३. दीपङ्करबुद्धवंसो
तदा ते भोजयित्वान, ससङ्घं लोकनायकं।
उपगच्छुं सरणं तस्स, दीपङ्करस्स सत्थुनो॥
सरणागमने कञ्चि, निवेसेसि तथागतो।
कञ्चि पञ्चसु सीलेसु, सीले दसविधे परं॥
कस्सचि देति सामञ्ञं, चतुरो फलमुत्तमे।
कस्सचि असमे धम्मे, देति सो पटिसम्भिदा॥
कस्सचि वरसमापत्तियो, अट्ठ देति नरासभो।
तिस्सो कस्सचि विज्जायो, छळभिञ्ञा पवेच्छति॥
तेन योगेन जनकायं, ओवदति महामुनि।
तेन वित्थारिकं आसि, लोकनाथस्स सासनं॥
महाहनुसभक्खन्धो , दीपङ्करस्स नामको।
बहू जने तारयति, परिमोचेति दुग्गतिं॥
बोधनेय्यं जनं दिस्वा, सतसहस्सेपि योजने।
खणेन उपगन्त्वान, बोधेति तं महामुनि॥
पठमाभिसमये बुद्धो, कोटिसतमबोधयि।
दुतियाभिसमये नाथो, नवुतिकोटिमबोधयि॥
यदा च देवभवनम्हि, बुद्धो धम्ममदेसयि।
नवुतिकोटिसहस्सानं, ततियाभिसमयो अहु॥
सन्निपाता तयो आसुं, दीपङ्करस्स सत्थुनो।
कोटिसतसहस्सानं, पठमो आसि समागमो॥
पुन नारदकूटम्हि, पविवेकगते जिने।
खीणासवा वीतमला, समिंसु सतकोटियो॥
यम्हि काले महावीरो, सुदस्सनसिलुच्चये।
नवकोटिसहस्सेहि, पवारेसि महामुनि॥
दसवीससहस्सानं, धम्माभिसमयो अहु।
एकद्विन्नं अभिसमया, गणनातो असङ्खिया॥
वित्थारिकं बाहुजञ्ञं, इद्धं फीतं अहू तदा।
दीपङ्करस्स भगवतो, सासनं सुविसोधितं॥
चत्तारि सतसहस्सानि, छळभिञ्ञा महिद्धिका।
दीपङ्करं लोकविदुं, परिवारेन्ति सब्बदा॥
ये केचि तेन समयेन, जहन्ति मानुसं भवं।
अपत्तमानसा सेखा, गरहिता भवन्ति ते॥
सुपुप्फितं पावचनं, अरहन्तेहि तादिहि।
खीणासवेहि विमलेहि, उपसोभति सब्बदा॥
नगरं रम्मवती नाम, सुदेवो नाम खत्तियो।
सुमेधा नाम जनिका, दीपङ्करस्स सत्थुनो॥
दसवस्ससहस्सानि , अगारं अज्झ सो वसि [अज्झावसी जिनो (स्या॰ क॰)]।
हंसा कोञ्चा मयूरा च, तयो पासादमुत्तमा॥
तीणिसतसहस्सानि, नारियो समलङ्कता।
पदुमा नाम सा नारी, उसभक्खन्धो अत्रजो॥
निमित्ते चतुरो दिस्वा, हत्थियानेन निक्खमि।
अनूनदसमासानि, पधाने पदही जिनो॥
पधानचारं चरित्वान, अबुज्झि मानसं मुनि।
ब्रह्मुना याचितो सन्तो, दीपङ्करो महामुनि॥
वत्ति चक्कं महावीरो, नन्दारामे सिरीघरे [सिरीधरे (सी॰)]।
निसिन्नो सिरीसमूलम्हि, अका तित्थियमद्दनं॥
सुमङ्गलो च तिस्सो च, अहेसुं अग्गसावका।
सागतो [सोभितो (क॰)] नामुपट्ठाको, दीपङ्करस्स सत्थुनो॥
नन्दा चेव सुनन्दा च, अहेसुं अग्गसाविका।
बोधि तस्स भगवतो, पिप्फलीति पवुच्चति॥
तपुस्सभल्लिका [तपस्सुभल्लिका (सी॰)] नाम, अहेसुं अग्गुपट्ठका।
सिरिमा कोणा उपट्ठिका, दीपङ्करस्स सत्थुनो॥
असीतिहत्थमुब्बेधो, दीपङ्करो महामुनि।
सोभति दीपरुक्खोव, सालराजाव फुल्लितो॥
सतसहस्सवस्सानि, आयु तस्स महेसिनो।
तावता तिट्ठमानो सो, तारेसि जनतं बहुं॥
जोतयित्वान सद्धम्मं, सन्तारेत्वा महाजनं।
जलित्वा अग्गिक्खन्धोव, निब्बुतो सो ससावको॥
सा च इद्धि सो च यसो, तानि च पादेसु चक्करतनानि।
सब्बं तमन्तरहितं [समन्तरहितं (सी॰ स्या॰ क॰)], ननु रित्ता सब्बसङ्खारा [सब्बसङ्खाराति (सब्बत्थ)]॥
दीपङ्करो जिनो सत्था, नन्दारामम्हि निब्बुतो।
तत्थेवस्स जिनथूपो, छत्तिंसुब्बेधयोजनोति॥
दीपङ्करस्स भगवतो वंसो पठमो।