८. सोभितबुद्धवंसो
रेवतस्स अपरेन, सोभितो नाम नायको।
समाहितो सन्तचित्तो, असमो अप्पटिपुग्गलो॥
सो जिनो सकगेहम्हि, मानसं विनिवत्तयि।
पत्वान केवलं बोधिं, धम्मचक्कं पवत्तयि॥
याव हेट्ठा अवीचितो, भवग्गा चापि उद्धतो।
एत्थन्तरे एकपरिसा, अहोसि धम्मदेसने॥
ताय परिसाय सम्बुद्धो, धम्मचक्कं पवत्तयि।
गणनाय न वत्तब्बो, पठमाभिसमयो अहु॥
ततो परम्पि देसेन्ते, मरूनञ्च समागमे।
नवुतिकोटिसहस्सानं, दुतियाभिसमयो अहु॥
पुनापरं राजपुत्तो, जयसेनो नाम खत्तियो।
आरामं रोपयित्वान, बुद्धे निय्यादयी तदा॥
तस्स यागं पकित्तेन्तो, धम्मं देसेसि चक्खुमा।
तदा कोटिसहस्सानं, ततियाभिसमयो अहु॥
सन्निपाता तयो आसुं, सोभितस्स महेसिनो।
खीणासवानं विमलानं, सन्तचित्तान तादिनं॥
उग्गतो नाम सो राजा, दानं देति नरुत्तमे।
तम्हि दाने समागञ्छुं, अरहन्ता [अरहतं (क॰)] सतकोटियो॥
पुनापरं पुरगणो [पुगगणो (क॰)], देति दानं नरुत्तमे।
तदा नवुतिकोटीनं, दुतियो आसि समागमो॥
देवलोके वसित्वान, यदा ओरोहती जिनो।
तदा असीतिकोटीनं, ततियो आसि समागमो॥
अहं तेन समयेन, सुजातो नाम ब्राह्मणो।
तदा ससावकं बुद्धं, अन्नपानेन तप्पयिं॥
सोपि मं बुद्धो ब्याकासि, सोभितो लोकनायको।
‘‘अपरिमेय्यितो कप्पे, अयं बुद्धो भविस्सति॥
‘‘पधानं पदहित्वान…पे॰… हेस्साम सम्मुखा इमं’’॥
तस्सापि वचनं सुत्वा, हट्ठो संविग्गमानसो।
तमेवत्थमनुप्पत्तिया, उग्गं धितिमकासहं॥
सुधम्मं नाम नगरं, सुधम्मो नाम खत्तियो।
सुधम्मा नाम जनिका, सोभितस्स महेसिनो॥
नववस्ससहस्सानि , अगारं अज्झ सो वसि।
कुमुदो नाळिनो पदुमो, तयो पासादमुत्तमा॥
सत्ततिंससहस्सानि, नारियो समलङ्कता।
मणिला [मखिला (अट्ठ॰), समङ्गी (सी॰), मकिला (स्या॰ कं॰)] नाम सा नारी, सीहो नामासि अत्रजो॥
निमित्ते चतुरो दिस्वा, पासादेनाभिनिक्खमि।
सत्ताहं पधानचारं, चरित्वा पुरिसुत्तमो॥
ब्रह्मुना याचितो सन्तो, सोभितो लोकनायको।
वत्ति चक्कं महावीरो, सुधम्मुय्यानमुत्तमे॥
असमो च सुनेत्तो च, अहेसुं अग्गसावका।
अनोमो नामुपट्ठाको, सोभितस्स महेसिनो॥
नकुला च सुजाता च, अहेसुं अग्गसाविका।
बुज्झमानो च सो बुद्धो, नागमूले अबुज्झथ॥
रम्मो चेव सुदत्तो च, अहेसुं अग्गुपट्ठका।
नकुला चेव चित्ता च, अहेसुं अग्गुपट्ठिका॥
अट्ठपण्णासरतनं, अच्चुग्गतो महामुनि।
ओभासेति दिसा सब्बा, सतरंसीव उग्गतो॥
यथा सुफुल्लं पवनं, नानागन्धेहि धूपितं।
तथेव तस्स पावचनं, सीलगन्धेहि धूपितं॥
यथापि सागरो नाम, दस्सनेन अतप्पियो।
तथेव तस्स पावचनं, सवणेन अतप्पियं॥
नवुतिवस्ससहस्सानि , आयु विज्जति तावदे।
तावता तिट्ठमानो सो, तारेसि जनतं बहुं॥
ओवादं अनुसिट्ठिञ्च, दत्वान सेसके जने।
हुतासनोव तापेत्वा, निब्बुतो सो ससावको॥
सो च बुद्धो असमसमो, तेपि सावका बलप्पत्ता।
सब्बं तमन्तरहितं, ननु रित्ता सब्बसङ्खारा॥
सोभितो वरसम्बुद्धो, सीहारामम्हि निब्बुतो।
धातुवित्थारिकं आसि, तेसु तेसु पदेसतोति॥
सोभितस्स भगवतो वंसो छट्ठो।