१०. पायासिराजञ्‍ञसुत्तवण्णना

४१२.अत्थि पन, राजञ्‍ञ, परियायोति अत्थि पन कारणन्ति पुच्छति। आबाधिकाति विसभागवेदनासङ्खातेन आबाधेन समन्‍नागता। दुक्खिताति दुक्खप्पत्ता। बाळ्हगिलानाति अधिमत्तगिलाना। सद्धायिकाति अहं तुम्हे सद्दहामि, तुम्हे मय्हं सद्धायिका सद्धायितब्बवचनाति अत्थो। पच्‍चयिकाति अहं तुम्हे पत्तियामि, तुम्हे मय्हं पच्‍चयिका पत्तियायितब्बाति अत्थो।

४१५.वेळुपेसिकाहीति वेळुविलीवेहि। सुनिम्मज्‍जथाति यथा सुट्ठु निम्मज्‍जितं होति, एवं निम्मज्‍जथ, अपनेथाति अत्थो।

असुचीति अमनापो। असुचिसङ्खातोति असुचिकोट्ठासभूतो असुचीति ञातो वा। दुग्गन्धोति कुणपगन्धो। जेगुच्छोति जिगुच्छितब्बयुत्तो। पटिकूलोति दस्सनेनेव पटिघावहो। उब्बाधतीति दिवसस्स द्विक्खत्तुं न्हत्वा तिक्खत्तुं वत्थानि परिवत्तेत्वा अलङ्कतपटिमण्डितानं चक्‍कवत्तिआदीनम्पि मनुस्सानं गन्धो योजनसते ठितानं देवतानं कण्ठे आसत्तकुणपं विय बाधति।

४१६.पुन पाणातिपातादिपञ्‍चसीलानि समादायवत्तेन्तानं वसेन वदति। तावतिंसानन्ति इदञ्‍च दूरे निब्बत्ता ताव मा आगच्छन्तु, इमे कस्मा न एन्तीति वदति।

४१८.जच्‍चन्धूपमोमञ्‍ञे पटिभासीति जच्‍चन्धो विय उपट्ठासि। अरञ्‍ञवनपत्थानीति अरञ्‍ञकङ्गयुत्तताय अरञ्‍ञानि, महावनसण्डताय वनपत्थानि। पन्तानीति दूरानि।

४१९.कल्याणधम्मेति तेनेव सीलेन सुन्दरधम्मे। दुक्खपटिकूलेति दुक्खं अपत्थेन्ते। सेय्यो भविस्सतीति परलोके सुगतिसुखं भविस्सतीति अधिप्पायो।

४२०.उपविजञ्‍ञाति उपगतविजायनकाला, परिपक्‍कगब्भा न चिरस्सेव विजायिस्सतीति अत्थो। ओपभोग्गा भविस्सतीति पादपरिचारिका भविस्सति। अनयब्यसनन्ति महादुक्खं। अयोति सुखं, न अयो अनयो, दुक्खं। तदेतं सब्बसो सुखं ब्यसति विक्खिपतीति ब्यसनं। इति अनयोव ब्यसनं अनयब्यसनं, महादुक्खन्ति अत्थो। अयोनिसोति अनुपायेन। अपक्‍कं न परिपाचेन्तीति अपरिणतं अखीणं आयुं अन्तराव न उपच्छिन्दन्ति। परिपाकं आगमेन्तीति आयुपरिपाककालं आगमेन्ति। धम्मसेनापतिनापेतं वुत्तं –

‘‘नाभिनन्दामि मरणं, नाभिनन्दामि जीवितं।

कालञ्‍च पटिकङ्खामि, निब्बिसं भतको यथाति॥ (थेरगा॰ १००१)

४२१.उब्भिन्दित्वाति मत्तिकालेपं भिन्दित्वा।

४२२.रामणेय्यकन्ति रमणीयभावं। वेलासिकाति खिड्डापराधिका। कोमारिकाति तरुणदारिका। तुय्हं जीवन्ति सुपिनदस्सनकाले निक्खमन्तं वा पविसन्तं वा जीवं अपि नु पस्सन्ति। इध चित्ताचारं ‘‘जीव’’न्ति गहेत्वा आह। सो हि तत्थ जीवसञ्‍ञीति।

४२३.जियायाति धनुजियाय, गीवं वेठेत्वाति अत्थो। पत्थिन्‍नतरोति थद्धतरो। इमिना किं दस्सेति? तुम्हे जीवकाले सत्तस्स पञ्‍चक्खन्धाति वदन्ति, चवनकाले पन रूपक्खन्धमत्तमेव अवसिस्सति, तयो खन्धा अप्पवत्ता होन्ति, विञ्‍ञाणक्खन्धो गच्छति। अवसिट्ठेन रूपक्खन्धेन लहुतरेन भवितब्बं, गरुकतरो च होति। तस्मा नत्थि कोचि कुहिं गन्ताति इममत्थं दस्सेति।

४२४.निब्बुतन्ति वूपसन्ततेजं।

४२५.अनुपहच्‍चाति अविनासेत्वा। आमतो होतीति अद्धमतो मरितुं आरद्धो होति। ओधुनाथाति ओरतो करोथ। सन्धुनाथाति परतो करोथ। निद्धुनाथाति अपरापरं करोथ। तञ्‍चायतनं न पटिसंवेदेतीति तेन चक्खुना तं रूपायतनं न विभावेति। एस नयो सब्बत्थ।

४२६.सङ्खधमोति सङ्खधमको। उपलापेत्वाति धमित्वा।

४२८.अग्गिकोति अग्गिपरिचारको। आपादेय्यन्ति निप्फादेय्यं, आयुं वा पापुणापेय्यं। पोसेय्यन्ति भोजनादीहि भरेय्यं। वड्ढेय्यन्ति वड्ढिं गमेय्यं। अरणीसहितन्ति अरणीयुगळं।

४२९.तिरोराजानोपीति तिरोरट्ठे अञ्‍ञस्मिम्पि जनपदे राजानो जानन्ति। अब्यत्तोति अविसदो अछेको। कोपेनपीति ये मं एवं वक्खन्ति, तेसु उप्पज्‍जनकेन कोपेनपि एतं दिट्ठिगतं हरिस्सामि परिहरिस्सामीति गहेत्वा विचरिस्सामि। मक्खेनाति तया वुत्तयुत्तकारणमक्खलक्खणेन मक्खेनापि। पलासेनाति तया सद्धिं युगग्गाहलक्खणेन पलासेनापि।

४३०.हरितकपण्णन्ति यं किञ्‍चि हरितकं, अन्तमसो अल्‍लतिणपण्णम्पि न होतीति अत्थो। सन्‍नद्धकलापन्ति सन्‍नद्धधनुकलापं। आसित्तोदकानि वटुमानीति परिपुण्णसलिला मग्गा च कन्दरा च। योग्गानीति बलिबद्दे।

बहुनिक्खन्तरोति बहुनिक्खन्तो चिरनिक्खन्तोति अत्थो। यथाभतेन भण्डेनाति यं वो तिणकट्ठोदकभण्डकं आरोपितं, तेन यथाभतेन यथारोपितेन, यथागहितेनाति अत्थो।

अप्पसारानीति अप्पग्घानि। पणियानीति भण्डानि।

४३४.आगतागतं कलिं गिलतीति आगतागतं पराजयगुळं गिलति। पज्‍जोहिस्सामीति पज्‍जोहनं करिस्सामि, बलिकम्मं करिस्सामीति अत्थो। अक्खेहि दिब्बिस्सामाति गुळेहि कीळिस्साम। लित्तं परमेन तेजसाति परमतेजेन विसेन लित्तं।

४३६.गामपट्टन्ति वुट्ठितगामपदेसो वुच्‍चति। ‘‘गामपद’’न्तिपि पाठो, अयमेवत्थो। साणभारन्ति साणवाकभारं। सुसन्‍नद्धोति सुबद्धो। त्वं पजानाहीति त्वं जान। सचे गण्हितुकामोसि, गण्हाहीति वुत्तं होति।

खोमन्ति खोमवाकं। अयन्ति काळलोहं। लोहन्ति तम्बलोहं। सज्झन्ति रजतं। सुवण्णन्ति सुवण्णमासकं। अभिनन्दिंसूति तुस्सिंसु।

४३७.अत्तमनोति सकमनो तुट्ठचित्तो। अभिरद्धोति अभिप्पसन्‍नो। पञ्हापटिभानानीति पञ्हुपट्ठानानि। पच्‍चनीकं कत्तब्बन्ति पच्‍चनीकं पटिविरुद्धं विय कत्तब्बं अमञ्‍ञिस्सं, पटिलोमगाहं गहेत्वा अट्ठासिन्ति अत्थो।

४३८.सङ्घातं आपज्‍जन्तीति सङ्घातं विनासं मरणं आपज्‍जन्ति। न महप्फलोति विपाकफलेन न महप्फलो होति। न महानिसंसोति गुणानिसंसेन महानिसंसो न होति। न महाजुतिकोति आनुभावजुतिया महाजुतिको न होति। न महाविप्फारोति विपाकविप्फारताय महाविप्फारो न होति। बीजनङ्गलन्ति बीजञ्‍च नङ्गलञ्‍च। दुक्खेत्तेति दुट्ठुखेत्ते निस्सारखेत्ते। दुब्भूमेति विसमभूमिभागे। पतिट्ठापेय्याति ठपेय्य। खण्डानीति छिन्‍नभिन्‍नानि। पूतीनीति निस्सारानि। वातातपहतानीति वातेन च आतपेन च हतानि परियादिन्‍नतेजानि। असारादानीति तण्डुलसारादानरहितानि पलालानि। असुखसयितानीति यानि सुक्खापेत्वा कोट्ठे आकिरित्वा ठपितानि, तानि सुखसयितानि नाम। एतानि पन न तादिसानि। अनुप्पवेच्छेय्याति अनुपवेसेय्य, न सम्मा वस्सेय्य, अन्वद्धमासं अनुदसाहं अनुपञ्‍चाहं न वस्सेय्याति अत्थो। अपि नु तानीति अपि नु एवं खेत्तबीजवुट्ठिदोसे सति तानि बीजानि अङ्कुरमूलपत्तादीहि उद्धं वुद्धिं हेट्ठा विरूळ्हिं समन्ततो च वेपुल्‍लं आपज्‍जेय्युन्ति । एवरूपो खो राजञ्‍ञ यञ्‍ञोति एवरूपं राजञ्‍ञ दानं परूपघातेन उप्पादितपच्‍चयतोपि दायकतोपि परिग्गाहकतोपि अविसुद्धत्ता न महप्फलं होति।

एवरूपो खो राजञ्‍ञ यञ्‍ञोति एवरूपं राजञ्‍ञदानं अपरूपघातेन उप्पन्‍नपच्‍चयतोपि अपरूपघातिताय सीलवन्तदायकतोपि सम्मादिट्ठिआदिगुणसम्पन्‍नपटिग्गाहकतोपि महप्फलं होति। सचे पन गुणातिरेकं निरोधा वुट्ठितं पटिग्गाहकं लभति, चेतना च विपुला होति, दिट्ठेव धम्मे विपाकं देतीति।

४३९.इमं पन थेरस्स धम्मकथं सुत्वा पायासिराजञ्‍ञो थेरं निमन्तेत्वा सत्ताहं थेरस्स महादानं दत्वा ततो पट्ठाय महाजनस्स दानं पट्ठपेसि। तं सन्धाय अथ खो पायासि राजञ्‍ञोतिआदि वुत्तं। तत्थ कणाजकन्ति सकुण्डकं उत्तण्डुलभत्तं। बिलङ्गदुतियन्ति कञ्‍जिकदुतियं। धोरकानि च वत्थानीति थूलानि च वत्थानि। गुळवालकानीति गुळदसानि, पुञ्‍जपुञ्‍जवसेन ठितमहन्तदसानीति अत्थो। एवं अनुद्दिसतीति एवं उपदिसति। पादापीति पादेनपि।

४४०.असक्‍कच्‍चन्ति सद्धाविरहितं अस्सद्धदानं। असहत्थाति न सहत्थेन। अचित्तीकतन्ति चित्तीकारविरहितं, न चित्तीकारम्पि पच्‍चुपट्ठापेत्वा न पणीतचित्तं कत्वा अदासि। अपविद्धन्ति छड्डितं विप्पतितं। सुञ्‍ञं सेरीसकन्ति सेरीसकं नाम एकं तुच्छं रजतविमानं उपगतो। तस्स किर द्वारे महासिरीसरुक्खो, तेन तं ‘‘सेरीसक’’न्ति वुच्‍चति।

४४१.आयस्मागवंपतीति थेरो किर पुब्बे मनुस्सकाले गोपालदारकानं जेट्ठको हुत्वा महतो सिरीसस्स मूलं सोधेत्वा वालिकं ओकिरित्वा एकं पिण्डपातिकत्थेरं रुक्खमूले निसीदापेत्वा अत्तना लद्धं आहारं दत्वा ततो चुतो तस्सानुभावेन तस्मिं रजतविमाने निब्बत्ति। सिरीसरुक्खो विमानद्वारे अट्ठासि। सो पञ्‍ञासाय वस्सेहि फलति, ततो पञ्‍ञास वस्सानि गतानीति देवपुत्तो संवेगं आपज्‍जति। सो अपरेन समयेन अम्हाकं भगवतो काले मनुस्सेसु निब्बत्तित्वा सत्थु धम्मकथं सुत्वा अरहत्तं पत्तो। पुब्बाचिण्णवसेन पन दिवाविहारत्थाय तदेव विमानं अभिण्हं गच्छति, तं किरस्स उतुसुखं होति। तं सन्धाय ‘‘तेन खो पन समयेन आयस्मा गवंपती’’तिआदि वुत्तं।

सोसक्‍कच्‍चं दानं दत्वाति सो परस्स सन्तकम्पि दानं सक्‍कच्‍चं दत्वा। एवमारोचेसीति ‘‘सक्‍कच्‍चं दानं देथा’’तिआदिना नयेन आरोचेसि। तञ्‍च पन थेरस्स आरोचनं सुत्वा महाजनो सक्‍कच्‍चं दानं दत्वा देवलोके निब्बत्तो। पायासिस्स पन राजञ्‍ञस्स परिचारका सक्‍कच्‍चं दानं दत्वापि निकन्तिवसेन गन्त्वा तस्सेव सन्तिके निब्बत्ता। तं किर दिसाचारिकविमानं वट्टनिअटवियं अहोसि। पायासिदेवपुत्तो च एकदिवसं वाणिजकानं दस्सेत्वा अत्तनो कतकम्मं कथेसीति।

इति सुमङ्गलविलासिनिया दीघनिकायट्ठकथायं

पायासिराजञ्‍ञसुत्तवण्णना निट्ठिता।

निट्ठिता च महावग्गस्सत्थवण्णना।

महावग्गट्ठकथा निट्ठिता।