४. कोण्डञ्ञबुद्धवंसो
दीपङ्करस्स अपरेन, कोण्डञ्ञो नाम नायको।
अनन्ततेजो अमितयसो, अप्पमेय्यो दुरासदो॥
धरणूपमो खमनेन, सीलेन सागरूपमो।
समाधिना मेरूपमो, ञाणेन गगनूपमो॥
इन्द्रियबलबोज्झङ्ग-मग्गसच्चप्पकासनं।
पकासेसि सदा बुद्धो, हिताय सब्बपाणिनं॥
धम्मचक्कं पवत्तेन्ते, कोण्डञ्ञे लोकनायके।
कोटिसतसहस्सानं, पठमाभिसमयो अहु॥
ततो परम्पि देसेन्ते, नरमरूनं समागमे।
नवुतिकोटिसहस्सानं, दुतियाभिसमयो अहु॥
तित्थिये अभिमद्दन्तो, यदा धम्ममदेसयि।
असीतिकोटिसहस्सानं, ततियाभिसमयो अहु॥
सन्निपाता तयो आसुं, कोण्डञ्ञस्स महेसिनो।
खीणासवानं विमलानं, सन्तचित्तान तादिनं॥
कोटिसतसहस्सानं, पठमो आसि समागमो।
दुतियो कोटिसहस्सानं, ततियो नवुतिकोटिनं॥
अहं तेन समयेन, विजितावी नाम खत्तियो।
समुद्दं अन्तमन्तेन, इस्सरियं वत्तयामहं॥
कोटिसतसहस्सानं , विमलानं महेसिनं।
सह लोकग्गनाथेन, परमन्नेन तप्पयिं॥
सोपि मं बुद्धो ब्याकासि, कोण्डञ्ञो लोकनायको।
‘‘अपरिमेय्यितो कप्पे, बुद्धो लोके भविस्सति॥
‘‘पधानं पदहित्वान, कत्वा दुक्करकारिकं।
अस्सत्थमूले सम्बुद्धो, बुज्झिस्सति महायसो॥
‘‘इमस्स जनिका माता, माया नाम भविस्सति।
पिता सुद्धोदनो नाम, अयं हेस्सति गोतमो॥
‘‘कोलितो उपतिस्सो च, अग्गा हेस्सन्ति सावका।
आनन्दो नामुपट्ठाको, उपट्ठिस्सतिमं जिनं॥
‘‘खेमा उप्पलवण्णा च, अग्गा हेस्सन्ति साविका।
बोधि तस्स भगवतो, अस्सत्थोति पवुच्चति॥
‘‘चित्तो च हत्थाळवको, अग्गा हेस्सन्तुपट्ठका।
नन्दमाता च उत्तरा, अग्गा हेस्सन्तुपट्ठिका।
आयु वस्ससतं तस्स, गोतमस्स यसस्सिनो’’॥
इदं सुत्वान वचनं, असमस्स महेसिनो।
आमोदिता नरमरू, बुद्धबीजं किर अयं॥
उक्कुट्ठिसद्दा वत्तन्ति, अप्फोटेन्ति हसन्ति च।
कतञ्जली नमस्सन्ति, दससहस्सिदेवता॥
‘‘यदिमस्स लोकनाथस्स, विरज्झिस्साम सासनं।
अनागतम्हि अद्धाने, हेस्साम सम्मुखा इमं॥
‘‘यथा मनुस्सा नदिं तरन्ता, पटितित्थं विरज्झिय।
हेट्ठातित्थे गहेत्वान, उत्तरन्ति महानदिं॥
‘‘एवमेव मयं सब्बे, यदि मुञ्चामिमं जिनं।
अनागतम्हि अद्धाने, हेस्साम सम्मुखा इमं’’॥
तस्साहं वचनं सुत्वा, भिय्यो चित्तं पसादयिं।
तमेव अत्थं साधेन्तो, महारज्जं जिने अदं।
महारज्जं ददित्वान [चजित्वा (सी॰)], पब्बजिं तस्स सन्तिके॥
सुत्तन्तं विनयञ्चापि, नवङ्गं सत्थुसासनं।
सब्बं परियापुणित्वान, सोभयिं जिनसासनं॥
तत्थप्पमत्तो विहरन्तो, निसज्जट्ठानचङ्कमे।
अभिञ्ञापारमिं गन्त्वा, ब्रह्मलोकमगञ्छहं॥
नगरं रम्मवती नाम, सुनन्दो नाम खत्तियो।
सुजाता नाम जनिका, कोण्डञ्ञस्स महेसिनो॥
दसवस्ससहस्सानि, अगारं अज्झ सो वसि [अगारमज्झे च सो वसि (स्या॰)]।
सुचि सुरुचि सुभो च, तयो पासादमुत्तमा॥
तीणिसतसहस्सानि, नारियो समलङ्कता।
रुचिदेवी नाम नारी, विजितसेनो अत्रजो॥
निमित्ते चतुरो दिस्वा, रथयानेन निक्खमि।
अनूनदसमासानि, पधानं पदही जिनो॥
ब्रह्मुना याचितो सन्तो, कोण्डञ्ञो द्विपदुत्तमो।
वत्ति चक्कं महावीरो, देवानं नगरुत्तमे॥
भद्दो चेव सुभद्दो च, अहेसुं अग्गसावका।
अनुरुद्धो नामुपट्ठाको, कोण्डञ्ञस्स महेसिनो॥
तिस्सा च उपतिस्सा च, अहेसुं अग्गसाविका।
सालकल्याणिको बोधि, कोण्डञ्ञस्स महेसिनो॥
सोणो च उपसोणो च, अहेसुं अग्गुपट्ठका।
नन्दा चेव सिरीमा च, अहेसुं अग्गुपट्ठिका॥
सो अट्ठासीति हत्थानि, अच्चुग्गतो महामुनि।
सोभते उळुराजाव सूरियो मज्झन्हिके यथा॥
वस्ससतसहस्सानि , आयु विज्जति तावदे।
तावता तिट्ठमानो सो, तारेसि जनतं बहुं॥
खीणासवेहि विमलेहि, विचित्ता आसि मेदनी।
यथा गगनमुळूहि, एवं सो उपसोभथ॥
तेपि नागा अप्पमेय्या, असङ्खोभा दुरासदा।
विज्जुपातंव दस्सेत्वा, निब्बुता ते महायसा॥
सा च अतुलिया जिनस्स इद्धि, ञाणपरिभावितो च समाधि।
सब्बं तमन्तरहितं, ननु रित्ता सब्बसङ्खारा॥
कोण्डञ्ञो पवरो बुद्धो, चन्दारामम्हि निब्बुतो।
तत्थेव चेतियो चित्तो, सत्त योजनमुस्सितोति॥
कोण्डञ्ञस्स भगवतो वंसो दुतियो।