६. महागोविन्दसुत्तवण्णना

६. महागोविन्दसुत्तवण्णना

२९३.एवंमे सुतन्ति महागोविन्दसुत्तं। तत्रायमनुत्तानपदवण्णना – पञ्‍चसिखोति पञ्‍चचूळो पञ्‍चकुण्डलिको। सो किर मनुस्सपथे पुञ्‍ञकम्मकरणकाले दहरो पञ्‍चचूळकदारककाले वच्छपालकजेट्ठको हुत्वा अञ्‍ञेपि दारके गहेत्वा बहिगामे चतुमग्गट्ठानेसु सालं करोन्तो पोक्खरणिं खणन्तो सेतुं बन्धन्तो विसमं मग्गं समं करोन्तो यानानं अक्खपटिघातनरुक्खे हरन्तोति एवरूपानि पुञ्‍ञानि करोन्तो विचरित्वा दहरोव कालमकासि। तस्स सो अत्तभावो इट्ठो कन्तो मनापो अहोसि। सो कालं कत्वा चातुमहाराजिकदेवलोके नवुतिवस्ससतसहस्सप्पमाणं आयुं गहेत्वा निब्बत्ति। तस्स तिगावुतप्पमाणो सुवण्णक्खन्धसदिसो अत्तभावो अहोसि। सो सकटसहस्समत्तं आभरणं पसाधेत्वा नवकुम्भमत्ते गन्धे विलिम्पित्वा दिब्बरत्तवत्थधरो रत्तसुवण्णकण्णिकं पिळन्धित्वा पञ्‍चहि कुण्डलकेहि पिट्ठियं वत्तमानेहि पञ्‍चचूळकदारकपरिहारेनेव विचरति। तेनेतं ‘‘पञ्‍चसिखो’’ त्वेव सञ्‍जानन्ति।

अभिक्‍कन्ताय रत्तियाति अभिक्‍कन्ताय खीणाय रत्तिया, एककोट्ठासं अतीतायाति अत्थो। अभिक्‍कन्तवण्णोति अतिइट्ठकन्तमनापवण्णो। पकतियापि हेस कन्तवण्णो, अलङ्करित्वा आगतत्ता पन अभिक्‍कन्तवण्णो अहोसि। केवलकप्पन्ति अनवसेसं समन्ततो। अनवसेसत्थो एत्थ केवलसद्दो। केवलपरिपुण्णन्ति एत्थ विय। समन्ततो अत्थो कप्पसद्दो, केवलकप्पं जेतवनन्तिआदीसु विय। ओभासेत्वाति आभाय फरित्वा, चन्दिमा विय सूरियो विय च एकोभासं एकपज्‍जोतं करित्वाति अत्थो।

देवसभावण्णना

२९४.सुधम्मायं सभायन्ति सुधम्माय नाम इत्थिया रतनमत्तकण्णिकरुक्खनिस्सन्देन निब्बत्तसभायं । तस्सा किर फलिकमया भूमि, मणिमया आणियो , सुवण्णमया थम्भा, रजतमया थम्भघटिका च सङ्घाता च, पवाळमयानि वाळरूपानि, सत्तरतनमया गोपानसियो च पक्खपासका च मुखवट्टि च, इन्दनीलइट्ठकाहि छदनं, सोवण्णमयं छदनपीठं, रजतमया थूपिका, आयामतो च वित्थारतो च तीणि योजनसतानि, परिक्खेपतो नवयोजनसतानि, उब्बेधतो पञ्‍चयोजनसतानि, एवरूपायं सुधम्मायं सभायं।

धतरट्ठोतिआदीसु धतरट्ठो गन्धब्बराजा गन्धब्बदेवतानं कोटिसतसहस्सेन परिवुतो कोटिसतसहस्ससुवण्णमयानि फलकानि च सुवण्णसत्तियो च गाहापेत्वा पुरत्थिमाय दिसाय पच्छिमाभिमुखो द्वीसु देवलोकेसु देवता पुरतो कत्वा निसिन्‍नो।

विरूळ्हको कुम्भण्डराजा कुम्भण्डदेवतानं कोटिसतसहस्सेन परिवुतो कोटिसतसहस्सरजतमयानि फलकानि च सुवण्णसत्तियो च गाहापेत्वा दक्खिणाय दिसाय उत्तराभिमुखो द्वीसु देवलोकेसु देवता पुरतो कत्वा निसिन्‍नो।

विरूपक्खो नागराजा नागानं कोटिसतसहस्सेन परिवुतो कोटिसतसहस्समणिमयानि महाफलकानि च सुवण्णसत्तियो च गाहापेत्वा पच्छिमाय दिसाय पुरत्थिमाभिमुखो द्वीसु देवलोकेसु देवता पुरतो कत्वा निसिन्‍नो।

वेस्सवणो यक्खराजा यक्खानं कोटिसतसहस्सेन परिवुतो कोटिसतसहस्सपवाळमयानि महाफलकानि च सुवण्णसत्तियो च गाहापेत्वा उत्तराय दिसाय दक्खिणाभिमुखो द्वीसु देवलोकेसु देवता पुरतो कत्वा निसिन्‍नोति वेदितब्बो।

अथ पच्छा अम्हाकं आसनं होतीति तेसं पच्छतो अम्हाकं निसीदितुं ओकासो पापुणाति। ततो परं पविसितुं वा पस्सितुं वा न लभाम। सन्‍निपातकारणं पनेत्थ पुब्बे वुत्तं चतुब्बिधमेव। तेसु वस्सूपनायिकसङ्गहो वित्थारितो। यथा पन वस्सूपनायिकाय, एवं महापवारणायपि पुण्णमदिवसे सन्‍निपतित्वा ‘‘अज्‍ज कत्थ गन्त्वा कस्स सन्तिके पवारेस्सामा’’ति मन्तेन्ति। तत्थ सक्‍को देवानमिन्दो येभुय्येन पियङ्गुदीपमहाविहारस्मिंयेव पवारेति। सेसा देवता पारिच्छत्तकादीनि दिब्बपुप्फानि चेव दिब्बचन्दनचुण्णानि च गहेत्वा अत्तनो अत्तनो मनापट्ठानमेव गन्त्वा पवारेन्ति। एवं पवारणसङ्गहत्थाय सन्‍निपतन्ति ।

देवलोके पन आसावती नाम लता अत्थि। सा पुप्फिस्सतीति देवा वस्ससहस्सं उपट्ठानं गच्छन्ति। पारिच्छत्तके पुप्फमाने एकवस्सं उपट्ठानं गच्छन्ति। ते तस्स पण्डुपलासादिभावतो पट्ठाय अत्तमना होन्ति। यथाह –

‘‘यस्मिं, भिक्खवे, समये देवानं तावतिंसानं पारिच्छत्तको कोविळारो पण्डुपलासो होति, अत्तमना, भिक्खवे, देवा तावतिंसा तस्मिं समये होन्ति – ‘पण्डुपलासो खो दानि पारिच्छत्तको कोविळारो, न चिरस्सेव पन्‍नपलासो भविस्सती’ति। यस्मिं, भिक्खवे, समये देवानं तावतिंसानं पारिच्छत्तको कोविळारो पन्‍नपलासो होति, खारकजातो होति, जालकजातो होति, कुटुमलकजातो होति, कोरकजातो होति। अत्तमना, भिक्खवे, देवा तावतिंसा तस्मिं समये होन्ति – ‘कोरकजातो दानि पारिच्छत्तको कोविळारो न चिरस्सेव सब्बपालिफुल्‍लो भविस्सती’ति (अ॰ नि॰ ७.६९)।

सब्बपालिफुल्‍लस्स खो पन, भिक्खवे, पारिच्छत्तकस्स कोविळारस्स समन्ता पञ्‍ञास योजनानि आभाय फुटं होति, अनुवातं योजनसतं गन्धो गच्छति। अयमानुभावो पारिच्छत्तकस्स कोविळारस्सा’’ति।

पुप्फिते पारिच्छत्तके आरोहणकिच्‍चं वा अङ्कुसकं गहेत्वा नमनकिच्‍चं वा पुप्फाहरणत्थं चङ्कोटककिच्‍चं वा नत्थि, कन्तनकवातो उट्ठहित्वा पुप्फानि वण्टतो कन्तति, सम्पटिच्छनकवातो सम्पटिच्छति, पवेसनकवातो सुधम्मं देवसभं पवेसेति, सम्मज्‍जनकवातो पुराणपुप्फानि नीहरति, सन्थरणकवातो पत्तकण्णिककेसरानि नच्‍चन्तो सन्थरति, मज्झट्ठाने धम्मासनं होति। योजनप्पमाणो रतनपल्‍लङ्को उपरि तियोजनेन सेतच्छत्तेन धारयमानेन, तदनन्तरं सक्‍कस्स देवरञ्‍ञो आसनं अत्थरियति। ततो तेत्तिंसाय देवपुत्तानं, ततो अञ्‍ञासं महेसक्खदेवतानं। अञ्‍ञतरदेवतानं पन पुप्फकण्णिकाव आसनं होति।

देवा देवसभं पविसित्वा निसीदन्ति। ततो पुप्फेहि रेणुवट्टि उग्गन्त्वा उपरि कण्णिकं आहच्‍च निपतमाना देवतानं तिगावुतप्पमाणं अत्तभावं लाखारसपरिकम्मसज्‍जितं विय करोति। तेसं सा कीळा चतूहि मासेहि परियोसानं गच्छति। एवं पारिच्छत्तककीळानुभवनत्थाय सन्‍निपतन्ति।

मासस्स पन अट्ठदिवसे देवलोके महाधम्मसवनं घुसति। तत्थ सुधम्मायं देवसभायं सनङ्कुमारो वा महाब्रह्मा, सक्‍को वा देवानमिन्दो, धम्मकथिकभिक्खु वा, अञ्‍ञतरो वा धम्मकथिको देवपुत्तो धम्मकथं कथेति। अट्ठमियं पक्खस्स चतुन्‍नं महाराजानं अमच्‍चा, चातुद्दसियं पुत्ता, पन्‍नरसे सयं चत्तारो महाराजानो निक्खमित्वा सुवण्णपट्टञ्‍च जातिहिङ्गुलकञ्‍च गण्हित्वा गामनिगमराजधानियो अनुविचरन्ति। ते – ‘‘असुका नाम इत्थी वा पुरिसो वा बुद्धं सरणं गतो, धम्मं सरणं गतो। सङ्घं सरणं गतो। पञ्‍चसीलानि रक्खति। मासस्स अट्ठ उपोसथे करोति। मातुउपट्ठानं पूरेति। पितुउपट्ठानं पूरेति। असुकट्ठाने उप्पलहत्थकसतेन पुप्फकुम्भेन पूजा कता। दीपसहस्सं आरोपितं। अकालधम्मसवनं कारितं। छत्तवेदिका पुटवेदिका कुच्छिवेदिका सीहासनं सीहसोपानं कारितं। तीणि सुचरितानि पूरेति। दसकुसलकम्मपथे समादाय वत्तती’’ति सुवण्णपट्टे जातिहिङ्गुलकेन लिखित्वा आहरित्वा पञ्‍चसिखस्स हत्थे देन्ति। पञ्‍चसिखो मातलिस्स हत्थे देति। मातलि सङ्गाहको सक्‍कस्स देवरञ्‍ञो देति।

यदा पुञ्‍ञकम्मकारका बहू न होन्ति, पोत्थको खुद्दको होति, तं दिस्वाव देवा – ‘‘पमत्तो, वत भो महाजनो विहरति, चत्तारो अपाया परिपूरिस्सन्ति, छ देवलोका तुच्छा भविस्सन्ती’’ति अनत्तमना होन्ति। सचे पन पोत्थको महा होति, तं दिस्वाव देवा – ‘‘अप्पमत्तो, वत भो, महाजनो विहरति, चत्तारो अपाया सुञ्‍ञा भविस्सन्ति , छ देवलोका परिपूरिस्सन्ति, बुद्धसासने पुञ्‍ञानि करित्वा आगते महापुञ्‍ञे पुरक्खत्वा नक्खत्तं कीळितुं लभिस्सामा’’ति अत्तमना होन्ति। तं पोत्थकं गहेत्वा सक्‍को देवराजा वाचेति। तस्स पकतिनियामेन कथेन्तस्स सद्दो द्वादस योजनानि गण्हाति। उच्‍चेन सरेन कथेन्तस्स च सकलं दसयोजनसहस्सं देवनगरं छादेत्वा तिट्ठति। एवं धम्मसवनत्थाय सन्‍निपतन्ति। इध पन पवारणसङ्गहत्थाय सन्‍निपतिताति वेदितब्बा।

तथागतं नमस्सन्ताति नवहि कारणेहि तथागतं नमस्समाना । धम्मस्स च सुधम्मतन्ति स्वाक्खाततादिभेदं धम्मस्स सुधम्मतं उजुप्पटिपन्‍नतादिभेदं सङ्घस्स च सुप्पटिपत्तिन्ति अत्थो।

अट्ठयथाभुच्‍चवण्णना

२९६.यथाभुच्‍चेति यथाभूते यथासभावे। वण्णेति गुणे। पयिरुदाहासीति कथेसि। बहुजनहितायपटिपन्‍नोति कथं पटिपन्‍नो? दीपङ्करपादमूले अट्ठ धम्मे समोधानेत्वा बुद्धत्थाय अभिनीहरमानोपि बहुजनहिताय पटिपन्‍नो नाम होति।

दानपारमी, सीलपारमी, नेक्खम्मपारमी, पञ्‍ञापारमी, वीरियपारमी, खन्तिपारमी, सच्‍चपारमी, अधिट्ठानपारमी, मेत्तापारमी, उपेक्खापारमीति कप्पसतसहस्साधिकानि चत्तारि असङ्ख्येय्यानि इमा दस पारमियो पूरेन्तोपि बहुजनहिताय पटिपन्‍नो।

खन्तिवादितापसकाले, चूळधम्मपालकुमारकाले, छद्दन्तनागराजकाले, भूरिदत्तचम्पेय्यसङ्खपालनागराजकाले, महाकपिकाले च तादिसानि दुक्‍करानि करोन्तोपि बहुजनहिताय पटिपन्‍नो। वेस्सन्तरत्तभावे ठत्वा सत्तसतकमहादानं दत्वा सत्तसु ठानेसु पथविं कम्पेत्वा पारमीकूटं गण्हन्तोपि बहुजनहिताय पटिपन्‍नो। ततो अनन्तरे अत्तभावे तुसितपुरे यावतायुकं तिट्ठन्तोपि बहुजनहिताय पटिपन्‍नो।

तत्थ पञ्‍च पुब्बनिमित्तानि दिस्वा दससहस्सचक्‍कवाळदेवताहि याचितो पञ्‍च महाविलोकनानि विलोकेत्वा देवानं सङ्गहत्थाय पटिञ्‍ञं दत्वा तुसितपुरा चवित्वा मातुकुच्छियं पटिसन्धिं गण्हन्तोपि बहुजनहिताय पटिपन्‍नो।

दस मासे मातुकुच्छियं वसित्वा लुम्बिनीवने मातुकुच्छितो निक्खमन्तोपि, एकूनतिंसवस्सानि अगारं अज्झावसित्वा महाभिनिक्खमनं निक्खमित्वा अनोमनदीतीरे पब्बजन्तोपि, छब्बस्सानि पधानेन अत्तानं किलमेत्वा बोधिपल्‍लङ्कं आरुय्ह सब्बञ्‍ञुतञ्‍ञाणं पटिविज्झन्तोपि, सत्तसत्ताहं बोधिमण्डे यापेन्तोपि, इसिपतनं आगम्म अनुत्तरं धम्मचक्‍कं पवत्तेन्तोपि, यमकपाटिहारियं करोन्तोपि, देवोरोहणं ओरोहन्तोपि, बुद्धो हुत्वा पञ्‍चचत्तालीस वस्सानि तिट्ठन्तोपि, आयुसङ्खारं ओस्सजन्तोपि, यमकसालानमन्तरे अनुपादिसेसाय निब्बानधातुया परिनिब्बायन्तोपि बहुजनहिताय पटिपन्‍नो। यावस्स सासपमत्तापि धातुयो धरन्ति, ताव बहुजनहिताय पटिपन्‍नोति वेदितब्बो। सेसपदानि एतस्सेव वेवचनानि। तत्थ पच्छिमं पच्छिमं पुरिमस्स पुरिमस्स अत्थो।

नेव अतीतंसे समनुपस्साम, न पनेतरहीति अतीतेपि बुद्धतो अञ्‍ञं न समनुपस्साम, अनागतेपि न समनुपस्साम, एतरहि पन अञ्‍ञस्स सत्थुनो अभावतोयेव अञ्‍ञत्र तेन भगवता न समनुपस्सामाति अयमेत्थ अत्थो। अट्ठकथायम्पि हि – ‘‘अतीतानागता बुद्धा अम्हाकं सत्थारा सदिसायेव, किं सक्‍को कथेती’’ति विचारेत्वा – ‘‘एतरहि बहुजनहिताय पटिपन्‍नो सत्था अम्हाकं सत्थारं मुञ्‍चित्वा अञ्‍ञो कोचि नत्थि, तस्मा न पस्सामाति कथेती’’ति वुत्तं। यथा च एत्थ, एवं इतो परेसुपि पदेसु अयमत्थो वेदितब्बो। स्वाक्खातादीनि च कुसलादीनि च वुत्तत्थानेव।

सनङ्कुमारकथावण्णना

३००.वण्णेन चेव यससा चाति अलङ्कारपरिवारेन च पुञ्‍ञसिरिया चाति अत्थो।

गोविन्दब्राह्मणवत्थुवण्णना

३०४.याव दीघरत्तं महापञ्‍ञोव सो भगवाति एत्तकन्ति परिच्छिन्दित्वा न सक्‍का वत्तुं, अथ खो याव दीघरत्तं अतिचिररत्तं महापञ्‍ञोव सो भगवा। नोति कथं तुम्हे मञ्‍ञथाति। अथ सयमेवेतं पञ्हं ब्याकातुकामो – ‘‘अनच्छरियमेतं, मारिसा, यं इदानि पारमियो पूरेत्वा बोधिपल्‍लङ्के तिण्णं मारानं मत्थकं भिन्दित्वा पटिविद्धअसाधारणञाणो सो भगवा महापञ्‍ञो भवेय्य, किमेत्थ अच्छरियं, अपरिपक्‍काय पन बोधिया पदेसञाणे ठितस्स सरागादिकालेपि महापञ्‍ञभावमेव वो, मारिसा, कथेस्सामी’’ति भवपटिच्छन्‍नकारणं आहरित्वा दस्सेन्तो भूतपुब्बं भोतिआदिमाह।

पुरोहितोति सब्बकिच्‍चानि अनुसासनपुरोहितो। गोविन्दोति गोविन्दियाभिसेकेन अभिसित्तो , पकतिया पनस्स अञ्‍ञदेव नामं, अभिसित्तकालतो पट्ठाय ‘‘गोविन्दो’’ति सङ्ख्यं गतो। जोतिपालोति जोतनतो च पालनतो च जोतिपालो। तस्स किर जातदिवसे सब्बावुधानि उज्‍जोतिंसु। राजापि पच्‍चूससमये अत्तनो मङ्गलावुधं पज्‍जलितं दिस्वा भीतो अट्ठासि। गोविन्दो पातोव राजूपट्ठानं गन्त्वा सुखसेय्यं पुच्छि राजा – ‘‘कुतो मे आचरिय, सुखसेय्या’’ति वत्वा तं कारणं आरोचेसि। मा भायि, महाराज, मय्हं पुत्तो जातो, तस्सानुभावेन सकलनगरे आवुधानि पज्‍जलिंसूति। राजा – ‘‘किं नु खो मे कुमारो पच्‍चत्थिको भवेय्या’’ति चिन्तेत्वा सुट्ठुतरं भायि। ‘‘किं वितक्‍केसि महाराजा’’ति च पुट्ठो तमत्थं आरोचेसि। अथ नं गोविन्दो ‘‘मा भायि महाराज, नेसो कुमारो तुम्हाकं दुब्भिस्सति, सकलजम्बुदीपे पन तेन समो पञ्‍ञाय न भविस्सति, मम पुत्तस्स वचनेन महाजनस्स कङ्खा छिज्‍जिस्सति, तुम्हाकञ्‍च सब्बकिच्‍चानि अनुसासिस्सती’’ति समस्सासेति। राजा तुट्ठो – ‘‘कुमारस्स खीरमूलं होतू’’ति सहस्सं दत्वा ‘‘कुमारं महल्‍लककाले मम दस्सेथा’’ति आह। कुमारो अनुपुब्बेन वुड्ढिमनुप्पत्तो। जोतितत्ता पनस्स पालनसमत्थताय च जोतिपालोत्वेव नामं अकंसु। तेन वुत्तं – ‘‘जोतनतो च पालनतो च जोतिपालो’’ति।

सम्मा वोस्सज्‍जित्वाति सम्मा वोस्सज्‍जित्वा। अयमेव वा पाठो। अलमत्थदसतरोति समत्थो पटिबलो अत्थदसो अलमत्थदसो, तं अलमत्थदसं तिरेतीति अलमत्थदसतरो। जोतिपालस्सेव माणवस्स अनुसासनियाति सोपि जोतिपालंयेव पुच्छित्वा अनुसासतीति दस्सेति।

रज्‍जसंविभजनवण्णना

३०६.येनते छ खत्तियाति ये ते ‘‘सहाया’’ति वुत्ता छ खत्तिया, ते किर रेणुस्स एकपितिका कनिट्ठभातरो, तस्मा महागोविन्दो ‘‘अयं अभिसित्तो एतेसं रज्‍जसंविभागं करेय्य वा न वा, यंनूनाहं ते पटिकच्‍चेव रेणुस्स सन्तिकं पेसेत्वा पटिञ्‍ञं गण्हापेय्य’’न्ति चिन्तेन्तो येन ते छ खत्तिया तेनुपसङ्कमि। राजकत्तारोति राजकारका अमच्‍चा।

कित्तिसद्दअब्भुग्गमनवण्णना

३११.उपसङ्कमिंसूति ‘‘अम्हाकं अयं इस्सरियसम्पत्ति न अञ्‍ञस्सानुभावेन, महागोविन्दस्सानुभावेन निप्फन्‍ना। महागोविन्दो अम्हे सत्त राजानो समग्गे कत्वा जम्बुदीपतले पतिट्ठापेसि, पुब्बूपकारिस्स पन न सुकरा पटिकिरिया कातुं। अम्हे सत्तपि जने एसोयेव अनुसासतु, एतंयेव सेनापतिञ्‍च पुरोहितञ्‍च करोम, एवं नो वुद्धि भविस्सती’’ति चिन्तेत्वा उपसङ्कमिंसु। महागोविन्दोपि – ‘‘मया एते समग्गा कता, सचे एतेसं अञ्‍ञो सेनापति पुरोहितो च भविस्सति, ततो अत्तनो अत्तनो सेनापतिपुरोहितानं वचनं गहेत्वा अञ्‍ञमञ्‍ञं भिन्दिस्सन्ति, अधिवासेमि नेसं सेनापतिट्ठानञ्‍च पुरोहितट्ठानञ्‍चा’’ति चिन्तेत्वा ‘‘एवं भो’’ति पच्‍चस्सोसि।

सत्त च ब्राह्मणमहासालेति ‘‘अहं सब्बट्ठानेसु सम्मुखो भवेय्यं वा न वा, यत्थाहं सम्मुखो न भविस्सामि, तत्थेव ते कत्तब्बं करिस्सन्ती’’ति सत्त अनुपुरोहिते ठपेसि। ते सन्धाय इदं वुत्तं – ‘‘सत्त च ब्राह्मणमहासाले’’ति। दिवसस्स द्विक्खत्तुं वा सायं पातो वा नहायन्तीति नहातका। वतचरियपरियोसाने वा नहाता, ततो पट्ठाय ब्राह्मणेहि सद्धिं न खादन्ति न पिवन्तीति नहातका।

ब्रह्मुनासाकच्छावण्णना

३१८.भयन्ति चित्तुत्रासभयमेव। अजानन्ताति अजानमाना। कथं जानेमु तं मयन्ति (दी॰ नि॰ २.१७९) मयं किन्ति तं जानाम, अयं कत्थवासिको, किन्‍नामो, किं गोत्तोतिआदीनं आकारानं केन आकारेन तं धारयामाति अत्थो।

मं वे कुमारं जानन्तीति मं ‘‘कुमारो’’ति ‘‘दहरो’’ति जानन्ति। ब्रह्मलोकेति सेट्ठलोके। सनन्तनन्ति चिरतनं पोराणकं । अहं सो पोराणकुमारो सनङ्कुमारो नाम ब्रह्माति दस्सेति। एवं गोविन्द जानाहीति गोविन्द पण्डित, त्वं एवं जानाहि, एवं मं धारेहि।

‘‘आसनं उदकं पज्‍जं, मधुसाकञ्‍च ब्रह्मुनो।

अग्घे भवन्तं पुच्छाम, अग्घं कुरुतु नो भव’’न्ति॥ –

एत्थ अग्घन्ति अतिथिनो उपनामेतब्बं वुच्‍चति। तेनेव इदमासनं पञ्‍ञत्तं, एत्थ निसीदथ, इदं उदकं परिसुद्धं, इतो पानीयं पिवथ, पादे धोवथ, इदं पज्‍जं पादानं हितत्थाय अभिसङ्खतं तेलं, इतो पादे मक्खेथ, इदं मधुसाकन्ति। बोधिसत्तस्स ब्रह्मचरियं न अञ्‍ञेसं ब्रह्मचरियसदिसं होति, न सो ‘‘इदं स्वे, इदं ततियदिवसे भविस्सती’’ति सन्‍निधिं नाम करोति। मधुसाकं पन अलोणं अधूपनं अतक्‍कं उदकेन सेदितसाकं, तं सन्धायेस – ‘‘इदं परिभुञ्‍जथा’’ति वदन्तो ‘‘अग्घे भवन्तं पुच्छामा’’तिआदिमाह। इमे सब्बेपि अग्घा ब्रह्मुनो अत्थि। ते अग्घे भवन्तं पुच्छाम। एवं पुच्छन्तानञ्‍च अग्घं कुरुतु नो भवं, पटिग्गण्हातु नो भवं इदमग्घन्ति वुत्तं होति। किं पनेस – ‘‘इतो एकम्पि ब्रह्मा न भुञ्‍जती’’ति इदं न जानातीति। नो न जानाति, जानन्तोपि अत्तनो सन्तिके आगतो अतिथि पुच्छितब्बोति वत्तसीसेन पुच्छति।

अथ खो ब्रह्मा – ‘‘किं नु खो पण्डितो मम परिभोगकरणाभावं ञत्वा पुच्छति, उदाहु कोहञ्‍ञे ठत्वा पुच्छती’’ति समन्‍नाहरन्तो ‘‘वत्तसीसे ठितो पुच्छती’’ति ञत्वा पटिग्गण्हितुं दानि मे वट्टतीति पटिग्गण्हाम ते अग्घं, यं त्वं गोविन्द भाससीति आह। यं त्वं गोविन्द भाससि – ‘‘इदमासनं पञ्‍ञत्तं, एत्थ निसीदथा’’तिआदि, तत्र ते मयं आसने निसिन्‍ना नाम होम, पानीयं पीता नाम होम, पादापि मे धोता नाम होन्तु, तेलेनपि मक्खिता नाम होन्तु, उदकसाकम्पि परिभुत्तं नाम होतु, तया दिन्‍नं अधिवासितकालतो पट्ठाय यं यं त्वं भाससि, तं तं मया पटिग्गहितमेव होति। तेन वुत्तं – ‘‘पटिग्गण्हाम ते अग्घं, यं त्वं गोविन्द भाससी’’ति। एवं पन अग्घं पटिग्गण्हित्वा पञ्हस्स ओकासं करोन्तो दिट्ठधम्महितत्थायातिआदिमाह।

कङ्खीअकङ्खिं परवेदियेसूति अहं सविचिकिच्छो भवन्तं परेन सयं अभिसङ्खतत्ता परस्स पाकटेसु परवेदियेसु पञ्हेसु निब्बिचिकिच्छं।

रेणुराजआमन्तनावण्णना

३२१.महापुरिसोपि ‘‘मम इतोव निक्खमित्वा पब्बजनं नाम न युत्तं, अहं राजकुलस्स अत्थं अनुसासामि, तस्मा रञ्‍ञो आरोचेस्सामि। सचे सोपि पब्बजिस्सति, सुन्दरमेव। नो चे पब्बजिस्सति, पुरोहितट्ठानं निय्यातेत्वा अहं पब्बजिस्सामी’’ति चिन्तेत्वा राजानं उपसङ्कमि, तेन वुत्तं – ‘‘अथ खो भो महागोविन्दो,…पे॰… नाहं पोरोहच्‍चे रमे’’ति।

तत्थ त्वं पजानस्सु रज्‍जेनाति तव रज्‍जेन त्वमेव जानाहि। नाहं पोरोहिच्‍चे रमेति अहं पुरोहितभावे न रमामि, उक्‍कण्ठितोस्मि, अञ्‍ञं अनुसासकं जानाहि, नाहं पोरोहिच्‍चे रमेति।

अथ राजा – ‘‘धुवं चत्तारो मासे पटिसल्‍लीनस्स ब्राह्मणस्स गेहे भोगा मन्दा जाता’’ति चिन्तेत्वा धनेन निमन्तेन्तो – ‘‘सचे ते ऊनं कामेहि। अहं परिपूरयामि ते’’ति वत्वा पुन – ‘‘किन्‍नु खो एस एकको विहरन्तो केनचि विहिंसितो भवेय्या’’ति चिन्तेत्वा,

‘‘यो तं हिंसति वारेमि, भूमिसेनापति अहं।

तुवं पिता अहं पुत्तो, मा नो गोविन्द पाजही’’ति॥ –

आह । तस्सत्थो – यो तं हिंसति, तं वारेमि, केवलं तुम्हे ‘‘असुको’’ति आचिक्खथ, अहमेत्थ कत्तब्बं जानिस्सामीति। भूमिसेनापति अहन्ति अथ वा अहं पथविया सामी, स्वाहं इमं रज्‍जं तुम्हेयेव पटिच्छापेस्सामि। तुवं पिता अहं पुत्तोति त्वं पितिट्ठाने ठस्ससि, अहं पुत्तट्ठाने। सो त्वं मम मनं हरित्वा अत्तनोयेव मनं गोविन्द, पाजेहि; यथा इच्छसि तथा पवत्तस्सु। अहं पन तव मनंयेव अनुवत्तन्तो तया दिन्‍नपिण्डं परिभुञ्‍जन्तो तं असिचम्महत्थो वा उपट्ठहिस्सामि, रथं वा ते पाजेस्सामि। ‘‘मा नो गोविन्द, पजही’’ति वा पाठो । तस्सत्थो – त्वं पितिट्ठाने तिट्ठ, अहं पुत्तट्ठाने ठस्सामि। मा नो त्वं भो गोविन्द, पजहि, मा परिच्‍चजीति। अथ महापुरिसो यं राजा चिन्तेसि, तस्स अत्तनि अभावं दस्सेन्तो –

‘‘न मत्थि ऊनं कामेहि, हिंसिता मे न विज्‍जति।

अमनुस्सवचो सुत्वा, तस्माहं न गहे रमे’’ति॥ –

आह। तत्थ न मत्थीति न मे अत्थि। गहेति गेहे। अथ नं राजा पुच्छि –

छ खत्तियआमन्तनावण्णना

३२२.येनते छ खत्तिया तेनुपसङ्कमीति रेणुं राजानं ‘‘साधु महाराज रज्‍जं नाम मातरं पितरं भातिभगिनीआदयोपि मारेत्वा गण्हन्तेसु सत्तेसु एवं महन्तं रज्‍जसिरिं पहाय पब्बजितुकामेन उळारं महाराजेन कत’’न्ति उपत्थम्भेत्वा दळ्हतरमस्स उस्साहं कत्वा उपसङ्कमि । एवं समचिन्तेसुन्ति रञ्‍ञो चिन्तितनयेनेव कदाचि ब्राह्मणस्स भोगा परिहीना भवेय्युन्ति मञ्‍ञमाना समचिन्तेसुं। धनेन सिक्खेय्यामाति उपलापेय्याम सङ्गण्हेय्याम। तावतकं आहरीयतन्ति तावतकं आहरापियतु गण्हियतु, यत्तकं इच्छथ, तत्तकं गण्हथाति वुत्तं होति। भवन्तानंयेव वाहसाति भवन्ते पच्‍चयं कत्वा, तुम्हेहि दिन्‍नत्तायेव पहूतं सापतेय्यं जातं।

ब्राह्मणमहासालादीनं आमन्तनावण्णना

३२४.अप्पेसक्खा च अप्पलाभा चाति भो पब्बज्‍जा नाम अप्पयसा चेव, पब्बजितकालतो पट्ठाय हि रज्‍जं पहाय पब्बजितं विहेठेत्वा विहेठेत्वा लामकं अनाथं कत्वाव कथेन्ति। अप्पलाभा च, सकलगामं चरित्वापि अज्झोहरणीयं दुल्‍लभमेव। इदं पन ब्रह्मञ्‍ञंमहेसक्खञ्‍च महायसत्ता, महालाभञ्‍च लाभसक्‍कारसम्पन्‍नत्ता। भवञ्हि एतरहि सकलजम्बुदीपे अग्गपुरोहितो सब्बत्थ अग्गासनं अग्गोदकं अग्गभत्तं अग्गगन्धं अग्गमालं लभतीति।

राजाव रञ्‍ञन्ति अहञ्हि भो एतरहि पकतिरञ्‍ञं मज्झे चक्‍कवत्तिराजा विय। ब्रह्माव ब्रह्मानन्ति पकतिब्रह्मानं मज्झे महाब्रह्मसदिसो। देवताव गहपतिकानन्ति अवसेसगहपतिकानं पनम्हि सक्‍कदेवराजसदिसो।

भरियानं आमन्तनावण्णना

३२५.चत्तारीसा भरिया सादिसियोति सादिसियोव चत्तारीसा भरिया, अञ्‍ञा पनस्स तीसु वयेसु नाटकित्थियो बहुकायेव।

महागोविन्दपब्बज्‍जावण्णना

३२६.चारिकं चरतीति गामनिगमपटिपाटिया चारिकं चरति, गतगतट्ठाने बुद्धकोलाहलं विय होति। मनुस्सा ‘‘महागोविन्दपण्डितो किर आगच्छती’’ति सुत्वा पुरेतरमेव मण्डपं कारेत्वा मग्गं अलङ्करित्वा पच्‍चुग्गन्त्वा गण्हित्वा एन्ति, महालाभसक्‍कारो महोघो विय अज्झोत्थरन्तो उप्पज्‍जि। सत्तपुरोहितस्साति सत्तन्‍नं राजूनं पुरोहितस्स। इति यथा एतरहि एवरूपेसु वा ठानेसु किस्मिञ्‍चिदेव दुक्खे उप्पन्‍ने ‘‘नमो बुद्धस्सा’’ति वदन्ति, एवं तदा ‘‘नमत्थु महागोविन्दस्स ब्राह्मणस्स, नमत्थु सत्तपुरोहितस्सा’’ति वदन्ति।