१०. पदुमबुद्धवंसो
अनोमदस्सिस्स अपरेन, सम्बुद्धो द्विपदुत्तमो।
पदुमो नाम नामेन, असमो अप्पटिपुग्गलो॥
तस्सापि असमं सीलं, समाधिपि अनन्तको।
असङ्खेय्यं ञाणवरं, विमुत्तिपि अनूपमा॥
तस्सापि अतुलतेजस्स, धम्मचक्कप्पवत्तने।
अभिसमया तयो आसुं, महातमपवाहना॥
पठमाभिसमये बुद्धो, कोटिसतमबोधयि।
दुतियाभिसमये धीरो, नवुतिकोटिमबोधयि॥
यदा च पदुमो बुद्धो, ओवदी सकमत्रजं।
तदा असीतिकोटीनं, ततियाभिसमयो अहु॥
सन्निपाता तयो आसुं, पदुमस्स महेसिनो।
कोटिसतसहस्सानं, पठमो आसि समागमो॥
कथिनत्थारसमये , उप्पन्ने कथिनचीवरे।
धम्मसेनापतित्थाय, भिक्खू सिब्बिंसु [याचिंसु (क॰)] चीवरं॥
तदा ते विमला भिक्खू, छळभिञ्ञा महिद्धिका।
तीणि सतसहस्सानि, समिंसु अपराजिता॥
पुनापरं सो नरासभो [नरवुसभो (स्या॰ कं॰)], पवने वासं उपागमि।
तदा समागमो आसि, द्विन्नं सतसहस्सिनं॥
अहं तेन समयेन, सीहो आसिं मिगाधिभू।
विवेकमनुब्रूहन्तं , पवने अद्दसं जिनं॥
वन्दित्वा सिरसा पादे, कत्वान तं पदक्खिणं।
तिक्खत्तुं अभिनादित्वा, सत्ताहं जिनमुपट्ठहं॥
सत्ताहं वरसमापत्तिया, वुट्ठहित्वा तथागतो।
मनसा चिन्तयित्वान, कोटिभिक्खू समानयि॥
तदापि सो महावीरो, तेसं मज्झे वियाकरि।
‘‘अपरिमेय्यितो कप्पे, अयं बुद्धो भविस्सति॥
‘‘पधानं पदहित्वान…पे॰… हेस्साम सम्मुखा इमं’’॥
तस्सापि वचनं सुत्वा, भिय्यो चित्तं पसादयिं।
उत्तरिं वतमधिट्ठासिं, दसपारमिपूरिया॥
चम्पकं नाम नगरं, असमो नाम खत्तियो।
असमा नाम जनिका, पदुमस्स महेसिनो॥
दसवस्ससहस्सानि , अगारं अज्झ सो वसि।
नन्दावसुयसुत्तरा , तयो पासादमुत्तमा॥
तेत्तिंस च सहस्सानि, नारियो समलङ्कता।
उत्तरा नाम सा नारी, रम्मो नामासि अत्रजो॥
निमित्ते चतुरो दिस्वा, रथयानेन निक्खमि।
अनूनअट्ठमासानि, पधानं पदही जिनो॥
ब्रह्मुना याचितो सन्तो, पदुमो लोकनायको।
वत्ति चक्कं महावीरो, धनञ्चुय्यानमुत्तमे॥
सालो च उपसालो च, अहेसुं अग्गसावका।
वरुणो नामुपट्ठाको, पदुमस्स महेसिनो॥
राधा चेव सुराधा च, अहेसुं अग्गसाविका।
बोधि तस्स भगवतो, महासोणोति वुच्चति॥
भिय्यो चेव असमो च, अहेसुं अग्गुपट्ठका।
रुची च नन्दरामा च, अहेसुं अग्गुपट्ठिका॥
अट्ठपण्णासरतनं, अच्चुग्गतो महामुनि।
पभा निद्धावती तस्स, असमा सब्बसो दिसा॥
चन्दप्पभा सूरियप्पभा, रतनग्गिमणिप्पभा।
सब्बापि ता हता होन्ति, पत्वा जिनपभुत्तमं॥
वस्ससतसहस्सानि, आयु विज्जति तावदे।
तावता तिट्ठमानो सो, तारेसि जनतं बहुं॥
परिपक्कमानसे सत्ते, बोधयित्वा असेसतो।
सेसके अनुसासित्वा, निब्बुतो सो ससावको॥
उरगोव तचं जिण्णं, वद्धपत्तंव पादपो।
जहित्वा सब्बसङ्खारे, निब्बुतो सो यथा सिखी॥
पदुमो जिनवरो सत्था, धम्मारामम्हि निब्बुतो।
धातुवित्थारिकं आसि, तेसु तेसु पदेसतोति॥
पदुमस्स भगवतो वंसो अट्ठमो।