११. एकादसनिपातो
१. संकिच्चत्थेरगाथा
‘‘किं तवत्थो वने तात, उज्जुहानोव पावुसे।
वेरम्भा रमणीया ते, पविवेको हि झायिनं॥
‘‘यथा अब्भानि वेरम्भो, वातो नुदति पावुसे।
सञ्ञा मे अभिकिरन्ति, विवेकपटिसञ्ञुता॥
‘‘अपण्डरो अण्डसम्भवो, सीवथिकाय निकेतचारिको।
उप्पादयतेव मे सतिं, सन्देहस्मिं विरागनिस्सितं॥
‘‘यञ्च अञ्ञे न रक्खन्ति, यो च अञ्ञे न रक्खति।
स वे भिक्खु सुखं सेति, कामेसु अनपेक्खवा॥
‘‘अच्छोदिका पुथुसिला, गोनङ्गुलमिगायुता।
अम्बुसेवालसञ्छन्ना, ते सेला रमयन्ति मं॥
‘‘वसितं मे अरञ्ञेसु, कन्दरासु गुहासु च।
सेनासनेसु पन्तेसु, वाळमिगनिसेविते॥
‘‘‘इमे हञ्ञन्तु वज्झन्तु, दुक्खं पप्पोन्तु पाणिनो’।
सङ्कप्पं नाभिजानामि, अनरियं दोससंहितं॥
‘‘परिचिण्णो मया सत्था, कतं बुद्धस्स सासनं।
ओहितो गरुको भारो, भवनेत्ति समूहता॥
‘‘यस्स चत्थाय [यस्सत्थाय (सी॰)] पब्बजितो, अगारस्मानगारियं।
सो मे अत्थो अनुप्पत्तो, सब्बसंयोजनक्खयो॥
‘‘नाभिनन्दामि मरणं, नाभिनन्दामि जीवितं।
कालञ्च पटिकङ्खामि, निब्बिसं भतको यथा॥
‘‘नाभिनन्दामि मरणं, नाभिनन्दामि जीवितं।
कालञ्च पटिकङ्खामि, सम्पजानो पतिस्सतो’’ति॥
… संकिच्चो थेरो…।
एकादसनिपातो निट्ठितो।
तत्रुद्दानं –
संकिच्चथेरो एकोव, कतकिच्चो अनासवो।
एकादसनिपातम्हि, गाथा एकादसेव चाति॥