो। सो हि अवहीयति चजीयति अस्माति ओधीति वुच्‍चति।

योपि पायासो वा यापि अम्बिलयागु वा ओधिं न दस्सेति, सो पवारणं न जनेतीति योजना। पयेन खीरेन कतत्ता पायासो। पातब्बस्स, असितब्बस्स चाति द्विन्‍नं ब्युप्पत्तिनिमित्तानं सम्भवतो वा पायासोति वुच्‍चति। उद्धनतोति चुल्‍लितो। सा हि उपरि धीयन्ति ठपियन्ति थाल्यादयो एत्थाति उद्धनन्ति वुच्‍चति। आवज्‍जित्वाति परिणामेत्वा। घनभावन्ति कथिनभावं। एत्थापि वाक्ये ‘‘यो सो’’ति पदानि योजेतब्बानि। पुब्बेति अब्भुण्हकाले। निमन्तनेति निमन्तनट्ठाने। भत्ते आकिरित्वा देन्तीति सम्बन्धो। यापनं गच्छति इमायाति यागु। किञ्‍चापि तनुका होति, तथापीति योजना। उदकादीसूतिआदिसद्देन किञ्‍जिकखीरादयो सङ्गय्हन्ति। यागुसङ्गहमेव गच्छति, कस्मा? उदकादीनं पक्‍कुथितत्ताति अधिप्पायो। तस्मिं वाति सभत्ते, पक्‍कुथितउदकादिके वा। अञ्‍ञस्मिं वाति पक्‍कुथितउदकादितो अञ्‍ञस्मिं उदकादिके वा। यत्थ यस्मिं उदकादिके पक्खिपन्ति, तं पवारणं जनेतीति योजना।

२४१.सति पच्‍चयेति एत्थ पच्‍चयस्स सरूपं दस्सेतुं ‘‘पिपासाय सती’’ति च ‘‘आबाधे सती’’ति च वुत्तं। तेन तेनाति सत्ताहकालिकेन च यावजीविकेन च। तस्साति आबाधस्स। इदं पदं ‘‘उपसमनत्थ’’न्ति एत्थ समुधातुया सम्बन्धे सम्बन्धो, युपच्‍चयेन सम्बन्धे कम्मन्ति दट्ठब्बन्ति। पञ्‍चमं।

२४३.अभिहट्ठुन्ति एत्थ तुंपच्‍चयो त्वापच्‍चयत्थोति आह ‘‘अभिहरित्वा’’ति। पदभाजने पन वुत्तन्ति सम्बन्धो। साधारणमेव अत्थन्ति योजना। अस्साति भिक्खुस्स। तीहाकारेहीति सामं जाननेन च अञ्‍ञेसमारोचनेन च तस्सारोचनेन चाति तीहि कारणेहि। आसादीयते मङ्कुं करीयते आसादनं, तं अपेक्खो आसादनापेक्खोति दस्सेन्तो आह ‘‘आसादन’’न्तिआदि।

यस्स अत्थाय अभिहटन्ति सम्बन्धो। इतरस्साति अभिहारकतो अञ्‍ञस्स भुत्तस्साति। छट्ठं।

२४९.‘‘विकाले’’ति सामञ्‍ञेन वुत्तेपि विसेसकालोव गहेतब्बोति आह ‘‘कालो’’तिआदि। सो चाति भोजनकालो च। मज्झन्हिको होतीति योजना। तेनेवाति भोजनकालस्स अधिप्पेतत्ता एव। अस्साति ‘‘विकाले’’तिपदस्स। ‘‘विकालो नाम…पे॰… अरुणुग्गमना’’ति पदभाजनेन अरुणुग्गमनतो याव मज्झन्हिका कालो नामाति अत्थो नयेन दस्सितो होति। ततोति ठितमज्झन्हिकतो। सूरियस्स अतिसीघत्ता वेगेन ठितमज्झन्हिकं वीतिवत्तेय्याति आह ‘‘कुक्‍कुच्‍चकेन पन न कत्तब्ब’’न्ति। कालत्थम्भोति कालस्स जाननत्थाय थूणो। कालन्तरेति कालस्स अब्भन्तरे।

अवसेसं खादनीयं नामाति एत्थ विनिच्छयो एवं वेदितब्बोति योजना। यन्ति खादनीयं अत्थीति सम्बन्धो। वनमूलादिपभेदं यम्पि खादनीयं अत्थि, तम्पि आमिसगतिकं होतीति योजना। सेय्यथिदन्ति पुच्छावाचकनिपातसमुदायो। इदं खादनीयं सेय्यथा कतमन्ति अत्थो। इदम्पीति इदं द्वादसविधम्पि। पिसद्देन न पूवादियेवाति दस्सेति।

तत्थाति द्वादससु खादनीयेसु, आधारे भुम्मं। मूलति पतिट्ठाति एत्थ, एतेनाति वा मूलं। खादितब्बन्ति खादनीयं। मूलमेव खादनीयं मूलखादनीयं, तस्मिं विनिच्छयो एवं वेदितब्बोति योजना। मूलकमूलादीनि लोकसङ्केतो पदेसतोयेव वेदितब्बानि। तं तञ्हि नामं अजानन्तानं अतिसम्मूळ्हकारणत्ता सह परियायन्तरेन वचनत्थं वक्खाम। सूपस्स हितं सूपेय्यं, सूपेय्यं पण्णं एतेसन्ति सूपेय्यपण्णा, तेसं मूलानि सूपेय्यपण्णमूलानि। आमीयति अन्तो पवेसीयतीति आमिसो, आकारो अन्तोकरणत्थो, आमिसस्स गति विय गति एतेसन्ति आमिसगतिकानि। एत्थाति मूलेसु। जरड्ढन्ति जरभूतं उपड्ढं। अञ्‍ञम्पीति वजकलिमूलतो अञ्‍ञम्पि।

यानि पन मूलानि वुत्तानि, तानि यावजीविकानीति योजना। पाळियं वुत्तानीति सम्बन्धो। खादनीयत्थन्ति खादनीयस्स, खादनीये वा विज्‍जमानं, खादनीयेन वा कातब्बं किच्‍चं, पयोजनं वाति खादनीयत्थं। ‘‘खादनीये’’तिइमिना ‘‘तत्थ वुत्ताभिधम्मत्था’’तिआदीसु विय खादनीयत्थपदस्स उत्तरपदत्थपधानभावं दस्सेति। तत्थ खादनीयस्स, खादनीये वा विज्‍जमानं, खादनीयेन वा कातब्बं किच्‍चं नाम जिघच्छाहरणमेव। यञ्हि पूवादिखादनीयं खादित्वा जिघच्छाहरणं होति, तस्स किच्‍चं किच्‍चं नामाति वुत्तं होति। तं किच्‍चं, पयोजनं वा नेव फरन्ति, नेव निप्फादेन्ति। एसेव नयो ‘‘न भोजनीये भोजनीयत्थं फरन्ती’’तिएत्थापि।

तेसन्ति मूलानं अन्तो, लक्खणन्ति वा सम्बन्धो। एकस्मिं जनपदे खादनीयत्थभोजनीयत्थेसु फरमानेसु अञ्‍ञेसुपि जनपदेसु फरन्तियेवाति दस्सनत्थं ‘‘तेसु तेसु जनपदेसू’’ति विच्छापदं वुत्तं। किञ्‍चापि हि बहूसु जनपदेसु पथवीरसआपोरससम्पत्तिवसेन खादनीयत्थभोजनीयत्थं फरमानम्पि एकस्मिं जनपदे पथवीरसआपोरसविपत्तिवसेन अफरमानं भवेय्य, विकारवसेन पन तत्थ पवत्तत्ता तं जनपदं पमाणं न कातब्बं, गहेतब्बमेवाति वुत्तं होति। पकतिआहारवसेनाति अञ्‍ञेहि यावकालिक, सत्ताहकालिकेहि अमिस्सितं अत्तनो पकतियाव आहारकिच्‍चकरणवसेन। ‘‘मनुस्सान’’न्तिइमिना अञ्‍ञेसं तिरच्छानादीनं खादनीयत्थभोजनीयत्थं फरमानम्पि न पमाणन्ति दस्सेति। तन्ति मूलं। हीति सच्‍चं। नामसञ्‍ञासूति नामसङ्खातासु सञ्‍ञासु।

२५३.इतीति इदं तयं। ‘‘सन्‍निधि कारो अस्सा’’ति समासो विसेसनपरनिपातवसेन गहेतब्बो। ‘‘सन्‍निधिकिरियन्ति अत्थो’’ति इमिना करीयतीति कारोति कम्मत्थं दस्सेति। एकरत्तन्ति अन्तिमपरिच्छेदवसेन वुत्तं तदधिकानम्पि अधिप्पेतत्ता। अस्साति ‘‘सन्‍निधिकारक’’न्ति पदस्स।

सन्‍निधिकारकस्स सत्ताहकालिकस्स निस्सग्गियपाचित्तियापत्तिया पच्‍चयत्ता सन्‍निधिकारकं यामकालिकं खादनीयभोजनीयं असमानम्पि सुद्धपाचित्तियापत्तिया पच्‍चयो होतीति आह ‘‘यामकालिकं वा’’ति। पटिग्गहणेति पटिग्गहणे च गहणे च। अज्झोहरितुकामताय हि पटिग्गहणे च पटिग्गहेत्वा गहणे चाति वुत्तं होति। यं पत्तं अङ्गुलिया घंसन्तस्स लेखा पञ्‍ञायति, सो पत्तो दुद्धोतो होति सचेति योजना उत्तरवाक्ये यंसद्दं दिस्वा पुब्बवाक्ये तंसद्दस्स गमनीयत्ता। गण्ठिकपत्तस्साति बन्धनपत्तस्स। सोति स्नेहो। पग्घरति सन्दिस्सतीति सम्बन्धो। तादिसेति दुद्धोते, गण्ठिके वा। तत्थाति धोवितपत्ते आसिञ्‍चित्वाति सम्बन्धो। हीति सच्‍चं। अब्बोहारिकाति न वोहरितब्बा, वोहरितुं न युत्ताति अत्थो। यन्ति खादनीयभोजनीयं परिच्‍चजन्तीति सम्बन्धो। हीति सच्‍चं, यस्मा वा। ततोति अपरिच्‍चत्तखादनीयभोजनीयतो नीहरित्वाति सम्बन्धो।

अकप्पियमंसेसूति निद्धारणसमुदायो। सति पच्‍चयेति पिपाससङ्खाते पच्‍चये सति। अनतिरित्तकतन्ति अतिरित्तेन अकतं सन्‍निधिकारकं खादनीयभोजनीयन्ति योजना। एकमेव पाचित्तियन्ति सम्बन्धो। विकप्पद्वयेति सामिसनिरामिससङ्खाते विकप्पद्वये। सब्बविकप्पेसूति विकालसन्‍निधिअकप्पियमंसयामकालिकपच्‍चयसङ्खातेसु सब्बेसु विकप्पेसु।

२५५.आमिससंसट्ठन्ति आमिसेन संसट्ठं सत्ताहकालिकं यावजीविकं।

२५६.चतुब्बिधकालिकस्स सरूपञ्‍च वचनत्थञ्‍च दस्सेन्तो आह ‘‘विकालभोजनसिक्खापदे’’तिआदि। तत्थ निद्दिट्ठं खादनीयभोजनीय’’न्तिइमिना यावकालिकस्स सरूपं दस्सेति। ‘‘याव…पे॰… कालिक’’न्तिइमिना वचनत्थं दस्सेति। ‘‘सद्धिं…पे॰… पान’’न्तिइमिना यामकालिकस्स सरूपं दस्सेति। ‘‘याव…पे॰… कालिक’’न्तिइमिना वचनत्थं दस्सेति। ‘‘सब्बिआदि पञ्‍चविधं भेसज्‍ज’’न्तिइमिना सत्ताहकालिकस्स सरूपं दस्सेति। ‘‘सत्ताहं…पे॰… कालिक’’न्तिइमिना वचनत्थं दस्सेति। ‘‘ठपेत्वा…पे॰… सब्बम्पी’’तिइमिना यावजीविकस्स सरूपं दस्सेति। ‘‘याव…पे॰… जीविक’’न्तिइमिना वचनत्थं दस्सेति। सब्बवचनत्थो लहुकमत्तमेव, गरुको पनेवं वेदितब्बो – याव यत्तको मज्झन्हिको कालो यावकालो, सो अस्सत्थी, तं वा कालं भुञ्‍जितब्बन्ति यावकालिकं। यामो कालो यामकालो, सो अस्सत्थि, तं वा कालं परिभुञ्‍जीतब्बन्ति यामकालिकं। सत्ताहो कालो सत्ताहकालो, सो अस्सत्थि, तं वा कालं निदहित्वा परिभुञ्‍जितब्बन्ति सत्ताहकालिकं। याव यत्तको जीवो यावजीवो, सो अस्सत्थि, यावजीवं वा परिहरित्वा परिभुञ्‍जितब्बन्ति यावजीविकन्ति।

तत्थाति चतुब्बिधेसु कालिकेसु। सतक्खत्तुन्ति अनेकवारं। याव कालो नातिक्‍कमति, ताव भुञ्‍जन्तस्साति योजना। अहोरत्तं भुञ्‍जन्तस्साति सम्बन्धोति। अट्ठमं।

२५९.‘‘यो पन…पे॰… भुञ्‍जेय्या’’ति एत्थ विनिच्छयो एवं वेदितब्बोति योजना। सुद्धानीति ओदनेन असंसट्ठानि। ओदनसंसट्ठानि सब्बिआदीनीति सम्बन्धो। एत्थाति इमस्मिं सिक्खापदे। हीति सच्‍चं। ‘‘पणीतसंसट्ठानी’’तिइमिना पणीतेहि सब्बिआदीहि संसट्ठानि भोजनानि पणीतभोजनानीति अत्थं दस्सेति। ‘‘सत्तधञ्‍ञनिब्बत्तानी’’ति इमिना भोजनानं सरूपं दस्सेति।

‘‘सब्बिना भत्त’’न्तिआदीनं पञ्‍चन्‍नं विकप्पानं मज्झे तीसुपि विकप्पेसु ‘‘भत्त’’न्ति योजेतब्बं। एवं वाक्यं कत्वा विञ्‍ञापने आपत्तिं दस्सेत्वा समासं कत्वा विञ्‍ञापने तं दस्सेन्तो आह ‘‘सब्बिभत्तं देही’’तिआदि।

इतोति गावितो लद्धेनाति सम्बन्धो। विसङ्केतन्ति सङ्केततो ञापिततो विगतं विरहितन्ति अत्थो। हीति सच्‍चं। इमिना विसङ्केतस्स गुणदोसं दस्सेति।

कप्पियसब्बिना देहीति कप्पियसब्बिना संसट्ठं भत्तं देहीति योजना। एसेव नयो सेसेसुपि। येन येनाति येन येन सब्बिआदिना। तस्मिं तस्साति एत्थापि विच्छावसेन अत्थो दट्ठब्बो। पाळियं आगतसब्बि नाम गोसब्बि, अजिकासब्बि, महिंससब्बि, येसं मंसं कप्पति, तेसं सब्बि च। नवनीतं नाम एवमेव। तेलं नाम तिलतेलं, सासपतेलं, मधुकतेलं, एरण्डतेलं, वसातेलञ्‍च। मधु नाम मक्खिकामधु। फाणितं नाम उच्छुम्हा निब्बत्तं। मच्छो नाम उदकचरो। पाळिअनागतो मच्छो नाम नत्थि। मंसं नाम येसं मंसं कप्पति, तेसं मंसं। खीरदधीनि सब्बिसदिसानेव। वुत्तं यथा एवं ‘‘नवनीतभत्तं देही’’तिआदीसुपि सूपोदनविञ्‍ञत्तिदुक्‍कटमेव होतीति योजना। हीति सच्‍चं। सो चाति सो चत्थो। तत्थाति तस्मिं अत्थे। किं पयोजनं। नत्थेव पयोजनन्ति अधिप्पायो।

पटिलद्धं भोजनन्ति सम्बन्धो। एकरसन्ति एककिच्‍चं। ततोति नवपणीतभोजनतो नीहरित्वाति सम्बन्धो।

सब्बानीति नव पाचित्तियानि सन्धाय वुत्तं।

२६१.उभयेसम्पीति भिक्खुभिक्खुनीनम्पि। सब्बीति चेत्थ यो नं परिभुञ्‍जति, तस्स बलायुवड्ढनत्थं सब्बति गच्छति पवत्ततीति सब्बि, घतं। ततियक्खरेनेव सज्झायितब्बं लिखितब्बञ्‍च । कस्मा? ततियक्खरट्ठानेयेव सब्ब गतियन्ति गतिअत्थस्स सब्बधातुस्स धातुपाठेसु आगतत्ताति। नवमं।

२६४.सम्माति अविपरीतं। असल्‍लक्खेत्वाति आहारसद्दस्स खादनीयभोजनीयादीसु निरूळ्हभावं अमञ्‍ञित्वा। भगवा पन ठपेसीति सम्बन्धो। यथाउप्पन्‍नस्साति येनाकारेन उप्पन्‍नस्स । पिता पुत्तसङ्खाते दारके सञ्‍ञापेन्तो विय भगवा ते भिक्खू सञ्‍ञापेन्तोति योजना।

२६५.एतदेवाति तिण्णमाकारानमञ्‍ञतरवसेन अदिन्‍नमेव सन्धायाति सम्बन्धो। हीति सच्‍चं। मातिकायं ‘‘दिन्‍न’’न्ति वुत्तट्ठानं नत्थि, अथ कस्मा पदभाजनेयेव वुत्तन्ति आह ‘‘दिन्‍नन्ति इद’’न्तिआदि। ‘‘दिन्‍न’’न्ति इदं उद्धटन्ति सम्बन्धो। अस्साति ‘‘दिन्‍न’’न्ति पदस्स। निद्देसे च ‘‘कायेन…पे॰… देन्ते’’ति उद्धटन्ति योजना। एवन्ति इमेहि तीहाकारेहि ददमानेति सम्बन्धो। एवन्ति इमेहि द्वीहाकारेहि । आदीयमानन्ति सम्बन्धो। रथरेणुम्पीति रथिकवीथियं उट्ठितपंसुम्पि। पुब्बेति पठमपवारणसिक्खापदे। एवं पटिग्गहितं एतं आहारं दिन्‍नं नाम वुच्‍चतीति योजना। ‘‘एतमेवा’’ति एवस्स सम्भवतो तस्स फलं दस्सेतुं वुत्तं ‘‘न इद’’न्तिआदि। निस्सट्ठं न वुच्‍चतीति योजना।

तत्थाति ‘‘कायेना’’तिआदिवचने। हीति सच्‍चं। नत्थु करीयति इमायाति नत्थुकरणी, ताय। नासापुटेन पटिग्गण्हातीति सम्बन्धो। अकल्‍लकोति गिलानो। हीति सच्‍चं। कायेन पटिबद्धो कायपटिबद्धो कटच्छुआदीति आह ‘‘कटच्छुआदीसू’’तिआदि। हीति सच्‍चं। पातियमानन्ति पातापियमानं।

एत्थाति इमस्मिं सिक्खापदे। ‘‘पञ्‍चहङ्गेही’’ति पदस्स वित्थारं दस्सेन्तो आह ‘‘थाममज्झिमस्सा’’तिआदि। तन्ति दातब्बवत्थुं।

तत्थाति ‘‘हत्थपासो पञ्‍ञायती’’तिवचने। गच्छन्तोपि ठितेनेव सङ्गहितो। भूमट्ठस्साति भूमियं ठितस्स। आकासट्ठस्साति आकासे ठितस्स। ‘‘हत्थं अङ्ग’’न्ति पदेहि अवयविसम्बन्धो कातब्बो। वुत्तनयेनेवाति ‘‘भूमट्ठस्स च सीसेना’’तिआदिना वुत्तनयेनेव। पक्खीति सकुणो। सो हि पक्खयुत्तत्ता पक्खीति वुच्‍चति। हत्थीति कुञ्‍जरो। सो हि सोण्डसङ्खातहत्थयुत्तत्ता हत्थीति वुच्‍चति। अद्धेन अट्ठमं रतनमस्साति अद्धट्ठमरतनो, हत्थी, तस्स। तेनाति हत्थिना।

एको दायको वदतीति सम्बन्धो। ओणमतीति हेट्ठा नमति। एत्तावताति एकदेससम्पटिच्छनमत्तेन। ततोति सम्पटिच्छनतो। उग्घाटेत्वाति विवरित्वा। काजेनाति ब्याभङ्गिया। सा हि कचति बन्धति विविधं भारं अस्मिन्ति काचोति वुच्‍चति, चकारस्स जकारे कते काजोपि युत्तोयेव। तिंस हत्था रतनानि इमस्साति तिंसहत्थो, वेणु। गुळकुम्भोति फाणितेन पूरितो घटो। पटिग्गहितमेवाति कुम्भेसु हत्थपासतो बहि ठितेसुपि अभिहारकस्स हत्थपासे ठितत्ता पटिग्गहितमेवाति वुत्तं होति। उच्छुयन्तदोणितोति उच्छुं पीळनयन्तस्स अम्बणतो।

बहू पत्ता ठपिता होन्तीति सम्बन्धो। यत्थाति यस्मिं ठाने। ठितस्स भिक्खुनो हत्थपासेति योजना। ठत्वा फुसित्वा ‘‘निसिन्‍नस्स भिक्खुनो’’ति पाठसेसेन योजेतब्बं। ठितेन वा निसिन्‍नेन वा निपन्‍नेन वा दायकेन दिय्यतीति सम्बन्धो।

२७३.‘‘सन्तिके’’तिइमिना ‘‘उपनिक्खिपित्वा’’ति एत्थ उपसद्दस्स समीपत्थं दस्सेति। तेसन्ति तित्थियानं। तत्थाति भाजने। इतोति पत्ततो। इधाति मय्हं भाजने। नन्ति खादनीयभोजनीयं। तस्साति तित्थियस्साति। पठमं।

२७६.वुत्तावसेसन्ति वुत्तेहि मातुगामेन सद्धिं हसितुकामतादीहि अवसेसं। तस्मिन्ति उय्योजितभिक्खुम्हि। अत्थतोति विजहन्तविजहितभिक्खूनं अविनाभावसङ्खातअत्थतो। इतरेनाति उय्योजकभिक्खुना। तत्थाति ‘‘दस्सनूपचारं वा सवनूपचारं वा’’तिवचने। एत्थाति निद्धारणसमुदायो, दस्सनूपचारसवनूपचारेसूति अत्थो। ‘‘तथातिइमिना द्वादसहत्थपमाणं अतिदिसति। तेहीति कुट्टादीहि। तस्साति दस्सनूपचारातिक्‍कमस्स। ‘‘वुत्तपकारमनाचार’’न्ति इमिना ‘‘न अञ्‍ञो कोचि पच्‍चयो’’ति एत्थ अञ्‍ञसद्दस्स अपादानं दस्सेति, ‘‘कारण’’न्तिइमिना पच्‍चयसद्दस्सत्थं।

२७७.कलिसद्दस्स पापपराजयसङ्खातेसु द्वीसु अत्थेसु पापसङ्खातो कोधोति आह ‘‘कलीति कोधो’’ति। ‘‘आण’’न्तिइमिना सासनसद्दस्सत्थं दस्सेति। वुत्तञ्हि ‘‘आणा च सासनं ञेय्य’’न्ति। कोधवसेन वदतीति सम्बन्धो। दस्सेत्वा वदतीति योजना। इमस्स ठानं निसज्‍जं आलोकितं विलोकितं पस्सथ भोति योजना। इमिनापीति अमनापवचनं वचनेनापीति। दुतियं।

२८०.सभोजनन्ति एत्थ सकारो सहसद्दकारियो च अकारुकारानं असरूपत्ता अकारतो उकारस्स लोपो च तीसु पदेसु पच्छिमानं द्विन्‍नं पदानं तुल्यत्थनिस्सितसमासो च पुब्बपदेन सह भेदनिस्सितबाहिरत्थसमासो च होति, इति इममत्थं दस्सेन्तो आह ‘‘सह उभोहि जनेही’’ति। अथ वा भुञ्‍जितब्बन्ति भोजनं, सं विज्‍जति भोजनं अस्मिं कुलेति सभोजनन्ति दस्सेन्तो आह ‘‘अथ वा’’तिआदि। हीति सच्‍चं। तेनेवाति तेनेव अञ्‍ञमञ्‍ञं भुञ्‍जितब्बत्ता। अस्साति ‘‘सभोजने’’तिपदस्स। घरेति एत्थ पुब्बो सयनिसद्दो लोपोति आह ‘‘सयनिघरे’’ति। इमिना ‘‘दत्तो’’तिआदीसु विय पुब्बपदलोपसमासं दस्सेति। पिट्ठसङ्घाटस्साति एत्थ पिट्ठसङ्घाटो नाम न अञ्‍ञस्स यस्स कस्सचि, अथ खो सयनिघरगब्भस्सेवाति आह ‘‘तस्स सयनिघरगब्भस्सा’’ति। यथा वा तथा वाति येन वा ते न वा आकारेन। कतस्साति पिट्ठिवंसं आरोपेत्वा वा अनारोपेत्वा वा कतस्साति। ततियं।

२८४.चतुत्थपञ्‍चमेसु यथा च सभोजनसिक्खापदं पठमपाराजिकसमुट्ठानं, एवमेव तानिपीति योजनाति। चतुत्थपञ्‍चमानि।

२९५.इदं पन वचनं आहाति सम्बन्धो। पसादञ्‍ञथत्तन्ति पसादस्स अञ्‍ञेनाकारेन भावो। नन्ति खादनीयं। ‘‘गहेत्वा आगमंसू’’तिइमिना ‘‘उस्सारियित्था’’ति एत्थ उकारस्स उग्गहत्थतञ्‍च सरधातुस्स गत्यत्थतञ्‍च अज्‍जतनिञुंविभत्तिया त्थत्तञ्‍च दस्सेति, उग्गहेत्वा सारिंसु अगमंसूति अत्थो।

२९८.यत्थाति यस्मिं ठाने। ठितस्स भिक्खुनो चित्तं उप्पन्‍नन्ति योजना। ततोति चित्तुप्पन्‍नतो। यन्ति भिक्खुं। पकतिवचनेनाति उच्‍चासद्दमकत्वा पवत्तेन सभाववचनेन। अन्तोविहारेति वचनस्स अतिसम्बाधत्ता अयुत्तभावं मञ्‍ञमानो आह ‘‘अपि च अन्तोउपचारसीमाया’’ति।

३०२.गामस्स अन्तरे आरामो तिट्ठतीति अन्तरारामो विहारो, तं गच्छतीति दस्सेन्तो आह ‘‘अन्तोगामे’’तिआदीति। छट्ठं।

३०६.तस्मिं समयेति तस्मिं पवारणसमये। ‘‘एत्तकेही’’तिपदस्स नामवसेन वा परिमाणवसेन वा दुविधस्स अत्थस्स अधिप्पेतत्ता वुत्तं ‘‘नामवसेन परिमाणवसेना’’ति। तेसु नामं सन्धाय एतं नामं एतेसं भेसज्‍जानन्ति एत्तकानीति वचनत्थो कातब्बो, परिमाणं सन्धाय एतं परिमाणं एतेसन्ति एत्तकानीति वचनत्थो कातब्बो। ‘‘अञ्‍ञं भेसज्‍ज’’न्ति एत्थ अञ्‍ञसद्दस्स अपादानं नामं वा परिमाणं वा भवेय्याति आह ‘‘सब्बिना पवारितो’’तिआदि।

३१०.येति दायका, पवारिता होन्तीति सम्बन्धोति। सत्तमं।

३१४.द्वादस पुरिसा इमस्स हत्थिनोति द्वादसपुरिसो, आवुधो हत्थेसु एतेसन्ति आवुधहत्था। निन्‍नन्ति निन्‍नट्ठानं, पस्सतो भिक्खुनोति सम्बन्धोति। अट्ठमं।

३२८.‘‘मधुकपुप्फादीनं रसेन कतो’’तिइमिना पुप्फानं रसेन कतो आसवो पुप्फासवोति वचनत्थं दस्सेति। एस नयो ‘‘फलासवो’’तिआदीसुपि। सुरामेरयानं विसेसं दस्सेतुं वुत्तं ‘‘सुरा नामा’’तिआदि। पिट्ठकिण्णपक्खित्ताति पिट्ठेन च किण्णेन च पक्खित्ता कता वारुणीति सम्बन्धो। किण्णाति च सुराय बीजं। तञ्हि किरन्ति नानासम्भारानि मिस्सीभवन्ति एत्थाति किण्णाति वुच्‍चति। तस्सायेव मण्डेति योजना। सुरनामकेन एकेन वनचरकेन कताति सुरा। मदं जनेतीति मेरयं।

३२९.लोणसोवीरकन्ति एवंनामकं पानं। सुत्तन्तिपि एवमेव। तस्मिन्ति सूपसंपाके। तेलं पन पचन्तीति सम्बन्धो। नत्थि तिखिणं मज्‍जं एत्थाति अतिखिणमज्‍जं, अतिखिणमज्‍जे तस्मिंयेव तेलेति अत्थो। यं पनाति तेलं पन। तिखिणं मज्‍जं इमस्स तेलस्साति तिखिणमज्‍जं। यत्थाति तेले। अरिट्ठोति एवंनामकं भेसज्‍जं। तन्ति अरिट्ठं, ‘‘सन्धाया’’तिपदे अवुत्तकम्मं। एतन्ति ‘‘अमज्‍जं अरिट्ठ’’न्तिवचनं, ‘‘वुत्त’’न्तिपदे वुत्तकम्मन्ति। पठमं।

३३६.हससङ्खातो धम्मो सभावो हसधम्मोति वुत्ते अत्थतो कीळिकायेवाति आह ‘‘कीळिका वुच्‍चती’’ति।

३३७.गोप्फकानन्ति चरणगण्ठिकानं। ते हि पादे पादं ठपनकाले अञ्‍ञमञ्‍ञूपरि ठपनतो गोपीयन्तीति गोप्फा, ते एव गोप्फकाति वुच्‍चन्ति। पादस्स हि उपरि पादं ठपनकाले एकस्स उपरि एको न ठपेतब्बो। तेनाह भगवा ‘‘पादे पादं अच्‍चाधाया’’ति (दी॰ नि॰ २.१९६; म॰ नि॰ १.४२३; अ॰ नि॰ ३.१६)। ओट्ठजो दुतियो। ओरोहन्तस्स भिक्खुनोति सम्बन्धो।

३३८.फियारित्तादीहीति आदिसद्देन लङ्कारादयो सङ्गण्हाति। केचि वदन्तीति सम्बन्धो। पतनुप्पतनवारेसूति पतनवार उप्पतनवारेसु। तत्थाति तस्सं खित्तकथलायं। हीति सच्‍चं , यस्मा वा। ठपेत्वा कीळन्तस्साति सम्बन्धो। लिखितुं वट्टति कीळाधिप्पायस्स विरहितत्ताति अधिप्पायो। कीळाधिप्पायेन अत्थजोतकं अक्खरं लिखन्तस्सापि आपत्तियेवाति वदन्ति। एत्थाति इमस्मिं सिक्खापदेति। ततियं।

३४४.पवेणियाति उपालिआदिकाय आचरियपरम्परसङ्खाताय तन्तिया। कुरुन्दियं वुत्तन्ति सम्बन्धो। महापच्‍चरियं वुत्तन्ति सम्बन्धो। तं सब्बन्ति कुरुन्दिवादमहापच्‍चरिवादसङ्खातं सब्बं तं वचनं। पवेणिया आगतेति पवेणिया आगतसङ्खाते महाअट्ठकथावादेति। चतुत्थं।

३४५.पञ्‍चमे मनुस्सविग्गहेति मनुस्सविग्गहपाराजिकेति। पञ्‍चमं।

३५२.‘‘जोतिके’’तिपदस्स जोतिस्स अग्गिस्स करणं जोतिकन्ति दस्सेतुं वुत्तं ‘‘जोतिकरणे’’ति।

३५४.‘‘समादहितुकामताया’’तिपदं ‘‘अरणिसण्ठापनतो’’तिपदे हेतु। जालाति सिखा। सा हि जलति दिब्बतीति जालाति वुच्‍चति।

पतिलातं उक्खिपतीति एत्थ ‘‘पतितालात’’न्ति वत्तब्बे तकारलोपं कत्वा सन्धिवसेन पतिलातन्ति वुत्तन्ति आह ‘‘अलातं पतितं उक्खिपती’’ति। अलातन्ति उम्मुक्‍कं। तञ्हि आदित्तं हुत्वा अतिउण्हत्ता न लातब्बं न गण्हितब्बन्ति अलातन्ति वुच्‍चति। अविज्झातन्ति झायनतो डय्हनतो अविगतं अलातन्ति सम्बन्धो। झायनं डय्हनं झातं, विगतं झातं इमस्सालातस्साति विज्झातं।

३५६.पदीपादीनीति पदीपजोतिकादीनि। तत्थाति तासु दुट्ठवाळमिगअमनुस्ससङ्खातासु आपदासु निमित्तभूतासु। निमित्तत्थे चेतं भुम्मवचनन्ति। छट्ठं।

३७१.अग्गळादीनीति आदिसद्देन अनुवातपरिभण्डे सङ्गण्हातीति। अट्ठमं।

३८५.सोधेन्तो अपनेतीति योजना। मङ्गुलोति मनुस्सरत्तपो एको किमिविसेसो। सो हि रत्तपिवनत्थाय मङ्गति इतो चितो च इमं चिमञ्‍च ठानं गच्छतीति ‘‘मङ्गुलो’’ति वुच्‍चति। पदक्खरानञ्हि अविपरितत्थं, सोतूनञ्‍च सज्झायोपदेसलभनत्थं कत्थचि ठाने वचनत्थो वुत्तोति दट्ठब्बं। तस्स बीजमेव खुद्दकट्ठेन मङ्गुलबीजकं, तस्मिं। तन्ति मङ्गुलबीजकं। भिन्दन्तो हुत्वाति योजनाति। पठमं।

३९३.यो धम्मोति यो समथधम्मो। धम्मेनाति एत्थ एनसद्देन ‘‘यथाधम्म’’न्ति एत्थ अंइतिकारियस्स कारिं दस्सेति। इमिना ‘‘यथाधम्म’’न्ति पदस्स ‘‘निहताधिकरण’’न्ति एत्थ निहतसद्देन सम्बन्धितब्बभावं दस्सेति। ‘‘सत्थारा’’तिपदं ‘‘वुत्तं’’ इतिपदे कत्ता। नत्थि हतं हननं इमस्साति निहतन्ति वुत्ते अत्थतो वूपसमनमेवाति आह ‘‘वूपसमित’’न्ति।

३९५.यं वा तं वा कम्मं धम्मकम्मं नाम न होति, अथ खो अधिकरणवूपसमकम्ममेव धम्मकम्मं नामाति दस्सेन्तो आह ‘‘येन कम्मेना’’तिआदि। अयम्पीति अयम्पि भिक्खु। सेसपदानिपीति ‘‘धम्मकम्मे वेमतिको’’तिआदीनि सेसपदानिपि। एत्थाति इमस्मिं सिक्खापदे। वित्थारो पन वुत्तोति सम्बन्धो। तत्थेवाति परिवारे एव। इधाति इमस्मिं सिक्खापदे, विभङ्गे वाति। ततियं।

४००.पञ्‍चापत्तिक्खन्धेति थुल्‍लच्‍चयादिके पञ्‍च आपत्तिक्खन्धे। अज्झाचारो नामाति अधिभवित्वा वीतिक्‍कमित्वा आचरितब्बत्ता अज्झाचारो नामाति। चतुत्थं।

४०४.विजायनकालतो पट्ठाय परिपुण्णवीसतिवस्सो न गहेतब्बो, गब्भगहणकालतो पन पट्ठायाति दस्सेन्तो आह ‘‘पटिसन्धिग्गहणतो पट्ठाया’’ति। गब्भे सयितकालेन सद्धिं वीसतिमं वस्सं परिपुण्णमस्साति गब्भवीसो पुग्गलो। हीति सच्‍चं। यथाहाति येनाकारेन सङ्ख्यं गच्छति, तेनाकारेन भगवा आहाति योजना। अथ वा यथा किं वचनं भगवा आहाति योजना।

गब्भवीसो हुत्वा उपसम्पन्‍नोति सम्बन्धो। अम्हीति अस्मि। नुसद्दो परिवितक्‍कत्थे निपातो। यन्ति यादिसं पठमं चित्तन्ति सम्बन्धो। इमिना पटिसन्धिचित्तं दस्सेति। ‘‘पठमं विञ्‍ञाण’’न्ति तस्सेव वेवचनं। तन्ति पठमं चित्तं पठमं विञ्‍ञाणं। अस्साति सत्तस्स। साव जातीति सा एव पटिसन्धि, गब्भो नाम होतीति सम्बन्धो।

तत्थाति पाळियं, विनिच्छयो एवं वेदितब्बोति योजना। योति पुग्गलो। महापवारणायाति अस्सयुजपुण्णमियं। सा हि पूजितपवारणत्ता महापवारणाति वुच्‍चति। ततोति पवारणाय जातकालतो। तन्ति महापवारणं। पाटिपदे चाति एत्थ चसद्दो अनियमविकप्पत्थो, पवारणदिवसपाटिपददिवसेसु अञ्‍ञतरस्मिं दिवसे उपसम्पादेतब्बोति अत्थो। हायनवड्ढनन्ति कुच्छिम्हि वसितमासेसु अधिकेसु हायनञ्‍च ऊनेसु वड्ढुनञ्‍च वेदितब्बं।

पोराणकत्थेरा पन उपसम्पादेन्तीति सम्बन्धो। एकूनवीसतिवस्सन्ति अनन्तरे वुत्तं एकूनवीसतिवस्सं। निक्खमनीयोति सावणमासो। सो हि अन्तोवीथितो बाहिरवीथिं निक्खमति सूरियो अस्मिन्ति ‘‘निक्खमनीयो’’ति वुच्‍चति। पाटिपददिवसेति पच्छिमिकाय वस्सूपगमनदिवसे। तं उपसम्पादनं। कस्माति पुच्छा। एत्थ ठत्वा परिहारो वुच्‍चते मयाति योजना। वीसतिया वस्सेसूति उपसम्पन्‍नपुग्गलस्स वीसतिया वस्सेसु। तिंसरत्तिदिवस्स एकमासत्ता ‘‘चत्तारो मासा परिहायन्ती’’ति वुत्तं। उक्‍कड्ढन्तीति एकस्स अधिकमासस्स नासनत्थाय वस्सं उपरि कड्ढन्ति। ततोति छमासतो अपनेत्वाति सम्बन्धो। एत्थाति ‘‘एकूनवीसतिवस्स’’न्तिआदिवचने। पन-सद्दो हिसद्दत्थो, सच्‍चन्ति अत्थो। योति पुग्गलो। तस्माति यस्मा गब्भमासानम्पि गणनूपगत्ता गहेत्वा उपसम्पादेन्ति, तस्मा छ मासे वसित्वाति सम्बन्धो। अट्ठ मासे वसित्वा जातोपि न जीवतीति सुत्तन्तअट्ठकथासु (दी॰ नि॰ अट्ठ॰ २.२४-२५; म॰ नि॰ अट्ठ॰ ३.२०५) वुत्तं।

४०६.दसवस्सच्‍चयेनाति उपसम्पदतो दसवस्सातिक्‍कमेन। उपसम्पादेतीति उपज्झायो वा कम्मवाचाचरियो वा हुत्वा उपसम्पादेति। तन्ति उपज्झाचरियभूतं अनुपसम्पन्‍नपुग्गलं। कम्मवाचाचरियो हुत्वा उपसम्पादेन्तो तं मुञ्‍चित्वा सचे अञ्‍ञोपि कम्मवाचाचरियो अत्थि, सूपसम्पन्‍नो। सोव सचे कम्मवाचं सावेति, नुपसम्पन्‍नो। ञत्वा पन पुन अनुपसम्पादेन्ते सग्गन्तरायोपि मग्गन्तरायोपि होतियेवाति दट्ठब्बन्ति। पञ्‍चमं।

४०९.राजानन्ति एत्थ रञ्‍ञो सन्तकं ‘‘राजा’’ति वुच्‍चति उपचारेन, अथ वा रञ्‍ञो एसो ‘‘राजा’’ति कत्वा रञ्‍ञो सन्तकं ‘‘राजा’’ति वुच्‍चति। थेय्यन्ति थेनेत्वा ‘‘सक्‍कच्‍च’’न्तिआदीसु (पाचि॰ ६०६) विय निग्गहीतागमो होति। राजानं, रञ्‍ञो सन्तकं वा थेय्यं थेनेत्वा गच्छन्तीति अत्थो। इति इममत्थं दस्सेन्तो आह ‘‘राजानं वा थेनेत्वा’’तिआदि।

४११.चतूसु विसङ्केतेसु द्वीहि अनापत्ति, द्वीहि आपत्तियेवाति। छट्ठं।

४२९.तेनाति सामणेरेन। ‘‘कारापेय्या’’ति पदे कारितकम्मन्ति। दसमं।

सप्पाणकवग्गो सत्तमो।

४३९.‘‘उद्दिस्समाने’’ति पदस्स कम्मरूपत्तं दस्सेतुं वुत्तं ‘‘उद्दिसियमाने’’ति। सो पनाति पातिमोक्खो पन। यस्मा उद्दिस्समानो नाम होति, तस्माति योजना। उद्दिसन्ते वाति उद्दिसियमाने वा। उद्दिसापेन्ते वाति उद्दिसापियमाने वा। अन्तसद्दो हि मानसद्दकारियो। योति भिक्खु। नन्ति तं पातिमोक्खं। चसद्दो खुद्दानुखुद्दकपदस्स द्वन्‍नवाक्यं दस्सेति, पुब्बपदे ककारलोपो दट्ठब्बो। तेसन्ति खुद्दानुखुद्दाकानं। हीति सच्‍चं। एतानीति खुद्दानुखुद्दकानि। येति भिक्खू। ‘‘याव उप्पज्‍जतियेव, ताव संवत्तन्ति इति वुत्तं होतीति योजना इमस्स नयस्स पाठसेसेहि योजेतब्बत्ता। गरुकभावं सल्‍लक्खेन्तो लहुकभावं दस्सेन्तो आह ‘‘अथ वा’’तिआदि। अतिवियाति अति इ एव। इकारो हि सन्धिवसेन अदस्सनं गतो। वियसद्दो एवकारत्थवाचको ‘‘वरम्हाकं भुसामिवा’’ति एत्थ (जा॰ १.३.१०८) इवसद्दो विय, अति हुत्वा एवाति अत्थो दट्ठब्बो। ‘‘उपसम्पन्‍नस्सा’’ति एत्थ समीपे सामिवचनन्ति (रुपसिद्धियं ३१६ सुत्ते) आह ‘‘उपसम्पन्‍नस्स सन्तिके’’ति। तस्साति उपसम्पन्‍नस्स। तस्मिन्ति विनये। विवण्णेतीति न केवलं तस्सेव विवण्णमत्तमेव, अथ खो निन्दतियेवाति आह ‘‘निन्दती’’ति। गरहतीति तस्सेव वेवचनं। अथ वा निन्दतीति उपसम्पन्‍नस्स सम्मुखा निन्दति। गरहतीति परम्मुखा गरहतीति। दुतियं।

४५१.सचेपीति एत्थ पिसद्देन सचे अमरति, का नाम कथा, पाचित्तियमेवाति दस्सेति। पहारेनाति पहारहेतुना। यथाति येनाकारेन। अयन्ति भिक्खु। न विरोचतीति न सोभति।

४५२.‘‘अनुपसम्पन्‍नस्सा’’ति एत्थ अकारस्स अञ्‍ञत्थं दस्सेतुं वुत्तं ‘‘गहट्ठस्स वा’’तिआदि। पब्बजितस्स वाति परिब्बाजकस्स वा सामणेरस्स वा।

४५३.‘‘केनची’’ति पदस्स अत्थं दस्सेतुं वुत्तं ‘‘मनुस्सेन वा’’तिआदि। ततोति विहेठनतो, इमिना मोक्खस्स अपादानं दस्सेति, ‘‘अत्तनो’’ति इमिना सम्बन्धं दस्सेति। ‘‘पत्थयमानो’’ति इमिना ‘‘अधिप्पायो’’ति पदस्सत्थं दस्सेति। मुग्गरेन वाति चतुहत्थदण्डस्स अद्धेन दण्डेन वा। सोति चोरादिकोति। चतुत्थं।

४५७-८.विरद्धोति पण्णको हुत्वा। पुब्बेति पुरिमसिक्खापदे। वुत्तेसु वत्थूसूति ‘‘चोरं वा पच्‍चत्थीकं वा’’तिआदिना वुत्तेसु वत्थूसूति। पञ्‍चमं।

४७३.‘‘वूपसमिस्सामी’’ति एत्थ इधातुया गत्यत्थं दस्सेतुं वुत्तं ‘‘वूपसमं गमिस्सामी’’ति। अकारकभावन्ति निद्दोसभावं। सोतुकामताय गमनवसेन सिया किरियन्ति योजना। परतोपि एसेव नयोति। अट्ठमं।

४९७.अन्तरन्ति खणं, ओकासं वा विवरं वा। घातेतुन्ति हनितुं। इच्छतीति इमिना पत्थधातुया याचनत्थं दस्सेति। ‘‘राजन्तेपुरं हत्थिसम्मद्द’’न्तिआदीसु वचनत्थो एवं वेदितब्बोति योजना। हत्थिसम्मद्दन्ति हत्थिसम्बाधट्ठानं। अस्सेहि सम्मद्दो एत्थाति अस्ससम्मद्दो। रथेहि सम्मद्दो एत्थाति रथसम्मद्दोति वचनत्थं अतिदिसन्तो आह ‘‘एसेव नयो’’ति। ‘‘सम्मत्त’’न्ति पठमक्खरेन पाठस्स सम्बाधस्स अवाचकत्ता वुत्तं ‘‘तं न गहेतब्ब’’न्ति। तत्थाति पाठे। ‘‘हत्थीनं सम्मद्द’’न्ति इमिना उत्तरपदस्स सम्मद्दनं सम्मद्दन्ति भावत्थं दस्सेति, पुरिमपदेन छट्ठीसमासञ्‍च। पुरिमपाठे पन उत्तरपदस्स अधिकरणत्थञ्‍च पुब्बपदेन ततियासमासञ्‍च दस्सेति। बाहिरत्थसमासोतिपि वुच्‍चति। पच्छिमपाठे ‘‘हत्थिसम्मद्द’’न्तिआदिपदस्स लिङ्गविपल्‍लासञ्‍च ‘‘अत्थी’’ति पाठसेसेन योजेतब्बतञ्‍च दस्सेतुं वुत्तं ‘‘हत्थिसम्मद्दो अत्थी’’ति। रजितब्बानीति रजनीयानि, रजितुं अरहानीति अत्थो। इमिना सम्बन्धकाले पुरिमपाठे रञ्‍ञो अन्तेपुरेति विभत्तिविपल्‍लासो कातब्बोति। पच्छिमपाठे पन मुख्यतोव युज्‍जति। तेन वुत्तं ‘‘तस्मिं अन्तेपुरे’’ति।

४९८.अवसित्तस्साति खत्तियाभिसेकेन अभिसित्तस्स। इतोति सयनिघरतो। इमिना पञ्‍चमीबाहिरसमासं दस्सेति। रञ्‍ञो रतिजननट्ठेन रतनं वुच्‍चति महेसी। महेसीति च साभिसेका देवी। निपुब्ब गमुधातुस्स निपुब्बकमुधातुया परियायभावं दस्सेतुं वुत्तं ‘‘निग्गतन्ति निक्खन्त’’न्ति। पठमं।

५०४.अन्ते समीपे वसनसीलत्ता परिचारिको ‘‘अन्तेवासी’’ति वुच्‍चतीति आह ‘‘परिचारिको’’ति।

५०६.द्वे लेड्डुपाताति थाममज्झिमस्स पुरिसस्स द्वे लेड्डुपाता। सङ्घ…पे॰… नवकम्मानं अत्थाय उग्गण्हन्तस्स वा उग्गण्हापेन्तस्स वा दुक्‍कटन्ति योजना। अवसेसन्ति जातरूपरजततो अवसेसं। मातुकण्णपिळन्धनतालपण्णम्पीति मातुया कण्णे पिळन्धिततालपण्णम्पि, पटिसामेन्तस्साति सम्बन्धो।

‘‘कप्पियभण्डं होती’’ति इमिना अकप्पियभण्डं न वट्टतीति दस्सेति। इदन्ति भण्डं। पलिबोधोनामाति अत्तनो पलिबोधो नाम। छन्देनपीति वड्ढकीआदीनं छन्दहेतुनापि। भयेनपीति राजवल्‍लभानं भयहेतुनापि। बलक्‍कारेनाति करणं कारो, बलेन कारो बलक्‍कारो, तेन, बलक्‍कारो हुत्वा पातेत्वाति अत्थो।

तत्थाति महारामे। यत्थाति यस्मिं ठाने, सङ्का उप्पज्‍जतीति सम्बन्धो। महाजनसञ्‍चरणट्ठानेसूति बहूनं जनानं सञ्‍चरणसङ्खातेसु ठानेसु। नगहेतब्बस्स हेतुं दस्सेतुं वुत्तं ‘‘पलिबोधो न होती’’ति। यस्मा पलिबोधो न होति, तस्मा न गहेतब्बन्ति अधिप्पायो। एकोति एको भिक्खु पस्सतीति सम्बन्धो। ओक्‍कम्माति ओक्‍कमित्वा।

रूपसद्दो भण्डपरियायोति आह ‘‘भण्ड’’न्ति। भण्डं रूपं नामाति योजना। भण्डिकन्ति भण्डेन नियुत्तं पुटकं। गणेत्वाति गणनं कत्वा। निमित्तन्तीति एत्थ इतिसद्दो नामपरियायो। लञ्छनादि निमित्तं नामाति हि योजना। लञ्छनादीति आदिसद्देन नीलपिलोतिकादयो सङ्गण्हाति। लाखायाति जतुना।

पतिरूपा नाम इध लज्‍जिकुक्‍कुच्‍चकाति आह ‘‘लज्‍जिनो कुक्‍कुच्‍चका’’ति। थावरन्ति जङ्गमा अञ्‍ञं थावरं। अद्धुनोति कालस्स। समादपेत्वाति अञ्‍ञे समादपेत्वा। उद्दिस्स अरिया तिट्ठन्ति, एसा अरियान याचना’’ति (जा॰ १.७.५९) वुत्तनयेन याचित्वाति अत्थो।

५०७.रतनसम्मतन्ति मनुस्सानं उपभोगपरिभोगन्ति। दुतियं।

५१२.सम्बहुला भिक्खूति सम्बन्धो। तस्मिं गामेति तस्मिं पठमपविसनगामे। तं कम्मन्ति तं इच्छितकम्मं। अन्तराति गामविहारानमन्तरे। भुम्मत्थे चेतं निस्सक्‍कवचनं।

कुलघरे वाति ञातिकुलउपट्ठाककुलघरे वा। तेलभिक्खाय वाति तेलयाचनत्थाय वा। पस्सेति अत्तनो पस्से समीपेति वुत्तं होति। तेनाति गाममज्झमग्गेन। अनोक्‍कम्माति अनोक्‍कमित्वा, अपक्‍कमित्वाति अत्थोति। ततियं।

५३९.‘‘यस्सा’’ति पदस्स विसयं दस्सेतुं वुत्तं ‘‘भिक्खुनो’’ति। ‘‘नाभिया हेट्ठा’’ति इमिना नाभिया अधो अधोनाभीति वचनत्थं दस्सेति, ‘‘जाणुमण्डलानं उपरी’’ति इमिना जाणुमण्डलानं उब्भ उब्भजाणुमण्डलन्ति। उब्भसद्दो हि उपरिपरियायो सत्तम्यन्तनिपातो। कण्डुखज्‍जुसद्दानं वेवचनत्ता वुत्तं ‘‘कण्डूति खज्‍जू’’ति। कण्डति भेदनं करोतीति कण्डु। खज्‍जति ब्यधनं करोतीति खज्‍जु। केसुचि पोत्थकेसु ‘‘कच्छू’’ति पाठो अत्थि, सो अयुत्तो।

लोहितं तुण्डं एतिस्साति लोहिततुण्डिका। पिळयति विबाधयतीति पिळका। आ भुसो असुचिं सवति पग्घरापेतीति अस्सावोति वचनत्थं दस्सेन्तो आह ‘‘असुचिपग्घरण’’न्ति। अरिसञ्‍च भगन्दरा च मधुमेहो च। आदिसद्देन दुन्‍नामकादयो सङ्गण्हाति। तत्थ अरि विय ईसति अभिभवतीति अरिसं। भगं वुच्‍चति वच्‍चमग्गं, तं दरति फालेतीति भगन्दरा, गूथसमीपे जातो वणविसेसो। मधु विय मुत्तादिं मिहति सेचतीति मधुमेहो, सो आबाधो मुत्तमेहो सुक्‍कमेहो रत्तमेहोति अनेकविधो। थुल्‍लसद्दो महन्तपरियायोति आह ‘‘महा’’ति। अट्ठमं।

५५३.पटिदेसेतब्बाकारं दस्सेति अनेनाति पटिदेसेतब्बाकारदस्सनं। द्विन्‍नं सद्दानं परियायभावं दस्सेतुं वुत्तं ‘‘रथिकाति रच्छा’’ति। रथस्स हिता रथिका। ण्यपच्‍चये कते ‘‘रच्छा’’ति (मोग्गल्‍लाने ४.७२ सुत्ते) वुच्‍चति। रच्छन्तरेन अनिब्बिद्धा रच्छा ब्यूहो नामाति आह ‘‘अनिब्बिज्झित्वा’’तिआदि। ब्यूहेति सम्पिण्डेति जने अञ्‍ञत्थ गन्तुमपदानवसेनाति ब्यूहो। सिङ्घाटकं नाम मग्गसन्धीति आह ‘‘मग्गसमोधानट्ठान’’न्ति। सिङ्घति मग्गसमोधानं करोति एत्थाति सिङ्घाटकं। एतेसूति रथिकादीसु। एसेव नयोति दुक्‍कटपाटिदेसनीये अतिदिसति। हीति सच्‍चं। ‘‘वचनतो’’ति पदं ‘‘वेदितब्बो’’ति पदे ञापकहेतु। ददमानाय भिक्खुनिया वसेनाति योजना। एत्थाति सिक्खापदे। तस्माति यस्मा अपमाणं, तस्मा।

इदन्ति वचनं वुत्तन्ति सम्बन्धो। सम्भिन्‍ने एकरसे कालिकत्तयेति योजना।

५५६.‘‘दापेती’’ति हेतुत्थकिरियाय कारितकत्तुकारितकम्मानि दस्सेतुं वुत्तं ‘‘अञ्‍ञातिकाय अञ्‍ञेन केनची’’ति। अञ्‍ञेनाति अत्तना अञ्‍ञेन। ‘‘ताय एव वा भिक्खुनिया अञ्‍ञेन वा केनची’’ति पदानि ‘‘पटिग्गहापेत्वा’’तिपदे कारितकम्मानीति। पठमं।

५६९.‘‘घरतो नीहरित्वा’’ति एत्थ ‘‘नीहरित्वा’’ति पदस्स कम्मं दस्सेतुं वुत्तं ‘‘आसनसालं वा विहारं वा’’ति। ‘‘आनेत्वा’’तिइमिना नीपुब्बहरधातुया अत्थं दस्सेति। द्वारेति अत्तनो गेहद्वारेति। ततियं।

५७३.‘‘पञ्‍चन्‍न’’न्ति निद्धारणे सामिवचनभावञ्‍च ‘‘यंकिञ्‍ची’’ति निद्धारणीयेन सम्बन्धितब्बभावञ्‍च दस्सेतुं वुत्तं ‘‘पञ्‍चसु सहधम्मिकेसु यं किञ्‍ची’’ति। ‘‘पेसेत्वा खादनीयं भोजनीयं आहरिस्सामी’’तिइमिना पटिसंविदिताकारदस्सनं। ‘‘आराम’’न्ति सामञ्‍ञतो वुत्तेपि आरञ्‍ञकसेनासनस्स आरामो एव अधिप्पेतोति आह ‘‘आरञ्‍ञकसेनासनारामञ्‍चा’’ति। तस्साति आरञ्‍ञकसेनासनारामस्स। ‘‘कस्मा’’ति पुच्छाय ‘‘पटिमोचनत्थ’’न्ति विसज्‍जनाय समेतुं सम्पदानत्थे निस्सक्‍कवचनं कातब्बं। किमत्थन्ति हि अत्थो। पटिमोचनत्थन्ति तदत्थे पच्‍चत्तवचनं। पटिमोचनसङ्खाताय अत्थायाति हि अत्थो। अत्थसद्दो च पयोजनवाचको। पयोजनायाति हि अत्थो। अथ वा ‘‘पटिमोचनत्थ’’न्ति विसज्‍जनायं। ‘‘कस्मा’’ति पुच्छाय समेतुं निस्सक्‍कत्थे पच्‍चत्तवचनं कातब्बं। पटिमोचनसङ्खाता अत्थाति हि अत्थो। अत्थसद्दो च कारणवाचको। कारणाति हि अत्थो। एवञ्हि पुच्छाविसज्‍जनानं पुब्बापरसमसङ्खातो विचयो हारो परिपुण्णो होतीति दट्ठब्बं। अम्हाकन्ति खादनीयभोजनीयपटिहरन्तानं अम्हाकं। अम्हेति चोरसङ्खाते अम्हे।

‘‘तस्सा’’ति पदस्सत्थं दस्सेतुं वुत्तं ‘‘एतिस्सा यागुया’’ति। अञ्‍ञानिपीति पटिसंविदितकुलतो अञ्‍ञानिपि कुलानि। तेनाति पटिसंविदितकुलेन। कुरुन्दिवादे यागुया पटिसंविदितं कत्वा यागुं अग्गहेत्वा पूवादीनि आहरन्ति, वट्टतीति अधिप्पायो।

५७५.एकस्साति भिक्खुस्स। तस्साति पटिसंविदितभिक्खुस्स, चतुन्‍नं वा पञ्‍चन्‍नं वा भिक्खूनं अत्थायाति योजना। अञ्‍ञेसम्पीति चतुपञ्‍चभिक्खुतो अञ्‍ञेसम्पि। अधिकमेवाति परिभुत्ततो अतिरेकमेव। यं पनाति खादनीयभोजनीयं पन, यम्पि खादनीयभोजनीयं वनतो आहरित्वा देन्तीति योजना। ‘‘तत्थजातक’’न्ति एत्थ तसद्दस्स विसयं दस्सेतुं वुत्तं ‘‘आरामे’’ति। अञ्‍ञेन दिन्‍नन्ति सम्बन्धो। नन्ति मूलखादनीयादिं। पटिसंविदितन्ति पटिकच्‍चेव सुट्ठु जानापितन्ति अत्थोति। चतुत्थं।

इति समन्तपासादिकाय विनयसंवण्णनाय

पाटिदेसनीयवण्णनाय

योजना समत्ता।

५७७.इधाति इमस्मिं विभङ्गे, सिक्खापदे वा। उभो कण्णेति पुरतो च पच्छतो च निग्गते द्वे कण्णे। अविसेसेनाति ‘‘अन्तरघरे’’ति च ‘‘आरामे’’ति च विसेसं अकत्वा सामञ्‍ञेन। विहारेपीति सङ्घसन्‍निपातबुद्धुपट्ठानथेरुपट्ठानादिकालं सन्धाय वुत्तं।

५७८.कायेकदेसे कायसद्दो वत्ततीति आह ‘‘जाणुम्पि उरम्पी’’ति। ‘‘न सीसं पारुतेना’’तिइमिना ‘‘सुप्पटिच्छन्‍नेना’’तिपदस्स अतिब्यापितदोसं पटिक्खिपति। गण्ठिकन्ति पासो। सो हि गन्थेति बन्धतीति वा, गन्थेति बन्धति एत्थाति वा कत्वा गन्थिकोति वुच्‍चति। न्थकारस्स वाण्ठकारे कते गण्ठिको, तं गण्ठिकं पटिमुञ्‍चित्वा। उभो कण्णेति चीवरस्स द्वे कोणे। गलवाटकतोति एत्थ गलोति कण्ठो। सो हि खज्‍जभोज्‍जलेय्यपेय्यसङ्खातं चतुब्बिधं असनं गलति पन्‍नो हुत्वा कुच्छियं पतति इतोति गलोति वुच्‍चति। आवाटोयेव खुद्दकट्ठेन आवाटको, खुद्दकत्थे को। गले ठितो आवाटको गलवाटको। अकारतो हि आकारस्स लोपो ‘‘पप’’न्तिआदीसु (जा॰ १.१.२) विय। एत्थ हि पआपन्ति पदच्छेदो, अकारतो आकारस्स च लोपो। पवद्धं आपं पपं, महन्तं उदकन्ति अत्थो। सीसं विवरित्वाति सम्बन्धो।

५७९.वासं उपगतोति वा वासेन उपगतोति वा अत्थं पटिक्खिपन्तो आह ‘‘वासत्थाय उपगतस्सा’’ति।

५८०.हत्थपादे अकीळन्तो सुसंवुतो नामाति दस्सेन्तो आह ‘‘हत्थं वा पादं वा अकीळापेन्तो’’ति।

५८२.ओक्खित्तचक्खूति एत्थ ओसद्दो हेट्ठापरियायोति आह ‘‘हेट्ठा खित्तचक्खू’’ति। ‘‘हुत्वा’’तिइमिना किरियाविसेसनभावं दस्सेति। युगयुत्तकोति युगे युत्तको। दमियित्थाति दन्तो। आभुसो जानाति कारणाकारणन्ति आजानेय्यो। एत्तकन्ति चतुहत्थपमाणं। यो गच्छति, अस्स भिक्खुनो दुक्‍कटा आपत्ति होतीति योजना। ‘‘परिस्सयभाव’’न्ति च ‘‘परिस्सयाभाव’’न्ति च द्वे पाठा युज्‍जन्तियेव।

५८४.इत्थम्भूतलक्खणेति इमं पकारं इत्थं चीवरुक्खिपनं, भवति गच्छतीति भूतो, भिक्खु। लक्खीयति अनेनाति लक्खणं, चीवरं। इत्थं भूतो इत्थम्भूतो, तस्स लक्खणं इत्थम्भूतलक्खणं, तस्मिं। करणवचनं दट्ठब्बन्ति योजना। इत्थम्भूतलक्खणं नाम किरियाविसेसनस्स सभावोति आह ‘‘एकतो वा…पे॰… हुत्वाति अत्थो’’ति। अन्तोइन्दखीलतोति गामस्स अन्तोइन्दखीलतोति। पठमो वग्गो।

५८८.कित्तावताति कित्तकेन पमाणेन, एवं निसिन्‍नेसु थेरेसूति सम्बन्धो, निद्धारणे चेतं भुम्मवचनं। ववत्थपेतीति इदञ्‍चीदञ्‍च कथेतीति ववत्थपेति। एत्तावताति एत्तकेन पमाणेन।

५९०.निच्‍चलं कत्वा कायस्स उजुट्ठपनं कायपग्गहो नामाति आह ‘‘निच्‍चलं कत्वा’’तिआदि। एसेव नयो बाहुपग्गहसीसपग्गहेसुपीति। दुतियो वग्गो।

६००.उद्धं एका कोटि इमिस्सा गमनायाति उक्‍कुटिकाति दस्सेन्तो आह ‘‘उक्‍कुटिका वुच्‍चती’’तिआदि। एत्थाति ‘‘उक्‍कुटिकाया’’तिपदे।

६०१.हत्थपल्‍लत्थीकदुस्सपल्‍लत्थीकेसु द्वीसु दुस्सपल्‍लत्थिके आयोगपल्‍लत्थीकापि सङ्गहं गच्छतीति आह ‘‘आयोगपल्‍लत्थिकापि दुस्सपल्‍लत्थिका एवा’’ति।

६०२.सतिया उपट्ठानं सक्‍कच्‍चन्ति आह ‘‘सतिंउपट्ठपेत्वा’’ति।

६०३.पिण्डपातं देन्तेपीति पिण्डपातं पत्ते पक्खिपन्तेपि। पत्ते सञ्‍ञा पत्तसञ्‍ञा, सा अस्सत्थीति पत्तसञ्‍ञी। ‘‘कत्वा’’ तिइमिना किरियाविसेसनभावं दस्सेति।

६०४.समसूपकं पिण्डपातन्ति एत्थ सूपपिण्डपातानं समउपड्ढभावं आसङ्का भवेय्याति आह ‘‘समसूपको नामा’’तिआदि। यत्थाति पिण्डपाते। भत्तस्स चतुत्थभागपमाणो सूपो होति, सो पिण्डपातो समसूपको नामाति योजना। ओलोणी च साकसूपेय्यञ्‍च मच्छरसो च मंसरसो चाति द्वन्दो। तत्थ ओलोणीति एका ब्यञ्‍जनविकति। साकसूपेय्यन्ति सूपस्स हितं सूपेय्यं, साकमेव सूपेय्यं साकसूपेय्यं। इमिना सब्बापि साकसूपेय्यब्यञ्‍जनविकति गहिता। मच्छरसमंसरसादीनीति एत्थ आदिसद्देन अवसेसा सब्बापि ब्यञ्‍जनविकति सङ्गहिता। तं सब्बं रसानं रसो रसरसोति कत्वा ‘‘रसरसो’’ति वुच्‍चति।

६०५.समपुण्णं समभरितन्ति वेवचनमेव। थूपं कतो थूपीकतोति अत्थं दस्सेन्तो आह ‘‘थूपीकतो नामा’’तिआदि।

तत्थाति ‘‘थूपीकत’’न्तिआदिवचने। तेसन्ति अभयत्थेरतिपिटकचूळनागत्थेरानं। इति पुच्छिंसु, तेसञ्‍च थेरानं वादं आरोचेसुन्ति योजना। थेरोति चूळसुमनत्थेरो। एतस्साति तिपिटकचूळनागत्थेरस्स । सत्तक्खत्तुन्ति सत्त वारे। कुतोति कस्साचरियस्स सन्तिका। तस्माति यस्मा यावकालिकेन परिच्छिन्‍नो, तस्मा। आमिसजातिकं यागुभत्तं वा फलाफलं वाति योजना। तञ्‍च खोति तञ्‍च समतित्थिकं। इतरेन पनाति नाधिट्ठानुपगेन पत्तेन पन। यं पूवउच्छुखण्डफलाफलादि हेट्ठा ओरोहति, तं पूवउच्छुखण्डफलाफलादीति योजना। पूववटंसकोति एत्थ वटंसकोति उत्तंसो। सो हि उद्धं तसीयते अलङ्करीयतेति वटंसोति वुच्‍चति उकारस्स वकारं, तकारस्स च टकारं कत्वा, सोयेव वटंसको, मुद्धनि पिलन्धितो एको अलङ्कारविसेसो। पूवमेव तंसदिसत्ता पूववटंसको, तं। पुप्फवटंसको च तक्‍कोलकटुकफलादिवटंसको चाति द्वन्दो, ते।

इधाति इमस्मिं सिक्खापदे। ननु सब्बथूपीकतेसु पटिग्गहणस्स अकप्पियत्ता परिभुञ्‍जनम्पि न वट्टतीति आह ‘‘सब्बत्थ पना’’तिआदि। तत्थ सब्बत्थाति सब्बेसु थूपीकतेसूति। ततियो वग्गो।

६१०.थूपकतोति थूपमेव थूपकं, ततो थूपकतोति दस्सेन्तो आह ‘‘मत्थकतो’’ति।

६११.माघातसमयादीसूति ‘‘पाणे मा घातेथा’’ति राजानो भेरिं चरापेन्ति एत्थाति माघातो, सोयेव समयो माघातसमयो। आदिसद्देन अञ्‍ञं पटिच्छन्‍नकारणं गहेतब्बं।

६१५.तेसन्ति मयूरण्डकुक्‍कुटण्डानन्ति। चतुत्थो वग्गो।

६१८.सकलं हत्थन्ति पञ्‍चङ्गुलिं सन्धाय वुत्तं।

६१९.सकबळेनाति एत्थ कबळसद्देन वचनस्स अपरिपुण्णकारणं सब्बम्पि गहेतब्बं।

६२०.पिण्डुक्खेपकन्तिआदीसु विच्छत्थे कपच्‍चयोति आह ‘‘पिण्डं उक्खिपित्वा उक्खिपित्वा’’ति। त्वासद्देन किरियाविसेसनभावं दस्सेति।

६२४.‘‘अवकिरित्वा’’ति इमिना सित्थावकारकन्ति एत्थ अवपुब्बो किरधातुयेव, न करधातूति दस्सेति।

६२६.‘‘चपुचपू’’ति एवं सद्दन्ति ‘‘चपुचपू’’ति एवं अनुकरणरवन्ति। पञ्‍चमो वग्गो।

६२८.‘‘भुञ्‍जन्तेना’’ति पदं ‘‘निल्‍लेहितु’’न्ति पदे भावकत्ता।

६३१.एवंनामकेति ‘‘कोकनुद’’न्ति एवं नामं अस्स पासादस्साति एवंनामको, पासादो, तस्मिं। ‘‘पदुमसण्ठानो’’ति इमिना पासादस्स सदिसूपचारेन ‘‘कोकनुदो’’ति नामलभनं दस्सेति। तेनाति पदुमसण्ठानत्ता। अस्साति पासादस्स। पुग्गलिकम्पीति परपुग्गलसन्तकं गहेतब्बं ‘‘अत्तनो सन्तकम्पी’’ति अत्तपुग्गलसन्तकस्स विसुं गय्हमानत्ता। सङ्खम्पीति पानीयसङ्खम्पि। सरावम्पीति पानीयसरावम्पि। थालकम्पीति पानीयथालकम्पि।

६३२.‘‘उद्धरित्वा’’ति सामञ्‍ञतो वुत्तवचनस्स कम्मापादानानि दस्सेतुं वुत्तं ‘‘सित्थानि उदकतो’’ति। भिन्दित्वाति चुण्णविचुण्णानि कत्वा। बहीति अन्तरघरतो बहि।

६३४.सेतच्छत्तन्ति एत्थ सेतसद्दो पण्डरपरियायोति आह ‘‘पण्डरच्छत्त’’न्ति। वत्थपलिगुण्ठितन्ति वत्थेहि समन्ततो वेठितं। सेतं छत्तं सेतच्छत्तं। किळञ्‍जेहि कतं छत्तं किळञ्‍जच्छत्तं। पण्णेहि कतं छत्तं पण्णच्छत्तं। मण्डलेन बद्धं मण्डलबद्धं। सलाकाहि बद्धं सलाकबद्धं। तानीति तीणि छत्तानि। हीति सच्‍चं। यम्पि एकपण्णच्छत्तन्ति योजना। एतेसूति तीसु छत्तेसु। अस्साति यस्स कस्सचि गहट्ठस्स वा पब्बजितस्स वा। सोति यो कोचि गहट्ठो वा पब्बजितो वा। छत्तपादुकाय वाति छत्तदण्डनिक्खेपनाय पादुकाय वा। एत्थाति इमस्मिं सिक्खापदे।

६३५.मज्झिमस्साति पमाणमज्झिमस्स। ‘‘चतुहत्थप्पमाणो’’तिइमिना चतुहत्थतो ऊनातिरेको दण्डो न दण्डो नामाति दस्सेति। दण्डो पाणिम्हि अस्साति वचनत्थं अतिदिसन्तो आह ‘‘वुत्तनयेनेवा’’ति।

६३६.‘‘सत्थपाणिम्ही’’ति एत्थ असि एव अधिप्पेतोति आह ‘‘असि’’न्ति। असिन्ति खग्गं।

६३७.‘‘आवुधं नाम चापो कोदण्डो’’ति पाळियं वुत्तवचनं उपलक्खणमेवाति दस्सेन्तो आह ‘‘आवुधपाणिस्साति एत्था’’तिआदि। सब्बापि धनुविकति आवुधन्ति वेदितब्बाति योजना। यथा असिं सन्‍नहित्वा ठितो सत्थपाणीति सङ्ख्यं न गच्छति, एवं धनुं कण्ठे पटिमुक्‍को आवुधपाणीति आह ‘‘सचे पना’’तिआदि, इमिना आवुधो पाणिना गहितोयेव आवुधपाणि नामाति दस्सेतीति। छट्ठो वग्गो।

६४०.द्वीहि जनेहि गहितोति सम्बन्धो। वंसेनाति वेणुना, याने निसिन्‍नोति सम्बन्धो। विसङ्खरित्वाति विपत्तिं करित्वा। द्वेपीति धम्मकथिकधम्मपटिग्गाहकसङ्खाता उभोपि जना। वट्टतीति देसेतुं वट्टति।

६४१.सयनगतस्साति सयनं गतस्स, सयने निपन्‍नस्साति अत्थो। निपन्‍नस्स देसेतुं न वट्टतीति सम्बन्धो।

६४२.तीसु पल्‍लत्थिकासु याय कायचि पल्‍लत्थिकाय निसिन्‍नस्स धम्मं देसेतुं न वट्टतीति दस्सेन्तो आह ‘‘पल्‍लत्थिकाया’’तिआदि।

६४३.यथा वेठियमाने केसन्तो न दिस्सति, एवं वेठितसीसस्साति योजना।

६४७.छपकसद्दस्स च चण्डालसद्दस्स च वेवचनत्ता वुत्तं ‘‘चण्डालस्सा’’ति। चण्डालो हि सं सुनखं पचतीति छपकोति वुच्‍चति सकारस्स छकारं कत्वा। छपकस्स एसा छपकी, चण्डालभरिया। यत्राति एत्थ त्रपच्‍चयो पच्‍चत्ते होतीति आह ‘‘यो हि नामा’’ति। यो राजा उच्‍चे आसने निसीदित्वा मन्तं परियापुणिस्सति नाम, अयं राजा याव अतिविय अधम्मिकोति वुत्तं होति। ‘‘सब्बमिद’’न्ति अयं सद्दो लिङ्गविपल्‍लासोति आह ‘‘सब्बो अय’’न्ति । ‘‘लोको’’ति इमिना इधसद्दस्स विसयं दस्सेति। चरिमसद्दो अन्तिमपरियायो। अन्तिमोति च लामको। लामकोति च नाम इध विपत्तीति आह ‘‘सङ्कर’’न्ति। सङ्करन्ति विपत्तिं। ‘‘निम्मरियादो’’ति इमिना ‘‘सङ्करं गतो’’ति पदानं अधिप्पायत्थं दस्सेति। चरिमं गतं चरिमगतं, सब्बो अयं लोको चरिमगतोति अत्थो। इध च जातके (जा॰ १.४.३३) च केसुचि पोत्थकेसु ‘‘चमरिकत’’न्ति पाठो अत्थि, सो अयुत्तोयेव। तत्थेवाति अम्बरुक्खमूलेयेव। तेसन्ति राजब्राह्मणानं।

तत्थाति तिस्सं गाथायं। पाळियाति अत्तनो आचारपकासकगन्थसङ्खाताय पाळिया। न पस्सरेति एत्थ रेसद्दो अन्तिस्स कारियोति आह ‘‘न पस्सन्ती’’ति। यो चायन्ति यो च अयं। अयंसद्दो पदालङ्कारमत्तो, ब्राह्मणोति अत्थो। अधीयतीति अज्झायति, सिक्खतीति अत्थो।

ततोति बोधिसत्तेन वुत्तगाथातो परन्ति सम्बन्धो। तस्साति गाथाय। भोति बोधिसत्तं आमन्तेति। ‘‘भुत्तो’’ति पदस्स कम्मवाचकभावमाविकातुं वुत्तं ‘‘मया’’ति। अस्साति ओदनस्स। इमिना सुचि परिसुद्धं मंसं सुचिमंसं, तेन उपसेचनमस्साति सुचिमंसूपसेचनोति बाहिरत्थसमासं दस्सेति। धम्मेति आचारधम्मे। बद्धो हुत्वाति थद्धो हुत्वा, अयमेव वा पाठो । वण्णसद्दस्स सण्ठानादिके अञ्‍ञे अत्थे पटिक्खिपितुं वुत्तं ‘‘पसत्थो’’ति। थोमितोति तस्सेव वेवचनं।

अथाति अनन्तरे। नन्ति ब्राह्मणं। तस्साति गाथाद्वयस्स। ब्राह्मणाति पुरोहितं आलपति। सम्पतीति सन्दीट्ठिके। ‘‘या वुत्ति विनिपातेन, अधम्मचरणेन वा’’ति पदानं सम्बन्धं दस्सेतुं वुत्तं ‘‘निप्पज्‍जती’’ति।

महाब्रह्मेति एत्थ ब्रह्मसद्दो ब्राह्मणवाचकोति आह ‘‘महाब्राह्मणा’’ति। अञ्‍ञेपीति राजब्राह्मणेहि अपरेपि। ‘‘पचन्ती’’ति वुत्ते अविनाभावतो ‘‘भुञ्‍जन्ती’’ति अत्थोपि गहेतब्बोति आह ‘‘पचन्ति चेव भुञ्‍जन्ति चा’’ति। ‘‘न केवल’’न्तिआदिना अञ्‍ञेपीति एत्थ पिसद्दस्स सम्पिण्डनत्थं दस्सेति, त्वं आचरिस्ससीति सम्बन्धो। पुन त्वन्ति तं, उपयोगत्थे चेतं पच्‍चत्तवचनं, ‘‘मा भिदा’’तिइमिना सम्बन्धितब्बं। ‘‘पासाणो’’तिइमिना अस्मसद्दो पासाणपरियायोति दस्सेति। तेनाति भिन्दनहेतुना।

६४८.अत्तनो कङ्खाठानस्स पुच्छनं सन्धाय वुत्तं ‘‘न कथेतब्ब’’न्ति।

६४९.समधुरेनाति समं धुरेन, समं मुखेनाति अत्थो।

६५२.यं मूलं वा या साखा वा गच्छतीति योजना। खन्धेति रुक्खस्स खन्धे। निक्खमतीति उच्‍चारपस्सावो निक्खमति। तिणण्डुपकन्ति तिणेन कतं, तिणमयं वा अण्डुपकं। एत्थाति उच्‍चारपस्सावखेळेसु।

६५३.अधिप्पेतउदकं दस्सेतुं वुत्तं ‘‘परिभोगउदकमेवा’’ति। सत्तमो वग्गो।

एत्थाति सेखियेसु। सूपब्यञ्‍जनपटिच्छादनेति सूपब्यञ्‍जने ओदनेन पटिच्छादेति। समत्ता सेखिया।