दसमो परिच्छेदो
१०. पभेदकथा
एकुप्पादा निरोधा च, एकालम्बणवत्थुका।
सहगता सहजाता, संसट्ठा सहवुत्तिनो॥
तेपञ्ञास पनिच्चेते, सम्पयुत्ता यथारहं।
चित्तचेतसिका धम्मा, अट्ठारसविधापि च॥
एकधा छब्बिधा चेव, चतुधा सत्तधा ठिता।
चित्तुप्पादपभेदेन, भिन्दितब्बा विभाविना॥
अट्ठ धम्माविनिब्भोगा, भिन्नासीति नवुत्तरा।
सत्तसतं दस द्वे च, सब्बे होन्ति समिस्सिता॥
सन्तीरणमनोधातु, सितवोट्ठब्बना तथा।
अपुञ्ञा कामपुञ्ञा च, महापाका महाक्रिया॥
पठमज्झानधम्मा च, लोकुत्तरमहग्गता।
पञ्चपञ्ञास सब्बेपि, वितक्का होन्ति भेदिता॥
विचारापि च तेयेव, दुतियज्झाननामका।
एकादसापरे चेति, छसट्ठि परिदीपिता॥
अपुञ्ञा कामपुञ्ञा च, महापाका महाक्रिया।
चतुक्का चेव चत्तारो, सितञ्च सुखतीरणं॥
पठमादितिकज्झाना , लोकुत्तरमहग्गता।
इच्चेवमेकपञ्ञास, पीतियो होन्ति सब्बथा॥
सितवोट्ठब्बना द्वे च, सावज्जा चानवज्जका।
भिन्नमेवं तु वीरियं, तेसत्ततिविधं भवे॥
सावज्जा चानवज्जा च, मोमूहद्वयवज्जिता।
छन्दा भवन्ति सब्बेपि, सट्ठिभेदा नवुत्तरा॥
सन्तीरणमनोधातु, सितवोट्ठब्बना तथा।
सावज्जा चानवज्जा च, विचिकिच्छाविवज्जिता॥
अधिमोक्खा पनिच्चेवं, अट्ठसत्तति भेदिता।
तिसतं नवुति द्वे च, भिन्ना होन्ति पकिण्णका॥
एकूनसट्ठि वा होन्ति, सद्धादेकूनवीसति।
सहस्सञ्च सतञ्चेकं, एकवीसञ्च सब्बथा॥
ञाणेन सम्पयुत्ता च, कामे द्वादसधापरे।
पञ्चतिंसाति पञ्ञापि, सत्ततालीसधा कथा॥
रूपज्झानचतुक्का च, कामपुञ्ञा महाक्रिया।
अट्ठवीसप्पमञ्ञेवं, छप्पञ्ञास भवन्ति च॥
अनुत्तरा कामपुञ्ञा, तिस्सो विरतियो पन।
होन्ति सोळसधा भिन्ना, अट्ठतालीस पिण्डिता॥
पञ्चवीसानवज्जेवं, सम्पयुत्ता चतुब्बिधा।
सहस्सद्विसतञ्चेव, द्वि च सत्तति भेदतो॥
चत्तारो पापसामञ्ञा, भिन्ना द्वादसधा पन।
अट्ठतालीसधा होन्ति, ते सब्बे परिपिण्डिता॥
लोभो पनट्ठधा भिन्नो, थिनमिद्धञ्च पञ्चधा।
चतुधा दिट्ठिमानो च, चतुधा दिट्ठियो विसुं॥
द्विधा दोसादिचत्तारो, विचिकिच्छेकधाति च।
सावज्जा सत्तधा वुत्ता, भिन्नासीति तिकुत्तरा॥
इच्चट्ठारसधा वुत्ता, तेपञ्ञासापि भेदतो।
द्विसहस्सञ्च तु सतं, भवन्तेकूनसट्ठि च॥
वितक्कविचारपीतिसुखोपेक्खासु पञ्चसु।
भिन्दित्वा झानभेदेन, गहेतब्बा अनुत्तरा॥
अञ्ञत्र पन सब्बत्थ, नत्थि भेदप्पयोजनं।
अट्ठेव कस्मा गय्हन्ति, अभेदेनाति लक्खये॥
पठमादिचतुज्झाना, लोकुत्तरमहग्गता।
इच्चेकमेकदसधा, चतुतालीस पिण्डिता॥
तेवीस पञ्चमा चेति, सत्तसट्ठि समिस्सिता।
अप्पना तत्थ सब्बापि, अट्ठपञ्ञास दीपिता॥
पञ्चतिंसेव सङ्खेपा, लोकुत्तरमहग्गता।
अप्पना तत्थ सब्बापि, छब्बीसति पकासिता॥
इद्धिविधं दिब्बसोतं, चेतोपरियनामका।
पुब्बेनिवासानुस्सति, दिब्बचक्खूति पञ्चधा॥
अभिञ्ञाञाणमीरेन्ति, रूपावचरपञ्चमा।
कुसलञ्च क्रिया चेति, भेदितं दुविधम्पि च॥
तं द्वयम्पि सम्मिस्सेत्वा, पञ्चाभिञ्ञा च लोकिया।
आसवक्खयञाणञ्च, छळभिञ्ञा पवुच्चरे॥
लोकिया च दसाभिञ्ञा, भिन्दित्वा कुसलक्रिया।
सत्तसत्तति झानानि, अट्ठसट्ठि पनप्पना॥
सत्तसत्तति चित्तानि, चतुपञ्ञास सब्बथा।
पचितानि च चित्तानि, एकतिंससतं सियुन्ति॥
इति चेतसिकविभागे पभेदकथा निट्ठिता।
दसमो परिच्छेदो।