दुतियो परिच्छेदो
२. पकिण्णककथा
कुसलानेकवीसेव , द्वादसाकुसलानि च।
छत्तिंसति विपाकानि, क्रियाचित्तानि वीसति॥
कामेसु चतुपञ्ञास, रूपेसु दस पञ्च च।
द्वादसारुप्पचित्तानि, अट्ठानुत्तरमानसा॥
कामे तेवीस पाकानि, पुञ्ञापुञ्ञानि वीसति।
एकादस क्रिया चेति, चतुपञ्ञास सब्बथा॥
पुञ्ञपाकक्रियाभेदा, तयो रूपेसु पञ्चका।
आरुप्पेति चतुक्कानि, सत्तवीस महग्गता॥
चतुमग्गफलानं तु, वसेनट्ठपि झानतो।
दसोभयम्पि मिस्सेत्वा, तालीसानुत्तरा सियुं॥
पुञ्ञपाकक्रियापापा, सन्ति कामे महग्गते।
पापं नत्थि क्रियापापा, न विज्जन्ति अनुत्तरे॥
पापाहेतुकमुत्तानि, अनवज्जानि सब्बथा।
एकूनसट्ठि चित्तानि, पुञ्ञपाकक्रियावसा॥
कम्मचित्तानि तेत्तिंस, पुञ्ञापुञ्ञानि सब्बथा।
छत्तिंस तेसं पाकानि, क्रिया वीस न चोभयं॥
चक्खुविञ्ञाणधातादि, पञ्चविञ्ञाणनामका।
पञ्चद्वारावज्जनञ्च, दुविधं सम्पटिच्छनं॥
मनोधातुत्तयं नाम, छसत्तति ततो परे।
मनोविञ्ञाणधातूति, सत्तधा धातुभेदतो॥
मनोविञ्ञाणधातुञ्च , मनोधातुत्तयं तथा।
कत्वा मनोविञ्ञाणन्ति, छ विञ्ञाणा पकित्तिता॥
आवज्जनं दस्सनञ्च, सवनं घायनं तथा।
सायनं फुसनञ्चेव, सम्पटिच्छनतीरणं॥
वोट्ठब्बनञ्च जवनं, तदारम्मणनामकं।
भवङ्गं चुति सन्धीति, चित्तं चुद्दसधा ठितं॥
आवज्जनादयो द्वे द्वे, युगा सत्त यथाक्कमं।
तीणि तीरणचित्तानि, एकं वोट्ठब्बनं मतं॥
कुसलाकुसला सब्बे, फला चावज्जनं विना।
क्रिया च पञ्चपञ्ञास, जवनन्ति पवुच्चरे॥
सन्तीरणमहापाका, तदारम्मणनामका।
एकादस पवत्तन्ति, जवनारम्मणे यतो॥
महग्गतमहापाका, उपेक्खातीरणद्वयं।
चुतिसन्धिभवङ्गानि, चित्तानेकूनवीसति॥
जवनावज्जनादीनि, वोट्ठब्बसुखतीरणा।
महग्गतमहापाका, उपेक्खातीरणाति च॥
अट्ठसट्ठि तथा द्वे च, नवट्ठ द्वे यथाक्कमं।
एकद्वितिचतुप्पञ्चकिच्चट्ठानानि निद्दिसे॥
रूपपाका महापाका, मनोधातु च तीरणं।
रूपं जनेन्ति एकूनवीसति नेतरद्वयं॥
अभिञ्ञावज्जिता सब्बे, अप्पनाजवना पन।
रूपं जनेन्ति छब्बीस, पणामेन्तिरियापथं॥
अभिञ्ञाद्वयवोट्ठब्बपरित्तजवना पन।
द्वत्तिंस रूपविञ्ञत्तिइरियापथसाधका॥
पञ्चविञ्ञाणमारुप्प-विपाका सब्बसन्धियो।
चुति खीणासवस्सेति, सोळसेते न किञ्चिपि॥
रूपं जनेन्ति चित्तानि, सत्तसत्तति सब्बथा।
अट्ठपञ्ञास चित्तानि, पणामेन्तिरियापथं॥
द्वत्तिंस चतुविञ्ञत्तिं, समुट्ठापेन्ति मानसा।
न जनेन्ति तस्सम्पेकं, यथावुत्तानि सोळस॥
सोमनस्ससहगता, परित्तजवना पन।
हसनम्पि जनेन्तीति, चतुकिच्चानि तेरस॥
सब्बम्पि पञ्चवोकारे, किच्चमेतं पकासितं।
आरुप्पे पन सब्बम्पि, रूपायत्तं न विज्जति॥
असञ्ञीनं तु सब्बानि, चित्तानेव न लब्भरे।
रूपक्खन्धोव तेसं तु, अत्तभावोति वुच्चति॥
पाणातिपातथेय्यादिवसेनोपचितं पन।
उद्धच्चरहितापुञ्ञं, चतुरापायभूमियं॥
दत्वा सन्धिं पवत्ते तु, पञ्चवोकारभूमियं।
उद्धच्चसहितञ्चापि, सत्त पाकानि पच्चति॥
दानसीलादिभेदेन, पवत्तं कुसलं पन।
कामे मानसमुक्कट्ठं, चतुक्कं तु तिहेतुकं॥
दत्वा तिहेतुकं सन्धिं, कामे सुगतियं पन।
सोळस पुञ्ञपाकानि, पवत्ते तु विपच्चति॥
तिहेतुकोमकं पुञ्ञं, उक्कट्ठञ्च द्विहेतुकं।
दत्वा द्विहेतुकं सन्धिं, कामे सुगतियं तथा॥
पवत्ते पन ञाणेन, सम्पयुत्तं विवज्जिय।
द्वादस पुञ्ञपाकानि, विपच्चति यथारहं॥
द्विहेतुकोमकं पुञ्ञं, पटिसन्धिमहेतुकं।
देति मानुसके चेव, विनिपातासुरे तथा॥
अट्ठाहेतुकपाकानि, पवत्ते तु विपच्चरे।
चत्तारिपि चतुक्कानि, पञ्चवोकारभूमियं॥
भावनामयपुञ्ञं तु, महग्गतमनुत्तरं।
यथाभूमिनियामेन, देति पाकं यथासकं॥
कटत्तारूपपाकानि, पञ्चवोकारभूमियं।
आरुप्पानुत्तरे पाकं, तथा रूपमसञ्ञिसु॥
पुञ्ञापुञ्ञानि कम्मानि, तेत्तिंसापि च यब्बथा।
सञ्जनेन्ति यथायोगं, पटिसन्धिपवत्तियं॥
इति चित्तविभागे पकिण्णककथा निट्ठिता।
दुतियो परिच्छेदो।