२८. बुद्धपकिण्णककण्डं
अपरिमेय्यितो कप्पे, चतुरो आसुं विनायका।
तण्हङ्करो मेधङ्करो, अथोपि सरणङ्करो।
दीपङ्करो च सम्बुद्धो, एककप्पम्हि ते जिना॥
दीपङ्करस्स अपरेन, कोण्डञ्ञो नाम नायको।
एकोव एककप्पम्हि, तारेसि जनतं बहुं॥
दीपङ्करस्स भगवतो, कोण्डञ्ञस्स च सत्थुनो।
एतेसं अन्तरा कप्पा, गणनातो असङ्खिया॥
कोण्डञ्ञस्स अपरेन, मङ्गलो नाम नायको।
तेसम्पि अन्तरा कप्पा, गणनातो असङ्खिया॥
मङ्गलो च सुमनो च, रेवतो सोभितो मुनि।
तेपि बुद्धा एककप्पे, चक्खुमन्तो पभङ्करा॥
सोभितस्स अपरेन, अनोमदस्सी महायसो।
तेसम्पि अन्तरा कप्पा, गणनातो असङ्खिया॥
अनोमदस्सी पदुमो, नारदो चापि नायको।
तेपि बुद्धा एककप्पे, तमन्तकारका मुनी॥
नारदस्स अपरेन, पदुमुत्तरो नाम नायको।
एककप्पम्हि उप्पन्नो, तारेसि जनतं बहुं॥
नारदस्स भगवतो, पदुमुत्तरस्स सत्थुनो।
तेसम्पि अन्तरा कप्पा, गणनातो असङ्खिया॥
कप्पसतसहस्सम्हि , एको आसि महामुनि।
पदुमुत्तरो लोकविदू, आहुतीनं पटिग्गहो॥
तिंसकप्पसहस्सम्हि, दुवे आसुं विनायका [आसिंसु नायका (स्या॰ क॰)]।
सुमेधो च सुजातो च, ओरतो पदुमुत्तरा॥
अट्ठारसे कप्पसते, तयो आसुं विनायका [आसिंसु नायका (स्या॰ क॰)]।
पियदस्सी अत्थदस्सी, धम्मदस्सी च नायका॥
ओरतो च सुजातस्स, सम्बुद्धा द्विपदुत्तमा।
एककप्पम्हि ते बुद्धा, लोके अप्पटिपुग्गला॥
चतुन्नवुतितो कप्पे, एको आसि महामुनि।
सिद्धत्थो सो लोकविदू, सल्लकत्तो अनुत्तरो॥
द्वेनवुते इतो कप्पे, दुवे आसुं विनायका।
तिस्सो फुस्सो च सम्बुद्धा, असमा अप्पटिपुग्गला॥
एकनवुतितो कप्पे, विपस्सी नाम नायको।
सोपि बुद्धो कारुणिको, सत्ते मोचेसि बन्धना॥
एकतिंसे इतो कप्पे, दुवे आसुं विनायका।
सिखी च वेस्सभू चेव, असमा अप्पटिपुग्गला॥
इमम्हि भद्दके कप्पे, तयो आसुं विनायका।
ककुसन्धो कोणागमनो, कस्सपो चापि नायको॥
अहमेतरहि सम्बुद्धो, मेत्तेय्यो चापि हेस्सति।
एतेपिमे पञ्च बुद्धा, धीरा लोकानुकम्पका॥
एतेसं धम्मराजूनं, अञ्ञेसंनेककोटिनं।
आचिक्खित्वान तं मग्गं, निब्बुता ते ससावकाति॥
बुद्धपकिण्णककण्डं निट्ठितं।