चुद्दसमो परिच्छेदो
१४. रासिसम्भवकथा
नवेव येवापनका, अट्ठारस च रासयो।
नवभिंसतिसम्भिन्ना, दस द्वे सविभत्तिका॥
एकद्वयतिचतुछसत्तट्ठानानवज्जके।
सत्तवीसति सत्तेको, द्वयमेको पुनेकको॥
दसेव येवापनका, एकादस च रासयो।
अट्ठवीसतिसम्भिन्ना, दसेव सविभत्तिका॥
एकद्वयतिचतुक्कछट्ठाननियता पन।
अट्ठारस च सत्तेको, एको चेकोव पापके॥
द्वे येवापनका होन्ति, रासयो च चतुब्बिधा।
तेरसेत्थ असम्भिन्ना, तयोव सविभत्तिका॥
एकद्वयतिकट्ठाना, दस द्वेको अहेतुके।
इच्चानवज्जा सावज्जा-हेतुके योगनिच्छयो॥
सत्तापि नत्थि सावज्जे, निरवज्जे पकासको।
अहेतुके च मग्गादिरासयो नत्थि चुद्दस॥
अनवज्जा तु सावज्जे, सावज्जकानवज्जके।
चित्तुप्पादम्हि नत्थेव, नत्थोभयमहेतुके॥
सावज्जा पन सावज्जे, अनवज्जानवज्जके।
गहेतब्बा तु सब्बत्थ, साधारणा पकिण्णका॥
झानपञ्चकचित्तेसु, सत्तसट्ठिसु निद्दिसे।
झानङ्गयोगभेदेन, रासिभेदं तहिं तहिं॥
चतुछक्कानवज्जेसु , ञाणपीतिकतं तथा।
चतुवीस परित्तेसु, चतुधा भेदमुद्दिसे॥
सरागवीतरागानं, अप्पमञ्ञापवत्तियं।
करुणामुदिता होन्ति, कामपुञ्ञमहाक्रिये॥
उपचारप्पनापत्ता, सुखिता सत्तगोचरा।
तस्मा न पञ्चमारुप्पे, महापाके अनुत्तरे॥
सोतापतितुपेक्खासु, परिकम्मादिसम्भवे।
झानानं तुल्यपाकत्ता, तप्पाकेसु च लब्भरे॥
विरती च सरागानं, वीतिक्कमनसम्भवा।
सम्पत्ते च समादाने, कामपुञ्ञेसु लब्भरे॥
तंतंद्वारिकदुस्सिल्य-चेतनुच्छेदकिच्चतो।
मग्गे च तुल्यपाकत्ता, फले च नियता सियुं॥
पवत्ताकारविसयभिन्ना पञ्चापि सम्भवा।
लोकिये लब्भमानापि, विसुं चेव सियुं न वा॥
पापा लब्भन्ति पापेसु, सत्त छक्केकका कमा।
सरूपयेवोभयका, नियतट्ठ छळेतरे॥
साधारणा च सब्बत्थ, यथावुत्ता पकिण्णका।
तत्थ चेकग्गता नत्थि, इन्द्रियादीसु कङ्खिते॥
छन्दाधिमोक्खा येवापि, वीसेकादसवज्जिते।
उद्धच्चमेकादससु, मज्झत्तमनवज्जके॥
सब्बत्थ मनसिकारो, तिद्वेकद्वितिकापरे।
अट्ठट्ठवीसचतूसु, पञ्चद्वीसु यथाक्कमं॥
समुदायवसेनेत्थ, उद्धच्चविरतित्तयं।
सविभत्तिकमञ्ञत्थ, अविभत्तिकमेव तं॥
चित्तुप्पादेसु तेनेतं, विभत्तिअविभत्तिकं।
इति साधु सल्लक्खेय्य, सम्भवासम्भवं बुधोति॥
इति चेतसिकविभागे रासिसम्भवकथा निट्ठिता।
चुद्दसमो परिच्छेदो।